གཏོར་མ་ཆེན་པོའི་ལས་ཀྱི་རིམ་པའི་འགྲེལ་པ།
རྡོ་རྗེ་མི་བསྐྱོད་པ།
རྒྱ་གར་སྐད་དུ། མ་ཧཱ་བ་ལིཾ་ཀརྨ་ཀྲ་མྀ་བྲཏྟི། བོད་སྐད་དུ། གཏོར་མ་ཆེན་པོའི་ལས་ཀྱི་རིམ་པའི་འགྲེལ་པ། འཕགས་པ་འཇམ་དཔལ་གཞོན་ནུར་གྱུར་པ་ལ་ཕྱག་འཚལ་ལོ། །དངོས་པོ་ཀུན་བདག་རྡོ་རྗེ་སེམས། །སྟོན་ཀའི་ཟླ་བ་ལྟར་དཀར་བ། །སངས་རྒྱས་ཀུན་གྱི་བདག་ཉིད་ཆེ། རྒྱུད་བདག་མགོན་པོར་ཕྱག་འཚལ་བསྟོད། །འཇམ་དབྱངས་ལ་སོགས་ཐམས་ཅད་ལ། །རྡོ་རྗེ་གུས་པར་ཕྱག་འཚལ་ནས། །གཏོར་མ་ཆེན་པོའི་རིམ་པ་འདི། །བློ་དམན་རྣམས་ལ་ཕན་ཕྱིར་བཤད། །ཉན་པ་པོ་རྟོག་པ་དད་ལྡན་པ་རྣམས་དགོས་པ་ལ་སོགས་པ་མེད་པ་ལ་མི་འཇུག་པས་དང་པོ་རེ་ཞིག་དགོས་པ་ལ་སོགས་པ་བརྗོད་པར་བྱ་སྟེ། དེ་ལ་དགོས་པ་ནི་གཏོར་མ་ཆེན་པོའི་ལས་ཀྱི་རིམ་པ་ཤེས་པར་བྱའོ། །དེས་བདག་དང་གཞན་གྱི་དོན་ཕུན་སུམ་ཚོགས་པ་ནི་དགོས་པའི་དགོས་པའོ། །དེ་ཡང་སློབ་དཔོན་གྱི་གཞུང་འདིས་རྟོགས་པ་འབྲེལ་པའོ། །བརྗོད་བྱ་ལས་ཀྱི་རིམ་པ་ཉིད་དོ། །ཤེས་རབ་ཡེ་ཤེས་འོད་ལྡན་པ། །ཡན་ལག་ཐམས་ཅད་བསྡུས་པ་ཡི། །འཕགས་པ་འཇམ་དཔལ་གཞོན་ནུར་བཏུད། །ཅེས་བྱ་བ་ནི་སློབ་དཔོན་གྱིས་ཡི་དམ་གྱིས་ཡི་དམ་གྱི་ལྷ་ལ་མཆོད་པ་བྱས་པའོ། །དེ་ཡང་ཤེས་རབ་ནི་སྟོང་པ་ཉིད་ཀྱི་ཡེ་ཤེས་ཀྱི་རང་བཞིན་ཡུམ་ཤེས་རབ་ཀྱི་ཕ་རོལ་ཏུ་ཕྱིན་པའོ། །དེ་ཡང༌། ཤེས་རབ་སྤྲོས་དང་བྲལ་བའོ།། ཞེས་པ་དང༌། སྟོང་པ་ཉིད་ནི་ཤེས་རབ་བརྗོད། །ཅེས་འབྱུང་བའི་ཕྱིར་རོ། །ཡེ་ཤེས་ནི་རྣམ་པ་ལྔའོ། །ཤེས་རབ་ཡེ་ཤེས་འོད་གསལ་བ་ཡོད་པས་ན་དེ་སྐད་ཅེས་བྱའོ། །ཡན་ལག་ནི་མཚན་དང་དཔེ་བྱད་དེ་བསྡུས་པ་ནི་ཚང་བའོ། །ཐམས་ཅད་ནི་མ་ལུས་པའོ། །ཡང་ན་ཡན་ལག་ནི། སྟོབས་དང་མི་འཇིགས་པ་དང་གཟུངས་དང་ཏིང་འཛིན་དང༌། །སོ་སོ་ཡང་དག་རིག་དང་བསྲུང་བ་མེད་པ་དང༌། སངས་རྒྱས་ཆོས་མ་འདྲེས་པ་བཅོ་བརྒྱད་འོད་ལྡན་པས། རྒྱུ་དང་འབྲས་བུའི་ཡོན་ཏན་ཁྱད་པར་ཀུན་ལྡན་པའོ། །ཞེས་པ་ནི་སངས་རྒྱས་ཀྱི་ཡན་ལག་གོ །མ་ལུས་པར་ཚང་ཤིང་རྫོགས་པས་ན་ཐམས་ཅད་འདུས་པ་སྟེ་ཤིང་རྟའི་ཡན་ལག་བཞིན་ནོ། །སྡིག་པ་རྣམས་ལས་རིང་དུ་སོང་བས་འཕགས་པའོ། །འཇམ་ཞིང་མཉེན་པ་དང་ལྡན་པས་འཇམ་དཔལ་
ལོ། །སྲ་ཞིང་རྩུབ་པ་མེད་པའི་དཔལ་མངའ་བས་བགྲེས་ཤིང་འགྱུར་བ་མེད་པའི་སྐུ་ན་ཚོད་ལོ་བརྒྱད་པ་ལྟ་བུ་གཉིས་སུ་མེད་པའི་བདེ་བའོ། །ཡང་ན་ཤེས་རབ་ནི་སྤྲོས་པ་དང་བྲལ་བ་སྟོང་པ་ཉིད་ཡེ་ནས་གནས་པའོ། །དེ་ཡང་དེ་བཞིན་གཤེགས་པ་རྣམས་བྱུང་ཡང་རུང་མ་བྱུང་ཡང་རུང་ཆོས་རྣམས་ཀྱི་ཆོས་ཉིད་ནི་གནས་པ་ཉིད་དོ་ཞེས་པ་དང༌། སེམས་ཅན་ཐམས་ཅད་བདེ་བར་གཤེགས་པའི་སྙིང་པོ་ཅན་ཞེས་གསུངས་པའི་ཕྱིར་རོ། །དེ་གསལ་ཞིང་རྟོགས་པས་ཤེས་རབ་ཡེ་ཤེས་འོད་ལྡན་ནོ། །ཤེས་རབ་ཡེ་ཤེས་ཉིད་ཡན་ལག་སྟེ། བསྡུས་པའི་སྒྲ་བསྲེས་པ་ལ་ཡང་འཇུག་པས་དབྱེར་མེད་དོ། །དེ་ཉིད་འཕགས་པ་འཇམ་དཔལ་གཞོན་ནུ་སྟེ། འཁོར་བའི་ཉེས་པ་བྲལ་བ་གཟུགས་སྐུས་འགྲོ་བའི་དོན་རྫོགས་པ། ཆོས་སྐུ་བདེ་བ་ཟག་པ་མེད་པ་ལ་ཕྱག་འཚལ་བས་ན་བཏུད་པའོ། །གཞུང་རྫོགས་པ་དང་ལེ་ལོ་མེད་པར་བྱ་བས་ན། །གཏོར་མ་བདག་གིས་བརྩམས་ཞེས་པ་སྟེ་རྫས་མང་པོས་བསྲེས་པ་ལ་མི་འཛིན་པས་གཏོར་མ་སྟེ། མི་འཛིན་གཏོར་བས་གཏོར་མའོ། །ཞེས་གསུངས་སོ། །ལས་དང་པོ་པས་ཤེས་པར་བྱ་བའི་ཕྱིར་ལས་ཀྱི་རིམ་པ་བྲི་བའོ། །སློབ་དཔོན་གྱིས་གྲགས་པ་དང་ཆགས་པས་མ་ཡིན་གྱི་མ་རྟོགས་པའི་གང་ཟག་ལ་སྙིང་རྗེ་བས་བརྩམས་པ་ནི། སྙིང་རྗེ་ཆེན་པོའི་སེམས་བསྐྱེད་པས། །འགྲོ་བ་མ་ལུས་དོན་དུ་ནི། །གཏོར་མ་ཆེན་པོའི་རིམ་པ་འདི། །ཞི་བའི་རྒྱུད་ཀྱི་དོན་བསྡུས་ཡིན། །ཞེས་བྱའོ། །སྙིང་རྗེ་ནི་སེམས་ཅན་ལ་དམིགས་པ་དང་ཆོས་ལ་དམིགས་པའོ། །དེ་ལ་སེམས་ཅན་སྡུག་བསྔལ་གྱིས་སྡུག་བསྔལ་བ་ལ་སྙིང་རྗེ་བ་དང༌། ཕྱིན་ཅི་ལོག་ལ་ཡང་དག་ཏུ་འཛིན་པ་ལ་སྙིང་རྗེ་བ་སྟེ་གོ་རིམས་བཞིན་ནོ། །ཐམས་ཅད་ཁྱབ་པས་ཆེན་པོའོ། །འགྲོ་བ་རིས་དྲུག་ནི་ལྷ་དང་ལྷ་མ་ཡིན་དང་མི་དང་དུད་འགྲོ་དང་ཡི་དགས་དང་དམྱལ་བ་སྟེ་སྤྱི་ལ་གཏོང་བས་མ་ལུས་དོན་ཏོ། །ཆེན་པོ་ཞེས་བྱ་བ་ནི་སྔ་མ་བཞིན་ནོ། །འཇམ་དཔལ་ཁྲི་དྲུག་སྟོང་པ་ནི་ཞི་བ་དང་ཁྲོ་བོའི་རྒྱུད་ཀྱི་རྟོག་པ་མང་བས་ན་ཞི་བའི་རྒྱུད་ཀྱི་དོན་བསྡུས་པའོ། །རྒྱུད་ནི་རྒྱུ་དང་ཐབས་དང་འབྲས་བུའོ། །དེ་ལ་རྒྱུད་ནི་སྨིན་པར་བྱས་པ་དམ་ཚིག་དང་ལྡན་པའོ། །ཐབས་ནི་དེ་ཁོ་ན་ཉིད་བཅུ་ལ་སོགས་པའོ། །
འབྲས་བུ་ནི་མཆོག་བསྒྲུབ་པའོ། །གང་ཞིག་སྙིང་རྗེའི་རླན་སེམས་ཀྱིས། །བདག་དང་གཞན་དོན་སྒྲུབ་འདོད་པས། །ཞེས་བྱ་བ་ནི་འཇུག་པའི་གང་ཟག་གི་མཚན་ཉིད་དེ། ཐེག་པ་ཆེན་པོ་ལ་སྙིང་རྗེ་དང་མི་ལྡན་པས་མི་འགྲུབ་པས་རྩ་བ་ནི་སྙིང་རྗེ་ཆེན་པོ་ཞེས་གསུངས་སོ། །བདག་བླ་ན་མེད་པའི་བྱང་ཆུབ་འདོད་པ་དང༌། སེམས་ཅན་གྱི་དོན་བྱ་བར་འདོད་པས་བླ་མ་དམ་པ་བསྟེན་པར་བྱ་ཞིང་རྒྱུད་ཀྱི་དོན་བཙལ་བར་བྱ་བ་ཡིན་པས། དང་པོ་མཁས་ལ་བསླབ་པར་བྱ། །ཞེས་སྨོས་ཏེ། དབང་དང་དམ་ཚིག་ཐོབ་པའི་སློབ་མས་བླ་མ་མཁས་པ་སྙིང་རྗེ་དང་ལྡན་པ་མང་དུ་ཐོས་པ་མཉེས་པར་བྱས་ལ། བླ་མའི་བཀའ་དང་མི་འགལ་བར་སྤྱད་ཅིང་རྒྱུད་ཀྱི་དགོངས་པ་བཙལ་བར་བྱའོ། །ལོབས་ནས་གཏོར་མའི་རྫས་བསོགས་ཏེ། རིན་ཆེན་སྣོད་མཛེས་ཆུ་གཙང་དང༌། །རིན་ཆེན་ལྔ་དང་སྨན་ལྔ་དང༌། །འབྲུ་ལྔ་དང་ནི་སྙིང་པོ་ལྔ། །སྤོས་དང་མེ་ཏོག་མཛེས་པ་ལྔ། །དཀར་གསུམ་མངར་གསུམ་ཕྱེ་འམ་ཟན། །འབྲས་ལ་སོགས་པའི་ཆན་ཁྲོལ་དང༌། ཁུར་བ་ལ་སོགས་གཙང་མའི་ཟས། །ཇི་ཅམ་འབྱོར་ཙམ་བཤམ་པར་བྱ། །ཞེས་བྱ་བ་ནི་བླ་མ་མཉེས་པར་བྱས་ཤིང་རྒྱུད་ཐོས་ནས་ལས་ཀྱི་རིམ་པ་ཤེས་ནས་རིན་པོ་ཆེའི་སྣོད་ལ་སོགས་པའི་རྫས་འབྱོར་བ་ཡོངས་སུ་བསོགས་ཏེ། སྣོད་རིན་པོ་ཆེ་ལས་བྱས་པ་བཟོ་ལེགས་པའི་ནང་དུ་ཆུ་མ་འབགས་པ་མི་གཙང་བ་ལ་སོགས་པས་སྨེ་བར་མ་གྱུར་པ་དང༌། གསེར་དང་བྱུ་རུ་དང་དངུལ་དང་མུ་ཏིག་དང་ཤེལ་ལ་སོགས་པ་རིན་པོ་ཆེ་སྣ་ཚོགས་པ་དང༌། ཀནྟ་ཀ་རི་དང༌། ཧ་ས་དེ་བ་དང༌། བྲྀ་ཧ་ཏི་དང༌། དཎྜོཏྤ་ལ་དང༌། ཤྭེ་ཏ་ཨ་པ་ར་ཙི་ཏ་ལ་སོགས་པའི་སྨན་ཐམས་ཅད་དང༌། འབྲས་དང་ནས་དང་ཏིལ་དང་གྲོ་དང་མ་ཤ་སྲན་མ་སོགས་པའི་འབྲུ་ཐམས་ཅད་དང༌། ཚ་དང་མར་དང་སྦྲང་རྩི་དང་བུ་རམ་དང་གསེར་ལ་སོགས་པ་སྙིང་པོ་ཐམས་ཅད་དང༌། ག་བུར་དང་ཙནྡན་དང༌། གུར་ཀུམ་དང། ཨ་ཀ་རུ་དང༌། ཏུ་རུ་སྐ་ལ་སོགས་པའི་སྤོས་ཐམས་ཅད་དང༌། ཨུཏྤ་ལ་དང༌། པདྨོ་དང༌། མནྡཱ་ར་བ་དང༌། ཙམ་པ་ཀ་དང༌། ཨ་ཤྭ་ཀ་ལ་སོགས་པ་མེ་ཏོག་ཐམས་ཅད་དང༌། མར་དང༌། འོ་མ་དང༌། ཞོ་དང༌། ཀ་ར་དང༌། བུ་རམ་དང༌། སྦྲང་རྩི་དང༌། འབྲས་དང༌། ནས་
