གསང་སྔགས་ལ་འཇུག་པའི་འགྲེལ་པ།
རྒྱ་གར་སྐད་དུ། མནྟྲཱ་བ་ཏ་ར་པྲྀཏྟིཿ། བོད་སྐད་དུ། གསང་སྔགས་ལ་འཇུག་པའི་འགྲེལ་པ། འཕགས་པ་འཇམ་དཔལ་གཞོན་ནུར་གྱུར་པ་ལ་ཕྱག་འཚལ་ལོ། །ཉོན་མོངས་ཤེས་བྱའི་སྒྲིབ་པ་དག །བག་ཆགས་བཅས་པར་གཏན་སྤངས་ཀྱང༌། །ཐུགས་རྗེས་འགྲོ་བའི་དོན་བཞུགས་པའི། །སྐྱོབ་པ་རྣམས་ལ་ཕྱག་འཚལ་ནས། །དགོངས་དོན་ཟབ་མོ་བསྡུས་པའི་དོན། །ཚིག་རེ་ནས་ནི་དབྱེ་བར་བྱ། །དངོས་པོའི་དེ་ཉིད་རང་བཞིན་འོད་གསལ་མངོན་མཛད་ནས། །ཞེས་བྱ་བ་ལ་སོགས་པ་ལ། དངོས་པོ་ནི་གཟུང་བ་དང་འཛིན་པའི་མཚན་ཉིད་ཅན་རྣམས་སོ། །དེའི་དེ་ཉིད་ནི་སྐྱེ་བ་མེད་པའོ། །སེམས་རང་བཞིན་གྱིས་འོད་གསལ་བ་དེས་དེ་ཉིད་མངོན་སུམ་དུ་མཛད་པ་ནི་དེའི་བདག་ཉིད་དུ་གྱུར་པའོ། །དེ་ལྟ་བུ་མངོན་སུམ་དུ་མཛད་ན་ཡང༌། ཐུགས་རྗེ་ཆེན་པོས་གདུལ་བྱའི་དབང་གིས་སྐུའི་ཆ་བྱད་སྣ་ཚོགས་དང༌། ཚིག་དང་ཡི་གེ་དུ་མས་དེ་ཁོ་ན་ཉིད་ཇི་ལྟར་འོས་པ་སྟོན་པར་མཛད་པའི་སྐུ་དང༌། གསུང་དང༌། ཐུགས་རྡོ་རྗེ་གསུམ་མི་ཕྱེད་པའི་བདག་ཉིད་ཅན་གྱི་སྐུ་ལ་ཕྱག་འཚལ་ནས་སོ། །ཅི་ཞིག་བྱ་ཞེ་ན། རབ་ཏུ་གསང་བ་བློ་མཆོག་ཡུལ་གྱུར་གསང་སྔགས་དོན། །ཞེས་བྱ་བ་ལ་སོགས་པ་སྨོས་ཏེ། རབ་ཏུ་གསང་བ་ནི་དངོས་པོར་མངོན་པར་ཞེན་པ་རྣམས་ལའོ། །བློ་མཆོག་ཡུལ་གྱུར་ཞེས་བྱ་བ་ནི་ཟབ་ཅིང་རྒྱ་ཆེ་བ་ལ་མོས་པ་རྣམས་ཀྱི་སྤྱོད་ཡུལ་ཡིན་པས་སོ། །གསང་སྔགས་དོན་ཞེས་བྱ་བ་ནི་དགོངས་པ་སྣ་ཚོགས་ཀྱིས་བསྟན་པའི་ཚིག་རྣམས་སོ། །ལོག་པར་རྟོགས་པ་ནི་ཕྱིན་ཅི་ལོག་ཏུ་བཟུང་བ་དང༌། དམ་པ་མ་ཡིན་པའི་བླ་མའི་གདམས་ངག་གི་དབང་གིས་སྒྲོ་འདོགས་སྐུར་པ་འདེབས་ཤིང༌། འདོད་ཆགས་ལ་སོགས་པ་ཉོན་མོངས་པའི་དབང་གིས་སྒྲ་ཇི་བཞིན་འཇུག་པར་བྱེད་པ་རྣམས་ཕྱིན་ཅི་མ་ལོག་པའི་དོན་རྟོགས་ཤིང་གོ་བར་བྱེད་པའི་ཕྱིར་དྲིས་པའི་ལན་གདབ་པའི་ཚུལ་གྱིས། རྒྱུད་ཡང་དག་པ་རྣམས་ལས་བཏུས་ནས་ཅུང་ཟད་ཅིག་ཙམ་བདག་གིས་བྲི་བར་
བྱའོ་ཞེས་བྱ་བའི་དོན་ཏོ། །བསྐལ་པ་ཆེན་པོ་རབ་མང་བས། །ཞེས་བྱ་བ་ལ་སོགས་པ་ལ་ཕ་རོལ་ཏུ་ཕྱིན་པའི་ཚུལ་ལམ། ལམ་གཞན་གྱིས་བསྐལ་པ་ཆེན་པོ་རབ་ཏུ་མང་པོས་བགྲོད་པར་བྱ་བའི་ས་རྣམས་དང༌། འོག་མིན་ལ་སོགས་པ་སངས་རྒྱས་ཀྱི་ཞིང་ཡོངས་སུ་དག་པ་རྣམས་སུ་ཇི་ལྟར་བསྒོམ་པ་དང༌། བཟླས་པ་དང༌། མཆོད་པ་ལ་སོགས་པས་བསྡུས་པ་དམ་ཚིག་དང༌། ལྷའི་ང་རྒྱལ་ལ་སོགས་པས། སྐྱེ་བ་འདིའམ་ཞེས་བྱ་བ་ཚེ་འདི་ལའམ། གཞན་དག་ཅེས་བྱ་བ་ཚེ་གསུམ་གྱིས་སོ། །སྔགས་པ་ཞེས་བྱ་བ་ནི་སྒོ་འདིར་ཞུགས་པའི་རྣལ་འབྱོར་པའོ། །མྱུར་དུ་འཇུག་པ་ནི་ཚེ་འདིའམ། སྐྱེ་བ་འགས་སོ། །རྒྱུ་དང་རྐྱེན་ནི་གང་དང་གང་ཞེས་བྱ་བ་ནི། དེ་ལྟར་མྱུར་དུ་འཇུག་པའི་རྒྱུ་ནི་གང་ཡིན། །རྐྱེན་ནི་གང་ཡིན་ཞེས་དྲིས་པའོ། །དེ་བཞིན་དུ་འོག་མ་དག་ལ་ཡང་སྦྱར་བར་བྱ་སྟེ། བྱ་བ་དང་བཅས་པའི་བྱེད་པ་པོ་ལྟ་བུ་ནི་གང་ཡིན། དེའི་གྲུབ་པའི་དངོས་གྲུབ་ནི་གང་ཞིག་ཡིན། གྲུབ་པ་ཐོབ་པའི་སྐྱེས་བུ་དེའི་སྤྱོད་པ་ནི་ཇི་ལྟ་བུ་ཡིན། འགྲུབ་པའི་དུས་ཀྱི་ངེས་པ་ནི་ཇི་ཙམ་གྱིས་ཡིན། གསང་སྔགས་ཀྱི་ཚུལ་ལ་ཞུགས་པ་ལས། འཇིག་རྟེན་པའི་དངོས་གྲུབ་འགྲུབ་པའམ། ཉན་ཐོས་སམ་རང་སངས་རྒྱས་སུ་འགྱུར་བ་ནི་ཇི་ལྟ་བུ་ཡིན། བདག་གི་དེ་ཁོ་ན་ཉིད་ནི་ཇི་ལྟ་བུ་ཡིན། ལྷའི་དེ་ཁོ་ན་ཉིད་ནི་གང་ཡིན། སྔགས་ཀྱི་དེ་ཁོ་ན་ཉིད་ནི་ཇི་ལྟ་བུ་ཡིན། ལམ་ནི་གང་ཡིན། ལམ་མ་ཡིན་པ་ནི་གང་ཡིན། གཞིའི་དམ་ཚིག་ནི་གང་ཡིན། ཡན་ལག་གི་དམ་ཚིག་ནི་གང་ཡིན། རྟག་ཏུ་བྱ་བའི་ཆོ་གའི་རྣམ་པར་ངེས་པ་ནི་གང་ཡིན་ཞེས་དྲི་ཚིག་བཅོ་ལྔས་དྲིས་པ་དང༌། དེ་དག་རེ་རེ་ནས་ལན་གདབ་པའི་ཕྱིར། དཔེར་ན་སྐྱེས་བུ་སྟོབས་ཆུང་བའམ། །ཞེས་བྱ་བ་ལ་སོགས་པ་སྨོས་ཏེ། དཔེར་ན་སྐྱེས་བུ་བཀྲེས་པའམ། སྐོམ་པའམ། ནད་ཀྱིས་མནར་བ་ཉམ་ཆུང་བར་གྱུར་པའམ། ཕྱུགས་ཏེ་བ་ལང་ལ་སོགས་པས་དྲངས་པ་ཤིང་རྟས་ལོའམ་ཟླ་བ་མང་པོས་བགྲོད་པར་བྱ་བའི་གནས་དེར། རྐང་མགྱོགས་གྲུབ་པའི་སྐྱེས་བུའམ་ཉི་མ་དང་ཟླ་བས་ནི་སྐད་ཅིག་མ་འགས་འགྲོ་བར་འགྱུར་རོ་ཞེས་བྱ་བའི་དོན་ཏོ། །དེ་བཞིན་ཕ་རོལ་ཕྱིན་པའམ། །ཞེས་བྱ་བ་ལ་སོགས་པ་ལ།
དེ་བཞིན་ཞེས་བྱ་བ་ནི་དཔེ་བཞིན་དུའོ། །ཕ་རོལ་ཏུ་ཕྱིན་པའི་ཐེག་པའམ། ལམ་གཞན་ཏེ་ཉན་ཐོས་དང༌། རང་སངས་རྒྱས་ཀྱི་ལམ་མམ། ཕ་རོལ་ཏུ་ཕྱིན་པའི་ཐེག་པ་དག་ལ་བརྟེན་ནས་སོ། །ཡུན་རིངས་འཇུག་པར་ཞེས་བྱ་བ་ནི་བསྐལ་པ་གྲངས་མེད་པ་གསུམ་མམ། དེ་བས་ཀྱང་ལྷག་པར་འཇུག་པའི་གནས་དེར་རོ། །སྔགས་པ་ཞེས་བྱ་བ་ནི་བརྩོན་འགྲུས་བརྟུལ་བ་ཅན་གྱི་རྣལ་འབྱོར་པས་ཡིན་གྱི་སྔགས་ཀྱི་སྒོར་ཞུགས་པ་ཙམ་གྱིས་ནི་མ་ཡིན་ནོ། །ཚེ་འདིས་འཇུག་ཅེས་བྱ་བས་ནི། ཚེ་འདི་ཉིད་ལ་ཡོན་ཏན་འདི་དག་འཐོབ་པའོ། །དེ་ཡང་རྒྱུ་ཅི་ཞིག་ཡིན་ཞེ་ན། སྔགས་ཀྱི་ཚུལ་མ་ནོར་བར་བསྒྲུབས་པའི་མཉམ་པ་མེད་པའི་མཐུ་ལ་བརྟེན་པའི་ཕྱིར་རོ། །དེ་ཡང་འཕགས་པ་ཞི་བའི་བློ་གྲོས་ཀྱིས་དྲིས་པ་ལས་དཔེར་ན་སྐྱེས་བུ་སྟོབས་ཆུང་བའམ། ཕྱུགས་ཀྱི་ཤིང་རྟས་ཡུན་རིང་ཞིག་གིས་བགྲོད་པར་བྱ་བའི་གནས་དེར་རྐང་མགྱོགས་གྲུབ་པའམ་ཉི་མའམ། ཟླ་བས་ནི་མྱུར་དུ་འགྲོ་བར་བྱེད་དོ། །དེ་བཞིན་དུ་ཕ་རོལ་ཏུ་ཕྱིན་པ་ལ་སྤྱོད་པའི་རིགས་ཀྱི་བུ་དག་བསྐལ་པ་རབ་འབྱམ་དག་གིས་འདའ་བའི་ས་དེ་དག་རིག་སྔགས་འཆང་རབ་ཏུ་བརྟུལ་བས་འཇུག་པས་ཚེ་འདི་ཉིད་ལ་འཐོབ་པ་ནི་མཐུ་མི་མཉམ་པ་ལ་བརྟེན་པ་ཡིན་པའི་ཕྱིར་རོ་ཞེས་གསུངས་པ་ཡིན་ནོ། །དེ་ཡང་རྒྱུ་རྐྱེན་ཕུན་ཚོགས་ཀྱིས། །ཞེས་བྱ་བ་ལ་སོགས་པ་ལ། དེ་ལ་རྒྱུ་གང་དག་ཡིན་ཞེ་ན། རྒྱུ་ཡང་ལུས་ངག་ཡིད་ཀྱི་ལས། །ཞེས་བྱ་བ་སྟེ། སྔོན་གྱི་སྐྱེ་བ་རྣམས་སུ་སྲོག་གཅོད་པ་སྤོང་བ་ལ་སོགས་པ་དགེ་བ་བཅུ་ལ་ལེགས་པར་སྤྱད་པས། དེ་ལྟར་རྣམ་པར་སྨིན་པའི་དབང་གིས་ཐོབ་པའི་རྒྱུ་འདི་མཚན་དང་ལྡན་པའི་ལུས་ཐོབ་ཅིང་ཞེས་བྱ་བ་ལ་སོགས་པ་བསྟན་ཏེ། ལུས་མཚན་སྣ་ཚོགས་འབར་བ་དང༌། །དག་ཆངས་པའི་དབྱངས་དང༌། ཀ་ལ་པིངྐའི་སྐད་དང༌། འབྲུག་གི་སྒྲ་དང༌། སེམས་འདོད་ཆགས་སྲབ་ཅིང་ཞེ་སྡང་གི་ཟུག་རྡུ་ཕྱུང་བ་དང༌། གཏི་མུག་གི་མུན་པ་བསལ་བ་ཡིན་ཏེ། དེ་ལྟར་ལུས་ངག་ཡིད་གསུམ་ཕུན་སུམ་ཚོགས་པ་གསུམ་དང་ལྡན་པ་ནི་སྒྲུབ་པའི་མཆོག་གི་རྟེན་དུ་འདོད་དོ། །དེ་ཡང་ཀྱེ་རྒྱལ་བའི་སྲས་འདི་ལ་རྒྱུ་ནི་རིགས་གཙོ་བོ་གསུམ་
