རྡོ་རྗེ་སྒྲོལ་མའི་སྒྲུབ་ཐབས།
རྒྱ་གར་སྐད་དུ། བཛྲ་ཏཱ་ར་སཱ་དྷ་ནཾ། བོད་སྐད་དུ། རྡོ་རྗེ་སྒྲོལ་མའི་སྒྲུབ་ཐབས། འཕགས་མ་སྒྲོལ་མ་ལ་ཕྱག་འཚལ་ལོ། །སྦྱིན་སྲེག་ལས་ཀྱི་ཆོ་ག་ཡིས།། འདོད་པའི་དོན་ཀུན་སྒྲུབ་བྱེད་པའི། །རྡོ་རྗེ་སྒྲོལ་མའི་སྒྲུབ་ཐབས་འདི། །དེ་ནས་ཡང་དག་བཤད་པར་བྱ། །དེ་ལ་སྔགས་ཀྱི་ཚིག་ནི་འདི་རྣམས་སུ་འགྱུར་ཏེ། ན་མ་ཨཱཪྻཱ་བ་ལོ་ཀི་ཏེ་ཤྭ་རཱ་ཡ་བོ་དྷི་སཏྭཱ་ཡ་མ་ཧཱ་སཏྭཱ་ཡ། མ་ཧཱ་ཀཱ་རུ་ཎི་ཀཱ་ཡ། ཏདྱ་ཐཱ། ཨོཾ་ཏཱ་རེ་ཏུཏྟཱ་རེ་ཏུ་རེ་སརྦ་དུཥྚཱཾ་མ་མ་ཀྲྀ་ཏེ་ཛམྦྷ་ཡ་སྟཾ་བྷ་ཡ་མོ་ཧ་ཡ་བནྡྷ་ཡ། ཧཱུཾ་ཧཱུཾ་ཧཱུཾ་ཕཊ་ཕཊ་ཕཊ་སརྦ་དུཥྚཱཾ་སྟཾ་བྷ་ནི་ཏཱ་རེ་སྭཱ་ཧཱ། དེ་ལ་དང་པོ་རེ་ཞིག་རང་གི་སྙིང་གར་ཟླ་བའི་དཀྱིལ་འཁོར་ལ་ཏཱཾ་ཡིག་གི་ས་བོན་བསྒོམ་པར་བྱས་ནས། དེའི་འོད་ཟེར་གྱིས་བླ་མ་དང༌། སངས་རྒྱས་དང༌། བྱང་ཆུབ་སེམས་དཔའ་རྣམས་སྤྱན་དྲངས་ཏེ། སྣ་ཚོགས་པའི་མཆོད་པ་རྣམས་ཀྱིས་ཡང་དག་པར་མཆོད་ནས་སྡིག་པ་བཤགས་པ་ལ་སོགས་པ་བྱས་ཏེ། གསུམ་ལ་སྐྱབས་སུ་འགྲོ་བའི་ཚིག་བཅད་བརྗོད་པར་བྱའོ། །དེ་ནས་ཚད་མེད་པའི་གནས་བཞི་བསྒོམ་པར་བྱས་ནས། ཨོཾ་ཤཱུ་ནྱ་ཏཱ་ཛྙཱ་ན་བཛྲ་སྭ་བྷཱ་ཝ་ཨཱཏྨ་ཀོ྅ཧཾ། ཞེས་བརྗོད་པར་བྱའོ། །དེ་ནས་པཾ་ཡིག་ལས་སྐྱེས་པའི། །པདྨ་ཟླ་བའི་དཀྱིལ་འཁོར་ཏེ། སླར་ཡང་ས་བོན་ཏཱཾ་ཡིག་བསྒོམ། །དེ་ཉིད་ཡོངས་སུ་གྱུར་པ་ལས། །མ་མོའི་དབུས་སུ་བཞུགས་པ་ཡི། །ཡུམ་གྱུར་ལྷ་མོ་སྒྲོལ་མ་བསྒོམ། །ཞལ་བཞི་ཕྱག་ནི་བརྒྱད་པ་སྟེ། རྒྱན་རྣམས་ཀུན་གྱིས་བརྒྱན་གྱུར་པ། །སྐུ་མདོག་གསེར་གྱི་འོད་འབར་བའི། །གཞོན་ནུ་མ་ཡི་མཚན་ཉིད་ཅན། །སྣ་ཚོགས་པདྨ་ལ་གནས་པའི། །ཟླ་བའི་གདན་ལ་ཡང་དག་བཞུགས། །སེར་དང་གནག་དང