དམ་ཚིག་ཐམས་ཅད་བསྡུས་པ་ཞེས་བྱ་བ།
རྒྱ་གར་སྐད་དུ། སརྦ་ས་མ་ཡ་སཾ་གྲ་ཧནཱ་མ། བོད་སྐད་དུ། དམ་ཚིག་ཐམས་ཅད་བསྡུས་པ་ཞེས་བྱ་བ། བཅོམ་ལྡན་འདས་དཔལ་རྡོ་རྗེ་སེམས་དཔའ་ལ་ཕྱག་འཚལ་ལོ། །ཨོཾ་ཨཱཿཧཱུཾ། རྡོ་རྗེ་མི་ཕྱེད་གསུམ་བདག་ཉིད། །དཔལ་ལྡན་བདེ་ཆེན་རྡོ་རྗེ་ལ། །བཏུད་དེ་གསང་སྔགས་ཐེག་པའི་གཞུང༌། །རྒྱུད་ལས་གསུངས་པ་བྲི་བར་བྱ། །བྱང་ཆུབ་སེམས་དཔའ་གསང་སྔགས་ཀྱི་སྒོར་ཞུགས་པས་འདི་ལྟར་ཤེས་པར་བྱའོ། །ཐེག་པ་ཆེན་པོའི་ཡང་ཆེན་པོ་འདི་འོག་མ་རྣམས་ལས་ཁྱད་པར་དུ་འཕགས་ཏེ། ཇི་ལྟར་ཞེ་ན། འདི་སྐད་དུ་འཕགས་པ་ཀླུ་སྒྲུབ་ཀྱི་ཞལ་སྔ་ནས་ཐམས་ཅད་ཆོས་ཀྱི་སྐུར་རྟོགས་པས་ཀུན་དུ་བཟང་པོའི་རྒྱས་ཐེབས་པ་དང་འཇིག་རྟེན་གྱི་ལྷ་ཆེན་པོ་དམ་ཚིག་ཅན་འཁོར་དང་བཅས་པས་བཀུར་གནས་བྱེད་པས་བྱིན་གྱིས་བརླབས་དང་ལྡན་པ་དང༌། དུས་གསུམ་གྱི་སངས་རྒྱས་སྲས་དང་བཅས་པས་ཐུགས་ལ་དགོངས་ཤིང་བྱིན་གྱིས་བརླབས་པས་དངོས་གྲུབ་མྱུར་བ་དང༌། བདེ་བར་གཤེགས་པ་རྣམས་དང་སྤྱོད་ཡུལ་གཅིག་པས་འཁོར་བ་དང་ངན་སོང་གི་འཇིགས་པ་དང་བྲལ་ཞིང་དབུགས་ཕྱིན་པ་དང༌། རྡོ་རྗེ་བྱང་ཆུབ་ཀྱི་སེམས་དང་ལྡན་ཞིང་སྐུ་དང་གསུང་དང་ཐུགས་མི་ཕྱེད་པས་བར་དུ་གཅོད་པ་གང་ཡང་མེད་པ་དང༌། ཕྱི་ནང་ཐམས་ཅད་རང་བཞིན་གྱིས་རྣམ་པར་དག་པར་ཡིད་ཆེས་པས་དམ་ཚིག་ཉམས་པར་མི་འགྱུར་བ་དང༌། གལ་ཏེ་ཉམས་ན་ཡང་རང་བཞིན་གྱིས་སྐོད་པར་འགྱུར་བའི་ཁྱད་པར་རོ་ཞེས་གསུངས་སོ། །ཡང་སློབ་དཔོན་ཆེན་པོ་ཨིནྡྲ་བྷཱུ་ཏིའི་ཞལ་སྔ་ནས་བླ་མའི་ཁྱད་པར་དང་སྣོད་ཀྱི་ཁྱད་པར་དང་ཆོ་གའི་ཁྱད་པར་དང་ལས་ཀྱི་ཁྱད་པར་དང་དམ་ཚིག་གི་ཁྱད་པར་དང༌། ལྟ་བའི་ཁྱད་པར་དང་སྤྱོད་པའི་ཁྱད་པར་ཏེ་བདུན་གྱིས་འཕགས་སོ་ཞེས་གསུངས་སོ། །སློབ་དཔོན་ཆེན་པོ་ཡེ་ཤེས་ཞབས་ཀྱི་ཞལ་སྔ་ནས་སྔགས་ཀྱི་ཐེག་པ་ནི་རྣམ་པ་གསུམ་གྱིས་ཐུན་མོང་མ་ཡིན་ཏེ། འདི་ལྟར་སྒྲུབ་པ་པོ་དང་ལམ་དང་འབྲས་བུ་གསུམ་མོ་ཞེས་གསུངས་སོ། །སློབ་དཔོན་ཏྲི་པི་ཏ་ཀ་མ་ལའི་
ཞལ་སྔ་ནས་ནི། དོན་གཅིག་ན་ཡང་མ་རྨོངས་དང༌། །ཐབས་མང་དཀའ་བ་མེད་པ་དང༌། །དབང་པོ་རྣོན་པོའི་དབང་བྱས་པས། །སྔགས་ཀྱི་ཐེག་པ་ཁྱད་པར་འཕགས། །ཞེས་གསུངས་སོ། །སློབ་དཔོན་ཌོཾ་བི་ཧེ་རུ་ཀའི་ཞལ་ནས་ཀྱང་འདི་ནི་སྣོད་ཀྱི་ཁྱད་པར་དང་སྣོད་དུ་བྱེད་པའི་ཆོ་ག་དང་གཞུང་དང༌། ལམ་གྱི་ཁྱད་པར་དང་འབྲས་བུའི་ཁྱད་པར་གྱིས་སྔགས་ཀྱི་ཐེག་པ་ཁྱད་པར་འཕགས་ཞེས་གསུངས་པ་དང༌། གཞན་ཡང་རྡོ་རྗེ་དྲིལ་བུ་པའི་ཞལ་ནས་ཀྱང་གསང་སྔགས་ཀྱི་ཐེག་པ་ནི་ཐེག་པ་ཆེན་པོའི་ཡང་ཆེན་པོ་ཡིན་ཏེ། འདི་ལྟར་རྟེན་གྱི་གང་ཟག་གི་ཁྱད་པར་དང༌། འཇུག་པ་ལམ་གྱི་ཁྱད་པར་དང༌། མཐར་ཐུག་པ་འདྲས་བུའི་ཁྱད་པར་དང༌། །མངོན་པར་འབྱུང་བའི་ཁྱད་པར་རོ་ཞེས་གསུངས་སོ། །སློབ་དཔོན་རཏྣ་ཨཱ་ཀ་ར་ཤཱནྟི་པའི་ཞལ་སྔ་ནས་འདིར། དམིགས་པ་རྣམ་པར་དག་པ་དང༌། །གྲོགས་ཀྱི་མཐུ་དང་སྤྱོད་པ་ཡིས། །བློ་ལྡན་རྣམས་ཀྱི་ཐེག་པ་འདི