སྟོང་ཆེན་པོ་རབ་ཏུ་འཇོམས་པའི་སྒྲུབ་ཐབས།

---

^{[མ་དཔེ་གཟིགས་ན་འདིར་གནོན།]}

རྒྱ་གར་སྐད་དུ། མཧཱ་ས་ཧ་སྲ་པྲ་མརད་ནཱི་སཱ་དྷ་ནཾ། བོད་སྐད་དུ། སྟོང་ཆེན་པོ་རབ་ཏུ་འཇོམས་པའི་སྒྲུབ་ཐབས། སྔར་བཤད་པའི་ཆོ་གའི་ཚུལ་གྱིས་སྣ་ཚོགས་པདྨ་དང་ཟླ་བ་ལ་ཡི་གེ་ཙུཾ་ལས་ངེས་པར་བྱུང་བའི་སྟོང་ཆེན་པོ་རབ་ཏུ་འཇོམས་པར་བདག་ཉིད་བསྒོམ་པར་བྱ་སྟེ། སྐུ་མདོག་དཀར་མོ་ཞལ་གཅིག་མ་ཕྱག་དྲུག་མ། གཡས་པའི་ཕྱག་གསུམ་གྱིས་ནི་རལ་གྲི་དང་མདའ་བསྣམས་ཤིང་མཆོག་སྦྱིན་པའི་ཕྱག་རྒྱ་མཛད་པའོ། །གཡོན་པའི་ཕྱག་གསུམ་གྱིས་ནི་གཞུ་དང༌། ཞགས་པ་དང་མདུང་བསྣམས་པའོ། །རྣམ་པ་སྣ་ཚོགས་པའི་རྒྱན་རྣམས་དང་ལྡན་པ་གཟུགས་དང་ལང་ཚོ་དང་སྒེག་པ་དང་ལྡན་པར་གྱུར་པ། དབུ་རྒྱན་ལ་རྣམ་པར་སྣང་མཛད་དང་ལྡན་པ་ཟླ་བ་དང་པདྨའི་གདན་དང་ལྡན་ཞིང་ཟླ་བའི་འོད་དང་ལྡན་པའོ། །འདི་ནི་སྟོང་ཆེན་མོ་རབ་ཏུ་འཇོམས་པའི་སྒྲུབ་ཐབས་སོ།། །།ཨ་བྷ་ཡ་ལས་ཚུལ་ཁྲིམས་རྒྱལ་མཚན་གྱིས་བསྒྱུར་བའོ།།