རྡོ་རྗེ་ལྕགས་སྒྲོག་གི་སྒྲུབ་ཐབས།
རྒྱ་གར་སྐད་དུ། བཛྲ་ཤྲྀཾ་ཁཾ་ལཱ་སཱ་དྷ་ནཾ། བོད་སྐད་དུ། རྡོ་རྗེ་ལྕགས་སྒྲོག་གི་སྒྲུབ་ཐབས། རྡོ་རྗེ་ལྕགས་སྒྲོག་མ་ལ་ཕྱག་འཚལ་ལོ། །སྔོན་དུ་གསུངས་པའི་ཆོ་གས་སྟོང་པ་ཉིད་དུ་བསྒོམས་པའི་རྗེས་ལ། སྣ་ཚོགས་ཆུ་སྐྱེས་དང་ཉི་མ་ལ་གནས་པའི་ཧཱུཾ་ཡིག་ལྗང་གུ་ལས་སྐྱེས་པའི་སྐུ་མདོག་ལྗང་གུ་ཞལ་གསུམ་པ་ཕྱག་བརྒྱད་པ། ཞལ་དང་པོ་ཅུང་ཟད་བཞད་པ། གཡས་སེར་སྐྱ་ལ་སྤྱན་སེར་སྐྱ་དང་ལྡན་པ། གཡོན་པ་དམར་ཞིང་ཁྲོ་གཉེར་ཅན་མཆེ་བ་གཙིགས་པ། གཡས་ཀྱི་ཕྱག་བཞི་རྣམས་སུ་མི་འཇིགས་པ་དང༌། རྡོ་རྗེ་དང༌། རྡོ་རྗེ་ལྕགས་སྒྲོག་དང་མདའ་བསྣམས་པ། གཡོན་གྱི་ཕྱག་བཞི་རྣམས་སུ་ཁྲག་གིས་གང་བའི་ཐོད་པ་དང༌། སྡིགས་མཛུབ་དང༌། ཞགས་པ་དང༌། གཞུ་བསྣམས་བའོ། །རོལ་པའི་སྟབས་ཀྱིས་བཞུགས་པ། བྱི་ལའི་པགས་པས་སྟོད་གཡོགས་བྱས་པ། དོན་ཡོད་གྲུབ་པས་དབུ་བརྒྱན་པ། དབུ་སྐྲ་སེར་སྐྱ་གྱེན་དུ་འཁྱིལ་པར་བསམས་ལ། ཨོཾ་བཛྲ་ཤྲྀཾ་ཁ་ལེ་ཧཱུཾ་ཕཊ་སྭཱ་ཧཱ། ཞེས་པའི་སྔགས་བཟླས་པར་བྱའོ། །འདི་ནི་མན་ངག་གི་རིམ་པའི་ནང་ནས་འབྱུང་བའི་རྡོ་རྗེ་ལྕགས་སྒྲོག་གི་སྒྲུབ་ཐབས་རྫོགས་སོ།།