བགེགས་མཐར་བྱེད་ཀྱི་སྒྲུབ་ཐབས།
རྒྱ་གར་སྐད་དུ། བི་གྷྣཱ་ནྟ་ཀ་སཱ་དྷ་ནཾ། བོད་སྐད་དུ། བགེགས་མཐར་བྱེད་ཀྱི་སྒྲུབ་ཐབས། དང་པོར་རེ་ཞིག་བདེ་པའི་སྟན་ལ་ཉེ་བར་གནས་པའི་སྒྲུབ་པ་པོས་ཡི་གེ་ཨཾ་དམར་པོ་ལས་དེས་གྲུབ་པའི་ཉི་མའི་དཀྱིལ་འཁོར་རང་གི་སྙིང་གར་རྣམ་པར་བསྒོམས་ལ། དེའི་སྟེང་དུ་ཡི་གེ་ཧཱུཾ་མཐིང་ནག་རྣམ་པར་བཀོད་དོ། །ཡི་གེ་ཧཱུཾ་གི་འོད་ཟེར་ལས་བྱུང་བའི་བགེགས་ཀྱི་གཤེད་དང༌། བླ་མ་དང༌། སངས་རྒྱས་དང༌། བྱང་ཆུབ་
སེམས་དཔའ་རྣམས་ལེགས་པར་དམིགས་ལ། མེ་ཏོག་ལ་སོགས་པས་ཡང་དག་པར་མཆོད་ཅིང༌། ཕྱག་བཙལ་ཏེ། གསུམ་ལ་སྐྱབས་སུ་འགྲོ་བ་ལ་སོགས་པ་བྱ་སྟེ། སྟོང་པ་ཉིད་བསྒོམ་པར་བྱ་བའོ། །ཨོཾ་སྟོང་བ་ཉིད་ཀྱི་ཡེ་ཤེས་ཀྱི་རྡོ་རྗེའི་བདག་ཉིད་ཀྱི་རང་བཞིན་ནི་ང་ཡིན་ནོ། །དེའི་རྗེས་ལ་ཡི་གེ་ཨཾ་དམར་པོ་ལས་བྱུང་བའི་ཉི་མའི་དཀྱིལ་འཁོར་གྱི་སྟེང་དུ་ཡི་གེ་ཧཱུཾ་ངོ༌། །དེ་ཡོངས་སུ་གྱུར་པ་ལས། རྡོ་རྗེ་ཡི་གེ་ཧཱུཾ་གིས་བྱིན་གྱིས་བརླབས་པ་རྣམ་པར་བསྒོམ་པར་བྱ་བའོ། །ཡི་གེ་ཧཱུཾ་གི་འོད་ཟེར་གྱིས་བསྐུལ་བའི་དེ་བཞིན་གཤེགས་པ་རྣམས་ཐམས་ཅད་རིགས་པར་བཞུགས་པ་སྔོན་དུ་འགྲོ་བའི་དེ་དག་ཐམས་ཅད་ཡོངས་སུ་གྱུར་པ་ལས་བགེགས་མཐར་བྱེད་དུ་བདག་ཉིད་རྣམ་པར་བསམ་པར་བྱ་སྟེ། སྐུ་མདོག་མཐིང་ནག་གཡས་བསྐུམ་པའི་ཞབས་ཀྱིས་གནས་པའི་ཞལ་གཅིག་ཕྱག་གཉིས་པ། གཡོན་པའི་ཕྱག་ནི་སྡིགས་མཛུབ་དང་བཅས་པའི་ཞགས་པ་གཡས་པའི་ཕྱག་ནི་རྡོ་རྗེ་གདེང་པ་དང༌། འཇིགས་སུ་རུང་བ་དང་སྐྲ་ཁམ་སེར་གྱེན་དུ་ཕྱོགས་པར་རོ། །དེ་ནས་བཅོམ་ལྡན་འདས་ཀྱི་ཐུགས་ཀར་ཉི་མའི་དཀྱིལ་འཁོར་ལ་ཡི་གེ་ཧཱུཾ་ཡོངས་སུ་གྱུར་པ་ལས་ཡི་གེ་ཧཱུཾ་གིས་བྱིན་གྱིས་བརླབས་པའི་རྡོ་རྗེའོ། །དེ་ལྟ་བུར་གྱུར་པའི་བགེགས་རྣམས་ཀྱི་གཤེད་པོ་སྐུ་སྤྲོ་བ་དང་བསྡུ་བ་དང་ལྡན་པ་པདྨ་འདབ་མ་སྣ་ཚོགས་པའི་སྟེང་ན་ཉི་མ་ལ་བཞུགས་པ། དམ་ཚིག་ལ་སོགས་པ་ཆོ་ག་བཞིན་དུ་སྔོན་དུ་འགྲོ་བས་བསྒོམ་པར་བྱ་བའོ། །དེ་དག་རྣམས་ཐུན་ཚོད་གཉིས་དང༌། གསུམ་དུ་བསྒོམ་པར་བྱ་བ་ཡིན་ནོ། །ཨོཾ་ཨཱཿ་བིགྷྣཱནྟ་ཀྲྀཏ་ཧཱུཾ། བགེགས་མཐར་བྱེད་ཀྱི་སྒྲུབ་ཐབས་སོ། །པཎྜི་ཏན་ཨ་བྷ་ཡ་ལས་དགེ་སློང་ཚུལ་ཁྲིམས་རྒྱལ་མཚན་གྱིས་བསྒྱུར་བའོ།།