རྟེན་ཅིང་འབྲེལ་བར་འབྱུང་བ་དང་པོ་དང་རྣམ་པར་དབྱེ་བ་བསྟན་པའི་རྒྱ་ཆེར་བཤད་པ།
ཡོན་ཏན་བློ་གྲོས།
རྒྱ་གར་སྐད་དུ། པྲ་ཏཱི་ཏྱ་ས་མཏྤཱ་ད་ཨཱ་དི་བི་བངྒ་ནིར་དེ་ཤ་སྱ་ཊཱི་ཀཱ །བོད་སྐད་དུ། རྟེན་ཅིང་འབྲེལ་བར་འབྱུང་བ་དང་པོ་དང་རྣམ་པར་དབྱེ་བ་བསྟན་པའི་རྒྱ་ཆེར་བཤད་པ། བམ་པོ་དང་པོ། སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། །གང་ལ་བློ་མངའ་རྟོགས་པར་བྱ་བ་མ་རྟོགས་མེད། །གང་ལ་དག་མངའ་ཕྱི་ནས་རྣམ་པར་སྦྱང་བྱ་མེད། །དེ་ནི་འཇིག་རྟེན་མགོན་ཏེ་འཇིག་རྟེན་མཐར་འབྱིན་པ། །སྐྱེ་དགུ་རྣམས་ཀྱི་གཙོ་ལ་སྤྱི་པོས་ཕྱག་འཚལ་ལོ། །ཆོས་ཀྱང་དེ་དག་ཉིད་ཀྱིས་ཇི་བཞིན་བསྟན་པ་ནི། །ཞི་བའི་གནས་དང་ལམ་དང་ལམ་གྱི་ཆེད་དུ་བྱས། །གང་ཞིག་རབ་ཏུ་རྟོགས་པས་ས་གསུམ་འདི་དག་ཏུ། །འཁོར་ལོ་བཞིན་དུ་འགྲོ་བ་འདི་དག་འཁོར་བ་མེད། །ཆོས་དེ་དག་ལ་གནས་པའི་འཕགས་པའི་དགེ་འདུན་ནི། །ཆགས་དང་ཚོགས་དག་ལས་ནི་ཤིན་ཏུ་འདས་གྱུར་ནས། །ཡན་ལག་བཅུ་དང་ཡན་ལག་བརྒྱད་དང་དབྱེ་བ་བརྒྱད། །ལམ་གྱི་འབྲས་བུ་འབྲས་བུས་ཀྱང་ནི་དེ་དག་རྣམས། །འདི་དག་གི་འགྲེལ་པ་ནི་མདོའི་དོན་བཤད་པ་རྩོམ་པའི་ཚེ་ཕྱིས་བཤད་པར་བྱའོ། །དཀོན་མཆོག་གསུམ་ལ་མཆོད་པར་བརྗོད་པ་ནི་བསྟོད་པ་དང་ཕྱག་འཚལ་བ་ཡིན་ནོ། །དེ་ཡང་ཅིའི་ཕྱིར་ཞེ་ན། སྟོན་པ་པོ་དང་བསྟན་པ་དང་སློབ་མའི་ཡོན་ཏན་ཕུན་སུམ་ཚོགས་པ་བརྗོད་པས། མདོ་སྡེ་འདི་ལ་གུས་པའི་ཁྱད་པར་བསྐྱེད་པའི་ཕྱིར་དང༌། ཁ་ཅིག་དག་ལ་དེ་བསྟན་པ་བྱས་པ་དང༌། དེ་ལ་ཞུགས་པ་དང་དེ་ལ་བརྟེན་པའི་ཕྱིར་ཏེ། འདིར་ཚིགས་སུ་བཅད་པས་དཀོན་མཆོག་གསུམ་ལ་མཆོད་པ་བརྗོད་པའི་སྒོ་ནས་གླེང་བསླང་བ་ཡིན་ནོ་ཞེས་འབྲེལ་པ་བསྟན་ཏོ། །མཆོད་པ་བརྗོད་པ་ཡང་མདོ་སྡེ་འདི་ལ་གུས་པའི་ཁྱད་པར་བསྐྱེད་པའི་ཕྱིར་དང༌། ཁ་ཅིག་དག་ལ་ཞེས་སྨོས་པ་ཡིན་པའི་ཕྱིར་དགོས་པ་དང་བཅས་པ་ཡིན་པར་བསྟན་ཏོ། །གུས་པའི་ཁྱད་པར་བསྐྱེད་པ་ཡང་གུས་པས་མཉན་པར་བྱ་བའི་ཕྱིར་རོ། །གུས་པས་མཉན་པ་ཡང་ཕྱིན་ཅི་མ་ལོག་པར་གཟུང་བའི་ཕྱིར་རོ། །ཕྱིན་ཅི་མ་ལོག་པར་དོན་བཟུང་བ་ཡང་མཉན་པ་དང༌། བསམ་པ་དང༌། བསྒོམ་པའི་རིམ་པ་དང༌། མཐོང་བ་དང་བསྒོམ་པའི་རིམ་གྱིས་མཐོང་བ་དང་བསྒོམ་པས་སྤང་བར་བྱ་བའི་ཉོན་མོངས་པ་སྤང་བའི་ཕྱིར་རོ། །ཁ་ཅིག་དག་ལ་ཞེས་སྨོས་པ་ནི་སྐྱོབ་པ་རབ་ཏུ་གྲུབ་པའི་གང་ཟག་བྱེ་བྲག་ཏུ་བྱ་བའི་ཕྱིར་རོ། །དེ་བསྟན་
པ་བྱས་པའི་ཕྱིར་ཞེས་བྱ་བ་ནི་དེ་བསྟན་པ་བྱས་པ་ཉེ་བར་ལེན་པ་ཞེས་བྱ་བའི་དོན་གང་ཡིན་པ་སྟེ། བསྟན་པ་བྱས་པ་ནི་བསྟན་ཟིན་པ་དང་དོན་མཐུན་པའི་ཕྱིར་རོ། །དེ་ལ་ཞུགས་བའི་ཕྱིར་ཞེས་བྱ་བ་ནི་མདོ་སྡེ་འདི་ལ་བསྟན་ཅིང་བསླབས་པའི་ནང་དུ་ཆུད་པའི་ཕྱིར་རོ། །དེ་ལ་བརྟེན་པའི་ཕྱིར་ཞེས་བྱ་བ་ནི་སློབ་མ་བསྟེན་པ་ཉིད་ཀྱི་ཕྱིར་ཞེས་བྱ་བའི་དོན་གང་ཡིན་པ་སྟེ། བསྟན་པ་ནི་གོམས་པར་བྱེད་པའི་དོན་ཡིན་པའི་ཕྱིར་རོ། །འདི་ལྟར་སངས་རྒྱས་ཀྱི་སློབ་མ་རྣམས་མྱ་ངན་ལས་འདས་པའི་འབྲས་བུ་དོན་དུ་གཉེར་བའི་ཕྱིར་ཆོས་ཀྱི་རྣམ་གྲངས་འདི་ལ་བསྟན་པ་ནི་མཉན་པ་དང༌། བསམ་པ་དང༌། བསྒོམ་པའི་ཚུལ་གྱིས་བསྟན་པ་ཡིན་ནོ། །དེ་ལ་སངས་རྒྱས་ལ་བསྟོད་པས་ནི་ཡོན་ཏན་ཕུན་སུམ་ཚོགས་པ་རྣམ་པ་ལྔ་བསྟན་ཏེ། གང་ལ་བློ་མངའ་རྟོགས་པར་བྱ་བ་མ་རྟོགས་མེད། །ཅེས་བྱ་བའི་ཚིག་གིས་ནི་ཡེ་ཤེས་ཕུན་སུམ་ཚོགས་པ་བསྟན་ཏེ། ཤེས་བྱ་ཐམས་ཅད་ལ་ཐོགས་པ་མི་མངའ་བའི་ཡེ་ཤེས་ཡིན་པའི་ཕྱིར་རོ། །གང་ལ་དག་མངའ་ཕྱི་ནས་རྣམ་པར་སྦྱང་བྱ་མེད། །ཅེས་བྱ་བའི་ཚིག་གིས་ནི་སྤངས་པ་ཕུན་སུམ་ཚོགས་པ་ཡིན་ཏེ། བག་ལ་ཉལ་དང་ཉོན་མོངས་པའི་ཕྲ་རྒྱས་ཐམས་ཅད་སྤངས་པའི་ཕྱིར་རོ། །དེ་ནི་འཇིག་རྟེན་མགོན་ཏེ་ཞེས་བྱ་བ་འདིས་ནི་ཐུགས་རྗེ་ཕུན་སུམ་ཚོགས་པ་ཡིན་ཏེ། །འཇིག་རྟེན་འཁོར་བའི་སྡུག་བསྔལ་ཐམས་ཅད་ལས་ཡོངས་སུ་སྐྱོབ་པར་མཛད་པའི་ཕྱིར་ཏེ། ཐུགས་རྗེ་ཅན་ནི་འཇིག་རྟེན་པའི་མགོན་དུ་གྱུར་པ་ཡིན་ནོ། །འཇིག་རྟེན་མཐར་འབྱིན་པ་ཞེས་བྱ་བའི་ཚིག་འདིས་ནི་མི་ཟད་པ་ཕུན་སུམ་ཚོགས་པ་ཡིན་ཏེ། འཇིག་རྟེན་གྱི་མཐའ་གཏུགས་པར་བཞུགས་པའི་ཕྱིར་རོ། །འཇིག་རྟེན་མཐར་ཕྱིན་པ་ཞེས་བྱ་བའི་སྒྲས་འདིར་འཇིག་རྟེན་གྱི་མཐའ་གཏུགས་པར་བསྟན་པ་ཡིན་གྱི་འཇིག་རྟེན་གྱི་མཆོག་ལ་བྱ་བ་མ་ཡིན་ཏེ། གང་གིས་འཇིག་རྟེན་མཐར་འབྱིན་པ་དེ་འཇིག་རྟེན་མཐར་འབྱིན་པ་ཞེས་བྱ་སྟེ། མཐའི་སྒྲ་ནི་འདིར་གཞི་ལ་སྒྲུབ་པ་ཡིན་ནོ། །དེ་ཉིད་ཀྱི་ཕྱིར་མི་དགེ་བ་དང་སྡིག་པ་མེད་པ་ཡིན་ནོ། །གཞན་དུ་ན་ནི་འཇིག་རྟེན་མཐར་ཕྱིན་པ་ཞེས་བཤད་པར་འགྱུར་རོ། །སྐྱེ་དགུ་རྣམས་ཀྱི་གཙོ་ཞེས་བྱ་བའི་ཚིག་འདིས་ནི་མཚུངས་པ་མེད་པ་ཕུན་སུམ་ཚོགས་པ་ཡིན་ཏེ། སེམས་ཅན་ཐམས་ཅད་པས་མཆོག་ཏུ་གྱུར་པའི་ཕྱིར་རོ། །ཇི་སྐད་དུ། ཡོན་ཏན་ཕུན་སུམ་ཚོགས་པ་དང་སྐྱེས་
བུ་ཆེན་པོའི་དངོས་པོ་ཕུན་སུམ་ཚོགས་པ་ཡིན་པའི་ཕྱིར་རོ་ཞེས་གསུངས་པ་ཡིན་ནོ། །དེ་ལ་ཡེ་ཤེས་ཕུན་སུམ་ཚོགས་པ་ནི་རྣམ་པ་བཞི་སྟེ། ཐམས་ཅད་མཁྱེན་པ་དང༌། རྣམ་པ་ཐམས་ཅད་མཁྱེན་པ་དང༌། མ་བསྟན་པ་མཁྱེན་པ་དང༌། འབད་པ་མེད་པར་མཁྱེན་པའོ། །དེ་ལ་ཐམས་ཅད་མཁྱེན་པ་ནི་ཤེས་བྱ་མཐའ་ཡས་པའི་རང་གི་མཚན་ཉིད་རྟོགས་པའི་དོན་གྱིས་རིག་པར་བྱའོ། །རྣམ་པ་ཐམས་ཅད་མཁྱེན་པའི་རྒྱུ་དང་འགྲོ་བ་དང་མཚུངས་པར་ལྡན་པ་དང༌། མཚུངས་པར་ལྡན་པ་མ་ཡིན་པ་དང༌། དགེ་བ་དང༌། མི་དགེ་བ་དང༌། ལུང་དུ་མ་བསྟན་པ་དང༌། སྡུག་བསྔལ་བ་དང༌། ཀུན་འབྱུང་བ་དང༌། འགོག་པ་དང༌། ལམ་དང༌། མཐོང་བ་དང་བསྒོམ་པས་སྤང་པར་བྱ་བ་དང༌། ཐོགས་པ་དང་བཅས་པ་ལ་སོགས་པའི་རྣམ་པ་ཐུགས་སུ་ཆུད་པའི་དོན་གྱིས་ཡིན་ནོ། །མ་བསྟན་པར་མཁྱེན་པ་ནི་རང་ཉིད་ཀྱིས་མངོན་པར་རྫོགས་པར་བྱང་ཆུབ་པའི་དོན་གྱིས་ཡིན་ནོ། །འབད་པ་མེད་པར་མཁྱེན་པ་ནི་རྩོལ་བ་མི་མངའ་བ་ཉིད་ཀྱི་ཕྱིར་ཏེ། བཞེད་པ་ཙམ་ལ་རག་ལུས་པའི་ཕྱིར་རོ། །དེ་ལ་ཡེ་ཤེས་ཕུན་སུམ་ཚོགས་པ་རྣམ་པ་གསུམ་ནི་ཉན་ཐོས་དང་རང་སངས་རྒྱས་དང་ཐུན་མོང་མ་ཡིན་པར་རིག་པར་བྱ་སྟེ། འདི་ལྟར་ཉན་ཐོས་དང་རང་སངས་རྒྱས་ནི་ཐམས་ཅད་མཁྱེན་པ་མ་ཡིན། རྣམ་པ་ཐམས་ཅད་ཤེས་པ་མ་ཡིན། འབད་པ་མེད་པར་ཤེས་པ་མ་ཡིན་ནོ། །མ་བསྟན་པར་མཁྱེན་པ་ཕུན་སུམ་ཚོགས་པ་ནི་ཉན་ཐོས་ཁོ་ན་དང་ཐུན་མོང་མ་ཡིན་པ་ཡིན་པར་བལྟ་བར་བྱའོ། །དེ་ལྟར་བྱས་ན་ཉན་ཐོས་ནི་ཐམས་ཅད་ཤེས་པ་མ་ཡིན། རྣམ་པ་ཐམས་ཅད་ཤེས་པ་མ་ཡིན་འབད་པ་མེད་པ་མ་ཡིན། མ་བསྟན་པར་མ་ཡིན་ནོ།། རང་སངས་རྒྱས་ནི་ཐམས་ཅད་ཤེས་པ་མ་ཡིན། རྣམ་པ་ཐམས་ཅད་ཤེས་པ་མ་ཡིན། འབད་པ་མེད་པར་མ་ཡིན་ནོ། །སངས་རྒྱས་བཅོམ་ལྡན་འདས་ནི་ཐམས་ཅད་མཁྱེན་པ་ཡིན། རྣམ་པ་ཐམས་ཅད་དང༌། མ་བསྟན་པ་དང༌། འབད་པ་མེད་པར་ཡང་མཁྱེན་པ་ཡིན་ནོ། །དེ་ཉིད་ཀྱི་ཕྱིར་ཐོགས་པ་མེད་པའི་དོན་གྱིས་ཡེ་ཤེས་སྟོབས་ཅན་ནི་སངས་རྒྱས་བཅོམ་ལྡན་འདས་ཀྱི་ཡིན་ནོ་ཞེས་བཤད་དོ། །དེ་ཡང་དམིགས་པའི་བྱེ་བྲག་གིས་ནི་སྟོབས་བཅུ་ཡིན་ཏེ། གནས་དང་གནས་མ་ཡིན་པ་མཁྱེན་པའི་སྟོབས་དང༌། ལས་ཀྱི་རྣམ་པར་སྨིན་པ་མཁྱེན་པའི་སྟོབས་དང༌། བསམ་གཏན་དང་རྣམ་པར་ཐར་པ་དང༌། ཏིང་
དེ་འཛིན་དང་སྙོམས་པར་འཇུག་པ་མཁྱེན་པའི་སྟོབས་དང༌། དབང་པོ་མཆོག་དང༌། མཆོག་མ་ཡིན་པ་མཁྱེན་པའི་སྟོབས་དང༌། མོས་པ་སྣ་ཚོགས་མཁྱེན་པའི་སྟོབས་དང༌། ཐམས་ཅད་དུ་འགྲོ་བའི་ལམ་མཁྱེན་པའི་སྟོབས་དང༌། སྔོན་གྱི་གནས་རྗེས་སུ་དྲན་པ་མཁྱེན་པའི་སྟོབས་དང༌། འཆི་འཕོ་དང་སྐྱེ་བ་མཁྱེན་པའི་སྟོབས་དང༌། ཟག་པ་ཟད་པ་མཁྱེན་པའི་སྟོབས་ཏེ་འཇིགས་པ་མི་མངའ་བའི་དོན་གྱིས་ན་ཆོས་ཐམས་ཅད་མངོན་བར་རྫོགས་པར་བྱང་ཆུབ་པ་ལ་མི་འཇིགས་པ་ཡིན་ཏེ། སྟོབས་རྣམ་པར་སྤྲོས་པ་ནི་མདོ་སྡེའི་རྒྱུད་ལས་ཇི་ལྟ་བ་བཞིན་དུ་ཁོང་དུ་ཆུད་པར་བྱའོ། །སྤངས་པ་ཕུན་སུམ་ཚོགས་པ་ཡང་རྣམ་པ་བཞི་སྟེ། ཉོན་མོངས་པ་ཐམས་ཅད་སྤངས་པ་དང༌། གཏན་དུ་སྤངས་པ་དང༌། བག་ལ་ཉལ་དང་བཅས་ཏེ་སྤངས་པ་དང༌། ཏིང་ངེ་འཛིན་དང་སྙོམས་པར་འཇུག་པའི་སྒྲིབ་བ་ཐམས་ཅད་སྤངས་པའོ། །དེ་ལ་ཉོན་མོངས་པའི་སྒྲིབ་པ་ཐམས་ཅད་སྤངས་པ་ནི་མཐོང་བ་དང་བསྒོམ་པས་སྤང་བར་བྱ་བའི་ཉོན་མངས་པ་སྤངས་པར་རིག་པར་བྱའོ། །གཏན་དུ་སྤངས་པ་ནི་ཡོངས་སུ་མི་ཉམས་པ་ཡིན་ཏེ། ཇི་སྐད་དུ་བཅོམ་ལྡན་འདས་ཀྱིས་དགེ་སློང་དག་དེ་ནི་གང་འཕགས་པའི་ཤེས་རབ་ཀྱིས་ཡོངས་སུ་སྤངས་པ་ཡིན་ནོ་ཞེས་གསུངས་སོ། །འདི་ཉིད་ཚིག་གི་རྒྱན་གྱི་སྒོ་ནས་གནས་བརྟན་རྟ་དབྱངས་ཀྱིས་ཀྱང༌། ས་ནི་བསྲེགས་ནའང་དེ་ནས་ཡང་ཡང་སྐྱེ། །ཤིང་ནི་བཅད་ན་ཡང་ལོ་མ་སྐྱེ་བར་འགྱུར། །ཆུ་ནི་སྐམས་ནའང་ཀླུང་ནི་འབབ་འགྱུར་གྱི། །ཤེས་རབ་མཚོན་གྱིས་ཁྱོད་སྐྱོན་བཅད་འབྱུང་མེད། །ཅེས་སྨྲས་སོ། །བག་ཆགས་དང་བཅས་ཏེ་སྤངས་པ་ནི་ཉོན་མོངས་པའི་བྱ་བ་བྱེད་པ་རྗེས་སུ་འཇུག་པའི་འདུ་བྱེད་སྤངས་པའི་ཕྱིར་རོ། །ཏིང་ངེ་འཛིན་དང་སྙོམས་པར་འཇུག་པའི་སྒྲིབ་པ་ཐམས་ཅད་སྤངས་པ་ནི་ཡོན་ཏན་ཁྱད་པར་ཅན་མ་ལུས་པ་མངོན་པར་བསྒྲུབ་པའི་གེགས་སུ་གྱུར་པ་སྟེ། ཉེ་བའི་ཉོན་མོངས་པ་དང་མི་ཤེས་པ་སྤངས་པའི་ཕྱིར་རོ། །འདིར་མུ་བཞིར་འགྱུར་ཏེ། ཉོན་མོངས་པ་ཐམས་ཅད་སྤངས་ལ་གཏན་དུ་སྤངས་པ་མ་ཡིན་པ་ཡང་ཡོད་དེ། །དཔེར་ན་ཡོངས་སུ་ཉམས་པའི་ཆོས་ཉན་གྱི་དགྲ་བཅོམ་པ་ལྟ་བུའོ། །གཏན་དུ་སྤངས་བ་ཡིན་ལ་ཉོན་མོངས་པ་ཐམས་ཅད་སྤངས་པ་མ་ཡིན་པ་ཡང་ཡོད་དེ། དཔེར་ན་ཐོག་མའི་འབྲས་བུས་བསྡུས་པའི་སྤངས་པ་ལྟ་བུའོ། །ཉོན་མོངས་པ་ཐམས་ཅད་སྤངས་པ་གཏན་དུ་སྤངས་པ་ཡིན་པ་ཡང་ཡོད་དེ།
དཔེར་ན་མི་འཁྲུགས་པའི་ཆོས་ཅན་གྱི་ལྟ་བུའོ། །ཉོན་མོངས་པ་ཐམས་ཅད་སྤངས་པ་མ་ཡིན་གཏན་དུ་སྤངས་པ་མ་ཡིན་པ་ཡང་ཡོད་དེ། དཔེར་ན་འཇིག་རྟེན་པའི་སྤངས་པ་ལྟ་བུའོ། །རེ་ཞིག་གང་ཉོན་མོངས་པ་ཐམས་ཅད་སྤངས་པ་ཡིན་ལ་བག་ཆགས་དང་བཅས་ཏེ་སྤངས་པ་མ་ཡིན་པ་ཡང་ཡོད་དེ། དཔེར་ན་དགྲ་བཅོམ་པ་དང་རང་སངས་རྒྱས་ཀྱི་ལྟ་བུའོ། །དེ་བཞིན་དུ་གང་བག་ཆགས་དང་བཅས་ཏེ་སྤངས་པ་དང༌། གཏན་དུ་སྤངས་པ་ཡང་དེ་ཡིན་ཏེ། དཔེར་ན་སངས་རྒྱས་བཅོམ་ལྡན་འདས་ཀྱི་ལྟ་བུའོ། །གཏན་དུ་སྤངས་པ་ཡིན་ལ། བག་ཆགས་དང་བཅས་ཏེ་སྤངས་པ་མ་ཡིན་པ་ནི་དཔེར་ན་མི་འཁྲུགས་པའི་ཆོས་ཅན་དང༌། རང་སངས་རྒྱས་ཀྱི་ལྟ་བུའོ། །གང་ཏིང་ངེ་འཛིན་དང་སྙོམས་པར་འཇུག་པའི་སྒྲིབ་པ་ཐམས་ཅད་སྤངས་པ་དང༌། ཉོན་མོངས་པ་ཐམས་ཅད་སྤངས་པ་དང༌། གཏན་དུ་སྤངས་པ་དང༌། བག་ཆགས་དང་བཅས་ཏེ་སྤངས་པ་ཡང་དེ་ཡིན་པ་ནི། དཔེར་ན་སངས་རྒྱས་བཅོམ་ལྡན་འདས་ཀྱི་ལྟ་བུའོ། །ཉན་ཐོས་དང་རང་སངས་རྒྱས་དག་ལ་ཏིང་ངེ་འཛིན་དང་སྙོམས་པར་འཇུག་པའི་སྒྲིབ་པ་མ་ལུས་པར་ཡོད་པ་མ་ཡིན་ཏེ། སངས་རྒྱས་ཀྱི་ཏིང་ངེ་འཛིན་དང་སྙོམས་པར་འཇུག་པ་མ་ཐོབ་པའི་ཕྱིར་རོ། །ཉོན་མོངས་པ་ཐམས་ཅད་སྤངས་ལ་གཏན་དུ་སྤངས་པ་ཡིན་ཡང་ཏིང་ངེ་འཛིན་དན་སྙོམས་པར་འཇུག་པའི་སྒྲིབ་པ་ཐམས་ཅད་སྤངས་པ་མ་ཡིན་པ་ཡང་ཡོད་དེ། དཔེར་ན་མི་འཁྲུགས་པའི་ཆོས་ཅན་དང༌། རང་སངས་རྒྱས་ཀྱི་ལྟ་བུའོ། །གང་བག་ཆགས་དང་བཅས་ཏེ་སྤངས་ལ་སྙོམས་པར་འཇུག་པའི་སྒྲིབ་པ་སྤངས་པ་ཡང་དེ་ཡིན་པ་ནི་སངས་རྒྱས་ཁོ་ན་ཡིན་ཏེ་དེ་ལ་མངའ་བའི་ཕྱིར་རོ། །སྤངས་པ་རྣམས་བསྡོམས་ནས་དེ་སྐད་སྨྲས་པ་ཡིན་གྱི། ཉོན་མོངས་པ་ཐམས་ཅད་སྤངས་པ་ཡང་གཞན་ཡིན་ལ། ཏིང་ངེ་འཛིན་དང༌། སྙོམས་པར་འཇུག་པའི་སྒྲིབ་པ་ཐམས་ཅད་སྤངས་པ་ཡང་གཞན་ཡིན་ནོ། །དེ་ལྟར་བྱས་ན་ཉན་ཐོས་དང་རང་སངས་རྒྱས་གཉིས་ལ་ནི་ཉོན་མོངས་པ་ཐམས་ཅད་སྤངས་པ་ཡང་ཡོད་གཏན་དུ་སྤངས་པ་ཡང་ཡོད་མོད་ཀྱི། བག་ཆགས་དང་བཅས་ཏེ་སྤངས་པ་དང༌། ཏིང་ངེ་འཛིན་དང་སྙོམས་པར་འཇུག་པའི་སྒྲིབ་པ་ཐམས་ཅད་སྤངས་པ་ནི་མ་ཡིན་ནོ། །སངས་རྒྱས་བཅོམ་ལྡན་འདས་རྣམས་ནི་ཉོན་མོངས་པ་ཐམས་ཅད་སྤངས་པ་དང༌། གཏན་དུ་སྤངས་པ་དང་བག་ཆགས་དང་བཅས་ཏེ་སྤངས་པ་དང་སྙོམས་པར་འཇུག་པའི་
སྒྲིབ་པ་ཐམས་ཅད་སྤངས་པ་ཡང་ཡིན་ནོ་ཞེས་བྱ་བ་ནི་སྤངས་པ་ཕུན་སུམ་ཚོགས་པ་བསྟན་པ་ཡིན་ནོ། །ཐུགས་རྗེ་ཕུན་སུམ་ཚོགས་པ་ནི་རྣམ་པ་བཞི་སྟེ། དགོངས་པ་ཕུན་སུམ་ཚོགས་པ་དང༌། སྦྱོར་བ་ཕུན་སུམ་ཚོགས་པ་དང༌། དགོངས་པའི་རབ་ཏུ་དབྱེ་བ་ཕུན་སུམ་ཚོགས་པ་དང༌། སྦྱོར་བའི་རབ་ཏུ་དབྱེ་བ་ཕུན་སུམ་ཚོགས་པའོ། །དེ་ལ་དགོངས་པ་ཕུན་སུམ་ཚོགས་པ་ནི། རྟག་ཏུ་ཐུགས་རྗེ་དང༌། དགེ་བར་དགོངས་པའི་ཕྱིར་རོ། །སྦྱོར་བ་ཕུན་སུམ་ཚོགས་པ་ནི་གཞན་གྱི་དོན་དུ་མཆོག་ལ་བརྩོན་པ་དང༌། དགེ་བ་ཉིད་ཡིན་པའི་ཕྱིར་རོ། །དགོངས་པའི་རབ་ཏུ་དབྱེ་བ་ཕུན་སུམ་ཚོགས་པ་ནི་ཕན་པར་དགོངས་པ་དང༌། སྐལ་བ་དང་ལྡན་པའི་དུས་སུ་འོང་བའི་ཕྱིར་རོ། །སྦྱོར་བའི་རབ་ཏུ་དབྱེ་བ་ཕུན་སུམ་ཚོགས་པ་ནི་ངན་སོང་གསུམ་ལས་འབྱིན་པའི་སྦྱོར་བ་ཕུན་སུམ་ཚོགས་པ་དང་བདེ་འགྲོ་དང་ཐེག་པ་གསུམ་ལ་རབ་ཏུ་འགོད་པའི་སྦྱོར་བ་ཕུན་སུམ་ཚོགས་པའོ། །དེ་ཡང་ཉན་ཐོས་དང་རང་སངས་རྒྱས་དང་ཐུན་མོང་མ་ཡིན་པ་ནི་བཅོམ་ལྡན་འདས་ཀྱི་ཐུགས་རྗེ་ཆེན་པོ་ཉིད་ཡིན་པར་བསྟན་ཏོ། །དེ་ཉིད་ཀྱི་ཕྱིར་རྣམ་པ་ཐམས་ཅད་དང་ལྡན་པའི་ཕྱིར་ཐུགས་རྗེ་ཕུན་སུམ་ཚོགས་པ་ཞེས་བྱའོ། །མི་ཟད་པ་ཕུན་སུམ་ཚོགས་པ་ཡང་རྣམ་པ་བཞིའོ། །ཇི་ལྟ་ཞེ་ན་ཟད་པ་ནི་རྣམ་པ་བཞི་སྟེ། མ་རྫོགས་པར་ཟད་པ་དང༌། རྫོགས་ཏེ་ཟད་པ་དང༌། དུས་ལ་མ་བབ་པར་དུས་ཟད་པ་དང༌། རང་གི་མཚན་ཉིད་ཟད་པའོ། །ཇི་སྐད་དུ་རྒ་ཤིའི་ཡན་ལག་རྣམ་པར་མ་ཕྱེ་བར་ཉམས་པ་དང༌། ཚེ་ཉམས་པ་དང་དྲོད་ཉམས་པ་དང༌། སྲོག་གི་དབང་པོ་འགགས་པ་དང༌། འཆི་བ་དང་དུས་བྱེད་པ་དང་ཞིགས་པ་དང༌། ནང་དུ་ཉམས་པའོ། །དེ་དག་ལས་བཟློག་པ་ནི་མི་ཟད་པ་རྣམ་པ་བཞིར་རིག་པར་བྱའོ། །དེ་ཉིད་ཀྱི་ཕྱིར་རྣམ་པ་ཐམས་ཅད་དང་ལྡན་པའི་ཕྱིར་མི་ཟད་པ་ཉིད་ཕུན་སུམ་ཚོགས་པ་ཞེས་བྱའོ། །ཉན་ཐོས་དང་རང་སངས་རྒྱས་རྣམས་ལ་ཡང་མི་ཟད་པ་ཕུན་སུམ་ཚོགས་པར་འདོད་མོད་ཀྱི། དེ་ནི་དེ་བཞིན་གཤེགས་པའི་མན་ངག་སྔོན་དུ་སོང་བའི་ཕྱིར་དེ་བཞིན་གཤེགས་པའི་མི་ཟད་པ་ཉིད་ཡིན་པར་རྣམ་པར་གཞག་སྟེ། འཁོར་ལོས་སྒྱུར་བའི་འཁོར་ཕུན་སུམ་ཚོགས་པ་རྣམ་པར་གཞག་པ་བཞིན་ནོ། །སྐྱེས་བུ་ཆེན་པོའི་དངོས་པོ་ཕུན་སུམ་ཚོགས་པ་ནི་རྣམ་པ་གཉིས་ཏེ། གཟུགས་ཀྱི་སྐུ་ཕུན་སུམ་ཚོགས་པ་དང་
མཐུ་ཕུན་སུམ་ཚོགས་པའོ། །དེ་ལ་གཟུགས་ཀྱི་སྐུ་ཕུན་སུམ་ཚོགས་པ་ནི་རྣམ་པ་བཞི་སྟེ། མཚན་ཕུན་སུམ་ཚོགས་པ་ནི་སྐྱེས་བུ་ཆེན་པོའི་དངོས་པོ་ཉེ་བར་མཚོན་པར་བྱེད་པ་ཉིད་ཀྱི་ཕྱིར་དང༌། དཔེ་བྱད་བཟང་པོ་ཕུན་སུམ་ཚོགས་པ་ནི་དེ་དཔེ་བྱད་བཟང་བའི་ཕྱིར་དང་སྟོབས་ཕུན་སུམ་ཚོགས་པ་ནི་མཐའ་མེད་པའི་ཡེ་ཤེས་ཀྱི་སྟོབས་བཟོད་པ་ཉིད་ཀྱི་ཕྱིར་དང༌། རྡོ་རྗེའི་སྙིང་པོ་སྐུ་རུས་པ་ཕུན་སུམ་ཚོགས་པ་ནི་ཕས་ཀྱི་རྒོལ་བ་དག་གིས་མི་ཆོམས་པ་ཉིད་ཀྱི་ཕྱིར་རོ། །དེ་དེ་ཡང་སངས་རྒྱས་བཅོམ་ལྡན་འདས་རྣམས་ཀྱི་ནི་འཇིག་རྟེན་པ་ཐམས་ཅད་དང༌། ཉན་ཐོས་དང་རང་སངས་རྒྱས་དང༌། ཐུན་མོང་མ་ཡིན་པ་སྐྱེས་བུ་ཆེན་པོའི་དངོས་པོས་བསྡུས་པ་ནི་སྐུ་ཕུན་སུམ་ཚོགས་པར་རིག་པར་བྱའོ། །འཁོར་ལོས་སྒྱུར་བ་ལ་ཡང་ལུས་ཕུན་སུམ་ཚོགས་པ་ཡོད་པར་འདོད་མོད་ཀྱི། རྣམ་པ་ཐམས་ཅད་དང་ལྡན་པ་མ་ཡིན་པའི་ཕྱིར་སྐྱེས་བུ་ཆེན་པོའི་དངོས་པོ་ཕུན་སུམ་ཚོགས་པ་ཞེས་མི་བྱའོ། །མཐུ་ཕུན་སུམ་ཚོགས་པ་ཡང་རྣམ་པ་བཞི་སྟེ། ཕྱིའི་ཡུལ་སྤྲུལ་པ་དང༌། ཡོངས་སུ་སྒྱུར་བ་དང༌། གནས་པ་ལ་དབང་བ་ཉིད་ཕུན་སུམ་ཚོགས་པ་དང༌། ཚེ་གཏོང་བ་དང༌། གནས་པ་ལ་དབང་བ་ཉིད་ཕུན་སུམ་ཚོགས་པ་དང༌། ནམ་མཁའ་དང་བསྒྲིབས་པ་དང༌། ཐག་རིང་པོར་ཡང་མྱུར་དུ་འགྲོ་བ་དང༌། ཆུང་ངུར་མང་པོ་ཤོང་བར་བྱེད་པ་ལ་དབང་བ་ཕུན་སུམ་ཚོགས་པ་དང༌། རྟག་ཏུ་རྨད་དུ་བྱུང་བའི་ཆོས་རྣམ་པ་སྣ་ཚོགས་ཕུན་སུམ་ཚོགས་པ་སྟེ། ཇི་སྐད་དུ་མདོ་ལས་དེ་བཞིན་གཤེགས་པའི་སྐུ་ལ་རྡུལ་གྱིས་མ་གོས་པ་དང༌། གྲོང་ཁྱེར་དུ་གཤེགས་པའི་ཚེ་སྦྲུམ་མ་རྣམས་བདེ་བར་བཙས་པར་འགྱུར་བ་དང༌། སྨྱོན་པ་རྣམས་དྲན་པ་རྙེད་པ་དང༌། ངན་སོང་གི་སེམས་ཅན་རྣམས་ཚོར་བ་བསྲབས་པ་ལ་སོགས་པ་གསུངས་པ་ཡིན་ནོ། །དེ་ལྟར་བྱས་ན་སངས་རྒྱ་བཅོམ་ལྡན་འདས་ཀྱི་ཆོས་དང་ཟང་ཟིང་ཡོངས་སུ་འཛིན་པ་དང༌། གཞན་གྱི་དོན་མཐའ་དག་མཛད་པར་སྤྱོད་པ་དང༌། དེ་བཞེད་ན་རྟག་ཏུ་བཞུགས་པར་འགྲུབ་པ་ཉིད་དང༌། དེ་སྐྱབས་སུ་འོས་པ་ཉིད་ཀྱིས་བསྟན་པ་ཡིན་ཏེ། ཡེ་ཤེས་ཕུན་སུམ་ཚོགས་པ་ནི་ཆོས་ཀྱི་སྦྱིན་པས་བསྟན་ཏོ། །སྤངས་པ་ཕུན་སུམ་ཚོགས་པ་ནི་ཟང་ཟིང་ཡོངས་སུ་འཛིན་པ་སྟེ། ཡོན་གནས་ཁྱད་པར་ཅན་ཡིན་པའི་ཕྱིར་རོ། །ཐུགས་རྗེ་ཕུན་སུམ་ཚོགས་པ་ནི་གཞན་གྱི་དོན་མཛད་པ་སྤྱོད་པས་ཡོངས་སུ་
བསྟན་ཏོ། །མི་བཟད་པ་ཕུན་སུམ་ཚོགས་པ་ནི་རྟག་ཏུ་བཞུགས་པར་འགྲུབ་པས་སོ། །མཚུངས་པ་མེད་པ་ཕུན་སུམ་ཚོགས་པ་ནི་སྐྱབས་སུ་འོས་པ་གཅིག་པུས་བསྟན་ཏོ། །ཚིགས་སུ་བཅད་པ་འདིར་གསུང་རབ་མཐའ་དག་བླངས་ཤིང་ཀུན་དུ་བླངས་ཤིང་བཤད་པར་ནུས་མོད་ཀྱི་ཤིན་ཏུ་འཕྲོས་པ་ཡིན་པས་བཞག་གོ །ཆོས་ལ་བསྟོད་པས་ཡོན་ཏན་ཕུན་སུམ་ཚོགས་པ་རྣམ་པ་རྔ་བསྟན་ཏེ། འདིར་ཆོས་རྣམ་པ་གསུམ་གྱིས་བསྟོད་པ་ལ། འབྲས་བུའི་ཆོས་ནི་མྱ་ངན་ལས་འདས་པའོ། །སྒྲུབ་པའི་ཆོས་ནི་ལམ་མོ། །བཤད་པའི་ཆོས་ནི་མདོ་སྡེ་ལ་སོགས་པའོ། །དེ་ལ་ཤི་བ་ཞེས་བྱ་བའི་ཚིག་གིས་དང་པོའི་ནི་སྡུག་བསྔལ་དང་ཀུན་འབྱུང་བ་དང་བྲལ་བ་དང་བྲལ་བ་ཕུན་སུམ་ཚོགས་པ་སྟེ། རྒྱུ་དང་བཅས་པའི་སྡུག་བསྔལ་ཐམས་ཅད་ཉེ་བར་ཞི་བའི་མཚན་ཉིད་ཡིན་པའི་ཕྱིར་རོ། །གནས་ཞེས་བྱ་བས་ནི་རྟག་པ་ཉིད་ཕུན་སུམ་ཚོགས་པ་ཡིན་ཏེ། དེ་ཁོ་ན་ཉིད་ལས་མི་བསྐྱོད་པའི་དོན་གྱིས་སོ། །ལམ་གྱིས་ཞེས་བྱ་བ་སྒྲུབ་པའི་ཆོས་ཀྱིས་ནི་ཐོབ་པར་བྱེད་པའི་ཡོན་ཏན་ཕུན་སུམ་ཚོགས་པའོ། །ལམ་གྱི་ཆེད་དུ་བྱས་ཞེས་བྱ་བ་གསུམ་པས་ནི་དེ་གསལ་བར་བྱེད་པའི་ཡོན་ཏན་ཕུན་སུམ་ཚོགས་པའོ། །ལམ་གྱི་ཆེད་དུ་བྱས་པ་ནི་ལམ་གྱི་ཆེད་དུ་གང་ཡིན་པ་སྟེ། བཤད་པའི་ཆོས་སོ། །ཡང་གསུམ་པའི་ནི་དེ་ལ་དམིགས་པའི་ཡེ་ཤེས་འཁོར་བ་དང་མི་མཐུན་པ་ཉིད་ཡོན་ཏན་ཕུན་སུམ་ཚོགས་པའོ། །གང་ཞིག་རབ་ཏུ་རྟོགས་པས་ས་གསུམ་འདི་དག་ཏུ། །འཁོར་ལོ་བཞིན་དུ་འགྲོ་བ་འདི་དག་འཁོར་བ་མེད། །ཅེས་བྱ་བས་ཕྱིན་ཅི་ལོག་པར་བཤད་པའི་དོན་རྟོགས་པའི་སྟོབས་ཀྱིས། མྱ་ངན་ལས་འདས་པ་ལ་ཞི་བར་མཐོང་བ་དང༌། ལམ་ལ་ལམ་དུ་འདུ་ཤེས་པའི་རིམ་གྱིས་འཁོར་བ་ལས་ལྡོག་པར་འགྱུར་རོ། །དེ་ལ་འབྲས་བུའི་ཆོས་ནི་ཞི་བ་ཉིད་རྣམ་པ་བདུན་གྱིས་རིག་པར་བྱ་སྟེ། སྐྱེ་བའི་སྡུག་བསྔལ་ཞི་བ་ཉིད་དང༌། རྒ་བའི་སྡུག་བསྔལ་ཞི་བ་ཉིད་དང༌། འཆི་བའི་སྡུག་བསྔལ་ཞི་བ་ཉིད་དང༌། ཕྲད་པའི་སྡུག་བསྔལ་ཞི་བ་ཉིད་དང༌། བྲལ་བའི་སྡུག་བསྔལ་ཞི་བ་ཉིད་དང༌། འདོད་པ་མ་འབྱོར་པའི་སྡུག་བསྔལ་ཞི་བ་ཉིད་དང༌། ཕུང་པོའི་སྡུག་བསྔལ་ཞི་བ་ཉིད་དོ། །ཇི་སྐད་དུ་བཅོམ་ལྡན་འདས་ཀྱིས་སྐྱེ་བ་ནི་སྡུག་བསྔལ་བའོ། །འཆི་བ་ནི་སྡུག་བསྔལ་བའོ།།
