གཞལ་ཡས་ཁང་གསལ་བར་བྱེད་པའི་མངོན་རྟོགས་མུན་སེལ་སྒྲོན་མ།
པདྨ་འབྱུང་གནས།
གཞལ་ཡས་ཁང་གསལ་བར་བྱེད་པའི་མངོན་རྟོགས་མུན་སེལ་སྒྲོན་མ་བཞུགས།། དཔལ་རྡོ་རྗེ་སེམས་དཔའ་ལ་ཕྱག་འཚལ་ལོ། །རང་བཞིན་ལྷུན་གྲུབ་འོག་མིན་གཞལ་ཡས་དང༌། །བྲིས་པ་རྡུལ་ཚོན་བསྐྱེད་པ་ཏིང་འཛིན་གྱིས། །བདེ་གཤེགས་བཞུགས་གནས་གཞལ་ཡས་གསལ་བྱེད་པ། །ཏིང་འཛིན་མུན་སེལ་སྒྲོན་མ་བསྟན་པར་བྱ། །དེ་ཡང་ལུས་དོན་ཚུལ་དུ་བསྟན་པ་ནི། །ཚད་དབྱིབས་རྒྱུ་དང་རྩེ་མོའི་གནས་ལུགས་དང༌། །ནང་དང་སྒོ་ཡི་གནས་ལུགས་བསྟན་པ་དང༌། །རྒྱན་གྱི་བྱེ་བྲག་རྣམས་ཀྱིས་མདོར་བསྟན་པའོ། །ཚད་ནི་འདི་ཞེས་ངེས་པར་བསྟན་དུ་མེད། །བློས་འཁྱུད་སྒོམ་བདེ་གང་དུ་གནས་པའོ། །དབྱིབས་ནི་ཕོ་བྲང་སྙིང་པོ་བུམ་པ་ཟླུམ། །གྲུ་ཆད་ལྷ་རྣམས་རྒྱས་ཕྱིར་གྲུ་བཞིའོ། །རྒྱུ་ནི་ཞི་ཁྲོ་གཉིས་ལས་དང་པོ་ནི། །ཡེ་ཤེས་རྒྱུ་ལས་རིན་པོ་ཆེ་རུ་སྣང༌། །པཉྩ་རེ་ཁཱ་རྡོ་རྗེ་ར་བ་དང༌། །ཐོག་དང་ཀ་གདུང་ལ་སོགས་དེ་ལྟར་རོ། །རྩེ་མོ་བུམ་པ་ཆོས་ཉིད་གཅིག་ཏུ་འཁྱིལ། །སྣ་ཚོགས་ཆོས་ཀྱི་འཁོར་ལོ་བྱ་འདབ་ལྡན། །ཏོག་ལྡན་རྨ་བྱའི་མདོངས་ལྟར་གནས་པའོ། །ནང་གི་གནས་
ཚུལ་འཁོར་ལོ་པདྨ་འམ། །ཀ་བཞི་གདུང་བརྒྱད་གྲུ་གསུམ་ཟླ་གམ་སོགས། །རང་གཞུང་གང་ཡིན་ལྟར་དེ་ཉིད་ཀྱང༌། །ལྟེ་བ་མཐོ་སྟེ་འཁོར་ལོ་པདྨ་སོགས། །རིམ་གྱིས་དམའ་སྟེ་གྲུ་ཆད་ལྷག་རྣམས་མཉམ། །རྡོ་རྗེ་ར་བ་རིན་ཆེན་རྐྱང་སྦག་གི །བར་དང་ཕྱི་རིམ་རྩིག་པ་དག་ཏུ་གནས། །ཕ་གུ་བད་དང་མདའ་ཡབ་བང་རིམ་ཚུལ། །སྟེང་ནས་བྱ་འདབ་སེང་མགོ་མུ་ཏིག་ལྡན། །རྩིག་གསེབ་རིན་ཆེན་ཀ་བ་དག་གིས་བཏེག །དེ་འོག་རྟ་བབས་ལྷ་མོ་ལ་སོགས་གནས། །ཕྱི་ནང་མཆོད་བྱེད་ཡང་ན་བར་ཁྱམས་ལའོ། །སྒོ་ལ་གཉིས་ཏེ་ཁྱུད་ཅན་ཁྱུད་མེད་དོ། །ཁྱུད་མེད་གློ་འབུར་ཚུལ་ཏེ་སྒོ་བ་གཅིག །ཁྱུད་ཅན་སྒོ་བ་གཉིས་ཏེ་ཕྱེད་སྒོའོ། །སྒོ་ཟུར་རྩིག་གསེབ་ཀ་ཐུང་བཅུ་དྲུག་གི །རྒྱན་གྱིས་རྟ་བབས་རིམ་པ་བརྒྱད་ལྡན་འདེགས། །དེ་གཉིས་རྣམ་ཐར་བརྒྱད་དང་ལྡན་ཕྱིར་རོ། །མཛེས་པའི་རྟ་བབས་ཐེམ་སྒས་གླང་ཆེན་ཚུལ། །མཆོད་རྟེན་མགོ་ལྔ་ལྟར་དུ་འདོད་ཟེར་བ། །འདི་ཡི་གཞུང་མིན་གཞན་དུ་རིག་པར་བྱ། །མུན་པ་ཝ་རན་རིན་ཆེན་ཆུན་འཕྱང་མཛེས། །བཅུ་གཅིག་རྡོ་རྗེ་དག་དང་ལྡན་པའོ། །རྒྱན་ལ་བདག་པོ་ཕྱི་ནང་སྟེང་འོག་ལོགས། །བདག་པོ་ཡབ་ཡུམ་ལ་སོགས་སྐབས་དང་སྦྱར། །བླ་རེ་བཞི་གདན་དྲ་བ་མུ་ཏིག་ཕྲེང༌། །གདན་ལ་སེང་གེ་གླང་ཆེན་རྟ་དང་ཁྱུང༌། །ནམ་མཁའ་ལྡིང་དང་ཉི་ཟླ་པདྨ་ཁྲི། །ཕྱི་ལ་རྩེ་མོའི་རྒྱན་དང་སྒོ་དྲུང་ངོ༌། །རྩེ་རྒྱན་གདུགས་དང་རྒྱལ་མཚན་རི་དགས་མཛེས། །སྒོ་དྲུང་རྒྱན་ནི་རྔམ་གློག་འོག་རིམ་ནས། །རྒྱལ་བ་གོང་མ་རྣམས་ཀྱིས་བཤད་ལྟར་རོ། །མཐའ་མ་མུ་ཁྱུད་རྡོ་རྗེ་མེ་རིས་བསྐོར། །ཞི་བའི་གཞལ་ཡས་དོན་ནི་དེ་ལྟར་གནས། །ཁྲོ་བོའི་གཞལ་ཡས་དོན་ནི་འདི་ལྟ་སྟེ། །ཚད་དབྱིབས་རྩེ་མོ་སྒོ་རྣམས་འདྲ་གཅིག་ལ། །རྒྱུ་དང་ནང་དང་རྒྱན་གྱི་བྱེ་བྲག་རྣམས། །གོང་ལྟར་མི་གནས་བྱེ་བྲག་བསྟན་པ་ནི། །རྒྱུ་ནི་དུར་ཁྲོད་འབར་བའི་རྩིག་པ་སྟེ། །ཐོད་པ་ཆེ་ཕྲ་གནམ་ལྕགས་འབར་བས་སྤྲས། །ནང་གཞི་ཀེང་རུས་རཀྟའི་ཟིལ་པ་ཆགས། །ཞིང་དང་ཚངས་པའི་ཀ་གདུང་རྣམས་དང་ལྡན། །ཆུ་སྲིན་སྤྲུལ་དང་ཉི་ཟླ་ཀ་ཞུའི་རྒྱན། །གཟའ་དང་རྒྱུ་སྐར་ཕྱམ་དང་གྲལ་
