ཛམྦྷལའི་སྒྲུབ་ཐབས།
རྒྱ་གར་སྐད་དུ། ཛམྦྷ་ལ་སཱ་དྷ་ནཾ། བོད་སྐད་དུ། ཛམྦྷ་ལའི་སྒྲུབ་ཐབས། སྟོང་པ་ཉིད་བསྒོམས་པའི་རྗེས་ཐོགས་ལ་ཟླ་བའི་དཀྱིལ་འཁོར་ཅུང་ཟད་དམར་བ། གྲུ་གསུམ་དང་པདྨ་འདབ་མ་བརྒྱད་པའི་རྫིང་བུའོ། །དེའི་དབུས་སུ་ཡི་གེ་བཾ་ལས་ནོར་རྒྱུན་མ་སྟེ་ཁ་དོག་སེར་མོ་འབྲས་ཀྱི་གྲུངས་པའི་སྙེ་མ་མཛེས་པ་བསྣམས་པ་དང༌།
ཕྱག་གིས་མཆོག་སྦྱིན་པར་མཛད་པ། རྒྱན་རྣམས་ཐམས་ཅད་ཀྱིས་བརྒྱན་ཅིང་གནོད་སྦྱིན་མོ་བརྒྱད་ཀྱིས་ཡོངས་སུ་སྐོར་བ་ལ་འདི་ལྟ་སྟེ། བཟང་མོ་དང་ཤིན་ཏུ་བཟང་མོ་དང༌། དགའ་མ་དང་ཤིན་ཏུ་དགའ་མ་དང༌། སྤེད་མ་དང་དབྱངས་ཅན་མ་དང་འཕགས་མ་དང་ཟླ་བ་དགའ་མ་རྣམས་སོ། །དེ་དག་རྣམས་ཀྱིས་ཡོངས་སུ་བསྐོར་བའི་ལྷ་མོ་ཆེན་མོ་དེའི་བྷ་གའི་དབུས་སུ་ཡི་གེ་ཛཾ་ལས་བྱུང་བའི་ཛམྦྷ་ལ་ནོར་རྒྱུན་མ་ལ་འཁྱུད་པས་ལེགས་པར་ཁ་སྦྱོར་བའི་བྱང་ཆུབ་ཀྱི་སེམས་ལས་ངེས་པར་བྱུང་བའི་རིན་པོ་ཆེ་ཕྱག་ནས་ཡང་དག་པར་འབབ་པ་རབ་ཏུ་གསལ་བར་བསྒོམ་པར་བྱ་བའོ། །འབབ་པའི་དུས་སུ་ནི་བཅོམ་ལྡན་འདས་ཀྱི་ཤར་ཕྱོགས་སུ་ནི་ནོར་བུ་བཟང་པོ་ཁ་དོག་མཐིང་ནག་གོ །ལྷོ་ཕྱོགས་སུ་ནི་གང་བ་བཟང་པོ་ཁ་དོག་སེར་བོའོ། །ནུབ་ཕྱོགས་སུ་ནི་རྣམ་ཐོས་དམར་པོའོ། །བྱང་ཕྱོགས་སུ་ནི་ནོར་སྦྱིན་དམར་པོའོ། །མེ་དང་བདེན་བྲལ་དང་རླུང་དང་དབང་ལྡན་གྱི་མཚམས་རྣམས་ལ་ནི་གད་བ་དང་ལེགས་པར་གང་བ་ནི་མཐིང་ནག་གོ །གཞང་གད་ཀྱི་ཕྲེང་བ་ཅན་དང༌། གཞང་གད་ཀྱི་ཕྲེང་བ་ཅན་ཆེན་པོ་ནི་སེར་པོའོ། །ཁའི་དབང་ཕྱུག་ནི་དམར་བའོ། །དབང་པོའི་མཆོག་ནི་ལྗང་གུའོ། །གསར་མདོག་ཟངས་ཀྱིང་བུ་རྒྱན་རྩེ་ལྔ་པ་དང་ལྡན་པ་དང་གཡས་པ་ན་ས་བོན་གྱི་ཐུ་མ་པོ་སྟེ། ཕྱག་གཡོན་པས་རིན་པོ་ཆེའི་ཆར་འབེབས་པའི་ནེའུ་ལེ་བསྣམས་པ། དེ་བཞིན་གཤེགས་པ་ལྔ་སྤྲོ་བར་མཛད་པ་པདྨ་དང་དུང་ནི་མགོ་བོའི་གཏེར་ཆེན་པོ་ལས་རང་གི་ཁྱིམ་གྱི་རྐང་པའི་ཐེན་ཀོར་དུ་རིན་པོ་ཆེ་ལ་སོགས་པའི་ཆར་འབེབས་པར་བསམ་པར་བྱ་བའོ། །མགོན་པོ་ཛམྦྷ་ལ་ནི་སྐུ་མདོག་སེར་པོ་ཨུཏྤལ་སྔོན་པོའི་ཕྲེང་བ་དང་ལྡན་པའོ། །དེ་དག་རྣམས་ཐམས་ཅད་ཀྱང་གནོད་སྦྱིན་མོ་བརྒྱད་ཀྱི་བྷ་གའི་དབུས་ན་གནས་པ་དང༌། རིན་པོ་ཆེའི་ཆར་འབེབས་པར་མཛད་པ་ཛམྦྷ་ལ་དང་འདྲ་བར་བསྒོམ་པར་བྱ་བའོ། །ཤར་གྱི་སྒོར་ནི་ནོར་སྦྱིན་དང་ནོར་སྦྱིན་ཆེན་པོ་དག་གོ །ལྷོའི་སྒོར་ནི་གནོང་སྦྱིན་དང་གནོད་སྦྱིན་ཆེན་པོ་དག་གོ །ནུབ་ཀྱི་སྒོར་ནི་བཞད་གད་པ་དང་བཞད་གད་ཆེན་པོ་དག་གོ །བྱང་གི་སྒོར་ནི་གང་བ་དང་ལེགས་པར་གང་བ་དག་གོ །དེ་དག་རྣམས་ནི་གཅེར་བུ་སྤ་བ་འཕྱང་བ་གསུས་པ་འཇོལ་