། །ཆེན་པོའི་ཆེན་པོ་ཉིད་དུ་བསྒྲགས། །ཞེས་གསུངས་སོ། །བདག་གི་བླ་མ་རྗེ་བཙུན་དམ་ཚིག་རྡོ་རྗེའི་ཞལ་ནས་ནི་ཕ་རོལ་ཕྱིན་པའི་ཐེག་པ་ལས་ཐེག་པ་འདི་གོང་དུ་གྱུར་པ་ཡིན་ཏེ་བླ་མ་དང་དབང་བསྐུར་བ་དང་དམ་ཚིག་དང་མན་ངག་དང་བརྩོན་འགྲུས་ཀྱིས་ཁྱད་པར་དུ་འཕགས་སོ་ཞེས་གསུངས་སོ། །དེ་ལ་འདིར་དམ་ཚིག་འབའ་ཞིག་བརྗོད་པར་བྱ་སྟེ། དམ་ཚིག་ནི་སྔགས་པ་རྣམས་ཀྱི་གནས་སུ་གྱུར་པ་དང་ཐེག་པ་ཆེན་པོའི་ཆོས་ཀྱི་ལོ་ཏོག་སྐྱེ་བའི་ས་གཞིར་གྱུར་པ་ཡིན་པས་དེ་བྲི་བར་བྱའོ། །དམ་ཚིག་རྣམས་ཀྱང་གང་ཞེ་ན། རྟེན་དང་རྒྱུ་དང་རྩ་བ་དང་ངོ་བོ་དང་ངེས་པའི་ཚིག་དང་དབྱེ་བ་དང་མིང་གི་རྣམ་གྲངས་དང་རྐང་གྲངས་དང་བརྡ་དང་བདུད་དང་དགྲ་དང་ཉམས་པའི་ཚད་དང་སྐོང་བ་དང༌། མ་ཉམས་པའི་རྟགས་དང་བསྐང་བ་དང་བསྔོ་བགྲང་བྱ་བ་དང་བསྐངས་པ་དང་བསྡུས་པའི་དམ་ཚིག་དང་ཉམས་པའི་ཉེས་དམིགས་དང་མ་ཉམས་པའི་ཕན་ཡོན་དང་འབྲས་བུ་རྣམས་སོ། །དེས་ན་རྟེན་ནི་ཐེག་པ་ཆེན་པོའི་རིགས་ཅན་སྐྱབས་སུ་འགྲོ་བ་གཉིས་སྔོན་དུ་སོང་བ་བླ་ན་མེད་པ་བྱང་ཆུབ་ཀྱི་སེམས་བསྐྱེད་པ་དཀྱིལ་འཁོར་དུ་ཞུགས་ཤིང་དབང་བསྐུར་བ་ཐོབ་པའོ། །དེ་ལ་རྒྱུ་
ནི་བྱང་ཆུབ་ཀྱི་སེམས་སོ། །རྩ་བ་ནི་སྙིང་རྗེའོ། །ངོ་བོ་ནི་ངོ་ཚ་ཤེས་པ་དང་ཁྲེལ་ཡོད་པ་དང༌། སྙིང་རྗེ་དང་ཤེས་རབ་མཚུངས་པར་ལྡན་པ་ཤེས་པའི་རྒྱུན་ནོ། །ངེས་ཚིག་ནི་རྟོགས་པའི་ཕྱིར་རམ། མཉམ་པ་ཉིད་དུ་འགྲོ་བའི་ཕྱིར་རམ། ཐོབ་ཅིང་མི་འདའ་བའི་ཕྱིར་རོ། །དེ་ལ་དབྱེ་བ་ནི་རྩ་བ་དང་སྦོམ་པོ་དང་ཡན་ལག་གི་སྒོ་ནས་དབྱེ་བ་དང་བསྲུང་བ་དང་བསྒྲུབ་པའི་སྒོ་ནས་དབྱེ་བ་དང་སྤྱོད་པ་དང་ལྟ་བའི་སྒོ་ནས་དབྱེ་བ་དང་སྤྱི་དང་ཁྱད་པར་དང་ལྷག་པའི་སྒོ་ནས་དབྱེ་བ་དང་ཐུན་མོང་དང་ཐུན་མོང་མ་ཡིན་པའི་སྒོ་ནས་དབྱེ་བ་དང༌། རགས་པ་དང་ཕྲ་བའི་སྒོ་ནས་དབྱེ་བ་དང༌། བསྲུང་བར་བྱ་བ་དང་ཉམས་སུ་བླང་བ་དང་སྤྱད་པར་བྱ་བ་དང་སྤྱོད་ལམ་དང་ཐུན་མོང་མ་ཡིན་པའི་སྒོ་ནས་དབྱེ་བའོ། །དེ་ལ་མིང་གི་རྣམ་གྲངས་ནི་དམ་ཚིག་དང་སྡོམ་པ་དང་བརྟུལ་ཞུགས་དང་སྤྱོད་ཡུལ་དང་དཀའ་སྤྱད་དང་སྤྱོད་པ་དང་ཤཱི་ལ་ལ་སོགས་པའོ། །དེ་ལ་རྐང་གྲངས་ནི་ཐུན་མོང་གི་རྩ་བའི་ལྟུང་བ་བཞི་དང་ཕ་རོལ་ཏུ་ཕྱིན་པའི་རྩ་བའི་ལྟུང་བ་བཅུ་གཉིས་དང་ཀྲྀ་ཡའི་རྒྱུད་ཀྱི་རྩ་བའི་ལྟུང་བ་བཅུ་གསུམ་དང༌། སྤྱོད་པའི་རྒྱུད་ཀྱི་རྩ་བའི་ལྟུང་བ་བཅུ་བཞི་དང་རྣལ་འབྱོར་གྱི་རྒྱུད་ཀྱི་རྩ་བའི་ལྟུང་བ་བཅུ་བཞི་དང༌། རྣལ་འབྱོར་ཆེན་པོའི་རྒྱུད་ཀྱི་རྩ་བའི་ལྟུང་བ་བཅུ་བཞི་དང༌། ཡང་ལྔ་དང་ཡང་བཞི་དང༌། རྩ་བའི་ལྟུང་བ་བདུན་ཅུ་ཐམ་པའོ། །དེ་ལ་ཡན་ལག་གི་དམ་ཚིག་རྣམས་ནི་འདི་རྣམས་སོ་ཞེས་བགྲང་བར་མི་ནུས་ཏེ། མདོ་སྡེ་དང་མངོན་པ་དང་འདུལ་བ་དང་རྒྱུད་སྡེ་རྣམས་སུ་བལྟ་བར་བྱའོ། །དེ་ལ་དམ་ཚིག་གི་བརྡ་ནི་ཇི་སྐད་དུ། མི་ཤིགས་པ་ནི་སེང་གེ་སྟེ། །གཅན་གཟན་རྒྱལ་པོ་ཡིན་པས་སོ། །ཟ་མ་ཏོག་ནི་རྒྱལ་མོའི་མཛོད། །དུག་སྤྱོད་པ་ནི་དེར་མི་རིགས། །རཏྣ་མྱུ་གུ་ལྕུག་ཕྲན་དག །བྲེགས་ཏེ་འབྱུང་རྒྱུན་གཅད་མི་བྱ། །གངས་ཀྱི་ཞུ་ཆུ་ཕལ་བ་ཡང༌། །མཁས་པས་བཏུང་བར་མི་བྱའོ། །པདྨའི་ཟེའུ་འབྲུ་ཁ་མ་བྱེ། །ཟླ་ཟེར་མ་ཡིན་དབྱེ་མི་བྱ། །མ་བརྟགས་བུག་རྡོལ་ཅན་སྣོད་དུ། །བདུད་རྩི་སྨན་བླུགས་ཟགས་པར་འགྱུར། །དོན་མེད་བཅོས་པའི་ཚུལ་རྟགས་ཅན། །བསྲེལ་ཞིང་སྤྱད་པར་བྱ་བ་མིན། །ཤེལ་དཀར་རཏྣ་སྒོ་ང་དང༌། །འདམ་རྫབ་ཁུང་དུ་ནུབ་མི་བྱ། །སེང་
གེ་དཀར་མོའི་འོ་མ་དག །གསེར་སྣོད་མ་ཡིན་བླུགས་མི་བྱ། །ཡིད་བཞིན་ནོར་བུ་རིན་པོ་ཆེ། །བསྲེག་པར་བྱ་བ་ཡོང་མ་ཡིན། །ཁྱུང་ཆེན་གཤོག་པ་གར་བརྐྱང་བ། །དེ་དག་བཅག་པར་བྱ་བ་མིན། །གནམ་ལྕགས་མེ་ཡི་དུར་མོ་དག །བརྡབ་པར་བྱ་བ་མ་ཡིན་ནོ། །རྡོ་རྗེ་དྲག་ཆེན་གཏམས་པའི་གཞི། །གཞིག་པར་བྱ་བ་གལ་ཡིན། །བུད་ཤིང་བསྲེགས་པའི་སྒྲོན་མེ་དེ། །འཐོར་རླུང་དྲག་པོས་བསྐྱོད་མི་བྱ། །རྡོ་རྗེ་ཚིག་གི་ཆུ་རྒྱུན་དག །འོལ་ཀ་བཀག་པར་བྱ་བ་མིན། །རྒྱལ་པོ་བཀའ་རྟགས་ཕྱག་རྒྱ་དག །ནམ་ཡང་བཤིག་པར་མི་བྱའོ། །གཙུག་གི་ཡིད་བཞིན་ནོར་བུ་དེ། །རྒྱལ་མཚན་རྩེ་ལས་དབྲོག་མི་བྱ། །ཞེས་གསུངས་པས། །ཟླ་བའི་དམ་ཚིག་ཀྱང་བརྡར་གསུངས་ཏེ། དཔལ་དགྱེས་པ་རྡོ་རྗེ་ལས་ཙའུ་ས་མ་ཡ། ཀསྤུར། སིཧླ། ཀབྤུ་ར། བཱ་ལ་ཞེས་པ་དང༌། སྙོམས་འཇུག་གི་དམ་ཚིག་ཀྱང་པོ་ལ། ཀ་ཀྐོ་ལ། ཀུན་དུ་རུ་ཞེས་གསུངས་སོ། །རྩ་བའི་ལྟུང་བ་བཅུ་བཞི་ཡང་བརྡར་གསུངས་ཏེ། དཔལ་དུས་ཀྱི་འཁོར་ལོ་ལས། རི་བོང་ཅན་དང་མིག་དང་ཡོན་ཏན་རིག་བྱེད་དང༌། །མདའ་དང་དབང་པོ་རི་དང་བཀྲ་ཤིས་གཟའ་དང་ཕྱོགས། །དྲག་པོ་ཉི་མ་ཡན་ལག་ས་རྣམས་ཡིན། །ཞེས་གསུངས་པ་ལྟ་བུའོ། །དེ་ལ་དམ་ཚིག་གི་བདུད་ནི་རྣམ་རྟོག་འཁྲིག་པའི་བདུད་དང༌། བཏང་སྙོམས་ལེ་ལོའི་བདུད་དང༌། ལོངས་སྤྱོད་གཡེང་བའི་བདུད་དང༌། ཚིག་རྩུབ་མཚོན་ཆའི་བདུད་དང༌། ཁྲོ་གཏུམ་འཁྲུག་པའི་བདུད་དེ། །དེ་ལ་དམ་ཚིག་དགྲ་ནི་གསང་བ་འཕེལ་བས་བཅོས་དཀར་སོང་བའི་དགྲ་དང་ཆོས་ལོག་པར་སྤྱད་པས་བར་ཆད་འོང་བའི་དགྲ་དང་རྩ་བ་བྱུང་བས་ཆད་པ་ཆེན་པོ་འབྱུང་བའི་དགྲ་དང༌། སྒྲུབ་པ་མི་བརྩོན་པས་དགེ་བ་འཕྲོག་པའི་དགྲའོ། །དེ་ལ་དམ་ཚིག་གི་ཉམས་པའི་ཚད་ནི་ཉམས་པ་ཆེ་ཆུང་གི་ཚད་དང་དུས་ཀྱི་ཚད་དོ། །དེ་ལ་ཉམས་པ་ཆེ་ཆུང་གི་ཚད་ནི་ཀུན་དུ་ཉམས་པ་ཆེན་པོ་དང་རྩ་བ་ཉམས་པ་དང༌། ཡན་ལག་ཉམས་པ་དང་ཟླས་ཉམས་པ་དང་ཞར་ལ་ཉམས་པའོ། །དེ་ལ་དང་པོ་བླ་མའི་དམ་ཚིག་ནི་དེ་བསྐྲོངས་པ་དང་དེ་ལ་མཚོན་ལ་སོགས་པས་བརྒྱབ་པ་དང་སྐུ་ལ་སྨད་པ་དང་འཁུས་པ་དང་བརྙས་པ་དང་འཁོན་པ་དང་
