རྒྱལ་པོ་ཆེན་པོ་རྣམ་ཐོས་སྲས་ཀྱི་ལས་བརྟག་པའི་སྒྲུབ་པའི་ཐབས།
འགྲོ་བཟང་སྙིང་པོ།
རྒྱ་རག་སྐད་དུ། མཧཱ་རཱ་ཛ་བི་རཱུཔ་ཀཱ་ཡ་ཀརྨ་ཀལྤ་སཱ་དྷ་ནཾ། བོད་སྐད་དུ། རྒྱལ་པོ་ཆེན་པོ་རྣམ་ཐོས་སྲས་གྱི་ལས་བརྟག་པའི་སྒྲུབ་པའི་ཐབས། །དཔལ་ཕྱག་ན་རྡོ་རྗེ་ལ་ཕྱག་འཚལ་ལོ། །ཐུགས་གཙོ་ཕྱག་ན་རྡོ་རྗེ་ཡིས། །དངོས་སུ་ལུང་བསྟན་བྱིན་བརླབས་པའི། །སྤྱོད་མཛད་ཆོས་གྱི་རྡོ་རྗེས་ནི། །གྲགས་འཛིན་ལ་སོགས་ཕ་རོལ་ཏེ། །ཆོ་གས་བསད་སོགས་ལས་རྣམས་ནི། །བླ་མ་བརྒྱུད་པ་ལས་བྱུང་བའི། །གནོད་སྦྱིན་རྒྱལ་པོ་གཙོར་གྱུར་པའི། །སྟོང་ཕྲག་བརྒྱད་དང་གཉིས་ལྷག་པའི། །དེ་སྒྲུབ་ཆོ་ག་བཤད་པར་བྱ། །དཔལ་ལྡན་ཁྲོ་རྒྱལ་རྡོ་རྗེ་ཅན། །སྔོན་འགྲོ་རྫོགས་པའི་རྣལ་འབྱོར་པས། །ལྷ་ཚོགས་གདུག་བ་གཞོམ་པའི་ཕྱིར། །དང་པོར་ཆོ་ག་ལ་འཇུག་བྱ། །སྐེ་ཚེ་ཉུངས་ཀར་དུག་སྣ་ཚོགས། །བོང་བུའི་ཆུ་དང་སྤངས་སོགས་དང༌། །ཚ་དང་གདུག་པའི་ཚེར་སྤངས་ཆུས། །ཧཱུཾ་བརྗོད་ས་གཞི་ལེགས་པར་བྱུག །ཁོ་ར་ཚེར་མ་ཅན་གྱི་ཤིང༌། །ནམ་ཕྱེད་བྱང་བལྟས་མེ་ཏོག་བླང༌། །ཚོམ་བུ་དགུར་ནི་ལེགས་པར་དགོད། །ཁྲུས་བྱས་བསྲུང་བ་བདུན་བྱས་ལ། །སེམས་དཔའི་སྐྱིལ་ཀྲུང་བདེ་སྟན་ལ། །བྱང་དུ་མངོན་ཕྱོགས་འཇུག་པར་བྱ། །དེ་ཉིད་རིགས་ཀྱི་མེ་ཏོག་དང༌། །སྣ་ཚོགས་དུག་ཕྱེ་མི་རུས་ཕྱེ། །ལེགས་པར་སྦྱར་བའི་དེ་བཞིན་སྤོས། །མི་རྐང་ལས་བྱུང་མར་མེད་དང༌། །སཱ་ལུ་དམར་པོ་ཤ་ལྔ་སོགས། །གཅིག་ཏུ་བྱས་པའི་ལྷ་བཤོས་དང༌། །མི་དང་བོང་བུའི་དྲི་ཆུ་དང༌། །རྨ་བྱའི་སྒོ་དང་ཀུ་ཤར་བཅས། །བསང་གཏོར་དྲི་ཡི་ཆུ་དང་ལྡན། །སྔགས་རྒྱལ་བཅུ་གསུམ་པ་བཟླས་བྱ། །ཕྱོགས་མཚམས་ཀུན་དུ་བསང་གཏོར་བྱ། །དེ་ནས་བདག་ཉིད་རྣལ་འབྱོར་པ། །གདོང་
བཀྲུས་ནས་བརྩམས་སྒྲུབ་ཐབས་གཞུང༌། །བདག་ཉིད་ཆོ་ག་རྫོགས་བྱས་ལ། །ཡི་གེ་བཅུ་གསུམ་བཟླས་པ་ནི། །འབུམ་ཕྲག་གཅིག་ཏུ་བཟླས་བྱས་ལ། །སྙིང་གར་ཡི་གེ་བསམས་པ་ལས། །འོད་ཟེར་བྱང་དུ་རབ་འཕྲོས་ཏེ། །གནོད་སྦྱིན་བྱེ་བ་འབུམ་གྱི་གཙོ། །ཀླུ་ཆེན་བརྒྱད་ཀྱིས་བསྐོར་བ་ཡི། །རྣམ་ཐོས་རྒྱལ་པོ་སྤྱན་དྲངས་ཏེ། །མདུན་གྱི་དཀྱིལ་འཁོར་སྟེང་དུ་ནི། །རིམ་པས་ལེགས་པར་བཞུགས་པར་བསམ། །དེ་ལ་བསང་གཏོར་ནས་བརྩམས་ཏེ། །གོང་གི་མཆོད་པའི་རིམ་པ་ཡིས། །ཡི་གེ་གསུམ་དང་ལྡན་པ་རྣམས། །རྒྱལ་པོ་འཁོར་བཅས་ལེགས་པར་མཆོད། །ཨོཾ་ཨ་མྲྀ་ཏ་ཀུཎྜ་ལི་ཧ་ན་ཧ་ན་ཧཱུཾ་ཕཊ། དེ་ལ་མཆོད་པའི་ཡི་གེ་ནི། །སོ་སོར་ལེགས་པར་སྦྱར་ཏེ་དབུལ། །སྤྱི་གཙུག་ལྐོག་མ་སྙིང་ག་ཡི། །ཡི་གེ་གསུམ་གྱི་འོད་ཟེར་གྱིས། །རྒྱལ་པོ་འཁོར་དང་བཅས་པ་རྣམས། །འོད་ཞུ་ས་བོན་རང་བཞིན་བྱ། །དེ་ལ་རང་སྔགས་བསྐོར་བ་དམིགས། །འོད་ཀྱིས་གདུག་པ་བཅོམ་བྱས་ཏེ། །སླར་བསྡུ་ཧཱུཾ་སོགས་ལ་ཐིམ་ནས། །རྒྱལ་ཆེན་འཁོར་བཅས་ཡོངས་སུ་རྫོགས། །ཀླུ་རྣམས་ཡི་གེ་ཕུཿལས་བསྐྱེད། །དེ་ཉིད་རྒྱལ་པོ་ཆེན་པོ་སྟེ། །སྐུ་མདོག་སྔོན་པོ་གཟི་བརྗིད་ཅན། །ཞལ་གཅིག་པ་ལ་ཕྱག་གཉིས་པ། །ཁྲོ་གཉེར་མཆེ་བ་ཅུང་ཞིག་གཙིགས། །ཅོད་པ་ན་སྦྲུལ་མགོ་ཆུན་འཕྱང་ལྡིང༌། །ཕྲག་གོང་གཡས་གཡོན་ཉི་ཟླས་མཚན། །ཉི་མ་འབུམ་གྱི་གཟི་བརྗིད་ཅན། །སེང་གེ་ལ་སོགས་འཇིགས་པས་མཚན། །སྐུ་ལས་ནམ་མཁའ་གང་བར་འཕྲོ། །གཡས་ན་རྡོ་རྗེས་རབ་མཚན་པའི། །དབྱུག་པ་བ་དན་བཅས་པ་འཛིན། །གཡོན་པ་ཕྱག་ན་སྐུ་གདུང་འཛིན། །ཀླུ་རྣམས་གདུག་པའི་རང་ལུས་འཆང༌། །གནོད་སྦྱིན་སྲིན་པོའི་གཟུགས་རྣམས་ནི། །ནམ་མཁའི་སྤྲིན་ཚོགས་བཞིན་དུ་བསམ། །ཐུགས་ཀའི་ས་བོན་ལས་འཕྲོས་པའི། །འོད་ཀྱིས་རྒྱལ་པོ་རྣམ་ཐོས་སྲས། །འཁོར་དང་བཅས་པ་བཀུག་ནས་ནི། །མདུན་གནས་དཀྱིལ་འཁོར་དག་ལ་བསྟིམ། །དེ་ནས་བསང་གཏོར་ནས་བརྩམས་ཏེ། །གོང་གི་སྔགས་ཀྱིས་མཆོད་པ་དབུལ། །གོང་གི་གཏོར་མའི་ཆོ་ག་བཞིན། །ལེགས་པར་བྱིན་གྱིས་བརླབས་ནས་ནི། །ཨོཾ་བཛྲ་བི་རུ་རཱ་ག །ཀུ་བེ་
