ཚོགས་ཀྱི་བདག་པོ་གསང་བའི་སྒྲུབ་ཐབས་ཞེས་བྱ་བ།
རྒྱ་གར་སྐད་དུ། ག་ཎ་པ་ཏི་གུ་ཧྱ་སཱ་དྷ་ནཾ་ནཱ་མ། བོད་སྐད་དུ། ཚོགས་ཀྱི་བདག་པོ་གསང་པའི་སྒྲུབ་ཐབས་ཞེས་བྱ་བ། །གཤིན་རྗེ་གཤེད་ལ་ཕྱག་འཚལ་ལོ། །འགྲོ་དོན་ཕྱོགས་མེད་སྤྱོད་པ་ལ། །བསོད་ནམས་ཚད་མེད་བསྐྱེད་དགོས་པས། །ཚོགས་ཀྱི་བདག་པོ་བསྒྲུབ་པར་བྱ། །མི་སྐད་ཁྱི་སྐད་མི་ཐོས་པའི། །གསངས་སམ་རི་པོ་མཐོན་པོའི་རྩེ། །ལྟ་ཆེན་གནས་པའི་ས་ཡིན་པས། །སྒྲུབ་པའི་གནས་སུ་ཤེས་པར་བྱ། །ཟངས་ཀྱི་མཎྜལ་གྲུ་བཞིའི་སྟེང༌། །བུམ་པ་ལྟ་བུའི་དཀྱིལ་འཁོར་བྲི། །དེ་སྙེད་ཀ་ར་ཝ་དི་གཞག །ཆུ་དང་འོ་མ་བསྲེས་པས་དགང༌། །བསྐྱེད་པའི་ས་བོན་ཤེལ་རྡོ་གཞུག །ག་བུར་ཛཱ་ཏི་ཙནྡན་གདབ། །དེ་སྟེང་ཚོགས་བདག་བཞུགས་པའི་རྟེན། །བྱང་ཤར་ཁ་བལྟས་ལུང་པ་ཡི། །ས་ཆུ་བསྲེས་པའི་འདག་པ་ལ། །ཚོགས་ཀྱི་བདག་པོའི་སྐུ་བཞེངས་ཏེ། །ཞལ་གཅིག་ཕྱག་བཞི་སྐུ་མདོག་དམར། །གཡས་པ་སྲིད་པའི་མེས་པོ་ལ། །གཡོན་པར་ནུའི་མཚན་མ་རྣམས། །ཕྱག་གཉིས་ཐལ་སྦྱོར་སྤོས་སྡོང་འཛིན། །ཞབས་གཉིས་བརྐྱང་བསྐུམ་མཇུག་མ་ཅན། །སྐྱིལ་ཀྲུང་ཕྱེད་པའི་ཚུལ་དུ་བཞུགས། །ཀ་ར་ཝ་དེའི་སྟེང་དུ་གཞག །ཁོང་པར་སྤྲེ་སྙིང་དུ་མ་གཅིག་དང༌། །ཡིག་འབྲུ་བཅུ་པའི་གསང་བསྔགས་གཞུག །དེ་ཡི་མདུན་དུ་མཆོད་པ་དང༌།། གཏོར་མ་བཟང་པོ་བཤམ་པར་བྱ། །དེ་ནས་བདག་ཉིད་ལྟར་བསྐྱེད་ལ། །སྟོང་པའི་ངག་ལས་གཿདེ་ལས། །སྤྲེའུ་ཕྱག་བཞི་བསྐྱེད་བསམ་ཏེ། །དེ་ཡི་ཐུགས་ཀར་གཿལ་ནི། །སྔགས་ཀྱིས་བསྐོར་བར་བསམ་བྱ་སྟེ། །རང་གི་སྙིང་གའི་འོད་ཟེར་གྱིས། །ཚོགས་བདག་བཀུག་ལ་སྐུ་ལ་བསྟིམ།། སྐུ་གསུང་ཐུགས་ཀྱིས་བྱིན་གྱིས་བརླབས། །ཧཱུཾ་རང་བཞིན་དག་པའི་ལྟ་ཡུལ་ནས། །ལྷ་ཆེན་ཡབ་ཡུམ་བཤོས་པའི་སྲས། །ནོར་བུ་དྲི་མ་མེད་པ་ནི། །གཞོན་ནུ་སྟོབས་ཀྱི་རྒྱན་གྱིས་སྤྲས། །ཕྱག་བཞི་གླིང་བཞི་ཁྱབ་པར་ཉུལ། །ལྷ་དམག་དཀར་པོའི་བ་ལོ་བསྒྱུར། །གང་གིས་ཁྱོད་ཀྱི་མཚན་
