འཕགས་པ་མཁའ་སྤྱོད་ཀྱི་སྒྲུབ་ཐབས།
ཨ་ནུ་པ་མ་རཀྵི་ཏ།
རྒྱ་གར་སྐད་དུ། ཨཱཪྻ་ཁརས་པཱ་ཎི་སཱ་དྷ་ནཾ། བོད་སྐད་དུ། འཕགས་པ་མཁའ་སྤྱོད་ཀྱི་སྒྲུབ་ཐབས། འཕགས་པ་མཁའ་སྤྱོད་ལ་ཕྱག་འཚལ་ལོ། །སྡུག་བསྔལ་ཅན་གྱི་མགོན་གྱུར་པའི། །མགོན་པོ་མཁའ་སྤྱོད་ལ་ཕྱག་འཚལ། །དེ་ཡི་སྒྲུབ་ཐབས་བསྡུས་པ་ལས། །ཅུང་ཟད་རྒྱས་པར་བྲི་བར་བྱ། །དང་པོ་རེ་ཞིག་སྔགས་པས་རྐང་པ་དང༌། ལག་པ་ལ་སོགས་པ་ཆུས་བཀྲུས་ཤིང་མཆོག་ཏུ་གཙང་བར་བྱས་ནས་རི་ཕུག་སྐྱེ་བོས་དབེན་པར་གནས་ཏེ། ཁ་བསང་བར་བྱའོ། །ཁ་ཅིག་ནས་ཡིད་དང་མཐུན་པའི་གནས་སུ་འཇམ་ཞིང་ཡངས་པའི་གདན་ལ་ཉེ་བར་འདུག་ནས། རང་གི་སྙིང་གར་དབྱངས་ཡིག་དང་པོ་ཡོངས་སུ་གྱུར་པ་ལས་ཟླ་བའི་དཀྱིལ་འཁོར་ཡིད་ཀྱིས་བསམ་པར་བྱ་སྟེ། དེའི་དབུས་སུ་སྟོན་ཀའི་ཟླ་བ་བརྒྱའི་འོད་ཟེར་གྱི་ཕྲེང་བ་རབ་ཏུ་འབར་བའི་ཧྲཱིཿཡིག་གི་ས་བོན་བལྟ་བར་བྱའོ། །དེ་ནས་ཡང་ཧྲཱིཿཡིག་གི་ས་བོན་ལས་འཕྲོས་ཏེ། འགྲོ་བ་རྣམས་ཀྱིས་མ་རིག་པའི་མུན་པ་འཇོམས་པར་བྱེད་ཅིང་འོད་ཟེར་གྱི་ལྕགས་ཀྱུའི་རྣམ་པར་འཕྲོས་ཏེ། ཕྱོགས་བཅུ་མཐའ་ཡས་པའི་འཇིག་རྟེན་གྱི་ཁམས་ན་བཞུགས་པ་རྣམས་ཐམས་ཅད་སྣང་བར་མཛད་ནས། དེ་ན་བཞུགས་པའི་ཡང་གྲངས་མེད་དཔག་ཏུ་མེད་པའི་བླ་མ་དང༌། སངས་རྒྱས་དང༌། བྱང་ཆུབ་སེམས་དཔའ་རྣམས་སྤྱན་དྲངས་ནས་མདུན་གྱི་ནམ་མཁའ་ལ་བཞུགས་པར་བྱའོ། །ཕྱི་ནས་དེ་རྣམས་ནམ་མཁའི་ཕྱོགས་སུ་འཁོད་ཅིང༌། མཆོག་གི་སྙིང་རྗེ་དང་ལྡན་པའི་བླ་མ་དང༌། སངས་རྒྱས་དང༌། བྱང་ཆུབ་སེམས་དཔའ་རྣམས་ལ་མེ་ཏོག་དང༌། སྤོས་དང༌། མར་མེ་དང༌། དྲི་དང༌། ཕྲེང་བ་དང༌། བྱུག་པ་དང༌། ཕྱེ་མ་དང༌། ན་བཟའ་དང༌། གདུགས་དང༌། རྒྱལ་མཚན་དང༌། དྲིལ་བུ་དང༌། བ་དན་ལ་སོགས་པ་ཤིན་ཏུ་ཕུལ་དུ་བྱུང་བའི་མཆོད་པའི་རྣམ་པས་མཆོད་ཅིང༌། སྡིག་པ་བཤགས་པར་བྱའོ། །གང་ཞིག་སྐྱེ་བ་འདི་དང༌། སྐྱེ་བ་གཞན་རྣམས་སུ་ཐོག་མ་དང་ཐ་མ་
མེད་པའི་འཁོར་བ་ནས་འཁོར་བའི་སྐྱེ་གནས་རྣམས་སུ་བདག་གི་ལུས་དང་ངག་དང་ཡིད་ཀྱིས་ཀྱང་སྡིག་པའི་ལས་ཅི་བགྱིས་པ་དང༌། བགྱིད་དུ་སྩལ་བ་དང༌། རྗེས་སུ་ཡི་རང་བར་བགྱིས་པ་དེ་རྣམས་ཐམས་ཅད་འཇིག་རྟེན་གསུམ་གྱི་མགོན་པོ་བཅོམ་ལྡན་འདས་སྤྲོ་བ་ཆེན་པོ་རྣམས་དང༌། བླ་མ་དང༌། སངས་རྒྱས་དང་བྱང་ཆུབ་སེམས་དཔའ་རྣམས་ཀྱི་སྤྱན་སྔར་སོ་སོར་བཤགས་པར་བགྱིའོ། །ཆོ་ག་འདིས་སོ་སོར་བཤགས་ཤིང་སླར་ཡང་མི་བྱེད་པའི་སྡོམ་པ་འཛིན་ཅིང་བསོད་ནམས་ལ་རྗེས་སུ་ཡི་རང་བར་བྱ་སྟེ། རྫོགས་པའི་སངས་རྒྱས་དང༌། རང་རྒྱལ་དང༌། ཉན་ཐོས་རྣམས་དང༌། བྱང་ཆུབ་སེམས་དཔའ་རྣམས་དང༌། གང་ཞིག་འཇིག་རྟེན་གསུམ་ན་མཆིས་པའི་དགེ་བ་ཐམས་ཅད་ལ་རྗེས་སུ་ཡི་རང་ངོ༌། །དེའི་རྗེས་སུ་དཀོན་མཆོག་གསུམ་ལ་སྐྱབས་སུ་འགྲོ་བར་བྱ་སྟེ། རྐང་གཉིས་རྣམས་ཀྱི་མཆོག་སངས་རྒྱས་ལ་སྐྱབས་སུ་མཆིའོ། །འདོད་ཆགས་དང་བྲལ་བ་རྣམས་ཀྱི་མཆོག་ཆོས་ལ་སྐྱབས་སུ་མཆིའོ། །ཚོགས་རྣམས་ཀྱི་མཆོག་དགེ་འདུན་ལ་སྐྱབས་སུ་མཆིའོ། །ཕྱི་ནས་ལམ་ལ་བརྟེན་པ་ནི་རྫོགས་པའི་སངས་རྒྱས་ཀྱིས་གསུངས་པའི་ལམ་ལ་བདག་གིས་བསྟེན་གྱི་གཞན་ནི་མ་ཡིན་ནོ། །དེ་ནས་གསོལ་བ་གདབ་པར་བྱ་སྟེ། སངས་རྒྱས་བཅོམ་ལྡན་འདས་རྣམས་དང་དེའི་སྲས་བྱང་ཆུབ་སེམས་དཔའ་ཆེན་པོ་རྣམས་ཀྱང་ཡོངས་སུ་མྱ་ངན་ལས་མི་འདའ་ཞིང་འཁོར་བ་མ་སྟོངས་ཀྱི་བར་དུ་སེམས་ཅན་གྱི་དོན་མཛད་དུ་གསོལ། དེའི་རྗེས་སུ་བསྐུལ་མ་གདབ་པར་བྱ་སྟེ། རྣམ་པ་དེ་བཞིན་དུ་བཅོམ་ལྡན་འདས་དེ་བཞིན་གཤེགས་པ་རྣམས་ཀྱིས་བླ་ན་མེད་པའི་ཆོས་གསུང་བཞིན་བསྟན་པས་གང་གིས་མྱུར་དུ་སེམས་ཅན་རྣམས་འཁོར་བའི་རྒྱ་མཚོ་གཏིང་མཐའ་མེད་པ་ལས་བསྒྲལ་དུ་གསོལ། གསོལ་བ་བཏབ་པའི་རྗེས་སུ་དེ་ནས་བསོད་ནམས་ཡོངས་སུ་བསྔོ་བར་བྱའོ། །བླ་ན་མེད་པའི་མཆོད་པ་རྣམ་པ་བདུན་གྱིས་མཆོད་ནས་གང་དེ་བཞིན་དུ་དགེ་བའི་རྩ་བ་བསྐྱེད་པ་རྣམས་དེ་བཞིན་དུ་བདག་གིས་རྫོགས་པའི་བྱང་ཆུབ་ཏུ་ཡོངས་སུ་བསྔོ་བར་བགྱིའོ། །ཡང་ན་བསྡུས་ནས་བླ་ན་མེད་པའི་མཆོད་པ་རྣམ་པ་བདུན་གསུངས་ཏེ། ཚིགས་སུ་བཅད་པ་འདི་བཀླག་པར་བྱའོ། །ལུས་དང་ངག་དང་ཡིད་ཀྱིས་གང་བགྱིས་པའི། །སྡིག་རྣམས་རྒྱལ་བ་རྣམས་ཀྱི་སྤྱན་སྔར་
བཤགས། །འཇིག་རྟེན་གསུམ་གྱི་དགེ་བ་ཐམས་ཅད་ལ། །རབ་ཏུ་དགའ་བས་རྟག་ཏུ་རྗེས་ཡི་རང༌། །དཀོན་མཆོག་གསུམ་ལ་བརྟག་ཏུ་བདག་སྐྱབས་མཆི། །རྒྱལ་བའི་གསུང་ལ་སྐྱབས་ཤིང་བསྟེན་པར་བགྱི། །ཇི་སྲིད་སྲིད་པ་བརྟན་གྱུར་དེ་སྲིད་དུ། །སྐྱེ་དགུའི་ཡབ་རྣམས་མྱ་ངན་མི་འདའ་ཞིང༌། །འདིར་ཡང་རྟག་ཏུ་སེམས་ཅན་དོན་མཛད་ཅིང༌། །སངས་རྒྱས་སྲས་བཅས་དེ་རྣམས་བཞུགས་སུ་གསོལ། །ཐེ་ཚོམ་མཐར་བྱེད་ཇི་ལྟ་བ་ཡི་ཆོས། །ཀྱེ་ཀྱེ་མཐུ་ཆེན་པོ་ཁྱོད་ཀྱིས་བསྟན་དུ་གསོལ། །འཁོར་བའི་རྒྱ་མཚོར་འགྲོ་རྣམས་ལྷན་ཅིག་དེར། །གང་གིས་ཕ་རོལ་འགྲོ་ཞིང་བདེ་བསགས་པ། །བསོད་ནམས་རབ་ཏུ་གང་བསགས་འདི་ཀུན་ཀྱང༌། །རྫོགས་པའི་བྱང་ཆུབ་བདག་གིས་བསྔོ་བར་བགྱི། །རྒྱལ་བ་རྣམས་དང་དེ་ཡི་སྲས། །བདག་དང་འགྲོ་བའི་བླ་མ་ལ། །བདག་གིས་དངོས་པོ་ཐམས་ཅད་ནི། །ཐམས་ཅད་དུ་ནི་དབུལ་བར་བགྱི། །ཞེས་པ་འདིས་མཆོད་པ་རྣམ་པ་བདུན་གྱིས་མཆོད་ནས། ཨོཾ་ཨཱཿཧཱུཾ་མུཿཞེས་པས་གཤེགས་སུ་གསོལ། དེ་ནས་ཚད་མེད་པ་བཞི་ནི་བྱམས་པ་དང༌། སྙིང་རྗེ་དང༌། དགའ་བ་དང༌། བཏང་སྙོམས་ཀྱི་མཚན་ཉིད་རྣམས་ནི་འོག་ནས་འཆད་པར་འགྱུར་བའི་རིམ་པས་བསྒོམ་པར་བྱའོ། །དེ་ལ་འདིར་བྱམས་པས་ནི་སེམས་ཅན་ཐམས་ཅད་ལ་ཤིན་ཏུ་ཕན་པར་བྱེད་ཅིང༌། བུ་གཅིག་པ་ལྟར་མཉེས་གཤིན་པའི་མཚན་ཉིད་ཅན་ནོ། །སྙིང་རྗེ་ནི་ཅི་འདྲ་ན། གཏིང་མཐའ་མེད་པའི་འཁོར་བའི་རྒྱ་མཚོའི་ནང་དུ་ལྷུང་བའི་མཐའ་ཡས་པའི་སེམས་ཅན་གྱི་ཁམས་བདག་གིས་ཡང་དག་པར་གདོན་པར་འདོད་པའི་བསམ་པ་ཅན་ནོ། །ཡང་དགའ་བ་ནི་ཅི་འདྲ་