ཐེག་པ་ཆེན་པོའི་མཚན་ཉིད་ཀུན་ལས་བསྡུས་པ་ཞེས་བྱ་བ།
སངས་རྒྱས་ཡེ་ཤེས་ཞབས།
རྒྱ་གར་སྐད་དུ། མ་ཧཱ་ཡཱ་ན་ལ་ཀཱ་ན་ས་མུ་ཙྩ་ཡ། བོད་སྐད་དུ། ཐེག་པ་ཆེན་པོའི་མཚན་ཉིད་ཀུན་ལས་བསྡུས་པ་ཞེས་བྱ་བ། དཔལ་རྡོ་རྗེ་སེམས་དཔའ་ལ་ཕྱག་འཚལ་ལོ། །བྱང་ཆུབ་ཡང་དག་སེམས་བསྐྱེད་པའི། །བྱམས་པ་ཆེན་པོའི་སྦྱོར་བ་སྟེ། །ཆོས་རྣམས་ཐམས་ཅད་བདག་མེད་པའི། །ཞེས་བྱ་ཡེ་ཤེས་མངོན་པར་བརྗོད། །ཅེས་ཏེ་དེ་ལྟར་ན་ཆོས་ཐམས་ཅད་གང་ཞེ་ན། འདི་ལྟ་སྟེ། ཕུང་པོ་དང༌། ཁམས་དང༌། སྐྱེ་མཆེད་དང༌། རྟེན་ཅིང་འབྲེལ་པར་འབྱུང་བ་དང༌། ཕ་རོལ་ཏུ་ཕྱིན་པ་དང༌། ས་དང༌། སྟོང་པ་ཉིད་དང༌། བྱང་ཆུབ་ཀྱི་ཕྱོགས་ཀྱི་ཆོས་དང༌། བདེན་པ་དང༌། བསམ་གཏན་དང༌། ཚད་མེད་པ་དང༌། གཟུགས་མེད་པའི་སྙོམས་པར་འཇུག་པ་དང༌། རྣམ་པར་ཐར་པ་དང༌། སྔོན་གྱི་གནས་ཀྱི་རྗེས་སུ་མཉམ་པར་གཞག་པ་དང༌། རྣམ་པར་ཐར་པའི་སྒོ་དང༌། མངོན་པར་ཤེས་པ་དང༌། མཉམ་གཞག་དང༌། འཛིན་པ་དང༌། སྟོབས་དང༌། སྟོབས་བཅུ་དང༌། མི་འཇིགས་པ་བཞི་དང༌། སོ་སོ་ཡང་དག་པར་རིག་པ་བཞི་དང༌། བྱམས་པ་ཆེན་པོ་དང༌། སྙིང་རྗེ་ཆེན་པོ་དང༌། ཕྱིར་མི་ལྡོག་པའི་སངས་རྒྱས་དང༌། ཆོས་དང༌། དགེ་སྦྱོང་གི་འབྲས་བུ་དང༌། རྣམ་པ་ཐམས་ཅད་མཁྱེན་པ་ཉིད་དང༌། དེ་བཞིན་ཉིད་དང༌། ཡང་དག་པའི་མཐའ་དང༌། མཚན་མ་མེད་པ་དང༌། དོན་དམ་པ་ཆོས་ཀྱི་དབྱིངས་ཤེས་པའོ། །དེ་ལྟར་ཕུང་པོ་ནི་ཅི་ཞེ་ན། སྐྱེ་མཆེད་ནི་གང༌། ཁམས་ནི་གང༌། ཇི་ལྟར་ངེས་པ་མཚན་ཉིད་
ཇི་ལྟ་ཡིན་ཏེ། ཕུང་པོ་ལྔ་ནི་གཟུགས་དང༌། ཚོར་བ་དང༌། འདུ་ཤེས་དང༌། འདུ་བྱེད་དང༌། རྣམ་པར་ཤེས་པ་དང༌། དེ་ལྟར་གཟུགས་ནི་དབང་པོ་ལྔ་མིག་ལ་སོགས་པ་དང༌། ཡུལ་ལྔའོ། །གཟུགས་ལ་སོགས་པའོ། །དེ་ལྟར་མིག་གི་རྣམ་པར་ཤེས་པ་ལ་བརྟེན་ནས། ས་ལ་སོགས་པ་རབ་ཏུ་དང་བ་སྟེ། མིག་གི་དབང་པོའོ། །དེ་ལྟར་རྣ་བའི་དབང་པོ་ལ་བརྟེན་ནས་རྣ་བའི་རྣམ་པར་ཤེས་པའོ། །སྔའི་དབང་པོ་ལ་བརྟེན་ནས་སྔའི་རྣམ་པར་ཤེས་པའོ། །ལྕེའི་དབང་པོ་ལ་བརྟེན་ནས་ལྕེའི་རྣམ་པར་ཤེས་པའོ། །ལུས་ཀྱི་དབང་པོ་ལ་བརྟེན་ནས་ལུས་ཀྱི་རྣམ་པར་ཤེས་པའོ། །གཟུགས་ནི་གཉིས་ཏེ་ཁ་དོག་དང་དབྱིབས་སོ། །ཁ་དོག་ནི་སྔོན་པོ་ལ་སོགས་པའོ། །ཡང་དག་པར་གནས་པ་ནི་གྲུ་བཞི་ལ་སོགས་པའོ། །སྒྲ་དང་ཡིད་ཀྱི་ཤེས་པ་ནི་ཡིད་ཤེས་ཀྱི་དབུས་ཀྱི་དབྱེ་བས་གཉིས་ཏེ། དེ་ལྟར་དྲི་དང་རོ་དང་རེག་པ་དང་སྐྱུར་བའི་དབྱེ་བས་བཅུ་དྲུག་གོ །རིག་པ་བཅུ་གཅིག་འདི་ལྟ་སྟེ། སྲ་བ་དང༌། སྙི་བ་དང༌། དྲོ་བ་དང༌། གྲང་བ་དང༌། བཏང་སྙོམས་དང༌། ལྕི་བ་དང༌། ཡང་བ་དང༌། འཇམ་པ་དང༌། རྩུབ་པ་དང༌། བཀྲེས་པ་དང༌། སྐོམ་པའོ། །བདེན་པ་ཡང་དག་པར་བསྡུས་པའོ། །ཡིད་ཀྱི་ཤེས་པའི་དབྱེ་བས་གསུམ་སྟེ། དེ་ལྟར་གང་ཞིག་གི་འབྱུང་བ་མིག་གི་དོན་བྱེད་པ་དང་ཁམས་རྟོགས་པ་དང༌། སྣང་བའི་སའི་དབྱེ་བ་དང་འདས་པ་ལ་སོགས་པའི་དབྱེ་བ་མཐའ་ཡས་པའི་རབ་ཏུ་བྱེད་པ་ཡང་དག་པར་བསྡུས་པ་གཟུགས་ཀྱི་ཕུང་པོ་ཞེས་བྱ་བའི་ཁྱབ་པ་བསྟན་ཏེ། གཟུགས་ཀྱི་མཐར་དབྱུ་གུ་ལྟ་བུ་འདུལ་བ་ཞེས་པའོ། །ཚོར་བའི་ཕུང་པོ་ལ་གསུམ་སྟེ། གཉིས་ཀྱིས་ནུས་པས་བདེ་བ་དང་སྡུག་བསྔལ་དང་བཏང་སྙོམས་སོ། །མིག་གི་དོན་བྱེད་པའི་རྒྱུན་གྱི་དབྱེ་བས་རབ་ཏུ་བྱེད་པ་དྲུག་པ་སྟེ། དེ་ལྟར་དབྱེ་བ་བཅོ་བརྒྱད་འབྱུང་ངོ༌། །དེ་ལྟར་སེམས་ཀྱི་དབྱིངས་རྟོགས་པས་གང་ཞིག་ཤིན་ཏུ་དབྱེ་བས་མཐའ་ཡས་པའི་རབ་ཏུ་བྱེད་པ་ལ་མངོན་པར་ཡང་དག་པར་བསྡུས་པ་ཚོར་བའི་ཕུང་པོ་ཞེས་ཤེས་རབ་ཐོབ་པའོ། །འདུ་ཤེས་ཀྱི་ཕུང་པོའི་ཤེས་པ་དྲུག་སྟེ། མིག་གི་དོན་བྱེད་པ་ལ་བརྟེན་པའི་དབྱེ་བས་བདེན་པའི་རྒྱུ་མཚན་གཟུང་བའི་མཚན་ཉིད་དོ། །དེ་ལྟར་རྒྱུ་མཚན་གྱི་གཟུགས་ཀྱི་རྣམ་གཞག་གིས་དབྱེ་བ་ལ་བ་རྟེན་པ་དེ་ལྟར་བརྟགས་པའོ། །
བརྗོད་པ་དང་བརྗོད་པ་མ་ཡིན་པའི་རྣམ་པའི་གཟུགས་དང་ཚོར་བ་ལ་སོགས་པས་ཡང་དག་པའི་ཕུང་པོའི་ཡུལ་ཆོས་ཀྱི་བདག་ཉིད་དང༌། ཉན་པ་ལྟ་བུའི་འདུ་ཤེས་དང་ཁམས་ཀྱི་དབྱེ་བ་མཐའ་ཡས་པའི་རབ་ཏུ་བྱེད་པའི་འདུ་ཤེས་ཀྱི་ཕུང་པོའི་ཕྱི་རོལ་དུའོ། །འདུ་བྱེད་ཀྱི་ཕུང་པོ་ཇི་སྲིད་དུ་སེམས་ཡོངས་སུ་ཞི་བ་རྣམས་དང༌། དང་བའི་མཚན་ཉིད་དང༌། འདོད་ཆགས་དང་ཞེ་སྡང་དང་གཏི་མུག་གི་དབང་གིས་ཉོན་མོངས་པའི་རབ་ཏུ་བྱེད་པའོ། །མིག་གི་དོན་བྱེད་པ་ལ་རབ་ཏུ་བརྟེན་པ་རབ་ཏུ་རྒྱས་པའི་སེམས་ཀྱི་བསླབ་པ་དང་ཆོས་ཀྱི་སེམས་ཀྱིས་མངོན་པར་འདུ་བྱེད་པའི་མཚན་ཉིད་རྣམ་གྲངས་ལས་འདས་པ་ལྟ་བུའོ། །ཁམས་ཀྱི་དབྱེ་བ་ཡང་དག་པར་བསྡུས་པ་འདུ་བྱེད་ཀྱི་ཕུང་པོ་ཞེས་ཁྱབ་པ་བསྟན་ཏོ། །རྣམ་པར་ཤེས་པའི་ཕུང་པོ་ནི། མངོན་ཤེས་དྲུག་གིས་སྐུ་དང་མིག་གི་དོན་བྱེད་པ་ལ་བརྟེན་པའི་དབྱེ་བ་སྟེ། གཟུགས་ཀྱི་མཚན་ཉིད་དང། རྣམ་པར་ཤེས་པའི་མཚན་ཉིད་ལྟ་བུའི་དབྱེ་བ་དང་མི་དགེ་བར་ལུང་མ་བསྟན་པའི་དབྱེ་བ་མཐའ་ཡས་པའི་རབ་ཏུ་བྱེད་པ་ལ་མོས་པས་མངོན་པར་ཡང་དག་པར་བསྡུས་པའི་རྣམ་པར་ཤེས་པའི་ཕུང་པོ་ཞེས་ཁྱབ་པའི་ཡུལ་བསྟན་ཏོ། །སྐྱེ་བའི་སྐྱེ་མཆེད་བཅུ་གཉིས་ཏེ། དེ་ལྟར་མངོན་ཤེས་དྲུག་གི་བདག་ཉིད་ནི། མིག་དང་རྣ་བ་དང་སྣ་དང་ལྕེ་དང་ལུས་དང་ཡིད་དོ། །དེ་ལྟར་སེམས་རྣམ་པར་ཤེས་པའི་རྒྱུ་རྣམ་པར་ཤེས་པ་འདིའོ། །ཕྱི་རོལ་དྲུག་ནི། གཟུགས་དང༌། སྒྲ་དང༌། དྲི་དང༌། རོ་དང༌། རེག་བྱ་དང༌། ཆོས་སོ། །སེམས་བདེན་པ་དང་བཅས་པ་ཆོས་ཐམས་ཅད་དེ། ཡིད་ཀྱི་རྣམ་པར་ཤེས་པར་སོང་བའི་འདས་པ་དང༌། མ་འོངས་པ་ལ་སོགས་པ་བཞིན་ནོ། །ཁྱད་པར་གྱི་དངོས་པོ་མིག་ལ་སོགས་པ་ལྔ་དང༌། ཡུལ་ལྔ་ཞེས་བྱའོ། །ཁམས་བཅོ་བརྒྱད་དང༌། སྐྱེ་མཆེད་བཅུ་གཉིས་འདི་རྣམས་སོ། །མིག་གི་རྣམ་པར་ཤེས་པ་དོན་བྱེད་པ་ལ་སོགས་པ་དྲུག་དང༌། རེག་པ་དྲུག་སྟེ། མིག་གི་རེག་པ་བརྗོད་པའི་ཡིད་དང༌། ཡང་དག་པར་རེག་པའོ། །བདེན་པའི་གཟུགས་དང༌། རྣམ་པར་ཤེས་པ་སྣོད་དང༌། ལྷན་ཅིག་དབུས་སུ་གནས་པའི་རྒྱུ་མཚན་བུམ་པའི་མཚན་ཉིད་ཀྱི་ངོས་ལ་མིག་གི་དོན་བྱེད་པར་རྟོགས་པའི་དགའ་བ་གསུམ་གྱི་དབྱེ་བ་སྐྱེད་པར་བྱེད་པའོ། །ཚོར་བ་མིག་གི་
