རྟོག་པ་ལས་གསུངས་པའི་ཆོ་གས་འོད་ཟེར་ཅན་དཀར་མོའི་སྒྲུབ་ཐབས།
རྒྱ་གར་སྐད་དུ། ཀལ་པོཀྟ་བི་དྷི་ནཱ་སཱི་ཏ་མཱ་རཱི་ཙྱཻ་སཱ་དྷ་ནཾ། བོད་སྐད་དུ། རྟོག་པ་ལས་གསུངས་པའི་ཆོ་གས་འོད་ཟེར་ཅན་དཀར་མོའི་སྒྲུབ་ཐབས། འཕགས་མ་འོད་ཟེར་ཅན་ལ་ཕྱག་འཚལ་ལོ། །དང་པོ་རེ་ཞིག་རང་གི་སྙིང་གར་ཟླ་བ་ལ་མཾ་ཡིག་དཀར་པོའི་འོད་ཟེར་གྱིས་མཉམ་པར་བཀུག་པའི་བཅོམ་ལྡན་འདས་མ་ལ་སྣ་ཚོགས་ཀྱི་ཉེ་བར་སྤྱོད་པས་མངོན་དུ་མཆོད་ལ་སྡིག་པ་བཤགས་པ་ལ་སོགས་པ་བྱས་ནས། ཚངས་པའི་གནས་བཞི་བསྒོམ་པར་བྱའོ། །ཨོཾ་ཤཱུ་ནྱ་ཏཱ་ཛྙཱ་ན་བཛྲ་སྭ་བྷཱ་བ་ཨཱཏྨ་ཀོ྅ཧཾ་ཞེས་བརྗོད་ལ་པཾ་ལས་སྐྱེས་པའི་སྣ་ཚོགས་པདྨའི་སྟེང་དུ་ཟླ་བ་ལ་ཡང་མི་དཀར་པོ་ཡོངས་སུ་གྱུར་པ་ལས། འོད་ཟེར་ཅན་ཀུནད་དང་ཟླ་བའི་འོད་དང་མཚུངས་པ། ཞལ་ལྔ་བ། ཕྱག་བཅུ་པ། ཞབས་བཞི་པ། སྐད་ཅིག་གིས་བསམ་པར་བྱའོ། །དེ་ལ་ཞལ་གྱི་གཙོ་མོ་ནི་སྐུའི་མདོག་གོ །གཡས་པའི་ཞལ་ནི་ནག་པོའོ། །གཡོན་པའི་ཞལ་ནི་ཕག་གདོང་དམར་བའོ། །ཞལ་ཕྱི་མ་ནི་ལྗང་གུའོ། །མགོ་བོའི་སྟེང་གི་ཞལ་ནི་སེར་པོའོ། །རིན་པོ་ཆེ་སྣ་ཚོགས་ཀྱིས་སྤྲས་པའི་རྩེ་གསུམ་པ་རལ་པའི་ཅོད་པན་ཅན་ནོ། །ཕྱག་གཡས་པའི་ཕྱག་ལྔ་ན་ཉི་མའི་དཀྱིལ་འཁོར་དང༌། རྡོ་རྗེ་སྔོན་པོ་དང༌། མདའ་དང༌། ལྕགས་ཀྱུ་དང༌། ཁབ་རྣམས་ཕྱག་ནའོ། །གཡོན་པའི་ཕྱག་ལྔ་རྣམས་སུ་ཟླ་བའི་དཀྱིལ་འཁོར་
དང༌། གཞུ་དང༌། མྱ་ངན་མེད་པའི་ཡལ་ག་དང༌། ཞགས་པ་དང་བཅས་པའི་སྡིགས་མཛུབ་དང༌། སྐུད་པ་རྣམས་ཕྱག་ནའོ། །སྣ་ཚོགས་པའི་རིན་པོ་ཆེས་སྤྲས་བའི་རྣ་རྒྱན་དང༌། དབུ་རྒྱན་དང༌། ལག་གདུབ་དང༌། དྲིལ་བུ་གཡེར་ཁ་དང་བཅས་པའི་སྐ་རགས་ཀྱིས་གོས་ཀྱི་རྣམ་པར་བརྒྱན་པའི་ལུས་སོ། །ལང་ཚོ་དར་ལ་བབ་པ་ཤ་འགག་དང༌། སྟོད་གཡོགས་དཀར་པོ་མཆོད་རྟེན་གྱི་ཁོང་དུ་གནས་པའི་ཕག་པ་བདུན་གྱི་ཤིང་རྟ་ལ་ཞོན་པའོ། །ཁྱབ་འཇུག་དང༌། དབང་པོ་དང༌། བདེ་བྱེད་དང༌། ཚངས་པ་ཞབས་བཞིས་མནན་