ངག་གི་སྒྲུབ་ཐབས།
རྒྱ་གར་སྐད་དུ་བཱ་གཱ་སཱ་དྷ་ནཾ། བོད་སྐད་དུ། ངག་གི་སྒྲུབ་ཐབས། འཕགས་པ་འཇམ་དཔལ་ལ་ཕྱག་འཚལ་ལོ། །ཉེས་པའི་དྲི་འཇོམས་དཔལ་ལྡན་རྡོ་རྗེ་ཆོས། །ངག་གི་དཀྱིལ་འཁོར་འོད་ཟེར་དྲ་བ་འཕྲོ། །རྫོགས་སངས་རྒྱས་ཀུན་གྱི་གསུང་གི་རང་བཞིན་ལ། །ཕྱག་འཚལ་ནས་ནི་ངག་གི་སྒྲུབ་ཐབས་བཤད། །མཁས་པས་བརྩོན་འགྲུས་རླུང་གིས་རབ་བསྐྱོད་ནས། །སྔགས་ཀྱི་རང་བཞིན་རྣམ་དག་གཟུགས་བརྗོད་ཅིང༌། །འཇིག་རྟེན་ཚོགས་པ་འདིར་ནམས་སྒྱུ་མ་དང༌། །སྨིག་རྒྱུ་ཆུ་ཟླའི་རྟོག་པ་བཞིན་དུབ་སྒོམ། །པཾ་ཡིག་ས་བོན་ལས་བྱུང་སྣ་ཚོགས་པད། །བསྒོམ་བྱ་རྣམ་པར་དག་པ་ཀུན་གྱི་གཟུགས། །ཨཾ་ཡིག་ལས་སྐྱེས་འོད་ཟེར་མཐའ་ཡས་པ། །རྣམ་དག་ཟླ་བ་ཆ་ཤས་ཀུན་རྫོགས་པ། །སླར་ཡང་གསང་བ་མཆོག་གྱུར་དག་པ་ཡི། །ས་བོན་ཡི་གེ་འོད་ཟེར་དྲ་བ་འགྱེད། །བནྡྷུའི་མེ་ཏོག་འོད་ཟེར་དང་མཚུངས་པའི། །ངག་གི་སྤྲོས་པ་བརྐྱང་མཛད་རྒྱུ་གཅིག་པོ། །ས་བོན་ལས་བྱུང་སྐྱོན་དུ་མ་གྱུར་བའི། །
ཏིང་འཛིན་ཕྱག་རྒྱ་ཚིམ་མཛད་པདྨའི་ཕྱག །བརྩེ་བས་མངོན་དགའ་རྡོ་རྗེའི་གདན་ལ་བཞུགས། །རྡོ་རྗེའི་ཆགས་པ་དཔལ་ལྡན་ཡོངས་དག་ཆགས། །བ་སྤུའི་ཁུང་བུ་ལས་བྱུང་སངས་རྒྱས་ཀྱི། །སྤྲིན་ཚོགས་དྲ་བ་འགྲོ་ལ་ཕན་པར་མཛད། །འགྲོ་བ་རྣམས་ཀྱི་རང་བཞིན་ཐམས་ཅད་ཀྱང༌། །ཤིན་ཏུ་རྣམ་དག་བློ་ཡིས་བསྒོམ་པར་བྱ། །སྙིང་གར་ཟླ་བའི་དཀྱིལ་དུ་རྡོ་རྗེ་ཡི། །འོད་ཟེར་དྲ་བས་འཇིག་རྟེན་ཀུན་གསལ་བལྟ། །མགོན་པོ་ཧཱུཾ་ཡིག་ལས་ནི་སྐྱེས་གྱུར་པ། །སྐུ་ལྔའི་བདག་ཉིད་ལས་བྱུང་སངས་རྒྱས་སྤྲིན། །དེ་དབུས་རྩེ་མོ་འཕྲོ་བའི་མེ་ཡི་ཁྲོད། །སྐུ་གནས་སྲིད་པ་གསུམ་པོ་སྣང་བར་མཛད། །འབྱུང་པོའི་རྒྱུད་ཀྱི་སྡུག་བསྔལ་ཀུན་ཁྱབ་རྣམས། །ཡི་གེ་ཆེན་པོས་གང་བ་རྣམ་པར་འཇོམས། །བརྗོད་པ་རབ་མཛེས་འོད་ཟེར་གྱིས་ཁྱབ་པས། །དྲི་མེད་ཉི་མ་འཆར་ཀ་དགའ་བས་ཆགས། །ལྗགས་སྐྱེས་ལེགས་གསུང་ཤེས་རབ་མཆོག་གི་སྤྲིན། །རྡོ་རྗེ་ལས་བྱུང་སྡིག་པ་རྣམ་པར་འཇོམས། །དེ་ཡི་རྩེ་མོར་གཡོ་ཞིང་རབ་ཆགས་པའི། །འོད་ཟེར་རྒྱ་ཆེན་དེ་ཉིད་བསམ་པར་བྱ།། བདག་གི་བརྩོན་འགྲུས་མཐུ་ཡིས་གཞན་ཟིལ་གནོན། །མཆོག་གི་མཐུ་ལྡན་རྒོལ་བ་ངེས་པར་འཇོམས། །སྐད་ཅིག་ལ་གོམས་སྟོབས་ལ་སྐྱེས་གྱུར་པ། །ངག་འགྲུབ་དངོས་གྲུབ་རྣམས་ནི་ཉེར་ཐོབ་འགྱུར། །ཚིགས་བཅད་རྐྱང་པས་རྟག་ཏུ་སྨྲ་འགྱུར་ཞིང༌། །རྣལ་འབྱོར་བསྟན་བཅོས་སྣ་ཚོགས་རིག་པ་དང༌། །བསྟན་བཅོས་སྣ་ཚོགས་ངེས་པར་རྩོམ་འགྱུར་ཞིང༌། །རང་ཉིད་འགྲོ་བའི་ཆེད་དུ་དོན་ཆེན་འགྱུར། །གཞན་གྱི་སེམས་ཀྱིས་འཇུག་པའང་འདུ་ཤེས་འགྱུར། །ཆགས་སོགས་སྡིག་པ་རྣམས་ཀྱང་དེ་ཡིས་འཇོམས། །དེ་ལ་ཏིང་འཛིན་བརྟན་པ་ཐོབ་གྱུར་ནས། །ཤིན་ཏུ་ཕྲ་ཞིང་རྣོ་འཕྲོ་ངེས་པ་ཡིས། །སངས་རྒྱས་གོ་འཕང་ཀུན་ཐོབ་གཟུགས་འཛིན་འགྱུར། །དེ་དག་འདིར་ནི་རྣམ་པར་སྤྱད་བྱ་མིན། །རྣལ་འབྱོར་གོམས་པར་གྱུར་ན་སྐྱེས་བུ་ཡི། །འབྱུང་དང་མ་བྱུང་བ་རྣམས་མདུན་གནས་འགྱུར། །འདོད་པས་འཁྲུགས་བཞིན་དགའ་ཞིང་ཆགས་པ་ཡིས། །སེམས་ཀྱི་རྗེས་འཇུག་སྦྱོར་བ་དང་ལྡན་གྱུར། །འདི་བྱས་བདག་གིས་དགེ་བ་ཉེར་བསགས་གང༌། །འགྲོ་རྣམས་རྒྱལ་བའི་དཔལ་མཆོག་འཛིན་གྱུར་ཅིག །རི་བོང་འཛིན་པའི་འོད་ཟེར་ཉེ་བ་ཡིས། །མྱ་ངན་ཟུག་རྔུ་ཡིད་འཇིགས་དང་
འབྲལ་ཤོག །རྒྱུན་མི་འཆད་པས་དགེ་ལ་ཡིད་ཆགས་པས། །བློ་མཆོག་ལས་རྙེད་བདེ་བའི་མན་ངག་གི །རང་བཞིན་འདི་ཡིས་པདྨའི་རིགས་འཇུག་ཅིང༌། །དཔལ་ནི་རྗེས་འཇུག་ཏིང་ངེ་འཛིན་དགའ་བར་ངེས། །བདག་ཀྱང་ལེགས་པའི་སྐྱེ་བོ་སྲིད་རྩེ་འདིས། །འབར་བའི་ཕྲེང་བའི་དབུས་ཀྱི་སྐུར་གྱུར་ཅིག །བླ་མ་མཆོག་གི་བརྩེ་བས་ཐོད་ཕྲེང་གི །ཆུ་འཛིན་གྱིས་གང་མངོན་རོལ་དཔལ་ཚོགས་ཤོག །ངག་གི་སྒྲུབ་ཐབས་མཆོག་གྱུར་པ། །སྐྱེ་བོ་བཟང་པོས་ལེགས་སྦྱར་བ། །འདི་ཡིས་ངག་ནི་བསྒྲུབས་བྱས་ནས། །ངག་གི་དབང་ཕྱུག་ཐོབ་པར་ཤོག །ངག་གི་སྒྲུབ་ཐབས་རྫོགས་སོ། །