ཕ་རོལ་ཏུ་ཕྱིན་པ་བསྡུས་པ་ཞེས་བྱ་བ།
རྒྱ་གར་སྐད་དུ། །པཱ་ར་མི་ཏཱ་ས་མཱ་ས་ནཱ་མ། བོད་སྐད་དུ། ཕ་རོལ་ཏུ་ཕྱིན་པ་བསྡུས་པ་ཞེས་བྱ་བ། སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། །བྱང་ཆུབ་མཆོག་ཏུ་སེམས་བསྐྱེད་དེ། །དཀོན་མཆོག་གསུམ་ལ་སྐྱབས་སོང་བས། སྟོན་པ་གཞན་ལ་ཕྱོགས་པ་ཡི། །སེར་སྣའི་དོགས་པ་ཡོངས་སུ་སྤང༌། །བླ་ན་མེད་པའི་སངས་རྒྱས་སྐུ། །དཔལ་ལྡན་སྐྱེས་ཆེན་མཚན་འཆང་ལ། །ཅི་ནས་ཤིགས་པར་མི་ནུས་པ། །ཐོབ་རྩོལ་སངས་རྒྱས་སྐྱབས་སོང་ཡིན། །འཇིག་རྟེན་སྐྱབས་མེད་སྐྱོབ་པའི་ཕྱིར། །སྤྱོད་ཅིང་རང་གི་དོན་བཏང་སྟེ། །སངས་རྒྱས་བསྒྲུབ་ཕྱིར་བློ་བརྟན་ན། །སངས་རྒྱས་སྐྱབས་སུ་སོང་བ་ཡིན། །རྒ་ཤི་ནད་དང་འཆི་བ་ལས། །སེམས་ཅན་མགོན་མེད་བསྐྱབ་པའི་ཕྱིར། །སངས་རྒྱས་ཉིད་དུ་འགྲུབ་སྨོན་ན། །སངས་རྒྱས་སྐྱབས་སུ་སོང་བ་ཡིན། །མཐོང་ཐོས་དྲན་དང་རེག་པ་དང༌། །དྲི་ཚོར་རོ་མྱད་ཅིས་ཀྱང་རུང༌། །འགྲོ་བ་ཀུན་ལ་བདེ་སྨོན་ན། །སངས་རྒྱས་སྐྱབས་སུ་སོང་བ་ཡིན། །སེམས་ཅན་རྣམས་ལ་སྙིང་བརྩེ་ཞིང༌། །བདེ་གཤེགས་ཡོན་ཏན་ཐོབ་མོས་ན། །དེ་བཞིན་གཤེགས་པ་ཐམས་ཅད་ལ། །མདོར་བསྡུས་སྐྱབས་སུ་སོང་བ་ཡིན། །བྱང་ཆུབ་མཆོག་ཏུ་སྨོན་བྱེད་དེ། །རང་གི་དོན་ལ་མི་ལྟ་ཞིང༌། །གཞན་དོན་བརྩོན་ཡང་ང་མེད་ན། །སངས་རྒྱས་སྐྱབས་སུ་སོང་བ་ཡིན། །བྱང་ཆུབ་སེམས་དཔའི་སྤྱོད་ཆེན་ལ། །གང་ཞིག་སྐྱོ་མེད་ཞུམ་མེད་ཅིང༌། །མོས་པ་ཆེན་པོ་སྐྱེད་བྱེད་པ། །དེ་ནི་སངས་རྒྱས་སྐྱབས་སོང་ཡིན། །སྐྱབས་ཀྱི་མཆོག་ནི་སྟོབས་བཅུ་དང༌། །སྟོབས་བཅུའི་ཆོས་ཞེས་དེ་ཚོལ་ཞིང༌། །ཡོན་ཏན་ཚོགས་ལ་དད་སྐྱེད་ན། །སངས་རྒྱས་སྐྱབས་སུ་སོང་བ་ཡིན། །འཇིག་རྟེན་འདི་དག་སྐྱབས་མེད་པ། །སྐྱབས་སུ་བྱ་ཞེས་དམ་བརྟན་ན། །དེ་ནི་འགྲོ་བའི་སྐྱབས་ཡིན་ཏེ། །སངས་རྒྱས་སྐྱབས་སུ་སོང་བ་ཡིན། །ཉོན་མོངས་བཅས་པའི་སེམས་ལྡན་པའི། །སེམས་ཅན་གང་ཚེ་མཐོང་གྱུར་པ། །དེ་ཚེ་མོས་པ་ཆེ་བསྐྱེད་ཅིང༌། །གཅིག་ལས་རྣམ་མང་སྤྲུལ་བྱས་ཏེ། །འཇིག་རྟེན་དཔག་ཡས་ཐམས་ཅད་ལ། །ཕན་པ་ཀུན་སྟོབས་ལུས་དང་སེམས། །བདག་
གིས་བསྒྲུབ་པར་བྱའོ་ཞེས། །སུ་སེམས་སངས་རྒྱས་སྐྱབས་སོང་ཡིན། །སྐྱབས་སུ་འགྲོ་བ་དང་པོའོ།། །།དམ་ཆོས་འཁོར་ལོས་སྒྱུར་བ་ཡི། །རྒྱལ་པོར་གྱུར་ཏེ་འཆི་མེད་པའི། །ལམ་གྱིས་འགྲོ་བ་སྐྱབས་སྨོན་ན། །ཆོས་ལ་སྐྱབས་སུ་སོང་བ་ཡིན། །བདག་ཀྱང་འཇིག་རྟེན་མཐའ་མེད་ཀྱང༌། །སྙིང་རྗེས་ཡོངས་སུ་མི་གཏོང་ཞིང༌། །དམ་ཆོས་བསྟན་པར་གང་མོས་པ། །དེ་ནི་ཆོས་ལ་སྐྱབས་སོང་ཡིན། །འགྲོ་བའི་སྡུག་བསྔལ་བསལ་བའི་ཕྱིར། །བདག་གིས་དམ་ཆོས་བསྟན་བྱ་ཞེས། །སེམས་ཅན་དོན་ལ་སེམས་མཉེན་ན། །ཆོས་ལ་སྐྱབས་སུ་སོང་བ་ཡིན། །མང་ཐོས་ནན་ཏན་རྒྱན་ལྡན་དང༌། །གཞན་ལ་བསྟན་པའི་དོན་བསྒྲུབ་ན། །ཆོས་ལ་སྐྱབས་སུ་སོང་བ་ཡིན། །མཚན་མ་ཤིན་ཏུ་གསལ་བ་ཡིན། །འཇིག་རྟེན་མ་ལུས་ཐམས་ཅད་ལ། །ཆོས་འདི་སྐྱབས་ཀྱི་མཆོག་ཡིན་ཞེས། །རྟོག་ཅིང་དམ་ཆོས་ཚོལ་བྱེད་ན། །ཆོས་ལ་སྐྱབས་སུ་སོང་བ་ཡིན། །ཆོས་ཀྱི་སློབ་དཔོན་བསྙེན་བྱེད་ཅིང༌། །ཉན་འདོད་ཚུལ་བཞིན་ཡིད་བྱེད་ལ། །སྟོན་ཅིང་ནན་ཏན་ལྷུར་བྱེད་ན། །ཆོས་ལ་སྐྱབས་སུ་སོང་བ་ཡིན། །དམ་ཆོས་ཡོངས་སུ་གཟུང་བའི་ཕྱིར། །སྤྱོད་པས་ཡང་དག་སྤྱོད་བྱེད་ཅིང༌། །ལུས་དང་སྲོག་ལ་མི་ལྟ་ན། །ཆོས་ལ་སྐྱབས་སུ་སོང་བ་ཡིན། །བྱང་ཆུབ་མཆོག་གི་ཕྱོགས་ཀྱི་ཆོས། །བདག་དོན་མ་ཡིན་གཞན་དོན་དུ། །སྙིང་རྗེ་ཆེན་པོས་སྤྱོད་བྱེད་ན། །ཆོས་ལ་སྐྱབས་སུ་སོང་བ་ཡིན། །གང་ཞིག་བདེ་ལ་ཆགས་མེད་ལ། །སྡུག་བསྔལ་རྣམ་པས་མི་འཇིགས་ཤིང༌། །འཇིག་རྟེན་ཕན་སྤྱོད་ཆོས་ཤེས་ན། །ཆོས་ལ་སྐྱབས་སུ་སོང་བ་ཡིན། །དམ་ཆོས་ཚུལ་འདི་མ་ཐོས་པས། །འཇིག་རྟེན་འདི་དག་དམན་འགྱུར་ཞེས། །སྟོན་ཅིང་ནན་ཏན་དོན་བྱེད་ན། །ཆོས་ལ་སྐྱབས་སུ་སོང་བ་ཡིན། །འགྲོ་བ་མ་ལུས་ཐམས་ཅད་ཀྱང༌། །བདག་གིས་ཆོས་ལ་དགོད་བྱ་ཞེས། །སེམས་བསྐྱེད་ནན་ཏན་སྤྱོད་བྱེད་ན། །ཆོས་ལ་སྐྱབས་སུ་སོང་བ་ཡིན། །སྐྱབས་སུ་འགྲོ་བ་གཉིས་པའོ།། །།མོས་པ་ཤིན་ཏུ་རྣམ་དག་པས། །འཕགས་པའི་དགེ་འདུན་དྲུང་འགྲོ་བ། །གང་གིས་བསམ་པ་མི་བཟློག་
པ། །དེ་ནི་དགེ་འདུན་སྐྱབས་སུ་སོང་ཡིན། །ངེས་པར་ལྷུང་བར་གྱུར་པ་ཡི། །ཉན་ཐོས་ཐེག་ལ་གནས་པ་རྣམས། །བྱང་ཆུབ་སེམས་ནི་སྐྱེད་བྱེད་ན། །དགེ་འདུན་སྐྱབས་སུ་སོང་བ་ཡིན། །དགེ་འདུན་ཡོན་ཏན་དྲན་བྱས་ཤིང༌། །དགེ་འདུན་བཞིན་དུ་བཀུར་གནས་སུ། །འཇིག་རྟེན་ཐམས་ཅད་བཀུར་མོས་ན། །དེ་ནི་དགེ་འདུན་སྐྱབས་སོང་ཡིན། །བྱང་ཆུབ་གོ་ཆ་བརྟན་བྱེད་ཅིང༌། །དགེ་འདུན་རྣམས་ལ་ཆེར་མོས་པས། །དགེ་འདུན་བསྙེན་བཀུར་གང་དད་པ། །དགེ་འདུན་སྐྱབས་སུ་སོང་བ་ཡིན། །ཚུལ་ཁྲིམས་ཏིང་འཛིན་ཤེས་རབ་དང༌། །རྣམ་གྲོལ་དེ་ཤེས་སྟོན་ལ་སོགས། །དགེ་འདུན་ཡོན་ཏན་རིན་ཆེན་གྱིས། །འཇིག་རྟེན་བརྒྱན་པར་མོས་པ་དང༌། །དགེ་འདུན་དག་ལ་དད་བརྟན་པས། །འགྲོ་བ་མང་པོ་ཀུན་གྱིས་ཀྱང༌། །དད་པས་བཟློག་པར་མི་ནུས་ན། །དེ་ནི་དགེ་འདུན་སྐྱབས་སོང་ཡིན། །སྐྱེས་བུ་དམ་པ་རིན་པོ་ཆེས། །བཅས་པའི་མུ་སྟེགས་གཙང་མ་སྟེ། བདུད་ལ་ཤིན་ཏུ་དཔའ་བ་ཡིན། །སྐྱེས་མཆོག་དེ་ནི་དགེ་འདུན་ཡིན། །ཡང་དག་ཇི་བཞིན་སྨྲ་བྱེད་ཅིང༌། །དེ་ལ་ཆུང་ཕུལ་ཡོངས་འགྱུར་ཞེས། །དེ་འདྲའི་རྣམ་དག་སེམས་འཆང་ན། །དགེ་འདུན་སྐྱབས་སུ་སོང་བ་ཡིན། །བྱང་ཆུབ་མཆོག་སེམས་མི་ལྡོག་དང༌། །དབང་དང་ཚང་མེད་ཡོན་ཏན་གྱིས། །བརྒྱན་པའི་ཡོན་ཏན་གང་ཚོལ་བ། །དེ་ནི་དགེ་འདུན་སྐྱབས་སོང་ཡིན། །དཀོན་མཆོག་གསུམ་ལ་སྐྱབས་སོང་བ། །སེམས་ཅན་འཇིགས་མེད་དོན་འགྱུར་བས། །དཀོན་མཆོག་གསུམ་གྱི་སྐྱབས་ལྡན་ནི། །དེ་ཕྱིར་མི་འཇིགས་སྦྱིན་བདག་ཡིན། །སྐྱབས་སོང་བསོད་ནམས་གཟུགས་ཡོད་ན། །ཁམས་གསུམ་འདི་ཡང་སྣོད་དུ་ཆུང༌། །རྒྱ་མཚོ་ཆེན་པོའི་ཆུ་ཡི་གཏེར། །ཕུལ་གྱིས་བཅལ་བས་གཞལ་མི་ནུས། །སྐྱབས་སུ་འགྲོ་བ་གསུམ་པའོ།། །།སྐྱབས་འགྲོ་གསུམ་བྱས་ཕྱིན་ཆད་སྦྱིན་པ་ལ། །ཅི་ནས་ལུས་ཀྱི་ཡན་ལག་བསླངས་གྱུར་ཀྱང༌། །ཚུལ་ངན་གཏོང་ལ་ཞུམ་པར་མི་འགྱུར་བར། །འཇིག་རྟེན་ཕན་པར་བརྩོན་པས་སྐྱོར་བ་བྱ། །སེར་སྣའི་སྐྱོན་ནི་གང་གིས་འཕེལ་འགྱུར་རམ། །ཡོངས་སུ་གཏོང་སེམས་འཕེལ་བར་མི་འགྱུར་བའི། །ཡོངས་འཛིན་བགེགས་སུ་འགྱུར་བའི་སླུ་བ་
དག་།བྱང་ཆུབ་སེམས་དཔས་མ་ལུས་ཡོངས་སུ་སྤང༌། །གང་ཞིག་གཏེར་སེམས་གཉེན་པོར་འགྱུར་བ་དག །ཡང་དག་བྱང་ཆུབ་ལམ་ལ་སྒྲིབ་བྱེད་ན། །དེ་འདྲའི་ནོར་རམ་རིན་ཆེན་རྒྱལ་སྲིད་ཀྱང༌། །བྱང་ཆུབ་སེམས་དཔས་བླང་བར་འོས་པ་མིན། །ཐུབ་པ་རྣམས་ཀྱི་སྤྱོད་མཆོག་དྲན་བྱས་ཤིང༌། །དེ་གཞོལ་རང་གི་དམ་བཅས་བསམ་བྱས་ཏེ། །ཡོངས་འཛིན་ཆགས་པ་རྣམ་པར་བརྩལ་བའི་ཕྱིར། །སེམས་ལ་རྟོགས་པའི་དམ་པ་འདི་དག་རྟོགས། །འགྲོ་བ་ཀུན་ལ་བདག་གི་ལུས་བཏང་སྟེ། །དེ་བཏང་ཆོས་ཀྱང་འདི་ལྷག་བདག་གིས་སྤང་བྱ་ན། །ཕྱི་རོལ་དངོས་ལ་བདག་གིས་ཆགས་བྱ་བ། །གླང་པོའི་ཁྲུས་བཞིན་བདག་ལ་རེག་པ་མིན། །ཤ་ལ་དོན་གཉེར་ཤ་འདི་བསྐུར་བར་གྱིས། །རྐང་འདོད་སེམས་ཅན་རྐང་ཡང་བྲུས་ཏེ་ཁྱེར། །བདག་གི་ལུས་འདི་འདི་ལྟར་བསྐུར་བ་ཡང༌། །འཇིག་རྟེན་དོན་ན་ཕྱི་རོལ་དངོས་ཅི་སྨོས། །ཇི་ལྟར་སྨན་གྱི་སྡོང་པོ་སྐྱེས་གྱུར་ལ། །ལོ་མ་མེ་ཏོག་སྐྱེ་བོ་འཐོག་བྱེད་ཀྱང༌། །འདི་དག་བདག་ལ་བླངས་ཤིང་ཁྱེར་བྱེད་ཅེས། །རྣམ་པར་རྟོག་པ་དེ་ལ་རྒྱུ་བ་མེད། །དེ་བཞིན་འཇིག་རྟེན་དོན་ལ་བརྩོན་པ་ཡིས། །དྲིན་མེད་རྟག་ཏུ་མི་གཙང་སྡུག་བསྔལ་བའི། །ལུས་འདི་གཞན་ལ་ཕན་ཞིང་མཁོ་གྱུར་ན། །བདག་གིར་བྱ་སྙམ་རྣམ་རྟོག་ཆུང་མི་སྐྱེད། །ནང་གིས་ས་དང་ཆུ་ལ་སོགས་པ་དང༌། །ཕྱི་རོལ་འབྱུང་བ་ཆེན་པོའི་ཚོགས་མཚུངས་ན། །འདི་ནི་བདག་གི་འདི་ནི་གཞན་གྱི་ཞེས། །མ་རིག་འདམ་གྱི་རྟོག་བསྐྱེད་ཚུལ་མ་ཡིན། །བདག་གི་ལུས་ཀྱང་ཅི་བདེར་བླང་བར་གྱིས། །འདི་ལ་གཞན་གྱི་ཡིན་སྙམ་བློ་མ་བསྐྱེད། །འདི་དག་ཐམས་ཅད་ཁྱེད་ཀྱི་དངོས་ཡིན་ཏེ། །འདི་ལ་བདག་གིས་ང་རྒྱལ་བདག་ལ་མེད། །དེ་འདྲའི་རྨད་བྱུང་བསམ་པ་རྣམས་དང་ཡང༌། །རྫོགས་པའི་སངས་རྒྱས་ཡོན་ཏན་རྗེས་འབྲང་བ། །གང་ལ་ཡོད་པ་བྱང་ཆུབ་སེམས་དཔའ་ཞེས། །སངས་རྒྱས་བསམ་གྱིས་མི་ཁྱབ་སྐྱེས་མཆོག་གསུངས། །དེ་ལྟར་སྦྱིན་ལ་ནན་ཏན་བརྩོན་པ་དེ། །ལུས་ལ་ནམ་ཡང་ཆགས་པར་མི་བྱེད་པས། །དེ་ཡི་ངག་ལུས་ཡིད་ཀྱི་ལས་རྣམས་ཀྱང༌། །ལྷུན་གྱིས་གྲུབ་པར་རྣམ་པར་དག་པར་འདོད། །རྣམ་
དག་ལས་ཅན་གཞན་ལ་ཕན་བྱེད་ན། །ཚོགས་སུ་འགྱུར་བའི་སྡུག་བསྔལ་མེད་པར་བྱེད། །དེ་ལྟར་རིགས་པའི་ཚུལ་ལ་མངོན་ཞུགས་པ། །ཚུལ་དང་ཚུལ་མིན་མཁས་པ་དངོས་སུ་ཐོབ། །སྦྱིན་པའི་འབྲས་བུ་སྤངས་པ་ཐོབ་གྱུར་ནས། །སྲིད་པའི་མུན་ནང་འཐོམས་པའི་སྐྱེ་བོ་ལ། །དམ་པའི་ཆོས་ཀྱི་སྦྱིན་པ་རྒྱ་ཆེན་གྱིས། །ཉི་མ་ཤར་བའི་འོད་པས་གསལ་བར་བྱེད། །འཇིག་རྟེན་ཕན་པའི་དོན་སྒྲུབ་སྙམ་པ་དེ། །ཐམས་ཅད་མཁྱེན་པ་ཉིད་འགྲུབ་གཞིར་གྱུར་པས། །ཉི་ཤར་ཟེར་བཀྱེ་འོད་ཆེན་མི་ཟད་བཞིན། །དེ་ཡི་བསོད་ནམས་ཡུན་དུ་ཟད་མི་ཤེས། །དེ་འདྲ་རྨད་བྱུང་སྦྱིན་པའི་ཡོན་ཏན་ཚོགས། །དེ་དག་བྱང་ཆུབ་སེམས་དཔའི་རྒྱན་གྱུར་པས། །དེ་ཕྱིར་སྦྱིན་པ་སྙིང་རྗེ་སྔོན་འགྲོ་པའི་སངས་རྒྱས་སྐུ་མདོག་གསེར་འདྲ་དང༌། །ཁྲེལ་ལྟས་རྒྱུ་ལས་པ་སངས་རྒྱས་སྟོབས་ལ་སོགས་པ། །འགྲོ་བ་ཀུན་ལ་དག་གིས་བསྒྲུབ་བྱ་ཞིང༌། །ཟང་ཟིང་སྦྱིན་པས་བསྡུས་པའི་སེམས་ཅན་དག །བདག་གི་དམ་ཆོས་སྣོད་དུ་འགྱུར་རོ་ཞེས། །དེ་ལྟར་ཁ་ཟས་སྐོམ་རྣམས་གཏོང་བར་བྱེད། །རང་གི་ཕུན་སུམ་ཚོགས་པ་བསྒྲུབ་ཕྱིར་མིན། །ཉོན་མོངས་སྐོམ་པ་གཞིལ་ཕྱིར་བཏུང་བ་དག །འཇིག་རྟེན་ཕན་བྱེད་འཇིག་རྟེན་རྣམས་ལ་གཏོང༌།། སངས་རྒྱས་རྫུ་འཕྲུལ་ཆེ་བའི་རྣམ་པ་དང༌། །མྱ་ངན་འདས་པའི་བདེ་བ་ཐམས་ཅད་ཀྱང༌། །འཇིག་རྟེན་འདི་དག་ཇི་ལྟར་ཐོབ་འགྱུར་ཞེས། །ཐེག་ཆེན་སྨོས་པ་ཐེག་པ་ཡོངས་སུ་གཏོང༌། །རྫོགས་པའི་སངས་རྒྱས་སྐུ་མདོག་གསེར་འདྲ་དང༌། །ཁྲེལ་ལྟས་རྒྱུ་ལས་བྱུང་བའི་གོས་སྒྲུབ་པར། །གོས་ཀྱི་རྣམ་པ་གྲངས་མེད་མང་པོ་དག །ལུས་ལ་བདེ་བར་རིམ་གྲོ་སྦྱིན་པར་བྱེད། །སྙིང་པོ་བྱང་ཆུབ་གནས་ཕྱིར་སྟན་གཏོང་སྟེ། །མལ་གསུམ་དོན་དུ་མལ་གྱི་སྦྱིན་པ་བྱེད། །ཐམས་ཅད་མཁྱེན་པའི་སྤྱན་མཆོག་བསྒྲུབ་པའི་ཕྱིར། །མཆོད་རྟེན་གཙུག་ལག་ཁང་དུ་མར་མེ་དབུལ། །ལྷ་ཡི་རྣ་བ་ཐོབ་ཕྱིར་རོལ་མོ་དང༌། །སངས་རྒྱས་ཚུལ་ཁྲིམས་བསྒྲུབ་ཕྱིར་སྤོས་ཀྱང་འབུལ། །སྐྱབས་སུ་འགྲོ་བ་ཡོངས་སུ་བསྒྲུབ་པའི་ཕྱིར། །ཁྱིམ་དང་བཏུང་གནས་ར་བ་གནས་རྣམས་གཏོང༌། །བྲོ་བ་རོ་མཆོག་ཡོངས་སུ་བསྒྲུབ་པའི་ཕྱིར། །ཤིན་ཏུ་ཞིམ་སྦྱར་རོ་རྣམས་གཏོང་བར་བྱེད། །འཇིག་