དོན་བྱེད་པ་ཡང་དག་པར་རེག་པའི་སྐྱེ་བ་དྲུག་སྟེ། དེ་ལྟར་ཡང་མངོན་སུམ་གྱི་བདེ་བ་དང་སྡུག་བསྔལ་གྱི་དབྱེ་བས་བཅོ་བརྒྱད་འབྱུང་སྟེ། སླར་ཡང་ས་དང་ཆུ་དང་མེ་དང་རླུང་དང་ནམ་མཁའ་དང༌། རྣམ་པར་ཤེས་པའི་མཚན་ཉིད་དྲུག་རྣམས་སོ། །རྟེན་ཅིང་འབྲེལ་པར་འབྱུང་བའི་ཡན་ལག་བཅུ་གཉིས་ནི། དེ་ལྟར་ཡང་མ་རིག་པའི་ཡན་ལག་བདེན་པའི་སེམས་ཀྱི་རང་བཞིན་ལས་ཀྱི་འབྲས་བུ་ཡང་དག་པར་འབྱུང་ངོ༌། །བདག་དང་གཞན་འབྱུང་བ་དང༌། ཕུང་པོ་རྣམས་ལ་དམིགས་པ་སྟེ། ཆགས་པ་སྟེར་བའོ། །དེའི་རྐྱེན་གྱིས་འདུ་བྱེད་དེ་ལྟར་གསུམ་སྟེ། མི་དགེ་བཅུ་དང༌། དགེ་བ་བཅུའི་ལས་ཀྱི་ལམ་རབ་ཏུ་འཕྲོ་བ་དང༌། དགེ་བ་བཅུའི་ལས་ལམ་ཇི་ལྟར་རབ་ཏུ་འཕྲོ་བའོ། །ཤིན་ཏུ་བསམ་གཏན་གྱི་གཟུགས་ལ་མཉམ་པར་གཞག་པའོ། །དེ་ལྟར་དེའི་མ་རིག་པ་ལས་བྱུང་བ་དེ་ལྟར་འདུ་བྱེད་དོ། །མིག་གི་དོན་བྱེད་པའི་རྣམ་པར་ཤེས་པའི་འདོད་པ་དང༌། མི་འདོད་པའི་འབྲས་བུའི་ས་བོན་འབྱུང་སྟེ། དེས་ན་མིང་དང་གཟུགས་སོ། །སྐྱེ་བས་ན་སྐྱེ་མཆེད་ནི། སྐྱེ་བའི་རྣམ་གྲངས་དང་ལྡན་པའི་ཚོར་བ་སྟེ། བཞིའི་ཕུང་པོའོ། །གཟུགས་དང་ཇི་ལྟར་འབྱོར་པ་ལ་བརྟེན་པ་འབྱུང་བ་དང༌། ཁུ་བ་ལས་བྱུང་བའི་ཐར་མ་ལྡན་པའི་སའི་ཁམས་སྟེར་བའོ། །དེ་ལྟར་མིང་དང་གཟུགས་ལས་སྐྱེ་མཆེད་དྲུག་གི་དེ་ནས་མིང་དང་གཟུགས་ལས་མིག་གི་དོན་བྱེད་པའི་སྐྱེ་མཆེད་དྲུག་ཡོངས་སུ་གྱུར་པའོ། །དེ་ལྟར་རེག་པ་ནི་མིག་གི་དོན་བྱེད་པའི་གཟུགས་ཤེས་པ་སྔོན་བཞིན་དུ་འདས་པའི་ཕྱི་མའོ། །དེའི་རྐྱེན་གྱིས་ཉེན་པ་ཚོར་བ་གསུམ་མོ། །དེ་ལྟར་མ་རིག་པའི་དབང་གིས་སྲེད་པའོ། །དེ་ནས་ལེན་པ་སྟེ། བདེ་བའི་འདུས་བྱས་པ་ལས་བྱུང་བ་གཟུགས་ཡོངས་སུ་འཛིན་པའོ། །ལེན་པའི་རྐྱེན་གྱིས་གང་ཞིག་འབྱུང་བ་དེ་སྔོན་གྱི་བཞིན་བྱས་པའི་རྣམ་པར་ཤེས་པའི་མཚན་ཉིད་དོ། །དེའི་རྐྱེན་གྱིས་སྐྱེ་བ་སྟེ། མིང་དང་གཟུགས་ཀྱི་ནུས་པ་དེ་འདི་ལྟར་མ་རིག་པའི་བདག་ཉིད་ཉོན་མོངས་པ་སྟེ་ལས་སོ།། དེ་ལྟར་སྐྱེ་བ་ཡང་ཉོན་མོངས་པ་སྟེ། ལས་དང་སྐྱེ་བའི་དབང་གིས་སེམས་རྒྱུན་མི་འཆད་པས་འཁོར་བའོ། །དེ་ལྟར་མ་རིག་པའི་དབང་གིས་གནས་པ་ནི། རང་གི་སྐྱེ་བ་དང་རྒ་ཤིའི་ཕུང་པོ་རྣམས་ནི་སྐྱེ་བ་དང་སྐྱེ་བའི་དངོས་པོ་འཆི་བའོ། །སྐྱེ་བའི་རྗེས་ཀྱི་རིགས་སྔོན་དུ་ཐོགས་པའི་བདག་ཉིད་
ཀྱི་དངོས་པོ་ཡོངས་སུ་གཏོང་ངོ༌། །དེ་ལྟར་མ་རིག་པའི་དབང་གིས་རབ་ཏུ་བརྟགས་པའི་ཡིད་ནི། །ཉོན་མོངས་པ་འདི་ཙམ་གྱི་བདག་ཉིད་ཀྱི་ཆོས་སོ། །དེ་ལྟར་གཉེན་པོའི་ཕྱོགས་འབྱུང་བའི་ཆོས་ནི་ཕ་རོལ་ཏུ་ཕྱིན་པ་ཡང་བཅུ་སྟེ། སྦྱིན་པ་ལ་གསུམ་སྟེ། ཆོས་ཀྱི་སྦྱིན་པ་དང༌། ཟང་ཟིང་གི་སྦྱིན་པ་དང༌། མི་འཇིགས་པའི་སྦྱིན་པའོ། །ཚུལ་ཁྲིམས་ལ་གསུམ་སྟེ། སྡོམ་པའི་ཚུལ་ཁྲིམས་དང༌། སེམས་ཅན་གྱི་དོན་བྱེད་པའི་ཚུལ་ཁྲིམས་དང༌། དགེ་བ་ཆོས་སྡུད་པའི་ཚུལ་ཁྲིམས་སོ། །བཟོད་པ་ལ་གསུམ་སྟེ། ཆོས་ལ་ངེས་པར་སེམས་པའི་བཟོད་པ་དང༌། གཞན་གྱི་གནོད་པ་བྱས་པ་ལ་ཇི་མི་སྙམ་པའི་བཟོད་པ་དང༌། སྡུག་བསྔལ་དང་དུ་ལེན་པའི་བཟོད་པའོ། །བརྩོན་འགྲུས་ལ་གསུམ་སྟེ། གོ་ཆའི་བརྩོན་འགྲུས་དང༌། སྦྱོར་བའི་བརྩོན་འགྲུས་དང༌། ཡོངས་སུ་མཐར་ཐུག་པའི་བརྩོན་འགྲུས་སོ། །བསམ་གཏན་ལ་གསུམ་སྟེ། སྐྱོན་བསལ་བ་དང་གནས་པ་དང༌། རྣམ་པར་རྒྱལ་བའོ། །ཤེས་རབ་ལ་གསུམ་སྟེ། ཐོས་པའི་བདག་དང༌། བསམ་པའི་བདག་དང༌། བསྒོམ་པའི་བདག་གོ །ཐབས་ལ་གསུམ་སྟེ། རང་གི་སྐྱོན་བསལ་བ་དང༌། སེམས་ཅན་སྒྲོལ་བ་དང༌། བདེ་བ་མྱུར་བར་མངོན་པར་བྱང་ཆུབ་པའོ། །སྨོན་ལམ་ལ་གསུམ་སྟེ། ཚོགས་ཀྱི་དབང་དུ་བསྡུས་པ་དང༌། སེམས་ཅན་གྱི་དོན་རྗེས་སུ་བསྡུས་པ་དང༌། སངས་རྒྱས་ཀྱི་ཞིང་ཡོངས་སུ་སྦྱོང་བའོ། །སྟོབས་ལ་གསུམ་སྟེ། ལས་སྒྲུབ་པ་དང༌། ཉོན་མོངས་འཇོམས་པ་དང༌། བདུད་ཀྱི་ཕྱོགས་རབ་ཏུ་འཇོམས་པའོ། །ཡེ་ཤེས་ལ་གསུམ་སྟེ། རྣམ་པར་མི་རྟོག་པ་དང༌། །མཉམ་པའི་བྱང་ཆུབ་དང༌། སེམས་ཅན་གྱི་དོན་དུ་ཐབས་བསྐྱེད་པའོ། །འདི་རྣམས་ཀྱི་སྦྱིན་པ་བྱིན་པ་བྱང་ཆུབ་མཆོག་ཏུ་སེམས་བསྐྱེད་པ་སྔོན་བཞིན་ནོ། །སེམས་ཅན་ཐམས་ཅད་ཀྱི་བྱམས་པ་ལ་བརྟེན་ནས་ཡོངས་སུ་གོམས་པའོ། །ཕ་རོལ་ཏུ་ཕྱིན་པ་ནི་དེ་ལྟར་ཡང་འཇིག་རྟེན་པའི་གཞན་གྱི་དང་བདག་གི་མཚན་ཉིད་དོ། །འཇིག་རྟེན་ལས་འདས་པའི་དངོས་པོ་ཕུང་པོ་རྣམས་ཀྱི་བདག་ཉིད་རྣམ་པར་ཐར་པས་རབ་ཏུ་བརྒྱན་པའི་དངོས་པོ་དང་བྱང་ཆུབ་ཏུ་འགྲོ་བའི་ནུས་པས་སོ། །དེ་ལྟར་ཡང་ས་རྣམས་ནི་འདི་ལྟ་སྟེ། ས་དང་པོ་རབ་ཏུ་དགའ་བ་ནི་སྦྱིན་པའི་ཕ་རོལ་ཏུ་ཕྱིན་པའོ། །