ར་ཨཱ་ཏམ་ཀ །མ་ཧཱ་ཡཀྵ་རཱ་ཛ། ཨཥྜ་ནཱ་ག་བི་ར་བཻ་ཀ་སརྦ་ཡཀྵ་པ་ཅི་བཱ་ར་ཨི་དམ་བ་ལིཾ་གྲྀཾ་ཧཱ་ནྟུ། ས་མ་ཡ་རཀྵ་ནྟུ། མ་མ་སིདྡྷིཾ་ཕྲ་ཡ་ཙྪ། མ་མ་སརྦ་ཀརྨ། སཱ་དྷ་ཨ་མུ་ཀ་མཱ་ར་ཡ་ཧཱུཾ་ཕཊ་སཱ་ཧཱ། ཡི་གེ་བཅོ་ལྔ་སྔགས་ལ་ནི། །བཏགས་ཏེ་གཏོར་མ་དབུལ་བར་བྱ། །དེ་ནས་བདག་ཉིད་བསྲུང་བར་བྱ། །གསེར་ལ་སོགས་པའི་རྫས་རྣམས་ལ། །ཧཱུཾ་ངམ་ཁྲོཾ་གྱི་ཕྱི་རོལ་དུ། །ཡི་གེ་བཅུ་གསུམ་བསྐོར་བར་བྱ། །ཉུངས་ཀར་དང་བཅས་སྤྱི་བོར་གཞག །གླ་རྩི་བ་ཡི་རྣམ་ལྔ་ལ། །གོས་སྔོན་ཅན་གྱི་སྔགས་བཟླས་ཏེ། །མགོ་ལུས་ཁྱབ་པར་བྱུགས་ལ་བསྲུང༌། །དེ་ནས་རྟེན་འབྲེལ་སྔགས་ཀྱིས་ནི། །ལུས་ལ་གོ་ཆ་དགོད་པར་བྱ། །སྤྱི་བོ་ཀློག་མ་སྙིང་ག་རུ། །ཁ་དོག་གསུམ་ལྡན་ཡི་གེ་བསམ། །སོ་སོར་སྔགས་ཀྱིས་བསྐོར་བར་བྱ། །ཐུགས་ཀར་ཟླ་བ་ལ་གནས་ཧཱུཾ། །དེ་ལ་སྔགས་ཀྱིས་ཡོངས་བསྐོར་ཏེ། །ལྕེ་ལ་རྡོ་རྗེ་སྦུ་གུ་བསམ། །སྤྲོ་བསྡུའི་སྔགས་གྱི་བཟླས་པ་ནི། །རྒྱལ་པོའི་ཐུགས་ཀར་དམིགས་ལ་བཟླས། །དལ་མིན་མྱུར་བ་མ་ཡིན་དང༌། །གསལ་མིན་མི་གསལ་མ་ཡིན་པར། །རྩེ་གཅིག་སེམས་ཀྱིས་བཟླས་བར་བྱ། །ཨོཾ་ནཱི་ལཱ་མབ་ར་དྷ་ར་བཛྲ་པཱ་ཎི་མཧཱ་ཡཀྵ་རཱ་ཛ་ཀུ་བེ་ར་བི་རུ་རཱ་ག་སིདྡྷི་མྨེ་ཕྲ་ཡ་ཙྪ་ཧཱུཾ་ཧཱུཾ་ཧཱུཾ་ཕཊ། འདི་བརྗོད་བསྙེན་པ་འབུམ་ཕྲག་གཅིག །རྫོགས་ནས་རྨི་ལྟས་འབྱུང་བ་སྟེ། །ཆུ་བོ་སྐམས་དང་སྦྲུལ་མཐོང་ངམ། །སྦྲ་ཁྱིམ་ནགས་ལ་མེ་མཆེད་མཐོང༌། །སོག་པོ་སྲིན་པོས་བསྐོར་བ་ཡི། །དབུས་ན་གནས་པ་མཐོང་བའམ། །སེང་གེ་ལ་སོགས་གཅན་གཟན་ཚོགས། །མདུན་འདུས་གུས་པར་མཐོང་བ་ན། །དེ་ནས་ལས་སྦྱོར་བརྩམ་པར་བྱ། །གནས་གསུམ་ཐིག་ལེ་བྱས་ནས་སུ། །གོང་གི་བསྲུང་བའི་ཆོག་རྣམས། །བསྲུངས་ཏེ་བྱིན་གྱིས་བརླབ་པར་བྱའོ། །དུར་ཁྲོད་རྡོ་ལེབ་ཐོག་ཏུ་ནི། །