རྟེན་འདི་དག་རྒ་ཤི་མེད་སྟོབས་པར། །སྨན་གྱི་མཆོག་རྣམས་གྲངས་མེད་སྦྱིན་པར་བྱེད། །ཉོན་མོངས་ཚོགས་ཀྱིས་འཁོར་བའི་འཇིག་རྟེན་རྣམས། །རབ་བྱུང་བདག་ཉིད་མཉམ་པར་བསྒྲུབ་པའི་ཕྱིར། །དེ་ནི་རྟག་ཏུ་བྲན་དག་གཏོང་བྱེད་ཅིང༌། །སེམས་ཅན་བླ་མེད་ཆོས་ཀྱི་རྗེར་ཡང་བསྒྲུབ། །མཚན་རབ་བཟང་པོ་ཕུན་སུམ་ཚོགས་བསྒྲུབ་པར། །མུ་ཏིག་བྱི་རུ་གསེར་ལ་སོགས་པ་གཏོང༌། །དཔེ་བྱད་བཟང་པོ་སྣ་ཚོགས་བསྒྲུབ་པའི་ཕྱིར། །རིན་ཆེན་སྒྲོན་མ་རྒྱན་གྱི་སྦྱིན་པ་བྱེད། །བསམ་གཏན་བསྒྲུབ་ཕྱིར་བརྟུལ་ཞུགས་ནགས་ཚལ་དང༌། །ཆོས་མཛོད་ཐོབ་ཕྱིར་ནོར་མཛོད་ཡོངས་སུ་གཏོང༌། །ཐུབ་དབང་རྒྱལ་པོ་ཐོབ་ཕྱིར་སྐྱོན་མེད་པར། །རྒྱལ་སྲིད་བཀས་བརྒྱན་སྤྱིན་པ་གཏོང་བར་བྱེད། །བྱང་ཆུབ་མཆོག་ལ་མོས་ཕྱིར་སྐྱོན་མེད་པར། །བུ་དང་བུ་མོ་སྡུག་པའི་སྦྱིན་པ་བྱེད། །གཅིག་ཏུ་ཆོས་ལ་དགའ་ཞིང་མོས་པའི་ཕྱིར། །དགའ་བའི་རྒྱུར་གྱུར་རྩེད་མོ་སྣ་ཚོགས་གཏོང༌། །འཁོར་ལོས་བརྒྱན་པའི་རྐང་པ་མཆོག་ཐོབ་སྟེ། །བྱང་ཆུབ་སྙིང་པོར་གནས་པས་མོས་པའི་ཕྱིར། །འཇིག་རྟེན་དོན་ཆེན་བསྒྲུབ་པར་བརྩོན་པ་དེ། །རྟོག་པ་མེད་པར་རྐང་པ་ཡོངས་སུ་གཏོང༌། །སྡུག་བསྔལ་རྒྱ་མཚོར་སྐྱེ་ཤིའི་ཆུས་གཡེངས་པའི། །འཇིག་རྟེན་ཆོས་ཀྱི་ལག་པས་བསྐྱབ་པོ་ཞེས། །ལག་པ་པདྨ་རྒྱས་འདྲ་གཏོང་བར་བྱེད། །དབང་པོ་ལྔ་དག་རྫོགས་པར་བྱ་བའི་ཕྱིར། །སྣ་དང་རྣ་བ་སྐྱོན་མེད་ཡོངས་སུ་གཏོང༌། །འཇིག་རྟེན་ཐམས་ཅད་སྒྲིབ་པ་ཀུན་སྤངས་ཏེ། །རྣམ་དག་མིག་ལྡན་བསྒྲུབ་ཕྱིར་མིག་ཀྱང་གཏོང༌། །ས་ཆུ་མེ་དང་རླུང་ལྟར་རྟོག་མེད་ཅིང༌། །འཇིག་རྟེན་ཉེར་འཚོར་བདག་གི་ལུས་སྒྲུབ་ཅེས། །ཤ་བཅད་ཁྲག་དང་བཅས་པ་གཙོ་བོ་དེ། །སྙིང་རྗེ་ཆེན་པོས་ཡོངས་སུ་གཏོང་བར་བྱེད། །རྨད་དུ་བྱུང་བའི་སྤྱོད་པ་བརྟན་པ་དེ། །རྡོ་རྗེ་ལྟ་བུའི་ཆར་པ་བབ་གྱུར་ཀྱང༌། །དེ་བཞིན་གཤེགས་པའི་སྐུ་མཆོག་མི་ཤིགས་པ། །འཇིག་རྟེན་ཀུན་གྱིས་ཐོབ་ཕྱིར་རྐང་ཡང་གཏོང༌། །འཇིག་རྟེན་བླར་རྒྱུར་ཡེ་ཤེས་མཉམ་བཞག་ཕྱིར། །སྐྱེ་བོ་སློང་དུ་འོངས་པ་ཐམས་ཅད་ལ། །ལུས་ཀྱི་དམ་པ་མགོས་ཀྱང་མཆོད་བྱེད་ན། །ལུས་ཀྱི་ཡན་ལག་གཞན་
ལྟ་ཅི་ཞིག་སྨོས། །དེ་ལ་སོགས་པ་རྒྱུན་དུ་སྐྱོན་མེད་པར། །བྱང་ཆུབ་སེམས་དཔའ་སྤྱོད་ལས་ཡོངས་བཏང་བའི། །སྦྱིན་པའི་ཆར་གྱིས་འགྲོ་བའི་ཚིམ་བྱས་ཤིང༌། །ཐམས་ཅད་མཁྱེན་པའི་རྒྱ་མཚོར་མངོན་པར་འགྲོ། །དེ་ནི་མི་རིགས་བཙལ་ཞིང་སྦྱིན་པ་དང༌། །གཞན་ལ་གནོད་པ་བཙལ་ཞིང་སྦྱིན་མི་བྱ། །དེ་ལ་གཞན་ལ་བཏང་བས་དམའ་བ་མེད། །དེ་ནི་སྦྱིན་པས་སྙེམས་པས་བདག་མི་བསྟོད། །གཞན་ལ་སྨོད་པ་ནམ་ཡང་བྱེད་པ་མེད། །ལོག་པའི་སྦྱོར་བ་ཡོངས་སུ་མི་གཏོང་སྟེ། །ལྷག་པའི་བསམ་པས་མ་ཟིན་སྦྱིན་མི་བྱེད། །ཁྲོ་བའི་སྐྱོན་གྱིས་དམའ་བར་མི་གཏོང་སྙེ། །བྱིན་ནས་དེ་ལ་རྗེས་སུ་འགྱོད་མི་བྱེད། །གཅམ་བྱས་སྒུར་ཞེས་མང་དུ་སྦྱིན་མི་བྱེད། །ཁྲེལ་གྱིས་དོགས་སམ་འཇིགས་པའི་རྒྱུ་ཕྱིར་རམ། །སྦྱིན་པའི་གནས་སུ་འགྱུར་ཕྱིར་གཏོང་བ་མིན། །བཟང་པོ་ཡོད་བཞིན་ངན་པ་གཏོང་བའམ། །སྦྱིན་པའི་གནས་མིན་ཞེས་ཏེ་བརྙས་པའམ། །རྣམ་སྨིན་རེ་བས་དོགས་པར་བྱས་པའམ། །རིམ་གྲོ་མེད་ཅིང་སྨད་པར་དེ་མི་གཏོང༌། །ཚུལ་ཁྲིམས་ལྡན་ལ་ཕུལ་བས་མི་མཐོང་ཞིང༌། །ཁེངས་ཤིང་བརྙས་བྱེད་ཉུང་བར་གཏོང་བ་མེད། །གང་གིས་ལོག་པའི་ནན་ཏན་རྒྱུར་གྱུར་དང༌། །སློང་བ་རྣམས་ལ་གནོད་པར་སྦྱིན་མི་བྱེད། །དེ་ནི་དུས་མིན་སྦྱིན་པར་མི་བྱེད་དེ། །དུས་དང་མི་མཐུན་སྦྱིན་པའང་དེ་མི་བྱེད། །ལྷར་སྨོན་མ་ཡིན་རྒྱལ་པོར་སྨོན་ཕྱིར་མིན། །ཐེག་པ་དམན་སྨོན་ཚུལ་གྱིས་གཏོང་མི་བྱེད། །དེ་ནི་ངོར་བལྟས་གཏོང་བར་མི་བྱེད་དེ། །གྲགས་པའི་སྒྲ་དང་བཞད་གད་དོན་ཕྱིར་མིན། །བདག་གིས་ནུས་སུ་ཟད་ཅེས་མི་རློམ་ཞིང༌། །གཞན་གྱི་སྲོག་ལ་གནོད་ཕྱིར་སྦྱིན་མི་བྱེད། །རྣམ་པ་ཐམས་ཅད་མཁྱེན་པར་མ་བསྔོས་པའམ། །སྐྱེས་བུ་དམ་པས་སྨད་པར་གཏོང་མི་བྱེད། །དེ་ཕྱིར་ཕ་རོལ་ཕྱིན་པའི་མིང་འཐོབ་ཅིང༌། །ཤིན་ཏུ་རྣམ་དག་སྦྱིན་པར་ཡང་དག་འགྲོ། །དེ་ཡི་སྦྱིན་ལས་བྱུང་བའི་བསོད་ནམས་ཚོགས། །འཇིག་རྟེན་ཀུན་གྱི་བསོད་ནམས་ཡོངས་བསྡུས་ཀྱང༌། །དེ་དག་ཀུན་གྱིས་ཟིལ་གནོན་མི་འགྱུར་བས། །དེ་ཕྱིར་འཇིག་རྟེན་ཀུན་གྱི་གཙོ་བོར་འགྱུར། །མངོན་ཤེས་ལྔ་ལ་ཤིན་ཏུ་ངེས་འགྱུར་ཞིང༌། །འཇིག་རྟེན་ཀུན་ལ་སྦྱིན་པའི་ཆར་འབེབས་པས། །ཕྱོགས་རྣམས་ཀུན་
དུ་དེ་ཡི་ཚད་མི་ཟིན། །རྟག་པར་རྒྱུན་དུ་འབྱུང་བས་ཟད་མི་ཤེས། །དེ་བས་མི་ཟད་འགྲོ་ལ་ཕན་པར་འགྱུར། །ཡེ་ཤེས་མི་ཟད་རྒྱ་ཆེན་རྒྱུ་ཡང་ཡིན། །ཁམས་གསུམ་ཟད་པར་འགྱུར་བའི་དངོས་པོ་དང༌། །མཁའ་དང་སྤྲིན་ལྟར་རྟག་ཏུ་འདྲེ་བ་མེད། །དེ་ནི་སྟོང་ཉིད་རྣམ་པར་མཉམ་གཞག་ཅིང༌། །མཚན་མའི་སྐྱོན་རྣམས་ཡོངས་སུ་སྤང་བ་དང༌། །ཉོན་མོངས་བསལ་ཞིང་དམན་པ་མེད་པས་ན། །ཐུབ་དབང་ཆེན་པོ་རྣམས་ཀྱིས་མི་ཟད་གསུངས། །སྐྱེས་བུ་དམ་པས་ཆེད་དུ་བརྗོད་བྱས་ཤིང༌། །བདེ་བ་རྒྱ་ཆེན་རྒྱུ་ཡི་སྦྱིན་པ་ནི། །བྱེད་པར་འདོད་པས་མི་རྟག་རྣལ་འབྱོར་དང༌། །འཇིག་རྟེན་རྣམས་ལ་སྙིང་རྗེ་ཆེན་པོ་བསྐྱེད། །ལོངས་སྤྱོད་རྣམ་པ་མི་རྟག་མཐོང་གྱུར་ཅིང༌། །སྙིང་རྗེ་ཆེན་པོ་རང་གི་ངང་གྱུར་ན། །བྱིན་པ་བདག་གི་ཁྱིམ་བཞག་གཞན་གྱི་བར། །ཤིན་ཏུ་རིག་པའི་ཚུལ་ཁྲིམས་རྟོགས་པར་འགྱུར། །གང་བྱིན་དེ་ལས་འཇིགས་པ་སྐྱེ་མི་འགྱུར། །ཁྱིམ་ན་གང་བཞག་དེ་ལས་འཇིགས་པ་འབྱུང༌། །མི་ཆོག་ཐུན་མོང་རྟག་ཏུ་བསྲུང་དགོས་ཏེ། །བྱིན་ན་ཉེས་པ་དེ་དག་གནོད་མི་འགྱུར། །བྱིན་པས་འཇིག་རྟེན་ཕ་རོལ་བདེ་བ་བསྒྲུབ། །མ་བྱིན་ཚེ་འདི་ཉིད་ལའང་སྡུག་བསྔལ་བསྐྱེད། །མི་ཡི་ནོར་རྣམས་སྐར་མདའི་རང་བཞིན་ལྟར། །ཡོངས་སུ་མ་བཏང་དེ་དག་མེད་པར་འགྱུར། །མ་བྱིན་ནོར་རྣམས་མི་རྟག་མེད་འགྱུར་ཏེ། །བྱིན་པས་དེ་དག་ཡོད་པའི་གཏེར་དུ་འགྲོ། །སེམས་ཅན་ཕན་པར་གཞོལ་བས་གང་བྱིན་པའི། །ནོར་རྣམས་སྙིང་པོ་མེད་པའང་ཡོད་པར་འགྱུར། །གང་ཞིག་ཡོངས་སུ་བཏང་བ་མཁས་པས་བསྔགས། །སྐྱེ་བོ་བྱིས་པ་དེ་དག་སོག་ལ་དགའ། །ཡོངས་སུ་བཟུང་བས་མི་འབྲལ་གང་ཡང་མེད། །བྱིན་པས་རྟག་ཏུ་ཕུན་སུམ་ཚོགས་པ་འབྱུང༌། །བཏང་བས་ཉོན་མོངས་ཡོངས་སུ་འཛིན་མི་འགྱུར། །འཇུངས་པ་འཕགས་པའི་ལམ་མིན་ཉེན་མོངས་བསྐྱེད། །གང་ཞིག་བྱིན་པ་དེ་ནི་ལམ་གྱི་མཆོག །དེ་ལས་གཞན་གྱུར་འཕགས་པས་ལམ་ངན་གསུངས། །སློང་བ་སྔོན་དུ་འོངས་ན་རྒྱལ་སྲས་དེས། །རྫོགས་པའི་བྱང་ཆུབ་ཚོགས་ནི་སྤེལ་བའི་ཕྱིར། །དེས་གཞན་འདུ་ཤེས་བདག་ལ་གཞག་བྱས་ཤིང༌། །དགེ་བའི་
བཤེས་གཉེན་འདུ་ཤེས་དེ་ལ་སྐྱེད། །སློང་བ་འོངས་པ་ཐོས་ན་ཆེ་བ་རྣམས། །ཉོན་མོངས་མི་དགའ་རྣམ་པར་སྲབ་འགྱུར་བས། །དགའ་བའི་སྟོན་མོ་ཆེན་པོ་འབྱུང་བ་བས། །སློང་བ་སྔོན་དུ་འོངས་ལ་དེ་དག་དགའ། །ཅི་སྟེ་སློང་བ་སྔོན་དུ་འོངས་གྱུར་ཀྱང༌། །ཤིན་ཏུ་མཐུ་ཆུང་སྦྱིན་པར་མ་ནུས་ན། །ཅི་ནས་སློང་བ་སྨ་བབ་མ་གྱུར་པ། །འཇམ་པའི་ཚིག་གིས་དེ་ཡི་ཡིད་ཀྱང་བཞོ། །ཕྱིན་ཆད་སློང་བ་དྲུང་དུ་འོངས་གྱུར་ན། །ཅི་ནས་ཁོ་ཆད་དམའ་བར་མི་འགྱུར་བར། །འཇུངས་པའི་སྐྱོན་རྣམས་རྣམ་པར་བསལ་བ་དང༌། །སྲིད་པ་ཡོངས་སུ་སྤང་ཕྱིར་ནན་ཏན་བྱ། །གང་ཞིག་ཟང་ཟིང་ནོར་ལ་ཆགས་བྱེད་པ། །དེ་ལ་བྱང་ཆུབ་མཆོག་སེམས་སྐྱེ་བ་མེད། །སེམས་མཆོག་དེ་ནི་སྐྱོན་དང་མི་འགྲོགས་ཏེ། །རྒྱ་མཚོ་ཆེན་པོ་རོ་དང་མི་འགྲོགས་བཞིན། །དེ་བས་རྟག་ཏུ་སྐྱོན་རྣམས་ཀུན་སྤངས་ཏེ། །བྱང་ཆུབ་ཚོལ་བས་རྟག་ཏུ་ཐམས་ཅད་སྦྱིན། །འཇིག་རྟེན་ཐམས་ཅད་གཅིག་པུ་ངས་བསྐྱབ་པའི། །སེམས་དང་སྤྱོད་དང་ཞུམ་པའི་ངང་མི་མཐུན། །སྦྱིན་པ་དེ་འདྲའི་རྩ་བ་བྱང་ཆུབ་སེམས། །དེ་འདྲའི་སྦྱིན་པ་གཏོང་འདོད་དེ་མི་གཏང༌། །འཇིག་རྟེན་ནང་ན་གཏོང་འདོད་སེམས་ལྡན་པ། །གཏོང་བའི་ནང་ན་མཆོག་ཅེས་རྒྱལ་བས་གསུངས། །སྦྱིན་པའི་ཕ་རོལ་ཏུ་ཕྱིན་པའི་ལེའུའོ།། །།རྫོགས་པའི་སངས་རྒྱས་ཚུལ་ཁྲིམས་བརྒྱན་ལྡན་པར། །འགྲོ་བ་ཐམས་ཅད་བསྒྲུབ་དོན་གང་བརྩོན་པ། །རང་གི་ཚུལ་ཁྲིམས་ཐོག་མར་ཡོངས་སུ་སྦྱངས། །ཚུལ་ཁྲིམས་དག་པའི་མཐུ་ཡི་སྟོབས་ཀྱང་བསྐྱེད། །ཅི་ནས་རྨི་ལམ་རྨི་ཡང་འཚེ་མེད་པར། །འཇིག་རྟེན་ཀུན་ལ་བྱམས་པ་བསྐྱེད་པར་བྱ། །གཞན་ལ་ཕན་པར་གཅིག་ཏུ་བརྩོན་པ་དེས། །གཞན་གྱི་ལོངས་སྤྱོད་སྤྲུལ་བཞིན་རེག་མི་བྱ། །ཁ་ཏོན་སྤྱོད་པའི་བློ་ལས་ཕྱིར་ལོག་པས། །ཐོག་མར་གཞན་གྱི་བུད་མེད་བསླུ་བའི་བློ། །ཡོངས་སུ་གཏང་བྱ་འཇིག་རྟེན་ཕན་བྱེད་པས། །ལུས་ཀྱི་སྤྱོད་པ་སྐྱེས་བུ་མཆོག་ལྟར་བསྒྲུབ། །སྙན་ཅིང་ཡིད་འོང་དུས་དང་ལྡན་པའི་ཚིག །དབྱེན་དུ་མི་འགྱུར་བདེན་དང་མཐུན་པ་དག །དམ་ཆོས་ཡང་དག་ཁོང་དུ་ཆུད་འགྱུར་བ། །གཉེན་པོས་བཙལ་ཞིང་རྟག་ཏུ་བརྗོད་པར་བྱ། །གཞན་གྱི་བདེ་བ་ཕུན་སུམ་ཐོབ་གྱུར་ན། །བདག་གི་ཞོ་
