ཐེག་པ་ཆེན་པོའི་ལམ་གྱི་རིམ་པ།
སྐལ་པ་བཟང་པོའི་རྡོ་རྗེ།
རྒྱ་གར་སྐད་དུ། མ་ཧཱ་ཡཱ་ན་པ་ཐ་ཀྲ་མ། བོད་སྐད་དུ། ཐེག་པ་ཆེན་པོའི་ལམ་གྱི་རིམ་པ། དཔལ་འཇམ་པའི་མགོན་ལ་ཕྱག་འཚལ་ལོ། །དཔལ་ལྡན་མགོན་པོ་ཀུན་རང་བཞིན། །རྣམ་སྣང་མཇད་ལ་ཕྱག་འཚལ་ཏེ། །སྐལ་ཆེན་དང་ལྡན་དགའ་བའི་ཕྱིར། །ཐག་ཆེན་ལམ་རིམ་བཤད་པར་བྱ། །གང་ཞིག་མི་ཁོམ་གནས་སྤངས་ཏེ། །ཆོས་སྤྱོད་སྐལ་བ་ལྡན་པའི་ཚེ། །བདག་ཉིད་བརྩོན་པར་མི་བྱེད་པ། །འཆི་བའི་སྡུག་བསྔལ་གྱིས་ཉེན་ཅིང༌། །བཞིན་གྱུར་མདངས་ཡལ་བཀྲག་བོར་ཚེ། །བདག་ལ་འགྱོད་པར་ཅིས་མི་འགྱུར། །འཚོ་བ་ཕྲ་མོའི་
ཆེད་དག་ཏུ། །སྡུག་བསྔལ་ཆེན་པོ་བཟོད་གྱུར་ན། །སྡུག་བསྔལ་ཀུན་དང་བྲལ་འདོད་པས། །བཟོད་པ་ཆེན་པོ་ཅིས་མི་བསྟེན། །དེ་བས་སྡུག་བསྔལ་འདོར་འདོད་རྣམས། །ཐེག་ཆེན་ལམ་ལ་བརྩོན་པ་དང༌། །དགེ་པའི་བཤེས་ལ་བསྙེན་བཀུར་ཞེས། །བདག་ནི་ཁྱེད་ལ་དེ་སྐད་གདམས། །ལྔ་བརྒྱ་ཐ་མའི་དུས་ཀྱི་ཚེ། །སྙིགས་མ་ལྔ་ཡི་སེམས་ཅན་རྣམས། །ཐེག་ཆེན་སྐལ་ལྡན་ངོ་མཚར་ཆེ། །དེ་བས་སྤྲོ་བ་ཆེན་པོ་བསྐྱེད། །དེ་ལ་ཐེག་ཆེན་རྣམ་གཉིས་ཏེ། །ཕ་རོལ་ཕྱིན་སོགས་ཐེག་ཆེན་དང༌། །ཐེག་པ་ཆེན་པོ་གསང་སྔགས་ཏེ། །དེ་དོན་བསྡུས་རྒྱས་ཤིན་ཏུ་རྒྱས། །ངོ་བོ་ལ་སོགས་བརྗོད་པར་བྱ། །དད་སོགས་བཅས་རྣམས་མཉན་པར་གྱིས། །གང་ཞིག་ཕ་རོལ་ཕྱིན་འདོད་པ། །ཆོ་ག་ལྔ་ཡི་རིམ་པ་ཡིས། །ལམ་རྣམས་ལ་ནི་བགྲོད་བྱ་སྟེ། །ཕ་རོལ་ཕྱིན་སོགས་ལྡན་པར་རོ། །སེམས་བསྐྱེད་སྡོམ་པ་ནོད་པ་དང༌། །དེ་བསྲུང་མཚན་ཉིད་ཤེས་བྱ་དང༌། །སེམས་བསྐྱེད་སྤྱོད་པ་དག་པ་སྟེ། །འདི་ནི་ཆོ་ག་ལྔར་འདོད་དོ། །བསྡུས་པའི་ཚིགས་སུ་བཅད་པའོ། །ད་ནི་དེ་ཉིད་རྒྱས་པར་བསྟན་པར་བྱ་སྟེ། དེ་ཡང་དང་པོ་རིགས་དང་ལྡན་པའི་གང་ཟག་གིས། ཡང་དག་པའི་དགེ་བའི་བཤེས་གཉེན་ལ། བྱང་ཆུབ་མཆོག་ཏུ་སེམས་བསྐྱེད་པར་བྱ་ཞིང་སྔོམ་པ་ནོད་པར་བྱའོ། །དེ་ནས་དེ་མི་ཉམས་པར་བསྲུང་བ་ལ་འབད་པར་བྱའོ། །དེ་ལྟར་སྣོད་དུ་རུང་བ་དང་ཐོས་པའི་ཤེས་རབ་ཀྱིས་ཐེག་པ་ཆེན་པོ་ཤེས་རབ་ཀྱི་ཕ་རོལ་ཏུ་ཕྱིན་པ་ལ་སོགས་པ་མཉན་ནས། སྤང་པར་བྱ་བ་དང༌། སྤོང་བྱེད་དང༌། སྤང་བའི་ཐབས་དང༌། སྤངས་པའི་འབྲས་བུ་ལ་སོགས་པའི་མཚན་ཉིད་ཤེས་པར་བྱའོ། །དེ་ནས་སེམས་བསྐྱེད་པར་བྱ་སྟེ། དེ་ཡང་ཡན་ལག་རྣམ་པ་ལྔའོ། །དེ་ལ་ཡན་ལག་ལྔ་ནི། ལམ་དང་ལམ་གྱི་གྲོགས་རྒྱུད་ལ་བསྐྱེད་པ་དང༌། དེའི་ཡུལ་དང༌། སྤང་བར་བྱ་བ་དང༌། སྤོང་པའི་ཐབས་དང༌། ལམ་དེས་སྤངས་པའི་འབྲས་བུའོ། །དེ་ལ་ལམ་ནི་ཚོགས་ཀྱི་ལམ་དང༌། སྦྱོར་བའི་ལམ་དང༌། མཐོང་བའི་ལམ་དང༌། བསྒོམ་པའི་ལམ་མོ། །ལམ་གྱི་ཡན་ལག་ནི་ཞི་གནས་དང༌། ལྷག་མཐོང་རྣམ་པ་གཉིས་སོ། །ཡུལ་ནི་འཇུག་པའི་ཡུལ་དང༌། དམིགས་པའི་ཡུལ་རྣམ་པ་གཉིས་སོ། །སྤང་བར་བྱ་བ་ནི་ཉོན་མོངས་པའི་སྒྲིབ་པ་དང༌། ཤེས་བྱའི་སྒྲིབ་པའོ། །སྤང་
བའི་ཐབས་ནི་ལམ་གྱི་རིམ་པ་བཞིན་དུ་བྱ་སྟེ། སྤྱང་བྱ་ཆེན་པོ་གཉེན་པོ་ཆུང་དུས་སྤང་ལ། སྤང་བྱ་ཆུང་དུ་གཉེན་པོས་སྤོང་བའོ། །སྤངས་པ་ལས་འབྲས་བུ་རྣམ་པ་གཉིས་འབྱུང་ངོ༌། །སྤྱོད་པ་དག་པར་བྱ་བ་ནི་རྣམ་པ་གཉིས་ཏེ། འགྲོ་བ་ལ་སོགས་པའི་གནས་སྐབས་དང༌། མཉམ་པར་མ་བཞག་པའི་གནས་སྐབས་སོ། །དེ་ལྟར་རྒྱས་པར་བསྟན་ནས་ཤིན་ཏུ་རྒྱས་པར་བསྟན་པར་བྱ་བའི་ཕྱིར། བྱང་ཆུབ་ཏུ་སེམས་བསྐྱེད་པའི་ངོ་བོ་ལ་སོགས་པ་བརྗོད་པར་བྱ་སྟེ། བྱང་ཆུབ་ཏུ་སེམས་བསྐྱེད་པའི་ཡུལ་ནི་གཞན་གྱི་དོན་ནོ། །ངོ་བོ་ཡང་དག་པར་རྫོགས་པའི་བྱང་ཆུབ་འདོད་པའོ། །དབྱེ་བ་ནི་རྒྱས་པར་དབྱེ་ན་ཉི་ཤུ་དང་གཉིས་སོ། །བསྡུ་ན་རྣམ་པ་བཞིའོ། །ཤིན་ཏུ་བསྡུ་ན་རྣམ་པ་གཉིས་སོ། །དེ་ལ་ཉི་ཤུ་རྩ་གཉིས་ནི་ཆོས་ཐམས་ཅད་མངོན་པར་བྱང་ཆུབ་འདོད་པས། འདུན་པ་ས་ལྟ་བུ་དང༌། ཕ་རོལ་ཏུ་ཕྱིན་པ་དྲུག་གི་སྤྱོད་པའི་མཚན་ཉིད་དེ་དུས་ཐམས་ཅད་དུ་མི་འགྱུར་བར་འདོད་པས་ན་བསམ་པ་གསེར་ལྟ་བུ་དང༌། བྱང་ཆུབ་ཀྱི་ཕྱོགས་ཀྱི་ཆོས་ལ་སོགས་པ་དེ་དག་འཕེལ་པར་འདོད་པས། ལྷག་པའི་བསམ་པ་ཟླ་བ་ཚེས་པ་ལྟ་བུ་དང༌། རྣམ་པར་མི་རྟོག་པའི་ཡེ་ཤེས་མིའི་ཁྱད་པར་དང་འདྲ་བ་རྟོགས་པས་སྦྱོར་པ་མེ་ལྟ་བུ་དང༌། སེམས་ཅན་ཚད་མེད་པའི་རྒྱུད་ཚིམ་པར་མཛད་པས་སྦྱིན་པའི་ཕ་རོལ་ཏུ་ཕྱིན་པ་གཏེར་ལྟ་བུ་དང༌། ཡོན་ཏན་རིན་པོ་ཆེ་རྣམས་དེ་ལས་འབྱུང་པས་ན་ཚུལ་ཁྲིམས་ཀྱི་ཕ་རོལ་ཏུ་ཕྱིན་པ་རིན་པོ་ཆེའི་འབྱུང་གནས་ལྟ་བུ་དང༌། མི་སྡུག་པའི་མཚན་མ་ཐམས་ཅད་ཀྱིས་མི་བསྐྱོད་པས་ན་བཟོད་པའི་ཕ་རོལ་ཏུ་ཕྱིན་པ་རྒྱ་མཚོ་ཆེན་པོ་ལྟ་བུ་དང༌། ཡང་དག་པའི་ཤེས་པ་ལ་བརྟེན་པ་མི་ཕྱེད་པའི་ཕྱིར་བརྩོན་འགྲུས་ཀྱི་ཕ་རོལ་ཏུ་ཕྱིན་པ་རྡོ་རྗེ་ལྟ་བུ་དང༌། དམིགས་པ་ཐམས་ཅད་ཀྱི་རྣམ་པར་གཡེང་བས་བསྒུལ་བར་མི་ནུས་པས་ན་བསམ་གཏན་གྱི་ཕ་རོལ་ཏུ་ཕྱིན་པ་རི་བོ་ལྟ་བུ་དང༌། སྒྲིབ་པ་གཉིས་ཀྱི་ནད་རབ་ཏུ་ཞི་བར་མཛད་པས་ན་ཤེས་རབ་ཀྱི་ཕ་རོལ་ཏུ་ཕྱིན་པ་སྨན་ལྟ་བུ་དང༌། གནས་སྐབས་ཐམས་ཅད་དུ་སེམས་ཅན་ཐམས་ཅད་ཀྱི་དོན་ཡོངས་སུ་མི་སྤོང་བས་ཐབས་ཀྱི་ཕ་རོལ་ཏུ་ཕྱིན་པ་བླ་མ་ལྟ་བུ་དང༌། སྨོན་ལམ་ཇི་ལྟ་བུའི་འབྲས་བུས་དོན་མཛད་པས་ན་སྨོན་ལམ་གྱི་ཕ་རོལ་ཏུ་ཕྱིན་པ་ཡིད་བཞིན་གྱི་ནོར་བུ་ལྟ་བུ་