མི་སྡུག་པ་དང་ཕྲད་པ་ནི་སྡུག་བསྔལ་བའོ། །སྡུག་པ་དང་བྲལ་བ་ནི་སྡུག་བསྔལ་བའོ། །གང་འདོད་པ་བཙལ་ཏེ་མ་རྙེད་པ་དེ་ཡང་སྡུག་བསྔལ་བའོ། །མདོར་ན་ཉེ་བར་ལེན་པའི་ཕུང་པོ་ནི་སྡུག་བསྔལ་བ་ཞེས་གསུངས་ཏེ། དེ་དག་གི་བཤད་པ་ནི་རྣལ་འབྱོར་སྤྱོད་པའི་ས་ལས་བལྟ་བར་བྱའོ། །མི་རྟག་པ་རྣམ་པ་བཞིའི་གཉེན་པོར་རྟག་པ་བཞིར་རིག་པར་བྱའོ། །མི་རྟག་པ་ཉིད་རྣམ་པ་བཞི་གང་ཞེ་ན། སྩོགས་པ་མི་རྟག་པ་ཉིད་དང༌། ལུས་མི་རྟག་པ་ཉིད་དང༌། ཕྲད་པ་མི་རྟག་པ་ཉིད་དང༌། འཆི་བ་མི་རྟག་པ་ཉིད་དོ། །ཇི་སྐད་དུ་བཅོམ་ལྡན་འདས་ཀྱིས། སྩོགས་པ་དག་ནི་མཐར་ཟད་འགྱུར། །ལུས་ནི་ཐ་མར་འཇིག་པར་འགྱུར། །འདུ་བ་ཐ་མར་བྲལ་བར་འགྱུར། །སྲོག་ནི་ཐ་མར་འཆི་བར་འགྱུར། །ཞེས་གསུངས་སོ། །མྱ་ངན་ལས་འདས་པ་ལ་ནི་སྩོགས་པ་དང༌། ལུས། སྡུག་པ་དང་ཕྲད་པ་དང་སྲོག་གང་མི་རྟག་པར་འགྱུར་བ་རྣམས་ཡོད་པ་མ་ཡིན་ནོ། །སྒྲུབ་པའི་ཆོས་ཀྱི་ཡང་རྣམ་པ་བཞི་སྟེ། དེ་ཐོབ་པར་བྱེད་པ་ཉིད་ཕུན་སུམ་ཚོགས་པ་ཡོན་པོ་མ་ཡིན་པ་ཕུན་སུམ་ཚོགས་པ་དང༌། རྒྱུན་མི་འཆད་པ་ཉིད་ཕུན་སུམ་ཚོགས་པ་དང༌། གནོད་པ་མེད་པ་ཉིད་ཕུན་སུམ་ཚོགས་པ་དང༌། ཉེ་བར་སྟོན་པ་ཕུན་སུམ་ཚོགས་པའོ། །དེ་ལ་འདི་ནི་ཡོན་པོ་མ་ཡིན་པ་ཉིད་ཕུན་སུམ་ཚོགས་པ་སྟེ། གང་མྱ་ངན་ལས་འདས་པའི་གྲོང་ཁྱེར་ཉིད་ཕྱིན་པར་བྱེད་པ་ཡིན་གྱི། འཁོར་བའི་གྲོང་ཁྱེར་དུ་མ་ཡིན་པའོ། །རྒྱུན་མི་འཆད་པ་ཕུན་སུམ་ཚོགས་པ་ནི་མྱ་ངན་འདས་པ་དང་འབྲེལ་བའི་ཕྱིར་ཏེ། བར་ཆད་པ་མ་ཡིན་ཞིང་མི་འགྱུར་བས་སོ། །གནོད་པ་མེད་པ་ཉིད་ཕུན་སུམ་ཚོགས་པ་ནི་འདོད་ཆགས་ལ་སོགས་པའི་ཆོམ་པོས་མི་འཕྲོག་པའི་ཕྱིར་རོ། །ཉེ་བར་སྟོན་པ་ཕུན་སུམ་ཚོགས་པ་ནི་ཆོས་ལ་དགའ་བའི་ཟས་དང་ལྡན་པའི་ཕྱིར་རོ། །བཤད་པའི་ཆོས་ལམ་གྱི་ཆོས་གསལ་བར་བྱེད་པ་ཡང་རྣམ་པ་བཞི་སྟེ། ཉེ་བར་ཉན་པ་ཉིད་དང༌། ངེས་པར་བྱེད་པ་དང༌། དེའི་ཚོགས་གསལ་བར་བྱེད་པ་དང༌། སྒྲིབ་པ་རྣམས་རབ་ཏུ་ཉེ་བར་སྟོན་པའོ། །བཤད་པའི་ཆོས་ཀྱི་བྱ་བ་ནི་འདི་དག་ཙམ་དུ་ཟད་དེ། འདི་ལ་སྟེ་འདི་ནི་ལམ་ཡིན་ནོ་ཞེས་ཡང་དག་པར་ཉན་པ་དང༌། འདི་ཉིད་ལམ་ཡིན་གྱི་གཞན་མ་ཡིན་ནོ་ཞེས་ངེས་པར་བྱེད་པ་དང༌། འདི་ནི་ལམ་གྱི་རྒྱུ་ཡིན་ནོ་ཞེས་དེའི་ཚོགས་གསལ་བར་བྱེད་པ་དང༌། འདི་ནི་ལམ་གྱི་གགས་བྱེད་པ་ཡིན་ནོ་ཞེས་སྒྲིབ་པ་རབ་ཏུ་ཉེ་
བར་སྟོན་པའོ། །དེ་ལ་ལམ་གྱི་ཚོགས་ནི་དྲན་པ་ཉེ་བར་གཞག་པ་ལ་སོགས་པ་ཡིན་པར་རིག་པར་བྱའོ། །ལམ་གྱི་སྒྲིབ་པ་ནི་ངན་སོང་བར་ངེས་པའི་ལས་ཚང་བར་ཡོད་པ་དང༌། ཉོན་མོངས་པ་དྲག་པོ་ཀུན་དུ་འབྱུང་བ་དང༌། ངན་འགྲོ་དང༌། བྱང་གི་སྒྲ་མི་སྙན་པ་དང༌། འདུ་ཤེས་མེད་པའི་སེམས་ཅན་རྣམས་ཏེ། དེ་དག་རྣམས་ནི་ཉོན་མོངས་པ་དང༌། ལས་དང་ཚེའི་སྒྲིབ་པ་རྣམས་ཡིན་པར་ཇི་ལྟར་རིག་པར་བྱའོ། །དེ་ལ་དམིགས་པའི་ཤེས་པ་འཁོར་བ་དང་མི་མཐུན་པ་ཉིད་ཕུན་སུམ་ཚོགས་པ་ཡང་རྣམ་པ་གསུམ་སྟེ། རྣམ་པར་རྨོངས་པ་དང་མི་མཐུན་པ་དང༌། དེའི་རྒྱུ་ཀུན་དུ་འབྱུང་བ་དང་མི་མཐུན་པ་དང༌། དེ་ཤིན་ཏུ་ཀུན་ཏུ་འབྱུང་བ་དང་མི་མཐུན་པའོ། །དེ་ལ་དམིགས་པའི་ཤེས་པ་ཡང་གསུམ་སྟེ། མཉན་པ་ལས་བྱུང་བ་དང༌། བསམ་པ་ལས་བྱུང་བ་དང༌། བསྒོམ་པ་ལས་བྱུང་བའོ། །དེ་ལ་བསྒོམ་པ་ལས་བྱུང་བ་ཡང་ཟག་པ་དང་བཅས་པ་དང༌། ཟག་པ་མེད་པའོ། །མཉན་པ་ལས་བྱུང་བ་དང་བསམ་པ་ལས་བྱུང་བ་ནི་འཁོར་བའི་རྒྱུ་ལ་རྨོངས་པ་དང་མི་མཐུན་པ་ཉིད་ཀྱིས་ནི་མྱ་ངན་ལས་འདས་པ་ལ་ཞི་བར་མཐོང་བ་ཡིན་གྱི། འཁོར་བ་ལ་ནི་མ་ཡིན་ནོ། །ལམ་ལ་ལམ་གྱི་འདུ་ཤེས་སུ་འགྱུར་གྱི། ལམ་མ་ཡིན་པ་ལ་ནི་མ་ཡིན་ནོ། །ལེགས་པར་གསུངས་པ་ལ་ལེགས་པར་གསུངས་པའི་འདུ་ཤེས་འབྱུང་གི །ཉེས་པར་བཤད་པ་ལ་ནི་མ་ཡིན་ནོ། །བསྒོམ་པ་ལས་བྱུང་བ་ཟག་པ་དང་བཅས་པ་ནི་འཁོར་བའི་རྒྱུ་ཉོན་མོངས་པ་དང་ཉེ་བའི་ཉོན་མོངས་པའི་ས་བོན་ཀུན་དུ་འཇོམས་པའི་ཚུལ་གྱིས་ཀུན་དུ་འབྱུང་བ་དང་མི་མཐུན་པ་ཡིན་ནོ། །ཟག་པ་མེད་པ་ནི་དེའི་བག་ལ་ཉལ་རྩ་ནས་འབྱིན་པར་བྱེད་པ་ནི་དེ་དང་ཤིན་ཏུ་མི་མཐུན་པ་ཡིན་ནོ། །དགེ་འདུན་ལ་བསྟོད་པས་ཀྱང་ཡོན་ཏན་ཕུན་སུམ་ཚོགས་པ་རྣམ་པ་ལྔ་བསྟན་ཏེ། མཐོང་བ་དང་བསྒོམ་པས་སྤང་བར་བྱ་བའི་ཉོན་མོངས་པའི་འཆིང་བ་ལས་གྲོལ་བ་ཉིད་དང་མང་པོ་གཞན་དང་གཞན་དག་ལས་ཁྱད་པར་འཕགས་པ་ཉིད་དང༌། ཡན་ལག་བཅུ་དང་ལྡན་པ་ཉིད་དང༌། ཡན་ལག་བརྒྱད་དང་ལྡན་པ་ཉིད་དང༌། དབྱེ་བ་རྣམ་པ་བརྒྱད་ཡིན་ནོ། །དེ་ལ་ཆགས་པ་ལས་འདས་ཞེས་བྱ་བའི་ཚིག་གིས་འབྲས་བུའི་ཆོས་ལ་གནས་པ་བསྟན་ཏེ། དེ་ལྟ་མ་ཡིན་ན་འདས་པར་མི་རུང་ངོ༌། །ཚོགས་པ་དག་ལས་ཤིན་ཏུ་འདས་གྱུར་ནས། །ཞེས་བྱ་བའི་ཚིག་གིས་ནི་སྒྲུབ་པའི་ཆོས་དང་བཤད་པའི་
ཆོས་ལ་གནས་པ་ཡིན་པར་བསྟན་ཏེ། དེ་ལྟ་ཡིན་ན་ནི་དེ་ལས་འདས་པ་ཡིན་ཏེ། སྒྲུབ་པའི་ཆོས་ལ་གནས་པ་ཡིན་པའི་ཕྱིར་རོ། །བཤད་པའི་ཆོས་གསུངས་པ་བཞིན་དུ་རྗེས་སུ་འབྲངས་ན་ནི་ལེགས་པར་ཞུགས་པ་ཡིན་ནོ། །ཆགས་པ་ལས་འདས་པ་ཡང་རྣམ་པ་བཞི་སྟེ། མཐོང་བས་སྤང་བར་བྱ་བའི་ཉོན་མོངས་པ་མ་ལུས་པ་ལས་འདས་པ་ནི་དཔེར་ན་རྒྱུན་ཏུ་ཞུགས་པ་ལྟ་བུ་སྟེ། སྲིད་པའི་རྩེ་མོ་པའི་ཚོགས་གཞན་དག་ནི་དེ་ལྟ་བུ་མ་ཡིན་ཏེ། མ་སྤངས་པའི་ཕྱིར་རོ། །ཁམས་གསུམ་གྱིས་བསྒོམ་པས་སྤང་བར་བྱ་བའི་ཉོན་མོངས་པ་ལས་འདས་པ་ནི་དཔེར་ན་དགྲ་བཅོམ་པ་ལྟ་བུ་སྟེ། ཚོགས་གཞན་དག་ནི་སྲིད་པའི་རྩེ་མོ་ལས་འདས་པ་མ་ཡིན་ནོ། །ཆགས་པ་ལས་ཤིན་ཏུ་ཡང་དག་པར་འདས་པ་ནི། དཔེར་ན་རྒྱུན་ཏུ་ཞུགས་པའི་འབྲས་བུ་མངོན་དུ་བྱ་བའི་ཕྱིར་འཇུག་པ་ལྟ་བུ་སྟེ། དེ་ལ་ཆགས་པ་ཐམས་ཅད་ལས་ཡང་དག་པར་འདས་པ་ཡོད་པ་མ་ཡིན་པར་འདོད་ཀྱང་ཤིན་ཏུ་འདས་པ་ནི་ཡོད་པ་ཁོ་ན་ཡིན་ནོ། །དེ་འདྲ་བར་ཚོགས་གཞན་དག་ནི་མ་ཡིན་ནོ། །དེའི་རྣམ་པར་སྨིན་པའི་ས་ལས་ཡང་དག་པར་འདས་པ་ཡང་ཡིན་ནོ། །ལན་ཅིག་ཕྱིར་འོང་བ་དང༌། ཕྱིར་མི་འོང་བ་དང༌། དགྲ་བཅོམ་པའི་འབྲས་བུ་ལ་གནས་པ་ཁ་ཅིག་ཡོངས་སུ་ཉམས་སུ་ཟིན་ཀྱང་དེའི་རྣམ་པར་སྨིན་པའི་སར་ཡང་སླར་སྐྱེ་བ་ནི་མ་ཡིན་ཏེ། མཐོང་བའི་ཆོས་ཁོ་ནས་དེ་དག་སྤོང་བར་བྱེད་པའི་ཕྱིར་རོ། །ཇི་སྐད་དུ་འབྲས་བུ་ཉམས་ཏེ་འཆི་བ་མ་ཡིན་ནོ་ཞེས་གསུངས་སོ། །དེ་འདྲ་བར་ཚོགས་གཞན་དག་ནི་མ་ཡིན་ནོ། །ཆགས་པ་ལས་འདས་པ་ཡང་ཚོགས་གཞན་དག་ལས་ཁྱད་པར་དུ་གྱུར་པ་ཉིད་ཡིན་པར་བསྟན་ཏོ། །ལེགས་པར་བཞུགས་པ་ཡང་རྣམ་པ་ལྔ་སྟེ། ཚུལ་ཁྲིམས་ཀྱིས་ནི་འཕགས་པ་དགྱེས་པའི་ཚུལ་ཁྲིམས་དང་ལྡན་པའི་ཕྱིར་དང༌། ཚེ་རབས་གཞན་དུ་ཡང་རྗེས་སུ་འབྲེལ་ལོ། །ཐོས་པས་ནི་ལེགས་པར་གསུངས་པའི་ཆོས་ཐོས་པ་ལས་བྱུང་བའི་ཤེས་པ་དང་ལྡན་པའི་ཕྱིར་རོ། །བསམས་པས་ནི་དེ་ལ་བརྟེན་ན་དགོངས་པ་ཅན་རྣམས་ལ་ངེས་པ་དང་ལྡན་པའི་ཕྱིར་རོ། །བསྒོམས་པས་ནི་བསྒོམ་པའི་ལམ་ཟག་པ་མེད་པ་ཐོབ་བའི་ཕྱིར་རོ། །འབྲས་བུས་ནི་དེའི་འབྲས་བུ་སྤངས་བ་དང་ལྡན་པའི་ཕྱིར་རོ། །དེ་ཡང་མདོར་ན་རྒྱུ་དང་བཅས་འབྲས་བུ་དང་བཅས་པ་ལེགས་པར་སྒྲུབ་པ་ཇི་ལྟར་རིག་པར་བསྟན་ཏོ། །ཡན་ལག་བཅུ་ཞེས་གང་གསུངས་པ་ལ་ཡན་ལག་བཅུ་ནི། ལམ་གྱི་ཡན་ལག་བརྒྱད་དང༌། ཡང་དག་པར་རྣམ་པར་གྲོལ་བ་དང༌།
ཡང་དག་པར་རྣམ་པར་གྲོལ་བའི་ཡེ་ཤེས་མཐོང་བའོ། །དེ་དག་ནི་རྣམ་པར་གཞག་པ་ལ་ཡན་ལག་གཙོ་བོ་ནི་ཡང་དག་བའི་ལྟ་བ་སྟེ། རབ་ཏུ་རྣམ་པར་འབྱེད་པ་གཙོ་བོ་ཡིན་པའི་ཕྱིར་རོ། །མཐོང་བ་དང་བསྒོམ་པ་དང༌། མི་སློབ་བའི་ལམ་གྱི་ཡན་ལག་རྣམས་རབ་ཏུ་སྟོན་པར་བྱེད་པའི་ཡན་ལག་ནི་ཡང་དག་པའི་རྟོག་པ་སྟེ། ཡང་དག་པའི་དག་ཀུན་ནས་བསླད་བའི་ཚིག་གིས་རང་གི་ཁོང་དུ་ཆུད་པ་བརྗོད་པའི་ཕྱིར་ཏེ། སྐྱེ་བ་ཟད་དོ། །ཚངས་པར་སྤྱོད་པ་བསྟེན་ཏོ་ཞེས་བྱ་བ་ཡིན་ནོ། །ཡིད་ཆེས་པར་བྱེད་པའི་ཡན་ལག་ནི་ཡང་དག་བའི་ངག་དང་ལས་ཀྱི་མཐའ་དང་འཚོ་བ་སྟེ། ཡང་དག་པའི་ཚིག་གིས་ནི་འབྲེལ་བའི་གཏམ་རྣམ་པར་ངེས་པར་བྱེད་པ་ན་འཇིག་རྟེན་ལས་འདས་པའི་ཤེས་རབ་ལ་མངོན་པར་ཡིད་ཆེས་པར་འགྱུར་རོ། །ཡང་དག་པའི་ལས་ཀྱི་མཐས་ནི་འཕགས་པ་དགྱེས་པའི་ཚུལ་ཁྲིམས་ལ་མངོན་པར་ཡིད་ཆེས་པར་འགྱུར་ཏེ། སྲོག་གི་ཕྱིར་ཡང་མ་ཡིན་པ་མི་བྱེད་པའི་ཕྱིར་རོ། །ཡང་དག་པའི་འཚོ་བས་ནི་ཡོ་བྱད་བསྙུངས་པ་ལ་ཡིད་ཆེས་པར་འགྱུར་ཏེ། ཆོས་དང་ཚོད་ཟིན་པས་ཆོས་གོས་ལ་སོགས་པ་ཚོལ་བའི་ཕྱིར་རོ། །སྤོང་པའི་ཡན་ལག་ནི་ཡང་དག་པའི་རྩོལ་བ་དང༌། ཡང་དག་པའི་དྲན་པ་དང༌། ཡང་དག་པའི་ཏིང་ངེ་འཛིན་ཏེ། བརྩོན་འགྲུས་བརྩམས་ན་བསྒོམ་པས་སྤང་བར་བྱ་བའི་ཉོན་མོངས་པ་སྤང་བའི་ཕྱིར་རོ། །དྲན་པ་ཉེ་བར་གནས་ན་ཞུམ་པ་དང་རྒོད་པའི་ཉེ་བའི་ཉོན་མོངས་པ་མེད་པའི་ཕྱིར་རོ། །ཏིང་ངེ་འཛིན་ལ་བརྟེན་ན་ཡོན་ཏན་ཁྱད་པར་ཅན་མངོན་པར་སྒྲུབ་པའི་གགས་དང་བྲལ་བའི་ཕྱིར་རོ། །འབྲས་བུའི་ཡན་ལག་ནི་ཡང་དག་པར་གྲོལ་བའོ། །ལམ་གྱི་འབྲས་བུ་ཡང་རྣམ་པར་གཉིས་སུ་རྣམ་པ་གཞག་སྟེ། ཉོན་མོངས་པ་སྤོང་པ་སྟེ་རྣམས་པར་གྲོལ་བ་དང༌། ལྷག་པར་མོས་པའོ། །དེ་ལ་ལྷག་པར་མོས་པ་ནི་མི་སློབ་པའི་ཡན་ལག་ཏུ་རྣམ་པར་གཞག་སྟེ། ཡན་ལག་རྣམས་ཀྱིས་འདུས་བྱས་པ་ཉིད་ཡིན་པའི་ཕྱིར་རོ། །ཡོངས་སུ་གཅོད་པའི་ཡན་ལག་ནི་ཡང་དག་པར་རྣམ་པར་གྲོལ་བའི་ཡེ་ཤེས་མཐོང་བ་སྟེ། རྣམ་པར་གྲོལ་ལོ་སྙམ་དུ་དེས་ཡང་དག་པར་རྣམ་པར་གྲོལ་བ་ཡོངས་སུ་གཅོད་པའི་ཕྱིར་རོ། །དེ་ལྟར་བྱས་ན་མི་སློབ་པའི་དགེ་འདུན་ནི་རིག་པ་དང་ཞབས་སུ་ལྡན་པ་དང་དེའི་འབྲས་བུ་རྣམ་པར་གྲོལ་བ་དང༌། རྣམ་པར་
གྲོལ་བའི་ཡེ་ཤེས་དང་ལྡན་པའི་ཡོན་ཏན་ཕུན་སུམ་ཚོགས་པར་བསྟན་པ་ཡིན་ནོ། །ཡན་ལག་བརྒྱད་དང་ལྡན་པ་ཉིད་ནི་སློབ་པའི་དགེ་འདུན་གྱི་ཡོན་ཏན་ཕུན་སུམ་ཚོགས་པ་ཡིན་ཏེ། རིག་པ་དང་ཞབས་སུ་ལྡན་པའི་ཕྱིར་དང༌། ཡང་དག་པའི་རྣམ་པར་གྲོལ་བ་དང་ཡེ་ཤེས་མཐོང་བ་གཉིས་མེད་པའི་ཕྱིར་རོ། །འཆིང་བ་ལྷག་མ་ལུས་པ་ནི་སློབ་པ་ཡིན་ནོ། །དེ་བས་ན་དེ་དག་ཡང་དག་པའི་རྣམ་པར་གྲོལ་བར་མི་གཞག་སྟེ། འཆིང་བ་ཕྱོགས་གཅིག་ལས་གྲོལ་བ་ནི་གྲོལ་བ་མ་ཡིན་ནོ། །དེ་མེད་པའི་ཕྱིར་རྣམ་པར་གྲོལ་ལོ་སྙམ་པའི་རྣམ་པར་གྲོལ་བའི་ཡེ་ཤེས་མཐོང་བ་མེད་པ་ཡིན་ནོ། །དེ་མངོན་པའི་ང་རྒྱལ་ཅན་གྱི་ཡེ་ཤེས་ཡིན་པར་ཐལ་བར་འགྱུར་བའི་ཕྱིར་རོ། །དབྱེ་བ་བརྒྱད་ནི་གཉི་གའི་ཡོན་ཏན་ཕུན་སུམ་ཚོགས་པ་ཡིན་ཏེ། འབྲས་བུས་ལམ་དང་ལམ་གྱིས་འབྲས་བུའི་བྱེ་བྲག་རབ་ཏུ་སྟོན་པའི་ཕྱིར་རོ། །ཞུགས་པ་བཞི་འབྲས་བུའི་ལམ་གྱི་དབྱེ་བས་དབྱེའོ། །འབྲས་བུའི་ལམ་གྱི་དབྱེ་བ་ཡང་ཉོན་མོངས་པའི་གཉེན་པོ་ཐ་དད་པའི་ཕྱིར་དང་རྒྱུ་བསྩགས་པ་ཐ་དད་པའི་ཕྱིར་རིག་པར་བྱའོ། །རྒྱུན་དུ་ཞུགས་པའི་འབྲས་བུ་མངོན་དུ་བྱ་བའི་ཕྱིར་ཞུགས་པའི་ལམ་ནི་མཐོང་བས་སྤང་བར་བྱ་བའི་ཉོན་མོངས་པའི་གཉེན་པོ་དང༌། མཐོང་བའི་ལམ་ཙམ་གྱི་རྒྱུ་ཉེ་བར་བསྩགས་པ་ཡང་ཡིན་ནོ། །ལན་ཅིག་ཕྱིར་འོང་བའི་འབྲས་བུ་མངོན་དུ་བྱ་བའི་ཕྱིར་ཞུགས་པའི་ལམ་ནི་བསྒོམ་པས་སྤང་བར་བྱ་བ་འདོད་པའི་ཁམས་ན་སྤྱོད་པའི་ཉོན་མོངས་པའི་ཕྱོགས་གཅིག་གི་གཉེན་པོ་དང༌། མཐོང་བ་དང་བསྒོམ་པའི་ལམ་གྱི་རྒྱུ་ཉེ་བར་བསྩགས་པ་ཡང་ཡིན་ནོ། །ཕྱིར་མི་འོང་བའི་འབྲས་བུ་མངོན་དུ་བྱ་བའི་ཕྱིར་ཞུགས་པའི་ལམ་ནི་འདོད་པ་ན་སྤྱོད་པའི་ཉོན་མོངས་པ་བསྒོམ་པས་སྤང་བར་བྱ་བ་མ་ལུས་པའི་གཉེན་པོ་དང༌། མཐོང་བའི་ལམ་གྱི་རྒྱུ་ཉེ་བར་བསྩགས་པ་དང༌། བསྒོམ་པའི་ལམ་གྱི་རྒྱུ་ལྷག་པར་ཉེ་བར་བསྩགས་པ་ཡང་ཡིན་ནོ། །དགྲ་བཅོམ་པའི་འབྲས་བུ་མངོན་དུ་བྱ་བའི་ཕྱིར་ཞུགས་པའི་ལམ་ནི་བསྒོམ་པས་སྤང་བར་བྱ་བའི་གཟུགས་དང་གཟུགས་མེད་པ་ན་སྤྱོད་པའི་ཉོན་མོངས་པའི་གཉེན་པོ་དང༌། མཐོང་བའི་ལམ་གྱི་རྒྱུ་ཉེ་བར་བསྩགས་པ་དང༌། བསྒོམ་པའི་ལམ་གྱི་རྒྱུ་ལྷག་པར་ཉེ་བར་བསགས་པ་ཡང་ཡིན་ཏེ། ལམ་དང་འབྲས་བུའི་བྱེ་བྲག་ནི་སྤངས་བ་ཐ་དད་པའི་ཕྱིར་རོ། །མཐོང་བས་སྤང་བར་བྱ་བའི་ཉོན་མོངས་པ་སྤངས་པ་ནི་རྒྱུན་དུ་ཞུགས་པའི་འབྲས་བུ་ཡིན་ནོ། །དེ་ཉིད་བསྒོམ་པས་སྤང་བར་
བྱ་བ་འདོད་པ་ན་སྤྱོད་པའི་ཉོན་མོངས་པའི་ཕྱོགས་གཅིག་སྤངས་པ་ནི་ལན་ཅིག་ཕྱིར་འོང་བའི་འབྲས་བུ་ཡིན་ནོ། །འདོད་པ་ན་སྤྱོད་པའི་བསྒོམ་པས་སྤང་བར་བྱ་བ་ལྷག་མ་མ་ལུས་པར་སྤངས་པ་ནི་ཕྱིར་མི་འོང་བའི་འབྲས་བུ་ཡིན་ནོ། །དེ་ཉིད་གཟུགས་དང་གཟུགས་མེད་པ་ན་སྤྱོད་པའི་བསྒོམ་པས་སྤང་བར་བྱ་བ་ནི་དགྲ་བཅོམ་པའི་འབྲས་བུ་ཡིན་ནོ། །ཚིགས་སུ་བཅད་པ་འདིར། འཕགས་པའི་གང་ཟག་རྣམ་པར་གཞག་པ་ཐམས་ཅད་བཤད་པར་ནུས་སོ། །རྟེན་ཅིང་འབྲེལ་པར་རབ་ཏུ་འབྱུང་མངོན་པར་བརྗོད་པའི་མདོ། །ཅུང་ཟད་ངེས་པར་བཤད་པ་བདག་ནི་བརྗོད་པར་འདོད། །ཅེས་བྱ་བ་དེ་ལ་དོན་རྗོད་པར་བྱེད་པས་ན་མདོ་སྡེའོ། །ཡང་ན་དོན་སྦྲེངས་པས་ན་མདོ་སྡེ་སྟེ། སྐུད་པ་སྦྲེངས་པ་བཞིན་ཏེ། རྟེན་ཅིང་འབྲེལ་པར་འབྱུང་བ་བརྗོད་པ་ཞེས་བྱ་བའི་དོན་གང་ཡིན་པའོ། །རྟེན་ཅིང་འབྱུང་བ་དང་རྟེན་ཅིང་འབྲེལ་བར་འབྱུང་བའི་སྒྲ་གཉིས་དོན་ཐ་དད་པ་མེད་པས་ཐ་དད་པ་མེད་པ་ཡིན་པའི་ཕྱིར་རྟེན་ཅིང་འབྲེལ་བ་གཞན་ཁོ་ནར་བརྗོད་པ་ནི་རྟེན་ཅིང་འབྲེལ་བར་འབྱུང་བ་གཞན་ཁོ་ན་ཡིན་པའི་ཕྱིར་ཏེ། འདིར་ཕྱིར་ཞེས་བྱ་བ་ཞིག་ཁོང་ནས་དབྱུང་བར་བལྟ་བར་བྱའོ། །དེ་ལྟ་མ་ཡིན་ན་སྒྲའི་ཚིག་གི་དོན་གཅིག་ཏུ་འགྲུབ་པར་མི་འགྱུར་རོ། །ཡང་ན་རྟེན་ཅིང་འབྱུང་བའི་དོན་དེ་བརྗོད་པ་གང་གིས་བརྗོད་པ་གང་རྗོད་པ་དེ་རྟེན་ཅིང་འབྱུང་བ་བརྗོད་པ་ཡིན་ཏེ། དེ་བརྗོད་པ་ནི་མདོ་སྡེ་འདི་ཡིན་ཏེ་འདི་ལྟ་སྟེ་རྟེན་ཅིང་འབྱུང་བ་བརྗོད་པ་ཞེས་བྱ་བ་ཡིན་ཡང་བརྗོད་པའི་སྒྲ་གཅིག་ཁོང་ནས་ཕྱུང་ནས་རྟེན་ཅིང་འབྱུང་བ་བརྗོད་པ་ཞེས་བྱའོ། །དེ་ཉིད་ཀྱི་ཕྱིར་མདོ་སྡེ་སྨོས་ཤིང་དོན་ཀྱང་རྟེན་ཅིང་འབྱུང་བ་བརྗོད་པ་ཡིན་པའི་ཕྱིར་རོ། །ཡང་ན་རྟེན་ཅིང་འབྱུང་བ་དེ་མདོ་སྡེ་གང་གིས་བརྗོད་པ་དེ་ནི་རྟེན་ཅིང་འབྱུང་བ་བརྗོད་པ་ཡིན་ཏེ། རྟེན་ཅིང་འབྱུང་བ་བརྗོད་པའི་ཕྱིར་རོ། །ཡང་ན་རྟེན་ཅིང་འབྱུང་བའི་དོན་གྱི་སྒོ་ནས་བརྗོད་པ་གང་ཡིན་པ་དེ་རྟེན་ཅིང་འབྱུང་བ་བརྗོད་པ་ཡིན་ནོ། །དེ་ལྟར་ན་དོན་གྱི་སྒྲོ་ནས་བརྗོད་པ་ཡིན་ཞེ་ན། སྒོ་དེ་ནས་རྗོད་པར་བྱེད་པའི་ཕྱིར་རོ། །འོག་ནས་ཀྱང་ཡི་གེའི་ཚོགས་ཀྱང་སྐབས་ཀྱི་དོན་བཞིན་གདགས་སོ་ཞེས་འབྱུང་ངོ༌། །ཡང་ན་འདི་ལ་རྗོད་པར་བྱེད་པ་ཡིན་ཏེ་གཞི་ལ་སྒྲུབ་པར་བྱེད་དོ། །མདོ་འདི་ནི་རྟེན་ཅིང་འབྲེལ་བར་འབྱུང་བ་བརྗོད་པ་ཡིན་པས་དེ་རྟེན་ཅིང་འབྱུང་བ་བརྗོད་པ་ཡིན་ཏེ་གཞི་ལ་བརྗོད་པའི་ཕྱིར་རོ། །རྟེན་ཅིང་འབྱུང་བ་མངོན་པར་བརྗོད་པ་སྨོས་པ་ནི་མདོ་གཞན་
གསལ་བའི་ཕྱིར་རོ། །ཅུང་ཟད་ངེས་པར་བཤད་པ་ཞེས་བྱ་བ་ནི་ཕྱོགས་གཅིག་ངེས་པར་བཤད་པ་ཞེས་བྱ་བའི་དོན་གང་ཡིན་པ་སྟེ། སངས་རྒྱས་བཅོམ་ལྡན་འདས་རྣམས་ཀྱིས་མདོའི་དོན་ངེས་པར་བཤད་པ་ནི་མཐའ་ཡས་ཏེ། མདོ་སྡེ་རྣམས་ནི་ཆོས་དང་དོན་དང་ངེས་པའི་ཚིག་དང་སྤོབས་པ་སོ་སོ་ཡང་དག་པའི་རྒྱུ་ལས་བྱུང་བའི་ཕྱིར་རོ། །གཏན་ལ་བབ་པར་སྟོན་པ་ནི་ངེས་པར་བཤད་པ་ཡིན་ཏེ། འདིས་འཆད་པའི་ཕྱིར་བྱེད་པ་ལ་སྒྲུབ་པོ། །བདག་ནི་བརྗོད་པར་འདོད་ཅེས་བྱ་བ་ནི་སྨྲ་བར་བདག་འདོད་ཅེས་བྱ་བའི་ཐ་ཚིག་གོ །བླ་མ་ལས་ཐོས་གཞན་དག་འདོད་པ་མཐོང་ནས་ཀྱང༌། །དེ་ལ་བརྟེན་ཏེ་ཅུང་ཟད་རབ་ཏུ་བརྟག་པར་བྱ། །ཞེས་བྱ་བ་ནི་ཉེས་པ་གསུམ་གྱི་གཉེན་པོར་དེ་སྐད་བསྟན་ཏེ། ཉེས་པ་གསུམ་ལ་ཡིད་མི་ཆེས་པ་དེའི་གཉེན་པོར་ནི། བླ་མ་ལས་ཐོས་ཞེས་བྱ་བ་ཡིན་པར་མངོན་ཏེ། དེ་ལྟར་ན་བཤད་པ་འདི་ནི་ཡིད་ཆེས་སུ་རུང་བའི་ལུང་དང་ལྡན་པ་ཡིན་པར་བསྟན་ཏོ། །ཐེ་ཚོམ་གྱི་གཉེན་པོར་སྨྲས་པ་ནི། གཞན་དག་འདོད་པ་མཐོང་ནས་ཀྱང༌། །ཞེས་བྱ་བ་ཡིན་ཏེ། དེ་ལྟར་བཤད་པ་འདི་ནི་དོན་ཤིན་ཏུ་རྣམ་པར་ངེས་པ་ཡིན་ནོ་ཞེས་བསྟན་པ་ཡིན་ནོ། །སྒྲོ་འདོགས་པ་དང་སྐུར་པ་འདེབས་པ་དེའི་གཉེན་པོ་སྨྲས་པ་ནི། དེ་ལ་བརྟེན་ཏེ་ཅུང་ཟད་རབ་ཏུ་བརྟག་པར་བྱ། །ཞེས་བྱ་བ་ཡིན་ནོ། །བརྟག་པར་བྱ་ཞེས་བྱ་བ་ནི་དཔྱད་པར་བྱ་བའི་དོན་གང་ཡིན་པའོ། །དེ་ལ་བརྟེན་ཏེ་ཞེས་བྱ་བ་ནི་རྟེན་ཅིང་འབྱུང་བ་མངོན་པར་བརྗོད་པའི་མདོ་སྡེ་ལ་བརྟེན་ནས་སོ། །ཡང་ན་བླ་མ་ལས་ཐོས་པའི་མདོ་སྡེ་དང༌། གཞན་གྱི་མན་ངག་མཐོང་བ་ལ་བརྟེན་ནས་ཞེས་སྟོན་ཏོ། །དེ་ལྟར་ན་མེད་པ་ལ་སྒྲོ་འདོགས་པར་བྱེད་པ་ཡང་མ་ཡིན། ཡོད་པ་ལ་སྐུར་པ་འདེབས་པར་བྱེད་པ་ཡང་མ་ཡིན་པས་རྟོག་པའི་ཉེས་པ་ཡོངས་སུ་སྤངས་པ་ཡིན་ནོ། །མདོ་སྡེ་རྟེན་ཅིང་འབྱུང་བ་མངོན་པར་བརྗོད་པ་ཡིན་པར་བསྟན་དུ་ཟིན་ཀྱང་ཡང་མདོ་སྡེ་གང་ཞེ་ན་ཞེས་བྱ་བ་ཅིའི་ཕྱིར་ཞེ་ན། རྟེན་ཅིང་འབྱུང་བ་བརྗོད་པ་གཞན་མ་ཡིན་པར་བསལ་བའི་ཕྱིར་རོ། །རྟེན་ཅིང་འབྱུང་བ་མངོན་པར་བརྗོད་པའི་མདོ་སྡེ་ནི་གསུང་རབ་མང་དུ་བཞུགས་ཏེ། འདི་ལྟ་སྟེ་དགེ་སློང་དག་ཁྱེད་ལ་རྟེན་ཅིང་འབྲེལ་པར་འབྱུང་བ་དང་རྟེན་ཅིང་འབྲེལ་པར་འབྱུང་བའི་ཆོས་བཤད་པར་བྱའོ་ཞེས་བྱ་བ་དང༌། རྟེན་ཅིང་འབྱུང་བའི་དོན་ཡང་མང་དུ་བརྗོད་དེ། རྒྱུ་དང་འབྲས་བུར་འབྲེལ་པ་མངོན་པར་རྗོད་པར་བྱེད་པའི་ཕྱིར་རོ། །ཇི་སྐད་དུ་སྤྲེའུ་ལྟ་བུའི་མདོ་དེར་འཕགས་པ་ཉན་ཐོས་ཐོས་པ་དང་ལྡན་པ་
རྣམས་རྟེན་ཅིང་འབྲེལ་པར་འབྱུང་བ་ཉིད་ལ་ལེགས་པར་རབ་ཏུ་ཚུལ་བཞིན་ཡིད་ལ་བྱེད་པས་སོ་སོར་རྟོག་སྟེ། འདི་ལྟ་སྟེ་འདི་ཡོད་པས་འདི་འབྱུང་འདི་སྐྱེས་པས་འདི་སྐྱེ་བ་སྟེ། འདི་ལྟ་སྟེ་བདེ་བ་མྱོང་བར་འགྱུར་བའི་རེག་པ་ལ་བརྟེན་ནས་བདེ་བའི་ཚོར་བ་སྐྱེ་བར་འགྱུར་རོ་ཞེས་བྱ་བ་ལ་སོགས་པ་གསུངས་སོ། །དེའི་ཕྱིར་དང་པོ་དང་རྣམ་པར་འབྱེད་པ་ཉིད་བྱེ་བྲག་ཏུ་བྱ་བའི་ཕྱིར་དེ་ཉིད་ཀྱི་དབང་དུ་བྱེད་པ་ནི། དགེ་སློང་དག་ཁྱེད་ལ་རྟེན་ཅིང་འབྲེལ་པར་འབྱུང་བའི་དང་པོ་རྣམ་པར་དབྱེ་བ་བསྟན་གྱི་ཞེས་བྱ་བ་ནི་མདོ་སྡེའོ། །ཇི་ལྟ་ཞེ་ན་གླེང་གཞི་ནི་མཉན་ཡོད་ནའོ། །དེར་བཅོམ་ལྡན་འདས་ཀྱིས་དགེ་སློང་རྣམས་ལ་བཀའ་སྩལ་པ། དགེ་སློང་དག་ཁྱེད་ལ་རྟེན་ཅིང་འབྲེལ་བར་འབྱུང་བའི་དང་པོ་དང་རྣམ་པར་དབྱེ་བ་བསྟན་གྱི་དེ་ལེགས་པར་ཉོན་ལ་ཤིན་ཏུ་ཡིད་ལ་ཟུང་ཤིག་དང་བཤད་དོ། །རྟེན་ཅིང་འབྲེལ་པར་འབྱུང་བའི་དང་པོ་གང་ཞེ་ན། འདི་ལྟ་སྟེ་འདི་ཡོད་ན་འདི་འབྱུང་འདི་སྐྱེས་པས་འདི་སྐྱེ་བ་སྟེ། འདི་ལྟ་སྟེ་མ་རིག་པའི་རྐྱེན་གྱིས་འདུ་བྱེད། འདུ་བྱེད་ཀྱི་རྐྱེན་གྱིས་རྣམ་པར་ཤེས་པ། རྣམ་པར་ཤེས་པའི་རྐྱེན་གྱིས་མིང་དང་གཟུགས། མིང་དང་གཟུགས་ཀྱི་རྐྱེན་གྱིས་སྐྱེ་མཆེད་དྲུག །སྐྱེ་མཆེད་དྲུག་གི་རྐྱེན་གྱིས་རེག་པ། རེག་པའི་རྐྱེན་གྱིས་ཚོར་པ་ཚོར་བའི་རྐྱེན་གྱིས་སྲེད་པ། སྲེད་པའི་རྐྱེན་གྱིས་ལེན་པ། ལེན་པའི་རྐྱེན་གྱིས་སྲིད་པ། སྲིད་པའི་རྐྱེན་གྱིས་སྐྱེ་བ། སྐྱེ་བའི་རྐྱེན་གྱིས་རྒ་ཤི་དང༌། མྱ་ངན་དང་སྨྲེ་སྔགས་འདོན་པ་དང༌། སྡུག་བསྔལ་བ་དང༌། ཡིད་མི་བདེ་བ་དང༌། འཁྲུག་པ་རྣམས་འབྱུང་བར་འགྱུར་ཏེ། དེ་ལྟར་ན་སྡུག་བསྔལ་གྱི་ཕུང་པོ་ཆེན་པོ་འདི་འབའ་ཞིག་འབྱུང་བར་འགྱུར་རོ། །འདི་ནི་རྟེན་ཅིང་འབྲེལ་བར་འབྱུང་བ་དང་པོའོ་ཞེས་བྱའོ། །རྟེན་ཅིང་འབྲེལ་པར་འབྱུང་བའི་རྣམ་པར་དབྱེ་བ་གང་ཞེ་ན། མ་རིག་པའི་རྐྱེན་གྱིས་འདུ་བྱེད་ཅེས་བྱ་བ་ལ། མ་རིག་པ་གང་ཞེ་ན། གང་དེ་སྔོན་གྱི་མཐའ་མི་ཤེས་པ་དང༌། ཕྱི་མའི་མཐའ་མི་ཤེས་པ་དང༌། སྔོན་དང་ཕྱི་མའི་མཐའ་མི་ཤེས་པ་དང༌། ནང་མི་ཤེས་པ་དང༌། ཕྱི་མི་ཤེས་པ་དང༌། ནང་དང་ཕྱི་མི་ཤེས་པ་དང༌། ལས་མི་ཤེས་པ་དང༌། རྣམ་པར་སྨིན་པ་མི་ཤེས་པ་དང༌། ལས་དང་རྣམ་པར་སྨིན་པ་མི་ཤེས་པ་དང༌། སངས་རྒྱས་མི་ཤེས་པ་དང༌། ཆོས་མི་ཤེས་པ་དང༌། དགེ་འདུན་མི་ཤེས་པ་དང༌། སྡུག་བསྔལ་མི་ཤེས་པ་དང༌། ཀུན་འབྱུང་བ་མི་ཤེས་པ་དང༌། འགོག་པ་དང་ལམ་མི་ཤེས་པ་དང༌། རྒྱུ་མི་ཤེས་པ་དང༌།
