འཕགས་པ་འཇམ་པའི་རྡོ་རྗེ་དཔའ་བོ་གཅིག་པའི་སྒྲུབ་ཐབས།
རྒྱ་གར་སྐད་དུ། ཨཱཪྻ་མཉྫུ་བཛྲ་སིདྡྷཻ་ཀ་བཱི་ར་སཱ་དྷ་ནཾ། བོད་སྐད་དུ། འཕགས་པ་འཇམ་དཔལ་རྡོ་རྗེ་དཔའ་བོ་གཅིག་པའི་སྒྲུབ་ཐབས། འཕགས་པ་འཇམ་དཔལ་ལ་ཕྱག་འཚལ་ལོ། །སྟོན་ཀའི་ཟླ་འདྲའི་འོད་གསལ་བའི། །འཇམ་དཔལ་རྡོ་རྗེ་ལ་ཕྱག་འཚལ། །དེ་ཡི་སྒྲུབ་ཐབས་གསལ་པོ་མཆོག །མདོར་བསྡུས་བདག་གིས་བརྗོད་པར་བགྱི། །དང་པོ་རེ་ཞིག་སྔགས་པས་ཡིད་དང་མཐུན་པའི་གཙང་མའི་ས་ཕྱོགས་སུ་བདེ་བའི་གདན་ལ་བསྡད་ནས། རང་གི་སྙིང་གར་ཨཾ་ཡིག་ལས་བྱུང་བའི་ཟླ་བ་ལ་མཾ་དཀར་པོ་དེ་ཉིད་རྣམ་པར་དགོད་པར་བྱའོ། །དེའི་འོད་ཟེར་གྱིས་ནམ་མཁའ་གང་བས་བཅོམ་ལྡན་འདས་བླ་མ་རྗེ་བཙུན་ནམ་མཁའ་ལ་བལྟས་ཏེ། དེ་ནས་བཅོམ་ལྡན་འདས་ཀྱི་མདུན་དུ་གནས་ལ་ཡིད་ཀྱིས་རང་བཞིན་གྱི་མཆོད་པས་བཅོམ་ལྡན་འདས་འཇམ་དཔལ་མཆོད་དེ། དགེ་བ་སྤེལ་བའི་དོན་དུ་སྡིག་པ་ཐམས་ཅད་སོ་སོར་བཤགས་པར་བགྱི་བ་དང༌། བསོད་ནམས་ཐམས་ཅད་ལ་རྗེས་སུ་ཡི་རང་བ་དང༌། དེ་ཡང་བླ་ན་མེད་པའི་སངས་རྒྱས་ཀྱི་བྱང་ཆུབ་ཏུ་ཡོངས་སུ་བསྔོ་བར་བགྱི་བ་དང་བྱང་ཆུབ་ཀྱི་བར་དུ་སངས་རྒྱས་དང༌། ཆོས་དང༌། དགེ་འདུན་ལ་སྐྱབས་སུ་མཆི་བ་དང༌། ཡང་དག་པའི་བྱང་ཆུབ་ཏུ་སེམས་བསྐྱེད་པར་བགྱིའོ། །དེ་ནས་བཅོམ་ལྡན་འདས་རང་གི་ས་བོན་དང་ལྷན་ཅིག་ཏུ་གྱུར་པར་བལྟའོ། །ཁམས་གསུམ་པོ་གཡོ་བ་དང༌། མི་གཡོ་བ་ཐམས་ཅད་རྟེན་ཅིང་འབྲེལ་བར་འབྱུང་བ་རྣམ་པར་དཔྱད་མི་བཟོད་པ། རྨི་ལམ་སྒྱུ་མ་གཟུགས་བརྙན་ལྟ་བུར་བསམས་ཏེ། འདི་གཅིག་ཏུ་རང་བཞིན་གྱིས་འོད་གསལ་བ་ཡོངས་སུ་དག་པའི་བདག་ཉིད་དུ་བསྒོམ་པར་བྱའོ། །ཨོཾ་སྭ་བྷཱ་ཝ་ཤུདྡྷཿསརྦ་དྷརྨཱཿསྭ་བྷཱ་ཝ་ཤུདྡྷོ྅ཧཾ། ཞེས་བྱ་བ་འདིས་བརྟན་པར་བྱའོ། །ཡང་ན་སྔོན་གྱི་སྨོན་ལམ་གྱི་སྟོབས་ལས་བྱུང་བའི་ཟླ་བ་ལ་མཾ་རྣམ་པར་བསམས་ཏེ། དེའི་འོད་འཕྲོས་པས་མཾ་འཇམ་པའི་རྡོ་རྗེའི་བདག་ཉིད་བཅུག་སྟེ་བདག་ཉིད་མཾ་ལས་བྱུང་