ལ་སོགས་པ་འབྲས་བུ་རྣམས་ཀྱི་ཆན་དང༌། ཁུར་བ་དང༌། ལ་དུ་དང་ཧྭགས་དང༌། ཐུད་སྣ་ཚོགས་པ་དང༌། གཞན་ཡང་དྲི་ཞིམ་ཞིང་གཙང་མའི་ཟས་སྣ་ཚོགས་པ་དང༌། ཕྱེ་དང་ཟན་ནི་གཉིས་ཀ་དགོས་པ་མ་ཡིན་གྱི་ཡང་ན་ཞེས་པའི་དོན་ཏོ། །དེ་ཡང་རྣམ་པ་ཐམས་ཅད་དུ་དགོས་པ་མ་ཡིན་གྱི་ནུས་ཚད་དུ་འབྱོར་ཚད་དོ། །མི་ནུས་པ་དང་མི་འབྱོར་ན་ཇི་ལྟ་བུ་སྙམ་པ་ལ་དེ་དག་མེད་ན་ཆུ་ཉིད་ལ། རིན་ཆེན་སྣ་འགའ་བདར་ལ་བཏང༌། །ཞེས་བྱའོ། །འགའ་ནི་གཅིག་ཙམ་དེ་ལས་ལྷག་པའོ། །དོན་ནི་འདི་སྐད་སྟོན་པ་ཡིན་ཏེ། འབྱོར་ཚད་ཀྱི་རྫས་ཡིན་གྱི་རྒྱ་ཆད་པ་ནི་མ་ཡིན་ནོ། །ཏིང་ངེ་འཛིན་ནམ་དངོས་སུ་ནི། །རྣམ་ལྔའི་མཆོད་པའང་མདུན་དུ་གཞག །ཅེས་པ་ནི་རྣལ་འབྱོར་རྒྱུད་ལ་ཕྱི་རོལ་གྱི་བྱ་བ་གཙོ་བོ་མ་ཡིན་པས་སོ། །རྫས་དང་ལྡན་པས་ཏིང་ངེ་འཛིན་གྱི་ཡན་ལག་ཏུ་ལུས་བདེ་བར་བྱ་བ་ནས། དེ་ནས་སྟན་བདེ་བ་ལ་འདུག་སྟེ་ཞེས་སྨོས་སོ། །ཐམས་ཅད་ཀྱི་དོན་དུ་སྙིང་རྗེ་འགྲོ་བས་ན་སྙིང་རྗེའི་སེམས་ཀྱིས་མཉམ་པར་བཞག་ལ་ཞེས་བཤད་དོ། །མངོན་པར་རྫོགས་པར་བྱང་ཆུབ་ནི་ཚོགས་རྫོགས་པས་འགྲུབ་ཀྱི་གཞན་དུ་མ་ཡིན་པས་ཚོགས་བསག་དགོས་ལ། དེ་ལ་ཡང་རྟེན་ཁྱད་པར་ཅན་དགོས་པས་བདེ་བར་གཤེགས་པ་སྤྱན་དྲངས་པ་ནི་ཏིང་ངེ་འཛིན་ཁོ་ནས་འགྲུབ་པས། དེ་ནས་རང་སྙིང་པཾ་པད་དཀར། །དེ་དཀྱིལ་ཨ་ལས་ཟླ་དཀྱིལ་འཁོར། །དེ་དཀྱིལ་དྷཱིཿལས་རལ་གྲིར་གྱུར། །ཆང་པའི་དྷཱིཿལས་འོད་ཟེར་འཕྲོས། །བདེ་གཤེགས་སྲས་བཅས་འོད་ཀྱི་བཀུག །མདུན་གྱི་མཁའ་ལ་གསལ་བར་བསམ། །ཞེས་སྨོས་ཏེ། དེའི་དོན་འདི་ཡིན་ཏེ། རང་གི་སྙིང་གར་པཾ་དཀར་པོ་བསམས་ལ། དེ་ཡོངས་སུ་གྱུར་པ་ལས་པདྨ་དཀར་པོ་འདབ་མ་བཞི་པའི་སྟེང་དུ་ཨ་དཀར་པོ་གྱུར་པ་ལས་ཟླ་བའི་དཀྱིལ་འཁོར་བསམས་པའི་སྟེང་དུ། དྷཱིཿ་དཀར་པོ་གྱུར་བ་ལས་རལ་གྲིའི་ཆང་པ་ལ་དྷཱིཿ་དཀར་པོས་མཚན་པའོ། །ཐམས་ཅད་དུ་དཀར་པོ་ནི་སྐྱོན་གྱིས་མ་གོས་པའོ། །པདྨ་ནི་ཤེས་རབ་ཀྱི་ཕ་རོལ་ཏུ་ཕྱིན་པ་པདྨའི་རིགས་སོ། །ཟླ་བ་ནི་བྱང་ཆུབ་ཀྱི་སེམས་སོ། །རལ་གྲི་ནི་ཤེས་རབ་རྣོ་བའོ། །དྷཱིཿ་ལས་འོད་ཟེར་ལྕགས་ཀྱུའི་དབྱིབས་ཅན་གྱིས་སངས་རྒྱས་
དང་བྱང་ཆུབ་སེམས་དཔའ་དང་ཉན་ཐོས་ཐམས་ཅད་མདུན་གྱི་ནམ་མཁའ་ལ་བཞུགས་པར་བསམས་ལ། ཕྱག་དང་མཆོད་པ་ལ་སོགས་པ་རྒྱན་དང་ལྡན་པས་མཆོད་པ་དབུལ་ཏེ་སྤྲོ་བསྡུ་གོང་དང་འདྲའོ། །དེ་ཡང་ཕྱོགས་བཅུའི་རྒྱལ་བ་སྲས་དང་བཅས་པ་ལ་སེམས་ཀྱིས་སྤྲུལ་ཏེ་ཕྱག་འཚལ་ལོ། །དེ་ཡང་སྙིང་གའི་དྷཱིཿ་ལས་ནི་མཆོད་པའི་ལྷ་མོ་མང་པོ་སྤྲོས་ཏེ། མཆོད་པ་དཔག་མེད་དབུལ་བར་བྱ། །ཞེས་བྱའོ། །བདག་ནི་སྐྱེ་གནས་ཐམས་ཅད་དུ། །ཞེས་བྱ་བ་ནི་སྐྱེ་གནས་བཞིའོ། །མངལ་དང་དྲོད་གཤེར་དང་སྒོ་ང་དང་རྫུས་པ་ལས་སྐྱེས་པ་ཐོག་མ་མེད་པ་ནས་སྐྱེ་བ་བླངས་པ་ཀུན་དུ་སྡིག་པ་སྲོག་གཅོད་པ་དང། མ་བྱིན་པར་བླངས་པ་དང༌། མི་ཚངས་པར་སྤྱད་པ་དང༌། བརྫུན་དང༌། ཕྲ་མ་དང༌། ཚིག་རྩུབ་སྨྲས་པ་དང༌། ངག་འཁྱལ་པ་དང༌། བརྣབ་སེམས་དང༌། གནོད་སེམས་དང༌། ལོག་པར་ལྟ་བ་དང༌། ཕ་གསོད་པ་དང༌། མ་གསོད་པ་དང༌། དགྲ་བཅོམ་པ་གསོད་པ་དང༌། དེ་བཞིན་གཤེགས་པ་ལ་ངན་སེམས་ཀྱི་ཁྲག་བཏོན་པ་དང༌། དམ་པའི་ཆོས་སྤོང་བ་ལ་སོགས་པ་ཐམས་ཅད་རང་གིས་བྱས་པ་དང༌། གཞན་ལ་བཅོལ་བ་དང༌། གཞན་བྱེད་པ་ལ་རྗེས་སུ་ཡི་རང་བ་བྱས་པ་ཐམས་ཅད་བཤགས་སོ། །སྡིག་པ་བགྱིས་པ་ཐམས་ཅད་སོ་སོར་བཤགས། །ཞེས་པའི་དོན་ཏོ། །བདག་གི་དགེ་བ་སྤེལ་བའི་ཕྱིར་གཞན་དགེ་བ་བྱེད་པ་ལ་རྗེས་སུ་ཡི་རང་བ་ནི་སངས་རྒྱས་དང་བྱང་ཆུབ་སེམས་དཔའ་ཐམས་ཅད་དགེ་བ་རྒྱ་ཆེན་པོའི་སྟོབས་ཀྱིས་མཆོག་བསྒྲུབ་ཅིང་ད་ལྟར་རྒྱུན་མི་ཆད་པ་དང༌། འགྲོ་བ་གྱ་ནོམ་པ་རྣམས་དགེ་བ་རྒྱུན་མི་འཆད་པ་དང༌། ཕལ་པ་རྣམས་དགེ་བ་བག་འགའ་བྱེད་པ་ལ་དགའ་བའོ། །བདེ་གཤེགས་སྲས་བཅས་བསམ་དག་པའི། །འགྲོ་བའི་དགེ་ལ་རྗེས་ཡི་རང༌། །ཞེས་སྨྲས་སོ། །བསམ་དག་ནི་ཉོན་མོངས་པའི་དྲི་མ་དག་པའོ། །སེམས་ཅན་ཐམས་ཅད་ལ་ཕན་འདོགས་པས་ན་མགོན་པོའོ། །དེ་ཉིད་ཐུགས་རྗེ་ཆེན་པོ་མངའ་བས་ན་སེམས་ཅན་ཐམས་ཅད་ལ་སྣོད་ཀྱི་རིམ་པ་དང་འཚམ་པའི་ཆོས་ཀྱི་འཁོར་ལོ་བསྐོར་ཅིག་པའོ། །ཇི་སྙེད་ཅེས་བྱ་བ་ནི་མཐའ་དག་ཅེས་པའི་དོན་ཏོ། །དེ་ཉིད་ཀྱིས་ན་སངས་རྒྱས་མ་ལུས་པ་ཞེས་བྱའོ། །སེམས་ཅན་མ་རིག་པའི་མུན་ནག་གི་ནང་ན་གནས་པ་རྣམས་ལ་ཡེ་ཤེས་ཀྱི་སྣང་བས་གསལ་བར་
མཛད་ཅིང་བཞུགས་ཤིག་པ་ནི། མྱ་ངན་མི་འདའ་བཞུགས་སུ་གསོལ། །ཞེས་བཤད་དོ། །དེ་ལྟར་མ་ཡིན་ན་སྐྱེ་ཤི་མེད་པའི་སྐུ་ལ་གྲོངས་པ་མི་མངའོ། །མྱ་ངན་འདས་པའི་ཚུལ་སྟོན་པ་ནི་རྟག་པ་ལྟ་བ་སུན་དབྱུང་བ་དང་ལེ་ལོ་ཅན་ལ་ཕན་ཕན་གདགས་པའི་ཕྱིར་རོ། །བདག་གི་དགེ་བ་འདི་དག་གིས། འགྲོ་རྣམས་ཐམས་ཅད་མྱུར་རྫོགས་ཤོག །ཅེས་བྱ་བ་ནི་སེམས་ཅན་ཐམས་ཅད་ལ་བསྔོ་བ་དང་བླ་ན་མེད་པའི་བྱང་ཆུབ་ཏུ་བསྔོ་བ་ཐབས་ཁྱད་པར་ཅན་ཡིན་པས་སོ། །ཨོཾ་བཛྲ་མུཿ་ཞེས་པ་ནི་གོང་གི་སྤྱན་དྲང་བ་རྣམས་གཤེགས་སུ་གསོལ་བའོ། །གཞན་དག་ནི་རང་གི་སྙིང་གར་བསྡུ་བར་འདོད་དོ། །དེ་ནི་བདག་ལ་བྱིན་གྱིས་རློབ་པར་དགོངས་པའོ། །གཤེགས་སུ་གསོལ་བ་ནི་བསོད་ནམས་བསགས་པས་དགོས་པ་གྲུབ་པར་དགོངས་པའོ། །ད་ནི་ཡེ་ཤེས་ཀྱི་ཚོགས་ཀྱི་ཡན་ལག་ཏུ་འགྱུར་བ་བྱང་ཆུབ་ཀྱི་སེམས་བསྐྱེད་པར་བྱ་སྟེ། དེ་ཡང་སྨོན་པ་དང་འཇུག་པའོ། །དེ་ལ་སྨོན་པ་ནི་བླ་ན་མེད་པའི་བྱང་ཆུབ་དང༌། དེ་ལས་གྲུབ་པར་འདོད་དོ། །འདི་ནི་འཇུག་པའི་སེམས་སོ། །དེ་ཡང༌། བྱང་ཆུབ་སེམས་དེ་མདོར་བསྡུ་ན། །རྣམ་པ་གཉིས་སུ་ཤེས་བྱ་སྟེ། །སྨོན་པ་བྱང་ཆུབ་སེམས་དང་ནི། །འཇུག་པ་བྱང་ཆུབ་སེམས་ཉིད་དོ།། འགྲོ་བར་འདོད་དང་འགྲོ་བ་ཡི། །བྱེ་བྲག་ཇི་ལྟར་ཤེས་པ་ལྟར། །དེ་བཞིན་མཁས་པས་འདི་གཉིས་ཀྱི། །བྱེ་བྲག་རིམ་བཞིན་ཤེས་པར་བྱ། །ཞེས་བཤད་པའོ། །དེ་ལས་ཀྱང་དང་པོ་ཀུན་རྫོབ་བྱང་ཆུབ་ཀྱི་སེམས་སུ་གྱུར་པ་ཚད་མེད་པའི་བྱམས་པ་ལ་སོགས་པའོ། །སེམས་བསྐྱེད་པ་ནི་གཞན་དོན་ཕྱིར། །ཡང་དག་རྫོགས་པའི་བྱང་ཆུབ་འདོད། །ཅེས་བྱམས་པས་གསུངས་སོ། །ཚད་མེད་པ་ནི་ཚད་གཞལ་དུ་མེད་པ་སྟེ་ཁམས་གསུམ་པ་ཐམས་ཅད་ལའོ། །དེ་ཡང་སེམས་ཅན་ཐམས་ཅད་ལ་ཆོས་དང་ཟང་ཟིང་གི་ཕན་གདགས་པ་དང༌། ནད་ལ་སོགས་པའི་གནོད་པ་ཞི་བར་བྱ་ཞིང་ཉོན་མོངས་པ་སྤང་བར་བྱ་བ་དང༌། དེ་ལྟར་ཕན་བཏགས་པ་དང་གནོད་པ་སྤངས་པས་སེམས་ཅན་ཐམས་ཅད་བདེ་བ་དང་ལྡན་ཞིང་ཚོགས་རྫོགས་པས་དེ་ལ་དགའ་བར་བྱ་བ་དང༌། དགྲ་ཟུན་ཐམས་ཅད་མཉམ་པ་བསྒོམས་བས་ན། དེ་ནས་ཚད་མེད་བཞི་བསྒོམ་བྱ།།
འགྲོ་ལ་ཕན་སེམས་བྱམས་པའོ། །ཕ་རོལ་གནོད་སེལ་སྙིང་རྗེའོ། །སེམས་ཅན་དོན་གྲུབ་དགའ་བ་ནི། །དེ་ནི་དགའ་བ་ཚད་མེད་ཡིན། །གཞན་གྱིས་གནོད་པ་ཚད་མེད་བྱེད། །དེ་ལ་མཉམ་གཞག་བཏང་སྙོམས་སོ། །ཞེས་བཤད་པའོ། །དེ་ལྟར་ཚད་མེད་བཞི་རྫོགས་ནས། །དེ་བཞིན་ཉིད་ཀྱི་ཏིང་འཛིན་བསྒོམ། །ཞེས་བྱ་བ་ནི་མཚམས་སྦྱར་བ་སྟེ། །དེ་བཞིན་ཉིད་ནི་ཆོས་ཐམས་ཅད་ཀྱི་ཆོས་ཉིད་དོ། །ཤེས་རབ་ཀྱི་ཕ་རོལ་ཏུ་ཕྱིན་པའི་མཚན་བརྒྱ་རྩ་བརྒྱད་བཤད་པ་ནི་དེ་བཞིན་ཉིད་ཀྱི་རྣམ་གྲངས་སོ། །དེ་ཉིད་བཤད་པ་ན། ཕྱི་ནང་སྣོད་བཅུད་ཐམས་ཅད་ཀུན། །ངོ་བོ་ཉིད་ཀྱིས་རྣམ་པར་སྟོང༌། །ཞེས་བྱ་བ་སྟེ། ཕྱི་ནི་རི་དང་ཁང་པ་ལ་སོགས་པ་སེམས་ཀྱི་གནས་ཡིན་པས་སྣོད་ཅེས་བྱའོ། །དེ་ཐམས་ཅད་ངོ་བོ་ཉིད་ཀྱིས་སྟོང་པ་ཉིད་ནི་སྟོང་པ་ཉིད་ནི་སྟོང་པ་ཉིད་ལས་མ་འདས་པའོ། །དེ་ཡང་ཤེས་རབ་ཀྱི་ཕ་རོལ་ཏུ་ཕྱིན་པ་ལས། །དེ་ལ་ཕྱི་སྟོང་པ་ཉིད་གང་ཞེ་ན། ཕྱིའི་ཆོས་གཟུགས་དང་སྒྲ་དང་དྲི་དང་རོ་དང་རེག་དང་ཆོས་རྣམས་ཏེ། མི་རྟག་མི་འཇིག་པའི་ཕྱིར་གཟུགས་གཟུགས་ཀྱིས་སྟོང་ངོ༌། །སྒྲ་སྒྲས་སྟོང་ངོ༌། །དྲི་དྲིས་སྟོང་ངོ༌། །རོ་རོས་སྟོང་ངོ༌། །རེག་རེག་གིས་སྟོང་ངོ༌། །ཆོས་ཆོས་ཀྱིས་སྟོང་ངོ་ཞེས་གསུངས་པའི་ཕྱིར་རོ། །ནང་གི་སེམས་ཅན་དུ་གཏོགས་པ་རྣམས་ཏེ་སྣོད་ན་ཡོད་པས་བཅུད་དོ། །དེ་ཡང་སྟོང་པ་ཉིད་དེ། ཡང་དེ་ཉིད་ལས་ནང་གི་ཆོས་མིག་དང༌། རྣ་བ་དང༌། སྣ་དང༌། ལྕེ་དང༌། ལུས་དང༌། ཡིད་དོ། །དེ་ཡང་མི་རྟག་མི་འཇིག་པའི་ཕྱིར་མིག་མིག་གིས་སྟོང་ངོ༌། །རྣ་བ་རྣ་བས་སྟོང་ངོ༌། །སྣ་སྣས་སྟོང་ངོ༌། །ལྕེ་ལྕེས་སྟོང་ངོ༌།། ལུས་ལུས་ཀྱིས་སྟོང་ངོ༌། །ཡིད་ཡིད་ཀྱིས་སྟོང་ངོ་ཞེས་གསུངས་པའི་ཕྱིར་རོ། །གཟུགས་རྣམ་པར་རྟོག་པ་ནི་གཟུགས་ལ་སོགས་པ་འབྱུང་བ་དང་འབྱུང་བ་ལས་གྱུར་པའོ། །དེ་ཐམས་ཅད་ནི་རྣམ་པར་རྟོག་པ་ཙམ་སྟེ་ཕྱི་རོལ་ན་མེད་དོ། །ཅིའི་ཕྱིར་ཞེ་ན། གཅིག་དང་དུ་མ་དང་བྲལ་བའི་ཕྱིར་རོ། །གལ་ཏེ་གཟུགས་ལ་སོགས་པ་དེ་དག་ཡོད་ན་གཅིག་པུ་ཞིག་གམ། དུ་མ་ཞིག་ཅེས་དེ་དང་པོར་བྱའོ། །གལ་ཏེ་གཅིག་པུ་ཞིག་ཡིན་ན་ནི་ཟིན་པ་དང་མ་ཟིན་པ་དང༌། རགས་པ་དང་ཕྲ་བ་དང་དམན་པ་དང་གྱ་ནོམ་པའི་ཆ་ཐ་དད་པ་མི་འཐད་དོ། །དུ་མ་ཡང་མི་འཐད་པ་ཉིད་དེ་ཕྲ་རབ་ཕྱོགས་ཆ་ཐ་དད་པའི་ཕྱིར་རོ། །
