དཔལ་རྡོ་རྗེ་ཆོས་ཀྱི་སྒྲུབ་ཐབས།
རྒྱ་གར་སྐད་དུ། སྲཱི་བཛྲ་དྷརྨ་སཱ་དྷ་ནཾ། བོད་སྐད་དུ། དཔལ་རྡོ་རྗེ་ཆོས་ཀྱི་སྒྲུབ་ཐབས། དཔལ་རྡོ་རྗེ་ཆོས་ལ་ཕྱག་འཚལ་ལོ། །ཉེས་པའི་དྲ་བ་བཅོམ་པའི་དཔལ་ལྡན་རྡོ་རྗེ་ཆོས། །ངག་གི་དཀྱིལ་འཁོར་སྤྲོས་པའི་འོད་ཀྱི་དྲ་བ་སྟེ།
ཡང་དག་སངས་རྒྱས་མ་ལུས་ངག་གི་རང་བཞིན་ལ། །རབ་ཏུ་བཏུད་ནས་ངག་གི་སྒྲུབ་ཐབས་བརྗོད་པར་བྱ། །སྔགས་ཀྱི་རང་བཞིན་གྱིས་ནི་རྣམ་པར་དག་པའི་གཟུགས། །རབ་བརྗོད་བརྩོན་འགྲུས་རླུང་དང་འདྲ་བས་བསྐྱོད་པ་ཡིས། །སྒྱུ་མ་དང་ནི་སྨིག་རྒྱུ་ཆུ་ཟླ་རྟག་པར་ནི། །འཇིག་རྟེན་མ་ལུས་པ་འདི་རྣམ་པར་བསྒོམ་པར་བྱའོ། །པཾ་གི་ཡི་གེ་ལས་བྱུང་རྣམ་པར་བསྒོམ་པ་ནི། །མ་ལུས་རྣམ་དག་ངོ་བོ་སྣ་ཚོགས་པདྨ་སྟེ། །ཨ་ཡིག་ལས་སྐྱེས་དཔག་ཏུ་མེད་པའི་འོད་གསལ་བ། །ཆ་ནི་མ་ལུས་རྣམ་པར་དག་པ་ཟླ་བ་སྟེ། །ཡང་ནི་གསང་བ་མཆོག་ནི་སྣ་ཚོགས་པར་འགྱུར་བའོ། །ས་བོན་ཡི་གེ་ལས་ནི་རབ་ཏུ་བྱུང་བའི་འཇིག་རྟེན་འོད་ཀྱི་ཚོགས། །བནྡུ་ཀ་ཡི་མེ་ཏོག་འོད་ཀྱི་རྣམ་པ་དྲ་བ་ཅན། །གང་གིས་སྤྲོས་པ་རབ་ཏུ་བྱུང་བའི་རྒྱུ་གཅིག་པོ། །དེ་ཡི་ས་བོན་ཡང་དག་གྱུར་པས་སྐྱོན་མེད་སོན། །ཏིང་འཛིན་ཕྱག་རྒྱ་འཆང་བའི་ཕྱག་ན་པདྨ་སྟེ། །རྡོ་རྗེ་གདན་གནས་སྙིང་རྗེ་མངོན་པར་ཉམས་དགའ་བའི། །དཔལ་ལྡན་རྡོ་རྗེ་འདོད་པས་ཡོངས་སུ་དག་པའི་ཆགས། །བ་སྤུའི་ཁུང་བུར་བྱུང་གྱུར་རྣམ་དག་སངས་རྒྱས་ཀྱི། །སྤྲིན་གྱི་ཚོགས་ཀྱིས་འགྲོ་ལ་ཕན་པའི་དོན་དུ་ནི། །ཤིན་ཏུ་རྣམ་པར་དག་པའི་བློ་ནི་རབ་འབྱེད་པར། །ཐམས་ཅད་འགྲོ་བའི་རང་བཞིན་དུ་ནི་རྣམ་པར་བསྒོམ། །སྙིང་གར་ཟླ་བའི་གཟུགས་ལ་རྡོ་རྗེ་རབ་བལྟས་ཏེ། །འབར་བ་ཡིས་ནི་འཇིག་རྟེན་ཐམས་ཅད་གསལ་བྱེད་པ། །ཡིག་ཧཱུཾ་མགོན་པོ་ལས་ནི་ཡོངས་སུ་རྫོགས་པའི་གཟུགས། །ལྔ་ཡི་བདག་ཉིད་སངས་རྒྱས་སྤྲིན་གྱི་ཚོགས་བྱུང་བ། །དེ་ཡི་དབུས་མའི་རྭ་ཡི་རྩེ་མོར་གསལ་གནས་ལ། །ངེས་གནས་ལུས་ཀྱིས་འཇིག་རྟེན་གསུམ་པོ་གསལ་བྱེད་པ། །ཡི་གེ་ཆེན་པོས་རྣམ་འཇོམས་མང་ཞིང་མི་འགྱུར་བའི། །རྒྱུད་ལས་སྡུག་བསྔལ་རབ་ཏུ་རྒྱས་པའི་མུན་པ་སྟེ། །དེ་ལས་བྱུང་བའི་མཛེས་པའི་འོད་ཀྱི་ཚོགས་ལྡན་པའི། །ཉི་མའི་གཟུགས་བརྙན་དྲི་མེད་ཉམས་དགའ་དམར་པོ་སྟེ། །ཤེས་རབ་སྔོན་གྱི་ཕོ་ཉ་དགེ་བའི་ངག་བསྐྱེད་པའི། །རྡོ་རྗེར་གྱུར་པའི་ལྕེ་ནི་རབ་ཏུ་རྫོགས་པར་བྱ། །དེ་ཡི་རྩེ་མོའི་ཆ་ལ་རོལ་པའི་མཆོག་གི་དམར་པོ་སྟེ། །དེ་ཉིད་རྒྱ་ཆེན་འོད་ནི་རྣམ་པར་བསམ་པར་བྱ། །རང་གི་སྟོབས་ཀྱིས་རྒྱུན་དུ་གྱུར་པའི་བརྩོན་འགྲུས་ཀྱིས། །རྩོད་པ་མཆོག་གིས་
