རྡོ་རྗེ་སྒྲོལ་མའི་སྒྲུབ་ཐབས།
རིན་ཆེན་འབྱུང་གནས་ཞི་བ།
རྒྱ་གར་སྐད་དུ། བཛྲ་ཏཱ་རཱ་སཱ་དྷ་ནཾ། བོད་སྐད་དུ། རྡོ་རྗེ་སྒྲོལ་མའི་སྒྲུབ་ཐབས། འཕགས་མ་སྒྲོལ་མ་ལ་ཕྱག་འཚལ་ལོ། །ཕུན་སུམ་ཚོགས་པ་ཀུན་འཕེལ་བའི། །སྒྲོལ་མ་ལ་ནི་གུས་ཕྱག་འཚལ། །མན་ངག་ཇི་བཞིན་བསྡུས་ནས་ནི། །དེ་ཡི་སྒྲུབ་ཐབས་བྲི་བར་བྱ། །དང་པོར་རེ་ཞིག་རྣལ་འབྱོར་པས། མེ་ཏོག་ཤིན་ཏུ་དྲི་ཞིམ་པོ་ལ་སོགས་པ་ཡིད་དུ་འོང་བའི་བསམ་གཏན་གྱི་ཁང་པ་ལ་སོགས་པར་ཞུགས་ནས་སྟན་བདེ་བ་ལ་རྡོ་རྗེ་སྐྱིལ་ཀྲུང་བཅིངས་ཏེ། རང་གི་སྙིང་གར་ཏཱཾ་ཡིག་ཡོངས་སུ་གྱུར་པ་ལས་ཟླ་བའི་དཀྱིལ་འཁོར། །དེའི་སྟེང་དུ་ཏཱཾ་ཡིག་སེར་པོ་ལས་རྡོ་རྗེའོ། །དེའི་འོད་ཟེར་གྱིས་ནམ་མཁའི་ཕྱོགས་སུ་བཅོམ་ལྡན་འདས་མའི་འཁོར་ལོ་བལྟ་ཞིང་གདན་དྲངས་ནས་མངོན་དུ་བྱས་ཏེ། རང་གི་སྙིང་གའི་ས་བོན་ལས་བྱུང་བའི་མེ་ཏོག་མ་
ལ་སོགས་པའི་ལྷ་མོ་རྣམས་སྤྲོས་ཏེ། མེ་ཏོག་ལ་སོགས་པ་རྣམས་ཀྱིས་མཆོད་པར་བྱའོ། །དེ་ནས་བཅོམ་ལྡན་འདས་མའི་འཁོར་ལོ་དེའི་མདུན་དུ་སྡིག་པ་བཤགས་པ་ལ་སོགས་པ་བྱའོ། །སྡིག་པ་ཐམས་ཅད་བདག་གིས་སོ་སོར་བཤགས་སོ། །སངས་རྒྱས་དང་བྱང་ཆུབ་སེམས་དཔའ་དང་འཕགས་པ་སོ་སོའི་སྐྱེ་བོ་ཐམས་ཅད་ཀྱི་དགེ་བ་ཐམས་ཅད་ལ་རྗེས་སུ་ཡི་རང་ངོ༌། །བདག་གིས་དགེ་བ་ཐམས་ཅད་ནི་བླ་ན་མེད་པ་ཡང་དག་པར་རྫོགས་པའི་སངས་རྒྱས་སུ་ཡོངས་སུ་བསྔོ་བར་བགྱིའོ། །འདིར་བདག་བྱང་ཆུབ་མ་ཐོབ་ཀྱི་བར་དུ་རྐང་གཉིས་རྣམས་ཀྱི་མཆོག་སངས་རྒྱས་ལ་སྐྱབས་སུ་མཆིའོ། །ཡང་དག་པའི་ཆོས་རྣམས་ཀྱི་མཆོག་ཐེག་པ་ཆེན་པོའི་ཆོས་ལ་སྐྱབས་སུ་མཆིའོ། །ཚོགས་རྣམས་ཀྱི་མཆོག་བྱང་ཆུབ་སེམས་དཔའ་ཕྱིར་མི་ལྡོག་པའི་ཚོགས་ལ་སྐྱབས་སུ་མཆིའོ། །ཀྱེ་མ་བདག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་རྫོགས་པར་སངས་རྒྱས་ནས་སེམས་ཅན་གྱི་དོན་དང་ཕན་པ་དང༌། བདེ་བའི་ཕྱིར་ཇི་སྲིད་ཤིན་ཏུ་མི་གནས་པའི་མྱ་ངན་ལས་འདས་པའི་དབྱིངས་རྫོགས་པའི་བྱང་ཆུབ་ལ་རབ་ཏུ་དགོད་ཅིང་དྲང་བའི་ཕྱིར་འདིར་བདག་བླ་ན་མེད་པ་ཡང་དག་རྫོགས་པའི་བྱང་ཆུབ་ཀྱི་ལམ་ལ་བརྟེན་པར་བགྱིད་དེ། འདི་ལྟར་རྡོ་རྗེའི་ཐེག་པའོ། །དེ་ནས་གསུམ་ལ་སྐྱབས་སུ་འགྲོ་བའི་ཚིགས་བཅད་བརྗོད་པར་བྱའོ། །དེ་ནས་སེམས་ཅན་ཐམས་ཅད་ལ་བདེ་བ་ཉེ་བར་སྡུད་པར་བྱེད་པ་ནི་བྱམས་པའོ། །སྡུག་བསྔལ་ཐམས་ཅད་སེལ་བར་བྱེད་པ་ནི་སྙིང་རྗེའོ། །མཐོ་རིས་ཀྱི་བདེ་བ་རྣམ་པར་སྦྱོར་བ་ངེས་པར་བྱེད་པ་ནི་དགའ་བའོ། །ཉོན་མོངས་པའི་གཉེན་པོའི་ཕྱོགས་ཀྱི་ལམ་ཉེ་བར་སྡུད་པའི་བཏང་སྙོམས་རྣམས་བསྒོམ་པར་བྱའོ། །དེ་ནས་ཆོས་ཐམས་ཅད་ལ་ཡིད་ཀྱིས་དམིགས་ཏེ་རྣམ་པར་སྤྱད་པར་བྱའོ། །བསམ་པ་དེ་བཞིན་དུ་འདིར་དེ་དང་དེའི་རྣམ་པས་འཁྲུལ་པ་རྣམས་སོ་སོར་བསལ་ཏེ་དཔེར་ན་རྨི་ལམ་གྱི་སེམས་ལས་ཕྱི་རུ་ཡོད་པ་ལྟ་བུའོ། །སེམས་ཀྱི་ཕྱི་རོལ་དུ་གཟུང་བ་རང་བཞིན་མེད་པས་འཛིན་པའི་སེམས་ཀྱང་རང་བཞིན་མེད་པར་འགྱུར་རོ། །དེ་ལ་སེམས་དང་ལུས་ཀྱི་ཆོས་ཐམས་ཅད་དེ་རྣམས་ཀྱིས་གཟུང་བ་དང་འཛིན་པ་སྟོང་པ་ཉིད་ཀྱིས་དོན་དམ་པ་ཞེས་བྱའོ། །དེ་བཞིན་དུ་གཅིག་གི་མཐའ་ཡས་ངེས་པ་དང་འཁྲུལ་པ་ཡང་དག་པར་སྐྱེ་བ་འཁྲུལ་པའི་རྟགས་ཆོས་ཐམས་ཅད་