ཐ་དད་མེད་པ་ཡང་མ་ཡིན་ཏེ་གེགས་བྱེད་པའི་ཕྱིར་རོ། །གེགས་མི་བྱེད་ན་ནི་གཅིག་གི་གོ་དེ་ཉིད་གཞན་གྱི་གོ་ཡང་ཡིན་པས་ཐམས་ཅད་ཕྲ་རབ་གཅིག་གི་ཚད་དུ་ཡང་འགྱུར་ལ་དེ་ཉིད་ཀྱང་མི་སྣང་བས་གཟུགས་ལ་སོགས་པ་ཕྱི་རོལ་ན་མི་སྣང་བ་ཉིད་དོ། །དེའི་ཕྱིར་ཕྲ་རབ་འ་ཆ་ཤས་དང་བཅས་པས་ཕྲ་རབ་གཅིག་ཏུ་མི་འགྲུབ་ལ། མ་གྲུབ་པས་དུ་མ་མི་འགྲུབ་སྟེ་དུ་མ་ཡང་ཁས་མི་བླང་ངོ༌། །ཡང་ན་གཟུགས་ལ་སོགས་པ་མི་འགྲུབ་པ་ཡིན་ཏེ་འབྲེལ་པ་མེད་པས་སོ། །འབྲེལ་པ་ཡོད་པ་ཡང་མ་ཡིན་ཏེ། སེམས་ཉིད་མ་ཡིན་པ་དང༌། སེམས་དང་རྒྱུ་འབྲས་མ་ཡིན་པའི་ཕྱིར་རོ། །རྒྱུ་འབྲས་ཀྱིས་ཀྱང་འགྲུབ་པ་མ་ཡིན་ཏེ་དུས་མི་མཚུངས་པའི་ཕྱིར་རོ། །འབྲེལ་པ་མེད་པ་རྟོགས་པ་ནི་ཧ་ཅང་ཐལ་བར་འགྱུར་བའི་ཕྱིར་རོ། །དེའི་ཕྱིར་ཡུལ་ཐམས་ཅད་རྣམ་པར་རྟོག་པ་ཙམ་མོ། །དེ་བས་ན་སྟུག་པོ་བཀོད་པ་ལས། སེམས་ནི་རྣམ་པ་གཉིས་དངོས་སུ། །གཟུང་དང་འཛིན་ལྟར་སྣང་བ་སྟེ། །བུམ་པ་སྣམ་བུ་ལ་སོགས་ལ། །ཡུལ་ནི་གང་ཡང་ཡོད་མ་ཡིན། །ཞེས་གསུངས་པ་དང༌། ས་བཅུ་པ་ལས་ཀྱང༌། ཀྱེ་རྒྱལ་བའི་སྲས་དག་ཁམས་གསུམ་པ་ནི་སེམས་ཙམ་མོ་ཞེས་གསུངས་པ་དང༌། འཕགས་པ་ལང་ཀར་གཤེགས་པ་ལས་ཀྱང༌། ཕྱི་རོལ་གཟུགས་ནི་ཡོད་མ་ཡིན། །བདག་གི་སེམས་ནི་ཕྱི་རོལ་སྣང༌། །ཞེས་གསུངས་པའི་ཕྱིར་རོ། །འོ་ན་བཅོམ་ལྡན་འདས་ཀྱིས་གཟུགས་ལ་སོགས་པ་བཤད་པ་ཇི་ལྟར་ཞེ་ན། དེ་ནི་བདག་མེད་པ་ཙམ་བསྟན་པས་འདུལ་བའི་ཉན་ཐོས་ལ་ཕན་གདགས་པའི་ཆེད་དུ་དགོངས་པ་ཅན་ནོ། །བདག་མེད་པ་རྟོགས་པས་མྱ་ངན་ལས་འདས་པའི་འབྲས་བུ་ཐོབ་པོ་ཞེ་ན། དེས་ནི་ཐར་པ་ཙམ་ཐོབ་ཀྱི་བླ་ན་མེད་པ་ཐམས་ཅད་མཁྱེན་པ་ནི་མ་ཡིན་ནོ་རེ་ཞིག་པའོ། །དེ་ཡང༌། དམྱལ་བར་འགྲོ་བ་བྱང་ཆུབ་ལ། །གཏན་དུ་གེགས་བྱེད་མ་ཡིན་ཏེ། །རང་སངས་རྒྱས་ཀྱིས་རྣམས་དང༌། །ཉན་ཐོས་རྣམས་ཀྱིས་གེགས་བྱེད་དོ། །ཞེས་གསུངས་པའི་ཕྱིར་རོ། །སེམས་ཀྱང་རྣམ་པར་རྟོག་པ་ཙམ་ལས་དོན་དམ་པར་གྲུབ་པ་མ་ཡིན་ནོ། །བདག་དང་གཞན་དང་གཉིས་ཀ་དང་རྒྱུ་མེད་པ་ལས་མི་སྐྱེ་བའི་ཕྱིར་རོ། །བདག་ལས་མི་སྐྱེ་སྟེ། སྐྱེས་ཟིན་པ་ནི་སྐྱེ་མི་དགོས་ལ། མ་སྐྱེས་པ་
ནི་དངོས་པོ་མེད་པས་རྒྱུ་རུ་མི་འཐད་པ་ཉིད་དོ། །གཞན་ལས་ཀྱང་མ་ཡིན་ཏེ་གལ་ཏེ་གཞན་སྐྱེན་རྟག་པའམ་མི་རྟག་པ་དེ་དཔྱད་དོ། །རྟག་པ་ལས་མི་སྐྱེ་སྟེ་རིམ་གྱིས་མི་འབྱུང་བར་ཐལ་བའི་ཕྱིར་རོ། །རིམ་གྱིས་འབྱུང་ན་རྟག་པ་མ་ཡིན་ནོ། །ཅིག་ཅར་སྐྱེ་ན་ནི་ཐམས་ཅད་དུས་ཅིག་ཅར་སྐྱེ་བས་སྔོན་དང་ད་ལྟར་མེད་དོ། །ཡང་ན་སྔར་སྐྱེས་པ་རྣམས་ཕྱིས་ཀྱང་སྐྱེའོ། །སྔ་ཕྱི་ཐ་དད་ན་མི་རྟག་པ་ལ་མི་སྐྱེ་བར་འགྲུབ་པོ། །མི་རྟག་པ་ལ་སྐྱེ་ན་འདས་པ་དང་མ་འོངས་པ་ལས་མི་སྐྱེ་སྟེ་མེད་པའི་ཕྱིར་རོ། །ད་ལྟར་བ་ནི་དུས་མཉམ་པ་རྒྱུ་འབྲས་སུ་མི་འཐད་དོ། །དུས་མི་མཉམ་པ་ད་ལྟར་བ་མ་ཡིན་ནོ། །ཡང་ན་འབྲེལ་པ་ལས་སམ་མ་འབྲེལ་པ་ལས་ཞེས་དེ་དཔྱད་པར་བྱའོ། །ལམ་འབྲེལ་པ་ནི་ཧ་ཅང་ཐལ་བར་འགྱུར་རོ། །འབྲེལ་ན་ཡང་ཕྱོགས་གཅིག་གམ་ཐམས་ཅད་ཕྱོགས་གཅིག་ན་འབྲེལ་པ་ཐ་དད་པས་ད་ལྟར་བ་མི་འཐད་པ་ཉིད་དོ། །ཕྱོགས་ཐམས་ཅད་དོ་ཞེ་ན། དེ་ཡང་མི་འཐད་པ་ཉིད་དེ་སྔ་ཕྱི་གཅིག་པའི་ཕྱིར་རོ། །དེ་ཉིད་ཀྱིས་ན་གཉིས་ཀ་ལ་བ་སྐྱེ་བ་ཡང་མ་ཡིན་ཏེ་ལོང་བ་འདུས་པ་བཞིན་ནོ། །རྒྱུ་མེད་པ་ལ་སྐྱེ་ན་རག་ལས་པ་མེད་པས་དུས་ཐམས་ཅད་དུ་སྐྱེའོ། །དེའི་ཕྱིར་བཅོམ་ལྡན་འདས་ཀྱིས་ཀྱང༌། །དངོས་རྣམས་སྐྱེ་བ་ཀུན་རྫོབ་ཏུ། །དམ་པའི་དོན་དུ་རང་བཞིན་མེད། །རང་བཞིན་མེད་ལ་འཁྲུལ་པ་གང༌། །དེ་ནི་ཡང་དག་ཀུན་རྫོབ་པོ། །ཞེས་གསུངས་པ་དང༌། འཕགས་པ་འཇིག་རྟེན་ལས་འདས་པའི་ལེའུ་ལས། ཀྱེ་རྒྱལ་བའི་སྲས་དག་ཁམས་གསུམ་པ་འདི་དག་སེམས་ཙམ་སྟེ་དུས་གསུམ་ཡང་སེམས་སུ་རྟོགས་ཤིག་ཅེས་གསུངས་པ་དང༌། འཕགས་པ་ལང་ཀར་གཤེགས་པ་ལས་ཀྱང༌། སེམས་ཙམ་ལ་ནི་བརྟེན་ནས་སུ། ཕྱི་རོལ་དོན་ལ་མི་བརྟག་གོ །དེ་བཞིན་ཉིད་ལ་གནས་ནས་སུ། །སེམས་ཙམ་ལས་ཀྱང་བཟླ་བར་བྱ། །སེམས་ཙམ་ལས་ནི་འདས་ནས་སུ། །སྣང་བ་མེད་ལས་བཟླ་པར་བྱ། །སྣང་མེད་གནས་མའི་རྣལ་འབྱོར་པ། །དེ་ཡིས་ཐེག་པ་ཆེན་པོ་མཐོང༌། །ཞེས་གསུངས་པ་དང་འཕགས་པ་ཤེས་རབ་ཀྱི་ཕ་རོལ་ཏུ་ཕྱིན་པ་ལས་ཀྱང༌། གཟུགས་ཀྱང་རྨི་ལམ་ལྟ་བུ་སྒྱུ་མ་ལྟ་བུ་ཞེས་པ་ནས། མྱ་ངན་ལས་འདས་པ་ཡང་རྨི་ལམ་ལྟ་བུ་སྒྱུ་མ་ལྟ་བུ།
མྱ་ངན་ལས་འདས་པ་ལས་ལྷག་པའི་ཆོས་ཞིག་ཡོད་ན་ཡང་རྨི་ལམ་ལྟ་བུ་སྒྱུ་མ་ལྟ་བུའོ་ཞེས་གསུངས་པའི་ཕྱིར་རོ། །དེའི་ཕྱིར་གཟུང་བ་དང་འཛིན་པ་རྣམ་པར་རྟོག་པ་ཡིན་པས་དེ་ལས་འདས་པ་ནི་ཡུལ་དུ་མི་བྱེད་ཅིང་མ་ཆགས་པ་སྟེ། སྟོང་པ་ཉིད་བསྒོམ་པ་ནས་སེམས་ཉིད་མཉམ་པའི་ངང་དུ་བསྒོམ་ཞེས་བྱའོ། །མཉམ་པའི་ངང་ནི་སེམས་ཀྱི་མཚན་ཉིད་སྟོང་པ་ཉིད་དོ། །དེ་ཉིད་བྱིན་གྱིས་བརླབ་པ་ནི་གསང་སྔགས་ཀྱི་མཐུས་བསམ་གྱིས་མི་ཁྱབ་པའོ། །དེ་ཉིད་ཀྱིས་ན་ཨོཾ་སྭ་བྷཱ་ཝ་ཞེས་པ་གཞན་གྱིས་དག་པར་བྱེད་པ་དབང་ཕྱུག་ལྟ་བུས་མ་ཡིན་པས་རང་བཞིན་གྱིས་དག་ལ་དེ་ཡང་གཅིག་འགའ་མ་ཡིན་པས་ཆོས་ཐམས་ཅད་རང་བཞིན་གྱིས་དག་བ་ཞེས་བྱ་སྟེ། ཆོས་ཐམས་ཅད་རང་བཞིན་སྟོང་པ་ཉིད་ཡིན་གྱི་གཞན་གྱིས་སྟོང་པར་བྱས་པ་མ་ཡིན་པས་ཨོཾ་སྭ་བྷ་ཝ་ཤུདྡྷཿ་སརྦ་དྷརྨཱཿ་སྭ་བྷཱ་ཝ་ཤུདྡྷོ྅ ཧཾ་ཞེས་པའོ། །སྔགས་དེ་བརྗོད་པས་བདག་ཉིད་དང་ནི་ཆོས་རྣམས་ཐམས་ཅད་དག་པར་བསམ་ཞེས་བྱ་བ་ནི་བདག་ནི་སེམས་སོ། །དེ་ཡང༌། བདག་ནི་ལེགས་པར་དུལ་གྱུར་ན། །མཁས་པས་མཐོ་རིས་ཐོབ་པར་འགྱུར། །ཞེས་གསུངས་པ་དང༌། ཡང༌། སེམས་དུལ་བ་ནི་དགེ་བ་སྟེ། །སེམས་དུལ་བདེ་བ་ཐོབ་པར་བྱེད། །ཅེས་གསུངས་པའི་ཕྱིར་རོ། །ཆོས་ནི་གཟུགས་དང་སྒྲ་ལ་སོགས་པའོ། །རྣམས་ཞེས་པ་ནི་མང་པོའི་ཚིག་སྟེ་མ་ལུས་པ་ལ་མི་འཇུག་པས་ཐམས་ཅད་ཅེས་བསྣན་པའོ། །དག་པའི་དོན་མ་རྟོགས་པ་ལ་གསང་སྔགས་ཀྱི་བྱིན་གྱི་རླབས་ཀྱིས་རྟོགས་པ་ནི་བསམ་གྱིས་མི་ཁྱབ་པོ། ཕ་རོལ་ཏུ་ཕྱིན་པ་ལས་སྟོང་ཉིད་རྟོགས་པ་དང༌། སྦྱིན་པ་ལ་སོགས་པས་བསོད་ནམས་བསགས་པ་དང༌། སྙིང་རྗེས་སེམས་ཅན་གྱི་དོན་བྱེད་ན་གསང་སྔགས་ཞེས་བྱ་བ་དགོས་པ་མེད་པ་ཡིན་ནམ་ཞེ་ན་མ་ཡིན་ཏེ། ཐབས་ཁྱད་པར་ཅན་བསམ་གྱིས་མི་ཁྱབ་པའི་ཕྱིར་རོ། །ཐབས་ཇི་ལྟ་བུ་ཞེ་ན། འདི་ལྟ་སྟེ་དམ་ཚིག་དང་དབང་ཐོབ་པ་ཐོག་མར་རོ། །དེ་ནས་ནི་བསྒོམ་པ་དང༌། བཟླས་བརྗོད་དང༌། སྦྱིན་སྲེག་དང༌། གཏོར་མ་དང༌། སཱཙྪ་དང༌། དཀྱིལ་འཁོར་དང༌། གཞན་བསྲུང་བ་དང༌། གང་དག་མི་འདུལ་བ་རྣམས་ལ་རྫུ་འཕྲུལ་ལ་སོགས་པ་འདུལ་བའི་ཐབས་བསམ་གྱིས་མི་ཁྱབ་པའོ། །ཐེག་པ་ཆེན་པོ་ཉིད་ནས་གཏོར་མ་ལ་སོགས་པ་