ཤས་གང་ཞིག་བསྒྲུབ་བྱ་བ། །དེ་དག་ཁོ་བདག་ཉིད་ཀྱིས་རྙེད་གྱུར་ཅེས། །དགའ་སེམས་བསྐྱེད་བྱ་ཆགས་སེམས་ཡོངས་སུ་སྤངས། །ཉོན་མོངས་དབང་གྱུར་བདག་ཕན་མི་རེག་པར། །འདི་ནི་བདག་ཉིད་མཐུ་ཆུང་ཞན་པའི་མཐའ། །གཞན་གྱི་ཉེས་པ་ཀུན་ཀྱང་དེ་བཞིན་ཞེས། །གནོད་སེམས་མེ་འབར་གཞི་ལ་ཕྱིར་ནན་ཏན་བྱ། །ལོག་ལྟའི་འདུ་ཤེས་མུན་ནག་ཐིབས་པོ་དག །ཡེ་ཤེས་སྣང་བས་ཡིད་ལ་གསལ་བྱས་ཏེ། །ལྷ་མི་ཕུལ་གྱི་ཡོན་ཏན་བསྒོམ་བྱས་ཤིང༌། །དད་པ་མི་འཕྲོགས་རྩ་བ་བརྟན་པར་གཟུགས། །མཐོ་རིས་ཐར་པའི་བདེ་ལམ་གྱུར་པ་དེ། །ལས་ལམ་བཅུ་པོ་འདི་ལས་ཉམས་མི་བྱ། །འདི་ལ་གནས་པ་འགྲོ་ལ་ཕན་བསམ་པའི། །བསམ་པའི་ཁྱད་པར་འབྲས་བུ་ཡོད་པར་འགྱུར། །ངག་ལུས་ཡིད་རྣམས་ཡང་དག་བསྡམ་བྱ་བ། །མདོར་བསྡུས་ཚུལ་ཁྲིམས་ཡིན་ཞེས་རྒྱལ་བས་གསུངས། །ཚུལ་ཁྲིམས་མ་ལུས་འདུལ་བའི་གཞི་ཡིན་པས། །དེ་ཕྱིར་འདི་དག་རྣམ་པར་སྦྱང་བར་གྱིས། །སྲོག་གཅོད་སྤངས་པ་དེས་པའི་ངང་འཆང་བ། །འགྲོ་བ་ཐམས་ཅད་བསྟེན་ཞིང་ཕེབས་པར་འགྱུར། །དེ་ཡི་བག་ཆགས་སེམས་ལ་སྐྱོན་གྱུར་པ། །ནན་ཏན་མ་བྱས་རང་གིས་ཡོངས་སུ་འཆད། །བྱམས་པའི་ཁྱད་པར་རྗེས་མཐུན་སེམས་ལྡན་ཞིང༌། །ཁོན་གཅུགས་རྣམ་པ་ཡོངས་སུ་ཞི་འགྱུར་ན། །མྱ་ངན་རྣམ་པའི་ཉེས་པ་ཀུན་སྤངས་ཤིང༌། །བདེ་བར་དེ་ཉལ་བདེ་བར་སད་པར་འགྱུར། །གནོད་སྦྱིན་སྲིན་པོ་དག་ཀྱང་ཕན་པར་བྱེད། །ལམ་ངན་རྒྱུད་ཀྱིས་དེ་ལ་འཇིགས་པ་མེད། །ནད་མེད་ཡོན་ཏན་རྒྱན་དང་ལྡན་པ་ཡི། །བདེ་ལམ་བརྟེན་པའི་ཚེ་རིང་ཐོབ་པར་འགྱུར། །དེ་ཉིད་རྒྱུ་ཡིན་བྱང་ཆུབ་བརྙེས་པ་ཡིས། །བདེ་གཤེགས་རྣམས་ཀྱི་སྐུ་ཚེ་དཔག་ཡས་ཤིང༌། །འཇིག་རྟེན་བདེ་བ་སྐྱེད་ཅིང་དོན་མཛད་པ། །དགོངས་པའི་རྗེས་སུ་སྙེགས་པ་ཡོངས་སུ་འགྲུབ། །གཞན་གྱི་ལོངས་སྤྱོད་མ་བྱིན་མ་བླངས་པས། །འཇིག་རྟེན་གཞན་དུ་ལོངས་སྤྱོད་རྒྱ་ཆེན་དག །བུད་མེད་དབུགས་ཀྱིས་རི་རབ་མི་སྒུལ་ལྟར། །བགོ་སྐལ་བ་དང་འཕྲོགས་པས་མི་འཕྲོགས་འགྲུབ། །སྤྱོད་པ་དག་པས་ཀུན་གྱིས་ཡིད་འོང་ཞིང༌། །སྟོན་པའི་སྣོད་དུ་ཚེ་འདི་ཉིད་ལ་འགྲུབ། །དེ་ཕྱིར་ཕ་
རོལ་དུ་ཡང་དོགས་མེད་ཅིང༌། །ལམ་གྱི་གེགས་སུ་གྱུར་པའི་རྣམ་པ་མེད། །སྐྱིད་ལོངས་ཡེངས་ལ་སྙིང་པོ་མེད་རྟོགས་པས། །ཆེད་དུ་མ་བསྒྲུབས་སྦྱིན་པའི་ངང་དུ་འགྱུར། །དེ་ཕྱིར་ཉེ་བའི་ཉོན་མོངས་རྣམ་དག་པས། །བླ་ན་མེད་པའི་བྱང་ཆུབ་ངང་གིས་ཐོབ། །འདོད་པ་རྣམས་ལ་ལོག་པར་སྤྱོད་སྤངས་པས། །དབང་པོ་ཐུལ་ཕྱིར་རབ་ཏུ་ཞི་ལ་མོས། །འཇིག་རྟེན་བསྟོད་པས་ཕྱོགས་རྣམས་ཀུན་གྱི་མཐར། །གྲགས་པ་ཁྱབ་འགྲོ་གསལ་བ་ཀུན་ཐོབ་འགྱུར། །བུད་མེད་ཀུན་ལ་མ་ལྟར་བལྟས་པས་ན། །ཉོན་མོངས་འདོད་ཆགས་གང་ལའང་མི་འབྱུང་སྟེ། །དེ་ཕྱིར་དེ་ཡི་བསོད་ནམས་བསགས་པས་ན། །ཐུབ་དབང་སྐྱེས་ཆེན་དབང་པོ་མཚན་ལྡན་འགྲུབ། །ཚིག་ཏུ་གང་སྨྲས་བརྫུན་ལས་ཕྱིར་བཟློག་པས། །རབ་ཏུ་དགའ་ལྡན་གཡོ་སྒྱུ་རྣམ་དག་སེམས། །ཚིག་རྣམས་ཀུན་གྱིས་བླང་བར་གྲུབ་གྱུར་པས། །སེམས་ཅན་མང་པོ་ཆོས་གཞོམ་ཀུན་གྱིས་འགྲུབ། །བདེན་དང་ལྡན་ལ་ལྷ་རྣམས་བྱམས་གྱུར་པ། །ལྷ་ཡི་རང་བཞིན་ཡོན་ཏན་ཕྱོགས་བྱེད་པ། །དེ་ཡི་སྤྱོད་པ་ཀུན་ལ་མངོན་སུམ་པས། །འདི་འདྲ་དེ་ལ་ངོ་མཚར་ཆེ་བ་མེད། །འཇིག་རྟེན་གཞན་བྱམས་ཚད་མར་བྱེད་པ་ནི། །འཇིག་རྟེན་ཕལ་ཆེར་ཡོན་ཏན་མི་འཆང་ལ། །རང་གི་ཚད་ཀྱིས་གཞན་ལ་ཚོད་འཛིན་ཀྱང༌། །དེ་འདྲར་གྱུར་པ་དེ་ནི་ངོ་མཚར་ཆེ། །མེ་ཏོག་ཨུཏྤལ་ཡི་ནགས་བོར་ཞིང༌། །བདེ་ལྡན་ཁ་ནི་པདྨོ་འཕགས་ཚུལ་དུ། །དྲི་ཞིམ་སིམ་བྱེད་ཡིད་དུ་འོང་བ་དང༌། །དེ་ཡི་མཁའ་ལ་གནས་འཆའ་རྟེན་པར་འགྱུར། །ཡེ་ཤེས་འབར་བ་ངན་འགྲོའི་སྐར་ལྟ་བུ། །རིགས་དང་མི་རིགས་རྣམ་པར་ཤེས་གྱུར་པས། །ཅི་དགའ་སྡུག་པའི་རྣམ་རྟོག་བྱུང་གྱུར་ན། །བདག་ཉིད་དབང་དུ་གྱུར་པ་ཁྲེལ་གྱིས་འཛེམ། །དེ་ལྟར་རང་བཞིན་རྣམ་དག་ཚུལ་གྱུར་པས། །གཞན་ལ་དོགས་མེད་གཞན་གྱི་དོགས་མི་བྱ།། དེ་ཕྱིར་དེ་ཡི་བདེན་པའི་རྗེས་བསྙེགས་ཚིག །སངས་རྒྱས་གྲུབ་ཚེ་བསྲུང་བ་མེད་པར་འགྱུར། །ཕྲ་མ་དབྱེན་སྤངས་གཡོག་འཁོར་མི་འཕྲོགས་ཤིང༌། །གཞན་གྱི་གནོད་པས་ལུས་ལ་མི་ཚུགས་ཏེ། །ནན་ཏན་ལྷུར་བྱེད་དད་པ་དབྱེར་མེད་འགྱུར། །བྱམས་པ་སླུ་མེད་འཇིགས་པ་
མི་འགྱུར་དང༌། །འགྲོ་དོན་མི་གཏོང་སྙིང་རྗེ་མི་ཉམས་ཐོབ། །ཐུབ་དབང་གྲུབ་ཚེ་སློབ་མའི་དགེ་འདུན་ཡང༌། །ཚེ་རབས་བསྐལ་པས་ཕྱི་བར་མི་འགྱུར་འགྲུབ། །ཁྲོ་བའི་རྡུལ་མང་དཔུང་དུ་གྱུར་པ་ལ། །རྣམ་རྟོག་རླུང་གིས་ཀུན་དུ་འཚུབ་པ་རྣམས། །གྲགས་པའི་ལུས་ལ་གྲིབ་མར་འགྱུར་རོ་ཞེས། །ཞེ་གཅོད་རྣམ་པ་བྱམས་པའི་ཆུས་བཀྲུས་ཤིང༌། །དེ་ལས་ཕྱི་རོལ་ཚིག་སྙན་འཇམ་པ་ཡིས། །འཇིག་རྟེན་བསམ་པ་བདེ་བའི་དབང་དུ་འགྱུར། །འཇིག་རྟེན་དགའ་བ་རྩ་བ་ཟུག་གྱུར་པས། །དེ་ཡི་ཚིག་ནི་ཀུན་གྱིས་བླང་ཞིང་གཟུང༌། །དེ་ཕྱིར་འཇིག་རྟེན་རྣམ་པ་བརྒྱར་བཏུལ་ཞིང༌། །དེ་དག་སྡུག་བསྔལ་ལམ་ངན་གཅད་བྱ་སྟེ། །བསོད་ནམས་ལས་ལྡན་འདི་དང་ཕ་རོལ་དུ། །ཆོས་ཀྱི་ཚུལ་བསྲུངས་ངན་འགྲོར་འགྲོ་མི་འགྱུར། །རྒྱང་རིང་གནས་ནས་ཟབ་གསལ་གྲགས་པ་དང༌། །དཔལ་ལྡན་ཉེ་ན་རང་བཞིན་བདེ་སྐྱེ་བ། །དེ་བཞིན་འབྲུག་སྒྲ་ཟབ་ལ་གསལ་བ་ཡི། །ཚངས་པའི་སྒྲ་དབྱངས་ཁ་ཡི་རྒྱན་ཀྱང་བྱེད། །འཁྱལ་བའི་ཚིག་ལས་ཕྱིར་ལོག་གྱུར་པས་ན། །མཁས་པ་རྣམས་ལ་ཤིན་ཏུ་དབེན་པར་འགྲོ། །དེ་ཡི་བློ་ཡང་བདེན་པར་སྨྲ་མོས་པས། །སྐྱོན་མེད་ཆེ་བ་ཉིད་ཀྱང་དེས་ཐོབ་པོ། །བསོད་ནམས་དེས་ན་ཐུབ་པའི་རྒྱལ་གྱུར་ཚེ། །དཀའ་ཞིང་ཟབ་པ་ཡོངས་སུ་བྲིས་པ་ཡི། །ཞུ་བ་རྣམ་མང་གྲངས་མེད་དུས་གཅིག་ཏུ། །ཐོགས་པ་མེད་པའི་ཚིག་གིས་ལུང་ཡང་སྟོན། །ཆགས་སེམས་དོན་མེད་འདི་དང་ཕ་རོལ་དུ། །གནོད་པའི་འབྲས་བུ་སྒྲུབ་བྱེད་བློས་གསལ་ཏེ། །ཕྲག་དོག་མེད་པས་བསམ་པ་ཇི་བཞིན་དུ། །ཕུན་སུམ་ཚོགས་པའི་ལོངས་སྤྱོད་རྒྱས་པ་ཐོབ། །རྣམ་ཤེས་དག་པས་དེ་ལ་བརྟེན་པ་ཡི། །ལུས་ངག་ཡིད་ཀྱི་ལས་ཀྱང་ཤིན་ཏུ་གཙང༌། །དུས་དང་མཐུན་པས་གསལ་བའི་མཁའ་དབྱིངས་ལ། །སྐར་ཚོགས་དྲི་མེད་དཀྱིལ་འཁོར་ཇི་བཞིན་འབར། །དེ་ཡི་ལོངས་སྤྱོད་མཆོག་རྣམས་བསོད་ནམས་ལ། །རྟག་ཏུ་སྦྱར་བ་དེ་ཡི་བློ་འཇུག་སྟེ། །ཁེངས་པ་ང་རྒྱལ་ཅན་གྱིས་གླགས་མེད་ཅིང༌། །རྒྱལ་པོ་དག་གིས་དེ་ནི་བསྟན་པར་འགྱུར། །དེ་ཡི་ལས་དགེས་བསྒྲུབས་པའི་འབྲས་བུ་བས། །དབང་པོ་ནམ་ཡང་ཉམས་པར་འགྲོ་བ་མེད། །དེ་ཕྱིར་འཇིག་རྟེན་གསུམ་གྱིས་མཆོད་འོས་པའི། །
འཁོར་ལོ་ཟློག་བྱེད་སྟོན་པའི་མཆོག་ཏུ་འགྱུར། །གནོད་སེམས་གདུང་བའི་རིམས་ནད་ཡོངས་བསལ་ཞིང༌། །རང་བཞིན་དགེ་ཚུལ་ཕུན་སུམ་ཚོགས་པས་ན། །ཤིན་ཏུ་ཞི་ཞིང་གསལ་བའི་ངང་ཚུལ་གྱིས། །ཡིད་ཀྱིས་མོས་པ་ཤིན་ཏུ་གསལ་བར་འགྱུར། །བྱམས་པའི་རོ་བདེ་ཁྱད་པར་ཐོབ་པས་ན། །འཚེ་བའི་ཚུལ་ལམ་འཐབ་མོ་འཁྲུག་ལྡན་དང༌། །འཕགས་མིན་སྤྱོད་པ་ལས་ངན་རྣམ་པ་ལ། །དེ་ཡི་བློ་ནི་ནམ་ཡང་འཇུག་མི་འགྱུར། །ལས་རུང་འཇམ་པའི་ཡིད་ཀྱི་ལས་ལྡན་ས། །ཚངས་པའི་འཇིག་རྟེན་དེ་ལ་དཀོན་པ་མེད། །འཇིག་རྟེན་ཀུན་དུ་འཕགས་དང་མཉམ་འགྱུར་ཞིང༌། །འགྲོ་བས་ལྷ་བཞིན་གུས་པས་མཆོད་པར་འགྱུར། །སེམས་ཅན་ཀུན་ལ་ཕན་དགའ་ཡང་དང་ཡང༌། །དབྱར་གྱིས་བསྙོགས་པའི་ཆུ་ཀླུང་ཆུ་བོ་དག །སྟོན་དུས་གསལ་བར་དངས་པར་བྱ་བ་བཞིན། །འགྲོ་བ་ཀུན་གྱི་ཡིད་ལ་དང་བ་བསྐྱེད། །ཀུན་གྱིས་བལྟ་ན་ཡིད་འོང་བཟང་བ་དང༌། །ཡེ་ཤེས་རྒྱུས་བྱུང་ཚུལ་མཆོག་རྨད་བྱུང་བ། །འཇིག་རྟེན་རྣམ་ཤེས་སོ་སོར་བསྒྲུབ་པ་དག །སངས་རྒྱས་བསྒྲུབ་ཚེ་རྣམ་པ་གཅིག་ཏུ་བསྒྲུབ། །ལོག་པར་ལྟ་བའི་འདམ་ལ་མི་འདུག་ན། །དེ་བས་བསྒྲུབ་པའི་གྲོགས་དང་ཕྲད་པར་འགྱུར། །རང་གི་ལས་བཞིན་འགྱུར་བར་ལམ་མཐོང་བས། །སྡིག་པའི་ལས་རྣམས་དེ་ནི་ཡོངས་སུ་སྤོངས། །རྒྱལ་བ་རྣམས་ལ་དད་པ་མི་བཟློགས་ཤིང༌། །ངོ་མཚར་བཀྲ་ཤིས་རྣམས་ཀྱིས་ཉོན་མོངས་མེད། །འཕགས་པའི་ལམ་ལ་གནས་པ་དེ་འཐོབ་སྟེ། །དེ་ཕྱིར་དེ་ནི་ཁྱད་པར་འགྲོ་བ་འཐོབ། །འཇིག་ཚོགས་ལྟ་བས་ཡང་དག་འཕགས་པས་ན། །རྒྱུ་རྣམས་ཐད་ཕྱིར་ངན་འགྲོར་དེ་མི་འགྲོ། །ཆགས་མེད་ཡེ་ཤེས་མཆོག་དང་དེ་ལྡན་པས། །ས་དང་མཐོ་རིས་ཆགས་པ་མེད་པར་འགྲོ། །འགྲོ་བའི་དོན་ལ་མཐུ་ཆེ་དཔའ་བ་ཡི། །ཐམས་ཅད་མཁྱེན་མྱུར་རྒྱལ་དབང་ཆོས་ཀྱི་རྣམས། །རང་རྒྱལ་ལ་སོགས་ཐོབ་པར་མ་གྱུར་པའང༌། །ཐམས་ཅད་དེ་ལ་དེ་ཕྱིར་མངོན་དུ་འགྱུར། །དེ་འདྲའི་ལོངས་སྤྱོད་ཡོན་ཏན་རྒྱན་ལྡན་ཞིང༌། །རང་ལ་དབང་ཡོད་བསྒོམ་འོས་དེ་དགའི་རྒྱུ། །མཁས་པ་སུ་ཞིག་ཡང་དག་ལེན་མི་བྱེད། །སེམས་ཅན་ཕན་དགའ་དེ་ལེན་ཅི་ཞིག་སྨོས། །ལྷ་རྫས་དགའ་རྒྱུ་
