འཇམ་དཔལ་ཤེས་རབ་འཁོར་ལོ་སྒྲུབ་པའི་ཐབས།
རྒྱ་གར་སྐད་དུ། མཉྫུ་ཤྲཱི་པྲ་ཛྙཱ་ཙཀྲ་སཱ་དྷ་ནཾ། བོད་སྐད་དུ། འཇམ་དཔལ་ཤེས་རབ་འཁོར་ལོ་སྒྲུབ་པའི་ཐབས། །སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། །བླ་མའི་ཞབས་ལ་རྟག་ཕྱག་འཚལ། །རྡོ་རྗེ་སློབ་དཔོན་དེ་བཞིན་དུ། །གང་གིས་དད་པོར་ཕྱག་བཙལ་ནས། །འཇམ་དབྱངས་སྒྲུབ་ཐབས་བྲི་བར་བྱ། །སེམས་དཔའི་སྐྱིལ་ཀྲུང་ལ་གནས་ཏེ། །སྙིང་གར་ཟླ་བ་ཨ་ཡིས་བརྒྱན། །ཀུནད་དང་འདྲ་ས་བོན་འབར། །སྣ་ཚོགས་འོད་ཟེར་ཀུན་དུ་ཁྱབ། །དེ་ཡང་ཡོངས་སུ་རྫོགས་པར་གྱུར་པའི་ཆེ་བར་གྱུར་པ་ཡང་དག་པའི་སངས་རྒྱས་དང༌། བླ་མ་དང༌། བྱང་ཆུབ་སེམས་དཔའ་དེ་རྣམས་བལྟས་ནས་སྔགས་འདིས་མཆོད་པ་བྱ་སྟེ། ཨོཾ་བཛྲ་པུཥྤེ་ཧཱུཾ། ཨོཾ་བཛྲ་དྷཱུ་པེ་ཧཱུཾ། ཨོཾ་བཛྲ་དཱི་པེ་ཧཱུཾ། ཨོཾ་བཛྲ་གནྡྷེ་ཧཱུཾ། ཨོཾ་བཛྲ་ནཻ་བི་དྱ་ཧཱུཾ། དེ་ནས། དཀོན་མཆོག་གསུམ་ལ་བདག་སྐྱབས་མཆི། །སྡིག་པ་ཐམས་ཅད་སོ་སོར་བཤགས། །འགྲོ་བའི་བསོད་ནམས་རྗེས་ཡི་རང༌། །སངས་རྒྱས་བྱང་ཆུབ་ཡིད་ཀྱིས་གཟུང༌། །སངས་རྒྱས་ཆོས་དང་དགེ་འདུན་མཆོག །བྱང་ཆུབ་བར་དུ་སྐྱབས་སུ་མཆི། །བདག་དང་གཞན་དོན་རབ་བསྒྲུབ་ཕྱིར། །བྱང་ཆུབ་སེམས་
འདི་བདག་གིས་བྱ། །བྱང་ཆུབ་མཆོག་གི་སེམས་ནི་བསྐྱེད་པར་བགྱི། །སེམས་ཅན་ཐམས་ཅད་བདག་གིས་དེ་ལ་གཟུང༌། །བྱང་ཆུབ་སྤྱོད་མཆོག་ཡིད་འོང་སྤྱད་ནས་སུ། །འགྲོ་ལ་ཕན་ཕྱིར་སངས་རྒྱས་འགྲུབ་པར་ཤོག །ཅེས་བྱའོ། །སྨོན་ལམ་སྔོན་དུ་འགྲོ་བས་ཆོས་ཐམས་ཅད་བདག་མེད་པར་སྔགས་འདི་ཡིས་བསྒོམ་པར་བྱ་སྟེ། ཨོཾ་ཤཱུ་ནྱ་ཏཱ་ཛྙཱ་ན་བཛྲ་སྭ་བྷཱ་ཝ་ཨཱཏྨ་ཀོ྅ཧཾ། ས་བོན་རྣམ་པ་སྒྱུ་མ་ལྟར། །ཁམས་གསུམ་མ་ལུས་རྣམ་བསམས་ནས། །མཐོང་བ་དང་ནི་རེག་ཉིད་ཀྱང༌། །ཇི་ལྟར་ཐམས་ཅད་སྒྱུ་མ་བཞིན། །འགྲོ་བ་ཐམས་ཅད་གནས་པ་ནི། །དེ་ལྟར་མི་དམིགས་པར་བྱའོ། །ཞེས་བྱ་བས་ལྷག་པར་མོས་པར་བྱའོ། །དེ་ནས་ཐོག་མ་མེད་པའི་དུས་ནས་ཡང་དག་པ་མ་ཡིན་པའི་རྣམ་པར་རྟོག་པའི་ས་བོན་བསལ་ནས། རང་བཞིན་གྱིས་དག་ཅེས་ལྷག་པར་མོས་པར་བྱའོ། །ཨོཾ་སྭ་བྷཱ་ཝ་ཤུདྡྷཿསརྦ་དྷརྨཱཿསྭ་བྷཱ་ཝ་ཤུདྡྷོ྅ ཧཾ་ཞེས་བྱའོ། །དེ་ནས་སྔོན་དུ་བསྟན་པའི་ས་བོན་ལས་ཡོངས་སུ་རྫོགས་པའི་རལ་གྲིའོ། །དེའི་ཆང་གཟུངས་ཀྱི་དབུས་སུ་ཟླ་བའི་དཀྱིལ་འཁོར་རོ། །དེའི་སྟེང་དུ་སྔོན་དུ་བསྟན་པའི་ས་བོན་ཏེ། དེ་ཐམས་ཅད་ཡོངས་སུ་གྱུར་པ་ལས། བདག་ཉིད་འཇམ་དཔལ་གྱི་གཟུགས་སུ་རྣམ་པར་བསམ་པར་བྱ་སྟེ། རང་ཉིད་འགྲོ་བ་ཐམས་ཅད་ཀྱི་གཙོ་བོ་ཞེས་བྱའོ། །པདྨ་དང་ཟླ་བའི་གདན་ལ་གནས་ཤིང་སེམས་དཔའི་སྐྱིལ་མོ་ཀྲུང་གིས་མཉམ་པར་བཞུགས་པའོ། །ཟླ་བའི་འོད་དུ་མའི་འོད་ཟེར་སྤྲོ་ཞིང་ནམ་མཁའ་ཁྱབ་པར་བྱེད་པ་སྣ་ཚོགས་ཀྱི་ན་བཟའ་མནབས་པ། འགྲོ་བ་དགའ་བར་བྱེད་པ་སྐུ་མདོག་དཀར་ཞིང་ཡིད་དུ་འོང་བར་བྱེད་པའི་དཔའ་བོ་ཆེན་པོ་གཙུག་ཕུད་ལྔ་པ། རྒྱན་ཐམས་ཅད་ཀྱིས་བརྒྱན་པ། ཕྱག་གཡས་ཀྱིས་རལ་གྲི་འཕྱར་བ། ཕྱག་གཡོན་པས་སྙིང་གར་པོ་ཏི་བསྣམས་པའོ། །དེ་ནས་ཕྱག་རྒྱ་བཅིང་བར་བྱ་སྟེ། ལག་པ་གཉིས་ཐལ་མོ་སྦྱར་བ་བྱས་ནས། སྡིགས་མཛུབ་གཉིས་ཀྱིས་སྲིན་ལག་གི་སེན་མོ་གཉིས་བཀབ་ལ་ཨུཏྤ་ལ་ཁ་ཕྱེ་བ་ལྟར་ཡང་དག་པར་གནས་ཏེ། སྙིང་ག་དང༌། སྨིན་མའི་བར་དང༌། མགྲིན་པ་དང༌། སྤྱི་བོ་རྣམས་སུ་རང་གི་སྔགས་ཀྱིས་དགོད་པར་བྱས་ནས། དེ་ནས་ལྟེ་བའི་འོག་ཏུ་ཡི་གེ་བྷྲཱུཾ་ལས་མདོག་དཀར་པོའི་བྱང་ཆུབ་ཀྱི་ཤིང་གི་ལོ་མ་དང་འདྲ་བའི་ཟླ་བའི་དཀྱིལ་འཁོར་བསྒོམ་པར་