སྦྱིན་པ་དང༌། གཞན་བསྲུང་བ་ལ་སོགས་པའི་སེམས་ཅན་གྱི་དོན་བྱེད་པའི་ཚུལ་ཁྲིམས་དང༌། མཆོད་རྟེན་ལ་སོགས་པ་ཡང་ཡོད་དོ་ཞེ་ན། དེ་ཐམས་ཅད་དུ་དབང་དང་དམ་ཚིག་མེད་པས་གདོལ་པ་ཅན་གྱི་ངག་དང་འདྲ་བས་མེད་པ་ཉིད་དོ། །ཡང་དེ་རྣམས་ཐབས་དང་བྲལ་བས་དེ་ཐམས་ཅད་ལ་རྨོངས་པ་ཉིད་ཀྱི་ཕྱིར་རོ། །དེ་ཉིད་ཀྱི་ཕྱིར་དཔལ་དེ་ཁོ་ན་ཉིད་བསྡུས་པ་ལས། ཇི་ལྟར་ཕྱག་རྒྱས་འགྲུབ་འགྱུར་བ། །དེ་ལྟར་བྱང་ཆུབ་སྤྱོད་ལ་སོགས། །ཐབས་ཀུན་ཆོ་གའི་རིམ་པས་ཀྱང༌། །སངས་རྒྱས་སེམས་ཅན་དོན་མི་འགྲུབ། །ཅེས་གསུངས་སོ། །དེས་ན་ལྷའི་རྣམ་པ་མེད་པས་ཉན་ཐོས་བཞིན་དུ་ལུས་ངག་གཙོ་བོར་བྱེད་པས་རྨོངས་པ་ཉིད་དོ། །སེམས་ཉིད་སྒྱུ་མ་ལྟ་བུ་དེ་ཉིད་ཐབས་ཀྱི་དམ་པ་ལྷ་དང་མི་བྲལ་བས་ཐམས་ཅད་འགྲུབ་པས་ན། བསམ་པ་གང་དང་གང་དག་གིས། །མི་རྣམས་ཡིད་ནི་ཡང་དག་སྦྱོར། །དེས་ནི་དེ་ཡི་རང་བཞིན་འགྱུར། །སྣ་ཚོགས་ནོར་བུ་ཇི་བཞིན་ནོ། །ཞེས་གསུངས་སོ། །ཐམས་ཅད་མཁྱེན་པ་ཉིད་འགྲུབ་པའི་རྒྱུ་ནི་ཐབས་དང་ཤེས་རབ་ཡིན་ལ། དེ་ལ་ཡང་ཚོགས་པས་འགྲུབ་ཀྱི་མ་ཚོགས་པས་མ་ཡིན་ནོ། །ཐབས་དང་ཤེས་རབ་མེད་པ་མ་ཡིན་ཏེ། ཐབས་ནི་ཕ་རོལ་ཏུ་ཕྱིན་པའོ། །ཤེས་རབ་ནི་རང་བཞིན་མེད་པའོ་ཞེ་ན། དེ་ཡང་འབྲེལ་པ་ཡོད་པ་མ་ཡིན་ཏེ། མཉམ་གཞག་ཐབས་དང་བྲལ་བ་དང༌། གཞན་དུ་ཤེས་རབ་དང་བྲལ་བའི་ཕྱིར་རོ། །དེའི་ཕྱིར་ས་བོན་རྐྱེན་དང་བྲལ་བ་ལྟ་བུའོ། །སྦྱིན་པ་ལ་སོགས་པ་བསམ་པས་ཀྱང་འགྲུབ་པ་ཐམས་ཅད་ལྷ་དང་མི་བྲལ་བས་སྒྱུ་མ་ལྟ་བུར་ཤེས་པ་ནི་རྒྱུ་ཚོགས་པ་སྟེ། གང་ལ་ཡང་མི་འཛིན་པའི་ཤེས་པ་དེ་ཉིད་ལྷའི་རྣམ་པས་སྦྱིན་པ་ལ་སོགས་པ་དངོས་སུ་དང༌། སེམས་ཀྱི་སྤྲུལ་པས་ཐབས་ཁྱད་པར་ཅན་ཞེས་བྱའོ། །ལྷའི་རྣམ་པ་ནི་ཀུན་བརྟགས་པ་སྟེ་སྨིག་རྒྱུ་ལྟ་བུའོ། །དངོས་པོ་མེད་པས་དོན་དང་ཕྲད་པ་ཡང་མེད་ལ། བརྟགས་པས་སྣང་བ་ཡང་དངོས་པོ་སྟེ་ཀེང་རུས་ཀྱི་གཟུགས་བརྙན་ལ་སོགས་པ་ལྟ་ཞེ་ན་ཡིན་ཏེ། ལོངས་སྤྱོད་རྫོགས་པའི་སྐུ་དང་སྤྲུལ་པའི་སྐུ་ཡང་སྣང་བ་ཡོད་ལ། སེམས་ཅན་ཐམས་ཅད་ཀྱི་དོན་ཡང་བྱེད་པས་དོན་དང་ཕྲད་པ་ཡིན་ནོ། །ཀེང་རུས་ནི་ཞེས་པས་དངོས་པོ་ལྷའི་རང་བཞིན་མེད་པར་མ་རྟོགས་སོ། །
དེའི་ཕྱིར་གཞག་པ་འདི་ནི་མཐུན་པ་མ་ཡིན་ནོ། །གལ་ཏེ་ལོངས་སྤྱོད་རྫོགས་པའི་སྐུ་ལ་སོགས་པ་ཡོད་ན་འདུས་བྱས་ཡིན་པས་སངས་རྒྱས་མ་ཡིན་ནོ་ཞེ་ན། དངོས་པོ་ཡང་དག་པར་གྲུབ་པ་མ་ཡིན་པ་སྣང་བ་ཙམ་སྒྱུ་མ་ལྟ་བུ་དང༌། ཡང་དག་པར་རྫོགས་པའི་སངས་རྒྱས་ལ་འགག་པ་ཡོད་པ་མ་ཡིན་པས་ཧ་ཅང་ཡང་ཐལ་བར་འགྱུར་རོ། །གཟུགས་ཀྱི་སྣང་བ་ཙམ་མེད་ན་སེམས་ཅན་གྱི་དོན་ཡང་མེད་ཅིང་བཀའ་ཐམས་ཅད་ཀྱང་མེད་པས་དེ་ནི་སྐུར་བའོ། །དེ་ཉིད་ཀྱི་ཕྱིར་འཕགས་པ་ཆོས་ཡང་དག་པར་སྡུད་པ་ལས། དཔེར་ན་སྒྱུ་མའི་མཁན་པོ་ཞིག ། སྤྲུལ་པ་ཐར་བར་བྱ་ཕྱིར་བརྩོན། །དེས་ནི་སྔ་ནས་དེ་ཤེས་པས། །སྤྲུལ་པ་དེ་ལ་ཆགས་པ་མེད། །སྲིད་གསུམ་སྤྲུལ་པ་འདྲ་བར་ནི། །རྫོགས་པའི་སངས་རྒྱས་མཁས་པས་ཤེས། །འགྲོ་བའི་ཆེད་དུ་གོ་བགོས་ཏེ། །འགྲོ་བ་དེ་ལྟར་སྔ་ནས་ཤེས། །ཞེས་གསུངས་པ་དང༌། འཕགས་པ་ལང་ཀར་གཤེགས་པ་ལས་ཀྱང༌། ཇི་ལྟར་མེ་ལོང་དག་ལས་གཟུགས། །གཅིག་དང་གཞན་ཡང་རྣམ་སྤངས་པར། །སྣང་ཡང་དེ་ནི་ཡོད་མ་ཡིན། །དེ་བཞིན་དངོས་པོའི་ངོ་བོ་ཉིད། །ཅེས་གསུངས་སོ། །ལྷའི་རྣམ་པ་མེད་པ་ལ་བརྟགས་པ་ཡིན་ནོ་ཞེ་ན། དེ་ཁོ་ན་ཉིད་བསྒོམ་པ་ཡང་དེ་བཞིན་ཏེ་མཚུངས་སོ། །ལས་དང་པོ་པ་ལ་དེ་ཁོ་ན་ཉིད་མོས་པའི་སྒོ་ནས་སམ་རྣམ་རྟོག་བརྟན་པོའི་སྒོ་ནས་ཡིན་གྱི་མངོན་སུམ་མ་ཡིན་ཏེ། མངོན་པའི་ང་རྒྱལ་ཅན་མངོན་སུམ་མོ་སྙམ་དུ་ལོག་པར་རྟོགས་པ་ཉིད་དོ། །དབང་དམ་ཚིག་གི་ཐབས་ནི་ཐབས་དང་ཤེས་རབ་ཏུ་མི་འདོད་དེ། ཤེས་རབ་ནི་རང་བཞིན་མེད་པར་ཤེས་པ་ཐབས་ནི་སྤྱིན་པ་ལ་སོགས་པ་ཡིན། ཐམས་ཅད་མཁྱེན་པའི་རྒྱུ་མ་ཡིན་ནོ་ཞེ་ན། འཕགས་པ་དང་བླ་མ་ལ་མཆོད་པ་རྒྱ་ཆེན་པོ་ཕུལ་བ་དང༌། སྦྱིན་གཏོང་བྱ་བ་དང༌། ཞི་བ་དང་དུལ་བ་དང༌། སེམས་ཅན་གྱི་དོན་བྱ་ཞིང་གནོད་པ་སྤང་བ་དང༌། དགེ་བ་ལ་བརྩོན་པར་བྱ་བ་དང༌། བསམ་པ་རྣམ་རྟོག་གཞན་གྱིས་གཡེངས་པ་མ་ཡིན་པ་དང༌། ཡེ་ཤེས་ཕབ་པ་ལ་སོགས་པ་བསམ་གྱིས་མི་ཁྱབ་པ་ཡིན་ཞིང་ཡང་དག་པར་རྫོགས་པའི་སངས་རྒྱས་ཀྱི་བག་ཆགས་འཇུག་པའོ། །དེ་ཡང་བྱང་ཆུབ་ཏུ་སེམས་
བསྐྱེད་པ་དང༌། སོ་སོར་ཐར་པའི་སྡོམ་པའི་ཆོ་ག་བཞིན་ཏེ་གཞི་དེ་ལ་བརྟེན་པའོ། །དེ་བས་ན་གསང་སྔགས་ཀྱི་ཐེག་པ་ནི་རྡོ་རྗེའི་ཐེག་པ་ཞེས་བྱ་བ་སྟེ་མི་ཕྱེད་པའོ། །འབྲས་བུ་ལམ་དུ་བྱེད་པ་ཡིན་ཞིང་ཚེ་གཅིག་ལ་སོགས་པས་འགྲུབ་པས་ལམ་ཉེ་བའོ། །དེ་ཉིད་ཀྱང༌། ཀུན་དུ་སྣང་གི་ཏིང་འཛིན་ནི། །དེ་ཡི་རྗེས་ལ་བསྒོམ་པར་བྱ། །ཞེས་བྱ་བ་ལ་སོགས་པའོ། །ཀུན་ནི་མ་ལུས་པ་སྟེ་སྣང་བ་ནི་སྙིང་རྗེའི་སེམས་སོ། །རྗེས་ནི་ཕྱི་ནས་ཏེ་བར་མ་ཆད་པའོ། །སེམས་ཅན་ལ་དམིགས་པ་ཡང་ཡོད་པས་དེ་མ་རྟོགས་པའི་སེམས་ཅན་ལ་སྙིང་རྗེ་ཆེན་པོ་བསྐྱེད་པ་ནི། ནམ་མཁའ་ལྟ་བུར་ཁྱབ་པར་བསྒོམ། །ཞེས་བཤད་དོ། །དེ་ཞེས་བྱ་བ་ནི་འདས་མ་ཐག་པའོ། །མ་རྟོགས་པ་ནི་མ་ཤེས་པ་སྟེ་སྟོང་བ་ཉིད་མ་གོ་ཞེས་བྱ་བའི་དོན་ཏོ། །དེ་ཡང་སེམས་ཅན་ཐམས་ཅད་ལ་བསྒོམ་གྱི་གཅིག་ལ་འགའ་མ་ཡིན་པས་ཆེན་པོའོ། །དེ་ཉིད་ཀྱིས་ནམ་མཁའ་དང་འདྲའོ། །དེ་རྗེས་རྒྱུ་ཡི་ཏིང་འཛིན་ནི། །ཤེལ་ལྟར་དཀར་བའི་ཡི་གེ་ཨ། །ནམ་མཁའི་དཀྱིལ་དུ་གསལ་བར་བསམ། །དེ་ལ་འོད་འཕྲོས་འཕགས་པ་མཆོད། །སེམས་ཅན་དོན་བྱས་འདུས་གྱུར་ནས། །ཨ་ལ་ཐིམ་ནས་འོད་དུ་ཞུ། །མུཾ་ཡིག་འོད་དང་ལྡན་བ་ཞིག །ནམ་མཁའི་དཀྱིལ་དུ་གསལ་བར་བསམ། །ཞེས་བྱ་བ་ནི་དེ་རྗེས་བསམ་ཞེས་འབྲེལ་ཏེ། རྒྱུ་ནི་ཉེ་བའི་རྒྱུ་སྟེ་དེ་ལས་སྐྱེ་ཞེས་བྱ་བའི་དོན་ཏོ། །ཤེལ་ནི་གསལ་ཞིང་འཚེར་བ་སྟེ་དེ་ལྟ་བུའི་ཨ་དཀར་པོ་ནི་རྒྱུའོ། །ཏིང་ངེ་འཛིན་ནི་དེའི་རྣམ་པར་སེམས་རྩེ་གཅིག་པའོ། །ནམ་མཁའ་ནི་སྟོང་པ་ཉིད་དེ་དེའི་ངང་ལ་སྐྱེ་བ་མེད་པའི་ཡི་གེ་ཨའོ། །དེ་ཉིད་ནི་འོད་གསལ་བ་དང་ལྡན་པས་འཇིག་རྟེན་ཁམས་སུ་སྤྲོ་བའོ། །འཕྲོས་ནས་སེམས་ཅན་གྱི་དོན་བྱ་བ་དང་འཕགས་པ་ལ་མཆོད་པ་སྟེ་དེ་ཡང་སེམས་ཅན་ལ་ཟང་ཟིང་དང༌། ཆོས་དང་བྱམས་པ་དང་སྐྱབས་ཀྱིས་ཕན་གདགས་ལ། འཕགས་པ་རྣམས་ཐམས་ཅད་མཆོད་པ་དབུལ་བ་ཡིན་པས་སོ། །དེ་ནས་འོད་ཨ་ཉིད་ལ་འདུས་པ་ནི་ཐིམ་པའོ། །ཞུ་ཞེས་བྱ་བ་ནི་ཨའི་དངོས་པོ་མེད་པའོ། །འོ་ན་ཅིའི་དངོས་པོར་གྱུར་སྙམ་པ་ལ་མུཾ་ཡིག་འོད་དང་ལྡན་པ་ཞེས་བྱའོ། །འོད་ལ་སོགས་པ་ནི་སྔ་མ་བཞིན་ནོ། །འདི་སྐད་སྟོན་པ་ཡིན་ཏེ་སྟོང་པ་ཉིད་ཀྱི་ངང་ལས་རང་རང་གི་སེམས་ཨ་དཀར་པོར་སྣང་