བ་བསམ་པར་བྱའོ། །སྟོན་ཀའི་ཟླ་བའི་རྣམ་པ་ཅན་གཙུག་ཕུད་ལྔ་པ་རྒྱན་ཐམས་ཅད་ཀྱིས་བརྒྱན་པ། ཕྱག་གཡོན་ན་ཨུཏྤ་ལ་སྔོན་པོ་འཛིན་པ། ཕྱག་གཡས་པ་ན་མཆོག་སྦྱིན་དང་སྣ་ཚོགས་པདྨ་དང་ཟླ་བའི་གདན་ལ་སྐྱིལ་མ་ཀྲུང་གིས་བཞུགས་པའོ། །རང་གི་སྙིང་གར་ཟླ་བ་ལ་མཾ་ཟླ་ཤེལ་ནོར་བུའི་འོད་ཅན་འོད་ཟེར་རྣམས་ཀྱི་ནམ་མཁའི་ཁམས་ན་གནས་པའི་འགྲོ་བའི་དོན་རྣམས་བྱེད་དོ། །གསལ་ཞིང་ཇི་སྲིད་སྐྱོ་བར་མ་གྱུར་པའི་རྣམ་པ་དེ་སྲིད་དུ་བསྒོམ་པར་བྱའོ། །བསྒོམས་པས་སྐྱོ་ན་སྔགས་པས་སྔགས་བཟླ་སྟེ། ཨོཾ་བཱ་ཀྱེ་དཾ་ནམཿསྔགྶ་སོ། །ཉེ་བའི་སྙིང་པོ་ཡང་བཟླས་པ་བྱའོ། །ཨོཾ་ཧྲཱིཿཧཱུཾ་དེ་ནས་ཡི་གེ་བརྒྱ་པ་བརྗོད་ལ། འཇམ་པའི་རྡོ་རྗེའི་ང་རྒྱལ་གྱིས་ལངས་ཏེ། ལངས་ལ་ཡང་དེ་བཞིན་དུ་གནས་པར་བྱའོ། །ཟླ་བ་དྲུག་གིས་ངག་གི་དབང་ཕྱུག་འགྲུབ་པར་འགྱུར་རོ། །རྒྱུན་ཏུ་གོམས་པའི་སྦྱོར་བས་སྐྱེ་བ་འདི་ལ་སངས་རྒྱས་ཉིད་ཀྱང་འགྲུབ་པར་འགྱུར་རོ། །དེ་ལྟར་བསམ་གཏན་ལ་གནས་པས་སྔོན་དུ་བསྙེན་པ་འབུམ་ཕྲག་བདུན་བཟླས་ལ་རལ་གྲི་ལ་སོགས་པའི་དངོས་གྲུབ་བསྒྲུབ་པར་བྱའོ། །དེ་ལ་ཟླ་བ་གཟས་ཟིན་པའམ། ཉི་མ་གཟས་ཟིན་པ་ལ་ཁབ་ལེན་གྱི་ལྕགས་ལས་བརྡུངས་པའི་རལ་གྲི་ལག་གིས་བཟུང་སྟེ། ཟླ་བ་ལ་བལྟས་ནས་ཇི་སྙེད་གྲོལ་བར་མ་གྱུར་པ་དེ་སྙེད་དུ་བཟླས་པ་བྱའོ། །རལ་གྲིའི་རིག་པ་འཛིན་པར་འགྱུར་རོ། །ཇི་ལྟར་རྡོ་རྗེ་འཁོར་ལོ་རྩེ་གསུམ། ཐོ་བ། ཞགས་པ། ལྕགས་ཀྱུ་ལ་སོགས་པ་དང༌། མིག་སྨན། རྐང་མགྱོགས། ཐིག་ལེ་དབང་དུ་བྱེད་པའི་རྫས་བསགས་ལ་བསྒྲུབ་པར་བྱའོ། །རིག་འཛིན་གྱི་བཅུད་ལེན་བསྡུས་པར་བྱས་ལ་བསྒྲུབ་པར་བྱའོ། །འོ་ཐུག་གི་བཟའ་བ་དང༌། ཞོའི་བཟའ་བའམ། མར་དང་བཅས་པས་ཤ་ཁ་ར་ཡིས་ལྷུང་བ་ཟེད་བཀང་སྟེ། ལག་པར་ཉེ་བར་བཞག་ལ་བཟླས་པ་བྱས་ཏེ་བཟའ་བར་བྱའོ། །ལོ་ལྔ་བརྒྱར་འཚོ་བར་འགྱུར་རོ། །མོན་སྲན་དྲེའུ་ཁར་བླུགས་ལ་བཟླས་པ་བྱ་སྟེ། ཁྲུང་སོ་སྐྱེ་བར་འགྱུར་རོ། །དེ་མིད་ན་ཚིགས་བཅད་ལ་མཁས་པར་འགྱུར་རོ། །ཐོས་པ་འཛིན་པར་འགྱུར་རོ། །ངག་དང་ལྡན་ཞིང་འཛིན་བློ་རྣོ་བར་འགྱུར་རོ། །བིལ་བ་རྣམས་ཀྱིས་འབུམ་ཕྲག་གཅིག་སྦྱིན་སྲེག་བྱས་ན་འཇིག་རྟེན་གསུམ་གྱི་རྒྱལ་པོ་འགྲུབ་པར་འགྱུར་རོ།།
ཇི་ལྟར་རྙེད་པའི་མེ་ཏོག་ཡང་འབུམ་ཕྲག་བཞི་སྦྱིན་སྲེག་བྱས་ན། ངག་གི་དབང་ཕྱུག་གི་གྲུབ་པ་ཐོབ་སྟེ། ངག་གི་དབང་ཕྱུག་དང་ཡང་མཉམ་མོ། །མར་དང་འབྲུ་སྣ་ལྔའི་སྦྱིན་སྲེག་བྱས་ན་འབུམ་ཕྲག་བཞི་ཙམ་གྱིས་གནོད་སྦྱིན་མོ་འགུགས་པར་འགྱུར་རོ། །ས་འོག་གི་ལྷ་མོ་ཡང་ངོ༌། །བྲམྷིའི་ཕྱེ་མ་སོར་མོ་བཞི་ཙམ་བརྒྱ་རྩ་བརྒྱད་མངོན་པར་བསྔགས་ལ། ནང་བར་སྔ་བར་དཀྱིལ་འཁོར་བྱས་ལ་ཇི་ལྟར་འབྱོར་པས་བཅོམ་ལྡན་འདས་མཆོད་ལ། མར་རམ་ཀན་ཛི་བཏུང་བར་བྱའོ། །ཤུ་དག་ཞོ་ཕྱེད་ཚད་དེ་བཞིན་དུ་མངོན་པར་བསྔགས་ལ། མར་རམ། འོ་མ་འམ་མར་ནག་དང་ཟླ་བ་གཅིག་ཏུ་བཏུང་བར་བྱའོ། །དིག་པ་དང༌། ལྐུགས་པ་རྣམ་པར་ཉམས་པར་བྱེད་དོ། །ཟླ་བ་དྲུག་ན་ཐོས་པ་དང༌། གཞན་ཡང་བསྟན་བཅོས་མངོན་དུ་འགྱུར་རོ། །མི་ཤེས་པ་རྣམ་པར་ཉམས་པར་འགྱུར་རོ། །ཐོས་པ་འཛིན་པ་དང༌། ཁུ་བྱུག་ལྟར་འཇམ་པོའི་དབྱངས་གསལ་བའི་ངག་ཏུ་འགྱུར་རོ། །འཕགས་པ་འཇམ་དཔལ་རྡོ་རྗེ་དཔའ་བོ་གཅིག་པའི་སྒྲུབ་ཐབས་རྫོགས་སོ། །ཁམས་པ་ལོ་ཙཱ་བ་བ་རི་དགེ་སློང་ཆོས་ཀྱི་གྲགས་པས་བསྒྱུར་བའོ།།