མཎྜལ་གྱི་ཆོ་ག།
ཁ་ཆེའི་པཎ་ཆེན།
རྒྱ་གར་སྐད་དུ། མཎྜལ་བི་དྷིཿ། བོད་སྐད་དུ། མཎྜལ་གྱི་ཆོ་ག །ཐུགས་རྗེ་ཆེན་པོ་རྣམ་པར་སྐྱོབ་ལ་ཕྱག་འཚལ་ལོ། །དཀྱིལ་འཁོར་བཟང་པོས་ཉིད་དང༌། །རིན་ཆེན་རང་བཞིན་ངོས་མཉམ་ལ། །དྲི་ཞིམ་པ་ཡི་བྱུག་
པས་བྱུག །མུ་ཏིག་མེ་ཏོག་ནོར་བུ་དགོད། །དབུས་སུ་འདབ་བརྒྱད་འདབ་བཞི་ཡི། །མེ་ཏོག་དམར་པོས་བོན་ཅན། །བཞག་ལ་དེ་སྟེང་ཐུབ་པ་བཞུགས། །གདུགས་དཀར་གྱིས་ནི་སྟེང་ནས་དབུབ། །སྒྲུབ་པོ་པདྨའི་ཕྲེང་བ་ཡི། །ང་རྒྱལ་འཛིན་པས་རྡོ་རྗེའི་ལག །གཉིས་གཤིབས་གྱེན་དུ་བསྐྱོད་པའི་རྒྱས། །ས་གསུམ་གཙོ་བོ་སྤར་བར་བྱ། །རབ་ཏུ་དབྱིབས་ལེགས་ཁ་དོག་མཛེས། །དྲི་བསུང་རོ་མཆོག་རེག་བཟང་བའི། །མེ་ཏོག་སྤུངས་པས་གོ་རིམས་བཞིན། །གླིང་སོགས་བཀོད་པ་ཇི་བཞིན་བརྟག །ཨོཾ་ཨཱཿབཛྲ་ཙ་ཏུ་ར་དྷྭཱི་པ་ཧཱུཾ། །ཨོཾ་ཨཱཿབཛྲ་པ་ཡཱཥྚ་དྭཱི་པ་ཧཱུཾ། ཨོཾ་ཨཱཿབཛྲཥྚ་རཏྣ་ཧཱུཾ། ཨོཾ་ཨཱཿ་བཛྲཱ་ཥྚ་མངྒ་ལ་ཧཱུཾ། ཨོཾ་ཨཱཿ་བཛྲ་སིདྡྷི་བིཾ་ཤ་ཏི་ཧཱུཾ། ཨོཾ་ཨཱཿ་བཛྲ་སཱུཪྻ་ཙནྡྲ་ཧཱུཾ། རྣམ་དག་གཞིང་དུ་ཕུན་ཚོགས་གླིང་དང་རིན་ཆེན་དང༌། །བཀྲ་ཤིས་གྲུབ་པ་རིམ་གསུམ་ཕྲེང་བ་ལེགས་བཀོད་ལ། །གསལ་བྱེད་སྒྲོན་མ་འབར་བ་གཉིས་ཀྱིས་བརྒྱན་གྱུར་པ། །སྔགས་འཆང་རྡོ་རྗེ་རོལ་པའི་གར་གྱི་བསྟབས་པས་དབུལ། །དེ་ནས་ལུས་ཅན་ཐམས་ཅད་ལ། །འཇིག་རྟེན་མགོན་པོ་ཉེར་མཁོའི་གཟུགས། །དཔག་མེད་རྣམ་པར་འཕྲུལ་པ་ཡིས། །ཞིང་རྣམས་ཀུན་དུ་དོན་ཡོད་སྤྱོད། །ཇི་སྲིད་སྙིང་པོ་བྱང་ཆུབ་བར། །དེ་དག་ནམ་ཡང་འདྲེན་པའི་མཐུས། །ངན་འགྲོའི་སྒྲ་ཡང་མི་གྲག་ཅིང༌། །རྟག་ཏུ་དགའ་སྐྱིད་འཚོ་བར་བྱེད། །གལ་ཏེ་བློ་གསལ་སྤོབས་སྤྱོད་ན། །སྐུ་གསུངས་ལ་སོགས་གང་བཤད་པ། །ཆོ་ག་དེ་དག་འདས་པ་ཡང༌། །གདོན་མི་ཟ་བར་བྱ་བ་ཉིད། །གང་ཚེ་བསྡུ་བར་འདོད་པ་ན། །སེ་གོལ་བརྡབས་པས་སྤར་བྱས་ལ། བཟོད་པར་གསོལ་དང་སྨོན་ལམ་གདབ། །དྲན་པའི་རྒྱུ་ཡིས་གཟུགས་གདབ་བྱ། །མཎྜལ་གྱི་ཆོ་ག་ཁ་ཆེའི་པཎ་ཆེན་གྱིས་མཛད་པ་རྫོགས་སོ།། །།གནུབས་བྱམས་པའི་དཔལ་གྱིས་བསྒྱུར་རོ།།