བ་ལས་འོད་འཕྲོས་པས་སེམས་ཅན་དང་འཕགས་པ་ལ་ཕན་གདགས་པ་དང་མཆོད་པ་བྱས་ཏེ་འདུས་པས་མུཾ་དུ་གྱུར་པའོ། །དེའི་དོན་ནི་འདི་ཡིན་ཏེ། ཆོས་ཀྱི་སྐུ་སྐྱེ་བ་མེད་པའི་ངང་ལས་ཐུགས་རྗེ་ཆེན་པོས་དོན་མཛད་པའི་གཟུགས་སྐུ་དང་ལྡན་པས་ན་དེ་བཞིན་ཉིད་བསྒོམས་ནས། མ་རྟོགས་པ་ལ་སྙིང་རྗེ་ཞིང་དེའི་དོན་དུ་སྣང་བར་ལྡང་ལ་ཨ་ལ་སོགས་པ་ཡང་དེ་བཞིན་ནོ། །དེ་ནི་དོན་དམ་པ་བྱང་ཆུབ་ཀྱི་སེམས་སུ་གྱུར་པ་གཉིས་སུ་མེད་པའོ། །ད་ནི་གཟུགས་ཀྱི་སྐུ་ཉིད་སེམས་ཅན་གྱི་དོན་མཛད་ཅིང་གདུལ་བྱ་ལ་སྣང་བ་བཤད་པར་བྱ་སྟེ། དེ་ལས་ཀྱང་དང་པོ་རྟེན་བཤད་པ་ནི། །དེ་ལས་ཨེ་ཡི་སྒྲ་བྱུང་བས། །འོག་གི་ཕྱོགས་སུ་ཡི་གེ་ཨེ། །དེ་ལས་གྲུ་གསུམ་དཀར་པོ་ནི། །གྱེན་དུ་འགྲེང་བ་ཚད་མེད་བསམ། །ཞེས་བྱ་སྟེ། དེ་ཞེས་བྱ་བ་ནི་མུཾ་སྟེ་ཨེ་ཞེས་གྲགས་པ་ལས་ཆད་པ་ལྟ་བུར་འོག་ཕྱོགས་སུ་གྲུབ་པ་ནི་དབྱིབས་གྲུ་གསུམ་མོ། །ཁ་དོག་དཀར་པོའི་གཞལ་ཡས་ཁང་དཔངས་མཐོ་ཞིང་རྒྱ་ཆེ་བས་ན་གྱེན་དུ་འགྲེང་བ་ཚད་མེད་ཅེས་བྱའོ། །གཞལ་ཡས་ཁང་དུ་གདན་བསམ་པ་ནི། །དེ་ནས་པཾ་གྱི་སྒྲ་བྱུང་བས། །དེ་དཀྱིལ་པཾ་བྱུང་པད་འདབ་ལྗང༌། །འདབ་མ་བཞི་པ་ཉི་ཟླར་ལྡན། །ཞེས་པའོ། །དེ་ནས་ཞེས་བྱ་བ་ནི་གཞལ་ཡས་ཁང་གྲུབ་ནས་སོ། །སྒྲ་ལ་སོགས་པ་ནི་སྔ་མ་བཞིན་ནོ། །དཀྱིལ་གྱི་སྙིང་པོ་སྟེ་གཞལ་ཡས་ཁང་གི་སྙིང་པོ་ལ་བྱའོ། །པཾ་ཉིད་གྱུར་པ་ལས་པདྨ་འདབ་མ་བཞི་པ་ཁ་དོག་ལྗང་གུ་འདབ་མ་གཉིས་དང་སྙིང་པོ་ལ་ཉི་མ་འདབ་མ་གཉིས་ལ་ཟླ་བས་བརྒྱན་ཏེ་གྲུ་གསུམ་ནི་ཆོས་ཀྱི་དབྱིངས་སོ། །པདྨ་ནི་ཉེས་པས་མ་གོས་པའོ། །ཉི་མ་ཐམས་ཅད་མཁྱེན་པ་ཡིན་ཞིང་ཟླ་བ་བྱང་ཆུབ་ཀྱི་སེམས་སོ། །རྟེན་དེ་ལྟ་བུ་དང་ལྡན་ནས་ལྷ་ཉིད་སྒོམ་པ་ནི། དེ་རྗེས་དྷཱིཿཡི་སྒྲ་བྱུང་བས། །ཉི་མའི་དཀྱིལ་དུ་དྷཱིཿ་དཀར་བསམ། །དེ་ལས་རལ་གྲི་དྷཱིཿ་ལྡན་བསམ། །དེ་ལས་འཇམ་དཔལ་ཞེས་བྱ་སྟེ། །སྒྲ་ལ་སོགས་པ་སྔ་མ་བཞིན་ནོ། །ཤེས་རབ་ཀྱིས་ཐམས་ཅད་གཅོད་པ་རལ་གྲིའི་ཆང་པ་ལ་དྷཱིཿ་ཡིས་མཚན་པའོ། །དེ་ཡོངས་སུ་གྱུར་པ་ལས་འཇམ་དཔལ་ལོ། །མཚན་ཉིད་ཇི་ལྟ་བུ་ཞེ་ན། སྐུ་མདོག་དཀར་པོ་གཡས་ན་རལ་གྲི་གཡོན་ན་གླེགས་བམ། གཞོན་ནུའི་
གཟུགས་ཅན་ཟུར་ཕུད་ལྔ། །ཕྱག་རྒྱ་ལྔ་ལྡན་བདག་ཉིད་བསམ། །ཞེས་བཤད་པའོ། །འདི་སྐད་སྟོན་པ་ཡིན་ཏེ། མུཾ་ལས་ཨེ་གྲགས་པ་ལས། ཨེ་ཁ་དོག་དཀར་པོ་གྲུ་གསུམ་གྱི་གཞལ་ཡས་ཁང་དུ། མུཾ་ལས་པཾ་གྲགས་པས་པདྨར་གྱུར་པའི་དཀྱིལ་དུ་དྷཱིཿ་གྱུར་པའི་རལ་གྲི་ལས་འཇམ་དཔལ་སྐུ་མདོག་དཀར་པོ་ཞལ་གཅིག་པ། ཕྱག་གཉིས་པ་རལ་གྲི་དང་ཤེས་རབ་ཀྱི་ཕ་རོལ་ཏུ་ཕྱིན་པའི་པོ་ཏི་བསྣམས་པ། ན་ཚོད་ལོ་བརྒྱད་པའི་མཚན་ཉིད་ཅན་རལ་པའི་ཐོར་ཚུགས་ཅན། །དབུ་རྒྱན་རིགས་ལྡས་མཚན་པ་ཕྱག་དང་ཞབས་ཀྱི་ལེའུ་དང་མགུལ་རྒྱན་དང་སྐུའི་སེ་མོ་དོ་ལ་སོགས་པའི་རྒྱན་དང་ལྡན་པའི། །མདུན་དུ་མ་ཡིན་པས་བདག་ཉིད་ཅེས་པའོ། །དེ་ལ་སྐུ་གསུང་ཐུགས་ཀྱི་རྒྱས་གདབ་པ་ནི། དཔྲལ་པ་མགྲིན་པ་སྙིང་ག་རུ། །གོ་རིམས་བཞིན་དུ་ཨོཾ་ཨཱཿཧཱུཾ་ནི་བསམ་བར་བྱ། །ཞེས་བྱའོ། །དེ་ནས་ནམ་མཁའི་མུཾ་ཡིག་ཐམས་ཅད་ཀྱི་འབྱུང་གནས་དེ་བདག་འཇམ་དཔལ་གྱི་དབུས་སུ་བབས་ཏེ་གྱུར་པ་ལས་ཡེ་ཤེས་སེམས་དཔར་གྱུར་པར་བསམ་པའོ། །འཁོར་རྣམས་བསྐྱེད་པ་ནི། །དེ་ནས་བདག་གིས་ཙ་བརྗོད་པས། །གཡས་ཀྱི་པད་འདབ་ཟླ་དཀྱིལ་དུ། །ལྷ་མོ་སྐྲ་ཅན་སྐུ་མདོག་དཀར། །ཞལ་གཅིག་ཕྱག་གཉིས་རིན་ཆེན་གཡས། སྐྱིལ་ཀྲུང་ཕྱད་བཅས་རྒྱལ་མཚན་གཡོན། །ཞེས་བྱ་སྟེ། ཙ་ཞེས་བརྗོད་པས་ཟླ་བའི་སྟེང་དུ་ཙ་བྱུང་ནས་དེ་གྱུར་པ་ལས་ལྷ་མོ་དཀར་མོ་མིང་སྐྲ་ཅན་མའོ། །གཡས་བརྐྱང་གཡོན་བསྐུམ་པའི་སྐྱིལ་ཀྲུང་ཕྱེད་དོ། །སྐྲ་ནི་ཚ་རེག་དང་གྲང་རེག་ལས་སྐྱོབ་པས་ན་དེ་བཞིན་དུ་མེ་ལོང་ལྟ་བུའི་ཡེ་ཤེས་ཀྱི་རྣམ་རྟོག་གི་ཚ་གྲང་ལས་སྐྱོབ་པའོ། །དེ་རྗེས་བདག་གིས་ར་བརྗོད་པས། མདུན་གྱི་པད་འདབ་ཉི་དཀྱིལ་དུ། །ལྷ་མོ་དྲ་ཅན་སྐུ་མདོག་དམར། །གཡས་ན་རལ་གྲི་གཡོན་བད་སྔོན། །སྐྱིལ་ཀྲུང་ཕྱེད་པའི་གར་དུ་བཞུགས། །ཡང་ནི་བདག་གིས་པ་བརྗོད་པས། །རྒྱབ་ཀྱི་པད་འདབ་ཟླ་དཀྱིལ་དུ། །ལྷ་མོ་ཟླ་འོད་སྐུ་མདོག་སེར། །སྐྱིལ་ཀྲུང་ཕྱེད་བཅས་རལ་གྲི་གཡས། །ཨུཏྤལ་སྔོན་པོ་གཡོན་པ་ན། །བདག་གིས་ན་ཡི་སྒྲ་བརྗོད་པས། །གཡོན་གྱི་པད་འདབ་ཉི་དཀྱིལ་དུ། །ཉེ་བའི་སྐྲ་ཅན་སྐུ་མདོག་ལྗང༌། །གཡས་ན་རལ་གྲི་
པོ་ཏི་གཡོན། །གཡས་བརྐྱང་གཡོན་བསྐུམ་སྟབས་སུ་བཞུགས། །ཞེས་བྱ་བའི་རྗེས་ནི་ཕྱི་ནས་ཏེ་ལྷ་མོ་དྲ་ཅན་བསྐྱེད་ནས་སོ། །རལ་ལ་སོགས་པའི་ཡི་གེ་རྣམས་ནི་སྔ་མ་བཞིན་ནོ། །མདུན་ལ་སོགས་པའང་ནི་གོ་སླའོ། །དྲ་བ་ཅན་ནི་ཉོན་མོངས་པ་དང་བྲལ་བས་སོ་སོར་རྟོག་པའི་ཡེ་ཤེས་ཏེ་དེ་ཡང་ཉོན་མོངས་འཕྲོག་པས་དྲ་བ་ཅན་ཏེ། ཉོན་མོངས་ཕྱེད་འཕྲོག་དྲ་ཕྱེད་ཡིན། །ཞེས་གསུངས་པའི་ཕྱིར་རོ། །དེ་དང་ལྡན་པས་དྲ་བ་ཅན་ནོ། །དམར་བ་ནི་སེམས་ཅན་གྱི་དོན་ལ་ཆགས་པའོ། །ཟླ་འོད་ཅེས་བྱ་བ་ནི་མཉམ་པ་ཉིད་ཀྱི་ཡེ་ཤེས་ཏེ། ཟླ་བའི་འོད་ཐམས་ཅད་ལ་གསལ་ཞིང་བསིལ་བ་ལྟར་ཐམས་ཅད་མཉམ་པ་ཉིད་ཀྱི་ཡེ་ཤེས་སོ། །སེར་བ་ནི་རིན་པོ་ཆེའི་རིགས་སེམས་ཅན་ཐམས་ཅད་ཀྱི་ཚེ་དང་བསོད་ནམས་འཕེལ་བར་བྱེད་པའོ། །ཉེ་བའི་སྐྲ་ཅན་ནི་བྱ་བ་གྲུབ་པའི་ཡེ་ཤེས་ཏེ་མེ་ལོང་ལྟ་བུའི་ཡེ་ཤེས་ཀྱི་ཤུགས་ཀྱིས་བྱུང་བས་ཉེ་བའོ། །ལྗང་གུ་ཁ་དོག་སྣ་ཚོགས་ཞེས་བྱ་སྟེ་ལས་ཐམས་ཅད་པའོ། །ད་ནི་དེ་རྣམས་ཀྱི་ཕྱག་མཚན་བཤད་པར་བྱ་སྟེ། རིན་པོ་ཆེ་ནི་དགོས་འདོད་སྡོད་པའོ། །རྒྱལ་མཚན་ནི་ཆོས་མི་ནུབ་པའོ། །རལ་གྲི་ཤེས་རབ་ཀྱིས་ཐམས་ཅད་གཅོད་པའོ། །པདྨ་སྔོན་པོ་ནི་འགྲོ་བའི་དོན་བྱས་ཀྱང་ཉེས་པས་མ་གོས་པ་ལས་མི་འགྱུར་བའོ། །ཨུཏྤལ་ནི་ཐམས་ཅད་ཕན་འདོགས་ཤིང་ལན་ལ་རེ་བ་མེད་པའོ། །པོ་ཏི་ནི་ཆོས་ཀྱི་ཆར་འབེབས་པའོ། །ལྷ་མོ་བཞི་པོ་དེ་རྣམས་ཀྱང་ཕྱག་རྒྱ་དང་ལྡན་པར་བསམ་ཞེས་བྱ་བ་ནི་སྔ་མ་བཞིན་ནོ། །རྣལ་འབྱོར་པའི་ལུས་ནི་རྒྱ་མཚོའི་གཟིངས་བཞིན་དུ་བསྐྱང་བར་བྱ་བ་ཡིན་ན་བསྲུང་བའི་དེ་ཁོ་ན་ཉིད་ཇི་ལྟ་བུ་སྙམ་པ་ལ་བདག་ཉིད་འཇམ་དཔལ་ཡིན་ཕྱིར་དང༌། ཡི་གེ་གསུམ་གྱིས་བྱིན་བརླབས་ཕྱིར། །ལུས་བསྲུང་ཆོ་ག་བྱ་མི་དགོས། །ཞེས་བྱ་སྟེ། བདག་འཇམ་དཔལ་གྱི་རྣལ་འབྱོར་ཉིད་བསྲུང་བའི་ཆོ་ག་ཡིན་པས། གཞན་གྱི་བསྲུང་བ་ལ་རག་མ་ལུས་པ་དང༌། སྐུ་གསུང་ཐུགས་བྱིན་གྱིས་བརླབ་པ་ཡང་བསྲུང་བ་མཆོག་ཏུ་གྱུར་པའོ་ཞེས་པའི་དོན་ཏོ། །ཐོ་རངས་ལ་སོགས་པ་ཐོག་མ་འཇུག་པའི་དུས་དང༌། གནས་སྐབས་གཞན་གྱི་བྱ་བ་དང༌། མཆོད་པ་ལ་སོགས་པའི་ཡན་ལག་ཏུ་ཁྲུས་དང་ཕྱོགས་དང་དུས་དང་སྐར་མ་དང་རྫས་རྣམས་ཀྱང་རྐྱེན་དུ་གྱུར་པ་ཡིན་ན་ཅིའི་ཕྱིར་མ་བཤད་ཅེ་ན། སྙིང་རྗེའི་སེམས་