ཐོབ་པ། སྔོན་ཤིན་ཏུ་ལས་ལེགས་པར་སྤྱད་ཅིང་བྱས་པས་འཕགས་པ་ཅན་ཡིན་ནོ་ཞེས་རྒྱུད་ལས་གསུངས་པ་ཡིན་ནོ། །དེ་ལྟར་རྒྱུ་ཕུན་སུམ་ཚོགས་པ་བསྟན་ནས། རྐྱེན་ཕུན་སུམ་ཚོགས་པ་བསྟན་པར་འདོད་ནས། རྐྱེན་ཡང་རྣམ་པ་གསུམ་ཉིད་དེ། །ཞེས་བྱ་བ་ལ་སོགས་པས་བསྟན་ཏོ། །གསུམ་པོ་དེ་དག་ཀྱང་གང་ཞེ་ན། འཇུག་དང་སྦྱོར་དང་སྒྲུབ་པ་ཡི། །སྤྱོད་པ་རྣམ་པ་གསུམ་ཉིད་དོ། །ཞེས་བྱ་བས་སྨྲས་སོ། །དེ་དག་རེ་རེ་ནས་བསྟན་པར་འདོད་ནས། དེ་ལ་འཇུག་པའི་སྤྱོད་པ་ནི། །ཞེས་བྱ་བ་ལ་སོགས་པ་སྨོས་ཏེ། དང་པོར་ཇི་ལྟར་བྱ་ཞེ་ན། སྔགས་ལ་དད་པའི་སློབ་མ་ཡིས། །ཞེས་བྱ་བ་ནི་གསང་སྔགས་ཀྱི་ཚུལ་ལ་མོས་ཤིང་ཡིད་ཆེས་པའི་སློབ་མས། བླ་མ་ཡོན་ཏན་དང་ལྡན་པ། །ཞེས་བྱ་བ་ནི་ཤེས་རབ་དང་སྙིང་རྗེ་ལ་སོགས་པའི་ཡོན་ཏན་དང་ལྡན་པ་ལའོ། །དུས་རིང་བསྙེན་པ་སྔོན་འགྲོ་བས། །ཞེས་བྱ་བ་ལ་ལོ་འམ་ཟླ་བ་མང་པོར་དུས་གསུམ་དུ་མཎྜལ་བྱ་བ་དང༌། ཕྱག་འཚལ་བ་དང༌། གོས་དང༌། ཟས་དང༌། སོ་རྩི་ལ་སོགས་པ་འབུལ་ཞིང་མཉེས་པར་བྱས་ནས་བླ་མའི་བྱ་བ་བསྒྲུབ་པའོ། །མཉེས་ནས་གསོལ་བ་གདབ་བྱས་ལ། །ཞེས་བྱ་བ་ནི་དེ་ལ་དུས་རིང་པོར་བསྙེན་བཀུར་ལ་སོགས་པ་བྱས་པས་བླ་མའི་ཐུགས་མཉེས་པ་དང་གསོལ་བ་གདབ་པར་བྱ་སྟེ། ཅིའི་ཕྱིར་གསོལ་བ་གདབ་ཅེ་ན། དཀྱིལ་འཁོར་འཇུག་དང་དབང་བསྐུར་ཞིང༌། །ཞེས་བྱ་བ་ལ་སོགས་པ་སྨོས་ཏེ། དེ་ལྟར་དོན་དུ་གཉེར་བའི་སློབ་མ་ལ་དཀྱིལ་འཁོར་དུ་གཞུག་པ་དང༌། དབང་བསྐུར་བ་དང༌། དམ་ཚིག་དང་སྔོམ་པ་ལ་སོགས་པ་བླ་མས་བྱིན་ལ་རང་གང་འདོད་པའི་ལྷ་བཟུང་ནས་བཟླས་པ་བྱེད་པ་ནི། རང་གི་འདོད་ལྷ་གཟུང་བ་སྟེ། །ཞེས་པའོ། །ད་ནི་རྐྱེན་རྣམ་པ་གསུམ་ལས་གཞིའི་རྐྱེན་ཞེས་བྱ་བ་ལ། དེ་ལྟར་འཇུག་པའི་སྤྱོད་པས་བདག་ཉིད་ཞིང་ས་གཤིན་པ་ལྟར་བསྒྲུབ་པའི་སྣོད་དུ་རུང་བར་བྱས་ནས་དངོས་གྲུབ་སྒྲུབ་པར་འདོད་ན། དེ་ལ་སྦྱོར་བའི་འདོད་པ་ནི། །མཐུན་པའི་གནས་སོགས་དེ་དང་དེར། །ཞེས་བྱ་བ་ལ་སོགས་པ་སྨོས་ཏེ། ཕུག་གམ། ལྷ་ཁང་སྟོང་པའམ། སྨན་ལྗོངས་སམ། སྔར་གྲུབ་པ་ཐོབ་པའི་གནས་ལ་སོགས་པར་གནས་ལ། འཇིག་རྟེན་པའི་ལས་ཀྱི་མཐའ་ངན་པ་རྣམ་པར་གཡེངས་པའི་རྒྱུ་ཐམས་ཅད་སྤངས་ནས། རང་གི་འདོད་པའི་
ལྷའི་རས་བྲིས་ལ་སོགས་པ་བྲིས་ནས། དང་པོར་སྭ་བྷཱ་བ་ཤུདྡྷཿ་ཞེས་བྱ་བ་ལ་སོགས་པའི་སྔགས་བཟླས་ལ། སྟོང་པ་ཉིད་དུ་སྒོམ་ཞིང༌། བྱམས་པ་ལ་སོགས་པ་ཚད་མེད་པ་རྣམས་བསྒོམ་པ་དང༌། རང་གི་འདོད་པའི་ལྷ་དཔའ་བོ་གཅིག་བུའམ། དཀྱིལ་འཁོར་གྱི་ལྷ་ཡང་རུང༌། ཆོ་ག་བཞིན་དུ་ཐུན་གསུམ་མམ། ཐུན་བཞིར་བསྒོམ་པ་དང་བཟླས་པ་བྱས་ལ། ལངས་པའི་དུས་སུ་ཡང་ཁ་ཏོན་དང༌། གཏོར་མ་གཏང་བ་དང༌། དཀོན་མཆོག་ལ་མཆོད་པ་དང༌། སྦྱིན་པ་གཏང་བ་ལ་སོགས་པ་བྱའོ། །དེ་ལྟར་སྤྱད་པས་ཅིར་འགྱུར་ཞེ་ན། སྡིག་ཆེན་ཀུན་ལས་གྲོལ་ནས་ནི། །ཞེས་བྱ་བ་སྨྲས་ཏེ། མཚམས་མེད་པ་ལྔ་ལ་སོགས་པ་བྱས་པའི་སྡིག་རྣམས་བྱང་བར་འགྱུར་རོ། །དེ་ཙམ་དུ་ཟད་དམ་ཞེ་ན། བསྐལ་བ་དུ་མར་སྤྱད་པ་ཡི། །བྱང་ཆུབ་སེམས་དཔའ་དང་མཚུངས་འགྱུར། །ཞེས་བྱ་བ་ལ། ཕ་རོལ་ཏུ་ཕྱིན་པའི་ཚུལ་ལ་ཞུགས་པའི་བྱང་ཆུབ་སེམས་དཔའ་རྣམས་ཀྱིས་བསྐལ་པ་མང་པོར་འབད་པ་བྱས་པ་དང༌། ཚེ་འདི་ཉིད་ལ་མཚུངས་པར་འགྱུར་རོ། །འདི་ནི་ཡོངས་འགྱུར་རུང་བའི་རྐྱེན། །གཉིས་པ་ཡིན་པར་བསྟན་པ་ཡིན། །ཞེས་བྱ་བ་ལ། འདི་ནི་ཞེས་བྱ་བ་ནི་སྦྱོར་བའི་སྤྱོད་པ་འདིའོ། །ཡོངས་འགྱུར་རུང་བའི་རྐྱེན་ཞེས་བྱ་བ་ནི་མིང་དང༌། རུས་དང༌། རིགས་དང༌། བདག་འཛིན་ལ་སོགས་པ་དང་ལྡན་པའི་སེམས་ཅན་གྱི་རྒྱུ་འདི་ལ་སངས་རྒྱས་དང་བྱང་ཆུབ་སེམས་དཔའི་སྐུ་དང༌། ཡོན་ཏན་དཔག་ཏུ་མེད་པར་འགྱུར་དུ་རུང་བའི་རྐྱེན་གྱིས་སྦྱོར་བའི་སྤྱོད་པ་ཡིན་པས་ཡོངས་འགྱུར་དུ་རུང་བའི་རྐྱེན་ཞེས་བྱ་བའོ། །གཉིས་པ་ཞེས་བྱ་བ་ནི། འཇུག་པའི་སྤྱོད་པ་ལ་ལྟོས་ནས་སོ། །དེ་ལྟར་སྦྱོར་བའི་སྤྱོད་པ་བསྟན་ནས། ད་ནི་བསྒྲུབ་པའི་སྤྱོད་པ་བསྟན་པའི་ཕྱིར། དེ་ལ་སྒྲུབ་པའི་སྤྱོད་པ་ནི། །དཔེར་ན་ལེགས་པར་བཀྲུས་པའི་རས། །ཁ་དོག་རྣམས་སུ་བསྒྱུར་བ་ན། །ཚེགས་ནི་ཆུང་སྟེ་གཟབ་འོས་ལྟར། །སྒྲུབ་བའི་སྤྱོད་པ་བསྒྲིམས་དགོས་ཀྱི། །ཧ་ཅང་དཀའ་བ་འང་མ་ཡིན་ནོ། །ཞེས་བྱ་བ་སྨོས་ཏེ། སྒྲུབ་པའི་སྤྱོད་པ་ནི་དཔེར་ན་ལེགས་པར་བཀྲུ་བཤལ་བྱས་པའི་རས་དང༌། སྣམ་བུ་ལ་སོགས་པ་ཚོན་རྣམས་སུ་ཁ་དོག་བསྒྱུར་བ་ན། དཀའ་བླས་ནི་ཆུང་ལ་གཟབ་ནི་དགོས་པ་ཡིན་པ་ལྟར་སྒྲུབ་པའི་སྤྱོད་པ་ཡང་ཤིན་ཏུ་བསྒྲིམས་ཤིང་མ་ཡེངས་པར་ནི་བྱ་དགོས་ལ། ཧ་ཅང་དཀའ་ཞིང་ཚེགས་ཆེ་བ་ནི་མ་ཡིན་ནོ། །
དེ་ཡང་བྱང་ཆུབ་སེམས་དཔའ་ཞི་བའི་བློ་གྲོས་ཀྱིས་དྲིས་པ་ལས་འདི་ལྟ་སྟེ་དཔེར་ན་ཡོངས་སུ་སྦྱངས་པའི་རས་ལ་ཚོན་གྱིས་ཁ་བསྒྱུར་བ་ནི་རབ་ཏུ་གཟབ་པར་རིགས་ལ། ཚེགས་ཆེ་བས་ནི་མ་ཡིན་ནོ། །དེ་བཞིན་དུ་བསྒྲུབ་པའི་སྤྱོད་པ་འདི་ཡང་རབ་ཏུ་བསྒྲིམས་པས་འཇུག་དགོས་ཀྱི་ཆེས་དཀའ་བར་ནི་མི་བརྗོད་དོ་ཞེས་གསུངས་པ་ཡིན་ནོ། །དེ་ཡང་ཅིའི་ཕྱིར་ཞེ་ན། སྦྱོར་བའི་སྤྱོད་པས་རྒྱུད་སྨིན་པའི། །གང་ཟག་བསྒྲུབ་ལ་འཇུག་པ་ནི། །ཞེས་བྱ་བ་སྨོས་ཏེ། འདི་ལྟར་སྔར་སྦྱོར་བའི་དུས་སུ་ཚོགས་ཁྱད་པར་ཅན་རིང་དུ་བསགས་པས་རྒྱུད་སྨིན་པར་བྱས་པའི་སྒྲུབ་པ་པོ་ཡིན་པས་སོ། །དེ་ལྟ་བུའི་གང་ཟག་དེ་ཡང་བསྒྲུབ་པ་ལ་འཇུག་པ་ན། ཇི་ལྟར་བྱ་ཞེ་ན། གནས་དང་གྲོགས་དང་ལོངས་སྤྱོད་དང༌། །བསམ་པ་མ་ཡིན་པ་རྣམས་སྤང༌། །ཞེས་བྱ་བ་སྨྲས་ཏེ། གནས་མ་ཡིན་པ་ནི་བྱང་ཆུབ་ཆེན་པོ་ལ་སོགས་པ་བསྒྲུབ་པའི་གནས་བསྟན་པ་ལས་གཞན་པ་མུ་སྟེགས་བྱེད་ཀྱི་གནས་དང༌། ཚོང་འདུས་དང་སྐྱེ་བོ་མང་པོ་འདུ་བའི་ས་རྣམས་སྤངས་པའོ། །གྲོགས་མ་ཡིན་པ་ནི་འདོད་པ་དང་གཉིད་དང༌། རྨུགས་པ་ལ་དགའ་བ་དང༌། ཞེ་སྡང་དང་ཕྲག་དོག་ཆེ་བ་དང༌། དབང་མ་བསྐུར་བ་དང༌། གསང་སྔགས་ལ་དད་པ་མེད་པ་རྣམས་སྤངས་ལ། བདག་པས་ཡོན་ཏན་ལྷག་པར་གྱུར་པའམ། བདག་དང་མཉམ་པ་དང་ལྷན་ཅིག་གནས་པའོ། །ལོངས་སྤྱོད་མ་ཡིན་པ་ནི་སྔགས་བ་སེམས་རྣམ་པར་གཡེང་བར་བྱེད་པའི་རྒྱུ་བུད་མེད་དང༌། ཆང་ལ་སོགས་པ་ལྷག་པར་ཞེན་པ་སྐྱེ་བའི་གནས་སུ་གྱུར་པ་རྣམས་སྤང་བའོ། །བསམ་པ་མ་ཡིན་པ་ནི་འདོད་ཆགས་དད། ཞེ་སྡང་དང༌། གཏི་མུག་དང༌། ང་རྒྱལ་དང༌། ཕྲག་དོག་ལ་སོགས་པ་སྔོན་དུ་སོང་བའི་སེམས་ཀྱི་འཇུག་པ་སྤང་བའོ། །དེ་ཡང་རྒྱུད་ལས་རང་རྒྱུད་རབ་ཏུ་སྨིན་པར་བྱ་བའི་སྔགས་པ་བསྒྲུབ་པའི་སྤྱོད་པ་ལ་འཇུག་པ་ན། གནས་མི་མཐུན་པ་དང༌། གྲོགས་མ་ཡིན་པ་དང༌། རྫས་མ་ཡིན་པ་དང། བསམ་པ་མ་ཡིན་པ་རྣམས་སྤང་བར་བྱའོ་ཞེས་གསུངས་པ་ཡིན་ནོ། །དམིགས་པའི་དོན་ལ་རྩེ་གཅིག་གཞག །ཅེས་བྱ་བ་ནི་མཉམ་པར་གཞག་པའི་ཚེ་ནི་བདག་གི་དེ་ཉིད་དམ། ལྷའི་དེ་ཉིད་ལ་རྩེ་གཅིག་ཏུ་བྱས་ལ། ལངས་པའི་ཚེ་ནི་ཐམས་ཅད་སྒྱུ་མ་ལྟ་བུར་མོས་པས་སྤྱོད་