ན། ཁམས་གསུམ་ན་གནས་པའི་སེམས་ཅན་རྣམས་ཀྱང་གང་ཞིག་ལེགས་པར་སྤྱོད་པ་དེ་རྣམས་ལ་དེའི་ལོངས་སྤྱོད་ཀྱི་དབང་ཕྱུག་ལ་སོགས་པ་རྣམས་ལ་སེམས་དགའ་བའོ། །གང་འདིར་བཏང་སྙོམས་ནི་ཁོང་ཁྲོ་བ་དང༌། རྗེས་སུ་བརྩེ་བ་དག་ངེས་པར་བཅིངས་ཤིང་ཕན་པ་དང༌། གནོད་པར་བྱེད་པ་སྤངས་ནས་སེམས་ཅན་རྣམས་ལ་མཆོག་ཏུ་ཕན་པར་སྤྱོད་པ་སྟེ། ཚད་མེད་པ་བཞི་སྒོམ་ཞིང༌། དེ་ནས་ཆོས་ཐམས་ཅད་ཀྱི་རང་བཞིན་ཡོངས་སུ་དག་པར་བསམ་པར་བྱའོ། །ཆོས་ཐམས་ཅད་འདི་བཞིན་དུ་རང་བཞིན་ངོ་བོ་ཉིད་མེད་ཅིང་ཡོངས་སུ་དག་པའོ་ཞེས་པ་ལ་སོགས་པ་མངོན་དུ་བྱའོ། །
འདི་བཞིན་དུ་ཆོས་ཐམས་ཅད་རང་བཞིན་ཡོངས་སུ་དག་ཅིང༌། ཨོཾ་སྭ་བྷཱ་ཝ་ཤུདྡྷཿསརྦ་དྷརྨཱཿསྭ་བྷཱ་ཝ་ཤུདྡྷོ྅ཧཾ་ཞེས་པ་འདིས་བརྟན་པར་བྱའོ། །ཆོས་ཐམས་ཅད་རང་བཞིན་ཡོངས་སུ་དག་པ་ལ་གསར་དུ་སྒྲིབ་པར་མི་འགྱུར་རོ་ཞེ་ན། བདེན་ཏེ། གཞན་འདིར་འགྱུར་བ་དང་མི་འགྱུར་བ་དེ་བཞིན་དུ་གང་ལས་འགྱུར་བ་ནི་འཁོར་བའི་རྒྱུ་འདོད་ཆགས་ལ་སོགས་པའི་དྲི་མ་སྣ་ཚོགས་པའི་ཕྱིར་སླར་ཡང་ཆོས་ཐམས་ཅད་ཀྱིས་ཇི་ལྟར་མེད་པར་འགྱུར་ན། ཁྱད་པར་དུ་འཕགས་པའི་ལམ་བསྒོམ་པ་དེས་འགོག་སྟེ། དེའི་ཕྱིར་བཅོམ་ལྡན་འདས་ཀྱིས་འགོག་པ་མངོན་དུ་བྱ་ཞེས་སོ། །དེའི་ཕྱིར་ན་ཆོས་ཐམས་ཅད་རང་བཞིན་གྱིས་ཡོངས་སུ་དག་པ་ཞེས་བྱ་བ་ལ་སོགས་པའི་ཚིག་ལས་བསྐྱེད་པ་བཞིན་ནོ། །འདིར་མང་པོ་སྨྲས་པས་ཅི་ཞིག་བྱ། ཆོས་ཐམས་ཅད་ཀྱི་རང་བཞིན་ཡོངས་སུ་དག་པ་མངོན་དུ་བྱ་བའི་ཕྱིར། ཆོས་ཐམས་ཅད་སྟོང་པ་ཉིད་དོ་ཞེས་བསྒོམ་པར་བྱའོ། །དེ་ལ་འདིར་སྟོང་པ་ཉིད་ནི་ཡིད་ཙམ་གྱིས་དེ་བཞིན་དུ་འདིར་དེ་དང་དེའི་རྣམ་པས་བདག་ཉིད་སྣང་ཞིང་སོ་སོར་གསལ་བར་བྱ་སྟེ། དཔེར་ན་རྨི་ལམ་བཞིན་ནོ། །ཕྱི་རོལ་དུ་ཡིད་ཀྱིས་གཟུང་བ་མེད་དེ་ཡིད་ཀྱིས་སོ། །གཟུང་བའི་དངོས་པོ་མེད་ན་འཛིན་པའི་ཡིད་ཀྱང་མེད་དོ། །དེའི་ཕྱིར་ཆོས་ཐམས་ཅད་ཀྱང་ཡིད་ཀྱི་རང་བཞིན་ནོ། །དེ་རྣམས་ཀྱི་གཟུང་བ་དང་འཛིན་པ་ལ་སོགས་པའི་རྟོག་པའི་སྤྲོས་པ་མཐའ་དག་ཇི་སྙེད་པ། དོན་དམ་པ་སྟོང་པ་ཉིད་ཀྱི་དེ་ཁོ་ན་ཉིད་དོ། །འདིའི་དོན་གཉིས་སུ་མེད་པའི་སྣང་བ་ཙམ་གྱི་བདག་ཉིད་དུ་གཡོ་བ་དང༌། མི་གཡོ་བའི་འགྲོ་བ་ཐམས་ཅད་བསམ་པར་བྱའོ། །འདིར་དེ་བཞིན་དུ་སྟོང་པ་ཉིད་ནི། ཨོཾ་ཤཱུ་ནྱ་ཏཱ་ཛྙཱ་ན་བཛྲ་སྭ་བྷ་ཝ་ཨཱཏྨ་ཀོ྅ཧཾ་ཞེས་པའི་སྔགས་འདིས་བྱིན་གྱིས་བརླབ་པར་བྱའོ། །རི་དགས་ཀྱིས་མཚན་པའི་དྲི་མ་དང་བྲལ་བའི་མཚན་མོར་བྱེད་པའི་དཀྱིལ་འཁོར་གྱི་སྟེང་དུ་ཤིན་ཏུ་དཀར་ཞིང་དཀར་བའི་ཧྲཱིཿཡིག་གི་ས་བོན་ལས་བཅོམ་ལྡན་འདས་དཔལ་ལྡན་མཁའ་ལ་གཤེགས་པའི་འཇིག་རྟེན་དབང་ཕྱུག་སྟོན་ཀའི་ཟླ་བ་དྲི་མ་མེད་པའི་དཀྱིལ་འཁོར་བརྒྱ་ཤར་པ་ལྟར་ཤིན་ཏུ་དཀར་བའི་སྐུ་ཅན། མཆོག་ཏུ་སྒེག་པའི་ཉམས་འབར་ཞིང་ཡིད་དུ་འོང་བ། རིན་པོ་ཆེ་སྣ་ཚོགས་པ་ལ་སོགས་པས་བརྒྱན་ཅིང་རྣམ་པར་སྤྲས་པའི་སྐུ་མངའ་བ། རལ་བའི་ཅོད་པན་འཛིན་པ། པདྨ་
དཀར་པོ་རྒྱས་པའི་སྤྱན་མངའ་བ། བཅོམ་ལྡན་འདས་འོད་དཔག་ཏུ་མེད་པ་རྒྱལ་བའི་རིན་པོ་ཆེས་དབུ་རྣམ་པར་མཛེས་པ། གངས་ཀྱི་བྱེ་མའི་ཆུས་བཀྲུས་པ་བཞིན་དཀར་བའི་ན་བཟའ་སྐུ་ལ་བསྣམས་པ། ཤིང་རྟའི་འཁོར་ལོའི་ཚད་ཙམ་པའི་ཤིན་ཏུ་ཡིད་དུ་འོང་བའི་ཆུ་སྐྱེས་དཀར་པོའི་སྟེང་ན་གནས་པའི་རི་དགས་ཀྱི་མཚན་མ་དང་བྲལ་བའི་ཟླ་བའི་དཀྱིལ་འཁོར་གྱི་གདན་ལ་སྐྱིལ་ཀྲུང་ཕྱེད་པས་བཞུགས་པ། ཕྱག་གཡས་པ་མཆོག་སྦྱིན། གཡོན་པ་ཡིད་འཕྲོག་པའི་པདྨ་དཀར་པོ་ཁ་འབུས་པ་བསྣམས་པ། དེ་ལྟ་བུར་གྱུར་པའི་བཅོམ་ལྡན་འདས་ཀྱི་སྐུ་བདག་ཉིད་བསྐྱེད་ཅིང་བསྒོམ་པར་བྱའོ། །བཅོམ་ལྡན་འདས་ཀྱི་གཡས་ཕྱོགས་ལོགས་སུ་འཕགས་མ་སྒྲོལ་མ་དང་ནོར་བཟངས་སོ། །གཡོན་ཕྱོགས་ལོགས་སུ་ཁྲོ་གཉེར་ཅན་དང་རྟ་མགྲིན་བསྒོམ་པར་བྱའོ་ཞེས་སོ། །མགོ་བོར་དྲི་མ་མེད་པའི་ཟླ་བའི་དཀྱིལ་འཁོར་གྱི་སྟེང་དུ་ཨོཾ་ཡིག་གོ །དེའི་རྗེས་སུ་མགྲིན་པར་དྲི་མ་མེད་པའི་ཟླ་བའི་དཀྱིལ་འཁོར་གྱི་སྟེང་དུ་ཨཱཿཡིག་གོ །སྙིང་གར་དྲི་མ་མེད་པའི་ཀུ་མུ་ཏའི་གཉེན་གྱི་དཀྱིལ་འཁོར་གྱི་སྟེང་དུ་ཧཱུཾ་ཡིག་བལྟ་བར་བྱའོ། །དེའི་རིམ་པ་འདིས་ཇི་སྲིད་འདོད་ཀྱི་བར་དེ་སྲིད་བསྒོམ་པར་བྱའོ། །དེའི་རྗེས་ལ་དེ་བཞིན་དུ་དམ་ཚིག་སེམས་དཔའི་གཟུགས་ཀྱིས་བཅོམ་ལྡན་འདས་འཇིག་རྟེན་མགོན་པོའི་ཐུགས་ཀར་རི་དགས་ཀྱི་མཚན་མ་དང་བྲལ་ཞིང་དྲི་མ་མེད་པའི་རི་བོང་འཛིན་པའི་དཀྱིལ་འཁོར་གྱི་སྟེང་དུ་སྨིན་དྲུག་གི་ཟླ་བ་འམ། ཀུན་དའི་མདོག་ལྟ་བུའི་ཧྲཱིཿཡིག་གི་ས་བོན་ལས་སྐྱེས་པའི་འོད་ཟེར་ཁོར་ཡུག་གི་མཐར་ཐུག་པར་འཕྲོས་ཏེ། འཇིག་རྟེན་གསུམ་གྱི་མི་ཤེས་པའི་མུན་པ་བཅོམ་པར་གྱུར་ནས། ཐོག་མ་མེད་པ་ནས་ཡང་དག་པར་བསྒྲུབས་པའི་བཅོམ་ལྡན་འདས་ཡེ་ཤེས་སེམས་དཔའི་སྐུ་ཤིན་ཏུ་རིང་པོ་ནས་ནམ་མཁའི་ཕྱོགས་སུ་གདན་དྲངས་ཤིང་བཀུག་སྟེ། དེ་བཞིན་དུ་བཅོམ་ལྡན་འདས་མདུན་གྱི་ནམ་མཁའི་ཕྱོགས་སུ་བཞུགས་ནས་རིན་པོ་ཆེ་སྣ་ཚོགས་པས་སྤྲས་པའི་གསེར་གྱི་སྣོད་དུ་དྲི་བཟང་གི་ཆུ་དང༌། དྲི་ཞིམ་པོའི་མེ་ཏོག་བཅུག་སྟེ། དེས་དེ་བཞིན་དུ་གདན་དྲངས་པའི་ཡེ་ཤེས་སེམས་དཔའི་སྐུ་བཅོམ་ལྡན་འདས་འཇིག་རྟེན་མགོན་པོའི་ཞབས་ལ་མཆོད་ཡོན་ཕུལ་ནས། དེའི་རྗེས་སུ་ལྷའི་མེ་
ཏོག་དང༌། སྤོས་དང༌། མར་མེ་དང༌། ཞལ་ཟས་དང༌། དྲི་དང༌། ཕྲེང་བ་དང༌། བྱུག་པ་དང༌། ཕྱེ་མ་དང༌། ན་བཟའ་དང༌། གདུགས་དང༌། རྒྱལ་མཚན་དང༌། དྲིལ་བུ་དང༌། བ་དན་ལ་སོགས་པ་རྣམས་ཀྱིས་ཕྱི་དང༌། གསང་བའི་མཆོད་པ་དང༌། ཕྱི་རོལ་གྱི་སྣ་ཚོགས་པའི་རིམ་པས་དེ་བཞིན་དུ་བཅོམ་ལྡན་འདས་ཡེ་ཤེས་སེམས་དཔའི་བདག་ཉིད་ལ་མཆོད་པར་བྱའོ། །སླར་ཡང་མངོན་པར་མཆོད་ཅིང་བསྟོད་ནས་ཛཿཧཱུཾ་བཾ་ཧོཿཞེས་པའི་ཡི་གེ་བཞི་པོ་འདིའི་ཕྱག་རྒྱ་བལྟ་བར་བྱའོ། །ཅུང་ཟད