འཆི་བསླུ་བའི་མན་ངག་གི་སྒྲོལ་མའི་སྒྲུབ་ཐབས།
རྒྱ་གར་སྐད་དུ། མྲྀ་ཏྱུ་བཉྩ་ནོ་པ་དེ་ཤ་ཏཱ་རཱ་སཱ་དྷ་ནཾ། བོད་སྐད་དུ། འཆི་བ་སླུ་བའི་མན་ངག་གི་སྒྲོལ་མའི་སྒྲུབ་ཐབས། །འཕགས་མ་སྒྲོལ་མ་ལ་ཕྱག་འཚལ་ལོ། །ཡིད་དུ་འོང་བའི་ས་ཕྱོགས་སུ། །ལངས་ནས་སྔ་དྲོའི་ཐུན་ལའོ། །བདེ་བའི་སྟན་ལ་རབ་འདུག་སྟེ། །རང་གི་སྙིང་གར་ཟླ་བ་ལ། །ལྔ་པ་ཡི་ནི་དང་པོ་ལ། །དབྱངས་ཡིག་གཉིས་པ་རབ་ཏུ་སྦྱར། །ཟླ་ཕྱེད་ཐིག་ལེ་ཡང་དག་ལྡན། །འོད་ཟེར་དཀར་པོས་རྣམ་པར་བརྒྱན། །དེ་ཡི་འོད་ཟེར་དཀར་པོ་ཡིས། །མཁའ་ལ་སྒྲོལ་མ་གདན་དྲངས་ཏེ། །ཕྱག་གཉིས་སྐུ་མདོག་དཀར་མོ་ལ། །མཆོག་སྦྱིན་དང་ནི་ཨུཏྤལ་བསྣམས། །ཉེར་སྤྱོད་ལྔ་ཡི་མཆོད་པ་ཡི། །གུས་པ་ཡིས་ནི་མཆོད་བྱས་ནས། །སྡིག་པ་བཤགས་ཤིང་ཕྱི་ནས་ནི། །དེ་ནས་བསོད་ནམས་རྗེས་ཡི་རང༌། །དེ་ནི་ཡོངས་སུ་བསྔོ་བ་དང༌། །དེ་བཞིན་གསུམ་ལ་སྐྱབས་སུ་འགྲོ། །ཨོཾ་ཤཱུ་ནྱ་ཏཱ་ཛྙཱ་ན་བཛྲ་སྭ་བྷཱ་བ་ཨཱཏྨ་ཀོ྅ཧཾ། ཞེས་པའི་སྔགས་ཀྱིས་སྟོང་པར་བསྒོམ། །རྣལ་འབྱོར་པ་ཡི་ཆོ་ག་ཡིས། །ཆུ་སྐྱེས་དཀར་པོའི་དབུས་གནས་པའི། །ཟླ་བའི་དཀྱིལ་འཁོར་སྟེང་དུ་ནི། །སྔོན་གསུངས་ས་བོན་ལས་སྐྱེས་པའི། །ལྷ་མོ་སྒྲོལ་མ་ཡིད་འོང་མ། །རྡོ་རྗེ་སྐྱིལ་མོ་ཀྲུང་བཅས་ནས། །མཆོག་སྦྱིན་མ་ནི་ཨུཏྤལ་བསྣམས། །སྟོན་ཀའི་ཟླ་བ་ལྟ་བུ་ནི། །ཟླ་བའི་སྟེང་དུ་ཡང་དག་བཞུགས། །རྒྱན་རྣམས་ཐམས་
ཅད་ཡོངས་སུ་རྫོགས། །བཅུ་དྲུག་ལོ་ཡི་གཟུགས་ཅན་མ། །སངས་རྒྱས་ཐམས་ཅད་དེ་ཡི་སྲས། །ཡུམ་གྱུར་འདོད་པའི་གཟུགས་འཛིན་མ། །འཕགས་མ་སྒྲོལ་མ་སྙིང་གར་བསྒོམ། །དེ་ཡི་འཁོར་ལོ་འོད་དཀར་ལྡན། །རེའུ་མིག་བརྒྱད་པོ་རྣམས་ལ་ནི། །ཡི་གེ་བརྒྱད་ཀྱིས་ཡོངས་སུ་བསྐོར། །ཨོཾ་ཧཱ་གསལ་བྱེད་དབུས་གནས་པ། །བསྒྲུབ་བྱའི་མིང་སོགས་ལྟེ་བ་ལ། །མཁས་པས་རྩེ་གཅིག་ཡིད་ཀྱིས་ནི། །ངེས་པ་བརྟན་པས་ཟླ་དྲུག་བསྒོམ། །ཡི་གེ་བཅུ་ཡི་གསང་སྔགས་འདི། །མཁས་བས་མི་སྐྱོའི་ཡིད་ཀྱིས་བཟླས། །ཨོཾ་ཡིག་དང་པོ་སྦྱིན་པར་བྱ། །ཕྱི་ནས་ཏཱ་རེ་རབ་ཏུ་སྦྱར། །ཏུཏྟཱ་རེ་ཡི་ཏུ་རེ་ཕྱིས། །སྭཱ་ཧཱའི་མཐའ་ཅན་ལས་ཀུན་བྱེད། །ཚངས་དབང་ཁྱབ་འཇུག་ཉི་ཟླ་དང༌། །དྲག་པོ་ཕྱོགས་སྐྱོང་འདོད་ལྷས་ཀྱང༌། །བ་སྤུའི་རྩེ་མོའང་གཅོད་མི་ནུས། །འཆི་བདག་ལས་རྒྱལ་གྲོལ་བ་བཞིན། །སྐྲ་དཀར་གཉེར་མ་སྐལ་ལྡན་དང༌། །ནང་དང་དབུལ་སོགས་མདོར་བསྡུས་ན། །སེང་གེ་ལ་སོགས་འཇིགས་ཆེན་བརྒྱད། །སྡུག་བསྔལ་ཚོགས་རྣམས་རབ་ཏུ་འཇོམས། །བསྐུལ་པ་མེད་པར་ཟས་ལ་སོགས། །ཁང་བཟངས་གོས་ལ་སོགས་པ་ཐོབ། །རལ་གྲི་མིག་སྨན་རྐང་མགྱོགས་དང༌། །བུམ་པ་བཟང་པོ་ལ་སོགས་འགྲུབ། །སྙན་ངག་དང་ནི་སྨྲ་བ་མཁས། །བློ་རྣོ་ཤེས་རབ་དྲི་མ་མེད། །གཞན་ཡང་འདོད་པའི་དངོས་གྲུབ་རྣམས། །འཁོར་ལོ་འདི་ལས་རབ་ཏུ་འབྱུང༌། །ཞེས་པ་ནི། འཆི་བ་སླུ་བའི་མན་ངག་གིས་སྒྲོལ་མའི་སྒྲུབ་ཐབས་རྫོགས་སོ།།