ཀྱེ་རྡོ་རྗེ་རིམ་པའི་རིགས་བྱེད་མའི་སྒྲུབ་ཐབས།
རྒྱ་གར་སྐད་དུ། ཧེ་བཛྲ་ཀྲ་མ་ཀུ་རུ་ཀུལླེ་སཱ་དྷ་ནཾ། བོད་སྐད་དུ། ཀྱེ་རྡོ་རྗེའི་རིམ་པའི་རིགས་བྱེད་མའི་སྒྲུབ་ཐབས། ཀུ་རུ་ཀུལླེ་ལ་ཕྱག་འཚལ་ལོ། །དང་པོ་རང་གི་སྙིང་གར་ཁ་དོག་དམར་པོའི་ཟླ་བའི་དཀྱིལ་འཁོར་བསྒོམས་ལ། དེ་ལ་ཧྲཱིཿཡིག་དམར་པོ་བལྟ་བར་བྱའོ། །དེ་ནས་སྡིག་པ་བཤགས་པ་ལ་སོགས་པ་བྱའོ། །ཕྱི་ནས་སྟོང་པ་ཉིད་བསྒོམ་པར་བྱའོ། །འདིར་རྣལ་འབྱོར་པས་སྟོང་པ་ཉིད་ལ་གནས་ནས་རཾ་ཡིག་ལས་མདུན་དུ་ཉི་མ་རྣམ་པར་བསྒོམས་ལ། དེའི་སྟེང་དུ་ཧཱུཾ་ཡིག་ཁ་དོག་ནག་པོ་འོད་ཟེར་དང་ལྡན་པ་བསྒོམ་པར་བྱའོ། །དེ་ཡོངས་སུ་གྱུར་པ་ལས་སྣ་ཚོགས་རྡོ་རྗེའོ། །དེ་ཡོངས་སུ་གྱུར་པ་ལས་རྡོ་རྗེའི་རང་བཞིན་གྱིས་གཞི་དང༌། རྡོ་རྗེའི་རབ་དང༌། རྡོ་རྗེའི་གུར་བཅིངས་ནས་ཨོཾ་རཀྵ་རཀྵ་ཧཱུཾ་ཧཱུཾ་ཧཱུཾ་ཕཊ་ཕཊ་ཕཊ་སྭཱ་ཧཱ། ཕྱི་ནས་
རྣལ་འབྱོར་པས་པདྨ་དམར་པོའོ། །དེའི་སྟེང་དུ་ཟླ་བའི་དཀྱིལ་འཁོར་རོ། །དེའི་སྟེང་དུ་ཧྲཱིཿཡིག་དམར་པོ་ཡོངས་སུ་གྱུར་པ་ལས་ཨུཏྤ་ལ་དམར་པོའོ། །དེའི་སྟེང་དུ་སླར་ཡང་ཟླ་བའི་དཀྱིལ་འཁོར་རོ། །དེ་ཡོངས་སུ་གྱུར་པ་ལས་ཀུ་རུ་ཀུལླེར་བདག་ཉིད་བསམ་པར་བྱ་སྟེ། སྐྱིལ་ཀྲུང་ཕྱེད་པའི་གར་སྟབས་ཀྱིས་བཞུགས་པ་གཞོན་ཞིང་རྐེད་པ་ལ་སྟག་གི་པགས་པའི་ཤམ་ཐབས་མནབས་པ། ཕྱག་རྒྱ་ལྔས་རྣམ་པར་བརྒྱན་པ། སྐྲ་དམར་སེར་གྱེན་དུ་བརྫེས་པ་མགོན་པོ་འོད་དཔག་ཏུ་མེད་པས་དབུ་བརྒྱན་པ། ཕྱག་ན་མདའ་གཞུ་དང་དེ་བཞིན་དུ་ཨུཏྤ་ལ་བསྣམས་པའོ། །འདིར་གནས་ངེས་པ་མེད་ཅིང་ཟས་ཀྱང་ངེས་པ་མེད་ལ། འདིར་སྔགས་བཟླས་ཤིང་བྱ་བ་དང་ལྡན་པས་སོ། །ཇི་ལྟ་བ་བཞིན་དུ་འགའ་ཞིག་གིས་ཀྱང་མི་ཤེས་ཏེ་དེ་བཞིན་དུ་བསྒྲུབ་པར་བྱའོ། །ཨོཾ་ཀུ་རུ་ཀུལླེ་ཧྲཱིཿསྭཱ་ཧཱ། ཟླ་བ་ཕྱེད་དུ་ཁྲི་ཕྲག་གཅིག་གིས་རྒྱལ་བོ་དང༌། སྐྱེ་དགུའི་འཇིག་རྟེན་དབང་དུ་འགྱུར་རོ། །བྱེ་བས་དུད་འགྲོ་དང་གནོད་སྦྱིན་ལ་སོགས་པ་དང༌། འབུམ་ཕྲག་བདུན་གྱིས་ལྷ་མ་ཡིན་རྣམས་ཀྱང་ངོ༌། །ཀྱེའི་རྡོ་རྗེའི་རིམ་པའི་ཀུ་རུ་ཀུལླེའི་སྒྲུབ་ཐབས་རྫོགས་སོ།།