རལ་གཅིག་མའི་སྒྲུབ་ཐབས།
རྒྱ་གར་སྐད་དུ། ཨེ་ཀ་ཛ་ཊཱི་སཱ་དྷ་ནཾ། བོད་སྐད་དུ། རལ་གཅིག་མའི་སྒྲུབ་ཐབས། རལ་གཅིག་མ་ལ་ཕྱག་འཚལ་ལོ། །དང་པོར་རེ་ཞིག་སྔགས་པས་ཡིད་དང་རྗེས་སུ་མཐུན་པའི་བསམ་གཏན་གྱི་ཁང་པར་བདེ་བའི་སྟན་ལ་ཉེ་བར་གནས་ལ། བླ་མ་དང་སངས་རྒྱས་དང་བྱང་ཆུབ་སེམས་དཔའ་རྣམས་ལ་ཕྱིའི་མཆོད་པ་དག་གིས་ཡང་དག་བར་མཆོད་དེ། གསུམ་ལ་སྐྱབས་སུ་འགྲོ་བ་དང༌། སྡིག་པ་བཤགས་པ་ལ་སོགས་པ་ཡང་ཚུལ་བཞིན་དུ་བྱ་ཞིང་ཤིན་ཏུ་བརྟན་པར་བྱང་ཆུབ་ཏུ་སེམས་བསྐྱེད་ལ། ཨོཾ་ཞེས་བྱ་བའི་ཡི་གེ་བརྗོད་པས་ཆོས་ཐམས་ཅད་སྟོང་པ་ཉིད་མངོན་སུམ་དུ་བྱས་ཏེ། ཡང་ཡི་གེ་ཨཾ་བརྗོད་ལ་དེ་ཡོངས་སུ་གྱུར་པ་ལས་སྣ་ཚོགས་པདྨ་རྣམ་པར་བསྒོམ་པར་བྱ་བའོ། །དེའི་དབུས་སུ་ཡི་གེ་ཏྲཱཾ་ལས་བྱུང་བའི་པདྨའི་སྣོད་ཤེལ་འཚེར་བ་དང་མཚུངས་པའི་འོད་ཟེར་ཅན་ནོ། །དེའི་དབུས་སུ་འོད་ཟེར་སྤྲོས་པས་འཇིག་རྟེན་གྱི་ཁམས་མཐའ་ཡས་པ་ཀུན་དུ་སྣང་བར་བྱེད་པའི་
ཡི་གེ་ཧཱུཾ་ཨིནྡྲ་ནཱི་ལའི་འོད་དང་མཚུངས་པ་རྣམ་པར་བསམ་མོ། །ཡོངས་སུ་གྱུར་པ་ལས། རིན་ཆེན་ཨིནྡྲཱ་ནི་ལ་ཡི། །འོད་ཀྱིས་འཇིག་རྟེན་གསུམ་ཁྱབ་མ། །འཇིགས་བྱེད་ཆེན་མོ་ཕྱག་བཞི་མ། །སྤྱན་གསུམ་འཇིགས་སུ་རུང་བར་དམར། །སྟག་གི་པགས་པའི་ཤམ་ཐབས་བསྣམས། །པདྨའི་སྣོད་ཀྱིས་རྒྱན་དུ་བྱས། །མི་རུས་དོ་ཤལ་དང་ལྡན་ཞིང༌། །གཏུམ་པ་ཡི་ནི་གཟུགས་ལྡན་པའི། །ལོ་ནི་བརྒྱད་གཉིས་མར་གྱུར་པ། །འོ་རྒྱས་ནུ་མ་འཕྱང་བ་དང༌། །ཤིན་ཏུ་སེར་བའི་རལ་གཅིག་མ། །ཁྲོ་བོའི་ཀླུ་ནི་རྒྱན་དང་ལྡན། །ཞལ་གྱི་མཆེ་བ་ཅུང་ཟད་གཙིགས། ལྗགས་འདྲིལ་བས་ནི་འཇིགས་པར་མཛད། །གྲོད་འཇོལ་བྱམས་པ་ཆེན་པོ་དང༌། །ཐུགས་རྗེས་གདེངས་པའི་ཡིད་ལྡན་པ། །དོ་ཤལ་རྐང་པ་དཔུང་བའི་རྒྱན་དང་ནི། །དྲིལ་བུ་གཡེར་ཁ་རྐེད་པའི་རྒྱན་སོགས་དང༌། །ལྡན་དང་ཧཱུཾ་གི་ཡི་གེ་གཏུམ་པོ་ཡིས། །བདུད་དང་རྩ་མུ་ཆེན་པོ་ལས་རྒྱལ་མཛད། །གཡོན་པའི་ཕྱག་གིས་པདྨའི་སྣོད