འོད་ཟེར་ཅན་གྱི་སྒྲུབ་ཐབས།
རྒྱ་གར་སྐད་དུ། མ་རཱི་ཙྱཻ་སཱ་དྷ་ནཾ། བོད་སྐད་དུ། འོད་ཟེར་ཅན་གྱི་སྒྲུབ་ཐབས། སྔར་བཤད་པའི་ཆོ་གས་ཡི་གེ་པཾ་ལས་བྱུང་བའི་སྣ་ཚོགས་པདྨའི་སྟེང་དུ་ཟླ་བ་ལ་ཡི་གེ་མཾ་ལས་སྐྱེས་པའི་འོད་ཟེར་ཅན་དཀར་མོ་སྟེ། ཞལ་ལྔ། ཕྱག་བཅུ། ཞབས་བཞི་པར་སྐད་ཅིག་གིས་བདག་ཉིད་བསམ་པར་བྱ་བའོ། །དེ་ལས་རྩ་བའི་ཞལ་ནི་དཀར་མོ། །གཡས་པ་ནི་མཐིང་ནག་གོ །གཡོན་པ་ནི་ཕག་གི་ཞལ་དམར་མོ། །ཞལ་ཕྱི་མ་ནི་ལྗང་གུའོ། །དབུའི་སྟེང་གི་ཞལ་ནི་སེར་མོ་སྟེ། རིན་པོ་ཆེ་སྣ་ཚོགས་ཀྱིས་མཛེས་པ། ཟུར་ཕུད་གསུམ་གྱིས་བརྒྱན་ཅིང་རལ་པའི་ཅོད་པན་དང་ལྡན་པའོ། །གཡས་པའི་ཕྱག་ལྔ་པོ་རྣམས་ན་ནི་ཉི་མའི་དཀྱིལ་འཁོར་དང༌། རྡོ་རྗེ་སྔོན་པོ་དང༌། མདའ་དང་ལྕགས་ཀྱུ་དང༌། ཁབ་བསྣམས་པའོ། །གཡོན་པའི་ཕྱོགས་ལྔ་པོ་རྣམས་ན་ནི་ཟླ་བའི་དཀྱིལ་འཁོར་དང་གཞུ་དང་ཤིང་མྱ་ངན་མེད་ལོ་འདབ་དང་བཅས་པ་དང༌། སྡིགས་མཛུབ་དང་བཅས་པའི་ཞགས་པ་དང་སྐུད་པ་བསྣམས་པའོ། །རྣམ་པ་སྣ་ཚོགས་པའི་རྒྱན་དང་ལྡན་པའི་གཞོན་ནུ་མ་ལང་ཚོ་བདོ་བར་གྱུར་པ་སྟོད་ཤག་དཀར་པོ་བསྣམས་
ཤིང༌། ཕག་བདུན་གྱི་ཤིང་རྟ་ལ་གནས་ནས་མཆོད་རྟེན་གྱི་ནང་ན་བཞུགས་པ། ཁྱབ་འཇུག་དང༌། དབང་པོ་དང༌། བདེ་བྱེད་དང༌། ཚངས་པ་རྣམས་ཞབས་བཞིས་མནན་པའོ། །ཆུ་སྲིན་མ་ལ་བཅིབས་ནས་ཤིང་རྟ་དེའི་ནང་མདུན་ན་གནས་བའི་བཅོམ་ལྡན་འདས་མ་གཞན་ནི་ནག་མོ་ཕག་གི་ཞལ་རྡོ་རྗེ་དང༌། སྡིག་མཛུབ་ཕྱག་གཡས་པ་དང་གཡོན་པ་གཉིས་ཀྱིས་བསྣམས་པར་མཛད་པའོ། །གཡས་ཀྱི་ཕྱོགས་པ་བཅོམ་ལྡན་འདས་མ་གཞན་ནི་ཕག་གི་ཞལ་ལ་ཕྱག་བཞི་མ་སྟེ། ལྕགས་ཀྱུ་དང་ཁབ་ནི་གཡས་པ་གཉིས་