ཚིག་ལྷུག་པའི་ཨ་ར་པ་ཙ་ནའི་སྒྲུབ་ཐབས།
རྒྱ་གར་སྐད་དུ། མུག་ཏེ་ཀེ་ན་ཨ་ར་པ་ཙ་ན་སཱ་དྷ་ནཾ། བོད་སྐད་དུ། ཚིག་ལྷུག་པའི་ཨ་ར་པ་ཙ་ནའི་སྒྲུབ་ཐབས། འཕགས་པ་འཇམ་དཔལ་ལ་ཕྱག་འཚལ་ལོ། །དང་པོ་རེ་ཞིག་སྔགས་པས་ཡིད་དང་མཐུན་པའི་ཕྱོགས་འགའ་ཞིག་ཏུ་སྟན་བདེ་བ་ལ་ཉེ་བར་འདུག་སྟེ། རང་གི་སྙིང་གར་ཡི་གེ་དང་པོ་ལས་བྱུང་བའི་ཟླ་བ་ལ་ལྔ་པའི་བཞི་པའི་ས་བོན་ལ་ཨཱ་ཡིག་དང་མཐར་ཐིག་ལེ་གཉིས་དང་ལྡན་པ་རྣམ་པར་བསྒོམས་ལ། དེ་ནས་དེའི་འོད་ཟེར་གྱི་ཚོགས་ཀྱིས་སྙིང་ལ་གནས་པའི་ཉོན་མོངས་པའི་མུན་པ་བསལ་ནས་བྱམས་པ་དང༌། སྙིང་རྗེ་དང༌། དགའ་བ་དང༌། བཏང་སྙོམས་ཞེས་པ་ཚད་མེད་པའི་གནས་བཞི་བསྒོམ་པར་བྱའོ། །འཆད་པར་འགྱུར་བའི་རིམ་པས་བྱམས་པ་གང་ཞེ་ན། སེམས་ཅན་ཐམས་ཅད་ལ་བུ་གཅིག་པ་ལྟར་རབ་ཏུ་དགའ་བའོ། །སྙིང་རྗེ་གང་ཞེ་ན། སྡུག་བསྔལ་གསུམ་གྱིས་གདུངས་པའི་སེམས་ཅན་རྣམས་འཁོར་བའི་རྒྱ་མཚོ་ལས་གདོན་པར་འདོད་པའོ། །དགའ་བ་གང་ཞེ་ན། དགེ་བའི་རྩ་བ་བསྐྱེད་པས་གཞན་གྱི་དབང་ཕྱུག་ལ་སོགས་པ་རྣམས་ལ་ལོངས་སྤྱོད་པ་ལ་སེམས་དགའ་བའོ། །བཏང་སྙོམས་གང་ཞེ་ན། རྣམ་པ་ཐམས་ཅད་དུ་ཁོང་ཁྲོ་བ་དང༌། རྗེས་སུ་ཆགས་པ་དང་
བྲལ་ཞིང་གཞན་ལ་ཕན་པའི་ཆོས་ཉིད་རང་གི་ངང་གིས་འབབ་ཅིང་རབ་ཏུ་འཇུག་པའོ་ཞེས་པའི་ཚད་མེད་པའི་གནས་བཞི་བསྒོམས་ནས། དེའི་རྗེས་སུ་རང་གི་སྙིང་གའི་ས་བོན་ཉིད་ལས་བྱུང་བའི་འོད་ཟེར་གྱིས་ནམ་མཁའི་ཕྱོགས་མཐའ་དག་ཁྱབ་པའི་བླ་མ་དང་སངས་རྒྱས་དང་བྱང་ཆུབ་སེམས་དཔའ་རྣམས་སྤྲོ་བ་དང་བསྡུ་བས་གཞན་འགྲོ་བ་རྣམས་ཀྱི་དོན་གྱི་བྱ་བ་གཅིག་ཏུ་བྱེད་པར་བལྟས་ལས། རང་གི་སྙིང་གའི་ས་བོན་གྱི་འོད་ཟེར་གྱིས་དེ་བཞིན་དུ་ལྷའི་དྲི་བཟངས་དང་མེ་ཏོག་ལ་སོགས་པ་ཁྱད་པར་འཕགས་པ་བྱུང་སྟེ། མཎྜལ་སྔོན་དུ་འགྲོ་བས་ཐལ་མོ་སྦྱར་ཏེ། བླ་མ་དང་སངས་རྒྱས་དང་བྱང་ཆུབ་སེམས་དཔའ་རྣམས་ཀྱི་ཞབས་ཀྱི་ཆུ་སྐྱེས་ལ་སྤྱི་བོས་བཏུད་ཅིང་གུས་པས་ཕྱག་འཚལ་ནས། འོད་ཟེར་དེ་ཉིད་ལས་བྱུང་བའི་མེ་ཏོག་དང༌། བདུག་པ་དང༌། མར་མེ་དང༌། ཕྱེ་མ་དང༌། དྲི་དང༌། ན་བཟའ་དང༌། རྒྱལ་མཚན་དང༌། དྲིལ་བུ་དང༌། བ་དན་ལ་སོགས་པ་རྣམས་ཀྱིས་དེ་རྣམས་ལ་ཕྱི་དང་ནང་གི་མཆོད་པ་རྣམས་ཀྱིས་མཆོད་པ་ནི་མཆོད་པའོ། །དེ་ནས་སྡིག་པ་བཤགས་པ་ལ་སོགས་པ་བྱའོ། །འདོད་ཆགས་ཞེ་སྡང་གཏི་མུག་ལས་གྱུར་པའི། །ལུས་དང་ངག་དང་གཞན་ཡང་ཡིད་ཀྱིས་ཀྱང༌། །སྡིག་པ་བགྱིས་དང་དེ་བཞིན་བགྱིད་སྩལ་རྣམས། །ཐམས་ཅད་རྒྱལ་བ་རྣམས་ཀྱི་མདུན་དུ་བཤགས། །ཞེས་པ་ནི་སྡིག་པ་བཤགས་པའོ།། གང་ཡང་དེ་བཞིན་གཤེགས་ཀུན་བསོད་ནམས་དང༌། །གཞན་ཡང་རྫོགས་པའི་བྱང་ཆུབ་ལམ་བསྟེན་དང༌། །རང་སངས་རྒྱས་དང་བླ་མ་མཆོག་རྣམས་ཀྱི། །དགེ་བ་ཀུན་ལ་བདག་ནི་རྗེས་ཡི་རང༌། །ཞེས་པ་ནི་བསོད་ནམས་ལ་རྗེས་སུ་ཡི་རང་བའོ། །དུས་གསུམ་ཀུན་དུ་གཤེགས་པའི་སངས་རྒྱས་དང༌། །ནམ་མཁའི་ཕྱོགས་ཁྱབ་བརྩེ་ལྡན་ཡོན་ཏན་ཚོགས། །སྐྱོན་སྤངས་འཕགས་པའི་ཚོགས་དང་དམ་པའི་ཆོས། །གུས་པས་བདག་ནི་སྐྱབས་སུ་ཉེ་བར་མཆི། །ཞེས་པ་ནི་གསུམ་ལ་སྐྱབས་སུ་འགྲོ་བའོ། །ཡོངས་སུ་དག་པ་རྒྱལ་བའི་ལམ་བསྟེན་པ། །ཚངས་དབང་དྲག་པོ་སོགས་པས་རྙེད་དཀའ་བ། །གང་འདིར་བསོད་ནམས་ཚོགས་ནི་ཉེར་བསགས་པ། །བྱང་ཆུབ་སེམས་འདི་རབ་ཏུ་བསྐྱེད་པར་བགྱི། །ཞེས་པ་ནི་རྒྱལ་བའི་ལམ་ལ་བསྟེན་པ་དང༌། བྱང་ཆུབ་ཏུ་སེམས་བསྐྱེད་པའི་ཚིག་གོ །དེ་བཞིན་དུ་བླ་ན་མེད་པའི་མཆོད་པ་རྣམ་པ་བདུན་གྱིས་མཆོད་ནས། དེའི་རྗེས་སུ་བླ་མའི་གསུང་