ཤིན་ཏུ་མུན་པ་བསལ་བས་དྲི་མ་མེད་པ་སྟེ། ཚུལ་ཁྲིམས་ཀྱི་ཕ་རོལ་ཏུ་ཕྱིན་པའོ། །འོད་འཕྲོ་བ་བཟོད་པའི་ཕ་རོལ་ཏུ་ཕྱིན་པའོ། །དགོས་འདོད་ཐམས་ཅད་འགྲུབ་པས་བརྩོན་འགྲུས་ཀྱི་ཕ་རོལ་ཏུ་ཕྱིན་པའོ། །ཤིན་ཏུ་སྦྱང་དཀའ་བས་ན་བསམ་གཏན་གྱི་ཕ་རོལ་ཏུ་ཕྱིན་པའོ། །མངོན་དུ་གྱུར་པས་ན་ཤེས་རབ་ཀྱི་ཕ་རོལ་ཏུ་ཕྱིན་པའོ། །རིང་དུ་སོང་བའི་བདག་ཉིད་ཀྱིས་ཐབས་ཀྱི་ཕ་རོལ་ཏུ་ཕྱིན་པའོ། །མི་གཡོ་བས་སྨོན་ལམ་གྱི་ཕ་རོལ་ཏུ་ཕྱིན་པའོ། །ལེགས་པའི་བློ་གྲོས་ཀྱིས་སྟོབས་ཀྱི་ཕ་རོལ་ཏུ་ཕྱིན་པའོ། །ཆོས་ཀྱི་སྤྲིན་གྱིས་ཡེ་ཤེས་ཀྱི་ཕ་རོལ་ཏུ་ཕྱིན་པའོ་ཞེས་ཏེ། དེ་ལྟར་གང་ཞིག་ས་ལ་བྱམས་པའི་ཆོས་ཤིན་ཏུ་རྟོགས་པའི་བྱེ་བྲག་གིས་སྦྱིན་པའི་ཕ་རོལ་ཏུ་ཕྱིན་པ་རྣམས་རྣམ་པར་དག་པའི་བྱིན་གྱི་རླབས་ནས་ཁྱད་པར་གྱི་གྲངས་ལས་འདས་པ་རབ་ཏུ་ཐོབ་པའོ། །སྐྱེ་བའི་མཐར་ཐུག་པའི་བར་དུ་སྨོན་ལམ་དང་སྟོབས་མི་མཉམ་པའི་མཐའ་ཡས་པར་ཐུན་མོང་མ་ཡིན་པ་སྟེ། ཉན་ཐོས་སམ་རང་སངས་རྒྱས་ཐམས་ཅད་དང་མི་མཉམ་པ་དེའི་རྒྱུན་ཡིན་པ་ནི་ཕ་རོལ་ཏུ་ཕྱིན་པ་རྣམས་ལ་དམིགས་པའི་བྱེ་བྲག་གིས་གང་ཟག་གི་བདག་གི་རྣམ་པའི་མཚན་ཉིད་སྟོང་པ་ཉིད་དོ། །དེ་ལྟར་དེའི་བདག་ཉིད་མིག་གི་དོན་བྱེད་པར་དབུས་ཀྱི་བདག་ཉིད་ནང་སྟོང་པ་ཉིད་དང༌། ཕྱི་རོལ་གྱི་གཟུགས་རྣམས་ཕྱིའི་སྟོང་པ་ཉིད་དང༌། མིག་གི་དོན་བྱེད་པའི་གཟུགས་རྣམས་ནི་དེའི་ཡེ་ཤེས་ཤེས་པ་དང༌། མངོན་དུ་མཛད་པའི་བདག་ཉིད་ཕྱིའི་སྟོང་པ་ཉིད་དོ། །ཕྱོགས་ཀྱི་ཆ་ཤས་ཀྱི་སྣང་བའི་དབྱེ་བས་སྣོད་ཆེན་པོའི་འཇིག་རྟེན་སྟོང་པ་ཉིད་ཆེན་པོའོ། །ཇི་ལྟར་ཡོངས་སུ་བརྟགས་པ་གཟུང་བའི་རྣམ་པ་གསལ་བ་སྟོང་པ་ཉིད་བཞིན་དུ་སྟོང་པ་ཉིད་ཀྱི་སྟོང་པ་ཉིད་དོ། །དོན་དམ་པའི་སྟོང་པ་ཉིད་བཞིན་དུ་དོན་དམ་པའི་སྟོང་པ་ཉིད་དོ། །འདུས་བྱས་ལས་མངོན་པར་འདུས་བྱས་པའི་སྦྱིན་པ་སྟེ། འདུས་བྱས་སྟོང་པ་ཉིད་དོ། །འདུས་མ་བྱས་ལ་མོས་པ་ནི་ལོངས་སྤྱོད་པ་མ་ཡིན་པའི་རྒྱུ་མཚན་གྱིས་ཕྱིའི་འདུས་མ་བྱས་པའི་སྟོང་པ་ཉིད་དོ། །རྒྱུ་བ་མེད་པའི་སྟོང་པ་ཉིད་ནི་སེམས་ལས་འདས་པའི་ཆོས་ལ་ཞེན་པའི་བློ་ནི། གཞན་གྱི་སྟོང་པ་ཉིད་དོ། །སྤྱོད་པ་ལས་འདས་པའི་གཟུང་བའི་དམིགས་པ་ཡོད་པ་ལས་འདས་པ་གཞན་མ་ཡིན་པ་སྟོང་པ་ཉིད་དོ། །མི་མཉམ་པའི་ཁྱད་པར་གང་ཞིག་སྟོང་པ་ཉིད་ཅེས་སོ།།
མཐའ་ལས་འདས་པའི་སྟོང་པ་ཉིད་ནི་སེམས་དེའི་རང་བཞིན་ཕུང་པོ་ལྔ་མི་འབྱུང་བ་རྣམས་ཇི་ལྟར་རང་བཞིན་གང་ཞིག་རྣམ་པར་གཞག་པ་སྟེ་རང་བཞིན་སྟོང་པ་ཉིད་དོ། །སེམས་དེའི་རང་བཞིན་གྱི་བྱེ་བྲག་གིས་ཆོས་ཐམས་ཅད་ཅེས་བྱ་སྟེ། ཆོས་ཐམས་ཅད་སྟོང་པ་ཉིད་དོ། །བདག་ཏུ་མི་འཛིན་པ་ལས་དང་སྦྱིན་པ་ལ་དམིགས་པ་དང་མི་དམིགས་པའི་སྟོང་པ་ཉིད་དེ་མི་དམིགས་པ་སྟོང་པ་ཉིད་དོ། །གཟུངས་ཀྱི་མཚན་ཉིད་ལས་ཡོངས་སུ་བརྟགས་པ་ཙམ་སྟེ། རང་གི་མཚན་ཉིད་དོ། །གང་ཟག་དང་ཆོས་ཀྱི་དངོས་པོ་ལས་དེ་ལྟར་སྟོང་པ་སྟེ། དངོས་པོ་མེད་པའི་སྟོང་པ་ཉིད་དོ། །གང་ཞིག་ཕུང་པོའི་སྦྱིན་པ་རང་བཞིན་ཇི་ལྟར་བརྟགས་པའི་དངོས་པོ་སྟེ། རང་བཞིན་སྟོང་པ་ཉིད་དོ། །དེའི་དངོས་པོ་མ་ཡིན་པའི་ཕུང་པོ་རྣམས་ལ་གཞན་གྱི་རྒྱུ་མཚན་གྱིས་དེ་ལྟར་ཡང་དག་པར་བརྟགས་པའི་སྣང་བའི་མཚན་ཉིད་འཛིན་པའི་རྣམ་པར་གཞག་པ་ནི་ཞེས་པ་ལ་སོགས་པ་དངོས་པོ་མེད་པའི་རང་བཞིན་སྟོང་པ་ཉིད་དོ། །དེའི་མཐར་རྣམ་པར་རྟོག་པ་བཅོམ་པའི་གཟུགས་བཅིངས་པའི་དབྱེ་བ་མེད་པའི་མཐའ་ལས་འདས་པའོ། །ཕུང་པོའི་འཛིན་པ་རྣམ་པར་རྟོག་པའི་མཚན་ཉིད་དེ་གཉིས་སུ་མེད་པའོ། །དེ་ལྟར་ཕ་རོལ་ཏུ་ཕྱིན་པ་མངོན་པར་འཛིན་པས་མཛད་པ་ནི་སྟོང་པ་ཉིད་རྣམ་པ་ལྔའི་རབ་ཏུ་བྱེད་པ་མཐོང་བ་ལ་འཇུག་པའོ། །བྱང་ཆུབ་ཀྱི་ཕྱོགས་ཀྱི་ཆོས་སུམ་ཅུ་རྩ་བདུན་ནི། དེ་ལྟར་དྲན་པ་ཉེ་བར་གཞག་པ་བཞི་ལ་འདི་ལྟ་སྟེ། ལུས་དྲན་པ་ཉེ་བར་གཞག་པ་ནི། སྣ་ཚོགས་པ་ཉེ་བ་དང་རིང་བའི་བྱེ་བྲག་ཙམ་མོ། །ལུས་ཀྱི་གཟུང་བའི་རྣམ་པར་རྟོག་པའི་མཚན་ཉིད་ལུས་དྲན་པ་ཉེ་བར་གཞག་པའོ། །དེ་ལྟར་ཚོར་བ་དྲན་པ་ཉེ་བར་གཞག་པ་དང༌། སེམས་དྲན་པ་ཉེ་བར་གཞག་པ་དང༌། ཆོས་དྲན་པ་ཉེ་བར་གཞག་པའོ། །དེ་ལྟར་བསམ་གཏན་གྱི་བདག་ཉིད་ཀྱི་དངོས་པོ་དབྱེ་བ་ཇི་ལྟ་བར་མངོན་སུམ་ནི་གསུམ་སྟེ། བརྩོན་འགྲུས་དང་ཏིང་ངེ་འཛིན་དང༌། ཏིང་ངེ་འཛིན་ཇི་ལྟ་བ་བཞིན་དུ་སྦྱོར་བའོ། །བྱེ་བྲག་ཏུ་བྱང་ཆུབ་སེམས་དཔའ་རྣམས་བྱང་ཆུབ་ཏུ་སེམས་བསྐྱེད་པས་སྦྱིན་པ་དང༌། དགེ་བ་ལས་སེམས་ཀྱི་སྡོད་པའི་སྦྱོར་བ་ཆོས་ཀྱི་བདག་ཉིད་བཞིན་དྲན་པ་གཙོ་བོ་སྟེ། དྲན་པ་ཉེ་བར་གཞག་པའོ་ཞེས་བརྗོད་པའོ། །དེ་ལྟར་ཡིད་སྐྱོབ་པའི་རྫས་ཤེས་སོ། །དྲན་པ་ནི་
མཐུན་པའི་ཕྱོགས་དང༌། གཉེན་པོའི་ཕྱོགས་ཆོས་སོ། །མི་མཐུན་པའི་ཕྱོགས་མཐའ་དག་སྤོང་བར་བྱ་བའོ། །མ་སྐྱེས་པ་རྣམས་སྐྱེད་པར་བྱེད་པའོ། །དེ་ལྟར་གཉེན་པོའི་ཕྱོགས་མ་སྐྱེས་པ་རྣམས་བསྐྱེད་པའོ། །སྐྱེས་པ་རྣམས་བརྟན་པའོ། །བརྩོན་འགྲུས་ཀྱི་བདག་ནི་ཡང་དག་པར་སྤོང་བ་བཞི་འབྱུང་སྟེ། དེ་ལྟར་བདེན་པའི་ཡང་དག་པའི་བྱང་ཆུབ་ལ་འདུག་པས་ན་བརྩོན་འགྲུས་སོ། །ཏིང་ངེ་འཛིན་ནི་ཤེས་རབ་ཀྱིས་རབ་ཏུ་བསྒྲུབས་པའོ། །དེ་ལྟར་བཞུང་གི་སྦྱོར་བའི་སྤྱོད་ཡུལ་གྱི་རྒྱུ་མཚན་གྱི་འབྲས་བུ་ཐོབ་པ་ལས་རང་རིག་པའི་སོ་སོར་དམིགས་པ་རབ་ཏུ་གསལ་བའོ། །འདུན་པ་ལ་དམིགས་པ་བཞིན་ཏེ། ཏིང་ངེ་འཛིན་ཏོ། །ལུས་དང་སེམས་ཀྱི་རྣམ་པ་རྟོག་པ་ལ་བརྟེན་ནས་མི་མཐུན་པའི་ཕྱོགས་དང་འགལ་བ་འགོག་པ་ཕྲ་མོ་ལ་བརྟེན་ནས་འདུས་བྱས་པས་འབྲེལ་པའི་མཐར་བག་ཆགས་བཞི་ནི་རྫུ་འཕྲུལ་གྱི་རྐང་པའོ། །དེ་ལྟར་རྣམ་པ་ཐམས་ཅད་མཁྱེན་པའི་གྲངས་ཀྱི་འབྲས་བུ་ནི་དད་པ་དང་བརྩོན་འགྲུས་དང༌། དྲན་པ་དང་ཏིང་ངེ་འཛིན་དང་ཤེས་རབ་ཀྱི་གྲངས་ལས་འདས་པའི་སྦྱོར་བ་བསྐྱེད་པ་ནི། དབང་པོའི་ལྔའོ། །དེ་ལྟར་གསལ་བའི་ངེས་པར་འབྱེད་པའི་ཆ་གཉིས་མེད་པ་སྟེ། དྲོ་བར་གྱུར་པ་ལས་དྲན་པ་ཉེ་བར་གཞག་པ་གཙོ་བོའོ། །རྩེ་མོར་གྱུར་པ་དང། ཡང་དག་པ་གཙོ་ཞེས་བྱའོ། །དེ་ལྟར་དད་པས་སྦྱིན་པ་ནི། རང་གི་མི་མཐུན་པའི་ཕྱོགས་ཟད་པ་དང་ཡང་ཐོབ་པ་ནི་སྟོབས་སོ། །དེ་ལྟར་མུན་པ་རབ་ཏུ་བསལ་བ་ལས་གཞན་ངེས་པར་འབྱེད་པའི་གཉིས་སུ་མེད་པ་སྟེ། བཟོད་པའོ། །རྫུ་འཕྲུལ་གྱི་རྐང་པ་གཙོ་བོའོ། །ཆོས་ཀྱི་མཆོག་ལ་དབང་པོ་དད་སྟོབས་གཙོ་བོའོ་ཞེས་སོ། །དེ་ལྟར་མངོན་པར་འདུས་བྱས་པའི་ཕྱིའི་གཟུང་བ་ནི། དད་པ་ཤིན་ཏུ་ལྷག་པ་མཐོང་བའི་ལམ་མཐར་ཐུག་པ་ནི། ཆོས་ཀྱི་དབྱིངས་ཀྱི་སྤྱོད་ཡུལ་ལོ། །བྱང་ཆུབ་ཀྱི་ཡན་ལག་བདུན་ནི། དེ་ལྟར་ཏིང་ངེ་འཛིན་བྱང་ཆུབ་ཀྱི་ཡན་ལག་དང༌། སེམས་ཅན་གྱི་དོན་དུ་བྱང་ཆུབ་སྨོན་པ་ཐོས་པར་ལྷག་པར་འགྲོ་བ་ནི། ཡང་དག་པའི་ཚད་མའི་མཚན་ཉིད་དེ། ཆོས་རྣམ་པར་འབྱེད་པ་བྱང་ཆུབ་ཀྱི་ཡན་ལག་གོ །རང་བཞིན་གྱི་བདག་ནི་ཆོས་ཅན་གྱིས་རྣམ་པར་བཅད་པའི་མཚན་ཉིད་དོ། །དེ་དང་ལྷན་ཅིག་
རང་གི་ལམ་གྱིས་བདག་ཏུ་བྱས་པའི་རྒྱུ་མཚན་ལ་བརྟེན་ནས་དགའ་བ་གསལ་བ་སྟེ། དགའ་བ་ཡང་དག་བྱང་ཆུབ་ཀྱི་ཡན་ལག་གོ །ཇི་ལྟར་ཆོས་ཅན་གྱི་ཤིན་ཏུ་འགྲོ་བས་མི་མཐུན་པའི་ཕྱོགས་ཀྱི་བག་ལ་ཉལ་གྱི་བདག་ཉིད་ལུས་དང་སེམས་ཀྱི་ལས་རབ་ཏུ་གསལ་བ་སྟེ། ཤིན་ཏུ་སྦྱངས་པ་ཡང་དག་བྱང་ཆུབ་ཀྱི་ཡན་ལག་གོ །ཚད་མེད་པ་བཞིའི་བྱང་ཆུབ་དེ་བཞིན་དུ་ཡེ་ཤེས་ཀྱི་མཐར་ཐུག་པར་གཟུང་བའི་མཚན་ཉིད་དེ། ཏིང་ངེ་འཛིན་གྱི་བྱང་ཆུབ་ཀྱི་ཡན་ལག་གོ །དེ་ལྟར་སྦྱིན་པའི་རོ་མྱང་བའི་རང་བཞིན་གསལ་བླ་ན་མེད་པའི་ཡོན་ཏན་ལྷག་པ་ལས་ཏེ། བརྩོན་འགྲུས་ཡང་དག་བྱང་ཆུབ་ཀྱི་མཚན་ཉིད་དོ། །སེམས་ཀྱི་དོན་དུ་དྲན་པ་དེ་ལྟར་འདུལ་བའི་རིག་པ་ཕ་རོལ་ཏུ་ཕྱིན་པའི་ཡོན་ཏན་གྱི་ཡང་དག་པའི་དབྱེ་བས་མཉམ་པའི་འཇུག་པའི་རྒྱུ་མཚན་མ་འོངས་པ་རྟོགས་པའི་རང་བཞིན་གསལ་བ་སྟེ། བཏང་སྙོམས་ཡང་དག་བྱང་ཆུབ་ཀྱི་ཡན་ལག་གོ །དེ་ཙམ་གྱིས་འདིར་ཡང་དག་བྱང་ཆུབ་ཀྱི་དགེས་ཀྱི་ཆ་ཤས་འབྱུང་བ་ཞེས་པ་ནི། བྱང་ཆུབ་ཀྱི་ཡན་ལག་གོ །འདི་རྣམས་ཀྱིས་ཉོན་མོངས་པའི་སྒྲིབ་པ་ལ་གཉེན་པོའི་ཕྱོགས་བླངས་ཏེ། ཤེས་བྱའི་སྒྲིབ་པ་བཅོམ་པ་ནི་བསྒོམ་པའི་ལམ་གྱིས་རབ་ཏུ་གསལ་བའོ། །ལམ་ཡན་ལག་བརྒྱད་ནི་འདི་ལྟ་སྟེ། ཡང་དག་པའི་ལྟ་བ་ནི། ཆོས་ཐམས་ཅད་ལ་བདག་མེད་པའི་མཚན་ཉིད་མཉམ་པའི་རྣམ་པར་འབྱེད་པའི་སྤྱོད་ཡུལ་ལོ། །སྡུག་བསྔལ་གྱི་འཇིགས་པ་ཕྱིན་ཅི་ལོག་ཤིན་ཏུ་ཕྲ་བའི་རྣམ་པར་ཤེས་པ་རབ་སྟེ། ཡང་དག་པའི་རྟོག་པའོ། །འདིར་གང་ཞིག་སྦྱིན་པ་བཏང་བ་ནི། སྤང་བར་བྱ་བ་མངོན་དུ་གྱུར་བ་བྱ་བའི་སྨོན་ལམ་སྟེ། ཡང་དག་པའི་དག་ཤིན་ཏུ་རྟོགས་པ་དེ་ཁོ་ན་དང་སེམས་ཅན་ལ་འཇུག་པའི་བརྗོད་པའོ། །ཡང་དག་པའི་ལས་ཀྱི་མཐའ་རྣམ་པའི་བྱེད་བྲག་རབ་ཏུ་གསལ་བའི་ནི་སེམས་ཅན་བསྐྱེད་པའོ། །སེམས་ཅན་ལ་འཇུག་པའི་ལུས་ཀྱི་ལས་ཏེ། ཡང་དག་པའི་འཚོ་བའོ། །རིགས་པའི་ཆུས་བརླན་པའི་སྐྱེ་བ་ནི། ཚད་མེད་པ་བསྐྱེད་པ་རང་གི་ཚོགས་སུ་འགྲོ་བ་དང༌། རོ་མྱང་བ་སྟེ། ཡང་དག་པའི་རྩོལ་བའོ། །ས་གོང་ནས་གོང་དུ་རབ་ཏུ་ཞི་བའི་རིགས་ཀྱི་རྒྱུད་དད་དུས་ཀྱིས་
བསྲུབས་པའི་ལུས་ཀྱི་བདེ་བས་སྤྲུལ་པའི་ལས་སྤོབས་པར་གྱིས་ཤིག་པ་སྟེ། ཡང་དག་པའི་དྲན་པའོ། །དྲན་པ་ལ་གནས་པ་འདིས་ནི་རབ་ཏུ་གསལ་བ་སྟེ། བྱམས་པས་བདག་ཏུ་བྱས་པ་དང༌། སྨོན་ལམ་གྱི་རྗེས་སུ་ཞུགས་པ་དང༌། ཆོས་ཚད་མེད་པ་དང༌། བགྲང་བ་ལས་འདས་པས་ཡང་དག་པའི་བྱང་ཆུབ་བོ། །ལུས་ཀྱི་ལས་རྗེས་སུ་རྟོགས་པའི་ཁྱད་པར་གྱི་ཡོན་ཏན་མངོན་པར་འདོད་པ་ལ་བརྟེན་ནས་རྣམ་པར་རྟོག་པའི་ཤེས་པས་རབ་ཏུ་གནས་པ་ཞེས་པའི་མིང་ཅན་གྱི་ཐོག་མར་བསམ་གཏན་གྱི་མཚན་ཉིད་དེ། ཡི་དམ་མོ། །དེ་ལྟར་ཡོངས་སུ་གོམས་པ་ནི། དེ་ལྟར་བྱང་ཆུབ་ཀྱི་ཕྱོགས་ཀྱི་ཆོས་སུམ་ཅུ་རྩ་བདུན་མ་ལུས་པར་ཤེས་པ་མངོན་པར་བསྡུས་པའི་མཚན་ཉིད་དོ། །བདེན་པ་བཞི་ནི་སྡུག་བསྔལ་གྱི་བདེན་པ་ཕུང་པོའི་མཐར་ཐུག་པའི་མཚན་ཉིད་དོ། །འཕགས་པ་རྣམས་ཀྱི་སོ་སོའི་རིགས་ཏེ། ཀུན་འབྱུང་གི་བདེན་པའོ། །ཡང་དག་པའི་བསྡུས་པ་ནི་ཇི་སྐད་དུ་སྡུག་བསྔལ་བར་འདོད་པ་འདུས་བྱས་པའི་རྐྱེན་གྱི་སྐྱེ་བ་ནི། སྡུག་བསྔལ་གྱི་རྒྱུ་སྟེ། འགོག་པའི་བདེན་པའོ། །ཆོས་ཐམས་ཅད་ཇི་ལྟ་བ་བཞིན་དུ་ཡོངས་སུ་བརྟགས་པའི་མ་སྐྱེ་པའི་མཚན་ཉིད་དོ། །འགྲོ་བ་ཆེན་པོ་སོ་སོ་ཕྱོགས་ལས་བྱུང་བ་དེ་ལྟར་ཤིན་ཏུ་འགྲོ་བའི་ལམ་གྱི་བདེན་པའོ། །བྱང་ཆུབ་ཡོངས་སུ་གྱུར་པ་ལས་བྱམས་པ་ཆེན་པོ་རབ་ཏུ་རྣམ་པར་རྟོག་པ་ལས་ཡང་དག་པར་བསྡུས་པའི་ཆོས་རྗེས་སུ་དྲན་པ་དང༌། དེ་ལྟར་བདེན་པའི་རབ་ཏུ་བྱེད་པ་ལས་ཡང་དག་པའི་མངོན་པར་བསྡུས་པ་ཆོས་ཐམས་ཅད་མཉམ་པ་ཉིད་ལ་མོས་པའོ། །དེ་ལྟར་དམིགས་པ་ནི་བསམ་གཏན་བཞི་རྣམས་སོ། །དེ་ལར་རྣམ་པར་རྟོག་པ་དང་བཅས་པ་ནི་རྣམ་པར་སྤྱོད་པའོ། །རྣམ་པར་སྤྱོད་པ་ནི་དགའ་བ་སོ་སོར་སྐྱེ་བ་སྟེ། དང་པོའི་བསམ་གཏན་ནོ། །རྣམས་པར་རྟོག་པ་དང་།རྣམ་པར་དཔྱོད་པ་སྤང་བ་དང་བཅས་པ་ནི་གཉིས་པའོ། །དགའ་བ་སྤངས་པའི་བཏང་སྙོམས་ནི་དྲན་པ་ཡང་དག་པར་སྦྱོར་བ་སྟེ་གསུམ་པའོ། །སྡུག་བསྔལ་ཡང་མ་ཡིན་པའི་བཏང་སྙོམས་དྲན་ཡོངས་སུ་དག་པ་ནི་བཞི་པའོ། །དེ་ལྟར་རབ་ཏུ་ཞི་བའི་མཐར་ཤིན་ཏུ་འདོད་ཆགས་