་ཐལ་མོ་གུག་པོར་སྦྱར་ནས་གུང་མོ་རྩེ་མོར་བྱས་ཏེ། སོར་མོའི་ལྷག་མ་རྣམས་ཅུང་ཟད་ཁ་བསྡུས་ཤིང་ཁ་མངོན་དུ་བྱས་ཏེ། ཅུང་ཟད་མ་རེག་པར་གཟུང་བར་བྱའོ། །མཐེ་བོ་དང་མཛུབ་མོ་དག་ཉེ་བར་གནས་ཤིང་ཆུ་སྐྱེས་ཁ་བྱེ་བའི་ཕྱག་རྒྱའོ། །ཕྱག་རྒྱ་འདིས་དེ་བཞིན་དུ་གདན་དྲངས་ནས་བཅོམ་ལྡན་འདས་ཡེ་ཤེས་སེམས་དཔའི་མཚན་ཉིད་ཡོངས་སུ་མཉེས་པར་བྱས་ནས། ཡང་དམ་ཚིག་སེམས་དཔའི་གཟུགས་ལ་བཅོམ་ལྡན་འདས་ནང་དུ་བསྒོམ་པར་བྱའོ། །ཨོཾ་ཨཱཿཧཱུཾ་ཞེས་པ་འདིས་གཉིས་སུ་མེད་པ་འདི་དག་ཉིད་ལྷག་པར་མོས་པར་བྱའོ། །དེའི་རྗེས་ལ་རི་དགས་ཀྱི་མཚན་མ་དང་བྲལ་བའི་ཟླ་བའི་དཀྱིལ་འཁོར་གྱི་དབུས་སུ་ཐིམ་ཞིང༌། དྲི་མ་མེད་པའི་རྩེའི་དབང་པོའི་དཀྱིལ་འཁོར་བརྒྱའི་འོད་ཟེར་གྱི་ཚོགས་འབར་བའི་ཧྲཱིཿཡིག་གི་ས་བོན་ལས་རྣམ་པར་འཕྲོས་ནས་གྲངས་མེད་གཞལ་དུ་མེད་པའི་བཅོམ་ལྡན་འདས་དཔལ་ཁརས་པཱ་ཎི་འཇིག་རྟེན་དབང་ཕྱུག་རྗེ་བཙུན་ཕྱོགས་བཅུ་ནས་བྱོན་ཞིང་དཔག་ཏུ་མེད་པའི་འཇིག་རྟེན་གྱི་ཁམས་ཀྱི་ནམ་མཁའ་ལ་བཞུགས་ནས། ཡང་དེ་ན་གནས་པའི་སེམས་ཅན་རྣམས་ལ་གསེར་དང༌། རིན་པོ་ཆེ་དང༌། མུ་ཏིག་དང༌། མུ་མེན་དང༌། བྱི་རུ་དང༌། བཻ་ཌཱུཪྻ་དང༌། ཨིནྡྲ་ནཱི་ལ་ལ་སོགས་པའི་རིན་པོ་ཆེའི་ཆར་ཕབ་ནས། དབུལ་བ་ལ་སོགས་པའི་སྡུག་བསྔལ་བཅོམ་ཞིང༌། བླ་ན་མེད་པའི་དཔལ་འབྱོར་ལ་བཀོད་ནས། བདག་མེད་པ་ལ་སོགས་པའི་ཆོས་གསུངས་པས་བདུད་རྩིའི་རྒྱུན་བབ་པ་དེས་ཡང་དག་པར་ཚིམ་པར་བྱས་ནས་སླར་ཡང་རྒྱུན་མི་འཆད་པར་སྣ་ཚོགས་པའི་རབ་ཏུ་བྱེད་པས། གཞན་གྱི་དོན་མཛད་ནས་འགྲོ་པ་རྣམས་ཀྱང་བཅོམ་ལྡན་འདས་འཇིག་རྟེན་དབང་ཕྱུག་གི་གཟུགས་སུ་བསྐྱེད་ནས། དེ་ལ་ཡང་