དང། གདུལ་བྱའི་སྐྱེ་བོ་རྣམས་ཡོངས་སུ་སྨིན་པར་བྱེད་པས་ན་སྟོབས་ཀྱི་ཕ་རོལ་ཏུ་ཕྱིན་པ་ཉི་མ་ལྟ་བུ་དང༌། གདུལ་བྱའི་སྐྱེ་བོ་རྣམས་ཀྱི་ཡིད་དགའ་བར་བྱེད་པའི་ཆོས་སྟོན་པས་ན་ཡེ་ཤེས་ཀྱི་ཕ་རོལ་ཏུ་ཕྱིན་པ་དབྱངས་སྙན་པ་ལྟ་བུ་དང༌། མཐུ་ཐོགས་པ་མེད་པའི་མངོན་པར་ཤེས་པ་དང་ལྷན་ཅིག་པར་རྟོགས་པ་ནི། །གཞན་གྱི་དོན་ལྷུར་མཛད་པས་ན་རྒྱལ་པོ་ཆེན་པོ་ལྟ་བུ་དང༌། བསོད་ནམས་དང་ཡེ་ཤེས་ཀྱི་ཚོགས་དང་ལྷན་ཅིག་པར་རྟོགས་པ་ནི། མཛོད་ལྟ་བུ་དང༌། བྱང་ཆུབ་ཀྱི་ཕྱོགས་ཀྱི་ཆོས་དང་ལྷན་ཅིག་པར་རྟོགས་པ་ནི། འཕགས་པ་ཐམས་ཅད་ཀྱི་རྗེས་སུ་འགྲོ་ཞིང་བཞུད་པས་ལམ་ཆེན་པོ་ལྟ་བུ་དང༌། །ཞི་གནས་དང་ལྷག་མ་ཐོང་དང་ལྷན་ཅིག་པར་རྟོགས་པ་ནི། །འཁོར་བ་དང་མྱ་ངན་ལས་འདས་པར་མི་ལྟུང་བར་བདེ་བླག་ཏུ་འགྲོ་བས་བཞོན་པ་ལྟ་བུ་དང༌། །གཟུངས་དང་སྤོབས་པ་དང་ལྷན་ཅིག་བར་རྟོགས་པ་ནི། བསྟན་པ་མཐའ་ཡས་པ་འཛིན་ཅིང་མི་ཟད་པས་བཀོད་མ་ལྟ་བུ་དང༌། ཆོས་ཀྱི་དབྱིངས་དང་ལྷན་ཅིག་པར་རྟོགས་པ་ནི། ཐར་པ་འདོད་པ་རྣམས་ཀྱིས་ཐོས་ན་དགའ་བ་ཡིན་པས་སྒྲ་བརྙན་ལྟ་བུ་དང༌། བགྲོད་པ་གཅིག་པའི་ལམ་དང་ལྷན་ཅིག་བར་རྟོགས་པ་ནི། ཐམས་ཅད་ཀྱི་རྒྱུ་གཅིག་བུ་ཡིན་པའི་ཕྱིར། རང་གི་ངང་གིས་འཇུག་པའི་ཕྱིར་ཆུ་བོའི་རྒྱུན་ལྟ་བུ་དང༌། ཆོས་ཀྱི་སྐུ་དང་ལྷན་ཅིག་པར་རྟོགས་པ་ནི། །དོན་གྱི་བྱ་བ་ཐམས་ཅད་དེ་ལ་རིག་ལས་པས་སྤྲིན་ལྟ་བུའོ། །དེ་ལྟར་ཉི་ཤུ་རྩ་གཅིག་པོ་དེ་ཉིད་བཞིར་བསྡུ་སྟེ། དེ་ཡང་འདུན་པ་ལ་སོགས་པ་གསུམ་ནི། ལས་དང་པོ་པའི་གནས་སྐབས་ཏེ། ཆུང་དང་འབྲིང་དང་ཆེན་པའོ། །སྦྱོར་བ་ནི་ངེས་པར་འབྱེད་པའི་གནས་སྐབས་སོ། །སྦྱིན་པ་ལ་སོགས་པ་བཅུ་ནི་རྒྱུའི་གནས་སྐབས་སོ། །མངོན་པར་ཤེས་པ་ལ་སོགས་པ་བརྒྱད་ཀྱིས་ནི་འབྲས་བུ་སྟེ། དེ་ཡང་དང་པོ་ལྔ་ནི་ཁྱད་པར་གྱི་ལམ་མོ། །འོག་མ་གསུམ་ནི་སྦྱོར་བ་དང༌། དངོས་དང་མཇུག་གི་སྒོ་ནས་སངས་རྒྱས་ཀྱི་སས་བསྡུས་པ་སྟེ། སེམས་གང་གིས་དང་པོའི་ལས་ལ་མངོན་པར་སྦྱོར་བ་དང༌། གང་གི་ལས་རྫོགས་པར་བྱེད་པ་དང༌། ལས་རྫོགས་པར་བྱས་པ་ལས་ལེགས་པར་བྱས་པས་སོ་ཞེས་བྱ་བ་ལ་སོགས་པ་དང་གོ་རིམས་བཞིན་ནོ། །དེ་དག་ཉིད་གཉིས་སུ་བསྡུས་ཏེ། །དང་
པོ་གསུམ་ནི་སྨོན་པའི་སེམས་སོ། །ལྷག་མ་བཅུ་དགུ་ནི་འཇུག་པའི་སེམས་ཏེ། །དེ་ལ་སྨོན་པ་ནི་དོན་དུ་གཉེར་པའི་རྒྱུ་སྟེ། །དེས་ན་འདིར་གཞན་གྱི་དོན་གྱི་ཕྱིར་སངས་རྒྱས་སུ་འགྲུབ་པར་གྱུར་ཅིག་ཅེས་གསོལ་པ་འདེབས་པ་ནི་སྨོན་པའོ། །འཇུག་པའི་སེམས་ནི་སྡོམ་པ་འཛིན་པ་སྔོན་དུ་འགྲོ་བས་སྤྱིན་པ་ལ་སོགས་པ་ཉམས་སུ་ལེན་པ་ནི་འཇུག་པའི་དོན་ཡིན་ནོ། །དེ་ལ་སྡོམ་པའི་སེམས་པ་སྟེ། ལྔ་ཀུན་དུ་འགྲོ་བའི་སེམས་པ་ཉིད་དོ། །དེའི་མཚན་ཉིད་ནི་བསྟན་དུ་མེད་པ་ཐོགས་པ་མེད་པའོ། །དབྱེ་བ་ནི་ཐུན་མོང་སྟེ། སྲོག་གཅོད་པ་སྤོང་བ་ལ་སོགས་པ་དང༌། ཐུན་མོང་མ་ཡིན་པ་སྟེ། གནོད་སེམས་ལ་སོགས་པ་སྤོང་ཞིང་གཞན་གྱི་དོན་ལ་འབད་པ་ལ་སོགས་པ་ཐམས་ཅད་དོ། །སྡོམ་པའི་སེམས་བ་དེས་ལུས་ངག་ཡིད་གསུམ་བྱ་བ་མ་ཡིན་པའི་ལས་ལ་མི་འཇུག་པས་སྡོམ་པའོ། །སེམས་བསྐྱེད་ཅིང་སྡོམ་པ་མནོད་པ་ཡང༌། བླ་མ་བྱང་ཆུབ་ཏུ་སེམས་བསྐྱེད་ཅིང༌། སྡོམ་པ་ལ་གནས་པ་མཁས་པ་ནུས་པ་དང་ལྡན་པ་ལས་བླང་ངོ༌། །དེ་མེད་ན་སངས་རྒྱས་དང་བྱང་ཆུབ་སེམས་དཔའ་རྣམས་ཡིད་ཀྱིས་དམིགས་ལ་བླང་བར་བྱའོ། །སེམས་བསྐྱེད་ཅིང་སྡོམ་བ་ནོད་པའི་ཆོ་གའོ། །དེ་ནས་བསྲུང་བར་བྱ་སྟེ་སྲོག་གི་ཕྱིར་ཡང་སྡོམ་པ་ཉམས་པར་མི་བྱ་སྟེ། བདག་ཉིད་ཤི་བ་ནི་བླའི་ཚེ་རབས་ཐམས་ཅད་དུ་ཤ་བསགས་ན་ནི་རི་རབ་བས་ཆེ་ལ། ཁྲག་བསགས་ན་ནི་རྒྱ་མཚོ་བས་མང་ཞིང༌། རུས་བསགས་པར་གྱུར་ན་ནི་རྩི་ཤིང་བས་མང་ཞིང༌། དོན་མེད་པར་འཁྱམས་ནས་ཚེ་འདིའི་བར་དུ་མི་གཙང་བའི་ཕུང་པོ་སྣ་ཚོགས་པ་བླངས་ཤིང༌། འཁོར་བའི་སྡུག་བསྔལ་ཆེན་པོ་ཡང་དང་ཡང་དུ་ཉམས་སུ་མྱོང་པར་གྱུར་པས། །སྡོམ་པ་ནི་ཉམས་པར་མི་བྱའོ། །སྡོམ་པ་ཡང་ཇི་ལྟར་བླ་མ་ལས་བླངས་པ་བཞིན་དུ་བསྲུང་བ་ལ་འབད་པར་བྱའོ། །དེ་མི་ཉམས་པར་བསྲུང་བའི་ཆོ་གའོ། །དེ་ལྟར་ཐེག་པ་ཆེན་པོའི་སྣོད་དུ་རུང་བ་དེ་ཐེག་པ་ཆེན་པོའི་གདམས་ངག་མཉན་ནས། ཐེག་པ་ཐུན་མོང་གི་ཆོས་དང༌། ཐུན་མོང་མ་ཡིན་པའི་ཆོས་ཀྱི་སྤང་བྱ་ལ་སོགས་པའི་མཚན་ཉིད་ཐམས་ཅད་ཤེས་པར་བྱ་སྟེ། མཚན་ཉིད་མ་ཤེས་པར་ནི་བསྒྲུབ་པར་མི་ནུས་ཏེ། དམུས་ལོང་གིས་མར་ལ་སོགས་པ་བཞིན་ནོ། །དེ་བས་ན་ཐོས་པའི་ཤེས་རབ་
སྔོན་དུ་སོང་བས་མཚན་ཉིད་ཤེས་པར་བྱའོ། །མཚན་ཉིད་ཡོངས་སུ་ཤེས་པར་བྱ་བའི་ཆོ་གའོ། །དེ་ལྟར་སྣོད་དུ་རུང་ཞིང་མཚན་ཉིད་ཤེས་པར་བྱས་པ་དེས་སེམས་སྦྱང་བའི་ཕྱིར་ཏིང་ངེ་འཛིན་བསྐྱེད་པར་བྱ་སྟེ། ཐོས་བ་ཙམ་གྱིས་འགྲུབ་པར་མི་འགྱུར་རོ། །དེ་བས་ན་བསྒོམ་པའི་ཤེས་རབ་ཀྱིས་སེམས་སྦྱང་བར་བྱའོ། །དེ་ཡང་ཡན་ལག་རྣམ་པ་ལྔ་སྟེ། རིགས་དང་ལྡན་པའི་གང་ཟག་གིས་ལམ་རྒྱུད་ལ་བསྐྱེད་པ་དང༌། དེ་ཡི་ཡུལ་དང༌། སྤང་བར་བྱ་བ་དང༌། སྤང་བའི་ཐབས་དང༌། སྤངས་པའི་འབྲས་བུའོ། །ལམ་རྒྱུད་ལ་བསྐྱེད་པ་ལ་ཡང་ལམ་གྱི་གྲོགས་ཞིག་ནས་དང༌། །ལྷག་མཐོང་ལ་བསླབ་པ་དང༌། །དེ་ནས་ལམ་དངོས་ཏེ་ཐབས་དང་ཤེས་རབ་ལ་བསླབ་པའོ། །དེ་ལ་ཞི་གནས་ནི་དངོས་པོ་གང་ཡང་རུང་བ་ཅིག་ལ་ངེས་པར་བྱ་སྟེ། སེམས་ཀྱི་རྒྱུན་གྱི་སྐད་ཅིག་མ་དེ་ཉིད་དུ་ཡང་དང་ཡང་གཏད་པར་བྱའོ། །གང་གི་ཡུལ་དེ་ལ་སེམས་གནས་པར་གྱུར་པ་དེའི་ཚེ། ཞི་གནས་རྫོགས་པ་ཡིན་པར་ཤེས་པར་བྱའོ། །ལྷག་མཐོང་ནི་ཞི་གནས་ཀྱི་འབྲས་བུ་ཡིན་ཏེ། དོན་དེ་ཉིད་ལ་དཔྱོད་པའོ། །ལྷག་མཐོང་གི་འབྲས་བུ་ནི་ཟུང་དུ་འབྲེལ་བ་སྟེ། ཡུལ་གང་ལ་ཡང་མི་གནས་པས་ཡུལ་དེ་ཉིད་བྱེ་བྲག་ཏུ་མཐོང་ལ། དེ་ཉིད་ཀྱི་ཚེ་སེམས་རྩེ་གཅིག་ཏུ་གྱུར་པས་དམིགས་པ་དུ་མ་ལ་རྒྱུག་པ་རབ་ཏུ་ཞི་བར་གནས་པའོ། །གལ་ཏེ་རྣལ་འབྱོར་པ་དེ་འདོད་ཆགས་ལ་སོགས་པས་སེམས་གཡེང་བར་གྱུར་ན་འདོད་ཆགས་ཀྱི་གཉེན་པོར་ནི་མི་སྡུག་པ་སྟེ། མི་གཙང་བ་ལ་སོགས་པ་སྒོམ་པའོ། །དེ་བཞིན་དུ་ཞེ་སྡང་གི་གཉེན་པོར་ནི་བྱམས་པའོ། །གཏི་མུག་གི་གཉེན་པོར་ནི་རྟེན་ཅིང་འབྲེལ་པར་འབྱུང་བའོ། །ང་རྒྱལ་གྱི་གཉེན་པོར་ནི་ཁམས་ཀྱི་རབ་ཏུ་དབྱེ་བའོ། །བྱིང་བའི་གཉེན་པོར་སྣང་བའི་འདུ་ཤེས་དང༌། སངས་རྒྱས་ལ་སོགས་པའི་ཡོན་ཏན་ཡིད་ལ་བྱེད་པའོ། །རྒོད་པའི་གཉེན་པོར་ནི་མི་རྟག་པ་ཡིད་ལ་བྱེད་པས་སྔོན་དགོད་པ་དང་རྩེ་ཞིང་དགའ་བ་རྗེས་སུ་དྲན་བ་དེ་ཡང་ཞི་བར་བྱའོ། །སེམས་དེར་མི་དགའ་བར་གྱུར་པའི་ཚེ་ནི་མི་དགའ་བའི་སྐྱོན་བསམ་ཞིང་ཏིང་ངེ་འཛིན་གྱི་ཡོན་ཏན་ལ་བསམས་པས་དེ་ཡང་ཞི་བར་བྱའོ། །བྱིང་རྒོད་ལ་སོགས་པ་དང་བྲལ་ནས་སེམས་ཆ་མཉམ་པར་འཇུག་ཅིང་གནས་པར་གྱུར་པའི་ཚེ། །བསྒྲིམས་པ་གློད་ལ་