སེམས་ཀྱི་རྣམ་པ་ལས་བྱུང་བ་མཐའ་ཡས་པ་སེམས་ཅན་ཡོངས་སུ་བཏང་བ་བྱང་ཆུབ་སེམས་དཔའི་ལམ་ཡོངས་སུ་རྫོགས་པ་སྟེ་ཚད་མེད་པ་བཞིའོ། །སེམས་ཅན་ཚད་མེད་པའི་དོན་དུ་ཚོགས་ལ་དམིགས་པ་ནི། འདི་ལྟ་སྟེ། བྱམས་པས་སེམས་ཅན་ཐམས་ཅད་ལ་ཕན་པ་དང༌། བདེ་བས་ཉེ་བར་བསྡུས་པའི་རྒྱུ་མཚན་གྱི་མཐར་ཐུག་པ་དང༌། རྣམ་པའི་མཐར་ཐུག་པར་བྱང་ཆུབ་ཀྱི་ལམ་གྱི་རྣམ་པའོ། །དེ་ལྟར་མ་རིག་པའི་སྡུག་བསྔལ་དང་སེམས་ཅན་ལ་སྙིང་རྗེའོ། །དེ་ལྟར་རབ་ཏུ་བསྒྲུབས་པ་གཉེན་པོའོ། །ཕྱོགས་གང་ཞིག་རྣམ་པ་རྣམས་ནི་དགའ་བའོ། །རང་བཞིན་གྱི་བདག་ཉིད་ཀྱི་ས་འབྱུང་བ་ནི་ཆོས་ཐམས་ཅད་རྟོགས་པའི་རིགས་དང༌། བྱང་ཆུབ་ཏུ་སེམས་བསྐྱེད་པ་སྦྱིན་པ་ནི། གང་ཞིག་རིགས་ཀྱི་དགེ་བ་སེམས་ཅན་གྱི་དོན་དུ་བདེ་བ་བསྐྱེད་པར་རབ་ཏུ་སྒྲུབ་པའོ། །བདེ་བའི་རྗེས་སུ་དངོས་པོ་ལས་བྱུང་བའི་བཏང་སྙོམས་བསྒོམ་པའི་བྱེ་བྲག་གི་རྗེས་སུ་འགྲོ་བའི་སེམས་ཅན་སྒྲོལ་བའི་ལས་འཇུག་པའི་རིམ་པས་རང་གི་ཏིང་ངེ་འཛིན་གྱི་བདེ་བའི་རོ་མྱོང་བ་ཐམས་ཅད་བག་མེད་པ་ལ། གཉེན་པོའི་ཕྱོགས་འབྱུང་བའི་སེམས་ཀྱི་དཀྱིལ་དུ་གནས་པའི་རྣམ་པའོ། །དེ་ལྟར་ཚད་མེད་པར་གྲོལ་བ་རྣམས་རྗེས་སུ་འཛིན་པ་ནི་ཚད་མེད་པའི་སེམས་སོ། །བསམ་གཏན་གྱིས་བསྐྱེད་པའི་སེམས་ཚད་མེད་པའི་ཆོས་སོ། །སོ་སོར་ལྡན་པའི་དོན་དུ་བདག་མེད་པའི་ཆོས་བདེ་བའི་བྱང་ཆུབ་ཚད་མེད་པ་ལ་འཇུག་པ་ཕུན་སུམ་ཚོགས་པ་ལ་ཐམས་ཅད་དང་ལྡན་པས་སོ་སོར་དམིགས་པའི་གཙོ་བོའི་གཟུགས་ཀྱི་འདུ་ཤེས་ཀྱི་གཉེན་པོའི་ཕྱོགས་འབྱུང་བ་དང༌། དེའི་ཟག་པ་ནི་གཟུགས་མེད་པའི་སྙོམས་པར་འཇུག་པ་འདི་ལྟ་སྟེ། ནམ་མཁའ་ལྟ་བུ་སྟོང་པ་ཉིད་ལ་སྙོམས་པར་འཇུག་པའོ། །དེ་ལྟར་གཟུགས་ནི་ཐོགས་པ་དང་བཅས་པ་སྣ་ཚོགས་པའི་འདུ་ཤེས་མཉམ་པའི་རིམ་པ་སྟེ། ནམ་མཁའ་མཐའ་ཡས་ཞེས་སོ། །རབ་ཏུ་སྦྱོར་བ་གསལ་བའི་བཏང་སྙོམས་ཀྱི་རྣམ་པ་སེམས་ཀྱིས་གཟུང་བའི་མཚན་ཉིད་དེ་ནམ་མཁའི་འདུ་ཤེས་ངེས་པ་ལས་མཐར་རྣམ་པར་ཤེས་པ་ཞེས་ཏེ། རྣམ་པར་ཤེས་པ་སྣ་ཚོགས་པའི་མཐའ་ཡས་པ་རྫོགས་
པའོ། །དེ་བཞིན་ཉིད་དུ་མེད་པ་ཇི་ལྟར་ཞེས་ཏེ། ཅི་ཡང་མེད་པའི་སྐྱེ་མཆེད་རྫོགས་པའོ། །དེ་ལྟར་འདུ་ཤེས་པ་རྣམས་དང་འདུ་ཤེས་མེད་པའི་སྐྱེ་མཆེད་རྫོགས་པའོ། །དེ་རྣམས་ཞི་བའི་གནས་པ་བཞིན་ནོ། །འདོད་པ་མེད་པའི་རྣམ་པ་གསལ་བའི་དམིགས་པ་ཐམས་ཅད་ཐོགས་པ་མེད་པའི་བྱ་བའི་ལས་གཞན་པའོ། །ཇི་ལྟར་མངོན་པར་དགོངས་པའི་སྣང་བས་གསལ་བའི་དོན་དུ་རྣམ་པར་ཐར་པ་བརྒྱད་དེ། དེ་ལྟར་ངེས་པར་གཟུགས་ཀྱི་འདུ་ཤེས་ཀྱི་དབྱེ་བའི་འདོད་པའི་གཟུགས་ནི། མཐོང་བ་ལས་འདས་པ་དང་པོའོ། །ངེས་པར་གཟུགས་ཀྱི་འདུ་ཤེས་ཀྱིས་བསམ་གཏན་གྱི་བདག་ཉིད་ཀྱི་གཟུགས་ཕྱིའི་གཟུགས་ལས་འདས་པའི་གཉིས་པའོ། །ཤིན་ཏུ་དགེ་བ་ལ་མོས་པའི་གཟུགས་སུ་འདོད་པ་ལ་གནས་པ་ལས་འདས་པ་ནི་གསུམ་པའོ། །འདོད་པ་མིན་པ་ལས་གསལ་བ་དང༌། གཟུགས་ཀྱི་ཟག་པ་དང་བཅས་པའི་གཟུགས་ལས་སྙོམས་པར་འཇུག་པའོ། །འགོག་པའི་སྙོམས་པར་འཇུག་པ་དང༌། དེ་ལྟར་འདིར་འདུ་ཤེས་མེད་འདུ་ཤེས་མེད་མིན་གྱི་སྐྱེ་མཆེད་ལས་མཉམ་པར་གཞག་པ་སྔོན་གྱི་སེམས་མངོན་པར་འདུས་བྱས་པ་འགོག་པ་སྟེ། རབ་ཏུ་གསལ་བ་ཆོས་ཀྱི་རང་བཞིན་བསྐྱེད་པའི་སྣང་བས་སྒྲིབ་པ་སོ་སོར་བསྐྱེད་པའི་མཚན་ཉིད་དང༌། དེ་ལྟར་བྱས་པའི་འདོད་པས་ངེས་པར་གསལ་བ་ལ་གནས་པའི་ནུས་པའོ། །རང་དང་གཞན་གྱི་འབྲེལ་པ་འཆད་པའི་སྣ་ཚོགས་པའི་རྣམ་པ་སྔོན་གྱི་གནས་ལ་སྙོམས་པར་འཇུག་པའོ། །བསམ་གཏན་བཞི་ངེས་པར་ཟག་པ་མེད་པ་དང་གཟུགས་མེད་པའི་སྙོམས་པར་འཇུག་པ་དང༌། འགོག་པའི་སྙོམས་པར་འཇུག་པའོ། །དེ་ལྟར་འདིར་བྱང་ཆུབ་སེམས་དཔའ་རྣམས་ནི་ཉོན་མོངས་པ་ལས་མངོན་དུ་ཕྱོགས་པའི་ནུས་པས་རབ་ཏུ་གསལ་བ། སེང་གེ་རྣམ་པར་བསྒྱིངས་པའི་ཏིང་ངེ་འཛིན་ཏོ། །མཉམ་པར་མ་གཞག་པའི་མཚམས་ཀྱི་རྗེས་སུ་བསམ་གཏན་དང་པོའི་རྗེས་སུ་འགོག་པ་ལ་སྙོམས་པར་ཞུགས་ནས་ཡང་ཕུང་པོ་ལ་མཉམ་བཞག་ཅེས་པའོ། །དེ་ལྟར་སེམས་ཅན་ཡོངས་སུ་སྨིན་པའི་རྗེས་སུ་རིམ་པ་གསལ་བ་མི་རྟག་པར་བསྐྱེད་པའི་སྒོ་ལས་མངོན་པར་གསལ་བའི་བདག་ཉིད་གྲུབ་པའི་རང་གི་
སེམས་ཀྱིས་དབང་དུ་གནས་པའི་མངོན་པར་ཤེས་པའི་ཕ་རོལ་ཏུ་ཕྱིན་པ་དང་ལྡན་པ་ཤེས་རབ་ཏུ་སྣང་བ་ནི། ཆོས་ཐམས་ཅད་ཡང་དག་པར་བསྡུས་པའི་མཚན་ཉིད་དོ། །རྣམ་པར་ཐར་པའི་སྒོ་གསུམ་ནི། རྣམ་པར་ཐར་པའི་སྒོ་སྟོང་པ་ཉིད་དེ། དེ་ལྟར་ཆོས་ཀྱི་བདག་གི་དབྱེ་བས་ཕུང་པོ་ལ་སོགས་པའི་རྫས་སྣ་ཚོགས་པའི་མཚན་ཉིད་དོ། །དེ་ལྟར་ཕུང་པོ་ལ་སོགས་པའི་དགེ་བའི་ཡོངས་བརྟགས་པའི་རྒྱུ་མཚན་དུ་སྒོམ་པ་སྟོང་པ་ཉིད་བཞིན། འཛིན་པའི་བདག་ཉིད་སྣ་ཚོགས་པའི་བདག་ཉིད་ཉོན་མོངས་པའི་ཤེས་པ་གཉེན་པོའི་ཕྱོགས་པ་ལས་བྱུང་བའི་རྒྱུ་མཚན་རྣམ་པར་ཐར་པའི་སྒོའོ། །རྒྱུ་མཚན་མེད་པར་བྱས་པའི་ཕྱིའི་ཕུང་པོ་ཉོན་མོངས་པའི་ཤེས་པ་གཉེན་པོའི་ཕྱོགས་འབྱུང་བ་ཐོགས་པ་མེད་པ་རབ་ཏུ་གསལ་བའི་སྨོན་ལམ་མེད་པའི་རྣམ་པར་ཐར་པའི་སྒོའོ། །དེ་ལྟར་རྣམ་པར་ཐར་པའི་སྒོའི་བྱེ་བྲག་གི་ས་འདས་པའི་ཕུང་པོ་དང༌། སྐྱེ་མཆེད་དང་ཁམས་རབ་ཏུ་རྒྱས་པ་ཕ་རོལ་ཏུ་ཕྱིན་པའི་ཚོགས་ཡོངས་སུ་རྫོགས་པའི་དོན་དུའོ། །གཞན་རྣམ་པ་ཐམས་ཅད་མཁྱེན་པ་མཐོང་བར་འགྱུར་རོ། །དངོས་པོ་མཉམ་པའི་མངོན་སུམ་དུ་མངོན་པར་ཤེས་པ་དྲུག་ནི། འདི་ལྟ་སྟེ། ལྷའི་མིག་གི་མངོན་པར་ཤེས་པ་དང་དེ་ལྟར་ལྷག་མ་རྣམས་དག་པ་དད་མ་དག་པའི་རྣམ་པའི་མཐར་ཐུག་པའི་གཟུགས་ཀྱི་སྤྱོད་ཡུལ་ཏེ། ལྷའི་རྣ་བའི་མངོན་པར་ཤེས་པའོ། །དེ་ལྟར་འདུན་པའི་སྤྱོད་ཡུལ་ནི་དེ་བཞིན་གཞན་གྱི་སེམས་ཐམས་ཅད་ཤེས་པའི་སྤྱོད་ཡུལ་ཏེ། གཞན་གྱི་སེམས་ཤེས་པའི་མངོན་པར་ཤེས་པའོ། །བདག་དང་གཞན་གྱི་ལྷག་མ་མེད་པའི་སྐྱེ་བའི་དབྱེ་བའི་སྤྱོད་ཡུལ་སྔོན་གྱི་བག་ཆགས་དྲན་པའོ། །རྫུ་འཕྲུལ་གྱི་མངོན་ཤེས་ཀྱི་ཡེ་ཤེས་ནི་གསུམ་སྟེ། འདུལ་བའི་རྗེས་སུ་སྐྱེས་པའི་ཇི་ལྟར་མངོན་པར་དགོངས་པ་ལྷག་པ་མེད་པའི་འཇིག་རྟེན་གྱི་ཁམས་ཡང་དག་པར་མཐོང་བའོ། །ནམ་མཁའ་ལ་འགྲོ་བའི་བྱ་བས་རབ་ཏུ་བརྟགས་པའི་ཇི་ལྟ་བ་བཞིན་དུ་མངོན་པར་དགོངས་པའི་བདག་ཉིད་ཡང་དག་པར་མཐོང་བའོ། །ཟག་པ་ཟད་པའི་ཡེ་ཤེས་ནི་དེ་ལྟར་ཟག་པ་མེད་པ་ཇི་ལྟ་བ་རབ་ཏུ་གསལ་བའི་མ་རིག་པའི་ཆགས་པ་དང་བྲལ་བའོ། །ལྔ་ནི་དེ་ལྟར་མི་ཟད་པར་སོང་བ་
