རི་ཁྲོད་ལོ་མ་ཅན་གྱི་སྒྲུབ་ཐབས།
རྒྱ་གར་སྐད་དུ། པརྞ་ཤ་པ་རི་སཱ་དྷ་ནཾ། བོད་སྐད་དུ། རི་ཁྲོད་ལོ་མ་ཅན་གྱི་སྒྲུབ་ཐབས། འཕགས་མ་རི་ཁྲོད་ལོ་མ་ཅན་ལ་ཕྱག་འཚལ་ལོ། །སྔོན་མ་བཞིན་དུ་ཐམས་ཅད་བསྒྲུབས་ནས་རང་གི་སྙིང་གར་པདྨ་དཀར་པོ་དང་ཟླ་བའི་དཀྱིལ་འཁོར་ལ་པཾ་ཡིག་སེར་པོ་ལས་སྐྱེས་པའི་རྡོ་རྗེའོ། །དེའི་ལྟེ་བ་ལ་པཾ་ཡིག་གོ །དེ་ཐམས་ཅད་ཡོངས་སུ་གྱུར་པ་ལས་བཅོམ་ལྡན་འདས་མ་སྐུ་མདོག་སེར་མོ་ཞལ་གསུམ་པ། སྤྱན་གསུམ་པ། ཕྱག་དྲུག་པ། དང་པོའི་ཞལ་སེར་
པོ། གཡས་དཀར་པོ། གཡོན་དམར་པོ་འགྱིང་ཞིང་བཞད་པ་རྒྱན་ཐམས་ཅད་ཀྱིས་བརྒྱན་པ། ལོ་མ་དང་རྨ་བྱའི་མདོངས་ཀྱི་ཤམ་ཐབས་ཅན། ལང་ཚོ་གཞོན་ཞིང་རྒྱས་པ། ཕྱག་གཡས་རྣམས་ཀྱིས་རྡོ་རྗེ་དང༌། དགྲ་སྟ་དང༌། མདའ་རྣམས་བསྣམས་པ། ཕྱག་གཡོན་པ་རྣམས་ཀྱིས་སྡིགས་མཛུབ་དང་བཅས་པའི་ཞགས་པ་དང༌། ཡལ་ག་དང་བཅས་པའི་རྨ་བྱའི་མདོངས་དང༌། གཞུ་རྣམས་བསྣམས་པ། མེ་ཏོག་བཅིངས་པའི་རལ་པའི་ཅོད་པན་ལ་གནས་པའི་མི་བསྐྱོད་པ་འཆང་བ། ཉི་མའི་འོད་ཀྱི་དཀྱིལ་འཁོར་ཅན། འོག་ཏུ་བགེགས་རྣམས་མནན་པའི་པདྨ་དཀར་པོ་དང་ཟླ་བའི་གདན་ལ་གཡོན་བརྐྱང་གིས་བཞུགས་པ། ཐུགས་ཀར་གཡོན་པའི་སྡིགས་མཛུབ་ཀྱིས་འོག་གི་བགེགས་ཀྱི་ཚོགས་སྐྲག་པར་མཛད་པའོ། །གཡས་རྡོ་རྗེའི་ཁུ་ཚུར་གྱིས་མཚོན་ཆ་འཕྱར་བའི་ཚུལ། དེ་བཞིན་དུ་ཕྱག་བཞིའི་གཡོན་པ་དག་གིས་སྡིགས་མཛུབ་དང་བཅས་པའི་ཞགས་པ་དང༌། ལོ་མ་དང་བཅས་པའི་རྨ་བྱའི་མདོངས་བསྣམས་པ། ཕྱག་གཡས་པ་དག་གིས་རྡོ་རྗེ་དང༌། དགྲ་སྟ་བསྣམས་པ། ཤིན་ཏུ་འཇིགས་པ་སྟེར་བར་བསྒོམ་པར་བྱའོ། །དེ་ནས་སྔགས་བཟླས་པར་བྱ་སྟེ། ཨོཾ་པི་ཤཱི་ཙི་པརྞ་ཤ་བ་རི་སརྦ་མ་རཱི་པྲ་ཤ་མ་ཎི་སྭཱ་ཧཱ། དེ་ནས་ཇི་ལྟ་བ་བཞིན་དུ་གཤེགས་ནས་ཅི་བདེར་གནས་པར་བྱའོ། །རི་ཁྲོད་ལོ་མ་ཅན་གྱི་སྒྲུབ་ཐབས་རྫོགས་སོ།།