བཀའ་བཅག་པ་དང་ངན་སེམས་དང་འཕྱ་བ་ལ་སོགས་པའོ། །རྡོ་རྗེ་སྤུན་ཕོ་མོའི་དམ་ཚིག་ནི་དེ་བསད་པ་དང་འཁུས་པ་དང་བརྡེགས་པ་དང་ནོར་རྫས་དང་ཆུང་མ་ལ་སོགས་པ་ཕྲོགས་པ་དང༌། ལྐོག་ཁ་དང་ངོར་ཁ་དང་མན་དུར་དང་བརྙས་པ་དང་མཚང་འདྲུ་བ་དང་ངན་སེམས་དང་འཁོན་པ་དང་བརྩེ་གདུང་མེད་པ་ལ་སོགས་པའོ། །གཞན་ཡང་བྱང་ཆུབ་ཀྱི་སེམས་གཏན་སྤངས་པ་ནི་ཀུན་དུ་ཉེས་པ་ཆེན་པོའོ། །དེ་ལ་རྩ་བའི་ལྟུང་བ་བདུན་ཅུ་ལས་བླ་མ་དང་རྡོ་རྗེ་སྤུན་དང་བྱང་ཆུབ་ཀྱི་སེམས་མ་གཏོགས་པ་དྲུག་ཅུ་རྩ་གསུམ་ཉམས་པ་དང༌། གཞན་ཡང་རང་གིས་དབང་མ་ཐོབ་པར་གཞན་ལ་བསྐུར་བ་དང་མི་ཤེས་པར་དཀྱིལ་འཁོར་འདྲི་བ་དང༌། རབ་གནས་དང་སྤྱིན་སྲེག་དང་ཚོགས་ཀྱི་འཁོར་ལོར་ཞུགས་པ་དང༌། གསང་སྔགས་རང་ཤེས་སུ་བླ་མ་མེད་པར་སྤྱོད་པ་དང་ཐུན་མཚམས་ཀྱི་རྣལ་འབྱོར་ཆགས་པ་དང་ལྷ་དང་བླ་མ་ལ་མཆོད་པ་དུས་སུ་ཆགས་པ་དང་མི་དགེ་བ་བཅུ་དང་མཚམས་མེད་པ་ལྔ་དང་ཉེ་བའི་མཚམས་མེད་པ་ལྔ་དང༌། དམ་པའི་ཆོས་སྤོང་བ་དང་འཕགས་པ་ལ་སྐུར་པ་འདེབས་པ་དང་རང་གི་གསང་བ་བཞི་པོ་བག་མེད་པར་གཞན་ལ་སྨྲ་བ་དང་ངོ་ཚ་མེད་པ་དང་ཁྲེལ་མེད་པས་སྡིག་པ་ཅི་ལ་ཡང་མི་འཛེམ་པ་རྣམས་ནི་རྩ་བའི་ལྟུང་བ་ཞིག་རལ་དུ་འགྱུར་རོ། །དེ་ལ་རྩ་བའི་ཡན་ལག་ཏུ་གྱུར་པ་ཡང་ལག་གི་ལྟུང་བ་བདུན་དང་བཅོ་ལྔ་ལ་སོགས་པ་སྤྱིར་བཞི། བར་སྐབས་བཞི། གསང་བ་ཉེ་བར་གཏད་པ་བཞི། གསང་བར་འོས་པའོ། །སྔགས་ཀྱི་རྒྱུད་ལ་སོགས་པ་ནས་གསུངས་པ་ཇི་སྙེད་པ་རྣམས་དང༌། གཞན་ཡང་གཟུགས་སྐུ་དང་པོ་ཏི་དང་རྡོ་རྗེ་དྲིལ་བུ་དང་ཕུར་བུ་འཇོམས་པ་དང་འཚོང་བ་དང་འགོམ་པ་དང་མཆོག་ཏུ་ཡི་དམ་ལྷའི་སྐུ་དང༌། གླེགས་བམ་དང་ཕྱག་རྒྱ་རྣམས་སྤྱིན་པ་དང་འཚོང་བ་ལ་སོགས་པ་རྣམས་ནི་ཡན་ལག་གི་ལྟུང་བ་ཞིག་རལ་དུ་འགྱུར་རོ། །དེ་ལ་བྱང་ཆུབ་ཀྱི་སེམས་གཏན་སྤངས་ཏེ་རྩ་བ་མང་དུ་བྱུང་བ་ནི་ཀུན་དུ་ཉོན་མོངས་པ་ཆེན་པོའོ། །དེ་མ་ཤོར་ཡང་རྩ་བའི་ཉེས་པ་གཅིག་གམ་འགའ་བྱུང་བ་ནི་རྩ་བ་ཉམས་པའོ། །རྩ་བ་མ་ཤོར་བ་ཡང་ཉེས་པ་གཞན་བྱུང་བ་ནི་ཡན་ལག་ཉམས་པའོ། །བླ་མ་ངན་པ་དང་གྲོགས་ངན་
པས་ཉེས་པ་བྱུང་ན་ནི་ཟླས་ཉམས་པའོ། །མི་ཤེས་པ་དང་མ་གུས་པ་དང་བག་མེད་པ་དང་ཉོན་མོངས་པ་ཆེ་བས་ཉེས་པ་བྱུང་བ་ནི་ཞར་ལ་ཉམས་པའོ། །དེ་ལ་དུས་ཀྱིས་ཉམས་པ་ནི་བརྩོན་པ་རབ་ཀྱི་རབ་ཀྱིས་ནི་ཉེས་པ་བྱུང་བའི་རྗེས་ཉིད་ལ་མ་བསྐངས་ན་ཉམས་སོ། །རབ་ཀྱི་འབྲིང་གིས་སྔ་དྲོ་ཉི་མ་ཕྱེད་དང་ཕྱེད་ཀྱི་ཕྱེད་དང་དགོངས་ཀ་དང་དེ་བཞིན་དུ་དུས་སུ་མ་བསྐངས་ན་ཉམས་སོ། །རབ་ཀྱི་ཐ་མས་ནི་ཉིན་པར་ཉེས་པ་མཚན་མོ་ལ། མཚན་མོའི་ཉེས་པ་ཉིན་པར་མ་བསྐངས་ན་ཉམས་སོ། །འབྲིང་གི་རབ་དང་འབྲིང་གི་འབྲིང་དང་འབྲིང་གི་ཐ་མ་ནི་ཞག་བདུན་དང་དུས་ཁྱད་པར་ཅན་དང་ཞག་ཉི་ཤུ་རྩ་གཅིག་ཚུན་ཆད་དུ་མ་བསྐངས་ན་ཉམས་སོ། །ཐ་མའི་རབ་དང་ཐ་མའི་འབྲིང་དང་ཐ་མའི་ཐ་མས་ནི་ཟླ་བ་གཅིག་དང་ཟླ་བ་བདུན་དང་ཟླ་བ་བཅུ་གཉིས་ཚུན་ཆད་དུ་མ་བསྐངས་ན་ཉམས་སོ། །ཤིན་ཏུ་དམན་པས་ཀྱང་སྐྱེ་བ་འདི་ལ་ཉམས་པ་ལུས་པ་ལས་འཆི་ཀར་སྐོང་ན་དེ་བསྐངས་པ་ལས་དེ་མ་བསྐངས་ན་ཉམས་སོ། །དེ་ལ་དམ་ཚིག་མ་ཉམས་པའི་རྟགས་ནི་གདུང་ཤ་རཱི་རམ་དང་ཁྲེལ་མ་ཁྲེལ་དང་རྨི་ལམ་དང་བར་ཆད་མང་ཉུང་ལས་བརྟག་པར་བྱའོ། །དེ་ལ་དམ་ཚིག་བསྐང་བ་ནི་སོ་སོ་དང་ཐུན་མོང་གིའོ། །དེ་ལ་སོ་སོར་བསྐང་བ་ནི་སྤྱོད་པ་རླབས་པོ་ཆེ་ཚ་ཚ་དང་སྤྱིན་སྲེག་དང་གཏོར་མ་དང་ཡན་ལག་བདུན་པ་དང་ཆོས་སྤྱོད་བཅུ་དང་ཚོགས་ཀྱི་ཙཀྲ་དང་ཉེའུ་འདོན་པ་དང་དགེ་འདུན་ལ་ཆོས་སྟོན་ཡོན་དང་བཅས་པ་དང༌། སྒྲུབ་པ་ཆེན་པོའི་གཞི་བཟུང་བ་དང་གཟུགས་ཁྱད་པར་ཅན་དང་རང་གི་ལྷའི་སྙིང་པོ་བཟླས་བརྗོད་བྱ་བ་ནི་འབུམ་ཕྲག་ལྔ་དང་ཁྲི་ཕྲག་གསུམ་དང་ཁྲི་ཕྲག་ལྔ་དང་སྟོང་ཕྲག་གསུམ་དང་སྟོད་ཕྲག་ལྔ་དང་བརྒྱ་ཕྲག་གསུམ་དང་བརྒྱ་ཕྲག་ལྔ་དང་བཅུ་ཕྲག་གསུམ་དང་བཅུ་ཕྲག་ལྔ་དང་ཉི་ཤུ་རྩ་གཅིག་སྟེ་ཉམས་པ་ཆེན་པོ་ལ་སོགས་པ་ལྡ་དང་རིམ་པ་བཞིན་དུ་སྦྱར་རོ། །གཞན་ཡང་རྡོ་རྗེ་སློབ་དཔོན་གྱི་ཉམས་ན་སླར་ཡང་དཀྱིལ་འཁོར་དུ་འཇུག་པར་བྱ་བ་དང། རྡོ་རྗེ་སྤུན་གྱི་དམ་ཚིག་ཉམས་པ་ན་ཚོགས་ཀྱི་ཙཀྲ་ལ་སོགས་པ་སྟེ་ཉེས་པ་སོ་སོར་བསྐང་བའི་ཐབས་སོ་སོར་ཇི་ལྟར་བཤད་པ་བཞིན་དུ་བསྐང་བར་བྱའོ། །དེ་ལ་ཐུན་མོང་གི་བསྐང་བ་ནི་བཤགས་
པ་དང་སྦྱང་བ་དང་སླར་བླང་བའོ། །གཞན་ཡང་གོང་དུ་བཤད་པའི་དགེ་བའི་ལས་ཀྱིས་བསྐང་བ་དང་རྫས་ཀྱིས་བསྐང་བ་དང་དོན་གྱིས་བསྐང་བ་དང་ཏིང་ངེ་འཛིན་གྱིས་བསྐང་བ་དང་གསང་བའི་ཐབས་ཀྱིས་བསྐང་བའོ། །དེ་ལ་དང་པོ་གོང་དུ་བཤད་དོ། །གཉིས་པ་ནི་བླ་མ་སྤྱན་དྲངས་ནས་རིན་པོ་ཆེ་དང་རྫས་ཁྱད་པར་ཅན་ཕུལ་ནས་ཉེས་པ་བཤགས་ཏེ། དཀྱིལ་འཁོར་དུ་ཞུགས་ནས་རྫས་དེ་དག་སླར་སླུ་བའི་ཚུལ་དུ་བླ་མ་ལས་དམ་ཚིག་བསླང་བར་བྱའོ། །གསུམ་པ་ནི་ཆོས་ཐམས་ཅད་ནམ་མཁའ་ལྟར་རྣམ་པར་དག་པས་བསྒོམ་པ་དང་ཆོས་ཟབ་མོ་ཉན་པ་དང་བསམ་པ་དང་བཀླག་པ་དང༌། ཁ་ཏོན་བྱ་བ་དེ་ལ་བརྟག་པ་དང་བྲི་བ་དང་གཞན་ལ་སྦྱིན་པར་བྱའོ། །དེ་ལ་བཞི་པ་ནི་སྡིག་པ་བཀྲུ་བ་དང་སྡིག་པ་སྲེག་པ་དང་སྡིག་པ་གཏོར་བ་དང་དམ་ཚིག་རྡོ་རྗེ་བསྒོམས་ནས་དེའི་ཏིང་ངེ་འཛིན་གྱིས་བསྐང་བའོ། །དེ་ལ་ལྔ་པ་ནི་བླ་མ་ལ་རྫས་དང་རང་གི་ཆུང་མ་ཕུལ་ཏེ། གསང་བའི་དབང་དང་ཤེས་རབ་ཡེ་ཤེས་ཀྱི་དབང་དང་བཞི་པའི་དབང་ཞུ་བར་བྱའོ། །གཞན་ཡང་ཡི་དམ་ལྷའི་ཏིང་ངེ་འཛིན་དང་བཟླས་པས་ཤིན་ཏུ་ཡང་བསྐང་ངོ༌། །ཁྱད་པར་དུ་རྡོ་རྗེ་བྱང་ཆུབ་ཀྱི་སེམས་བསྒོམས་ནས་བསྐང་དུ་མི་བཏུབ་པ་ཡང་བསྐང་སྟེ། མཛོད་ཀྱི་མདོ་ལ་སོགས་པ་ལ་བལྟ་བར་བྱའོ། །དེ་ལ་དམ་ཚིག་རྣམས་བསྡོ་བ་གྲང་བྱ་བ་ནི་མདོར་བསྡུ་ན་དྲན་པའི་ཚུལ་གྱིས་བསྡོ་བགྲང་བྱ་བ་དང༌། ཁ་ཐོན་དུས་གསུམ་དུ་བསྡོ་བགྲང་བྱ་བ་དང༌། དུས་དྲུག་ཏུ་ཡི་དམ་ནར་མའི་དུས་སུ་བསྐང་ཞིང་བསྡོ་བགྲང་བྱ་བ་དང༌། གླེགས་བམ་བལྟས་པས་བསྡོ་བགྲང་བྱ་བའོ། །དེ་ལ་དམ་ཚིག་བསྐངས་པ་དང་མ་ཉམས་པའི་རྟགས་སྔར་བཤད་པ་བཞིན་དུ་ཤེས་པར་བྱའོ། །དེ་ལ་དམ་ཚིག་ཉམས་པའི་ཉེས་དམིགས་ནི་ཇི་སྐད་དུ་དཔལ་སངས་རྒྱས་མཉམ་སྦྱོར་གྱི་རྒྱུད་ལས། དམ་ཚིག་ཉམས་པས་དཀྱིལ་འཁོར་དུ། །དབང་བསྐུར་དངོས་གྲུབ་འཐོབ་མི་འགྱུར། །ཞེས་གསུངས་པས་དང་པོ་དཀྱིལ་འཁོར་དུ་ཞུགས་ཤིང་དབང་བསྐུར་བ་ཐོབ་ནས་དམ་ཚིག་སྡོམ་པ་མནོས་ནས་ཕྱིས་མ་བསྲུངས་ན་འཇིག་རྟེན་དང་འཇིག་རྟེན་ལས་འདས་པའི་དངོས་གྲུབ་མི་འབྱུང་ལ། མི་འདོད་པ་སྣ་ཚོགས་པ་འབྱུང་