ཡེ་ཤེས་རབ་ཏུ་གསལ་བའི་རྒྱུས་བརླན་པ་དང༌། བྱང་ཆུབ་ཀྱི་སེམས་སྦྱིན་པ་གསུམ་ནི་ཇི་ལྟར་ཕྱིན་ཅི་ལོག་ཅེས་པ་དེ་ལྟར་དུ་མངོན་པར་ཤེས་པ་ནི་ཉན་ཐོས་ཀྱི་ལམ་ལས་ཐུན་མོང་མ་ཡིན་པར་ཡོངས་སུ་རྫོགས་པའི་རྒྱུ་མཚན་ལྷུན་གྱིས་གྲུབ་པ་ཕྱིའི་ཕ་རོལ་ཏུ་ཕྱིན་པའི་ཚོགས་སོ། །ལམ་མཉམ་པར་མངོན་པར་ཡང་དག་པར་བསྡུས་པའི་མཚན་ཉིད་དོ། །རང་གི་སྟོབས་མཐའ་ཡས་པ་རྣམ་པ་ཐམས་ཅད་མཁྱེན་པ་ལ་མངོན་པར་དགོངས་པའི་གནས་ལས་རིང་དུ་སྤྱོད་པའོ། །མཉམ་པའི་མཆོག་ཏུ་དགེ་བའི་གཅིག་འཛིན་པ་རབ་ཏུ་གསལ་བ་སྟེ། བསམ་གཏན་དང་པོའི་མཚན་ཉིད་དོ། །ཇི་ལྟར་དམིགས་པའི་རྗེས་སུ་འབྲངས་པའི་ཕ་རོལ་ཏུ་ཕྱིན་པའི་དབྱེ་བ་སྟེ། འཛིན་པའོ། །དེ་ལྟར་ཆོས་ཐམས་ཅད་ཨ་ལས་བྱུང་བའི་སྒོའོ་ཞེས་པའོ། །ཆོས་ཀྱི་བརྡའི་རྗེས་སུ་འབྲངས་ནས་དབྱངས་དང་གསལ་བྱེད་དོ། །དེའི་དོན་གྱི་རྒྱུ་མཚན་གྱིས་ཤེས་པ་དང་ཕ་རོལ་ཏུ་ཕྱིན་པ་མ་ཡིན་པའི་རང་བཞིན་གསལ་བ་ངེས་པའི་རྒྱུ་ནི་ཏིང་ངེ་འཛིན་གྱི་གྲོགས་གཉེན་པོའི་ཕྱོགས་འབྱུང་བའོ། །གང་ཞིག་གཞན་གྱི་བྱང་ཆུབ་ཐོབ་པའི་སེམས་འཛིན་པའོ། །དེ་ལྟར་ཏིང་ངེ་འཛིན་གྱི་གཟུངས་རབ་ཏུ་གསལ་བ་རྡོ་རྗེ་ལྟ་བུའི་བསམ་གཏན་མངོན་སུམ་དུ་མཛད་པ་མཉམ་པའི་དངོས་པོ་ཨ་ལས་བྱུང་བའི་ཡེ་ཤེས་མཉམ་པའི་བདག་ཉིད་དེ། བག་ཆགས་ཐམས་ཅད་ཀྱི་རྗེས་ཀྱི་རྒྱུན་སྤངས་པ་སྙིང་རྗེ་ཆེན་པོའི་སྦྱོར་བས་སྤངས་པར་མཛད་པའོ། །ཆོས་ཀྱི་རྣམ་པར་ཐར་པ་མཐོང་བའི་རྣམ་པར་སྨིན་པ་མཉམ་པའི་བྱ་བ་ལ་གནས་པའོ། །ངེས་པའི་ཤེས་པའི་སྟོབས་ཀྱིས་མེ་ལོང་ལྟ་བུའི་ཡེ་ཤེས་སོ། །དེ་ལྟར་སྟོབས་བཅུ་ངེས་པ་ནི། འདི་ལྟ་སྟེ། གནས་དང་གནས་མ་ཡིན་པ་མཁྱེན་པའི་སྟོབས་ནི་དེ་ལྟར་ཐམས་ཅད་དང་རྒྱུ་དང་འབྲས་བུའི་ངེས་པའི་ཡེ་ཤེས་ཐོགས་པ་མེད་པའི་མཚན་ཉིད་དེ། གནས་བཞིན་ནོ། །གང་ཞིག་སྐྱེས་བུ་ཁོ་ནས་འཁོར་ལོས་སྒྱུར་བ་ཉིད་དང༌། སངས་རྒྱས་ཉིད་སོ་སོར་ཐོབ་ཀྱང་བུད་མེད་ཀྱི་སྐྱེ་བས་གནས་མ་ཡིན་ཞིང་མཐའ་ཡས་པ་བཞིན་ནོ་ཞེས་པ་ལ་སོགས་པ་ནི་སོ་སོར་ངེས་པར་མགོན་མ་ཡིན་ཞིང་བྱ་བ་མ་ཡིན་པས་ནུས་པ་མེད་པའོ་ཞེས་ཏེ། ལས་ཀྱི་རྣམ་པར་སྨིན་པ་མཁྱེན་པའི་སྟོབས་སོ། །ལས་མི་དགེ་བའི་རྣམ་པར་སྨིན་པ་གང་ཞིག་བདེ་བར་གཤེགས་པའི་ཡེ་ཤེས་ཀྱི་བྱ་བ་རྟོགས་པ་སྟེ། ཁམས་སྣ་ཚོགས་པ་མཁྱེན་པའི་སྟོབས་སོ། །དབྱིངས་ཀྱི་རིགས་སོ། །དེ་ལྟར་ཉན་ཐོས་རྣམས་ནི་རྣམ་པར་གཞག་པ་གཞན་དུ་ཤེས་པ་སྟེ། མོས་པ་སྣ་
ཚོགས་པ་མཁྱེན་པའི་སྟོབས་སོ། །རིགས་ཀྱི་དབྱེ་བས་ལྷ་རྣམས་ཀྱི་དབྱེ་བ་ལས་གྲོལ་བའོ། །ཉན་ཐོས་རྣམས་ཀྱི་སེམས་ཞུམ་པའི་སྣ་ཚོགས་པ་དབང་དུ་མཛད་དེ། ཆོས་ལ་མོས་པ་སྣ་ཚོགས་ཡང་དག་པར་འབྱུང་བ་སྟེ། དབང་པོ་མཆོག་དང་མཆོག་མ་ཡིན་པ་མཁྱེན་པའི་སྟོབས་སོ། །དབང་པོ་དང་བ་སྣ་ཚོགས་པ་ལ་མོས་པའི་དབྱེ་བས་སྣ་ཚོགས་པའི་ཏིང་ངེ་འཛིན་ལ་སྙོམས་པར་ཞུགས་པའི་ཡེ་ཤེས་ཀྱི་སྟོབས་ཏེ། སྣ་ཚོགས་པའི་ཏིང་ངེ་འཛིན་ཏོ། །བསམ་གཏན་དང་པོའི་མཚན་ཉིད་དོ། །རིང་དུ་སོང་བའི་མིག་གི་དོན་གྱིས་དབྱེ་བའི་རྗེས་སུ་རབ་ཏུ་བྱེད་པ་སྟེ། དམ་བཅས་པ་བཞིན་དུ་འགྲོ་བ་ཐམས་ཅད་མཁྱེན་པའི་སྟོབས་སོ། །དེ་ལྟར་བའི་ལམ་མོ།། དེ་ལྟར་སྣ་ཚོགས་པར་མི་ཟད་པར་འགྲོ་བ་ནི་མ་རིག་པ་སྟེ། བཟོད་པའི་འགྲོ་བ་དང༌། དེའི་འགོག་པའི་ཕྱོགས་སོ། །དེ་ནི་རབ་ཏུ་ཞི་བ་གཞན་ནོ། །གཞན་གྱི་དབྱངས་ཀྱི་རྗེས་སུ་རྟོགས་པའི་ཉན་ཐོས་སོ། །རང་འབྱུང་སྟེ། རང་སངས་རྒྱས་སོ། །སེམས་ཅན་ཐམས་ཅད་ཀྱི་སྒྲིབ་པའི་གཉེན་པོའི་ཕྱོགས་འབྱུང་བའི་བྱང་ཆུབ་སེམས་དཔའ་རྣམས་ཏེ། འཆི་འཕོ་བ་དང་སྐྱེ་བ་མཁྱེན་པའི་སྟོབས་སོ། །སྒྲིབ་པ་ཐམས་ཅད་ཀྱི་བག་ལ་ཞ་ལས་གྲོལ་བའི་རྣམ་པའི་ལྷག་མ་རྣམས་རྗེས་སུ་བཟུང་བའོ། །དེའི་རྣམ་པར་སྨིན་པའི་ཉོན་མོངས་པ་དང་རྣམ་པར་བྱང་བའི་སྤྱོད་ཡུལ་ལོ། །ལྷའི་མིག་གི་མངོན་ཤེས་སོ། །དེ་ལྟར་སྔོན་གྱི་གནས་རྗེས་སུ་དྲན་པ་མཁྱེན་པའི་སྟོབས་དང༌། ཟག་པ་ཟད་པ་མཁྱེན་པའི་སྟོབས་སོ། །འདིར་མེ་ལོང་ལྟ་བུའི་ཡེ་ཤེས་བཅོམ་ལྡན་འདས་ཀྱི་རང་བཞིན་གྱི་སྟོབས་ཀྱི་བྱེ་བྲག་གསལ་བར་མཛད་པའི་རྣམ་པར་མི་རྟོག་པ་མཉམ་པར་གནས་དང་གནས་མ་ཡིན་པའི་སྤྲོས་པ་དང་བཅས་པར་ཤིན་ཏུ་འགྲོ་བ་སྟེ། འདིའི་སྟོབས་ཕུན་སུམ་ཚོགས་པ་ཐམས་ཅད་ཀྱི་སྐྱོན་རབ་ཏུ་གསལ་བའོ།། མི་འཇིགས་པ་བཞི་ནི། ཡེ་ཤེས་མི་འཇིགས་པ་དང༌། སྤོང་བ་མི་འཇིགས་པ་དང༌། ཉོན་མོངས་པའི་རྒྱུ་ཡང་དག་པར་འབྱུང་བ་ལ་མི་འཇིགས་པ་དང༌། རྣམ་པར་བྱང་བའི་རྒྱུན་འབྱུང་བས་མི་འཇིགས་པའོ། །ཡེ་ཤེས་ཀྱི་ཡུལ་དེ་བཞིན་ཉིད་དང་བྱང་ཆུབ་བོ། །རིགས་པའི་རྗེས་སུ་ཐོབ་པའོ། །འཇིགས་པ་མེད་པས་ན་མི་འཇིགས་པའོ། །འདི་ནི་མཉམ་པ་ཉིད་ཀྱི་ཡེ་ཤེས་སོ། །ཡིད་བཞིན་གྱི་ནོར་བུ་རིན་པོ་ཆེ་བཞིན་དུ་མཐོང་བ་དང་བཅས་པས་སེམས་ཅན་ཐམས་ཅད་ལ་མཉམ་པ་སེམས་རྣམ་པར་དག་པའི་ང་རྒྱལ་དུ་སྒོམ་པའོ། །དེ་ལྟར་ཤིན་ཏུ་འདས་པའི་སྦྱོར་བས་ཆོས་ཐམས་ཅད་མེ་ལོང་ལྟ་བུའི་ཡེ་ཤེས་རབ་ཏུ་གསལ་བའོ། །དོན་གྱི་མཐར་ཐུག་