པས་སོ། །འདི་ནི་མྱུར་དུ་འཕགས་པའི་རྐྱེན། །གསུམ་པ་ཡིན་པར་བསྟན་པ་ཡིན། །ཞེས་བྱ་བ་ལ་འདི་ནི་ཞེས་བྱ་བ་ནི་བསྒྲུབ་པའི་སྤྱོད་པ་འདིའོ། །མྱུར་དུ་འཕགས་པའི་རྐྱེན་ཞེས་བྱ་བ་ནི་གྲུབ་པ་མངོན་སུམ་དུ་བྱེད་པའི་རྐྱེན་ཡིན་པའོ། །གསུམ་པ་ཞེས་བྱ་བ་ནི་འཇུག་པ་དང་སྦྱོར་བའི་སྤྱོད་པ་ལ་ལྟོས་ནས་གསུམ་པ་ཡིན་པས་སོ། །ད་ནི་སྤྱོད་པ་གསུམ་པོ་དག་གི་ངོ་བོ་ཇི་ལྟ་བུ་ཡིན་པ་དང༌། རྒྱུའི་གཙོ་བོ་གང་ཡིན་པ་བསྟན་པའི་ཕྱིར། དེ་ལ་འཇུག་པའི་སྤྱོད་པ་ནི། །དངོས་གྲུབ་སྐྱེ་བ་ཞིང་དང་འདྲ། །དེ་ལ་སྦྱོར་པའི་སྤྱོད་པ་ནི། །དངོས་གྲུབ་འབྱུང་བ་མྱུ་གུ་འདྲ། །དེ་ལ་བསྒྲུབ་པའི་སྤྱོད་པ་ནི། །འབྲུ་ཡི་ཚོགས་རྣམས་སྨན་པ་བཞིན། །དེ་དག་ཀུན་ལའང་གཙོ་བོ་ནི། །ལས་བཟང་དུ་མས་སྨིན་བྱས་པའི། །སེམས་ནི་ས་བོན་འདྲ་བའི་ཕྱིར། །ཕུལ་དུ་བྱུང་བའི་རྒྱུར་རབ་གནས། །ཞེས་བྱ་བས་བསྟན་ཏེ་སྔར་རྐྱེན་རྣམ་པ་གསུམ་རྒྱས་པར་བསྟན་པའི་འཇུག་པའི་སྤྱོད་པས་ནི་ཞིང་ས་བཟང་པོ་ལྟར་སེམས་དངོས་གྲུབ་སྐྱེ་བའི་ཞིང་དུ་བྱས་པ་ཡིན་ལ། སྦྱོར་བའི་སྤྱོད་པས་ནི་ས་བོན་དང་བཅས་པའི་ཞིང་ས་བཟང་པོ་ལས་མྱུ་གུ་འབྱུང་བ་ལྟ་བུ་ཡིན་ནོ། །བསྒྲུབ་པའི་སྤྱོད་པ་ནི་རིམ་གྱིས་འབྲུའི་ཚོགས་སྨིན་པ་ལྟ་བུ་ཡིན་ཏེ། སྤྱོད་པ་དེ་དག་ཀུན་ལའང་གཙོ་བོ་ནི་སྔོན་གྱི་ཚེ་རབས་དག་ཏུ་ལས་བཟང་པོ་དུ་མས་སྨིན་པར་བྱས་པའི་སེམས་ཁོ་ན་ས་བོན་དང་འདྲ་བ་ཡིན་པའི་ཕྱིར། ཕུལ་དུ་བྱུང་བའི་རྒྱུར་རབ་ཏུ་གནས་པ་ཡིན་ཏེ། རྒྱས་པར་གོང་དུ་བསྟན་པས་ཡང་མ་སྦྲོས་པ་ཡིན་ནོ། །དེ་ལྟར་རྒྱུ་རྐྱེན་ཕུན་སུམ་ཚོགས་པ་དང་ལྡན་པའི་སྔགས་པས་འབྲས་བུ་ཅི་ཞིག་འཐོབ་པར་འགྱུར་ཞེ་ན། སྔགས་པས་ས་རྣམས་རབ་གནོན་ཅིང༌། །མངོན་པར་ཤེས་པ་ལྔས་རྩེ་ལ། །དག་པའི་སངས་རྒྱས་ཞིང་དུ་འགྲོ། །ཞེས་བྱ་བ་སྨྲས་ཏེ། དེ་ལྟར་རྒྱུ་རྐྱེན་ཕུན་སུམ་ཚོགས་པ་དང་ལྡན་པའི་སྔགས་པ་དེ་ནི་སྐྱེ་བ་འདི་ལས་རྣམས་རབ་ཏུ་གནོན་ཅིང་མངོན་པར་ཤེས་པ་ལྔས་རྩེ་ཞིང་འོག་མིན་གྱི་འཇིག་རྟེན་ནམ། མངོན་པར་དགའ་བ་ལ་སོགས་པའི་སངས་རྒྱས་ཀྱི་ཞིང་ཡོངས་སུ་དག་པ་རྣམས་སུ་ཡང་ཚེ་འདི་ཉིད་ལ་འགྲོ་བར་ནུས་པར་འགྱུར་རོ། །འོ་ན་དེ་ལྟར་རྒྱུ་རྐྱེན་ཕུན་སུམ་ཚོགས་པའི་སྤྱོད་པ་དེ་དག་ཐམས་ཅད་ལ་གཙོ་བོར་གྱུར་པའི་བྱེད་པ་བོ་གང་ཞིག་ཡིན་ཞེ་ན། དེ་ལ་བྱ་བ་དང་
བཅས་པའི། །བྱེད་པ་པོ་དང་འདྲ་བར་ནི། །རྣམ་པ་གསུམ་དུ་ཤེས་བྱ་སྟེ། །ཞེས་བྱ་བ་སྨྲས་སོ། །གསུམ་པོ་ཉིད་གང་དང་གང་ཡིན་ཞེ་ན། བརྩོན་འགྲུས་ཤིན་ཏུ་འབར་བ་དང༌། །སེམས་ནི་དམིགས་ལ་རྩེ་གཅིག་དང༌། །ཡང་དག་ལྟ་དང་ལྡན་པའོ། །དེ་ལ་བརྩོན་འགྲུས་ཤིན་ཏུ་འབར་བ་ནི་མགོ་ལ་མེ་འབར་བ་གསད་པ་ལ་ཤིན་ཏུ་བརྩོན་པ་ལྟར་དགེ་བའི་ཕྱོགས་ལ་གཅིག་ཏུ་བརྩོན་པའོ། །སེམས་དམིགས་པ་ལ་རྩེ་གཅིག་པ་ནི་དམིགས་པ་ལ་མཉམ་པར་གཞག་པའི་ཚེ་ཆར་དང༌། ཉི་མ་དང༌། རླུང་དང༌། རྔ་དང༌། དུང་གི་སྒྲ་ལ་སོགས་པས་ཀྱང་མི་གཡོ་བའོ།། ཡང་དག་པའི་ལྟ་བ་དང་ལྡན་པ་ནི་རྒྱུ་དང་འབྲས་བུ་ལ་སྐུར་པ་མི་འདེབས་ཤིང་རྣམ་པར་སྨིན་པ་ལ་ཡིད་ཆེས་པའོ། །དེ་ལྟའི་བྱ་བ་དང་ལྡན་པའི། །གྲུབ་པའི་དངོས་གྲུབ་གང་ཞེ་ན། །ཞེས་བྱ་བ་ནི། འོ་ན་དེ་ལྟར་དཀའ་བ་སྣ་ཚོགས་དང་ལྡན་པའི་བྱ་བ་སྒྲུབ་པའི་དངོས་གྲུབ་དེ་ཇི་ལྟ་བུ་ཞིག་ཡིན་ཞེས་དྲིས་པ་དང༌། ལུས་དང་གནས་དང་ལོངས་སྤྱོད་དག །ཅེས་བྱ་བ་ལ་སོགས་པས་བསྟན་ཏོ། །མི་ལས་ཁྱད་པར་འཕགས་པ་སྟེ། །ཞེས་བྱ་བ་ལ་ལུས་མི་ལས་ཁྱད་པར་དུ་འཕགས་པ་ནི་གསེར་གྱི་ཁ་དོག་དང༌། མཚན་དང་དཔེ་བྱད་ཀྱིས་བརྒྱན་པ་ལ་སོགས་པ་ལའོ། །གནས་དང་ལོངས་སྤྱོད་ནི་ལྷའི་གཞལ་ཡས་ཁང་ལ་སོགས་པ་དང༌། ཆོས་ཀྱི་ལོངས་སྤྱོད་པ་ལ་སོགས་པ་དག་གོ །ཚེ་ལ་དབང་སྒྱུར་བ་ནི་འདོད་ན་བསྐལ་པར་ཡང་གནས་ཤིང་སེམས་ཅན་གྱི་དོན་མཐོང་ན་ལུས་གཞན་ལེན་པའོ། །མི་ཁོམ་པར་སྐྱེ་བ་ལས་གཏན་དུ་གྲོལ་ཞེས་བྱ་བ་མི་ཁོམ་པ་བརྒྱད་པོ་དེ་དག་ཏུ་སེམས་ཅན་གྱི་དོན་མཐོང་ནས་རང་གི་འདོད་པའི་དབང་གིས་སྐྱེ་བ་ལེན་པ་ནི་སྲིད་ཀྱི། ལས་དང་ཉོན་མོངས་པའི་རྒྱུས་དེ་དག་ཏུ་མི་སྐྱེ་བའོ། །སངས་རྒྱས་འབྱུང་དང་ཕྲད་སོགས་དང༌། །ཞེས་བྱ་བ་ནི་ཚེ་རབས་ཐམས་ཅད་དུ་སངས་རྒྱས་འབྱུང་བ་དང་ཕྲད་པའམ། དེའི་དམ་པའི་ཆོས་གནས་པ་དང་ཕྲད་པའོ། །སོགས་པས་བསྡུ་བ་ནི་བྱང་ཆུབ་སེམས་དཔའ་རྣམས་དང་འགྲོགས་པ་དང་མི་འབྲལ་བའོ། །འདོད་ཡོན་ལྔ་པོ་ཤེས་བཞིན་དུ། །སྤྱོད་ལ་འཆིང་བར་མི་འགྱུར་དང༌། །ཞེས་བྱ་བ་ལ་འདོད་པའི་ཡོན་ཏན་ལྔ་པོ་རང་གི་སེམས་གཟུང་བར་སྣང་བ་ཉིད་གཟུགས་རྡོ་རྗེ་ལ་སོགས་པ་ལོངས་སྤྱོད་
དུ་ཤེས་ཤིང༌། ཕུང་པོ་དང༌། ཁམས་དང༌། སྐྱེ་མཆེད་རྣམས་སངས་རྒྱས་དང་བྱང་ཆུབ་སེམས་དཔར་རྟོགས་པས་མཆོད་པ་དང༌། མཆོད་པའི་གནས་རྣམས་སེམས་གཟུང་འཛིན་གྱི་རྣམ་པ་ཅན་དུ་རོ་གཅིག་པར་ཤེས་པས་ལོངས་སྤྱོད་ཀྱང་འཆིང་བར་ཡང་མི་འགྱུར་ལ་བསོད་ནམས་ཆེན་པོར་ཡང་འགྱུར་བའོ། །བདག་གཞན་ཕན་སྐྱེད་ནུས་པའོ། །ཞེས་བྱ་བ་ནི། མ་འོངས་པའི་དུས་རིང་པོ་དག་ཏུ་བདག་དང་གཞན་གྱི་མཐོ་རིས་དང༌། ཐར་པའི་བདེ་བ་སྐྱེད་ནུས་པའོ། །གྲུབ་པའི་སྤྱོད་པ་གང་ཞེ་ན་ཞེས་བྱ་བ་ལ་དེ་ལྟ་བུའི་གྲུབ་པ་ཐོབ་པའི་གྲུབ་པའི་སྐྱེས་བུ་དེ་སྤྱོད་པ་ཇི་ལྟ་བུ་ཡིན་ཞེ་ན། ཡུལ་དང་དུས་ནི་དེ་དང་དེར། །ཞེས་བྱ་བ་ལ་སོགས་པ་སྨོས་ཏེ། སངས་རྒྱས་ཀྱི་ཞིང་ཡོངས་སུ་དག་པ་རྣམས་སམ་ལྷའི་གནས་ལ་སོགས་པ་དེ་དང་དེར་རོ། །འབྱོར་པའི་བདེ་བ་ལ་སྤྱོད་ཅིང༌། །ཞེས་བྱ་བ་ལ། མི་ལས་ཁྱད་པར་དུ་འཕགས་པའི་གཟུགས་ལ་སོགས་པའི་ལོངས་སྤྱོད་ཀྱི་བདེ་བ་གྱ་ནོམ་པ་ལ་བདག་ཉིད་སྤྱོད་པའོ། །དེ་བཞིན་འཕགས་པ་རྣམས་ལ་ཡང༌། །ཅི་ནུས་པར་ནི་ཆོད་པ་དང༌། །ཞེས་བྱ་བ་ལ། བདག་སྤྱོད་པ་དེ་བཞིན་དུ་འཕགས་པ་རྣམས་ལ་ཡང་སྟེ། སངས་རྒྱས་དང་བྱང་ཆུབ་སེམས་དཔའ་རྣམས་དང༌། དགྲ་བཅོམ་པ་དང༌། རང་སངས་རྒྱས་རྣམས་ལ་ཡང་མཆོད་པའི་སྤྲིན་རབ་འབྱམས་དཔག་ཏུ་མེད་པ་དབུལ་ཞིང༌། རང་འདོད་པའི་ལྷ་མཉེས་པར་བྱེད་པ་ལ་ཡང་སྐད་ཅིག་རེ་རེས་ཀྱང་གོང་ནས་གོང་དུ་ཁྱད་པར་དུ་འཕགས་པར་འཇུག་པའོ། །ཕན་གདགས་ཚར་གཅོད་ཀྱིས་འདུལ་བའི། །ཞེས་བྱ་བ་ལ་སོགས་པ་ལ་ནད་དང་འཚེ་བ་སྣ་ཚོགས་ཀྱི་གནོད་པ་རྣམས་ལ་ནི་སྡུག་བསྔལ་སྣ་ཚོགས་ཞི་བར་བྱེད་ཅིང་ཚེ་དང་ལོངས་སྤྱོད་ལ་སོགས་པ་རྒྱས་པར་བྱེད་དོ། །ཤིན་ཏུ་གདུག་ཅིང་གཏུམ་ལ་རང་བཞིན་དན་པ་གཞན་ལ་འཚེ་བ་རྣམས་ལ་ནི་ཁྲོ་བོ་ཤིན་ཏུ་མི་བཟད་པ་ལག་ན་མཚོན་ཆ་སྣ་ཚོགས་འཛིན་ཅིང་གསོད་པ་ལ་དགའ་བ་ལྟ་བུར་སྤྲུལ་ནས་འདུལ་བར་བྱེད་དོ། །གཞན་ཡང་སེམས་ཅན་རྣམས་དང་རྗེས་སུ་མཐུན་པར་ནམ་མཁའ་ལ་འགྲོ་བ་དང༌། མེ་འབར་བ་དང༌། ཆུ་འབེབས་པ་ལ་སོགས་པ་རྫུ་འཕྲུལ་སྣ་ཚོགས་བསྟན་པས་འདུལ་བར་བྱེད་དོ། །དམྱལ་ལ་སོགས་པར་ཡུད་ཙམ་ལའང༌། །བསིལ་དང་དྲོད་སོགས་སྦྱིན་པ་