རྒྱུ་ལས་ཡང་དག་པར་བྱུང་བའི་ཆོས་མི་ཤེས་པ་དང༌། དགེ་བ་དང་མི་དགེ་བ་དང༌། ཁ་ན་མ་ཐོ་བ་དང་བཅས་པ་དང༌། ཁ་ན་མ་ཐོ་བ་མེད་པ་དང༌། བསྟེན་པར་བྱ་བ་དང༌། བསྟེན་བར་བྱ་བ་མ་ཡིན་པ་དང༌། ངན་པ་དང་གྱ་ནོམ་པ་དང༌། ནག་པོ་དང༌། དཀར་པོ་དང༌། རྣམ་པར་དབྱེ་བ་དང་བཅས་པའི་རྟེན་ཅིང་འབྲེལ་པར་འབྱུང་བ་དང༌། རེག་པའི་སྐྱེ་མཆེད་དྲུག་ཡང་དག་པ་ཇི་ལྟ་བ་བཞིན་ཁོང་དུ་མི་ཆུད་པ་དང༌། གང་དེ་དང་དེར་ཡང་དག་པ་ཇི་ལྟར་བ་བཞིན་དུ་མི་ཤེས་པ་དང༌། མ་མཐོང་བ་དང༌། མངོན་པར་མ་རྟོགས་པ་དང༌། རྨོངས་པ་དང༌། ཀུན་དུ་རྨོངས་པ་དང༌། མ་རིག་པ་དང༌། མུན་པའི་རྣམ་པ་ཞེས་བྱ་བ་འདི་ནི་མ་རིག་པ་ཞེས་བྱའོ། །མ་རིག་པའི་རྐྱེན་གྱིས་འདུ་བྱེད་ཅེས་བྱ་བ་ལ། འདུ་བྱེད་གང་ཞེ་ན། འདུ་བྱེད་ནི་རྣམ་པ་གསུམ་མོ། །གསུམ་གང་ཞེ་ན། ལུས་ཀྱི་འདུ་བྱེད་དང༌། ངག་གི་འདུ་བྱེད་དང༌། ཡིད་ཀྱི་འདུ་བྱེད་དོ། །འདུ་བྱེད་ཀྱི་རྐྱེན་གྱིས་རྣམ་པར་ཤེས་པ་ཞེས་བྱ་བ་ལ་རྣམ་པར་ཤེས་པ་གང་ཞེ་ན། རྣམ་པར་ཤེས་པའི་ཚོགས་དྲུག་སྟེ། མིག་གི་རྣམ་པར་ཤེས་པ་དང༌། རྣ་བ་དང༌། སྣ་དང༌། ལྕེ་དང༌། ལུས་དང༌། ཡིད་ཀྱི་རྣམ་པར་ཤེས་པའོ། །རྣམ་པར་ཤེས་པའི་རྐྱེན་གྱིས་མིང་དང་གཟུགས་ཞེས་བྱ་བ་ནི་མིང་གང་ཞེ་ན། གཟུགས་ཅན་མ་ཡིན་པའི་ཕུང་པོ་བཞི་སྟེ། ཚོར་བའི་ཕུང་པོ་དང༌། འདུ་ཤེས་ཀྱི་ཕུང་པོ་དང༌། འདུ་བྱེད་ཀྱི་ཕུང་པོ་དང༌། རྣམ་པར་ཤེས་པའི་ཕུང་པོའོ། །གཟུགས་གང་ཞེ་ན། གཟུགས་གང་ཡིན་པ་ཅི་ཡང་རུང༌། དེ་ཐམས་ཅད་འབྱུང་བ་ཆེན་པོ་བཞི་དང༌། འབྱུང་བ་ཆེན་པོ་བཞི་དག་རྒྱུར་བྱས་པ་སྟེ། གཟུགས་འདི་དང་སྔ་མིའི་མིང་གཉིས་གཅིག་ཏུ་མངོན་པར་བསྡུས་ནས། མིང་དང་གཟུགས་ཞེས་བྱའོ། །མིང་དང་གཟུགས་ཀྱི་རྐྱེན་གྱིས་སྐྱེ་མཆེད་དྲུག་ཅེས་བྱ་བ་ལ། །སྐྱེ་མཆེད་དྲུག་གང་ཞེ་ན། ནང་གི་སྐྱེ་མཆེད་དྲུག་སྟེ། མིག་ནང་གི་སྐྱེ་མཆེད་དང༌། རྣ་བ་དང༌། སྣ་དང༌། ལྕེ་དང༌། ལུས་དང༌། ཡིད་ནང་གི་སྐྱེ་མཆེད་དོ། །སྐྱེ་མཆེད་དྲུག་གི་རྐྱེན་གྱིས་རེག་པ་ཞེས་བྱ་བ་ལ། རེག་པ་གང་ཞེ་ན། རེག་པའི་ཚོགས་དྲུག་སྟེ། མིག་གི་འདུས་ཏེ་རེག་པ་དང༌། རྣ་བ་དང༌། སྣ་དང༌། ལྕེ་དང༌། ལུས་དང༌། ཡིད་ཀྱི་འདུས་ཏེ་རེག་པའོ། །རེག་པའི་རྐྱེན་གྱིས་ཚོར་བ་ཞེས་བྱ་བ་ལ་ཚོར་བ་གང་ཞེ་ན། ཚོར་བ་ནི་གསུམ་སྟེ། བདེ་བ་དང༌། སྡུག་བསྔལ་བ་དང༌། བདེ་བ་ཡང་མ་ཡིན།
སྡུག་བསྔལ་བ་ཡང་མ་ཡིན་པའོ། །ཚོར་བའི་རྐྱེན་གྱིས་སྲེད་པ་ཞེས་བྱ་བ་ལ་སྲེད་བ་གང་ཞེ་ན། སྲེད་པ་ནི་གསུམ་སྟེ། འདོད་པའི་སྲེད་པ་དང༌། གཟུགས་ཀྱི་སྲེད་པ་དང༌། གཟུགས་མེད་པའི་སྲེད་པའོ། །སྲེད་པའི་རྐྱེན་གྱིས་ལེན་པ་ཞེས་བྱ་བ་ལ། ལེན་པ་གང་ཞེ་ན། ལེན་པ་ནི་བཞི་སྟེ། འདོད་པ་ཉེ་བར་ལེན་པ་དང༌། ལྟ་བ་ཉེ་བར་ལེན་པ་དང༌། ཚུལ་ཁྲིམས་དང་བརྟུལ་ཞུགས་ཉེ་བར་ལེན་པ་དང༌། བདག་ཏུ་སྨྲ་བ་ཉེ་བར་ལེན་པའོ། །ལེན་པའི་རྐྱེན་གྱིས་སྲིད་པ་ཞེས་བྱ་བ་ལ་སྲིད་པ་གང་ཞེ་ན། སྲིད་པ་ནི་གསུམ་སྟེ། འདོད་པའི་སྲིད་པ་དང༌། གཟུགས་ཀྱི་སྲིད་པ་དང༌། གཟུགས་མེད་པའི་སྲིད་པའོ། །སྲིད་པའི་རྐྱེན་གྱིས་སྐྱེ་བ་ཞེས་བྱ་བ་ལ། སྐྱེ་བ་གང་ཞེ་ན། སེམས་ཅན་རྣམས་གང་ཡིན་པ་དེ་དང་སེམས་ཅན་གྱི་རིས་དེ་དང་དེ་དག་ཏུ་སྐྱེ་བ་གང་ཡིན་པ་དང༌། ཤིན་ཏུ་སྐྱེ་བ་དང༌། འཕོ་བ་དང༌། རབ་ཏུ་འབྱུང་བ་དང༌། ཕུང་པོ་སོ་སོར་ཐོབ་པ་དང༌། ཁམས་སོ་སོར་ཐོབ་པ་དང༌། སྐྱེ་མཆེད་སོ་སོར་ཐོབ་པ་དང༌། ཕུང་པོ་རྣམས་མངོན་པར་འགྲུབ་པ་དང༌། སྲོག་གི་དབང་པོ་རབ་ཏུ་སྐྱེས་པ་འདི་ནི་སྐྱེ་བ་ཞེས་བྱའོ། །སྐྱེ་བའི་རྐྱེན་གྱིས་རྒ་ཤི་ཞེས་བྱ་བ་ལ། རྒ་བ་གང་ཞེ་ན། གང་དེའི་སྤྱི་ཅེར་དང༌། སྐྲ་དཀར་དང༌། གཉེར་མ་འཚིགས་པ་དང༌། འཁོགས་པ་དང༌། སྒུར་པོ་དང༌། དགུ་བོ་དང༌། འཁྱོར་བ་དང༌། ཤ་གནག་པ་དང༌། ལུད་པ་ལུ་བ་དང༌། དབུགས་རྒོད་པ་དང༌། འཁར་བ་ལ་བརྟེན་པ་དང༌། མོང་རྟུལ་བ་དང་ཞན་པ་དང༌། ཉམས་པ་དང༌། ཡོངས་སུ་ཉམས་པ་དང༌། དབང་པོ་རྣམས་རྒུད་པ་དང༌། མི་གསལ་བ་དང༌། འདུ་བྱེད་རྣམས་རྙིང་པ་དང༌། འཇིག་པར་ཉེ་བ་འདི་ནི་རྒ་བ་ཞེས་བྱའོ། །འཆི་བ་གང་ཞེ་ན། སེམས་ཅན་གང་ཡིན་པ་དེ་དང་དེ་དག་སེམས་ཅན་གྱི་རིས་དེ་དང་དེ་དག་ནས་འཆི་བ་དང་འཕོ་བ་དང་འཇིག་པ་དང༌། ནད་རྨུགས་པ་དང༌། ཚེ་ཉམས་པ་དང༌། དྲོད་ཡལ་བ་དང༌། སྲོག་གི་དབང་པོ་འགགས་པ་དང༌། ཕུང་པོ་རྣམས་འདོར་བ་དང༌། ཤི་བ་དང༌། དུས་བྱད་པའི་འདི་ནི་ཤི་བ་ཞེས་བྱ་སྟེ། ཤི་བ་འདི་དང༌། སྔ་མ་རྒ་བ་གཉིས་གཅིག་ཏུ་བསྡུས་ནས་རྒ་ཤི་ཞེས་བྱ་བ་སྟེ། འདི་ནི་རྟེན་ཅིང་འབྲེལ་པར་འབྱུང་བའི་རྣམ་པར་དབྱེ་བའོ། །དགེ་སློང་དག་ཁྱེད་ལ་རྟེན་ཅིང་འབྲེལ་པར་འབྱུང་བའི་དང་པོ་དང་རྣམ་པར་དབྱེ་བ་བཤད་པར་བྱའོ་ཞེས་ངས་གང་སྨྲས་པ་དེ་དག་ནི་ངས་སྨྲས་པ་དེ་དག་ཡིན་ནོ། །ཅིའི་ཕྱིར་འདི་བསྟན་ཞེ་ན་ཞེས་བྱ་བ་ནི་མདོ་
སྡེ་མཐའ་དག་སྟོན་པའི་དགོས་པ་འདྲི་སྟེ། དགོས་པ་མེད་པར་ནི་སངས་རྒྱས་བཅོམ་ལྡན་འདས་རྣམ་པ་ཆོས་མི་སྟོན་པས་མདོ་སྡེ་སྟོན་པའི་དགོས་པ་བརྗོད་པར་བྱ་དགོས་སོ། །སངས་རྒྱས་ཀྱི་བཀའི་དགོས་པ་ནི་ངེས་པར་སེམས་ཅན་གྱི་སྤྱོད་པའི་དབང་དུ་བྱས་པ་མ་ཡིན་ནམ། དེ་བས་ན་དྲི་མི་དགོས་སོ་ཞེ་ན་སེམས་ཅན་གྱི་སྤྱོད་པ་ཡང་མང་དུ་ཡོད་ལ། དེ་བས་ན་འདི་གང་གི་གཉེན་པོར་བསྟན་པའི་དམིགས་མི་ཕྱེད་པས་དགོས་པ་ཉིད་དྲི་དགོས་ཏེ། དེའི་ཕྱིར་དེ་ལྟར་ན་སྡུག་བསྔལ་གྱི་ཕུང་པོ་ཆེན་པོ་འབའ་ཞིག་འབྱུང་བར་འགྱུར་རོ་ཞེས་བསྟན་པའི་ཕྱིར་རོ་ཞེས་སྨྲས་སོ། །དེ་ལྟར་ན་ཞེས་བྱ་བ་ནི་ཇི་སྐད་དུ་མ་རིག་པའི་རྐྱེན་གྱིས་འདུ་བྱེད་རྣམས་ཞེས་བྱ་བ་ནས་སྐྱེ་བའི་རྐྱེན་གྱིས་རྒ་ཤི་ཞེས་བྱ་བའི་བར་དུ་བསྟན་པའི་རྣམ་པ་དེ་དག་གིས་ན་ཞེས་བྱའོ། །འདི་ཞེས་བྱ་བ་ནི་སྐྱེ་བ་དང་རྒ་ཤི་ལ་སོགས་པ་དང༌། འདུ་བྱེད་ལ་སོགས་པའི་ཞེས་བསྟན་ཏོ། །སྡུག་བསྔལ་གྱི་ཕུང་པོ་ཞེས་བྱ་བ་ནི་སྡུག་བསྔལ་གྱི་ཚོགས་སོ། །ཆེན་པོ་ཞེས་བྱ་བ་ནི་ཐོག་མ་མེད་པའི་དུས་ཅན་ནོ། །འབའ་ཞིག་ཅེས་བྱ་བ་ནི་བདག་དང་བདག་གི་དང་བྲལ་བའོ། །འབྱུང་བར་འགྱུར་རོ་ཞེས་བྱ་བ་ནི་སྐྱེ་བར་འགྱུར་རོ་ཞེས་བྱ་བའོ། །སྤྱོད་པ་སྤང་བ་ནི་བསྟན་པ་དགོས་པ་ཡིན་གྱི། སྡུག་བསྔལ་གྱི་བདེན་པ་རབ་ཏུ་འཇུག་པ་ཙམ་བསྟན་པ་མ་ཡིན་ནོ་སྙམ་ནས་བསྟན་པ་དེ་ཡང་ཅིའི་ཕྱིར་ཞེ་ན། དེའི་ཕྱིར་ཁ་ཅིག་ནི་བདག་མེད་ན་ཇི་ལྟར་འཁོར་བར་འགྱུར་ཞེས་མི་ཤེས་པ་དང༌། ཐེ་ཚོམ་དང༌། ལོག་པར་ཤེས་པ་དང་ལྡན་པ་དེ་དག་བསྩལ་བའི་ཕྱིར་རོ་ཞེའོ་ཞེས་སྨྲས་ཏེ། མདོ་སྡེ་འདི་ལས་ནི་འཁོར་བར་འཇུག་པའི་རིམ་པ་འདི་བསྟན་པ་ཡིན་ལ། དེ་ཡང་བདག་མེད་པར་ནི་འབའ་ཞིག་ཅེས་གསུངས་པའི་ཕྱིར་རོ། །དེ་བས་ན་དེ་ནི་འདིའི་དགོས་པ་དམིགས་ཀྱིས་བསྟན་པ་ཡིན་ནོ། །དེ་ལ་མི་ཤེས་པ་དང་ལྡན་པ་ཞེས་བྱ་བ་འདིས་ནི་མ་འདྲེས་པའི་མ་རིག་པ་བསྟན་ཏོ། །ཐེ་ཚོམ་གྱི་ཤེས་པ་དང་ལྡན་པ་ཞེས་བྱ་བ་འདིས་ནི་ཐེ་ཚོམ་དང་མཚུངས་པར་ལྡན་པ་ཡིན་ཏེ། ཅི་བདག་མེད་པར་ཡང་འཁོར་བ་ཡིན་ནམ། འོན་ཏེ་བདག་ཡོད་པ་ཡིན་སྙམ་པའོ། །ལོག་པར་ཤེས་པ་དང་ལྡན་པ་ཞེས་བྱ་བ་འདིས་ནི་བདག་ཡོད་ན་ནི་འཁོར་བར་འགྱུར་གྱི་བདག་མེད་ན་ནི་མ་ཡིན་ནོ་ཞེས་ལོག་པར་ཤེས་པ་ཚུལ་བཞིན་མ་ཡིན་པ་ཡིད་ལ་བྱེད་པ་དང་མཚུངས་པར་ལྡན་པའི་མ་རིག་པ་བསྟན་པ་ཡིན་ནོ།།
མ་རིག་པ་ལ་སྤྱོད་པའི་གཉེན་པོ་ནི་འདི་ཡིན་པར་མངོན་ནོ། །མི་ཤེས་པ་རྣམ་པར་ལོག་ན་ནི་ཐེ་ཚོམ་གྱི་ཤེས་པ་དང༌། ལོག་པར་ཤེས་པ་ཡང་རྣམ་པར་ལྡོག་པར་འགྱུར་ཏེ། དེ་ཀུན་ནས་བསླང་བ་ཉིད་ཀྱི་ཕྱིར་རོ། །དེ་ལྟར་དེ་དག་བསྟན་པས་ནི་མི་ཤེས་པ་དང༌། ཐེ་ཚོམ་གྱི་ཤེས་པ་དང་ལོག་པར་ཤེས་པ་རྣམས་ཀུན་དུ་འབྱུང་བ་རྣམ་པར་ལྡོག་པར་འགྱུར་རོ། །བསྒོམ་པའི་ཚུལ་གྱིས་ནི་གཏན་ནས་ལྡོག་རྣམ་པར་ལྡོག་པར་འགྱུར་རོ། །བདག་ནི་བདག་ཏུ་ལྟ་བ་དང་སྲེད་པའི་གཉེན་པོའི་ཕྱིར་ཡིན་པར་མཐོང་ངོ་ཞེས་བྱ་བ་ནི་སློབ་དཔོན་རང་གི་བསམ་པ་སྟོན་པར་བྱེད་དོ། །འདིར་དགོས་པ་དེ་ཡིན་གྱི་སྔར་བསྟན་པ་ཉིད་མ་ཡིན་ནོ་ཞེས་བྱ་བར་ཇི་ལྟར་ངེས་པར་བྱ་ཞེ་ན། དེའི་ཕྱིར་དེ་ལྟར་ན་བདག་མེད་པར་སྡུག་བསྔལ་འབྱུང་བར་བསྟན་པས་སྟོང་པ་ཉིད་དང་སྨོན་པ་མེད་པ་དང༌། རྗེས་སུ་མཐུན་པར་བྱ་བ་ཡིན་ནོ་ཞེས་བྱ་བ་སྨྲས་ཏེ། བདག་མེད་པ་ནི་སྟོང་པ་ཉིད་དང༌། རྗེས་སུ་མཐུན་པར་བསྟན་པའི་ཕྱིར་རོ། །དེ་ལ་སྟོང་པ་ཉིད་ནི་བདག་མེད་པ་དང༌། སྟོང་པའི་རྣམ་པ་དང་མཚུངས་པར་ལྡན་པའི་ཏིང་ངེ་འཛིན་གྱི་རྣམ་པ་ཡིན་ནོ། །སྡུག་བསྔལ་འབྱུང་ཞེས་བྱ་བ་ནི་སྨོན་པ་མེད་པ་དང་རྗེས་སུ་མཐུན་པར་བསྟན་པའི་ཕྱིར་རོ། །དེ་ཡང་སྟོང་པ་ཉིད་དང་བདག་མེད་པའི་རྣམ་པ་གཉིས་དང༌། འགོག་པའི་རྣམ་པ་རྣམས་མ་གཏོགས་པར་མི་རྟག་པ་དང༌། སྡུག་བསྔལ་པ་ལ་སོགས་པར་མཐོང་བའི་རྣམ་པ་ཅན་གྱི་ཏིང་ངེ་འཛིན་ཏོ། །ཅིའི་ཕྱིར་མཚན་མ་མེད་པ་དང༌། རྗེས་སུ་མཐུན་པ་མ་ཡིན་ཞེ་ན། འདི་ལྟར་འདི་ནི་འཇུག་པའི་རིམ་པ་བསྟན་པ་བརྩམས་པ་ཡིན་གྱི་ལྡོག་པའི་རིམ་པ་ནི་མ་ཡིན་པའི་ཕྱིར་རོ། །དེ་ལྟ་མ་ཡིན་ན་རྣམ་པར་ཐར་པའི་སྒོ་གསུམ་ཡིན་པས། མཚན་མ་མེད་པ་ཡང་བརྗོད་པར་བྱ་དགོས་པར་འགྱུར་རོ། །གདུལ་བྱ་ཅི་འདྲ་བ་ཞིག་ལ་ཡིན་ཞེ་ན། བདག་ཏུ་ལྟ་བ་ཅན་དང་འཁོར་བའི་ཉེས་པ་མ་མཐོང་བ་རྣམས་ལ་ཞེས་བྱ་བ་ཡིན་ཏེ། སྤྱོད་པའི་བྱེ་བྲག་གིས་གང་ཟག་བྱེ་བྲག་ཏུ་བྱ་བའི་ཕྱིར་ཏེ། བདག་ཏུ་ལྟ་བ་ལ་སྤྱོད་པ་རྣམས་དང༌། སྲིད་པ་ལ་སྲེད་པས་སྤྱོད་པའི་གདུལ་བྱ་རྣམས་ལ་བདག་ཏུ་ལྟ་བ་དང་སྲེད་པའི་གཉེན་པོར་འདི་བཤད་པ་ཡིན་ནོ། །སྲིད་པའི་ཉེས་པ་མ་རྟོགས་པ་རྣམས་ནི་སྲིད་པ་ལ་སྲེད་པ་ལྷག་པར་འབྱུང་བར་འགྱུར་རོ། །འཇིག་ཚོགས་ལ་ལྟ་བ་རྣམས་ནི་ཉེ་བར་ལེན་པའི་ཕུང་པོ་རྣམས་ལ་བདག་དང༌།
བདག་གིར་མངོན་པར་ཞེན་ནས་ཉེས་པ་མ་མཐོང་བས་ན་མངོན་པར་ཞེན་ཅིང་ཚོལ་བར་བྱེད་དོ། །བདག་ཏུ་ལྟ་བ་མངོན་དུ་སོང་བ་ཉིད་ཀྱིས་སྲིད་པ་ལ་སྲིད་པས་ཡིན་པར་ཁོང་དུ་ཆུད་པར་བྱའོ། །སྔར་སྡུག་བསྔལ་གྱི་ཕུང་པོ་ཞེས་བྱ་བ་དགོས་པ་སྨོས་པ་འདོད་པ་ཡིན་ན། སྔར་དགོས་པ་ཇི་ལྟར་བསྟན་པ་བཞིན་དུ། དགོས་པ་འདི་ཡང་ཡིན་པར་ཅིའི་ཕྱིར་མི་འདོད། ཡང་ན་བསྟན་མ་ཐག་པ་ཇི་ལྟར་དོགས་པ་ཡིན་པར་འདོད་པ་དེ་བཞིན་དུ། འདི་ཡང་ཡིན་པར་ཅིའི་ཕྱིར་མི་འདོད། གལ་ཏེ་འདི་དག་ཉིད་དགོས་པ་ཡིན་པར་བསམ་པར་གྱུར་ན་ནི་འདིར་ཡང་གི་སྒྲ་ཤིན་ཏུ་འདོད་པར་བྱ་བ་ཡིན་ནོ། །དགོས་པ་གང་ཞེ་ན། དེའི་ཕྱིར་ཇི་སྐད་དུ་མདོ་གཞན་ལས་ཇི་ལྟར་འཕགས་པ་ཉན་ཐོས་ཐོས་པ་དང་ལྡན་པས་རྟེན་ཅིང་འབྲེལ་པར་འབྱུང་བ་དང༌། རྟེན་ཅིང་འབྲེལ་པར་འབྱུང་བའི་ཆོས་རྣམས་ཡང་དག་པ་ཇི་ལྟ་བ་དེ་བཞིན་དུ་ཡང་དག་པའི་ཤེས་རབ་ཀྱིས་ལེགས་པར་མཐོང་བ་ཡིན། ལེགས་པར་རྟོགས་པར་ཡིད་ལ་བྱས། ལེགས་པར་བསྟན། ལེགས་པར་འདྲིས་པ་དེ་ནི་ཅི་བདག་སྔོན་གྱི་དུས་ན་བྱུང་ངམ། མ་བྱུང་བ་ཡིན། སྔོན་བདག་ཇི་ལྟ་བུ་ཞིག་ཏུ་བྱུང༌། བདག་ཇི་ལྟར་བྱུང་བར་གྱུར་ཞེས་དེ་སྔོན་གྱི་མཐར་རྗེས་སུ་འབྲང་བ་མ་ཡིན། ཅི་མ་འོངས་པའི་དུས་ན་འབྱུང་བར་འགྱུར་རམ་འོན་ཏེ་འབྱུང་བར་མི་འགྱུར། ཇི་ལྟ་བུ་ཞིག་ཏུ་འབྱུང་བར་འགྱུར། ཇི་ལྟར་འབྱུང་བར་འགྱུར་ཞེས་ཕྱི་མའི་མཐའི་རྗེས་སུ་འབྲང་བ་མ་ཡིན་ནོ། །ནང་ལ་ཡང་འདི་ཅི་ཞིག་ཡིན། འདི་ཇི་ལྟར་ཡིན་ཡོད་པ་འདི་དག་ཅི་ཡིན། གང་ཞིག་འབྱུང་བར་འགྱུར། སེམས་ཅན་འདི་དག་གང་ནས་འོངས། འདི་ནས་ཤི་སྟེ་གར་འགྲོ་བར་འགྱུར་ཞེས་ཅི་ལྟར་ཡང་ཐེ་ཚོམ་མེད་དོ། །དེ་བཞིན་དུ་ཀཱ་ཏྱཱའི་བུ་འཇིག་རྟེན་ཀུན་འབྱུང་བ་རྣམས་ཡང་དག་པ་ཇི་ལྟ་བ་བཞིན་དུ་ཡང་དག་པའི་ཤེས་རབ་ཀྱིས་མ་མཐོང་བ་གང་ཡིན་པ་དེ་ནི་འཇིག་རྟེན་ལ་མེད་པ་ཉིད་ཡིན་ནོ་ཞེས་བྱ་བར་མི་འགྱུར་རོ་ཞེས་བྱ་བའི་བར་དུ་གསུངས་སོ། །མདོར་ན་སྔོན་གྱི་མཐའ་རྡང་ཕྱི་མའི་མཐའ་དང༌། དབུས་ལ་རྨོངས་པ་བཟློག་པ་དང༌། ལོག་པར་ལྟ་བ་བཟློག་པ་ཡང་འདིའི་དགོས་པ་ཡིན་པར་བསྟན་ཏོ། །དགོས་པ་ཡིན་པར་འཐད་ན། བཅོམ་ལྡན་འདས་ཀྱིས་དགོས་པ་ཡིན་པར་མ་གསུངས་སམ་ཞེ་ན། དེའི་ཕྱིར་བདག་ཏུ་ལྟ་བ་སྤངས་པ་ཁོ་ནས་བདག་ཐམས་ཅད་མི་འབྱུང་བས་དེ་ཉིད་འདིར་དགོས་བའི་རྩ་བ་ཡིན་ལ་གང་ཡིན་པ་དེ་ཉིད་མདོ་སྡེ་
འདིར་བཅོམ་ལྡན་འདས་ཀྱིས་བསྟན་ཏོ་ཞེས་བྱ་བས་འདི་སྐད་བསྟན་ཏོ། །དགོས་པ་འདི་ཡོད་མོད་ཀྱི་དགོས་པའི་རྩ་བ་མ་ཡིན་ནོ། །བདག་ཏུ་ལྟ་བ་སྤངས་པ་སྔོན་དུ་སོང་བ་ཡིན་པའི་ཕྱིར། དགོས་པའི་རྩ་བ་ཡིན་པར་འདིར་འདོད་དོ། །དེ་བས་ན་གང་མདོ་སྡེ་ལས་གསུངས་པ་དེ་ཉིད་འདིར་འདོད་པ་ཡིན་ནོ། །དེ་ལྟ་མ་ཡིན་ན་མྱ་ངན་ལས་འདས་པའི་བར་ཡང་འདིར་དགོས་པ་ཡིན་པར་བརྗོད་པར་བྱ་དགོས་པར་འགྱུར་རོ། །གལ་ཏེ་དགོས་པའི་རྩ་བ་བརྗོད་པར་བཞེད་པ་མ་ཡིན་ན་ཉོན་མོངས་པའི་ཀུན་ནས་ཉོན་མོངས་པ་ཡང་ལྟ་བའི་ཀུན་ནས་ཉོན་མོངས་པའི་རྒྱུ་ཅན་དུ་མི་འགྱུར་རོ། །དེ་བས་ན་འཇིག་ཚོགས་ལ་ལྟ་བ་སྤངས་པའི་ཕྱིར་ཤིང་གི་རྩ་བ་རྒྱས་པ་བཅད་པ་བཞིན་དུ་ཉོན་མོངས་པ་ཐམས་ཅད་རྣམ་པར་ཞིག་པར་འགྱུར་ཞིང་རིམ་གྱིས་མྱ་ངན་ལས་འདས་པ་ཡང་ཐོབ་པར་འགྱུར་རོ། །རྟེན་ཅིང་འབྲེལ་པར་འབྱུང་བ་ཞེས་བྱ་བ་ནི་ཡན་ལག་སྔ་མ་ལ་བརྟེན་ནས་འབྲེལ་པར་ཕྱི་མ་འབྱུང་བའོ། ཞེས་བྱ་བ་ལ་ཇི་སྐད་དུ་དགེ་སློང་རྟེན་ཅིང་འབྲེལ་པར་འབྱུང་བའི་དང་པོ་བཤད་པར་བྱའོ་ཞེས་གསུངས་པ་འདི་གང་ཞེ་ན། དེའི་ཕྱིར་ཡན་ལག་སྔ་མ་ལ་བརྟེན་ནས་འབྲེལ་པར་ཕྱི་མ་འབྱུང་བ་ནི་རྟེན་ཅིང་འབྲེལ་པར་འབྱུང་བ་ཞེས་བྱའོ། །ཡན་ལག་སྔ་མ་ཞེས་བྱ་བ་ནི་སྔར་སྐྱེས་པ་ལའོ། །བརྟེན་ནས་ཞེས་བྱ་བ་ནི་དེ་ཡོད་ན་ཞེས་བྱ་བ་ཡིན་ཏེ། རྐྱེན་དེ་དང་འབྲེལ་བ་ཞེས་བྱ་སྟེ། ཡན་ལག་སྔ་མ་འཇིག་པའི་བར་དུ་མཆོད་པ་སྟེ། རྒྱུ་འཇིག་པ་དང་འབྲས་བུའི་བདག་ཉིད་ཀྱི་དུས་གཉིས་དུས་ཐ་དད་པ་མེད་པའི་ཕྱིར་རོ། །འབྱུང་བ་ཞེས་བྱ་བ་ནི་རབ་ཏུ་སྐྱེ་བའོ། །འདིར་རྟེན་ཅིང་ཞེས་བྱ་བའི་སྒྲ་ནི་རྒྱུ་ཡོད་པར་སྟོན་པར་བྱེད་པ་ཡིན་ནོ། །འབྲེལ་པའི་སྒྲ་ནི་འབྲེལ་བ་ལ་བྱའོ། །དེ་ཉིད་ཀྱི་ཕྱིར་འདི་སྐད་དུ་རྒྱུ་ཡོད་ན་འཇིག་པ་བར་དུ་མ་ཆོད་པར་འབྱུང་བ་ནི་རྟེན་ཅིང་འབྲེལ་བར་འབྱུང་བ་ཡིན་ནོ་ཞེས་བྱ་བར་སྦྱར་རོ། །དེ་ལྟར་བྱས་ན་འདས་པ་ལས་གང་ཡང་སྐྱེ་བ་མེད་དོ་ཞེས་བསྟན་པ་ཡིན་ལ། འབྲས་བུའི་དུས་ན་ཡང་རྒྱུ་ཡོད་པ་ཉིད་དུ་མི་འགྱུར་ཏེ། དེ་འཇིག་པ་ཉིད་དེའི་དུས་ཡིན་པའི་ཕྱིར་རོ། །དེ་ལྟར་བྱས་ན་རྟེན་ཅིང་འབྲེལ་པར་འབྱུང་བ་འཆད་པ་གང་ཡིན་པ་དེ་ཡང་རྟེན་ཅིང་འབྲེལ་པར་འབྱུང་བ་ཞེས་བྱའོ། །དེ་ཇི་ལྟར་རྟེན་ཅིང་འབྲེལ་པར་འབྱུང་བ་ཞེས་བྱ་ཞེ་ན། དེའི་ཕྱིར་དེ་ཉིད་ནི་དབང་དུ་བྱས་ནས་འཆད་པའི་ཡི་གེ་ཡང་དོན་བཞིན་དུ་གདགས་ཏེ་ཞེས་རྒྱས་པར་སྨོས་སོ། །དོན་ཞེས་བྱ་བ་ནི་སྐབས་
ཀྱི་དོན་ཞེས་བྱ་བ་སྟེ་འདི་ནི་ལས་ལ་སྒྲུབ་པ་ཡིན་ནོ། །ཇི་ལྟར་དོན་དམ་པ་སྟོང་པ་ཉིད་ཀྱི་ཆོས་ཀྱི་རྣམ་གྲངས་བཞིན་ནོ་ཞེས་བྱ་བ་ལ་དོན་དམ་པ་སྟོང་པ་ཉིད་ནི་ཏིང་ངེ་འཛིན་གྱི་ངོ་བོའི་དོན་ནོ། །དེའི་དབང་དུ་བྱས་ནས་བཤད་པའི་ཆོས་ཀྱི་རྣམ་གྲངས་འཆད་པའི་ངོ་བོ་དེ་ལ་ཡང་དོན་དམ་པ་སྟོང་པ་ཉིད་ཅེས་གདགས་སོ། །འཇིག་རྟེན་ན་ཡང་ཁར་བ་བསད་པ་དང་རིན་པོ་ཆེ་ཕྲོགས་པ་བཞིན་ནོ་ཞེས་བྱ་བ་ནི་བསད་པ་དང་ཕྲོགས་པའི་དོན་གྱི་དབང་དུ་བྱས་པའི་ཡི་གེ་གང་ཡིན་པ་དེ་ལ་ཡང་ཁར་བ་བསད་པ་དང་རིན་པོ་ཆེ་ཕྲོགས་པ་ཞེས་ཉེ་བར་གདགས་སོ། །དེའི་ཕྱིར་རྟེན་ཅིང་འབྲེལ་པར་འབྱུང་བའི་དང་པོ་དང་རྣམ་པར་དབྱེ་བ་བཤད་པར་བྱའོ་ཞེས་འཆད་པ་དེ་ཡང་ཡིན་པར་རིག་པར་བྱའོ། །རྟེན་ཅིང་ཞེས་བྱ་བ་ནི་རྐྱེན་དེ་ལས་ཞེས་བྱ་སྟེ། ཇི་ལྟར་བུད་ཤིང་ལ་བརྟེན་ནས་མི་འབྱུང་ངོ་ཞེས་བྱ་བ་རྟེན་དེ་ལས་ཞེས་བྱ་བར་མངོན་ནོ། །སྤྲིན་ལ་བརྟེན་ནས་ཆར་འབབ་བོ་ཞེས་བྱ་བ་སྤྲིན་འདུས་པ་ལས་ཞེས་བྱ་བར་མངོན་ནོ། །གངས་རི་ལ་བརྟེན་ནས་སྨན་རྣམས་སྐྱེའོ་ཞེས་བྱ་བ་གཞི་དེ་ལས་ཞེས་བྱ་བར་མངོན་ནོ་ཞེས་བྱ་བ་ཡིན་ནོ། །ཡན་ལག་སྔ་མ་ལ་བརྟེན་ནས་ཞེས་སྨྲས་པ་གང་ཡིན་པ་དེ་ཇི་ལྟར་ཡིན་ལག་སྔ་མ་ལ་བརྟེན་ནས་ཕྱིས་འབྲས་བུ་འབྱུང་བར་འགྱུར་ཞེ་ན། དེའི་ཕྱིར་རྐྱེན་དེ་ལས་ཞེས་འདིར་ཚིག་རྣམ་པར་དབྱེ་བ་གསལ་བ་ཡིན་པར་བལྟ་བར་བྱའོ། །འཆད་པ་འདིའི་འཇིག་རྟེན་ན་གྲགས་པའི་དོན་སྟོན་པ་ནི་སྔར་བུད་ཤིང་ལ་བརྟེན་ནས་ཕྱིས་མི་འབྱུང་བ་མ་ཡིན་ནོ། །དེ་བཞིན་དུ་སྔར་གངས་རི་ལ་བརྟེན་ནས་སྨན་རྣམས་ཕྱིས་འབྱུང་ཞེས་བྱ་བའི་བར་དུ་མ་ཡིན་ཏེ། སྔར་མེད་པའི་ཕྱིར་རོ། །ཇི་ལྟར་ཁྲུས་བྱས་ནས་ཟས་ཟ་བ་ལྟ་བུར་དུས་སྔ་ཕྱི་ཉིད་ནི་མ་ཡིན་ནོ་ཞེས་བྱ་བ་ནི་ཇི་ལྟར་སྔར་ཁྲུས་བྱས་ནས་ཕྱིས་ཟས་ཟ་བ་ལྟ་བུར་སྔ་ཕྱི་ཡོད་པ་མ་ཡིན་ཏེ། འདིར་དོན་དེ་མ་ཡིན་པར་རིག་པར་བྱའོ་ཞེས་སྟོན་ཏོ། །དོན་དེ་ཉིད་བཅོམ་ལྡན་འདས་ཀྱིས་མདོ་གཞན་ལས་སྟོན་པ་ནི་རྟེན་ཅིང་འབྲེལ་པར་འབྱུང་བ་གང་ཞེ་ན། འདི་ལྟ་སྟེ་འདི་ཡོད་ན་འདི་འབྱུང་འདི་སྐྱེས་པས་འདི་སྐྱེ་བ་སྟེ་ཞེས་བྱ་བ་ཡིན་ནོ། །རྒྱུའི་དོན་ཡིན་ཏེ། དུས་སྔར་བྱ་བ་བྱེད་པའི་དོན་མ་ཡིན་ན་ཇི་ལྟར་འདི་བརྟེན་ཏེ་ཞེས་བྱ་བའི་སྒྲུབ་པ་ཤེས་པར་འགྱུར་ཞེ་ན་ཞེས་བྱ་བ་ནི་དོན་དེ་ལྟ་བུ་སྟོན་པ་ཡིན་ནོ་ཞེས་བྱ་བ་ནི་བརྟེན་ནས་ཞེས་བྱ་བ་གང་སྨྲས་པ་ཡིན་ཏེ། འདི་ནི་རྒྱུ་དེ་དང་རྐྱེན་དེ་ལས་ཞེས་བྱ་བ་ཡིན་ནོ། །ཇི་ལྟར་དོན་འདི་བསྟན་ཞེ་ན། འདི་ལྟར་འདི་ཡོད་ན་
འདི་འབྱུང་འདི་སྐྱེས་པས་འདི་སྐྱེ་བ་ཞེས་བྱ་བ་ཡིན་ནོ། །དེ་ལྟར་ན་བརྟེན་ཏེ་ཞེས་བྱ་བ་འདི་ནི་བཅོམ་ལྡན་འདས་ཀྱིས་རྒྱུའི་དོན་དུ་རབ་ཏུ་བསྟན་ཏོ། །བརྡ་སྤྲོད་པ་པ་ཁ་ཅིག་ཀྱང་བྱེད་པ་པོ་མི་མཐུན་པ་ནི་རྒྱུའི་དོན་ཡིན་པར་སྔོན་གྱི་སློབ་དཔོན་དག་སྨྲའོ་ཞེས་བྱ་བ་ལ་སོགས་པ་འདོན་ཏོ། །དེ་ཞེས་བྱ་བ་ནི་རྟེན་ཅིང་འབྲེལ་པར་འབྱུང་བའོ། །ཁྱེད་ལ་ཞེས་བྱ་བ་ནི་ཞེས་བྱ་བའི་ཁྱེད་ཀྱི་སྒྲ་དེ་ནི་བཞི་པའི་དོན་དང་གཉིས་པ་མང་པོའི་ཚིགས་སུ་བཅད་པར་སྟོན་པ་ཡིན་གྱི་བོད་པའི་ཆེད་ནི་མ་ཡིན་ཏེ། ཁྱེད་ཅེས་བྱ་བ་ཁྱེད་ཅག་ལའམ། ཁྱེད་ཅག་གི་ཆེད་དུ་བསྟན་པ་ཡིན་ནོ་ཞེས་བསྟན་ཏོ། །དགེ་སློང་དག་ཅེས་བྱ་བ་ནི་བོད་པ་སྟེ། སེམས་གཞན་དུ་སོང་བའི་དགེ་སློང་རྣམས་དེ་མངོན་དུ་བྱ་བའི་ཕྱིར་རོ་ཞེས་བྱ་བ་ནི་རྟེན་ཅིང་འབྲེལ་པར་འབྱུང་བའི་དང་པོ་རྣམ་པར་དབྱེ་བ་འཆད་པ་མངོན་དུ་བྱ་བའི་ཕྱིར་ཞེས་བྱ་བའི་དོན་གང་ཡིན་པའོ། །ཅིའི་ཕྱིར་དགེ་སློང་རྣམས་ཁོ་ན་ཡིན་གྱི། འཁོར་གཞན་དགེ་སློང་མ་དང༌། དགེ་བསྙེན་དང༌། དགེ་བསྙེན་མའི་འཁོར་དེ་དག་མ་ཡིན་ཞེ་ན། དེའི་ཕྱིར་མཆོག་ཡིན་པའི་ཕྱིར་དང་ཞེས་བྱ་བ་ལ་སོགས་པ་སྨོས་ཏེ། དེ་ལ་མཆོག་ཉིད་ནི་སྔར་ཁོང་དུ་ཆུད་པ་ཡིན་པའི་ཕྱིར་རོ། །དེ་བས་ན་སྲས་ཀྱི་གཙོ་བོ་ཡིན་པའི་ཕྱིར་དེ་དག་ཁོ་ན་དང་པོར་བོད་པར་རིགས་པ་ཡིན་ནོ། །གཙོ་བོ་ཡིན་པའི་ཕྱིར་དང་ཞེས་བྱ་བ་ནི་དེ་ལས་ངེས་པར་སྐྱེས་པའི་ཕྱིར་རམ། གཞན་པས་གཙོ་བོ་ཡིན་པའི་ཕྱིར་རམ། ཡོན་ཏན་ཕུན་སུམ་ཚོགས་པ་ཐམས་ཅད་ཀྱི་གཞིར་འགྱུར་པའི་ཕྱིར་རོ། །ཉེ་བ་ཡིན་པའི་ཕྱིར་དང་ཞེས་བྱ་བ་ནི་མཆོག་ཡིན་པའི་ཕྱིར་དང་གཙོ་བོ་ཡིན་པའི་ཕྱིར་གཞན་དག་པས་སྙན་སྔར་འདུག་པ་ཡིན་པའི་ཕྱིར་རོ། །རྟག་ཏུ་འདུག་པ་ཡིན་པའི་ཕྱིར་དང་ཞེས་བྱ་བ་ནི་སྐྱེས་པ་དང་རབ་ཏུ་བྱུང་བ་སྐལ་བ་མཉམ་པ་ཡིན་པའི་ཕྱིར་དེ་དག་རྟག་ཏུ་རྗེས་སུ་འབྲང་བ་ཡིན་པའི་ཕྱིར་རོ། །འཛིན་ནུས་པ་དང་ལྡན་པའི་ཕྱིར་རོ་ཞེས་བྱ་བ་ནི་འཁྲུགས་པ་མ་ཡིན་པ་ཉིད་ཀྱིས་ན་དྲན་པ་ཤིན་ཏུ་ཉེ་བར་གནས་པ་ཡིན་པའི་ཕྱིར་དང༌། སྐྱེས་བུའི་རྩལ་གྱི་དབང་གིས་ཤེས་རབ་མཆོག་དང་ལྡན་པའི་ཕྱིར་རོ། །བཙུན་པ་སྒྲ་གཅན་འཛིན་བཟང་པོ་ནི་ཡོན་ཏན་དང་སྤྲུལ་པའི་སྒོ་ནས་ང་ལྟ་བུ་ཡིན་པར་བསྟན་པའི་ཕྱིར་རོ། །དང་པོ་ཡང་བསྟན་པར་བྱའོ། །རྣམ་པར་དབྱེ་བ་ཡང་བསྟན་པར་བྱའོ་ཞེས་གང་གསུངས་པའི་དང་པོ་གང་ཡིན། རྣམ་པར་དབྱེ་བ་ཡང་གང་ཞེ་ན། དེའི་ཕྱིར་དང་པོ་ཞེས་བྱ་བ་ནི་བསྟན་པ་སྟེ་ཞེས་སྨྲས་སོ། །
འདི་དོན་གང་གིས་བཞག་ཅེ་ན། དེའི་ཕྱིར་རྣམ་པར་འཆད་པ་བས་དེ་སྔ་བའི་ཕྱིར་ཏེ་ཞེས་སྨྲས་ཏེ་བསྟན་པ་སྔ་བ་ཡིན་པའི་ཕྱིར་རོ་ཞེས་བྱ་བའི་ཐ་ཚིག་སྟེ། བསྟན་པ་ནི་མདོའི་ཚིག་གོ །རྣམ་པར་འཆད་པ་ནི་རྒྱས་པའི་ཚིག་ཡིན་ནོ། །བསྡུས་པ་དང་རྒྱས་པར་སོ་སོར་བསྟན་ཞེས་བྱ་བ་གྲུབ་པ་ཡིན་ནོ། །རྣམ་པར་འཆད་པ་བས་བསྟན་པ་དེ་སྔ་བའི་ཕྱིར་ཏེ། དེའི་སྒོ་ནས་འདི་ལྟར་རྟེན་ཅིང་འབྲེལ་པར་འབྱུང་བ་སྡུད་པའི་ཕྱིར་རོ་ཞེས་བྱ་བ་ལ་དེའི་སྒོ་ནས་ཞེས་བྱ་བ་ནི་དང་པོའི་སྒོ་དེ་ནས་རྟེན་ཅིང་འབྲེལ་བར་འབྱུང་བ་སྡུད་ཅིང་འཇོག་པ་སྟེ། རྟེན་ཅིང་འབྲེལ་བར་འབྱུང་བའི་དོན་དང༌། རྟེན་ཅིང་འབྲེལ་པར་འབྱུང་བའི་ཡི་གེ་རྣམས་སྤྱིའི་ཚིག་གིས་བྱེ་བྲག་གི་ཚིག་འདོད་པ་ཡིན་པའི་ཕྱིར་རོ། །དེ་ལྟར་ན་སྡུད་པ་ཡིན་པའི་ཕྱིར་ཞེས་བྱ་བས་འདིའི་བྱ་བ་བྱེད་པའི་ཚིག་བསྟན་པ་ཡིན་ནོ།། །།རྟེན་ཅིང་འབྲེལ་བར་འབྱུང་བ་དང་པོ་དང་རྣམ་པར་དབྱེ་བ་བསྟན་པ་རྒྱ་ཆེར་འགྲེལ་པ། བམ་པོ་གཉིས་པ། རྣམ་པར་དབྱེ་བ་ཞེས་བྱ་བ་ནི་ངེས་པར་འཆད་པ་སྟེ་ཞེས་བྱ་བ་ནི་འདིས་རྣམ་པར་འབྱེད་པས་ན་རྣམ་པར་འབྱེད་པ་སྟེ། རྣམ་པར་ཆད་པས་བསྟན་པ་མདོར་བྱས་པ་རྣམ་པར་འབྱེད་པའི་ཕྱིར་རོ། །ངེས་པར་འཆད་པ་ནི་བསྟན་པའི་ཚིག་ཡིན་ཏེ། བསྟན་པའི་དོན་བདེ་བླག་ཏུ་ཁོང་དུ་ཆུད་པར་བྱ་བའི་ཕྱིར་དང༌། ངེས་པར་འཆད་པ་ཚིགས་ཆུང་དུས་བདེ་བླག་ཏུ་འཛིན་པར་བྱ་བའི་ཕྱིར་དང༌། མདོ་དང་འབྲེལ་བ་ལྟ་བུ་ཡིན་པའི་ཕྱིར་དང་ཞེས་བྱ་བ་ལ་འབྲེལ་བ་ལྟ་བུ་ནི་ངེས་པར་འཆད་པ་ཡིན་ནོ། །མདོ་ལྟ་བུ་ནི་བསྟན་པ་ཡིན་ནོ། །དེ་བས་ན་མདོ་ལྟ་བུ་བསྡུས་པའི་དོན་མདོར་བསྟན་པ་ཡིན་པ་རྣམས་འགྲེལ་པ་ལྟ་བུ་ངེས་པར་འཆད་པས་རྣམ་པར་དབྱེ་བ་བྱས་ན་བདེ་བླག་ཏུ་ཁོང་དུ་ཆུད་པར་འགྱུར་རོ། །གལ་ཏེ་དེ་ལྟ་ན་རྣམ་པར་འཆད་པ་ཁོ་ན་བྱ་དགོས་ཀྱི་བསྟན་པ་ནི་མི་དགོས་སོ་ཞེ་ན། དེའི་ཕྱིར་ངེས་པར་འཆད་པ་ཚེགས་ཆུང་དུས་བདེ་བླག་ཏུ་འཛིན་པར་བྱ་བའི་ཕྱིར་ཞེས་བྱ་བ་སྨོས་ཏེ། བསྟན་པ་ནི་ཉུང་ལ་ངེས་པར་འཆད་པ་ནི་མང་བ་ཡིན་ནོ། །སྤྱིའི་ཚིག་དང་བྱེ་བྲག་གི་ཚིག་ཡིན་པར་འདོད་དོ་ཞེས་བྱ་བ་ནི་སྤྱིའི་ཚིག་ལྟ་བུ་ནི་བསྟན་པ་ཡིན་ལ། བྱེ་བྲག་གི་ཚིག་ལྟ་བུ་ནི་ངེས་པར་འཆད་པ་ཡིན་ནོ། །ཚེགས་ཆུང་དུས་བདེ་བླག་ཏུ་འཛིན་པར་བྱ་བའི་ཕྱིར་ཞེས་བྱ་བ་ནི་སྤྱི་དྲན་པའི་རྒྱུ་བྱེ་བྲག་ཡིན་པའི་ཕྱིར་རོ། །སྐྱོན་རྣམ་པ་གཉིས་ཀྱི་གཉེན་པོར་ཡང་བསྟན་པ་ཡིན་ཏེ། སྐྱོན་རྣམ་པ་གཉིས་ནི་སྒྲུབ་པའི་སྐྱོན་དང་དྲན་པའི་སྐྱོན་
ནོ། །དེ་བས་ན་དེ་ལྟར་ན་ལེགས་པར་བཤད་པར་འགྱུར་ཏེ། མདོ་དང་རྒྱས་པར་ཡང་བཤད་པའི་ཕྱིར་རོ་ཞེས་བྱ་བ་སྨོས་ཏེ། འགའ་ཞིག་སྨོས་ན་ནི་ཅིག་ཤོས་ཀྱི་སྐྱོན་དང་ལྡན་པའི་ཕྱིར་རོ། །སྤྲོས་ན་གོ་བ་དང་མདོས་གོ་བའི་གང་ཟག་ལ་ཡང་ལྟོས་པ་ནི་ངེས་པར་འཆད་པ་ནི་བསྟན་པའི་ཚིག་ཡིན་ཏེ་ཞེས་བྱ་བ་ཡིན་ནོ། །བསྟན་གྱིས་ཞེས་བྱ་བ་ནི་དང་པོ་དང་རྣམ་པར་དབྱེ་བ་ཞེས་བྱ་བ་འཆད་པ་འཇུག་པ་ལ་བྱ་བར་མངོན་ཏེ་ཞེས་བྱ་བ་ནི་ཆོས་ཀྱི་རྣམ་གྲངས་འདི་ལ་དང་པོ་དང་རྣམ་པར་དབྱེ་བ་ཞེས་བྱ་བའི་སྒྲས་དེ་ཉིད་མདོ་དང་རྒྱས་པར་འཆད་པ་སྟོན་པ་ཡིན་ནོ། །འཆད་པ་དེ་ཡང་གང་ཞེ་ན། འཇུག་པ་ལ་ཞེས་བྱ་བར་མངོན་ཏེ་ཞེས་བྱ་བ་སྨོས་ཏེ། འཇུག་པ་ནི་མངོན་པར་སྒྲུབ་པ་དང་འབྱུང་བ་ཞེས་བྱ་བ་དོན་གཅིག་པ་ཡིན་ནོ། །དེ་ཉིད་ཀྱི་ཕྱིར་ཇི་ལྟར་གཞན་དུ་ཆོས་བཤད་པར་བྱའོ་ཞེས་སྨོས་ན། མདོ་ལ་སོགས་པའི་ཆོས་ལས་དེ་འཆད་པ་གཞན་མ་ཡིན་པ་དང་ཞེས་བྱ་བ་སྨོས་ཏེ་གསུང་རབ་ལས་གྲགས་པ་དཔེར་བྱེད་དོ། །འཇིག་རྟེན་ན་ཡང་ཚིག་གཅིག་བརྗོད་དོ་ཞེས་སྨྲ་བ་པོ་སྟོན་པར་བྱེད་ན་ཚིག་ལས་ཚིག་གཞན་ཡོད་པ་མ་ཡིན་པ་བཞིན་ནོ་ཞེས་བྱ་བ་ནི་འཇིག་རྟེན་ན་གྲགས་པ་དཔེར་བྱེད་པ་ཡིན་ནོ། །སྟོན་ཏོ་ཞེས་མི་བྱ་འམ་ཞེ་ན། བྱས་ན་ནི་བསྟན་པར་བྱ་བ་དང༌། སྟོན་པར་བྱེད་པ་འབྲེལ་བ་མེད་པར་འགྱུར་བའི་ཕྱིར་དང༌། ཉེ་བར་བརྟགས་པ་ཡིན་ན་ནི་སྟོན་པར་འགྱུར་བའི་ཕྱིར་རོ། །ཉེ་བར་བརྟགས་པ་ཡིན་ན་ནི་བསྟན་པར་བྱ་བ་དང༌། སྟོན་པ་པོ་འབྲེལ་པ་ཡིན་ནོ། །ཡི་གེས་དོན་སྟོན་པ་བཞིན་དུ་བཅོམ་ལྡན་འདས་དེ་སྟོན་པ་བཞིན་དུ་སྟོན་ན་ཇི་ལྟར་སྟོན་པར་བྱེད་པས་ན་ཐ་སྙད་ཙམ་ཡིན་པར་བལྟ་བར་བྱའོ། །དེ་ཞེས་བྱ་བ་འདི་ནི་ཚིག་འགོད་པའམ་ཞེས་བྱ་བ་ནི་ཚིག་འཇོག་པ་སྟེ། མིང་ཐམས་ཅད་གསལ་བའི་ཕྱིར་རོ། །དེ་བས་ན་ཞེས་བྱ་བ་ནི་གང་གི་ཕྱིར་བསྟན་པར་བྱའོ་ཞེས་བྱ་བ་དེ་བས་ན་ཉོན་ཅིག་ཅེས་སྟོན་པར་བྱེད་དོ། །དེ་ལྟ་མ་ཡིན་ན་ནི་སྐྱོན་རྣམ་པ་གསུམ་གྱིས་བཤད་པ་དོན་ཡོད་པར་མི་འགྱུར་ཏེ། ཇི་ལྟ་ཞེ་ན་འདི་ལྟ་མ་ཡིན་ཏེ། ཅི་སྟེ་གཏོད་པར་བྱེད་པ་དང༌། ཕྱིན་ཅི་མ་ལོག་པ་དང་གུས་པས་ཉན་ཞིང་སྦྱོར་བར་བྱེད་ན་ཞེས་དགོངས་པའོ། །ཇི་ལྟ་ཞེ་ན་དེའི་ཕྱིར་རྣམ་པར་གཡེང་བའི་སྐྱོན་གྱིས་ཡི་གེ་མི་ཐོས་པ་དེའི་གཉེན་པོར་ལེགས་པར་ཉོན་ལ་ཞེས་སྨོས་ཏེ་རྣ་གཏོང་པ་ལ་སྦྱོར་བར་བྱེད་དོ། །ཤེས་རབ་ཀྱི་སྐྱོན་གྱིས་ནི་ཡི་གེའི་དོན་
ཕྱིན་ཅི་ལོག་ཏུ་འཛིན་པའི་ཕྱིར་སྭ་སྟི་དང་ཨ་རིཤྟ་ལ་སོགས་པ་བཞིན་ནོ་ཞེས་བྱ་བ་ནི་བཤད་པ་འདི་ལ་སྭསྟིས་ཤེས་རབ་ཀྱི་སྐྱོན་གྱིས་ཡི་གེའི་དོན་ཇི་ལྟར་ལོག་པར་ཟིན་པ་ནི་འདི་ལྟ་སྟེ། ཤི་བ་དུས་ལས་འདས་པ་དང༌། གཉེན་རྣམས་ཀྱིས་ལུས་ནི་མེས་སྲེག་པར་བྱེད། ཆུར་སྐྱུར་བར་བྱེད་ས་དོང་དུ་འཇུག་པར་བྱེད་པ་འམ། བྱོལ་སོང་གི་སྐྱེ་གནས་སུ་གཏོགས་པའི་སྲོག་ཆགས་རྣམ་པ་དུ་མས་ནི་ཟ་བར་བྱེད་པའམ། རླུང་དང་ཉི་མ་གཉིས་ཀྱིས་བསྐམས་ཤིང་ཡོངས་སུ་ཟད་པ་དང་གཏུགས་པར་འགྱུར་རོ། །གང་ཡང་སེམས་ཞེས་བྱ་བ་དང༌། ཡིད་ཅེས་བྱ་བ་དང༌། རྣམ་པར་ཤེས་པ་ཞེས་བྱ་བ་གང་ཡིན་པ་འདི་ནི་ཡུན་རིང་པོར་དེ་ལ་དད་པས་ཡོངས་སུ་བསྒོས་ཤིང༌། ཚུལ་ཁྲིམས་དང༌། ཐོས་པ་དང༌། གཏོང་བ་དང༌། ཤེས་རབ་ཡོངས་སུ་བསྒོས་ཏེ། གོང་དུ་འགྲོ་བར་འགྱུར། ཁྱད་པར་དུ་འགྲོ་བར་འགྱུར་ལ། ཤི་འཕོས་ནས་ཀྱང་མཐོ་རིས་སུ་འགྲོ་བར་འགྱུར་ཞེས་བྱ་བ་ལ་ལྟ་བར་གཏོགས་པ་འབྱུང་བ་ནི་འདི་ལྟ་བུ་ཡིན་ཏེ། བདག་གིས་བཅོམ་ལྡན་འདས་ཀྱིས་གསུངས་པའི་དོན་ཁོང་དུ་ཆུད་དེ། རྣམ་པར་ཤེས་པ་གང་ཡིན་པ་དེ་ནི་མཚམས་སྦྱོར་བར་བྱེད་པ་ཡིན། འཁོར་བ་ཡིན་ཏེ་མ་ཚང་བ་མེད་པ། གཞན་དུ་འགྱུར་བ་མ་ཡིན་ནོ་ཞེས་བྱ་བ་ཡིན་ནོ། །དེ་བཞིན་དུ་འདི་ལ་ཨ་རིཤྟས་ཀྱང་འདི་ལྟ་སྟེ། ཀྱེ་གཽ་ཏ་མ་དགེ་སློང་ཡང་ཞོག །དགེ་སློང་མ་ཡང་ཞོག །དགེ་བསྙེན་ཚངས་པར་སྤྱོད་པ་ཡང་ཞོག །དགེ་བསྙེན་མ་ཚངས་པར་སྤྱོད་པ་ཡང་ཞོག་ལ། དགེ་བསྙེན་ཁ་ཅིག་འདོད་པའི་ལོངས་སྤྱོད་ཅན་ཆོས་འདུལ་བ་འདི་ལ་དོགས་པ་དང་ཐེ་ཚོམ་སྤངས་པ་དག་མཆིས་ཏེ། དེ་དག་ཀྱང་འདི་ལ་དགེ་བསྙེན་དུ་གྱུར་པ་གཅིག་གཉིས་མ་ལགས། ལྔ་བརྒྱ་མ་ལགས་ཀྱི། དེ་བས་ཀྱང་ཤིན་ཏུ་མང་བའི་དགེ་བསྙེན་གང་དག་བུ་རྣམས་སྟེན་པར་བགྱིད། མལ་སྟན་རྣམས་ལ་ཆགས་པར་བགྱིད། བགོ་བ་བཟང་པོ་རྣམས་སྟེན་པར་བགྱིད། ཕྲེང་བ་དང་བྱུག་པ་འཆང་བར་བགྱིད། གསེར་དང་དངུལ་བདག་གིར་བགྱིད། ཆུང་མ་དང་བྲན་ཕོ་དང༌། བྲན་མོ་དང༌། ལས་བྱེད་པའི་མི་རྣམས་འཁོལ་བར་བགྱིད་པ་དག་ལྷ་དང་མི་དག་ཏུ་ལན་བདུན་སྐྱེ་བ་བླངས་ནས་ཤི་སྟེ། སྡུག་བསྔལ་གྱི་མཐར་འབྱིན་པར་འགྱུར་རོ་ཞེས་བྱ་བ་ལ། ལྟ་བར་གཏོགས་པ་སྐྱེས་པ་ནི་འདི་ཡིན་ཏེ་བཅོམ་ལྡན་འདས་ཀྱིས་འདོད་པ་ནི་བར་དུ་གཅོད་པ་ཡིན་པར་གསུངས་པ་དེ་བསྟེན་ཀྱང་བར་དུ་གཅོད་པར་མི་འགྱུར་རོ་ཞེས་བྱ་བ་ཡིན་ནོ། །
སོགས་པའི་སྒྲས་ནི་གཞན་དག་ལ་ཡང་སྦྱར་བར་བྱའོ། །དེའི་གཉེན་པོར་ལེགས་པར་ཞེས་བྱ་བ་ཡིན་ཏེ། ཕྱིན་ཅི་མ་ལོག་པར་འཛིན་པ་ལ་སྦྱོར་བ་ཡིན་ནོ། །འདུན་པ་ཞན་པའི་སྐྱོན་གྱིས་ནི་མ་གུས་པས་གཟུང་བ་མི་འཛིན་པའི་ཕྱིར་རོ། །དེའི་གཉེན་པོར་ཤིན་ཏུ་ཞེས་བྱ་བ་ཡིན་ཏེ། གུས་པར་འཛིན་པ་ལ་སྦྱོར་བ་ཡིན་ནོ། །སྣོད་ཁས་ཕུབ་པ་དང༌། མི་གཙང་བ་དང༌། ཞབས་རྡོལ་གྱི་ནང་དུ་ཆར་བབ་པ་དོན་མེད་པ་ཡིན་ཏེ། དེའི་ནང་དུ་མི་འཇུག་པ་དང༌། རྣམ་པར་གྱུར་པ་དང༌། མི་གནས་པའི་ཕྱིར་རོ་ཞེས་བྱ་བ་ལ་སྣོད་ཁས་ཕུབ་པ་ལྟ་བུ་ནི་རྣམ་པར་གཡེང་བའི་སྐྱོན་ཡིན་པ་རིག་པར་བྱ་སྟེ། དེར་ནི་ཡི་གེ་ཉིད་ཀྱང་མི་འཇུག་སྟེ། སྣོད་ཁས་ཕུབ་པ་ལ་ཆར་བབ་པ་བཞིན་ནོ། །སྣོད་མི་གཙང་བ་ལྟ་བུར་ནི་ཤེས་རབ་ཀྱི་སྐྱོན་ཡོད་པ་ཡིན་པར་རིག་པར་བྱ་སྟེ། དེར་གལ་ཏེ་ཞུགས་སུ་ཟིན་ཀྱང་ཕྱིན་ཅི་ལོག་གི་རྣམ་པར་འདུག་སྟེ། སྣོད་མི་གཙང་བའི་ནང་ན་ཆར་བབ་པ་དྲི་ལ་སོགས་པ་མནམ་པར་གྱུར་པ་བཞིན་ནོ། །སྣོད་ཞབས་རྡོལ་ལྟ་བུ་ནི་འདུན་པ་ཞན་པའི་སྐྱོན་ཡིན་པར་བལྟ་སྟེ། ནང་དུ་ལོན་ཅིང་གྱུར་པ་མེད་དུ་ཟིན་ཀྱང་མི་གནས་པའི་ཕྱིར་ཏེ། སྣོད་ཞབས་རྡོལ་དུ་ཆར་བབ་པ་བཞིན་ནོ། །དེ་ལྟ་ན་ནི་བཤད་ཀྱི་གཞན་དུ་ན་མི་བྱེད་དོ་ཞེས་བསྟན་པའི་ཕྱིར་དང་ཞེས་བྱ་བ་ནི་གལ་ཏེ་ལེགས་པར་ཤིན་ཏུ་ཡིད་ལ་བྱེད་ཅིང་ཉན་ན་ཞེས་དགོངས་པའོ། །འདིས་ནི་ཆོས་འཆད་པར་དམ་འཆའ་བ་བྱེ་བྲག་ཏུ་བྱེད་པ་ཡིན་ཏེ། སངས་རྒྱས་བཅོམ་ལྡན་འདས་རྣམས་ཀྱིས་ཆོས་འཆད་པ་ནི་དོན་མེད་པ་མ་ཡིན་ཏེ། དེ་ལྟ་ཡིན་ན་ཆོས་འཆད་པ་དོན་ཡོད་པ་ཡིན་གྱི་གཞན་དུ་མ་ཡིན་ནོ། །ང་ཡང་ལེགས་པར་ཤིན་ཏུ་འཆད་དོ་ཞེས་སྦྱར་བའི་ཕྱིར་རོ་ཞེས་བྱ་བ་ནི་སངས་རྒྱས་བཅོམ་ལྡན་འདས་རྣམས་ཀྱིས་ཆོས་འཆད་པ་ནི་མ་ལེགས་པ་དང་ཤིན་ཏུ་མ་ཡིན་པར་མི་འཆད་མོད་ཀྱི། འོན་ཀྱང་དེ་སྐད་གསུངས་པ་ནི་གདུལ་བྱ་རྣམས་ཉེ་བར་འདུན་པར་བྱ་བའི་ཕྱིར་རོ། །ང་ནི་འཆད་པར་ཟད་ཀྱི་ཁྱེད་རྣམས་ཀྱིས་ནི་ནན་ཏན་གྱིས་སྒྲུབས་ཤིག་ཅེས་བསྟན་པའི་ཕྱིར་རོ་ཞེས་བྱ་བ་ནི་ཆོས་ལ་སྒྲུབ་པ་སྙིང་པོར་བྱ་བར་རབ་ཏུ་བསྟན་པ་ཡིན་ནོ། །ཆོས་ཐོས་པ་ཙམ་གྱིས་རྟོགས་པའི་འབྲས་བུ་དང་འབྲེལ་པར་མི་འགྱུར་བས་གཞན་གྱིས་དྲི་བར་བྱ་བའི་སྐབས་སུ་ཚིག་དེ་རང་ཉིད་ཀྱི་ཡིན་ཏེ། དེ་མ་ཐག་ཏུ་གཏམ་འཕྲོ་འཆད་པའི་ཉེས་པ་ཡོངས་སུ་སྤངས་པའི་ཕྱིར་དང༌། འཇིགས་ནས་
ཞུ་མི་ནུས་པ་དང་ལྡན་པ་རྣམས་ལ་ཕན་གདགས་པའི་ཕྱིར་དང༌། སེམས་རྩེ་གཅིག་ཏུ་བྱས་པ་རྣམས་ཚིག་དང་སྤྱོད་ལམ་ཐ་དད་པས་རྣམ་པར་གཡེངས་པར་འགྱུར་བའི་ཉེས་པ་ཡོངས་སུ་སྤང་བའི་ཕྱིར་རོ་ཞེས་བྱ་བ་ནི་ཉེས་པ་གསུམ་གྱི་གཉེན་པོར་འདི་གསུངས་ཏེ། ཉེས་པ་གསུམ་ནི་དུས་འདས་པའི་ཉེས་པ་དང༌། འཇིགས་པའི་ཉེས་པ་དང༌། རྣམ་པར་གཡེང་བའི་ཉེས་པའོ། །དེ་མ་ཐག་ཏུ་གཏམ་འཕྲོ་འཆད་པ་ནི་འཆི་བར་འགྱུར་ཏེ་དུས་ལས་ཐལ་བ་ཡིན་ནོ། །ཇི་སྐད་དུ། དབང་པོ་དང་ནི་བསམ་པ་དང༌། །དུས་དང་འདོད་ལྟོས་ལུས་ཅན་ལ། །གང་ཕྱིར་དྲང་སྲོང་ཆོས་འཆད་པ། །དེ་ཕྱིར་བཤད་འདི་དོན་མེད་མིན། །ཞེས་གསུངས་སོ། །བཅོམ་ལྡན་འདས་ཅང་མི་གསུང་བར་གྱུར་པ་དང༌། བདག་ཅག་གིས་དྲི་བར་བྱ་བ་ཡིན་ནོ། །འཇིགས་ནས་ཞུ་མི་ནུས་པ་དང་ལྡན་པ་ནི་འཇིགས་པ་སྐྱེ་བ་ཡིན་ཏེ། དེ་ལ་འཇིགས་པ་ནི་སེམས་ལས་བྱུང་བའི་ཆོས་ཡིན་ཏེ། འཇིགས་པ་ནི་ཞུ་མི་ནུས་པའི་རྒྱུ་ཡིན་ནོ། །བླ་གོས་ཕྲག་པ་གཅིག་ཏུ་གཟར་ཏེ། པུས་མོ་གཡས་པའི་ལྷ་ངས་ལ་བཙུགས་ནས་ཐལ་མོ་སྦྱར་ཏེ། བཅོམ་ལྡན་འདས་ལ་ཞུ་བར་བྱེད་ན། ཚིག་དང་སྤྱོད་ལམ་ཐ་དད་པས་རྣམ་པར་གཡེང་བར་འགྱུར་བའི་ཉེས་པ་འབྱུང་ངོ༌། །དེ་ལ་སྔར་སེམས་རྩེ་གཅིག་ཏུ་བྱས་པ་ཡིན་པར་ནི་བཅོམ་ལྡན་འདས་ཀྱིས་ལེགས་པར་ཉོན་ལ་ཤིན་ཏུ་ཞེས་གསུངས་པའི་ཕྱིར་རོ། །དེ་བས་ན་སྐྱོན་གསུམ་ཡོངས་སུ་སྤང་བའི་ཕྱིར། གཞན་གྱིས་དྲི་བར་བྱ་བའི་སྐབས་སུ་བཅོམ་ལྡན་འདས་ཐུགས་རྗེ་ཆེན་པོ་མངའ་བས་རྟེན་ཅིང་འབྲེལ་བར་འབྱུང་བ་དང་པོ་གང་ཞེས་རང་ཉིད་ཀྱིས་དྲི་བ་མཛད་དོ། །འདི་ལྟ་སྟེ་ཞེས་བྱ་བའི་ཚིག་སྦྱོར་བ་འདི་ནི་དང་པོ་བཤད་པ་རྩོམ་པར་བསྟན་པའི་ཕྱིར་དེ་བཤད་པར་རྩོམ་པ་གང་ཡིན་པ་དེ་ནི་རྟེན་ཅིང་འབྲེལ་པར་འབྱུང་བའི་དང་པོ་ཡིན་ནོ་ཞེས་བསྟན་པའི་ཕྱིར་རོ། །འདི་ལྟ་སྟེ་ཞེས་བྱ་བ་ནི་མཐའ་དག་དེའི་རྩོམ་པ་སྟོན་པར་བྱེད་པའི་ཕྱིར་རོ། །འདི་ཡོད་ན་འདི་འབྱུང་འདི་སྐྱེས་པས་འདི་སྐྱེ་བ་སྟེ་ཞེས་བྱ་བ་ནི་རྟེན་ཅིང་འབྲེལ་པར་འབྱུང་བའི་དང་པོ་དབྱེ་བ་མེད་པར་འཆད་པ་ཡིན་ཏེ། ཡན་ལག་རྣམས་མི་སྒྲོགས་པའི་ཕྱིར་རོ། །འདི་ལྟ་སྟེ་མ་རིག་པའི་རྐྱེན་གྱིས་འདུ་བྱེད་ཅེས་བྱ་བ་ནི་ཡན་ལག་རྣམས་ཕྱི་ནས་སྒྲོགས་པའི་ཕྱིར་རོ་ཞེས་བྱ་བ་ནི་རྟེན་ཅིང་འབྲེལ་བར་འབྱུང་བའི་དོན་གྱི་མཚན་ཉིད་ནི་རྣམ་པ་གཉིས་ཏེ། རྣམ་པར་དབྱེ་བ་མེད་པ་དང་དབྱེ་བའོ། །དེ་ལ་སྔར་རྒྱུ་ཡོད་པར་གྱུར་
ན། འདུ་བྱེད་རྣམས་འབྱུང་བ་འདི་ནི་རྟེན་ཅིང་འབྲེལ་པར་འབྱུང་བ་དབྱེ་བ་མེད་པ་ཡིན་ནོ། །དེ་ཡང་མ་བྱུང་བ་ལས་བྱུང་བའམ། བརྟག་པའི་ཆོས་ལ་ནི་དངོས་སུ་དབྱེ་བར་མི་ནུས་པའི་ཕྱིར་རོ། །ཡན་ལག་ཕྱེ་བ་ནི་འདིའི་དབྱེ་བ་བསྟན་པ་ཡིན་ནོ། །དེ་ལ་ཡུལ་དབྱེ་བ་མེད་པར་སྟོན་པ་ནི་དབྱེ་བ་མེད་པའི་རྟེན་ཅིང་འབྲེལ་པར་འབྱུང་བའི་དང་པོ་ཞེས་བྱའོ། །དེ་ཉིད་ཀྱི་ཕྱིར་རྟེན་འབྱུང་གི་ཡན་ལག་རྣམས་མི་སྒྲོགས་པའི་ཕྱིར་རོ་ཞེས་སྨོས་སོ། །ཡུལ་ཕྱེ་བ་ནི་རྟེན་ཅིང་འབྲེལ་པར་འབྱུང་བའི་དང་པོའི་དབྱེ་བ་ཡིན་ནོ། །འདིར་འདི་ཡོད་ན་ཞེས་བྱ་བ་ནི་ཡོད་པར་འགྱུར་ནའོ། །འདི་འབྱུང་བ་ནི་སྐྱེ་བའོ་ཞེས་བྱ་བ་ལ་ཡོད་པར་གྱུར་པ་ཞེས་བྱ་བ་འདིས་ནི་ཡོད་པའི་སྒྲ་ཡོད་པ་ཉིད་ཀྱིས་དོན་སྟོན་པར་བྱེད་པ་ཡིན་ནོ། །བསྔགས་པའི་དོན་བསལ་བའི་ཕྱིར་ནི་སྐྱེ་བའོ་ཞེས་སྨོས་པ་ཡིན་ནོ། །འབྱུང་བའི་དོན་དུ་མ་ཡིན་པ་ལས་སྐྱེ་བའི་དོན་གྱིས་བྱ་བ་བྱེད་པར་སྟོན་ཏོ། །འདི་སྐྱེས་པས་ཞེས་བྱ་བ་ནི་བྱུང་བའི་ཕྱིར་ཞེས་བྱ་བ་ཡིན་ནོ། །འདི་སྐྱེ་བ་སྟེ་ཞེས་བྱ་བ་ནི་འབྱུང་བ་སྟེ་ཞེས་བྱ་བའི་ཚིག་གིས་དེ་འབྱུང་བའི་དོན་ཉིད་སྟོན་པར་བྱེད་དོ། །ཅིའི་ཕྱིར་དང་པོ་མ་ཕྱེ་བར་བསྟན་གྱི། ཕྱེ་བ་ཁོ་ནས་མ་ཡིན་ཞེ་ན་ཞེས་བྱ་བ་ནི་ལོག་པར་སྨྲས་པ་ཡིན་ཏེ། འདི་སྐད་བརྗོད་པར་བྱ་སྟེ། ཅིའི་ཕྱིར་དང་པོ་འདི་ཕྱེ་སྟེ་བསྟན། མ་ཕྱེ་བ་ཁོ་ནར་མ་ཡིན་ཞེས་བྱའོ་ཞེ་ན། དེ་སྐད་བརྗོད་པར་བྱ་བ་མ་ཡིན་ཏེ། དབྱེ་བའི་ཚིག་ནི་དགོས་པ་དང་བཅས་པའི་ཕྱིར་རོ། །འདི་ལྟར་དབྱེ་བའི་ཚིག་ལ་དགོས་པ་ཡོད་དེ། དེ་གང་ཞེ་ན། མ་རིག་པ་ལ་སོགས་པའི་རྣམ་པར་དབྱེ་བ་བསྟན་པ་མ་བྱས་པར་ནི་རྣམ་པར་དབྱེ་བ་སྟོན་པ་འབྲེལ་པ་མེད་པར་འགྱུར་བའི་ཕྱིར་རོ། །དེ་བས་ན་དབྱེ་བ་སྟོན་པ་ཡང་དགོས་པ་དང་བཅས་པ་ཉིད་དུ་བསྟན་ཏོ། །མ་རིག་པ་ལ་སོགས་པའི་རྐྱེན་གྱི་དོན་བསྟན་པའི་ཕྱིར་རོ། །དེ་དག་རྐྱེན་གྱི་དོན་ཡང་འདི་ཡིན་ཏེ་ཞེས་བྱ་བ་ནི་དེ་ལྟ་མ་ཡིན་ན་མ་རིག་པའི་རྐྱེན་གྱིས་འདུ་བྱེད་ཅེས་བྱ་བ་དོན་གང་གིས་མ་རིག་པ་འདུ་བྱེད་ཀྱི་རྐྱེན་ཞེས་བྱ་བ་བསྟན་པར་འགྱུར་རོ། །སྐྱེ་བའི་རྐྱེན་གྱིས་རྒ་ཤི་ཞེས་བྱ་བའི་བར་དུ་ཡང་དེ་བཞིན་ནོ། །རྐྱེན་གྱི་མཚན་ཉིད་ཐ་དད་པ་མེད་པའི་ཕྱིར་རོ་ཞེས་བྱ་བ་ནི་གང་གི་ཕྱིར་ནང་དང་ཕྱིའི་རྟེན་ཅིང་འབྲེལ་པར་འབྱུང་བའི་རྐྱེན་གྱི་མཚན་ཉིད་དེ་དག་ནི་དབྱེ་བ་མེད་པ་ཡིན་ཏེ། འདི་ལྟ་སྟེ་འདི་ཡོད་པས་འདི་འབྱུང་འདི་སྐྱེས་པས་འདི་སྐྱེ་བ་སྟེ་ཞེས་བྱ་བ་ཡིན་ནོ། །ཕྱིའི་རྟེན་ཅིང་འབྲེལ་བར་འབྱུང་བ་བསྟན་
པ་ལ་དགོས་པ་ཅི་ཡོད་ཅེ་ན། རྒྱུ་མེད་པ་དང་མི་མཐུན་པ་རྒྱུར་ལྟ་བ་རབ་ཏུ་གསལ་བ་དགོས་པ་ཡིན་ནོ། །འདི་ལྟ་སྟེ་འདི་ཡོད་ན་འདི་འབྱུང་འདི་སྐྱེས་པས་འདི་སྐྱེ་བ་སྟེ་ཞེས་བྱ་བའི་ཚིག་འདི་གཉིས་ལ་དོན་གྱི་བྱེ་བྲག་ཐ་དད་པ་ཅི་ཞིག་ཡོད་ཅེ་ན། འདི་གཉི་གས་ཀྱང་རྐྱེན་ཡོད་པ་སྔོན་དུ་སོང་བ་ཅན་གྱི་འབྲས་བུ་སྐྱེ་བ་ཡིན་པ་རྗོད་པར་བྱེད་དོ། །དེའི་ཕྱིར་ཅི་ཡང་མེད་དོ་ཞེས་སྨྲས་སོ། །གལ་ཏེ་མེད་ན་འོ་ན་ཅིའི་ཕྱིར་གཉིས་བརྗོད་ཅེ་ན་དེའི་ཕྱིར་གཅིག་ལ་གཅིག་འཆད་པ་ཡིན་པའི་ཕྱིར་རོ་ཞེས་སྨོས་སོ། །ཇི་ལྟར་གཅིག་ལ་གཅིག་འཆད་པ་ཡིན་ཞེ་ན། འདི་ཡོད་ན་འདི་འབྱུང་ཞེས་བྱ་བས་ནི་འདི་སྐྱེས་པས་འདི་སྐྱེ་བ་སྟེ་ཞེས་བྱ་བ་བསྟན་པ་ཡིན་ནོ། །འདི་སྐྱེས་པས་འདི་སྐྱེ་བ་སྟེ་ཞེས་བྱ་བས་ནི་འདི་ཡོད་ན་འདི་འབྱུང་ཞེས་བྱ་བ་བསྟན་པ་ཡིན་ནོ། །གཅིག་ལ་གཅིག་འཆད་པའི་དགོས་པ་སྟོན་པ་ཡང་གང་ཡང་རུང་བ་ཞིག་བརྗོད་ན་ནི་གྲངས་ཅན་པའི་དོན་ཡོད་པའམ། སྐྱེ་བར་རྟོག་པ་བྱེད་པར་འགྱུར་ཏེ་ཞེས་བྱ་བ་སྨྲས་སོ། །ཇི་ལྟ་ཞེ་ན། དེའི་ཕྱིར་དེ་དག་ནི་སྐྱེ་བ་མེད་པར་ཡང་རྒྱུ་དང་འབྲས་བུ་ཡོད་པར་འདོད་ཀྱི་ཞེས་སྨྲས་ཏེ། ཡོད་པ་གང་ཡིན་པ་དེ་ཉིད་ཡོད་པ་ཡིན་ནོ། །མེད་པ་གང་ཡིན་པ་དེ་ཉིད་མེད་པ་ཡིན་ནོ་ཞེས་བྱ་བ་ནི་གྲུབ་པའི་མཐའ་ཡིན་པའི་ཕྱིར་རོ། །འདི་སྐྱེས་པས་འདི་སྐྱེ་བ་སྟེ་ཞེས་བྱ་བའི་ཚིག་གིས་ནི་གྲངས་ཅན་པའི་དོན་ཡོད་པ་གསལ་བ་ཡིན་ནོ། །མ་བྱུང་བ་ལས་བྱུང་བ་སྐྱེ་བ་ཡིན་པར་ནི་མ་ཡིན་ཏེ། ཇི་ལྟར་འདོད་ཅེ་ན་སྐྱེ་བའི་སྒྲ་བྱས་པ་མ་ཡིན་གྱི། མངོན་པར་གསལ་བའི་རྣམ་གྲངས་སུ་གཏོགས་པའི་ཕྱིར་རོ། །འདི་ཡོད་ན་འདི་འབྱུང་ཞེས་བྱ་བས་མ་བྱུང་བ་ལས་བྱུང་བ་རབ་ཏུ་བསྟན་པ་ཡིན་ཏེ། ཇི་ལྟ་ཞེ་ན། འདི་ཡོད་པ་མ་ཡིན་ན་འདི་མེད་དོ་ཞེས་བསྟན་པ་ཡིན་པའི་ཕྱིར་རོ། །འདིར་རིགས་པ་ཡང་བརྗོད་པར་བྱ་སྟེ། རྒྱུ་ལ་འབྲས་བུ་ཡོད་པ་མ་ཡིན་ནོ་ཞེས་བྱ་བ་ནི་དམ་བཅའ་བའོ། །ཅིའི་ཕྱིར་ཞེ་ན། དེ་སྐྱེ་བ་ལ་བྱེད་པ་མཐོང་བའི་ཕྱིར་རོ། །དཔེ་ཅི་ཡོད་ཅེ་ན། ལྷན་ཅིག་བྱེད་པ་དང་བཅས་པའི་རྒྱུ་ཡང་ཐལ་ཞར་དང་སྐུད་པ་དང་ཆུ་དང་སྐྱེས་བུ་རྣམས་ལྷན་ཅིག་བྱེད་པ་དང་བཅས་པའི་རྒྱུ་རྣམས་ཀྱི་བྱེད་པ་ནི་བདག་ཉིད་མེད་པའི་བུམ་པ་འབྲས་བུ་སྐྱེ་བ་ལ་མཐོང་ངོ༌། །སྐྱེ་བའི་གཞི་འཇིམ་གོང་རྒྱུ་མ་ཚང་བ་མེད་པ་རྣམས་ཀྱི་བྱེད་པ་ཡང་དེ་སྐྱེ་བ་ལ་མཐོང་བ་ཡིན་པས་དེ་ལ་འབྲས་བུ་ཡོད་པ་མ་ཡིན་ནོ་ཞེས་བྱ་བ་གྲུབ་པ་ཡིན་ནོ། །གཞན་ཡང་འདི་སྐྱེས་པས་ཞེས་བྱ་བ་ནི་གཞན་དུ་ཡང་ཞེས་བྱ་བའི་ཐ་ཚིག་གོ །འདི་སྐྱེས་པས་
འདི་སྐྱེ་བ་སྟེ་ཞེས་བྱ་བ་མ་བརྗོད་ན་ནི་རྒྱུ་རྟག་པ་དགག་པ་མ་བྱས་པར་འགྱུར་ཏེ། སྐྱེས་པ་ཁོ་ན་རྐྱེན་གྱིས་དངོས་པོར་བསྟན་པའི་ཕྱིར་གཙོ་བོ་དང་སྐྱེས་བུ་དང༌། དབང་ཕྱུག་དང༌། དུས་ལ་རྡུལ་ཕྲ་རབ་ལ་སོགས་པ་རྟག་པ་རྒྱུ་ཡིན་པ་རྣམས་རབ་ཏུ་བཀག་པ་ཡིན་ནོ། །འདི་ཡོད་ན་འདི་འབྱུང་ཞེས་བྱ་བ་མ་བརྗོད་ན་ནི་ངེས་པར་གཏན་ལ་ཕབ་པ་མ་ཡིན་པར་འགྱུར་རོ། །གང་སྐྱེས་པས་གང་སྐྱེ་བ་ནི་དེ་ཁོ་ན་ཡོད་ན་དེ་ཡོད་པ་ཡིན་གྱི་བདག་ལ་སོགས་པ་རྟག་པ་ལས་ཀྱང་མ་ཡིན་ཏེ། དེ་ལྟ་ན་ནི་རྒྱུ་རྟག་པ་དགག་པ་མ་བྱས་པར་འགྱུར་རོ་ཞེས་བྱ་བ་ནི་ཇི་ལྟར་བྱེ་བྲག་པ་དག་ན་རེ་མ་རིག་པའི་རྐྱེན་གྱིས་འདུ་བྱེད་སྐྱེ་བའི་རྐྱེན་གྱིས་རྒ་ཤི་ཞེས་བྱ་བ་བདེན་ཏེ། འོན་ཀྱང་བདག་ཡོད་ན་ཡིན་ནོ། །དེ་བཞིན་དུ་དབང་ཕྱུག་ལ་སོགས་པ་རྒྱུར་སྨྲ་བ་དག་དབང་ཕྱུག་ལ་སོགས་པ་ཡོད་ན་ཡིན་ནོ་ཞེས་ཟེར་རོ། །དེའི་ཕྱིར་དེ་ལྟ་ན་ཡང་རྒྱུ་རྟག་པ་དགག་པ་མ་བྱས་པར་འགྱུར་རོ་ཞེས་བྱ་བ་འདི་སྨོས་སོ། །མདོར་ན་དོན་འདི་ལྟ་སྟེ་ས་བོན་ལ་སོགས་པ་རྒྱུ་མི་རྟག་པ་རྣམས་ཞིང་ལ་སོགས་པ་རྒྱུ་གཞན་དང་རྗེས་སུ་བསྡོངས་པའི་རང་གི་མཐུ་ནི་མྱུ་གུ་ལ་སོགས་པ་འབྲས་བུ་སྐྱེ་བ་ལ་རྒྱུར་འགྱུར་བ་ནི་མངོན་སུམ་དུ་གྲུབ་པ་ཡིན་ཏེ། རྟག་པ་མ་ཡིན་ནོ། །ལྷན་ཅིག་བྱེད་པའི་རྒྱུ་གཞན་གྱིས་ཡོངས་སུ་ཟིན་པའི་རང་གི་མཐུ་ཡང་རྟག་པ་མ་ཡིན་ནོ། །གཞན་ན་རེ་ཡན་ལག་གཞན་དང་གཞན་སྟོན་པ་ཡིན་ཞེའོ་ཞེས་བྱ་བ་ཇི་ལྟ་བུ་ཞེ་ན། མ་རིག་པ་ཡོད་ན་འདུ་བྱེད་འབྱུང་བ་ཡིན་ལ་འདུ་བྱེད་རྣམས་སྐྱེས་པས་རྣམ་པར་ཤེས་པ་སྐྱེ་བ་ཡིན་ནོ་ཞེས་བྱ་བ་ལ་སོགས་པ་དེ་བཞིན་དུ་རྟེན་ཅིང་འབྲེལ་བར་འབྱུང་བ་དང་པོ་ནས་རྟེན་ཅིང་འབྲེལ་བར་འབྱུང་བ་མཐའ་དག་གཟུང་བ་ཡིན་ནོ། །གཞན་ན་རེ་དུམ་བུ་གསུམ་རྣམ་པར་བཞག་པ་ཡིན་ནོ་ཞེའོ་ཞེས་བྱ་བ་ནི་ཁ་ཆེ་རྣམ་པར་སྨྲ་བ་དག་ཡིན་ཏེ། ཅིའི་ཕྱིར་ཞེ་ན། སྔོན་དང་ཕྱི་མ་དང་བར་གྱི་མཐའ་ལ་རྨོངས་པ་བཟློག་པའི་ཕྱིར་རོ། །འདི་ཡོད་ན་འདི་འབྱུང་ཞེས་བྱ་བ་ནི་སྔོན་གྱི་མཐའ་ཡོད་པ་ན་བར་གྱི་མཐའ་ཡོད་པ་ཡིན་ནོ་ཞེས་བྱའོ། །འདི་སྐྱེས་པས་འདི་སྐྱེ་བ་སྟེ་ཞེས་བྱ་བ་ནི་བར་གྱི་མཐའ་སྐྱེས་པས་ཕྱི་མའི་མཐའ་སྐྱེ་བ་ཡིན་ནོ། །དེ་ལ་མ་རིག་པ་དང་འདུ་བྱེད་ཡན་ལག་གཉིས་ནི་སྔོན་གྱི་མཐའ་བསྡུས་པ་ཡིན་ནོ། །རྣམ་པར་ཤེས་པ་དང་མིང་དང་གཟུགས་དང༌། སྐྱེ་མཆེད་དྲུག་དང༌། རེག་པ་དང༌། ཚོར་བ་དང་སྲེད་པ་དང་ལེན་པ་དང༌། སྲིད་པ་དང་ཡན་ལག་བརྒྱད་ནི་བར་གྱི་མཐས་བསྡུས་པ་ཡིན་