་བསྣམས་ཤིང༌། །གཡས་པའི་ཕྱག་གིས་གསོར་མཛད་པས། །བདུད་རྣམས་ཀུན་ནས་སྐྲག་པར་མཛད་པ་ཡི། །རྡོ་རྗེ་དང་ལྡན་གྲི་གུག་བསྣམས་པ་སྟེ། །ཡང་ནི་གཡོན་པར་རྩ་བ་དང་བཅས་པའི། །ཨུཏྤལ་གཟུགས་ནི་དྲི་མ་མེད་པའོ། །གཡས་པའི་ཕྱག་ན་རལ་གྲི་བསྣམས་པ་ནི། །བལྟ་བྱ་དེ་དག་ཡོངས་སུ་གྱུར་པ་ལས། །སྤྲོ་བྱ་སྐར་མའི་ཕྲེང་བར་དགའ་བ་ཡི། །བགྲང་བའི་ཕྲེང་བ་བསྒོམ་པར་བྱ་བ་ཡིན། །ཐོད་པ་ཁྲག་གིས་གང་བར་གྱུར་པ་ཡི། །དབུས་སུ་གཡོན་བསྐུམ་པས་ནི་ལེགས་པར་བཞུགས། དུས་ཀྱི་མཐའ་ཡི་མེ་ལྟར་འོད་ཟེར་ནི། །འབར་བའི་ནང་དུ་འཇུག་པར་གྱུར་པའི་སྐུར། །བསྒོམ་པར་བྱ་བའི་ལྷ་མོ་རལ་གཅིག་མ། །སྤྲོ་བྱ་དེ་ནས་གསང་སྔགས་བཟླས་པ་བྱ། །སྔགས་ཀྱང་ནུས་པ་བསམ་གྱིས་མི་ཁྱབ་སྟེ། །ཡི་གེ་ཕྱེད་དང་བཅས་པའི་བཞི་པོ་རྣམས། །འཇིག་རྟེན་བསྐྱོད་དང་དབང་བྱ་གཞུག་བྱ་དང༌། །སྐྲག་པར་བྱེད་པ་སངས་རྒྱས་རྣམས་ཀྱིས་གསུངས། །ཞབས་གཉིས་བརྐྱང་བསྐུམ་མཛད་པའི་རྩེ་ཡིས་ནི། །བསྒྲུབ་བྱའི་མགོ་ནས་ཞབས་གཉིས་དག་གིས་གནོན། །པདྨའི་སྣོད་ནི་རྣམ་བསྒོམ་དེ་ལྟར་ནི། །རྣལ་འབྱོར་པ་ཡིས་སྤྲོ་བས་སྔགས་བཟླས་
སོ། །སྔགས་ཀྱང་ལྷ་མོ་ཡང་དག་སད་བྱེད་པའི། །གྲུབ་པ་ཉིད་ནི་བརྗོད་པར་བྱ་བ་ལས། །དང་པོ་ས་མཐའ་ཡིན་ཏེ་མེ་ཡི་ཤིང༌། །རྟ་ལ་ཞོན་པ་དབྱངས་ཡིག་ཨི་ཡིས་བརྒྱན། །ཟླ་ཕྱེད་ཐིག་ལེ་ཕྱེད་པས་མགོ་བོ་ནི། །བརྒྱན་པར་གྱུར་བ་བཏུ་བར་བྱ་བ་ཡིན། །གཉིས་པ་ཡང་ནི་དེ་བཞིན་འོན་ཀྱང་ནི། །ཎ་མཐའི་གཟུགས་ལ་གནོན་པར་བྱ་བ་ཡིན། །ས་མཐའ་ཉིད་ནི་གསུམ་པ་ཡང་ཡིན་ཏེ། །དབྱངས་ཡིག་དྲུག་པ་དང་ནི་ལྡན་པ་ལ། །མགོ་བོ་སྔར་བཞིན་དུ་ནི་མཛེས་པའོ། །བཞི་བ་ཕ་སྟེ་ཊ་ཡི་མཐའ་ཅན་ཡིན། །སྔགས་འདི་དག་ནི་སྔགས་པས་བཟླས་བྱ་སྟེ། །ཧྲཱི་ཏྭཱཾ་ཧཱུཾ་ཕཊ་བྱ་བ་འདྲ་བའོ། །འཕགས་མ་རལ་གཅིག་མའི་སྒྲུབ་ཐབས་རྫོགས་སོ།། །།པཎྜི་ཏ་ཆེན་པོ་དཱ་དང་ཨ་བྷ་ཡ་ལས་དགེ་སློང་ཚུལ་ཁྲིམས་རྒྱལ་མཚན་གྱིས་བསྒྱུར་བའོ། །