སྟོབས་ཀུན་འཇོམས་པར་བྱེད་པ་སྟེ། །རྟག་ཏུ་རབ་ཏུ་གོམས་ཤིང་ངེས་པར་བསྒྲུབ་པ་ལས། །ངག་གི་སྒྲུབ་ཐབས་དངོས་གྲུབ་ཉེ་བར་གྲུབ་གྱུར་ན། །ཚིགས་བཅད་ཚིག་ལྷུག་པ་དག་རྩོལ་བ་མེད་པར་བརྗོད། །མཚོན་ཆ་བསྟན་བཅོས་དག་ནི་རྣལ་འབྱོར་པ་ཡིས་རྟོགས། །བསྟན་བཅོས་སྣ་ཚོགས་དག་ཀྱང་ངེས་པར་འབྱེད་པར་འགྱུར། །འགྲོ་བ་རྣམས་ཀྱི་ཆེད་དུ་བདག་ཉིད་དོན་ཆེན་པོ། །འདི་ཡིས་གཞན་གྱི་སེམས་ཀྱི་རྒྱུད་ཤེས་པར་འགྱུར་ཏེ། །འདོད་ཆགས་ལ་སོགས་ཉེས་པའི་ཉེ་བ་བཅོམ་འགྱུར་ཞིང༌། །གང་ཚེ་ཏིང་ངེ་འཛིན་དེ་བརྟན་པར་གྱུར་པའི་ཚེ། །ཤིན་ཏུ་ཕྲ་བ་མྱུར་དུ་གསལ་བ་ངེས་པར་རྟོགས། །སངས་རྒྱས་མ་ལུས་དང་མཉམ་སྐུ་ནི་འཛིན་པ་སྟེ། །དེ་ལྟར་འགྱུར་ལ་ཐེ་ཚོམ་འདིར་ནི་མི་བྱའོ། །བྱུང་དང་འབྱུང་བར་གྱུར་པ་མདུན་ན་གནས་པ་བཞིན། །གོམས་པའི་སྦྱོར་བ་ཡིས་ནི་སྐྱེས་བུས་རྟོགས་པར་འགྱུར། །འདོད་ཆགས་རིགས་ཅན་བུད་མེད་ལ་ནི་དགའ་བ་བཞིན། །སེམས་ནི་རྗེས་སུ་ཆགས་པར་བྱེད་ན་རྣལ་འབྱོར་གྲོལ། །ཇི་སྙེད་དགེ་བའི་རྩ་བ་བདག་གིས་བསགས་འདི་ཡིས། །རྒྱལ་བ་མཆོག་གི་དཔལ་ནི་གྲོལ་བ་ཐོབ་པར་ཤོག །འཇིགས་དང་མྱ་ངན་མི་དགའ་ཟུག་རྔུ་རབ་སྤངས་ཏེ། །རི་བོང་འཛིན་པའི་ཡིད་ནི་འོད་དང་ཉེ་བ་སྟེ། །རིང་བོར་མི་ཐོགས་དགེ་བ་ཆགས་པའི་སེམས་ཀྱིས་ནི། །བླ་མ་མཆོག་ལས་རྙེད་པའི་གདམས་ངག་རོལ་པ་ཡིན། །འདི་ཡིས་པདྨའི་རིགས་སུ་འགྲོ་ཞིང་རྒྱས་གྱུར་ཅིག །དཔལ་གྱི་རྗེས་འགྲོ་ཏིང་ངེ་འཛིན་དབང་དུ་བྱས་པས་དགའ། །བདག་ཉིད་བཟང་པོ་སྐྱེ་འགྲོ་མཐོང་བར་རབ་འགྱུར་བ། །འབར་བའི་མེ་ཡི་ཕྲེང་བའི་དབུས་སུ་གནས་པའི་སྐུ། །སྙིང་རྗེ་བླ་མར་འཛིན་འགྱུར་ཐོད་པའི་ཕྲེང་བ་འཛིན། །ཆུ་འཛིན་རྒྱས་པའི་མངོན་པར་རབ་ཏུ་སྔོ་བའི་དཔལ། །ངག་གི་སྒྲུབ་ཐབས་མཆོག་གྱུར་བ། །བདེ་བའི་སྐྱེ་བོ་བཟང་པོས་བྱས། །འདི་ཡིས་ངག་ནི་སྒྲུབ་བྱེད་པ། །ངག་གི་དབང་ཕྱུག་དེ་འགྱུར་ཤོག །རྡོ་རྗེ་ཆོས་ཀྱི་སྒྲུབ་ཐབས་སློབ་དཔོན་སུ་ཛ་ན་བྷ་དྲས་མཛད་པ་རྫོགས་སོ།།