མྱ་ངན་མེད་པའི་ཤིང་གི་འོད་ཟེར་ཅན་གྱི་སྒྲུབ་ཐབས།
རྒྱ་གར་སྐད་དུ། ཨ་ཤོ་ཀ་ཀཱནྟ་མཱ་རཱི་ཙྱཻ་སཱ་དྷ་ནཾ། བོད་སྐད་དུ། མྱ་ངན་མེད་པའི་ཤིང་གི་འོད་ཟེར་ཅན་གྱི་སྒྲུབ་ཐབས། འཕགས་མ་འོད་ཟེར་ཅན་ལ་ཕྱག་འཚལ་ལོ། །དེ་ནས་སྟོང་པ་ཉིད་བསྒོམས་པའི་རྗེས་ལ་ཟླ་བ་ལ་མཾ་ཡིག་སེར་པོ་ལས་བྱུང་བའི་མྱ་ངན་མེད་པའི་ཤིང་དེའི་སྟེང་དུ་མཾ། དེ་ཡོངས་སུ་གྱུར་པ་ལས་སྐུ་མདོག་སེར་མོ་ཞལ་གཅིག་ཕྱག་གཉིས་པ། མགོན་པོ་རྣམ་པར་སྣང་མཛད་ཀྱི་རིན་པོ་ཆེའི་དབུ་རྒྱན་ཅན། གསེར་ལྟ་བུའི་ཕྱག་པའི་རྒྱབ་ཏུ་སྣ་ཚོགས་པདྨ་དང༌། ཟླ་བ་ལ་འགྱིང་བག་དང་བཅས་པའི་སྟེང་དུ་བཞུགས་པ། མྱ་ངན་མེད་པའི་ཤིང་གི་ཡལ་ག་འཕྱར་བ་ཕྱག་གཡོན་ན་བསྣམས་པ། ཕྱག་གཡས་པས་མཆོག་སྦྱིན་པ། དོ་ཤལ་ལ་སོགས་པ་སྐུ་ལ་བརྒྱན་པ། ལང་ཚོ་གཞོན་ཞིང་མཛེས་པ་འདི་བཞིན་བསམ་པར་བྱའོ། །སྙིང་གའི་མཾ་ཡིག་གི་ས་བོན་ལས་འོད་ཟེར་འཕྲོས་པས་མགོ་དང་བཅས་པའི་ཕག་གི་ཚོགས་ཀྱིས་གདུག་པ་ཅན་བརླག་སྟེ།
སེམས་ཅན་དཔག་ཏུ་མེད་པའི་དོན་སྣ་ཚོགས་བྱེད་པའོ། །ཨོཾ་མཱ་རཱི་ཙྱཻ་མཱཾ་སྭཱ་ཧཱ། ཞེས་པ་ནི་བཟླས་པའི་སྔགས་སོ། །མྱ་ངན་མེད་པའི་ཤིང་གི་འོད་ཟེར་ཅན་གྱི་སྒྲུབ་ཐབས་རྫོགས་སོ།།