གིས་ཕྱི་དང་ནང་དུ་བཅས་པ་ཐམས་ཅད་སྟོང་པ་ཉིད་དུ་བསྒོམས་ནས་ཡང་བརྟན་པར་བྱ་བའི་ཕྱིར། ཨོཾ་སྭ་བྷཱ་བ་ཤུདྡྷཿསརྦ་དྷརྨཱཿསྭབྷཱ་བ་ཤུདྡྷོ྅ཧཾ། ཞེས་པའི་ཚིགས་སུ་བཅད་པ་བརྗོད་པར་བྱའོ། །དེའི་རྗེས་སུ་རང་གི་སེམས་ཀྱི་སྣང་བ་ཙམ་དང་ས་ཤིང་ཐོགས་པ་མེད་པའི་གཟུགས་དབྱངས་ཡིག་དང་པོ་ལས་བྱུང་བའི་ཟླ་བའི་དཀྱིལ་འཁོར་གྱི་རྣམ་པར་བསམས་ལ། དེའི་སྟེང་དུ་སྔོན་དུ་གསུངས་པའི་ས་བོན། དེ་ནས་ཟླ་བ་དང་ས་བོན་ཡོངས་སུ་གྱུར་པ་ལས་རལ་གྲི་འོད་འཕྲོ་བའི་གཟུགས་སོ། །དེ་ནས་ཚངས་པའི་དབུས་སུ་རི་བོང་འཛིན་པའི་སྟེང་དུ་སྔོན་དུ་གསུངས་པའི་ས་བོན་དང༌། རལ་གྲི་ཡོངས་སུ་གྱུར་པ་ལས་འཇམ་དཔལ་དབྱངས་སྟོན་ཀའི་ཟླ་བ་དང་མཚུངས་པའི་འོད་ཕྱོགས་བཅུའི་འཇིག་རྟེན་གསལ་བར་བྱེད་པའི་འོད་ཀྱི་ཚོགས་འཆང་བ། ཕྱག་གཉིས་པ་གཞོན་ནུའི་རྣམ་པ་ཅན། ཕྱག་གཡས་པ་ན་མི་ཤེས་པ་མ་ལུས་པ་གཅིག་ཏུ་གཅོད་པར་བྱེད་པའི་རལ་གྲི་བསྣམས་པ། གཡོན་ན་ཐབས་སུ་གྱུར་པ་མ་ལུས་པའི་བསྟན་བཅོས་ཀྱི་པོ་ཏི་ཕྱག་ན་བསྣམས་པ། རྒྱན་ཐམས་ཅད་ཀྱིས་བརྒྱན་པ། ན་བཟའ་དམར་པོ་མནབས་པ། བསམ་གཏན་ལ་རྩེ་གཅིག་ཏུ་གནས་པ། པདྨ་རབ་ཏུ་རྒྱས་པའི་ཞལ་མངའ་བ། པདྨའི་སྤྱན་མངའ་བ། སྐྱེས་བུ་ཆེན་པོའི་མཚན་གྱིས་སྤྲས་པ། ཨིནྡྲ་ནཱི་ལའི་ནོར་བུ་ལྟ་བུའི་དབུ་སྐྲའི་ཚོགས་ཟུར་ཕུད་ལྔ་དང་ལྡན་པ། ཆུ་སྐྱེས་དཀར་པོ་འདབ་མ་བརྒྱད་པ་དང་ཟླ་བ་ལ་རྡོ་རྗེ་སྐྱིལ་ཀྲུང་གིས་ཉེ་བར་བཞུགས་པ། དེ་བཞིན་གཤེགས་པ་ཐམས་ཅད་ཀྱི་ཡེ་ཤེས་ཀྱི་ངོ་བོ་ཉིད་འཇམ་དཔལ་གྱི་སྐུར་བདག་ཉིད་བསྒོམས་ལ། དེ་ལྟར་རྣལ་འབྱོར་པ་དམ་ཚིག་སེམས་དཔའི་ང་རྒྱལ་དང་ལྡན་པས་རང་གི་སྙིང་གར་ཨ་ཡིག་ལས་སྐྱེས་པའི་འཁོར་ལོ་རྩིབས་བརྒྱད་པ། འོད་ཟེར་གྱི་ཚོགས་འཕྲོ་བས་མི་ཤེས་པ་མ་ལུས་པ་འཇོམས་པར་བྱེད་པ་མྱུར་དུ་གཡས་སུ་འཁོར་བར་བྱེད་པའི་རིམ་པ་བལྟས་ལ། དེའི་སྟེང་དུ་བར་སྣང་ལ་དབྱངས་ཡིག་དང་པོ་ལས་ཟླ་བའི་དཀྱིལ་འཁོར། དེའི་སྟེང་དུ་ཡི་གེ་ལྔ་རིམ་པ་ཇི་ལྟ་བ་བཞིན་དུ་མར་མེ་འབར་བའི་རྣམ་པ་ལྟ་བུས་འོད་ཟེར་དང་བཅས་པས་མི་ཤེས་པ་མཐའ་དག་གཅོད་པར་བྱེད་པ་བླ་མའི་མན་ངག་གིས་བསྒོམ་པར་བྱའོ། །ལྷའི་རྣམ་པ་རྫོགས་པ་ལས་སྔགས་པས་ལེ་ལོ་མེད་པར་སྤྲོ་བ་ལ་སོགས་པ་བྱས་ནས་བཟླས་པ་བྱའོ། །ཡང་ན་སྙིང་གའི་ཟླ་བའི་དབུས་སུ་ཨ་ཡིག་དཀར་པོའི་རྣམ་པ་
རྫོགས་པ་ལས་ཨ་ར་པ་ཙ་ན་ཞེས་པ་དཀར་པོ་རྒྱན་ཐམས་ཅད་ཀྱིས་བརྒྱན་པ། དགའ་བའི་བསམ་གཏན་ལ་རྩེ་གཅིག་ཏུ་གནས་པ། རྡོ་རྗེ་སྐྱིལ་མོ་ཀྲུང་གིས་ཉེ་བར་བཞུགས་པ། ཕྱག་གཡས་པ་དང་གཡོན་པ་དག་གིས་རལ་གྲི་དང་པོ་ཏི་བསྣམས་པ། ཨིནྡྲ་ནཱི་ལ་ལྟ་བུའི་རལ་པའི་ལྕང་ལོ་ལྔ་དང་ལྡན་པ། འོད་འཕྲོ་བའི་ཟླ་བའི་ཞལ་ཟླ་བལྟ་བུས་སྨྲ་བའི་མཆོག་གོ །ཟླ་བ་ལ་རང་གི་ས་བོན་དང་བཅས་པ་སྙིང་གར་བསྒོམས་ལ། དེའི་མདུན་དུ་ར་ཡིག་དཀར་པོ་ལས་བྱུང་བའི་དྲ་བ་ཅན་གྱི་འོད་རང་གི་ས་བོན་གནས་པར་བལྟའོ། །དེའི་རྗེས་སུ་རྒྱབ་ཏུ་པ་ཡིག་དཀར་པོ་ལས་བྱུང་བའི་ཟླ་འོད་རང་གི་སྙིང་གའི་ཟླ་བ་ལ་ས་བོན་དང་ལྡན་པར་བལྟའོ། །དེ་ནས་གཡས་སུ་ཙ་ཡིག་དཀར་པོ་ལས་བྱུང་བའི་སྐྲ་ཅན་མ་དཀར་མོ་རྒྱན་ཐམས་ཅད་ཀྱིས་བརྒྱན་པ། ནུ་མ་རྒྱས་པ་རང་གི་སྙིང་གའི་ས་བོན་དང་ལྡན་པ་བསྒོམ་པར་བྱའོ། །དེ་ནས་གཡོན་དུ་ན་ཡིག་དཀར་པོ་ལས་བྱུང་བའི་ཉེ་བའི་སྐྲ་ཅན་མ་རང་གི་སྙིང་གའི་ཟླ་བ་ལས་ས་བོན་དང་ལྡན་པར་བསྒོམ་པར་བྱའོ། །ཐམས་ཅད་ཨ་ར་པ་ཙ་ན་དང་འདྲ་བར་རྣམ་པར་བསམ་པར་བྱའོ། །ལྷའི་ཚོགས་འདི་རྣམས་