བཏང་སྙོམས་སུ་བྱ་སྟེ། སེམས་མཉམ་པར་འཇུག་པ་ལ་བསྒྲིམས་པར་བྱས་ན་གཡེང་བར་འགྱུར་རོ། །དེ་ལྟར་ཞི་གནས་དང་ལྷག་མཐོང་ལ་སློབ་པའི་གང་ཟག་དེས་གོང་ནས་གོང་དུ་གྱུར་པའི་ལས་ནི་མཚན་མ་མེད་པའི་ཞི་གནས་སོ་སོར་རྟོག་པའི་ཤེས་རབ་ལས་མཚན་མ་མེད་པའི་ལྷག་མཐོང་རྣམ་པར་མི་རྟོག་པའི་ཡེ་ཤེས་སྐྱེ་བར་འགྱུར་རོ། །དེ་ཡང་ལམ་དངོས་ཏེ་ཐབས་དང་ཤེས་རབ་བསྒོམས་པས་སོ། །བསྒོམ་པ་ཡང་རྣམ་པར་དབྱེ་བས་ལྔ་སྟེ། ཚོགས་ཀྱི་ལམ་དང༌། སྦྱོར་བའི་ལམ་དང༌། མཐོང་བའི་ལམ་དང༌། སྒོམ་པའི་ལམ་ས་གཉིས་པ་ནས་བདུན་པ་དང༌། བརྒྱད་པ་ནས་བཅུ་པ་སྟེ། མོས་པས་སྤྱོད་པའི་ས་གསུམ་མོ། །འདིར་མོས་པ་ཞེས་བྱ་བའི་སྒྲ་ནི། བདག་དང་གཞན་གྱི་དོན་ལ་མོས་པ་དང༌། བརྩོན་པ་ཆེ་ཐང་དུ་བྱེད་པས་མོས་པ་སྟེ། སྦྱོར་བའི་ལམ་ནི་མ་ཡིན་པར་དགོངས་སོ། །ཁྱད་པར་གྱི་ལམ་སྟེ། རྡོ་རྗེ་ལྟ་བུའི་ཏིང་ངེ་འཛིན་ཏེ། །དེ་ལ་ཐབས་ནི་སྦྱིན་པ་ལ་སོགས་པའི་ཕ་རོལ་ཏུ་ཕྱིན་པ་གཞན་རྣམས་དང༌། ཚད་མེད་པ་དང༌། དགེ་བའི་ཆོས་ཐམས་ཅད་དོ། །ཤེས་རབ་ནི་ཐབས་དེ་ཕྱིན་ཅི་མ་ལོག་པར་བྱེད་པ་སྟེ། ཆོས་ཐམས་ཅད་སྐྱེ་བ་མེད་པ་སྟོང་པ་ཉིད་ཀྱི་རང་བཞིན་ཤེས་པའོ། །དེ་ལ་ཚོགས་ཀྱི་ལམ་ཐར་པའི་ཆ་དང་མཐུན་པའི་སྐབས་སུ། ལུས་དྲན་པ་ཉེ་བར་གཞག་པ་དང༌། དེ་བཞིན་དུ་ཚོར་བ་དང༌། སེམས་དང་ཆོས་དྲན་པ་ཉེ་པར་གཞག་པ་བཞི་བསྒོམ་པ་སྟེ། དྲན་པ་ཉེ་བར་གཞག་པ་བཞི་དང༌། མི་དགེ་བའི་ཆོས་ཐམས་ཅད་སྐྱེས་པ་མེད་པར་བྱས་པ་དང༌། མ་སྐྱེས་པ་མི་སྐྱེད་པ་དང༌། དགེ་བའི་ཆོས་མ་སྐྱེས་པ་རྣམས་བསྐྱེད་པར་བྱ་བ་དང༌། སྐྱེས་པ་རྣམས་འཕེལ་བར་བྱ་སྟེ། ཡང་དག་པར་སྤོངས་བ་བཞི་དང༌། འདུན་པའི་ཏིང་ངེ་འཛིན་སྤོང་བའི་འདུ་བྱེད་དང་ལྡན་པའི་རྫུ་འཕྲུལ་གྱི་རྐང་པ་དང༌། དེ་བཞིན་དུ་བརྩོན་འགྲུས་དང༌། སེམས་དང་དཔྱོད་པའི་ཏིང་ངེ་འཛིན་སྤོང་བའི་འདུ་བྱེད་དང་ལྡན་པའི་རྫུ་འཕྲུལ་གྱི་རྐང་པ་བཞི་བསྒོམ་པར་བྱའོ། །དེ་ནས་སྦྱོར་བའི་ལམ་ངེས་པར་འབྱེད་པའི་སྐབས་སུ་དབང་པོ་ལྔ་དང༌། སྟོབས་ལྔ་སྟེ། དེ་ཡང་དྲོད་དང་རྩེ་མོའི་དུས་སུ་དད་པ་དང༌། བརྩོན་འགྲུས་དང༌། དྲན་པ་དང༌། ཏིང་ངེ་འཛིན་དང༌། ཤེས་རབ་
ཀྱི་དབང་པོ་སྟེ་ལྔའོ། །དེའི་འོག་ཏུ་བཟོད་པ་དང༌། ཆོས་ཀྱི་མཆོག་གི་དུས་སུ་དད་པ་ལ་སོགས་པ་དེ་ཉིད་སྟོབས་དང་ལྡན་པར་འགྱུར་བ་ལ་སྟོབས་ཞེས་བྱ་སྟེ། དད་པའི་སྟོབས་ལ་སོགས་པ་བསྒོམ་པར་བྱའོ། །དེའི་འོག་ཏུ་མཐོང་བའི་ལམ་སྟེ། བྱང་ཆུབ་ཀྱི་ཡན་ལག་གིས་ཕྱེ་བའོ། །དེ་ཡང་དྲན་པ་ཡང་དག་བྱང་ཆུབ་ཀྱི་ཡན་ལག་དང༌། དེ་བཞིན་དུ་ཆོས་རྣམ་པར་འབྱེད་པ་དང༌། བརྩོན་འགྲུས་དང༌། དགའ་བ་དང༌། ཤིན་ཏུ་སྦྱངས་པ་དང༌། ཏིང་ངེ་འཛིན་དང༌། བཏང་སྙོམས་ཡང་དག་བྱང་ཆུབ་ཀྱི་ཡན་ལག་སྟེ། དེ་ལ་སྡུག་བསྔལ་གྱི་བདེན་པ་དང༌། ཀུན་འབྱུང་གི་བདེན་པ་དང། འགོག་པའི་བདེན་པ་དང༌། ལམ་གྱི་བདེན་པ་སྟེ། བདེན་པ་རྣམ་པ་བཞི་ཆོས་བཅུ་དྲུག་ཏུ་དམིགས་པ་མེད་པར་བསྒོམས་པས་ཤེས་བཟོད་བཅུ་དྲུག་ཏུ་རྟོགས་ནས་མཐོང་བའི་ལམ་ཐོབ་བའོ། །དེའི་འོག་ཏུ་བསྒོམ་པའི་ལམ་སྟེ། ལམ་གྱི་ཡན་ལག་རྣམས་སོ། །དེ་ཡང་ཡང་དག་པའི་ལྟ་བ་དང༌། དེ་བཞིན་དུ་ཡང་དག་པའི་རྟོག་པ་དང༌། ངག་དང་ལས་ཀྱི་མཐའ་དང༌། འཚོ་བ་དང་རྩོལ་བ་དང་དྲན་པ་དང་ཡང་དག་པའི་ཏིང་ངེ་འཛིན་ཏེ། བསྒོམ་པའི་ལམ་ས་གཉིས་ནས་བཅུ་པའི་བར་དུ་རྟོགས་པའོ། །དེ་དག་ཀྱང་ཀུན་རྫོབ་སྒྱུ་མ་ཙམ་དུ་སྤྱོད་པ་ནི་ཐབས་སོ། །དོན་དམ་པར་དེ་དག་ཀྱང་རང་བཞིན་མེད་པར་བསྒོམ་པ་ནི་ཤེས་རབ་པོ། །དེ་བར་ཆད་མེད་པའི་ལམ་རྡོ་རྗེ་ལྟ་བུའི་ཏིང་ངེ་འཛིན་ཞེས་ཀྱང་བྱ། མིང་གི་རྣམ་གྲངས་གཞན་ཡང་ཀུན་དུ་བཟང་པོ་ཞེས་བྱ་བ་ལ་སོགས་པ་སྐྱེད་པར་བྱེད་པའོ། །ལམ་ཞེས་བྱ་བའི་ངོ་བོ་ནི་ཡིད་ཀྱི་རྣམ་པར་ཤེས་པ་སེམས་ལས་བྱུང་བ་དང་བཅས་པ་སྟེ། དེ་ཡང་ཤེས་རབ་ལ་སོགས་པའོ། །འཕགས་པ་ཐམས་ཅད་གཤེགས་པའམ། ཡང་ན་འཕགས་པའི་སར་ཕྱིན་པར་བྱེད་པའི་ཕྱིར་ལམ་ཞེས་བྱའོ། །དེ་ལ་དྲན་པ་ཉེ་བར་གཞག་པ་ནི་ཤེས་རབ་ཀྱི་རང་བཞིན་ནོ། །འདི་དག་གིས་དྲན་པ་ཉེ་བར་གནས་པས་དྲན་པ་ཉེ་བར་གཞག་པའོ། །ཡང་དག་པར་སྤོང་བ་ནི་བརྩོན་འགྲུས་ཀྱི་རང་བཞིན་ནོ། །མི་མཐུན་པའི་ཕྱོགས་ཡང་དག་པར་སྤོང་བ་སྟེ། འདིས་ནང་གི་སེམས་ཡང་དག་པར་འཇོག་པས་ན་ཡང་དག་པར་སྤོང་བ་སྟེ། སྤང་བྱའི་མིང་སྤོང་བྱེད་ལའོ། །རྫུ་འཕྲུལ་གྱི་རྐང་པ་
ནི་ཏིང་ངེ་འཛིན་གྱི་རང་བཞིན་ནོ། །རྫུ་འཕྲུལ་གྱི་རྒྱུར་གྱུར་པས་རྫུ་འཕྲུལ་གྱི་རྐང་བ་སྟེ། མངོན་པར་ཤེས་པ་ལ་སོགས་པའི་རྒྱུ་ཞེས་བྱའོ། །ངེས་པར་འབྱེད་པའི་ཆ་དང་མཐུན་པ་རྣམས་ནི་ཏིང་ངེ་འཛིན་དང་ཤེས་རབ་མཚུངས་པར་ལྡན་པའི་རང་བཞིན་ནོ། །ཐར་པའི་ཆ་དང་མཐུན་པའི་དགེ་བའི་རྩ་བ་བསྐྱེད་པ་ལ་དབང་བྱེད་པས་དབང་པོའོ། །མི་མཐུན་པའི་ཕྱོགས་བསྲབས་པའི་ཕྱིར་དེ་དག་ཉིད་སྟོབས་སོ། །དེ་ལ་མི་མཐུན་པའི་ཕྱོགས་ནི་མ་དད་པ་དང༌། ལེ་ལོ་དང༌། བརྗེད་ངས་པ་དང༌། རྣམ་པར་གཡེང་བ་དང༌། ཤེས་བཞིན་མད་པ་རྣམས་སོ། །དབང་པོའི་སྐབས་ནི་མ་བསྲབས་པས་འདྲེའོ། །འདི་ནི་འདྲེ་བ་མེད་པའོ། །དེ་ཡང་དད་པ་ལ་སོགས་པ་ནི་གསུམ་སྟེ། ཆུང་དུ་དང༌། འབྲིང་བོ་དང༌། ཆེན་པོའོ། །དེ་ཡང་ཆུང་དུ་ནི་དྲོད་ཀྱི་གནས་སྐབས་སོ། །འབྲིང་པོའི་རྩེ་མོའི་དུས་སོ། །ཆེན་པོ་ཡང་བཞིན་དབྱེ་སྟེ། ཆུང་ངུ་དང༌། འབྲིང་པོ་དང༌། ཆེན་པོའི་བཟོད་པ་ཆུང་དུ་དང༌། འབྲིང་དང༌། ཆེན་པོ་དང༌། གོ་རིམས་སུ་སྦྱར་རོ། །ཤིན་ཏུ་ཡང་ཆེན་པོ་ནི་འཇིག་རྟེན་ཆོས་ཀྱི་མཆོག་གོ །དེ་ལ་དྲོ་བར་གྱུར་པ་ནི། དཔེར་ན་གཙུབ་ཤིང་གཙུབས་པ་ལས་ཐོག་མར་མེའི་མཚན་མ་དྲོ་བ་འབྱུང་ངོ༌། །དེ་བཞིན་དུ་འཕགས་པའི་མེ་ལྟ་བུ་སྐྱེ་པའི་དང་པོ་ཡིན་པས་དྲོ་བ་ཞས་བྱ་སྟེ། དཔེའི་སྒོ་ནས་སོ། །དགེ་བའི་རྩ་བརྒྱ་ཆེན་པོ་གཡོ་བའི་རྩེ་མོར་ཕྱིན་པས་རྩེ་མོའོ། །བདེན་པའི་དོན་ལ་བཟོད་པས་བཟོད་པའོ། །ཟག་པ་དང་བཅས་པས་འཇིག་རྟེན་ནོ། །ཟག་པ་དང་བཅས་པ་གཞན་པས་མཆོག་ཏུ་གྱུར་པས་མཆོག་སྟེ། དེ་མ་ཐག་ཏུ་མཐོང་བའི་ལམ་སྒྱེ་བས་སོ། །མཐོང་བའི་ལམ་ནི་མ་དམིགས་པའི་ཏིང་ངེ་འཛིན་ལ་སོགས་པ་བྱང་ཆུབ་ཀྱི་ཡན་ལག་དང་མཚུངས་པ་ཉིད་རང་བཞིན་ཏེ། དེ་ཡང་རྣམ་པར་གྲོལ་བ་ནི་བྱང་ཆུབ་པོ། །ཆོས་རྣམ་པར་འབྱེད་པ་ནི་བྱང་ཆུབ་ཀྱི་ཡན་ལག་སྟེ། བར་ཆད་མེད་པའི་ལམ་དུ་གཏོགས་པའོ། །དྲན་པ་ལ་སོགས་པ་དྲུག་ནི་བྱང་ཆུབ་དང་མཐུན་པའི་ཕྱིར་བྱང་ཆུབ་ཀྱི་ཡན་ལག་གོ །དེ་ལ་དྲན་པ་ནི་གནས་ཀྱི་ཡན་ལག་ཆོས་རྣམ་པར་འབྱེད་པ་ནི་རང་བཞིན་གྱི་ཡན་ལག་བརྩོན་འགྲུས་ནི་ངེས་པར་འབྱུང་བའི་ཡན་ལག་དགའ་བ་ནི་ཕན་ཡོན་གྱི་ཡན་ལག་ཤིན་ཏུ་སྦྱངས་པ་ནི་ཉོན་མོངས་པ་མེད་
