འཕགས་མ་རལ་གཅིག་མའི་སྒྲུབ་ཐབས།
རྒྱ་གར་སྐད་དུ། ཨཱཪྻ་ཨེ་ཀ་ཛཱ་ཊཱི་སཱ་དྷ་ནཾ། བོད་སྐད་དུ། འཕགས་མ་རལ་གཅིག་མའི་སྒྲུབ་ཐབས། །འཕགས་མ་རལ་གཅིག་མ་ལ་ཕྱག་འཚལ་ལོ། །དང་པོ་རེ་ཞིག་སྔགས་པས་ཡིད་དང་མཐུན་པའི་བསམ་གཏན་གྱི་ཁང་བར་སྟན་བདེ་བ་ལ་ཉེ་བར་འདུག་སྟེ། བླ་མ་དང་སངས་རྒྱས་དང༌། བྱང་ཆུབ་སེམས་དཔའ་རྣམས་ལ་ཕྱི་དང་ནང་གི་མཆོད་པ་རྣམས་ཀྱིས་ཡང་དག་པར་མཆོད་ནས་གསུམ་ལ་སྐྱབས་སུ་འགྲོ་བ་དང༌། སྡིག་པ་བཤགས་པ་ལ་སོགས་པ་བྱས་ནས། ཤིན་ཏུ་བརྟན་པའི་བྱང་ཆུབ་ཀྱི་སེམས་བསྐྱེད་དེ། ཨོཾ་ཞེས་པའི་ཡི་གེ་བརྗོད་ནས། ཆོས་ཐམས་ཅད་སྟོང་པ་ཉིད་མངོན་དུ་བྱས་ཏེ། སླར་ཡང་ཨཾ་ཡིག་བརྗོད་པ་དེ་ཡོངས་སུ་གྱུར་བ་ལས་སྣ་ཚོགས་པདྨ་བསྒོམ་པར་བྱའོ། །དེའི་དབུས་སུ་ཊཱཾ་ཡིག་ལས་སྐྱེས་པའི་པདྨའི་སྣོད་དུ་ཆུ་ཤེལ་གྱི་འོད་དང་མཚུངས་པ། དེའི་དབུས་སུ་འོད་ཟེར་འཕྲོ་བས་འཇིག་རྟེན་གྱི་ཁམས་མཐའ་ཡས་པ་སྣང་བར་མཛད་པ་ཨིནྡྲ་ནཱི་ལའི་འོད་དང་ལྡན་པའི་ཧཱུཾ་ཡིག་རྣམ་པར་བསམ་པར་བྱའོ། །དེ་ཡོངས་སུ་གྱུར་པ་ལས། རིན་ཆེན་ཨིནྡྲ་ནཱི་ལ་ཡི། །འོད་ལྡན་འགྲོ་བ་གསུམ་པོ་ཁྱབ། །ཕྱག་བཞི་འཇིགས་པ་ཆེན་མོ་སྟེ། །དམར་ཞིང་འཇིགས་པའི་སྤྱན་གསུམ་མ། །སྟག་གི་པགས་པའི་ན་བཟའ་མནབས། །པདྨའི་སྣོད་ཀྱིས་རབ་བརྒྱན་མ། །རུས་པའི་དོ་ཤལ་གྱིས་བརྒྱན་ཅིང༌། །གཏུམ་མོ་ཡི་ནི་གཟུགས་ཅན་མ། །ལོ་བརྒྱད་གཉིས་ཀྱི་རྣམ་པ་ཅན། །དཀར་འཛིན་མཐོ་ཞིང་མཁྲེགས་པ་སྟེ། །ཀུན་ནས་ཁམ་པའི་རལ་པ་ཅན། །སྤྲུལ་ནག་རྒྱན་གྱིས་རྣམ་པར་བརྒྱན། །ཞལ་ནི་ཅུང་ཟད་མཆེ་བ་གཙིགས། །ལྗགས་བསྒྲིལ་འཇིགས་པར་བྱེད་པ་སྟེ། །ལྟོ་ནི་འཕྱང་ཞིང་བྱམས་ཆེན་མ། །སྙིང་རྗེས་ཀུན་ཏུ་ཡིད་ཁྱབ་མ། །དོ་ཤལ་རྐང་གདུབ་དཔུང་རྒྱན་དང༌། །གཡེར་ཀ་སྐ་རགས་ལ་སོགས་པས། །བརྒྱན་ཅིང་གཏུམ་མོ་ཧཱུཾ་མཛད་མ། །བདུད་ཀྱི་དཔུང་ཆེན་ལས་རྒྱལ་མ། །ཕྱག་གཡོན་ཆུ་སྐྱེས་སྣོད་བསྣམས་མ། །གཡས་ཀྱི་ཕྱག་ན་གསོར་བཞིན་པས། བདུད་རྣམས་སྐྲག་པར་མཛད་པ་ཡི། །རྡོ་རྗེ་དང་བཅས་གྲི་གུག་བསྣམས། །སླར་ཡང་གཡོན་པའི་ཕྱག་ན་ནི། །སྡོང་བུ་དང་བཅས་ཨུཏྤལ་བསྣམས། །ཕྱག་གཡས་ན་ནི་
རལ་གྲི་བལྟ། །དེ་ནི་ཡོངས་སུ་གྱུར་པ་ལས། །སྐར་མའི་ཕྲེང་བའི་འོད་འཕྲོ་བའི། །བགྲང་ཕྲེང་རྣམ་པར་བསྒོམ་པར་བྱ། །ཐོད་པ་ཁྲག་གིས་གང་བའི་དབུས། །གཡས་བརྐྱང་གིས་ནི་ཡང་དག་གནས། །བསྐལ་པའི་མེ་དང་མཚུངས་པ་ཡི། །འོད་ཟེར་འབར་བས་འཁོར་བའི་སྐུ། །ལྷ་མོ་རལ་པ་གཅིག་མ་བསམ། །འཕྲོ་བའི་སྔགས་བཟླས་དེ་ནས་ནི། །བསམ་མེད་སྔགས་ཀྱི་ནུས་པ་ནི། །ཕྱེད་བཅས་ཡི་གེ་བཞི་པ་ཡིས། །འགྲོ་བ་གཡོ་ཞིང་དབང་བྱེད་དང༌། །འབེབས་ཤིང་སྐྲག་མཛད་སངས་རྒྱས་གསུང༌། །བསྒྲུབ་བྱའི་སྤྱི་བོར་རྐང་པ་དག །གཡས་བརྐྱང་ཞབས་ཀྱིས་ཀུན་ནས་མནན། །དེ་བཞིན་པདྨའི་སྣོད་ལ་བསྒོམ། །རྣལ་འབྱོར་སྔགས་ནི་སྤྲོ་ཞིང་བཟླ། །སྔགས་གསུངས་པ་ལས་དངོས་གྲུབ་ནི། །ཡང་དག་ལྷ་མོས་རབ་ཏུ་རྟོགས། །དང་པོ་མེ་ཡི་ཤིང་རྟ་ཞོན། །ས་མཐའ་ཨཱི་ཡི་དབྱངས་ཀྱིས་བརྒྱན། །ཕྱི་ནས་ཟླ་ཕྱེད་ཐིག་ལེ་ཡིས། །དབུ་ཡི་སྟེང་དུ་ཡང་དག་བརྒྱན། །གཉིས་པ་ཡང་ནི་དེ་བཞིན་ཏེ། །འོན་ཀྱང་ཎ་མཐའི་གཟུགས་ཀྱིས་དབྱེ། །ས་མཐའ་དེ་བཞིན་གསུམ་པ་ཡང༌། །དྲུག་པའི་དབྱངས་དང་ཡང་དག་ལྡན། །སྔོན་མ་བཞིན་དུ་དབུ་ལ་མཛེས། །བཞི་པ་ཕཊ་གྱི་མཐའ་ཅན་ཏེ། །སྔགས་པས་སྔགས་འདི་བཟླས་པར་བྱ། །ཧྲཱིཾ་ཏྲཱིཾ་ཧཱུཾ་ཕཊ་འདི་བཞིན་ཞེས། །འཕགས་མ་རལ་གཅིག་མའི་སྒྲུབ་ཐབས་རྫོགས་སོ།།