བསིལ་ཟེར་བྱེད་པའི་དཀྱིལ་འཁོར་གྱི་དབུས་སུ་ཤེལ་དང༌། ནོར་བུའི་འོད་ཟེར་ཕྲེང་བ་ལྟ་བུའི་ཧྲཱིཿཡིག་གི་ས་བོན་བཀོད་ནས། དེ་བཞིན་དུ་བཅོམ་ལྡན་འདས་ནང་དུ་ཡང་དག་པར་ཞུགས་པར་གྱུར་ཏེ། དེ་ལྟ་བུ་ལ་སོགས་པ་སྤྲོ་བ་དང་བསྡུ་བའི་རིམ་པས་ཇི་སྲིད་ངལ་བར་མ་གྱུར་པ་དེ་སྲིད་དུ་བསྒོམ་པར་བྱའོ། །དེ་ནས་ཡང་བསྒོམས་པས་ངལ་ན་སྔགས་བཟླས་པར་བྱའོ། །དེ་ལ་སྔགས་ནི་འདིའོ། །ཨོཾ་ཧྲཱིཿསྭཱ་ཧཱ་སྔགས་གང་བཅོམ་ལྡན་འདས་འཇིག་རྟེན་མགོན་པོའི་སྙིང་པོ་ཐུན་མོང་མ་ཡིན་པའི་མཐུ་དང་ལྡན་པ་དེ་དག་གིས་དེ་བཞིན་དུ་སྔགས་ཀྱི་རྒྱལ་པོ་སྟེ། ཐམས་ཅད་ཀྱིས་དེ་བཞིན་དུ་རྒྱལ་བ་མཆོག་རྣམས་ཀྱིས་མངོན་པར་མཆོད་པས་བཀུར་སྟི་དང་ཕྱག་བྱའོ་ཞེས་སོ། །ཏིང་ངེ་འཛིན་ལས་ལངས་ནས་འགྲོ་བ་རྣམས་འཇིག་རྟེན་དབང་ཕྱུག་གི་སྐུར་བལྟ་ཞིང༌། དེའི་ང་རྒྱལ་བྱས་ནས་ཇི་ལྟར་འདོད་པ་བཞིན་གནས་པར་བྱའོ་ཞེས་སོ། །ཆོ་ག་འདིས་བཅོམ་ལྡན་འདས་མང་དུ་བསྒོམས་ན། རལ་གྲི་ལ་སོགས་པའི་དངོས་གྲུབ་མཐའ་དག་མངོན་དུ་བྱེད་ཅིང་ཞབས་ཀྱི་དྲུང་དུ་ཡང་དག་པར་འབྱུང་ཞིང་འཇུག་ན། གཞན་དངོས་གྲུབ་ཕྲ་མོ་སྨོས་ཅི་དགོས་ཏེ། ངེས་པར་འབྱུང་ངོ༌། །གང་ཞིག་སྐྱེ་བོས་དབེན་པའི་ནགས་ཚལ་དང༌། དུར་ཁྲོད་དང༌། རིའི་ཕུག་རྣམས་སུ་གནས་ནས་བཅོམ་ལྡན་འདས་སྒོམ་པ་དེ་རྣམས་ཀྱིས་ཡུན་མི་རིང་བར་དེ་བཞིན་དུ་འདིར་ངེས་པར་བཅོམ་ལྡན་འདས་མངོན་དུ་བྱེད་དེ། བཅོམ་ལྡན་འདས་རང་ཉིད་ཀྱིས་དེ་རྣམས་ཀྱི་དབུགས་འབྱིན་པ་དང་རང་ཏུ་དབུགས་འབྱིན་པ་ལ་སོགས་པ་སྟེར་བར་མཛད་དོ། །ངེས་པར་ཞུགས་ན་མང་པོ་སྨྲས་པས་ཅི་ཞིག་བྱ། །མཆོག་ཏུ་ཤིན་ཏུ་རྙེད་པར་དཀའ་བའི་སངས་རྒྱས་ཉིད་ཀྱང་དེ་རྣམས་ཀྱི་ལག་པའི་མཐིལ་ན། རག་ཆུང་གི་འབྲས་བུ་གཞག་པ་བཞིན་དུ་འགྱུར་རོ་ཞེས་སོ། །དཔལ་ལྡན་མཁའ་སྤྱོད་འཇིག་རྟེན་མགོན། །མཆོག་གི་སྒྲུབ་ཐབས་བྱས་པ་ཡིས། །བསོད་ནམས་གང་བསགས་དེ་ཡིས་ནི། །འཇིག་རྟེན་ཐུབ་པའི་དྲུང་འགྲོ་ཤོག །དཔལ་ལྡན་མཁའ་སྤྱོད་འཇིག་རྟེན་དབང་ཕྱུག་གི་སྒྲུབ་ཐབས་ཅུང་ཟད་རྒྱས་པར་མཛད་པ། ཨ་ནུ་པ་མ་རཀྵི་ཏས་མཛད་པ་རྫོགས་སོ།།