པའི་གཞིའི་ཡན་ལག །ཏིང་ངེ་འཛིན་ནི་ཉོན་མོངས་པ་མེད་པའི་གནས་ཀྱི་ཡན་ལག །བཏང་སྙོམས་ནི་ཉོན་མོངས་པ་མེད་པའི་ངོ་བོའི་ཡན་ལག་སྟེ། གོ་རིམས་བཞིན་དུ་སྟེ། དམིགས་པ་དེ་ལས་མི་གཡེང་བའི་ཕྱིར་དང༌། བྱང་ཆུབ་ནི་ཤེས་པ་རྣམ་པར་གྲོལ་བའི་ངོ་བོ་ཉིད་ཡིན་པའི་ཕྱིར་དང༌། སོ་སོའི་སྐྱེ་བོའི་ས་ལས་འདའ་བའི་ཕྱིར་དང༌། ལུས་དང་སེམས་ལ་ཕན་འདོགས་པའི་ཕྱིར་དང༌། ཀུན་ནས་ཉོན་མོངས་པའི་གཞིའི་གཉེན་པོར་གྱུར་པའི་ཕྱིར་དང༌། སེམས་མཉམ་པར་བཞག་ན་ཡང་དག་པ་ཇི་ལྟ་བ་བཞིན་ཤེས་པ་ཉོན་མོངས་པ་སྤོང་བའི་ཕྱིར་དང༌། བྱིང་བ་དང་རྒོད་པའི་གཉེན་པོ་སྟེ། སེམས་མཉམ་པ་དང༌། རྣལ་དུ་འཇུག་པ་དང༌། ལྷུན་གྱིས་གྲུབ་པའི་ཕྱིར་རོ། །དེ་ལ་མཐོང་བའི་ལམ་སྐད་ཅིག་མ་བཅུ་དྲུག་སྟེ། ཡོན་ཏན་གྱི་སྒོ་ནས་སོ། །སྐད་ཅིག་མ་བཞི་སྟེ་ཆོས་ཙམ་གྱིས་སོ། །སྐད་ཅིག་མ་གཅིག་སྟེ་ངོ་བོ་ཉིད་ཀྱི་སྒོ་ནས་སོ། །དེ་ལ་སྐད་ཅིག་མ་བཅུ་དྲུག་ནི། སྡུག་བསྔལ་དང༌། ཀུན་འབྱུང་དང༌། འགོག་པ་དང་ལམ་རྣམས་ལ་ཆོས་ཤེས་པའི་བཟོད་པ་དང༌། ཆོས་ཤེས་པ་དང༌། རྗེས་སུ་ཤེས་པའི་བཟོད་པ་དང༌། རྗེས་སུ་ཆོས་ཤེས་པ་སྟེ། བཞི་བཞིར་བྱས་པས་བཅུ་དྲུག་གོ །དེ་ཡང་སྡུག་བསྔལ་གྱི་ཆོས་ནི་མི་རྟག་པ་ལ་སོགས་པའོ། ཀུན་འབྱུང་གི་ཆོས་ནི་རྒྱུ་ལ་སོགས་པའོ། །འགོག་པ་ནི་ཞི་བ་ལ་སོགས་པའོ། །ལམ་ནི་རིགས་པའི་སོགས་པ་སྟེ། དེ་དག་ལ་རྟག་པ་དང༌། མི་རྟག་པ་དང༌། སྡུག་བསྔལ་བ་དང༌། སྡུག་བསྔལ་ཡང་མ་ཡིན་པ་དང༌། སྟོང་པ་དང༌། མི་སྟོང་པ་དང༌། བདག་དང་བདག་མེད་པ་མི་དམིགས་པ་དང༌། དེ་བཞིན་དུ་ཀུན་འབྱུང་བ་དང༌། ཀུན་འབྱུང་བ་མ་ཡིན་པ་ལ་སོགས་པ་མི་དམིགས་པའི་རྣམ་པར་ཤེས་ཤིང་བཟོད་པས་སོ། །ཆོས་ཤེས་པ་ནི་བདག་གིས་སྤང་བྱ་སྤངས་ནས་ཐོབ་བྱ་ཐོབ་སྙམ་སྟེ། རྣམ་པར་གྲོལ་བ་མངོན་དུ་བྱེད་པའོ། །རྗེས་ཀྱི་བཟོད་ཤེས་གཉིས་ཀྱིས་ནི་ཇི་ལྟར་ན་ཡུལ་མི་དམིགས་པ་བཞིན་དུ། དེ་ལ་མི་དམིགས་པའི་ཤེས་པ་ཡང་དེ་བཞིན་དུ་ཤེས་ཤིང་བཟོད་པ་དང༌། ཤེས་པ་དེ་ངེས་པར་འཛིན་པ་སྟེ། བདེན་པར་རྟོགས་པའོ། །མདོར་ན་དང་པོ་གཉིས་ནི་ཡུལ་ལ་དམིགས་པའི་སྒོ་ནས་ཡུལ་མི་དམིགས་པའི་རྣམ་པར་མཐོང་བ་དང་དེ་ངེས་པར་འཛིན་པའོ། །
རྗེས་ཀྱི་གཉིས་ཀྱིས་ནི་ཡུལ་ཇི་ལྟ་བའི་རྗེས་སུ་ཡུལ་ཅན་ཡང་དེ་བཞིན་དུ་རྟོགས་པ་དང༌། དེ་ངེས་པར་འཛིན་པའོ། །མཐོང་བའི་ལམ་སྐད་ཅིག་མ་བཞི་ནི། དག་པ་དང༌། དག་པ་བརྟན་པ་དང༌། གྲོལ་བ་དང༌། གྲོལ་བ་འཛིན་པ་སྟེ། ཤེས་བཟོད་བཞི་དང་གོ་རིམས་བཞིན་ནོ། །གཅིག་ནི་ཆོས་ཀྱི་མཆོག་གི་སྐད་ཅིག་མ་གཅིག་ལ་མཐོང་བའི་ལམ་མངོན་དུ་གྱུར་པའོ། །སྤྱིར་སྦྱོར་བ་དང༌། མཉམ་པར་གཞག་པ་དང༌། རྗེས་ཀྱི་ཤེས་པའམ། ཡེ་ཤེས་ཞེས་གསུམ་དུ་ཤེས་པར་བྱའོ། །སྔོན་དུ་དེ་ཁོ་ན་ཉིད་མ་མཐོང་བ་གཟོད་མཐོང་བས་སོ། །ངེས་པར་འབྱེད་པའི་གནས་སྐབས་ན་ནི་དར་ལས་ཆོད་པ་ལྟ་བུར་བདེན་པ་རྣམས་རྟོགས་སོ། །མཐོང་བའི་ལམ་གྱིས་ནི་དེ་བསལ་བ་ལྟ་བུར་རྟོགས་སོ། །བསྒོམ་པའི་ལམ་གྱིས་ནི་མི་དམིགས་པའི་ཏིང་ངེ་འཛིན་ཡང་དག་པའི་ལྟ་བ་ལ་སོགས་པ་དང་མཚུངས་པར་བཅས་པའོ། །བསྒོམ་པའི་ལམ་ཆུང་ངུ་དང༌། འབྲིང་པོ་དང་ཆེན་པོའི་དབྱེ་བས་རྣམ་པ་དགུའོ། །དེ་ཡང་ཡང་དག་པའི་ལྟ་བས་ནི་མཐོང་བའི་ལམ་གྱིས་རྟོགས་པའི་དོན་བདག་གིས་འདི་ལྟ་བུ་རྟོགས་སོ་ཞེས་དཔྱོད་ཅིང༌། མཐོང་བའི་ལམ་ལ་ལྟ་བས་ཡང་དག་པར་ལྟ་བའོ། །ཡང་དག་པའི་རྟོག་པ་ནི་ཇི་ལྟར་རྟོགས་པ་བཞིན་དུ་རྣམ་པར་འཇོག་པ་སྟེ། ཡང་དག་པའི་ངག་ཀུན་ནས་སློང་བས་གཞན་ལ་རྟོགས་པའི་དོན་དེ་ཉིད་སྟོན་པའོ། །ལས་ཀྱི་མཐའ་ལ་སོགས་པས་ནི་སྲོག་གི་ཕྱིར་ཡང་བྱ་བ་མ་ཡིན་པ་མི་བྱེད་པས། ཚུལ་ཁྲིམས་རྣམ་པར་དག་པ་དང༌། གོས་ལ་གོས་པ་རིགས་པ་དང༌། ཆོད་ཟིན་པར་ཚོལ་བ་དང་མི་མཐུན་པའི་གཉེན་པོར་ལམ་བསྒོམ་པ་དང༌། དྲན་པ་ཤིན་ཏུ་ཉེ་བར་གནས་པ་དང༌། བྱིང་རྒོད་མེད་པ་དང༌། མངོན་པར་ཤེས་པ་ལ་སོགས་པ་ཡོན་ཏན་གྱི་རང་བཞིན་གྱི་མི་མཐུན་པའི་ཕྱོགས་སྤང་བ་སྟེ། གོ་རིམས་བཞིན་ནོ། །མཐོང་བའི་དོན་ཉིད་གོང་ནས་གོང་དུ་བསྒོམ་པའོ། །ཁྱད་བར་གྱི་ལམ་ནི་སྤྱིར་ཀུན་དུ་ཡང་བརྩི་བར་བྱ་སྟེ། དེ་ཡང་སྦྱོར་བའི་ལམ་དང་བར་ཆད་མེད་པའི་ལམ་དང༌། ཁྱད་པར་གྱི་ལམ་སྟེ་བཞིའོ། །དེ་ལ་གང་གིས་ཉོན་མོངས་པ་སྤང་བར་སྦྱོར་བ་དང༌། སྤང་བ་ལ་བར་ཆད་མེད་པ་དང༌། སྤངས་ནས་རྣམ་པར་གྲོལ་བ་མངོན་དུ་བྱེད་པ་དང༌། དེ་ཉིད་
སྔོན་པས་ཁྱད་པར་དུ་གྱུར་པ་ཡིན་པ་སྟེ་གོ་རིམས་བཞིན་ནོ། །འོན་ཀྱང་འདི་ནི་རྡོ་རྗེ་ལྟ་བུའི་ཏིང་ངེ་འཛིན་གྱི་སྐབས་མོས་པས་སྤྱོད་པའི་ས་བཞི་པ་དང་སྦྱར་བར་བྱའོ། །ཡུལ་ནི་རྣམ་པ་གཉིས་ཏེ། འཇུག་པའི་ཡུལ་དང༌། དམིགས་པའི་ཡུལ་ལོ། །དེ་ལ་འཇུག་པའི་ཡུལ་ནི་སྟོན་པའི་བྱུང་ཚུལ་ལ་སྤྱོད་པའོ། །དམིགས་པའི་ཡུལ་ཡང་རྣམ་པ་གཉིས་ཏེ། ཐུན་མོང་སྟེ་བདེན་པ་བཞི་དང༌། ཐུན་མོང་མ་ཡིན་པ་ནི་གཉིས་ཏེ། མཚན་མ་ཅན་དང༌། དེ་བཞིན་ཉིད་ཀྱི་ངོ་བོའོ། །སྤང་བར་བྱ་བ་ནི། ཉོན་མོངས་པ་ཅན་མ་ཡིན་པའི་མི་ཤེས་པ་དང༌། ཉོན་མོངས་པ་མང་བའོ།། དེ་ཡང་སྔར་ནི་སྤང་བྱ་ཆེན་པོ་ལ་སོགས་པ་གཉེན་པོ་ཆུང་དུ་ལ་སོགས་པས་རིམ་པ་བཞིན་དུ་སྤངས་ནས། ཐ་མར་རྡོ་རྗེ་ལྟ་བུའི་ཏིང་ངེ་འཛིན་གྱིས་ཕྲ་མོའི་ཡང་ཕྲ་མོ་སྤང་བ་སྟེ་མིང་གི་དབྱེ་བ་མེད་དོ། །གཉིས་པ་ནི་མིང་གི་དབྱེ་བ་ཡང་ཡོད་ལ། གནས་སྐབས་ཀྱིས་སྤང་བར་བྱ་བ་ཡང་ཡོད་དེ། དེ་ཡང་དྲན་པ་ཉེ་བར་གཞག་པས་ནི་ལོག་པར་ལྟ་བ་སྟེ། གཙང་བ་དང༌། རྟག་པ་དང་ཡོད་པ་སྟེ། བདག་དང་བདེ་བར་ལྟ་པ་ལ་སོགས་པ་སྤང་ངོ༌། །ཡང་དག་སྤང་བས་ལེ་ལོ་སྤང་ངོ༌། །རྫུ་འཕྲུལ་གྱི་རྐང་པས་ནི་ཉེས་པ་ལྔ་སྤོང་སྟེ། ལེ་ལོ་དང༌། བརྗེད་ངས་པ་དང༌། བྱིང་རྒོད་དང༌། སྐྱོན་བྱུང་བའི་ཚེ་མངོན་པར་འདུ་མི་བྱེད་པ་དང༌། སྐྱོན་མེད་པའི་ཚེ་མངོན་པར་འདུ་བྱེད་པ་སྟེ། སྐྱོན་ནི་བྱིང་རྒོད་གཉིས་སོ། །དེ་སྤོང་བའི་གཉེན་པོ་ནི་བརྒྱད་དེ། ལེ་ལོའི་གཉེན་པོ་ནི་བརྩོན་འགྲུས་སོ། །དེའི་གནས་ནི་འདུན་པའོ། །འདུན་པའི་རྒྱུ་ནི་དད་པའོ། །བརྩོན་འགྲུས་ཀྱི་འབྲས་བུ་ནི་ཤིན་ཏུ་སྦྱངས་པ་སྟེ། ཡིད་ཆེས་པས་ནི་འདོད་པ་སྐྱེ་ལ། འདོད་པས་ནི་བརྩོན་འགྲུས་བརྩམས་ལ། བརྩོན་འགྲུས་ཀྱིས་ཏིང་ངེ་འཛིན་ཁྱད་པར་ཅན་བརྩམས་པས་ནི། ལུས་དང་སེམས་གཉིས་ལས་སུ་རུང་བ་སྟེ། དེ་ལྟར་བཞིའོ། །དྲན་པ་ནི་བརྗེད་ངས་པའོ། །ཤེས་བཞིན་ནི་བྱིང་རྒོད་ཀྱིའོ། །སེམས་པ་ནི་འདུ་མི་བྱེད་པའིའོ། །བཏང་སྙོམས་ནི་འདུ་བྱེད་པའིའོ། །དེ་ཡང་དྲན་པ་ཉེ་བར་གནས་པས་ཤེས་བཞིན་དང་ལྡན་ལ། དེ་སེམས་མངོན་པར་འདུ་བྱེད་ཅིང་ཉེས་པ་མེད་ནས་བཏང་སྙོམས་སུ་གནས་པ་སྟེ་གོ་རིམས་བཞིན་ནོ། །དབང་པོ་དང་
སྟོབས་ཀྱིས་ནི་མ་དད་པ་ལ་སོགས་པ་ལྔའོ། །མཐོང་བའི་ལམ་ལ་སྡུག་བསྔལ་བ་དང༌། ཀུན་འབྱུང་དང༌། འགོག་པ་དང༌། ལམ་གྱི་བདེན་པས་འདོད་ཁམས་ན་སྤང་བྱ་བཅུ་བཅུ་ཡོད་པས་བཞི་བཅུའོ། །དེ་བཞིན་ཁམས་གོང་མ་གཉིས་ན། ཁོང་ཁྲོ་བ་མེད་པས་དགུ་དགུ་སྟེ་བདུན་ཅུ་རྩ་གཉིས་ཏེ་སྤྱིར་བརྒྱ་རྩ་བཅུ་གཉིས་སྤོང་ངོ༌། །བསྒོམ་པའི་ལམ་གྱིས་ནི་འདོད་ཁམས་ན་འཇིག་ཚོགས་ལ་ལྟ་བ་དང༌། མཐར་འཛིན་པར་ལྟ་བ་ལྷན་ཅིག་སྐྱེས་པ་དང༌། འདོད་ཆགས་དང༌། ཁོང་ཁྲོ་བ་དང༌། ང་རྒྱལ་དང༌། མ་རིག་པ་དང་དྲུག་སྤོང་ངོ༌། །དེ་ལྟར་ཁམས་གོང་མ་གཉིས་ན་ཁོང་ཁྲོ་མ་གཏོགས་པ་ལྔ་ལྔ་སྟེ་བཅུ་སྤོང་ངོ༌། །དེ་ལྟར་མདོར་བསྡུ་ན་བསྒོམ་པས་སྤང་བར་བྱ་བ་ནི་ཉོན་མོངས་པ་བཅུ་དྲུག་གོ །སྤང་བའི་ཐབས་ནི་གོང་དུ་བསྟན་པའི་ལམ་དེས་རིམ་པ་བཞིན་དུ་སྤོང་སྟེ། ལྷན་ཅིག་ཏུ་མི་གནས་པའི་འགལ་བ་སྣང་བ་དང་མུན་པའི་ཚུལ་དུ་གཉེན་པོ་ཆུང་དུས་སྤང་བྱ་ཆེན་པོ་སྤོང་ཞིང༌། གཉེན་པོ་ཆེན་པོས་སྤང་བྱ་ཆུང་དུ་སྤང་བའོ། །སྤངས་པའི་འབྲས་བུ་ནི། དེ་ལྟར་རྡོ་རྗེ་ལྟ་བུའི་ཏིང་ངེ་འཛིན་གྱིས་བག་ཆགས་ཆ་ཕྲ་མོ་སྤངས་པའི་སྐད་ཅིག་མ་གཉིས་པ་ལ་ནི་སངས་རྒྱས་ཞེས་བྱའོ། །དེ་ནས་སྐད་ཅིག་མ་གསུམ་པ་ལ་ཡང་དག་པར་རྫོགས་པའི་སངས་རྒྱས་ཞེས་བྱ་སྟེ། ཆོས་ཀྱི་སྐུ་ཡོན་ཏན་ཐམས་ཅད་ནི་རྫོགས་པ་ནུས་པ་ཐམས་ཅད་དང་ལྡན་པར་འགྱུར་རོ། །དེ་ལས་སྔོན་གྱི་སྨོན་ལམ་དང་ཐུགས་རྗེས་གཟུགས་སྐུ་རྣམ་པ་གཉིས་སུ་བྱུང༌། དེ་ཡང་འོག་མིན་གྱི་གནས་སྟུག་པོ་བཀོད་པའི་ཞིང་ཁམས་ན། ལོངས་སྤྱོད་རྫོགས་པའི་སྐུ་བསྟན་པ་དང༌། སྤྲུལ་པའི་སྐུ་ཅི་ལ་ཅིས་འདུལ་བ་བཞིན་དུ་རྣམ་པ་སྣ་ཚོགས་པའི་སྐུ་བསྟན་པ་སྟེ། དེ་ལ་སྔ་མ་ནི་འཁོར་ཉེ་བ་ལ་དགོངས་པའོ། །ཕྱི་མ་ནི་རིང་བ་ལ་དངོས་པའོ། །སྤྱོད་པ་དག་པར་བྱ་བ་ནི་གཉིས་ཏེ། འགྲོ་བ་ལ་སོགས་པའི་དུས་སུ་དྲན་པ་བཞིན་དུ་འགྲོ་བ་ལ་སོགས་པ་དང༌། གནས་སྐབས་སུ་བྱ་བའི་ཆོ་ག་ལ་ཕྱག་འཚལ་བ་ལ་སོགས་པ་དང༌། བསྐོར་བ་བྱ་བ་དང༌། མཎྜལ་ལ་སོགས་པ་བྱ་བའོ། །ཐེག་པ་ཆེན་པོ་ལམ་གྱི་རིམ་པ་ལས། ཕ་རོལ་ཏུ་ཕྱིན་པའི་ལམ་གྱི་རིམ་པའི་ལེའུར་ཕྱེ་བ་སྟེ་དང་
པོའོ།། །།ཕ་རོལ་ཕྱིན་པའི་ཐེག་པ་ཡི། །ལམ་གྱི་རིམ་པ་བསྟན་བྱས་ནས། །གསང་སྔགས་ཐེག་པའི་ལམ་གྱི་ནི། །རིམ་བ་ཡང་དག་བཤད་པར་བྱ། །དེ་ལ་ཐེག་ཆེན་གསང་སྔགས་ནི། །ཁྱད་པར་གྱུར་ཕྱིར་ཁྱད་པར་ཏེ། །ཐབས་མང་དཀའ་བ་མེད་པ་དང༌། །དབང་པོ་རྣོན་པོ་མཆོག་གྱུར་དང༌། །དོན་གཅིག་ཕྱིར་ནའང་རྨོངས་པས། །སྔགས་ཀྱི་བསྟན་བཅོས་ཁྱད་པར་འཕགས། །དེ་ཕྱིར་དམ་ཚིག་སོགས་ལྡན་གཞུག །དམ་ཚིག་མི་ལྡན་སྤང་བར་བྱ། །དམ་ཚིག་དང་ལྡན་བཟློག་པ་ནི། །མཁའ་འགྲོ་མ་ཡིས་འཚེ་བ་དང༌། །དུས་མ་ཡིན་པར་འཆི་བ་དང༌། །ཤི་ནས་དམྱལ་བར་འགྲོ་བའོ། །དམ་ཚིག་མི་ལྡན་བཅུག་པ་ཡང༌། །ཚུལ་དེ་ཉིད་དུ་ཤེས་པར་བྱ། །ཐེག་ཆེན་སྔགས་ཀྱི་སྤྱོད་པ་ལ། །སྐྱོན་འདོགས་སྨོད་པར་བྱེད་པ་ནི། །མཁའ་འགྲོ་མ་ཡིས་མྱུར་དུ་གསེད། །དེ་ནས་དམྱལ་བར་སྐྱེ་བར་འགྱུར། །དེ་བས་ཟབ་མོའི་སྤྱོད་པ་ལ། །སྐྱོན་འདོགས་སྨོད་པ་སྤང་བྱ་སྟེ། །སྐལ་པ་དང་ལྡན་གང་ཟག་གིས། །བླ་མ་དམ་པར་གྱུར་པ་ལ། །སེམས་བསྐྱེད་སྡོམ་བླང་དབང་ནོད་ཅིང༌། །དེ་ཉིད་བསྲུང་དང་མཚན་ཉིད་ཤེས། །སེམས་སྦྱང་སྤྱོད་པ་དག་པ་དང༌། །ཆོ་ག་ལྔ་ཡི་མཚན་ཉིད་དེ། །ཐེག་པ་དམན་ལའང་ཡོད་པ་སྟེ། །སྐབས་མ་ཡིན་པས་འདི་མི་བརྗོད། །བསྡུས་པའི་ཚིགས་སུ་བཅད་པའོ། །ད་ནི་དེ་ཉིད་རྒྱས་པར་བསྟན་པར་བྱ་སྟེ། །དེ་ཡང་དང་པོར་སྐལ་བ་དང་ལྡན་པའི་གང་ཟག་གིས། བླ་མ་དམ་པ་ཐེག་པ་མཐའ་དག་གི་གྲུབ་པའི་མཐའ་ལམ་རྨོངས་ཤིང༌། རྒྱུད་ཀྱི་དགོངས་པ་ཤེས་པ་དང༌། །དཀྱིལ་འཁོར་གྱི་ཆོ་ག་ལ་སོགས་པ་ལ་མཁས་ཤིང༌། སྙིང་རྗེ་ཆེན་པོ་དང་ལྡན་པ་བླ་བའི་བཀའ་ཐོབ་པ་ལ་ཚོགས་ཀྱི་དགའ་སྟོན་བྱ་སྟེ། ཡོན་ཕུལ་ནས་གསོལ་བ་གདབ་པར་བྱའོ། །དེ་ལྟར་གསོལ་བ་བཏབ་པ་དང༌། བླ་མས་ཀྱང་བསྙེན་པ་དང༌། སའི་ཆོ་ག་དང༌། ལྷག་པར་གནས་པའི་ཆོ་ག་དང༌། དཀྱིལ་འཁོར་གྱི་ཆོ་ག་རྒྱས་པ་དང༌། འཇུག་པ་དང༌། དབང་བསྐུར་བ་དང༌། ཡོན་བླང་བར་བྱའོ། །དེ་ནས་སྲུང་བ་ལ་འབད་པར་བྱ་སྟེ། བསྲུངས་པའི་ཡོན་ཏན་དང༌། མ་བསྲུང་བའི་སྐྱོན་ནི་གཞན་ལས་གསལ་བས་བདག་གིས་བརྗོད་དོ། །དེ་ལྟར་སྣོད་དུ་རུང་བ་དང༌། བླ་མ་དམ་པ་ལས་སྔགས་ཀྱི་མཚན་ཉིད་ཤེས་