མི་ཡི་ལོངས་སྤྱོད་དང༌། །བདེ་མཆོག་རོ་མཆོག་ལྷ་ཡི་ཕུན་སུམ་ཚོགས། །ཚུལ་ཁྲིམས་རྒྱུས་བྱུང་ཅི་ཞིག་ངོ་མཚར་ཆེ། །སངས་རྒྱས་ཆོས་རྣམས་དེ་ལས་བྱུང་བ་ལྟོས། །ཚུལ་ཁྲིམས་ཉམས་པས་རང་དོན་མི་ནུས་ན། །གཞན་དོན་ཚུལ་ལ་མཐུ་ཡོད་ག་ལ་འོང༌། །དེ་ཕྱིར་གཞན་དོན་ལེགས་པར་བརྩོན་པ་ཡིས། །འདི་ལ་རིམ་གྲོ་གློད་པར་རིགས་པ་མིན། །དེ་བས་མི་བཟད་འཇིགས་པ་མཐོང་བྱ་ཞིང༌། །སྤང་འོས་ཆུང་ཡང་རྣམ་པར་སྤང་བར་གྱིས། །བྱང་ཆུབ་སེམས་དཔས་ལུང་བསྟན་ཚུལ་ཁྲིམས་དག །རང་གི་བདེ་ལ་བརྐམ་པས་བྲལ་མི་བྱ། །བུད་མེད་ལུས་དང་ཚུལ་སྤྱད་མཐོང་སྩོགས་པའི། །སྐབས་ཀྱི་ཉེས་པས་ཤག་ཤིག་ཚུལ་མི་བཅང༌། །མི་སྲུན་སྐྱེ་བོ་ཉོན་མོངས་རྣམ་པས་ཀྱང༌། །ཚུལ་ཁྲིམས་འདྲན་འདྲེན་རྣམ་པ་ཡོངས་སུ་སྤངས། །གཅིག་ཏུ་དཀར་ཆོས་ཚོགས་ནི་བསགས་བྱས་ཤིང༌། །རྙོག་དང་རྣམ་བྲལ་ཚུལ་ཁྲིམས་བསྟེན་པར་བྱ། །རང་དབང་གྱུར་ལས་ཉམས་སུ་བདེ་བ་དང༌། །མཁས་པས་བསྔགས་པའི་རྒྱན་ལྡན་ཚུལ་ཁྲིམས་བསྲུང༌། །བསླབ་པའི་གནས་སྐབས་ཚང་བར་ཡོངས་རྫོགས་པས། །ཀུན་རྫོབ་བསྙེམས་མེད་ཚུལ་ཁྲིམས་ཡང་དག་བསྟེན། །རྣམ་དག་སེམས་ལ་གཟུགས་བརྙན་གྱུར་པ་ཡི། །གཞན་དོན་རོ་གཅིག་སྦྱོར་བས་དེ་དག་བསྲུང༌། །དྲན་པའི་གཞི་ལྡན་དབང་པོ་བསྡམས་བྱས་ཤིང༌། །ཚུལ་ཁྲིམས་བསྲུང་ལ་ཤིན་ཏུ་བརྩོན་པར་བྱ། །འཇིག་རྟེན་ཚུལ་ཁྲིམས་འཆལ་པ་མང་པོའི་མུན། །ཉི་མའི་འོད་ཀྱིས་གསལ་བ་ཇི་བཞིན་གསལ། །སྡུག་བསྔལ་གཉེན་པོའི་དོན་དུ་བསྟེན་པ་ཡང༌། །ལུས་ཀྱི་རྨ་བསྐུའི་རྡུལ་ལ་སོགས་པ་དང༌། །རིགས་པས་འཐོབ་པས་ཆོ་ག་བསམ་བྱས་ཤིང༌། །གཞན་གདོང་ལྟ་བའི་རེ་བ་མེད་པར་བྱ། །ཚུལ་དང་མཐུན་ཞིང་ཡོན་ཏན་འབྱུང་བའི་རྒྱུ། །ཡིད་བཞིན་དགའ་བ་ཀུན་གྱི་སྤྱོད་གྱུར་ཀྱང༌། ངོ་མཚར་མེད་པས་ང་རྒྱལ་སྤང་བྱ་ཞིང༌། །དེ་ལས་བྱུང་བའི་གྲགས་པ་བསྙེམས་མི་བྱ། །ཐོབ་པའི་ཡོན་ཏན་རྣམ་པ་གཟུགས་བརྙན་དག །མཛའ་བའི་ཚུལ་གྱིས་དགྲ་དང་ཉེ་བ་བཞིན། །པདྨའི་ནགས་ལ་ཟླ་བའི་འོད་གསལ་ལྟར། །བརྟུལ་ཞུགས་ལྷོད་པ་རྣམས་ལ་བདེ་བ་གནོད། །ཚུལ་
ཁྲིམས་ཡོན་ཏན་བསྒོམ་པའི་ཚུལ་དུ་གསུངས། །ཡོན་ཏན་མ་ལུས་བྱང་ཆུབ་སེམས་ལ་གནས། །བྱང་ཆུབ་མཆོག་སེམས་སྙིང་རྗེའི་རྒྱུ་ལས་བྱུང༌། །དེ་བས་སྙིང་རྗེའི་དང་ཚུལ་ལྡན་པར་བྱ། །གང་ཞིག་འདོད་པའི་ཁམས་ལ་མི་གནས་ཤིང༌། །གཟུགས་ཀྱི་ཁམས་ལའང་དེ་བཞིན་མི་གནས་ཏེ། །གཟུགས་མེད་ཁམས་ལའང་དེ་བཞིན་མི་བརྟེན་པ། །དེ་ནི་ཚུལ་ཁྲིམས་ཡང་དག་ཡིན་པར་བརྗོད། །གང་ཞིག་འཇིག་རྟེན་དཔག་ཡས་སེམས་ཅན་དག །མཐའ་དག་ཚུལ་ཁྲིམས་དག་ལ་དགོད་མོས་ཤིང༌། །འཇིག་རྟེན་རྔན་ཕྱིར་ཚུལ་ཁྲིམས་སྟེན་བྱེད་པ། །དེ་ནི། ཚུལ་ཁྲིམས་ཕ་རོལ་ཕྱིན་པར་གསུངས། །དེ་བས་ངན་སོང་འཇིགས་དང་རྒྱལ་སྲིད་དང༌། །མཐོ་རིས་ཕུན་སུམ་ཚོགས་པ་སྨོན་བཙལ་ཏེ། །ཚུལ་ཁྲིམས་དྲི་མེད་ཡང་དག་བསྲུང་བྱ་ཞིང༌། །འཇིག་རྟེན་དོན་ལ་བརྩོན་པས་ཚུལ་ཁྲིམས་བསྟེན། །ཚུལ་ཁྲིམས་དེ་ནི་ཁྱད་པར་ཐོབ་པའི་ལམ། །སྙིང་རྗེས་དང་ཅན་རྣམས་དང་མཉམ་པར་བསྒྲུབ། །ཡེ་ཤེས་གཙང་མ་ལུས་ཀྱི་རང་བཞིན་ཏེ། །སྐྱོན་བྲལ་རྒྱན་དུ་འགྱུར་བའི་མཆོག་ཅེས་བྱ། །ཁམས་གསུམ་ཀུན་དུ་ཡིད་འོང་དྲི་བསུང་དང༌། །རབ་ཏུ་བྱུང་དང་མི་འགལ་བྱུག་པ་ཡིན། །ཆ་ལུགས་མཐུན་ཡང་ཚུལ་ཁྲིམས་ལྡན་གྱུར་ན། མི་ཡིན་ནང་ན་དེ་ནི་འཕགས་པར་འགྱུར། །ཚིག་ཏུ་མ་བརྗོད་ཚིགས་སུ་མ་གྱུར་ཀྱང༌། །ཉམས་སུ་མཁོ་བའི་ལོངས་སྤྱོད་རིམ་གྲོ་འདུ། །སྡིག་པ་མེད་པར་འཇིག་རྟེན་ཀུན་སྡུད་དེ། །ཆགས་མེད་མ་བསྒྲུབས་དབང་ཕྱུག་ཐོབ་པར་འགྱུར། །བརྗོད་དུ་མི་འོས་རིགས་སུ་འབྱུང་བ་དང༌། །ཕན་ཞིང་དབེན་པ་གང་ཡང་མ་བྱས་ཤིང༌། །སྔོན་ཆད་མི་ཤེས་སྐྱེ་བོ་ཐམས་ཅད་དང༌། །ཚུལ་ཁྲིམས་ལྡན་པའི་སྐྱེ་བོ་དེ་ལ་འདུད། །རྐང་པས་བཀྲ་ཤིས་གྱུར་པའི་རྡུལ་དག་ཀྱང༌། །སྤྱི་གཙུག་དམ་པས་བླངས་ཤིང་ལྷ་དང་མི། །ཕྱག་འཚལ་མགོས་གཏུགས་ཐོབ་པ་ཀུན་དུ་ཁྱེར། །དེ་ཕྱིར་ཚུལ་ཁྲིམས་དཔལ་ལྡན་རིགས་མཆོག་ཡིན། །ཚུལ་ཁྲིམས་ཀྱི་ཕ་རོལ་ཏུ་ཕྱིན་པའི་ལེའུའོ།། །།བདུད་རྣམས་ཐམས་ཅད་ཡོངས་སུ་རྨོངས་བྱེད་ཅིང༌། །རྣམ་ཐར་ཐོབ་བྱེད་བདེ་བར་གང་གསུངས་པའི། །བཟོད་པ་ཤིན་ཏུ་ཕན་པ་སྒྲུབ་བྱེད་པ། །དེ་ལ་སུ་ཞིག་ནན་ཏན་མི་བྱེད་
ཡོད། །གཞན་ལ་གནོད་བྱེད་ནམ་ཡང་མི་ཤེས་པ། །བརྟན་པ་རྣམས་ཀྱི་ཡིད་འོང་ངང་ཚུལ་ཏེ། །འཇིག་རྟེན་དོན་བྱེད་སྙིང་རྗེའི་ཚུལ་བསྙེམས་པ། །ཡོན་ཏན་མཐུན་པའི་མིང་ནི་བཟོད་པ་ཡིན། །གཞན་དོན་མཐུན་པའི་ཡིད་དང་ལྡན་པ་ལ། །ཚུལ་གྱི་དམ་པ་བཟོད་པ་ཡིན་ཞེས་གསུངས། །འཇིག་རྟེན་ལེགས་པ་ཕུན་སུམ་ཚོགས་པ་དག །ཁྲོ་བའི་སྐྱོན་ལ་བཟོད་པས་ཡོངས་སུ་སྐྱོབ། །མཐུ་ལྡན་རྣམས་ཀྱི་རྒྱན་གྱི་དམ་པ་སྟེ། །དཀའ་ཐུབ་ཚུལ་འཆང་རྣམས་ལ་སྟོབས་ཀྱི་ཚུལ། །གནོད་སེམས་འབྲོག་གི་མེ་ལ་ཆུ་ཡི་རྒྱུན། །འདི་ལ་གཞན་ལ་གནོད་དགུ་བཟོད་པས་སེལ། །སྐྱེ་བོ་མཆོག་གི་བཟོད་པའི་གོ་ཆ་ལ། །མི་སྲུན་སྐྱེ་བོའི་ཚིག་གི་མདས་རྡུགས་པས། །དེ་དག་བསྟོད་པའི་མེ་ཏོག་བཟང་འགྱུར་ཞིང༌། །གྲགས་པའི་ཕྲེང་བ་ཡིད་དུ་འོང་བར་འགྱུར། །སྐྱེ་བོ་གདུག་པའི་ངག་གི་མཚོན་གྱི་རྨ། །ཡེ་ཤེས་ཟླ་བ་བཞིན་དུ་སིམ་པར་བྱེད། །བརྟུལ་ཞུགས་འཆང་བ་བརྟན་པའི་རང་བཞིན་ཏེ། །བཟོད་པ་དེ་ནི་ཡོད་ཏན་ཚོགས་ཀྱི་གནས། །ཟབ་ཅིང་བརྟན་པའི་སྙིང་པོར་གྱུར་པ་སྟེ། །ཁྲོ་བའི་གདུང་བ་གཞིལ་བ་དབྱར་དང་འདྲ། །ཡོན་ཏན་རྒྱ་མཚོའི་རླབས་ཀྱིས་བརླབས་པ་ཡི། །སྒྲ་སྙན་ཁྱབ་པ་བཟོད་པའི་མཐུ་ལས་བྱུང༌། །ཚངས་རིས་འཇིག་རྟེན་དག་ཏུ་འཛེགས་པ་ལ། སྐས་ཀྱི་ཐེམ་བཞིན་སྐྱོ་བའི་སྐོན་དང་བྲལ། །ཡོན་ཏན་མཛེས་ལྡན་མཚན་རབ་བརྒྱན་པ་ཡི། །གཟུགས་བསྒྲུབ་བཟོ་ཡི་གནས་ཀྱང་བཟོད་པ་ཡིན། །སྐྱོན་གྱི་ཤིང་ཆེན་ཁོན་བཟོད་ཆུ་བོ་བཞིན། །རྫོགས་པའི་བྱང་ཆུབ་སེམས་ཀྱིས་སྤེལ་བ་ཡིན། །བསོད་ནམས་ཆུ་ཡི་ཚོགས་དང་རྟག་ཏུ་མཐུན། །འཇིག་རྟེན་གཞན་དུ་ཕན་དགེ་རྫོགས་པར་བསྒྲུབ། །འགྲོ་ལ་ཕན་དོན་འཕེལ་བའི་མཆོག་ཀྱང་ཡིན། །གྲགས་པའི་སྙན་པའི་རང་བཞིན་ཕུལ་གྱི་རྒྱུ། །ཡོན་ཏན་ཡིད་བསྒྲུབ་གནས་ཀྱང་བཟོད་པ་ཡིན། སྙིང་རྗེས་སེམས་ཅན་དབེན་པར་མཐོང་བས་ན། །འཁོར་བའི་ཉེས་པས་དེ་ནི་སྐྱོ་མི་འགྱུར། །རང་གི་ལས་དགེ་འཇིག་རྟེན་ཕན་བྱེད་པས། །འཇིག་རྟེན་ཀུན་དུ་གྲགས་པའི་ཚོགས་སུ་འགྱུར། །ཡེ་ཤེས་མཆོག་གིས་སྦྱངས་པའི་བཟོད་ལྡན་ན། །མཚར་འཛིན་དཔྱ་བ་ཀུན་གྱིས་འགོ་
བ་མེད། །མི་རྟག་བཟོད་པའི་མཐུ་དང་ལྡན་པས་ན། །བདེ་བའི་རྣམ་པས་དགའ་བར་འགྱུར་བ་མེད། །གནོད་པའི་རྣམ་པ་མི་བཟད་མང་པོས་ཀྱང༌། །སྐྱེས་མཆོག་དེ་དག་ཡིད་ནི་འགྱུར་བ་མེད། །བཟོད་པའི་སྟོབས་ཀྱིས་ཤིན་ཏུ་བརྟན་པ་ན། །བྱང་ཆུབ་མཆོག་སྒྲུབ་མོས་པ་མེད་བར་འགྱུར། །བཟོད་པས་བརྟན་པའི་སྤྱོད་པ་དམ་པ་དེས། །དཀའ་ཐུབ་དཀའ་བ་ཀུན་དུ་སྟོན་བྱེད་ཅིང༌། །མུ་སྟེགས་དྲེགས་པས་མཐོ་བའི་བསམ་པ་དག །ཕན་པའི་བསམ་པས་བཅིལ་ཞིང་དམའ་བར་བྱེད། །འཇིག་རྟེན་རྨོངས་པ་བདག་སུམ་ཆགས་གྱུར་ཏེ། །ལྷག་མ་གཞན་སྙམ་ང་རྒྱལ་འཆང་བ་དག །དེ་ཡི་གནོད་པས་ཟིལ་གནོན་སེམས་གྱུར་ཅིང༌། །བཟོད་དང་མི་ལྡན་ཡོངས་སུ་གདུང་བར་འགྱུར། །སྐྱེས་མཆོག་བསམ་པ་སྙིང་རྗེའི་མགོན་ལྡན་ཞིང༌། །བཟོད་པས་བཀྲ་ཤིས་བསྒྲུབ་པ་འཆང་བ་དང༌། །བདག་ཏུ་ལྟ་བ་ཡོངས་སུ་སྤངས་པ་ལ། །གནོད་བྱེད་གཞན་དང་ཉེ་ཡང་གནོད་པ་མེད། །བརྟན་པ་ཉམ་ཆུང་སེམས་ཀྱི་སྐྱོན་གྱུར་པའི། །ཁྲོ་བ་ལོག་པ་རྣམ་པར་རྟོག་ལས་བྱུང༌། །ཡང་དག་རྟོག་པ་ཡིད་ལ་ཞི་སྐྱེ་ཞིང༌། །བཟོད་པའི་རྣམ་པ་མཉམ་པར་གཞོག་པར་བྱེད། །ཆུ་ལ་ཟླ་བའི་གཟུགས་བརྙན་ཡོད་འདྲ་བའི། །བཟོད་པའི་རྣམ་རྟོག་ཞི་ལ་བརྟེན་པ་ལས། །འཕགས་པས་རྟག་ཏུ་སྐབས་མེད་འཕགས་པར་བྱ། །རྣམ་རྟོག་ཞི་བ་དོན་དམ་བཟོད་པ་ཞེས། །བཟོད་པའི་ཡང་དག་ཉིད་མཁྱེན་དེ་དག་གསུངས། །དེ་བས་འཇིག་རྟེན་མི་འདྲ་རྟོགས་བྱ་ཞིང༌། །རྣམ་རྟོག་ཉེ་བར་ཞི་ལ་ནན་ཏན་གྱིས། །མིག་ནི་མིག་ཏུ་ཟད་ན་ཅི་སྟེ་ཁྲོ། །རྣ་བ་ལ་སོགས་དེར་ཟད་ཁྲོ་མེད་ཅེས། །དེ་ལྟར་གང་བཟོད་སྐྱེ་མཆེད་ལྟོས་པ་སྟེ། །དེ་ནི་དོན་དམ་ཉིད་དུ་བཟོད་པ་མིན། །སྒྲ་དང་ཚིག་ནི་མི་རྟག་རང་བཞིན་ཏེ། །སྒྲ་དང་རྣམ་རྟོག་འདི་ཡང་མི་རྟོག་ཅེས། །གང་བཟོད་དེ་ནི་མི་རྟག་རྟོག་པ་སྟེ། །བཟོད་པའི་མཆོག་ཏུ་དེ་ཡང་གསུངས་པ་མིན། །ཉེས་པ་བྱེད་པ་གང་ལའང་ཡོད་པ་མིན། །གང་ལ་བྱ་བ་དེ་ཡང་མེད་དོ་ཞེས། །གང་བཟོད་དེ་ནི་བདག་མེད་སྦྱར་བ་སྟེ། །དེ་ཡང་བཟོད་པའི་ཕུལ་དུ་ཕྱིར་པ་མིན། །བདེ་དང་སྡུག་བསྔལ་བསྟོད་དང་སྨད་པ་དག །ཀུན་ཀྱང་རྟེན་ཅིང་འབྲེལ་འབྱུང་དངོས་པོ་ཞེས། །གང་བཟོད་དེ་ནི་
རྟེན་འབྲེལ་རྟོགས་བྱའི་ས། །བཟོད་པ་ཤིན་ཏུ་མཉམ་བཞག་དེ་མ་ཡིན། །འདི་ནི་ཡོངས་སུ་རྨོངས་པས་བསླུས་གྱུར་པས། །བསམ་པ་ལོག་གྱུར་དེ་འདྲ་བདག་མིན་ཞེས། །གང་བཟོད་དེ་ནི་མཐོན་དམན་བསམ་པ་སྟེ། །བཟོད་པའི་ཕུལ་གྱི་གོ་སྐབས་དེ་ལ་མེད། །སྒྲ་སྐད་ཡི་གེ་སྒྲ་སྙན་ཇི་བཞིན་ཏེ། །རེ་རེ་བརྗོད་ཅིང་དེ་བཞིན་འཇིག་པས་ན། །སུ་ལ་སུ་ཞིག་ཇི་ལྟར་གནོད་འགྱུར་ཞེས། །བཟོད་པ་དེ་ཡང་བཟོད་པའི་ཕུལ་མ་ཡིན། །འདི་ནི་བདག་གི་སྡིག་པ་ཟད་བྱའི་ཕྱིར། །རང་གི་ཆོས་ལ་གནོད་པའང་མི་ལྟ་ན། །བདེ་གཤེགས་དམ་པ་ཅི་རོ་བ་མ་ཡིན་ཞེས། །གང་བཟོད་དེ་ནི་མིང་ཙམ་བཟོད་པ་མིན། །རང་གི་ལས་བཞིན་འགྱུར་བ་རྟོགས་བྱ་ཞིང༌། །དེ་ཡི་ཡོན་ཏན་རྫོགས་པས་བཟོད་བྱེད་པ། །དེ་འདྲའི་བཟོད་པའང་རྣམ་རྟོག་སྦྱོར་ཅན་ཏེ། །བཟོད་པའི་མཐར་ཕྱིན་མཆོག་ནི་དེ་མ་ཡིན། །མི་རྟག་སྡུག་བསྔལ་མི་གཙང་བདག་མེད་པ། །བདག་ལ་བཟོད་ཀྱི་བཟློག་པ་མ་ཡིན་ཞེས། །གང་ཡིན་དེ་ནི་གཉེན་པོ་ཞི་བཟོད་ཀྱི། །གཉིས་ཀྱི་རྗེས་འབྲང་དོན་དམ་བཟོད་པ་མིན། །སྐྱེ་བོ་འདི་ནི་ཡང་དག་མི་ཤེས་པས། །དེ་ཕྱིར་གཞན་ལ་གནོད་པར་དགའོ་ཞེས། །གང་བཟོད་དེ་ཡང་མཉམ་ཉིད་མཉམ་མི་འགྲོ།། བཟོད་པ་དེ་ཡང་རྣམ་རྟོག་སྐྱོན་ཅན་ཡིན། །མཐོ་དམན་མཉམ་པའི་རྣམ་རྟོག་རྣམ་པ་དག །གང་ཚེ་མ་ལུས་ཡང་དག་ཞི་གྱུར་པ། །དེ་ནི་བཟོད་པ་བླ་མེད་དམ་པ་ཞེས། །གཉིས་མེད་ལམ་ལ་སྤྱོད་པ་དེ་དག་གསུངས། །རང་དང་གཞན་དང་གཉི་ག་རྒྱུ་མེད་ལས། །དངོས་པོ་གང་ཡང་འབྱུང་བ་མེད་པ་དང༌། །རང་དང་གཞན་དང་གཉི་ག་རྒྱུ་མེད་ལས། །དངོས་པོ་གང་ཡང་འཇིག་པར་འགྱུར་བ་མེད། །ཡོད་དང་མེད་ལ་སྐྱེ་བ་མེད་པས་ན། །སྐྱེ་བ་མེད་ཕྱིར་གང་ཡང་འགག་པ་མེད། །དངོས་པོའི་རྣམ་རྟོག་རང་བཞིན་སྟོང་པ་ཉིད། །ཡང་དག་མཐོང་ན་བཟོད་པའི་ཕུལ་ཞེས་བྱ། །དེ་ཐོབ་གྱུར་ན་རྒྱལ་བ་འདིར་འགྱུར་ཞེས། །རྒྱལ་བ་རྣམས་ཀྱིས་རྣམ་མང་ལུང་ཡང་བསྟན། །དེ་ནི་རྟག་ཏུ་ཡང་དག་མཉམ་གཞག་ཀྱང༌། །འཇིག་རྟེན་ཕན་འདོད་གྲངས་མེད་ཀུན་དུ་འབྱུང༌། །ཆོས་དང་སྨོན་ལམ་ལས་ལ་དབང་ཐོབ་སྟེ། །མོས་པ་རྫུ་འཕྲུལ་སྐྱེ་བའི་དབང་
