གཏུམ་པོ་ཆེན་པོའི་སྒྲུབ་ཐབས།
རྒྱ་གར་སྐད་དུ། ཙཎྜ་མ་ཧཱ་རོ་ཥ་ཎ་སཱ་དྷ་ནཾ། བོད་སྐད་དུ། གཏུམ་པོ་ཆེན་པོའི་སྒྲུབ་ཐབས། སྔར་བཤད་པའི་ཚུལ་གྱིས་སྟོང་པ་ཉིད་བསྒོམས་པའི་རྗེས་ཐོགས་ལ་པདྨ་དཀར་པོའི་སྟེང་དུ་ཉི་མ་ལ་ཡི་གེ་ཧཱུཾ་ནག་པོ་ཡོངས་སུ་གྱུར་པ་ལས་མེ་ཏོག་ཨ་ཏ་སི་དང་མཚུངས་པར་གྱུར་བའི་བཅོམ་ལྡན་འདས་དཔལ་དང་ལྡན་པའི་ཁྲོ་བོ་ཆེན་པོ་གཏུམ་པོའོ། །མཚན་
གཞན་ནི་མི་གཡོ་བ་སྟེ། ཞལ་གཅིག་ཕྱག་གཉིས་པ། སྤྱན་གཡོ་བར་མཛད་པ་མཆེ་བ་རྣམ་པར་གཙིགས་པའི་ཞལ་ཆེས་འཇིགས་པར་གྱུར་པ། མན་མགལ་བསྡམས་པའི་ཚེམས་གཙིགས་པ་རིན་པོ་ཆེའི་དབུ་རྒྱན་དང་ལྡན་པ། དབུ་ལ་མགོ་བོའི་ཕྲེང་བ་དང་ལྡན་པ། སྤྱན་གཉིས་ཤིན་ཏུ་དམར་བ། གཡས་པས་ནི་རལ་གྲི་བསྣམས་ཤིང་ཕྱག་གཡོན་པས་སྡིག་མཛུབ་དང་ཞགས་པ་ཐུགས་ཀར་རོ། །སྦྲུལ་དཀར་པོ་གཤལ་དག་བྱེད་དུ་མཛད་པ། སྟག་གི་པགས་པའི་ཤམ་ཐབས་དང་ལྡན་པ། རིན་པོ་ཆེ་སྣ་ཚོགས་ཀྱིས་རྣམ་པར་སྤྲས་པའི་རྒྱན་མངའ་བ། །ཞབས་གཡས་པ་ས་ལ་བཙུགས་ཤིང་གཡོན་པ་ཅུང་ཟད་སྨད་པ། ཉི་མའི་འོད་ཟེར་གྱི་ཕྲེང་བ་དང་ལྡན་པར་བདག་ཉིད་རྣམ་པར་བསམ་པར་བྱ་ཞིང༌། དམ་ཚིག་སེམས་དཔའ་དང་ཡེ་ཤེས་སེམས་དཔའ་བསྒོམ་པ་སྔོན་དུ་འགྲོ་བས་མི་བསྐྱོད་པ་ཅོད་པན་གྱི་མཚམས་སུ་བསྒོམ་པར་བྱ་བའོ། །དེའི་རྗེས་ལ་བཟླས་པ་ནི། ཨོཾ་ཙཎྜ་མ་ཧཱ་རོ་ཥ་ཎ་ཧཱུཾ་ཕཊ། ཁྲོ་བོ་ཆེན་པོ་གཏུམ་པོའི་སྒྲུབ་ཐབས་སོ། །ཨ་བྷ་ཡ་ལས་ཚུལ་ཁྲིམས་རྒྱལ་མཚན་གྱིས་བསྒྱུར་བའོ། །