སྒྲོལ་མ་རབ་ཏུ་དངས་བའི་སྒྲུབ་ཐབས།
རྒྱ་གར་སྐད་དུ། པྲ་སནྣ་ཏཱ་རཱ་ཡཱཿསཱ་དྷ་ནཾ། བོད་སྐད་དུ། སྒྲོལ་མ་རབ་ཏུ་དང་བའི་སྒྲུབ་ཐབས། སྒྲོལ་མ་ལ་ཕྱག་འཚལ་ལོ། །སྔར་གྱི་རིམ་པའི་སྦྱོར་བས་བྷ་གའི་དབུས་སུ་ཟླ་བའི་དཀྱིལ་འཁོར་ལ་ལྷ་མོ་སྒྲོལ་མ་རྫུ་འཕྲུལ་ཅན་གངས་ཀྱི་མདོག་སྟེ་འཇིགས་ཆེན་མ། སྤྱན་གསུམ་མ་སྟེ་ཞལ་བརྒྱད་མ། བཅུ་དྲུག་ཕྱག་ན་རྒྱན་དུ་འགྱུར། སྐྲ་ཁམས་སེར་གྱེན་དུ་འཁྱིལ་བ་འཛག་པ་དང་ལྡན་པའི་མི་མགོ་བརྒྱ་ཕྱེད་ཀྱི་ཕྲེང་བས་དོ་ཤལ་དུ་བརྒྱན་བ། སྐྱེ་དགུ་རྣམས་ཀྱི་སྐྱབས་མཛད་པའི་སྟོབས་ཆེན་མོ་དང་ལྡན་པ། གཡས་བསྐུམ་པའི་ཞབས་ཀྱིས་གནས་པ་དང་ལྡན་པ་བཞད་པ་དང་ལྡན་ཞིང་གཞོན་ནུ་མ་ལང་ཚོལ་བབས་པ། རྣམ་པར་བཀྲ་བའི་ན་བཟའ་གསོལ་བར་གྱུར་པ་ཞལ་གྱི་གཙོ་བོ་ནི་སེར་མོའོ། །གཡས་
ཀྱི་གཉིས་པ་ནི་མཐིང་ནག་གོ །གསུམ་པ་ནི་ལྗང་གུའོ། །བཞི་པ་ནི་ནམ་མཁའ་ལྟར་སྔོ་བའོ། །གཡོན་པ་ནི་ཀུནད་ལྟར་དཀར་བའོ། །གཉིས་པ་ནི་དམར་བའོ། །གསུམ་པ་ནི་ནམ་མཁའ་ལྟར་སྔོ་བའོ། །སྟེང་གི་ཞལ་ནི་དུ་བའི་མདོག་ལྟ་བུ་སྟེ་ཤིན་ཏུ་འཇིགས་སུ་རུང་བའོ། །ཞལ་དབུས་མ་ནི་རྣམ་པར་བསྒྱུར་ཞིང་ཚེམས་གཙིགས་པའོ། །གཡས་པའི་ཕྱག་རྣམས་ཀྱིས་ནི་རལ་གྲི་དང༌། ཨུཏྤལ་དང༌། མདའ་དང་རྡོ་རྗེ་དང་ལྕགས་ཀྱུ་དང་དབྱུག་ཏོ་དང་གྲི་གུག་དང་མི་འཇིགས་པའི་ཕྱག་རྒྱ། གཡོན་པའི་ཕྱག་རྣམས་ཀྱིས་ནི་ཞགས་པ་དང་བཅས་པའི་སྡིགས་མཛུབ་དང་ཐོད་པ་དང་གཞུ་དང༌། ཁ་ཊྭཱཾ་ག་དང་རྡོ་རྗེ་དང་ཞགས་པ་དང༌། ཚངས་པའི་མགོ་བོ་དང་རིན་པོ་ཆེའི་བུམ་པ་བསྣམས་པའོ། །སྣ་ཚོགས་པདྨ་དང་ཟླ་བ་ལ་བཞུགས་ཤིང་ཉི་མའི་འོད་ཟེར་གྱིས་རྣམ་པར་བརྒྱན་པ། གཡོན་པའི་ཞབས་ཀྱིས་ནི་དབང་པོ་སྟེ་ཞབས་གཡས་པས་ནི་ཉེ་བའི་དབང་པོའོ། །ཞབས་གཉིས་ཀྱི་བར་ན་ནི་དྲག་པོ་དང་ཚངས་པ་ཡང་མནན་ནས་བཞུགས་པའོ། །སྒྲིབ་པ་ཐམས་ཅད་རྣམ་པར་འཇོམས་པར་མཛད་པ་རྣལ་འབྱོར་པས་བསྒོམ་པར་བྱ་སྟེ། སླ་བར་དངོས་གྲུབ་ཐོབ་པར་འགྱུར་རོ། །བཟླས་པའི་སྔགས་ནི། ཨོཾ་པྲ་སྰྣྣ་ཏཱ་རེ་ཟ་མྲྀ་ཏ་མུ་ཁི་ཨ་མྲྀ་ཏ་ལོ་ཙ་ནེ་སརྦ་ARTHA་སཱ་དྷ་ནི་སརྦ་སྟྭ་བ་ཤྱཾ་ཀ་ར་ཧཱུཾ་ཕཊ་ཧཱུཾ་སྭཱ་ཧཱ། ཞེས་བྱ་བའོ། །དོན་རྣམས་ཐམས་ཅད་སྒྲུབ་པར་མཛད་མ་འཕགས་མ་སྒྲོལ་མ་རབ་ཏུ་དང་བའི་སྒྲུབ་ཐབས་རྫོགས་སོ།། །།ཨ་བྷ་ཡའི་ཞལ་སྔ་ནས་ཚུལ་ཁྲིམས་རྒྱལ་མཚན་གྱིས་བསྒྱུར་བའོ། །