སོ་སོར་འབྲང་བ་ཆེན་མོའི་སྒྲུབ་ཐབས།
― DTG077_Page_0431 ―
[མ་དཔེ་གཟིགས་ན་འདིར་གནོན།]
རྒྱ་གར་སྐད་དུ། མ་ཧཱ་པྲ་ཏི་སཱ་ར་སཱ་དྷ་ནཾ། བོད་སྐད་དུ། སོ་སོ་འབྲང་བ་ཆེན་མོའི་སྒྲུབ་ཐབས། འཕགས་མ་སོ་སོ་འབྲང་བ་ཆེན་མོ་ལ་ཕྱག་འཚལ་ལོ། །སྔོན་དུ་གསུངས་པའི་ཆོ་ག་འདིས་སྟོང་པ་ཉིད་དུ་བསྒོམས་པའི་རྗེས་ལ་ཨ་ཡིག་ལས་ཟླ་བའི་དཀྱིལ་འཁོར་ལ་པྲཾ་ཡིག་སེར་པོ་སྣ་ཚོགས་པའི་འོད་ཟེར་འཕྲོ་བས་གཞན་གྱི་དོན་བྱས་ཤིང་དེ་ཡོངས་སུ་གྱུར་པ་ལས་བཅོམ་ལྡན་འདས་མ་སོ་སོ་འབྲང་མ་ཆེན་མོར་བདག་ཉིད་སྐད་ཅིག་གིས་བསྐྱེད་པར་བྱའོ། །སྐུ་མདོག་སེར་མོ་ཞལ་བཞི་པ། སྤྱན་གསུམ་པ། ཕྱག་བརྒྱད་པའོ། །ཞལ་དང་པོ་སེར་པོ། གཡས་དཀར་པོ། རྒྱབ་ཀྱི་ཞལ་སྔོན་པོ། གཡོན་དམར་པོའོ། །ཕྱག་གཡས་པ་རྣམས་ཀྱིས་རལ་གྲི་དང༌། འཁོར་ལོ་དང༌། རྩེ་གསུམ་པ་དང༌། མདའ་བསྣམས་བ། ཕྱག་གཡོན་བ་རྣམས་ཀྱིས་དགྲ་སྟ་དང༌། གཞུ་དང༌། ཞགས་པ་དང༌། རྡོ་རྗེ་བསྣམས་པའོ། །སྣ་ཚོགས་པདྨ་དང༌། ཟླ་བའི་གདན་ལ་རོལ་པའི་སྟབས་ཀྱིས་ཡང་དག་པར་བཞུགས་པ་འོད་ཀྱི་དཀྱིལ་འཁོར་དམར་པོ་ཅན། རྒྱན་ཐམས་ཅད་ཀྱིས་བརྒྱན་པ། སྣ་ཚོགས་པའི་ན་བཟའ་བསྣམས་པ། དར་གྱི་སྟོད་གཡོགས་ཅན། དེ་བཞིན་དུ་རིན་པོ་ཆེ་སྣ་ཚོགས་པའི་དབུ་རྒྱན་ཅན་དུ་བསམ་པར་བྱའོ། །དེ་ནས་སྐུ་གསུང་ཐུགས་རྣམས་སུ་ཟླ་བ་ལ་གནས་པའི་ཨོཾ་ཨཱཿཧཱུཾ་དཀར་པོ་དང་དམར་པོ་དང༌། སྔོན་པོའི་ཡི་གེ་གསུམ་བསམ་པར་བྱའོ། །དེ་ནས་ནུ་མའི་བར་དུ་ཟླ་བ་ལ་གནས་པའི་པྲཾ་ཡིག་རྣམ་པར་བསམས་ལ་བདག་ཉིད་ལ་ལྷ་མོ་རྣམས་ཀྱིས་རྣམ་པ་སྣ་ཚོགས་པའི་མཆོད་པ་བྱེད་པར་བལྟ་ཞིང་ཇི་སྲིད་མི་ངལ་བར་དེ་སྲིད་དུ་བསྒོམ་
― DTG077_Page_0432 ―
[མ་དཔེ་གཟིགས་ན་འདིར་གནོན།]
པར་བྱའོ། །ངལ་བར་གྱུར་ན་རང་གི་སྙིང་གར་ཟླ་བ་ལ་སྔགས་རྣམས་མུ་ཏིག་གི་དོ་ཤལ་བཞིན་དུ་བལྟས་ལ་བཟླས་པར་བྱའོ། །ཨོཾ་མ་ཎི་དྷ་རི་བཛྲི་ཎི་མ་ཧཱ་པྲ་ཏི་སཱ་རེ་ཧཱུཾ་ཧཱུཾ་ཕཊ་ཕཊ་སྭཱ་ཧཱ། སོ་སོ་འབྲང་བ་ཆེན་མོའི་སྒྲུབ་ཐབས་རྫོགས་སོ།།
| 
