རྣམ་སྲས་རྟོགས་པ།
རྣམ་སྲས་རྟོགས་པ་བཞུགས། དཔལ་ཕྱག་ན་རྡོ་རྗེ་ལ་ཕྱག་འཚལ་ལོ། །དེ་ནས་གསང་བ་བཤད་པར་བྱ། །ཟླ་བ་ཡར་ངོའི་བཅོ་ལྔ་ལ། །དམ་ཚིག་ལྡན་པའི་རྣལ་འབྱོར་བས། །ཐུན་མོང་མ་ཡིན་མཆོད་པ་སྟེ། །གང་གིས་བདུགས་པ་ཙམ་གྱིས་ནི། །དངོས་གྱུར་མྱུར་དུ་ཐོབ་བྱེད་པའི། །སྒྲུབ་པོས་བདུག་སྤོས་བདུག་པ་ནི། །བརྟུལ་ཞུགས་འཛིན་པས་འདི་ལྟར་བྱ། །འབྲས་དཀར་བཏགས་པའི་ཕྱེ་མ་ནི། །སརྫ་ར་ཛ་དག་དང་ནི། །ག་པུར་ཙནྡན་ཙནྡན་དཀར་དམར་དང༌།། ཆ་མཉམ་ནས་ནི་དེ་དག་བསྲེ། །ཨ་ཀ་རུ་ནག་གིས་བསྒོས་ནས། །བེ་ཏ་དཀར་མོའི་ཆར་རྒྱུན་གྱིས། །རྣམ་པར་སྦྲུས་ནས་རབ་བསྔགས་ཏེ། །རྩ་བའི་རིག་པ་གང་དེ་ལ། །དབབ་པའི་གསང་སྔགས་རབ་ཏུ་སྒྱར། །སྟོང་ཙ་བརྒྱད་དུ་བཟླས་ནས་ནི། །དངོས་གྱུར་ཕྱིར་ནི་རྫས་དེ་ཡི། །དེ་ནས་མཁས་པས་རི་ལུ་བྱ། །གང་ཞིག་མཆོད་པའི་དུས་སུ་ནི། །སེམས་ཀྱི་དབང་ཕྱུག་ཏིང་འཛིན་གྱིས། །རྣམ་པར་སྦྱངས་པའི་ས་གཞི་ལ། རྟེན་སོགས་དགྲམ་པར་བྱས་ནས་ནི། །ཚོགས་གཏེར་བདག་མདུན་བཀུག་ནས། །རྡོ་རྗེ་ཅན་གྱིས་བདུག་པ་དབུལ། །གསེར་སོགས་མཛེས་པའི་སྣོད་དུ་ནི། །ཙནྡན་ལ་
སོགས་མདག་མེ་ལ། །སྔར་བཤད་པ་ཡི་རི་ལུ་བསྲེག །དེས་ནི་རྟེན་ལ་བདུག་པར་བྱ། །སྦྱོར་ངེས་སྐྱོབ་པ་མཉེས་གྱུར་ན། །གཏེར་རྣམས་དེ་ཡི་མོད་ལ་སྟེར། །གལ་ཏེ་དེ་ལྟར་མ་གྱུར་ན། །གཏེར་བདག་ཉམས་པར་གདོན་མི་ཟ། །འདི་ནི་རབ་ཏུ་གསང་བ་སྟེ། །གསང་བའི་གནས་སུ་སྤྱད་པར་བྱ། །བདུག་སྤོས་ཀྱི་སྦྱོར་བའོ། །དེ་ནས་དམ་ཚིག་བཤད་བྱ་བ། །རྟག་པར་ཁྲུས་དང་གཙང་སྦྲ་བྱ། །རྔ་དྲིལ་ལ་སོགས་རོལ་མོའི་སྒྲ། །སྣ་ཚོགས་མེ་ཏོག་དྲི་ལྡན་དང༌། །སྣ་ཚོགས་འབྲུ་ཡི་ཆན་དང་བཤོས། །མཛེས་པའི་དང་སྣས་རྟག་མཆོད་བྱ། །ཆང་རྣམས་དབུལ་བར་མི་བྱ་སྟེ། །ཤ་ནི་བརྟགས་ཏེ་དབུལ་བར་བྱ། །རྟག་ཏུ་སྔོན་པོའི་གོས་འཆང་ཞིང༌། །ལུང་ཐང་འབྲས་བུའི་བགྲང་འཕྲེང་བགྲང༌། །མྱུར་འགྲོ་ཤ་ཡི་བཟའ་བ་སྤང༌། །ཉམས་ཤིང་ཆག་པའི་སྣོད་མི་བཟའ། །རྩུབ་ཅིང་ནག་པོའི་སྟན་མི་འདུག །བཟའ་བྲལ་མས་བསྟབས་བཟའ་བཏུང་རྣམས། །རྣམ་པ་ཀུན་དུ་མི་སྤྱོད་དོ། །སྲོག་བྲལ་བ་ལ་རེག་པ་སྤང༌། །བསྲུང་བར་བྱ་བའི་དམ་ཚིག་གོ །དེ་ནས་རྟེན་ནི་བཤད་པར་བྱ། །ཕྱི་ནང་གསང་བའི་བྱེ་བྲག་གི །གཏེར་བདག་བརྟེན་པའི་རྟེན་ཡང་ནི། །རྣམ་པ་གསུམ་དུ་མཁས་པས་བརྟག །ཕྱི་རྟེན་རྟ་མཆོག་རབ་སྔོ་ལ། །མཛེས་པའི་རྒྱན་བཏགས་མགོན་ལ་དམིགས། །རྟག་ཏུ་ཡང་ནི་བཅང་བར་བྱ། །ཡང་ན་གཟུགས་ལེགས་རབ་ཏུ་གཟུང༌། །གསང་རྟེན་གྲོ་གའི་ཤུན་སོགས་ལ། །གུར་གུམ་དྲི་བཟངས་རབ་སྤེལ་བས། །བཻ་ཡིག་བྲིས་ལ་སྔགས་ཀྱིས་བསྐོར། །རིན་ཆེན་དང་བཅས་རིན་ཆེན་གཟུགས། །འབྲུ་མཆོག་བཏགས་ནས་བསྣོས་བྱས་ལ། །མཁས་པས་བྱས་ཏེ་སྙིང་པོ་གཞུག །ཚོན་བྱུགས་ནས་ནི་མདུན་གཞག་གོ །གཉིས་པ་བྲམ་ཟེའི་རས་དག་གམ། །གཞོན་ནུ་མ་ཡིས་ལེགས་བཀལ་བའི། །རས་ལ་དྲི་ཡིས་རབ་བསྒོས་ནས། །གཏེར་བདག་སྐུ་མདོག་ཕྱག་ཆར་ལྡན། །ལུགས་ནས་འབྱུང་བའི་རིམ་པ་ཡིས། །དམ་ཚིག་ལྡན་པས་མྱུར་བྲིས་ལ།། ཕྱི་རོལ་ཤིང་སོགས་རྒྱན་གྱིས་མཛེས། །སྔགས་རིག་པས་ནི་མདུན་དགྲམ་བྱ། །རྟེན་གཟུགས་པ་ཡི་རིམ་པའོ། །དེ་ནས་གསང་བ་བཤད་བྱ་སྟེ། །སྒྲུབ་པོ་གསང་བདག་ཕྱགས་བལྟས་ཏེ། །གཏོར་མའང་དེ་ཉིད་ཕྱོགས་སུ་སྤྱི་ན། །གསང་རྟེན་ནེའུ་ལེའི་རླུད་བུར་གཞུག །སྔོན་དམར་ཁ་སྤྲོ་
རྒྱུན་འཆང་ཞིང༌། །འབྲས་སོགས་འབྲུ་རྣམས་དེར་གཞུག་བྱ། །གཞན་གྱིས་མཐོན་ན་དངོས་གྲུབ་ཉམས། །གཏོར་སྒྲུབ་པ་ལ་གསང་བ་ཤིས། །ཆོ་གའི་སྦྱོར་བ་འདི་ཡིས་ནི། །ནམ་མཁའ་མཛོད་ལ་རྣམ་པར་རོལ། །རྒྱལ་པོ་ཆེན་པོ་རྣམ་ཐོས་སྲས་ཀྱི་རྟོགས་པ་བདེ་བྱེད་ཆོ་ག་སྣ་ཚོགས་པའི་མཛོད་ཅེས་བྱ་བ་རྫོགས་སོ།།