ཀྱིས་མཉམ་འཇོག་ཕྱིར། །ཞེས་བྱ་སྟེ་གཏན་ཚིགས་དེའི་ཕྱིར་རོ། །དེའི་ཕྱི་རོལ་ཀྱི་ཁྲུས་དང་ཕྱོགས་དང་དུས་དང་སྐར་མ་དང་རྫས་ཀྱི་ཁ་དོག་ནི་སོགས་པ་ཞེས་བྱ་བར་བསྡུའོ། །དེ་རྣམས་ཀྱི་རྩོལ་བ་བྱ་མི་དགོས་ཏེ་སྙིང་རྗེ་ཆེན་པོ་དང༌། སྟོང་པ་ཉིད་དང་ལྷའི་རྣལ་འབྱོར་ཉིད་ཀྱིས་གྲུབ་པའི་ཕྱིར་རོ། །དེ་ཡང༌། ཁྲུས་དང་གཙང་སྒྲ་འདིར་མི་དགོས། །དཀའ་ཐུབ་དཀའ་སྤྱད་མི་དགོས་ཏེ། །སངས་རྒྱས་ཀུན་དང་སེམས་དཔའ་ཆེ། །རྟག་ཏུ་སྦྱོར་བས་འགྲུབ་པར་འགྱུར། །ཞེས་གསུངས་པ་ལྟ་བུའོ། །སྙིང་རྗེ་དང་ལྡན་ན་སྡོམ་པ་གསུམ་ལ་གནས་ཏེ། དེ་ཡང་ཁྲུས་ཀྱི་ཆོ་ག་ཡིན་པས་ན་སྡོམ་པ་གསུམ་ལ་གནས་པ་ནི། །དང་པོ་ཁྲུས་སུ་བཤད་པ་ཡིན། །ཞེས་གསུངས་སོ། །བྱས་པས་ཉེས་པར་འགྱུར་རམ་སྙམ་པ་ལ་བྱས་པ་ལ་ཡང་ཉེས་པ་མེད་དེ་དེ་ལྟ་བུ་ལ་དགའ་བ་དང་རྣལ་འབྱོར་གྱི་རྐྱེན་དུ་འགྱུར་ན་བྱ་བ་ཉིད་དོ། །རྣམ་པ་ཐམས་ཅད་དུ་དགོས་པ་མ་ཡིན་གྱིས་བྱ་བ་ནི་ཡིན་ནོ་ཞེས་པའི་དོན་ཏོ། །དེ་ལྟར་ལྷའི་རྣལ་འབྱོར་དང་ལྡན་པས་བསྒོམ་པ་དང༌། བསྒོམས་པས་དུབ་ན་བཟླས་པ་བྱ་བ་ལ་སོགས་པ་ནི། བདག་གི་ནང་གི་སྙིང་ག་རུ། །མུཾ་ཡིག་འོད་དང་ལྡན་པ་བསམ། །དེ་ལས་འཁོར་ལོ་རྩི་བས་བརྒྱད་བསམ། །ཞེས་བཤད་དོ། །བདག་འཇམ་དཔལ་གྱི་ནང་གི་ཡེ་ཤེས་སེམས་དཔའ་སྟེ། དེའི་ཐུགས་ཀར་མུཾ་དཀར་པོ་འོད་ཟེར་སྣ་ཚོགས་ཅན་གྱུར་བ་ལས། འཁོར་ལོ་རྩིབས་བརྒྱད་དང་ལྡན་པར་བསམ་ཞེས་པའི་དོན་ཏོ། །མདོ་སྡེ་དང༌། འདུལ་བ་དང༌། མངོན་པ་ཐེག་པ་ཆེ་ཆུང་གི་དྲུག་དང་གསང་སྔགས་ལས་བྱ་བ་གཙོ་བོ་དང༌། རྣལ་འབྱོར་གཙོ་བོ་སྟེ་བརྒྱད་ཀྱིས་ཆོས་ཀྱི་འཁོར་ལོ་སྐྱོན་མེད་པར་བསྐོར་བས་དཀར་པོ་རྩི་བས་བརྒྱད་པའོ། །དེའི་མཚན་ཉིད་ཇི་ལྟ་བུ་ཞེ་ན། མུ་ཁྱུད་གཉིས་དང་ལྡན་པར་བསམ། །ཞེས་བྱ་སྟེ་མུ་ཁྱུད་རིམ་པ་གཉིས་ཀྱིས་བསྐོར་བའོ། །དེ་ཡང་ཡིག་འབྲུ་དགོད་པ་ནི་ཕྱི་རོལ་གྱི་མུ་ཁྱུད་ལ་ཀཱ་ལི་ཞེས་བྱ་སྟེ། ཀ་ཁ་ག་གྷ་ང༌། ཙ་ཚ་ཛ་ཛྷ་ཉ། ཊ་ཋ་ཌ་ཌྷ་ཎ། ཏ་ཐ་ད་དྷ་ན། པ་ཕ་བ་བྷ་མ། ཡ་ར་ལ་ཝ། ཤ་ཥ་ས་ཧ། ཀྵ། དེ་རྣམས་བསམ་མོ། །མུ་ཁྱུད་ནང་མ་ལ་ནི་ཨཱ་ལི་ཞེས་བྱ་སྟེ། ཨ་ཨཱ་ཨི་ཨཱི་ཨུ་ཨཱུར་རྀ་རཱྀ་ལྀ་ལཱྀ་ཨེ་ཨཻ་ཨོ་ཨཽ་ཨོཾ་ཨཿ། དེ་རྣམས་བསམ་པའོ། །དབུས་
ཀྱི་ལྟེ་བ་སྟེ་འཁོར་ལོའི་སྙིང་པོ་ལ་ཨོཾ་བསམ་མོ་ཞེས་པ་ནི་གཞན་འདྲེན་པ་སྟེ་འཁོར་ལོའི་རྩིབས་ཀྱི་ཡིག་འབྲུའོ། །དེ་ཉིད་བཤད་པ། ཨ་ར་པ་ཙ་ན་དྷཱིཿ་དང༌། མཐར་ནི་སྭཱ་ཧཱ་ཡོད་པ་རྣམས་ཞེས་བྱ་སྟེ་དང་ནི་སྭཱ་ཧཱ་བསྡུའོ། །སྙིང་པོ་ལས་མཐར་གྱུར་པ་ནི་རྩི་བས་ཉིད་དོ། །ཁ་ཅིག་ནི་སྭཱ་ཧཱི་མཐའ་ཅན་ཞེས་བྱ་བར་འདོད་དོ། །དོན་ནི་འདི་ཡིན་ཏེ། ཨ་ར་པ་ཙ་ན་དྷཱིཿསྭཱ་ཧཱ་བརྒྱད་རྩི་བས་རེ་ལ་ཡིག་འབྲུ་རེ་དགོད་པའོ། །དེ་ཉིད་ཀྱིས་ནི། རྩིབས་བརྒྱད་ལ་ནི་ཀླག་ཕྱོགས་སུ། །སེམས་ཀྱིས་བྲི་ཞིང་བསམ་པར་བྱ། །ཞེས་བཤད་པའོ། །ཀླག་ཕྱོགས་ནི་མདུན་ནས་གཡས་ཕྱོགས་ནས་ཕར་རིམ་པས་སོ། །རིམ་གྱིས་བྲི་བ་ནི་གསལ་བར་བསམ་པའོ། །དེ་ཡང་གང་གི་ཚེ་བར་སྐབས་སུ་སྐྱོ་བར་གྱུར་པ་དེའི་ཚེ་མཆོད་པ་དང༌། བསྟོད་པ་བྱས་ལ་བསྒོམ་པར་བྱའོ། །དེ་ནས་ཀྱང་སྐྱོ་བར་གྱུར་ན་བཟླས་པ་བྱ་སྟེ། ཨོཾ་ཨ་ར་པ་ཙ་ན་དྷཱིཿསྭཱ་ཧཱ་ཞེས་བཟླས་སོ། །འདི་སྐད་སྟོན་པ་ཡིན་ཏེ། ཐོ་རངས་ཀྱི་དུས་སུ་ཁྲུས་ལ་སོགས་པ་བྱས་སམ་མ་བྱས་ཀྱང་རུང་སྟེ། སྟན་བདེ་པ་ལ་འདུག་ནས་སྙིང་རྗེའི་སེམས་ཀྱིས་མཉམ་པར་བཞག་ལ་མཆོད་པ་རྣམ་པ་ལྔ་དང་རས་རིས་ལ་སོགས་པའི་སྐུ་གཟུགས་དང་མཎྜལ་བྱི་དོར་ལེགས་པར་བྱས་པར་མེ་ཏོག་ཚོམ་བུར་དགྲམ་པ་དང༌། སྔར་བཤད་པའི་གཏོར་མ་བཤམ་པ་འམ། ཡང་གཏོར་མ་མ་བཤམས་པ་ཡང་རུང་སྟེ་སྔར་བཤད་པའི་ཡན་ལག་བདུན་པ་ལ་སོགས་པ་བྱས་པ་སྟེ་ཚད་མེད་པ་བཞི་བསྒོམ་པ་དང༌། ཡང་ན་ཡན་ལག་བཅུ་གཅིག་པ་བྱ་སྟེ། ཕྱོགས་དུས་ཀུན་ན་བཞུགས་པ་ཡི། །སངས་རྒྱས་ཆོས་དང་དགེ་འདུན་ཏེ། །དཀོན་མཆོག་གསུམ་ལ་སྐྱབས་སུ་མཆི། །བདུག་པ་མེ་ཏོག་མར་མེ་སོགས། །དངོས་སུ་བཤམས་དང་སྤྲུལ་པས་མཆོད། །བདག་གི་སྐྱེ་གནས་ཐམས་ཅད་དུ། །སྡིག་པ་ཅི་བགྱིས་ཐམས་ཅད་བཤགས། །བདེ་གཤེགས་སྲས་བཅས་བསམ་དག་པའི། །འགྲོ་བའི་དགེ་ལ་རྗེས་ཡི་རང༌། །མགོན་པོ་ཐུགས་རྗེ་ཆེ་རྣམས་ཀྱིས། །ཆོས་ཀྱི་འཁོར་ལོ་བསྐོར་དུ་གསོལ། །ཇི་སྙེད་སངས་རྒྱས་མ་ལུས་པ། །མྱ་ངན་མི་འདའ་བཞུགས་སུ་གསོལ། །བླ་ན་མེད་པའི་བྱང་ཆུབ་ཏུ། །དུས་འདི་ཕན་ཆད་སེམས་
བསྐྱེད་བགྱི། །མགོན་པོ་རྣམས་ལ་ལུས་འདི་དབུལ། །ཐུགས་ལ་བཞེས་ཤིང་དངོས་གྲུབ་སྩོལ། །བདག་གི་དགེ་བ་དེ་དག་གིས། །འགྲོ་རྣམས་ཐམས་ཅད་མྱུར་རྫོགས་ཤོག །སོ་སོར་ཐར་དང་བྱང་ཆུབ་སེམས། །རིག་འཛིན་སྡོམ་ལ་གནས་པར་བགྱི། །ཞེས་བརྗོད་ལ་གཤེགས་སུ་གསོལ་ལོ། །དེ་ནས་ཚད་མེད་པ་བཞི་ལ་སོགས་པ་ནས་སྙིང་གར་འཁོར་ལོ་བསྒོམ་པའི་བར་དུ་སྔ་མ་བཞིན་དུ་བྱས་ལ། ལྟེ་བའི་ཨོཾ་ལས་འོད་འཕྲོས་པས་ཡེ་ཤེས་སེམས་དཔའ་སྤྱན་དྲངས་ལ་མཆོད་པ་རྣམ་པ་ལྔ་ལ་སོགས་པ་དབུལ་ཞིང་བསྟོད་ལ་དེ་ནས་གསལ་བར་བསྒོམ་པའོ། །དེ་ནས་སྐྱོ་བར་གྱུར་ན་མཆོད་པ་ལ་སོགས་པ་བྱ་སྟེ། དེ་ཉིད་བཤད་པ། དེ་ལས་ཨོཾ་ལས་འོད་ཟེར་ནི། །ལྕགས་ཀྱུའི་དབྱིབས་འཕྲོས་ཡི་དམ་ལྷ། །འཁོར་བཅས་བཀུག་ནས་ནམ་མཁར་བསམ། །ཞེས་བྱའོ། །སྙིང་གའི་ཨོཾ་ལས་འོད་ཟེར་ལྕགས་ཀྱུའི་དབྱིབས་འདྲ་བ་འཕྲོས་པས་ཡི་དམ་གྱི་ལྷ་འཇམ་དཔལ་འཁོར་ལྷ་མོ་བཞིས་བསྐོར་བའི་ཡེ་ཤེས་སེམས་དཔའ་སྤྱན་དྲངས་ལ་མདུན་དུ་བཞུགས་སུ་གསོལ་བའོ། །དེ་ཡང་སྒོམ་པ་གཙོ་བོར་བྱེད་པས་ཛཿཧཱུཾ་བཾ་ཧོཿ་ཞེས་བརྗོད་པས་དགུག་པ་དང་གཞུག་པ་དང་བཅིང་བ་དང་དབང་དུ་བྱ་བས་གཉིས་སུ་མེད་པར་བསྒོམ་མོ། །བཟླས་པ་གཙོ་བོར་བྱེད་ན་མདུན་ཉིད་དུའོ། །དེ་ཉིད་མཆོད་པར་འདོད་པས་དེ་ལ་དངོས་སམ་ཏིང་ངེ་འཛིན་གྱིས། ཕྱག་དང་མཆོད་པ་དབུལ་བར་བྱ། །ཞེས་བྱ་སྟེ། སྙན་སྔགས་དང་བཅས་པའི་ཕྱག་བྱས་པས་བདག་གི་སྙིང་གའི་ཨོཾ་ལས་ལུས་མཛེས་པ་རྒྱན་དང་ལྡན་པ་གྲངས་མེད་པས་ཕྱག་བྱས་པར་བསམ་པ་དང༌། ཡང་དེ་ཉིད་དུ་ཐིམ་པར་བསམ་པ་ལ་ལྷ་མོ་དཔག་ཏུ་མེད་པ་ཡང་ཨོཾ་ལས་འཕྲོས་ཏེ་མཆོད་པ་བྱེད་པར་བསམ་ཞིང་དངོས་སུ་དབུལ་ལོ། །དེ་ནས་ཡང་ཨོཾ་ཉིད་ལ་ཐིམ་པའོ། །དངོས་སུ་མ་འབྱོར་ན་ཏིང་ངེ་འཛིན་གྱིས་ཀྱང་དབུལ་ལོ། །མདུན་གྱི་ལྷ་རྣམས་གསལ་བསམས་ལ། །རང་གི་སྙིང་གའི་སྔགས་གསལ་བར། །ཞེས་བྱ་བ་ནི་བཟླས་བརྗོད་བྱ་སྟེ། རང་གི་སྙིང་གའི་སྔགས་ནི་ཨོཾ་དང་རྩིབས་བརྒྱད་ཀྱི་ཡི་གེའོ། །མདུན་གྱི་ལྷ་ནི་འཇམ་དཔལ་འཁོར་དང་བཅས་པའོ། །དེ་ཐམས་ཅད་གསལ་བར་བསྒོམ་ཞིང་བཟླས་ཞེས་པའི་དོན་ཏོ། །བཟླས་པའི་བསམ་པ་ནི། བཟླས་པ་ཡི་ནི་མཆོད་པ་འདི། །ཡིད་ཀྱིས་བཟླས་པས་
འོད་འཕྲོས་ཏེ། །འོད་ལས་ལྷ་མོ་མང་སྤྲོས་ཏེ། །མདུན་གྱི་ལྷ་རྣམས་མཆོད་བསམ་ཞིང༌། །ལྷ་མོ་ཉིད་ཀྱང་དེར་ཐིམ་པར། །ཞེས་བྱ་སྟེ། བཟླས་པ་བྱས་པས་སྙིང་གའི་ཡིག་འབྲུ་ལས་འོད་འཕྲོས་པས་ལྷ་མོར་གྱུར་ནས་མཆོད་པ་ཕུལ་ནས་སླར་འདུས་པའོ། །བརྒྱ་རྩ་བརྒྱད་ཀྱི་གྲངས་སུ་བྱ། །ཞེས་བྱ་བ་ནི་མཆོད་པ་ཙམ་དུ་ཟད་ཀྱི་ངེས་པ་ཁོ་ན་མ་ཡིན་ནོ། །དེ་ཡང་བསྒོམ་པ་གཙོ་བོར་བྱེད་པ་ནི་སྙིང་གའི་ཡིག་འབྲུ་ཁོ་ན་གསལ་བར་བྱ་ཞིང་བཟླས་ལ། བཟླས་བརྗོད་གཙོ་བོར་བྱེད་པས་མདུན་གྱི་ལྷ་དང་སྔགས་ཀྱི་འོད་ཟེར་སྤྲོ་བསྡུ་གསལ་བར་བྱའོ། །ཁ་ཅིག་ན་འོད་འཕྲོས་པས་ཐུགས་དམ་བསྐུལ་ནས་སླར་འདུས་པས་དངོས་གྲུབ་སྩོལ་བར་གསུངས་སོ། །དེ་ནས་ཡང་སྐྱོ་བར་གྱུར་ན་མཆོད་པ་འབུལ། རྡོ་རྗེ་གནོད་སྦྱིན་ཡོངས་སུ་བཟླས་པའི་ཆུས་མཆོད་པའི་ཡན་ལག་རྣམས་བསངས་ལ་ཨོཾ་བཛྲ་དྷཱུ་པེ་ཧཱུཾ་ཞེས་སྤོས་བྱིན་གྱིས་བརླབ། ཨོཾ་བཛྲ་པུ་ཥྤེ་ཧཱུཾ། ཨོཾ་བཛྲ་ཨཱའོ་ཀེ་ཧཱུཾ་ཨོཾ་བཛྲ་ག་ནྡྷེ་ཧཱུཾ་ཞེས་མེ་ཏོག་དང་མར་མེ་དང་དྲི་ཆབ་བྱིན་གྱིས་བརླབས་ཏེ། དེ་རྣམས་རང་རང་གི་ལྷ་མོར་རོ། །ཨོཾ་ཨ་ཀཱ་རོ་མུ་ཁཾ་སརྦ་དྷ་རྨ་ཎཱཾ་ཨཱདྱ་ནུ་ཏྤནྣ་ཏྭཱད་ཅེས་པ་ལྷའི་ཞལ་ཟས་རོ་བརྒྱ་དང་ལྡན་པ་མི་རྟོག་པའི་ཡེ་ཤེས་ཐོབ་པར་བྱིན་གྱིས་བརླབས་ལ། དེ་ནས་དུང་ལ་སོགས་པ་ཆུ་གཙང་དྲི་དང་མེ་ཏོག་དང་སྨན་སྣ་ཚོགས་དང་ལྡན་པ་ལ་རྡོ་རྗེ་སེམས་དཔའ་ཡོངས་སུ་བཟླས་པ་དབུལ་ཏེ། དེ་ཡང་ཁ་ཅིག་ཏུ་ནི་ཁྲུས་ཁ་ཅིག་ཏུ་ནི་བྱང་ཆུབ་ཀྱི་མཆོད་པའོ། །དེ་ནས་མཆོད་པ་ཐམས་ཅད་དབུལ་བར་བྱ་སྟེ། ཨོཾ་སརྦ་ཏ་ཐཱ་ག་ཏ་དྷཱུ་པ་པཱུ་ཛ་མེ་གྷ་ས་མུ་དྲ་སྤར་ཎ་ས་མ་ཡེ་ཧཱུཾ་ཞེས་བདུག་སྤོས་དབུལ། ཨོཾ་སརྦ་ཏ་ཐཱ་ག་ཏ་པུ་ཥྤ་པཱུ་ཛ་མེ་གྷ་ས་མུ་དྲ་སྤར་ཎ་ས་མ་ཡེ་ཧཱུཾ། ཨོཾ་སརྦ་ཏ་ཐཱ་ག་ཨཱ་ལོ་ཀེ་པཱུ་ཛ་མེ་གྷ་ས་མུ་དྲ་སྥར་ཎ་ས་མ་ཡེ་ཧཱུཾ། ཨོཾ་སརྦ་ཏ་ཐཱ་ག་ཏ་ག་ནྡྷེ་པཱུ་ཛ་མེ་གྷ་ས་མུ་དྲ་སྥར་ཎ་ས་མ་ཡེ་ཧཱུཾ་ཞེས་མེ་ཏོག་དང༌། མར་མེ་དང༌། དྲི་ཆབ་རྣམས་གོ་རིམས་བཞིན་དབུལ། ཨོཾ་སརྦ་ཏ་ཐཱ་ག་ཏ་ནཻ་བི་དྱེ་པཱུ་ཛ་མེ་གྷ་ས་མུ་དྲ་སྤར་ཎ་ས་མ་ཡེ་ཧཱུཾ་ཞེས་ཞལ་ཟས་དབུལ། གཞན་ཡང་ན་བཟའ་ལ་སོགས་པ་ཡང་ཨོཾ་དང་མངོན་པར་བཟླས་ལ་དབུལ་ལོ། །དེ་ནས་བསྟོད་པ་བྱ་བ་ནི། གཞོན་ནུ་མཛེས་པའི་སྐུ་འཆང་ཞིང༌། །ཤེས་རབ་སྒྲོན་མས་རབ་བརྒྱན་པ། །འགྲོ་བའི་
གཏི་མུག་མུན་སེལ་བ། །འཇམ་པའི་དབྱངས་ལ་ཕྱག་འཚལ་བསྟོད། །ཅེས་བྱའོ། །གཞོན་ནུ་སྔ་མ་བཞིན་ནོ། །མཛེས་པ་ནི་ཐ་དད་པ་དང༌། ཐ་མི་དད་པའི་རྒྱན་ཚང་བའོ། །ཐ་དད་པ་ནི་དབུ་རྒྱན་ལ་སོགས་པའོ། །ཐ་མི་དད་པ་ནི་མཆན་དང་དཔེ་བྱད་དེ་དེ་ལྟ་བུས་མཛེས་པར་བྱས་པའི་སྐུ་དང་ལྡན་པས་འཆང་ཞེས་པ་སྟེ་སྐུ་ལ་བསྟོད་པའོ། །ཤེས་རབ་ནི་ཤེས་བྱ་ཐམས་ཅད་ལས་ཕུལ་དུ་གྱུར་པ་སྟེ་གཉིས་སུ་མེད་པའི་ཡེ་ཤེས་སོ། །དེ་ཉིད་སྒྲོན་མ་སྟེ་མ་རིག་པའི་མུན་ནག་འཇོམས་པ་དང༌། ཐམས་ཅད་གསལ་བས་ན་ཐུགས་ལ་བསྟོད་པའོ། །རང་ཉིད་ཀྱིས་རྟོགས་པ་གཞན་ལ་བསྟོད་པས་གཞན་གྱི་མ་རིག་པ་འཇོམས་ཤིང་ཡེ་ཤེས་གསལ་བར་བྱེད་པས་འགྲོ་བའི་གཏི་མུག་གི་མུན་པ་སེལ་བ་ཞེས་གསུང་ལ་བསྟོད་པའོ། །གཞན་དག་ནི་ལོངས་སྤྱོད་རྫོགས་པའི་སྐུ་དང༌། ཆོས་ཀྱི་སྐུ་དང་སྦྲུལ་པའི་སྐུ་ལ་བསྟོད་པ་སྟེ་གོ་རིམས་བཞིན་དུ་འདོད་དོ། །དེ་ལྟ་བུ་དང་ལྡན་པས་འཇམ་པའི་དབྱངས་ཞེས་བྱ་སྟེ་སྙན་ངག་གིས་བསྟོད་པའོ། །དེ་ལ་གཏོར་མ་ཙམ་གཏོང་བར་འདོད་པས་ནི་འཁོར་ལོ་དང་ཡིག་འབྲུ་ལ་ང་རྒྱལ་ཙམ་བྱས་ལ་བཟླས་བརྗོད་བརྒྱ་ཙ་བརྒྱད་ཙམ་བྱས་ནས་བསྟོད་པ་བྱའོ། །གཏོར་མ་ལ་མི་འཇུག་པ་རྣམས་ཀྱིས་ནི་འདི་ཉིད་དུ་ལྷ་རྣམས་གཤེགས་སུ་གསོལ་ཏེ་རྒྱས་པར་འོག་ནས་འབྱུང་ངོ༌། །དེ་ནས་ལངས་ལ་མཚན་ཡང་དག་པར་བརྗོད་བ་ཡང་ལྷའི་ང་རྒྱལ་དང་ལྡན་པས་དུས་གསུམ་དུ་གདོན་ནོ། །སྤྱོད་ལམ་གཞན་དུ་ཡང་ལྷའི་ང་རྒྱལ་གྱིས་གནས་པར་བྱའོ། །ཁ་ཟས་ལ་སོགས་པ་ཡང་རཾ་གྱིས་ཉེས་པ་དང་བྲལ་བར་བསམ། ཨོཾ་སརྦ་དྷ་རྨ་ཏེ་བཛྲ་སི་དྡྷི་ཧཱུཾ་ཞེས་བརྗོད། ཨ་ལས་བདུད་རྩིར་གྱུར་པར་བསམ། ཨོཾ་ཨ་མྲྀ་ཏེ་ཧཱུཾ་ཕཊ་ཅེས་བརྗོད་པའོ། །གཞན་དག་ནི་ཨོཾ་སརྦ་ཀ་རི་ཞེས་པས་ཉེས་པ་དང་བྲལ་ཞིང༌། ཨོཾ་སརྦ་སིདྡྷི་ཞེས་བརྗོད་པས་ཡོན་ཏན་ཐམས་ཅད་ཀྱི་འབྱུང་གནས་བདུད་རྩིར་བསམ་ཞེས་གསུང་ངོ༌། །དེ་ནས་ལྷའི་ང་རྒྱལ་གྱིས་བཟའ་བར་བྱའོ། །གཞན་ཡང་སྦྱིན་སྲེག་ལ་སོགས་པ་གསང་སྔགས་ཀྱི་བྱ་བ་ཐམས་ཅད་དང་ཀློག་པ་ལ་སོགས་པ་ཆོས་སྤྱོད་བཅུའི་བདག་ཉིད་ཀྱི་མདོ་དོན་དྲན་པའི་བློ་བཞག་ནས་ཞེས་
གསུངས་པ་ཐམས་ཅད་ཀྱང་ང་རྒྱལ་ཤེས་པར་བྱ་སྟེ་ལྷའི་ང་རྒྱལ་དེ་ཉིད་ཀྱིས་བྱའོ། །དེ་ཡང༌། གང་དག་ཏུ་ནི་རྣམ་པ་མེད། །ལས་ཀྱི་ཆོ་ག་རྣམས་མེད་པ། །དེར་ནི་སྤྱི་རྒྱུད་ལས་གསུངས་པའི། །ཆོ་ག་མཁས་པས་བརྟེན་པར་བྱ། །ཞེས་གསུངས་པ་ལྟ་བུའོ།། གཏོར་མ་གཏོང་བར་འདོད་པས་གཏོང་བའི་རིམ་པ་ཇི་ལྟ་བུ་ཞེ་ན། བསྟོད་པའི་རྗེས་ལ་གཏང་བར་བྱ་བ་ཡིན་ཏེ། དེ་ཉིད་བཤད་པ། དེ་རྗེས་གཏོར་མ་བྱིན་བརླབས་ཏེ། །ལག་པ་རྡོ་རྗེ་ཐལ་སྦྱར་ནས། །ཞེས་བྱ་སྟེ་བསྟོད་པའི་རྗེས་ཏེ་ཕྱི་ནས་བར་མ་ཆད་པར་གཏོར་མ་བྱིན་གྱིས་བརླབ་པའི་ཕྱག་རྒྱ་ལག་པ་རྡོ་རྗེ་ཐལ་མོ་སྦྱར་བ་སྟེ། ཐལ་མོ་སྦྱར་བའི་སོར་མོ་ཕན་ཚུན་རྩེ་བསྣོལ་བའོ། །དེ་ཡང་ཐལ་མོ་དམ་དུ་བསྡམས་པ་ལས་སོར་མོ་ཐམས་ཅད་བསྣོལ་བ་ནི་རྡོ་རྗེ་ཐལ་མོར་བཀའ་སྩལ་ཏེ་ཞེས་གསུངས་སོ། །ལག་སོར་རྣམས་ལ་རཾ་ཁ་དོག་དམར་པོ་བསམ་མོ། །ལག་སོར་ཁོ་ན་ལ་འམ་ཞེ་ན། གཏོར་མར་ཡང་ནི་ཞེས་བསྣན་པའོ། །རཾ་ཁ་དོག་དམར་པོ་བསྒོམས་ཏེ། དེ་ནས་ལག་སོར་གྱི་རཾ་ལས་འོད་འཕྲོས་པས་གཏོར་མའི་ལ་རཾ་ལ་ཕོག་སྟེ། འོད་ཟེར་དེ་རྣམས་ཀྱིས་གཏོར་མའི་ཉེས་པ་དང༌། སྐྱོན་དུ་གྱུར་པ་འབགས་པ་དང༌། ཉམས་པ་དང༌། རྨེ་བ་དང༌། དྲི་མ་ཅན་དུ་གྱུར་པ་དང༌། མི་མཐུན་པ་ཐམས་ཅད་དག་པར་བསམ་མོ། །སྔགས་བདུན་བཟླས་ཤིང་ཕྱག་རྒྱ་བཅའ། །ཞེས་པ་ནི། ལུས་ངག་ཡིད་གསུམ་གྱི་སྤྱོད་པ་ནུས་པ་ཅན་དུ་བྱ་བའི་ཕྱིར་ལན་གྲངས་བདུན་ནོ། །དེ་ཉིད་ཀྱི་སྔགས་ནི་ཨོཾ་སྭ་བྷཱ་ཝ་ཤུདྡྷཿསརྦ་དྷརྨཱཿསྭ་བྷཱ་ཝ་ཤུདྡྷོ྅ ཧཾ་ཞེས་བྱ་བའོ། །ལག་པ་རིན་ཆེན་སྒྲོམ་བུ་ཞེས་བྱ་བ་ནི་སྙིམ་པ་མདུན་དུ་གཞག་པའི་སོར་མོ་རྣམས་རྩེ་མོ་སྦྱར་ཏེ་ཚིགས་ཟུར་ཅན་དུ་བྱ་བའོ། །དེ་ལྟ་བུར་བྱས་པའི་ཚིགས་ཀྱི་བར་དང་གཏོར་མའི་ནང་དུ་སྭ་ཁ་དོག་སེར་པོ་བསམ་པའོ། །སྭ་ལས་འོད་ཟེར་བྱུང་སྟེ་འཕྲོས་པས་གཏོར་མའི་སྭ་ལ་ཕོག་པས་རྒྱ་ཆེན་པོ་འཇིག་རྟེན་ཐམས་ཅད་གང་བ་འདོད་པའི་ཡོན་ཏན་གཟུགས་མཛེས་པ་དང༌། སྒྲ་སྙན་ཅིང་ཡིད་དུ་འོང་བ་དང༌། དྲི་ཞིམ་པ་དང༌། རོ་མངར་ཞིང་ཞིམ་པ་དང༌། རེག་བྱ་འཇམ་ཞིང་ཡིད་དུ་འོང་བ་ལྔའི་རང་བཞིན་དུ་གང་བར་བསམ་མོ། །སྔགས་དང་ཕྱག་རྒྱལ་ན་བདུན་བཟླས། །ཞེས་བྱ་བ་
ནི་སྔ་མ་བཞིན་ནོ། །ཨོཾ་ན་མཿསརྦ་ཏ་ཐཱ་ག་ཏ་བྷྱོ་བི་ཤྭ་མུ་ཁེ་བྷྱཿ་སརྦ་ཏད་ཁཾ་ཨུངྒ་ཏེ་སྥ་ར་ཎ་ཧི་མཾ་ག་ག་ན་ཁཾ་སྭཱ་ཧཱ། ཞེས་བྱ་བ་ནི་སྔགས་སོ། །ལག་པ་ཐལ་སྦྱར་གཤོག་པར་གདེངས། །ཞེས་བྱ་བ་ནི་ཐལ་མོ་སྦྱར་བ་ལས་བསྐྱེད་ལ་གཤོག་པ་གདེངས་པ་ལྟར་བྱས་པའོ། །ལག་སོར་དང་གཏོར་མའི་ནང་དུ་ཨ་དཀར་པོ་བསམས་པ་ལས་འོད་འཕྲོས་པས་གཏོར་མའི་ཨ་ལ་ཕོག་པས་བདུད་རྩིར་གྱུར་པའོ། །དེ་ཉིད་ཀྱིས། ལག་སོར་དང་ནི་གཏོར་མར་ཨ། །དེ་ནས་བདུད་རྩིའི་རྒྱ་མཚོར་འཁྱིལ། །ཞེས་བྱ་བའོ། །ཕྱག་རྒྱ་སྔགས་ནི་ལན་བདུན་བཟླས། །ཞེས་བྱ་བ་ནི་བཤད་ཟིན་ཏོ། །སྔགས་ནི་ཨོཾ་ཨ་མྲྀ་ཏེ་ཀུཎྜ་ལི་ཧ་ན་ཧ་ན་ཧཱུཾ་ཕཊ་ཅེས་བྱའོ། །ལག་པ་ལྕགས་ཀྱུའི་ཕྱག་རྒྱ་བཅས། །ཞེས་བྱ་བ་ནི་ལག་པ་གཉིས་ཁུ་ཚུར་བཅངས་པའི་མཁྲིག་མ་བསྣོལ་ལ། མཐེ་ཆུང་ལུ་གུ་རྒྱུད་དུ་སྤྲེལ། །མཛུབ་མོ་ལྕགས་ཀྱུ་ལྟར་བྱས་པའོ། །སྙིང་གའི་འཁོར་ལོའི་ལྟེ་བའི་ཨོཾ་ལས་འོད་ཟེར་ལྕགས་ཀྱུའི་དབྱིབས་ཅན་འཕྲོས་པས་འོད་ཟེར་དང་སྔགས་འོག་ནས་འབྱུང་བ་འདི་གཉིས་ཀྱིས་སྤྱན་དྲངས་ཏེ་ཞེས་བྱ་བའི་དོན་ཏོ། །ཨོཾ་ཨཱ༔་ཧཱུཾ། ཨེ་ཧྱེ་ཧི་བྷ་ག་ཝཱ་ན་མ་ཧཱ་ཀཱ་རུ་ཎི་ཀ་དྲྀ་ཤྱ་ཧོ་ས་མ་ཡ་ཧོཿ་ཞེས་བྱ་བ་ནི་སྔགས་སོ། །སྤྱན་དྲང་སྙམ་པ་ལ། བདེ་གཤེགས་སྲས་བཅས་འཁོར་བཅས་ཀུན། །ཞེས་བྱ་བ་སྟེ། སངས་རྒྱས་རྣམས་བདེ་བས་བདེ་བར་གཤེགས་པའོ། །སྲས་ནི་བྱང་ཆུབ་སེམས་དཔའོ། །འཁོར་ནི་ཉན་ཐོས་དང་རང་སངས་རྒྱས་རྣམས་སོ། །ཡང་ན་ཐམས་ཅད་ཀྱང་བདེ་བར་གཤེགས་པའི་འཁོར་ཏེ་ཁམས་གསུམ་ནི་སེམས་ཅན་ཐམས་ཅད་དང་བཅས་པ་ཞེས་པ་ཁ་ཅིག་འདོད་དོ། །ཀུན་ཞེས་བྱ་བ་ནི་མ་ལུས་པའོ། །མདུན་གྱི་ནམ་མཁའི་གདན་ཐོག་ཏུ་ཡིད་ཀྱིས་མངོན་སུམ་དང་འདྲ་བར་གསལ་བ་ནི་གཞུག་པའོ། །དེ་ནས་ཏིང་ངེ་འཛིན་གྱི་སྤྲོ་བསྡུས་དེ་ལ་ཕྱག་འཚལ་བ་དང༌། མཆོད་པ་དབུལ་བའོ། །སྤྲོ་བསྡུ་གང་ལས་ཤེ་ན། ཐུགས་ཀའི་ཨོཾ་ལས་སྤྲོ་བསྡུ་ཞེས་བྱའོ། །ཇི་ལྟ་བུ་ཞེ་ན། བདག་ལུས་དཔག་ཏུ་མེད་པ་དང༌། །ལྷ་མོ་དཔག་ཏུ་མེད་པ་སྤྲོ། །ཞེས་བྱ་སྟེ། དཔག་ཏུ་མེད་པ་ནི་གྲངས་དང་མཚན་ཉིད་དོ། །ཏིང་ངེ་འཛིན་འགའ་ཞིག་གམ་ཞེ་ན་མ་ཡིན་ཏེ། མཆོད་པ་