པར་སེམས་ཅན་འདུལ་བ་དང་སྐྱེ་བས་བཟུང་བའི་གཏི་མུག་དང་བཅས་པ་གཞན་ལས་ཆོས་ཀྱི་སྐུ་བརྟེན་པའི་རྣམ་པའོ། །དེ་ལྟར་སོ་སོར་རིག་པ་ནི། དོན་སོ་སོ་ཡང་དག་པར་རིག་པ་སྟེ། སེམས་ཅན་ཐམས་ཅད་བདག་ཏུ་བྱས་པའི་རྣམ་པའི་ཡེ་ཤེས་ཤིན་ཏུ་ཕྲ་བ་རྣམས་ནི་ཆོས་སོ་སོ་ཡང་དག་པའོ། །དེའི་ཚུལ་ལས་བྱུང་བའི་མཚན་ཉིད་དོ། །ངེས་པའི་ཚིག་སོ་སོར་རིག་པའོ། །ངོ་བོ་ཉིད་ཀྱི་བརྡ་ལས་བྱུང་བའི་རྣམ་བྱང་སྟེ། སྤོབས་པ་སོ་སོ་ཡང་དག་པར་རིག་པའོ། །ཀུན་དགའ་བར་བསྐྱེད་པའི་རང་བཞིན་རབ་ཏུ་གསལ་བའི་རྣམ་དབྱེའོ། །སེམས་ཅན་གྱི་དོན་ལ་བྱེད་པས་བྱ་བ་སྒྲུབ་པའི་ཡེ་ཤེས་སོ། །རབ་ཏུ་གསལ་བའི་བདེ་བ་སེམས་ཅན་འདུལ་བའི་རྒྱུར་ལྷུན་གྱིས་གྲུབ་པའི་རྒྱུ་མཚན་རབ་ཏུ་གསལ་བའི་བྱམས་པ་ཆེན་པོའོ། །འདུལ་དཀའ་འདུལ་བའི་རྒྱུ་ནི་སྙིང་རྗེ་ཆེན་པོའོ། །དེ་ལྟར་ཆོས་ཀྱི་དབྱིངས་རྣམ་པར་དག་པའི་བདག་ཉིད་དོ། །ཉན་ཐོས་རྣམས་ལ་ཐུན་མོང་མ་ཡིན་པའི་སངས་རྒྱས་ཀྱི་ཆོས་ལ་མ་འདྲེས་པ་བཅོ་བརྒྱད་ནི་འདི་ལྟ་སྟེ། དེ་བཞིན་གཤེགས་པ་ལ་འཁྲུལ་པ་མི་མངའོ། །གཞན་དག་ནི་ཡང་དག་པར་འཁྲུལ་པས་མ་ཞི་བའི་རྒྱུ་ནི། ལུས་ཀྱི་སྐྱོན་ནོ། །ཅ་ཅོ་མི་མངའ་སྟེ། ཅ་ཅོ་ནི་ངག་གི་སྐྱོན་ནོ། །དྲན་པ་ཉམས་པ་མེད་དེ། དྲན་པ་ཉམས་པ་ནི་སེམས་ཀྱི་སྐྱོན་ནོ། །སེམས་ཅན་སྣ་ཚོགས་པ་རྣམས་ལ་ཐ་དད་པའི་འདུ་ཤེས་ལ་སོགས་པ་དང་ལྡན་པ་མི་མངའོ། །མཉམ་པར་མ་བཞག་པའི་སེམས་མི་མངའོ། །རྨོངས་པ་དང་བཅས་པ་ནི་སེམས་ཅན་གྱི་དོན་རྣམ་པར་གཡེངས་པའི་མཚན་ཉིད་དོ། །སོ་སོར་མ་བརྟགས་པའི་བཏང་སྙོམས་མི་མངའོ། །བློ་དམན་པས། སྔོན་སེམས་ཅན་གྱི་དོན་ལ་ཐུགས་ཆུང་ངུ་ལ་གཞོལ་བའོ། །འདི་རྣམས་ནི་ལྷག་པའི་ཚུལ་ཁྲིམས་ཀྱི་བསླབ་པའི་རྒྱུ་མཐུན་པའོ། །རབ་ཏུ་མི་གནས་པའི་མྱ་ངན་ལས་འདས་པའི་རྒྱུ་ནི་དད་པས་བཅོམ་པ་མེད་པའོ། །སྡིག་པ་ལ་རབ་ཏུ་མི་གནས་པའི་མྱ་ངན་ལས་འདས་པའི་རྒྱུ་ནི། སྒྱུ་བར་འགྲོ་བའོ། །འདུན་པ་ཉམས་པ་མེད་དེ་སྡིག་པ་ལ་རབ་ཏུ་མི་གནས་པའི་མྱ་ངན་ལས་འདས་པའི་གང་ཞིག་དགའ་བས་སོ། །བརྩོན་འགྲུས་ཉམས་པ་མེད་དེ། སྡིག་པའི་དོན་དུ་ཚོའི་འདུས་བྱས་པ་སྣ་ཚོགས་པ་བྱིན་གྱིས་བརླབས་པའོ། །ཤེས་རབ་ཉམས་པ་མེད་དེ། སྡིག་པའི་མཐའ་ལས་འདས་པའི་འགྲོ་བའི་བྱ་བ་ལ་སྐུའི་ཡོན་ཏན་དྲུག་འགྱུར་གྱི་དབྱེ་བའོ། །རྣམ་པར་གྲོལ་བ་ཉམས་པ་མེད་པ་སྟེ། སྡིག་པས་ཉན་ཐོས་མྱ་ངན་ལས་འདས་པའི་རྒྱུ་མཚན་དུ་གཟུང་བའོ། །རྣམ་པར་གྲོལ་བའི་ཡེ་ཤེས་ཉམས་པ་མེད་དེ། སྡིག་པ་ལ་སོགས་
པ་མ་ཡིན་པ་ནི་རྣམ་པར་འབྱེད་པ་ལྔས་མཛད་པ་སེམས་ཅན་གྱི་དོན་ཤེས་པའི་རྐྱེན་གྱི་ཡོངས་སུ་མྱ་ངན་ལས་འདས་པ་མཉམ་པ་སྣ་ཚོགས་པར་འགྲོ་བའོ། །འདི་རྣམས་ནི་ལྷག་པའི་སེམས་ཀྱི་བསླབ་པའི་རྒྱུ་མཐུན་པའི་བདག་ཉིད་དོ། །མྱ་ངན་ལས་འདས་པ་ལ་རབ་ཏུ་མི་གནས་པའི་རྐྱེན་གྱིས་སྐུའི་ཕྲིན་ལས་ཐམས་ཅད་ཡེ་ཤེས་ཀྱི་སྔོན་དུ་འགྲོ་ཞིང་ཡེ་ཤེས་ཀྱི་རྗེས་སུ་འབྲང་ངོ༌། །སྐུའི་ཕྲིན་ལས་མ་ལུས་པ་རྣམས་གནས་དང་རིམ་བཞིན་དུ་འབུམ་བྱེ་བའི་འཇིག་རྟེན་གྱི་ཁམས་ཐམས་ཅད་དུ་སེམས་ཅན་མོས་པའི་དབང་གིས་དབྱེ་བའི་མཐའི་རབ་ཏུ་བྱེད་པའི་སྣང་བ་བླ་ན་མེད་པའི་ཡེ་ཤེས་ཀྱི་རྗེས་སུ་ལྡན་པའོ། །ཡེ་ཤེས་ཀྱི་རྗེས་སུ་རྟོགས་པ་དེ་དང༌། གཞན་ལོངས་སྤྱོད་རྫོགས་པའི་སྦྱིན་པའོ། །དེ་ལྟར་ངག་གི་ལས་ཐམས་ཅད་ཡེ་ཤེས་ཀྱི་སྔོན་དུ་འགྲོ་ཞིང་ཡེ་ཤེས་ཀྱི་རྗེས་སུ་འབྲང་ངོ༌། །གསུང་གི་ཕྲིན་ལས་ཐམས་ཅད་ཀྱི་རྣམ་པར་རྟོག་པ་ཡེ་ཤེས་ཀྱི་སྔོན་དུ་འགྲོ་བ་ནི་སྔོན་བཞིན་ནོ། །ཐུགས་ཀྱི་ཕྲིན་ལས་ཐམས་ཅད་ནི་བྱམས་པའི་ཕྱོགས་ཏེ་ཡེ་ཤེས་ཀྱི་སྔོན་དུ་འགྲོ་ཞིང་ཡེ་ཤེས་ཀྱི་རྗེས་སུ་འབྲང་ངོ༌། །དེ་ལྟར་དངོས་པོ་མཉམ་པ་ལྷག་མ་མ་ལུས་པར་སེམས་ཅན་གྱི་དོན་དུ་ཁྱབ་པ་ཇི་ལྟ་བ་བཞིན་དུ་རང་རང་གི་རྣམ་པར་སྨིན་པ་དགེ་བའི་བྱིན་གྱིས་བརླབས་པ་ཡོངས་སུ་མྱ་ངན་ལས་འདས་པ་ནི། བདེ་བར་ལོངས་སྤྱོད་པའི་རྣམ་པ་མ་ཡིན་ནོ། །འདས་པའི་དུས་ཀྱི་ཡེ་ཤེས་མ་ཆགས་པ་མ་ཐོགས་པར་རབ་ཏུ་མཐོང་ངོ༌། །མ་འོངས་པའི་དུས་ཀྱི་ཡེ་ཤེས་མ་ཆགས་པ་མ་ཐོགས་པར་མཐོང་བ་ལ་རབ་ཏུ་འཇུག་གོ །ད་ལྟར་གྱི་དུས་ཀྱི་ཡེ་ཤེས་མ་ཆགས་པ་མ་ཐོགས་པར་མཐོང་བ་ལ་རབ་ཏུ་འཇུག་གོ །དེ་རྣམས་ནི་ལྷག་པའི་ཤེས་རབ་ཀྱི་བསླབ་པའི་རྒྱུ་མཐུན་པའི་བདག་ཉིད་དོ། །ཉན་ཐོས་རྣམས་ཀྱི་ཡེ་ཤེས་བླ་ན་མེད་པའི་ཡེ་ཤེས་ཐུན་མོང་མ་ཡིན་པའི་ཡེ་ཤེས་ལ་ལོངས་སྤྱོད་པའོ། །དེའི་རྣམ་པར་སྨིན་པའི་ཡེ་ཤེས་སེམས་ཅན་གྱི་དོན་དུ་འབྲེལ་པ་དང་ལྡན་པའི་ཡོངས་སུ་མྱ་ངན་ལས་འདས་པ་ཕུན་སུམ་ཚོགས་པའོ། །དེ་ལྟར་ཐུན་མོང་མ་ཡིན་པའི་བཅོམ་ལྡན་འདས་ནི། ཉན་ཐོས་དང་རང་སངས་རྒྱས་ཀྱི་བྱང་ཆུབ་པོ། །དགེ་སྦྱོང་གི་འབྲས་བུ་བཞི་ནི། རྒྱུན་དུ་ཞུགས་པའི་འབྲས་བུ་རྣམས་ནི། དེ་ལྟར་གཞན་བསྐྱེད་པ་དང་སྟོན་པ་དང་སྒོམ་པའི་རྒྱུ་མཐུན་གྱི་ཤུགས་དྲག་པོས་རྟོགས་བཞིན་དུ་བདུན་པ་མངོན་པར་དགོངས་པ་ནི་རང་མྱ་ངན་ལས་འདས་པའི་ངེས་པ་སྟེ། གང་ཟག་གི་བདག་མེད་པ་རྣམས་དང༌། ཆོས་ལ་བདག་མེད་པ་རྣམས་བདེ་བ་དང་སྡུག་བསྔལ་དུ་འགྲོ་