པར་བྱའོ། །དེ་ཤེས་ནས་སེམས་སྦྱང་བར་བྱ་སྟེ། སེམས་མ་སྦྱངས་པར་ནི་བྱང་ཆུབ་མི་འགྲུབ་ལ། དེ་མ་གྲུབ་པར་ནི་གཞན་གྱི་དོན་མི་འགྲུབ་པས་སེམས་སྦྱང་བར་བྱའོ། །དེ་ཡང་ཡན་ལག་རྣམ་པ་ལྔ་སྟེ། ལམ་རྒྱུད་ལ་བསྐྱེད་པ་དང༌། དེའི་ཡུལ་དང༌། སྤང་བར་བྱ་བ་དང༌། སྤང་བའི་ཐབས་དང༌། སྤངས་པའི་འབྲས་བུའོ།།དེ་ལ་ལམ་ལ་རྣམ་པར་གསུམ་སྟེ། །ལམ་དངོས་དང༌། དེའི་གྲོགས་དང༌། ཉེ་བའི་གྲོགས་སོ། །དེ་ལ་ལམ་དངོས་ནི་བྱ་བའི་རྒྱུད་དང༌། སྤྱོད་པའི་རྒྱུད་དང༌། རྣལ་འབྱོར་གྱི་རྒྱུད་ཀྱིས་ནི་མཚན་མ་དང་བཅས་པའི་སྒྲུབ་པའི་ཐབས་དང་མཚན་མ་མེད་པའི་སྒྲུབ་པའི་ཐབས་ཞེས་བྱ་བར་གསུངས་སོ། །རྣལ་འབྱོར་ཆེན་པོས་ནི་བསྐྱེད་པའི་རིམ་པ་དང༌། རྫོགས་པའི་རིམ་པ་ཞེས་བྱ་སྟེ། དེ་ཉིད་ནི་ལམ་མོ། །གྲོགས་ནི་ལྔ་སྟེ། བདག་དང་གཞན་གྱི་བར་ཆད་ཉེ་བར་ཞི་བར་བྱ་བའི་ཕྱིར་གཏོར་མའི་ཆོ་ག་དང༌། ལྷ་ཚིམ་ཞིང་བགེགས་ལ་སོགས་པ་ཞི་བར་བྱ་བ་ལ་སོགས་པའི་ཕྱིར་སྦྱིན་སྲེག་གི་ཆོ་ག་དང༌། དངོས་གྲུབ་མྱང་ཞིང་ལྷ་ལ་སོགས་པ་ཁྱད་པར་དུ་བྱ་བའི་ཕྱིར་རབ་གནས་ཀྱི་ཆོ་ག་དང༌། བསོད་ནམས་ཁྱད་པར་ཅན་བསགས་པའི་ཕྱིར་ཚ་ཚའི་ཆོ་ག་དང༌། བག་ཆགས་སྦྱང་བ་དང༌། དབང་བསྐུར་བའི་ཕྱིར་བུམ་པའི་ཆོ་ག་བྱའོ། །ཉེ་བའི་གྲོགས་ཀྱང་ལྔ་སྟེ། སྒྲུབ་པའི་གནས་དང༌། ཤིས་པའི་དུས་དང༌། མཚན་དང་ལྡན་པའི་གྲོགས་དང༌། གཞུང་དང་མཐུན་པའི་རྫས་དང༌། ཆོས་དང་མཐུན་པའི་འཚོ་བའི་ཡོ་བྱད་དང་ལྔའོ། །རྫས་ལ་གསུམ་སྟེ། མཆོད་རྫས་དང༌། སྔགས་རྫས་དང༌། སྒྲུང་རྫས་སོ། །ཡུལ་ནི་རྣམ་པ་གཉིས་ཏེ། འཇུག་པའི་ཡུལ་དང༌། དམིགས་པའི་ཡུལ་ལོ། །དེ་ལ་འཇུག་པའི་ཡུལ་ནི་ཕ་རོལ་ཏུ་ཕྱིན་པ་དང་མཐུན་ནོ། །དམིགས་པའི་ཡུལ་ནི་རྣམ་པ་གཉིས་ཏེ། ཡི་གེ་ལ་སོགས་པ་མཚན་མ་ཅན་དང༌། མཚན་མ་མེད་པ་སྟེ། སྟོང་པ་ཉིད་ཀྱི་རང་བཞིན་ལ་དམིགས་པ་མེད་པའི་ཚུལ་གྱིས་དམིགས་པའོ། །སྤང་བར་བྱ་བ་ནི་རྣམ་པ་གཉིས་ཏེ། ངན་རྟོག་དང༌། བཟང་རྟོག་གོ །སྤང་བའི་ཐབས་ནི་ངན་རྟོག་ནི་བཟང་རྟོག་གིས་སྤོང་ལ། བཟང་རྟོག་ནི་མི་རྟོག་པས་སྤང་བར་བྱའོ། །སྤངས་པའི་འབྲས་བུ་ནི་གཉིས་ཏེ། ཐུན་མོང་དང༌། ཐུན་
མོང་མ་ཡིན་པའོ། །དེ་ལ་ཐུན་མོང་བ་ནི་མངོན་པར་ཤེས་པ་ལ་སོགས་སོ། །ཐུན་མོང་མ་ཡིན་པ་ལ་གཉིས་ཏེ། མཐར་ཐུག་སྟེ་སྐུ་གསུམ་དང་མཐར་ཐུག་མ་ཡིན་པ་སྟེ། ཕྱག་རྒྱ་ཆེན་པོའི་དངོས་གྲུབ་སྟེ། མཐོང་བའི་ལམ་སྐྱེས་པའོ། །སྤྱོད་པ་ནི་གཉིས་ཏེ། འགྲོ་བ་ལ་སོགས་པའི་དུས་སུ་ལྷའི་རྣམ་པར་བྱ་བ་དང༌། གནས་སྐབས་སུ་བྱ་བའོ། །ལྷའི་རྣམ་པར་བྱ་བ་ལ་ཡང་ལྷག་པའི་ལྷའམ། རིགས་གསུམ་མམ། ལྔའམ། གཟུགས་ཀྱི་རྡོ་རྗེ་མ་ལ་སོགས་པར་བྱ་བའོ། །གནས་སྐབས་སུ་བྱ་བ་ནི། ཁྲུས་བྱས་ནས་ཕྱག་འཚལ་བ་ལ་སོགས་པ་དང༌། བསྐོར་བ་དང༌། མཎྜལ་དབུལ་བ་དང༌། ཡི་དམ་བཀླགས་པ་ལ་སོགས་པ་བྱ་བའོ། །དེ་ལྟར་རྒྱས་པར་བཤད་ནས་ཤིན་ཏུ་རྒྱས་པར་བྱ་བའི་ཕྱིར། ཆོ་གའི་རིམ་པ་དང༌། དོན་གྱི་རིམ་པ་དང༌། དགོས་པའི་རིམ་པ་དང༌། ངོ་བོ་དང༌། ངེས་ཚིག་དང༌། དབྱེ་བ་ལ་སོགས་པ་བཤད་པར་བྱ་སྟེ། དེ་ཡང་དང་པོར་བླ་མ་དམ་པ་ལས་སྔོམ་པ་ལ་སོགས་པ་ཐོབ་པ་དེས་བསྲུང་བ་ལ་འབད་ཅིང༌། གདམས་ངག་མཉན་པར་བྱའོ། །དེ་ནས་གནས་ཡིད་དུ་འོང་བར་གྲོགས་ཆོས་དང་མཐུན་པའམ། བདག་ཉིད་གཅིག་པུ་དུས་ཚིགས་བཟང་པོ་ལ་འདུག་ལ། གཏོར་མ་བྱ་བ་དང༌། སཱཙྪ་གདབ་པ་དང༌། སྦྱིན་སྲེག་དང༌། ཡི་དམ་བཀླག་པར་ཡང་བྱའོ། །དེ་ནས་ཁྲུས་བྱས་ནས། མཎྜལ་བྱས་ལ་མེ་ཏོག་བཀྲམ་ནས་སྲུང་བའི་འཁོར་ལོ་བསྒོམ་པར་བྱའོ། །དེ་ནས་སྙིང་རྗེ་བསྒོམ་པར་བྱའོ། །སེམས་ཅན་ཐམས་ཅད་སྡུག་བསྔལ་དང་བྲལ་བར་འདོད་པའོ། །དེ་ནས་བྱམས་པ་སྟེ། སེམས་ཅན་ཐམས་ཅད་བདེ་བ་དང་ལྡན་པར་འདོད་པའོ། །དེ་ནས་དགའ་བ་སྟེ། བདག་གིས་བྱང་ཆུབ་ཆེན་པོ་ཐོབ་པར་བྱས་ལ། སེམས་ཅན་གྱི་དོན་བྱའོ་ཞེས་སྤྲོ་བར་བྱའོ། །དེ་ནས་བཏང་སྙོམས་ཏེ། དེ་གསུམ་མི་དམིགས་པར་བསྒོམ་པའོ། །དེ་ཡང་སྙིང་རྗེ་ནི་རྩ་བ་ལྟ་བུའོ། །བྱམས་པ་ནི་སྡོང་བུ་ལྟ་བུའོ། །དགའ་བ་ནི་ཡལ་ག་ལྟ་བུའོ། །ཚོགས་གཉིས་ནི་ལོ་མ་ལྟ་བུའོ། །རྣལ་འབྱོར་གཞན་རྣམས་ནི་མེ་ཏོག་ལྟ་བུའོ། །རྣལ་འབྱོར་པ་རྒྱུད་ཡོངས་སུ་སྨིན་པ་ནི་འབྲས་བུ་ལྟ་བུ་སྟེ། རྩ་བ་མེད་པར་སྡོང་བུ་ལ་སོགས་པ་མི་འབྱུང་བ་དང་འདྲ་བར་སྙིང་རྗེ་མེད་པར་བྱམས་པ་ལ་སོགས་པ་མི་འབྱུང་ངོ༌། །དེ་ནས་ལྷ་དང་
བླ་མ་སྤྲུལ་པ་ལ་ཕྱག་འཚལ་བ་ལ་སོགས་པ་བྱ་སྟེ། བསོད་ནམས་ཀྱི་ཚོགས་སོ། །དེ་ནས་སྟོང་པ་ཉིད་ཀྱི་སྔགས་བརྗོད་པའི་སྒོ་ནས་སྟོང་པ་ཉིད་ཀྱི་རང་བཞིན་མངོན་དུ་བྱ་བ་སྟེ། ཡེ་ཤེས་ཀྱི་ཚོགས་སོ། །དེ་ནས་སོ་སོའི་གཞུང་བཞིན་དུ་བདག་དམ་ཚིག་སེམས་དཔར་བསྐྱེད་པ་དང༌། མདུན་དུ་དམ་ཚིག་སེམས་དཔའ་སྤྲུལ་པ་དང༌། ཡེ་ཤེས་སེམས་དཔའ་སྤྱན་དྲངས་པ་ལ་སོགས་པ་བྱས་ནས། མཆོད་པ་དང་བསྟོད་པ་བྱས་ལ། ཡི་གེའམ། ཕྱག་མཚན་ནམ། སྐུའམ་ཐིག་ལེའམ། ཕྲ་མོའམ། སྤྲོ་བསྡུ་ལ་སོགས་པ་ལ་དམིགས་ནས་བསྒོམ་པར་བྱའོ། །སྐྱོ་བར་གྱུར་ན་ངག་གིས་བཟླས་པ་བྱའོ། །ཤིན་ཏུ་སྐྱོ་བར་གྱུར་ན་ལྷ་མོ་ལ་སོགས་པས་མཆོད་པ་ལ་སོགས་པ་བྱས་ནས་སྤྱན་དྲངས་པ་རྣམས་གཤེགས་སུ་གསོལ་བར་བྱའོ། །སྤྲུལ་པ་རྣམས་ནི་བསྡུ་བར་བྱའོ། །ཡང་ན་བདག་ཉིད་ལྷར་བསྐྱེད་ལ་འཁོར་གྱི་དཀྱིལ་འཁོར་སྤྲུལ་ནས་མར་མེའི་འོད་གྱེས་པའི་ཚུལ་དུ་གཉིས་སུ་བྱས་ལ། གཅིག་དཀྱིལ་འཁོར་གྱི་གཙོ་བོར་སྣང་ལ། གཅིག་ལས་ཀྱི་ལྷར་བྱས་ལ་མཆོད་པ་ལ་སོགས་པ་དེ་བཞིན་དུ་ཐམས་ཅད་བྱའོ། །ཡང་ན་བདག་ལྷར་བྱས་ནས་ཡེ་ཤེས་དཔའ་སྤྱན་དྲང་བ་ལ་སོགས་པ་བདག་ཉིད་ལ་བྱས་ལ། བདག་གི་སྙིང་ག་ནས་ལྷ་མོ་སྤྲུལ་པའམ། འཁོར་གྱི་ལྷ་མོས་བདག་ལ་མཆོད་བསྟོད་བྱས་ནས། ཡང་བདག་གི་སྙིང་གའམ། སྐུ་ལ་བསྡུས་ལ་གོང་དུ་བསྟན་པ་ལྟར་བྱའོ། །བཟླས་པའི་དུས་སུ་ཐབས་ནི། མགལ་མེ་བསྐོར་བ་ལྟ་བུའམ། ཐག་མདུང་འཕེན་པ་ལྟ་བུའམ། སྒྲོའི་ཆུན་པོ་ལྟ་བུའམ། ཐི་གུ་བསྒྲིལ་བ་ལྟ་བུའམ། ལྕགས་སྒྲོག་སྦྲེལ་བ་ལྟ་བུ་བྱ་སྟེ། སྐབས་ཀྱི་སྟོབས་ཀྱིས་ཤེས་པར་བྱའོ། །དེ་ལྟར་བསྒོམས་པ་ལས་མཚན་མ་བརྟན་པོ་འབྱུང་བར་འགྱུར་རོ། །མཚན་མ་ཐོབ་ནས་མཚན་མ་མེད་པ་བསྒོམ་པར་བྱའོ། །མཚན་མ་མེད་པ་མངོན་དུ་གྱུར་པ་ལ་ནི་ཕྱག་རྒྱ་ཆེན་པོའི་དངོས་གྲུབ་ཅེས་བྱའོ། །དེ་ཡན་ཆད་ལམ་གྱི་ཐུན་མོང་སྟེ་གཉིས་སུ་མེད་དོ། །ཆོ་གའི་རིམ་པའོ། །དོན་གྱི་རིམ་པ་ནི་དེ་བཞིན་གཤེགས་པས་ཚད་མེད་པ་བསྒོམས་པ་དང༌། ཚོགས་གཉིས་བསགས་པ་དང༌། བདུད་ཐམས་ཅད་འདུལ་བ་དང༌།