ཡང་ཐོབ། །དེ་བཞིན་སེམས་དང་ཡོ་བྱད་རྣམ་པ་དང༌། །ཡེ་ཤེས་མཆོག་དང་ཚེ་ལ་དབང་བ་ཐོབ། །དབང་གི་ནོར་མཆོག་ཡུན་དུ་མི་ཟད་ཅིང༌། །གཞན་དོན་ཚེ་སྒྲུབ་དེ་འདྲ་ཐོབ་གྱུར་ནས། །འགྲོ་བ་མི་བདེའི་རྒྱུན་དུ་ལྟུང་བ་དག །ཡོངས་སུ་བཟུང་ཕྱིར་དབང་ལྡན་དེ་དག་སྐྱེ། །དེ་ཕྱིར་གཞན་དོན་ཕལ་ཆེར་བཀུར་སྤྲོ་བས། །བཟོད་པ་ཐབས་ཚུལ་འདི་འདྲ་བསྙེན་པར་བྱ། །དེ་ལ་གནས་ལ་གཞན་དོན་ཆེ་བསམ་པའི། །སྤྱོད་ཡུལ་ཡོན་ཏན་འབྲས་བུའི་རྒྱན་ལྡན་འགྱུར། །འདི་ལ་དད་པ་རྩ་བ་བརྟན་གྱུར་ན། །དེས་ཀྱང་ཐུབ་རྒྱལ་ངེས་པར་འགྱུར་ཞེས་གསུངས། །ཆོས་ཀྱི་ལམ་ལ་དད་པ་རྒྱུན་ཆགས་ན། །བསམ་པ་ཡིད་བཞིན་ཤིང་རྟ་ཆག་མི་འགྱུར། །བཟོད་པའི་ཕ་རོལ་ཏུ་ཕྱིན་པའི་ལེའུའོ།། །།ཐམས་ཅད་བཟོད་པའི་མཐུ་ནི་སྐྱེས་གྱུར་ནས། །སྤྱོད་པའི་མཐུ་ཆེན་མཐའ་དཀའ་བརྩོན་འགྲུས་ཀྱིས། །དཔའ་བོ་བརྟུལ་ཞུགས་ཐམས་ཅད་རྩོམ་བྱེད་པས། །ལྷའམ་བདུད་རྣམས་ལས་ཀྱང་འཕགས་པར་འགྲོ། །ཚེ་འདིར་མཐར་ཕྱིན་འཇིག་རྟེན་དོན་དག་ཀྱང༌། །བརྩོན་འགྲུས་མེད་པས་མཐར་ཕྱིན་བྱ་བ་དཀའ། །ཡོངས་སུ་སྐྱོ་མེད་བརྩོན་འགྲུས་ཆེ་ལྡན་ན། །མི་འཐོབ་མི་འགྲུབ་རྣམ་པ་གང་ཡང་མེད། །སྐྱེ་བོ་མ་རབས་ཐོག་མར་བརྩམས་མི་མོས། །བརྩམས་ནས་དབུས་སུ་སྒྱིད་ལུག་བརྩོན་འགྲུས་གཏོང༌། །གཞན་དོན་ངལ་མེད་བརྩོན་འགྲུས་ལྡན་པ་ནི། །མྱ་ངན་འདས་སྟོང་སྤྱོད་པ་རྒྱ་ཆེན་རྩོམ། །ལེ་ལོས་བསླུས་པའི་འགྲོ་བ་ཕལ་ཆེར་ནི། །བརྩོན་འགྲུས་རང་དབང་ཡོད་ཀྱང་བདག་དོན་གཏོང༌། །བརྩོན་འགྲུས་ཆེ་ལྡན་གཞན་ལ་ལྟོས་མེད་ནི། །གཞན་དོན་ཁུར་ཆེན་སྐྱོ་བ་མེད་པར་འཁྱེར། །སྔ་ཕྱི་འཁོར་བའི་མཐའ་དང་མཉམ་ཙམ་དུ། །རྒྱ་ཆེ་རིང་བའི་ཉིན་དང་མཚན་གྱུར་ལ། །དེ་འདྲ་བསགས་པས་ལོ་གྱུར་དུས་རིང་བའི། །བསྐལ་པ་རྒྱ་མཚོའི་ཆུ་ཐིགས་གྲངས་སྙེད་ཀྱིས། །བྱང་ཆུབ་མཆོག་གི་སེམས་གཅིག་སྐྱེ་འགྱུར་བ། །དེ་འདྲའི་རྣམ་པས་ཚོགས་གཞན་དེ་རེ་ཞིང༌། །བསྒྲུབ་དགོས་གྱུར་ཀྱང་སྙིང་རྗེས་སྐྱོ་བསལ་ཏེ། །བྱང་ཆུབ་དམ་པ་སྒྱིད་ལུག་མེད་པར་བསྒྲུབ། །འཁོར་ཚེ་རང་གི་སྡུག་བསྔལ་སེམས་གཏང་ཞིང༌། །གོ་ཆ་བརྟན་པ་དཔག་
ཡས་དེ་བསྐྱེད་ན། །བརྟུལ་ཞུགས་དཔའ་བོ་སྙིང་རྗེའི་ངང་ཅན་ལ། །ཡང་དག་བླངས་པ་དང་པོ་ཡིན་པར་བརྗོད། །འཇིག་རྟེན་མེས་བཀང་རྐང་གིས་འབོག་བྱ་ཞིང༌། །ས་ཆེན་མཚོན་གྱིས་དཀྲིགས་པས་གཟིགས་བྱས་ཏེ། །བདེ་གཤེགས་ལྟ་བར་མོས་དང་གང་ལྡན་ཞིང༌། །ཆོས་ཀྱི་བདུད་རྩི་ཞི་བ་མཆོག་བསྲུང་དང༌། །འཁོར་བའི་འདམ་ནས་སྐྱེ་བོ་འདི་དག་ཀུན། །བདག་གིས་བཏོན་ཏེ་བྱང་ཆུབ་བདེ་དགོད་ཅེས། །གོམས་པ་བཏེག་ཅིང་བོར་བའི་དུས་དག་ཏུ། །གང་ཞིག་དེ་འདྲར་མཉམ་འཇོག་སེམས་འཆང་དང༌། །འཇིག་རྟེན་ཕན་ཕྱིར་བརྩོན་འགྲུས་ཆེ་བསྐྱེད་ཅིང༌། །གཞན་ལ་ཕན་པའི་བསོད་ནམས་མང་བསྒྲུབས་པ། །དེ་ནི་མི་ཟད་པ་ཡི་བརྩོན་འགྲུས་ཏེ། །དཔལ་ལྡན་ཡང་དག་བླངས་པ་གཉིས་ཞེས་བྱ། །བསོད་ནམས་རྣམ་པ་ཅི་སྒྲུབ་དུས་ན་ཡང༌། །རྫོགས་པའི་སངས་རྒྱས་ཉིད་དུ་སྔོ་བྱེད་ན། །དེ་ནི་མི་ཟད་ཡང་དག་བསྒྲུབ་པའི་ཕྱིར། །ཡང་དག་ལེན་པའི་མཆོག་ཅེས་ཐུབ་པས་གསུངས། །རྒྱ་མཚོ་ཆེན་པོར་ཆུ་ཐིགས་གཅིག་བོར་བ། །རྒྱ་མཚོ་མ་ཟད་དུས་སུ་ཟད་མི་འགྱུར། །དེ་བཞིན་བྱང་ཆུབ་མཆོག་ཏུ་བསྔོས་པ་ཡི། །བསོད་ནམས་རྣམ་པ་ཟད་པར་འགྱུར་བ་མེད། །དེ་ཡང་སྙིང་རྗེ་རྣམ་དག་སེམས་ལྡན་ཞིང༌། །འགྲོ་བ་རྒྱུ་དང་མི་རྒྱུ་མ་ལུས་ཀུན། །རྣམ་པ་ཐམས་ཅད་མཁྱེན་པར་བསྒྲུབ་བྱ་ཞེས། །སེམས་ཅན་དམ་པ་བསོད་ནམས་དེ་དག་རྩོམ། །སྟོང་གསུམ་ཆེན་པོའི་འགྲོ་བ་ཇི་སྙེད་པ། །ཉི་མ་གཅིག་གིས་ལ་ལ་སྒྲོལ་བྱེད་ལ། །བསྐལ་པ་དུ་མར་དེ་བཞིན་བསྒྲལ་བྱས་ཀྱང༌། །སེམས་ཅན་ཁམས་ལས་མང་པོ་མ་བསྒྲལ་ཞེས། །སེམས་ཅན་མི་ཟད་དེ་འདྲ་ཐོས་གྱུར་ཀྱང༌། །མ་ལུས་སེམས་ཅན་བསྒྲལ་བར་རབ་མོས་ཤིང༌། །སྒྱིད་ལུག་སྐྱོན་གྱིས་མ་བཟུང་བརྩོན་ལྡན་ན། །དོན་གྱི་སྙིང་པོ་དེ་ལ་རིང་བ་མིན། །འགྲོ་བ་ཀུན་གྱི་བསོད་ནམས་གཅིག་བསྒྲུབ་པ། །དེ་སྙེད་བཅུ་འགྱུར་བསྒྱུར་བས་བདེ་གཤེགས་ཀྱི། །བ་སྤུའི་ཁུང་གཅིག་མངོན་པར་འགྲུབ་འགྱུར་ལ། །སྤུ་རྣམས་གཅིག་ནས་རེ་རེར་མངོན་འགྲུབ་ཅིང༌། །བ་སྤུ་མངོན་སྒྲུབ་བསོད་ནམས་དེ་དག་ཚོགས། །བརྒྱ་འགྱུར་དག་ཏུ་བསྒྱུར་བའི་བསོད་ནམས་ཀྱིས། །དཔེ་བྱད་བཟར་གཅིག་
འགྲུབ་ཅིང་དེ་བཞིན་དུ། །དཔེ་བྱད་བཟང་པོའི་ལྷག་མ་ཀུན་འགྲུབ་ཅིང༌། །དཔེ་བྱད་བཟང་པོས་བསྡུས་པའི་བསོད་ནམས་ཚོགས། །དེ་སྙེད་སྟོང་དུ་བསྒྱུར་བའི་བསོད་ནམས་ཀྱིས། །རྫོགས་པའི་སངས་རྒྱས་མངོན་པར་སངས་རྒྱས་ཚེ། །མཚན་ནི་སྣ་ཚོགས་རེ་རེ་འགྲུབ་འགྱུར་ལ། །མཚན་རབ་བསྐྱེད་པའི་བསོད་ནམས་རྒྱུར་གྱུར་ཏེ། །སྟོང་དུ་བསྒྱུར་བའི་བསོད་ནམས་ཕུང་པོ་ལས། །ཟླ་བ་ཉ་ལྟར་མཛེས་ཤིང་གསལ་བ་ཡི། །མཛོད་སྤུ་མདོག་བཟང་ཡིད་འོང་འགྲུབ་འགྱུར་བ། །མཛོད་སྤུ་མངོན་སྒྲུབ་བསོད་ནམས་དེ་སྙེད་ཚོགས། །བརྒྱར་འགྱུར་སྟོང་དུ་བསྒྱུར་བའི་བསོད་ནམས་ཀྱིས། །སྤྱི་གཙུག་བལྟར་མི་མཐོང་བའི་མཚན་ལྡན་པའི། །གཙུག་ཏོར་རྒྱན་མཛེས་སངས་རྒྱས་དབུ་འགྲུབ་སྟེ། །དེ་འདྲའི་བསོད་ནམས་སྒྲུབ་ཚུལ་དེ་དག་ཀྱང༌། །བདག་གིས་བསྒྲུབ་ཅེས་བྱང་ཆུབ་སེམས་མཐོང་ན། །བརྩོན་འགྲུས་འདོར་བ་དེ་ལ་གང་གི་སྒོར། །སྒྱིད་ལུག་ལེ་ལོའི་ཆ་ཤས་སྐབས་སུ་འགྱུར། །འཇིག་རྟེན་ཁམས་ཀུན་སེམས་ཅན་མ་ལུས་པར། །རང་རྒྱལ་རྣམས་དང་ཐམས་ཅད་འདྲར་གྱུར་ཀྱང༌། །བཟོད་ལ་གནས་པའི་བྱང་ཆུབ་སེམས་དཔའ་གཅིག །ཡེ་ཤེས་དམ་པས་དེ་དག་ཀུན་པས་འཕགས། །དེ་སྙེད་བཟོད་པའི་སྟོབས་ལ་གནས་པ་བས། །མི་ལྡོག་བྱང་ཆུབ་སེམས་དཔའ་གཅིག་འཕགས་ཏེ། །འཇིག་རྟེན་པ་དང་འཇིག་རྟེན་འདས་པ་ཡི། །དགེ་ལ་བསྒྲུབ་པ་དེ་ནི་ངལ་མི་ཤེས། །མི་ལྡོག་བྱང་ཆུབ་སེམས་དཔའ་དེ་སྙེད་པས། །སྐྱེ་བ་གཅིག་ཐོགས་རྒྱལ་སྲས་དེ་འཕགས་ཏེ། །བརྩོན་འགྲུས་བརྟན་དང་ལྡན་པའི་ནང་ན་ཡང༌། །བྱང་ཆུབ་ཤིང་དྲུང་ཕྱིན་པ་ཅི་ཞིག་སྨོས། །རྣམ་པ་དེ་འདྲའི་ཡེ་ཤེས་རྣམ་དག་དང༌། །འཇིག་རྟེན་མ་ལུས་སེམས་ཅན་ཀུན་ལྡན་ཡང༌། །བྱང་ཆུབ་སྙིང་པོའི་ཤིང་དྲུང་ཕྱིན་གྱུར་ལ། །བདུད་འདུལ་སྐྱེ་བ་ཐ་མའི་ཆར་མི་འགྲོ། །དེ་འདྲའི་ཡེ་ཤེས་རྣམ་པ་དག་ལྡན་པས། །འཇིག་རྟེན་མ་ལུས་ཁམས་ཀུན་གང་གྱུར་ཀྱང༌། །ཡོན་ཏན་རྣམ་མང་དེ་དག་གཅིག་སོགས་པས། །བདེ་གཤེགས་སྟོབས་ཀྱི་ཆ་ལའང་མཉམ་མི་འགྲོ། །དེ་འདྲའི་ཡེ་ཤེས་རྒྱ་མཚོ་རྨད་བྱུང་བ། །གཞན་སེམས་ཤེས་པའི་མཐུ་ལ་ཐོགས་མེད་ཅིང༌། །
ཡེ་ཤེས་སྣང་བ་མཁའ་ལྟར་ཡངས་པ་ལ། །སྙིང་རྗེ་ལྡན་པ་གཅིག་པུ་ཕ་རོལ་རྒལ། །སེམས་ཅན་མ་ལུས་ཀུན་ལ་ཁྱབ་པ་ཡི། །སྙིང་རྗེ་ཆེན་པོ་འཇིག་རྟེན་ཀུན་དུ་འབྱུང༌། །རྫོགས་པའི་སངས་རྒྱས་ཆོས་ཀྱི་རྣམ་པ་དག །རྨད་བྱུང་མ་ལུས་དེ་ཕྱིར་ཡང་དག་གྲུབ། །དེ་འདྲའི་སེམས་ཅན་དམའ་བས་མཉན་དགའ་བའི། །ཡང་དག་བླང་བའི་ཡོན་ཏན་ཀུན་ལྡན་ན། །ཡང་དག་ཉིད་ལམ་ཡན་ལག་བརྒྱད་ལྡན་ཞིང༌། །བརྩོན་འགྲུས་ཕུལ་བྱུང་ཤིན་ཏུ་རྣམ་པར་མཛེས། །བརྩོན་འགྲུས་རྣམ་གསུམ་དགེ་བ་སྦྱོར་བ་སྟེ། །ལུས་དང་ངག་ཡིད་བརྩོན་འགྲུས་རྣམ་པ་ལས། །འཇུག་དང་གནས་དང་མཉམ་པར་བཞག་པ་ཡི། །བརྩོན་འགྲུས་ཕུལ་བྱུང་ཡིད་ལས་བྱུང་བ་ཡིན། །བྱང་ཆུབ་སེམས་ལ་མོས་ཤིང་ཞི་བ་དང༌། །སྙིང་རྗེ་ཆེ་དང་བདག་མེད་བཟོད་པ་དང༌། །འགྲོ་བ་སྡུག་བསྔལ་བསྡུ་བ་རྣམ་བཞི་དང༌། །ཆོས་རྣམས་ཀུན་ལ་ཡོངས་སུ་འཛིན་མེད་དང༌། །འཁོར་བའི་འདམ་ན་ཡོངས་སུ་སྐྱོ་མེད་དང༌། །ཁམས་གསུམ་ཐམས་ཅད་ཉེ་བར་མི་དམིགས་ཤིང༌། །བདོག་པ་ཀུན་གཏོང་ང་རྒྱལ་འགྱུར་མེད་དང༌། །བསླབ་པ་ཀུན་ལ་ཡང་དག་སློབ་པ་དང༌། །གཞན་གྱི་གནོད་པས་མི་འགྱུར་བརྟན་ལྡན་ཞིང༌། །སེམས་ལ་རྣམ་འཁྲུག་ནམ་ཡང་མི་འབྱུང་དང༌། །དགེ་བའི་ལས་ལ་བརྩོན་པ་བརྟན་པ་དང༌། །དཔེན་ལ་དགའ་བའི་རོ་གཅིག་སེམས་ལྡན་དང༌། །བསམ་གཏན་བཞི་པོར་མཉམ་པར་གཞོག་པ་དང༌། །བདག་མེད་ངེས་པར་རྟོགས་པའི་སེམས་ལྡན་དང༌། །ཐོས་པ་མང་པོས་ངོམ་པར་མི་འགྱུར་ཞིང༌། །རིགས་པར་འཇུག་ཅིང་དེ་ལ་རྟོག་པ་དང༌། །ཇི་ལྟར་ཐོབ་པ་ཡང་དག་སྟོན་བྱེད་ཅིང༌། །བརྗོད་མེད་ཆོས་ཉིད་ཡང་དག་ཤེས་པ་དང༌། །མངོན་ཤེས་ལྔ་ལ་མཐུ་ཆེན་ལྡན་པ་དང༌། །མངོན་ཤེས་དྲུག་ལ་སྒོམ་ཙམ་བྱེད་པ་དང༌། །རྫུ་འཕྲུལ་རྐང་པ་མངོན་པར་སྒྲུབ་པ་དང། །སྤྱོད་པ་ཚེགས་མེད་ཤིན་ཏུ་གསལ་བ་དང༌། །ཡང་དག་སྤོང་ལ་སྦྱོར་བ་བྱེད་པ་དང༌། །དགེ་དང་མི་དགེའི་ཕྱོགས་ལས་རྣམ་གྲོལ་ཞིང༌། །དབང་པོ་ངེས་པར་བྱ་ལ་མཁས་པ་དང༌། །ཆོས་རྣམས་དབང་པོ་མེད་པར་ཤེས་གྱུར་ཅིང༌། །ལས་ཀྱི་ཚོགས་རྣམས་ཡོངས་སུ་