བར་འགྱུར་རོ། །ཡང༌། དམ་ཚིག་མེད་པའི་མི་རྣམས་ལ། །སྔགས་དང་ཕྱག་རྒྱ་མི་སྦྱིན་ཞིང༌། །དེ་དང་འགྲོགས་པར་མི་བྱ་སྟེ། །སྙིང་རྗེ་བསྐྱེད་ལ་སྤང་བར་བྱ། །ཞེས་པ་དང༌། དང་པོར་བླ་མ་རྗེ་བཙུན་ལས། །དམ་ཚིག་ཐོབ་ནས་མི་བསྲུང་བ། །མཁའ་འགྲོ་སྲིན་པོས་བསད་ནས་སུ། །ངུ་འབོད་ལ་སོགས་དམྱལ་བར་འགྲོ། །ཤེས་རབ་སྙིང་རྗེ་མི་ལྡན་པ། །གསང་སྔགས་ལ་ནི་འཇུག་མི་བྱ། །ཡན་ལག་དམ་ཚིག་ཉམས་གྱུར་ན། །རྡོ་རྗེ་དམྱལ་བར་སྐྱེ་བར་འགྱུར། །དེ་བས་དམ་ཉམས་སྡིག་ཅན་དེའི། །ཉམས་པས་གྲིབ་མ་འགོ་བས་ན། །ལྷན་ཅིག་གནས་པར་མི་བྱ་ཞིང༌། །དེ་ལ་སྙིང་རྗེ་བསྐྱེད་པར་བྱ། །ཞེས་གསུངས་པ་དང༌། དཔལ་སངས་རྒྱས་ཐོད་པ་ལས་ཀྱང༌། རེ་ཞིག་དམ་ཚིག་ཉམས་པ་ལས། །དངོས་གྲུབ་ཐོབ་པ་ལྟ་ཞོག་གི །མི་ཡི་སྐྱེ་བའང་རྙེད་པར་དཀའ། །གང་ཡང་བླ་མ་བརྒྱུད་པ་ཡི། །རིམས་འོངས་དེ་ཉིད་མན་ངག་ནི། །དེ་ཡིས་ཇི་ལྟར་འགྲུབ་མཉམ་དགོངས། །ཞེས་གསུངས་པ་དང༌། གཞན་ཡང་རྩ་བའི་དམ་ཚིག་ཉམས་ན་དཔེར་ན་ཤིང་ཆེན་པོ་རྩ་བ་ཚིག་པའམ་སྐམས་པའམ་བྲེགས་པ་དང་འདྲ་སྟེ། འཇིག་རྟེན་དང་དེ་ལས་འདས་པའི་དངོས་གྲུབ་ཐམས་ཅད་མེད་པར་འགྱུར་རོ། །སྤོམ་པའི་ཉེས་པ་ནི་སྔར་བཤད་པ་བཞིན་དུ་ཤིང་ཆེན་པོའི་སྡོང་པོ་དང་འདྲ་སྟེ། འཇིག་རྟེན་གྱི་དངོས་གྲུབ་ཆེན་པོ་བརྒྱད་མི་འབྱུང་ངོ༌། །ཡན་ལག་གི་ལྟུང་བ་ནི་ཤིང་གི་ཡལ་ག་དང་འདྲ་བར་ཕྲིན་ལས་བཞིའི་དངོས་གྲུབ་ཀྱི་བར་དུ་གཅོད་དོ། །གཞན་ཡང་འདི་ལ་གཡེལ་བ་དང་མཆོད་པ་དང་གཏོར་མ་ཆགས་ན་བྱིན་རླབས་ཆུང་བ་དང་རྣལ་འབྱོར་སྡོ་སྐམས་སོ། །བླ་མའི་ཐུགས་མ་ཟིན་ཞིང་བཀའ་བཅག་ན་བགེགས་ལྡང་ངོ༌། །སྤྱོད་པ་རྩིང་བ་དང༌། བག་མེད་ན་འབྱོར་པ་བརླག་པར་འགྱུར་རོ། །གལ་ཏེ་དམ་ཚིག་མ་བསྲུངས་ཀྱང་བཀྲ་ཤིས་པ་འདྲ་ན་ཡང་འཕྲལ་དུ་ཚེ་འདི་ལ་གནོད་པ་མེད་ཀྱང་དེ་ཉིད་ཆད་པ་ཆེན་པོ་འབྱུང་བའི་རྟགས་ཡིན་ཏེ། དཔེར་ན་རྒྱལ་པོའི་བཀའ་ཆད་བྱུང་ན་དེ་ལ་ཟན་དང་ཆང་མང་པོ་བླུད་ནས་བཞི་བར་བྱས་ན་ཕྱིས་གསོད་དོ། །དམ་ཚིག་ཁ་ཅིག་ལེགས་པར་བསྲུངས་པ་ལས་སྡུག་བསྔལ་དང་བར་ཆད་མང་བ་ལྟར་འདུག་
ཀྱང་དེ་ཚེ་རབས་སྔ་མའི་ལས་ཀྱི་ལྷག་མ་ལུས་པ་ཡིན་པས་དེས་ནི་མྱུར་དུ་ཕྱག་རྒྱ་ཆེན་པོའི་དངོས་གྲུབ་ཐོབ་པར་འགྱུར་རོ། །གཞན་ཡང་དམ་ཚིག་ཉམས་པ་ནི་ཚེ་འདིར་ཡང་བཀྲ་མི་ཤིས་པ་མང་པོ་འབྱུང་ལ། དུས་མ་ཡིན་པར་འཆི་བ་བརྒྱད་དང༌། གཤིས་ངན་དུ་འཆི་བ་བཅུ་གཉིས་ཀྱིས་འཆི་བར་འགྱུར་རོ། །དེ་ནས་ཤི་ནས་ཀྱང་རྡོ་རྗེ་དམྱལ་བར་སྐྱེས་ནས་དེ་ནས་ཐོན་པའི་དུས་མེད་དོ། །དེ་ལ་དམ་ཚིག་མ་ཉམས་པའི་ཕན་ཡོན་ནི། ཚེ་རིང་བ་དང་ལོངས་སྤྱོད་ཆེ་བ་དང་ཅི་བསམས་པ་འགྲུབ་པ་དང༌། མཐུ་དང་བྱིན་རླབས་ཆེ་བ་དང་བཀྲ་ཤིས་པར་འགྱུར་རོ། །བསྒོམ་པ་དང་བཟླས་པ་དང་མཆོད་པ་ལ་བརྩོན་པས་རྣལ་འབྱོར་པ་སྔོ་མ་སྐམས་