སྣ་ཚོགས་རྡོ་རྗེ་བྲིས་བྱས་ལ། །སྟེང་དུ་དུག་དང་ལན་ཚྭ་དང༌། །ཁྲག་དང་ཆུ་འགྲམ་གཉིས་ཀྱི་ས། །རྐང་རྗེས་ས་ལ་སོགས་པ་ལ། །བསྒྲུབ་བྱའི་གཟུགས་སམ་གདུག་པའི་གཟུགས། །རང་གཟུགས་མཚན་ཉིད་ལྡན་པར་བྱ། །དགུག་དང་བཅིང་བ་ལ་སོགས་པའི། །བསད་པའི་ཆོ་ག་བྱས་ནས་ནི། །དེ་ལ་སྦྱིན་སྲེག་བརྩམས་པར་བྱ། །མེ་ཐབ་གྲུ་གསུམ་ཐབ་ཁུང་ལ། །ཟུར་
ལ་ཁྲུ་རེའི་ཚད་ཡོད་དེ། །ཟབས་སུ་ཁྲུ་ཕྱེད་ལ་སོགས་ལ། །སྦྱིན་སྲེག་ཆོ་གར་གསུངས་པ་བཞིན། །ཐབ་ཀྱི་མཚན་ཉིད་ཤེས་པར་བྱ། །དེ་ཡི་དབུས་སུ་མཆོད་རྟེན་ནི། །དུར་ཁྲོད་ཚོན་ནི་ནག་པོས་བྲིས། །དེ་དབུས་རྡོ་རྗེ་དབྱུག་པ་ནི། །བ་དན་རྩེ་ལྡས་མཚན་པར་བྱ།། དེ་ཡི་ཕྱི་རོལ་ཕྱོགས་མཚམས་སུ། །ཁ་དོག་ནག་པོ་སྦྲུལ་བརྒྱད་བྲི། །གཞན་དག་དཀྱིལ་འཁོར་ཕྱག་མཚན་རྣམས། །སྦྱིན་སྲེག་ཆོ་གར་ཤེས་པར་བྱ། །ཚེར་མ་དུག་ཤིང་ཁྲུ་གང་ལ། །དབུས་སུ་ཟུར་གསུམ་བརྩིག་བྱ་སྟེ། །མི་སྐྲའི་སྐུད་པས་བཅིང་བྱ་ཡིས། །ཚེར་མ་ཁྲུ་གང་དབུས་སུ་གཞག །དེ་ནས་མངོན་སྤྱོད་རྫས་རྣམས་གཞག །སྲེག་རྫས་ལིངྒ་གཉིས་སུ་བྱ། །དུག་དང་ཁྲག་དང་སྐེ་ཚེ་དང༌། །ཡུངས་ཀར་ཆུ་འགྲམ་གཉིས་ཀྱིས། །རྐང་རྗེས་ས་དང་ད་དུ་ར། །བྲ་འོ་སྲན་མ་མི་རུས་ཕྱེ། །བྱང་དུ་མགོ་བསྟན་ཤི་བའི་སྐྲས། །ཀུན་ལ་བསྲེག་པ་བྱས་ནས་ནི། །དུག་ཤིང་ཚེར་མ་སོར་བརྒྱད་ལ། །ཁྲག་དང་དུག་ཆུས་སྦགས་པ་ཡི། །དེ་ཡི་ཡམ་ཤིང་དབུལ་བར་བྱ། །རུས་ཕྱེ་ལ་སོགས་མཆོད་པ་རྣམས། །གོང་དུ་གསུངས་པ་བཞིན་དུ་བྱ། །དེ་ནས་མེ་ནི་སྦར་བྱ་སྟེ། །དབུས་སུ་རྒྱལ་པོ་ཆེན་པོ་ནི། །ཀླུ་དང་གནོད་སྦྱིན་ཚོགས་བསྐོར་བའི། །ཐམས་ཅད་རྫོགས་པར་བསམ་པར་བྱ། །རང་བཞིན་རྒྱལ་པོ་བཀུག་ལ་བསྟིམ། །སྐུ་སྟོད་ཁྭ་དང་འུག་པ་དང༌། །གཅན་གཟན་འཇིགས་ཚོགས་སྤྲོ་བར་བྱ། །རྐེད་བར་གནོད་སྦྱིན་འཇིགས་པའི་གཟུགས། །མཚོན་ཆ་སྣ་ཚོགས་འཛིན་པ་སྤྲོ། །སྐུ་སྨད་སེང་གེ་ལ་སོགས་པ། །གཅན་གཟན་འཇིགས་པའི་ཚོགས་སུ་སྤྲོ། །དེ་དག་གཟུགས་ཀྱིས་བསྒྲུབ་བྱ་དང༌། །བགེགས་ཀྱི་ཚོགས་རྣམས་བཀུག་བྱས་ཏེ། །གོང་གི་ལིངྒར་བསྟིམ་པ་དང༌། །ནམ་མཁའ་དུམ་བུར་གཏུབས་ནས་ནི། །གནོད་སྦྱིན་རྒྱལ་པོའི་ཞལ་དུ་དབུལ། །དུག་དང་ཁྲག་ལ་སོགས་པ་ནི། །བདུན་ནམ་ཉི་ཤུ་རྩ་གཅིག་བར། །གོང་གི་རྫས་རྣམས་དབུལ་བར་བྱ། །ཨོཾ་བཛྲ་བི་རུའི་ར་ཀ་ཀུ་བེ་ར་མ་ཧཱ་ཡཀྵ་རཱ་ཛ། ཆེ་གེ་མོ་ཨ་ན་ལ་ཧ་ན་སརྦ་དུ་ཥྚཱ་ན། སརྦ་བྷ་སྨི་ཀུ་རུ་ཆེ་གེ་མོ་མཱ་ར་ཡ་ཧཱུཾ་ཕཊ། དེས་ནི་སྦྱིན་སྲེག་དབུལ་བར་བྱ། །གནོད་སྦྱིན་རྒྱལ་པོའི་ཕྱག་རྒྱ་ཡིས། །སྟོང་ཕྲག་གཅིག་ཏུ་བསྲེག་
པར་བྱའོ། །ཐལ་བ་ལན་ཚྭ་སྐེ་ཚེ་དང༌། །དུག་དང་ཁྲག་གིས་སྦྲུས་ནས་ནི། །བསྒྲུབ་བྱའི་གཟུགས་ནི་ཁྲུ་གང་ཚད། །ལེགས་པར་བྱས་པའི་སྙིང་ག་རུ། །འཁོར་ལོ་རྩི་བས་ནི་བཅུ་གཉིས་པ། །འཁོར་ལོ་དེ་ཡི་ལྟེ་བར་ནི། །ཧཱུཾ་གཉིས་བར་དུ་མིང་བཀོད་དེ། །དེ་ལི་ལྟེ་བའི་མུ་ཁྱུད་ལ། །ཡི་གེ་བཅུ་གསུམ་དགོད་པར་བྱ། །ཕྱི་རོལ་རྩི་བས་ནི་བཅུ་གཉིས་ལ། །བཛྲ་བི་རཱུ་ར་ཀ་མ་ཧཱ་ཡཀྵ་ཀུ་བེ་ར། ཡི་གེ་དེ་ལ་བསྒྲུབ་བྱ་དང༌། །གསད་པའི་ཡི་གེ་གདགས་པར་བྱ། །མཆོད་པ་སྙིང་གར་གདགས་པར་བྱ། །དུག་ལ་སོགས་པའི་རྫས་རྣམས་ཀྱིས། །གཟུགས་ལ་ལེགས་པར་བྱུག་པར་བྱ།། དེ་ཡི་སྟེང་དུ་རྡོ་ལེབ་ལ། །རྡོ་རྗེ་རྒྱ་གྲམ་བྲིས་ནས་ནི། །ལིངྒའི་སྙིང་གར་གཞུག་པར་བྱ། །དེ་ཡི་སྟེང་དུ་མཆོད་རྟེན་ནི། །སྔོན་པོ་ཁྲུ་གང་ཚད་དུ་བརྩིག །བུམ་པར་རྒྱལ་པོ་ཆེན་པོ་ཡི། །གསད་པའི་སྔགས་ནི་བྲིས་ཏེ་གཞུག །སློབ་དཔོན་ཆེན་པོ་འགྲོ་བཟང་སྙིང་པོས་མཛད་པའི་རྣམ་ཐོས་སྲས་ཀྱི་དྲག་བྱེད་ཀྱི་ཆོ་ག་རྫོགས་སོ།། །།རྒྱ་གར་དབུས་ཀྱི་པཎྜི་ཏ་ཆེན་པོ་ཏེ་ཛ་དེ་བ་དང༌། བོད་ཀྱི་ལོ་ཙཱ་བ་དགེ་སློང་ཟངས་དཀར་འཕགས་པ་ཤེས་རབ་ཀྱིས་བསྒྱུར་བའོ།།