ཀྱིས་བསྣམས་པའོ། །སྡིགས་མཛུབ་དང་བཅས་པས་ཞགས་པ་དང་སྐུད་པ་ནི་ཕྱག་གཡོན་པ་གཉིས་ཀྱིས་བསྣམས་ཤིང་ལྷ་རྫས་ཀྱི་རྒྱན་དང་ལྡན་པ་ཡང་ཡིན་ནོ། །གཡོན་ཕྱོགས་ཀྱི་རྗེ་བཙུན་མ་གཞན་ནི་ཕག་གི་ཞལ་དམར་མོ་དང༌། རྣ་བའི་བར་དུ་བཀང་བའི་མདའ་གཞུ་དང༌། གཡས་པ་དང་གཡོན་པའི་ཕྱག་ལྷག་མ་དག་གིས་ནི་རྡོ་རྗེ་དང་ཤིང་མྱ་ངན་མེད་པ་ལོ་མ་དང་ལྡན་བ་བསྣམས་པ། སྣ་ཚོགས་པའི་རྒྱན་དང་ལྡན་པ་ཡང་ཡིན་ནོ། །ཤིང་རྟ་འདྲེན་པའི་ཕག་རྣམས་ཀྱི་འོག་ན་ཡང་ཉི་མ་ལ་སོགས་པའི་གཟའ་དགུས་ནད་དང་ཉེ་བར་འཚེ་བའི་གདུག་པ་རྣམ་པ་སྣ་ཚོགས་པ་རྣམས་ཀྱང་མིའི་གཟུགས་སུ་འོག་ཏུ་མནན་པར་བསམ་པར་བྱ་བའོ། །དེ་ནས་སྙིང་གའི་
ཟླ་བ་ལ་གནས་པའི་ས་བོན་མཾ་གྱི་འོད་ཟེར་གྱིས་དེ་བཞིན་གཤེགས་པ་རྣམས་སྤྱན་དྲངས་ཤིང་དབང་མནོས་པ་དང༌། རྣམ་པར་སྣང་མཛད་ཀྱིས་རྒྱས་བཏབ་པར་འགྱུར་བ་ཡིན་ནོ། །དེ་ནས་སྙིང་གའི་ས་བོན་ཉིད་ལས་ཕྲེང་བའི་རྣམ་པ་ཉིད་སྔགས་ཀྱི་ཡི་གེ་ངེས་པར་སྤྲོས་ལ། ཁ་ནས་ལྟེ་བར་ལྟེ་བ་ནས་ཁར་ཁ་ནས་ཕྱིར་ཡང་ལྟེ་བར་ཞེས་བྱ་བ་ལ་སོགས་པས་འཁོར་ལོ་འཁོར་བའི་རིམ་པས་སྔགས་བགྲད་བར་བྱ་བའོ། །དེ་ལ་སྔགས་ནི་འདི་ཡིན་ཏེ། ཨོཾ་མ་རཱི་ཙྱཻ་མཱཾ་ཧཱུཾ་ཧཱུཾ་ཕཊ་ཕཊ་སྭཱ་ཧཱ། ཟས་ལ་སོགས་པ་རྣམ་པ་ཐམས་ཅད་ལ་ཡང་རང་གི་ས་བོན་གྱིས་བྱིན་གྱིས་བརླབས་པ་རྗེས་སུ་བསྒྲུབ་པར་བྱ་བའོ། སྐྱོན་ཡི་གེ་བརྒྱ་པའི་སྔགས་ཉེ་བར་བརྗོད་ལ་ཇི་ལྟར་བདེ་བར་རྒྱུ་བར་བྱ་བ་ཡིན་ནོ། །རྟོག་པ་ལས་གསུངས་པའི་འོད་ཟེར་ཅན་དཀར་མོའི་སྒྲུབ་ཐབས་སོ།། །།བྱང་ཆུབ་སེམས་དཔའ་དཱ་ན་ཤྲཱིའི་ཞལ་སྔ་ནས་དགེ་སློང་ཚུལ་ཁྲིམས་རྒྱལ་མཚན་གྱིས་བསྒྱུར་བའོ། །