ནོ། །སྐྱེ་བ་དང༌། རྒ་ཤི་ཡན་ལག་གཉིས་ནི་ཕྱི་མའི་མཐས་བསྡུས་པ་ཡིན་ནོ། །དེ་ལ་སྔོན་གྱི་ཚེ་འདོད་ཆགས་དང་ཞེ་སྡང་དང་གཏི་མུག་ལ་སོགས་པའི་ཉོན་མོངས་པའི་གནས་སྐབས་རྣམས་ནི་མ་རིག་པའི་སྒྲས་བསྟན་ཏེ། དུས་འདས་པ་རྣམས་མུན་པའི་རྣམ་པར་གྱུར་པའི་ཕྱིར་རོ། །དེ་ཉིད་ན་བསོད་ནམས་དང་བསོད་ནམས་མ་ཡིན་པ་དང་མི་གཡོ་བའི་ལས་ཀྱི་གནས་སྐབས་རྣམས་ནི་ད་ལྟར་གྱི་སྐྱེ་བ་མངོན་བར་འདུ་བྱེད་པའི་དོན་གྱིས་འདུ་བྱེད་ཀྱི་སྒྲས་བསྟན་ཏོ། །ད་ལྟར་སྐྱེ་བའི་ཚེ་མའི་མངལ་དུ་ཉིད་མཚམས་སྦྱོར་བའི་ཕུང་པོ་རྣམས་ནི་རྣམ་པར་ཤེས་པ་ཡིན་ཏེ། ངེས་པའི་ཚིག་གི་ཚུལ་གྱིས་ན་སྐྱེ་བའི་དོན་གྱིས་དེ་དག་ལ་རྣམ་པར་ཤེས་པའི་ཕྱིར་རོ། །དེའི་འོག་ཏུ་སྐྱེ་མཆེད་དྲུག་མ་དོད་ཀྱི་བར་དུ་མིང་དང་གཟུགས་ཡིན་ཏེ། དེ་ཙམ་ཞིག་སྐྱེ་བར་རབ་ཏུ་བསྟན་པའི་ཕྱིར་རོ། །དེའི་འོག་ཏུ་གསུམ་འདུས་པ་མ་བྱུང་གི་བར་དུ་མིག་ལ་སོགས་པའི་དབང་པོ་མངོན་པར་གྲུབ་པ་ནི་སྐྱེ་མཆེད་དྲུག་ཡིན་ཏེ། གཞི་དང་རྟེན་པ་ཡོངས་སུ་རྫོགས་པའི་ཕྱིར་རོ།། ལུས་དང་ཡིད་ཀྱི་སྐྱེ་མཆེད་གཉིས་ནི་མིང་དང་གཟུགས་ཀྱི་གནས་སྐབས་ཉིད་ན་མེད་པའི་ཕྱིར་རོ། །དེའི་འོག་ཏུ་རེག་པ་རྣམ་པར་གཞག་སྟེ། བདེ་བ་དང་སྡུག་བསྔལ་ལ་སོགས་པའི་རྒྱུ་ཀུན་ཡོངས་སུ་གཅོད་པར་ནུས་པ་ཡིན་ཏེ། གནས་ཡོངས་སུ་རྫོགས་པའི་ཕྱིར་ཡིན་གྱི་རྣམ་པར་ཤེས་པ་དང་མིང་དང་གཟུགས་ཀྱི་གནས་སྐབས་གཉིས་ན་རེག་པ་ནི་མ་ཡིན་ནོ། །དེ་ལ་བརྟེན་ནས་ཚོར་བ་རྣམ་པར་གཞག་སྟེ། ཀུན་དུ་འཁྲིག་པའི་འདོད་ཆགས་ཀུན་ནས་འབྱུང་བའི་ཕྱིར་དང༌། རྒྱུ་ཡོངས་སུ་རྫོགས་པའི་ཕྱིར་ཡིན་གྱི། སྔར་ཡང་ཚོར་བ་ནི་མེད་པ་མ་ཡིན་ནོ། །དེ་ནས་འཁྲིག་པ་ཉེ་བར་སྤྱོད་པའི་འདོད་ཆགས་ཀུན་དུ་འབྱུང་བའི་གནས་སྐབས་ན་སྲེད་པ་རྣམ་པར་གཞག་སྟེ། འཁྲིག་པའི་ལོངས་སྤྱོད་ཀྱི་བདེ་བ་དེའི་ཚེ་འབྱུང་བའི་ཕྱིར་རོ། །དེའི་ཚེ་ལོངས་སྤྱོད་ཐོབ་པའི་ཚོལ་བ་བྱུང་བ་ན་ལེན་པ་རྣམ་པར་གཞག་སྟེ། དེའི་ཚེ་འདོད་ཆགས་དང༌། ཞེ་སྡང་དང་གཏི་མུག་ལ་སོགས་པའི་ཉོན་མོངས་པ་ཡོངས་སུ་སྨིན་པའི་ཕྱིར་རོ། །དེ་ནས་སྲིད་པ་རྣམ་པར་གཞག་སྟེ། འདི་ལྟར་ལེན་པའི་རྐྱེན་གྱིས་ཡང་སྲིད་པའི་ལས་རབ་ཏུ་སོགས་པ་ཡིན་ནོ། །དེ་ནས་ཚེ་ཕྱི་མ་ལ་ཡང་སྲིད་པར་སྐྱེ་བའི་དོན་གྱིས་སྐྱེ་བ་རྣམ་པར་གཞག་གོ །དེ་ནས་རྒ་ཤི་ཡིན་པར་རིག་པར་བྱ་སྟེ། དེ་དག་ཙམ་གྱིས་དོན་བྱས་པའི་ཕྱིར་རོ། །དེ་ནི་མ་རིག་པ་ལ་སོགས་པ་དེ་དག་
རྐྱེན་ཡིན་པའི་ཚིག་ཁོ་ནས་གཉི་ག་གྲུབ་པས་ཞེས་བྱ་བ་ནི་འདི་ལྟ་སྟེ་ཡན་ལག་གཞན་དང་གཞན་དུམ་བུ་གསུམ་རྣམ་པར་གཞག་པ་ཡང་ཞེས་སྟོན་ཏོ། །ཇི་ལྟར་ཡན་ལག་གཞན་དང་གཞན་འགྲུབ་ཅེ་ན། འདི་ལྟར་མ་རིག་པའི་རྐྱེན་གྱིས་འདུ་བྱེད། འདུ་བྱེད་ཀྱི་རྐྱེན་གྱིས་རྣམ་པར་ཤེས་པ་ཞེས་བྱ་བ་ནས། སྐྱེ་བའི་རྐྱེན་གྱིས་རྒ་ཤི་ཞེས་སྨོས་པ་ཡིན་ནོ། །དུམ་བུ་གསུམ་རྣམ་པར་གཞག་པ་ཡང་འགྲུབ་པ་ཡིན་ཏེ། འདི་ལྟར་མ་རིག་པ་འདུ་བྱེད་ནི་སྔོན་གྱི་མཐའི་དུམ་བུ་ཡིན་ནོ། །རྣམ་པར་ཤེས་པ་ནས་སྲིད་པའི་བར་ནི་བར་གྱི་མཐའི་དུམ་བུ་ཡིན་ནོ། །སྐྱེ་བ་དང་རྒ་ཤི་ནི་ཕྱི་མའི་མཐའི་དུམ་བུ་ཡིན་པས་སོ་ཞེས་བྱ་བ་ལ་སོགས་པ་གསུངས་པ་དེར་ཡང་ཡན་ལག་གཞན་དང་གཞན་དུམ་བུ་གསུམ་རྣམ་པར་གཞག་པ་མེད་པས་གཉིས་མི་བརྗོད་པར་འགྱུར་རོ་ཞེས་བྱ་བ་ནི་སྤྲེའུ་ལྟ་བུའི་མདོ་སྡེ་ལས་སོ། །ཇི་ལྟར་ཡན་ལག་གཞན་དང་གཞན་མེད་པ་ཡིན་ཞེ་ན། ཡན་ལག་བཅུ་གཉིས་རྗོད་པར་མི་བཞེད་པའི་ཕྱིར་རོ། །དེ་ཉིད་ཀྱི་ཕྱིར་དུམ་བུ་གསུམ་རྣམ་པར་གཞག་པ་ཡང་མེད་པར་འགྲུབ་པ་ཡིན་ནོ། །མངོན་སུམ་དང་བརྒྱུད་པའི་རྐྱེན་གྱི་དངོས་པོ་སྟོན་པ་ཡིན་ནོ་ཞེས་བྱ་བ་ནི་འདི་ཡོད་ན་འདི་འབྱུང་ཞེས་བྱ་བ་ནི་མངོན་སུམ་གྱི་རྐྱེན་གྱི་དངོས་པོ་སྟོན་ཏེ། ཇི་ལྟར་མ་རིག་པའི་རྐྱེན་གྱིས་འདུ་བྱེད་ཅེས་བྱ་བ་སྟེ། མ་རིག་པ་ལས་དེ་མ་ཐག་ཏུ་དེ་དག་འབྱུང་བའི་ཕྱིར་རོ། །འདི་སྐྱེས་པས་འདི་སྐྱེ་བ་སྟེ་ཞེས་བྱ་བ་ནི་བརྒྱུད་པའི་རྐྱེན་གྱི་དངོས་པོ་སྟོན་ཏེ། འདི་ལྟར་འདུ་བྱེད་ཀྱི་རྐྱེན་གྱིས་རྣམ་པར་ཤེས་པ་ཞེས་བྱ་བ་ཡིན་ནོ། །རྣམ་པར་ཤེས་པ་ལ་སོགས་པ་ལ་ནི་མ་རིག་པ་བརྒྱུད་བའི་སྒོ་ནས་རྐྱེན་གྱི་དངོས་པོར་འགྱུར་ཏེ། འབྲས་བུ་ལ་ས་བོན་བཞིན་ནོ། །འདི་ལྟར་གང་དེ་སྐྱེས་པ་མ་ཡིན་ན་ནི་དེའི་རྐྱེན་གྱིས་འདུ་བྱེད་ཀྱང་མ་ཡིན་ལ། འདུ་བྱེད་ཀྱི་རྐྱེན་གྱིས་རྣམ་པར་ཤེས་པར་ཡང་མི་འགྱུར་ཞིང༌། རྒ་ཤིའི་བར་དུ་ཡང་རྒྱས་པར་སྦྱར་རོ་ཞེ་ན། དེ་དག་དགག་པ་ཡང་དེ་ཉིད་ཡིན་ནོ་ཞེས་བྱ་བ་ནི་དེ་ནི་མ་རིག་པ་ལ་སོགས་པ་དེ་དག་རྐྱེན་ཡིན་པའི་ཚིག་ཁོ་ནས་གཉི་ག་གྲུབ་པས་ཞེས་བསྟན་པ་ཡིན་ནོ། །ཇི་ལྟ་ཞེ་ན། མ་རིག་པའི་རྐྱེན་གྱིས་འདུ་བྱེད་ཅེས་བྱ་བས་ནི་མངོན་སུམ་གྱི་དངོས་པོ་བསྟན་པ་ཡིན་ནོ། །དེའི་རྐྱེན་ཅན་གྱི་འདུ་བྱེད་ཀྱི་རྐྱེན་གྱིས་རྣམ་པར་ཤེས་པ་ཞེས་བྱ་བས་ནི་བརྒྱུད་པའི་རྐྱེན་གྱི་དངོས་པོ་ངེས་པར་བྱས་པ་ཡིན་ནོ། །སྤྲེའུ་ལྟ་བུའི་མདོ་ལས་ཀྱང་སྲིད་པ་ན་མངོན་
སུམ་གྱི་རྐྱེན་གྱི་དངོས་པོ་ནི་བདེ་བ་མྱོང་བར་འགྱུར་བའི་རེག་པ་ལ་བརྟེན་ནས་བདེ་བའི་ཚོར་བ་སྐྱེའོ་ཞེས་བྱ་བ་དེ་ལ་སོགས་པ་གསུངས་པའི་ཕྱིར་བརྒྱུད་པའི་རྐྱེན་གྱི་དངོས་པོ་ཡོད་པ་མ་ཡིན་པས། གཉིས་མི་བརྗོད་པར་འགྱུར་རོ། །གཞན་དག་ན་རེ་ཚིག་དང་པོས་ནི་རྒྱུན་གྱིས་རྒྱུ་གནས་པ་སྔོན་དུ་སོང་བའི་འབྲས་བུ་གནས་པ་ཡིན་ནོ་ཞེས་བྱ་བ་ནི་རྒྱུན་གྱིས་ཞེས་སྨྲས་ཏེ། ཇི་ལྟ་ཞེ་ན། ཇི་སྲིད་དུ་རྒྱུན་གྱིས་རྒྱུ་གནས་པར་འདུག་པ་དེ་སྲིད་དུ་རྒྱུན་ཁོ་ནས་འབྲས་བུ་གནས་པ་ཡིན་ནོ། །རྒྱུན་གྱིས་ཞེས་སྨོས་པ་ནི་སྐད་ཅིག་མ་ནི་གཞན་དུ་གནས་པར་མི་རིགས་པའི་ཕྱིར་རོ། །འདིར་རྒྱུ་འབྲས་འབྲེལ་པ་ལ་རྒྱུན་གྱིས་སྒྲས་བསྟན་ཏོ། །འབྲས་བུ་གནས་པ་དེ་ཡང་རྒྱུ་གང་གིས་ཡིན་པ་མི་ཤེས་པས་དེའི་ཕྱིར་གཉིས་པས་ནི་ཞེས་བྱ་བ་ནི་འདི་སྐྱེས་པས་འདི་སྐྱེ་བ་སྟེ་ཞེས་བྱ་བ་ཡིན་ཏེ། རྒྱུ་སྐྱེས་པས་འབྲས་བུ་སྐྱེ་བ་ཡིན་ནོ་ཞེས་སྨྲའོ་ཞེ་ན་དེར་རྟེན་ཅིང་འབྲེལ་བར་འབྱུང་བ་བརྩམས་པ་ལ་གནས་པ་འཆད་པ་འབྲེལ་བ་ཅི་ཡོད་ཅེས་བྱ་བ་ནི་འདུས་བྱས་ཀྱི་མཚན་ཉིད་ནི་རྣམ་པ་གསུམ་སྟེ། སྐྱེ་བ་དང་འཇིག་པ་དང་གནས་པ་ལས་གཞན་དུ་འགྱུར་བའོ། །དེ་ལ་རྟེན་ཅིང་འབྲེལ་བར་འབྱུང་བ་གནས་པར་འཆད་པའི་སྐབས་འབྲེལ་བ་ཡོད་པ་མ་ཡིན་ཏེ། སྐབས་མ་ཡིན་པའི་ཕྱིར་རོ། །འོན་ཏེ་དེ་ཡང་སྐྱེ་བ་ཁོ་ན་ཡིན་ན་ནི་ཞེས་བྱ་བ་ལ་དེ་ཡང་ཞེས་བྱ་བ་ནི་གནས་པ་ལ་སྦྱར་ཏེ་སྐད་ཅིག་མ་ལ་ནི་གཞན་དུ་གནས་པ་ཡོད་པ་མ་ཡིན་པའི་ཕྱིར་རོ། །དེ་ལྟར་བྱས་ན་དེར་རྟེན་ཅིང་འབྲེལ་བར་འབྱུང་བ་བརྩམས་པ་ལ་གནས་པ་འཆད་པ་འབྲེལ་བ་ཅི་ཡོད་ཅེས་བྱ་བ་དེའི་ལན་བཏབ་པ་ཡིན་ཏེ། གནས་པ་ནི་སྐྱེ་བའི་རྣམ་གྲངས་ཡིན་པའི་ཕྱིར་གནས་པ་ཡང་ཁོངས་སུ་གཏོགས་པ་ཁོ་ན་ཡིན་པའི་ཕྱིར་རོ་ཞེ་ན་དེའི་ཕྱིར་སློབ་དཔོན་གྱིས་འདི་ཡོད་ན་འདི་འབྱུང་འདི་སྐྱེས་པས་འདི་སྐྱེ་ཞེས་བྱ་བའི་ཚིག་གཉིས་ལ་དོན་ལ་བྱེ་བྲག་ཅི་ཡོད་ཅེས་སྨྲས་སོ། །གཉི་གས་ཀྱང་རྒྱུ་སྔོན་དུ་སོང་བ་ཅན་གྱི་སྐྱེ་བ་ཡིན་པར་བསྟན་པས་སོ། །གལ་ཏེ་རྒྱུན་ཐོག་མར་སྐྱེས་པའི་བྱེ་བྲག་ལ་བརྟེན་ནས་འདི་དག་སྨྲ་ན་དེའི་ཕྱིར། གལ་ཏེ་རྒྱུན་སྐྱེས་པ་དང་གནས་པ་ཡིན་སྔ་མ་སྐྱེས་པ་སྐྱེ་བ་ཡིན་ཏེ། སྔར་སྐྱེ་ལ་ཕྱིས་གནས་པ་ཡིན་པས་སྐྱེ་བ་མ་བཤད་པར་གནས་པའི་དུས་ཅིའི་ཕྱིར་བཤད་ཅེས་བྱ་བ་སྨྲས་ཏེ། སྔར་སྐྱེ་ལ་ཞེས་བྱ་བ་ནི་དང་པོར་སྐྱེས་པའོ། །ཕྱིས་གནས་པ་ཡིན་པས་ཞེས་བྱ་བ་ནི་རྒྱུན་གྱི་སྐྱེས་པ་སྔོན་དུ་སོང་བ་ཅན་གྱི་རྒྱུན་གྱིས་གནས་
པ་ཡིན་པས་དུས་ལོག་པར་འཆད་པ་རིགས་པ་མ་ཡིན་གྱི། འདི་སྐྱེས་པས་འདི་སྐྱེ་ཞིང་འདི་ཡོད་ན་འདི་འབྱུང་ཞེས་བྱ་བ་ནི་རིགས་པར་འགྱུར་བ་ཡིན་ནོ། །ནུར་ནུར་པོ་དང་ནར་ནར་པོ་ལ་སོགས་པ་དང༌། ཞོ་དང་འོ་མ་ལ་སོགས་པ་ཡང་སྐྱེས་ཏེ་གནས་པ་ཡིན་ན་རྒྱུ་གང་ཞིག་གནས་པ་ཡོད་ན་ཡོད་དོ་ཞེས་འདི་བརྗོད་པར་བྱ་ཞེས་བྱ་བ་ནི་ནར་ནར་པོ་དང་ནུར་ནུར་པོ་ལ་སོགས་པ་ལ་མ་གཏོགས་པ་རྒྱུ་གནས་སྔོན་དུ་སོང་བ་ཅན་ནམ། འོ་མ་དང་ཞོ་ལ་སོགས་པ་མ་གཏོགས་པ་རྒྱུ་གནས་པ་སྔོན་དུ་སོང་བ་ཅན་གྱི་ནུར་ནུར་པོ་དང་ནར་ནར་པོ་ལ་སོགས་པའམ་ཞོ་དང་འོ་མ་ལ་སོགས་པ་གནས་པ་ནི་ཡོད་པ་མ་ཡིན་ཏེ། ནུར་ནུར་པོ་རྣམ་པར་ཞིག་ན་ནར་ནར་པོར་འགྱུར། ནར་ནར་པོ་རྣམ་པར་ཞིག་ན་གོར་གོར་པོར་འགྱུར། གོར་གོར་པོ་རྣམ་པར་ཞིག་ན་མཁྲང་པོར་འགྱུར་བ་ཡིན་ལ་འོ་མ་ཞིག་ན་ཞོར་འགྱུར་ཞིང་ཞོ་ཞིག་ན་དར་བར་འགྱུར་བ་ལ་སོགས་པ་ཡིན་ན་དེའི་ཕྱིར་འདིར་རྒྱུ་གནས་པ་གང་ཡིན་པ་བརྗོད་པར་བྱ་དགོས་ལ་གང་གི་ཕྱིར་ནར་ནར་པོ་ལ་སོགས་པའི་རྒྱུན་གྱི་མཚན་ཉིད་གནས་པ་ཡིན་ཞེས་བྱ། གང་ཡང་རྒྱུ་ཟས་ལ་སོགས་པ་གནས་པ་སྔོན་དུ་སོང་བ་ཅན་གྱི་ནུར་ནུར་པོ་དང་ནར་ནར་པོ་ལ་སོགས་པ་གནས་པ་ཡིན་ནོ་ཞེས་བརྗོད་ན་ཡང་ཟས་ལ་སོགས་པའི་རྐྱེན་ཇི་སྲིད་དུ་རྗེས་སུ་འཇུག་པ་དེ་སྲིད་དུ་ནུར་ནུར་པོ་དང་ནར་ནར་པོ་ལ་སོགས་པ་དེ་དག་གནས་པ་ཡིན་པར་ཐལ་བར་འགྱུར་ཏེ། དེ་ནི་འདོད་པ་མ་ཡིན་ནོ། །དེ་བས་ན་རྒྱུ་གང་ཞིག་གནས་པ་ཡོད་ན་ཡོད་དོ་ཞེས་འདིར་བརྗོད་པར་བྱ་གྲིབ་མ་དང་འོད་དང༌། ཨུཏྤལ་ལ་སོགས་པ་རྒྱུ་གནས་པ་སྔོན་དུ་སོང་བ་ཅན་གྱི་གནས་པ་ཡིན་པར་མཐོང་བ་མ་ཡིན་ནམ་ཞེ་ན། མཐོང་བ་ནི་བདེན་ཏེ་ཡོད་པ་མ་ཡིན་པར་ཡང་རྒྱུ་གནས་ན་འབྲས་བུ་གནས་པ་མཐོང་བའི་ཕྱིར་རོ། །འདི་ཡོད་ན་འདི་འབྱུང་ཞེས་ངེས་པར་བརྗོད་པར་བྱ་བ་མ་ཡིན་ཏེ། ཚོགས་པའམ་རྐྱེན་སྔར་བྱུང་བས་གྲིབ་མ་དང༌། འོད་དང་ཨུཏྤ་ལ་ལ་སོགས་པ་ཡིན་པས་དེ་དག་རྒྱུ་གནས་པ་སྔོན་དུ་སོང་བ་ཅན་གྱི་གནས་པ་ཡིན་པར་ཡང་མ་གྲུབ་པ་ཡིན་ནོ་ཞེས་བྱའོ། །ཕ་རོལ་པོ་དག་ན་རེ་ཞེས་བྱ་བ་ནི་ཚིག་དང་པོ་ཀུན་གྱིས་རྣམ་པ་གཞན་བསྟན་པ་ཡིན་ནོ་སྙམ་དུ་སེམས་ནའོ་ན་ནི་རྒྱུ་མེད་པ་ཅན་དུ་འགྱུར་རོ། །ཅི་ཞེ་ན་འབྲས་བུ་སྐྱེ་བའོ། འདི་ལྟར་འདི་སྐྱེས་པས་འདི་སྐྱེ་བ་སྟེ། དེའི་ཕྱིར་ཞེས་བྱ་བ་ནི་འབྲས་བུ་ཡོད་ན་རྒྱུ་འཇིག་པར་སྨྲའོ་ཞེས་གྲགས་
པ་ཡིན་ནོ་ཞེ་ནའོ། །འབྲས་བུ་རྒྱུ་མེད་པ་ཅན་ཉིད་ཡིན་པར་ཇི་ལྟར་དོགས་ཤེ་ན། རྒྱུའི་ཚིག་མེད་པའི་ཕྱིར་ཏེ། ཇི་ལྟར་རྒྱུ་འཇིག་པའི་རྒྱུ་ནི་སྨྲས་ཀྱི་འབྲས་བུ་སྐྱེ་བའི་ནི་མ་སྨྲས་པའི་ཕྱིར་རོ། །གཞན་དུ་བསྟན་པ་མེད་པ་ལ་གཞན་དུ་སྟོན་པ་ནི་རང་དགའི་ཚིག་ཙམ་དུ་ཟད་དེ་མདོ་མ་ཡིན་པའི་ཕྱིར་དང་ཞེས་བྱ་བ་ནི། འདི་ཡོད་ན་འདི་འབྱུང་ཞེས་བྱ་བས་འདིར་གཞན་དུ་བསྟན་པ་མེད་དེ་གཞན་དུ་བསྟན་པ་མེད་པ་ཁོ་ན་ལ་འབྲས་བུ་ཡོད་ན་རྒྱུ་འཇིག་གོ་ཞེས་གཞན་དུ་སྟོན་ཏེ། འབྲས་བུ་ཡོད་ན་རྒྱུ་འཇིག་གོ་ཞེས་སྟོན་པ་ནི་རང་གི་ཚིག་ཙམ་དུ་ཟད་དོ། །ཅིའི་ཕྱིར་ཞེ་ན་མདོ་མ་ཡིན་པའི་ཕྱིར་ཏེ། མདོ་ལས་ནི་འབྲས་བུ་ཡོད་ན་རྒྱུ་འཇིག་པར་བསྟན་པ་མ་ཡིན་གྱི་འོ་ན་ཅི་ཞེ་ན་རྒྱུ་ཡོད་ན་འབྲས་བུ་ཡོད་པ་ཁོ་ནར་བསྟན་པ་ཡིན་ཏེ། འདི་ཡོད་ན་འདི་འབྱུང་འདི་སྐྱེས་པས་འདི་སྐྱེ་བ་སྟེ། འདི་ལྟ་སྟེ་མ་རིག་པའི་རྐྱེན་གྱིས་འདུ་བྱེད་ཅེས་བྱ་བ་ནས། སྐྱེ་བའི་རྐྱེན་གྱིས་རྒ་ཤི་ཞེས་བྱ་བའི་བར་དུ་གསུངས་པའི་ཕྱིར་རོ། །གལ་ཏེ་འབྲས་བུ་ཡོད་ན་རྒྱུ་འཇིག་པར་འགྱུར་བ་ལ་དགོངས་པ་ཡིན་ན་ནི་འདི་ལྟ་སྟེ། འདུ་བྱེད་ཀྱི་རྐྱེན་གྱིས་མ་རིག་པ་འཇིག་པར་འགྱུར་ཞེས་གསུངས་པར་འགྱུར་རོ། །རྒྱུ་ཞིག་པ་སྐྱེ་བ་མ་ཡིན་ལ་འབྲས་བུ་ལ་བརྟེན་པ་ཡང་མ་ཡིན་ཏེ། སྐད་ཅིག་མའི་ཆོས་འཇིག་པ་ལ་རྐྱེན་མེད་པའི་ཕྱིར་རོ་ཞེས་བྱ་བ་ནི་རྟེན་ཅིང་འབྲེལ་བར་འབྱུང་བ་ཞེས་བྱ་བ་ཡིན་ན། རྒྱུ་འཇིག་པ་ནི་སྐྱེ་བ་མ་ཡིན་ཏེ། འདུས་བྱས་ཀྱི་མཚན་ཉིད་དུ་ཆུད་པའི་ཕྱིར་རོ། །སྐད་ཅིག་མ་ཡིན་པའི་ཕྱིར་འབྲས་བུ་ལ་བརྟེན་པ་མ་ཡིན་ན། འདི་ཇི་ལྟར་རྟེན་ཅིང་འབྲེལ་ཏེ་འབྱུང་བ་ཡིན། རྟེན་ཅིང་འབྲེལ་བར་འབྱུང་བ་འཆད་པར་རྩོམ་པ་ལ་འཇིག་པ་སྟོན་པ་འབྲེལ་བ་ཅི་ཡོད་ཅེས་བྱ་བ་ནི་འབྲེལ་བ་ཡོད་པ་མ་ཡིན་ཏེ། སྐབས་མ་ཡིན་པའི་ཕྱིར་རོ། །སྐད་ཅིག་མའི་ཆོས་འཇིག་ཕ་ལ་རྐྱེན་ཡོད་ན་སྐྱོན་ཅི་ཡོད་ཅེ་ན། སྐད་ཅིག་མ་འཇིག་པ་ལ་གནོད་པར་འགྱུར་ཏེ། འབྲས་བུའི་སྐད་ཅིག་མའི་ཚེ་རྒྱུ་ཡོད་པ་ཉིད་ཡིན་པའི་ཕྱིར་རོ། །རྒྱུའི་གནས་སྐབས་ན་འབྲས་བུ་སྐྱེ་བཞིན་པ་ཡིན་ལ་རྒྱུ་འཇིག་པའི་གནས་སྐབས་ན་འབྲས་བུ་སྐྱེས་པ་མ་ཡིན་ནམ། འབྲས་བུའི་ཚེ་རྒྱུ་ཡང་རྣམ་པར་ཞིག་པ་ཡིན་ན་འབྲས་བུའི་ཚེ་ཇི་ལྟར་རྒྱུའི་གནས་སྐབས་ཡིན་པར་འགྱུར་ཞེ་ན། གལ་ཏེ་དེ་ལྟ་ན་འོ་ན་ནི་འབྲས་བུ་ནི་རྒྱུ་འཇིག་པའི་རྒྱུ་ཡིན་པར་འགྲུབ་པར་མི་འགྱུར་ཏེ། སྐྱེ་བཞིན་པའི་གནས་སྐབས་ནི་མེད་པ་ཡིན་པའི་ཕྱིར་རོ། །རྒྱུ་འཇིག་བཞིན་པའི་གནས་སྐབས་ཀྱང་
འབྲས་བུའི་རྒྱུ་ཡིན་པར་ཇི་འགྱུར་ཏེ། འཇིག་བཞིན་པའི་གནས་སྐབས་ནི་ཡོད་པ་མ་ཡིན་པའི་ཕྱིར་ཏེ། ད་ལྟར་གྱི་དངོས་པོ་ནི་འཇིག་པ་ལ་མངོན་དུ་ཕྱོགས་པའི་ཕྱིར་འཇིག་བཞིན་པའི་གནས་སྐབས་ཞེས་བྱའོ། །ཕྱིས་དེ་མ་ཐག་ཏུ་འབྲས་བུ་སྐད་ཅིག་མ་འབྱུང་བར་འགྱུར་བ་ནི་འབྲས་བུ་སྐྱེ་བཞིན་པ་ཞེས་བྱ་སྟེ། སྐྱེ་བཞིན་པ་ཡིན་པ་ལྟར་སྐྱེ་བཞིན་པ་ཡིན་པའི་ཕྱིར་རོ། །གལ་ཏེ་དོན་འདི་ཡིན་པར་གྱུར་ན་ནི་ཞེས་བྱ་བ་ནི་འབྲས་བུ་ཡོད་ན་རྒྱུ་འཇིག་པར་འགྱུར་རོ་ཞེས་བྱ་བ་སྨྲས་པ་གང་ཡིན་པའོ། །དེ་ལྟར་བྱས་ན་ཤིན་ཏུ་དོན་གསལ་བར་ཁོང་དུ་ཆུད་པར་འགྱུར་རོ་ཞེས་བྱ་བ་ནི་འདི་མི་འབྱུང་བ་ནི་འདི་མི་འབྱུང་ཞེས་བྱ་བ་རྣམ་པར་འཇིག་པ་འདིའི་ཚིག་ཡིན་པའི་ཕྱིར་རོ། །དེ་ལྟར་མ་བྱས་ན་གཏན་ལ་ཕེབས་པར་མི་འགྱུར་ཏེ། ཅི་འབྲས་བུ་ཡོད་ན་རྒྱུ་འཇིག་པ་ཡིན་ནམ། འོན་ཏེ་རྒྱུ་ཡོད་ན་འབྲས་བུ་ཡིན་ཞེས་བྱ་བར་འགྱུར་རོ། །ཇི་ལྟར་རེག་པ་དང༌། ཚོར་བའམ་མྱུ་གུ་དང་གྲིབ་མ་ལྟ་བུའི་ཞེས་བྱ་བ་ནི་ལྷན་ཅིག་འབྱུང་བའི་རྐྱེན་གྱིས་ཞེས་སྦྱར་རོ། །དེ་ལ་དཔེ་གཉིས་ནི་འཇིག་རྟེན་ན་གྲགས་པ་ཐ་དད་པས་བསྟན་པ་ཡིན་ནོ། །ཇི་ལྟར་སྲིད་པ་ལས་སྐྱེ་བ་ལྟ་བུ་དང་ས་བོན་ལས་མྱུ་གུ་ལྟ་བུའོ་ཞེས་བྱ་བ་ནི་ཅི་ཞེ་ན། རྐྱེན་སྔར་སྐྱེས་པ་ཡིན་ནོ་ཞེ་ན། རྟེན་ཅིང་འབྲེལ་བར་འབྱུང་བའི་མདོ་འདིར་ནི་དེ་དག་འགྲུབ་པར་འགྱུར་ཏེ། ཇི་ལྟ་ཞེ་ན། འདི་ལས་ནི་ལྷན་ཅིག་འབྱུང་བའི་རྐྱེན་ཀྱང་ཡོད་དེ། ཇི་ལྟར་ཚོར་བའི་རེག་བ་ལྟ་བུའོ། །སྔར་བྱུང་བ་ཡང་ཡོད་དེ། ཇི་ལྟར་སྐྱེ་བའི་སྲིད་པ་ལྟ་བུའོ། །སྤྲེའུ་ལྟ་བུའི་མདོ་ལས་ནི་འགྲུབ་པར་མི་འགྱུར་ཏེ། ལྷན་ཅིག་འབྱུང་བའི་རྐྱེན་ཁོ་ན་བསྟན་པའི་ཕྱིར་རོ་ཞེས་བྱ་བ་ནི་བདེ་བ་མྱོང་བར་འགྱུར་བའི་རེག་པ་ལ་བརྟེན་ནས་བདེ་བའི་ཚོར་བ་སྐྱེའོ་ཞེས་གསུངས་པའི་ཕྱིར་རོ། །དེ་དག་ནི་ཚིག་དང་པོ་མེད་པར་ཡང་སྨྲ་བ་གཉི་ག་དགག་པ་འགྲུབ་པས་དེ་དག་ནི་དོན་མ་ཡིན་ནོ་ཞེས་བྱ་བ་ལ་ཚིག་དང་པོ་ནི་འདི་ཡོད་ན་འདི་འབྱུང་ཞེས་གང་གསུངས་པ་དེ་ཡིན་ནོ། །འདི་སྐྱེས་པས་འདི་སྐྱེ་ཞེས་བྱ་བ་འདི་ཁོ་ནས་རྒྱུ་མེད་པ་དང༌། རྒྱུ་རྟག་པར་སྨྲ་བ་དགག་པ་འགྲུབ་པར་འགྱུར་བའི་ཕྱིར་རོ། །མ་སྤངས་པའི་ཕྱིར་དང༌། མི་རྟག་པའི་རྐྱེན་ལས་སྐྱེ་བའི་དོན་གྱིས་ཚིག་གཉིས་སྨོས་ཏེ་ཞེས་རྒྱས་པར་འབྱུང་བ་ལ་མ་རིག་པ་ལ་སོགས་པ་མ་སྤངས་པའི་རྐྱེན་ལས་སྐྱེ་བའི་དོན་གྱིས་འདི་ཡོད་ན་འདི་འབྱུང་ཞེས་བྱ་བའི་ཚིག་དང་པོ་འདི་གསུངས་སོ། །མི་
རྟག་པ་ཁོ་ན་ལས་སྐྱེ་བའི་དོན་གྱིས་འདི་སྐྱེས་པས་འདི་སྐྱེ་བ་སྟེ་ཞེས་བྱ་བའི་ཚིག་གཉིས་པ་གསུངས་སོ། །མདོའི་དོན་འདི་ཡིན་ཏེ་མི་རྟག་པའི་དོན་འདི་ལས་སྐྱེ་ཡང་མ་སྤངས་པ་ལས་ཡིན་གྱི་ཐམས་ཅད་ལས་མ་ཡིན་ནོ། །ཇི་སྐད་དུ་ཕྲ་རྒྱས་མ་སྤངས་པའི་ཕྱིར་དང་ཡུལ་སོ་སོར་ཉེ་བར་གནས་པའི་ཕྱིར་ཞེས་རྒྱས་པར་གསུངས་ཏེ། སྲིད་པའི་ཡན་ལག་གི་དབང་དུ་བྱས་ཏེ་མ་སྤངས་པ་བསྟན་ཏོ། །འོན་ཀྱང་དགེ་བ་ཟག་པ་དང་བཅས་པ་དང་མ་བསྒྲིབས་ལ་ལུང་དུ་མ་བསྟན་པ་དང༌། དེ་ལ་དམིགས་པའི་འདུན་པ་དང་འདོད་ཆགས་མ་སྤངས་པ་ནི་སྐལ་བ་མཉམ་པའི་རྒྱུ་ཡིན་ནོ་ཞེས་སྟོན་པ་ནི་འདི་ཡོད་ན་འདི་འབྱུང་ཞེས་བྱ་བ་ཡིན་ནོ། །མ་སྤངས་པའི་ཕྱིར་ཞེས་བསྟན་པ་ཡིན་པར་ཇི་ལྟར་མངོན་ཞེ་ན། དེའི་ཕྱིར་ཡོད་ན་ཞེས་བྱ་བ་ནི་མ་སྤངས་པ་ལ་བྱ་སྟེ་ཞེས་བྱ་བར་རྒྱས་པར་སྨྲས་སོ། །ཅི་འདོད་པ་དང༌། འདུན་པ་ཡོད་བཞིན་དུ་ཞེས་བྱ་བ་ནི་མ་སྤངས་བཞིན་དུ་ཞེས་བྱ་བའི་ཐ་ཚིག་གོ །གཡོ་བ་མེད་པའི་རྐྱེན་བྱུང་བའི་མཚན་ཉིད་ཅེས་བྱ་བ་ནི་སྤྱོད་པ་མེད་པ་དང༌། བྱ་བ་བྱེད་པ་མེད་པའི་རྐྱེན་ལས་བྱུང་བའི་མཚན་ཉིད་ཅེས་བྱ་བའི་དོན་གང་ཡིན་པ་སྟེ། འདི་ལས་གཡོ་བ་དང་བྲལ་བས་གཡོ་བ་མེད་པའོ། །གཡོ་བ་མེད་པ་ཡང་ཡིན་རྐྱེན་ཀྱང་དེ་ཡིན་པས་གཡོ་བ་མེད་པའི་རྐྱེན་ནོ། །གཡོ་བ་མེད་པའི་རྐྱེན་ལས་བྱུང་བ་ནི་རྟེན་ཅིང་འབྲེལ་པར་འབྱུང་བ་འདིའི་གཡོ་བ་མེད་པའི་རྐྱེན་ལས་བྱུང་བའི་མཚན་ཉིད་དེ། །དེ་གང་ཡིན་པ་ནི་གཡོ་བ་མེད་པའི་རྐྱེན་ལས་བྱུང་བའི་མཚན་ཉིད་དོ། །མི་རྟག་པའི་རྐྱེན་ལས་བྱུང་བའི་མཚན་ཉིད་དང་ནུས་པའི་རྐྱེན་ལས་བྱུང་བའི་མཚན་ཉིད་ཀྱང་དེ་བཞིན་ནོ། །ཡོད་པ་ཙམ་རྐྱེན་ཉིད་ཡིན་པར་བསྟན་པའི་ཕྱིར་རོ་ཞེས་བྱ་བ་ནི་འདི་ཡོད་ན་འདི་འབྱུང་ཞེས་གསུངས་པའི་ཕྱིར་ཏེ། འདི་ལྟར་རྐྱེན་རྣམས་གཡོ་བས་ནོན་པ་མ་ཡིན་པ་དེ་ལས་འབྲས་བུ་འབྱུང་བར་འགྱུར་ཏེ། ལྕགས་ལ་ཁབ་ལོང་བཞིན་པ་དང་བདག་ཉིད་མ་ཡིན་ཡང་གསེར་གྱི་འབི་སྟི་བ་དཀོན་པ་དང་འདྲ་སྟེ། གསེར་གྱི་འབི་སྟི་བ་དཀོན་པ་མེད་ན་ནི་གསེར་རིན་ཆེ་བ་དང་ཁྱད་པར་དུ་ཡང་མི་འགྱུར་གྱི། འོན་ཀྱང་དེ་ཡོད་ན་དེ་མ་བྱུང་བ་ལས་འབྱུང་བར་འགྱུར་རོ། །སྔ་ཕྱིའི་ཡན་ལག་ངེས་པས་རྐྱེན་ཉིད་དུ་བསྟན་པའི་ཕྱིར་རོ་ཞེས་བྱ་བ་ནི་སྔ་མ་ཡང་ཡིན་ལ་ཕྱི་མ་ཡང་ཡིན་པས་སྔ་ཕྱིའོ། །དེ་དག་ཉིད་ཡན་ལག་ཡིན་པས་སྔ་ཕྱིའི་ཡན་ལག་གོ །དེ་གཉིས་ངེས་པའི་སྔ་ཕྱིའི་ཡན་ལག་ངེས་པའོ། །
སྔ་ཕྱིའི་ཡན་ལག་ངེས་པ་དེས་ན་མ་རིག་པ་ལ་སོགས་པ་རྐྱེན་ཉིད་དུ་བསྟན་པའི་ཕྱིར་ཏེ། ཡན་ལག་སྔ་མ་ཉིད་ནི་ཡན་ལག་ཕྱི་མའི་རྐྱེན་ཡིན་གྱི་ཕྱི་མ་ནི་སྔ་མའི་མ་ཡིན་ནོ། །གང་དང་གང་སྐྱེ་བར་བྱ་བའི་ཕྱིར་ནུས་པ་ཡོད་པ་དེ་དང་དེ་ལས་སྐྱེ་བ་ཡིན་གྱི་ནུས་པ་མེད་པ་ལས་མ་ཡིན་པས་ནུས་པའི་རྐྱེན་ལས་བྱུང་བའི་མཚན་ཉིད་དོ། །ལྷག་མ་རྣམས་ཀྱང་དེ་བཞིན་དུ་རིག་པར་བྱའོ་ཞེས་བྱ་བ་ནི་ཇི་ལྟ་བུ་ཞེ་ན། འདུ་བྱེད་ཀྱི་རྐྱེན་གྱིས་རྣམ་པར་ཤེས་པ་ཞེས་བྱ་སྟེ། འདུ་བྱེད་ནི་འདིའི་རྐྱེན་ཡིན་ནོ། །དེ་ནི་འདུ་བྱེད་ཀྱི་རྐྱེན་གྱིས་ཞེས་བྱ་བ་འདི་ཡིན་ནོ། །དེ་བཞིན་དུ་སྐྱེ་བ་ནི་འདིའི་རྐྱེན་ཡིན་ཏེ། དེ་ནི་འདི་ལྟ་སྟེ་སྐྱེ་བའི་རྐྱེན་གྱིས་རྒ་ཤི་ཞེས་བྱ་བ་སྟེ། ཚིག་བསྡུ་བ་གཞན་དུ་རྟོག་པ་བསལ་བའི་ཕྱིར་རོ། །རྐྱེན་གྱི་དོན་ནི་སྔར་བསྟན་བ་ཁོ་ན་ཡིན་ནོ་ཞེས་བྱ་བ་འདི་ཇི་ལྟ་བུ་ཞེ་ན། དེ་དག་གི་རྐྱེན་གྱི་དོན་ནི་འདི་ལྟ་སྟེ། འདི་ཡོད་ན་འདི་འབྱུང་འདི་སྐྱེས་པས་འདི་སྐྱེ་བ་ཞེས་བྱ་བ་ཡིན་ནོ། །ངེས་ཚིག་ནི་རྐྱེན་དེ་ལས་ཡིན་པས་རྐྱེན་ཡིན་པ་དང་ཞེས་བྱ་བ་ནི་ངེས་པར་འདི་ལས་འགྲུབ་པས་ངེས་འགྲུབ་སྟེ་རྐྱེན་ལ་བྱ་བ་དང་ཉེ་བར་གྲུབ་པའི་བྱེ་བྲག་གིས་ཁམས་ཀྱི་དོན་ཡོངས་སུ་སྒྲུབ་པའི་ཕྱིར་རབ་ཏུ་འབྱུང་ཞེས་བྱ་བའི་ཐ་ཚིག་སྟེ། དེའི་ཕྱིར་རབ་ཏུ་འབྱུང་བ་ཞེས་བྱ་བའི་ཐ་ཚིག་གོ་ཞེས་བྱ་བ་སྨོས་སོ། །གཞན་དག་ན་རེ་རྐྱེན་བྱེད་པས་རྐྱེན་ཡིན་ནོ། །རྐྱེན་བྱེད་པ་གང་ཞེ་ན། འབྲས་བུ་སྐྱེས་པ་ལ་རང་རྒྱུའི་དངོས་པོ་ཡིན་པའམ། རང་གི་འབྲས་བུའི་རྐྱེན་ཡིན་པས་རྐྱེན་ཏོ། །རྐྱེན་གང་ཡིན་ཞེ་ན་ཞེས་བྱ་བ་ནི་རྐྱེན་ལ་ཐེ་ཚོམ་ཟ་བའོ། །གཙོ་བོའི་རྐྱེན་བརྗོད་པར་འདོད་པ་ཡིན་གྱི། མ་རིག་པ་ལ་སོགས་པ་དག་འདུ་བྱེད་ལ་སོགས་པ་ལ་དེ་མ་ཐག་པ་དང༌། དམིགས་པའི་རྐྱེན་གྱིས་དངོས་པོ་བྱེད་པ་མེད་པ་ནི་མ་ཡིན་ནོ། །ཅིའི་ཕྱིར་རྐྱེན་ཅེས་བྱ་བ་བསྟན་ཞེས་རྒྱས་པར་འབྱུང་བ་ནི་མ་རིག་པའི་རྐྱེན་གྱིས་འདུ་བྱེད་ནས་སྐྱེ་བའི་རྐྱེན་གྱིས་རྒ་ཤི་ཞེས་བྱ་བ་ཅིའི་ཕྱིར་རྐྱེན་ཅེས་བསྟན། མ་རིག་པའི་རྒྱུ་ཅན་འདུ་བྱེད་ཡིན་ནོ། །མ་རིག་པ་བྱེད་རྒྱུ་དང་མ་རིག་པ་གཞི་ནས་སྐྱེ་བའི་རྒྱུ་ཅན་རྒ་ཤི་དང་སྐྱེ་བ་བྱེད་རྒྱུ་དང་སྐྱེ་བ་བཞིའོ་ཞེས་བྱ་བ་མ་ཡིན་ཞེ་ན། གང་ཡང་རུང་བ་སྨོས་ན་ཡང་ཕྱིར་རྒོལ་བར་འགྱུར་རོ་ཞེས་བྱ་བ་ནི་རྒྱུ་དང་བྱེད་རྒྱུ་དང་གཞི་སྨོས་ན་ཡང་ཅིའི་ཕྱིར་རྒྱུ་སྨོས་ཀྱི་བྱེད་རྒྱུ་དང་གཞི་མ་ཡིན་ཞེས་ཕྱིར་རྒོལ་བ་འདི་སྲིད་པར་འགྱུར་རོ། །རྟེན་ཅིང་འབྲེལ་བར་འབྱུང་བའི་སྐབས་སུ་ནི་གང་ལ་བརྟེན་ནས་གང་
