ཧེ་རུ་ཀའི་སྒྲུབ་ཐབས།
རྒྱ་གར་སྐད་དུ། ཧེ་རུ་ཀ་སཱ་དྷ་ནཾ། བོད་སྐད་དུ། ཧེ་རུ་ཀའི་སྒྲུབ་ཐབས། ཧེ་རུ་ཀ་ལ་ཕྱག་འཚལ་ལོ། །དུར་ཁྲོད་བརྒྱད་ཀྱི་དབུས་གནས་ནས། །ཟླ་མེད་ཡིད་ཀྱི་དགའ་བ་ཡི། །ཐབས་དང་ཤེས་རབ་རྣམ་པ་ཡིས། །ཟླ་བ་ཉི་མ་རབ་སྦྱོར་བས། །ཨཱ་ལི་ཀཱ་ལི་མཉམ་སྦྱོར་བ། །ཉི་མའི་དཀྱིལ་འཁོར་ལ་བསྒོམ་བྱ། །དེ་ལ་ཧཱུཾ་ཡིག་ལས་བྱུང་བའི། །རྡོ་རྗེ་རྩེ་གཅིག་དང་ལྡན་པ། །མི་ཡི་པགས་པ་རོ་ཡི་གདན། །རོ་ལངས་སྐྱིལ་ཀྲུང་ཕྱེད་པས་བཞུགས། །ཐལ་བའི་བརྡུལ་གྱིས་ལུས་ལ་བྱུགས། །རྡོ་རྗེ་འཕྲོ་བ་ཕྱག་གཡས་ན། །བ་དན་གཡོ་བཅས་ཁ་ཊྭཱཾ་གཡོན། །ཐོད་པ་དམར་པོ་དང་བཅས་པ། །བརྒྱ་ཕྱེད་མགོ་བོའི་ཕྲེང་བ་ཡི། །དོ་ཤལ་ཡིས་ནི་འཕྲོག་པར་བྱེད། །ཅུང་ཟད་མཆེ་བ་གཙིགས་པའི་ཞལ། །སྤྱན་གསུམ་པ་ནི་སྒེག་བཅས་ཤིང༌། །དབུ་སྐྲ་དམར་སེར་གྱེན་དུ་བརྫེས། །མི་བསྐྱོད་དབུ་རྒྱན་རྣ་རྒྱན་དང༌། །རུས་པའི་རྒྱན་གྱིས་མཛེས་བྱས་ཤིང༌། །ཐོད་པ་ལྔ་ཡིས་དབུ་ལ་བརྒྱན། །སངས་རྒྱས་ཉིད་དེར་བསྒོམ་པར་བྱ། །འགྲོ་བའི་བདུད་རྣམས་འཇོམས་བྱེད་པ། །ཨོཾ་ཧཱུཾ་ཕཊ་སྭཱ་ཧཱ་ཞེས་པ་འདི་མདོར་བསྡུས་པའི་ཕྱག་གཉིས་པའི་ཧེ་རུ་ཀའི་སྒྲུབ་ཐབས་རྫོགས་སོ།།