ལྷ་མོ་རིགས་བྱེད་མའི་སྒྲུབ་ཐབས།
རྒྱ་གར་སྐད་དུ། ཀུ་རུ་ཀུལླེ་སཱ་དྷ་ནཾ། བོད་སྐད་དུ། ལྷ་མོ་རིགས་བྱེད་མའི་སྒྲུབ་པའི་ཐབས། འཕགས་མ་རིགས་བྱེད་མ་ལ་ཕྱག་འཚལ་ལོ། །རང་གི་སྙིང་གར་ཟླ་བའི་དཀྱིལ་འཁོར་ལ་ཧྲཱིཿཡིག་ལས་སྐྱེས་པའི་ཨུཏྤ་ལ་དམར་པོའི་དབུས་སུ་ཧྲཱིཿས་མཚན་པར་བསམས་ལ། དེ་ཡོངས་སུ་གྱུར་པ་ལས་འཕགས་མ་རིགས་བྱེད་མ་མདོག་དམར་པོ་ཟླ་བའི་གདན་ལ་འོད་ཀྱི་དཀྱིལ་འཁོར་དམར་པོའོ། །སྣ་ཚོགས་དམར་པོའི་ན་བཟའི་སྟོད་གཡོགས་ཅན་མ། འོད་དཔག་མེད་པས་དབུ་བརྒྱན་ཅིང༌། ཕྱག་བཞི་པ། རྩ་བའི་ཕྱག་གཉིས་ན་ཨུཏྤ་ལ་དམར་པོའི་མདེའུས་རྣམ་པར་མཛེས་པ་དང་ལྡན་པའི་མདའ་རྣ་བའི་བར་དུ་བཀང་བའི་མེ་ཏོག་གི་གཞུ་བསྣམས་པའོ། །གཡོན་པ་ན་སྡོང་བུ་དང་བཅས་ཤིང་ཁ་བྱེ་བའི་ཨུཏྤ་ལ་དམར་པོ་བསྣམས་ཤིང་གཡས་པ་ན་མཆོག་སྦྱིན་པའོ། །སྒེག་པའི་རོ་ཆེན་པོ་དང་ལྡན་པར་བལྟས་ལ་ཡེ་ཤེས་སེམས་དཔའ་དང་གཅིག་ཏུ་བྱས་ལ། རང་གི་ལུས་ཀྱི་འོད་དམར་པོའི་ལྕགས་ཀྱུས་བཀུག་པའི་ལྷ་དང་ལྷ་མ་ཡིན་དང༌། བྱ་ཁྱུང་དང༌། མི་འམ་ཅི་དང༌། ལྟོ་འཕྱེ་ཆེན་པོ་དང༌། གནོད་སྦྱིན་དང༌། སྐྱེས་པ་དང༌། བུད་མེད་བརྒྱ་སྟོང་ལ་སོགས་པའི་ཚོགས་ཤིན་ཏུ་གུས་པས་ལུས་བཏུད་ཅིང་མཆོག་ཏུ་དབང་དུ་འགྱུར་བར་ཕྱོགས་བཅུར་ཡང་དག་པར་བལྟ་བར་བྱའོ། །ཨོཾ་ཀུ་རུ་ཀུལླེ་ཧྲཱིཿསྭཱ་ཧཱ། ཞེས་བྱ་བའི་སྔགས་ཀྱི་བཟླས་པ་འབུམ་ཕྲག་གཅིག་ནས་བརྩམས་ཏེ། ཇི་སྲིད་བཅོམ་ལྡན་འདས་མ་མངོན་དུ་གྱུར་གྱི་བར་དུ་བྱའོ། །གཞན་ཡང་ཁ་ཅིག་ཏུ་དབང་དུ་བྱེད་པར་འདོད་ན་ཇི་སྐད་གསུངས་པའི་རྣལ་འབྱོར་གྱི་ཆོ་གས་འབུམ་ཕྲག་གཅིག་བྱས་ལ་གུས་ཤིང་བཏུད་པའི་ལྷ་