འཛིན་པ། །དེ་ལ་ནོར་གྱི་ཆར་པ་འབེབས། །ཐུགས་དམ་རྒྱུད་བསྐུལ་སྤྱན་འདྲེན་ན། །ཐུགས་རྗེས་དགོངས་ལ་གཤེགས་སུ་གསོལ། །ཨོཾ་ག་ཎ་པ་ཏི་ཨཱ་ཀཪྵ་ཡ་ཛ་ཛཿ། དེ་ནས་མཆོད་པའི་ཚོགས་རྣམས་དབུལ། །དེ་ནས་བསྙེན་པ་བསྐྱལ་བར་བྱ། །ཚོགས་བདག་ཐུགས་ཀར་ཟླ་བ་ལ། །རྩ་བའི་སྔགས་དང་གཟུངས་ཀྱིས་བསྐོར། །སྔགས་བཟླས་སྤྲོ་བསྡུའི་སྦྱོར་པ་བྱ། །ཨོཾ་ག་ཎ་མ་ག་ཎ་ཛྙཱ་ཡ་སྭཱ་ཧཱ། ཨོཾ་རཏྣ་རཏྣ་རཏྣ་རཏྣ་ག་ཎ་པ་ཏེ་ག་ག་ག་ག་ག་ག་ག་ག་ག་ག་ཎ་པ་ཏི་སྭཱ་ཧཱ། ཙུ་རུ་ཙུ་རུ། མ་ནུ་པ་ཏྲ། ཏུ་རུ་ཏུ་རུ། གྷ་གྷ་ཏ་ཡ་ག་ཎ་པ་ཏི་སྭཱ་ཧཱ། རྩ་སྔགས་གཟུངས་སྔགས་བཅས་པ་ལ། །ཞག་བདུན་པར་དུ་བསྙེན་པ་བསྐྱལ། །དེ་དུས་ཏིང་འཛིན་རིམ་པ་ནི། །རང་ལས་འོད་འཕྲོས་མཆོད་པའི་ཚོགས། །སྤྲོས་ནས་ཚོགས་བདག་སྐུ་ལ་འབུལ། །ཚོགས་བདག་སྐུ་ལས་འོད་ཟེར་འཕྲོས། །སྟོང་གསུམ་ནོར་གྱི་བཅུད་བསྡུས་ནས། །ལྷ་ཆེན་ཚོགས་ཀྱི་ཞལ་དུ་གསོལ། །ཁོང་དུ་ཞུ་ནས་གསང་བར་འཛགས། །འོག་གི་བུམ་པ་ཁེངས་པར་བསམ། །བུམ་ཆུ་སྐབས་སུ་ལྟོ་ཆུ་བྱ། །དེ་ནས་ལས་ལ་སྦྱར་བར་བྱ། །ཕོ་དང་མོ་ཡི་དབང་པོ་དང༌། །འཁོར་ལོ་ལས་ལ་སྦྱང་བར་བྱ། །ཟངས་ལས་སྲིད་པའི་མེས་པོ་བྱ། །ལྟོ་བར་སྐྱེས་པའི་ཕོ་མཚན་གཞུག །རྩ་བའི་སྔགས་ལ་ལས་སྔགས་གདགས། །ཤམ་པུ་ཁ་སྒྱུར་ཤེས་པར་བྱ། །དེ་ལྟར་ཞག་གསུམ་ལས་ལ་སྦྱར། །སྲིད་པའི་མེད་པོ་དར་སྣས་བརྒྱན། །ཡུལ་འཁོར་མཐོང་སར་གཡུགས་བྱས་ན། །ལྷ་མོ་རྣམས་ཀྱང་འདུ་བར་འགྱུར། །ཡང་ན་ར་ནུའི་མཚན་མ་ལ། །ལས་སྦྱོར་སྔགས་དེ་ཞག་གསུམ་གདབ། །གསལ་ཤིང་རྩེ་ལ་ཕྱར་བྱས་ནས། །སྐྱེས་པ་འདུ་བའི་སར་ཕྱིན་ན། །ལྷ་རྣམས་འཚོགས་པར་གྱུར་བ་ན། །བརྒྱ་བྱིན་མཛེས་པ་ལྟ་བུ་རུ། །སྐྱེས་པ་ཐམས་ཅད་སེམས་འདུས་ནས། །བཀུར་སྟི་ཕུན་སུམ་ཚོགས་པར་བྱེད། །ཡིད་འཕྲོག་སྔགས་ནི་འདི་ཡིན་ནོ། །ཨོཾ་ག་ན་མ་ག་ཎ་ཛྙཱ་ཡ་སྭཱ་ཧཱ། ཨོཾ་བ་བ། སེ་སེ། ཁང་ཁང༌། ཡེར་ཡེར། རབ་རབ་གྷུར་མི། ཧ་ས་མང་ཁ་མི། སྐྱེས་པའི་ཚོགས་ཝ་ཤཾ་ཀུ་རུ་ཡེ་སྭཱ་ཧཱ། འཁོར་ལོ་ལས་ལ་སྦྱོར་བ་ནི། །མདུན་དུ་ཟངས་ཀྱི་མཎྜལ་ཁར། །མདའ་བཞི་བཙུགས་ལ་འཁོར་ལོ་
བརྒྱད། །ཡུལ་དང་འགྲོང་དང་རྒྱལ་བློན་ཚོགས། །འཁོར་ལོ་འོད་ཟེར་ལྕགས་ཀྱུ་ཡིས། །རང་དབང་མེད་པར་འགུགས་པར་བསམ། །སྔགས་ཡི་འོད་ཟེར་ཞག་གསུམ་མོ། །སྲིད་གསུམ་དབང་སྡུད་ལས་སྦྱོར་ཡིན། །དེ་ནས་གཏོང་མ་ཕུལ་བྱས་ལ། །བསྟོད་པ་བྱ་ཞིང་བཟོད་གསོལ་དབུལ། །ཡེ་ཤེས་གཤེགས་ལ་དམ་ཚིག་བསྡུ། །མིས་མ་མཐོང་བར་སྦ་བར་བྱ། །སྐར་མ་རྒྱལ་ལ་བབ་པའི་ཚེ། །མཆོད་བསྟོད་གཏོར་མ་གཏང་བར་བྱ། །དེ་ལྟར་བརྩོན་འགྲུས་ལྡན་གྱུར་ན། །གང་བསམས་པ་ནི་འགྲུབ་འགྱུར་ཞིང༌། །ཡིད་དུ་འདོད་པ་ཆར་དུ་འབབ། །འདི་བརྩམས་དགེ་བ་ཅི་ཡོད་པས། །བྱང་ཆུབ་སྤྱོད་པ་ལ་ཞུགས་ནས། །སེམས་ཅན་རྣམས་ཀྱི་དོན་བྱེད་ཤོག །ཚོགས་ཀྱི་བདག་པོ་སྤྲེའུ་ཡི་མགོ་ཅན་གྱི་སྒྲུབ་ཐབས། དཔལ་དངོས་གྲུབ་བརྙེས་པའི་པཎྚི་ཏ་ཨ་མོ་གྷ་བཛྲས་མཛད་པ་རྫོགས་སོ།། །།སླད་ཀྱིས་མཁན་པོ་དཱི་པཾ་ཀཱ་ར་ཤྲཱི་ཛྙཱ་ན་དང་ལོ་ཙཱ་བ་ནག་ཚོ་ཚུལ་ཁྲིམས་རྒྱལ་བས་བསྒྱུར་བའོ།། ཚོགས་བདག་གི་ཕྱི་སྒྲུབ་གྲ་སྟ་དཀར་པོ། ནང་སྒྲུབ་ཆགས་པ་རྡོ་རྗེ། གསང་སྒྲུབ་སྤྲེའུའི་དབུ་ཅན་རྣམས་དང༌། གཞན་ཡང་ཚོགས་བདག་དམར་པོ་ཕྱག་བཅུ་གཉིས་པ། ཚོགས་བདག་སྤྲིན་གྱི་སྒྲོན་མ་ཞེས་བྱ་བ་སྔོན་པོ་ཕྱག་བཞི་པ་རྣམས་བླ་མ་ཆོས་དཔལ་བཟང་པོས་བདག་ལ་གནང་ངོ༌།།