ཀྱི་རྣམ་པར་སྤོང་བ་དེ་རྣམས་ཀྱི་རང་བཞིན་དེ་བཞིན་ཉིད་འབའ་ཞིག་པ་གཉིས་སུ་མེད་པ་དག་ཅིང་མཚན་ཉིད་ཤེལ་དག་པ་ལྟ་བུ་སྟོན་ཀའི་དྲི་མ་མེད་པའི་ཉིན་གུང་གི་ནམ་མཁའ་ལྟ་བུ་མཐའ་ཡས་པ་བལྟ་བར་བྱའོ། །འདིར་འཇིག་རྟེན་ལས་འདས་པའི་སྟོང་པ་ཉིད་ཀྱི་ཡེ་ཤེས་སྤྲོས་པ་དང་བྲལ་བ་རྣམ་པར་མི་རྟོག་པར་གསུངས་སོ། །དེ་ནས་དེའི་སྔགས་ཀྱིས་བྱིན་གྱིས་བརླབ་པར་བྱའོ། །ཨོཾ་ཤཱུ་ནྱ་ཏཱ་ཛྙཱ་ན་བཛྲ་སྭ་བྷཱ་བ་ཨཱཏྨ་ཀོ྅ཧཾ། བསྙེན་པ་ནི་བཅོམ་ལྡན་འདས་མ་ཤེས་རབ་ཀྱི་ཕ་རོལ་ཏུ་ཕྱིན་མ་བསྙེན་པའི་ཆོ་ག་བསྲུང་བར་བྱའོ། །དེ་ནས་དེའི་མི་འཇིགས་པར་འགྱུར་པའི་རྣམ་པ་དང་ལྡན་པ་བསྲུང་ཤིང་དག་པ་འཇིག་རྟེན་པའི་ཡེ་ཤེས་ཀྱི་རང་བཞིན་བསྒོམ་པར་བྱའོ། །དེ་ནས་ར་ཡིག་ལས་ནི་ཉི་མ་བདུན་དུ་བསྒོམ། །ཉི་མར་ཧཱུཾ་ཡིག་ལས་བྱུང་སྣ་ཚོགས་རྡོར། །དེ་ཡིས་དེ་བཞིན་རྡོ་རྗེ་རྣམ་བསྒོམས་ནས། །ར་བ་དང་ནི་གུར་ཡང་བཅིང་བར་བྱ། །སྣ་ཚོགས་རྡོ་རྗེའི་འོད་ཀྱིས་བསྐལ་པའི་མེ་ལྟར་བཟོད་པར་དཀའ་བས་ཐམས་ཅད་དུ་འཕྲོ་ཞིང་མཁྲེགས་པར་འགྱུར་བས་སྤྲས་པའོ། །འཕྲེང་དུ་གྲུ་བཞི་པ་འབར་བཞིན་པའི་རྡོ་རྗེའི་ར་བའོ། །སྟེང་དུ་རྡོ་རྗེའི་གུར་རོ། །འོག་ཏུ་རྡོ་རྗེའི་རང་བཞིན་གྱིས་གཞིས་རོ་གདན་གྱི་འོག་ཀུན་དུ་རྣམ་པར་སྤྲས་པར་བལྟ་བར་བྱའོ། །དེ་ནས་ཉི་མ་དང་སྣ་ཚོགས་རྡོ་རྗེ་དག་ལས་འོད་ཟེར་བྱུང་ནས་ཕྱོགས་སུ་འཕྲོ་ཞིང་མཁྲེགས་པར་གྱུར་པས་ཕྱི་རུ་སྒོའི་མཚམས་བཅིང་པར་བྱའོ་ཞེས་པ་ནི་ཚིགས་སུ་བཅད་པའི་དོན་ཏོ། །དེའི་དབུས་སུ་ནམ་མཁར་འབྱུང་བ་ཆེན་པོའི་རང་བཞིན་ཆོས་འབྱུང་ཞེས་བཤད་པ་རྡོ་རྗེ་ཆེན་པོ་འཛིན་པའི་རང་བཞིན་སྟོན་ཀའི་ཟླ་བ་ལྟར་དཀར་བ་སྨད་ཕྲ་ཞིང་སྟེང་ཡངས་པ་ཟུར་གསུམ་པ་ནམ་མཁའི་རང་བཞིན་ནོ། །དེའི་དབུས་སུ་སྣ་ཚོགས་ཆུ་སྐྱེས་ཀྱི་ཟེའུ་འབྲུལ་ལ་གནས་པའི་སྣ་ཚོགས་རྡོ་རྗེ་ཆེན་པོའོ། །དེའི་སྟེགས་བུ་ལ་འབྱུང་བ་ཆེན་པོ་བཞི་ལས་གྲུབ་པའི་དཀྱིལ་འཁོར་གྱི་རྣམ་པ་བཞི་པོ་ལྷ་མོ་བཞིའི་རང་བཞིན་རྣམས་ནི་སྟེང་དུ་ཡོངས་སུ་བལྟ་བར་བྱའོ། །དེ་ལ་དང་པོ་ཡཾ་ཡིག་ལས་རླུང་གཞུའི་རྣམ་པ་ནག་པོ་དུ་བའི་མདོག་ལྟ་བུ་རྩེ་མོ་གཉིས་ལ་གཡོ་བའི་དན་གྱིས་བརྒྱན་པའོ། །དེ་ནས་རཾ་ཡིག་ལས་མེ་གྲུ་གསུམ་དམར།པོ་ཟུར་རྣམས་རཾ་ཡིག་གིས་མཚན་པའོ། །དེ་ནས་བཾ་ཡིག་ལས་ཆུ་དཀར་པོ་ཟླུམ་པོ་བུམ་པས་མཚན་པའོ། །དེ་ནས་ལཾ་ཡིག་ལས་དབང་ཆེན་གྱི་དཀྱིལ་འཁོར་གྲུ་བཞི་སེར་པོ་ཟུར་རྣམས་སུ་རྡོ་རྗེ་
རྩེ་གསུམ་པས་མཚན་པའོ། །དེའི་སྟེང་དུ་བྷཱུཾ་ཡིག་ལས་སྐྱེས་པའི་འཁོར་ལོའོ། །དང་པོ་ནི་དེ་ལས་ངོ་བོ་ཉིད་ཀྱི་ལྷ་འཇིག་རྟེན་ལས་འདས་པའི་ཡེ་ཤེས་ཉིད་ཀྱིས་ཁྱབ་ཅིང་གནས་པ། དེ་ནས་སྣ་ཚོགས་རྡོ་རྗེའོ། །སྟེགས་བུའི་དབུས་སུ་འབྱུང་བ་ཆེན་པོ་བཞི་ཡོངས་སུ་གྱུར་པ་ལས་སྐྱེས་པ་ཡོངས་སུ་དག་པའི་སངས་རྒྱས་ཀྱི་ཞིང་བསྡུས་པའི་གཟུགས་ཐར་པའི་གྲོང་ཁྱེར་ཆེན་པོ་རྣམ་པར་སྣང་མཛད་ཀྱི་རང་བཞིན་རིན་པོ་ཆེ་སྣ་ཚོགས་པའི་རང་བཞིན་གྱི་གཞལ་ཡས་ཁང་གྲུ་བཞི་སྒོ་བཞི་པ། ཀ་བ་བརྒྱད་ཀྱིས་ཉེ་བར་མཛེས་པའི། སྟེགས་བུ་བཞིས་ཡོངས་སུ་བསྐོར་བ། རྟ་བབས་བཞིས་བརྒྱན་པ། དྲ་བ་དང༌། དྲ་བ་ཕྱེད་པ་དང༌། དར་དཔྱངས་དང༌། མེ་ཏོག་གི་ཕྲེང་བ་དང༌། བླ་རེ་དང༌། མེ་ལོང་དང༌། རྔ་ཡབ་ཀྱིས་མཛེས་པ། རྡོ་རྗེའི་སྲད་བུ་ལས་འཕྲོས་པའི་སངས་རྒྱས་ཀྱི་ཚོགས་ཀྱི་འོད་ཟེར་གྱིས་སེམས་གཡོ་བའི་བ་དན་གྱི་རྩེ་མོ་ལ་དྲིལ་བུའི་སྒྲ་སྣ་ཚོགས་ཕྱོགས་ཀུན་ཏུ་འཁྲོལ་བ། ལྷ་མོ་མཆོག་གིས་འདོད་པ་ལྔ་པོ་ཉེ་བར་འབུལ་བས་མཉེས་པར་མཛད་པའོ། །འཁོར་ལོ་གཉིས་ཏེ། གེ་སར་དང་བཅས་པ་བསྒོམ་པར་བྱ་བ་གཅིག་པ་དང༌། གཞན་ནི་ཟུར་གསུམ་པ་དྲན་པར་བྱའོ། །དེའི་དབུས་སུ་ཡོན་ཏན་ཉིས་འགྱུར་ཨཱ་ལི་ཡོངས་སུ་གྱུར་པ་ལས་ཟླ་བའོ། །དེའི་སྟེང་དུ་ཏཱི་ཡིག་ཡོངས་སུ་གྱུར་པ་ལས་རྡོ་རྗེའོ། །དེའི་ལྟེ་བ་ལ་ཏཱཾ་ཡིག་གོ །དེ་ནས་ཡང་ཡོན་ཏན་ཉིས་འགྱུར་ཌ་ཌྷ་ད་དྷ་ཡ་ལ་དང་ལྡན་པའི་ཡོན་ཏན་ཉིས་འགྱུར་ཀཱ་ལི་ཡོངས་སུ་གྱུར་པ་ལས་ཉི་མའོ། །གཉིས་པོ་སྦྱོར་བ་ནི་བདེ་བ་ཆེན་པོའི་མཆོག་ཏུ་དགའ་བ་མེ་ལོང་ལྟ་བུའི་ཡེ་ཤེས་དང་ལྡན་པ་ནི་ཟླ་བའོ། །མཉམ་པ་ཉིད་དང་ལྡན་པའི་ཉི་མ་དང༌། ས་བོན་གྱི་རྟགས་ལས་རང་གི་ལྷ་ནི་སོ་སོར་རྟོག་པ་ཞེས་བརྗོད་དོ། །བྱ་བ་ཐམས་ཅད་གཅིག་ཏུ་གྲུབ་ཅིང་རྫོགས་པ་དང༌། དག་པའི་ཆོས་ཉིད་དོ་ཞེས་པ་ནི་རྣམ་པ་ལྔས་མངོན་པར་བྱང་ཆུབ་པའོ། །དེའི་ས་བོན་གྱི་འོད་ཟེར་གྱིས་ཡེ་ཤེས་སེམས་དཔའ་རྣམས་བཀུག་ནས་རང་གི་འདོད་ལྷའི་འཁོར་ལོ་ལ་དེ་བཞིན་དུ་གཞུག་ཅིང༌། ཡང་རྣལ་འབྱོར་པས་མཚན་མ་དང་ས་བོན་ཡོངས་སུ་གྱུར་པ་ལས་ལྷ་མོ་སྒྲོལ་མ་རྣམ་པར་བསྒོམ་པར་བྱ་སྟེ། ཕྱག་བརྒྱད་པ་དང་ཞལ་བཞི་མ། །རྒྱན་ཐམས་ཅད་ཀྱིས་ཀུན་ནས་བརྒྱན། །གསེར་གྱི་མདོག་ཅན་གཞོན་ནུ་མའི། །མཚན་ཉིད་དང་ལྡན་གཟི་བརྗིད་འབར། །སངས་རྒྱས་བཞི་ཡི་ཅོད་པན་ཅན། །རྡོ་རྗེ་
ཉི་མས་དབང་བསྐུར་སྐྱེས། །ན་ཚོད་གཞོན་ཞིང་མཛེས་ལྡན་མ། །གསེར་གྱི་རྣ་ཆ་གཡོ་བ་ཅན། །སྣ་ཚོགས་པདྨའི་གདན་ལ་བཞུགས། །འོད་ཟེར་དམར་པོས་རྣམ་པར་བརྒྱན། །རྡོ་རྗེ་ཞགས་པ་དེ་བཞིན་དུང༌། །མདའ་བསྟོད་པ་ནི་གཡས་ཀྱི་ཕྱག །རྡོ་རྗེ་ལྕགས་ཀྱུ་ཨུཏྤལ་དང༌། །གཞུ་དང་སྡིགས་མཛུབ་དེ་བཞིན་གཡོན། །རྡོ་རྗེ་སྒྲོལ་བདག་རྣལ་འབྱོར་པས། །སེམས་ཅན་ཀུན་དོན་ཕ་རོལ་ཕྱིན། །རྡོ་རྗེ་སྐྱིལ་ཀྲུང་སྦྱོར་བ་ཡིས། །ས་གསུམ་པོ་ནི་བསྒྲུབ་པར་བྱ། །ཤར་དུ་མེ་ཏོག་སྒྲོལ་མ་སྟེ། །སྐུ་མདོག་དཀར་མོ་ཡིད་འོང་མ། །ཨོཾ་ཡིག་ཡེ་ཤེས་རྫོགས་པ་ཡི། །མེ་ཏོག་ཕྲེང་བ་ཕྱག་ན་བསྣམས། །ཞལ་གཅིག་པ་དང་ཕྱག་གཉིས་མ། །རྒྱན་རྣམས་ཀུན་གྱིས་རྣམ་པར་བརྒྱན། །ལྷོ་རུ་བདུག་སྤོས་སྒྲོལ་མ་ནི། །སྐུ་མདོག་ནག་མོ་གཟུགས་མཛེས་མ། །རྒྱན་རྣམས་ཀུན་གྱིས་རྣམ་པར་བརྒྱན། །ཕྱག་ན་