ཧ་ལ་ཧ་ལའི་སྒྲུབ་ཐབས།
ལྷན་ཅིག་སྐྱེས་པའི་རོལ་པ།
རྒྱ་གར་སྐད་དུ། ཧ་ལ་ཧ་ལ་སཱ་དྷ་ནཾ། བོད་སྐད་དུ། ཧ་ལ་ཧ་ལའི་སྒྲུབ་པའི་ཐབས། བཅོམ་ལྡན་འདས་ཧ་ལ་ཧ་ལ་ལ་ཕྱག་འཚལ་ལོ། །སྔོན་དུ་བསྟན་པའི་ཆོ་གས་སྟོང་པ་ཉིད་བསྒོམས་པའི་རྗེས་སུ་པདྨ་དམར་པོ་དང༌། ཟླ་བ་ལས་ཧྲཱིཿཡིག་དཀར་པོ་ཡོངས་སུ་གྱུར་པ་ལས་ཡན་ལག་ཐམས་ཅད་དཀར་བ། ཞལ་གསུམ་པ། ཕྱག་དྲུག་པ། ནག་པོ་དང་དམར་པོ་ནི་གཡས་དང་གཡོན་གྱི་ཞལ་ལོ། །ཞལ་སོ་སོ་ལ་སྤྱན་གསུམ་གསུམ་མོ། །མངའ་དང༌། ཕྲེང་བ་དང༌། མཆོག་སྦྱིན་པ་ནི་གཡས་ཀྱི་ཕྱག་གསུམ་ནའོ། །གཞུ་དང་པདྨ་དང༌། ནུ་མ་བཟུང་བ་ནི་གཡོན་གྱི་ཕྱག་གསུམ་ནའོ། །འོད་དཔག་ཏུ་མེད་པ་དང༌། རིན་པོ་ཆེ་དང༌། ཟླ་ཕྱེད་ཀྱི་རལ་པ་བཅིངས་ཤིང་ཐོད་པའི་ཕྲེང་བས་མཚན་པའི་དབུ་རྒྱན་ཅན། རྒྱན་བཟང་པོས་བརྒྱན་པ། སྟག་གི་པགས་པའི་ཤམ་ཐབས་ཅན། སྒེག་པའི་རོལ་པས་མདོག་བཟང་པོ་ལ་སོགས་པའི་ཡོན་ཏན་ཅན་གྱི་བཅོམ་ལྡན་འདས་སྐྱིལ་ཀྲུང་བཅས་པ་རྣམ་པར་བསམས་ཏེ། དེའི་གཡས་ཕྱོགས་སུ་འཇིགས་པར་བྱེད་པའི་སྤྲུལ་གྱིས་དཀྲིས་པའི་རྩེ་གསུམ་མོ། །གཡོན་ཕྱོགས་སུ་སྣ་ཚོགས་ཀྱི་མེ་ཏོག་གིས་བཀང་བའི་ཐོད་པའོ། །རོལ་པས་གནོན་ཞིང་ཡང་དག་པར་གནས་པའི་རིན་པོ་ཆེ་མི་གཡོ་བའི་རིའི་ཕུག་གི་ནང་ན་གནས་པའི་ཧ་ལ་ཧ་ལར་བདག་ཉིད་སྐད་ཅིག་གིས་བསམས་ལ། ཨོཾ་བཛྲ་དྷརྨ་ཧྲཱིཿཞེས་བྱ་བའི་སྔགས་བཟླས་པར་བྱའོ། །ཧ་ལ་ཧ་ལའི་སྒྲུབ་ཐབས། སློབ་དཔོན་ལྷན་ཅིག་སྐྱེས་པའི་རོལ་པས་མཛད་པ་རྫོགས་སོ། །པཎྜི་ཏ་དོན་ཡོད་རྡོ་རྗེ་དང༌། ཁམས་པ་ལོ་ཙཱ་བ་དགེ་སློང་བ་རིས་བསྒྱུར་ཅིང་ཞུས་ཏེ་གཏན་ལ་ཕབ་པ།།