འཕགས་མ་སྒྲོལ་མའི་བསྟོད་པ་ཕྲིན་ལས་སྒྲུབ་པ་ཞེས་བྱ་བ།
ཙནྡྲགོམིན།
― DTG077_Page_0562 ―
[མ་དཔེ་གཟིགས་ན་འདིར་གནོན།]
རྒྱ་གར་སྐད་དུ། ཨཱཪྻ་ཏཱ་རཱ་སྟོ་ཏྲཾ་བྷི་ས་ཀརྨཱ་སཱ་དྷ་ནཱ་མ། བོད་སྐད་དུ། འཕགས་མ་སྒྲོལ་མའི་བསྟོད་པ་ཕྲིན་ལས་སྒྲུབ་པ་ཞེས་བྱ་བ། །བཅོམ་ལྡན་འདས་མ་སྒྲོལ་མ་ལ་ཕྱག་འཚལ་ལོ། །ཏཱཾ་ཡིག་ལྗང་གུ་ཨུཏྤལ་ལས་བྱུང་བའི། །སྒྲོལ་མ་སྐུ་མདོག་ལྗང་གུ་ཞལ་གཅིག་ཕྱག་གཉིས་མ། །ཕྱག་གཉིས་སྐུ་ལ་རིན་ཆེན་སྣ་ཚོགས་སྤྲས། །ཡིད་དམ་སྒྲོལ་མ་ལྷ་ལ་ཕྱག་འཚལ་བསྟོད། །དོན་གྲུབ་ལ་སོགས་རིགས་ལྔས་དབུ་བརྒྱན་ཅིང༌། །བཅུ་དྲུག་ལོ་ལོན་འཛུམ་པའི་བཞིན་དང་ལྡན། །གཟི་བརྗིད་བཟོད་དཀའ་སྣ་ཚོགས་ལྷག་པར་འདུད། །ཡི་དམ་སྒྲོལ་མ་ལྷ་ལ་ཕྱག་འཚལ་བསྟོད། །ཕྱག་གཡས་མཆོག་སྦྱིན་ཕྱག་གཡོན་ཨུཏྤལ་འཛིན། །སྣ་
― DTG077_Page_0563 ―
[མ་དཔེ་གཟིགས་ན་འདིར་གནོན།]
ཚོགས་པདྨ་ཟླ་བའི་དཀྱིལ་འཁོར་ལ། །གཡས་བརྐྱང་གཡོན་བསྐུམ་ཚུལ་གྱིས་རབ་ཏུ་བཞུགས། །ཡི་དམ་སྒྲོལ་མ་ལྷ་ལ་ཕྱག་འཚལ་བསྟོད། །ཐུགས་རྗེའི་སྤྱན་གྱིས་འགྲོ་ལ་རྟག་ཏུ་གཟིགས། །སྐུ་ལ་འཇིགས་པ་བརྒྱད་སྐྱོབ་སྒྲོལ་མ་འཕྲོ། །འཁོར་བའི་སྡུག་བསྔལ་ཀུན་ལས་སྒྲོལ་བྱེད་པའི། །ཡི་དམ་སྒྲོལ་མ་ལྷ་ལ་ཕྱག་འཚལ་བསྟོད། །ཞི་དང་རྒྱས་དང་དབང་དང་དྲག་པོ་དང༌། །ལས་ཚོགས་ཐམས་ཅད་མྱུར་དུ་གྲུབ་མཛད་མ། །ཕྲིན་ལས་ཐམས་ཅད་ཡོངས་སུ་གྲུབ་བྱེད་པའི། །ཡི་དམ་སྒྲོལ་མ་ལྷ་ལ་ཕྱག་འཚལ་བསྟོད། །སེང་གེ་གླང་ཆེན་མེ་སྦྲུལ་ཆོམ་རྐུན་དང། །ལྕགས་སྒྲོག་ཆུ་དང་བགེགས་དང་འཇིགས་པ་བརྒྱད། །འཇིགས་པ་ཀུན་ལས་ཡོངས་སུ་སྒྲོལ་བྱེད་པའི། །ཡི་དམ་སྒྲོལ་མ་ལྷ་ལ་ཕྱག་འཚལ་བསྟོད། །གདོན་དང་རིམས་དང་སྨྱོ་འབོག་ལ་སོགས་དང༌། །གནོད་བྱེད་ལ་སོགས་དུས་མིན་འཆི་བས་སྐྲག །སྡུག་བསྔལ་ཐམས་ཅད་རབ་ཏུ་ཞི་བྱེད་པའི། །ཡི་དམ་སྒྲོལ་མ་ལྷ་ལ་ཕྱག་འཚལ་བསྟོད། །སྐྱེ་བོ་སྔོན་བསགས་ལས་དང་ཉོན་མོངས་ཀྱི། །མཚམས་མེད་ལྔ་དང་མི་དགེ་བཅུ་སོགས་སྡིག །སྡིག་པའི་ལས་རྣམས་བདག་གིས་ཅི་བསགས་པ། །དེ་དག་ཐམས་ཅད་མ་ལུས་བྱང་བར་ཤོག །བདག་ནི་ད་ལྟར་སྐྱེ་བ་འདི་ལ་ཡང༌། །མི་ངན་མཚན་ངན་འཆི་ལྟས་དུས་མིན་སྐྲག །བཀྲ་མི་ཤིས་པ་ཐམས་ཅད་དག་གྱུར་ནས། །ཚེ་དང་བསོད་ནམས་ལོངས་སྤྱོད་རྒྱས་པར་ཤོག །བདག་ནི་མ་འོངས་སྐྱེ་བ་ཐམས་ཅད་དུ། །ཡི་དམ་སྒྲོལ་མ་རྗེས་སུ་དྲན་གྱུར་ནས། །མཆོག་དང་ཐུན་མོང་དངོས་གྲུབ་ལ་སོགས་པ། །ལས་ཚོགས་ཐམས་ཅད་ཡིད་བཞིན་གྲུབ་པར་ཤོག །ཡི་དམ་སྒྲོལ་མ་ཐུགས་རྗེ་ཆེ་ལྡན་པ། །བདག་གིས་རབ་ཏུ་བརྩེ་བའི་གདུང་སེམས་ཀྱིས། །བསྟོད་པ་བགྱིས་པའི་བསོད་ནམས་གང་བསགས་དེས། །ཡི་དམ་སྒྲོལ་མ་ལྷ་དང་མི་འབྲལ་ཤོག །འཕགས་མ་སྒྲོལ་བའི་བསྟོད་པ་ཕྲིན་ལས་ཐམས་ཅད་སྒྲུབ་པ་ཞེས་བྱ་བ། སློབ་དཔོན་ཙནྡྲ་གོ་མིས་མཛད་པ་རྫོགས་སོ།།
| 
