སྒྲོལ་མའི་སྒྲུབ་ཐབས།
མར་མེ་མཛད་ཡེ་ཤེས།
སྒྲོལ་མའི་སྒྲུབ་ཐབས་བཞུགས།། རྗེ་བཙུན་མ་སྒྲོལ་མ་ལ་ཕྱག་འཚལ་ལོ། །དེ་ལ་དང་པོར་སྔགས་པས་གདོང་བཀྲུ་བ་ལ་སོགས་པ་བྱས་ཏེ། ཡིད་དང་མཐུན་པར་བསམ་གཏན་གྱི་གནས་གཙང་ཞིང་དྲི་ཞིམ་པོ་གཅལ་དུ་བཀྲམ་པར་སྟན་གཙང་མ་ལ་བདེ་བར་སྐྱིལ་མོ་ཀྲུང་གིས་འདུག་སྟེ་འབྱུང་པོ་ཐམས་ཅད་པའི་གཏོར་མའི་སྔགས་ཀྱིས་གཏོར་མ་བྱིན་གྱིས་བརླབས་ལ། ཨོཾ་ཨཱ་བི་གྷྣཱནྟ་ཀྲྀཏ་ཧཱུཾ་ཕཊ། ཅེས་བྱ་བའི་སྔགས་ལན་བཅུའི་བར་དུ་བརྗོད་དེ། ཕྱོགས་བཅུ་ན་གནས་པའི་བགེགས་ཐམས་ཅད་བསྐྲད་པར་བྱའོ། །དེ་ནས་རང་གི་སྙིང་གར་ཆོས་ཐམས་ཅད་ཆོད་དབྱིངས་ཀྱི་རང་བཞིན་སྐྱེ་བ་མེད་པར་སྟོན་པར་བྱེད་པ་སྟོན་ཀའི་ཟླ་བ་ལྟར་དཀར་བ་འོད་ཟེར་དཀར་པོ་འཕྲོ་བས་རང་གི་ལུས་གསལ་བར་བྱེད་པ་ཤིན་ཏུ་འཕྲོ་བ་བསམས་ལ། དེ་ཡོངས་སུ་གྱུར་པའི་འོད་དཀར་པོའི་ཐིག་ལེ་ཤེལ་སྐོང་དག་པ་ལྟ་བུ་དེ་རིམ་གྱིས་འཕེལ་བར་གྱུར་པའི་ཟླ་བའི་དཀྱིལ་འཁོར་གྱི་གཟུགས་སུ་བསམ་ཞིང༌། དེའི་སྟེང་དུ་ཡི་གེ་ཏཱཾ་འོད་ཟེར་གྱི་ཚོགས་འཕྲོ་བའི་རིན་པོ་ཆེའི་སྒྲོན་མ་ལྟར་དཀར་བ་རྣམ་པར་བསམ་མོ། །དེ་ནས་ཡི་གེ་ཏཱཾ་དེ་འོད་ཟེར་ཤིན་ཏུ་དཀར་བའི་ཚོགས་ཀྱིས་འཇིག་རྟེན་གྱི་ཁམས་ཐམས་ཅད་གསལ་བར་བྱས་པ་སྔོན་དུ་འགྲོ་བས་ལྷ་མོ་སྒྲོལ་མ་ལ་སོགས་པ་སངས་རྒྱས་དང་བྱང་ཆུབ་སེམས་དཔའ་དང་བླ་མ་རྣམས་བསྐུལ་ཏེ། སྤྱན་དྲངས་པ་མདུན་གྱི་ནམ་མཁའི་ཕྱོགས་ལ་རྣམ་པར་བསམ་པར་བྱའོ། །དེའི་སྟེང་དུ་ཡིད་ཀྱིས་རང་བཞིན་གྱི་མཆོད་པར་བྱ་བ་ཡིན་ལ། དེ་ལ་མཆོད་པའི་ཆོ་གའི་རིམ་པ་ནི་འདི་ཡིན་ཏེ། ཨོཾ་བཛྲ་པུཥྤེ་ཧཱུཾ་ཞེས་བྱ་བའི་སྔགས་བརྗོད་