སྙིང་གའི་ས་བོན་གྱི་འོད་ཟེར་ལས་སྤྲོ་བ་དང་བསྡུ་བས་འགྲོ་བ་རྣམས་ཀྱི་མི་ཤེས་པའི་ཚོགས་གཅོད་ཅིང་ཆོས་ཀྱི་བདུད་རྩི་དང༌། བསྟན་བཅོས་མཐའ་དག་དང༌། བཟོའི་ཚོགས་རྣམས་ཀྱིས་སེམས་ཅན་ཐམས་ཅད་ཡང་དང་ཡང་དུ་ཡང་དག་པར་ཚིམ་པར་མཛད་པ། དྲི་མ་མེད་ཅིང་ཐོགས་པ་མེད་པའི་རང་བཞིན་དུ་བདག་ཉིད་བསྒོམ་པར་བྱའོ། །བླ་མའི་མན་ངག་གིས་ཏིང་ངེ་འཛིན་དང་སྔགས་བཟླས་པར་བྱ་སྟེ། ཨོཾ་ཡིག་དང་པོར་བྱས་ལ་ས་བོན་གྱི་ཡི་གེ་ལྔ་པོ་དབུས་སུ་བྱས་ནས་དམ་ཚིག་སེམས་དཔའི་ས་བོན་གྱི་མཐར་སྔགས་སོ། །གང་གི་ཚེ་ལྡང་བར་འདོད་པ་དེའི་ཚེ་རང་གི་སྔགས་བླ་མའི་མན་ངག་གིས་བཟླས་པར་བྱའོ། །དེའི་རྗེས་སུ་ཡི་གེ་བརྒྱ་པའི་ཚིགས་སུ་བཅད་པ་བརྗོད་པར་བྱའོ། །ཨོཾ་བཛྲ་ས་ཏྭ་ས་མ་ཡ། མ་ནུ་པཱ་ལ་ཡ། བཛྲ་སཏྭ་ཏྭེ་ནོ་པ། ཏིཥྛ་དྲྀ་ཌྷོ་མེ་བྷ་བ། སུ་ཏོ་ཥྱོ་མེ་བྷ་བ། སུ་པོ་ཥྱོ་མེ་བྷ་བ། ཨ་ནུ་རཀྟོ་མེ་བྷ་བ། སརྦ་སིདྡྷི་མྨེ་པྲ་ཡཙྪ། སརྦ་ཀརྨྨ་སུ་ཙ་མེ། ཙིཏྟཾ་ཤྲེ་ཡཿཀུ་རུ་ཧཱུཾ། ཧ་ཧ་ཧ་ཧ་ཧོཿ། བྷ་ག་བཱ་ན་སརྦ་ཏ་ཐཱ་ག་ཏ། བཛྲ་མཱ་མེ་མུཉྩ་བཛྲཱི་བྷ་བ་མ་ཧཱ་ས་མ་ཡ་ས་ཏྭ་ཨཱཿཞེས་པའི་ཡི་གེ་བརྒྱ་པ་བཀླགས་ནས་སྤྲོ་བ་དང་བསྡུ་བ་ལ་སོགས་པ་བྱས་ནས། དམ་ཚིག་
སེམས་དཔའི་ང་རྒྱལ་གྱིས་ཅི་བདེར་གནས་པར་བྱའོ། །ཏིང་ངེ་འཛིན་དང་ལྡན་པའི་རྣལ་འབྱོར་པས་ཡང་དག་པའི་ཡེ་ཤེས་ཀྱི་རྒྱ་མཚོའི་ཕ་རོལ་དུ་ཕྱིན་པར་གྱུར་ནས་དུས་རིང་པོར་མི་ཐོགས་པར་བླ་ན་མེད་པའི་བྱང་ཆུབ་ཐོབ་པར་འགྱུར་རོ་ཞེས་སོ། །ཚིག་ལྷུག་གསལ་པོ་འདི་ཡིས་ནི། །དཀར་པོའི་སྒྲུབ་ཐབས་ཡང་དག་བྲིས། །པདྨའི་འབྱུང་གནས་བསོད་ནམས་གང༌། །དེ་ཡིས་སྲིད་ལས་གྲོལ་བར་ཤོག །ཚིག་ལྷུག་པའི་ཨ་ར་པ་ཙ་ནའི་སྒྲུབ་ཐབས་རྫོགས་སོ།།