བགེགས་བསྐྲད་པའི་སྒྲུབ་པའི་ཐབས།
རྒྱ་གར་སྐད་དུ། བིགྷྣཱནྟ་ཀ་སཱ་དྷ་ནཾ། བོད་སྐད་དུ། བགེགས་བསྐྲད་པའི་སྒྲུབ་པའི་ཐབས། བཅོམ་ལྡན་འདས་བགེགས་མཐར་བྱེད་ལ་ཕྱག་འཚལ་ལོ། །དང་པོ་རེ་ཞིག་སྒྲུབ་པ་པོ་བདེ་བའི་གདན་ལ་འདུག་སྟེ། རང་གི་སྙིང་གར་ཨཾ་དམར་པོ་ལས་སྐྱེས་པའི་ཉི་མའི་དཀྱིལ་འཁོར་བསྒོམས་ལ། དེའི་སྟེང་དུ་ཧཱུཾ་སྔོན་པོ་རྣམ་པར་བསམས་ནས། ཧཱུཾ་གི་འོད་ལས་སྐྱེས་པའི་བགེགས་མཐར་བྱེད་དང༌། བླ་མ་དང༌། སངས་རྒྱས་དང༌། བྱང་ཆུབ་སེམས་དཔའ་དམིགས་ལ། མེ་ཏོག་ལ་སོགས་པས་ཡང་དག་པར་མཆོད་དེ། ཕྱག་འཚལ་བ་དང་གསུམ་ལ་སྐྱབས་སུ་འགྲོ་བ་ལ་སོགས་པ་བྱས་ནས་སྟོང་པ་ཉིད་བསྒོམ་པར་བྱའོ། །ཨོཾ་ཤཱུ་ནྱ་ཏཱ་ཛྙཱ་ན་བཛྲ་སྭ་བྷཱ་ཝ་ཨཱཏྨ་ཀོ྅ཧཾ། དེ་ནས་ཨཾ་དམར་པོ་ལས་སྐྱེས་པའི་ཉི་མའི་དཀྱིལ་འཁོར་གྱི་སྟེང་དུ་ཧཱུཾ་ངོ༌། །དེ་ཡོངས་སུ་གྱུར་པ་ལས། རྡོ་རྗེ་ཧཱུཾ་གིས་མཚན་པ་བསྒོམ་པར་བྱའོ། །ཧཱུཾ་གི་འོད་ཀྱིས་བསྐུལ་བའི་དེ་བཞིན་གཤེགས་པ་ཐམས་ཅད་བཞུགས་པའི་སྔོན་དུ་འགྲོ་བས་དེ་ཐམས་ཅད་ཡོངས་སུ་གྱུར་པ་ལས་བདག་ཉིད་བགེགས་དགྲ་བསྒོམ་པར་བྱ་སྟེ། ཞལ་གཅིག་ཕྱག་གཉིས་པ། གཡོན་པ་བརྐྱང་བའི་ཞབས་ཀྱིས་གནས་པ། མདོག་སྔོ་བ་ཕྱག་གཡོན་ན་སྡིགས་མཛུབ་དང་ཞགས་པ། གཡས་པ་ན་རྡོ་རྗེ་འཕྱར་ཞིང་འཇིགས་པར་བྱེད་པ། སྐྲ་ཁམ་པ་གྱེན་དུ་བསྒྲེང་བའོ། །དེ་ནས་བཅོམ་ལྡན་འདས་ཀྱི་ཐུགས་ཀར་ཧཱུཾ་ཡོངས་སུ་གྱུར་པ་ལས་རྡོ་རྗེ་ཧཱུཾ་གིས་མཚན་པའོ། །དེ་ལྟ་བུར་གྱུར་པའི་བགེགས་དགྲ་སྤྲོ་བ་དང་བསྡུ་བའི་གཟུགས་སྣ་ཚོགས་པདྨའི་སྟེང་དུ་ཉི་མ་ལ་གནས་པ་བསྒོམ་པར་བྱའོ། །དམ་ཚིག་ལ་སོགས་པའི་ཆོ་ག་སྔོན་དུ་འགྲོ་བས་འདི་ལྟར་ཐུན་མཚམས་གཉིས་དང་གསུམ་དང་བཞི་ལ་སོགས་པར་བསྒོམ་པར་བྱའོ། །ཨོཾ་ཨཱཿབིགྷྣཱནྟ་ཀྲྀཏ་ཧཱུཾ་ཕཊ། བགེགས་དགྲའི་སྒྲུབ་པའི་ཐབས་རྫོགས་སོ། །པཎྜི་ཏ་དོན་ཡོད་རྡོ་རྗེ་དང༌། ཁམས་པ་ལོ་ཙཱ་བ་དགེ་སློང་བ་རིས་བསྒྱུར་ཅིང་ཞུས་སོ།།