ཚོལ་བྱེད་ཀྱང༌། །གར་ཡང་འགྲོ་མེད་རྨད་བྱུང་ཟབ་པ་དང༌། །དེ་ལ་སོགས་པ་སེམས་སྤངས་བརྩོན་པའི་ལུས། །གཟུད་ཅིང་དགོད་པའི་ཁྱད་པར་འཕགས་པ་ཅན། །དེ་ཉིད་མི་ཟད་ཡོངས་སུ་རྫོགས་བྱའི་ཕྱིར། །དགོན་པའི་བརྩོན་འགྲུས་ཁྱད་པར་རྒྱུ་ཡང་ཡིན། །ཡེ་ཤེས་མཆོག་གི་ལས་ལ་གནས་འཆའ་ཡང༌། །མཚན་མའི་ལས་ལ་དེ་ནི་འཇུག་པ་མེད། །སྙིང་རྗེ་ཆེན་པོས་འདུས་བྱས་མི་གཏོང་ཞིང༌། །བརྩོན་འགྲུས་ཆེ་ཡང་འདུས་བྱས་མེད་མི་ལྟུང༌། །སྔོན་ཆད་མ་ཐོས་ཆོས་ཐོས་གནོད་པ་མེད། །ཅིས་ཀྱང་མི་ཚུགས་ཐོས་པའི་ཆོས་ཀྱང་འཛིན། མི་མིན་ཀུན་ཀྱང་དེ་ལ་ཕན་པར་དགའ། །ཏིང་འཛིན་རྣམ་པ་ཀུན་ཀྱང་ཐོབ་པར་འགྱུར། །ཉིན་མཚན་དུས་རྣམས་འབྲས་བུ་ཡོད་པར་ཟླ། །ཡོན་ཏན་ཚོགས་ཀྱིས་དམའ་བར་འགྱུར་བ་མེད། །མི་ཡི་ཆོས་ལས་འཕགས་པའི་དོན་རྣམས་ཀྱིས། །མེ་ཏོག་ཨུཏྤལ་བཞིན་རྣམ་པར་འཕེལ། །གྲགས་པ་ཡང་དང་བདེ་བ་ཐོབ་པར་འགྱུར། །སེར་སྣ་དོགས་སྤངས་ཡིད་ཚུལ་མཆོག་ཀྱང་འཐོབ། །ཚེ་འདིའི་ཡོན་ཏན་ཇི་སྙེད་སྣང་བ་ཀུན། །བརྩོན་པའི་ཚུལ་འབྱུང་ཡོན་ཏན་ཆེ་བ་མེད། །ཡོན་ཏན་ཆེ་མངའ་རྫོགས་པའི་སངས་རྒྱས་ཏེ། །ཁམས་གསུམ་མཆོད་འོས་ཉིད་ཀྱང་དེ་ལས་གྲུབ། །བརྩོན་འགྲུས་ཆེན་པོའི་ཡོན་ཏན་དེ་འདྲ་ན། །བརྩོན་འགྲུས་ཆེ་ལ་གང་ཞིང་བརྩོན་མི་བྱེད། །བརྩོན་འགྲུས་ཀྱི་ཕ་རོལ་ཏུ་ཕྱིན་པའི་ལེའུའོ།། །།དེ་ནས་ཡེ་ཤེས་བསྐྱེད་པའི་ཕྱིར། །བསམ་གཏན་ཚུལ་ལ་བརྩོན་པར་བྱ། །འཇིག་རྟེན་ཕན་པའི་རྣམ་པ་དག །ཡེ་ཤེས་སྣང་བས་བདེ་བར་འགྲུབ། །བསམ་གཏན་ཚུལ་གྱིས་སེམས་དག་ན། །སྟོན་གྱི་དུས་ཀྱི་སྤྲིན་བསལ་བའི། །མཁའ་ལ་ཟླ་བ་གསལ་བ་ལྟར། །ཡེ་ཤེས་ཁྱད་དུ་དང་བར་འགྱུར། །རྣམ་དག་ཚུལ་ཁྲིམས་ལྡན་བྱས་ཤིང༌། །དགེ་ཕན་གྲོགས་དང་བརྟེན་བྱས་ཏེ། །བྱ་བ་ཉུང་ཞིང་ཞི་བའི་དང༌། །དྲན་པས་བྱིན་རླབས་ཚུལ་བཅང་སྟེ། །ཤིང་དྲུང་བརྟུལ་ཞུགས་གནས་དག་གམ། །ནེའུ་གསིང་སྡུག་གུའི་ས་གཞིའམ། །ཆེད་དུ་མ་བྱས་མདངས་དགའ་བའི། །ནགས་ཀྱི་མེ་ཏོག་དྲི་ཞིམ་པའམ། །བསམ་གཏན་རྐྱེན་དུ་འོས་པ་ཡི། །ཆོག་ཤེས་འགྲོ་བའི་གནས་དག་
གམ། །འགྲོ་བའི་སྒྲ་སྐད་མི་འབྱུང་བར། །ཟབ་མོར་གནས་པའི་གནས་དག་གམ། །དགོན་པའི་ས་གཞི་བཟང་པོའམ། །སྟོང་པའི་གནས་དང་ཁྱིམ་དག་གམ། །སྨན་ལྗོངས་རི་ཁྲོད་དབེན་པ་དག །སེང་གེའི་ང་རོ་གྲགས་གནས་སམ། །འདུ་འཛི་ཉོན་མོངས་དབེན་གྱུར་པའི། །གང་ཡང་རུང་བའི་གནས་དག་ཏུ། །སྐྱིལ་མོ་ཀྲུང་དུ་བདེར་འདུག་སྟེ། །དྲང་པོའི་ལུས་ནི་བསྲང་བྱས་ཤིང༌། །དྲང་བའི་བསྲུང་བ་སེམས་གཞི་ལ། །ཉེ་བར་ཡང་དག་གཞག་བྱ་སྟེ། །སྙིང་རྗེས་ལོག་པར་རྟོགས་པ་རྣམས། །སྐབས་མེད་ཚུལ་དུ་དམ་བཅས་ཤིང༌། །ཤེས་ཕར་རབ་ཤེས་བྱ་བའི་དུས། །འདི་ཡིན་མྱ་ངན་འདས་དུས་མིན། །སེམས་ཅན་མྱ་ངན་མ་འདས་སུ། །མྱ་ངན་འདའ་བར་མོས་མེད་ཅེས། །དེ་ལྟར་འཇིག་རྟེན་ཕན་བསམས་ཏེ། །སངས་རྒྱས་ཉིད་དུ་མོས་བསྐྱེད་ཅིང༌། །རྒྱུན་མི་འཆད་པའི་རྣལ་འབྱོར་གྱིས། །བསམ་གཏན་བསྒྲུབ་ལ་བརྩོན་པར་བྱ། །ཡང་དང་ཡང་ཞིང་ངལ་བསོ་ན། །གཙུབས་པས་མེ་ཕྱིན་མེ་འགྱུར་ཏེ། །རྣལ་འབྱོར་ཚུལ་ལའང་དེ་བཞིན་དུ། །ཁྱད་པར་མ་ཐོབ་གཏོང་མི་བྱ། །དམིགས་པ་གཅིག་ལ་བརྟན་ཚུལ་དུ། །ཡིད་ཀྱི་བསམ་པ་བརྟན་པར་བྱ། །དམིགས་པ་མང་པོ་བརྒྱུད་པ་ལས། །འདི་ནི་ཉོན་མོངས་འཁྲུག་པར་འགྱུར། །ལྷག་མཐོང་བརྩོན་པའི་སྟོབས་ཀྱི་མཐུས། །ཞུམ་པར་གྱུར་ན་གཟེངས་ཡང་བསྟོད། །རྒོད་པར་གང་ཚེ་གྱུར་པའི་ཡིད། །ཞི་གནས་ཚུལ་གྱིས་བཟློག་པར་བྱ། །ཏིང་འཛིན་མཐུ་ནི་མི་གཡོ་ཞིང༌། །ཡང་དག་གྱུར་ན་བཏང་སྙོམས་གཞག །བདེ་གཤེགས་ཏིང་འཛིན་ཐོབ་བྱའི་ཕྱིར། །དེ་ལ་ཆགས་པར་ཡོང་མི་བྱ། །བསམ་གཏན་དགའ་བའི་རོ་མྱང་བས། །རང་དབང་མེད་པའི་ཉམ་མི་བླང༌། །བདག་གི་བདེ་ཙམ་ཐོབ་དོན་དུ། །བརྩམ་པ་རྒྱ་ཆེན་འདི་སྒྲུབ་མིན། །ལུས་དང་སྲོག་ལ་ལྟ་བ་ཡི། །ཞུམ་པས་ནོན་གྱུར་སེམས་གྱུར་ཅིང། །རང་གི་མགོ་བོ་ཚིག་གྱུར་ཀྱང༌། །བརྩོན་འགྲུས་ལྷོད་པར་དེས་མི་བྱ། །མཚན་མའི་རྣམ་པ་ཤེས་བྱས་ཤིང༌། །ཡིད་ནི་མཉམ་པར་གཞག་པའི་ཕྱིར། །དམིགས་ལས་བསམ་པ་ཉམས་གྱུར་ན། །དྲན་པས་ཕྱིར་ཡང་བསྡུ་བར་བྱ། །སྒྲིབ་པ་རྣམས་ལས་རང་གི་ཡིད། །གླང་
པོ་རང་དབང་ཐོབ་འགྱུར་ན། །ལྕགས་ཀྱུས་བཟློག་པར་བྱ་བ་བཞིན། །ལོག་པའི་ཕྱོགས་ལས་བཟློག་པར་བྱ། །དེ་ནས་སྒྲིབ་པའི་ནད་ཀྱི་རྣམས། །བསལ་བས་སོས་པའི་ཡིད་གྱུར་ཅིང༌། །དབུལ་པོ་ཉམ་ཐག་ཕོངས་པ་ལས། །ལོངས་སྤྱོད་སྐྱིད་ཐོབ་ཐར་པ་བཞིན། །བདེ་དང་ལྡན་པའི་ཡིད་ཀྱིས་ནི། །འདོད་པའི་སྐྱོན་རྣམས་བསལ་བར་བྱ། །དེ་དང་བྲལ་བས་དམིགས་པ་ཡི། །བདེ་བ་གཅིག་ནས་གཅིག་བརྒྱུད་ཀྱང༌། །གློག་ལྟར་མི་རྟག་འགྱུར་བ་དང༌། །དབུ་བ་གསོག་ལྟར་བདག་མེད་པའི། །རྨི་ལམ་བཞིན་དུ་དོན་མེད་པར། །བསླུ་བའི་དོན་དུ་འོངས་འདྲ་དོར། །ཕ་རྣམས་བུ་ལ་བྱམས་པ་དང༌། །བུ་རྣམས་ཕ་ལ་དེ་བཞིན་ཏེ། །མཛའ་ལ་མཛའ་བོ་བྱམས་པ་དང༌། །འགྲོ་རྣམས་ཕན་ཚུན་བྱམས་པ་དག །ཡོན་ཏན་ཚོགས་ཀྱིས་བསྒྲུབ་བྱས་ཤིང༌། །བརྟན་པའི་སྙིང་པོས་བརྟན་བྱས་ཏེ། །གཡུལ་དུ་གྲུ་གདོང་འདྲེན་བཞིན་གྱི། །མཛའ་བྱམས་ས་མཚམས་འཇིགས་བྱེད་ཀྱང༌། །འདི་ཚེ་བརྩལ་བའི་སྡུག་བསྔལ་དང༌། །གཞན་དུ་ངན་འགྲོ་སྐྱེད་བྱེད་པའི། །རྒྱུར་གྱུར་འདོད་པའི་རྣམ་པ་ཡིན། །དེ་བས་འདོད་པ་བསྟེན་མི་བྱ། །རྣམ་རྟོག་རྣམས་ཀྱི་གཞིར་གྱུར་ཅིང༌། །བདག་དང་གཞན་རྣམས་ཀུན་གྱི་ཡང༌། །ཤེས་རབ་མིག་ལྡོངས་བྱེད་པའི་རྒྱུ། །མི་བདེ་སྣ་ཚོགས་སྐྱེད་པ་ཡང༌། །བདག་འདོད་དོན་ལ་བརྩོན་པར་བྱ། །རྣམ་པ་ཀུན་དུ་ཡོངས་སྤངས་པའི། །འདོད་པ་དེ་དག་གཞན་དོན་ལ། །བརྩོན་པས་དྲན་བྱར་འོས་པ་མིན། །འདོད་པ་དེ་དག་ཐོབ་པ་དང༌། །ཉིན་གཅིག་བཞིན་དུ་བསྟེན་པ་དང༌།། མང་དུ་བསགས་པས་མི་ངོམས་ན། །དེ་ལས་ནད་ཆེན་གང་ཞིག་ཡོད། །བཙལ་ཚེ་རོ་མེད་ཉོན་མོངས་ལ། །བསྲུང་ཚེ་འཇིགས་པ་སྐྱེད་བྱེད་ཅིང༌། །མེད་འགྱུར་མྱ་ངན་ཆེ་བསྐྱེད་ན། །དེ་ལ་འདོད་བྱེད་སུ་ཞིག་ཡོད། །གང་གི་རོ་ལ་མྱོས་གྱུར་ན། །རང་དོན་ཉིད་ཀྱང་མི་རིགས་ཏེ། །མྱོས་འགྱུར་སྨྱོན་ཆུ་ཇི་བཞིན་པའི། །འདོད་པ་སེམས་ལྡན་སུ་ཞིག་བསྐྱེད། །དེ་ལྟར་རྣམ་པ་ཐམས་ཅད་དུ། །འདོད་པ་སྐྱོན་ལྡན་ཤེས་གྱུར་ན། །དེ་ལས་སེམས་ནི་ལྡོག་འགྱུར་ཏེ། །འབྱུང་ལམ་ཆོས་ལ་མོས་པར་འགྱུར། །དབེན་ལས་སྐྱེས་པའི་དགའ་དང་བདེ། །བག་ཡངས་ཐོབ་ལས་སྐྱེས་པ་འབྱུང༌།།
ཡན་ལག་དེ་དང་ལྡན་པས་ན། །བསམ་གཏན་དང་པོ་ཐོབ་པ་ཡིན། །དེར་ནི་རྣམ་རྟོག་རྣམ་དཔྱོད་དག །འདོད་ལྡན་སྐྱོན་ལྡན་མཐོང་འགྱུར་ཞིང༌། །དེ་དག་ཞི་བ་ཚོལ་བྱེད་པས། །ཏིང་འཛིན་དགའ་སྐྱེས་བདེ་བ་ཐོབ། །ནང་ནི་ཡོངས་སུ་དང་གྱུར་ཞིང༌། །དེ་སེམས་རྩེ་གཅིག་གྱུར་པ་ནི། །བསམ་གཏན་གཉིས་པའི་བསམ་གཏན་ཞེས། །གཉིས་མེད་དྲང་སྲོང་མཆོག་གིས་གསུངས། །ཡིད་ཀྱི་འཁྲུག་ལོང་ཡིན་ཤེས་ནས། །དགའ་ལས་འདོད་ཆགས་བྲལ་གྱུར་པ། །དྲན་པ་བཏང་སྙོམས་ལྡན་པ་ཡི། །བསམ་གཏན་གསུམ་པ་ཐོབ་པར་འགྱུར། །བདེ་བའི་བསམ་པ་ཡོངས་བཏང་བས། །བདེ་དང་སྡུག་བསྔལ་མེད་གྱུར་ཅིང༌། །བཏང་སྙོམས་དྲན་པས་རྣམ་དག་པའི། །བསམ་གཏན་བཞི་པ་འཐོབ་པར་འགྱུར། །དེ་ནས་མངོན་ཤེས་ལྔ་ཐོབ་སྟེ། །ཆོས་རྒྱལ་རྒྱལ་སྲིད་གནས་པ་ན། །དཔལ་ལྡན་གྲགས་པ་ཁྲེལ་དང་གཟུངས། །དེ་ཡི་རྗེས་སུ་འབྲང་བར་འགྱུར། །གཞན་གྱི་དོན་དུ་མངོན་བསྒྲུབས་པས། །རང་རྒྱལ་ཉན་ཐོས་ཡོན་ཏན་ལ། །དེ་དག་ཤིན་ཏུ་འདས་གྱུར་ཅིང༌། །ཤིན་ཏུ་ཁྱད་འཕགས་མཐུ་དང་ལྡན། །གཏོང་བ་འཇུངས་པ་འགོད་བྱེད་ཅིང༌། །ཚུལ་ཁྲིམས་མེད་པ་ཚུལ་ལ་འགོད། །ཁྲོ་བ་བཟོད་ཅིང་ངེས་པ་དང༌། །སྒྱིད་ལུག་བརྩོན་འགྲུས་ཆེན་པོ་དང༌། །འཁྲུག་པའི་སེམས་ལྡན་བསམ་གཏན་དང༌། །ཤེས་རབ་འཆལ་པ་ཤེས་རབ་ལ། །སྙིང་རྗེ་ཆེན་པོ་སྐྱོ་མེད་པར། །བརྩོན་འགྲུས་སྤྱོད་པས་སྦྱོར་བ་བྱེད། །དེ་ནས་མཐའ་ཡས་སྤྱོད་ཡུལ་ཅན། །ཉི་མ་འོད་ཆེན་ཇི་བཞིན་དུ། །མི་ཉམས་གསལ་བའི་འོད་ཆེན་གྱིས། །འཇིག་རྟེན་ཐམས་ཅད་སྣང་བར་བྱེད། །དེ་ནས་སེམས་ཅན་སྡིག་ཅན་དག །ངན་འགྲོར་ལྟུང་བར་གྱུར་པ་དང༌། །བསོད་ནམས་ཚེ་དག་ཟད་གྱུར་ཅིང༌། །ལྷ་ལས་ལྟུང་བར་གྱུར་པ་དང༌། །འཇིག་རྟེན་སྡུག་བསྔལ་དེ་དང་དེས། །ཡོངས་སུ་གདུང་བར་གྱུར་པ་དག །འཇིག་རྟེན་ཁམས་ན་གང་ཡོད་པ། །ལྷ་མིག་གསལ་བས་མཐོང་གྱུར་ཅིང༌། །སྙིང་རྗེ་ཆེན་པོ་སྐྱེ་འགྱུར་ཏེ། །སྙིང་རྗེ་ལྡན་པས་བག་མེད་སྤོང༌། །གཞན་དོན་སྒྲུབ་ལ་བག་ཡོད་པས། །བསམ་གྱིས་མི་ཁྱབ་མཐུ་དང་ལྡན། །དེ་ནས་འཇིག་རྟེན་ཁམས་མང་ན། །
དེ་བཞིན་གཤེགས་པ་མང་བཞུགས་དང༌། །སངས་རྒྱས་ཞིང་གི་རྒྱན་དག་དང༌། །དགེ་འདུན་ཕུན་སུམ་ཚོགས་མཐོང་ཞེས། །བྱང་ཆུབ་སེམས་དཔའ་ཁྱུ་མཆོག་གི །རྣམ་དག་སྤྱོད་ཡུལ་སྤྱོད་མཐོང་སྟེ། །སེམས་ཅན་གཞན་ལ་ཕན་དོན་དུ། །དཔལ་ལྡན་སྤྱོད་པ་མཐོང་གྱུར་པས། །དེ་ལ་སྨོན་ལམ་ཆེ་སྐྱེད་ཅིང༌། །སྨོན་ལམ་དཀྱིལ་འཁོར་འགྲུབ་འགྱུར་ཏེ། །གཞན་དོན་རྒྱ་ཆེན་སྔོ་བྱེད་པས། །རྒྱལ་སྲས་ཚུལ་མཆོག་ཡོངས་སུ་འགྲུབ། །མི་ལས་འདས་པའི་རྣ་བ་སྟ། །ལྷ་ཡི་རྣ་བ་རྣམ་དག་པས། །རྒྱང་རིང་སྒྲ་རྣམས་ཉེ་བ་བཞིན། །ཆེ་ཆུང་རྣམ་པ་ཀུན་ཐོས་ཤིང༌། །སྙིང་བརྩེ་མེད་པས་གང་སྨྲས་པའི། །ཞེ་གཅོད་རོ་མེད་ཚིག་གི་རྣམས། །ཁྲོ་བའི་མེ་ལས་བྱུང་བ་ཡི། །མེ་སྟག་རྒལ་འདྲ་ཐོས་འགྱུར་ཞིང༌། །ལྷ་མོའི་གླུ་རུ་སྙན་པ་དང༌། །རྒྱན་གྱི་ཕར་ཕུར་སིལ་ཁྲོལ་དང༌། །ལྷ་རྫས་རོལ་མོའི་སྒྲ་སྙན་པས། །མི་རྟག་ཚུལ་ཐོས་སྒྲ་ཐོས་ཤིང༌། །འཇིགས་དང་སྡུག་བསྔལ་རྣམ་པ་ལས། །མི་བཟད་མྱ་ངན་དྲག་པོའི་སྒྲ། །ཉོན་མོངས་ཉམས་བབ་ཐོས་པ་དག །མི་དགའི་རྣམ་པ་ཐོས་གྱུར་ན། །སྐུལ་མ་དྲག་པོས་བསྐུལ་བ་བཞིན། །བྱང་ཆུབ་སེམས་དཔའ་མཐུ་ལྡན་ཞིང༌། །ཁོང་ནས་སྙིང་རྗེ་ཆེ་ལྡན་ཏེ། །བརྩོན་འགྲུས་མཆོག་ནི་རྩོམ་པར་བྱེད། །འཇིག་རྟེན་སྣ་ཚོགས་འཇིག་པ་ཡི། །བདེ་གཤེགས་རྣམས་ལས་ཆོས་ཐོས་ཏེ། །མྱ་ངན་འདས་ལ་མོས་པའི་བློས། །སེམས་ཅན་དོན་མང་སྒྲུབ་པར་བྱེད། །གཞན་སེམས་ཚུལ་ལ་དེ་མཁས་ཤིང༌། །བག་ལ་ཉལ་དང་བསམ་ཤེས་པས། །ཡེ་ཤེས་ཡོ་བྱད་ལྡན་པ་དེ། །བསོད་ནམས་མྱུ་གུ་གསར་ཡང་བསྐྱེད། །བསྐལ་པ་བྱེ་བ་མང་པོ་ཡི། །སྔོན་གྱི་གནས་རྣམས་རྗེས་དྲན་ཞིང༌། །འཇིག་རྟེན་བསོད་ནམས་རྣམ་པ་དང༌། །སྟོབས་དང་སྟོབས་མེད་མཐོང་གྱུར་ནས། །དེ་དག་བསམ་པའི་ཚུལ་བཞིན་དུ། །རྫུ་འཕྲུལ་རྣམ་པས་ལུས་བསྒྱུར་ཅིང༌། །སྣོད་བཞིན་སྟོན་པར་བྱེད་པས་ན། །དོན་ཡོད་རྗོད་བྱེད་མཆོག་ཏུ་འགྱུར། །ལ་ལར་གཟུགས་མཛེས་ཡུན་ལྡན་ཞིང༌། །ཉི་མ་བརྒྱ་ལྟའི་འོད་ལྡན་ཏེ། །རི་མོ་གསལ་བའི་མཚན་རྒྱས་པ། །ཐུབ་རྒྱལ་མཚན་ལྡན་སྐུ་མཆོག་གིས། །འགྲོ་བའི་མིག་ལ་བདེ་སྐྱིད་ཅིང༌། །ཡིད་ལ་ཁྱབ་པར་སིམ་བྱེད་པས།།
རྒྱལ་དབང་མོས་པ་བྱང་ཆུབ་ཏུ། །བསྒྲུབ་ཕྱིར་འཆི་མེད་སྟོན་པར་བྱེད། །ཐུབ་དབང་ཞི་ཚུལ་དཔལ་ལྡན་པའི། །སྤྱོད་པ་རྣམ་པར་སྤྱོད་བྱེད་ཅིང༌། །ལ་ལར་འདུལ་དབང་ཇི་བཞིན་དུ། །སློབ་མའི་ཚུལ་གྱིས་འདུལ་བར་བྱེད། །ལ་ལར་ལྷ་དབང་བརྒྱ་བྱིན་བཞིན། །ལྷ་ཡི་སྤྱི་བོ་ཞབས་ལ་ཐུག །ནོར་སྦྱིན་ཇི་བཞིན་ནོར་མང་གཏོང༌། །ལ་ལར་ཚངས་ལྟར་གཟུགས་མཆོག་འཛིན། །ལ་ལར་སྤྱན་གསུམ་ཕྱེ་བ་སྟེ། །དྲི་མེད་ཟླ་བའི་རྒྱན་ལྡན་སྟོན། །ལ་ལར་ལྷ་མིའི་རྒྱལ་པོ་དང༌། །ཀླུ་ཡི་དཔལ་ཆེན་ཁྱེར་བ་སྟོན། །ལ་ལར་གནོད་སྦྱིན་རྒྱལ་པོ་ལྟར། །རྡོ་རྗེ་འབར་བ་ཐོགས་པ་སྟོན། །ཡོན་ཏན་འོད་ལྡན་ཐུབ་ཟླ་ལྟར། །ལ་ལར་གཡང་གཞི་མཚན་བསྟན་སྟོན། །ལ་ལར་བརྒྱ་བྱིན་ནོར་བུ་ཡིས། །བྲང་ལ་འོད་འབར་མཛེས་པ་སྟོན། །ལ་ལར་ཆུ་ཡི་ལྷ་གཟུགས་དང༌། །ལ་ལར་འདོད་པའི་ལྷ་ལྟར་སྟོན། །ལ་ལར་བུད་མེད་གཟུགས་མཛེས་དང༌། །ལ་ལར་ཕོ་སྨོས་དགའ་བ་སྟོན། །ལ་ལར་བརྟུལ་ཞུགས་ནོར་ལྡན་ཏེ། །འདོད་ལས་འདོད་ཆགས་བྲལ་བ་སྟོན། །ལ་ལར་མི་རྣམས་ཡིད་འཕྲོག་ཅིང༌། །སློབ་དཔོན་སློབ་མ་རྒྱལ་པོ་བྱེད། །ལ་ལར་མཐུ་ཆེན་བྱིན་རླབས་ཀྱིས། །ངན་སོང་སྡུག་བསྔལ་རྣམ་མང་སེལ། །འགྲོ་བའི་དད་པ་ཚུལ་བཞིན་དུ། །སྣ་ཚོགས་སྤྱོད་པ་ལས་བསྟན་ཞིང༌། །སྙིང་རྗེའི་ཡོན་ཏན་རྒྱ་ཆེ་བས། །འཇིག་རྟེན་ཕན་པ་གྲངས་མེད་བྱེད། །བསམ་གཏན་འདི་འདྲའི་གནས་ཐོབ་ཅིང༌། །ཁྱད་པར་ཕུན་སུམ་ཚོགས་ཐོབ་པས། །གཏེར་གྱི་མཚན་མ་སླུ་མེད་བཞིན། །ཁྱད་པར་གོང་ནས་གོང་བརྩོན་བྱ། །དེ་ལ་གནས་འཆའ་ཡན་བོར་ཅིང༌། །བརྟུལ་ཞུགས་ལྷོད་པའི་ཚུལ་བོར་ཏེ། །དགེ་བ་སྤེལ་ཕྱིར་བརྩོན་པར་བྱ། །དེ་ལས་བཟློག་པ་དམན་པར་འགྲོ། །ཏིང་འཛིན་རྩོམ་པ་མེད་པ་སྟེ། །རྗེས་སུ་བསྒྲུབ་པ་དཀོན་པས་ན། །རྣམ་པར་རྒྱལ་བ་འདོད་རྣམས་ཀྱིས། །ཞི་བའི་གཉེན་པོ་ཚུགས་མེད་བསྟེན། །ཡིད་ཚུལ་སྤང་བའི་མཆོག་གྱུར་ཀྱང༌། །ས་ལྟར་མི་གཡོ་བརྟན་པ་ཡི། །ས་མཆོག་མི་གཡོ་མ་ཐོབ་ཏུ། །དེ་ལ་ཡིད་བརྟན་གཡོ་མི་བྱ། །མངོན་པར་འདུས་བྱས་ལམ་བྱས་པ། །ཏིང་འཛིན་བསྒྲུབ་པའང་འཇིག་པར་འགྱུར། །དེ་བས་རྣམ་རྟོག་རྣམ་སྤངས་ཏེ། །
ལམ་གྱི་དམ་པ་བསྒོམ་པར་བྱ། །བདེ་གཙང་རྟག་པའི་རྣམ་རྟོག་དག །འདུས་བྱས་སླུ་བའི་ཆོས་ཅན་དུ། །ཡང་དག་རྟོགས་པར་ཤེས་བྱ་སྟེ། །དངོས་པོའི་རྣམ་རྟོག་ཡོངས་སུ་སྤང༌། །དམིགས་པ་ཆུང་ཡང་བྱུང་གྱུར་ན། །ཉོན་མོངས་མདས་གཙག་གཞིར་ཡང་འགྱུར། །དེ་འདྲའི་གནོད་པ་ཀུན་བཅིལ་ན། །བདུད་ཀྱི་སྤྱོད་ཡུལ་འདས་པར་འགྱུར། །གནས་པའི་སྐྱོན་དང་ལྡན་གྱུར་ན། །བསམ་གཏན་རྣམ་དག་ཚུལ་མི་འགྱུར། །གནས་པའི་རྗེས་འབྲངས་ཉམས་པ་སྟེ། །དོང་སྐམ་བཅས་ཞེས་དེ་ཕྱིར་བརྗོད། །ཐ་སྙད་ཚུལ་དག་འགྲུབ་དོན་དུ། །དེ་ནི་འཇིག་རྟེན་ལམ་ཞེས་བྱ། །ཡོད་དང་མེད་བྱུང་གཏང་མེད་པས། །གང་ནའང་ཅི་ཡང་སྐྱེ་བ་མེད། །ནམ་མཁའི་དབྱིངས་འདྲ་ཡིད་ལྡན་ན། །སྲིད་པ་གསུམ་གྱི་གནས་དང་བྲལ། །ཚུལ་འཆོས་བྲལ་བའི་སྤྱོད་བརྟན་ལ། །ཁ་གསག་མེད་པའི་ཚུལ་ལྡན་ན། །འཇིག་རྟེན་སྤྱོད་པ་དེ་བྱེད་ཀྱང༌། །འགྲོ་བ་གཅིག་ཏུ་ཕན་པ་སྤྱོད། །སེམས་ལ་དབང་གྱུར་ཐོབ་པས་ན། །ཏིང་འཛིན་སྟོབས་ལས་ཉམས་པ་མེད། །དེ་ཐོབ་ཡན་ཆད་རྨད་བྱུང་བའི། །ཏིང་འཛིན་འབྲས་བུ་མང་ལྡན་པས། །དབྱར་དུས་རྒྱ་མཚོ་ཆུ་ཀླུང་དག །ཆུ་གསར་བྱུང་བས་སྐྱེ་ཞིང་འཕེལ། །བསམ་གཏན་གྱི་ཕ་རོལ་ཏུ་ཕྱིན་པའི་ལེའུའོ།། །།སྦྱིན་ལ་སོགས་པའི་བསོད་ནམས་འདི་དག་ནི། །ཤེས་རབ་མགོན་བཅས་ལྷག་པར་མཐུ་ལྡན་འགྱུར། །གསེར་གྱི་རྒྱན་བཟངས་རྣམ་པ་སྣ་ཚོགས་ལ། །རིན་ཆེན་ཕྲ་བཀོད་འོད་ཀྱིས་གསལ་བ་བཞིན། །སོ་སོའི་དོན་ལ་དེ་དག་ཡོན་ཏན་མཐུ། །ཤེས་རབ་འདི་ཉིད་རྒྱ་ཆེན་སྒྲུབ་པར་བྱེད། །དབང་པོ་རང་རང་ཡུལ་གྱི་བྱེ་བྲག་ལ། །མཐུ་ཞེན་ཡིད་ཀྱིས་གསལ་བར་བསྟན་པ་བཞིན། །ལུས་འདི་སྲོག་དང་བྲལ་ན་མཐུ་མེད་ཅིང༌། །རང་གི་དགོས་པ་བསྒྲུབ་པ་མི་མཛེས་པ། །དེ་བཞིན་ཤེས་རབ་མེད་པས་བློ་གྱུར་ན། །དོན་སྒྲུབ་འཇིག་རྟེན་དག་ན་མཛེས་པ་མེད། །དད་ལ་སོགས་པའི་དབང་པོའི་རྣམ་པ་ཡང༌། །དབང་པོ་གཞན་ལ་བློ་འཛིན་ཤེས་རབ་གཙོ། །དེ་ཡི་མགོན་ལྡན་ཡོན་ཏན་སྐྱོན་ཤེས་པས། །ཉོན་མོངས་ཟད་པའི་ཚུལ་ལ་མཁས་པར་འགྱུར། །ཤེས་རབ་མེད་ན་འབྲས་བུ་དོན་གཉེར་ལ། །སྦྱིན་པ་དག་ཉིད་
རྣམ་པར་དག་མི་འགྱུར། །གཞན་དོན་བཏང་བ་སྦྱིན་པའི་མཆོག་ཅེས་གསུངས། །ལྷག་མ་ནོར་སྤེལ་དོན་གྱི་སྦྱོར་བ་ཡིན། །ཤེས་རབ་མི་གསལ་རྣམ་པར་བྱིང་གྱུར་ན། །བྱང་ཆུབ་སེམས་དཔས་རང་གི་ཤ་བྱིན་ན། །སྨན་གྱི་ཤིང་ལྟར་རྣམ་པར་མི་རྟོག་པར། །མཐོའམ་དམའ་བར་འགྱུར་བ་དེ་ལ་མེད། །དེ་བས་འཇིག་རྟེན་འདས་པ་དོན་གྱི་གཞི། །ཁྲོ་མེད་དགའ་བས་ཕུན་སུམ་ཚོགས་པའི་སེམས། །སྦྱིན་པ་ཆེན་པོས་འགྲོ་དོན་བསྒྲུབ་མོས་པ། །རྒྱལ་སྲས་ས་ཡི་དང་པོ་འཐོབ་པར་འགྱུར། །དེ་ལ་གནས་པ་ཕལ་ཆེར་བྱང་ཆུབ་ཏུ། །མི་འཕྲོགས་བློ་འཆང་འཁོར་ལོས་སྒྱུར་བར་འགྱུར། །ཤེས་རབ་མཐུས་བསྟན་ལམ་མཆོག་བདེ་བ་དེས། །རིམ་གྱིས་དྲི་མེད་རྒྱལ་སྲས་ས་ཡང་ཐོབ། །དེ་ནས་རང་བཞིན་རྣམ་དག་ཚུལ་འཆང་ཞིང༌། །གླིང་བཞི་འཁོར་ལོས་སྒྱུར་བར་དེ་འགྱུར་ཏེ། །རྒྱལ་པོ་ཀུན་གྱི་སྤྱི་བོས་བཀའ་བླང་ཞིང༌། །ཐུབ་དབང་རྒྱལ་བ་བཞིན་དུ་མཆོད་པར་འགྱུར། །དེ་དག་ཡན་ཆད་འདོད་པའི་ལྷ་རིས་དང༌། །འཇིག་རྟེན་བྱུར་བུ་སྟོང་གཉིས་སྟོང་གསུམ་གྱི། །དབང་ཕྱུག་ཐོབ་འགྱུར་དེ་དག་ཡན་ཆད་དུ། །ཤེས་རབ་འོད་ཀྱིས་རྒྱུ་རྣམས་སྦྱངས་པས་འཐོབ། །ཤེས་རབ་སྣང་བས་མུན་པ་མ་བསལ་ན། །ཚུལ་ཁྲིམས་དག་དང་ལྡན་པར་དེ་མི་འགྱུར། །ཕལ་ཆེར་ཤེས་རབ་མེད་པས་ཚུལ་ཁྲིམས་དག །ཤེས་པའི་སྐྱོན་གྱིས་ཉོན་མོངས་རྙོག་བཅས་འགྱུར། །རང་གི་དོན་དུ་ཚུལ་ཁྲིམས་མི་བསྒྲུབ་ན། །བློ་ལྡན་སྲིད་པའི་བཙོན་རའི་སྐྱོན་མཐོང་ཞིང༌། །དེ་ནས་འཇིག་རྟེན་མ་ལུས་གདོན་མོས་པ། །སྲིད་པའི་དོན་དུ་མི་སྒྲུབ་སྨོས་ཅི་དགོས། །ཤེས་རབ་ལོག་པའི་སྐྱོན་གྱིས་སེམས་རྙོག་ན། །བཟོད་པའི་ཡོན་ཏན་དེ་ལ་གནས་ཅི་སྨོས། །ལེགས་པར་རྟོགས་ལ་མི་དགའི་ཚུལ་འཆང་ཞིང༌། །ཡོན་ཏན་མེད་པའི་རྒྱན་ལ་གྲགས་པ་བཞིན། །ཤེས་རབ་ལྡན་པ་རྣམས་ལ་གནོད་པ་དག །བཟོད་པའི་ཡོན་ཏན་ཡོད་པས་གནོད་མི་འགྱུར། །ཤིན་ཏུ་དུལ་བའི་གླང་པོ་མཆོག་རྣམས་ལ། །ལས་ཀྱི་ཁྱད་པར་རྣམ་མང་བཟོད་པ་བཞིན། །བརྩོན་འགྲུས་གཅིག་པུ་བྱས་པ་ངལ་བའི་མཐའ། །ཤེས་རབ་གྲོགས་ཀྱིས་བསྟངས་ན་དོན་ཆེན་འགྲུབ། །བསྒྲུབས་བྱས་རྗེས་ལ་དེ་ཡི་ཡོན་ཏན་འཐོབ། །དེ་ལས་བྱུང་
བའི་དུབ་པ་ཡོངས་སུ་སེལ། །མཁས་པ་རྣམས་ལ་ཕུལ་དུ་བསྔགས་འགྱུར་ཞིང༌། །དེ་ལས་ཕྲ་ཞིང་ཟབ་པ་གཞན་མེད་པས། །འདོད་པའི་སྐྱོན་གྱིས་ཡོངས་སུ་མ་བསྒྲིབས་པའི། །ཡིད་ལམ་དྲང་པོར་ཤེས་རབ་མེད་མི་འགྱུར། །དེ་འདྲའི་བསམ་གཏན་བདེ་དགའ་མཆོག་ལྡན་པ། །སྐྱོན་བསགས་ཉེས་པ་ཆེན་པོ་གྲགས་གྱུར་པའི། །ལམ་གོལ་རིགས་པའི་ཚུལ་ལས་བརྟེན་པ་ནི། །སྐྱེ་བོ་མ་རབས་ཡིད་ལ་ཇི་ལྟར་འགྲུབ། །ཤེས་རབ་ཚུལ་ལ་བརྩོན་མེད་བློ་འཆང་ན། །དེ་ཡི་ལྟ་བ་ཡོངས་སུ་དག་མི་འགྱུར། །དེ་མེད་ཚུལ་ཁྲིམས་མི་འདག་དེ་མེད་པས། །ཏིང་འཛིན་མི་འཐོབ་སྡུག་བསྔལ་ཟད་མི་འགྱུར། །ཤེས་རབ་ལྡན་པས་སྐྱོན་ལས་བག་བྱེད་ཅིང༌། །ཡོན་ཏན་ཚོགས་ལས་རྒྱུན་དུ་བདེ་ཐོབ་པས། །ཉོན་མོངས་འགྲོ་བའི་དོན་ལ་རབ་བརྩོན་ཞིང༌། །ཡོན་ཏན་ཚོགས་ཀྱི་བདེ་བའི་ལམ་དུ་འཇུག །ཡང་དག་རྟོགས་པས་ཏིང་འཛིན་འཐོབ་པར་འགྱུར། །ངག་ཡིད་ལུས་རྣམས་རྣམ་པར་དག་པ་འགྲུབ། །དེ་ཕྱིར་སྐྱོན་མེད་མཐུ་དང་ལྡན་གྱུར་པ། །འཇིག་རྟེན་ཕན་པ་ཕུན་སུམ་ཚོགས་ལ་འཇུག །སྦྱིན་པས་ཅི་འདོད་ཡིད་བཞིན་སྒྲུབ་པ་བྱེད། །ཚིག་སྙན་བདུད་རྩི་ཤིན་ཏུ་གསལ་བ་དང༌། །རྒྱུ་མེད་མཐུ་དང་ལྡན་པའི་སྡོམ་པ་ཡིས། །གཞན་གྱི་དོན་ལ་མཉམ་པར་ཀུན་དུ་སྤྱོད། །དོན་ལ་ཐུན་མོང་ཡང་དག་བསྟན་བྱས་ཤིང༌། །བྱམས་པས་དེ་དག་ཡིད་ནི་དབང་བསྐུར་ཏེ། །ཤེས་རབ་སྟོབས་ཀྱིས་འཁོར་ལོ་ཐོགས་མེད་དེ། །མྱ་ངན་འདས་བའི་བདེ་ལ་འགོད་པར་བྱེད། །ཤེས་རབ་སྔོན་འགྲོ་མཐུ་ཆེན་འདི་དག་གིས། །བྱིན་གྱིས་བརླབས་ཤིང་ཡོངས་སུ་བསྲུངས་པས་ན། །མཚོ་མེད་ངན་འགྲོ་འཆི་དང་སྨད་པ་དང༌། །དོགས་པའི་སྟོབས་ཀྱིས་འཇིགས་པ་ཉེར་མི་འོང༌། །འཇིགས་པ་ཐམས་ཅད་སྐྱོན་ལས་བྱུང་བ་སྟེ། །ཤེས་རབ་སྐྱོན་དང་ལྷན་ཅིག་མི་འགྲོགས་པས། །སྟོན་གྱི་ནམ་མཁའི་སྤྲིན་ཚོགས་མེད་པ་ལ། །ཉི་འོད་གསལ་བ་མུན་དང་མི་འགྲོགས་བཞིན། །ཉི་མ་འོད་ཆེན་ཤར་བར་གྱུར་བཞིན་དུ། །འགྲོ་བའི་རྒྱུད་རྣམས་མུན་ནག་གང་འགེབས་པ། །ཤེས་རབ་འོད་ཀྱི་མཐུ་ཆེན་འབྱུང་བས་ན། །ཐམས་ཅད་གསལ་