སྤོས་ཀྱི་སྡོང་པོ་བསྣམས། །ནུབ་ཏུ་མར་མེའི་སྒྲོལ་མ་ནི། །མར་མེའི་སྡོང་བུ་ཕྱག་ན་བསྣམས། །སྐུ་མདོག་སེར་མོ་རྒྱན་ཆེན་མ། །གསེར་གྱི་རྣ་ཆ་གཡོ་བ་ཅན། །བྱང་དུ་དྲི་ཡི་སྒྲོལ་མ་ནི། །དྲི་ཡི་དུང་ཆོས་ཕྱག་ན་བསྣམས། །ལྷ་མོ་སྐུ་མདོག་དམར་མོ་བརྗིད། །དཀྱིལ་འཁོར་པ་ཀུན་བསྒོམ་པར་བྱ། །ལྕགས་ཀྱུ་ལ་སོགས་དབྱེ་བ་ཡིས། །དེ་ནས་སྒོ་སྐྱོང་མ་རྣམས་བསྒོམ། །ཕྱག་གཡས་ན་ནི་ལྕགས་ཀྱུ་དང༌། །གཡོན་པ་བདུད་ལ་སྡིགས་མཛུབ་མཛད། །ཉི་མའི་དཀྱིལ་འཁོར་དབུས་གནས་པའི། །སྐུ་མདོག་དཀར་མོ་ཡིད་འོང་མ། །ལྕགས་ཀྱུ་མའོ། །ཕྱག་གཡས་ན་ནི་ཞགས་པ་དང༌། །གཡོན་པ་གདུག་ལ་སྡིག་མཛུབ་མཛད། །དཀྱིལ་འཁོར་དམར་པོའི་དབུས་གནས་པའི། །སྐུ་མདོག་དཀར་མོ་ཡིད་འོང་མ། །ཞགས་པ་མའོ། །ཕྱག་གཡས་ན་ནི་ལྕགས་སྒྲོག་བསྣམས། །གཡོན་གྱི་ཕྱག་ནི་སྡིགས་མཛུབ་མཛད། །རྡོ་རྗེ་སྐྱིལ་ཀྲུང་དབུས་གནས་པའི། །སྐུ་མདོག་དམར་མོ་བསྒོམ་པར་བྱ། །རྡོ་རྗེ་ལྕགས་སྒྲོག་མའོ། །རྡོ་རྗེ་དྲིལ་བུ་ཕྱག་ན་བསྣམས། །གཡོན་པ་གདུག་ལ་སྡིགས་མཛུབ་མཛད། །འོད་ཟེར་དཀྱིལ་འཁོར་དབུས་གནས་པའི། །མར་གད་དང་མཚུངས་ཨུཏྤལ་བསྣམས། །རྡོ་རྗེ་དྲིལ་བུ་མའོ། །ཟུར་ཆ་རྣམས་ཀྱི་མཚན་མ་ནི། །བྱང་སེམས་བུམ་པ་རི་རབ་དང༌། །མེ་ཐབ་དང་ནི་རྒྱལ་མཚན་ཆེ། །སྟེང་དུ་གཙུག་ཏོར་རྣམ་རྒྱལ་མ། །སྐུ་མདོག་དཀར་མོ་གཟུགས་མཇེས་མ། །ཕྱག་གཡས་ན་ནི་འཁོར་ལོ་དང༌།།
གཡོན་པ་གདུག་ལ་སྡིགས་མཛུབ་མཛད། །ཕྱག་གཡས་སྦྲུལ་གྱི་ཞགས་པ་དང༌། །གཡོན་པ་གདུག་ལ་སྡིགས་མཛུབ་མཛད། །སྐུ་མདོག་ནག་མོ་འཇིགས་ཆེན་མོ། །འོག་ཏུ་གནོད་མཛེས་མ་བསྒོམ་བྱ། །དེ་ལྟར་བསྒོམ་ཞིང་སྔགས་སྤྲོས་ནས་བཟླས་པར་བྱའོ། །ཨོཾ་ཏཱ་རེ་ཏུཏྟཱ་རེ་ཏུ་རེ་སྭཱ་ཧཱ། །ཡི་གེ་བཅུ་ཡིས་ལྷ་མོ་བཅུ། །ཕ་རོལ་ཕྱིན་པ་བཅུ་ལ་བརྟེན། །བསྒོམ་པ་རབ་ཏུ་སྦྱོར་བ་ཡིས། །ལས་ཀུན་རབ་ཏུ་གྲུབ་པར་བྱེད། །གཏི་མུག་རྡོ་རྗེ་མིག་ལ་དགོད། །ཞེ་སྡང་རྡོ་རྗེ་རྣ་བ་དག །སེར་སྣ་རྡོ་རྗེ་དེ་བཞིན་སྣ། །ཞལ་ལ་འདོད་ཆགས་རྡོ་རྗེ་མ། །ལུས་ལ་ཕྲག་དོག་རྡོ་རྗེ་མ། །ཉོན་མོངས་མུན་པ་ཀུན་འཇོམས་པའི། །སྐྱེ་མཆེད་རྣམས་སུ་ཤེས་པར་བྱ། །སྙིང་གར་བདག་མེད་རྣལ་འབྱོར་མ། །ཞེས་པ་ནི་མིག་ལ་སོགས་པ་བྱིན་གྱིས་བརླབ་པའོ། །ཞལ་གཅིག་མ་དང་ཕྱག་གཉིས་མ། །སྣ་ཚོགས་གཟུགས་རྣམས་གཡོ་བ་ཡིས། །གྲི་གུག་ཐོད་པ་ཕྱག་ན་བསྣམས། །སྲོག་ནི་སྟེང་དུ་ཡང་དག་གནས། དེ་ནས་ལུས་ངག་ཡིད་གསུམ་བྱིན་གྱིས་བརླབ་པ་ནི། ཨོཾ་ཡིག་སྐུ་ཡི་རྡོ་རྗེ་ཡིས། །རྒྱལ་པོ་ཆེན་པོ་རྣམ་པར་བརྒྱན། །ཧཱུཾ་ཡིག་ཐུགས་ཀྱི་རྡོ་རྗེ་ཡིས། །རྒྱལ་ཆེན་རྡོར་སེམས་གོ་འཕང་གནས། །ཨཱཿཡིག་མཆོག་གི་དེ་ཉིད་དག །ཇི་ལྟར་རྣམ་སྣང་མཛད་པར་འདོད། །ཀུན་ལ་དེ་བཞིན་ཡུམ་གྱུར་པའི། །ཡེ་ཤེས་རང་བཞིན་ཐུགས་ཀར་དགོད། །སེམས་དཔའ་ཡེ་ཤེས་སྦྱོར་བ་ཡིས། །སངས་རྒྱས་བྱང་ཆུབ་ཐོབ་པར་འགྱུར། །རང་སྔགས་ཡི་གེ་ལས་བྱུང་བའི། །ཕྱག་རྒྱའི་འཁོར་ལོ་བརྟག་པ་ཡིས། །དཀྱིལ་འཁོར་པ་ཀུན་འབྱུང་བ་ཡི། །སྤྲོ་དང་བསྡུ་བ་བྱས་ནས་ནི། །ནམ་མཁའི་ཁམས་ཀྱི་དབུས་གནས་པའི། །ཡེ་ཤེས་དཀྱིལ་འཁོར་བསྒོམ་པར་བྱ། །ཡེ་ཤེས་ལྔ་ཡི་ཡོན་ཏན་གྲགས། །སྣ་ཚོགས་གཟུགས་དང་ལྡན་པ་ཡི། །མཆོད་པ་ཀུན་གྱིས་མཆོད་པ་དང༌། །མངོན་པར་བསྟོད་པས་མཆོད་པར་བྱ། །སྒོ་སྐྱོང་མ་རྣམས་རབ་སྦྱོར་བས། །ཡེ་ཤེས་ཆུ་བོ་རབ་ཏུ་བསྒྲུབས། །དམ་ཚིག་འཁོར་ལོར་ཡང་དག་ཞུགས། །ཡེ་ཤེས་འཁོར་ལོ་ཤིན་ཏུ་འབར། །སངས་རྒྱས་ཀུན་མཚུངས་རྣལ་འབྱོར་པས། །གཉིས་མེད་གྱུར་པར་སྐད་ཅིག་ལ། །ཨོཾ་བཛྲཱཾ་ཀུ་ཤི་ཨཱ་ཀཪྵ་ཡ་ཛཿ་ཨོཾ་བཛྲ་པཱ་ཤི་པྲ་བེ་ཤ་ཡ་ཧཱུཾ། ཨོཾ་བཛྲ་སྥོ་ཊི་བནྡྷ་ཡ་བཾ། ཨོཾ་བཛྲཱ་བེ་ཤ་བ་ཤྲཱི་ཀུཾ་རུ་ཧོཿ་རང་གི་སྙིང་གའི་ས་བོན་ལས་བྱུང་བའི་འོད་ཟེར་ལྕགས་
ཀྱུའི་རྣམ་པས་ཁམས་གསུམ་ན་བཞུགས་པའི་སངས་རྒྱས་རྣམས་གདན་དྲངས་པ་ཙམ་གྱིས་ཡང་དག་པར་མཆོད་ནས་རྗེས་སུ་མགོན་དུ་བྱེད་པས། ཨོཾ་ཨ་བྷི་ཥིཉྩནྟུ་མཱཾ་སར་བ་ཏ་ཐཱ་ག་ཏ། བྱང་ཆུབ་རྡོ་རྗེ་སངས་རྒྱས་ལ། །ཇི་ལྟར་མཆོད་ཆེན་སྩལ་བ་ལྟར། །བདག་ཀྱང་བསྐྱབ་པའི་དོན་གྱི་ཕྱིར། །ནམ་མཁའི་རྡོ་རྗེ་དེང་བདག་སྩོལ། །ཞེས་པས་དབང་བསྐུར་བ་ཞུའོ། །དབང་བསྐུར་བ་ནི་རྡོ་རྗེ་ཆེ། །ཁམས་གསུམ་པ་ཡིས་ཕྱག་བྱས་པ། །སངས་རྒྱས་ཀུན་གྱི་གསང་བ་གསུམ། །གནས་གྱུར་བདག་ལ་སྩལ་དུ་གསོལ། །ཞེས་བརྗོད་ནས་སངས་རྒྱས་ཧེ་རུ་ཀའི་གཟུགས་ཀྱིས་བདུད་རྩི་ལྡས་གང་བའི་དེ་བཞིན་གཤེགས་པ་ལྔའི་བདག་ཉིད་ཀྱི་བུམ་པ་ལྔས་དབང་བསྐུར་ཏེ། དབང་བསྐུར་བའི་དུས་སུ་མེ་ཏོག་གི་ཆར་འབབ་བར་འགྱུར་རོ། །རྔ་བོ་ཆེའི་སྒྲ་འབྱུང་བར་འགྱུར་རོ། །གུར་གུམ་གྱི་ཆར་འབབ་པར་འགྱུར་རོ། །གཟུགས་རྡོ་རྗེ་མ་ལ་སོགས་པ་རྣམས་ཀྱིས་མཆོད་པ་བྱེད་པར་འགྱུར་རོ། །སྤྱན་མ་ལ་སོགས་པ་རྣམས་ཀྱིས་རྡོ་རྗེའི་གླུ་དང་བསྟོད་པ་བྱེད་པར་འགྱུར་རོ། །དབང་བསྐུར་བ་དང་ལྡན་པའི་སྤྱི་བོར་རྡོ་རྗེ་ཉི་མས་དབུ་བརྒྱན་ཏེ། ཅོད་པན་གྱི་ཕྱོགས་རྣམས་སུ་དེ་བཞིན་གཤེགས་པ་རྣམ་པར་སྣང་མཛད་དང༌། མི་བསྐྱོད་པ་དང༌། འོད་དཔག་མེད་དང༌། དོན་ཡོད་གྲུབ་པ་རྣམས་སོ། །དབུས་ཀྱི་འཁོར་ལོའི་རིམ་པ་ཇི་ལྟ་བ་བཞིན་དུ་ལྷ་མོ་བཞི་པོ་རྣམས་ཀྱི་ཅོད་པན་ཅན་ནོ། །སྒོ་སྐྱོང་མ་རྣམས་ཀྱི་ཡང་སྟེ། གཙུག་ཏོར་དུ་རིན་ཆེན་དབང་པོ་དང༌། གནོད་མཛེས་མ་ལ་མི་བསྐྱོད་པའི་ཅོད་པན་ནོ། །ཞེ་སྡང་རྡོ་རྗེ་ཁྱོད་ལ་འདུད། །གཏི་མུག་རྡོ་རྗེ་ཕྱག་འཚལ་འདུད། །སེར་སྣ་རྡོ་རྗེ་བདག་སྐྲག་པས། །འདོད་ཆགས་རྡོ་རྗེ་བདག་ལ་སྩོལ། །ང་རྒྱལ་ཆེན་པོ་ཕྲག་དོག་ཆེ། །རྡོ་རྗེ་ཐམས་ཅད་བདག་ལ་སྩོལ། །རྡོ་རྗེ་ཐམས་ཅད་དམ་ཚིག་མགོན། །ལས་རྣམས་ཐམས་ཅད་རབ་ཏུ་སྒྲུབ། །བསྟོད་པའོ། །ལྷ་ཡི་མེ་ཏོག་དམ་པ་འདི། །གཙང་ཞིང་དག་པའི་སྐྱེ་གནས་ཏེ། །བདག་གིས་གུས་པས་ངེས་པར་འབུལ།། སོ་སོར་བཞེས་ནས་བདག་ལ་སྐྱོབས། །མེ་ཏོག་གོ །ནགས་ཀྱི་རོ་སོགས་ཡིད་འོང་བ། །དྲི་ལ་སོགས་པའི་བདུག་སྤོས་མཆོག །བདག་གིས་གུས་པས་ངེས་པར་འབུལ། །སོ་སོར་བཞེས་ནས་བདག་ལ་སྐྱོབས། །བདུག་སྤོས་སོ། །བསྲུང་པའི་ཚོགས་དང་དག་པ་དང༌། །ཡིད་ཀྱི་མུན་འཇོམས་
