ཞལ་གཅིག་ཕྱག་གཉིས་པའི་ཧེ་རུ་ཀའི་སྒྲུབ་ཐབས།
― DTG077_Page_0112 ―
[མ་དཔེ་གཟིགས་ན་འདིར་གནོན།]
རྒྱ་གར་སྐད་དུ། དྭི་བྷུ་ཛ་ཧི་རུ་ཀ་སཱ་དྷ་ནཾ། བོད་སྐད་དུ། ཞལ་གཅིག་ཕྱག་གཉིས་པའི་ཧེ་རུ་ཀའི་སྒྲུབ་ཐབས། དཔལ་ཧེ་རུ་ཀ་ལ་ཕྱག་འཚལ་ལོ། །གྲོགས་མེད་དགའ་བའི་ཡིད་ཀྱིས་ནི། །དུར་ཁྲོད་བརྒྱད་ཀྱི་དབུས་གནས་པ། །ཤེས་རབ་ཐབས་ཀྱི་ཆོ་ག་ཡིས། །ཟླ་བ་ཉི་མ་རབ་སྦྱོར་བ། །ཨཱ་ལི་ཀཱ་ལི་མཉམ་སྦྱོར་བས། །ཉི་མའི་དཀྱིལ་འཁོར་བསྒོམ་པར་བྱ། །དེ་ལ་ཧཱུཾ་ཡིག་ཡོངས་སུ་གྱུར། །རྡོ་རྗེ་རྭ་དང་ཡང་དག་ལྡན། །སྐྱིལ་ཀྲུང་ཕྱེད་པས་རོ་ལ་གནས། །མི་ཡི་པགས་པའི་གོས་བསྣམས་པས། །ཐལ་བས་ལུས་ལ་བྱུགས་པ་སྟེ། །འབར་བའི་རྡོ་རྗེ་གཡས་པ་ན། །གཡོ་བའི་བ་དན་ཁ་ཊྭཱཾ་ག །ཁྲག་ལྡན་ཐོད་པ་གཡོན་དུའོ། །མགོ་བོ་བརྒྱ་ཕྱེད་ཕྲེང་བ་ཡིས། །ཡིད་དུ་འོང་བའི་དོ་ཤལ་དབྱངས། །ཅུང་ཞིག་ཞལ་གྱིས་མཆེ་བ་གཙིགས། །སྤྱན་གསུམ་དམར་པོ་རོ་ལྡན་པ། །དབུ་སྐྲ་ཁམ་པ་གྱེན་དུ་འཁྱིལ། །མི་བསྐྱོད་པ་ཡི་དབུ་རྒྱན་ཅན། །རྣ་ཆ་དག་དང་རབ་ཏུ་ལྡན། །རུས་པའི་རྒྱན་གྱིས་མཛེས་པ་སྟེ། །དབུ་ལ་ཐོད་པ་ལྔ་དང་ལྡན། །སངས་རྒྱས་ཉིད་བཞིན་བསམ་བྱ་སྟེ། །རྒས་དང་འཆི་བ་ཟློག་བྱེད་པའོ། །སྭཱ་ཧཱ་ཕཊ་ཧཱུཾ་ཨོཾ་ཞེས་བྱ་བ་ནི་མདོར་བསྡུས་པའོ། །ཞལ་གཅིག་ཕྱག་གཉིས་པའི་ཧེ་རུ་ཀའི་སྒྲུབ་ཐབས་རྫོགས་སོ།། །།པཎྜི་ཏ་དོན་ཡོད་རྡོ་རྗེ་དང༌། ཁམས་པ་ལོ་ཙཱ་བ་དགེ་སློང་བ་རིས་བསྒྱུར་བའོ། །
| 