འགྱུར་མིང་ཙམ་འབའ་ཞིག་ལུས། །གང་ལ་ཤེས་རབ་འོད་ཆེན་ཤར་གྱུར་པ། །དེ་ལ་བྱ་བའི་ལྷག་མ་ལས་པ་མེད། །བསྐལ་པའི་མེས་བསྲེགས་འཇིག་རྟེན་གསལ་བའི་ཚེ། །བསྲེག་བྱའི་ལྷག་མ་ཡོད་པར་བརྗོད་མེད་བཞིན། །སྣང་བ་ཐམས་ཅད་གཅིག་ཏུ་འདུས་གྱུར་ཀྱང༌། །ཤེས་རབ་འོད་ལ་བསྐྲུན་དུ་ཉེར་མི་འགྲོ། །དེ་བས་ཁེ་ཆེན་དེ་ལས་མཆོག་གཞན་མེད། །ཡོངས་སུ་མཉམ་པ་མེད་པར་འང་གཞན་མེད་དོ། །ཤེས་རབ་ཚུལ་བརྩོན་བསླབ་པ་བདེ་ཚུལ་དུ། །ཡོངས་སུ་རྫོགས་འགྱུར་ཚུལ་ཁྲིམས་ཞི་བར་འགྱུར། །དེ་བས་རང་གི་མཐུ་རྣམས་ཀུན་གཏུགས་ཏེ། །དེ་འདྲའི་ཤེས་རབ་ཚུལ་ལ་བརྩོན་པར་བྱ། །ཕུང་པོ་ཁམས་དང་སྐྱེ་མཆེད་རྒྱུ་དག་དང༌། །བདེན་པའི་གནས་ལ་སོམ་ཉིར་མི་འགྱུར་ཞིང༌། །དུས་གསུམ་དེ་འདྲར་བསྡུས་པའི་རིགས་པ་ནི། །ཤེས་རབ་ཤིན་ཏུ་སྦྱངས་པའི་ཡུལ་འཇུག་ཡིན། །ཤེས་རབ་དག་སྦྱངས་སྤྱོད་པའི་རྣམ་པ་དག །ཡིད་ཆེས་དཀའ་ཞིང་ཡོན་ཏན་སྣང་ལ་ཡང༌། །སྐྱི་གཡའ་ངོ་མཚར་ཐོབ་པའི་དབང་གྱུར་པས། །རྒྱལ་སྲས་གྲགས་པ་ཆེན་པོས་ཁྱབ་པར་འགྱུར། །ཤིན་ཏུ་མཐུ་འབར་ཤེས་རབ་སྟོབས་ཀྱི་ཕུལ། །བདུད་དང་དཔུང་བཅས་ཚོགས་ཀྱིས་བཟོད་མི་ནུས།། ཤེས་རབ་འོད་ཀྱིས་དེ་དག་མིག་རྨོངས་པས། །དེ་དག་མགོ་འདེགས་ལྟ་བར་མོས་པ་མེད། །འདོད་པའི་ལྟས་འཕངས་མདའ་ལ་མགོ་ཐུབ་པའི། །ཤེས་རབ་གོ་ཆ་སེམས་ཀྱིས་བརྟན་བགོས་ན། །གཟུགས་ལ་སོགས་པའི་དམག་མང་ཚོགས་ཀྱི་རྣམས། །གཅིག་པུ་འཇིགས་མེད་ཟིལ་གྱིས་མནན་ཅིང་འགྲོ། །མི་བརྟན་དང་ཚུལ་འཇིགས་ཤིང་རྟབས་པའམ། །གླེན་པའི་ངང་ཚུལ་མྱ་ངན་འཛིན་པའམ། །མཐུ་ཞན་སེམས་ལ་རྩ་བ་ཟུག་གྱུར་པའི། །ཁྲོ་དང་ཆགས་དང་དམན་ཟིལ་གནོན་པའམ། །ཕན་བྱེད་རྣམས་ལ་འཇུངས་པའི་དྲི་མ་དག །འདོད་ཆགས་ལྡན་ལ་རྟེན་འཆའ་རྒོད་པའམ། །གཟི་བརྗིད་མཐུ་ཆུང་ལེ་ལོའི་བསམ་པ་དང༌། །ཤིན་ཏུ་གཡེང་བས་མ་ཞི་འཆར་ཚུལ་དག །སོ་སོའི་རྐྱེན་གྱི་བསམ་པ་ཐིབས་པོ་ལ། །གནས་འཆའ་ཉེས་པའི་རྣམ་པ་དེ་དང་དེ། །འགྲོ་ལ་ཕན་དོན་དམ་བཅས་ཤེས་རབ་ཅན། །ཤེས་རབ་ཆེན་པོས་མ་
ལུས་ཡོངས་སུ་སེལ། །སྐྱོན་བྲལ་བརྟན་ཞིང་ངང་དེས་དེ་མཁྱེན་ནས། །དགའ་བདེ་སྐྱིད་ཕྱིར་ལེགས་པར་དེ་གཟིགས་ཤིང༌། །དབང་བསྐུར་བདུད་རྩི་ཤིན་ཏུ་སིམ་བྱེད་པས། །ཐུབ་དབང་རྣམས་ཀྱིས་དེ་ནི་དབང་ཡང་བསྐུར། །བདེ་གཤེགས་མཛོད་སྤུ་མཚན་རབ་ཐོན་པ་ཡི། །འོད་ཆེན་ཟླ་བ་གསལ་བཞིན་སིམ་བྱེད་པས། །རྒྱལ་སྲས་དེ་ཡི་མགོ་ནས་དབང་བསྐུར་ན། །མཆོད་སྦྱིན་མེ་ལ་མར་ཁུས་བླུགས་ལྟར་མཛེས། །ཆོས་རྒྱལ་རྒྱལ་ཚབ་ཐབས་དེ་ཐོབ་གྱུར་ན། །ཕྱོགས་བཅུ་ཀུན་དུ་སྤྲུལ་པའི་ལུས་བཀྱེ་ཞིང༌། །སྤྲིན་ཆེན་ཆར་གྱི་རྒྱུན་གྱིས་རྡུལ་བསལ་བཞིན། །འཇིག་རྟེན་སྡུག་བསྔལ་ལྷུན་གྱིས་གྲུབ་པར་སེལ། །རྒྱལ་སྲས་མཐུ་མཆོག་དེ་འདྲ་རྨད་བྱུང་དག །ཐམས་ཅད་ཤེས་རབ་དེ་ཡི་མཐུ་ལས་བྱུང༌། །བུ་ལ་བྱམས་པའི་མ་འདྲ་ཤེས་རབ་ལས། །དེ་འདྲའི་ཕུན་སུམ་ཚོགས་འབྱུང་ཅི་མཚར་གྱི། །བདེ་གཤེགས་སྟོབས་བཅུ་སྟོབས་ཀྱི་ཕུལ་བྱུང་བ། །མཚུངས་མེད་མཆོག་ཏུ་བྱ་བ་ཐམས་ཅད་དང༌། །ཡོན་ཏན་ཚོགས་གཞན་མ་ལུས་ཐམས་ཅད་ཀྱང༌། །དེ་འདྲའི་ཤེས་རབ་རྒྱུ་ལ་བརྟེན་ཞིང་འབྱུང༌། །འཇིག་རྟེན་དག་ན་སྒྱུ་རྩལ་གཏེར་མཆོག་དང༌། །གཙུག་ལག་མིག་འདྲ་ཅི་སྙེད་ཡོད་པ་དང༌། །ཡོངས་སུ་སྐྱོབ་བྱེད་བློ་དང་སྔགས་ལ་སོགས། །རྣམ་བཀོད་ཆོས་ཀྱི་ཁྱད་པར་ཐ་དད་དང༌། །རྣམ་གྲངས་རྣམ་མང་རྣམ་ཐར་སྒོ་དག་དང༌། །འཇིག་རྟེན་ཕན་པའི་རྣམ་པ་དེ་དང་དེས། །རྒྱལ་སྲས་མཐུ་ཆེན་རྣམ་པར་སྟོན་བྱེད་པ། །དེ་དག་ཐམས་ཅད་ཤེས་རབ་མཐུ་ལས་འབྱུང༌། །དབང་པོའི་ཡུལ་རྣམས་ལྷ་རྫས་འདྲ་བདོག་པའི། །རྒྱལ་སྲིད་ཆེ་ལྡན་བྱང་ཆུབ་སེམས་དཔའ་དག །རང་བཞིན་ཚུལ་མིན་འགྱུར་བ་མེད་པ་ཡང༌། །ཤེས་རབ་ཡོན་ཏན་བློན་པོ་ལྡན་པའི་མཐུས། །གཞན་ལ་ཕན་བྱེད་རོ་གཅིག་བྱམས་པ་ལ། །འདོད་ཆགས་འགོ་བ་ཡོངས་སུ་སྤང་བ་དང༌། །གཞན་གྱི་སྡུག་བསྔལ་མི་བཟོད་སྙིང་རྗེ་ལ། །མྱ་ངན་ཁུར་གྱི་ལེ་ལོས་མི་དམའ་དང༌། །དགའ་མཆོག་དང་ལྡན་ཡང་དག་གཡེང་མེད་དང༌། །འགྲོ་དོན་མི་གཡེལ་བཏང་སྙོམས་ཆེན་པོ་དང༌། །ཡོན་ཏན་དེ་དང་དེ་དག་གཉེན་པོའི་ལམ། །ཤེས་རབ་ཆེན་པོས་བཀག་པས་རྣམ་པར་མཛེས། །བསམ་པ་བག་ལ་ཉལ་ལ་
བཀའ་བརྩན་པའི། །ཤེས་རབ་ཉི་འོད་འབར་ལྟར་དེ་མེད་ན། །སུ་ཞིག་ཡུན་རིང་འཇིག་རྟེན་རྐྱེན་འབྱུང་བའི། །རང་བཞིན་ཚུལ་གྱུར་མུན་ནག་སེལ་ནུས་ཡོད། །བརྟན་འོས་བླ་མ་རིམ་གྲོ་བསྙེན་བཀུར་ཏེ། །ཤེས་རབ་བསྒྲུབ་ཕྱིར་ཐོས་པ་བཙལ་བར་བྱ། །རྣམ་པ་སུམ་ཅུ་གཉིས་ཀྱིས་ཤེས་བྱ་སྟེ། །ཡང་དག་མཉམ་གཞག་ཡིད་ཀྱིས་རྣམ་པར་སེལ། །ཐོས་ཉུང་དམུས་ལོང་བསྒོམ་པའི་ཚུལ་མི་ཤེས། །དེ་མེད་དེས་ཀོ་ཅི་ཞིག་བསམ་པར་བྱ། །དེ་བས་ཐོས་ལ་བརྩོན་བྱ་དེ་རྒྱུ་ལས། །བསམས་བཞིན་བསྒོམས་པས་ཤེས་རབ་ཡངས་པ་འབྱུང༌། །དྲི་མ་རྩོད་མེད་སྒོ་དང་བརྟན་པ་དང༌། །དོན་ཚོལ་རྟོགས་པའི་མཐུ་ཡོད་རྟོགས་པ་དང༌། །བསམ་གཏན་དེ་ཡི་ཡོན་ཏན་སྐྱེད་པ་བས། །ཤེས་རབ་བསྒྲུབ་ལ་མངོན་པར་བརྩོན་པར་བྱ། །ཤེས་རབ་ཐོབ་པའི་ཚུལ་ལ་ཐབས་ཀྱི་མདོ། །བསམ་གཏན་དེ་དོན་ངེས་པའི་ཐོས་མང་བ། །ཡོན་ཏན་ཚོགས་རྒྱུ་ཤེས་རབ་སྣང་བ་ནི། །གཉིས་པོ་དེ་ལས་གཙུབ་ཤིང་མེ་ལྟར་འབྱུང༌། །མཁས་པའི་སྐྱེ་བོས་སྤྱོད་པའི་ལམ་བསྟེན་ཏེ། །གཏི་མུག་རྒྱུར་གྱུར་ཐིབས་པོ་སྤང་བར་བྱ། །དེ་བསྒྲིབས་གྱུར་ན་ཟླ་བ་ཤར་གྱུར་ཀྱང༌། །ཆར་སྤྲིན་ཆེར་བསྒྲིབས་མི་སྣང་མཚུངས་མི་སྣང༌། །ལེ་ལོ་སྙོམ་དང་རྟེན་ངན་བརྟེན་པ་དང༌། །གཉིད་ཀྱི་དབང་གྱུར་མི་རྟོག་ངང་ཚུལ་དང༌། །ཐུབ་པའི་ཡེ་ཤེས་མཆོག་ལ་མོས་མེད་དང༌། །ལོག་པའི་ང་རྒྱལ་ནོན་པས་དོན་འདྲི་དང༌། །དམའ་སེམས་ངག་ལ་ཞེན་པས་བྱུང་བའི་རྒྱུས། །མཁས་པའི་སྐྱ་བོ་བསྟེན་པར་མ་དད་དང༌། །ལོག་པའི་རྣམ་རྟོག་དུས་ཚེ་ལོག་ལྟ་དག །གཏི་མུག་རྒྱུ་ཡིན་དེ་བསལ་གཉེན་པོ་ནི། །ཕུང་པོ་ཁམས་དང་སྐྱེ་མཆེད་བདེན་པ་དང༌། །རིག་པ་དག་དང་རྒྱུ་བྱུང་ཚུལ་བརྟག་དང༌། །ཆོས་ལ་མཁས་པའི་རྣམ་པ་དེ་དག་ནི། །ཤེས་རབ་ཐབས་ཀྱི་ཡུལ་བརྒྱད་རྣམ་པ་ཡིན། །གཟུགས་རྣམས་དབུ་བའི་ཚོགས་འདྲ་སྙིང་པོ་མེད། །ཚོར་བ་རྣམ་གསུམ་ཆུ་ཡི་ཆུ་བུར་ཚུལ། །འདུ་ཤེས་འདོད་པའི་ཡོན་ཏན་ཞུགས་པ་ནི། །སྨིག་རྒྱུས་རི་དགས་སླུ་བཞིན་བྱིས་པ་སླུ། །འདུ་བྱེད་རྣམ་པ་ཆུ་ཤིང་རང་བཞིན་འདྲ། །སྒྱུ་མའི་ཚུལ་ལས་རྣམ་ཤེས་གཏད་པ་མེད། །དེ་ལ་བརྟེན་ཞིང་རོ་འདྲའི་ལུས་འདི་ཉིད། །རྣམ་མང་བསྐྱོད་
ཅིང་ལམ་རྒྱུད་ཀུན་དུ་འཁྱམ། །བདག་དང་བདག་གི་འདི་ལ་གང་ཡང་མེད། །མི་གཙང་སྣ་ཚོགས་འདུས་པའི་ཚོགས་འདི་སྟེ། །རང་དབང་ཡོད་ལྟར་འཁྲུལ་འཁོར་བྱས་པ་བཞིན། །སེམས་ཅན་འདུ་ཤེས་བྱིས་པ་སླུ་བ་བྱེད། །མིག་འདི་སྐད་ཅིག་འཇིག་སྟེ་བདག་མ་ཡིན།། མིག་ལྡན་དེ་མིན་མིག་ལ་བདག་ཀྱང་མེད། །བདག་ལ་མིག་མེད་སྐྱེ་མཆེད་ལྷག་མ་ཡང༌། །དེ་དང་ཚུལ་འདྲ་གཏད་མེད་བདག་གི་མེད། །ལུས་ལ་གནས་པའི་ཁམས་དང་ཕྱི་རོལ་ཁམས། །མཚན་ཉིད་མི་མཚུངས་འགལ་བ་གང་ཡང་མེད། །རྣམ་ཤེས་ཁམས་ཀྱང་མི་རྟག་བདག་མ་ཡིན། །དེ་ལས་གཞན་ཡང་ནམ་མཁའི་མེ་ཏོག་བཞིན། །དེ་ལྟར་འདི་ནི་སྲེད་རྨོངས་ཡིད་ལྡན་ལ། །སྡུག་བསྔལ་འབའ་ཞིག་བྱུང་བར་གྱུར་པ་ཡིན། །སྲེད་དང་བྲལ་ན་ཞི་བའི་མཆོག་ཐོབ་སྟེ། །ཚུལ་ཁྲིམས་ཏིང་འཛིན་སྲེད་སེལ་ལམ་ཡང་ཐོབ། །དེ་དང་དེ་དག་རྟེན་འབྲེལ་བྱུང་བ་ཞེས། །ལྟ་བ་རྣམ་དག་ཡོད་མེད་གཉིས་མི་དམིགས། །འགྲོ་བ་འདི་དག་དེ་ལ་སྒྱུ་ལྟར་སྣང༌། །དེ་ཕྱིར་བདེ་ལ་སོགས་པས་འགྱུར་མེད་བསྟན། །འདས་གྱུར་བྱུང་གྱུར་རྟོག་པ་ལོག་ལྟ་སྟེ། །བྱུང་གྱུར་གང་ཡིན་སྲིད་ལས་བདེ་འགྱུར་ཞེས། །དེ་ལྟར་འདས་པའི་ཡུལ་ལ་འདོད་བྲལ་ཞིང༌།། བྱུང་དང་འབྱུང་བར་འགྱུར་བ་སྨོན་པ་མེད། །སྡུག་བསྔལ་ཚུལ་གྱིས་མངོན་པར་མི་བདེ་ཞིང༌། །མི་བཟད་མིག་ཕྱེ་མངོན་པའི་ཚུལ་ཡོད་ན། །དེ་དག་དོན་བསྒྲུབ་ཕོངས་དོར་ཚུལ་བསམས་ཤིང༌། །ཤེས་ལྡན་སུ་ཞིག་དགར་གནས་སླ་སྙམ་སེམས། །དེ་ལྟར་རྣམ་གྲོལ་བློ་ལྡན་སྙིང་རྗེ་ཅན། །འགྲོ་བ་མགོན་མེད་ཉོན་མོངས་གཟིར་མཐོང་ན། །ཐམས་ཅད་བྱང་ཆུབ་མཆོག་ལ་མ་བཀོད་དུ། །དམའ་ལས་བྱམས་བཏང་མྱ་ངན་འདར་མི་མོས། །འཇིག་རྟེན་དོན་སྒྲུབ་ཚུལ་ལ་མཐུ་མེད་པའི། །ཐེག་པ་གཉིས་པོ་གཏན་དུ་སྤང་བྱས་ཤིང༌། །ཐུབ་རྒྱལ་ཐེག་པ་སྙིང་རྗེས་བསྟན་པའི་ལམ། །གཞན་ཕན་རོ་གཅིག་རང་བཞིན་དེ་དག་འཇུག །དམའ་འོས་ཚུལ་ལ་ལེགས་པའི་བློ་མི་གཞོལ། །ཆེ་ལ་ཆེ་མིན་ནམ་ཡང་གནས་མི་འགྱུར། །གཙང་མའི་རང་བཞིན་གཙང་དང་རྟག་ཏུ་འབྲེལ། །གཞན་ཡང་མཐུན་དང་མཐུན་གྱུར་ཆོས་ཉིད་ཚུལ། །བདེ་དང་མི་བདེ་རྨི་ལམ་འདྲར་འབྲངས་ཤིང༌། །
གཏི་མུག་སྐྱོན་གྱིས་དམའ་བའི་འགྲོ་མཐོང་ན། །ལས་ཀྱི་དམ་པ་གཞན་དོན་དགའ་བོར་ཞིང༌། །རང་གི་དོན་ལ་དེ་ཀོ་ཅི་སྟེ་བརྩོན། །གང་ཞིག་འཇིག་རྟེན་ཕན་ཕྱིར་ཀུན་སྤྱོད་ཅིང༌། །མངོན་པའི་ང་རྒྱལ་བདག་ལྟ་ཡོངས་སྤངས་ཏེ། །ཀུན་ལ་བྱམས་པས་མི་གཉིས་ལམ་རྒྱུ་བ་དེ་ནི་མྱ་ངན་འདས་ཀྱང་འཇིག་རྟེན་སྤྱོད། །ཤེས་རབ་རྣམ་དག་མངོན་སྒྲུབ་ཐེག་པའི་མཆོག །ཐུབ་ཆེན་ཐམས་ཅད་མཁྱེན་ཉིད་དེ་ལས་འབྱུང༌། །དེ་ནི་འཇིག་རྟེན་རྣམས་ཀྱི་མིག་བཞིན་ཏེ། །འོད་ལྡན་ཉི་མ་ཤར་བའི་འོད་དང་འདྲ། །འཁོར་བའི་སྐྱོན་གྱི་ཁུར་གྱིས་ངལ་ཆད་ཀྱང༌། །ཤེས་རབ་རྣམ་པར་དབྱེ་ལ་སྐྱོན་མེད་པ། །དེ་ནི་སངས་རྒྱས་ལེགས་བསྒྲུབ་ཐེག་པ་ལ། །བདག་ཉིད་ཡོངས་སུ་སྐྱོ་བར་འགྱུར་བ་མེད། །བདེ་གཤེགས་མཐུ་ཅན་རྨད་བྱུང་མཐོང་འགྱུར་བས། །ཡན་ལག་ཐམས་ཅད་སྤུ་གཡོ་དགའ་གྱུར་ཅིང༌། །དེ་བསྒྲུབ་ཐེག་པའི་དམ་པ་སྤོང་བྱེད་པ། །གཡོ་སྒྱུ་སྤྱོད་མིན་རྒྱུ་ནི་གཞན་མེད་དོ། །བདུད་ཀྱི་འཁྲུག་པས་མ་ནོན་སུ་ཞིག་ཀོ །དཀོན་མཆོག་གསུམ་གྱི་འབྱུང་གནས་ཐེག་པ་སྟེ། །གནོད་པའི་མདའ་འབྱིན་བདེ་གཤེགས་ཐེག་པ་ལ། །སྨོད་པར་སུ་བྱེད་དེ་ནི་འགྲོ་བའི་སྒྲ། །ཤེས་རབ་མིག་ཟུམས་འགྲོས་འཁྱར་གྱུར་པ་ལ། །འཇིག་རྟེན་དོན་སྒྲུབ་རྒྱལ་བའི་རྒྱལ་རིགས་ན། །སྙིང་རྗེ་མི་སྐྱེད་སྐྱེས་བུ་གང་ཞིག་ཡོད། །དེ་དག་རྨོངས་བསལ་བརྩོན་འགྲུས་སུ་མི་རྩོམ། །ཤེས་རབ་ཀྱི་ཕ་རོལ་ཏུ་ཕྱིན་པའི་ལེའུའོ།། །།ཕ་རོལ་ཏུ་ཕྱིན་པ་བསྡུས་པ་ཨཱཪྻ་ཤཱུ་རས་མཛད་པ་རྫོགས་སོ།། །།ལོ་ཙཱ་བ་ཨཱ་ཙཱ་ཪྻ་བཻ་རོ་ཙ་ན་ར་ཀྵི་ཏས་བསྒྱུར་བའོ།། །