རིགས་བྱེད་མའི་སྒྲུབ་ཐབས།
རྒྱ་གར་སྐད་དུ། ཀུ་རུ་ཀུ་ལླེ་སཱ་དྷ་ནཾ། བོད་སྐད་དུ། རིགས་བྱེད་མའི་སྒྲུབ་ཐབས། འཕགས་མ་རིགས་བྱེད་མ་ལ་ཕྱག་འཚལ་ལོ། །ལྟེ་བའི་དབུས་སུ་གྲུ་གསུམ་མེའི་དཀྱིལ་འཁོར། །དེའི་དབུས་སུ་བནྡུ་ཀའི་མེ་ཏོག་ལྟ་བུ་འདབ་མ་བཞི་པའོ། །དེའི་སྟེང་དུ་ཧྲཱིཿབྶྐལ་པའི་མེ་བཞིན་དུ་འབར་བའོ། །དེ་ཡོངས་སུ་གྱུར་པ་ལས་བདག་ཉིད་རིགས་བྱེད་མའི་གཟུགས་སུ་བསམ་པར་བྱ་སྟེ། ཡི་དགས་ཀྱི་གདན་ལ་གནས་པ། སྐྲ་ཁམ་པ་གྱེན་དུ་འགྲེང་བ། ཐོད་པའི་དབུ་རྒྱན་ཅན། སྟག་གི་པགས་པའི་ཤམ་ཐབས་ཅན་མ། མགོ་བོའི་ཕྲེང་བས་རྣམ་པར་བརྒྱན་མ། ཕྱག་བཞི་མ་གཡས་ན་མདའ་དང་ལྕགས་ཀྱུ་འཆང་བ། གཡོན་ན་གཞུ་དང་ཨུཏྤལ་དམར་པོའི་སྟེང་ན་ཐོད་པ་ཁྲག་གིས་ཡོངས་སུ་བཀང་བ་སྤྱན་གསུམ་པ། རྒྱན་ཐམས་ཅད་ཀྱིས་བརྒྱན་པ། ན་བཟའ་དམར་པོ་བསྣམས་པ་བསྒོམ་པར་བྱའོ། །ཨོཾ་ཀུ་རུ་ཀུལླེ་ཧྲཱིཿསྭཱཧཱ། བཟླས་པའི་སྔགས་འདི་བསམ་གཏན་དང་ལྡན་པས་བཟླས་པར་བྱའོ། །ཨོཾ་ཨཱཿཧྲཱིཿཧཱུཾ་ཧྲཱི་ཧཱུཾ་ཛཾ། རིགས་བྱེད་མའི་སྒྲུབ་ཐབས་རྫོགས་སོ། །པཎྜི་ཏ་དོན་ཡོད་རྡོ་རྗེ་དང༌། ཁམས་པ་ལོ་ཙཱ་བ་དགེ་སློང་བ་རིས་བསྒྱུར་ཅིང་ཞུས་སོ། །