པར་ལོངས་སྤྱོད་ཆེ་བ་དང་བླ་མའི་བཀའ་མ་བཅག་ཅིང་གུས་པས་བར་ཆད་མེད་པ་དང་རྡོ་རྗེ་སྤུན་ལ་བརྩེ་གདུང་བྱས་པས་མི་མ་ཡིན་རྣམས་ཀྱིས་བཀུར་སྟི་བྱེད་དོ། །གཡོ་སྒྱུ་མེད་པས་མི་དང་མི་མ་ཡིན་པ་རྣམས་དགའ་བར་འགྱུར་རོ། །གསང་སྔགས་འཆོལ་བར་མ་སྤྱད་པས་འབྱོར་བ་བརྟན་པ་དང་བཀྲ་ཤིས་སོ། །འཆི་བའི་དུས་སུ་ཡང་རྡོ་རྗེ་མཁའ་འགྲོ་མ་རྣམས་ཀྱིས་བསུ་ནས་རིག་འཛིན་གྱི་གནས་སུ་འཁྲིད་དོ། །གཞན་ཡང་དེས་སྐྱེ་བ་འདི་དང་ཕྱི་མ་དང་སྐྱེ་བ་བདུན་དང་སྐྱེ་བ་བཅུ་དྲུག་ཚུན་ཆད་ཀྱིས་འགྲུབ་པ་ལ་ཐེ་ཚོམ་མེད་དོ། །དེ་ལ་དམ་ཚིག་ཐམས་ཅད་བསྡུ་ན་གཉིས་ཏེ། སྙིང་རྗེ་རུས་པའི་གཏིང་ནས་སྐྱེ་བ་དང་ཤེས་རབ་ཚིག་ཙམ་མ་ཡིན་པ་གཏིང་ནས་གོ་བའོ། །འདི་གཉིས་རྒྱུད་ལ་བརྟེན་ན་དང་པོ་ཉིད་ནས་ཉེས་པ་མི་འབྱུང་ལ་གལ་ཏེ་བྱུང་ན་ཡང་མྱུར་དུ་བསྐངས་པར་འགྱུར་རོ། །གཞན་ཡང་དམ་ཚིག་ཐམས་ཅད་ནི་བྱང་ཆུབ་ཀྱི་སེམས་སུ་འདུས་ཏེ་དེ་ཡང་རྣམ་པ་བཞིའོ། །བྱང་ཆུབ་ཀྱི་སེམས་དང་བླ་ན་མེད་པ་བྱང་ཆུབ་ཀྱི་སེམས་དང་ཀུན་དུ་བཟང་པོའི་སེམས་དང་རྡོ་རྗེ་བྱང་ཆུབ་ཀྱི་སེམས་སོ། །དེ་ལ་སོ་སོར་ཐར་པའི་སྡོམ་པ་ནི་ལས་དགེ་སྡིག་གཙོར་སྟོན་ཏོ། །མདོ་སྡེའི་སྡོམ་པ་ནི་སྙིང་རྗེ་གཙོར་སྟོན་ཏོ། །གསང་སྔགས་ཀྱི་སྡོམ་པ་ནི་སྐུ་གསུང་ཐུགས་ཀྱི་མི་ཕྱེད་པ་གཙོར་སྟོན་ཏོ། །དེ་ལ་སོ་སོར་ཐར་པའི་སྡོམ་པ་ནི་མྱ་ངན་ལས་འདས་པའི་བསམ་པ་བརྟན་པོ་ལས་སྐྱེའོ། །བྱང་ཆུབ་སེམས་དཔའི་སྡོམ་པ་ནི་ལྷག་པའི་བསམ་
པ་བཟང་པོ་ལས་སྐྱེའོ། །གསང་སྔགས་ཀྱི་སྡོམ་པ་ནི་རྡོ་རྗེ་བྱང་ཆུབ་ཀྱི་སེམས་ལས་སྐྱེའོ། །དེ་ལ་སོ་སོར་ཐར་པའི་སྡོམ་པ་ནི་སྤོང་པ་བདུན་ནོ། །བྱང་ཆུབ་སེམས་དཔའི་སྡོམ་པ་ནི་སྤོང་བ་བཅུའོ། །སྔགས་ཀྱི་སྡོམ་པ་ནི་སྤོང་བ་གཅིག་གོ །སོ་སོར་ཐར་པའི་གཞུང་དུ་ནི་ཁ་ན་མ་ཐོ་བ་གཉི་ག་བརྗོད་དོ། །བྱང་ཆུབ་སེམས་དཔའི་གཞུང་དུ་ནི་རང་བཞིན་འབའ་ཞིག་བརྗོད་དོ། །སྔགས་ཀྱི་གཞུང་དུ་ནི་དེ་གཉི་གའི་ཐ་སྙད་མ་བརྗོད་དོ། །ཡང་སོ་སོར་ཐར་པའི་སྡོམ་པ་ནི་རྫས་ཀྱི་བདག་ཉིད་དུ་ཡོད་པར་འདོད་དོ། །བྱང་ཆུབ་སེམས་དཔའི་སྡོམ་པ་ནི་བརྟག་པ་ཙམ་དུ་ཡོད་བར་འདོད་དོ། །སྔགས་སུ་ནི་དེ་གཉི་གའི་ཐ་སྙད་མ་བརྗོད་དོ། །ཡང་ཉན་ཐོས་ཀྱི་སྡོམ་པ་ལ་པར་ཆད་ཀྱི་ཆོས་མང་དུ་ཡོད་དོ། །བྱང་ཆུབ་སེམས་དཔའི་སྡོམ་པ་ལ་བར་ཆད་ཀྱི་ཆོས་ཉུང་ཟད་ཅིག་གོ །སྔགས་ཀྱི་སྡོམ་པ་ལ་ནི་བར་ཆད་ཀྱི་ཆོས་བཤད་པ་མེད་དོ། །ཡང་སྡོམ་པ་དང་པོ་ལ་ནི་ཕམ་བ་བྱུང་ན་ཕྱིས་བླང་བའི་སྐལ་པ་མེད་དོ། །བར་མ་ལ་ནི་ཕམ་པ་བྱུང་ན་ཕྱིས་བླང་བའི་སྐལ་བ་ཡོད་དོ། །ཐ་མ་ནི་རྡོ་རྗེ་བྱང་ཆུབ་ཀྱི་སེམས་དང་ལྡན་ན་ཉམས་པ་མེད་དོ། །དེ་ལ་སྡོམ་པ་དང་པོ་ལ་ནི་མཁན་པོ་དང་སློབ་དཔོན་དགོས་སོ། །བར་མའི་སྡོམ་པ་ལ་ནི་བླ་མ་གཅིག་པུའམ་ཡང་ན་མེད་པའོ། །ཐ་མ་དེ་ལ་ནི་བཞི་སྟེ། བླ་མའི་ཞལ་ནས་བྱུང་བའི་དབང་དང༌། ཡེ་ཤེས་ལྷའི་ཕྱིན་གྱི་རླབས་ཀྱི་དབང་དང༌། རྡོ་རྗེ་མཁའ་འགྲོ་མས་ལུང་བསྟན་པའི་དབང་དང༌། རང་ཉིད་ཀྱི་སེམས་ཀྱི་རྩལ་གྱིས་ཐོབ་པའི་དབང་དང་ངོ༌། །ཡང་སྔ་མ་ནི་གཞན་ལ་གནོད་པ་བྱེད་པ་ལས་ལྡོག་གོ །བར་མ་ནི་དེའི་སྟེང་དུ་གཞན་ལ་ཕན་འདོགས་པའོ། །ཕྱི་མ་ནི་དེའི་སྟེང་དུ་སངས་རྒྱས་ཀྱི་མཛད་སྤྱོད་ཉམས་སུ་ལེན་པའོ། །ཡང་དང་པོའི་སྡོམ་པ་ནི་དགྲ་བཅོམ་པ་རྣམས་ཀྱི་རྗེས་སུ་སློབ་པའོ། །བར་མའི་སྡོམ་པ་ནི་སྔོན་གྱི་བྱང་ཆུབ་སེམས་དཔའ་རྣམས་ཀྱི་རྗེས་སུ་སློབ་པའོ། །སྔགས་ཀྱི་སྡོམ་པ་ནི་སངས་རྒྱས་རྣམས་ཀྱི་རྗེས་སུ་སློབ་པའོ། །ཡང་དང་པོའི་སྡོམ་པ་ནི་བདག་འབའ་ཞིག་གི་དོན་ཏོ། །བར་མའི་སྡོམ་པ་ནི་གཞན་འབའ་ཞིག་གི་དོན་ཏོ། །ཕྱི་མའི་སྡོམ་པ་ནི་གཉི་གའི་དོན་ཏོ། །ཡང་དང་པོའི་སྡོམ་པ་ནི་ཇི་སྲིད་
འཚོའི་བར་དུ་མནོ་ས་སོ། །བར་མའི་སྡོམ་པ་ནི་སྙིང་པོ་བྱང་ཆུབ་ཀྱི་བར་དུའོ། །ཕྱི་མའི་སྡོམ་པ་ནི་ནམ་མཁའ་ཇི་སྲིད་གནས་ཀྱི་བར་དུའོ། །སྡོམ་པ་དང་པོའི་འབྲས་བུ་ནི་མྱ་ངན་ལས་འདས་པ་གཉིས་སོ། །བར་མའི་འབྲས་བུ་ནི་ས་བཅུ་འམ་ས་བཅུ་གཅིག་པའོ། །ཐ་མའི་འབྲས་བུ་ནི་ས་བཅུ་གཉིས་པའོ། །གཞན་ཡང་སྒོམ་སྒྲུབ་དང་ཆོས་སྤྱོད་ཡི་དམ་གྱི་ལྷས་མ་ཁྲེལ་བ་དང༌། དད་པ་དང་བསྙེན་བཀུར་བླ་མས་མ་ཁྲེལ་བ་དང༌། དམ་ཚིག་དང་སྡོམ་པ་རྡོ་རྗེ་མཁའ་འགྲོ་མ་རྣམས་ཀྱིས་མ་ཁྲེལ་བ་དང༌། བརྩེ་གདུང་ཕན་གནོད་རྡོ་རྗེ་སྤུན་ཕོ་མོས་མ་ཁྲེལ་བ་དང༌། བཟླས་བརྗོད་དང་གཏོར་མ་དང་ཆོ་གའི་ནུས་པ་དང་བྱིན་རླབས་མཚན་མོ་རྒྱུ་བའི་འབྱུང་པོའི་ཚོགས་ཀྱིས་མ་ཁྲེལ་བ་དང༌། རྡོ་རྗེ་བླ་མའི་མན་ངག་ཟབ་མི་ཟབ་རང་གི་སློབ་མས་མ་ཁྲེལ་བ་དང༌། ལྟ་བ་ཟབ་མི་ཟབ་མཁས་པ་རྣམས་ཀྱིས་མ་ཁྲེལ་བ་དང༌། ཇི་ལྟར་དམ་བཅས་པའི་དོན་རང་གི་སེམས་ཀྱིས་མ་ཁྲེལ་བ་དང༌། སྤྱོད་པ་བཟང་ངན་གྲོགས་པོས་མ་ཁྲེལ་བ་དང༌། གཏོང་ཕོད་དང༌། གསལ་གཤོག་དང༌། རོ་ཚོད་དང༌། ཞི་དེས་དང༌། མཐུན་འཇུག་འཇིག་རྟེན་གྱི་མི་རྣམས་ཀྱིས་མ་ཁྲེལ་པའོ། །མཉམ་པར་གཞག་པའི་རྣལ་འབྱོར་ནི། །བསྐྱེད་དང་རྫོགས་པའི་ཏིང་འཛིན་བསྒོམ། །སྤྱོད་ལམ་རྣལ་འབྱོར་དུས་སུ་ནི། །ཕྱི་ནང་ཐམས་ཅད་གཞན་མིན་ཏེ། །སེམས་ཉིད་ལྷ་ཉིད་སྒྱུ་མ་ཉིད། །འོད་གསལ་ཡིན་ཏེ་མཉམ་ཉིད་གཞི། །དག་པ་བཞི་ཡང་དེ་ཉིད་ཡིན། །ཉིན་དང་མཚན་མོ་རྟག་པར་ནི། །སེམས་ཀྱི་སྐད་ཅིག་རེ་རེ་ལ། །དེ་ལྟར་མོས་པ་ཡང་ཡང་བྱ། །རྡོ་རྗེ་ཤུགས་དང་མི་ལྡན་ཡང༌། །སྣང་བ་བྱིན་གྱིས་བརླབས་པ་ཡིན། །དེ་ལྟ་བུ་ཡི་སྔགས་པ་ནི། །དམ་ཚིག་ཉམས་པའི་དོགས་པ་མེད། །བྷཾ་ག་ལར་སྐྱེས་དགེ་སློང་ནི། །མར་མེ་མཛད་དཔལ་ཡེ་ཤེས་ཀྱིས། །གཞུང་དང་བླ་མའི་མན་ངག་གིས། །དམ་ཚིག་ཐམས་ཅད་བསྡུས་ནས་བྲིས། །དམ་ཚིག་ཐམས་ཅད་བསྡུས་པ་ཞེས་བྱ་བ་མཁས་པ་ཆེན་པོ་དཱིཾ་པ་ཀ་ར་ཤྲཱི་ཛྙཱ་ནས་མཛད་པ་རྫོགས་སོ།། །།རྗེ་བཙུན་བླ་མ་ཆེན་པོ་དེ་ཉིད་ཀྱི་ཞལ་སྔ་ནས་དང༌། ལོ་རྩཱ་བ་དགེ་སློང་ཚུལ་ཁྲིམས་
རྒྱལ་བས་བསྒྱུར་ཅིང་ཞུས་ཏེ་གཏན་ལ་ཕབ་པའོ།།