དགེ་བ་འདི། །བདག་གིས་གུས་པས་ངེས་པར་འབུལ། །སོ་སོར་བཞེས་ནས་བདག་ལ་སྐྱོབས། །མར་མེའོ། །ལྷ་ཡི་དྲི་མཆོག་དམ་པ་འདི། །གཙང་ཞིང་དག་པའི་སྐྱེ་གནས་ཏེ། །བདག་གིས་གུས་པས་ངེས་པར་འབུལ། །སོ་སོར་བཞེས་ནས་བདག་ལ་སྐྱོབས། །དྲིའོ། །དེའི་རྗེས་སུ་ཡཾ་ཡིག་ཡོངས་སུ་གྱུར་པ་ལས་རླུང་གི་དཀྱིལ་འཁོར་གཞུའི་རྣམ་པ་རྒྱལ་མཚན་གྱིས་མཚན་པའོ། །རཾ་ཡིག་དམར་པོའི་ས་བོན་ལས་བྱུང་བའི་མེའི་དཀྱིལ་འཁོར་ཟུར་གསུམ་གྱི་སྟེང་དུ་ཨ་ཡི་ག་དམར་པོ་ལས་བྱུང་བའི་པདྨའི་སྣོད་བྷྲཱུཾ་ཨཱཾ་ཛྲཱིཾ་ཁཾ་ཧཱུཾ་གི་ས་བོན་ཡོངས་སུ་གྱུར་པ་ལས་དེའི་ས་བོན་བྱིན་གྱིས་བརླབས་ནས་དྲི་དང༌། ཉི་མ་དང་ཟླ་བ་དང༌། སྨན་དང༌། ཆུའི་མཚན་ཉིད་གྲངས་ཇི་ལྟར་དེ་བཞིན་གཤེགས་པ་ལྔའི་རང་བཞིན་བདུད་རྩི་ལྔ་གོ་ཀུ་ད་ཧ་ན་ཞེས་པའི་ས་བོན་ལྔ་བསམས་ནས། དེའི་སྟེང་དུ་མཐོ་གང་ཙམ་འཕགས་པའི་ཟླ་བ་ལ་གནས་པའི་ཧཱུཾ་ཡིག་ལས་བྱུང་བའི་རྡོ་རྗེ་ཆེན་པོ་རྩེ་ལྔ་པ་བསྒོམས་ནས། དེའི་འོག་ཏུ་ཨོཾ་ཡིག་བསམས་ནས་རླུང་གིས་བསྐྱོད་པའི་མེའི་དཀྱིལ་འཁོར། མེའི་སྟེང་དུ་རྡོ་རྗེའི་མེ། དེ་ཐམས་ཅད་སྡུད་པར་བལྟས་ནས་དེའི་རེག་བྱས་ཨོཾ་ཡིག་དང་རྡོ་རྗེ་ཞུ་ནས་དེ་ལ་དེ་བཞིན་དུ་བདུད་རྩི་དང་མར་ཞུ་བ་བཞིན་དུ་རོ་གཅིག་ཏུ་གྱུར་པར་བསམས་ནས། དེའི་སྟེང་དུ་ཏཱཾ་ཡིག་དཀར་པོའི་འོད་ཟེར་གྱིས་ཁམས་གསུམ་གྱི་ནང་དུ་ཞུགས་ནས་བདུད་རྩི་ཐམས་ཅད་བཀུག་སྟེ། དེའི་ནང་དུ་བྱས་པས་ཆོས་ཀྱི་དབྱིངས་དང་མཚུངས་པ་དེས་དེ་བཞིན་གཤེགས་པ་ཐམས་ཅད་ཀྱི་ཐུགས་ལ་ཞུགས་ཤིང་ཡེ་ཤེས་ཀྱི་བདུད་རྩི་བཀུག་ནས་ད་བཞིན་དུ་ལྷན་ཅིག་ཏུ་བྱས་ཏེ། དེའི་སྟེང་དུ་དེ་ཉིད་གསུམ་བསམས་ནས་དེས་དེ་བཞིན་དུ་མངོན་པར་བསྔགས་ཏེ། དཀྱིལ་འཁོར་པ་ཐམས་ཅད་ཀྱི་ཐུགས་ཀར་དཀྱིལ་འཁོར་གྱི་འཁོར་ལོ་བསམས་ནས་ལྗགས་རྣམས་ལ་ཧཱུཾ་ཡིག་དཀར་པོ་ལས་སྐྱེས་པའི་རྡོ་རྗེ་དཀར་པོ་ནས་འབྲུའི་ཚད་ཙམ་བསམས་ནས་དེའི་བདུད་རྩིས་དཀྱིལ་འཁོར་བའི་བདག་ཉིད་ཀྱང་མཉེས་པར་བྱའོ། །འདིས་དཀྱིལ་འཁོར་རྫོགས་ནས་ཐུན་མཚམས་གསུམ་དུ་བསྒོམས་ནས་ལྡང་བར་བྱའོ། །རྟག་ཏུ་ལྷའི་གཟུགས་ཀྱིས་གནས་པར་བྱའོ། །དེ་ལ་བཟླས་པའི་སྔགས་ནི་འདིའོ། །ཨོཾ་ཏཱ་རེ་ཏུཏྟཱ་རེ་ཏུ་རེ་སྭཱ་ཧཱ། །སྔགས་མཆོག་འདི་ནི་གཙོ་བོ་སྟེ། །སངས་རྒྱས་ཀུན་གྱིས་ཕྱག་བྱས་
པ། བཀླགས་པས་དངོས་གྲུབ་མྱུར་དུ་བྱེད། །རྡོ་རྗེ་གུར་ལས་གསལ་པོར་གསུངས། །དེ་ནས་གཞན་ཡང་གཟུངས་ཀྱི་སྔགས་ནི། ན་མོ་རཏྣ་ཏྲ་ཡཱ་ཡ། ནམ་ཨཱཪྻཱ་ཝ་ལོ་ཀི་ཏེ་ཤྭ་རཱ་ཡ། བོ་དྷི་སཏྭཱ་ཡ། མ་ཧཱ་སཏྭཱ་ཡ། མ་ཧཱ་ཀཱ་རུ་ཎི་ཀཱ་ཡ་ཏདྱ་ཐཱ། ཨོཾ་ཏཱ་རེ་ཏུཏྟཱ་རེ་ཏུ་རེ་སརྦ་དུཥྚཱན་མ་མ་ཀྲྀ་ཏེ་ཛཾ་བྷ་ཡ། སྟམྦྷ་ཡ། མོ་ཧ་ཡ། བནྡྷ་ཡ་ཧཱུཾ་ཧཱུཾ་ཧཱུཾ་ཕཊ་ཕཊ་ཕཊ་སརྦ་དུཥྚཱན་སྟམྦྷ་ནི་ཏཱ་རེ་སྭཱ་ཧཱ། ཡི་གེ་བཅུའི་ཆོ་གའི་སྔགས་འདི་གོས་ཀྱི་སྣ་ལ་ལན་བདུན་དུ་མངོན་པར་བསྔགས་ནས་མདུད་པ་བྱས་ན། །འཇིགས་པ་དང་བཅས་པའི་