འབྱུང་བ་དེའི་རྐྱེན་ནི་དེ་ཡིན་པར་བསྟན་ཏོ་ཞེས་བྱ་བ་ནི་འདི་ནི་རྟེན་ཅིང་འབྲེལ་པར་འབྱུང་བའི་ཆེད་དུ་བྱས་པ་ཡིན་ནོ། །དེ་བས་ན་འདི་ལྟར་ངེས་པར་འདི་ལས་འབྲས་བུ་འགྲུབ་པ་ཁོ་ན་ཡིན་པས་དེ་ནི་དེའི་རྐྱེན་ཅེས་བསྟན་ཏོ། །དེ་ལྟར་ན་གྲུབ་པར་འགྱུར་ཏེ་སྐབས་ཇི་ལྟ་བ་བཞིན་བསྟན་པའི་ཕྱིར་རོ། །གཞན་དག་ན་རེ་རྒྱུ་སྨོས་ན་ནི་དེ་མ་ཐག་པའི་རྐྱེན་ལ་སོགས་པ་འཛིན་པར་མི་འགྱུར་རོ་ཞེ་ན་ཞེས་བྱ་བ་ནི་དེ་མ་ཐག་པ་དང་དམིགས་པ་དང་བདག་པོའི་རྐྱེན་རྣམས་སྨོས་པས་འགྱུར་བ་ནི་འདུ་བྱེད་ལ་སོགས་པའི་མ་རིག་པ་ལ་སོགས་པའི་ཡན་ལག་རྣམས་ཡིན་ཏེ། ཇི་ལྟར་སྲིད་པར་དེ་མ་ཐག་པ་དང་དམིགས་པ་དང་བདག་པོའི་རྐྱེན་རྣམས་ཡིན་ལ་རྐྱེན་གྱི་སྒྲས་ནི་སྤྱིར་རྣམ་པ་བཞི་ཆར་ཡང་རྐྱེན་གྱི་སྒྲར་བསྟན་པ་ཡིན་ནོ། །དེའི་ཕྱིར་གཞི་དང་བྱེད་རྒྱུ་སྨོས་ན་ཉེས་བ་ཅི་ཡོད་ཅེས་སྨྲས་ཏེ། གཞི་དང་བྱེད་རྒྱུའི་སྒྲ་གཉིས་ལ་རྐྱེན་གྱིས་ཁྱབ་པ་ཡིན་པའི་ཕྱིར་རོ། །རྒྱུའི་སྒྲ་གཞན་ལ་ཡང་མཐོང་སྟེ་ཞེས་བྱ་བ་ནི་རྒྱུའི་རྐྱེན་ཉི་ཚེ་ལ་མ་ཡིན་པར་སྟོན་ཏོ། །ཡང་དག་པའི་ལྟ་བ་བསྐྱེད་པར་བྱ་བའི་ཕྱིར་རྒྱུ་གཉིས་རྐྱེན་གཉིས་ཡིན་ལ་ཞེས་བྱ་བ་ནི་གཞན་གྱི་སྒྲ་དང་ནང་དུ་ཚུལ་བཞིན་ཡིད་ལ་བྱེད་པའོ། །གཞན་གྱི་སྒྲ་ནི་ཡང་དག་པའི་ལྟ་བའི་རྒྱུའི་རྐྱེན་མ་ཡིན་ནོ། །འོ་ན་ཅི་ཞེ་ན་དམིགས་པའི་རྐྱེན་ནོ། །དེ་བཞིན་དུ་ན་ནག་དུ་ཚུལ་བཞིན་ཡིད་ལ་བྱེད་པ་ནི་ཡང་དག་པའི་ལྟ་བ་ཟག་པ་མེད་པའི་རྒྱུའི་རྐྱེན་མ་ཡིན་ནོ། །འོ་ན་ཅི་ཞེ་ན། བདག་པོའི་རྐྱེན་ནོ། །དེ་བཞིན་དུ་ཚངས་པ་བདག་ནི་རྒྱུར་སྨྲ་བ་སྟེ། རྒྱུ་སྟོན་པར་བྱེད་དོ་ཞེས་བྱ་བ་ལ་སོགས་པ་གསུངས་པ་ནི་རྒྱུའི་རྐྱེན་འབའ་ཞིག་གསུངས་པ་མ་ཡིན་ནོ། །འོ་ན་ཅི་ཞེ་ན་རྐྱེན་ཐམས་ཅད་དོ། །སོགས་པའི་སྒྲ་གཞན་ནས་རྒྱུའི་སྒྲ་ཡོད་པ་ལ་ཡང་བརྗོད་པར་བྱའོ། །དེ་ལྟར་ན་རྒྱུའི་སྒྲ་འདི་ནི་རྒྱུའི་རྐྱེན་ཁོ་ན་ལ་འཇུག་པ་མ་ཡིན་ནོ། །དེ་བས་ན་དེ་དག་རྣ་ལན་དུ་མི་རུང་སྟེ། རྒྱུ་སྨོས་པས་དེ་མ་ཐག་པ་ལ་སོགས་པའི་རྐྱེན་སྨོས་པ་ཡིན་པའི་ཕྱིར་རོ། །མ་རིག་པ་ལ་སོགས་པ་ནི་རྟེན་ཅིང་འབྲེལ་བར་འབྱུང་བ་མ་ཡིན་གྱིའོ་ན་ཅི་ཞེ་ན། རྟེན་ཅིང་འབྲེལ་ཏེ་འབྱུང་བ་ཡིན་ནོ་ཞེས་བྱ་བ་ནི་མདོ་སྡེ་གཞན་གྱི་རྗེས་སུ་འབྲངས་ཏེ་སྐད་སྨྲས་སོ། །ཁ་ཆེ་རྣམ་པར་སྨྲ་བ་དག་ནི་མ་རིག་པ་ལ་སོགས་པ་དེ་དག་ཉིད་རྒྱུ་དང་འབྲས་བུར་ཕྱེ་ནས་རྟེན་ཅིང་འབྲེལ་པར་འབྱུང་བ་དང་རྟེན་ཅིང་འབྲེལ་ཏེ་འབྱུང་བ་ཞེས་བརྗོད་དོ། །དེ་ཉིད་ཀྱི་ཕྱིར་སློབ་དཔོན་
གྱིས་དེ་ལྟར་ནི་བཅོམ་ལྡན་འདས་ཀྱིས་མདོ་སྡེ་གཞན་ལས་གསུངས་ཏེ་ཞེས་རྒྱས་པར་སྨྲས་སོ། །རྟེན་ཅིང་འབྲེལ་པར་འབྱུང་བའི་རྣམ་པར་དབྱེ་བ་གང་ཞེ་ན་ཞེས་བྱ་བ་ནས་བརྩམས་ཏེ་མ་རིག་པ་ལ་སོགས་པ་རྣམ་པར་དབྱེ་བ་སྟོན་ཏོ། །མ་རིག་པ་ལ་སོགས་པ་ནི་རྟེན་ཅིང་འབྲེལ་པར་འབྱུང་བ་མ་ཡིན་གྱི། འོ་ན་ཅི་ཞེ་ན། རྟེན་ཅིང་འབྲེལ་ཏེ་འབྱུང་བ་ཡིན་ནོ་ཞེས་གང་གསུངས་པ། འདི་ལ་དགོངས་པ་ཅི་ཡོད་ཅེ་ན། དེའི་ཕྱིར་རྟེན་ཅིང་འབྲེལ་པར་འབྱུང་བ་ཞེས་བྱ་བ་ནི་བྱུང་བའི་ཆོས་རྣམས་ནི་སྤྱིའི་མཚན་ཉིད་ཡིན་ཏེ་ཞེས་རྒྱས་པར་སྨོས་སོ། །མ་བྱུང་བ་ལས་འབྱུང་བའོ་ཞེས་བྱ་བ་ནི་རྒྱུ་ཚོགས་པ་སྔར་ཡོད་ན་ཕྱིས་འབྱུང་བར་འགྱུར་རོ་ཞེས་བྱ་བའི་དོན་གང་ཡིན་པའོ། །མ་རིག་པ་ལ་སོགས་པ་ཐམས་ཅད་ཀྱང་མ་བྱུང་བ་ལས་བྱུང་བ་ཡིན་པ་དེ་བས་ན་རྟེན་ཅིང་འབྲེལ་པར་འབྱུང་བ་ཞེས་བྱ་བ་ནི་བྱུང་བ་རྣམས་ཀྱི་སྤྱིའི་མཚན་ཉིད་ཡིན་ན། དེ་རྣམ་པར་དབྱེ་བ་གཞན་དུ་ཇི་ལྟར་བསྟན་པར་ནུས་ཞེས་བྱ་བ་ནི་དེ་མ་བྱུང་བ་ལས་བྱུང་བའོ་ཞེས་བྱ་བ་ནི་རྟེན་ཅིང་འབྲེལ་པར་འབྱུང་བའི་ཆོས་རྣམ་པར་དབྱེ་བ་མེད་པ་རྣམ་པ་གཞན་དུ་ལོགས་ཤིག་ཏུ་རྣམ་པར་དབྱེ་ཞིང༌། བསྟན་པར་ཇི་ལྟར་ནུས་འདིར་དགོངས་པ་ནི་དེ་ནི་དེ་དག་ལས་གཞན་དུ་རྣམ་པར་གཞག་པར་མི་ནུས་ཏེ། དེ་ལ་བརྟགས་པའི་ཆོས་ཡིན་པའི་ཕྱིར་རོ་ཞེས་བྱ་བ་ཡིན་ནོ། །ཇི་ལྟར་རྒས་པར་གྱུར་བ་ལས་གཞན་དུ་རྒ་བར་གྱུར་པ་ཇི་ལྟར་བསྟན་པར་ནུས་ཞེས་བྱ་བ་ནི་སྐྲ་དཀར་ལ་སོགས་པའི་རྟགས་ལས་དེ་མངོན་པ་ཡིན་གྱི་དེ་དག་ལས་གཞན་དུ་ནི་བསྟན་པར་མི་ནུས་ཏེ། དེའི་དབྱེ་བ་མེད་པར་དབྱེ་བར་ག་ལ་ནུས་ཞེས་བྱ་བ་ལྟ་བུའོ། །གཞན་ཡང་མི་རྟག་པ་ཉིད་ནི་མི་རྟག་པ་ལས་གཞན་དུ་དམིགས་ཀྱིས་དབྱེ་བར་མི་ནུས་ཏེ། བརྟགས་པའི་ཆོས་ཡིན་པའི་ཕྱིར་རོ། །མི་རྟག་པའི་ཆོས་དབྱེ་བ་མེད་པ་ཡང་དེའི་དབྱེ་བ་བསྟན་པར་མི་ནུས་ཏེ། དངོས་པོ་མེད་པ་ནི་ངོ་བོ་གཅིག་པ་ཡིན་པའི་ཕྱིར་རོ། །དེ་དག་ནི་འདུས་བྱས་ཀྱི་མཚན་ཉིད་གསུམ་པོ་འདི་དག་ཡིན་ཏེ། འདི་ལྟ་སྟེ་སྐྱེ་བ་དང་འཇིག་པ་དང་གནས་པ་གཞན་དུ་གྱུར་པའོ། །དེ་ལ་སྐྱེ་བ་ནི་རྟེན་ཅིང་འབྲེལ་པར་འབྱུང་བའི་དང་པོར་བཤད་པས་རབ་ཏུ་བསྟན་པ་ཡིན་ནོ། །གནས་པ་གཞན་དུ་གྱུར་པ་ཉིད་ནི་རྒ་བ་རྣམ་པར་འབྱེད་པས་སོ། །འཇིག་པ་ནི་འཆི་བ་རྣམ་པར་འབྱེད་པས་སོ། །དེ་ལ་སྐྱེ་བ་ཞེས་བསྟན་པ་ནི་མ་བྱུང་བ་
ལས་བྱུང་བས་བྱེ་བྲག་ཏུ་བྱས་པའི་དངོས་པོ་ལ་བྱ་བར་མངོན་པ་ཡིན་གྱི། དངོས་པོ་ཙམ་ནི་མ་ཡིན་ནོ། །གནས་པ་གཞན་དུ་གྱུར་པ་ཉིད། །ཅེས་བསྟན་པ་ནི་རྒྱུན་གྱི་སྔ་ཕྱིའི་བྱེ་བྲག་ལ་བྱ་བར་མངོན་པ་ཡིན་གྱི་རྒྱུན་ཙམ་ནི་མ་ཡིན་ནོ། །འཇིག་པ་ཞེས་བསྟན་པ་ནི་བྱུང་ནས་མེད་པ་ལ་བྱ་བར་མངོན་པ་ཙམ་ཡིན་གྱི་མེད་པ་ཁོ་ན་ནི་མ་ཡིན་ནོ། །དེར་རྟེན་ཅིང་འབྲེལ་པར་འབྱུང་བ་གང་ཡིན་པ་དེ་ནི་ཞེས་བྱ་བ་ལ་དེར་ཞེས་བྱ་བ་ནི་མདོ་སྡེ་དེར་རོ། །འདིར་རྟེན་ཅིང་འབྲེལ་པར་འབྱུང་བ་དང་པོ་ཡིན་པར་གསུངས་སོ་ཞེས་བྱ་བ་ནི་མདོ་སྡེ་འདིར་རོ། །མདོ་སྡེ་དེར་ནི་འདི་ཡོད་པས་འདི་འབྱུང་འདི་སྐྱེས་པས་འདི་སྐྱེ་བ་སྟེ་ཞེས་བྱ་བ་འདི་ཉིད་རྟེན་ཅིང་འབྲེལ་པར་འབྱུང་བ་ཡིན་པར་གསུངས་ལ་འདིར་ནི་རྟེན་ཅིང་འབྲེལ་པར་འབྱུང་བ་དང་པོ་ཡིན་པར་གསུངས་སོ། །དེར་རྟེན་ཅིང་འབྲེལ་པར་འབྱུང་བའི་ཆོས་མ་རིག་པ་ལ་སོགས་པ་གང་ཡིན་པ་དེ་ནི་འདིར་རྟེན་ཅིང་འབྲེལ་པར་འབྱུང་བ་ཡིན་པར་གསུངས་པ་ཡིན་ནོ། །ཇི་ལྟར་ཁྱེད་ལ་རྟེན་ཅིང་འབྲེལ་པར་འབྱུང་བའི་རྣམ་པར་དབྱེ་བ་བཤད་པར་བྱའོ་ཞེས་གསུངས་ནས་མ་རིག་པ་ལ་སོགས་པའི་རྣམ་པར་དབྱེ་བ་འཆད་པའི་ཕྱིར་མ་རིག་པ་ལ་སོགས་པ་ནི་རྟེན་ཅིང་འབྲེལ་པར་འབྱུང་བ་ཡིན་པར་གསུངས་པ་ཡིན། དེའི་ཕྱིར་ཆོས་ཀྱི་རྣམ་གྲངས་འདི་ནི་རྟེན་ཅིང་འབྲེལ་པར་འབྱུང་བ་ལ་དགོངས་པ་ཡིན་པས་ཞེས་རྒྱས་པར་གསུངས་ཏེ། ཡི་གེ་ཡང་སྐབས་བཞིན་དུ་ཉེ་བར་གདགས་སོ་ཞེས་ཇི་སྐད་སྨོས་པ་ཡིན་ནོ། །དེའི་མདོ་དང་རྒྱས་པ་བསྟན་པའི་ཕྱིར་ཞེས་བྱ་བ་ནི་བསྟན་པ་དང་བཤད་པ་ཞེས་བྱ་བའི་དོན་གང་ཡིན་པའོ། །བྱུང་བ་དང་འབྱུང་བ་དག་ཀྱང་དོན་ཐ་དད་པར་ཁ་ཅིག་རྟོག་པ་ཞེས་བྱ་བ་ནི་ཆོས་མངོན་པ་པ་དག་གོ །དེ་དག་ལས་ཀྱང་བསལ་བ་ཡིན་ཏེ་ཞེས་རྒྱས་པར་འབྱུང་བ་ཇི་ལྟར་ཡིན་ཞེ་ན། དེའི་ཕྱིར་བརྟགས་པའི་ཆོས་ཡིན་པ་ཉིད་སྟོན་པའི་ཕྱིར་རོ་ཞེས་བྱ་བ་སྨྲས་ཏེ། གང་འདི་རྟེན་ཅིང་འབྲེལ་པར་འབྱུང་བ་རྣམ་པར་དབྱེ་བ་ནས་བརྩམས་ཏེ། རྟེན་ཅིང་འབྲེལ་པར་འབྱུང་བའི་ཆོས་རྣམ་པར་དབྱེ་བ་སྟོན་པ་ནི་རྟེན་ཅིང་འབྲལ་པར་འབྱུང་བ་དེ་བརྟགས་པའི་ཆོས་ཡིན་པ་ཉིད་དུ་སྟོན་པར་བྱེད་པ་ཡིན་ཏེ། དེ་ནི་ཐ་དད་པར་འགྱུར་བ་དེ་ལ་དེ་ཉིད་ཀྱི་རྣམ་པར་དབྱེ་བ་འཆད་པར་བྱེད་པའི་ཕྱིར་རོ། །ཚིག་ལ་ཚིག་འབྱུང་བ་ཞེས་བྱ་བ་ཚིག་གང་ལས་ཤེ་ན། རྟེན་ཅིང་འབྲེལ་པར་འབྱུང་བའི་ཆོས་རྣམས་གང་ཞེ་ན། མ་རིག་
པ་ནས་རྒ་ཤིའི་བར་དུ་གང་གསུངས་པ་གང་ཡིན་པ་དེ་ལས་ཚིག་འབྱུང་བ་ནི་གལ་ཏེ་མ་རིག་པ་ཡང་རྟེན་ཅིང་འབྲེལ་པར་འབྱུང་བ་ཡིན་ན་ཞེས་རྒྱས་པར་འབྱུང་བ་འདི་ཡིན་ནོ། །རྒྱུ་དང་བཅས་རྐྱེན་དང་བཅས་གཞི་དང་བཅས་པའི་ཆོས་ཀྱི་རྣམ་གྲངས་ལས་ཇི་ལྟར་བྱས་ཤེ་ན། དགེ་སློང་དག་མ་རིག་པ་ཡང་རྒྱུ་དང་བཅས་པ་རྐྱེན་དང་བཅས་པ་ངེས་པར་སྐྱེད་པ་དང་བཅས་པ་ཡིན་ནོ། །དགེ་སློང་དག་མ་རིག་པའི་རྒྱུ་ནི་གང་རྐྱེན་ནི་གང་ངེས་པར་སྐྱེད་པ་ཅི་ཞེ་ན། མ་རིག་པའི་རྒྱུ་ནི་ཚུལ་བཞིན་མ་ཡིན་པར་ཡིད་ལ་བྱེད་པ་ཡིན་ནོ། །རྐྱེན་ཡང་ཚུལ་བཞིན་མ་ཡིན་པར་ཡིད་ལ་བྱེད་པ་ཡིན་ནོ། །ངེས་པར་སྐྱེད་པ་ཡང་ཚུལ་བཞིན་མ་ཡིན་པར་ཡིད་ལ་བྱེད་པ་ཡིན་ནོ་ཞེས་བྱ་བ་ཡིན་ནོ། །གསུས་པོ་ཆེའི་མདོ་ལས་སྒྲིབ་པ་ལྔ་ཡང་ཡིན་པར་གསུངས་ཏེ། དེ་ལ་སྒྲིབ་པ་ལྔ་ནི་མ་རིག་པའི་བདག་ཉིད་འཐོབ་ཅིང་གནས་པར་བྱ་བའི་ཕྱིར་སྒྲུབ་པར་བྱེད་ཅིང་དེའི་རྒྱུན་རྗེས་སུ་གནས་པར་བྱེད་པའི་དོན་གྱིས་ཡིན་ནོ། །སྒྲིབ་པ་ལྔ་ནི་འདོད་པ་ལ་འདུན་པ་དང་གནོད་སེམས་དང་རྒོད་པ་དང༌། འགྱོད་པ་དང༌། རྨུགས་པ་དང༌། གཉིད་དང་ཐེ་ཚོམ་མོ། །ཚིགས་སུ་བཅད་པ་གསུམ་པ་ལས། །ཞེས་བྱ་བ་ནི་འདོད་ཆགས་དང་ཞེ་སྡང་དང་གཏི་མུག་རྣམས་ལ་ཚིགས་སུ་བཅད་པ་གསུམ་མོ། །ཆགས་པ་པོས་ནི་ཆོས་མི་ཤེས། །ཞེས་རྒྱས་པར་འབྱུང་བ་དེ་བཞིན་དུ་ཁྲོས་པ་པོ་དང་རྨོངས་པ་ཆོས་མི་ཤེས་ཞེས་བྱ་བ་ཡིན་ནོ། །རེག་པ་ཡང་སྤྱིའི་རྐྱེན་ཡིན་པར་བསྟན་ཏེ་ཞེས་བྱ་བ་ནི་འདུ་བྱེད་ཀྱི་ཕུང་པོའི་རྐྱེན་ཉིད་ཡིན་པའི་སྒོ་ནས་ཀྱང་འདུ་བྱེད་ཀྱི་ཕུང་པོའི་ནང་དུ་འདུས་པ་ཡིན་ནོ། །མ་རིག་པ་ཀུན་འབྱུང་བ་ལས་ཟག་པ་ཀུན་འབྱུང་ཞེས་བྱའོ་ཞེས་བྱ་བ་ནི་མ་རིག་པ་ནི་ཟག་པའི་ནང་དུ་གཏོགས་པའི་ཕྱིར་མ་རིག་པ་ཀུན་འབྱུང་བ་ལས་ཟག་པ་ཀུན་འབྱུང་ཞེས་བསྟན་པ་ཡིན་ནོ། །མ་རིག་པ་ཁོ་ན་ལ་བརྟེན་ནས་མ་རིག་པ་འབྱུང་བ་ཡིན་གྱི་ཞེས་བྱ་བ་ནི་སློབ་དཔོན་གྱིས་རང་གི་བསམ་པ་སྟོན་པར་བྱེད་པ་ཡིན་ནོ། །རྨོངས་པ་ཁོ་ན་ལས་དེ་སྐྱེ་བའི་ཕྱིར་རོ་ཞེས་བྱ་བ་ནི་ཚུལ་བཞིན་མ་ཡིན་པར་ཡིད་ལ་བྱེད་པ་སྒྲིབ་པ་དང་ལོག་པར་ལྟ་བ་དང་འདོད་ཆགས་ལ་སོགས་པ་སྐྱེ་བའི་ཕྱིར་རོ་ཞེས་བྱ་བའི་ཐ་ཚིག་སྟེ། ཚུལ་བཞིན་མ་ཡིན་པར་ཡིད་ལ་བྱེད་པ་ལ་སོགས་པ་ནི་རྨོངས་པ་མེད་པར་སྐྱེ་བ་མ་ཡིན་ནོ། །དེ་བས་ན་ཚུལ་བཞིན་མ་ཡིན་པར་ཡིད་ལ་བྱེད་པ་ལ་སོགས་པ་ལས་སྐྱེ་བ་མ་ཡིན་ནོ། །
གལ་ཏེ་དེ་ལྟ་ཡིན་ན་སྔར་གླེངས་པའི་མདོ་སྡེ་རྣམས་ཇི་ལྟར་དྲང་ཞེ་ན། དེའི་ཕྱིར་རང་གི་རིགས་གཅིག་ལས་གཅིག་འབྱུང་བ་ན་ཚུལ་བཞིན་མ་ཡིན་པར་ཡིད་ལ་བྱེད་པ་ལ་སོགས་པས་ལྷག་པར་རྒྱས་པར་འབྱུང་བར་བྱེད་དེ་ཞེས་སྨོས་སོ། །དེའི་ཕྱིར་ས་བོན་རྒྱས་པ་ནི་ལྷག་པར་སྤང་དཀའ་བ་ཉིད་ཡིན་པའི་ཕྱིར་རོ་ཞེས་སྨྲས་ཏེ། ཇི་ལྟ་ཇི་ལྟར་ཚུལ་བཞིན་མ་ཡིན་པར་ཡིད་ལ་བྱེད་པ་དང༌། སྒྲིབ་པ་དང་ལོག་པར་ལྟ་བ་དང༌། འདོད་ཆགས་ལ་སོགས་པ་ཀུན་དུ་འབྱུང་བ་དེ་ལྟ་དེ་ལྟར་མ་རིག་པའི་ས་བོན་ཡོངས་སུ་རྒྱས་པར་འགྱུར་རོ། །ཡོངས་སུ་རྒྱས་པ་ན་ཤིན་ཏུ་སྤང་དཀའ་བ་ཡིན་ཏེ། དེ་ལྟར་ན་ལྷག་པར་རྒྱས་པར་བྱེད་པ་ཡིན་ནོ། །ཡང་ན་ཚུལ་བཞིན་མ་ཡིན་པར་ཡིད་ལ་བྱེད་པ་ལ་སོགས་པ་ཀུན་དུ་འབྱུང་བས་མ་རིག་པའི་གཉེན་པོ་ཀུན་དུ་འབྱུང་བའི་གགས་བྱས་ཏེ་གཉེན་པོ་མེད་པའི་མ་རིག་པའི་ས་བོན་ནི་ཤིན་ཏུ་རྒྱས་པ་ཡིན་ནོ། །ཇི་ལྟ་ཇི་ལྟར་རྒྱས་པར་གྱུར་པ་དེ་ལྟ་དེ་ལྟར་ཤིན་ཏུ་སྤང་དཀའ་བ་ཡང་ཡིན་ཏེ། དེ་ལྟར་ན་ས་བོན་རྒྱས་པ་ནི་ལྷག་པར་སྤང་དཀའ་བ་ཡིན་པའི་ཕྱིར་རོ་ཞེས་བྱའོ། །དེ་ལྟར་ན་དེ་ཡང་དེའི་རྐྱེན་ཡིན་པར་གསུངས་སོ་ཞེས་བྱ་བ་ནི་ཚུལ་བཞིན་མ་ཡིན་པར་ཡིད་ལ་བྱེད་པ་ལ་སོགས་པ་ཞེས་བྱ་བའི་ཐ་ཚིག་གོ །འོ་ན་མདོ་སྡེ་འདིར་ཞེས་བྱ་བ་ནི་འདི་ལྟ་སྟེ་འཆད་པར་བྱེད་པའོ། །དེ་ལ་ཡང་གཞན་བརྗོད་པར་བྱ་དགོས་པར་འགྱུར་ལ་ཞེས་བྱ་བ་ནི་ཐུག་པ་མེད་པར་འགྱུར་བ་སྟོན་པར་བྱེད་དོ། །འོ་ན་མདོ་སྡེ་འདིར་དེའི་རྐྱེན་ཅིའི་ཕྱིར་མ་གསུངས་ཞེས་རྒོལ་བ་འདི་བཟློག་པར་འགྱུར་བ་གང་ནས་བསྟན་ཏེ། སྐྱེ་བའི་རིམ་བ་བསྟན་པ་བརྩམ་པར་བྱ་ཡང་ན་སྐྱེ་བའི་རིམ་པ་བསྟན་པ་མེད་པ་ཡིན་ནོ། །གང་གི་དོན་དུ་ཡན་ལག་བཅུ་གཉིས་བསྟན་པ་ཞེས་བྱ་བ་ནི་འཆད་པར་བྱེད་པ་ཡིན་ནོ། །ཅིའི་ཕྱིར་ཞེ་ན། གང་གིས་འཕེན་པ་དང་གང་གི་ཕྱིར་དང་གང་གི་དེ་འབྱུང་བ་དང་དེ་ཡང་ཉེས་དམིགས་གང་ཡིན་པ་ཞེས་བྱ་བ་དེ་དག་ནི་ཡན་ལག་བཅུ་གཉིས་བསྟན་པ་ཡིན་པས་དེ་ལ་ནི་མ་རིག་པའི་རྐྱེན་བསྟན་པ་དགོས་པ་མེད་དེ་ཡན་ལག་བཅུ་གཉིས་ཁོ་ནས་དེའི་དོན་བསྟན་ཟིན་པའི་ཕྱིར་རོ། །དེ་ཡང་ཕྱིས་བསྟན་པར་བྱའོ་ཞེས་བྱ་བ་ནི་དེ་ནི་དགོས་པའི་དབང་དུ་བྱས་ཏེ་བསྟན་པ་ཡིན་ནོ། །མ་རིག་པའི་རྐྱེན་རང་གི་རིགས་ཡིན་ཡང་ཞེས་བྱ་བ་ནི་མ་རིག་པའི་རིག་ནི་རྐྱེན་ཡིན་ཏེ། ཇི་སྐད་དུ་མ་རིག་པ་ཁོ་ན་ལ་བརྟེན་ནས་མ་རིག་པ་
འབྱུང་བ་ཡིན་གྱི་ཞེས་རྒྱས་པར་སྨོས་པ་ཡིན་ནོ། །འདིར་ཡན་ལག་རྣམས་ཀྱི་རྐྱེན་རང་གི་རིགས་བརྗོད་པར་འདོད་པ་མ་ཡིན་གྱི་འོ་ན་ཅི་ཞེ་ན། རིགས་མི་མཐུན་པ་རྐྱེན་ཡིན་ནོ་ཞེས་བསྟན་ཏོ། །དེ་ལྟ་མ་ཡིན་ན་ནི་མིང་དང་གཟུགས་ཀྱང་མིང་དང་གཟུགས་ཀྱི་རྐྱེན་ཡིན་པ་དང༌། སྐྱེ་མཆེད་དྲུག་ཀྱང་སྐྱེ་མཆེད་དྲུག་གི་རྐྱེན་ཡིན་ནོ་ཞེས་བརྗོད་པར་བྱ་དགོས་པར་འགྱུར་རོ། །འཁོར་བ་ཐོག་མ་ཡོད་པར་འགྱུར་བ་དང་ཞེས་བྱ་བ་ནི་མ་རིག་པ་ལས་སྔ་རོལ་དུ་ཡན་ལག་གཞན་མེད་པའི་ཕྱིར་རོ། །ཡན་ལག་ལྷག་པར་འགྱུར་བ་ནི་གལ་ཏེ་མ་རིག་པ་ལ་རྐྱེན་ཡོད་ན་ཞེས་བསམས་པའོ། །དེ་དག་ལ་ཐུག་པ་མེད་པར་འགྱུར་རོ་ཞེས་བྱ་བ་ནི་དེ་དག་གི་ཡན་ལག་རྣམས་སོ། །དེ་ལྟ་མ་ཡིན་ན་གང་ཡིན་པ་དེའི་རྐྱེན་མ་སྨོས་པའི་ཕྱིར་འཁོར་བ་ཐོག་མ་ཡོད་པར་འགྱུར་རོ་ཞེས་བྱ་བ་སྐྱོན་དེ་གནས་པར་འགྱུར་རོ། །ལན་ནི་ཚུལ་བཞིན་མ་ཡིན་པར་ཡིད་ལ་བྱེད་པ་མ་རིག་པའི་རྐྱེན་ཡིན་ནོ་ཞེས་མདོ་སྡེ་གཞན་ལས་འབྱུང་བ་སྔར་བསྟན་ཟིན་ཏོ་ཞེས་བྱ་བ་འདིས་འཁོར་བ་ཐོག་མ་ཡོད་པ་མ་ཡིན་ནོ་ཞེས་སྟོན་པར་བྱེད་དོ། །ཡན་ལག་ལྷག་པ་ཡང་མ་ཡིན་ཏེ། ལེན་པའི་ནང་དུ་དེ་འདུས་པའི་ཕྱིར་རོ་ཞེས་བྱ་བ་ལ་ཚུལ་བཞིན་མ་ཡིན་པར་ཡིད་ལ་བྱེད་པ་དེ་ཅི་ཞེ་ན། ཡན་ལག་ལྷག་པར་འགྱུར་བ་མ་ཡིན་ནོ་ཞེས་སྦྱར་བར་བྱའོ། །ཐུག་པ་མེད་པར་ཡང་མི་འགྱུར་ཏེ། དེ་གཉིས་གཅིག་ལ་གཅིག་རྐྱེན་བྱེད་པའི་ཕྱིར་བྱ་དང་སྒོ་ང་བཞིན་ནོ་ཞེས་བྱ་བ་ནི་དཔེར་ན་བྱ་ལས་སྒོ་ང་སྒོ་ང་ལས་བྱ་ཡང་བྱ་ལས་སྒོ་ང་ཡང་སྒོ་ང་ལས་བྱ་ཡིན་པས་གཅིག་གི་རྐྱེན་གཅིག་ཡིན་པའི་ཕྱིར་ཐོག་མ་ཡོད་པ་མ་ཡིན་པ་དང་ཡན་ལག་ལྷག་པ་དང་ཐུག་པ་མེད་པའི་ཉེས་པ་མེད་པ་ཡང་ཡིན་པ་དེ་བཞིན་ནོ། །དེ་གཉིས་གཅིག་ལ་གཅིག་རྐྱེན་ཡིན་པར་ཇི་ལྟར་རིག་པར་བྱ་ཞེ་ན་དེའི་ཕྱིར་འདི་ལྟ་སྟེ་དགོས་པ་ཡིད་ལ་བྱེད་པ་ནི་ཞེས་རྒྱས་པར་གསུངས་ཏེ་འདི་ལྟར་རྒྱུ་དང་བཅས་རྐྱེན་དང་བཅས་ངེས་པར་སྐྱེད་པ་དང་བཅས་པའི་ཆོས་ཀྱི་རྣམ་གྲངས་དེ་ཉིད་ལས་གསུངས་སོ། །བསྒོས་པ་ཡིད་ལ་བྱེད་པ་ནི་རྨོངས་པ་ལས་སྐྱེས་པ་ཡིན་ནོ་ཞེས་བྱ་བ་དེ་ལ་བསྒོས་པ་ཞེས་བྱ་བ་ཚིག་གིས་ཚུལ་བཞིན་མ་ཡིན་པར་ཡིད་ལ་བྱེད་པ་འདི་ཉིད་བསྟན་པ་ཡིན་ཏེ། ཉོན་མོངས་པ་ཅན་དུ་བསྒོས་པ་ཉིད་ཡིན་པའི་ཕྱིར་རོ། །རྨོངས་པ་ལས་སྐྱེས་པ་ཞེས་བྱ་བའི་ཚིག་གིས་མ་རིག་པ་ནི་དེའི་རྐྱེན་ཡིན་པར་བསྟན་པ་ཡིན་ཏེ།
གཏི་མུག་ལས་སྐྱེས་པ་ནི་རྨོངས་པ་ལས་སྐྱེས་པ་ཞེས་བྱ་བ་ཡིན་པའི་ཕྱིར་རོ། །འོ་ན་ནི་ཡན་ལག་ཀུན་གཞན་ལས་རྐྱེན་ཉིད་ཡིན་པར་གསུངས་པའི་ཕྱིར་ཞེས་རྒྱས་པར་འབྱུང་བ་ནི་གལ་ཏེ་མདོ་སྡེ་གཞན་ལས་མ་རིག་པའི་རྐྱེན་གསུངས་པས་མདོ་སྡེ་འདིར་དེའི་རྐྱེན་བརྗོད་པར་བྱ་བ་མ་ཡིན་ན་ནི་འདུ་བྱེད་དང་རྣམ་པར་ཤེས་པ་ལ་སོགས་པ་ཡན་ལག་ཀུན་མདོ་སྡེ་གཞན་ལས་རྟེན་ཅིང་འབྲེལ་པར་འབྱུང་བ་དང་རྟེན་ཅིང་འབྲེལ་པར་འབྱུང་བའི་ཆོས་ཡིན་པར་གསུངས་ལ་མདོ་སྡེ་གཞན་ལས་ཀྱང་དེ་དག་རྐྱེན་ཡིན་པར་གསུངས་པ་ནི་དགེ་སློང་དག་ཆོས་རྣམས་བསྩོགས་པ་དང་འགྲིབ་པ་ཡང་བཤད་པར་བྱའོ་ཞེས་རྒྱས་པར་འབྱུང་བ་དང༌། མ་རིག་པའི་རྐྱེན་དེ་བསོད་ནམས་འདུ་བྱེད་པ་མངོན་པར་འདུ་བྱེད་པ་དང༌། མ་རིག་པའི་རྐྱེན་གྱིས་བསོད་ནམས་མ་ཡིན་པ་དང་མི་གཡོ་བའི་འདུ་བྱེད་མངོན་པར་འདུ་བྱེད་པའོ་ཞེས་བྱ་བ་དང༌། གལ་ཏེ་དེ་བསོད་ནམས་འདུ་བྱེད་པ་མངོན་པར་འདུ་བྱེད་ན་ནི་འདིའི་རྣམ་པར་ཤེས་པ་བསོད་ནམས་ཀྱི་རྗེས་སུ་འགྲོ་བར་འགྱུར་རོ་ཞེས་རྒྱས་པར་འབྱུང་བ་ཡིན་ནོ། །སྲེད་པ་དང་མ་རིག་པ་གཉིས་ཀྱང་ཆོས་མངོན་པའི་ལུགས་ཀྱིས་ལེན་པའི་ནང་དུ་འདུས་པའི་ཕྱིར་ཞེས་བྱ་བ་ཅི་ཞེ་ན། བརྗོད་པར་མི་བྱ་བར་ཐལ་བར་འགྱུར་རོ་ཞེས་བྱ་བའི་སྐབས་དང་སྦྱར་རོ། །དེ་ལྟ་ན་ནི་རྟེན་ཅིང་འབྲེལ་པར་འབྱུང་བ་ཡན་ལག་བཅུ་ཡིན་པར་འགྱུར་ཏེ། ཆོས་མངོན་པ་ལས་ཀུན་ནས་དཀྲིས་པ་དང་བཅས་པའི་ཉོན་མོངས་པ་ཐམས་ཅད་ལེན་པ་ཡིན་པར་གསུངས་སོ། །ཆོས་མངོན་པར་སྨོས་པ་ནི་མདོ་སྡེའི་ལུགས་ཀྱིས་འདུན་པ་དང༌། འདོད་ཆགས་ཉེ་བར་ལེན་པར་འབྱུང་བའི་ཕྱིར་རོ། །དཔེར་ན་ཨུཏྤ་ལའི་རྐྱེན་རྩ་བ་ཡིན་པར་བསྟན་དུ་ཟིན་ཀྱང་ཞེས་བྱ་བ་རྒྱས་པར་འབྱུང་བ་ནི་མ་སྨོས་པའི་ཕྱིར་མ་རིག་པ་ལ་རྐྱེན་མེད་པར་མ་ཡིན་ནོ་ཞེས་སྟོན་པར་བྱེད་དེ། ཡོད་དུ་ཟིན་ཀྱང་དགོས་པའི་དབང་གི་ཕྱིར་རམ། དགོས་པ་མེད་པའི་ཕྱིར་བརྗོད་པར་མི་བྱ་བ་ཡིན་ནོ། །དེ་ཉིད་ཀྱི་ཕྱིར་དེ་ནི་བདག་གིས་རྟོགས་ཏེ་ཞེས་སྨོས་པ་ནི་དེ་ལ་ཡང་གཞན་བརྗོད་པར་བྱ་དགོས་པར་འགྱུར་ལ་གང་ནས་བརྟེན་ཏེ་སྐྱེ་བའི་རིམ་པ་བསྟན་པ་བརྩམ་པར་བྱ་ཞེས་བྱ་བ་ཡིན་ནོ། །དེ་ཉིད་ཀྱིས་ཀྱང་འདི་ལ་རྒོལ་བ་མ་རིག་པའི་རྐྱེན་མ་སྨོས་པའི་ཕྱིར་འཁོར་བ་ཐོག་མ་ཡོད་པར་འགྱུར་བ་དང་ཡན་ལག་ལྷག་པ་དང་དེ་དག་ལ་ཐུག་པ་མེད་པར་འགྱུར་རོ་ཞེས་བྱ་བའི་
སྐབས་མེད་པ་ཡིན་ནོ། །ཇི་ལྟ་ཞེ་ན། དེ་ལ་ཡང་གཞན་བརྗོད་པར་བྱ་དགོས་པར་འགྱུར་ལ་གང་ནས་བརྟེན་ཏེ་སྐྱེ་བའི་རིམ་པ་བསྟན་པ་བརྩམ་པར་བྱ་སྟེ། གང་ནས་བརྟེན་ནས་བསྟན་པ་རྩོམ་ཞིང་གང་ནས་བརྟེན་ནས་བསྟན་པ་བརྩམས་པ་ཡོད་ན་དེའི་རྐྱེན་མ་སྨོས་པའི་ཕྱིར་འཁོར་བ་ཐོག་མ་ཡོད་པར་འགྱུར་རོ་ཞེས་རྒོལ་བ་འདི་ལྡོག་པར་འགྱུར་ཏེ། དེ་བས་ན་དེ་ཉིད་ཀྱིས་ཀྱང་འདི་ལ་རྒོལ་བའི་སྐབས་མེད་པ་ཡིན་ནོ། །གང་གི་དོན་དུ་ཡན་ལག་བཅུ་གཉིས་བསྟན་པ་ཞེས་རྒྱས་པར་སྨོས་པ་དེ་ཉིད་ཀྱིས་ཀྱང་འདི་ལ་རྒོལ་བའི་སྐབས་མེད་པ་ཡིན་ནོ། །མ་རིག་པའི་རྐྱེན་རང་གི་རིགས་ཡིན་ནོ་ཞེས་རྒྱས་པར་སྨོས་པ་གང་ཡིན་པ་དེ་ཉིད་ཀྱིས་ཀྱང་རྒ་ཤིའི་འོག་ཏུ་ཡན་ལག་གཞན་མ་བརྗོད་དེ། ཇི་ལྟ་ཞེ་ན། གང་ནས་རྒ་ཤིའི་འོག་ཏུ་ཡན་ལག་གཞན་བསྟན་ནས་ཡན་ལག་གཞན་མ་བརྗོད་ཀྱང་ཡན་ལག་གཞན་མི་བརྗོད་པ་འདི་ལ་རྒོལ་བ་ལྡོག་པར་འགྱུར་ལ། འཁོར་བ་ལ་ཐ་མ་ཡོད་པར་ཐལ་བ་ཡང་མ་ཡིན་ཏེ། དེ་བས་ན་དེ་ཉིད་ཀྱིས་ཀྱང་རྒ་ཤིའི་འོག་ཏུ་ཡན་ལག་གཞན་མ་བརྗོད་ལ་ཞེས་རྒྱས་པར་འབྱུང་བ་ཡིན་ནོ། །གཞན་ཡང་དེ་ཉིད་ཀྱིས་ཀྱང་ཞེས་རྒྱས་པར་འབྱུང་ལ། གང་གི་དོན་དུ་ཡན་ལག་བཅུ་གཉིས་བསྟན་པ་སྨོས་པ་དེ་ཉིད་ཀྱིས་ཀྱང་རྒ་ཤིའི་འོག་ཏུ་ཡན་ལག་གཞན་མ་སྨོས་ཀྱང་འཁོར་བ་ལ་ཐ་མ་ཡོད་པར་ཐལ་བར་མི་འགྱུར་ཏེ། ཡན་ལག་བཅུ་གཉིས་ཀྱིས་བསྒོས་པ་དེ་ཡོངས་སུ་རྫོགས་པའི་ཕྱིར་རོ། །ཇི་ལྟར་དེ་རེག་པའི་ཚེ་བསྟན་ཅེ་ན། མིང་དང་གཟུགས་ལ་བརྟེན་ནས་རྨོངས་པ་ལས་བྱུང་བའི་བསྒོས་པའི་ཡིད་ལ་བྱེད་པ་སྐྱེའོ་ཞེས་གསུངས་པའི་ཕྱིར་རོ། །ཚོར་བ་བསྟན་པས་ཀྱང་མ་རིག་པ་བསྟན་པ་ཡིན་ཏེ་ཞེས་རྒྱས་པར་འབྱུང་བ་འདི་མདོ་སྡེ་འདིར་ཚོར་བའི་རྐྱེན་གྱིས་སྲིད་པ་ཞེས་གསུངས་པ་མ་རིག་པ་མེད་པའི་ཚོར་བ་ནི་སྲིད་པའི་རྐྱེན་མ་ཡིན་ཏེ། དཔེར་ན་དགྲ་བཅོམ་པ་ལྟ་བུའོ། །དེ་ལྟར་ན་འདིར་ཚོར་བ་བསྟན་པས་མ་རིག་པ་བསྟན་པ་ཡིན་ནོ། །འདི་སྐད་བསྟན་ཏེ་རེག་པ་དང་ལྷན་ཅིག་བྱུང་བའི་ཚུལ་བཞིན་མ་ཡིན་པར་ཡིད་ལ་བྱེད་པ་ནི་ཚོར་བ་དང་ལྷན་ཅིག་བྱུང་བའི་མ་རིག་པའི་རྒྱུ་ཡིན་ནོ་ཞེས་བྱའོ། །མ་རིག་པའི་འདུས་ཏེ་རེག་པ་ནི་མ་རིག་པ་དང་མཚུངས་པར་ལྡན་པ་ལ། མ་རིག་པའི་འདུས་ཏེ་རེག་པ་ཞེས་བྱའོ། །དེ་ལས་སྐྱེས་པ་འདི་མ་རིག་པའི་འདུས་ཏེ་རེག་པ་ལས་སྐྱེས་པའོ། །མདོ་སྡེ་གཞན་ལས་གསུངས་པ་དེ་དག་