བ་རྣམས་ལན་ཅིག་ཕྱིར་འོང་བའི་འབྲས་བུའོ། །བདེན་པ་མཐོང་བ་རྣམས་ནི་འདོད་པ་ཆགས་པ་རྗེས་ཀྱི་མཚན་ཉིད་དོ། །དེ་ལྟར་བདེན་པའི་རྗེས་སུ་སྦྱོར་བ་བཞི། ལན་ཅིག་ཕྱིར་འོང་བའི་འཇིག་རྟེན་པའི་མྱ་ངན་ལས་འདས་པར་འགྲོ་བ་སྟེ། ཕྱིར་མི་འོང་བའི་འབྲས་བུའོ། །ཤེས་རབ་ཀྱིས་འདོད་པ་ལ་ཆགས་པ་མ་ལུས་པར་སོང་ངོ༌། །ཕྱིར་མི་འོང་བའི་འཇིག་རྟེན་གཟུགས་དང་གཟུགས་མེད་པ་ཞིག་རྣམ་པར་ཐར་པར་མྱ་ངན་ལས་འདས་པའི་སྔོན་དུ་མཛད་པ་སྟེ། དགྲ་བཅོམ་པའི་འབྲས་བུའོ། །འཇིག་རྟེན་གསུམ་གྱི་ཆགས་པ་སྤངས་པའི་མངོན་སུམ་དུ་བྱང་ཆུབ་པའི་མཚན་ཉིད་ནི་འདིར་ཁྱད་པར་གྱི་དངོས་པོ་བསྐྱེད་པ་དང་སྟོན་པ་དང་འདུལ་བའི་མཐར་བརྗོད་པ་མེད་པའི་མངོན་དུ་མཛད་པའོ། །འདི་རྣམས་ཀྱིས་མྱ་ངན་ལས་འདས་པ་གཞན་ནོ། །འདིར་སོ་སོར་རྟོགས་པའི་བྱང་ཆུབ་པའི་རྐྱན་རང་གི་རྐྱེན་གྱི་བག་ཆགས་ཀྱི་ཁྱད་པར་དུ་འབྱུང་པའི་རྒྱུན་གྱིས་བཅིངས་པའི་ཡང་དང་པར་འབྱུང་བའོ། །རབ་ཏུ་ཞི་བ་དེའི་ཚེ་བཅིངས་པ་དང་ཕན་ཚུན་དང་ལྡན་པ་ཡང་དག་པར་མཐོང་བར་མཛད་པའི་རྒྱུའི་དངོས་པོ་ཞི་བྱམས་པ་ཆེན་པོའོ། །སྒྱུ་མས་རྣམ་པར་བརྟགས་པའི་ཆོས་ཀྱི་དབྱིངས་སོ་ཞེས་སོ་སོར་ཕྱེ་བའོ། །དེ་རྣམས་ཀྱི་མཉམ་པར་དེ་བཞིན་གཤེགས་པ་ཐམས་ཅད་ནི། རྣམ་པ་ཐམས་ཅད་མཁྱེན་པ་རྣམས་སོ། །དེ་རྣམས་ཀྱིས་དབང་པོའི་དྲན་པའོ། །ལོངས་སྤྱོད་རྫོགས་པའི་སྐུས་འཇིག་རྟེན་པའི་དོན་དུ་ཐམས་ཅད་ཤེས་པའི་རྗེས་ཀྱི་རིགས་རྣམས་ཡང་དག་པ་ཚད་མའི་ཆོས་ཅན་མཐོང་བ་དང་བསྒོམ་པའི་མཚན་ཉིད་དོ། །དེ་ལྟར་ཆོས་ཀྱི་སྐུ་དང༌། བདག་མེད་པའི་ཡེ་ཤེས་ཀྱི་མཚན་ཉིད་དོ། །ལོངས་སྤྱོད་རྫོགས་པའི་སྐུའོ། །དེ་ལྟར་ཁྱད་པར་གྱི་མཚན་ཉིད་རྣམས་ནི་རྣམ་པ་ཐམས་ཅད་མཁྱེན་པ་བརྟེན་པའོ། །དེ་ལྟར་བྱིན་གྱིས་བརླབས་པའི་རང་བཞིན་རབ་ཏུ་གསལ་བའི་དངོས་པོའོ་རང་བཞིན་ནི་ཐམས་ཅད་སྐྱོབ་པའི་རིགས་སྤྲུལ་པའི་སྐུའོ། །དེ་ལྟར་བརྟགས་པའོ། །འདིར་རྣམ་པ་ཐམས་ཅད་མཁྱེན་པའི་རྣམ་པར་རྟོག་པར་སེམས་ཅན་གྱི་དོན་དུ་བྱ་བ་ནི། ནུས་པ་མེད་པའི་རབ་ཏུ་ཞི་བས་སོ། །ཞི་བ་ལས་བྱང་བའི་དམིགས་པ་ནི་རབ་ཏུ་གསལ་བ་སྟེ། དེ་ལྟར་འཇིག་རྟེན་གསུམ་དུ་རྣམ་པར་བྱང་བ་རྣམས་སོ། །གང་ལ་བརྟེན་པའི་བག་ཆགས་ཀྱི་དམིགས་པའི་དབྱེ་བ་སྟེ། དེ་ལྟར་གཟུགས་ནས་རྣམ་པ་ཐམས་ཅད་མཁྱེན་པའི་བར་དུའོ། །དེ་བཞིན་ཉིད་ཀྱི་རང་བཞིན་འཛིན་པའི་རྣམ་པ་སྟེ། ཡེ་ཤེས་དང་ཡེ་ཤེས་མ་ཡིན་པ་གནས་མ་ཡིན་པའི་དངོས་པོའི་གཟུགས་མེད་པའོ། །དེ་ལྟར་གཞན་ཡང་དག་པའི་མཐའ་སྟེ། ཐམས་ཅད་ཚད་དང་ལྡན་པའོ། །བདག་གི་ཕྱོགས་ཀྱིས་རྟོགས་པའི་
རིགས་སོ་སོ་བ་འདས་པའོ། །དེ་ལྟར་བཅོམ་ལྡན་འདས་ཕུང་པོའི་ཕྱོགས་ཀྱི་བདག་ཉིད་དེ་ལྟར་དམིགས་པ་འདི་དང་ཕ་རོལ་གྱི་ཚད་ཉེ་བར་མཐོང་སྟེ། རྒྱུ་མཚན་ལ་མེད་པའི་སེམས་དེ་བཞིན་དུ་རྒྱུ་མཚན་ནི་རྣམ་པར་རྟོག་པ་ཙམ་མོ། །སེམས་མི་བདེ་བའི་ངེས་པའི་བདག་ཉིད་ཀྱི་དངོས་པོའོ། །ཆོས་ཅན་རྣམས་ཀྱི་རང་བཞིན་ནི་འབྲས་བུ་ཇི་ལྟ་བ་ཞེས་ཏེ། གང་ལ་སྦྱར་བའི་ཆོས་ཀྱི་བདག་མེད་པའི་རྣམ་པ་གཅིག་གི་མཚན་ཉིད་དོ། །ཆོས་ཐམས་ཅད་ནི་གཟུགས་བརྙན་གྱི་རྣམ་པར་རྟོག་པའི་བདག་ཉིད་ཀྱི་དབྱིངས་ཀྱི་ཕ་རོལ་ཏུ་ཕྱིན་པའི་དོན་དུ་གཡོ་བ་མེད་པའི་ངོ་བོ་ཉིད་དེ། སྟོབས་ཀྱི་མཚན་རྣམས་དང་འབྲས་བུའི་ཆོས་རྣམས་དང་དེའི་ལམ་གྱི་ཆོས་རྣམས་སོ། །དབྱིངས་ནི་རྒྱུའི་དངོས་པོ་སྟེ། ཆོས་ཀྱི་དབྱིངས་སོ། །དེ་ལྟར་ཐམས་ཅད་རྣམ་པའི་མཐར་ཐུག་པ་རྣམས་བརྟེན་པ་མེད་པའི་སྟོབས་ཆུང་བའོ། །རིག་པའི་དངོས་པོ་འབྱུང་བ་ནི་བརྟེན་པའི་སྟོབས་སོ། །དེ་ལྟར་དེ་བཞིན་ཉིད་ཀྱི་ཕྱོགས་ནི་མེ་ལོང་ལྟ་བུའི་ཡེ་ཤེས་སྣ་ཚོགས་པ་རྣམས་ཆོས་རྣམས་ཨའི་སྲོལ་ནས་བྱུང་བ་སྟེ། ཇི་ལྟ་བ་དེ་ལྟ་བའི་སྒོ་ཆོས་རྣམས་རང་བཞིན་བཟང་པོ་ལ་འཇུག་གོ །དེ་ལྟར་སྟོབས་རབ་ཏུ་གསལ་བ་ནི་མི་ལོང་ལྟ་བུའི་ཡེ་ཤེས་སོ། །ཡང་དག་པའི་མཐར་ཐུག་པར་འགྲོ་བའི་ནམ་མཁའ་འདི་མི་འཇིག་པའི་མཚན་ཉིད་དོ། །མཉམ་པ་ཉིད་ཀྱི་ཡེ་ཤེས་སོ། །རྒྱུ་མཚན་མེད་པ་ཤིན་ཏུ་ཕྲ་བ་བརྟགས་པའི་རྣམ་པར་དག་པའི་དགོངས་པ་སྟེ། སོ་སོར་ཡང་དག་པ་རིག་པའི་རང་བཞིན་སོ་སོར་རྟོག་པའི་ཡེ་ཤེས་སོ། །ཆོས་ཀྱི་དབྱིངས་སུ་ཆོས་ཐམས་ཅད་སྙིང་པོའི་ཤིན་ཏུ་འགྲོ་བ་ལ་བརྟེན་པ་དང༌། དེ་ལྟར་བྱམས་པ་ཆེན་པོ་དང༌། སྙིང་རྗེ་ཆེན་པོས་བྱམས་པ་བྱ་བ་སྒྲུབ་པའི་ཡེ་ཤེས་སོ། །ཐམས་ཅད་དུ་སྐྱོབ་པ་ནི་ཤིན་ཏུ་ལྷག་པར་གསལ་བ་སྟེ། ཆོས་ཀྱི་དབྱིངས་རྣམ་པར་དག་པའི་ཡེ་ཤེས་ཞེས་སོ། །དེ་ལྟར་ཚད་མེད་པའི་བྱང་ཆུབ་ཏུ་སེམས་བསྐྱེད་པས་སེམས་ཅན་ཐམས་ཅད་བྱམས་པ་ཆེན་པོའི་རྗེས་སུ་རྟོགས་པ་རྣམས་ཆོས་ཐམས་ཅད་མཉམ་པ་ཉིད་ཀྱི་སྒོ་གཅིག་གི་དམིགས་པའི་སྦྱོར་བ་བཞིན་ཕ་རོལ་ཏུ་ཕྱིན་པ་ཐམས་ཅད་ཆོས་ཀྱི་མཐར་གོམས་པ་འདི་ལྟ་སྟེ། ཡུལ་ཆོས་ཚད་མེད་པའི་རབ་ཏུ་སྦྱོར་བའི་རྣམ་པར་ཐར་པ་རབ་ཏུ་སྤངས་པ་ཞེས་སོ། །བླ་ན་མེད་པའི་ཡེ་ཤེས་ཀྱི་མཐར་རྒྱུའི་སྦྱོར་བ་ཞེས་རབ་ཏུ་མཐོང་ངོ༌། །དེ་ལྟར་སྦྱོར་བ་ལ་སོ་སོར་བརྟེན་པ་ནི་བློ་གྲོས་ཆེན་པོ་མུན་པ་ཤིན་ཏུ་དངས་པར་མཛད་པའོ། །ཐེག་པ་ཆེན་པོ་མཚན་ཉིད་ཀུན་ནས་བསྡུས་པ་སློབ་དཔོན་སངས་རྒྱས་ཡེ་ཤེས་ཞབས་ཀྱིས་མཛད་པ་རྫོགས་སོ།། །།རྒྱ་གར་གྱི་མཁན་པོ་པཎྜི་ཏ་ཀ་རྞོ་པ་ཏི་དང༌། བོད་ཀྱི་ལོ་ཙཱ་བ་ཤཱཀྱའི་དགེ་སློང་པྲཛྙཱ་སི་ཧིས་དཔལ་ནཱ་ལེནྡྲའི་གཙུག་ལག་ཁང་ཆེན་པོར་བསྒྱུར་ཅིང་ཞུས་ཏེ་གཏན་ལ་ཕབ་པ།། །།