ཐམས་ཅད་ལ་མ་ཆགས་པ་དང༌། སྔ་ཕྱིར་བྱང་ཆུབ་ཏུ་སེམས་བསྐྱེད་པ་དང༌། ཐོས་པའི་ཤེས་རབ་དང༌། བསམས་པའི་ཤེས་རབ་དང༌། བསྒོམས་པའི་ཤེས་རབ་མཐར་ཕྱིན་པ་རྣམས་བྱིན་གྱིས་བརླབས་ནས། གོ་རིམས་བཞིན་དུ་ཚད་མེད་པ་དང༌། ཚོགས་གཉིས་དང༌། སྲུང་བའི་འཁོར་ལོ་དང༌། པདྨ་དང༌། ཟླ་བ་དང༌། ཡི་གེ་དང༌། ཕྱག་མཚན་དང༌། སྐུར་གྱུར་པ་བསྟན་ཏོ། །ཡང་དེ་བཞིན་གཤེགས་པས་ཚོགས་ཀྱི་ལམ་དང༌། སྦྱོར་བའི་ལམ་དང༌། མཐོང་བའི་ལམ་དང༌། བསྒོམ་པའི་ལམ་དང༌། མི་སློབ་པའི་ལམ་དང༌། གཞན་གྱི་དོན་དུ་གཟུགས་རྣམ་པ་གཉིས་བྱུང་བ་དེ་ཉིད་བྱིན་གྱིས་བརླབས་ནས་རིམ་པ་བཞིན་དུ་བསོད་ནམས་ཀྱི་ཚོགས་བསགས་པ་དང༌། ཡེ་ཤེས་ཀྱི་ཚོགས་བསགས་པ་དང༌། ཡི་གེའམ། ཟླ་བ་ཚེས་པའམ། ཟླ་བ་རྒྱས་པའམ། ཡི་གེའི་འཕྲོ་འདུའམ། ཟླ་བའམ། ཟླ་བ་གཉིས་པ་དང༌། ཕྱག་མཚན་དང༌། སྐུ་དག་ཏུ་བསྟན་ཏོ། །དེ་བཞིན་གཤེགས་པའི་འདུ་བ་མཛད་པ་ནི་སྤྲོ་བ་དང༌། བསྡུ་བ་དང༌། བྱིན་གྱིས་བརླབ་པར་བསྟན་ཏོ། །དོན་གྱི་རིམ་པའོ། །དགོས་པའི་རིམ་པ་ནི། དང་པོར་དེ་བཞིན་གཤེགས་པས་བདེན་པ་གཉིས་ལམ་བཞིར་བསྒོམས་ཤིང༌། ཚོགས་བསགས་པས་སྐུ་གསུམ་ཐོབ་པ་དེ་བཞིན་དུ། དེ་ལྟར་རྣལ་འབྱོར་པས་ཐུན་གཅིག་ལ་བསྒོམས་པས་ཀྱང་ཚུལ་དེ་བཞིན་དུ་སྣང་ལ། གོམས་པ་ལས་ཕྱིས་དེ་བཞིན་དུ་འགྲུབ་པར་འགྱུར་ཏེ། དེ་བས་ན་ཐབས་ཁྱད་པར་ཅན་འབྲས་བུ་ལམ་དུ་གྱུར་པ་ཞེས་བྱའོ། །དགོས་པའི་རིམ་པའོ།། ད་ནི་སྔགས་ལ་སོགས་པའི་རང་གི་ངོ་བོ་ལ་སོགས་པ་བརྗོད་པར་བྱ་སྟེ། དེ་ལ་ངོ་བོ་ནི་ཐམས་ཅད་ཀྱི་མཐུན་པར་ཐབས་དང་ཤེས་རབ་གཉིས་སོ། །གཞན་དུ་ནི་བདེན་པ་གཉིས་ཀྱི་མིང་ཅན་ནོ། །དེ་ལ་ཐབས་ནི་ཀུན་རྫོབ་སྒྱུ་མ་ཙམ་དུ་སྣང་བའོ། །ཤེས་རབ་ནི་དོན་དམ་པར་སྐྱེ་བ་མེད་པ་སྟེ། སྟོང་པ་ཉིད་ཀྱི་རང་བཞིན་ནོ། །གཞན་དག་གི་ངོ་བོ་ལ་སོགས་པ་བརྗོད་པ་ནི། དོན་གྱི་ཕྱོགས་རེ་ཙམ་གཟུང་བ་སྟེ། བདག་གིས་ནི་ཁྱབ་པ་སྤྱིར་བཏང་བའོ། །ངེས་པའི་ཚིག་ནི་སྐྱོབ་པའི་ཕྱིར་ན་སྔགས་ཏེ། ཡིད་སྐྱོབ་པར་བྱེད་པའི་དོན་ཏོ། །དབྱེ་ན་རྣམ་པ་གཉིས་ཏེ། དོན་དམ་པའི་སྔགས་
དང། ཀུན་རྫོབ་ཀྱི་སྔགས་སོ། །དེ་ལ་དོན་དམ་པའི་སྔགས་ནི་གཉིས་སུ་མེད་པའི་རང་བཞིན་སྟོང་པ་ཆེན་པོའི་ཡེ་ཤེས་དང༌། དེ་ཡུལ་དུ་བྱེད་པའི་ཡེ་ཤེས་ཏེ། དེ་ངེས་པར་རྟོགས་པས་འཁོར་བ་ལས་སྐྱོབ་པའི་ཕྱིར་རོ། །དེ་ལ་ངོ་བོའི་དབང་དུ་བྱས་ན་དབྱེ་བ་མེད་དོ། །ཡུལ་ཅན་གྱི་དབང་དུ་དབྱེ་བ་ཡོད་དེ། རྣལ་འབྱོར་པའི་ཤེས་པའི་དབྱེ་བས་གཞག་གོ །ཡུལ་ཅན་གྱི་སྒོ་ནས་དབྱེ་ན་དེ་ཡང་རྣམ་པ་གཉིས་ཏེ། གཟུངས་སྔགས་དང༌། རིག་སྔགས་སོ། །གཟུངས་ལ་བཞི་སྟེ། བཟོད་པ་ཐོབ་པའི་རྒྱུར་གྱུར་པའི་གཟུངས་དང༌། གསང་སྔགས་ཀྱི་གཟུངས་དང༌། ཆོས་ཀྱི་གཟུངས་དང༌། དོན་གྱི་གཟུངས་སོ། །དེ་ལ་བཟོད་པའི་གཟུངས་ནི། བསྐྱེད་པའི་རིམ་པ་མཐར་ཕྱིན་པའི་རྣལ་འབྱོར་པའམ། མཚན་མ་དང་བཅས་པའི་རྣལ་འབྱོར་མཐར་ཕྱིན་པས་རྫོགས་པའི་རིམ་པའམ། མཚན་མ་མེད་པའི་རྣལ་འབྱོར་གྱི་སྐབས་སུ་ཡི་གེ་ཨ་ལ་སོགས་པ་དེ་དག་བརྗོད་བྱ་དང༌། རྗོད་བྱེད་རང་བཞིན་མེད་པར་སེམས་སོ། །དེ་ལྟར་དེས་རང་བཞིན་མེད་པ་དེ་རྟོགས་པ་ལ་ནི་དགའ་བ་དང༌། མཆོག་ཏུ་དགའ་བ་ཆེན་པོ་སྐྱེས་ཏེ་གཟུངས་ཐོབ་པ་ཞེས་བྱའོ། །དྲན་པ་དང་ཤེས་རབ་གཅིག་ཏུ་བྱས་པས་བཟོད་པ་འཛིན་པར་བྱེད་པས་ན་གཟུངས་ཞེས་བྱའོ། །གཟུངས་ཐོབ་པ་དེས་དེ་མ་ཐག་ཏུ་ཕྱག་རྒྱ་ཆེན་པོའི་ཡེ་ཤེས་སྐྱེ་བ་དང་མཐུན་པའི་བཟོད་པ་ཆེན་པོ་སྐྱེ་སྟེ། དོན་དམ་པའི་ཆོས་རྣམས་ལ་བཟོད་པས་ན་བཟོད་པའོ། །བཟོད་པ་དེ་སྐྱེས་ནས་རིང་པོ་མི་ཐོགས་པར་ཕྱག་རྒྱ་ཆེན་པོའི་ཡེ་ཤེས་འཐོབ་པར་འགྱུར་རོ། །དེ་བས་ན་གཟུངས་དེ་ནི་རྫོགས་པའི་རིམ་པའམ། མཚན་མ་མེད་པ་བསྒོམ་པའི་སྐབས་སོ། །ཕ་རོལ་ཏུ་ཕྱིན་པའི་གཟུང་ལྟར་ན་ངེས་པར་འབྱེད་པའི་སྐབས་སོ། །བསྐྱེད་པའི་རིམ་པའམ་མཚན་མ་དང་བཅས་པའི་རྣལ་འབྱོར་ནི་ཐར་པའི་ཆ་དང་མཐུན་པའོ། །གཟུངས་གསུམ་ནི་ཕྱག་རྒྱ་ཆེན་པོ་ཐོབ་པ་ཡན་ཆད་དུ་འཐོབ་པའོ། །དེ་ཡང་ཕྱག་རྒྱ་ཆེན་པོ་ཐོབ་པ་དེ་ཡན་ཆད་དེས་ཏིང་ངེ་འཛིན་དང༌། སྔོན་གྱི་སྨོན་ལམ་གྱི་སྟོབས་བསྐྱེད་པས་གསང་སྔགས་ཀྱི་ཚིག་དེ་དག་གིས་སེམས་ཅན་ཐམས་ཅད་ཀྱི་ནད་ལ་སོགས་པ་མེད་པར་གྱུར་ཅིག་ཅེས་ཏིང་ངེ་འཛིན་གྱི་དབང་གི་སྟོབས་ཀྱིས་སེམས་ཅན་རྣམས་ཀྱི་
ཡམས་ཀྱི་ནད་ལ་སོགས་པ་མེད་ཅིང་བྱིན་གྱིས་བརླབས་པ་ལྟར་འགྲུབ་པར་འགྱུར་རོ། །དེ་བས་ན་ཏིང་ངེ་འཛིན་གྱི་དབང་དེ་ལྟར་གྱུར་པས་གསང་སྔགས་རྣམས་འཛིན་པར་བྱེད་པས་ན་གསང་སྔགས་ཀྱི་གཟུངས་ཞེས་བྱའོ། །གསང་ཞེས་བྱ་བ་ནི་སྣོད་མ་ཡིན་པ་ལ་ཐབས་དེ་གསང་བའི་ཕྱིར་རམ། རྟོགས་པར་དཀའ་བའི་ཕྱིར་གསང་བའོ། །ཆོས་ཀྱི་གཟུངས་ནི་ཕྱག་རྒྱ་ཆེན་པོ་ཐོབ་པའམ། ཕ་རོལ་ཏུ་ཕྱིན་པའི་ལྟར་ན་ས་དང་པོ་ཐོབ་པ་ཡན་ཆད་ཀྱིས་སངས་རྒྱས་དང་བྱང་ཆུབ་སེམས་དཔའ་འམ། མཁའ་འགྲོ་མ་ལ་ཆོས་ཉན་པས་སྔོན་མ་ཐོས་ཤིང་མི་ཤེས་པའི་ཆོས་ཚད་མེད་པ་གྲངས་མེད་པ་དཔག་ཏུ་མེད་པ་ཐོས་པ་ཙམ་གྱིས་མི་བརྗེད་པར་འཛིན་པའི་དྲན་པ་དང༌། ཤེས་རབ་ནི་ཆོས་ཀྱི་གཟུངས་ཞེས་བྱའོ། །དོན་གྱི་གཟུངས་ནི་དེ་བཞིན་དུ་གསུངས་པའི་ཆོས་དེ་དག་གི་དོན་གང་དང་གང་ཡིན་པ་དེ་དག་མི་བརྗེད་པར་འཛིན་པའི་དྲན་པ་དང་ཤེས་རབ་ནི་དོན་གྱི་གཟུངས་སོ་ཞེས་བྱའོ། །དེ་ལ་རིག་སྔགས་ནི་སྟོང་པ་ཆེན་པོའི་ཡེ་ཤེས་དེས་ཡུལ་དུ་བྱས་ཤིང་རྟོགས་པས་མ་རིག་པ་སྤོང་ཞིང་རིག་པ་སྐྱེད་པའི་ཕྱིར་རིག་སྔགས་ཞེས་བྱའོ། །ཡང་ན་སྟོང་པ་ཆེན་པོའི་ཡེ་ཤེས་དེ་ཉིད་ལ་གཟུངས་ཞེས་བྱ་སྟེ། གནོད་པའི་འཚེ་བ་ཐམས་ཅད་ནུབ་པས་ན་མི་བཟོད་པ་མེད་པས་བཟོད་པ་དང༌། དེ་རྣམ་པར་མི་རྟོག་པའི་ཡེ་ཤེས་མ་རྟོགས་པ་རྟོག་པ་ཅན་གྱི་ཡུལ་མ་ཡིན་པས་གསང་བ་དང༌། ཚིག་དང་ཡི་གེ་དང་མིང་དུ་བརྗོད་པ་ཐམས་ཅད་དེ་རྟོགས་པ་ལས་བྱུང་བའི་ཕྱིར་ཆོས་དང༌། བཟོད་པ་ཐམས་ཅད་ཀྱི་དོན་ཤེས་པར་བྱ་བའི་དོན་གྱི་ངོ་བོ་དེ་ཡིན་པའི་ཕྱིར་དོན་ཞེས་བྱའོ། །གཟུངས་ནི་འཛིན་པའི་ཕྱིར་ཞེས་བྱ་སྟེ། ཐམས་ཅད་མཁྱེན་པའི་སངས་རྒྱས་བཅོམ་ལྡན་འདས་མན་ཆད་ནས། དམྱལ་བའི་སེམས་ཅན་ཡན་ཆད་ཀུན་དེས་ཁྱབ་ཅིང་འཛིན་པས་སོ། །ཡང་ན་དྲན་པ་དང་ཤེས་རབ་གཉིས་ཀྱིས་འཛིན་ཅིང་མི་བརྗེད་པར་བྱ་བས་ན་གཟུངས་སོ། །དེ་བས་ན་ཡུལ་དེ་ལྟར་གྲུབ་པས་ཡུལ་ཅན་ལ་ཡང་གྲུབ་ལ། དེ་རྟོགས་པའི་ཐབས་ལ་ཡང་གྲུབ་པ་དེ་སྟོན་པར་བྱེད་པའི་ཚིག་ལ་གྲུབ་སྟེ། གཅིག་གི་མིང་གཅིག་ལ་བཏགས་པའོ། །ཀུན་རྫོབ་ཀྱི་སྔགས་ནི་དེ་ཐོབ་པའི་ཐབས་ཏེ། དེ་ཡང་སྔགས་ཀྱི་གཟུངས་དང༌། སྔགས་