ལ་ཡི་གེ་ཏཱཾ་ལས་བྱུང་བའི་མེ་ཏོག་གི་མཆོད་པའི་ཚོགས་ཀྱིས་མཆོད་པར་བྱའོ། །དེ་ནས་ཨོཾ་བཛྲ་དྷཱུ་པེ་ཧཱུཾ་ཞེས་བྱ་བའི་སྔགས་བརྗོད་ལ་ཡི་གེ་ཏཱཾ་དེ་ཉིད་ལས་ཡང་དག་པར་སྤྲོས་པའི་བདུག་པའི་མཆོད་པའི་ཚོགས་ཀྱིས་མཆོད་པར་བྱའོ། །དེའི་འོག་ཏུ་ཨོཾ་བཛྲ་དཱི་པེ་ཧཱུཾ་ཞེས་བྱ་བའི་སྔགས་བརྗོད་ལ་ཡི་གེ་ཏཱཾ་དེ་ཉིད་ལས་རིན་པོ་ཆེའི་སྒྲོན་མ་སྤྲོས་ལ་མཆོད་པར་བྱའོ། །དེ་ནས་ཨོཾ་བཛྲ་གནྡྷེ་ཧཱུཾ་ཞེས་བྱ་བའི་སྔགས་བརྗོད་ལ་ཡི་གེ་ཏཱཾ་དེ་ཉིད་ལས་བྱུང་བའི་དྲིའི་མཆོད་པའི་སྤྲིན་ཡང་དག་པར་སྤྲོས་པས་མཆོད་པར་བྱའོ། །དེ་ནས་ཨོཾ་བཛྲ་ནི་བི་དྱེ་ཧཱུཾ་ཞེས་བྱ་བའི་སྔགས་བརྗོད་ལ་ཡི་གེ་ཏཱཾ་དེ་ཉིད་ལས་རིན་པོ་ཆེ་སྣ་ཚོགས་བཅུག་པའི་ལྷའི་ཞལ་ཟས་རོ་མཆོག་དང་ལྡན་པའི་མཆོད་པའི་སྤྲིན་རྣམ་པ་སྣ་ཚོགས་ཡང་དག་པར་སྤྲོས་པས་མཆོད་པར་བྱའོ། །དེ་ནས་ཨོཾ་སརྦྦ་བི་ཤིཥྚ་པཱུ་ཛ་མེ་གྷ་པྲ་ས་ར་ས་མུ་དྲ་ཨཱཿཧཱུཾ། ཞེས་བྱ་བའི་སྔགས་བརྗོད་ལ་ཡི་གེ་ཏཱཾ་དེ་ཉིད་ལས་རིན་པོ་ཆེ་སྣ་བདུན་གྱི་གདུགས་དང༌། རྒྱལ་མཚན་དང༌། དྲིལ་བུ་དང༌། བ་དན་དང༌། བླ་རེ་ལ་སོགས་པ་དང༌། འཁོར་ལོས་སྒྱུར་བའི་རིན་པོ་ཆེ་སྣ་བདུན་གྱིས་མཆོད་པར་བྱའོ། །དེ་ལྟར་མཆོད་པ་བྱས་ནས། དེ་དག་གི་སྤྱན་སྔར་སྡིག་པ་བཤགས་པ་དང༌། བསོད་ནམས་ལ་རྗེས་སུ་ཡི་རང་བ་དང་བསྐུལ་བ་དང༌། གསོལ་བ་གདབ་པ་དང༌། བསོད་ནམས་ཡོངས་སུ་བསྔོ་བ་དང༌། གསུམ་ལ་སྐྱབས་སུ་འགྲོ་བ་བྱས་ལ། བྱམས་པ་དང་སྙིང་རྗེ་དང་དགའ་བ་དང་བཏང་སྙོམས་ཏེ་ཚངས་པའི་གནས་བཞི་བསྒོམས་ནས་བྱང་ཆུབ་ཀྱི་སེམས་བརྟན་པོར་བྱའོ། །དེ་ནས་ཨོཾ་སྭ་བྷཱ་བ་ཤུདྡྷཿསརྦྦ་དྷརྨཱཿསྭ་བྷཱ་བ་ཤུདྡྷོ྅ཧཾ། ཞེས་བྱ་བའི་སྔགས་ལན་གསུམ་བརྗོད་ལ། འགྲོ་བ་ཐམས་ཅད་རྨི་ལམ་དང་སྒྱུ་མ་དང་སྨིག་རྒྱུ་ལྟ་བུར་སྟོང་པ་ཉིད་ཀྱི་རང་བཞིན་དུ་དམིགས་པར་བྱའོ། །དེ་ནས་ཡི་གེ་ཨ་ཡོངས་སུ་གྱུར་པ་ལས་ཟླ་བའི་དཀྱིལ་འཁོར་དུ་བསམ། དེའི་སྟེང་དུ་ཡི་གེ་ཏཱཾ་དཀར་པོ་ལས་འོད་ཟེར་དཀར་པོ་འཁྲིགས་པར་བསམ། དེ་ཡོངས་སུ་གྱུར་པ་ལས་ཨུཏྤ་ལ་སྔོན་པོ། དེའི་དབུས་སུ་ཟླ་བའི་དཀྱིལ་
འཁོར་གྱི་སྟེང་ན་ཡི་གེ་ཏཱཾ་དཀར་པོ་བསམ། དེ་ལས་འོད་ཟེར་དཀར་པོ་ཕྱོགས་བཅུར་འཕྲོས་པ་དེས་སེམས་ཅན་ཐམས་ཅད་སྦྱངས་ནས་ལྷ་མོ་སྒྲོལ་མའི་སྐུར་གྱུར་པ་འོད་ཟེར་དེ་ཉིད་ཀྱིས་བཀུག །ཨུཏྤལ་དང་ཡི་གེ་ཏཱཾ་ལ་བསྟིམས་པས། པདྨ་དཀར་པོའི་དབུས་གནས་པའི། །ཟླ་བའི་གཟུགས་ཀྱི་གདན་སྟེང་དུ། །རྡོ་རྗེ་སྐྱིལ་ཀྲུང་བཅས་ནས་ནི། །མཆོག་སྦྱིན་མ་དང་ཨུཏྤལ་བསྣམས། །སྟོན་ཀའི་ཟླ་བའི་མདངས་འདྲ་བའི། །ཟླ་བ་ལ་ནི་རྒྱབ་བརྟེན་པ། །རྒྱན་རྣམས་ཐམས་ཅད་ཡོངས་སུ་རྫོགས། །བཅུ་དྲུག་ལོ་ལོན་ལུས་དང་ལྡན། །རྫོགས་སངས་རྒྱས་དང་དེ་འདྲའི་སྲས། །ཀུན་གྱི་ཡུམ་གྱུར་འདོད་དགུ་འཆང༌། །འཕགས་མ་སྒྲོལ་མ་དེའི་སྙིང་གར་ཟླ་བའི་སྟེང་གི་ཏཱཾ་དཀར་པོ་ཡོངས་སུ་གྱུར་པ་ལས། འཁོར་ལོ་འོད་ཟེར་དཀར་པོ་བསྒོམ། །རྩིབས་བརྒྱད་པ་ལ་ཡི་གེ་ནི། །བརྒྱད་ཀྱིས་ཡོངས་སུ་བསྐོར་བ་ལ། །ལྟེ་བར་ཨོཾ་ཏཱའི་ཡི་གེ་ཡི། །དབུས་གནས་བསྒྲུབ་བྱའི་མིང་དང་ལྡན། །ཟླ་དྲུག་བསྟེན་ཞིང་ངེས་པ་ནི། །རྩེ་གཅིག་པ་ཡི་སེམས་ཀྱིས་བསྒོམ། །ཡི་གེ་བཅུ་པོའི་སྔགས་འདི་ནི། །སྐྱོ་བར་མ་གྱུར་སེམས་ཀྱིས་བཟླས། །དང་པོར་ཨོཾ་ནི་བཞག་ནས་སུ།། དེ་འོག་ཏཱ་རེ་རབ་ཏུ་སྦྱར། །དེ་འོག་ཏཱ་རེ་ཏུཏྟཱ་རེ། །སྭཱ་ཧཱའི་མཐའ་ཅན་ལས་ཀུན་བྱེད། །ཐུགས་ཀའི་འཁོར་ལོ་དེ་ལས་འོད་ཟེར་དཀར་པོ་འཕྲོས་པས་དམ་ཚིག་སེམས་དཔའ་འདྲ་བའི་ཡེ་ཤེས་སེམས་དཔའ་རང་བཞིན་གྱིས་གྲུབ་པ་ཀུན་ནས་སྤྱན་དྲངས་པ་མདུན་གྱི་ནམ་མཁའ་ལ་རྣམ་པར་བསམས་ནས། སྔ་མ་བཞིན་དུ་ཡང་དག་པར་མཆོད་དེ། དེ་ནས་དམ་ཚིག་གི་ཕྱག་རྒྱ་བཅིང་བར་བྱ་སྟེ། ཐལ་མོ་ཁོང་སྟོང་དུ་སྦྱར་ནས་མཛུབ་མོ་གཉིས་གུང་མོ་གཉིས་ཀྱི་རྒྱབ་ཏུ་སྦྱར་ལ་མཐེ་བོང་གཉིས་ནང་དུ་བཀུག་པ་ནི། ཨུཏྤ་ལའི་ཕྱག་རྒྱའོ། །དེའི་དབུས་སུ་ཡི་གེ་ཏཱཾ་དཀར་པོ་བསམས་ཏེ། དེ་ལས་འོད་ཟེར་དཀར་པོ་འཕྲོས་པ་དེས་ཡེ་ཤེས་སེམས་དཔའ་ལ་བསྐོར་བར་བྱས་ལ། དེ་ནས་ཛཿཧཱུཾ་བཾ་ཧོཿཞེས་བྱ་བའི་ཡི་གེ་བཞིས་སྤྱན་དྲངས་ནས་དམ་ཚིག་སེམས་དཔའ་བདག་ཉིད་ལ་གཞུག་པ་དང་བཅིང་བ་དང༌། དགྱེས་པ་བྱས་ལ། ཨོཾ་དྷརྨ་དྷཱ་
ཏུ་ཛྙཱ་ན་བཛྲ་སྭ་བྷཱ་བ་ཨཱཏྨ་ཀོ྅ ཧཾ། ཞེས་ང་རྒྱལ་བྱའོ། །དེའི་རྗེས་ལ་འཁོར་ལོ་ཡི་གེར་བཅས་པ་ལས་འོད་ཟེར་སྤྲོ་བ་བྱས་ལ། དེ་བཞིན་གཤེགས་པ་ལྔ་མདུན་གྱི་ནམ་མཁའ་ལ་རྣམ་པར་བསམས་ལ། དབང་བསྐུར་བའི་ཚིགས་སུ་བཅད་པ་འདིས་དོན་དུ་གཉེར་བར་བྱ་བ་སྟེ། བྱང་ཆུབ་རྡོ་རྗེས་སངས་རྒྱས་ལ། །ཇི་ལྟར་མཆོག་ཆེན་སྩོལ་མཛད་པ། །བདག་ལ་བསྲུང་བའི་དོན་གྱི་ཕྱིར། །ནམ་མཁའི་རྡོ་རྗེ་དེང་བདག་སྩོལ། །དེ་ནས་དེ་བཞིན་གཤེགས་པ་དེ་དག་གི་སྐུ་ལས་བྱུང་བའི་ལོ་ཙཱ་ན་དང༌། མཱ་མ་ཀཱི་དང༌། གོས་དཀར་མོ་དང༌། ཏཱ་ར་རིན་པོ་ཆེའི་བུམ་པ་ཡེ་ཤེས་ཀྱི་བདུད་རྩིས་བཀང་བ་ཕྱག་ན་བསྣམས་པས། རྡོ་རྗེ་ཆེན་པོའི་དབང་བསྐུར་བ། །ཁམས་གསུམ་པོ་ཡིས་ཕྱག་བྱས་པ། །གསང་བ་གསུམ་གྱི་གནས་ལས་བྱུང༌། །སངས་རྒྱས་ཀུན་གྱིས་སྦྱིན་པར་བྱ། །ཞེས་བྱ་བ་འདོན་ཅིང་དབང་བསྐུར་བར་བསམ་མོ། །དབང་བསྐུར་བ་རྫོགས་མ་ཐག་ཏུ་རིན་པོ་ཆེའི་ཅོད་པན་གྱི་སྟེང་དུ་དེ་བཞིན་གཤེགས་པ་འོད་དཔག་ཏུ་མེད་པ་སྐུ་མདོག་དཀར་པོ་ཞལ་གཅིག་ཕྱག་གཉིས་པ། ཏིང་ངེ་འཛིན་གྱི་ཕྱག་རྒྱ་ཅན་བསམ་མོ། །ལུས་དང་ངག་དང་ཡིད་གསུམ་བྱིན་གྱིས་བརླབ་པར་བྱ་བའི་ཕྱིར། སྤྱི་བོར་ཡི་གེ་ཨོཾ་དཀར་པོ་ཟླ་བའི་དཀྱིལ་འཁོར་ལ་གནས་པ་དང༌། ལྐོག་མར་ཡི་གེ་ཨཱཿདྨར་པོ་ཟླ་བའི་དཀྱིལ་འཁོར་ལ་གནས་པ་དང༌། སྙིང་གར་ཡི་གེ་ཧཱུཾ་ནག་པོ་ཟླ་བའི་དཀྱིལ་འཁོར་ལ་གནས་པ་རྣམ་པར་བཀོད་དོ། །ཡི་གེ་བཅུ་པོ་ལས་