་དཀར་དང་དམར། །གཡས་སྐོར་གྱི་ནི་ཞལ་བཞིའོ། །ཞལ་ནི་སོ་སོར་སྤྱན་གསུམ་སྟེ། །རྡོ་རྗེ་སྐྱིལ་མོ་ཀྲུང་གིས་བཞུགས། །དབུ་རྒྱན་འོད་དམར་སངས་རྒྱས་བཞི། །རྡོ་རྗེ་མདའ་དུང་མཆོག་སྦྱིན་རྣམས། །གཡས་ཀྱི་ཕྱག་ན་བསྣམས་པའོ། །ཨུཏྤལ་གཞུ་དང་རྡོ་རྗེ་ཡི། །ལྕགས་ཀྱུ་རྡོ་རྗེ་ཞགས་པ་དང༌། །སྡིགས་མཛུབ་གཡོན་གྱི་ཕྱག་ན་བསྣམས། །རྡོ་རྗེ་སྐྱིལ་ཀྲུང་རྣལ་འབྱོར་གྱིས། །ས་གསུམ་པོ་ནི་བསྒྲུབ་པར་བྱ། །དེ་མདུན་མེ་ཏོག་སྒྲོལ་མ་ནི། །སྐུ་མདོག་དཀར་ཞིང་
ཡིད་འོང་མ། །ཨོཾ་ཡིག་རྣམ་པ་ལས་སྐྱེས་པའི། །མེ་ཏོག་ཕྲེང་བ་ཕྱག་ན་བསྣམས། །ཞལ་གཅིག་ཕྱག་ནི་གཉིས་མ་སྟེ། །རྒྱན་རྣམས་ཀུན་གྱིས་རྣམ་པར་བརྒྱན། །ལྷོ་རུ་བདུག་སྤོས་སྒྲོལ་མ་ནི། །སྐུ་མདོག་ནག་མོ་གཟུགས་མཛེས་མ། །རྒྱན་རྣམས་ཀུན་གྱིས་མཛེས་པ་ཡི། །ཕྱག་ན་སྤོས་ཀྱི་སྣོད་བསྣམས་པའོ། །ནུབ་ཏུ་མར་མེའི་སྒྲོལ་མ་ནི། །སྐུ་མདོག་སེར་མོ་ཡིད་འོང་མ། །གསེར་གྱི་རྣ་རྒྱན་གཡོ་བས་མཛེས། །ཕྱག་ན་མར་མེའི་སྡོང་བུ་བསྣམས། །བྱང་དུ་དྲི་ཡི་སྒྲོལ་མ་ནི། །ཕྱག་ན་དྲི་ཡི་དུང་ཆོས་བསྣམས། །ལྷ་མོ་སྐུ་མདོག་དམར་ཞིང་འབར། །སྙིང་པོའི་དཀྱིལ་འཁོར་ལ་བསྒོམ་བྱ། །འདི་རྣམས་ཞལ་གཅིག་ཕྱག་གཉིས་མ། །རྒྱན་རྣམས་ཀུན་གྱིས་རྣམ་པར་བརྒྱན། །རྡོ་རྗེ་སྐྱིལ་ཀྲུང་གིས་བཞུགས་མ། །ལྷ་མོ་ལྔ་པོ་འདི་རྣམས་ནི། །ཅུང་ཟད་ཞལ་ནི་གཙིགས་པ་སྟེ། །རོལ་པའི་སྟབས་ཀྱིས་ཡང་དག་བཞུགས། །དེ་ལྟར་དཀྱིལ་འཁོར་གྱི་འཁོར་ལོ་ཐམས་ཅད་བསམས་ལ། རང་གི་སྙིང་གའི་ས་བོན་གྱི་འོད་ཟེར་གྱིས་ཡེ་ཤེས་ཀྱི་འཁོར་ལོ་གདན་དྲངས་ལ། ཛཿཧཱུཾ་བཾ་ཧོཿཞེས་པས་འདིར་དགུག་པ་ལ་སོགས་པ་བྱའོ། །དེ་ནས་ཤར་སྒོར་བསྒོམ་བྱ་སྟེ། །རྡོ་རྗེ་ལྕགས་ཀྱུ་འོད་དཀར་མོ། །རྡོ་རྗེ་ལྕགས་ཀྱུའི་ཕྱག་མཚན་མ། །ཤིན་ཏུ་ཡིད་འོང་བདག་ཉིད་དོ། །ལྷོ་སྒོར་རྡོ་རྗེ་ཞགས་པ་མ། །ཤིན་ཏུ་འདོད་དགའ་སྐུ་མདོག་གནག །གཟུགས་མཛེས་རྒྱན་གྱིས་བརྒྱན་པ་སྟེ། །རྡོ་རྗེ་ཞགས་པ་འཆང་བའི་མཆོག །ནུབ་སྒོར་རྡོ་རྗེ་ལྕགས་སྒྲོག་མ། །བྱག་ན་རྡོ་རྗེ་ལྕགས་སྒྲོག་བསྣམས། །སྣ་ཚོགས་རྒྱན་གྱིས་བརྒྱན་པ་སྟེ། །སྐུ་མདོག་སེར་མོ་བསམ་པར་བྱ། །བྱང་སྒོར་རྡོ་རྗེ་དྲིལ་བུ་མ། །ཕྱག་ན་རྡོ་རྗེ་དྲིལ་བུ་མཆོག །ཤིན་ཏུ་གཟུགས་མཛེས་ཁ་དོག་དམར། །བཟང་མོའི་གཟུགས་ནི་བལྟ་བར་བྱ། །སྟེང་དུ་གཙུག་ཏོར་རྣམ་རྒྱལ་མ། །གཟུགས་མཛེས་སྐུ་མདོག་སེར་མོ་སྟེ། །བྱང་ཆུབ་འབྲས་བུ་སྦྱིན་མཛད་མ། །སྔགས་པས་འཁོར་ལོ་འཛིན་མ་བསྒོམ། །དེ་ནས་སྙིང་པོའི་དཀྱིལ་འཁོར་འོག། དགེ་ཞིང་འོད་ཟེར་འབར་བའི་གཟུགས། །སྦྲུལ་གྱི་ཞགས་པ་ཕྱག་ན་བསྣམས། །སྐུ་མདོག་ནག་མོ་བསྒོམ་པར་བྱ། །ཞལ་གཅིག་ཕྱག་ནི་གཉིས་པ་སྟེ། །ཤེས་བྱ་ཀུན་མཁྱེན་ཡིན་འོང་མ། །ཡི་གེ་བུ་པོ་འདི་རྣམས་ཀྱིས། །ལྷ་མོ་བཅུ་ནི་རྣམས་པར་སྤྲུལ། །པ་རོལ་ཕྱིན་བཅུ་དག་པ་སྟེ། ལས་ཀུན་རབ་ཏུ་
འགྲུབ་པར་བྱེད། །དེ་ལ་ཡི་གེ་བཅུ་རྣམས་ནི། །ཨོཾ་ཏཱ་རེ་ཏུཏྟཱ་རེ་ཏུ་རེ་སྭཱ་ཧཱ། དེ་བཞིན་དུ་སྐུར་དང་གསུང་དང་ཐུགས་བྱིན་གྱིས་བརླབ་པ་དང༌། །དབང་བསྐུར་བ་དང༌། །ཐིག་ལེ་དང༌། ཕྲ་མོའི་རྣལ་འབྱོར་དང༌། བཟླས་པ་ལ་སོགས་པ་དང༌། བསྒོམ་པར་ཡང་བྱའོ་ཞེས་སོ། །སྔགས་མཆོག་འདི་ནི་གཙོ་བོ་སྟེ། །སངས་རྒྱས་ཀུན་གྱིས་ཕྱག་བྱས་པ། །བཀླགས་པ་ཡིས་ནི་དངོས་གྲུབ་བྱེད། །གསལ་པོར་རྡོ་རྗེ་གུར་ལས་གསུངས། །ཞེས་སོ། །དེ་ལ་འདིར་ཉེ་བར་སྤྱོད་པ་ནི་སྔགས་འདིས་གོས་ཀྱི་སྣ་ལ་བཟུང་ནས་ལན་བདུན་དུ་བསྔགས་ཤིང་མདུད་པ་བྱས་ན་འཇིགས་པ་དང་བཅས་པའི་ས་གང་དུ་འགྲོ་ཡང་འཇིགས་པར་མི་འགྱུར་རོ། །སྟག་དང༌། ཆོམ་པོ་དང༌། ཆུ་སྲིན་དང༌། སེང་གེ་དང༌། སྦྲུལ་དང༌། གླང་པོ་ཆེ་དང༌། མ་ཧེ་དང༌། དོམ་དང༌། བ་ལང་དང༌། རྟ་ལ་སོགས་པས་གནོད་བར་མི་བྱེད་དོ། །དེ་བཞིན་དུ་སྔགས་འདིས་ཨུཏྤ་ལ་ལ་བརྒྱ་རྩ་བརྒྱད་བཟླས་ནས་སྦྱིན་སྲེག་བྱ་སྟེ། ཨོཾ་ཏཱ་རེ་ཏུཏྟཱ་རེ་ཏུ་རེ་ཨ་མུ་ཀི་མེ་བ་ཤ་མ་ནཱ་ཡ་སྭཱ་ཧཱ། ཞེས་པས་གང་འདོད་པ་དེ་དབང་དུ་བྱེད་པར་འགྱུར་རོ། །དེ་བཞིན་དུ་སྔགས་འདིས་བྱ་རོག་གི་སྒྲོལ་ལ་ལན་སུམ་ཅུ་རྩ་གཉིས་བཟླས་ཏེ་དགྲ་བོའི་ཁང་པར་སྦས་ན་ཉི་མ་བདུན་གྱིས་སྐྲོད་པར་འགྱུར་རོ། །ཨོཾ་ཏཱ་རེ་ཏུཏྟཱ་རེ་ཏུ་རེ་ཙལ་པྲ་ཙ་ལ་ཤཱི་གྷྲཾ་མི་ནི་དེ་བ་དཏྟ་ཨུཙཚ་ཊ་ཡ་ཧཱུཾ་ཕཊ་ཅེས་པ་ནི་བསྐྲད་པའི་ཆོ་གའོ། །དེ་ནས་གཞན་ལ་སྦྱོར་བ་ནི། ཨོཾ་ཏཱ་རེ་ཏུཏྟཱ་རེ་ཏུ་རེ་ཨ་མུ་ཀཱ་བྷི་དྷཱ་ནཱཾ་ཀུ་མཱ་རཱི་མ་ཧྱ་མུད་བཱ་ཧེ་ན་ཏ་སྱཱཿབི་ཏཱ་བྲ་ཡཙྪནྟུ་སྭཱ་ཧཱ། མྱོས་བྱེད་ག་ཏུམ་པོའི་ས་བོན་དང༌། །མྱོས་བྱེད་འབྲས་བུ་དེ་བཞིན་དུ། །མྱ་ངན་མེད་ཤིང་མེ་ཏོག་བཅས། །སྦྱིན་སྲེག་སྟོང་ཕྲག་ལྔ་བྱས་ཏེ། །མར་སྦྲང་བུ་རམ་སྦྱིན་སྲེག་ནི། །བུ་མོ་སྒྲུབ་ལ་མཆོག་ཏུ་བསྔགས། །དེ་ནས་ཞིག་བདུན་སྦྱོར་བ་ཡིས། །རང་འདོད་བུ་མོ་ཐོབ་པར་འགྱུར། །དེ་ནས་གཞན་ལ་རབ་ཏུ་སྦྱོར་བ་ནི། །ཨོཾ་ཏཱ་རེ་ཏུཏྟཱ་རེ་ཏུ་རེ་ཨ་མུ་ཀཱ་བྷི་དྷཱ་ནཱཾ་སྭསྠའ་ན་ཏ་ཨཱ་ཀཪྵ་ཡ་མ་མཱནྟི་ཀེ་ཛཿཞེས་པའི་སྔགས་འདིས་རྒྱ་ཤུག་གི་ཚེར་མ་ལ་སྟོང་ཕྲག་ལྔ་རང་བྱུང་གི་མེ་ཏོག་ལ་བསྙུགས་ནས་སྦྱིན་སྲེག་བྱས་ནས་འདིས་རྒྱལ་པོའི་བུ་མོ་ཡང་འགུགས་པར་བྱེད་དོ། །དེ་ནས་གཞན་ལ་ཡང་རབ་ཏུ་སྦྱོར་བར་འགྱུར་ཏེ། རང༌། བྱུང་གི་མེ་ཏོག་གིས་བསྐུལ་བའི་རས་ལ་བཅོམ་ལྡན་འདས་མ་ཞལ་གཅིག་ཕྱག་གཉིས་མ་ལྕགས་ཀྱུ་དང་ཨུཏྤ་ལའི་ཞགས་པ་ཕྱག་གཉིས་ན་བསྣམས་པ་བྲིས་ལ། །ལྷ་རྫས་མེ་