དང། །ཞེས་བྱ་བ་ན། ཚ་བའི་དམྱལ་བ་རྣམས་སུ་སེར་བུའི་བསིལ་བ་དང་སྤོས་ཀྱི་ཆར་ལ་སོགས་པ་འབེབས་པས་བསིལ་བ་སྦྱིན་པར་བྱེད་དོ། །གྲང་བའི་དམྱལ་བ་རྣམས་ལ་ནི་མེའི་ཕུང་པོ་ལ་སོགས་པ་སྤྲུལ་ནས་དྲོ་བ་སྦྱིན་པར་བྱེད་དོ། །དེ་བཞིན་སེམས་ཅན་སྣ་ཚོགས་ལ།། ཆོས་རྣམས་སྣ་ཚོགས་སྟོན་པ་སྟེ། །ཞེས་བྱ་བ་ལ། ལྷ་དང༌། མི་དང༌། ལྷ་མ་ཡིན་ལ་སོགས་པ་སེམས་ཅན་མོས་པ་དང༌། སྐད་སྣ་ཚོགས་ཅན་རྣམས་ལ་སོ་སོའི་སྐད་ཀྱིས་མོས་པ་བཞིན་དུ་ཆོས་སྣ་ཚོགས་སྟོན་པའོ། །སྨན་གྱི་ལྗོན་ཤིང་ཆེན་པོ་ལྟར། །མཐོང་དང་ཐོས་དང་རེག་པ་དང། །དྲན་པས་ཀུན་ལ་ཕན་འགྱུར་བའོ། །ཞེས་བྱ་བ་ལ། དཔེར་ན་སྨན་གྱི་ལྗོན་ཤིང་ཆེན་པོ་ལ་ཞེ་སྡང་གིས་གཅད་དམ་དགའ་བས་བཅད་ཀྱང་རུང་ཇི་ལྟར་ཡང་ཕན་འདོགས་པར་བྱེད་པ་ཡིན་པ་ལྟར་གྲུབ་པའི་སྐྱེས་བུ་དེ་ལ་ཡང་སེམས་ཅན་རྣམས་ཀྱི་ཆགས་པའི་སེམས་སམ། སྡང་བའི་སེམས་ཀྱིས་ཀྱང་རུང༌། མིག་གིས་མཐོང་ངམ། རྣ་བས་ཐོས་སམ། ལུས་ཀྱིས་རེག་གམ། སེམས་ཀྱིས་དྲན་ཡང་རུང༌། ཅི་ནས་ཀྱང་ཕན་པ་འབྱུང་བར་འགྱུར་བ་ཡིན་ནོ། །དེ་ལྟར་དངོས་གྲུབ་ཐོབ་པའི་སྤྱོད་པ་ཇི་ལྟ་བུ་ཡིན་པ་བསྟན་ནས། དུས་ཇི་ཙམ་གྱིས་འགྲུབ་པར་བསྟན་པའི་ཕྱིར། གྲུབ་པའི་དུས་ནི་གང་ཞེ་ན། །ཞེས་བྱ་བ་དྲིས་པ་དང༌། རྒྱུ་དང་རྐྱེན་རྣམས་ཕུན་ཚོགས་ཤིང༌། །ཞེས་བྱ་བ་ལ་སོགས་པ་སྨྲས་ཏེ། རྒྱུ་སྔོན་གྱི་ལས་བཟང་པོ་དུ་མས་བསྐྱེད་པའི་ལུས་དང༌། ངག་དང༌། སེམས་ཡོན་ཏན་མང་པོ་འབྱུང་བའི་རྟེན་དུ་རུང་བ་དང་ལྡན་པ་དང༌། རྐྱེན་སྤྱོད་པ་རྣམ་པ་གསུམ་ལ་གོ་རིམས་བཞིན་དུ་ལེགས་པར་སློབ་པ་ནི། རྒྱུ་དང་རྐྱེན་ཕུན་སུམ་ཚོགས་པའོ། །དེ་ཡང་རྒྱུན་དུ་བཟླས་པ་དང༌། བསྒོམ་པ་དང་ལྡན་ཞིང༌། སངས་རྒྱས་དང་བྱང་ཆུབ་སེམས་དཔའ་རྣམས་ལ་དད་པའི་དཀའ་ཐུབ་ཅན་ཡིན་ན། དེའི་དངོས་གྲུབ་ནི་ཚེ་འདི་ཉིད་ལ་འགྲུབ་པར་འགྱུར་རོ། །དེའི་ཕྱིར། རྒྱུན་དུ་བཟླས་དང་བསྒོམ་པ་དང༌། །རྒྱལ་བ་སྲས་བཅས་ལ་དད་པའི། །དཀའ་ཐུབ་ཅན་གྱིས་དངོས་གྲུབ་ནི། །ཚེ་འདི་ཉིད་ལ་འགྲུབ་པར་འགྱུར། །ཞེས་སྨྲས་པ་ཡིན་ནོ། །རྒྱུ་དང་ལྡན་ཡང་རྐྱེན་འགའ་ཞིག །སྨན་གྱི་ལྗོན་
ཤིང་ཆེན་པོ་ལྟར། །མ་ཚང་བ་ནི་ཚེ་གསུམ་གྱིས། །སྟོང་ཉིད་ལེགས་མཐོང་དུས་མེད་གྲོལ། །ཞེས་བྱ་བ་ལ། ལས་བཟང་པོ་དུ་མས་བསྐྱེད་པའི་རྒྱུ་སྐྱེ་མཆེད་ཁྱད་པར་ཅན་ཡོད་ཅིང༌། སྤྱོད་པ་འགའ་ཞིག་ལས་སྤྱད་ཀྱང་སྒྲུབ་པའི་སྤྱོད་པས་མ་བསྒྲུབས་ན་ནི། ཚེ་གསུམ་ནས་འགྲུབ་པའོ། །སྟོང་པ་ཉིད་ལ་ལེགས་པར་མཐོང་བའི་སྒྲུབ་པ་པོ་ལ་ནི་གྲོལ་བ་ལ་དུས་ངེས་པ་ཡོད་པ་མ་ཡིན་ནོ། །དེ་ལྟར་གྲུབ་པའི་ངོ་བོ་དང༌། །གྲུབ་པ་ཐོབ་པའི་སྤྱོད་པ་དང༌། འགྲུབ་པའི་དུས་ངེས་པ་བསྟན་ནས། ད་ནི་འདིར་དཔྱད་པར་བྱའོ། །གསང་སྔགས་ཀྱི་ཚུལ་ལ་ཞུགས་ཤིང་དབྱད་པར་འདྲ་བ་ལས་ཁ་ཅིག་གིས་ནི་ཞི་བ་དང་རྒྱས་པ་ལ་སོགས་པ་དང༌། འཇིག་རྟེན་པའི་དངོས་གྲུབ་ཆེན་པོ་བརྒྱད་འགྲུབ་ལ། ཁ་ཅིག་གིས་ནི་ཉན་ཐོས་དང༌། རང་སངས་རྒྱས་ཀྱི་འབྲས་བུ་འགྲུབ་པ་ཇི་ལྟར་ཡིན་སྙམ་དུ་སེམས་ན། དེའི་ཕྱིར། འབྲས་བུ་དམན་པ་རྣམ་མང་ལས། །ཉན་ཐོས་རང་རྒྱལ་འགྲུབ་པ་ནི། །ཞེས་སྨྲས་ཏེ། འབྲས་བུ་དམན་པ་ནི་འཇིག་རྟེན་པའི་དངོས་གྲུབ་ལ་སོགས་པ་སྔར་བསྟན་པ་རྣམས་སོ། །དེ་རྣམས་ཀྱི་ནང་ནས་ཉན་ཐོས་ལ་སོགས་པ་འགྲུབ་པ་ཇི་ལྟ་བུ་ཡིན་ཞེ་ན། ཙནྡན་ཤིང་ནི་བསིལ་མོད་ཀྱང། །བྱུག་པའི་སྦྱོར་བས་མ་བསྟེན་པར། །བུད་ཤིང་སྦྱོར་པས་བསྟེན་ན་ནི། །ཤིན་ཏུ་སྲེག་ཅིང་གདུང་བར་འགྱུར། །ཞེས་བྱ་སྟེ། དཔེར་ན་ཙནྡན་གྱི་ཤིང་ཤིན་ཏུ་བསིལ་བ་ཡིན་ན་ཡང་བརྡར་ནས་ལུས་ལ་བསྐུ་ཞིང་བྱུག་པའི་ཚུལ་གྱིས་མ་བསྟེན་པར་བུད་ཤིང་དུ་བྱས་ནས་མེ་སྤར་ན་སྲེག་ཅིང་གདུང་བར་འགྱུར་རོ། །དཔེས་མཚོན་པའི་དོན་བསྟན་པའི་ཕྱིར། དེ་བཞིན་གསང་སྔགས་སྒོར་སྤྱོད་པས། །སེམས་ཅན་ཀུན་གྱི་ཉོན་མོངས་པའི། །གདུང་བ་ཞི་བྱེད་ཡིན་ན་ཡང༌། །སྙིང་རྗེའི་ལྕགས་ཀྱུ་དང་བྲལ་ཞིང༌། །མཚན་མེད་དགོན་པར་ཞུགས་གྱུར་ན། །ཐེག་པ་དམན་པས་མྱ་ངན་འདའ། །དེས་ན་འབྲས་བུ་དམན་ཞེས་བྱ། །ཞེས་བྱ་བ་སྨོས་ཏེ། དཔེ་བསྟན་པ་དེ་བཞིན་དུ་གསང་སྔགས་ཀྱི་སྒོར་ཞུགས་ཤིང༌། སྤྱོད་པ་ཡང་ནམ་མཁའི་ཁམས་ཀྱི་མཐས་གཏུགས་པའི་སེམས་ཅན་ཐམས་ཅད་ཀྱི་ལས་དང་ཉོན་མོངས་པའི་གདུང་བ་ཐམས་
ཅད་ཞི་བར་བྱ་བའི་ཕྱིར་ཞུགས་ཤིང་སེམས་བསྐྱེད་པ་ཡིན་ན་ཡང་སྙིང་རྗེ་ཆེན་པོས་སེམས་ཅན་ཡོངས་སུ་མི་གཏོང་བའི་ལྕགས་ཀྱུ་དང་བྲལ་ཞིང༌། བྱང་ཆུབ་སེམས་དཔའ་ཆེན་པོའི་སེམས་དང་བྲལ་བས་འཁོར་བས་སྐྱོལ་མཚན་མ་མེད་པའི་དགོན་པར་འཇུག་པར་གྱུར་ན། ཉན་ཐོས་དང༌། རང་སངས་རྒྱས་ཀྱི་ཐེག་པས་མྱ་ངན་ལས་འདའ་བར་འགྱུར་རོ། །དེ་བཞིན་དུ་འཇིག་རྟེན་པའི་འབྲས་བུ་དོན་དུ་གཉེར་བ་རྣམས་ཀྱང་དེ་ཙམ་ཞིག་ཐོབ་ནས་ཟད་པར་འགྱུར་རོ། །དེ་བཞིན་དུ་ཞེ་སྡང་སྔོན་དུ་སོང་བས་མ་གནང་བའི་མངོན་སྤྱོད་བྱེད་ཅིང༌། སྲོག་གཅོད་པ་ལ་དགའ་བ་རྣམས་ནི་དམྱལ་བའམ། སྲིན་པོའམ། གནོད་སྦྱིན་ལ་སོགས་པར་སྐྱེ་བར་འགྱུར་རོ། །དེ་ལྟར་བསམ་པ་དང་ལས་ཀྱི་ཁྱད་པར་གྱིས་གཞན་ཡང་མཚོན་པར་བྱའོ། །དེ་ཡང་འོག་ནས་རྒྱས་པར་སྟོན་པས་འདིར་མ་བརྗོད་དོ། །དེའི་ཕྱིར་གསང་སྔགས་ཀྱི་སྒོར་ཞུགས་སོ་ཅོག་ཐམས་ཅད་ཀྱིས་རྡོ་རྗེ་འཆང་གི་གོ་འཕང་ཐོབ་པ་མ་ཡིན་གྱི། འགལ་བར་སྤྱོད་པ་ཁ་ཅིག་ནི་ངན་སོང་དུ་སྐྱེ་བར་ཡང་ངེས་སོ། །དེས་ན་གསང་སྔགས་ཀྱི་སྒོར་ཞུགས་ཀྱང་དམན་པའི་གནས་ཐོབ་པར་འགྱུར་བས་ན་འབྲས་བུ་དམན་པ་ཞེས་བྱའོ། །ད་ནི་བདག་གི་དེ་ཁོ་ན་ཉིད་གང་ཡིན། ལྷ་ཡི་དེ་ཁོ་ན་ཉིད་གང་ཡིན་སྙམ་པ་ལ། དེ་ལ་དང་པོར་བདག་གི་དེ་ཁོ་ན་ཉིད་བསྟན་པའི་ཕྱིར། བདག་ལུས་ཤ་ཁྲག་རུས་པ་དང༌། །རྩ་རྒྱུས་སྤུ་སོགས་འདུས་པ་ཙམ། །བདག་ཏུ་བརྗོད་པར་བྱ་བ་ཡིན། །ཞེས་སྨྲས་ཏེ། རྟོག་པ་རྩིང་བ་དག་བདག་ཅེས་འདོགས་པའི་གཞི་ནི། བདག་གི་ལུས་ཤ་དང༌། ཁྲག་དང༌། རུས་པ་དང༌། རྩ་རྒྱུས་དང༌། མི་གཙང་བ་ལ་སོགས་པ་འདུས་པ་ཙམ་ལ་བདག་ཏུ་ང་རྒྱལ་བྱེད་ཅིང་བདག་ཅེས་བརྗོད་པ་ཡིན་ནོ། །ཆོས་དབྱིངས་སྦྱོར་བའི་གསང་སྔགས་དང༌། །དེ་ཉིད་ལ་ནི་མོས་པའི་མཐུས། །ལྷ་ཡི་གཟུགས་སུ་འབྱུང་བའི་རྟེན། །ཁྱད་པར་ཅན་དུ་གནས་པ་ནི། །རགས་པའི་བདག་གི་དེ་ཉིད་ཡིན། །ཞེས་བྱ་བ་ནི། དེ་ལྟར་རྟོག་པ་རྩིང་བས་བདག་ཏུ་བརྟགས་པ་དེ་ལ། ཨོཾ་ཤཱུ་ནྱ་ཏཱ་ཛྙཱ་ན་བཛྲ་སྭ་བྷཱ་བ་ཨཱཏྨ་ཀོ྅ ཧཾ། ཞེས་བྱ་བ་ཆོས་ཀྱི་དབྱིངས་ལ་སྦྱོར་བའི་གསང་
