སྤྲིན་གྱི་སྒྲོན་མ་ཚོགས་ཀྱི་བདག་པོ་སྒྲུབ་པའི་ཐབས་ཞེས་བྱ་བ།
རིན་ཆེན་རྡོ་རྗེ།
རྒྱ་གར་སྐད་དུ། །མེ་གྷ་ཨ་ལོ་ཀ་ག་ན་པ་ཏི་སཱ་དྷ་ནཾ་ནཱ་མ། བོད་སྐད་དུ། སྤྲིན་གྱི་སྒྲོན་མ་ཚོགས་ཀྱི་བདག་པོ་སྒྲུབ་པའི་ཐབས་ཞེས་བྱ་བ། ཚོགས་ཀྱི་བདག་པོ་ལ་ཕྱག་འཚལ་ལོ། །ཁྲོ་རྒྱལ་ཁྱུ་མཆོག་ཕོངས་པ་སེལ། །མདོག་སྔོ་དེ་ལ་བདག་བཏུད་དེ། །གཏེར་གྱི་སྒྲོན་མ་ཞེས་བྱ་བའི། །སྒྲུབ་ཐབས་བདག་གི་ལེགས་རྟོགས་དང༌། །རྒྱུད་དང་མན་ངག་ལེགས་དྲན་པས། །ཡང་དག་བདག་གིས་བཤད་པར་བྱ། །མཚན་ཉིད་ལྡན་པའི་སྒྲུབ་པ་པོས། །ཡིད་འོང་ལེགས་པའི་གནས་དག་ཏུ། །སྔར་ལངས་ཁྲུས་བྱས་མེ་ཏོག་གཏོར། །ཙནྡན་ཆུ་ཡིས་མནྜལ་བྱ། །མེ་ཏོག་དྲི་ཞིམ་ཚོམ་བུ་དགྲམ། །དེ་ནས་རང་ཉིད་ཡི་གེ་མཾ། །དེ་ལས་འོད་འཕྲོས་སྤྱན་དྲངས་ལ། །མཆོད་ཅིང་གུ་གུལ་ནག་པོའི་སྨོས། །བཏང་ཞིང་འོད་ཀྱི་ངོ་བོར་བཞུ། །རང་ཉིད་ནང་དུ་ལེགས་པར་གཞུག །དེ་ཡི་སྟོབས་ཀྱིས་བདག་ཉིད་ཀྱང༌། །ཞལ་གཅིག་པ་ལ་ཕྱག་བཞི་པ། །སྐུ་མདོག་སྔོན་པོ་སྤྱན་གསུམ་པ། །དབུ་ལ་རལ་པའི་ཅོད་པན་ཏེ། །ཟླ་ཚེས་དང་
ལྡན་སྦྲུལ་གྱིས་བརྒྱན། །ཕྱག་གཡས་ད་གྲ་སྟ་མཆེ་བ་དང༌། །གཡོན་པ་རྩེ་གསུམ་ཞགས་པ་བསྣམས། །སྟག་གི་བགས་པས་སྨད་དཀྲིས་ཤིང༌། །ཀླུ་རྒྱལ་དཀར་པོའི་དོ་ཤལ་ཅན། །འོད་ཟེར་ཚོགས་ལྡན་དེ་བསྒོམ་བྱ། །རིན་ཆེན་རྟེན་ལ་ཡེ་ཤེས་གཞུག །མཆོད་པ་བྱ་ཞིང་ཡི་དགས་འཇིགས། །དེ་ཡིས་དེ་ལ་བདག་ནས་ནི། །སྐུ་ཡིས་བོན་དང་པོ་སྟེ། །བཞི་པའི་ལྔ་པ་ཨེ་ཡིས་བརྒྱན། །དང་པོའི་གསུམ་པ་དེ་འོག་སྟེ། །དེ་འོག་དབྱངས་ཡིག་དང་པོའི། །དྲུག་པའི་གསུམ་པའི་ས་བོན་ལ། །ཨོ་ཡིག་མགོ་བོ་ལེགས་པར་བརྒྱན། །དང་པོའི་དང་པོ་དེ་འོག་གནས། །རླུང་གི་ས་བོན་དེ་འོག་སྟེ། །ཞི་བའི་ཡི་གེའི་གདན་དུ་ནི། །དབྱངས་ཡིག་གཉིས་པ་སྟེང་དུས། །ཁྲོ་བོའི་སྐད་གདངས་རྗེས་ལ་བརྗོད། །ཨཱ་ལི་ཀཱ་ལི་ལེགས་པར་རྟོགས། །དེ་ལྟར་བཏུས་པའི་རིག་པ་དེ། །ཉིན་ཏེ་ཁྲི་ཚོ་རེ་རེ་དང༌། །གུ་གུལ་ནག་པོའི་རི་ལུ་ལ། །བརྒྱ་རྩ་བརྒྱད་ཀྱི་སྦྱིན་སྲེག་བྱ། །དེ་ལྟར་འབད་པས་ཟླ་རེ་ལ། །དོང་ཙ་འབུམ་འབུམ་རྙེད་པར་བྱེད། །རྒྱལ་གྱི་ཉིན་པར་སྔར་ལངས་ནས། །མཆོད་པ་དང་ནི་གཏོར་མ་དང༌། །དྲི་ཞིམ་སྤོས་ཀྱིས་ལེགས་པར་མཆོད། །རྟེན་ནི་གཙང་མིའི་གཞིའམ་ནི། །ཁྲུ་མཆོག་པ་གས་པའི་གཞི་ལ་ནི། །སྒྲུབ་པོས་མཚོན་གང་གོང་གཟུགས་བྲི། །རྒྱལ་གྱི་ཉིན་པར་རྫོགས་པ་ལ། །རྨུགས་འཛིན་རྒྱལ་པོ་ཁྱོད་ཀྱིས་མཛོད། །ཞེས་བརྗོད་གར་ཡང་བཅས་པར་བྱ། །ཟ་མ་ཏོག་གི་ནང་དུ་ནི། །མེ་ཏོག་བཟང་དང་དྲི་བཟངས་ཀྱིས། །ལེགས་པར་བསྡམས་ནས་ངེར་གནས་བྱ། །རྟག་པར་དེ་ལ་མཆོད་བྱ་སྟེ། །རྒྱ་ཆེན་ཚོགས་ཀྱིས་ལེགས་པར་མཆོད། །དེ་ལྟར་རྒྱུན་དུ་བྱས་པ་ཡིན། །གཏེར་ཆེན་ཐམས་ཅད་ཐོབ་པ་དང༌། །འབྱུང་པོའི་ཚོགས་ཀྱང་འདུན་པར་འགྱུར། །ཀུན་ལ་གཙང་ཞིང་གཙང་སྦྲར་ལྡན། །འདི་ནི་འདི་ཡི་དམ་ཚིག་གོ །འདི་ལ་འབད་གྱུར་ཐམས་ཅད་ལ། །གཏེར་གྱིས་རེ་བ་སྐོང་བ་དང། །དུས་རྣམས་ཀུན་དུ་ཁྱོད་ཀྱིས་གཟིགས། །ཞེས་ནི་ལེགས་པར་རྟོགས་པར་མཛོད། །ཚོགས་བདག་གཟིགས་གཟུངས་གསལ་བ་ཡི། །སྒྲུབ་ཐམས་གཏེར་གྱི་སྒྲོན་མ་འདི། །འགྲོ་རྣམས་ཕོངས་ལས་གྲོལ་པ་དང༌། །སྦྱིན་པའི་ཕ་རོལ་ཕྱིན་རྫོགས་ཤོག །ཚོགས་ཀྱི་བདག་
པོ་སྤྲིན་གྱི་སྒྲོན་མའི་སྒྲུབ་ཐབས་སློབ་དཔོན་བྲམ་ཟེ་རིན་ཆེན་རྡོ་རྗེས་མཛད་པ་རྫོགས་སོ།། །།རྒྱ་གར་གྱི་པཎྜི་ཏ་དཱི་པཾ་ཀ་ར་ཤྲཱི་ཛྙཱ་ན་དང་ལོ་ཙཱ་བ་ནག་ཚོ་ཚུལ་ཁྲིམས་རྒྱལ་བས་བསྒྱུར་བའོ།།