བ། རིན་པོ་ཆེའི་ཆར་རབ་ཏུ་འབེབས་པར་བྱེད་པའོ། །དེ་ནས་སྤྱི་བོར་ནི་ནོར་བུ་བཟང་པོ། །མིག་གཉིས་ལ་ནི་རྣམ་ཐོས་སོ། །ཁ་ལ་ནི་ཁའི་དབང་ཕྱུག་གོ །ནུ་མ་གཉིས་ཀྱི་བར་དུ་ནི་གང་བ་བཟང་པོ། །ལྟེ་བར་ནི་ནོར་སྦྱིན་ནོ། །པུས་མོ་གཉིས་ལ་ནི་བཞད་གད་ཀྱི་ཕྲེང་བ་ཅན་དག་གོ །རྣམ་པར་བཀྲ་བའི་རྣ་གདུབ་ཅན་དག་ནི་རྐང་པ་གཉིས་ལ་སྟེ་འདི་ནི་ལྷ་དགོད་པའོ། །ཡི་གེ་དགོད་པ་ཡང་སྤྱི་བོར་ནི་ཨོཾ་མོ། །དཔྲལ་བར་ནི་ཛླུཾ་ངོ༌། །རྣ་བ་གཉིས་ལ་ནི་ཙླུཾ་ངོ༌། །མགོ་བོའི་སྟེང་དུ་ནི་ཧཱའོ། །ལག་མགུལ་དུ་ནི་ཛླུཾ་ངོ༌། །ལག་པའི་མཐིལ་དུ་ནི་པླུཾ་ངོ༌། །སོང་མོ་ཐམས་ཅད་ཀྱི་རྩེ་མོ་དང༌། སོར་མོ་རྣམས་ལ་ནི་ཨོཾ་ཛམྦྷ་ལ་ཛ་ལེནྡྲ་ཡེ་སྭཱ་ཧཱའོ། །ཨོཾ་ཛླུཾ་ཙླུཾ་སྭཱ་ཧཱ། ཞེས་བྱ་བ་ནི་ཆུའི་སྔགས་སོ། །དེ་བཞིན་དུ་མཛུབ་མོ་ལ་ནི་ནོར་བུ་བཟང་པོའོ། །གུང་མོ་ལ་གང་བ་བཟང་པོའོ། །སྲིན་ལག་ལ་ནི་ནོར་སྦྱིན་ནོ། །མཐེའུ་ཆུང་ལ་ནི་རྣམ་ཐོས་སོ། །རྣམ་པར་བཀྲ་བའི་རྣ་གདུབ་ཅན་ནི་མཐེ་བོང་ལའོ། །ལག་མགུལ་དུ་ནི་བཞད་གད་ཀྱི་ཕྲེང་བ་ཅན་ནོ། །ཡི་གེའི་བཀོད་པ་དེ་དག་རྣམས་ལག་པ་ལ་བྱས་པ་རྡོ་རྗེའི་ཆུ་ལ་སོགས་པ་བདུད་རྩི་ལྔའམ། དེ་དག་མེད་ན་རྡོ་རྗེའི་ཆུས་ཀྱང་སྟེ། ཆུ་དང་བསྲེས་ལ་ཁྱོར་བས་འཐུངས་ལ་ལག་པས་སྦྱིན་པར་བྱ་སྟེ། ནང་པར་སྔ་མོར་ཁྱོར་བ་བརྒྱ་རྩ་བརྒྱད་སྦྱིན་པར་བྱ་བའོ། །ཐུན་ཚོད་གསུམ་དུ་བྱས་པས་ནི་དུས་རིང་པོ་མི་ཐོགས་པར་འགྲུབ་པར་འགྱུར་རོ། །ཨོཾ་ཛླུཾ་ཙླུཾ་སླུཾ་སཾ་ཞེས་བརྗོད་ལ་ཆུ་ཁྱོར་བས་དབུལ་བར་བྱ་བའོ། །དེ་ལྟར་བྱས་ཀྱང་གལ་ཏེ་གྲུབ་པར་མ་གྱུར་ན་དེའི་བདག་ཉིད་དཔལ་རྡོ་རྗེ་ཧཱུཾ་མཛད་ཀྱི་སྐུར་བསྒོམས་ལ། ཛམྦྷ་ལའི་སྐུ་གཟུགས་དུག་དང་སྐྱེ་ཚེ་དང་ཚྭ་དང་ཐང་ཕྲོམ་གྱི་འདབ་མའི་ཁུ་བ་དང་དུར་ཁྲོད་ཀྱི་སོལ་བས་བྱུགས་ཏེ་ཁྲོས་པར་གྱུར་པས་དུར་ཁྲོད་ཀྱི་མེ་ལ་འདེ་པར་བྱ་སྟེ། །ངེས་པར་འགྲུབ་པར་བྱའོ། །ཛམྦྷ་ལའི་སྒྲུབ་ཐབས་རྫོགས་སོ།། །།པཎྜི་ཏ་ཆེན་པོ་དཱ་དང་ཨ་བྷ་ཡ་ལས་ཚུལ་ཁྲིམས་རྒྱལ་མཚན་གྱིས་བསྒྱུར་བའོ། །