བྱའོ། །དེའི་སྟེང་དུ་བརྒྱད་པའི་བཞི་པ། དང་པོའི་བཅུ་དྲུག་པ། བདུན་པའི་གཉིས་པ། དང་པོའི་བཞི་པས་བརྒྱན་པའོ། །དེ་ལས་ཡོངས་སུ་རྫོགས་པའི་པདྨ་ཁ་ཟུམ་པ་སྟེ། ལྟེ་བའི་སྟེང་དུ་ཡི་གེ་ཧཱུཾ་གིས་ཁ་ཕྱེ་བ་བསམ་པར་བྱའོ། །དེའི་སྟེང་དུ་ཟླ་བའི་དཀྱིལ་འཁོར་རོ། །དེའི་སྟེང་དུ་སོར་གཅིག་ཙམ་སྤངས་པ་ལ་འཁོར་ལོ་རྩིབས་དྲུག་པ་འོད་ཟེར་དང་བཅས་པའོ། །དེའི་རྩིབས་ལ་དབྱངས་ཡིག་བཅུ་གཉིས་ཡི་གེ་ཟུང་རེ་རེ་དགོད་པར་བྱའོ། །རྩིབས་སོ་སོའི་སྟེང་དུ་རྩ་བའི་སྔགས་ཀྱི་ཡི་གེ་རེ་རེ་རྣམ་པར་བཀོད་ནས། འཁོར་ལོའི་ནང་གི་ལྟེ་བ་ལ་ཡི་གེ་ཧྲཱིཿའོད་ཟེར་དང་བཅས་པ་མི་གཡོ་བར་བསྒོམ་པར་བྱའོ། །ཕྱིའི་མུ་ཁྱུད་ལ་ཀཱ་ལིའི་སྦྱོར་བས་ཡང་དག་པར་འབར་བའོ། །ང་ཉ་ཎ་ན་མ་ནིང་གི་ཡི་གེ་རྣམས་སྤངས་པ་བསྒོམ་པར་བྱའོ། །ཡང་དེའི་སྟེང་དུ་སོར་མོ་གཅིག་ཙམ་སྤངས་པ་ལ་ཟླ་བའི་དཀྱིལ་འཁོར་རོ། །དེའི་སྟེང་དུ་ཨ་ར་པ་ཙ་ན་ཞེས་བྱ་བ་བལྟས་ནས་ཤིན་ཏུ་མྱུར་བའི་འཁོར་ལོ་བསྒོམ་པར་བྱའོ། །ཇི་སྲིད་ཟླ་བ་དྲུག་གི་བར་དུ་སྔགས་འདི་བཟླས་པར་བྱའོ། །ཨོཾ་བཛྲ་ཏཱིཀྵྞ་མུཿ། ཉི་མ་རེ་རེ་ལ་ཁྲི་ཕྲག་རེ་རེ་བཟླས་པར་བྱའོ། །ལྐུགས་པ་ཡང་སྨྲ་མཁས་པའོ། །ངག་གི་བདག་པོར་འགྱུར་རོ། །འཛིན་བློ་རྣོ་ཞིང་གཞུང་སྟོང་ཕྲག་གཅིག་འཛིན་པར་འགྱུར་རོ། །རྒྱུན་ཆད་པ་མེད་པའི་ལེགས་པར་སྦྱར་བའི་སྐད་དང༌། ཚིགས་བཅད་ཆེན་པོ་དང༌། བསྟན་བཅོས་ཐམས་ཅད་མཐར་ཕྱིན་པ་དང༌། གྲུབ་ན་ནི་རལ་གྲིའི་རིག་པ་འཛིན་པར་འགྱུར་རོ། །རིག་འཛིན་མ་རྣམས་དང་ལྷན་ཅིག་ཏུ་རྩེ་བར་འགྱུར་རོ། །ཤེས་རབ་འཁོར་ལོའི་གཙོ་བོ་འདི། །བྲིས་པས་འབྲས་བུ་སྐྱེས་པ་གང༌། །དེ་ཡིས་འཇིག་རྟེན་ཐམས་ཅད་འདི། །འཇམ་དཔལ་གོ་འཕང་ཐོབ་པར་ཤོག །འཇམ་དཔལ་ཤེས་རབ་ཀྱི་འཁོར་ལོ་སྒྲུབ་པའི་ཐབས་རྫོགས་སོ། །ཁམས་པ་ལོ་ཙཱ་བ་བ་རི་དྷརྨ་ཀཱིརྟིས་བསྒྱུར་བའོ།།