འོད་ཟེར་དཀར་པོ་སྤྲོས་པས་འགྲོ་བ་ཀུན་སྦྱངས་ནས་སངས་རྒྱས་སུ་བསྒྲུབས་ནས་སླར་བཀུག་སྟེ། འཁོར་ལོ་དང་ཡི་གེ་ལ་བསྟིམས་ཏེ་གསལ་བར་བསྒོམ་ཞིང་བཟླས་བརྗོད་བྱའོ། །ཇི་སྲིད་མི་སྐྱོ་བའི་བར་དུ་བསྒོམ་པ་དང་བཟླས་པར་བྱས་ནས་དེ་ལས་ལྡང་བར་འདོད་ན་ཆོ་ག་ཉམས་པ་བསྐང་བར་བྱ་བའི་ཕྱིར་རྡོ་རྗེ་སེམས་དཔའི་སྙིང་པོ། ཡི་གེ་བརྒྱ་པ་ཞེས་བྱ་བ་བཟླས་ནས་ཡེ་ཤེས་སེམས་དཔའ་ཡང་དག་པར་མཆོད་བསོད་ནམས་ཡོངས་སུ་བསྔོས་ལ་གཤེགས་སུ་གསོལ་ལོ། །དེ་ལ་ཡེ་ཤེས་སེམས་དཔའ་གཤེགས་སུ་གསོལ་བའི་ཚིགས་སུ་བཅད་པ་ནི། ཨོཾ་ཁྱེད་ཀྱིས་སེམས་ཅན་
དོན་ཀུན་མཛད། །རྗེས་སུ་མཐུན་པའི་དངོས་གྲུབ་སྩོལ། །སངས་རྒྱས་ཡུལ་དུ་གཤེགས་ནས་ནི། །སླར་ཡང་འབྱོན་པར་མཛད་དུ་གསོལ། །མུཿཞེས་བྱ་བ་འདི་ཡིན་ནོ། །དེ་ལ་བཟླས་པའི་སྔགས་ནི། ཨོཾ་ཏཱ་རེ་ཏུཏྟཱ་རེ་ཏུ་རེ་སྭཱ་ཧཱ། དེ་ལ་རྡོ་རྗེ་སེམས་དཔའི་སྙིང་པོ་ཡི་གེ་བརྒྱ་པའི་སྔགས་ནི། ཨོཾ་བཛྲ་ས་ཏྭ་ས་མ་ཡ། མ་ནུ་པཱ་ལ་ཡ། བཛྲ་སཏྭ་ཏྭེ་ནོ་པ། ཏིཥྛ་དྲྀ་ཌྷོ་མེ་བྷ་བ། སུ་ཏོ་ཥྱོ་མེ་བྷ་བ། སུ་པོ་ཥྱོ་མེ་བྷ་བ། ཨ་ནུ་རཀྟོ་མེ་བྷ་བ། སརྦྦ་སིདྡྷིམྨེ་པྲ་ཡཙྪ། སརྦ་ཀརྨ་སུ་ཙ་མེ། ཙིཏྟཾ་ཤྲེ་ཡཿཀུ་རུ་ཧཱུཾ། ཧ་ཧ་ཧ་ཧ་ཧོཿ། བྷ་ག་ཝཱན་སརྦྦ་ཏ་ཐཱ་ག་ཏ། བཛྲ་མཱ་མི་མུཉྩ། བཛྲི་བྷ་བ་མ་ཧཱ་ས་མ་ཡ་སཏྭ་ཨཱཿ། ཞེས་བྱ་བ་འདི་ཡིན་ནོ། །བསོད་ནམས་འདི་ཡིས་འགྲོ་བ་ཀུན། །རྗེ་བཙུན་སྒྲོལ་མ་འདྲ་བར་ཤོག །བདག་ཀྱང་ཏིང་འཛིན་འདི་བསྒྲུབས་ནས། །འགྲོ་བའི་དོན་དུ་སངས་རྒྱས་ཤོག ། རྗེ་བཙུན་སྒྲོལ་མའི་སྒྲུབ་ཐབས་སློབ་དཔོན་ཆེན་པོ་དཔལ་མར་མེ་མཛད་ཡེ་ཤེས་ཀྱིས་མཛད་པ་རྫོགས་སོ།། །།རྒྱ་གར་གྱི་མཁན་པོ་དཱི་པཾ་ཀ་ར་ཤྲཱི་ཛྙཱ་ན་དང༌། བོད་ཀྱི་ལོ་ཙཱ་བ་དགེ་སློང་དགེ་བའི་བློ་གྲོས་ཀྱིས་སྒྱུར་ཅིང་ཞུས་ཏེ་གཏན་ལ་ཕབ་པའོ།། །།