ཏོག་དམ་པ་འདི། །ཞེས་པ་ལ་སོགས་པས་དེའི་མདུན་དུ་མཆོད་པ་བྱས་ཏེ། བསྒོམ་པ་དང་ལྡན་པས་སྔགས་བཟླས་པར་བྱའོ། །ཨོཾ་ཏཱ་རེ་ཏུཏྟཱ་རེ་ཏུ་རེ་ཨ་མུ་ཀཱི་མ་མེ་པ་ཙི་ཏཾ་སྭ་པྣཾ་ཀ་ཐཱ་ཡ་ཧཱུཾ་ཕཊ། སྟོང་ཕྲག་ལྔས་འོང་བར་འགྱུར་ཏེ། ཞགས་པས་མགུལ་པ་བཅིངས་ཤིང་ལྕགས་ཀྱུས་ཕུག་ལ་ཨུཏྤལ་གྱིས་རྐང་པ་བཅིངས་ཏེ། བསྒྲུབ་བྱ་བཀུག་ནས་རྐང་པའི་འོག་ཏུ་བསམས་ནས་བྲན་མོའི་གཟུགས་ཀྱིས་ལོངས་སྤྱོད་པར་བྱའོ། །དེ་ནས་གཞན་ལ་རབ་ཏུ་སྦྱོར་བ་ནི། སྒྲོལ་མའི་གཟུངས་ལན་བདུན་དུ་མངོན་པར་བསྔགས་ནས་བདག་ཉིད་ཀྱི་མིག་གཉིས་ལ་བྱུགས་ནས་རྒྱལ་པོའི་རིགས་ཀྱི་ནང་དུ་ཞུགས་ན་རྒྱལ་པོ་དང་བཅས་པས་བླ་མ་ལ་སོགས་པར་བྱེད་ཅིང་གཅིག་ཏུ་དབང་དུ་བྱེད་པར་འགྱུར་རོ། །དེ་ནས་གཞན་ལ་རབ་ཏུ་སྦྱོར་བ་ནི་སྒྲོལ་མའི་གཟུངས་ལན་བརྒྱ་རྩ་བརྒྱད་བཟླས་ལ་སྤྲུལ་གདོང་གཉིས་པའི་མགོ་ཐལ་བར་བྱས་ཏེ་བ་དམར་མོའི་མར་ལ་ཨརྐའི་བལ་ལ་སྡོང་བུ་བྱས་ཏེ་རབ་ཏུ་སྦར་ཏེ་མིག་སྨན་བསག་པར་བྱའོ། །དེའི་མིག་སྨན་དང༌། རྡོ་རྗེ་ཉི་མ་དང༌། རྡོ་རྗེ་ཆོས་དག་ཡང་དག་པར་མཉེས་ལ་རྟ་མཆོག་གིས་བདུག་པར་བྱའོ། །དེའི་ཐལ་བ་དང་ལྷན་ཅིག་ཏུ་མིག་སྨན་མིག་ལ་བསྐུས་ན་གང་ལ་རྡོ་རྗེའི་མིག་གིས་བལྟས་པ་དེའི་པདྨ་གར་གྱི་དབང་ཕྱུག་འཛག་པར་འགྱུར་རོ། །དེ་ལྟར་མ་གྱུར་ན་སྒྲོལ་མ་བདག་གིས་སངས་རྒྱས་བཅོམ་ལྡན་འདས་ངེས་པར་བསླུས་པ་ཡིན་ནོ། །དེ་ནས་གཞན་ལ་སྦྱོར་བ་ནི་ལྟོ་བའི་སྲིན་བུ་ལ་སྒྲོལ་མའི་གཟུངས་ཀྱིས་ལན་བདུན་དུ་མངོན་པར་བསྔགས་ནས་རྡོ་རྗེ་ཆོས་དང་ལྷན་ཅིག་ཏུ་བྱས་ཏེ། དེ་སོ་རྩི་དང་སྦྱར་ལ་སྦྱིན་ནོ། །བྱ་བ་བྱེད་ཅིང་སྦྱོར་བའི་མཆོག་འདིས་མི་གཏོང་སྟེ། རང་གི་ཆུང་མ་བཞིན་དུ་སྤྱོད་པར་འགྱུར་རོ། །དེ་ལས་གཞན་ལ་རབ་ཏུ་སྦྱོར་བར་འགྱུར་ཏེ། སོ་མ་སྐྱེས་པའི་བུ་ཆུང་གི་ལྕེ་བླངས་ཏེ་སྒྲོལ་མའི་གཟུངས་ལན་བདུན་དུ་མངོན་པར་བསྔགས་ཏེ་བྷྲྀངྒ་རཱ་ཛ་དང༌། གི་ཝང་དང་ལྷན་ཅིག་ཏུ་བྱས་ཏེ་དཔྲལ་བར་ཐིག་ལེ་བྱས་ན་གང་ལ་བལྟས་པ་དེ་དབང་དུ་འགྱུར་རོ། །དེ་ནས་གཞན་ལ་ཡང་རབ་ཏུ་སྦྱོར་བ་ནི་ཞག་ཆེན་པོ་རང་གི་ལུས་ལ་བྱུགས་ཏེ་བསྒོམས་པ་དང་ལྷན་ཅིག་པས་སྒྲོལ་མའི་གཟུངས་ཁྲི་ཚོ་གཅིག་བཟླས་པར་བྱ་སྟེ། བཟླས་པའི་མཐར་འབྲས་སཱ་ལུའི་ཟན་གྱིས་དྲིལ་ཕྱིས་བྱས་ལ་དྲིལ་ཕྱིས་དེ་བསྡུས་ཏེ་གང་ལ་བྱིན་པ་དེ་ཇི་སྲིད་འཚོའི་བར་དུ་དབང་དུ་འགྱུར་རོ། །དེ་ནས་གཞན་ལ་རབ་ཏུ་སྦྱོར་
བ་ནི་ཟླ་བ་གཟས་ཟིན་པའི་དུས་སུ་སྒྲོལ་མའི་གཟུངས་བཟླས་ཤིང་བསྙེན་པ་བྱས་ལ། དེ་ལས་བྱུང་བའི་འཇིག་རྟེན་དབང་ཕྱུག་གིས་དུང་གི་ཕྱེ་མ་སྦང་བར་བྱའོ། །དེ་གང་ལ་བྱིན་པ་དེ་ཇི་སྲིད་འཚོའི་བར་དུ་རྗེས་སུ་འཇུག་པར་འགྱུར་རོ། །གཞན་ཡང་རབ་ཏུ་སྦྱོར་བ་ནི་སྒྲོལ་མའི་གཟུངས་མྱོས་བྱེད་ཀྱི་འབྲས་བུ་ལ་ལན་བརྒྱ་རྩ་བརྒྱད་ཡོངས་སུ་བཟླས་ཏེ། འབྲས་བུ་རྡོ་རྗེ་རྟ་མགྲིན་དང་ལྷན་ཅིག་ཏུ་བྱས་ཏེ་བྱུགས་ན་དེ་དབང་དུ་འགྱུར་རོ། །གཞན་ཡང་རབ་ཏུ་སྦྱོར་བར་འགྱུར་ཏེ། ཨོཾ་ཏཱ་རེ་ཏུཏྟཱ་རེ་ཏུ་རེ་ཨ་མུ་ཀཱ་སྱ་བནྡྷཱ་ན་མུཀྟིཾ་ཀུ་རུ་སྭཱ་ཧཱ། སྔགས་འདིས་ཨརྐའི་ལོ་མ་ལ་བསྒྲུབ་བྱའི་མིང་བར་དུ་བཅུག་སྟེ་བྲིས་ནས་སྡིག་པའི་ཚང་དུ་སྦས་ན། བཅིངས་པ་ལས་གྲོལ་བར་འགྱུར་རོ། །རྡོ་རྗེ་སྒྲོལ་མའི་སྒྲུབ་ཐབས་རྫོགས་སོ།།