པའོ། །དེའི་ཤིང་རྟའི་དབུས་སུ་གནས་པའི་ཆུ་སྲིན་མནན་པའི་བཅོམ་ལྡན་འདས་མ་གཞན་ཏེ། དེ་ཡང་སྐུ་མདོག་ནག་མོ་ཕག་གི་གདོང་པ་ཅན། རྡོ་རྗེ་དང་སྡིགས་མཛུབ་ནི་གཡས་པ་དང་གཡོན་པའི་ཕྱག་ནའོ། །གཡས་ཕྱོགས་སུ་ལྷ་མོ་གཞན་ཕག་གི་ཞལ་དམར་མོ་ཕྱག་བཞི་པ་ལྕགས་ཀྱུ་དང། ཁབ་ནི་གཡས་ཀྱི་ཕྱག་གཉིས་ནའོ། །སྡིགས་མཛུབ་དང་བཅས་པའི་ཞགས་པ་དང་སྐུད་པ་ནི་གཡོན་གྱི་ཕྱག་གཉིས་ནའོ། །རྒྱན་བཟང་པོས་ཡང་དག་པར་བརྒྱན་པའོ། །གཡོན་ཕྱོགས་སུ་རྗེ་བཙུན་མ་གཞན་ཏེ་དེ་ཡང་ཕག་ཞལ་མདོག་དམར་བ་རྣ་བའི་བར་དུ་བཀང་པའི་གཞུ་དང། མདའ་དང༌། རྡོ་རྗེ་དང༌། མྱ་ངན་མེད་པའི་ཡལ་ག་ནི་གཡས་དང༌། གཡོན་པའི་ཕྱག་ནའོ། །སྣ་ཚོགས་པའི་ན་བཟས་བརྒྱན་པ་སྟེ། ཤིང་རྟ་འདྲེན་པའི་ཕག་གི་འོག་ན་ཉི་མ་ལ་སོགས་པའི་གཟའ་ཆེན་པོ་དགུ་དང༌། ཉེ་བར་འཚེ་བའི་ནད་ཀྱི་ཚོགས་རྣམས་ལྷུང་ནས། མིའི་གཟུགས་ཀྱིས་གནས་པའོ། །དེ་ལྟ་བུའི་གཟུགས་ཀྱི་བཅོམ་ལྡན་འདས་མ་བསམས་ལ། སྙིང་གར་ཟླ་བ་ལ་མཾ་ལས་བྱུང་བའི་འོད་ཟེར་གྱིས་དེ་བཞིན་གཤེགས་པ་བཀུག་སྟེ། དབང་བསྐུར་བླངས་ནས་དབུ་ལ་རྣམ་པར་སྣང་མཛད་ཀྱིས་དབུ་བརྒྱན་པར་བསམ་པར་བྱའོ། །དེ་ནས་སྙིང་གའི་ས་བོན་ཉིད་ལས་ཕྲེང་བའི་རྣམ་པ་ལྟ་བུའི་སྔགས་ཀྱི་ཡི་གེ་ཁ་ནས་བྱུང་ནས་ལྟེ་བར་རོ། །ལྟེ་བ་ནས་ཁ་རུ། ཁ་ནས་ཡང་ལྟེ་བ་ལ་སོགས་པར་འཁོར་ལོ་འཁོར་བའི་རིམ་པས་སྔགས་བཟླས་པར་བྱའོ། །མཐའ་གསུམ་གྱི་དེ་ཉིད་ཡིད་ཀྱིས་བྱའོ། །དེ་ལ་འདི་ནི་སྔགས་ཡིན་ཏེ། ཨོཾ་མཱ་
རཱི་ཙྱཻ་མཱཾ་ཧཱུཾ་ཧཱུཾ་ཕཊ་ཕཊ་སྭཱ་ཧཱ། རང་གི་ས་བོན་གྱི་བྱིན་གྱིས་བརླབས་ལ། ཟས་ལ་སོགས་པ་ཐམས་ཅད་ལ་རྗེས་སུ་གནས་པར་བྱའོ། །སྐྱོ་ན་ཡི་གེ་བརྒྱ་པའི་སྔགས་བརྗོད་ལ། དེ་ལྟར་བདེ་བས་གནས་པར་བྱའོ། །རྟོག་པ་ལས་གསུངས་པའི་ཆོ་གའི་འོད་ཟེར་ཅན་དཀར་མོའི་སྒྲུབ་པའི་ཐབས་རྫོགས་སོ། །པཎྜི་ཏ་དོན་ཡོད་རྡོ་རྗེ་དང༌། ཁམས་པ་ལོ་ཙཱ་བ་དགེ་སློང་བ་རིས་བསྒྱུར་བའོ།།