ས་གང་དུ་འགྲོ་ཡང་འཇིགས་པར་མི་འགྱུར་རོ། །སྟག་དང༌། ཆོམ་པོ་དང༌། ཆུ་སྲིན་དང༌། སེང་གེ་དང༌། སྤྲུལ་དང། མ་ཧེ་དང༌། དོམ་དང༌། དྲེད་ལ་སོགས་པ་མིང་དྲན་པ་ཙམ་གྱིས་ཞི་ཞིང་འཇིགས་པར་མི་འགྱུར་རོ། །སྔགས་འདིས་ཨུཏྤལ་ལའི་སྦྱིན་སྲེག་བརྒྱ་རྩ་བརྒྱད་བྱས་ཏེ། ཨོཾ་ཏཱ་རེ་ཏུཏྟཱ་རེ་ཏུ་རེ་ཨ་མུ་ཀཾ་མེ་བ་ས་མ་ན་ཡ་སྭཱ་ཧཱ། ཡང་སྔགས་དེས་དེ་བཞིན་དུ་བྱ་རོག་གི་སྒྲོལ་ལ་ལན་སུམ་ཅུ་རྩ་གཉིས་ཡོངས་སུ་བཟླས་ཏེ་དགྲའི་ཁྱིམ་དུ་སྦས་ན་ཞག་བདུན་ན་སྐྲོད་པར་འགྱུར་རོ། །ཨོཾ་ཏཱ་རེ་ཏུཏྟཱ་རེ་ཏུ་རེ་ཙ་ལ་པྲ་ཙ་ལ་ཤཱི་གྷྲཾ་གཱ་མི་ནི་དེ་བ་དཏྟ་ཨུཙྪ་ཊ་ཡ་ཧཱུཾ་ཕཊ། དེ་ནས་གཞན་ལ་ཡང་རབ་ཏུ་སྦྱོར་བར་འགྱུར་ཏེ། ཨོཾ་ཏཱ་རེ་ཏུཏྟཱ་རེ་ཏུ་རེ་ཨ་མུ་ཀཱ་བྷི་དྷཱ་ནཱཾ་ཀུ་མཱ་རཱི་མ་ཧྱཱ་མུད་བཱ་ཧེ་ན་ཏ་སྱཱཿཔི་ཏཱ་པྲ་ཡཙྪནྟུ་སྭཱ་ཧཱ། མྱོས་བྱེད་གཏུམ་པོའི་ས་བོན་དང༌། །མྱོས་བྱེད་འབྲས་བུ་དེ་བཞིན་དུ། །མྱ་ངན་མེད་ཤིང་མེ་ཏོག་བཅས། །སྦྱིན་སྲེག་སྟོང་ཕྲག་ལྔ་བྱས་ཏེ། །མར་སྦྲང་བུ་རམ་སྦྱིན་སྲེག་ནི། །བུ་མོ་སྒྲུབ་ལ་མཆོག་ཏུ་བསྔགས། །དེ་ནས་ཞག་བདུན་སྦྱོར་བ་ཡིས། །རང་འདོད་བུ་མོ་ཐོབ་པར་འགྱུར། །དེ་ནས་གཞན་ལ་ཡང་རབ་ཏུ་སྦྱོར་བར་འགྱུར་ཏེ། ཨོཾ་ཏཱ་རེ་ཏུཏྟཱ་རེ་ཏུ་རེ་ཨ་མུ་ཀཱ་བྷཱི་དྷ་ནཱཾ་སྭསྠཱ་ན་ཏ་ཨཱ་ཀཪྵ་ཡ་མ་མཱ་ནྟི་ཀེ་ཛཿསྔགྶ་འདིས་རག་ཆུང་གི་ཚེར་མ་རང་བྱུང་གི་མེ་ཏོག་ལ་བསྙུགས་ཏེ་སྦྱིན་སྲེག་སྟོང་ཕྲག་ལྔ་བྱས་ན་འདིས་རྒྱལ་པོའི་བུ་མོ་ཡང་འགུགས་པར་བྱེད་དོ། །དེ་ནས་གཞན་ལ་ཡང་རབ་ཏུ་སྦྱོར་བར་འགྱུར་ཏེ། རང་བྱུང་གི་མེ་ཏོག་གིས་བསྐུས་པའི་རས་ལ་བཅོམ་ལྡན་འདས་མ་ཞལ་གཅིག་ཕྱག་གཉིས་མ་ལྕགས་ཀྱུ་དང་ཨུཏྤལ་ལའི་ཞགས་པ་ཕྱག་ན་བསྣམས་པ་བྲིས་ལ་དེའི་མདུན་དུ་མཆོད་པ་བྱས་ནས། ལྷ་ཡི་མེ་ཏོག་དམ་པ་འདི། །ཞེས་པ་ལ་སོགས་པས་མཆོད་པར་བྱའོ། །ཕྱིས་བསྒོམ་པ་དང་ལྡན་པས་སྔགས་བཟླས་པར་བྱའོ། །ཨོཾ་ཏཱ་རེ་ཏུཏྟཱ་རེ་ཏུ་
རེ་ཨ་མུ་ཀི་མ་མེ་བ་སི་ཏཾ་སྭ་སྣཾ་ཀ་ཐཱ་ཡ་ཧཱུཾ་ཕཊ། སྟོང་ཕྲག་ལྔས་འོང་བར་འགྱུར་ཏེ། ཞགས་པས་མགུལ་པ་བཅིངས་ཤིང་ལྕགས་ཀྱུས་སྙིང་གར་ཕུག་ལ་བཀུག་ནས་བསྒྲུབ་བྱ་རྐང་པའི་འོག་ཏུ་བསམས་ལ་བྲན་མོའི་ཚུལ་གྱིས་སྤྱད་པར་བྱའོ། །དེ་ནས་གཞན་ལ་ཡང་རབ་ཏུ་སྦྱོར་བར་འགྱུར་ཏེ། སྒྲོལ་མའི་གཟུངས་ལན་བདུན་དུ་མངོན་པར་བསྔགས་ནས་བདག་གི་མིག་གཉིས་ལ་བྱུགས་ནས་རྒྱལ་རིགས་ཀྱི་ནང་དུ་ཞུགས་ན་རྒྱལ་པོ་དང་བཅས་པ་སློབ་མར་འགྱུར་ཞིང་གུས་པར་བྱེད་དོ། །འགལ་བ་སྨྲ་བར་མི་འགྱུར་རོ། །དད་པས་འབུལ་བར་འགྱུར་རོ། །དགའ་བའི་གཏམ་བྱེད་པར་འགྱུར་རོ། །དེའི་གཡོག་བྱེད་པར་འགྱུར་རོ། །ཁྲོ་བ་ཡང་དབང་དུ་འགྱུར་རོ། །མཐོང་བའི་རྐྱེན་གྱིས་ངོ་མཚར་དུ་འགྱུར་རོ། །དེ་ནས་གཞན་ལ་ཡང་རབ་ཏུ་སྦྱོར་བར་འགྱུར་ཏེ། སྒྲོལ་མའི་གཟུངས་ལན་བརྒྱ་བཟླས་ནས་སྦྲུལ་མགོ་གཉིས་པའི་མགོ་ཐལ་བར་བྱས་ཏེ་བ་དམར་མོའི་མར་ལ་ཨརྐའི་བལ་ལ་སྡོང་བུ་བྱས་ཏེ་རབ་ཏུ་སྦར་ནས་མིག་སྨན་བྱས་ཏེ། དེའི་མིག་སྨན་དང༌། རྡོ་རྗེ་ཉི་མ་དང་རྡོ་རྗེ་ཆོས་དག་ལ་མཉེས་ཤིང་རྟ་མཆོག་གིས་བདུག་པར་བྱའོ། །ཐལ་བ་དང་ལྷན་ཅིག་མིག་སྨན་བྱས་གང་ལ་རྡོ་རྗེའི་མིག་གིས་བལྟས་པ་དེའི་གལ་ཏེ་པདྨ་གར་དབང་འཛག་པར་མ་གྱུར་ན། དེའི་ཚེ་སྒྲོལ་མ་བདག་གིས་སངས་རྒྱས་བཅོམ་ལྡན་འདས་བསླུས་པར་འགྱུར་རོ། །དེ་ནས་གཞན་ལ་ཡང་རབ་ཏུ་སྦྱོར་བར་འགྱུར་ཏེ། བྱིས་པ་སོ་མ་སྐྱེས་པའི་ཁ་ཆུ་བླངས་ནས་སྒྲོལ་མའི་གཟུངས་ལན་བདུན་དུ་མངོན་བར་བསྔགས་ཏེ། བྷྲྀངྒ་རཱ་ཛའི་རྩ་བ་དང་གིའུ་ཝང་དང་ལྷན་ཅིག་ཏུ་བྱས་ཏེ་དཔྲལ་བར་ཐིག་ལེ་བྱས་ནས་གང་དང་གང་ལ་བལྟས་པ་དེ་དང་དེ་དབང་དུ་འགྱུར་རོ། །དེ་ནས་གཞན་ལ་ཡང་རབ་ཏུ་སྦྱོར་བར་འགྱུར་ཏེ། ལྟོ་བའི་སྲིན་བུ་ལ་སྒྲོལ་མའི་གཟུངས་ལན་བདུན་དུ་མངོན་པར་བསྔགས་ནས་རྡོ་རྗེ་ཆོས་དང་བཅས་ཏེ་སོ་རྩི་གཞོན་ནུ་མ་ལ་བྱིན་ན་ལོངས་སྤྱད་པ་ཙམ་གྱིས་སྦྱོར་བའི་མཆོག་ཏུ་འགྱུར་རོ། །འདི་མི་སྤོང་ཞིང་གཞན་ལ་དགའ་བར་མི་འགྱུར་རོ། །གཞན་དུ་མི་འགྲོ་ལ་སྐྱེས་བུ་གཞན་མི་འདོད་དོ། །རང་གི་བདག་པོ་ཡང་སྤོང་བར་མི་བྱེད་དོ། །དེ་ནས་གཞན་ལ་ཡང་རབ་ཏུ་སྦྱོར་བར་འགྱུར་ཏེ། ཞག་ཆེན་པོ་བདག་ཉིད་ཀྱི་ལུས་ལ་བྱུགས་ཏེ། སྒྲོལ་མའི་གཟུངས་ཁྲི་ཕྲག་གཅིག་བཟླས་ཤིང་བསྒོམས་ཏེ།
བཟླས་པའི་མཐའ་ལ་འབྲས་སཱ་ལུའི་ཕྱེ་མས་དྲིལ་ཕྱིས་བྱས་བའི་དྲི་མ་བསྡུས་ཏེ་གང་ལ་བྱིན་པ་དེ་ཇི་སྲིད་འཚོའི་བར་དུ་གཏོང་བར་མི་འགྱུར་རོ། །དེ་ནས་གཞན་ལ་ཡང་རབ་ཏུ་སྦྱོར་བར་འགྱུར་ཏེ། ཟླ་བ་གཟས་ཟིན་པའི་དུས་སུ་སྒྲོལ་མའི་གཟུངས་བཟླས་ཤིང་བསྙེན་པ་བྱས་ནས་དེ་ལས་ཡང་དག་པར་བྱུང་བའི་འཇིག་རྟེན་དབང་ཕྱུག་བླངས་ཏེ་དུང་གི་ཕྱེ་མ་དང་བསྲེ་བར་བྱའོ། །དེ་ནས་སྒེག་མོ་ལ་བྱིན་ན་དེ་ཇི་སྲིད་འཚོའི་བར་དུ་རྗེས་སུ་འཇུག་པར་འགྱུར་རོ། །དེ་ལ་དེ་བཞིན་དུ་བདག་པོར་འདོད་ཅིང་གཞན་དུ་མི་འགྲོའོ། །དེ་ནས་གཞན་ལ་ཡང་རབ་ཏུ་སྦྱོར་བར་འགྱུར་ཏེ། སྒྲོལ་མའི་གཟུངས་སྔགས་ཀྱིས་མྱོས་བྱེད་ཀྱི་འབྲས་བུ་ལ་ལན་བརྒྱ་རྩ་བརྒྱད་ཡོངས་སུ་བཟླས་ཏེ་མྱོས་བྱེད་ཀྱི་འབྲས་བུ་དང་རྟ་མགྲིན་ལྷན་ཅིག་ཏུ་མཉེས་ལ་བྱུགས་ན་དེ་དབང་དུ་འགྱུར་རོ། །དེ་ནས་གཞན་ལ་ཡང་རབ་ཏུ་སྦྱོར་བར་འགྱུར་ཏེ། ཨོཾ་ཏཱ་རེ་ཏུཏྟཱ་རེ་ཏུ་རེ་ཨ་མུ་ཀཱ་སྱ་བནྡྷ་ན་མུཀྟི་ཀུཾ་རུ་སྭཱཧཱ། ཞེས་པའི་སྔགས་འདིས་ཨརྐའི་ལོ་མ་ལ་བསྒྲུབ་བྱའི་མིང་བར་དུ་བཅུག་སྟེ་བྲིས་ནས་སྡིག་པའི་ཚང་དུ་སྦས་ན་དེ་བཅིངས་པ་ལས་གྲོལ་བར་འགྱུར་རོ། །རྡོ་རྗེ་སྒྲོལ་མའི་སྒྲུབ་པའི་ཐབས། །ཡང་དག་བྲིས་ལས་ཉེར་བསགས་པའི། །བསོད་ནམས་གང་དེས་འཇིག་རྟེན་འདི། །བདེ་གཤེགས་གནས་སུ་འཇུག་པར་ཤོག །རྡོ་རྗེ་སྒྲོལ་མའི་སྒྲུབ་ཐབས་རྫོགས་སོ།། །།པཎྚི་ཏ་ཆེན་པོ་རིན་ཆེན་འབྱུང་གནས་ཞི་བའི་ཞབས་ཀྱིས་མཛད་པའོ། །ལྷ་མཆོད་ཀ་ར་བཱི་རའི་མེ་ཏོག་ལ། །ཐུན་མཚམས་གསུམ་དུ་བརྒྱ་རྩ་བརྒྱད་བཟླས་ནས། །འདོད་པའི་མཆོག་ཉིད་བླང་བྱ་ཟླ་གཅིག་གིས། །འཕགས་མ་སྒྲོལ་མས་ངེས་པར་སྩོལ་བར་མཛད། ཨོཾ་ཛཾ་བྷེ་མོ་ཧེ་སྭཱཧཱ།། །།