སྔགས་དང༌། དེ་ཁོ་ན་ཉིད་ལ་མོས་པའི་མཐུས། ཕྱིས་ལྷའི་གཟུགས་ཁྱད་པར་ཅན་འབྱུང་བའི་རྟེན་སྟོང་པ་ཉིད་ཀྱི་རྣམ་པ་ཅན་དུ་གནས་པའི་བློས་ཁྱད་པར་ཅན་གྱི་རགས་པའི་བདག་གི་དེ་ཁོ་ན་ཉིད་ཅེས་བྱའོ། །གཞན་ཡང་རྟོག་པ་ཞིབ་པ་དག །འཁོར་བར་མངོན་པར་ཕྱོགས་པའི་སེམས། །ལུས་དང་གནས་དང་ལོངས་སྤྱོད་དང༌། །དཔའ་རླབས་ལྡན་པ་འདི་ཁོ་ན། །བདག་ཏུ་བརྗོད་པའི་གཞིར་འདོད་དོ། །ཞེས་བྱ་བ་ནི། གཞན་ཡང་རྟོག་པ་ཞིབ་པ་དག་ནི་འཁོར་བ་ལ་མངོན་པར་ཕྱོགས་པའི་སེམས་ལུས་དང་གནས་དང༌། ལོངས་སྤྱོད་ཀྱི་དབའ་རླབས་དང་ལྡན་པ་འདི་ཁོ་ན་བདག་ཅེས་བརྗོད་པའི་གཞིར་འདོད་དོ། །དེ་བདག་གི་དེ་ཁོ་ན་ཉིད་གང་ཡིན་ཞེ་ན། དེ་ནི་གཟུང་འཛིན་དང་བྲལ་ཞིང༌། །རང་རིག་འོད་གསལ་དངོས་གྱུར་པ། །བདག་གི་དེ་ཉིད་ཅེས་བརྗོད་དོ། །ཞེས་བྱ་བ་སྨྲས་ཏེ། ཕུང་པོ་དང༌། ཁམས་དང༌། སྐྱེ་མཆེད་ཐམས་ཅད་ཀྱི་རང་བཞིན་གཅིག་ལ་གཟུང་འཛིན་དང་བྲལ་བ། རང་རིག་པ་འོད་གསལ་བ་ཉིད་ནི་བདག་གི་དེ་ཁོ་ན་ཉིད་ཅེས་བརྗོད་དོ། །འོ་ན་ལྷའི་དེ་ཁོ་ན་ཉིད་གང་ཡིན་ཞེ་ན། བྱེ་བྲག་ཏུ་དབྱེ་ན་མང་དུ་ཡོད་ན་ཡང་སྤྱིར་ཕྱོགས་གཅིག་ཏུ་བསྟན་པར་བྱ་བའི་ཕྱིར། དེ་ལ་ལྷ་ཡི་དེ་ཉིད་ནི། །རང་སྔགས་ཆོས་དབྱིངས་ཐུགས་ཆུད་ཅིང༌། །ནམ་མཁའི་ངོས་ལྟར་གྱུར་པ་ལས། །ཀླུ་རྣམས་ཀྱི་ནི་བྱིན་རླབས་ཀྱིས། །མདོག་དང་དབྱིབས་ནི་ཐ་དད་པའི། །སྤྲིན་རྣམས་ནམ་མཁར་འབྱུང་བ་ལྟར། །ལྷ་ཡི་སྐུ་ནི་འབྱུང་བ་ཡིན། །ཞེས་བྱ་བ་ལ་ལྷའི་དེ་ཁོ་ན་ཉིད་ནི་སྔར་བསྟན་པའི་སྔགས་བརྗོད་ཅིང་དེའི་དོན་ལ་མོས་པའི་མཐུས་ཆོས་ཀྱི་དབྱིངས་ཀྱི་རང་བཞིན་དུ་རྟོགས་ཤིང་ཁོང་དུ་ཆུད་པ་ལས་སྔོན་དུ་བསོད་ནམས་ཀྱི་ཚོགས་བསགས་པ་དང༌། སྨོན་ལམ་ཁྱད་པར་ཅན་གྱི་མཐུས། ལྷའི་སྐུ་མཚན་དང་དཔེ་བྱད་ཀྱིས་བརྒྱན་པ་འབྱུང་བར་འགྱུར་ཏེ། དཔེར་ན་ཀླུ་རྣམས་ཀྱི་བྱིན་གྱི་རླབས་ཀྱིས་རྣམ་པར་རྟོག་པ་མེད་བཞིན་དུ་ནམ་མཁའི་དཀྱིལ་དུ་མདོག་དང༌། དབྱིབས་ཐ་དད་པའི་སྤྲིན་གྱི་ཕུང་པོ་འབྱུང་བ་བཞིན་ནོ། །དེ་ལྟ་བུའི་བདག་གི་དེ་ཁོ་ན་ཉིད་དེ་དང༌། ལྷའི་དེ་ཉིད་ཟུང་དུ་འཇུག་པ་བསྟན་པའི་ཕྱིར། རྣམ་ཐར་སྒོ་གསུམ་གྱིས་བརྟགས་པས། །ཡོད་མེད་གཉིས་ལས་འདས་
པར་འགྱུར། །ཞེས་བྱ་བ་སྨོས་ཏེ། དེ་ལྟར་བདག་ཏུ་བརྟགས་པའི་གཞི་ལུས་སམ། སེམས་སམ། འབྱིན་པ་པོའི་མཚན་དང་དཔེ་བྱད་ཀྱི་རྣམ་པ་ཅན་གྱི་ལྷའི་སྐུ་ལ་དཔྱད་པ་ན། དངོས་པོ་འགའ་ཡང་མ་རྙེད་པས། དངོས་པོར་འཛིན་པའི་བློ་ལོག་པ་ནི་རྣམ་པར་ཐར་པའི་སྒོ་སྟོང་པ་ཉིད་དོ། །དེ་བཞིན་དུ་དེ་དག་གི་རྒྱུ་ཅི་ཞིག་ཡིན་ཞེས་དཔྱད་པ་ན། ངོ་བོ་འགའ་ཡང་མ་མཐོང་བ་ནི་མཚན་མ་མེད་པའོ། །དེ་བཞིན་དུ་རྒྱུ་དང་བཅས་པའི་འབྲས་བུ་ལ་སྨོན་པར་བྱ་བའི་གནས་འགའ་ཡང་ལེགས་པར་བརྟགས་ན་མ་མཐོང་བ་ནི་རྣམ་པར་ཐར་པའི་སྒོ་སྨོན་པ་མེད་པའོ། །དེ་ལྟ་བུའི་ཚུལ་གྱིས་ཡོད་མེད་གཉིས་ལས་འདས་པ་དེ་ནི་ཟུང་དུ་འཇུག་པའི་གཉིས་སུ་མེད་པའི་ཡེ་ཤེས་ཤེས་རབ་ཀྱི་ཕ་རོལ་ཏུ་ཕྱིན་པ་ཞེས་བྱའོ། །ད་ནི་སྔགས་ཀྱི་དེ་ཉིད་བསྟན་པར་འདོད་ནས། དེ་ལ་སྔགས་ཀྱི་དེ་ཉིད་ནི། །ཐབས་དང་ཤེས་རབ་ཚུལ་གནས་ལྷ། །མི་རྟོག་བཞིན་དུ་དེར་སྟོན་ཅིང༌། །སྤྱན་དྲངས་མཆོད་ནས་གཤེགས་གསོལ་བའོ། །ཞེས་སྨྲས་ཏེ། སྔགས་ཞེས་བྱ་བ་ནི་ཐབས་དང་ཤེས་རབ་ཀྱི་ཚུལ་དུ་བྱུང་བའི་ལྷ་རྣམས་སོ། །དེའི་དེ་ཉིད་ནི་མི་རྟོག་བཞིན་དུ་ཡུལ་དང་དུས་དེ་དང་དེར་གདུལ་བྱའི་བསམ་པ་སྨིན་པའི་དབང་གིས་ཐོགས་པ་མེད་པར་སྐུ་སྣ་ཚོགས་ཀྱི་སྣང་བ་སྟོན་ཅིང་ཡིད་ལ་རེ་བ་རྫོགས་པར་བྱ་བའི་ཕྱིར་བརྟན་པ་དང༌། གཡོ་བ་དང༌། སྐྱེས་པ་དང༌། བུད་མེད་ཀྱི་གཟུགས་སུ་སྟོན་པ་ལ། རང་རང་གི་ཆོ་ག་ཇི་ལྟ་བ་བཞིན་དུ་སྤྱན་དྲངས་ཤིང་བཞུགས་སུ་གསོལ་ཏེ་མཆོད་ནས། བཟླས་པ་བྱས་ལ་གཤེགས་སུ་གསོལ་བ་ནི། འདིའི་གོ་རིམས་ཡིན་ནོ། །ད་ནི་ལམ་དང་ལམ་མ་ཡིན་པ་བསྟན་པར་འདོད་ནས། ལམ་ནི་སྤྱོད་པ་རྣམ་གསུམ་སོགས། །ཇི་སྐད་གོང་དུ་སྔར་བསྟན་པའོ། །ཞེས་བྱ་བ་སྨྲས་ཏེ། དེ་ལ་ལམ་ནི་འཇུག་པ་དང༌། སྦྱོར་བ་དང༌། བསྒྲུབ་པའི་སྤྱོད་པ་ལ་སོགས་པ་སྔར་བསྟན་པ་ཐམས་ཅད་དེ། ཕྱི་ནང་གི་སྡེ་སྣོད་ཐམས་ཅད་དང་མི་འགལ་བར་བསྟན་པ་རྣམས་སོ། །ལམ་མ་ཡིན་པ་གང་ཞེ་ན། ལམ་མ་ཡིན་པ་འདི་ལྟ་སྟེ། །ལོག་པར་འཇུག་ཅིང་ཚོལ་བ་སྟེ། །བཀག་པའི་མི་དགེ་བཅུ་སྤྱོད་པའོ། །དཔེར་ན་མུ་སྟེགས་ཅན་ཁ་ཅིག །འཇུག་པའི་སྤྱོད་
པའི་དུས་ན་ཡང༌། །བུད་མེད་བསྟེན་པའི་དབང་བསྐུར་བཞིན། །ཞེས་བྱ་བ་སྨྲས་ཏེ། ལམ་མ་ཡིན་པ་ནི་དགེ་བ་བཅུ་ལས་བཟློག་པ་མ་གནང་བའི་མི་དགེ་བ་རྣམས་སྤྱོད་པ་དང༌། གཞན་ཡང་དཔེར་ན་གཞན་མུ་སྟེགས་ཅན་ཁ་ཅིག་དང་པོ་འཇུག་པའི་དུས་ན་ཡང༌། བུད་མེད་བསྟེན་པའི་མངོན་པར་དབང་བསྐུར་བ་ལེན་པར་བྱེད་པ་ལྟ་བུའོ། །ཐོག་མ་མེད་ནས་དེར་ཞེན་པས། །ཞེས་བྱ་བ་ལ། དེ་དག་བུད་མེད་ཀྱི་ལུས་ལ་ཐོག་མ་མེད་པའི་དུས་ནས་ཞེན་པ་དམ་པོས་བཅིངས་ཤིང་རང་གི་སེམས་ཀྱི་དབའ་རླབས་སུ་མ་ཤེས་ནས། ལྷག་པར་ཆགས་པས་དེ་ལ་བརྟེན་པའི་ལམ་དུ་འགྲོ་ཞིང༌། ལོག་པའི་ལམ་དབང་བསྐུར་བས་དབང་བསྐུར་ཏེ་དུས་དེའི་ཕྱི་ནས། སྦྱོར་བའི་སྤྱོད་པའི་དུས་སུ་ཡང་སྒྲུབ་པ་པོ་དེ་དག་བུད་མེད་ཀྱི་མགུལ་ནས་འཁྱུད་ཅིང༌། སྒོམ་པ་དང༌། བཟླས་བརྗོད་བྱེད་ན་ཡང་རིམ་གྱིས་འདོད་ཆགས་འཕེལ་བར་འགྱུར་རོ། །དེའི་ཕྱིར། དེ་ལ་འཁྱུད་ཅིང་ཞེན་པ་ཡིས། །བསྒོམ་དང་བཟླས་བརྗོད་བྱེད་ན་ཡང༌། །ཆགས་པ་ཕྱིར་ཞིང་འཕེལ་བར་འགྱུར། །