དངོས་སུ་ཡོད་ན་ཡང༌། །ཚིགས་བཅད་དང་ནི་སྔགས་ཀྱིས་དབུལ། །ཞེས་བྱ་སྟེ་ཚིགས་སུ་བཅད་པ་ནི། བདུག་སྤོས་ཕལ་ཆེར་བདུག་སྤོས་བླ་རེ་སྟེ། །བདུག་སྤོས་བཀོད་པའི་འོད་ཟེར་རབ་བརྒྱན་ཞིང༌། །བདུག་སྤོས་སྣ་ཚོགས་བདུག་སྤོས་གཅལ་དུ་བཀྲམ། །བདག་ཉིད་ཆེན་པོ་རྒྱལ་བ་དེ་དག་མཆོད། །ཅེས་བྱ་བ་ལ་སོགས་པའོ། །སྔགས་ནི་སྔར་བསྟན་པ་རྣམས་སོ། །ད་ནི་འགྲོ་བ་ལ་གཏོར་མ་སྦྱིན་པ་བཤད་པར་བྱ་སྟེ། དེ་རྗེས་གཏོར་མ་བསྔོ་བར་བྱ། །ཞེས་དམ་བཅས་པའོ། །དེ་ཉིད་བཤད་པ་ནི་ལག་པ་གཡས་པ་རྡོ་རྗེ་ཁུ་ཚུར་བཅངས་མཛུབ་མོ་བསྒྲེངས་ནས་རྩེ་མོ་ཧཱུཾ་དཀར་པོ་བསམ་མོ། །ཧཱུཾ་ལས་འོད་འཕྲོས་པས་སོ་སོའི་གནས་སུ་འབྱུང་བ་ནི་ཇི་ལྟར་མོས་པ་དང༌། ཇི་ལྟར་དགའ་བར་སྤྱོད་པའོ། །སྔགས་དང་ཕྱག་རྒྱལ་ན་བདུན་བཟླས། །ཞེས་བྱ་བ་ནི་བཤད་ཟིན་ཏོ། །ཨོཾ་སརྦ་ཏ་ཐཱ་ག་ཏ་ཨ་ཝ་ལོ་ཀི་ཏེ་སམྦྷ་ར་སམྦྷ་ར་ཧཱུཾ་ཞེས་བྱ་བ་ནི་སྔགས་སོ། །ལག་པ་གཡས་པ་རྡོ་རྗེ་ཁུ་ཚུར་སྙིང་གར་བཅས་ལ་གཡོན་པ་མཆོད་སྦྱིན་གྱི་སྣོད་འདེགས་པ་ལྟར་བྱས་ལ་གཡོན་པའི་སོར་མོ་བྲེ་ག་ལ་སྟེ་རྩེ་མོའི་ནང་ལྔ་ལ་ཡི་གེ་ཧཱུཾ་དཀར་པོ་ལྔ་ནི་སོར་མོ་རེ་ལ་ཧཱུཾ་རེ་བསམ་མོ། །ཧཱུཾ་རྣམས་ལས་འོད་འཕྲོས་པས་མཆོད་པའི་ལྷ་མོ་དཔག་ཏུ་མེད་པ་འཐོན་ནས་དེ་རྣམས་ནི་བྱོན་པ་ལྟར་ཐམས་ཅད་ལ་སྟེར་པར་བྱེད་པས་ལག་ཏུ་ལྷན་ལྷན་གཏད་པར་བསམ་ཞིང་སྔགས་དང་ཕྱག་རྒྱལ་བདུན་བཅའ་ཞེས་བྱའོ། །སྔགས་ནི་ཨོཾ་ཛྙཱ་ན་ཨ་ཝ་ལོ་ཀི་ཏེ་ས་མནྟ་སྥ་ར་ཎ་ར་སྨི་བྷ་ཝ་ས་མ་ཡ་མ་ཧཱ་མ་ཎི་དུ་རུ་དུ་རུ་ཧྲྀཾ་ད་ཡ་ཛ་ལ་ནི་སྭཱ་ཧཱ་ཞེས་བྱ་བའོ། །ལག་གཉིས་སོ་སོར་ནང་དུ་བསྣོལ། །ཞེས་བྱ་བ་ནི་གཅིག་གི་ནང་དུ་གཅིག་གི་སོར་མོ་རྣམས་བཅུག་པའི་མཐེ་བོང་གཉིས་བརྒྱང་སྟེ་ལྟོ་གཉིས་ལ་ཛ་དམར་པོ་རེ་བསམ་མོ། །ཛ་དེ་གཉིས་ལས་འོད་ཟེར་ལྕགས་ཀྱུ་ལྟ་བུ་འཕྲོས་པས་འཕགས་པ་དང་སེམས་ཅན་ཐམས་ཅད་དབང་དུ་བསྡུས་ནས་དེ་ནས་ནི་ཐམས་ཅད་ལ་ཅི་བཅོལ་བའི་ཕྲིན་ལས་མཛད་པ་དང་བྱེད་པར་བསམ་མོ། །དེ་ནས་སྔགས་འོག་ནས་འབྱུང་བ་འདི་ཕྱག་རྒྱ་དང་བཅས་པ་ལན་བདུན་བཟླས་སོ། །ཨོཾ་ན་མཿ་ས་མནྟ་བུདྡྷཱ་ནཱ་ན་གྲ་ཧེ་ཤྭ་རེ་པྲ་ཛོ་ཏི་ནི་མ་ཧཱ་ས་མ་ཡ་སྭཱ་ཧཱ། དེ་ནས་སྔགས་ཐམས་
ཅད་ནུས་པ་བརྟན་པས་ན་རྟེན་ཅིང་འབྲེལ་པར་འབྱུང་པའི་སྙིང་པོ་བསྔགས། ཡེ་དྷརྨཱ་ཧེ་ཏུ་བྲ་བྷ་ཝཱ་ཧེ་ཏུ་ནྟེ་ཥཱ་ནྷ་ཐཱ་ག་ཏོ་ཧྱ་ཝ་ད་ཏ། །ཏེ་ཥཱ་ཉྩ་ཡོ་ནི་རོ་དྷ་ཨེ་ཝཾ་བཱ་དཱི་མྀ་ཧཱ་ཤྲ་མ་ཎཿ་ཞེས་བྱ་བ་བཟླས་སོ། །ཀྱང་ཞེས་བྱ་བ་ནི་བསྡུ་བ་སྟེ་ཆོས་ཀྱི་སྦྱིན་པ་ཡང་ཁ་ཏོན་བྱ་ཞེས་བྱ་བཱི་དོན་ཏོ། །དེ་ཉིད་བཤད་པ་དེ་ནས་ཆོས་ཀྱི་སྤྱིན་པ་ནི། །རྒྱ་ཆེན་རབ་ཟབ་མདོ་གདོན་བྱ། །ཞེས་བྱ་བས་བསྟན་ཏོ། །ཆོས་བཤད་པས་ཐམས་ཅད་ཀྱིས་མཉན་པར་ཐམས་ཅད་བྱང་ཆུབ་སེམས་སུ་ལྡན་པར་བསམ་པ་དང༌། བདག་གིས་ཀྱང་ཉན་པ་དང༌། གསལ་བ་དང༌། ཐམས་ཅད་དུ་ཐོས་པ་དང། ཐམས་ཅད་ཀྱི་སྐད་དུ་གོ་བ་དང༌། ཆོས་ཀྱི་སྒོ་མོ་མཐའ་ཡས་པ་དུས་གཅིག་ལ་སྟོན་པར་བསམས་ལ། །བ་ཏོན་བྱ་བའམ་ཀླག་པ་ཡང་རུང་སྟེ། ཟབ་པ་དང་དོན་དམ་པ་སྤྲོས་པ་དང་བྲལ་བ་སྟོན་པ་དང༌། རྒྱ་ཆེ་བ་ཐམས་ཅད་ཕུན་སུམ་ཚོགས་པ་སྟོན་པའོ། །ནི་ཞེས་བྱ་བ་ནི་བསྣན་པའམ་གོ་རིམས་བཟློག་པའོ། །ད་ནི་གཤེགས་སུ་གསོལ་བར་བྱ་སྟེ། དེ་ཡང་དེ་རྗེས་མདུན་གྱི་ལྷ་འཇམ་དཔལ་འཁོར་དང་བཅས་པ་དང་སངས་རྒྱས་དང་བྱང་ཆུབ་སེམས་དཔའ་ལ་སོགས་པ་རྣམས་ཏིང་ངེ་འཛིན་གྱིས་གསལ་བར་ནི་མཆོད་པ་དང་ནི་བསྐོར་བ་དང༌། ཕྱག་བྱ་བ་དང། བསྟོད་པ་བྱས་པར་བསམས་ནས་ཡི་གེ་བརྒྱ་པའི་བཤགས་པ། ཨོཾ་བཛྲ་ས་ཏྭ་ས་མ་ཡ། མ་ནུ་པཱ་ལ་ཡ། བཛྲ་ས་ཏྭ་ཏྭེ་ནོ་པ་ཏི་ཥྛ། དྲྀ་ཌྷོ་མེ་བྷ་ཝ། སུ་ཏོ་ཥྱོ་མེ་བྷ་ཝ། ཨ་ནུ་ར་ཀྟོ་མེ་བྷ་ཝ། སུ་བོ་ཥྱྸོ་མེ་བྷ་ཝ། སརྦ་སིདྡྷི་མྨེ་བྲ་ཡ་ཙྪ། སརྦ་ཀ་རྨ་སུ་ཙ་མེ་ཙི་ཏྟཾ་ཤྲེ་ཡཿ་ཀུ་རུ་ཧཱུཾ། ཧ་ཧ་ཧ་ཧ་ཧོ་བྷ་ག་ཝཱ་ན། སརྦ་ཏ་ཐཱ་ག་ཏ། བཛྲ་མཱ་མེ་སུ་ཉྩ། བི་ཛྲཱ་བྷ་བ། མ་ཧཱ་ས་མ་ཡ་ས་ཧྭ་ཨཱཿ་ཞེས་བྱ་བ་བཟླས་ལ། དེ་ནས་གཤེགས་སུ་གསོལ་བ་ནི་ཨོཾ་བཛྲ་མུཿ་ཞེས་བྱའོ། །ཇི་ལྟར་ཞེ་ན་ཐམས་ཅད་རང་རང་གི་གནས་སུ་གཤེགས་པ་ནི་དགྱེས་ནས་སྙན་ངག་དང་བཅས་པས་གཤེགས་པར་བསམ་མོ། །འོ་ན་བདག་ཉིད་ལྷའི་འཁོར་དང་བཅས་པ་ཅི་ལྟ་བུ་ཞེ་ན། བསྐྱེད་པའི་ལྷ་མོ་བཞི་བོ་ནི་སྙིང་གའི་འཁོར་ལོ་ཡི་གེ་རང་རང་གི་ས་བོན་དུ་གྱུར་པ་ར་དང༌། པ་དང༌། ཙ་དང༌། ན་ལ་བསྡུའོ། །འཁོར་ལོ་རྩིབས་བརྒྱད་ཀྱི་ཡི་གེ་བརྒྱད་པོ་ནི་ལྟེ་བའི་ཨོཾ་ལ་བསྡུ་བར་བྱའོ། །དེ་ནས་ཨོཾ་ལས་བསྡུས་པས་ཨོཾ་
ལས་འོད་བྱུང་སྟེ་ལུས་ཐམས་ཅད་ལ་འོད་ཀྱིས་ཁྱབ་ནས་དེ་ཡང་སླར་འདུས་པས་ཨོཾ་ཉིད་ལ་འོད་དང་ལུས་སུ་བཅས་པ་ཐིམ་ནས་ཨོཾ་ཉིད་ཀྱང་འོད་དུ་ཞུ་སྟེ། ཆོས་ཐམས་ཅད་སྟོང་པ་ཉིད་ཀྱི་རང་བཞིན་ཏེ་གཟུང་བ་དང་འཛིན་པ་སྟོང་པ་སྟོང་པ་ཉིད་རྣམ་པར་ཐར་བའི་སྒོ་དང༌། རྒྱུ་མཚན་དང་བྲལ་བ་མཚན་མ་མེད་པའི་སྒོ་དང༌། འབྲས་བུ་རེ་རེ་སྨོན་པ་མེད་པས་སྨོན་པ་མེད་པ་རྣམ་པར་ཐར་པའི་སྒོ་གསུམ་དང་ལྡན་པར་བསམ་མོ། །ལས་ཀྱི་རིམ་པ་གང་བྱེད་ཀྱང་སྔོན་འགྲོའི་ཆོ་ག་གཏོར་མ་འདི་ཡིན་ལ། འདི་རྩོམ་པའི་གང་ཟག་ལ་ཕན་ཡོན་ནི་ཤེས་བྱ་དང་ཉོན་མོངས་པའི་སྒྲིབ་པ་གཉིས་བྱང༌། བསོད་ནམས་དང་ཡེ་ཤེས་ཀྱི་ཚོགས་གཉིས་རྫོགས་ནས་བླ་ན་མེད་པའི་བྱང་ཆུབ་ཆེན་པོ་ནི་ཤིན་ཏུ་མྱུར་བར་ཐོབ་པར་འགྱུར་རོ། །སྲིད་པ་ཉིད་གཏི་མུག་གི་དགོན་པ་སྟེ་ཆོས་ཀྱིས་དཔེན་པ་ཡིན་ལ། དེས་ན་རྣལ་འབྱོར་པ་རྣམས་ཀྱང་ལམ་གྱི་རབ་གསང་སྔགས་ཀྱི་ལམ་སྟོར་ན་གཞན་རྣམས་ལྟ་ཅི་སྨོས་ཞེས་བྱའོ། །ལམ་སྟོར་བ་རྣམས་ལ་དེ་བསྟན་པའི་དོན་དུ་བདག་གིས་ལམ་འདི་བརྩམས་པས་འགྲོ་བ་སེམས་ཅན་ཚད་མེད་གཞལ་དུ་མེད་པ་གྲོལ་བར་ཤོག་ཅིག་པའོ། །རྒྱུད་དང་སློབ་དཔོན་དགོངས་པ་དང༌། །ཀླུ་སྒྲུབ་ལ་སོགས་མན་ངག་དང༌། བླ་མ་བརྒྱུད་པའི་རིམ་པ་རྣམས། །མི་འགལ་ཚུལ་དུ་བརྩམས་པ་ཡིན། །འདི་དོན་མ་རྟོགས་གང་ཟག་རྣམས། །ལམ་གྱི་སྒྲོན་མས་དགའ་བྱའི་ཕྱིར། །ཆོས་ཀྱི་རྒྱལ་མཚན་གུས་པ་ཡིས། །རྡོ་རྗེ་བདག་གིས་འབད་དེ་བྲིས། །བཀྲ་ཤིས་མར་མེ་བརྩོམས་པ་བཤད་པའི་དགེ་བ་འདིས། །རྨོངས་པས་དེ་དོན་རྟོགས་ཤིང་འཇམ་དཔལ་གྲུབ་པར་ཤོག །བླ་མ་དམ་པ་ཡུན་རིང་བསྟེན་ཅིང་གཞན་འགྲོལ་ཤོག །གཞན་རྒྱུད་པ་ཀྲོལ་པས་འགྲོ་རྣམས་འཇམ་དཔལ་ཉིད་ཐོབ་ཤོག །གཏོར་མ་ཆེན་པོའི་ལས་ཀྱི་རིམ་པའི་འགྲེལ་བ་སློབ་དཔོན་རྡོ་རྗེ་མི་བསྐྱོད་པས་མཛད་པ་རྫོགས་སོ།། །།རྒྱ་གར་གྱི་མཁན་པོ་བཛྲ་ཀཱི་རྟི་དང་བོད་ཀྱི་ལོ་ཙཱ་བ་དགེ་སློང་དགེ་བའི་བློ་གྲོས་ཀྱིས་བསྒྱུར་ཅིང་ཞུས་ཏེ་གཏན་ལ་ཕབ་པའོ།།