ཐམས་ཅད་ཀྱང་འདིར་མི་བརྗོད་པར་ཐལ་བར་འགྱུར་རོ། །ཇི་ཙམ་དུ་རིགས་པར་དཀྲི་ནུས་པའི་བར་དུ་ཁ་ཆེ་བྱེ་བྲག་ཏུ་སྨྲ་བ་དག་ན་རེ་མ་རིག་པ་དང་རྒ་ཤི་གཉིས་ལས་རྐྱེན་མ་སྨོས་སུ་ཟིན་ཀྱང་འཁོར་བ་ལ་ཐོག་མ་དང་ཐ་མ་ཡོད་པར་ཐལ་བར་མི་འགྱུར་ཏེ། མདོ་སྡེ་འདིར་ཉོན་མོངས་པ་དང་ལས་དང་དངོས་པོ་རྒྱུར་བསྟན་པའི་ཕྱིར་རོ། །ཇི་ལྟར་ཉོན་མོངས་པ་ལས་ཉོན་མོངས་པ་སྐྱེ་ཞེ་ན། སྲེད་པ་ལས་སྲེད་པ་དང་ལེན་པའོ། །ལས་ཀྱང་སྐྱེ་སྟེ། མ་རིག་པ་ལས་འདུ་བྱེད་དང་ལེན་བ་ལས་སྲིད་པའོ། །ལས་ལས་ཀྱང་དངོས་པོ་སྐྱེ་སྟེ། འདུ་བྱེད་ལས་རྣམ་པར་ཤེས་པ་དང་སྲིད་པ་ལས་སྐྱེ་བའོ། །དངོས་པོ་ལས་དངོས་པོ་སྐྱེ་སྟེ། རྣམ་པར་ཤེས་པ་ལས་མིང་དང་གཟུགས་མིང་དང་གཟུགས་ལས་སྐྱེ་མཆེད་དྲུག་ཅེས་བྱ་བ་ལ་སོགས་པ་དང༌། སྐྱེ་བ་དང་རྒ་ཤིའི་ཉོན་མོངས་པ་ཡང་དངོས་པོ་ལས་སྐྱེ་སྟེ་ཚོར་བ་ལས་སྲིད་པའོ། །དེ་ལྟར་བྱས་ན་མ་རིག་པའི་རྒྱུ་ནི་ཉོན་མོངས་པ་དང་དངོས་པོ་ཡིན་པའམ། དངོས་པོ་ཡིན་ནོ་ཞེས་ཤེས་པར་བྱས་པ་ཡིན་ནོ། །རྒ་ཤི་ལས་དངོས་པོ་འམ་ཉོན་མོངས་པ་སྐྱེ་བ་ཡིན་ནོ། །དེ་བས་ན་འདི་ལ་བརྒལ་དུ་མེད་དོ། །མ་རིག་པ་གང་ཞེ་ན་ཞེས་བྱ་བའི་མའི་རྣམ་པ་འདི་ནི་རིག་པ་མ་ཡིན་པ་ནི་མ་རིག་པ་ཡིན་ནོ་ཞེས་འགོག་པའི་རྣམ་གྲངས་ཡིན་ནོ་ཞེས་བྱ་བ་ལ་རྣམ་གྲངས་ཞེས་བྱ་བ་ནི་རྣམ་གྲངས་མ་ཡིན་པ་བསལ་བའི་ཕྱིར་ཏེ། དོན་ཐ་དད་པ་མ་ཡིན་པ་ཉིད་ཡིན་པའི་ཕྱིར་རོ། །ཡོད་པ་འགོག་པ་ལ་ནི་འཛིན་པ་མ་ཡིན་པ་དང་དངོས་པོ་མ་ཡིན་ཞེས་བྱ་བ་ལྟ་བུའོ་ཞེས་བྱ་བ་ནི་འཛིན་པ་དང་དངོས་པོ་ཡོད་པ་འགོག་པར་ངེས་པར་བྱེད་པ་ཡིན་ཏེ། འཛིན་པ་ཡོད་པ་མ་ཡིན་དངོས་པོ་ཡོད་པ་མ་ཡིན་ཞེས་བྱ་བ་ཡིན་ནོ། །གཞན་ཉིད་ལ་རིགས་སྲོག་ཆགས་མ་ཡིན་ཞེས་བྱ་ན་ཞེས་བྱ་བ་ནི་འདིར་སྲོགས་ཆགས་ཀྱི་རིགས་ཡོད་པ་འགོག་པར་ངེས་པར་བྱེད་པ་མ་ཡིན་གྱི་འོ་ན་ཅི་ཞེ་ན་སྲོག་ཆགས་ལས་གཞན་གང་ཡིན་པ་དེ་ལ་ངེས་པར་འཛིན་པ་ཡིན་ནོ། །འདི་ལ་ཡང་འདྲ་བ་ཡོད་མོད་ཀྱི་འདི་ནི་ཉེ་བ་མ་ཡིན་པ་ཡིན་ནོ། །འདྲ་བ་གཞན་ཉིད་ལ་ནི་བྲམ་ཟེ་མ་ཡིན་གཞོན་ནུ་མ་ཡིན་ཞེས་བྱ་བ་ནི་འདྲ་བ་ཉེ་བར་བྱ་བ་ཡིན་པའི་ཕྱིར་རོ། །སྨད་པའི་དོན་ལ་ནི་ཆུང་མ་མ་ཡིན་པ་དང༌། བུ་མ་ཡིན་པ་ཞེས་བྱ་བ་ནི་འདིར་ཆུང་མ་དང་འདྲ་བ་གཞན་དང་བུ་དང་འདྲ་བ་གཞན་ཡིན་པར་ངེས་པར་བྱེད་པ་མ་ཡིན་གྱི། སྨད་པའི་ཆུང་
མ་ཉིད་ལ་ཆུང་མ་མ་ཡིན་པ་ཉིད་ཅེས་བྱ། སྨད་པའི་བུ་ལ་བུ་མ་ཡིན་པ་ཉིད་ཅེས་བྱ་བ་ཡིན་ནོ། །ཉུང་བའི་དོན་ལ་ཚོད་མ་ལན་ཚྭ་མེད་པ་དང༌། གཞོན་ནུ་མ་ལྟོ་མེད་ཅེས་བྱ་བ་ལྟ་བུའོ་ཞེས་བྱ་བ་ནི་རེས་འགའ་ཞིག་ལན་ཚྭ་མེད་པའི་ཚོད་མ་ཞེས་བྱས་ན་འདི་ཡང་ཡོད་པ་འགོག་པ་ཡིན་མོད་ཀྱི། ཉུང་བའི་དོན་ལ་ཡང་དེ་མཐོང་བ་ཡིན་ནོ། །བྲལ་བའི་དོན་ལ་ནི་དགེ་སློང་མེད་པའི་གནས་དང༌། ཆུ་མེད་པའི་དགོན་པ་ཞེས་བྱ་བ་ལྟ་བུའོ་ཞེས་བྱ་བ་ནི་དགེ་སློང་ཉུང་བ་ཡང་དགེ་སློང་མེད་དོ། །ཆུ་ཉུང་བ་ལ་ཡང་ཆུ་མེད་དོ་ཞེས་ཉུང་བའི་དོན་ལ་ཡང་འདི་མཐོང་སྟེ། འདོད་མོད་ཀྱི་བྲལ་བའི་དོན་ལ་ཡང་མཐོང་བ་ཡིན་ནོ། གཉེན་པོའི་དོན་ལ་ནི་བསོད་ནམས་མེད་པ་དང༌། གྲགས་པ་མེད་པ་ཞེས་བྱ་བ་ལྟ་བུའོ་ཞེས་བྱ་བ་ནི་བསོད་ནམས་དང་གྲགས་པ་གཉིས་ཀྱི་མི་མཐུན་པའི་ཕྱོགས་ཀྱི་དོན་ལ་བྱ་སྟེ། ཕྱོགས་དང་འགལ་བ་ལ་མི་མཐུན་པའི་ཕྱོགས་ཞེས་བྱའོ། །འདི་ལྟར་དངོས་པོ་མེད་པ་ནི་འདུ་བྱེད་སྐྱེ་བའི་བདག་པོའི་རྐྱེན་ཉིད་དུ་མི་རིགས་པའི་ཕྱིར་རོ་ཞེས་བྱ་བ་ནི་གང་གི་དོན་དུ་བྱས་ནས་རིག་པའི་རྐྱེན་གྱིས་འདུ་བྱེད་ཅེས་བརྗོད་པའོ། །གལ་ཏེ་མ་རིག་པ་འགགས་པས་འདུ་བྱེད་འགག་གོ་ཞེས་བརྗོད་པའི་འགག་པ་ཡང་མ་རིག་པ་དངོས་པོ་ཅི་ཡང་མེད་པ་ཡིན་ན། རིག་པ་མ་ཡིན་ནོ། །ལྡོག་པའི་ཕྱོགས་ཀྱི་དབང་དུ་བྱས་ནས་རིག་པ་མེད་པ་ཙམ་ནི་ཡང་དངོས་པོ་མེད་པར་འགྱུར་བར་མི་རིགས་སོ། །མདོ་སྡེ་གཞན་ལས་ཀུན་དུ་སྦྱོར་བ་དང༌། འཆིང་བ་ལ་སོགས་པ་ཉིད་ཡིན་པར་གསུངས་པ་ཡང་ཅི་ཞེ་ན། རིག་པའི་དངོས་པོ་མེད་པ་ཙམ་ཡིན་ན་མི་རིགས་སོ། །སོགས་པའི་སྒྲས་ཕྲ་རྒྱས་དང༌། ཀུན་ནས་དཀྲིས་པ་ལ་སོགས་པ་གཟུང་ངོ། །སྡུག་བསྔལ་སྣ་ཚོགས་ལ་སྦྱར་བའི་དོན་གྱིས་ཀུན་དུ་སྦྱོར་བ་ཡིན་ནོ། །ཁམས་གསུམ་ལས་ནི་འདའ་བའི་དོན་གྱིས་འཆིང་བའོ། །ཕྲ་མོར་རྗེས་སུ་འཇུག་ཅིང་ཕྲ་རྒྱས་ཀྱི་དོན་གྱིས་ཕྲ་རྒྱས་སོ། །དེ་དག་ནི་རིག་པའི་དངོས་པོ་མེད་པ་ཙམ་ཡིན་ན་མི་རིགས་སོ། །རིག་པའི་དངོས་པོ་མེད་པ་ཙམ་ཡིན་ན་ཅི་ཞེ་ན་ཚུལ་བཞིན་མ་ཡིན་པར་ཡིད་ལ་བྱེད་པ་རྒྱུ་ཡིན་པར་ཡང་མི་རིགས་ཏེ། དེ་ཅིའི་ཕྱིར་ཞེ་ན། དངོས་པོ་མེད་པ་ལ་རྒྱུ་ཡོད་པ་མ་ཡིན་པའི་ཕྱིར་དང༌། འདུས་བྱས་རྣམས་ནི་སྐད་ཅིག་མ་ཡིན་པའི་ཕྱིར་དང༌། དངོས་པོ་མེད་པ་ནི་བདག་མེད་པ་ཡིན་པའི་ཡང་ཕྱིར་རོ། །དེ་དག་གིས་ནི་སྔ་ན་མེད་པ་ཡང་བཀག་པ་ཡིན་
ནོ། །འདི་ལྟར་དངོས་པོ་མེད་པ་ནི་འདུ་བྱེད་སྐྱེ་བའི་བདག་པོའི་རྐྱེན་ཉིད་དུ་མི་རིགས་པའི་ཕྱིར་རོ་ཞེས་སྨོས་པ་གང་ཡིན་པ་དེར་རེ་ཞིག་འདོད་མ་ཆགས་པ་ནི་འཇིག་རྟེན་པའི་ཆོས་ཀུན་ནས་ཉོན་མོངས་པའི་རྐྱེན་དུ་ཇི་ལྟར་འགྱུར་ཏེ་ཞེས་རྒྱས་པར་སྨོས་སོ། །དེ་ནི་རྣམ་པར་རྟོག་པ་དེའི་ཞེས་བྱ་བ་ནི། འདོད་མ་ཆགས་པ་རྣམ་པར་རྟོག་པའོ། །དམིགས་པ་ཙམ་སྨོས་པ་ནི་སྐྱེ་བའི་རྐྱེན་གྱིས་དངོས་པོ་འགོག་པར་བྱེད་པ་ཡིན་ནོ། །གལ་ཏེ་འདི་རྣམ་པར་རྟོག་པ་དང་སྐྱེ་བའི་རྐྱེན་ཡིན་ན་ནི་བརྒྱུད་པའི་སྒོ་ནས་ཉོན་མོངས་པའི་རྐྱེན་ཡང་ཡིན་པར་འགྱུར་བ་ཞིག་ན་དཔེར་ན་འདུས་མ་བྱས་ནི་ཡིད་ཀྱི་རྣམ་པར་ཤེས་པའི་དམིགས་པ་ཙམ་ཡིན་གྱི། སྐྱེ་པའི་རྐྱེན་མ་ཡིན་པ་བཞིན་ནོ། །རྣམ་པར་རྟོག་པ་དེ་ལས་རྙེད་པ་འདོད་པ་རྣམས་ཀུན་ནས་ཉོན་མོངས་པར་འགྱུར་རོ་ཞེས་བྱ་བ་ནི་མ་རྙེད་པར་རྣམ་པར་རྟོག་པ་ལས་སོ། །རྙེད་པ་འདོད་པ་རྣམས་ཞེས་བྱ་བ་ནི་རྙེད་པ་ལ་ཆགས་པ་དང་ལྡན་པའོ། །དེ་དག་གིས་ནི་རྙེད་པ་ལ་རྣམ་པར་རྟོག་པ་བྱེ་བྲག་ཏུ་བྱས་སོ། །མ་རིག་པ་ཡང་རྨོངས་པ་ཞེས་མདོ་སྡེ་གཞན་ལས་བསྟན་ལ་ཞེས་བྱ་བ་འདི་ཡང་སྐྱོན་གཞན་ཡིན་ཏེ། གལ་ཏེ་རྨོངས་པ་ནི་རིག་པ་མེད་པའི་དངོས་པོ་ཙམ་ཡིན་ན་རྨོངས་པ་མེད་པ་རིག་པའི་མཚན་ཉིད་དག་ཅི་རྨོངས་པའི་དངོས་པོ་མེད་པ་ཙམ་ཡིན་ནམ། རྨོངས་པ་མེད་པ་ཙམ་ནི་མ་ཡིན་པས་དེ་ལྟར་མི་འདོད་པ་སྟེ་རྨོངས་པ་མེད་པ་ནི་ཤེས་རབ་ཀྱི་བདག་ཉིད་ཡིན་པའི་ཕྱིར་རིག་པ་ཡིན་ནོ། །འོན་ཏེ་མ་རྨོངས་པ་རིག་པའི་མཚན་ཉིད་ནི་རྨོངས་པའི་གཉེན་པོ་ཡིན་ན་དེ་གཉི་ག་ཡང་དངོས་པོ་མེད་པ་ལ་རིག་པ་མ་ཡིན་ཏེ་ཞེས་བྱ་བའི་གཉི་ག་ཅི་ཞེ་ན། དངོས་པོ་མེད་པ་དང་གཉེན་པོའོ། །ཅིའི་ཕྱིར་ཞེ་ན། དེའི་ཕྱིར་དངོས་པོ་མེད་པ་ནི་སྐྱེ་བ་མེད་པ་དང་ལྡན་པའི་ཕྱིར་རོ་ཞེས་བྱ་བ་སྨོས་སོ། །འདི་ལྟར་གང་སྐྱེ་བ་དང་ལྡན་པ་དེ་ཁོ་ན་དངོས་པོ་མེད་པ་ཡིན་གྱི། དངོས་པོ་མེད་པ་ནི་མ་ཡིན་ནོ། །འདོད་ཆགས་ལ་སོགས་པའི་གཉེན་པོ་ཡང་ལམ་གྱི་དངོས་པོ་ཡིན་གྱི། དངོས་པོ་མེད་པ་ནི་མ་ཡིན་ནོ། །དངོས་པོ་མེད་པ་ཡང་རྣམ་པ་གཉིས་ཏེ། སྔ་ན་མེད་པ་དང་ཞིག་ནས་མེད་པའོ། །དེ་ལ་ཞིག་ནས་མེད་པ་ནི་སྐྱེ་བ་དང་ལྡན་པ་རྣམས་ལ་ཡིན་པར་མངོན་སུམ་དུ་གྲུབ་པ་ཡིན་ནོ། །སྐྱེ་བ་དང་ལྡན་པ་ཡིན་ན་ཡང་སྐྱེ་བའི་གཉེན་པོ་ཡིན་ཏེ། དཔེར་ན་འདོད་ཆགས་ལ་སོགས་པའི་ལམ་ལྟ་བུའོ། །སྔ་ན་མེད་པ་ནི་སྐྱེ་བ་དང་ལྡན་པ་
ཡང་མ་ཡིན་ནོ། །དེ་ལྟར་ན་རེ་ཞིག་འཛིན་པ་མ་ཡིན་པ་དང་ལྡན་པ་དང༌། དངོས་པོ་མ་ཡིན་པ་དང་ལྡན་པ་ནི་མ་རིག་པ་ཡིན་པར་མི་འཐད་དོ། །སྲོག་ཆགས་མ་ཡིན་པ་དང་གཟུགས་ཅན་མ་ཡིན་པ་ཞེས་བྱ་བ་བཞིན་དུ། རིག་པ་ལས་གཞན་པ་གང་ཡིན་པ་དེ་ཡང་མ་རིག་པ་ཡིན་ཏེ། ཅིའི་ཕྱིར་ཞེ་ན། མིག་ལ་སོགས་པ་ལ་ཡང་ཐལ་བར་འགྱུར་བའི་ཕྱིར་ཏེ། མིག་དང༌། རྣ་བ་དང༌། སྣ་ལ་སོགས་པ་དེ་དག་ཀྱང་རིག་པ་ལས་གཞན་ཡིན་པས་སོ། །མིག་ལ་སོགས་པ་ལ་ཐལ་བར་གྱུར་ན་ཉེས་པ་ཅི་ཡོད་ཅེ་ན། འཇུག་པ་དང་ལྡོག་པར་ཐལ་བའི་ཉེས་པ་ཡོད་དེ། གལ་ཏེ་རེ་ཞིག་མིག་ལ་སོགས་པ་མ་རིག་པའི་མཚན་ཉིད་ཡིན་པར་འདོད་ན་རྟག་ཏུ་ཡོད་པར་ཐལ་བར་འགྱུར་ཏེ། དགྲ་བཅོམ་པ་ལ་ཡང་དེ་ཡོད་པའི་ཕྱིར་རོ། །འོན་ཏེ་མིག་ལ་སོགས་པའི་མཚན་ཉིད་མ་རིག་པ་ཡིན་ན། མིག་ལ་སོགས་པ་ནི་མ་བསྒྲིབས་ལ་ལུང་དུ་མ་བསྟན་པ་ཡིན་པའི་ཕྱིར་མ་རིག་པ་མ་སྤངས་ཀྱང་ལྡོག་པར་ཐལ་བར་འགྱུར་རོ། །འདོད་ཆགས་ལ་སོགས་པ་ཡང་མིག་ལ་སོགས་པའི་མཚན་ཉིད་ཡིན་པར་འགྱུར་ཏེ། མ་རིག་པའི་མཚན་ཉིད་ཡིན་པའི་ཕྱིར་རོ། །མིག་ལ་སོགས་པ་ཡང་འདོད་ཆགས་ལ་སོགས་པའི་མཚན་ཉིད་ཡིན་ན་ནི་དེས་ན་རྟག་ཏུ་ཡོད་པར་ཐལ་བའི་སྐྱོན་དེ་ཁོ་ན་དེ་བཞིན་དུ་གནས་པ་ཉིད་དུ་འགྱུར་ཏེ། དགྲ་བཅོམ་པ་ལ་ཡང་དེ་ཡོད་པའི་ཕྱིར་རོ། །རིག་པ་དང་འདྲ་བའི་ཆོས་གཞན་ཡང་བྲམ་ཟེ་མ་ཡིན་པ་དང༌། གཞོན་ནུ་མ་ཡིན་པ་བཞིན་དུ་མ་རིག་པ་མ་ཡིན་ཏེ། དེ་མེད་པའི་ཕྱིར་དང་ཞེས་བྱ་བ་ནི་རིག་པ་དང་འདྲ་བ་ཆོས་གཞན་དེ་མེད་པའི་ཕྱིར་རོ་ཞེས་བྱ་བའི་ཐ་ཚིག་གོ །གལ་ཏེ་ཡང་དགེ་བའི་ཤེས་རབ་འགའ་ཞིག་ཡོད་ལ། རིག་པ་ཡང་མ་ཡིན་ན་ནི་དེ་རིག་པ་དང་འདྲ་བར་འགྱུར་ན། དེ་ཡང་ཡོད་པ་མ་ཡིན་ནོ། །བརྒྱ་ཞིག་ལ་ཤེས་རབ་ཡོད་ལ། རིག་པ་དང་འདྲ་བར་འགྱུར་ན། དེ་ཡང་ཡོད་པ་མ་ཡིན་ནོ། །འོན་ཏེ་ཤེས་རབ་ཉོན་མོངས་པ་ཅན་མ་ཡིན་པ་དང་ཆོས་འདྲ་བར་རྟོག་པར་བྱེད་ན་དེའི་ཕྱིར་ཉོན་མོངས་པ་ཅན་མ་ཡིན་པ་ལུང་དུ་མ་བསྟན་པའི་ཤེས་རབ་ཀྱི་རྫས་ཀྱང་མ་རིག་པ་ཡིན་པར་འགྱུར་རོ། །དེས་ཅི་ཉེས་ཤེ་ན་དགྲ་བཅོམ་པ་ལ་ཡང་ཡོད་པར་ཐལ་བར་འགྱུར་ཏེ། དེ་ལ་ཡོད་པ་ཡིན་པའི་ཕྱིར་རོ། །འདིར་གཅིག་ཁོ་ནར་ཉོན་མོངས་པ་ཅན་མ་རིག་པ་ཡིན་པར་བརྗོད་པར་འདོད་ན་ཡང༌། དེ་ཇི་ལྟར་ཉོན་མོངས་པ་ཅན་མ་ཡིན་པ་ལུང་དུ་མ་བསྟན་པའི་ཤེས་རབ་ཀྱི་རྫས་ཡིན་པར་འགྱུར།
རིག་པ་ཡང་ཉོན་མོངས་པ་ཅན་ལ་བདག་པོ་བྱེད་པ་ཡོད་པ་མ་ཡིན་ནོ། །སྨད་པའི་རིག་པ་ཡང་ཆུང་མ་མ་ཡིན་པ་དང༌། བུ་མ་ཡིན་པ་བཞིན་དུ་མ་རིག་པ་མ་ཡིན་ཏེ། ཅིའི་ཕྱིར་ཞེ་ན། དེ་མེད་པའི་ཕྱིར་ཞེས་སྨོས་ཏེ། སྨད་པའི་རིག་པ་དེ་མེད་པའི་ཕྱིར་རོ་ཞེས་བྱ་བའི་ཐ་ཚིག་གོ །གལ་ཏེ་རིག་པ་འགའ་ཞིག་ཡོད་ལ་སྨད་པ་ཡིན་པར་གྱུར་ན་ནི་དེ་མ་རིག་པ་ཡིན་ནོ་ཞེས་རྣམ་པར་གཞག་ཏུ་རུང་སྟེ། དཔེར་ན་ཆུང་མ་ཡོད་ལ་སྨད་པ་ཡིན་པའི་ཕྱིར་ཆུང་མ་མ་ཡིན་ནོ་ཞེས་བྱ་བ་བཞིན་དུ་རུང་ན་དེ་ཡང་ཡོད་པ་མ་ཡིན་ནོ། །འོན་ཏེ་དགེ་བ་ཟག་པ་དང་བཅས་པའི་ཕྱིར་སྨད་པ་ཡིན་ནོ་ཞེས་བརྗོད་ན་དེ་གཅིག་ཏུ་དགེ་བ་ཡིན་པའི་ཕྱིར་ཇི་ལྟར་ཉོན་མོངས་པའི་བདག་པོ་བྱེད་པར་འཐད་ལ། དགྲ་བཅོམ་པ་ལ་ཡང་ཡོད་པའི་ཕྱིར་ཀུན་ནས་ཉོན་མོངས་པ་ཅན་ཡིན་པར་འགྱུར་རོ། །ཉོན་མོངས་པ་ཅན་གྱི་ཤེས་རབ་ཀྱི་རྫས་ཀྱང་མ་རིག་པ་ཡིན་པར་འགྱུར་རོ་ཞེས་བྱ་བ་ནི་གལ་ཏེ་ཤེས་རབ་ཙམ་རིག་པ་ཡིན་པར་རྣམ་པར་འཇོག་པའི་ཕྱིར་རོ། །ཅི་ཉེས་ཤེ་ན་ཞེས་བྱ་བ་ནི་དེ་ལྟ་ཡིན་ན་ཉེས་པ་ཅི་ཡོད་ཅེས་བྱ་བའི་ཐ་ཚིག་གོ །དེའི་ཕྱིར་ཉོན་མོངས་པ་ཅན་གྱི་ལྟ་བ་མ་རིག་པ་ཡིན་པར་འགྱུར་རོ་ཞེས་སྨྲས་སོ།། །།རྟེན་ཅིང་འབྲེལ་པར་འབྱུང་བའི་དང་པོ་དང་རྣམ་པར་དབྱེ་བ་བསྟན་པ་རྒྱ་ཆེར་འགྲེལ་པ། བམ་པོ་གསུམ་པ། ཅི་ཉེས་ཤེ་ན་ཞེས་བྱ་བ་ནི་དེས་ཅིར་འགྱུར་ཞེས་བྱ་བའི་ཐ་ཚིག་གོ །དེའི་ཕྱིར་སོ་སོར་མ་རིག་པའི་ཕྲ་རྒྱས་དང༌། ལྟ་བའི་ཕྲ་རྒྱས་ཞེས་མི་བརྗོད་པར་འགྱུར་རོ། །དེའི་ཕྱིར་གལ་ཏེ་དེ་ལས་གཞན་པའི་ཉོན་མོངས་པ་དང་མཚུངས་པར་ལྡན་པའི་ཤེས་རབ་མ་རིག་པ་ཡིན་པར་འགྱུར་རོ་ཞེས་སྨྲས་སོ། །ཅི་ཉེས་ཤེ་ན་དེའི་ཕྱིར་མ་འདྲེས་པའི་མ་རིག་པ་མེད་པར་འགྱུར་རོ་ཞེས་སྨྲས་ཏེ། སྨད་པའི་ཤེས་རབ་མ་རིག་པ་ཡིན་པར་བསྟན་ན་སྨད་པ་ཡིན་ན་ཇི་ལྟར་ཉོན་མོངས་པ་ཅན་མ་ཡིན་པར་འགྱུར། དེ་ནི་རྣམ་པ་གཉིས་ཏེ། ལྟ་བའི་མཚན་ཉིད་དང་དེ་ལས་གཞན་པའི་ཉོན་མོངས་པ་དང་མཚུངས་པར་ལྡན་པའོ། །དེ་ནི་ལྟ་བ་ཡིན་པ་དང་འདོད་ཆགས་ལ་སོགས་པའི་ཉོན་མོངས་པ་གཞན་དང་མཚུངས་པར་འགྱུར་པ་ཞེས་བྱ་འོ། །དེ་ལ་ལྟ་བའི་མཚན་ཉིད་ནི་ལྟ་བའི་ཕྲ་རྒྱས་སོ། །དེ་ལས་གཞན་པའི་ཉོན་མོངས་པ་དང་མཚུངས་པར་ལྡན་པ་ནི་མ་རིག་པའི་ཕྲ་རྒྱས་ཡིན་ནམ་འདྲེས་པའི་མ་རིག་པ་ནི་ཉོན་མོངས་པ་གང་དང་གང་འགྲོགས་
པ་མ་ཡིན་པས་དེ་ནི་མ་རིག་པ་མ་ཡིན་པར་འགྱུར་ཏེ། མ་རིག་པའི་མཚན་ཉིད་མེད་པའི་ཕྱིར་རོ། །ཡང་སྐྱོན་གཞན་འདི་ཡོད་དེ་མི་དགེ་བའི་ལྟ་བ་ལོག་པར་ལྟ་བ་ལ་སོགས་པ་ཡང་མི་དགེ་བའི་རྩ་བ་རྨོངས་པ་དང་མཚུངས་པར་ལྡན་པ་མ་ཡིན་པར་འགྱུར་རོ། །ལྟ་བ་ཡང་ཤེས་རབ་ཡིན་ལ་རྨོངས་པ་ཡང་དེ་ལས་གཞན་པའི་ཉོན་མོངས་པ་དང་མཚུངས་པར་ལྡན་པ་ཡིན་ཏེ། ཤེས་རབ་དང་མ་རིག་པ་ཞེས་སྨྲས་པའི་ཕྱིར་རོ། །ཤེས་རབ་ཀྱི་རྫས་གཉིས་མཚུངས་པར་ལྡན་པ་ཡང་ཡོད་པ་མ་ཡིན་ཏེ། རྫས་མཉམ་པ་ཉིད་ངེས་པའི་ཕྱིར་རོ། །རིག་པ་ཆུང་བ་ཡང་ལན་ཚྭ་མེད་པ་ལ་སོགས་པ་བཞིན་དུ་མ་རིག་པ་ཡིན་ཏེ། ཅིའི་ཕྱིར་ཞེ་ན། དེའི་ཕྱིར་ལུགས་ལས་བཟློག་པའི་བརྒྱད་པ་ལ་སོགས་པ་རྒྱུན་དུ་ཞུགས་པའི་འབྲས་བུ་མངོན་དུ་བྱ་བའི་ཕྱིར་ཞུགས་པའི་རིག་པ་ཟག་པ་མེད་པའི་ཤེས་རབ་མ་རྫོགས་པའི་རིག་པ་ཡང་མ་རིག་པ་ཡིན་པར་གྱུར་ཏེ་རེ་ཞེས་སྨྲས་སོ། །དེ་ལྟར་གྱུར་ན་ཉེས་པ་ཅི་ཡོད་ཅེ་ན་སོ་སོའི་སྐྱེ་བོའི་བཞིན་དུ་ཉོན་མོངས་པ་ཅན་ཡིན་པར་འགྱུར་ཏེ། མ་རིག་པ་ཡོད་པའི་ཕྱིར་དང་འཕགས་པ་རྣམས་ལ་ཡང་ཡང་སྲིད་པ་འཕེན་པ་ཡོད་པར་འགྱུར་བ་ཞིག་ན་མ་རིག་པས་བྱས་པའི་ཡང་སྲིད་ནི་ཡོད་པ་མ་ཡིན་ཏེ། མ་རིག་པའི་ཉོན་མོངས་པའི་གཉེན་པོ་ཡིན་པའི་ཕྱིར་རོ། །འོན་ཏེ་སོ་སོའི་སྐྱེ་བོ་རྣམས་ཀྱི་དགེ་བ་ཟག་པ་དང་བཅས་པ་ཡང་རིག་པ་ཆུང་བས་མ་ཡིན་ནོ་ཞེས་དེ་ནི་རིག་པ་མ་ཡིན་ནོ། །དེ་ནི་གཅིག་ཏུ་ཉོན་མོངས་ཅན་ཉིད་ལ་སོགས་པ་ཡིན་པའི་ཕྱིར་རོ། །རིག་པ་དང་བྲལ་བ་གང་ཡིན་པ་དེ་ཡང་དགེ་སློང་མེད་པའི་གནས་དང་ཆུ་མེད་པའི་དགོན་པ་བཞིན་དུ་མ་རིག་པ་མ་ཡིན་ཏེ། རིག་པ་མ་སྐྱེས་པའི་རྒྱུ་སོ་སོའི་སྐྱེ་བོའི་རྒྱུད་ཀྱི་མིག་ལ་སོགས་པ་ཐམས་ཅད་ཀྱང་མ་རིག་པ་ཡིན་པར་གྱུར་ཏ་རེ་དེ་ལྟར་གྱུར་ན་ནི་རྣམ་པར་བྱང་བའི་ཕྱོགས་མེད་པའི་སྐྱོན་དུ་འགྱུར་ཏེ། མ་རིག་པའི་མཚན་ཉིད་མིག་ལ་སོགས་པ་རྣམས་རྟག་ཏུ་འབྲེལ་བའི་ཕྱིར་རོ། །ཇི་སྐད་དུ་སེམས་ཉོན་མོངས་པར་བྱེད་པའི་ཕྱིར་དང་སྒྲིབ་པ་ཡིན་པའི་ཕྱིར་དང༌། དགེ་བ་དང་མི་མཐུན་པའི་ཕྱིར་དང༌། དགེ་བ་ལ་སྐབས་འཚོལ་བའི་ཕྱིར་དང༌། བྲལ་བ་མ་ཡིན་པ་ནི་འདིར་ཕྲ་རྒྱས་ཞེས་བཤད་དོ། །རིག་པའི་མི་མཐུན་པའི་ཕྱོགས་ཆོས་གཞན་ནི་མ་རིག་པ་ཡིན་ནོ་ཞེས་བྱ་བར་རིག་པར་བྱ་སྟེ། བསོད་ནམས་མ་ཡིན་པ་དང༌།
གྲགས་པ་མ་ཡིན་པ་ལྟ་བུ་དང་ཞེས་བྱ་བས་ལྷག་མ་འདི་གྲུབ་པ་ཡིན་ཏེ། ཇི་ལྟར་བསོད་ནམས་ཀྱི་མི་མཐུན་པའི་ཕྱོགས་ཆོས་གཞན་ལ་བསོད་ནམས་ཡིན་ནོ་ཞེས་བྱ་བ་དང༌། གྲགས་པ་མི་མཐུན་པའི་ཕྱིར་ལ་གྲགས་པ་མ་ཡིན་ནོ་ཞེས་བྱ་བ་དེ་བཞིན་དུ་རིག་པའི་མི་མཐུན་པའི་ཕྱོགས་སུ་གྱུར་པ་ཆོས་གཞན་ལ་མ་རིག་པ་ཞེས་བྱའོ། །མི་དགེ་བའི་ཆོས་ཐམས་ཅད་ནི་དགེ་བའི་ཆོས་རྣམས་ཀུན་དུ་འབྱུང་བ་དང་མི་མཐུན་པ་ཡིན་པར་འདོད་དུ་ཟིན་ཀྱང་འོན་ཀྱང་མ་རིག་པ་ཁོ་ན་མི་མཐུན་པའི་ཕྱོགས་ཡིན་པར་བརྗོད་པར་བྱ་སྟེ། དེ་ནི་དེ་དག་གི་སྔ་རོལ་བ་ཡིན་པའི་ཕྱིར་རོ། །ཇི་སྐད་དུ་རྨོངས་པ་ཁོ་ནས་སྐྱེ་བའི་ཕྱིར་རོ་ཞེས་བྱ་བ་དང་དེ་བཞིན་དུ་མ་རིག་པ་ཀུན་འབྱུང་བ་ལས་ཟག་པ་ཀུན་འབྱུང་བ་ཡིན་ནོ་ཞེས་གསུངས་པ་ཡིན་ནོ། །རིག་པ་ནི་ཤེས་བྱའི་རང་དང་སྤྱིའི་མཚན་ཉིད་ཀྱི་རྣམ་པ་ཕྱིན་ཅི་མ་ལོག་པར་ཡང་དག་པར་མཐོང་བའི་རྣམ་པ་གསལ་བར་གྱུར་བ་ཡིན་པའི་ཕྱིར་རོ། །མི་མཐུན་པའི་ཕྱོགས་ཉེ་བའི་དབང་དུ་བྱས་ནས་ཡང་དག་པར་རབ་ཏུ་མི་མཐོང་བའི་རྣམ་པ་ཉིད་ནི་མ་རིག་པ་ཡིན་ཏེ། མུན་པའི་རྣམ་པ་ཡིན་པའི་ཕྱིར་རོ། །དེ་བས་ན་དེ་ནི་རིག་པའི་མི་མཐུན་པའི་ཕྱོགས་ཞེས་བྱ་བར་གྲུབ་པ་ཡིན་ནོ། །ཇི་ལྟར་ཆགས་པའི་མི་མཐུན་པའི་ཕྱོགས་ནི་ཆགས་པ་མེད་པ་ཡིན་ཞིང་ཞེ་སྡང་གི་མི་མཐུན་པའི་ཕྱོགས་ནི་ཞེ་སྡང་མེད་པ་ཡིན་ཏེ། མི་མཐུན་པའི་ཕྱོགས་ནི་ཉེ་བའི་དབང་དུ་བྱས་ནས་ཀུན་དུ་འབྱུང་བའི་རྣམ་པ་དགྲ་ཟླ་ཡིན་པའི་ཕྱིར་རོ། །དེའི་ངོ་བོ་ཡང་གང་ཞེ་ན་ཞེས་བྱ་བ་ནི་མ་རིག་པ་དེའི་འོ། །དེའི་ཕྱིར་རེ་ཞིག་བྱམས་པའི་རྣམ་པའི་སེམས་ལ་ཆགས་པ་མེད་པའི་རང་གི་ངོ་བོ་ཡང་གང་ཞིག་ཡིན། མི་སྡུག་པའི་རྣམ་པ་ལ་ཞེ་སྡང་མེད་པ་ཡང་གང་ཞིག་ཡིན་ཞེས་བྱ་བ་སྨྲས་ཏེ། བྱམས་པའི་རྣམ་པ་ནི་སེམས་ཀྱིས་སེམས་ཅན་བདག་གིར་བྱེད་པ་བཞིན་ཡིན་ན་དེར་ཆགས་པ་མེད་པའི་རང་གི་ངོ་བོ་ཡོངས་སུ་བཅད་པར་མི་ནུས་སོ། །མི་སྡུག་པའི་རྣམ་པས་ཡོངས་སུ་སྤོང་བར་བྱེད་པ་བཞིན་ཡིན་ན་དེ་ལ་ཞེ་སྡང་མེད་པའི་རང་གི་ངོ་བོ་ངེས་པར་བྱ་བར་མི་ནུས་ཏེ། དེ་གཉིས་ལ་ནི་དེ་གཉིས་ཏེ་ཆགས་པ་དང་ཞེ་སྡང་མི་མཐུན་པའི་ཕྱོགས་ཀྱི་མཚན་ཉིད་མེད་པ་ཡང་མ་ཡིན་ནོ་ཞེས་བྱ་བ་ལ་དེ་གཉིས་ལ་ནི་ཞེས་བྱ་བ་ནི་ཆགས་པ་མེད་པ་དང༌། ཞེ་སྡང་མེད་པ་གཉིས་ལའོ། །དེ་གཉིས་ཏེ་ཞེས་བྱ་བ་ནི་བྱམས་པ་དང་མི་སྡུག་པའི་རྣམ་པའི་སེམས་དེ་གཉིས་ཏེ། ཆགས་པ་དང་ཞེ་སྡང་མི་
མཐུན་པའི་ཕྱོགས་ཀྱི་མཚན་ཉིད་ཡིན་པའི་ཕྱིར་རོ། །ཆགས་པ་དང་ཞེ་སྡང་མི་མཐུན་པའི་ཕྱོགས་ཀྱི་མཚན་ཉིད་འདི་གཉིས་ནི་གོ་རིམས་བཞིན་དུ་ཆགས་པ་མེད་པ་དང༌། ཞེ་སྡང་མེད་པ་འདི་གཉིས་ཀྱི་མཐུན་པའི་ཕྱོགས་ཀྱི་མཚན་ཉིད་ཆགས་པ་དང་ཞེ་སྡང་ཡིན་ནོ། །ཆགས་པ་དང་ཞེ་སྡང་གི་གཉེན་པོ་ཡང་ཆགས་པ་མེད་པ་དང་ཞེ་སྡང་མེད་པ་གཉིས་ཡིན་ལ་ཆགས་པ་དང་ཞེ་སྡང་གཉིས་ནི་མི་མཐུན་པའི་ཕྱོགས་སུ་བསྟན་ཏོ། །རེ་ཞིག་གཉེན་པོ་གང་ཡིན་པའི་མི་མཐུན་པའི་ཕྱོགས་ཀྱང་དེ་ཡིན་ནམ་ཞེ་ན། མི་མཐུན་པའི་ཕྱོགས་ཡིན་ལ་གཉེན་པོ་མ་ཡིན་པ་ཡང་ཡོད་དེ། ཉོན་མོངས་པ་ཅན་གྱི་ཆོས་རྣམས་ཡིན་ནོ། །མི་མཐུན་པའི་ཕྱོགས་ཀྱི་མཚན་ཉིད་ཀྱང་སྔར་མི་མཐུན་པའི་ཕྱོགས་ཉེ་བའི་དབང་དུ་བྱས་ནས་ཀུན་ནས་འབྱུང་བའི་རྣམ་པ་ནི་མི་མཐུན་པའི་ཕྱོགས་ཡིན་ནོ་ཞེས་བསྟན་ཟིན་ཏོ། །མིག་ལ་སོགས་པའི་དབང་པོ་རྣམས་ཀྱི་གཟུགས་དང་བའི་རང་གི་ངོ་བོ་ཡང་དེས་པར་བྱ་བ་སུ་ཞིག་ནུས་ཞེས་བྱ་བ་ནི་ཡུལ་གཟུགས་དང་བའི་རང་གི་ངོ་བོ་མ་གཏོགས་པར་གཞན་གཟུགས་དང་བའི་རང་གི་ངོ་བོ་གྲུབ་པ་མ་ཡིན་ནོ་ཞེས་བྱ་བ་ཡིན་ནོ། །མཐོང་བའི་བྱ་བ་བྱེད་པ་ལས་ནི་ཞེས་བྱ་བ་ནི་མཐོང་བ་དང་ཐོས་པ་དང་སྣོམ་པ་དང༌། རོ་མྱོང་བ་དང་རེག་པའི་བྱ་བ་བྱེད་པ་ལས་དེ་ཡོད་པར་ངེས་པར་བྱ་སྟེ། དེ་དག་གི་མིག་དང་རྣ་བ་ལ་སོགས་པ་ཡོད་པར་མངོན་པ་ཡིན་ནོ་ཞེས་བྱ་བའི་ཐ་ཚིག་སྟེ། ལོང་བ་ལ་སོགས་པ་ལ་མཐོང་བ་ལ་སོགས་པའི་བྱ་བ་བྱེད་པ་མེད་པའི་ཕྱིར་དང་ལུས་དང་སེམས་ཀྱི་གནས་སྐབས་ཀྱི་བྱེ་བྲག་ལས་ཀྱང་གཉིད་ལོག་པ་ལ་ཡོད་པ་ཉིད་དུ་ངེས་པར་གཟུང་བར་བྱའོ། །འདིར་ཁ་ཅིག་སྨྲས་པ་དབང་པོ་ལྔ་ནི་འཇུག་ཅིང་ཡིད་རང་དབང་མེད་པར་འཇུག་པ་ནི་གཉིད་ཡིན་ནོ་ཞེའོ། །ཁ་ཅིག་ན་རེ་ལུས་འཛིན་མི་ནུས་པར་སེམས་བསྡུས་པ་ཡིན་ནོ་ཞེའོ། །གཙོར་ནི་འཇིག་རྟེན་ལས་འདས་པའི་ཤེས་རབ་དང་ཞེས་བྱ་བ་ནི་དེ་ནི་མཉམ་པར་གཞག་པ་ཟག་པ་མེད་པ་ཡིན་པའི་ཕྱིར་དོན་དམ་པར་རིག་པ་ཞེས་བྱའོ། །རྣམ་པར་གྲོལ་བར་སོང་བ་ཡང་ཡིན་ཏེ། ཉེ་ན་ཤིན་ཏུ་ཉོན་མོངས་པ་སྤངས་པ་ཡིན་ནོ། །དེ་དང་རྗེས་སུ་མཐུན་པ་དང་ཞེས་བྱ་བ་ནི་དེའི་རྒྱུ་ཡིན་པའི་ཕྱིར་ཞེས་པའི་ཐ་ཚིག་སྟེ། འབྲས་བུའི་རྒྱུར་བརྗོད་པ་ཡིན་ནོ། །དེའི་ཆེད་དུ་བྱེད་པ་དང་ཞེས་བྱ་བ་ནི་འཇིག་རྟེན་ལས་འདས་པའི་ཤེས་རབ་ཀྱི་ཆེད་དུ་བྱེད་པ་