ཞེས་བྱ་བ་སྨྲས་སོ། །བསྒྲུབ་པའི་སྤྱོད་པའི་དུས་ན་ཡང༌། །དེ་ཡི་ཐ་སྙད་ལ་དགའ་ཞིང༌། །ཚུལ་བཞིན་མ་ཡིན་ཡིད་བྱེད་པས། །འདོད་ཁམས་འདའ་བར་ཡང་མི་ནུས། །རྨད་བྱུང་ཐོབ་པར་ག་ལ་འགྱུར། །ཞེས་བྱ་བ་སྨོས་ཏེ། དེ་བཞིན་དུ་བསྒྲུབ་པའི་སྤྱོད་པའི་དུས་ན་ཡང་འཁྲིག་པའི་ཐ་སྙད་ཀྱིས་སྒོམ་པར་བྱེད་པས་འདོད་ཆགས་ཕྱིར་ཞིང་བརྟས་པར་འགྱུར་ཏེ། ཚུལ་བཞིན་མ་ཡིན་པ་ཡིད་ལ་བྱེད་པ་དང་ལྡན་པའི་ཕྱིར་རོ། །དེས་ན་འདོད་པའི་ཁམས་ལས་ཀྱང་འདའ་བར་ནུས་པ་མ་ཡིན་ན་རྨད་བྱུང་ཞེས་བྱ་བ་རྡོ་རྗེ་འཆང་གི་གོ་འཕང་འཐོབ་པར་ལྟ་ག་ལ་འགྱུར་ཞེས་བྱ་བའི་དོན་ཏོ། །དེ་བཞིན་ཞེ་སྡང་གཏི་མུག་སོགས། །སྔོན་དུ་སོང་བས་བྱས་པའི་ལས། །སྲོག་གཅོད་མ་བྱིན་ལེན་པ་དང༌། །བརྫུན་དུ་སྨྲ་དང་ཕྲ་མ་སོགས། །དེ་དག་ཐམས་ཅད་ལམ་མིན་བསྟན། །དེ་བཞིན་དུ་ཞེ་སྡང་དང༌། གཏི་མུག་དང༌། ང་རྒྱལ་དང༌། ཕྲག་དོག་དང༌། ལྟ་བ་ལ་སོགས་པ་སྔོན་དུ་སོང་བས་བྱས་པའི་ལས་སྔགས་དང་སྨན་ལ་སོགས་པའི་མཐུས་སྲོག་གཅད་དམ། ཐབས་གཞན་གྱིས་ཀྱང་རུང་སྟེ།
སྲོག་གཅོད་པ་དང༌། མ་བྱིན་པར་ལེན་པ་དང༌། བརྫུན་དང་ཕྲ་མ་ལ་སོགས་པ་ཅི་བྱས་པ་ཐམས་ཅད་ལམ་མ་ཡིན་པར་བསྟན་པ་ཡིན་ནོ། །འོ་ན་རྣལ་འབྱོར་ཆེན་པོའི་རྒྱུད་དཔལ་གསང་བ་འདུས་པ་ལ་སོགས་པ་ལས། བུ་མོ་ལོ་ནི་བཅུ་དྲུག་པ། །བྱིན་གྱི་རླབས་ཀྱིས་གནས་བསམས་ཏེ། །དབེན་པར་མཆོད་པ་བརྩམ་པར་བྱ། །ཞེས་གསུངས་པ་དང༌། དེ་བཞིན་དུ། བྷ་ག་ལ་ནི་ལིངྒ་གཞག །དབང་པོ་གཉིས་ནི་མཉམ་སྦྱོར་ཏེ། །ཞེས་བྱ་བ་ལ་སོགས་པ་གསུངས་པ་དང༌། ཁྱོད་ཀྱིས་སྲོག་ཆགས་གསང་བར་བྱ། །མ་བྱིན་པར་ཡང་བླང་བར་བྱ། །བརྫུན་གྱི་ཚིག་ཀྱང་སྨྲ་བར་བྱ། །གཞན་གྱི་བུད་མེད་སྤྱད་པར་བྱ། །ཞེས་གསུངས་པ་ཅི་ལྟ་བུ་ཡིན་ཞེ་ན། དེ་དག་ནི་སྒྲ་ཇི་བཞིན་པ་དང༌། ཅི་བཞིན་པ་མ་ཡིན་པར་ཤེས་པར་བྱ་སྟེ། སྒྲ་ཇི་བཞིན་པ་ནི་གཅིག་ཏུ་བུད་མེད་ཀྱི་ཡུལ་ལ་སྲེད་ཅིང་ཞེན་པ་རྣམས་དེ་ལ་མ་བརྟེན་པར་ཡེ་ཤེས་ཚོལ་བའི་སྐབས་མེད་པའི་ཁྱིམ་པ་རྣམས་རིམ་གྱིས་དྲང་བའི་ཕྱིར་གསང་བའི་དབང་བསྐུར་ལ་སོགས་པ་བསྟན་པ་ཡིན་ཏེ། དཔེར་ན་ནད་པའི་ནད་ལ་གནོད་པའི་ཉ་ལ་སྲེད་པ་ལ་སྨན་པ་མཁས་པས་ཉི་མའི་ཁ་དོག་དང་རོ་དང་ལྡན་པར་བཅོས་པའི་སྨན་དང་པོར་བྱིན་ནས་དེ་ལ་གོམས་པ་དང༌། ཕྱིས་སྨན་དངོས་སྟེར་བར་བྱེད་པ་ལྟར། བུད་མེད་ཀྱི་ཡུལ་ལ་ལྷག་པར་ཞེན་པ་རྣམས་ལ་དང་པོ་དེ་དང་བསྟེན་པའི་བདེ་བ་དམིགས་པ་ལ་སེམས་གོམས་པར་བསླབས་ནས་ཕྱིས་དེ་ཁོ་ན་ཉིད་དངོས་སུ་སྟོན་པར་བྱེད་པ་ཡིན་ནོ། །སྒྲ་ཅི་བཞིན་མ་ཡིན་པ་ནི་དགོངས་པ་ལུང་བསྟན་པའི་རྒྱུད་ལས། ནང་སྟོང་ལ་སོགས་བཅུ་དྲུག་པ། །མ་སྐྱེས་པ་ཡི་ཞི་བ་གང༌། །དེ་ནི་བུད་མེད་ཡིན་པར་གསུངས། །ཞེས་གསུངས་པས། སྟོང་པ་ཉིད་བཅུ་དྲུག་གམ། སྡུག་བསྔལ་ལ་ཆོས་ཤེས་པའི་བཟོད་པ་ལ་སོགས་སྐད་ཅིག་མ་བཅུ་དྲུག་གིས་རྟོགས་པར་བྱ་བའི་སྐྱེ་བའི་སྐྱེ་བ་མེད་པའི་དོན་དེ་ཉིད་བུད་མེད་ཀྱི་སྒྲས་བསྟན་པ་ཡིན་ནོ། །བྷ་ག་ལ་ནི་ལིངྒ་གཞག །ཅེས་བྱ་བའི་དོན་ཡང་འདི་ཡིན་ནོ། །བྷ་ག་ནི་དོན་དམ་པར་བདེན་པའོ། །ལིངྒ་ནི་ཀུན་རྫོབ་ཀྱི་བདེན་པའོ། །བཞག་པ་ནི་བདེན་པ་གཉིས་གཉིས་སུ་མེད་པར་དམིགས་པ་ཡིན་
གྱི་དབང་པོ་གཉིས་སྦྱང་བ་ལ་ནི་མི་བྱའོ། །འཇམ་དཔལ་གྱི་རྒྱུད་ཆེན་པོ་ལས་ཀྱང༌། གང་ཚེ་ཐུབ་པ་ནོད་པ་དང༌། །འཕགས་པའི་སྐྱེ་བོ་ཆེན་པོ་ཟད། །ས་སྟེང་མུན་པས་ཁྱབ་པ་སྟེ། །དེ་ཚེ་འཇིག་རྟེན་རབ་ཏུ་མདོངས། །རྒྱལ་བའི་སྲས་པོ་ཁྱོད་ལྟོས་ཤིག །ཡང་དག་ལམ་རྣམས་རབ་གཅོད་ཅིང༌། །དགེ་སློང་དགེ་སློང་མ་རྣམས་དོར། །ང་ཡི་དཀའ་ཐུབ་མི་ཟད་པར། །དོན་ཆེན་བྱེད་པར་མི་ནུས་པས། །ཡང་དག་དཀའ་ཐུབ་རབ་སུན་འབྱིན། །དེ་དག་འཁྲིག་པར་དགའ་བ་ཡིས། །ལོག་པའི་ལམ་ནི་འཛིན་བྱེད་ཅིང༌། །འཇུག་པར་བྱེད་བཅས་དུས་ཀུན་དུ། །བུད་མེད་བསྟེན་པའི་ལམ་འཇུག་བྱེད། །དེ་ཚེ་རྟོག་གེ་པ་དག་དང༌། །གཅེར་བུ་གསང་ཚིག་ལ་བརྟེན་པའི། །སྔགས་ཀྱི་གཞུང་སྤྱོད་དུ་མ་དག །ལོག་པའི་ལམ་ཆེན་འདྲེན་པ་འབྱུང༌། །ཞེས་གསུངས་པས། དེ་ལྟ་བུ་དག་ནི་ཕྱི་རོལ་པའི་ལུགས་ལ་བརྟེན་པའི་འཁྲུལ་པ་དང་བཅས་པའི་ལམ་ཡིན་པར་བསྟན་པ་ཡིན་ནོ། །དེ་བཞིན་དུ་རྡོ་རྗེའི་ཚིག་གཞན་དག་གི་དོན་ལ་འཁྲུལ་པར་སྤྱོད་པ་འབྱུང་བ་དག་ཀྱང་ལུང་གིས་ཅུང་ཞིག་བསྟན་པར་བྱའོ། །དེ་ཡང་དགོངས་པ་ལུང་སྟོན་པ་ལས། དེ་ནས་བཅོམ་ལྡན་རྡོ་རྗེ་ཅན། །འོད་ཆེན་ལྡན་པས་བཀའ་སྩལ་པ། །མ་འོངས་སྐྱེ་བོ་མཐོང་ནས་ནི། །གང་ཞིག་ཁྱོད་ཀྱིས་ང་དྲིས་པས། །ལེགས་སོ་ལེགས་སོ་དཔའ་བོ་ཆེ། །གསང་བའི་བདག་པོ་ཁྱོད་ལེགས་སོ། །ཞུས་དོན་དེ་ནི་ཅི་ལྟ་བ་དང༌། །དེ་ལྟར་སྤྱོད་ལ་ལུང་བསྟན་བྱ། །མ་འོངས་དུས་ན་མི་རྣམས་ནི། །འཇིག་རྟེན་རྒྱང་འཕེན་མཆོག་གཞོལ་འགྱུར། །ལོག་པར་ལྟ་ལ་གནས་པ་སྟེ། །ཅི་དགའ་བ་ཡང་གནས་པར་བྱེད། །ལ་ལ་གླུ་དང་གར་ལ་དགའ། །དགོད་དང་སྒེག་ལ་མཆོག་ཏུ་གཞོལ། །དྲི་དང་ཕྲེང་བ་ལ་དགའ་ཞིང༌། །དེ་བཞིན་འཁྲིག་པ་ལ་དགའ་འགྱུར། །རྨོངས་པ་ལ་ལ་སྡང་བ་དང༌། །དེ་བཞིན་གཏི་མུག་ལ་རབ་གཞོལ། །ལ་ལ་དེ་བཞིན་འདོད་ཆགས་ཞེན། །ཤེས་པ་གཞན་དག་འདོད་པར་འགྱུར། །ཉ་དང་ཤ་དང་དེ་བཞིན་ཆང༌། །བཤང་གཅི་ཁུ་བ་ཁྲག་རྣམས་ནི། །སྐྱེས་བུ་གླེན་པས་ཟ་བར་བྱེད། །མེད་པར་སྨྲ་བ་ཆོས་སུ་སྒྲོགས། །མ་དང་སྲིད་མོ་ལ་སོགས་པ། །བགྲོད་
མིན་ལ་ནི་བགྲོད་པ་དང༌། །ཕ་མ་ལ་ཡང་གསོད་པ་དང༌། །དེ་བཞིན་སྲོག་ཆགས་གཞན་རྣམས་གསོད། །བརྫུན་གྱི་ཚིག་ནི་སྨྲ་བ་དང༌། །ཁྱད་པར་དུ་ཡང་རྐུ་བ་དང༌། །གཞན་གྱི་ཆུང་མའི་ཐད་འགྲོ་བ། །སྨད་པ་གཞན་ཡང་མེད་པར་འགྱུར། །ལ་ལ་དམ་ཚིག་སྤོང་བ་དང༌། །དེ་བཞིན་མཚམས་མེད་བྱེད་པ་དང༌། །སྣ་ཚོགས་སྡིག་པ་བྱས་ནས་ཀྱང༌། །སྔགས་པས་དངོས་གྲུབ་པ་འདོད་པར་འགྱུར། །རབ་ཏུ་དགའ་བ་དང་ལྡན་པ་ཡིས། །རྣལ་འབྱོར་པ་ནི་བདག་ཅེས་སྨྲས། །མངོན་པའི་ང་རྒྱལ་ལ་རྟག་དགའ། །རྒྱུ་དང་བཅོས་མའི་ཆོས་ལ་དགའ། །གསང་སྔགས་སྨྲ་བ་ལ་བརྟེན་ནས། །གཅིག་ལ་གཅིག་ནི་རྩོད་པར་འགྱུར། །ཚོགས་པའི་ནང་དུ་རྩོད་པ་དང༌། །ཁྱི་བཞིན་ཁ་ཟས་ལ་སྤྱོད་འགྱུར། །ཁྱི་དང་ཕག་དང་ཁྭ་རྣམས་ཀྱི། །སྤྱོད་པ་དག་ནི་སྟོན་པར་བྱེད། །གསང་བ་འདུས་པ་མི་ཤེས་པར། །དམ་ཚིག་ལ་སོགས་སྤྱོད་པར་བྱེད། །གསང་བ་སྲུང་བར་མི་བྱེད་པར། །ཐམས་ཅད་དུ་ནི་སྟོན་པར་བྱེད། །བདག་ཉིས་པ་བར་མི་བྱེད་པས། །དམ་ཚིག་འདས་པར་བྱེད་པར་འགྱུར། །ཉེས་པ་ཅུང་ཟད་ཙམ་གྱི་ཕྱིར། །མངོན་སྤྱོད་རབ་ཏུ་བྱེད་པར་འགྱུར། །རང་གི་དམ་ཚིག་ཡོངས་སྤངས་ནས། །ལྕགས་ཀྱུ་མེད་པ་བཞིན་དུ་སྤྱོད། །སྔགས་དང་ཕྱག་རྒྱའི་སྦྱོར་བ་ཡིས། །དེ་རྣམས་འཚོ་བ་བསྒྲུབ་པར་འགྱུར། །གང་དུ་རྙེད་པར་ཐོབ་འགྱུར་བ། །དམ་པའི་ཆོས་ནི་སྟོན་པར་བྱེད། །དེ་རྣམས་ཡང་དག་འདུལ་བའི་ཕྱིར། །གསང་བའི་དགོངས་པ་བཤད་པ་ཡིན། །དམ་ཚིག་ཉམས་ཏེ་བཤད་པ་རྣམས། །འདི་ཡིས་ཐམས་ཅད་དགུག་པར་བྱ། །ཞེས་གསུངས་པ་དང༌། །ཡང་དེ་ཁོ་ན་ཉིད་བཅུ་པ་ལས། ཆགས་དང་ཞེ་སྡང་གཏི་མུག་གིས། །གང་གིས་ལོག་པར་བཟུང་འགྱུར་ནས། །འགྲོ་བ་རྣམས་ནི་གསད་བྱས་ནས། །འོག་ཏུ་བལྟས་ཏེ་མནར་མེད་འགྲོ། །ཞེས་གསུངས་པ་ཡིན་ནོ། །དེ་ལ་བརྫུན་དུ་སྨྲ་བ་ལ་སོགས་པ་བསྟན་པའི་དགོངས་པ་ཡང་དགོངས་པ་ལུང་བསྟན་པའི་རྒྱུད་ལས། ནང་དང་དེ་བཞིན་ཕྱི་རོལ་དག །རྟེན་འབྱུང་གཉིས་སུ་བསྟན་པ་ནི། །དེ་ནི་བརྫུན་སྨྲ་དགའ་བ་སྟེ། །གནས་
མེད་ལ་གནས་རྣལ་འབྱོར་པའོ། །རྫོགས་སངས་རྒྱས་ཀྱི་ཡེ་ཤེས་གང༌། །དེ་ནི་རྗེས་སུ་ཤེས་བྱ་སྟེ། །དེ་འཕྲོག་དང་ཚུལ་གང་ཡིན་པ། །གཞན་གྱི་ནོར་ལ་ཆགས་པར་འདོད། །གང་ཞིག་དེ་ཉིད་དངོས་གཅིག་པུ། །དེ་བཞིན་ཉིད་ལ་རྟག་སྦྱོར་པ། །སེམས་ཅན་དེ་དེ་འདོད་ལ་དགའ། །བསྒྲུབ་པ་མཆོག་ལ་དམ་པར་འགྱུར། །ཕུང་པོ་ལ་སོགས་མེད་སྟོན་ཚིག །མཉམ་མིན་གང་ཡིན་ངག་རྩུབ་སོགས། །དེ་དོན་རྣལ་འབྱོར་པས་བསླབས་ན། །མྱུར་དུ་བྱང་ཆུབ་ཐོབ་པར་འགྱུར། །ཞེས་བྱ་བ་གསུངས་པ་ཡིན་ནོ། །དེ་ལྟ་བུའི་དགོངས་པ་ཅན་གྱི་དོན་མི་ཤེས་བཞིན་དུ་སྒྲ་ཙམ་གྱི་རྗེས་སུ་ཞུགས་ནས་སྤྱད་པའི་ཉེས་པ་ནི། སློབ་དཔོན་ཡེ་ཤེས་གྲགས་པས་ཀྱང༌། །ཚིག་ཙམ་ལ་ནི་བརྟེན་ནས་སུ། །ཆགས་སོགས་ཞེན་པའི་སེམས་ཀྱིས་ནི། །བསོད་ནམས་མ་ཡིན་བྱེད་པ་གང༌། །དེ་དག་འོག་ནས་འོག་ཏུ་འགྲོ་།ཞེས་བཤད་པ་ཡིན་ནོ། །འོ་ན་དེ་བཞིན་གཤེགས་པས་ཀྱང༌། །བཙུན་མོ་དང་སྲས་ལ་སོགས་པའི་ལོངས་སྤྱོད་ཕུན་སུམ་ཚོགས་པ་བཟུང་ནས། །ལོངས་སྤྱོད་པའི་ཚུལ་བསྟན་པ་ཇི་ལྟ་བུ་ཡིན་ཞེ་ན། དེ་ནི་དེ་བཞིན་གཤེགས་པ་ཉོན་མོངས་པའི་དབང་དུ་གྱུར་ནས། སྲས་དང་བཙུན་མོ་ལ་སོགས་པ་འཁོར་གྱི་ནང་ན་འདོད་པ་ལ་དངོས་སུ་ལོངས་སྤྱོད་པ་མ་ཡིན་གྱི། །འདོད་པའི་དབང་ཕྱུག་ལ་སོགས་པའི་ལྷ་རྣམས་བུ་དང་ཆུང་མ་ལ་སོགས་པ་ལོངས་སྤྱོད་ཀྱིས་དྲེགས་པ་རྣམས་ཀྱི་ང་རྒྱལ་བསལ་བའི་ཕྱིར། ལྷ་དེ་བས་ཀྱང་ཆོས་ཁྱད་པར་དུ་འཕགས་པའི་འཁོར་དང་ལོངས་སྤྱོད་ལ་སོགས་པ་བསྟན་པས། དེ་དག་ཡིད་བྱུང་ཞིང་ང་རྒྱལ་དང་བྲལ་ནས། དེ་བཞིན་གཤེགས་པའི་ཕུན་སུམ་ཚོགས་པ་ལ་འདོད་པ་སྐྱེས་ནས། དེའི་རྒྱུ་ཚད་མེད་པ་བཞིན་དང༌། ཕ་རོལ་ཏུ་ཕྱིན་པ་དྲུག་ལ་སོགས་པ་ལ་ནན་ཏན་དུ་བྱས་ནས་དེ་ཐོབ་པར་བྱ་བའི་ཕྱིར་བསྟན་པ་ཡིན་གྱི། དེ་བཞིན་གཤེགས་པ་ཆགས་སྡང་ངམ། རྨོངས་པས་དེ་ལྟར་སྤྱོད་པ་ནི་མ་ཡིན་ནོ། །ད་ནི་དམ་ཚིག་རྣམས་བསྟན་པར་འདོད་ནས། དེ་ལ་གཞི་ཡི་དམ་ཚིག་ནི། །རྣམ་པ་བཞིར་ནི་ཤེས་པར་བྱ། ཞེས་
སྨོས་ཏེ། དེ་དག་ཀྱང་གང་ཞེ་ན། ཡང་དག་ལྟ་དང་ལྡན་པ་དང༌། །དཀོན་མཆོག་གསུམ་པོ་མི་སྤོང་དང༌། །བྱང་ཆུབ་སེམས་དང་ལྡན་པ་དང༌། །དབང་བསྐུར་ཡང་དག་མི་སྤོང་བའོ། །ཞེས་བྱ་བ་སྨྲས་སོ། །དེ་ལ་རྒྱུ་དང་འབྲས་བུ་ལ་སྐུར་པ་མི་འདེབས་ཤིང༌། རྣམ་པར་སྨིན་པ་ལ་ཡིད་ཆེས་པ་ནི་ཆོས་འདི་པའམ། ཕྱི་རོལ་པ་ཡང་རུང༌། མཐོ་རིས་དང་ཐར་པ་འདོད་པ་ཐམས་ཅད་ཀྱི་དམ་ཚིག་ཡིན་པས་གཞི་ཞེས་བྱའོ། །དེས་ན་ཡང་དག་པའི་ལྟ་བ་དང་བྲལ་བར་གྱུར་ན། དམ་ཚིག་ཐམས་ཅད་ཉམས་ཤིང་བཅོམ་པར་བརྗོད་པར་བྱའོ། །དེ་ལས་གཞན་ཡང༌། དཀོན་མཆོག་གསུམ་ལ་སྐྱབས་སུ་འགྲོ་ཞིང༌། ལྷ་གཞན་མི་འཛིན་པ་འདི་ནི་བསྟན་པ་འདི་ལ་ཞུགས་པ་རྣམས་ཀྱི་ཐུན་མོང་མ་ཡིན་པའི་དམ་ཚིག་སྟེ། དེས་གང་གི་ཚེ་དཀོན་མཆོག་གསུམ་བཏང་མ། དེའི་ཚེ་དེའི་ཆོས་འདིའི་དམ་ཚིག་ཐམས་ཅད་ཉམས་ཤིང་ཞིག་པར་བརྗོད་པར་བྱའོ། །གཞན་ཡང་གཞི་ཁྱད་པར་ཅན་ལ་གནས་པ་དེས། དེ་ནས་གོང་དུ་བྱང་ཆུབ་ཆེན་པོར་སེམས་བསྐྱེད་པར་གྱུར་ན། དེའི་ཚེ་གཞི་ཤིན་ཏུ་ཁྱད་པར་ཅན་གྱི་དམ་ཚིག་བླངས་པ་ཡིན་ནོ། །གང་གི་ཚེ་དེས་བྱང་ཆུབ་ཀྱི་སེམས་བཏང་ན། དེའི་ཚེ་ཐེག་པ་ཆེན་པོའི་དམ་ཚིག་ཐམས་ཅད་རྩ་བ་ནས་ཉམས་པར་བརྗོད་པར་བྱའོ། །དེའི་ཕྱིར་རབ་ཏུ་བྱུང་བའི་བསླབ་པ་ཐམས་ཅད་རབ་ཏུ་བྱུང་བ་ཉིད་ལ་བརྟེན་པ་ཡིན་པ་བཞིན་དུ། གསང་སྔགས་ཀྱི་སྒོ་ནས་སྤྱོད་པའི་དམ་ཚིག་ཐམས་ཅད་ཀྱང་སྔར་བསྟན་པའི་ཆོས་གསུམ་པོ་དེ་ལ་བརྟེན་པ་ཡིན་པས། དམ་ཚིག་གསུམ་པོ་དེ་དག་སྲོག་གི་ཕྱིར་ཡང་གཏང་བར་མི་བྱའོ། །དེའི་སྟེང་དུ་འཇུག་པའི་སྤྱོད་པའི་ཚུལ་གྱིས་མངོན་པར་དབང་བསྐུར་བ་ནི་གཞི་ཁྱད་པར་ཅན་གྱི་དམ་ཚིག་སྟེ། དབང་མ་བསྐུར་བ་ལ་སྔགས་པ་ཞེས་བྱ་བ་ཐ་སྙད་མེད་པའི་ཕྱིར་རོ། །དེ་ཉམས་པ་ནི་སྔར་ཆོས་གསུམ་པོ་སྤངས་པ་དང༌། བླ་མས་ནང་དབང་བསྐུར་བ་ཉིད་སྤངས་པས་ཉམས་པར་འགྱུར་རོ། །དེ་ནི་ཡན་ལག་གི་དམ་ཚིག་བསྟན་པའི་ཕྱིར། དེ་ལ་ཡན་ལག་
དམ་ཚིག་ནི། །བཞི་པོ་དེ་ལ་བརྟེན་པ་ཡིས། །ཐུན་མོང་ཐུན་མོང་མ་ཡིན་པའི། །བྱེ་བྲག་ལྷག་པ་ཐམས་ཅད་དོ། །ཞེས་བྱ་བ་སྨོས་སོ། །དེ་ལ་ཡན་ལག་གི་དམ་ཚིག་ཐུན་མོང་བ་ཉིད་གང་ཞེ་ན། ཁྱིམ་པ་དང༌། རབ་ཏུ་བྱུང་བ་དང༌། སྐྱེས་པ་དང༌། བུད་མེད་ཐམས་ཅད་ལ་ཁྱད་པར་མེད་པར་བསྟན་པ་བཞི་པོའམ། སྲོག་གཅོད་པ་སྤོང་བ་ལ་སོགས་པའོ། །དེ་ལ་ཐུན་མོང་མ་ཡིན་པ་བྱེ་བྲག་གི་དམ་ཚིག་གང་ཞེ་ན། གང་དག་ཡུལ་ཐ་དད་པ་ལ་གསུངས་པ་སྟེ། རབ་ཏུ་བྱུང་བ་དང༌། ཁྱིམ་པ་དང༌། སྐྱེས་པ་དང༌། བུད་མེད་དག་ལ་སོ་སོར་བཅས་པའམ། རིགས་དང་ལྷའི་བྱེ་བྲག་གིས་བསྒོམ་པ་དང༌། བཟླས་པ་དང༌། བསམ་རྒྱུད་ཐ་དད་དུ་བསྟན་པ་རྣམས་སོ། །དེ་ལ་ལྷག་པའི་དམ་ཚིག་གང་ཞེ་ན། ཡུལ་དང་དུས་ཐམས་ཅད་དུ་གང་ཟག་ཐམས་ཅད་ལ་བསྟན་པ་ནི་མ་ཡིན་གྱི། ཡུལ་དང་དུས་ལ་ལར་གང་ཟག་འགའ་ལ་བསྟན་པ་ནི་ལྷག་པའི་དམ་ཚིག་ཅེས་བྱའོ། །ད་ནི་དུས་ཐམས་ཅད་དུ་བྱ་བའི་ལས་བསྟན་པའི་ཕྱིར། ཆོ་གའི་བྱ་བ་རྣམ་ངེས་ནི། །ཡང་དག་ལྟ་སོགས་གསུམ་ལྡན་ཞིང༌། །བླ་མ་མཉེས་བྱེད་བསླབ་ལ་གུས། །དུས་གསུམ་ལྷ་མཆོད་ཀློག་འདོན་ཟློས། །རྣམ་ཐར་སྒོ་གསུམ་ལ་གཞོལ་ཞིང༌། །དམིགས་པ་གཅིག་ལ་བརྟན་པར་བྱ། །ཞེས་བྱ་བ་སྨོས་ཏེ། དེ་ལ་ཆོ་གའི་བྱ་བ་རྣམ་པར་ངེས་པ་ནི་འདི་དག་སྟེ། ཡང་དག་པའི་ལྟ་བ་ལ་སོགས་པ་གསུམ་ནི་སྔར་བསྟན་པ་དག་གོ །བླ་མ་མཉེས་པར་བྱེད་པ་ནི་ཡོད་ཅིང་བདོག་ན་རྒྱལ་སྲིད་དམ། རྒྱལ་སྲིད་ཀྱི་ཕྱེད་དམ། བུ་དང༌། བུ་མོ་དང༌། ཆུང་མ་དང༌། བདག་ཉིད་དམ། རྟའམ། གླང་པོའམ། གོས་སམ། ཟས་སམ། ལུས་ཀྱི་བསྙེན་བཀུར་གྱིས་ཀྱང་བསྙེན་བཀུར་བྱེད་པའོ། །བསླབ་པ་གུས་པ་ནི་སྔར་བསྟན་པའི་དམ་ཚིག་རྣམས་སམ། སོ་སོར་ཐར་པའི་སྔོམ་པའམ། འོག་ནས་བསྟན་པ་རྣམས་ལ་གུས་པས་ནན་ཏན་བྱེད་པའོ། །དུས་གསུམ་དུ་ལྷ་མཆོད་པ་ནི། སྔ་དྲོ་དང༌། ཕྱི་དྲོ་དང༌། ཉི་མ་གུང་ལ་ཡི་དམ་
གྱི་ལྷ་བསྒོམ་པ་དང༌། བཟླས་པ་དང༌། མཆོད་པ་ལ་སོགས་པ་བྱེད་ཅིང་དེ་དག་རྫོགས་པའི་མཐར། རྒྱལ་པོ་དང་ནི་ཡོན་བདག་དང༌། །སེམས་ཅན་ཕུང་པོ་གཞན་དག་ཀྱང༌། །ཚེ་རིང་ནད་མེད་ཕུན་སུམ་ཚོགས། །རྟག་ཏུ་བདེ་བ་ཐོབ་གྱུར་ཅིག། ཅེས་བྱ་བ་ལ་སོགས་པའི་སྨོན་ལམ་དག་ཀྱང་བརྗོད་པར་བྱའོ། །རྣམ་པར་ཐར་པའི་སྒོ་གསུམ་ནི་སྔར་བསྟན་པ་རྣམས་སོ། །དེ་ལ་གཞོལ་བ་ནི་ལྷའི་རྣལ་འབྱོར་ལ་འཇུག་པའི་སྔོན་དང་ཕྱིས་ཀྱང་དེའི་རང་བཞིན་དུ་ལྟ་བའོ། །དམིགས་པ་གཅིག་ལ་བརྟན་པ་ནི་དང་པོར་དམིགས་པ་གཅིག་ལ་ཞི་གནས་བརྟན་པར་བྱ་བའམ། འདོད་པའི་ལྷ་ཡང་དང་ཡང་སྤོང་བར་མི་བྱ་བའམ། རེས་འགའ་ནི་ལྷའི་སྐུ་བསྒོམ། རེས་འགའ་ནི་སྟོང་པ་ཉིད་བསྒོམ་པ་ལ་ཡང་དང་ཡང་མི་སྤོང་བའོ། །བྱང་ཆུབ་སེམས་དཔའ་རབ་བྱུང་བས། །རང་གི་འདུལ་དང་ཆོ་ག་ལས། །མ་འདས་པར་ནི་འབད་པ་ཡིས། །སྔགས་ཀྱི་དངོས་གྲུབ་ལ་རེག་བྱ། །ཞེས་བྱ་བ་འདིས་ནི། སྡོམ་པ་གསུམ་ལ་གནས་པར་བྱས་ལ་དངོས་གྲུབ་བསྒྲུབ་པར་བསྟན་ཏེ། བྱང་ཆུབ་སེམས་དཔའ་རབ་ཏུ་བྱུང་བ་དེས་སོ་སོར་ཐར་པའི་སྡོམ་པ་དང༌། བྱང་ཆུབ་སེམས་དཔའི་སྡོམ་པ་དང༌། སྔགས་ཀྱི་དམ་ཚིག་གསུམ་ལ་གནས་ཏེ། དེ་དག་ལས་མ་འདས་པར་འབད་ལ་གསང་སྔགས་ཀྱི་དངོས་གྲུབ་མྱུར་དུ་བསྒྲུབ་པར་བྱའོ། །གལ་ཏེ་རྡོ་རྗེ་སློབ་དཔོན་ཁྱིམ་པ་ཡིན་ལ་སློབ་མ་རབ་ཏུ་བྱུང་བ་ཡིན་ན། ཇི་ལྟར་བྱ་ཞེ་ན། ཁྱིམ་པར་གྱུར་པའི་སྔགས་པ་ཡིས། །རབ་ཏུ་བྱུང་བའི་སྔགས་པ་དག །བདག་གི་སློབ་མར་གྱུར་པ་ན། །རྐང་པ་བཀྲུ་དང་ཕྱག་ལ་སོགས། །ནམ་ཡང་བདག་གིར་མི་བྱའོ། །དེ་དག་ནི་གོ་སླ་བའི་ཕྱིར་མ་བཤད་དོ། །འོ་ན་ཅི་ལྟར་བྱ་ཞེ་ན། རྟག་ཏུ་རབ་ཏུ་བྱུང་བ་ལ། །ཤཱཀྱའི་དབང་པོ་ལྟར་འཛིན་པས། །གུས་པས་བསྙེན་བཀུར་བྱ་བ་ཡིན། །ཞེས་བྱ་བ་སྨོས་ཏེ། རྟག་ཏུ་ཞེས་བྱ་བ་དུས་ཐམས་ཅད་དུའོ། །ཤཱཀྱའི་དབང་པོ་ནི་ཤཱཀྱའི་རིགས་ཀྱི་གཙོ་བོ་སྟེ། བཅོམ་ལྡན་འདས་ཤཱཀྱ་
ཐུབ་པའོ། །དེ་དང་འདྲ་བར་བལྟས་ལ་གུས་པ་དང་བཅས་པས་བསྙེན་བཀུར་ཐམས་ཅད་བྱ་བའོ། །དེ་ཅིའི་ཕྱིར་ཞེ་ན། སངས་རྒྱས་བསྟན་པ་རིན་ཆེན་སྒྲོན། །འབར་བའི་སྣོད་ནི་དཀའ་ཐུབ་ཅན། །ངུར་སྨྲིག་འཛིན་པ་ཤཱཀྱའི་སྲས། །དགེ་སློང་རྣམས་ནི་ཡིན་ཕྱིར་རོ། །ཞེས་བྱ་བ་སྨྲས་ཏེ། སངས་རྒྱས་ཀྱི་བསྟན་པ་དམ་པའི་ཆོས་ནི་ནོར་བུ་རིན་པོ་ཆེ་དང་འདྲ་བ་ཡིན་ཏེ། དེ་ལ་བརྟེན་ནས་འཇིག་རྟེན་དང་འཇིག་རྟེན་ལས་འདས་པའི་བདེ་བ་ཐམས་ཅད་འབྱུང་བའི་ཕྱིར་རོ། །དེའི་ཕྱིར་དེ་ནི་ནོར་བུ་རིན་པོ་ཆེ་འོད་འབར་བ་ལྟ་བུ་ཡིན་ལ། དེ་འཛིན་ཅིང་འཆང་བའི་སྣོད་གསེར་གྱི་ཟ་མ་ཏོག་ལྟ་བུ་ནི་ཤཱཀྱའི་སྲས་ཏེ། བཅོམ་ལྡན་འདས་ཀྱི་སློབ་མ་དཀའ་ཐུབ་ཅན་དུར་སྨྲིག་གྱོན་པའི་དགེ་སློང་རྣམས་ཡིན་པའི་ཕྱིར་རོ། །བྱང་ཆུབ་སེམས་དཔའི་སྤྱོད་པ་ལ་འཇུག་པ་ལས་ཀྱང༌། བསྟན་རྩ་དགེ་སློང་ཉིད་ཡིན་ན། །དགེ་སློང་ཉིད་ཀྱང་དགའ་བར་གནས། །ཞེས་བསྟན་པས། དགེ་སློང་ནི་བསྟན་པ་འཛིན་པའི་རྩ་བ་ཡིན་པར་བསྟན་པ་ཡིན་ནོ། །གཞན་ཡང་རྟག་ཏུ་བྱ་བའི་ཆོ་ག་ནི། གཏོར་མ་གཏང་བ་དང༌། སཱཙྪ་གདབ་པ་དང༌། བཟང་པོ་སྤྱོད་པ་ལ་སོགས་པ་སྨོན་ལམ་རྒྱ་ཆེན་པོ་གདབ་པ་དང༌། ཚད་མེད་པ་བཞི་སྒོམ་པ་ལ་སོགས་པ་དགེ་བའི་ལས་ཐམས་ཅད་བྱ་བ་ཁོ་ནའོ། །དེ་ལྟར་དགོངས་པ་ཅན་གྱི་གསུང༌། །དགོངས་བཅས་དགོངས་མིན་ཇི་ལྟ་བར། །བསྡུས་ནས་བདག་གིས་བྲིས་པ་ལས། །སྟོན་ཀའི་ཟླ་བ་དཀར་བའི། །དགེ་བ་ཅུང་ཞིག་གར་ཐོབ་དེས། །འགྲོ་བསམ་ནོར་ལམ་རྟོགས་ཤོག །ཅེས་བྱ་ལ་དགོངས་པ་ཅན་གྱི་གསུང་ཞེས་བྱ་བ་ནི། རྡོ་རྗེའི་ཚིག་དོན་སྣ་ཚོགས་སྟོན་པ་རྣམས་སོ། །དགོངས་བཅས་དགོངས་མིན་ཇི་ལྟ་བར། །ཞེས་བྱ་བ་ལ། དགོངས་བཅས་ནི་གསང་བའི་རྒྱན་ཞེས་བྱ་བའི་རྒྱུད་ལས། སངས་རྒྱས་ཐམས་ཅད་ཆགས་ལས་འཁྲུངས། །དེ་བཞིན་སྡང་དང་རྨོངས་ལས་འཁྲུངས། །ཞེས་གསུངས་པ་དང༌། ཟླ་གསང་ཐིག་ལེ་ལས་ཀྱང༌། འདོད་ཆགས་ཞེ་སྡང་
གཏི་མུག་རྣམས། །བསྟེན་ན་དངོས་གྲུབ་མྱུར་དུ་འཐོབ། །ཅེས་གསུངས་པ་ལྟ་བུའོ། །དགོངས་པ་ཅན་མ་ཡིན་པ་ནི། སྲོག་ཆགས་དག་ནི་གསད་མི་བྱ། །མ་བྱིན་པར་ཡང་མི་བླང་ངོ༌། །འདོད་སྤྱོད་དག་ནི་མི་བྱ་ཞིང༌། །བརྫུན་དུ་སྨྲ་བར་མི་བྱའོ། །གནོད་པ་ཀུན་གྱི་རྩ་བ་ཡི། །ཆང་ནི་རྣམ་པར་སྤང་བར་བྱ། །ཞེས་གསུངས་པ་ལྟ་བུའོ། །གཞན་ཡང་སྒྲ་ཇི་བཞིན་པར་བསྟན་པ་དང༌། སྒྲ་ཇི་བཞིན་མ་ཡིན་པར་བསྟན་པ་རྣམས་སོ། །མདོར་བསྡུས་པ་ནི་རྒྱས་པར་བསྟན་པའོ། །སྟོན་ཀའི་ཟླ་བ་ལྟར་དཀར་བའི། །ཞེས་བྱ་བ་ལ་སོགས་པ་ནི་གོ་བླའོ། །མ་ནོར་རྒྱུད་ཀྱི་དོན་བརྟན་ནས། །བློ་ཆུང་རྣམས་ཕྱིར་བྲིས་པ་ལ། །ཚིག་དང་དོན་ལ་འཁྲུལ་པ་དང༌། །མཁས་པ་རྣམས་ཀྱིས་བཟོད་པར་མཛོད། །ཅེས་བྱ་བ་རྒྱུད་མ་ནོར་བ་གསང་བ་འདུས་པ་དང༌། དགོངས་པ་ལུང་སྟོན་པ་དང༌། འཇམ་དཔལ་གྱི་རྒྱུད་ལ་སོགས་པའོ། །དེ་དག་གི་དོན་ཕྱིན་ཅི་མ་ལོག་པ་ལ་བརྟེན་ནས་བདག་ལས་བློ་ཆུང་བ་དང༌། ཤེས་རབ་དམན་པ་རྣམས་ཀྱི་ཕྱིར་བྲིས་པ་སྟེ་བསྟན་པ་ལ་ཚིག་དང་དོན་ལ་འཁྲུལ་པ་སྟེ། ཚིག་སྡེབས་མ་ལེགས་པ་དང༌། དོན་ལོག་པར་བསྟན་པ་ཡོད་ན་མཁས་པ་རྣམས་ཀྱིས་ཏེ། མང་དུ་ཐོས་ཤིང་མཁྱེན་པ་ཆེ་བ་རྣམས་ཀྱིས་བཟོད་པར་མཛོད་ཅིག་ཅེས་བྱ་བ་ནི། སོ་སོའི་སྐྱེ་བོ་ལ་འཁྲུལ་པ་འབྱུང་བ་ངོ་མཚར་མི་ཆེ་བས་བཟོད་པ་མཛད་པར་འོས་སོ་ཞེས་བྱ་བའི་དོན་ཏེ། །འཇིག་རྟེན་གསུམ་གཙོ་ཐམས་ཅད་མཁྱེན་པའི་གསུང༌། །བདུད་རྩི་ལྟ་བུའི་ཚིག་འབྲུ་འགའ་བསྟན་པས། །གཞན་ལ་ཕན་པ་བྱུང་ན་དགེ་བ་དེས། །འགྲོ་བ་ཀུན་གྱིས་སངས་རྒྱས་ཐོབ་པར་ཤོག །གསང་སྔགས་ལ་འཇུག་པའི་རབ་ཏུ་བྱེད་པ་དྲུག་ཅུ་པའི་འགྲེལ་པ་པཎྜི་ཏ་ཨཱ་ཙཪྻ་ཛྙཱ་ན་ཨཱ་ཀ་རས་མཛད་པ་རྫོགས་སོ།། །།རྒྱ་གར་གྱི་མཁན་པོ་ཛྙཱ་ན་ཨཱ་ཀ་ར་ཉིད་དང༌། ལོ་ཙཱ་བ་དགེ་སློང་ཚུལ་ཁྲིམས་རྒྱལ་བས་བསྒྱུར་ཅིང་ཞུས་ཏེ་གཏན་ལ་ཕབ་པ།། །།