མཎྜལ་བྱ་བའི་ཆོ་ག།
སངས་རྒྱས་གསང་བ།
རྒྱ་གར་སྐད་དུ། མཎྜལ་ཀྲི་ཡ་བོ་དྷིཿ། བོད་སྐད་དུ།
མཎྜལ་བྱ་བའི་ཆོ་ག །སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། །དང་པོ་དཀྱིལ་འཁོར་ཆེ་ཆུང་གི །བསྐུས་པས་ཡོག་པའི་མར་བཤམས་ལ། །ལྕི་བ་དངོས་པོ་ཉི་ཤུར་འགྱུར། །ཆུ་ཡང་སྲང་གི་ཉི་ཤུར་འགྱུར། །འོ་མ་དག་དང་ཞོ་དག་ཀྱང། །དང་པོ་མར་གྱི་སུམ་འགྱུར་རོ། །དང་པོར་ལྕི་བ་བཙིར་བ་ཡང༌། །བ་ཡི་ཆུ་ཡིས་མནོས་ལ་བཙིར། །དེ་ནས་ཚགས་ཀྱིས་བཙགས་བྱ་སྟེ། །དེ་ནས་དེ་རྣམས་སྦྱར་བྱས་ལ། །ཞག་ནི་གཉིས་དང་གསུམ་བར་དུ། །དེ་ནི་རས་སུ་བཅུག་པ་ཡང༌། །ཉི་མ་གཉིས་གཉིས་བར་ཆོད་པར།། ཉི་མ་བདུན་དུ་རིམ་གྱིས་བྱུག །དེ་ནས་ལག་སྣུམ་དག་གིས་བྱུག །དེ་ནི་མི་བརྟན་པར་ཡང་བཤད། །བརྟན་པར་བྱ་བའི་ཆོ་ག་ནི། །མཎྜལ་ཟུར་ནི་རམས་ཀྱིས་བྱུག །མདངས་ནི་བྱུང་ན་ལེགས་པར་བཤད། །དེ་ནས་སརྫ་ར་རྫ་དང༌། །མར་གྱི་ལྡེ་གུ་བྱས་པ་ཡིས། །དཀྱིལ་འཁོར་ལ་ནི་བསྐུས་བྱས་ན། །མེ་ལོང་དང་ནི་ཆུ་ཤེལ་ལྟར། །བཞིན་ལ་སོགས་པ་སྣང་བར་འགྱུར། །མཎྜལ་བྱ་བའི་ཆོ་ག་དངོས་གྲུབ་བརྙེས་པའི་སློབ་དཔོན་སངས་རྒྱས་གསང་བའི་ཞལ་སྔ་ནས་མཛད་པ་རྫོགས་སོ།། །།མཎྜལ་བྱ་བའི་ཆོ་ག་འདི་ནི་ཕ་རོལ་ཏུ་ཕྱིན་པ་དང་གསང་སྔགས་གཉི་གའི་ཐུན་མོང་པའོ།།