འཕགས་མ་ཛཱཾ་གུ་ལིའི་སྒྲུབ་ཐབས།
རྒྱ་གར་སྐད་དུ། ཨཱཪྻ་ཛཱཾ་གུ་ལཱི་སཱ་དྷ་ནཾ། བོད་སྐད་དུ། འཕགས་མ་ཛཱཾ་གུ་ལཱིའི་སྒྲུབ་ཐབས། འཕགས་མ་དུག་སེལ་མ་ལ་ཕྱག་འཚལ་ལོ། །སེམས་ཅན་རྣམས་ལ་བརྩེ་བ་ཅན། །འཕགས་མ་དུག་སེལ་གཟུགས་ཅན་མ། །བཅོམ་ལྡན་སྒྲོལ་མ་ལ་བཏུད་ནས། །དེ་ཡི་སྒྲུབ་ཐབས་བྲི་བར་བྱ། །དང་པོ་རེ་ཞིག་སྔགས་པས་གཙང་ཞིང་ཁྲུས་བྱས་ནས། ཕྲེང་བ་དང་གོས་དཀར་པོ་བཟུང་སྟེ། སྐྱེ་བོས་དབེན་པའི་ས་ཕྱོགས་ལེགས་པར་བྱུགས་ཤིང་དྲི་བཟང་དཀར་པོའི་ཆུས་ཆག་ཆག་བཏབ་ནས་མེ་ཏོག་དཀར་པོ་གཅལ་དུ་བཀྲམ་སྟེ། སྟན་བདེ་བ་ལ་ཉེ་བར་འདུག་ནས་འགྲོ་བ་རྣམས་ལ་བྱམས་པ་དང༌། སྙིང་རྗེ་དང༌། དགའ་བ་དང༌། བཏང་སྙོམས་རྣམས་རྣམ་པར་བསྒོམ་པར་བྱའོ། །ཨོཾ་སྭ་བྷཱ་བ་ཤུདྡྷཿསརྦ་དྷརྨཱཿསྭབྷཱ་ཝ་ཤུདྡྷོ྅ཧཾ་ཞེས་བརྗོད་པར་བྱའོ། །དེ་ནས་གཟུང་བ་དང་འཛིན་པ་དང་བྲལ་བར་བལྟའོ། །དེ་ནས་པཾ་ཡིག་ཡོངས་སུ་གྱུར་པ་ལས་པདྨ་དཀར་པོ་འདབ་མ་བརྒྱད་པ་རྣམ་པར་བསམ་པར་བྱའོ། །དེའི་ཟེའུ་འབྲུ་ལ་ཨ་ཡིག་དཀར་པོ་ཡོངས་སུ་གྱུར་པ་ལས་ཟླ་བའི་དཀྱིལ་འཁོར་
བལྟས་ནས། དེའི་སྟེང་དུ་ཧྲཱིཿ་ཡིག་ཁ་དོག་དཀར་པོ་ལས་སྐྱེས་པའི་བདག་ཉིད་འཕགས་མ་དུག་སེལ་མ་སྐུ་མདོག་ཐམས་ཅད་དཀར་མོ་ཕྱག་བཞི་པ། ཞལ་གཅིག་པ། རལ་པའི་ཅོད་པན་ཅན། དཀར་མོ་གོས་དཀར་པོས་སྟོད་གཡོགས་བྱས་པ། རིན་པོ་ཆེའི་རྒྱན་དཀར་པོས་བརྒྱན་པ། སྦྲུལ་དཀར་པོས་བརྒྱན་པ། སེམས་དཔའི་སྐྱིལ་ཀྲུང་གིས་བཞུགས་པ། རྩ་བའི་ཕྱག་དག་གིས་པི་ཝང་བསྒྲེང་བར་མཛད་པ། གཡོན་གྱི་གཉིས་པས་སྦྲུལ་དཀར་པོ་བསྣམས་པ། གཡས་ཀྱི་གཉིས་པས་མི་འཇིགས་པ་རབ་ཏུ་སྦྱིན་པ། ཟླ་བའི་འོད་ཀྱི་ཕྲེང་བ་བསྣམས་པ་བསམ་པར་བྱའོ། །མགོ་བོ་དང་མགྲིན་པ་དང་ནུ་མའི་བར་དུ་ཟླ་བའི་དཀྱིལ་འཁོར་ལ་ཨཱཿཧྲཱིཿཧཱུཾ་གི་ཡི་གེ་རྣམ་པར་བསྒོམ་པར་བྱའོ། །དེའི་རྗེས་སུ་ཧྲཱིཿཡིག་གི་འོད་ཟེར་གྱི་ནམ་མཁའ་ལ་གནས་པའི་ཡེ་ཤེས་སེམས་དཔའ་གདན་དྲངས་ཏེ་དམ་ཚིག་སེམས་དཔའ་དང་གཅིག་ཏུ་བྱས་ཏེ་རྣམ་པར་བསྒོམ་པར་བྱའོ། །ཛཿཧཱུཾ་བཾ་ཧོཿརབ་ཏུ་སྦྱོར་བས་སོ། །སླར་ཡང་ཧྲཱིཿཡིག་གི་འོད་ཟེར་གྱིས་ནམ་མཁའ་ལ་བཞུགས་པའི་དེ་བཞིན་གཤེགས་པ་ཐམས་ཅད་གདན་དྲངས་ཏེ་སེམས་ཅན་གྱི་དོན་ལ་བརྩོན་བས་ཀུན་ནས་དབང་བསྐུར་ཞིང་ལུས་ཀྱི་ནང་དུ་ཞུགས་པར་བསམ་པར་བྱའོ། །དེ་བཞིན་དུ་བསམས་ནས་སྔགས་བཟླས་པར་བྱའོ། །ཧྲཱིཿཞེས་པའི་སྔགས་འབུམ་ཕྲག་བདུན་བཟླས་ནས་མེ་ཏོག་དཀར་པོའི་སྦྱིན་སྲེག་ཁྲི་ཕྲག་བདུན་བྱའོ། །རྒྱན་དཀར་པོས་རྣམ་པར་བརྒྱན་པར་བྱའོ། །འདིའི་རིམ་པས་ནམ་མཁའ་ལྡིང་གི་དབང་ཕྱུག་ཉིད་ཀྱི་མཁས་པར་གྱུར་ནས་བསྟན་བཅོས་ཐམས་ཅད་ལ་འཇིགས་པ་མེད་ཅིང་དུག་ཐམས་ཅད་འཇོམས་པ་ཉིད་དུ་འགྱུར་ཏེ་ཐེ་ཚོམ་མེད་དོ། །འཕགས་མ་ཛཱཾ་གུ་ལཱིའི་སྒྲུབ་ཐབས་རྫོགས་སོ།།