འོད་ཟེར་ཅན་གྱི་སྒྲུབ་ཐབས།
རྒྱ་གར་སྐད་དུ། མཱ་རཱི་ཙྱཻ་སཱ་དྷ་ནཾ། བོད་སྐད་དུ། འོད་ཟེར་ཅན་གྱི་སྒྲུབ་ཐབས། སྔར་བཤད་པའི་རིམ་པས་སྡིག་པ་བཤགས་པ་ལ་སོགས་པ་བྱས་པའི་རྗེས་ཐོགས་སུ་སྟོང་པ་ཉིད་རྣམ་པར་བསྒོམས་ལ། སྣ་ཚོགས་པདྨ་དང་ཉི་མ་ལ་ས་བོན་གྱི་ཡི་གེ་མཾ་དམར་པོ་ཡོངས་སུ་གྱུར་པ་ལས་ཨཽ་ཌི་ཡ་ནས་བྱུང་བའི་འོད་ཟེར་ཅན་ཏེ་སྐུ་མདོག་དམར་མོ་ཞལ་དྲུག་མ། ཕྱག་བཅུ་གཉིས་མ་ཞལ་རེ་རེ་ཞིང་སྤྱན་གསུམ་གསུམ་མ་དམར་མོ་དང་ནག་མོ་དང་དཀར་མོ་དང་ལྗང་གུ་དང་སེར་མོ་ནི་གཡས་ནས་བསྐོར་བའི་ཞལ་ལྔ་ཡིན་ནོ། །སྟེང་མ་ནི་ནག་མོ་སྟེ་ཕག་གི་ཞལ་ཡིན་ནོ། །དང་པོ་ནས་རིམ་པ་ཇི་ལྟ་བར་གཡས་ཀྱི་ཕྱག་དྲུག་པོ་རྣམས་ན་རལ་གྲི་དང་འཁོར་ལོ་དང་དབྱུག་ཏོ་དང་མདའ་དང་མདུང་དང་རྡོ་རྗེ་རྩེ་གཅིག་པ་རྣམས་སོ། །སྡིགས་མཛུབ་དང༌། ཞགས་པ་དང༌། ཁ་ཊྭཱཾ་ག་དང་ཐོད་པ་དང་ཤིང་མྱ་ངན་མེད་འདབ་མ་དང་ལྡན་པ་དང༌། ཚངས་པའི་མགོ་བོ་དང༌། གཞུ་དང་མདུད་རྩེ་གསུམ་པ་རྣམས་ནི་གཡོན་གྱི་ཕྱག་རྣམས་ནའོ། །ཀླུའི་རྒྱལ་པོ་བརྒྱད་ཀྱིས་སྐུ་ལ་བརྒྱན་པར་གྱུར་པ། དབུ་སྐྲ་ཁམ་སེར་གྱེན་དུ་འཕུར་བ། ཞལ་མཆེ་བ་རྣམ་པར་གཙིགས་པ། མགོ་ཐོད་སྐམ་པོ་ལྔའི་ཕྲེང་བའི་ཅོད་པན་དང་ལྡན་པ། རྣམ་པར་འཛག་བར་གྱུར་བའི་མགོ་བོའི་ཕྲེང་བ་རབ་ཏུ་འཕྱང་བའི་དོ་ཤལ་ཅན། རིན་པོ་ཆེ་དུ་མས་སྤྲས་པའི་ཤིང་རྟ་འོག་ན་རྣམ་པར་བཀྲ་བའི་ཕག་བདུན་དང་ལྡན་པ་བཅིབས་པ་སྟེ། ཕྱི་རོལ་དུར་ཁྲོད་བརྒྱད་ཀྱིས་ཡོངས་སུ་བསྐོར་བའི་མཆོད་རྟེན་གྱི་ནང་ན་བཞུགས་པའོ། །ཤིང་རྟའི་དབུས་ན་སྐྱིལ་ཀྲུང་གིས་བཞུགས་པའོ། །རྡོ་རྗེ་དང་ཁབ་དང་མྱ་ངན་མེད་བསྣམས་ཤིང་སྡིགས་མཛུབ་དང༌། འོད་ཟེར་ཅན་ཁ་དོག་དམར་མོ་སྟེ། སྟོད་ཤག་སེར་པོ་བསྣམས་པ། རྒྱན་སྣ་ཚོགས་དང་ལྡན་པ། སྟག་གི་པགས་པའི་ཤམ་ཐབས་ཅན། འོད་ཟེར་དམར་པོས་བརྒྱན་པ། དེ་བཞིན་གཤེགས་པ་ལྔ་སྤྲོ་བར་མཛད་པ་སྐད་ཅིག་གིས་བསྒོམས་ལ། དེའི་ཐུགས་ཀར་ཉི་མ་ལ་ས་བོན་མཾ་ལས་ཀུན་ནས་ངེས་པར་སྤྲོ་བའི་འོད་ཟེར་བརྒྱ་ཕྲག་གིས་ཡང་དག་པར་སྤྱན་དྲངས་པའི་སངས་རྒྱས་དང་བྱང་ཆུབ་སེམས་དཔའ་རྣམས་ལས་དབང་བླངས་པས་རྣམ་པར་སྣང་མཛད་དབུ་རྒྱན་ལ་གནས་པར་བདག་ཉིད་ལ་རྣམ་པར་
བསམ་མོ། །དེ་ནས་གཉུག་མའི་ས་བོན་གྱིས་རབ་ཏུ་བསྒྲུབས་པའི་དམ་ཚིག་གི་རྫས་ཇི་ལྟར་རྙེད་པ་བསྙེན་པ་སྔོན་དུ་བཏང་བའི་སྔགས་པས་ས་བོན་དེ་ནས་ཀུན་ནས་དེས་པར་བྱུང་བའི་ཡི་གེ་རྣམས་ཕྲེང་བའི་རྣམ་པས་སྙིང་ག་ནས་བྱུང་ནས་ལྟེ་བར་ལྟེ་བ་ནས་སླར་ཡང་སྙིང་གར་ཏེ། དེ་ལྟར་འཁོར་ལོ་འཁོར་བའི་སྦྱོར་བས་སྔགས་བཟླས་པར་བྱ་བ་ནི། ཨོཾ་མཱ་རཱི་ཙྱཻ་མཾ་ཧཱུཾ་ཧཱུཾ་ཕཊ་ཕཊ་སྭཱ་ཧཱ། དུས་ཕྱིས་ནི་ཏིང་ངེ་འཛིན་ཉེ་བར་བཏང་ལ་བཟླས་པ་དང༌། དེའི་སྦྱོར་བ་ཉིད་ཀྱིས་ཇི་ལྟར་བདེ་བར་རྒྱུ་བར་བྱའོ། །ཨུ་ཌྱན་ནས་བྱུང་བའི་འོད་ཟེར་ཅན་གྱི་སྒྲུབ་ཐབས་སོ། །ཨ་བྷ་ཡའི་ཞལ་སྔ་ནས་དགེ་སློང་ཚུལ་ཁྲིམས་རྒྱལ་མཚན་གྱིས་བསྒྱུར་བའོ། །