ཐབས་མཛེས། །ཞིང་གི་སྤང་ལེབ་མ་ཏང་གནས་ཀྱིས་གཡོགས། །རྒྱན་ནི་སྟེང་ནས་ཞིང་ཆེན་འོག་གདན་ཀྱང༌། །ཉི་ཟླ་པདྨ་དྲེགས་པ་སེམས་ཅན་ནོ། །རྩེ་མོ་ཙིཏྟའི་ཏོག་ལ་ཞིང་གི་གདུགས། །ཕ་གུ་ཐོད་པ་སྣ་ཚོགས་བད་དུ་བྱས། །དྲ་བ་དྲ་ཕྱེད་ཐོད་སྤྲུལ་དྲིལ་བུ་དང༌། །མཆོད་པའི་ལྷ་མོ་ཕྱི་ནང་མེད་པར་དབུལ། །སྒོ་རྒྱན་རྟ་བབས་ཐོད་པ་འབར་བ་ལ། །དེ་སྟེང་ཆུ་སྲིན་ཆོས་ཀྱི་འཁོར་ལོར་ལྟ། །རྩེ་ལ་གདུགས་དང་རྒྱལ་མཚན་གྲུ་བཞིར་མཛེས། །མཐའ་མ་ལྕགས་རི་མེ་འོད་འབར་བའི་ནང༌། །དུར་ཁྲོད་ཆེན་པོ་བརྒྱད་ཀྱིས་གཏམས་པ་ནི། །ཁྲོ་བོའི་དཀྱིལ་འཁོར་གཞལ་ཡས་བསྟན་པའོ། །དེ་ནི་བུམ་པ་གཅིག་ཏུ་འཁྱིལ་པའི་གཞུང༌། །མཆོད་རྟེན་མགོ་བོ་ལྟར་དུ་གནས་པ་ནི། །དབུས་ཀྱི་ཕོ་བྲང་མཆོད་རྟེན་བུམ་པའི་ཚུལ། །སྒོ་བཞི་རྟ་བབས་མཆོད་རྟེན་ཚུལ་དུ་གནས། །དེ་རྣམས་མཐོ་སྟེ་གྲུ་ཆད་ལྷ་རྣམས་དམའ། །བཅུ་གཅིག་རྡོ་རྗེ་སྒོ་ཡི་བྱམ་སྒོ་ལ། །གྲུ་ཆད་གདུང་མགོ་ཟླ་ཚེས་རྡོ་རྗེའོ། །རྟ་བབས་བཞིར་འདོད་གསང་སྔགས་ཕྱི་ཡི་གཞུང༌། །བདག་འདྲ་ཨུ་ཌྱན་པདྨ་རྒྱལ་པོ་ཡིས། །ཏིང་འཛིན་ཉམས་ལེན་དགོངས་པ་མཐར་ཕྱིན་ཀྱང༌། །ཕྱི་རབས་ལམ་པ་རྣམས་ཀྱི་དོན་ཆེད་དུ། །རྒྱུད་ལུང་ཀུན་དང་མི་འགལ་མུན་སེལ་བའི། །སྒྲོན་མ་ཨ་མྲྀ་ཏ་ཡི་དོན་དུ་བརྩམས། །དགེ་བས་སེམས་ཅན་ཀུན་གྱིས་འཕགས་ཐོབ་བསྔོ། །གཞལ་ཡས་ཁང་གསལ་བའི་མངོན་རྟོགས་མུན་སེལ་སྒྲོན་མ་ཞེས་བྱ་བ་སློབ་དཔོན་པདྨ་འབྱུང་གནས་ཀྱིས་མཛད་པ་རྫོགས་སོ།།