ཀྱི་མིང་དང༌། བརྡ་དང༌། ཚིག་ལ་སོགས་པ་ཐམས་ཅད་དོ། །རྒྱུད་ཅེས་བྱ་བ་ནི་འབྲེལ་བའི་ཕྱིར་རྒྱུད་དེ། དེ་ཡང་གཞི་དང༌། ཐབས་དང༌། འབྲས་བུ་རྣམ་པ་གསུམ་འབྲེལ་པའི་ཕྱིར་རོ། །དབྱེ་བ་རྣམ་པ་གཉིས་ཏེ། ཚིག་གི་རྒྱུད་དང༌། དོན་གྱི་རྒྱུད་དོ། །ཚིག་ནི་སྒྲའོ། །དོན་ལ་རྣམ་པ་གསུམ་སྟེ། གཞིའི་རྒྱུད་དང༌། ཐབས་ཀྱི་རྒྱུད་དང༌། འབྲས་བུའི་རྒྱུད་དོ། །དེ་ལ་གཞིའི་རྒྱུད་ནི་བདེན་པ་གཉིས་ཀྱི་རང་བཞིན་དུ་གནས་པའོ། །ཐབས་ནི་སྒྲུབ་པའི་རིམ་པ་གཉིས་སོ། །འབྲས་བུ་ནི་སྐུ་གཉིས་ཏེ། ཆོས་ཀྱི་སྐུ་དང༌། གཟུགས་ཀྱི་སྐུའོ། །དེ་བས་ན་གཞི་ལ་བརྟེན་ནས་ཐབས་བསྒོམས། །འབྲས་བུ་ཐོབ་པས་ན་འབྲེལ་པའི་ཕྱིར་རྒྱུད་ཅེས་དེ་ལ་བྱའོ། །བསྐྱེད་པ་ནི་ཟླ་བ་ལ་སོགས་པ་བསྐྱེད་པས་ན་བསྐྱེད་པའོ། །གཞན་ནི་རིམ་པའོ། །རྫོགས་པ་ནི་སྟོང་པ་ཆེན་པོའི་ཡེ་ཤེས་ཏེ། དེ་ནི་ཐབས་ལ་རྫོགས་པར་ཡོད་པའམ། ཡང་ན་དེ་རྫོགས་པས་ཡོན་ཏན་རྫོགས་པའི་ཕྱིར་རྫོགས་པའོ། །གཞན་ནི་རིམ་པའོ། །མ་ཆགས་པར་གཏོང་བས་ནི་གཏོར་མའོ། །རྟོག་པ་ལ་སོགས་པ་སྲེག་ཅིང་གང་འདོད་པའི་དོན་སྦྱིན་པས་ན་སྦྱིན་སྲེག་གོ །མཆོད་པའི་ཡུལ་དུ་གྱུར་པས་ན་སཱཙྪའོ། །ཁྱད་པར་དུ་གྱུར་པས་ན་རབ་ཏུ་གནས་པའོ། །ཡོན་ཏན་ཐམས་ཅད་འདུས་པས་ན་དགོས་པ་བྱེད་པའི་ཕྱིར་བུམ་པའོ། །དགའ་བར་བྱེད་པས་ན་མཆོད་པའོ། །ཡོན་ཏན་བརྗོད་པས་ན་བསྟོད་པའོ། །གཏོར་མ་ནི་གཉིས་ཏེ། འབྱུང་པོ་སྤྱིའི་གཏོར་མ་དང༌། སོ་སོའི་གཏོར་མའོ། །སྦྱིན་སྲེག་ལ་ཡང་གཉིས་ཏེ། དོན་དམ་པའི་སྦྱིན་སྲེག་མི་རྟོག་པ་བསྒོམ་པ་དང༌། ཀུན་རྫོབ་ཀྱི་སྦྱིན་སྲེག་གོ །དེ་ལ་རྣམ་པ་གཉིས་ཏེ། ནང་གི་དང་ཕྱིའིའོ། །ནང་གི་ནི་ཁ་ཐབ་ཁུང་དུ་བསམ་པ་ལ་སོགས་པ་དེ་ཉིད་དོ། །ཕྱིའི་སྦྱིན་སྲེག་ལ་ཡང་གཉིས་ཏེ། ལས་ཐམས་ཅད་པའི་སྦྱིན་སྲེག་དང༌། ལས་སོ་སོའི་སྦྱིན་སྲེག་གོ །སོ་སོའི་སྦྱིན་སྲེག་ནི་མོས་པ་དང༌། རིགས་དང༌། ལས་དང་དབང་དུ་བྱས་པས་ཅི་རིགས་སུ་བརྩི་བར་བྱའོ། །སཱཙྪ་ཡང་རྣམ་པ་གཉིས་ཏེ། ཆོ་ག་རྒྱས་པ་དང༌། འཕྲལ་དུ་བྱ་བའོ། །རབ་ཏུ་གནས་པ་ནི་རྣམ་པ་གསུམ་སྟེ། དེ་བཞིན་གཤེགས་པའི་སྐུའམ་རྟེན་རབ་གནས་
བྱ་བ་དང༌། གླེགས་བམ་རབ་ཏུ་གནས་པར་བྱ་བ་དང༌། རྡོ་རྗེ་ལ་སོགས་པ་རབ་ཏུ་གནས་པའོ། །བུམ་པ་ལ་གཉིས་ཏེ། གནས་སྐབས་སུ་བྱ་བ་དང༌། དཀྱིལ་འཁོར་བཞེངས་པའི་དུས་སུ་བྱ་བའོ། །དཀྱིལ་འཁོར་བྱེད་པའི་དུས་སུ་ནི་བུམ་པ་གསུམ་སྟེ། དབང་གི་བུམ་པ་དང༌། ཁྲུས་ཀྱི་བུམ་པ་དང༌། མཆོད་པའི་བུམ་པའོ། །སྤྱིར་བུམ་པ་ནི་མང་སྟེ། ཕྱིའི་བུམ་པ་དང༌། ནང་གི་བུམ་པ་དང༌། གསང་བའི་བུམ་པ་ཞེས་རྒྱལ་པོ་ཨིནྡྲ་བྷཱུ་ཏི་ལ་སོགས་པས་བཤད་པས་དེར་ཤེས་པར་བྱའོ། །བདག་གིས་མི་སྤྲོའོ། །མཆོད་པ་ནི་སོ་སོའི་གཞུང་གིས་མི་མཐུན་ཏེ། འོན་ཀྱང་རྣམ་པ་གསུམ་དུ་འདུས་སོ། །དེ་ཡང་དངོས་སུ་བཤམས་པ་དང༌། ཡོངས་སུ་གཟུང་བ་མེད་པ་དང༌། ཏིང་ངེ་འཛིན་གྱིས་སྤྲུལ་པའོ། །དེ་ལྟར་ངོ་བོ་ལ་སོགས་པ་བདག་གིས་སྤྱིར་ཁྱབ་ཆེ་བར་བརྗོད་པ་ནི། བླ་མའི་མན་ངག་བཟུང་ཞིང་རྒྱུད་ཐམས་ཅད་དང་མཐུན་པར་བྱ་སྟེ། བདག་གིས་རྟོགས་པ་ཙམ་ནི་མ་ཡིན་ནོ། །སློབ་དཔོན་གཞན་དག་གིས་གཞན་དུ་བརྗོད་པ་ནི་དོན་གྱི་ཕྱོགས་རེ་ཙམ་བླངས་ནས་གསུངས་ཏེ། འོན་ཀྱང་བདག་གིས་བླ་མའི་མན་ངག་བརྒྱུད་ནས་བརྗོད་པའི་ནང་དུ་འདུས་པས་འགལ་བ་མེད་པར་ཤེས་པར་བྱའོ། །དེ་ལྟར་སྐལ་བ་དང་ལྡན་པ་རྣམས་ཀྱིས་ཤེས་པར་བྱས་ལ་འཇུག་པར་བྱའོ། །དེ་ཅིའི་ཕྱིར་ཞེ་ན། གང་གཞིག་ཡུལ་གཞན་མཐོང་འདོད་པས། །མ་གྲོལ་བར་དུ་མཐོང་མི་འགྱུར། །དེ་བཞིན་ནད་རྣམས་སེལ་བ་ཡང༌། །སྨན་སོགས་མེད་པར་སེལ་མི་ནུས། །དེ་བཞིན་བདག་གཞན་དོན་འདོད་པས། །དངོས་གྲུང་རྣམ་གཉིས་མ་ཐོབ་པར། །དོན་རྣམས་གྲུབ་པར་མི་འགྱུར་ཏེ། །དེ་བས་དངོས་གྲུབ་གཉིས་ལ་འབད། །དེ་རྒྱུ་ཐབས་ནི་རྣམ་པ་གཉིས། །དེ་རྒྱུ་གདམས་ངག་ཐོབ་པའོ། །དེ་རྒྱུ་འཇུག་པ་ལ་སོགས་པ། །དེ་རྒྱུ་སྙིང་རྗེ་ཆེན་པོ་ཡིན། །གང་ཞིག་ཤེས་རབ་སྙིང་རྗེ་མེད། །ཐེག་པ་དམན་པ་སྤང་བར་བྱ། །ཤེས་རབ་སྙིང་རྗེ་ཆ་ལྡན་པ། །ཐེག་པ་ཆེ་སྟེ་གཟུང་བར་བྱ། །སྤྱིར་ན་ཐེག་པ་གཉིས་མེད་དོ། །སེམས་དང་སེམས་བྱུང་ཁྱད་པར་རོ། །གང་ཞིག་ཤེས་རབ་སྙིང་རྗེ་མེད། །སྡོམ་དང་དམ་ཚིག་ལ་མ་གནས། །འཇུག་དང་དབང་བསྐུར་མ་ཐོབ་ལ། །གསང་སྔགས་
བརྗོད་པར་མི་བྱའོ། །དེ་བཞིན་དབང་བསྐུར་མེད་པ་དང༌། །དབང་བསྐུར་དམན་དེ་མི་གནས་པས། །ལས་རྣམས་མཁས་ཀྱང་མི་བྱ་སྟེ། །འབྲས་བུ་མེད་ཅིང་བདག་ལ་འཚེ། །དེ་བས་སྡོམ་གནས་དབང་ཐོབ་ནི། །གཅེས་པར་སངས་རྒྱས་ཀུན་དག་དང༌། །བླ་མ་ཀུན་གྱིས་མཐུན་པར་གསུངས། །དད་སོགས་ལྡན་རྣམས་ཤེས་པར་མཛོད། །ཐེག་པ་ཆེན་པོའི་ལམ་གྱི་རིམ་པ་ལས་སྔགས་ཀྱི་ལམ་གྱི་རིམ་པ་བསྟན་པའི་ལེའུར་ཕྱེ་བ་སྟེ་གཉིས་པའོ།། །།བདག་གིས་དད་སོགས་སྣོད་ལྡན་ཕྱིར། །ཐེག་ཆེན་ལམ་རིམ་མདོར་བསྡུས་བྱས། །འདི་ཡི་བསོད་ནམས་གང་ཡིན་པས། །ཀུན་གྱིས་བྱང་ཆུབ་ཐོབ་པར་ཤོག །ཐེག་པ་ཆེན་པོ་ལམ་གྱི་རིམ་པ་ཞེས་བྱ་བ་སློབ་དཔོན་སྐལ་བ་བཟང་པོའི་རྡོ་རྗེ་ཞེས་བྱ་བས་མཛད་པ་རྫོགས་སོ།། །།རྒྱ་གར་གྱི་མཁན་པོ་ག་ཡ་དྷ་ར་དང༌། སྒྲ་བསྒྱུར་གྱི་ལོ་ཙཱ་བ་འབྲོག་མི་ཤཱཀྱ་ཡེ་ཤེས་ཀྱིས་བསྒྱུར་ཅིང་ཞུས་ཏེ་གཏན་ལ་ཕབ་པའོ།།