དང། ལྷ་མ་ཡིན་ལ་སོགས་པའི་དབུས་སུ་གནས་པའི་རང་གི་ལུས་ཀྱི་འོད་ཟེར་ལྕགས་ཀྱུས་བསྒྲུབ་བྱ་བཀུག་ལ་མདུན་དུ་ཡང་དག་པར་བཞག་པ་ལ་རང་གི་སྙིང་གར་ཨུཏྤ་ལ་དམར་པོ་འདབ་མ་བཅུ་དྲུག་པ། དེའི་སྙིང་གར་རྣམ་པར་བསམས་ལ། འཕགས་པ་ཡན་ལག་མེད་པའི་རྡོ་རྗེས་གསུངས་པའི་རིམ་པས་བུང་བ་ལྕགས་ཀྱུ་ལྟ་བུར་བསྒོམས་ལ། དེའི་མིང་གི་ཡི་གེ་རང་གི་སྙིང་གའི་སྔགས་ཀྱིས་དང་པོར་མནན་ནས་དེ་བཞིན་དུ་མདའ་ཉིད་ཀྱིས་སྙིང་ག་ཕུག་པས་འདོད་ཆགས་ཆེན་པོས་བརྒྱལ་ཞིང་ཡང་སྡོང་བུས་རྐང་པ་གཉིས་བཅིངས། ཨུཏྤ་ལའི་ཞགས་པས་ཀྱང་སྐེ་ནས་བཅིངས་ཏེ། ཡང་དག་པར་བཀུག་ལ་རང་གི་རྐང་པ་གཉིས་སུ་ལྷུང་བའོ། །གལ་ཏེ་སྐྱེས་པ་ཡིན་ན་ལྕགས་ཀྱུས་སྙིང་ག་འབུགས་པའོ། །བུད་མེད་ཡིན་ན་ཆོས་འབྱུང་ནས་སོ། །ཨོཾ་ཀུ་རུ་ཀུལླེ་ཆེ་གེ་མོ་འམ། ཆེ་གེ་མོ་ཨཱ་ཀཪྵ་ཡ་ཧྲཱིཿསྭཱ་ཧཱ་ཞེས་བྱ་བའི་སྔགས་བཟླས་པ་བྱའོ། །བསྒྲུབ་བྱ་ཁུགས་ནས་སྔགས་དེ་ཉིད་གཏན་དུ་གནས་པའི་ཆེད་དུའོ། །བ་ཤ་མ་ན་ཡ་ཞེས་བྱ་བ་དང༌། སྤེལ་ཞིང་བཟླས་པ་བྱའོ། །བརྒྱ་བཟླས་པས་ཐུན་མོང་གི་སྐྱེས་པ་དང་བུད་མེད་ཀྱི་ཚོགས་དང༌། རྒྱལ་པོ་དང༌། བློན་པོ་དབང་དུ་འགྱུར་རོ། །ཁྲི་བཟླས་ན་འཇིག་རྟེན་ཐ་མལ་པ་རྣམས་སོ། །འབུམ་ཕྲག་གིས་རྒྱལ་པོའོ། །འབུམ་ཕྲག་བདུན་གྱིས་ལྷ་དང་ལྷ་མ་ཡིན་གྱི་བུ་མོའོ། །བྱེ་བས་ནི་བྱ་ཁྱུང་དང་གླང་པོ་ཆེ་ལ་སོགས་པའི་བཟང་པོའི་ཕྱུགས་དང་ཐུན་མོང་གི་ཕྱུགས་རྣམས་ཀྱང་ངོ༌། །གུས་པས་རྒྱུན་མ་ཆད་པར་དུས་རིང་པོར་དཔག་ཏུ་མེད་པ་བཟླས་ནས་གསུམ་པོ་དབང་དུ་བྱེད་དོ། །ལྷ་མོ་རིགས་བྱེད་མའི་སྒྲུབ་པའི་ཐབས་རྫོགས་སོ། །པཎྜི་ཏ་དོན་ཡོད་རྡོ་རྗེ་དང༌། ཁམས་པ་ལོ་ཙཱ་བ་དགེ་སློང་བ་རིས་བསྒྱུར་བའོ།།