ཨུ་ཌྱན་གྱི་རིམ་པའི་འོད་ཟེར་ཅན་གྱི་སྒྲུབ་པའི་ཐབས།
རྒྱ་གར་སྐད་དུ། ཨོ་ཌཱི་ཡཱ་ན་ཀྲ་མཱ་རཱི་ཙྱཻ་སཱ་དྷ་ནཾ། བོད་སྐད་དུ། ཨུ་ཌྱན་གྱི་རིམ་པའི་འོད་ཟེར་ཅན་གྱི་སྒྲུབ་པའི་ཐབས། འཕགས་མ་འོད་ཟེར་ཅན་ལ་ཕྱག་
འཚལ་ལོ། །དང་པོར་སྙིང་གར་ཉི་མའི་གདན་ལ་ཧཱུཾ་ངོ༌། །དེའི་འོད་ཟེར་གྱིས་བཅོམ་ལྡན་འདས་མ་བཀུག་སྟེ། སྣ་ཚོགས་པའི་མཆོད་པས་ཡང་དག་པར་མཆོད་ལ། སྡིག་པ་བཤགས་པ་ལ་སོགས་པ་བྱས་ནས། སྟོང་པ་ཉིད་བསྒོམས་བའི་རྗེས་སུ་སྣ་ཚོགས་རྡོ་རྗེའི་རྣམ་པ་སེམས་ཀྱིས་བསམས་ལ། དེ་ཡོངས་སུ་གྱུར་པ་ལས་རྡོ་རྗེའི་ས་གཞི་དང༌། རྡོ་རྗེའི་ར་བ་ལ་སོགས་པ་བསམས་ལ། དེའི་དབུས་སུ་དཔལ་ཨུ་ཌྱན་གྱི་གནས་གྲུ་གསུམ་དཀར་ཞིང་དམར་བའོ། །དེའི་དབུས་སུ་ཉི་མ་ལ་གནས་པའི་རྡོ་རྗེ་རྩེ་ལྔ་པ་ཧཱུཾ་གིས་དེའི་ལྟེ་བ་མཚན་པའོ། །དེ་ཡོངས་སུ་གྱུར་པ་ལས་བྱང་ཆུབ་སེམས་ཀྱི་ངོ་བོ་ཉིད་འཇིག་པའི་དུས་ཆེན་པོའི་སེ་ལྟ་བུ་གྱེན་དུ་རྣམ་པར་འཕྲོ་བ། ཟིལ་གྱིས་མི་ནོན་པའོ། །ཧ་ཧ་ཞེས་དགོད་ཅིང་བདུད་རྣམ་བཞི་གཡོན་བརྐྱང་པའི་ཞབས་ཀྱིས་མནན་པ། ཕྱག་བཅུ་གཉིས་པ། ཞལ་དྲུག་པ། སྤྱན་གསུམ་པ། མདོག་དམར་པོ། དང་པོ་གཡས་ཀྱི་ཕྱག་དྲུག་རྣམས་སུ་རལ་གྲི་དང༌། སྣ་ཚོགས་རྡོ་རྗེ་དང༌། རྡོ་རྗེ་རྩེ་གཅིག་པ་དང༌། དགྲ་སྟ་དང༌། མདའ་དང༌། གཏུན་ཤིང་བསྣམས་པའོ། །གཡོན་གྱི་ཕྱག་རྣམས་སུ་སྡིགས་མཛུབ་དང་བཅས་པའི་ཁབ་དང༌། རྩེ་གསུམ་དང༌། མྱ་ངན་མེད་པའི་ཡལ་ག་དང༌། གཞུ་དང༌། ཞགས་པ་དང༌། ཚངས་པའི་མགོ་བོ་རྣམས་སོ། །མི་མགོའི་ཕྲེང་བ་འཕྱང་བ། ལུས་ཀྱི་ཡན་ལག་དང༌། ཉིད་ལག་ཐམས་ཅད་མཛེས་པའོ། །སྟག་གི་པགས་པའི་སྟོད་གཡོགས་ཀྱི་གོས་ཅན། རྩ་བའི་ཞལ་ནི་དམར་བའོ། །དཀར་པོ་དང༌། ནག་པོ་གཡོན་པའི་ཞལ་གཉིས་སོ། །སེར་པོ་དང་ནག་པོ་ནི་གཡས་ཀྱི་ཞལ་གཉིས་སོ། །སྟེང་གི་ཕག་གི་ཞལ་ནི་ནག་པོའོ། །ལྗགས་འདྲིལ་བ། སྐྲ་ཁམ་པ་གྱེན་དུ་འབར་བ། རྣམ་པར་སྣང་མཛད་ཀྱི་དབུ་རྒྱན་ཅན། སྤྲུལ་དང་རུས་པའི་རྒྱན་གྱིས་བརྒྱན་པ། གཉུག་མའི་འོད་ཟེར་གྱིས་རྣམ་པ་ཐམས་ཅད་ཀྱི་བདུད་འཇོམས་པར་བྱེད་མ། ཕྱོགས་བཅུར་འབྲོས་བཞིན་པའི་མཁའ་འགྲོ་མ་དང༌། འབྱུང་པོ་དང༌། རོ་ལངས་ཕེཾ་ཕེཾ་གྱི་རྣམ་པ་དང༌། ཧ་ཧའི་འཇིགས་པའི་སྒྲ་སྒྲོགས་པས་ཡོངས་སུ་བསྐོར་བའི་དུར་ཁྲོད་བརྒྱད་ཀྱིས་བརྒྱན་པ། དཔལ་ཨུ་ཌྱན་གྱི་འོད་ཟེར་ཅན་གྱི་བདག་ཉིད་དུ་སྐད་ཅིག་གིས་བསྐྱེད་ལ། མགོ་བོ་དང༌། མགྲིན་པ་དང༌། སྙིང་ག་
རྣམས་སུ་ཨོཾ་ཨཱཿཧཱུཾ་ངོ༌། །ཡན་ལག་ཐམས་ཅད་ལ་ཕཊ་ཀྱི་རྣམ་པ་བསམ་པར་བྱའོ། །དེ་ནས་ལྟེ་བའི་སྟེང་དུ་སྣ་ཚོགས་པའི་པདྨ་ལ་ཟླ་བ་ཉི་མ་ཁ་སྦྱོར་གྱི་དབུས་སུ་ཧཱུཾ་གི་རྣམ་པ་པད་སྣོད་ཀྱི་རང་བཞིན་སྣ་ཚོགས་ཀྱི་མདོག་ཅན་གྱི་ཡི་གེ་བསམ་པར་བྱའོ། །ཨོཾ་བཛྲ་དྷཱ་ཏྭཱི་ཤྭ་རི་སརྦ་དུཥྚཱ་ན་ཧ་ན་ཧ་ན། ད་ཧ་ད་ཧ། པ་ཙ་པ་ཙ། ཨོཾ་མཱ་རཱི་ཙྱཻ་མཱཾ་ཧཱུཾ་ཧཱུཾ་ཕཊ་ཕཊ་སྭཱ་ཧཱ། སྙིང་པོའི་སྔགས་སོ། །ཨོཾ་ཨཱཿཧཱུཾ། བསྒོམ་པའི་སྔགས་སོ། །ཨོཾ་བཛྲ་བེ་ཏཱ་ལཱི་ཧཱུཾ་ཕཊ། བཟླས་པའི་སྔགས་སོ། །ཨོཾ་མཱ་རཱི་ཙྱཻ་ཨཾ་མཾ་ཧཱུཾ་ཧཱུཾ་ཕཊ་བཟླས་པའི་སྔགས་གཉིས་པའོ། །དེ་ནས་ཐུན་མཚམས་བཞིར་གཏོར་མའི་སྔགས་ནི། ཨོཾ་ཨཱ་རལླི་ཧོ། ཛཿཧཱུཾ་བཾ་ཧོཿཨོཾ་བཛྲ་ཌཱ་ཀི་ནཱི་ས་མ་ཡ་སྟྭཱཾ་དྲྀ་ཤྱ་ཧོ། ཁ་ཁ་ཁཱ་ཧི་ཁཱ་ཧི་སརྦ་ཡཀྵ་རཱཀྵ་ས་བྷཱུ་ཏ་པྲེ་ཏ་པི་ཤ་ཙོན་མཱ་ད་ཨ་པསྨཱ་ར་ཌཱ་ཀི་ནྱཱ་ད་ཡཿ་ཨི་དཾ་བ་ལིཾ་གྲྀཧྞ་ཐཱ་པི་པ་ཐཱ་མཱ་ཏི་ཀྲཱ་མ་ཐཱ་མ་ཧཱ་སུ་ཁ་བི་བྲྀཏ་དྷ་ཡེ་མ་མ་ས་ཧ་ཡི་ཀ་བྷ་བ་ཐཱ་ཧཱུཾ་ཧཱུཾ་ཕཊ་ཕཊ་སྭཱཧཱ། ཟས་ལ་སོགས་པ་ཡང་ཧྲཱིཿའི་ཡི་གེ་འམ། ཧཱུཾ་གི་ཡི་གེ་ལ་སོགས་པས་ཡང་དག་པར་སྦྱངས་ལ་སྤྱད་པར་བྱའོ། །ཨུ་ཌྱན་གྱི་རིམ་པའི་འོད་ཟེར་ཅན་གྱི་སྒྲུབ་ཐབས་རྫོགས་སོ། །པཎྜི་ཏ་དོན་ཡོད་རྡོ་རྗེ་དང༌། ཁམས་པ་ལོ་ཙཱ་བ་བ་རི་དགེ་སློང་གིས་བསྒྱུར་བའོ།།