ཞེས་བྱ་བའི་ཐ་ཚིག་གོ །དེ་ཡོངས་སུ་སྦྱོར་བར་བྱེད་པ་ཞེས་བྱ་བ་ནི་འཇིག་རྟེན་ལས་འདས་པའི་ཡེ་ཤེས་ཐོབ་པའི་ཐབས་སུ་གྱུར་པ་ཐོས་པ་ལས་བྱུང་བ་ལ་སོགས་པའི་ཤེས་རབ་ནི་རིག་པ་ཞེས་བྱ་སྟེ། རྒྱུ་ལ་འབྲས་བུ་ཉེ་བར་བཏགས་པ་ཡིན་ནོ། །དེ་དག་གི་མཚན་ཉིད་བརྗོད་པ་ནི་ཡིད་ཆེས་པའི་ཚིག་ཚད་མ་ལ་ངེས་པ་སྐྱེས་པ་ནི་ཐོས་པ་ལས་བྱུང་བའི་ཤེས་རབ་བོ། །རིག་པས་དཔྱོད་པ་ལས་སྐྱེས་པ་ནི་བསམས་པ་ལས་བྱུང་བའོ། །ཏིང་ངེ་འཛིན་ལས་བྱུང་བ་ནི་བསྒོམས་པ་ལས་བྱུང་བའོ། །བྱུང་བ་ཞེས་བྱ་བ་ནི་རྒྱུ་ཡིན་པ་ལ་བྱ་སྟེ། དཔེར་ན་ཟས་ལས་བྱུང་བ་ནི་སྲོག་ཡིན་ནོ། །རྩ་ལས་བྱུང་བ་ནི་བ་གླང་ཡིན་ནོ་ཞེས་བྱ་བ་ལྟ་བུའོ། །གནས་བརྟན་ཤཱ་རིའི་བུས་གསུངས་པའི་མདོ་ལས་ཀྱང་ཞེས་རྒྱས་པར་འབྱུང་བ་ནི་འདིར་གཙོར་དགོངས་པ་སྟོན་པ་ཡིན་ནོ། །ཇི་ལྟ་བ་བཞིན་དུ་རིག་པ་ཡིན་པ་དང་ཞེས་རྒྱས་པར་འབྱུང་བ་ནི་ཚོར་བ་དང་རིག་པ་དང་ཤེས་པ་ཞེས་བྱ་བ་རྣམ་གྲངས་སོ། །ཇི་ལྟ་བ་བཞིན་ཞེས་བྱ་བ་ཕྱིན་ཅི་མ་ལོག་པའི་དོན་གྱིས་སོ། །དེ་ཡང་འཇིག་རྟེན་ལས་འདས་པའི་ཤེས་རབ་དང༌། དེའི་རྗེས་ལས་ཐོབ་པ་ཡང་ཡིན་པར་བསྟན་ཏེ། དེ་དག་ཀྱང་ཇི་ལྟ་བ་བཞིན་དུ་རིག་པ་ཡིན་ནོ་ཞེས་འདིར་ངེས་པའི་ཚིག་སྒྲུབ་པའི་ཚུལ་དུ་རིག་པར་བྱའོ། །དེ་བས་རྣམ་པར་གྲོལ་བར་འགྲོ་བའམ་ཞེས་བྱ་བ་ནི་འཇིག་རྟེན་ལས་འདས་པའི་ཤེས་རབ་ཀྱིས་དང༌། དེ་ཡོངས་སུ་སྦྱོང་བར་གྱུར་པས་ཀྱང་རིམ་གྱིས་རྣམ་པར་གྲོལ་བར་འགྲོ་ཞིང་མྱ་ངན་ལས་འདས་པ་ཐོབ་པར་བྱེད་པའོ། །གཏན་ཚིགས་དེས་ན་རིག་པ་ཞེས་བྱ་སྟེ། ངེས་ཚིག་ཅེས་བྱ་བ་ནི་རིག་པའི་རྣམ་པར་ངེས་པའི་ཚིག་གོ །རིག་པར་རམ་ཞེས་བྱ་བ་ཅི་ཞེ་ན། དེས་འགྲོ་ཞེས་བྱ་བར་སྦྱར་ཏེ། ཟག་པ་མེད་པའི་ཤེས་རབ་ཡོངས་སུ་སྦྱོང་བར་གྱུར་པ་དེ་འགྲོ་ཞིང་ཐོབ་པར་འགྱུར་བའི་གཏན་ཚིགས་དེས་ཀྱང་རིག་པ་ཞེས་བྱའོ། །ཇི་ལྟར་རིགས་པར་ཞེས་བྱ་བ་ནི་ཇི་ལྟར་སྲིད་པ་ཇི་སྐད་དུ་བརྗོད་པ་ཡིན་ནོ། །གནས་བརྟན་ཤཱ་རིའི་བུས་གསུངས་པའི་མདོ་དེ་ལས་ཀྱང་ཞེས་རྒྱས་པར་འབྱུང་བ་ལ་མདོ་དེ་ལས་ནི་གང་གནས་བརྟན་ཤཱ་རིའི་བུས་གསུངས་པ་རབ་ཏུ་ཤེས་པ་རབ་ཏུ་ཤེས་པ་ཞེས་རྒྱ་ཆེར་འབྱུང་བའོ། །དེ་ནི་ཤེས་པའི་དོན་ཡིན་པའི་ཕྱིར་རིག་པ་ཞེས་བྱ་བའི་ཁམས་ནི་རིག་པ་དང་ཤེས་པ་ཞེས་བྱ་སྟེ། འདི་རིག་པ་ཡིན་པ་དེ་བས་ན་རིག་པ་ཞེས་རྣམ་པར་བཤད་པའི་རྣམ་གྲངས་སྟོན་པར་བྱེད་དོ། །ཅིའི་ཕྱིར་ཞེ་ན། རབ་ཏུ་ཤེས་
པར་བྱེད་པ་ཞེས་བརྗོད་པ་ནི་ཤིན་ཏུ་གྲགས་པ་ཡིན་པའི་ཕྱིར་རོ། །བྱ་བ་བྱེད་པ་གཞན་མེད་པར་བྱེད་པ་པོ་སྟོན་པ་ཇི་ལྟར་རིགས་ཏེ་ཞེས་རྒྱས་པར་འབྱུང་བ་ནི་ཤེས་རབ་ལས་མ་གཏོགས་པར་བྱ་བ་བྱེད་པ་གཞན་མེད་པར་རབ་ཏུ་ཤེས་པར་བྱེད་དོ་ཞེས་བྱ་བ་བྱེད་པ་པོ་སྟོན་པ་ཇི་ལྟར་རིགས་ཏེ་འདི་ལྟར་སྐད་ཅིག་མ་ལ་ནི་རབ་ཏུ་ཤེས་པར་བྱེད་པའི་བྱེད་པ་པོ་གཞན་ཡོད་པ་མ་ཡིན་ནོ། །ཇི་ལྟར་མི་རིགས་ཞེས་དེའི་ཕྱིར་འདི་ལྟར་ལྷག་མའི་སྦྱོར་བ་མཐོང་བ་ནི་མེད་པ་ཡིན་ནོ་ཞེ་ན་ཞེས་སྨྲས་ཏེ། འཇིག་རྟེན་ན་ཡང་ཚེས་པའི་བྱ་བ་བྱེད་པ་མ་གཏོགས་པར་ཚོས་ཟིན་པ་ལ་བྱེད་པ་པོའི་སྦྱོར་བ་མཐོང་བ་ཡོད་པ་མ་ཡིན་ནོ་ཞེ་ན། འདི་ཉིད་གཙུག་ལག་ལས་སྒྲས་ཅི་ཆད་གཉིས་ཀྱི་རྗེས་སུ་བསྒྲུབ་པར་བྱའོ་ཞེས་རབ་ཏུ་སྦྱོར་བ་འདི་མཐོང་བ་མ་ཡིན་ནམ། ཅིའི་ཕྱིར་འདི་ལྟར་ལྷག་མའི་སྦྱོར་བ་མཐོང་བ་ནི་མེད་པ་ཡིན་ནོ་ཞེས་བྱ་བ་འདི་རྗོད་པར་བྱེད། འོན་ཏེ་གཙུག་ལག་རང་བཟོ་སྟེ་ཚད་མ་མ་ཡིན་ན་ནི་སྒྲའི་བསྟན་བཅོས་ལས་ལྷག་མ་བསྟན་པ་ཡིན་ནོ་ཞེས་དེ་ཡང་ཚད་མར་བྱེད་པ་ཅིའི་ཕྱིར་ཚད་མ་ཡིན། འོན་ཏེ་འདི་གཙུག་ལག་མ་ཡིན་ནོ་ཞེས་བརྗོད་ན་ནི་འདི་ལ་བརྗོད་པ་མང་དུ་ཡོད་པས་ཤིན་ཏུ་འཕྲོས་པས་གཞག་གོ །ས་བོན་ལས་མྱུ་གུ་འབྱུང་བར་བྱེད་ཅེས་བྱ་བ་ལས་གཞན་བྱེད་པ་མེད་ཀྱང་བྱེད་པ་པོ་སྟོན་པ་འདི་ཡང་ཡོད་པ་ཡིན་ནོ། །རྒོལ་བ་པོ་ཡང་དངོས་པོ་ཙམ་ཡིན་ཏེ་བྱ་བ་བྱེད་པ་གཞན་མེད་པར་བྱེད་པ་པོ་སྟོན་པ་ཡིན་དུ་ཆུག་ན། འོ་ན་ཅིའི་ཕྱིར་ལས་སྟོན་བྱ་བ་བྱེད་པ་མེད་པར་གཟུགས་ཡང་དག་པ་ཇི་ལྟ་བ་བཞིན་དུ་རབ་ཏུ་ཤེས་པར་བྱེད་པ་དེ་ལ་ནི་བྱ་བ་བྱེད་པ་མེད་པར་བྱེད་པ་པོ་སྟོན་པ་དེ་ལ་ལས་དང་འབྲེལ་པ་ཡང་ཡོད་པ་མ་ཡིན་ཏེ། ཇི་ལྟར་ཁྱོད་ཉིད་ཀྱི་བློས་ས་བོན་ལས་མྱུ་གུ་འབྱུང་བར་བྱེད་དོ་ཞེས་བྱ་བ་ལས་དང་འབྲེལ་པ་མ་ཡིན་པ་བཞིན་ནོ་ཞེ་ན་དེའི་ཕྱིར་ལས་བསྟན་པ་ནི་ཤེས་རབ་ཀྱི་ཡུལ་བསྟན་པའི་ཕྱིར་ཞེས་སྨྲས་སོ། །ཇི་ལྟར་ཞེ་ན་ཡུལ་གང་ལ་ཤེས་རབ་སྐྱེས་པ་ཞེས་རྒྱ་ཆེར་འབྱུང་བ་ཡིན་ནོ། །དེ་ལྟ་མ་ཡིན་ན་ཤེས་རབ་ཀྱི་ཡུལ་མ་བསྟན་པར་འགྱུར་རོ། །དེ་ནི་དེ་སྣང་བར་སྐྱེ་བ་ན་དེ་ལ་བྱ་བ་བྱེད་པ་དང་བཅས་པ་ལྟ་བུ་ཁོ་ནར་སྣང་ངོ༌། །ཇི་ལྟར་སྣང་བ་དེ་བཞིན་དུ་ཤེས་པར་བྱེད་པ་དེ་བས་ན་རིག་པ་ཞེས་བྱའོ་ཞེས་འདིའི་ངེས་ཚིག་བྱེད་པ་ཡིན་ནོ། །ཡང་ན་གང་དུ་མི་མཐུན་པའི་ཕྱོགས་ཞེས་རྒྱས་པར་འབྱུང་བ་ནི་གཟུགས་ལ་སོགས་
པའི་ཡུལ་གང་དུ་མི་མཐུན་པའི་ཕྱོགས་རིག་པའི་མི་མཐུན་པའི་ཕྱོགས་མི་ཤེས་པ་དེ་འཇོམས་པར་བྱེད་པ་རྣམ་པར་འཇིག་པར་བྱེད་པའི་ཡུལ་དེ་རྣམ་པར་ཤེས་པར་བྱེད་དོ་ཞེས་བྱའོ། །དེ་ལྟར་ན་བྱ་བ་བྱེད་པ་དང་བཅས་པ་ལ་ཡང་ལས་སྟོན་པ་ཡོད་དོ་ཞེས་སྟོན་པར་བྱེད་དོ། །དཔེར་འདི་ན་སྒྲོན་མ་ནི་སྒྲོན་མའི་མི་མཐུན་པའི་ཕྱོགས་མུན་པ་འཇོམས་པའི་ཡུལ་དེ་སྣང་བར་བྱེད་དོ་ཞེས་བྱ་བ་བཞིན་ནོ། །གང་དེ་ཞེས་བྱ་བ་ནི་སྔར་བསྟན་པ་ཡིན་ཏེ། མདོ་སྡེ་དེ་དང་དེ་ལས་གསུངས་པའོ་ཞེས་བྱ་བ་ནི་འདི་ལྟ་སྟེ་གསུས་པོ་ཆེའི་མདོ་ལས་ཕུང་པོ་ལྔ་ལ་ཞེས་རྒྱས་པར་གསུངས་ནས་ཉེ་བར་ལེན་པའི་ཕུང་པོ་ལྔ་པོ་དེ་དག་ཡང་དག་པ་ཇི་ལྟ་བ་བཞིན་དུ་མི་ཤེས་པ་དང༌། མི་མཐོང་བ་དང་མངོན་པར་མི་རྟོགས་པ་ཞེས་རྒྱས་པར་འབྱུང་བའོ། །དེ་བཞིན་དུ་སྐྱེ་མཆེད་དྲུག་པོ་ལ་ཞེས་རྒྱས་པར་གསུངས་ནས་སྐྱེ་མཆེད་དྲུག་པོ་དེ་དག་ཉིད་ཡང་དག་པ་ཇི་ལྟ་བ་བཞིན་དུ་མི་ཤེས་པ་དང་མི་མཐོང་བ་དང༌། མངོན་པར་མི་རྟོགས་པ་ཞེས་རྒྱས་པར་འབྱུང་བའོ། །རྒྱས་པ་སྨོས་པ་ནི་སྔོན་གྱི་མཐའ་ནས་བརྩམས་ནས་མུན་པའི་རྣམ་པའི་བར་དུ་མདོ་སྡེའི་དུམ་བུ་ཐམས་ཅད་སྟོན་པར་བྱེད་དོ། །སྔོན་གྱི་མཐའ་ལ་སོགས་པ་ནི་དམིགས་པའོ་ཞེས་བྱ་བ་ནི་སྔོན་གྱི་མཐའ་དང༌། ཕྱི་མའི་མཐའ་དང༌། གཉི་ག་དང་ནང་དང༌། ཕྱི་དང་གཉི་ག་དང༌། ལས་དང་རྣམ་པར་སྨིན་པ་དང༌། གཉིག་དང་སངས་རྒྱས་དང་ཆོས་དང༌། དགེ་འདུན་དང༌། སྡུག་བསྔལ་དང༌། ཀུན་འབྱུང་དང༌། འགོག་པ་དང༌། ལམ་དང་རྒྱུ་དང༌། ཡང་དག་པར་བྱུང་བ་དང༌། དགེ་བ་དང༌། མི་དགེ་བ་དང༌། ཁ་ན་མ་ཐོ་བ་དང་བཅས་པ་དང༌། ཁ་ན་མ་ཐོ་བ་མེད་པ་དང༌། བསྟེན་པར་བྱ་བ་དང༌། བསྟེན་པར་བྱ་བ་མ་ཡིན་པ་དང༌། ངན་པ་དང༌། གྱ་ནོམ་པ་དང༌། ནག་པོ་དང༌། དཀར་པོ་དང༌། རྣམ་པར་དབྱེ་བ་དང་བཅས་པའི་རྟེན་ཅིང་འབྲེལ་པར་འབྱུང་བ་དང༌། རེག་པའི་སྐྱེ་མཆེད་དྲུག་རྣམས་ནི་མ་རིག་པའི་དམིགས་པ་ཡིན་ནོ། །མི་ཤེས་པ་ལ་སོགས་པ་ནི་རྣམ་གྲངས་སོ་ཞེས་བྱ་བ་ནི་མི་ཤེས་པ་དང༌། མི་མཐོང་བ་དང༌། མངོན་པར་མི་རྟོགས་པ་དང༌། རྨོངས་པ་དང༌། ཀུན་ཏུ་རྨོངས་པ་དང༌། མ་རིག་པ་དང༌། མུན་པའི་རྣམ་པ་དག་ཅེས་བྱ་བ་ཡིན་ནོ། །དེ་ལ་སྔོན་གྱི་མཐའ་དང་ཕྱི་མའི་མཐའ་གཉིས་ལ་ཐེ་ཚོམ་ཟ་བ་དང་མཚུངས་པར་ལྡན་པའི་མ་རིག་པ་ཡིན་པར་གསུངས་པ་ནི་ཅི་བདག་འདས་པའི་དུས་ན་བྱུང་བ་ཞིག་གམ། འོན་ཏེ་མ་
བྱུང་བ་ཞིག་གམ། ཇི་ལྟ་བུར་བདག་བྱུང་བ་ཡིན། ཇི་ལྟར་བདག་བྱུང་བ་ཡིན་ཞེས་བྱ་བ་དང༌། ཅི་བདག་མ་འོངས་པའི་དུས་ན་འབྱུང་བར་འགྱུར་རམ། འོན་ཏེ་འབྱུང་བར་མི་འགྱུར་ཞེས་ཐེ་ཚོམ་ཟ་བའི་ཕྱིར་རོ་ཞེས་གསུངས་པའི་ཕྱིར་རོ། །དབྱེ་བ་མེད་པར་རྨོངས་པ་འཇུག་པ་ཞེས་བྱ་བ་ནི་སྔོན་གྱི་མཐའ་དང་ཕྱི་མའི་མཐའ་ལ་སྤྱོད་པ་མེད་པ་ཁོ་ནར་འཁོར་བར་འཇུག་ཅིང་རྨོངས་པའི་མི་ཤེས་པ་གང་ཡིན་པ་དེ་ནི་མ་འདྲེས་པའི་མ་རིག་པ་ཡིན་པར་བསྟན་ཏོ། །སྔོན་གྱི་མཐའ་ཡོད་པ་མ་ཡིན། ཕྱི་མའི་མཐའ་ཡོད་པ་མ་ཡིན་གྱི་ཇི་ཙམ་དབང་པོའི་སྤྱོད་ཡུལ་གྱི་སྐྱེས་བུ་འདི་དག་ཁོ་ནར་ཟད་དོ་ཞེས་དེ་ལྟར་རྟོག་པའི་མི་ཤེས་པ་གང་ཡིན་པ་དེ་ནི་ལོག་པར་ལྟ་བ་དང་མཚུངས་པར་ལྡན་པའི་མ་རིག་པ་ཡིན་པར་བསྟན་ཏོ། །ནང་མི་ཤེས་པ་ནི་རང་གི་རྒྱུད་ལ་སེམས་ཅན་དུ་ལྟ་བར་བསམས་པའི་མི་ཤེས་པ་གང་ཡིན་པ་དེ་ནི་འཇིག་ཚོགས་ལ་ལྟ་བ་དང་མཚུངས་པར་ལྡན་པའི་མ་རིག་པ་ཡིན་པར་བསྟན་ཏོ། །ཕྱི་མིའི་ཤེས་པ་ནི་ཞེས་རྒྱས་པར་འབྱུང་བའི་མི་ཤེས་པ་འདི་ནི་རྣལ་འབྱོར་སྤྱོད་པའི་ཚུལ་གྱིས་འཇིག་ཚོགས་ལ་ལྟ་བ་དང་མཚུངས་པར་ལྡན་པ་ཁོ་ནའི་མ་རིག་པ་ཡིན་པར་བསྟན་ཏོ། །ཁ་ཆེ་བྱེ་བྲག་ཏུ་སྨྲ་བ་དག་ནི་འདི་ནི་ལྟ་བ་མ་ཡིན་གྱི་འོ་ན་ཅི་ཞེ་ན། ལོག་པའི་ཤེས་པ་ཡིན་ནོ། །རང་གི་རྒྱུད་ལ་དམིགས་ནས་སེམས་ཅན་དུ་ལྟ་བ་ཁོ་ན་འཇིག་ཚོགས་ལ་ལྟ་བ་ཡིན་ནོ་ཞེས་བརྗོད་དོ། །གཉི་ག་མི་ཤེས་པ་ནི་རང་དང་གཞན་གྱི་རྒྱུད་གཉི་ག་ལ་བྱེ་བྲག་མེད་པར་རྨོངས་པའོ་ཞེས་བྱ་བ་ནི་རང་གི་རྒྱུད་དམ་གཞན་གྱི་རྒྱུད་ལ་བདག་ཏུ་རྟོག་པ་མ་ཡིན་གྱི་འོ་ན་ཅི་ཞེ་ན། བདག་དང་གཞན་གྱི་རྒྱུད་གཉི་ག་བྱེ་བྲག་མེད་པ་ཁོ་ནར་བདག་མེད་པ་ཡིན་པར་མ་རྟོགས་པའི་མི་ཤེས་པ་གང་ཡིན་པ་དེ་ནི་མ་འདྲེས་པའི་མ་རིག་པ་ཡིན་པར་བསྟན་ཏོ། །ལས་མི་ཤེས་པ་ནི་བསོད་ནམས་དང་བསོད་ནམས་མ་ཡིན་པ་ཡོད་པ་ཉིད་ལ་ཐེ་ཚོམ་ཟ་བ་དང་སྐུར་པ་འདེབས་པའོ་ཞེས་བྱ་བ་དེ་ལ་བསོད་ནམས་དང་བསོད་ནམས་མ་ཡིན་པ་ཡོད་པ་ཉིད་ལ་ཐེ་ཚོམ་ཟ་བ་དང་ལྡན་པའི་མི་ཤེས་པ་གང་ཡིན་པ་དེ་ནི་ཐེ་ཚོམ་ཟ་བ་དང་མཚུངས་པར་ལྡན་པའི་མ་རིག་པ་ཡིན་པར་བསྟན་ཏོ། །བསོད་ནམས་དང་བསོད་ནམས་མ་ཡིན་པ་ཡོད་པ་ཉིད་ལ་བསོད་ནམས་ཡོད་པ་མ་ཡིན་ནོ། །བསོད་ནམས་མ་ཡིན་པ་ཡང་ཡོད་པ་མ་ཡིན་ནོ་ཞེས་སྐུར་པ་འདེབས་པ་རྣམས་ཀྱི་མི་
ཤེས་པ་གང་ཡིན་པ་དེ་ནི་ལོག་པར་ལྟ་བ་དང་མཚུངས་པར་ལྡན་པ་ཡིན་ནོ། །བསོད་ནམས་ལ་ཡང་བསོད་ནམས་མ་ཡིན་པར་འདུ་ཤེས་པ་རྣམས་ཀྱི་མི་ཤེས་པ་གང་ཡིན་པ་དེ་ནི་ཚུལ་ཁྲིམས་དང་བརྟུལ་ཞུགས་མཆོག་ཏུ་འཛིན་པ་དང་མཚུངས་པར་ལྡན་པ་དང་ལོག་པར་ལྟ་བ་དང་མཚུངས་པར་ལྡན་པ་ཡང་ཡིན་ནོ། །ཇི་ལྟ་ཞེ་ན། གལ་ཏེ་བསོད་ནམས་ལ་འབྲས་བུ་ཡིད་དུ་མི་འོང་བའི་རྒྱུར་གྱུར་པ་བསོད་ནམས་མ་ཡིན་པ་ཡིན་ནོ་ཞེས་རྟོག་ན་ཚུལ་ཁྲིམས་དང༌། བརྟུལ་ཞུགས་མཆོག་ཏུ་འཛིན་པ་དང་མཚུངས་པར་ལྡན་པ་ཡིན་ནོ། །འོན་ཏེ་བསོད་ནམས་ལ་ཡིད་དུ་འོང་བའི་འབྲས་བུའི་རྒྱུར་གྱུར་པ་ཉིད་ཅུང་ཟད་ཀྱང་མ་ཡིན་ནོ་ཞེ་ན། ལོག་པར་ལྟ་བ་དང་མཚུངས་པར་ལྡན་པ་ཡིན་ནོ། །བསོད་ནམས་ལ་བསོད་ནམས་མ་ཡིན་པར་འདུ་ཤེས་པར་ཇི་ལྟར་འགྱུར་ཞེ་ན། དེའི་ཕྱིར་ཕྱུགས་གསོད་པ་དང་མེར་འཇུག་པ་ལ་སོགས་པ་ཞེས་སྨོས་ཏེ། དེ་དག་ནི་ཕྱུགས་གསོད་པ་དང་མེར་འཇུག་པ་ལ་། སོགས་པ་ལ་བསོད་ནམས་སུ་འདུ་ཤེས་པ་ཡིན་པའི་ཕྱིར་རོ། །དེ་བས་ན་དེ་ལས་ལྡོག་པའི་ཕྱིར་ཏེ། བསོད་ནམས་ལ་བསོད་ནམས་ཡིན་པར་འདུ་ཤེས་པ་དང་བསོད་ནམས་མ་ཡིན་པ་ལ་ཡང་བསོད་ནམས་སུ་འདུ་ཤེས་པ་རྣམས་ཀྱི་མི་ཤེས་པ་གང་ཡིན་པ་དེ་ཡང་ཚུལ་ཁྲིམས་དང་བརྟུལ་ཞུགས་མཆོག་ཏུ་འཛིན་པ་དང་མཚུངས་པར་ལྡན་པ་དང༌། ལོག་པར་ལྟ་བ་དང་མཚུངས་པར་ལྡན་པའི་མ་རིག་པ་ཡིན་ཏེ། གལ་ཏེ་ཡིད་དུ་འོང་བའི་འབྲས་བུའི་རྒྱུར་གྱུར་པའི་བསོད་ནམས་བཞིན་དུ་བསོད་ནམས་མ་ཡིན་པ་ལ་རྟོག་ན་ནི་ཚུལ་ཁྲིམས་དང་བརྟུལ་ཞུགས་མཆོག་ཏུ་མཚུངས་པར་ལྡན་པ་ཡིན་ནོ། །འོན་ཏེ་བསོད་ནམས་བཞིན་དུ་འབྲས་བུ་ཡིད་དུ་མི་འོང་བ་མ་ཡིན་ནོ་ཞེས་བསོད་ནམས་མ་ཡིན་པ་ལ་རྟོག་ན་ལོག་པར་ལྟ་བ་དང་མཚུངས་པར་ལྡན་པ་ཡིན་ནོ། །རྒྱུ་དང་འབྲས་བུ་ཕྱིན་ཅི་ལོག་ཏུ་སྐུར་པ་འདེབས་པའམ། ལྟ་བ་ཡང་ལོག་པར་ལྟ་བ་ཡིན་པའི་ཕྱིར་འདི་ཡང་ལོག་པར་ལྟ་བ་དང་མཚུངས་པར་ལྡན་པ་ཡིན་ནོ་ཞེས་བསྟན་ཏོ། །རྣམ་པར་སྨིན་པ་མི་ཤེས་པ་ཞེས་རྒྱས་པར་འབྱུང་བ་འདི་ཡང་ཐེ་ཚོམ་དང་མཚུངས་པར་ལྡན་པ་དང་ལོག་པར་ལྟ་བ་དང་མཚུངས་པར་ལྡན་པ་ཉིད་དུ་བསྟན་ཏོ། །རྣམ་པར་སྨིན་པ་མ་ཡིན་པ་ལ་ཡང་ཞེས་རྒྱས་པར་འབྱུང་བ་འདི་ཡང་གཅེར་བུ་པ་རྣམས་ཀྱི་ལོག་པར་ལྟ་བ་དང་མཚུངས་པར་ལྡན་པའི་མ་རིག་
པ་ཡིན་པར་བསྟན་ཏེ། སྐྱེས་བུ་བྱེད་པའི་རྒྱུ་ལ་སྐུར་པ་འདེབས་པའི་ཕྱིར་ཏེ། དེ་དག་ནི་ཐམས་ཅད་སྔོན་བྱས་པའི་རྒྱུ་ཅན་ཡིན་པར་བརྗོད་དོ། །རྒྱུ་དང་འབྲས་བུ་ཕྱིན་ཅི་ལོག་ཏུ་ལྟ་བ་ཡང་ལོག་པར་ལྟ་བ་ཡིན་པའི་ཕྱིར་རོ། །རྣམ་པར་སྨིན་པ་ཡང་རྣམ་པར་སྨིན་པ་མ་ཡིན་པར་འདུ་ཤེས་པ་ནི་ཞེས་རྒྱས་པར་འབྱུང་བ་འདི་ཡང་ལོག་པར་ལྟ་བ་ཁོ་ན་དང་མཚུངས་པར་ལྡན་པ་ཡིན་ཏེ། རྣམ་པར་སྨིན་པ་དང་རྒྱུ་ལ་སྐུར་པ་འདེབས་པའི་ཕྱིར་རོ། །ལྷ་རྣམས་ནི་རང་བྱུང་ཡིན་ནོ་ཞེས་གང་དག་བརྗོད་ཅིང་རྒྱུ་དང་འབྲས་བུ་ཕྱིན་ཅི་ལོག་པར་ལྟ་བ་ཡིན་པའི་ཕྱིར་ཏེ། ལྷའི་ལུས་རྣམ་པར་སྨིན་པ་ཡིན་པ་དེ་ལ་རྣམ་པར་སྨིན་པ་མ་ཡིན་པར་འདུ་ཤེས་པའི་ཕྱིར་རོ། །གཉིས་ཀ་མི་ཤེས་པ་ཞེས་རྒྱས་པར་འབྱུང་བ་དེ་ལ་གཉི་ག་ཞེས་བྱ་བ་ནི་ལས་དང་རྣམ་པར་སྨིན་པའོ། །དབང་ཕྱུག་ལ་སོགས་པ་འགྲོ་བའི་བྱེད་པ་པོ་ཡིན་པར་འདུ་ཤེས་པ་རྣམས་ཀྱི་མི་ཤེས་པ་གང་ཡིན་པ་དེ་ནི་ཚུལ་ཁྲིམས་དང་བརྟུལ་ཞུགས་མཆོག་ཏུ་འཛིན་པ་དང་མཚུངས་པར་ལྡན་པའི་མ་རིག་པ་ཡིན་པར་བསྟན་ཏེ། རྒྱུ་མ་ཡིན་པ་ལ་རྒྱུར་ལྟ་བའི་ཕྱིར་རོ། །འདི་ནི་གཅིག་ཁོ་ན་ལ་མི་ཤེས་པ་ཡིན་ཡང་གཉི་ག་ཡིན་པར་བསྟན་ཏེ། འདིས་རྣམ་པར་སྨིན་པ་ལ་ཡང་རྨོངས་པ་ཡིན་ཏེ། དེའི་རྒྱུ་གཞན་དུ་རྟོག་པར་བྱེད་པའི་ཕྱིར་རོ། །རྒྱུ་མེད་པར་སྨྲ་བ་རྣམས་ཀྱི་ཡང་ཡིན་ནོ་ཞེས་བྱ་བ་ནི་གང་དག་རྒྱུ་ཡོད་པ་མ་ཡིན་ནོ་ཞེས་སྨྲ་བ་དེ་དག་ཀྱང་གཉི་གར་མི་ཤེས་པ་ལོག་པར་ལྟ་བ་དང་མཚུངས་པར་ལྡན་པའི་མ་རིག་པ་ཡིན་པར་བསྟན་ཏེ། རྒྱུ་ལ་སྐུར་བ་འདེབས་པ་གང་ཡིན་པ་དེ་ནི་རྣམ་པར་སྨིན་པའི་རྒྱུ་སྔོན་གྱི་ཡིན་པར་མི་ཤེས་པས་གཉི་གར་མི་ཤེས་པ་ཡིན་ནོ་ཞེས་བསྟན་ནོ། །སངས་རྒྱས་ལ་སོགས་པར་མི་ཤེས་པ་ཞེས་རྒྱས་པར་འབྱུང་བ་ལ་ཁོང་དུ་མ་ཆུད་པའམ་ཞེས་བྱ་བ་ནི་མ་འདྲེས་པའི་མ་རིག་པ་ཡིན་པར་བསྟན་ཏོ། །ཐེ་ཚོམ་ཟ་བའམ་ཞེས་བྱ་བ་ནི་ཐེ་ཚོམ་ཟ་བ་དང་མཚུངས་པར་ལྡན་པ་ཡིན་ནོ། །ལོག་པར་ལྟ་བའམ་ཞེས་བྱ་བ་ནི་ལོག་པར་ལྟ་བ་དང་མཚུངས་པར་ལྡན་པ་ཡིན་ནོ། །དེ་བཞིན་དུ་སྡུག་བསྔལ་ལ་སོགས་པ་ལ་སྡུག་བསྔལ་ལ་སོགས་པའི་མཚན་ཉིད་ཐོས་ན་ཞེས་བྱ་བ་ལ་སྡུག་བསྔལ་གྱི་བདེན་པའི་མཚན་ཉིད་ནི་མི་རྟག་པ་དང་སྡུག་བསྔལ་བ་དང་སྟོང་བ་དང་བདག་མེད་པའོ། །ཀུན་འབྱུང་གི་མཚན་ཉིད་ནི་ཀུན་འབྱུང་བ་དང༌། རྒྱུ་དང་རབ་
ཏུ་སྐྱེ་བ་དང༌། རྐྱེན་གྱི་མཚན་ཉིད་དོ། །འགོག་པའི་མཚན་ཉིད་ནི་འགོག་པ་དང་ཞི་བ་དང༌། གྱ་ནོམ་པ་དང་ངེས་པར་འབྱུང་བའི་མཚན་ཉིད་དོ། །ལམ་གྱི་མཚན་ཉིད་ནི་ལམ་དང་རིག་པ་དང་སྒྲུབ་པ་དང༌། ངེས་པར་འབྱིན་པར་བྱེད་པའི་མཚན་ཉིད་དོ། །སྔ་མ་བཞིན་ནོ་ཞེས་བྱ་བ་དེ་ཁོང་དུ་མ་ཆུད་པའམ་ཐེ་ཚོམ་ཟ་བ་འམ་སྐུར་བ་འདེབས་པའོ་ཞེས་སྨྲས་པ་གང་ཡིན་པའོ། །རྒྱུ་དང་རྒྱུ་ལས་ཡང་དག་པར་བྱུང་བའི་ཆོས་རྣམས་ཞེས་རྒྱས་པར་འབྱུང་བ་ལ་རྒྱུ་དང་འབྲས་བུར་གྱུར་བའི་སྲིད་པའི་ཡན་ལག་བཅུ་གཉིས་ཞེས་བྱ་བ་ནི་མ་རིག་པ་ལ་སོགས་པ་ནས་རྒ་ཤིལ་ཐུག་པའི་བར་དེ་དག་ནི་ཡན་ལག་ཕྱི་མ་ལ་ལྟོས་ན་ནི་རྒྱུར་གྱུར་བ་ཡིན་ལ། ཡན་ལག་སྔ་མ་ལ་ལྟོས་ན་ནི་འབྲས་བུར་གྱུར་བ་ཡིན་ནོ། །དེ་ལ་ཡང་དེ་ཁོང་དུ་མི་ཆུད་པའམ། ཐེ་ཚོམ་ཟ་བའམ། སྐུར་པ་འདེབས་པ་ཞེས་བརྗོད་པར་བྱའོ། །བྱང་ཆུབ་ཀྱི་ཕྱོགས་མི་མཐུན་པའི་ཕྱོགས་དང་བཅས་པ་རྒྱུ་དང་བཅས་པ་ཞེས་བྱ་བ་དེ་ལ་བྱང་ཆུབ་ཀྱི་ཕྱོགས་དེ་དག་མི་མཐུན་པའི་ཕྱོགས་དང་བཅས་པ་རྒྱུ་དང་བཅས་པ་ཞེས་བསྟན་པ་དེ་ལ་བྱང་ཆུབ་ཀྱི་ཕྱོགས་ནི་དྲན་པ་ཉེ་བར་གཞག་པ་དང༌། ཡང་དག་པར་སྤོང་བ་དང༌། རྫུ་འཕྲུལ་གྱི་རྐང་པ་དང༌། དབང་པོ་དང་སྟོབས་དང་བྱང་ཆུབ་ཀྱི་ཡན་ལག་དང་ལམ་མོ། །དེའི་མི་མཐུན་པའི་ཕྱོགས་ནི་མི་ཤེས་པ་དང་ལེ་ལོ་དང༌། གཡེང་བ་དང་མ་དད་པ་དང༌། དྲན་པ་ཉམས་པ་དང༌། ཤེས་བཞིན་མ་ཡིན་པ་དང༌། མཐོང་བས་སྤང་བར་བྱ་བ་དང༌། བསྒོམ་པས་སྤང་བར་བྱ་བའི་ཕྲ་རྒྱས་རྣམས་སོ། །བྱང་ཆུབ་ཀྱི་ཕྱོགས་ཀྱི་ཆོས་རྣམས་ཀྱི་རྒྱུ་ནི་སྐྱེས་བུ་དམ་པ་ལ་བརྟེན་པ་དང༌། དམ་པའི་ཆོས་ཉན་པ་དང༌། ཚུལ་བཞིན་ཡིད་ལ་བྱེད་པ་དང༌། སྔོན་གྱི་ཚེ་རབས་ལ་གོམས་པའོ། །དེ་ལ་སྐྱེས་བུ་དམ་པ་ལ་བརྟེན་པ་དང་དམ་པའི་ཆོས་ཉན་པ་ནི་གཞན་གྱི་རྐྱེན་གྱི་སྟོབས་སོ། །ཚུལ་བཞིན་ཡིད་ལ་བྱེད་པ་ནི་ནང་གྱི་རྐྱེན་གྱི་སྟོབས་སོ། །སྔོན་གྱི་ཚེ་རབས་ལ་གོམས་པ་ནི་རྒྱུ་དང་རྐྱེན་གྱི་སྟོབས་ཡིན་ནོ། །དེའི་མི་མཐུན་པའི་ཕྱོགས་ཀྱི་རྒྱུ་ནི་སྐྱེས་བུ་དམ་པ་མ་ཡིན་པ་ལ་བརྟེན་པ་དང༌། དམ་པའི་ཆོས་མ་ཡིན་པ་ཉན་པ་དང༌། ཚུལ་བཞིན་མ་ཡིན་པར་ཡིད་ལ་བྱེད་པ་དང༌། སྔོན་གྱི་ཚེ་རབས་ལ་མ་གོམས་པའོ། །དེ་ལ་སྐྱེས་བུ་དམ་པ་མ་ཡིན་པ་ལ་བརྟེན་པ་ནི་བདག་པོའི་རྐྱེན་ཡིན་ནོ། །དམ་པའི་ཆོས་མ་ཡིན་པ་ཉན་པ་ནི་དམིགས་པའི་རྐྱེན་ཡིན་ནོ། །ཚུལ་བཞིན་མ་ཡིན་པར་ཡིད་ལ་བྱེད་པ་ནི་
དེ་མ་ཐག་པའི་རྐྱེན་ཡིན་ནོ། །ཚེ་རབས་སྔ་མ་ལ་མ་གོམས་པ་ནི་རྒྱུའི་རྐྱེན་ཡིན་ཏེ། དེ་དག་མི་ཤེས་པ་ནི་ཇི་སྐད་དུ་དེ་ཁོང་དུ་མི་ཆུད་པའམ། ཐེ་ཚོམ་ཟ་བའམ། སྐུར་བ་འདེབས་པའོ་ཞེས་བསྟན་པ་ཡིན་ནོ། །དེ་དག་ནི་དགེ་བ་ཡིན་ཏེ། བདེ་བའི་དོན་གྱི་ཕྱིར་དང༌། འབྲས་བུ་ཡིད་དུ་འོང་བའི་ཕྱིར་ཞེས་བྱ་བ་བྱང་ཆུབ་ཀྱི་ཕྱོགས་དེ་དག་བདེ་བའི་དོན་གྱི་ཕྱིར་ཞེས་བྱ་བ་ནི་གནོད་པ་མེད་པའི་དོན་ཡིན་པའི་ཕྱིར་རོ། །ཇི་ལྟ་ཞེ་ན། དེའི་ཕྱིར་འབྲས་བུ་ཡིད་དུ་འོང་བ་ཡིན་པའི་ཕྱིར་ཞེས་བྱ་བ་སྨྲས་ཏེ། འབྲས་བུ་ཡིད་དུ་མི་འོང་བ་ནི་གནོད་པ་དང་བཅས་པ་ཡིན་པའི་དོན་གྱིས་མི་བདེ་བ་ཞེས་བྱའོ། །མ་རིག་པའི་གཉེན་པོ་ཡིན་པའི་ཕྱིར་རོ་ཞེས་བྱ་བ་ནི་དུས་རེ་ཞིག་པ་དང་གཏན་དུ་བ་སྟེ། དགེ་བ་ཟག་པ་དང་བཅས་པའི་བྱང་ཆུབ་ཀྱི་ཕྱོགས་རྣམས་ནི་དུས་རེ་ཞིག་ཅིག་མ་རིག་པའི་གཉེན་པོ་ཡིན་ནོ། །ཡང་ན་དགེ་བ་ཟག་པ་དང་བཅས་པ་རྣམས་ནི་འབྲས་བུ་ཡིད་དུ་འོང་བ་ཡིན་པའི་ཕྱིར་བདེ་བ་ཡིན་ཏེ། དེ་ནི་གནོད་པ་མེད་པ་ཡིན་པའི་ཕྱིར་རོ། །ཟག་པ་མེད་པ་རྣམས་ནི་མ་རིག་པའི་གཉེན་པོ་ཡིན་པའི་དོན་གྱིས་གནོད་པ་སེལ་བར་བྱེད་པའི་ཕྱིར་བདེ་བ་ཡིན་པའི་ཕྱིར་རོ། །སྨད་པའི་དོན་གྱིས་ཁ་ན་མ་ཐོ་བ་ཞེས་བྱའོ། །དེ་ལས་བཟློག་པ་ཁ་ན་མ་ཐོ་བ་མེད་པ་ནི་མཁས་པས་བསྔགས་པའི་དོན་གྱིས་ཡིན་ནོ་ཞེས་བྱ་བར་གྲུབ་པ་ཡིན་ནོ། །མཁས་པ་སྨོས་པ་ནི་རྨོངས་ཤིང་ཕྱིན་ཅི་ལོག་པས་བསྔགས་པ་བསྩལ་བའི་ཕྱིར་རོ། །བསྟེན་པར་བྱ་བ་ནི་ཡང་ནས་ཡང་མངོན་དུ་བྱ་བའི་དོན་གྱིས་སོ་ཞེས་བྱ་བ་ཅིའི་ཕྱིར་ཞེ་ན་ཕན་པ་ཡིན་པའི་ཕྱིར་ཏེ་ཕན་པ་ནི་ཡང་ནས་ཡང་དུ་མངོན་དུ་བྱ་བ་ཡིན་པའི་དོན་གྱིས་བསྟེན་པར་བྱ་བར་འོས་པ་ཡིན་ནོ། །ཚིམ་པར་བྱེད་པ་ནི་ལུས་དང་སེམས་ཚིམ་པར་བྱེད་པའི་དོན་གྱིས་ཏེ་ཞེས་བྱ་བ་ཇི་ལྟར་ཡིན་ཞེ་ན་དེའི་ཕྱིར་ཤིན་ཏུ་སྦྱངས་པའི་བྱེ་བྲག་དང་ལྡན་པའི་ཕྱིར་རོ་ཞེས་བྱ་བ་སྨྲས་ཏེ། དེ་དག་ནི་ལུས་དང་སེམས་ལ་ཚིམ་པར་བྱེད་པ་ཡིན་ནོ། །དཀར་བ་ནི་དྲི་མ་མེད་པའི་དོན་གྱིས་ཏེ། ཇི་ལྟ་ཞེ་ན། དེའི་ཕྱིར་ཟག་པ་མེད་པ་ཡིན་པའི་ཕྱིར་རོ་ཞེས་ལྟ་ཞེ་ན། དེའི་ཕྱིར་ཟག་པ་མེད་པའི་ཕྱིར་རོ་ཞེས་སྨྲས་ཏེ། ཟག་པ་རྣམས་ནི་སེམས་དང་སེམས་ལས་བྱུང་བའི་དྲི་མ་ལྟ་བུ་ཡིན་ནོ། །དེ་ལས་བཟློག་པ་ཞེས་རྒྱས་པར་འབྱུང་བ་ཇི་ལྟ་བུ་ཞེ་ན། དེ་དག་ནི་མི་དགེ་བ་སྟེ་མི་བདེ་བའི་དོན་གྱིས་ཡིན་ཏེ། དེ་འབྲས་བུ་ཡིད་དུ་མི་འོང་བ་ཡིན་
པའི་ཕྱིར་དང༌། རིག་པའི་མི་མཐུན་པའི་ཕྱོགས་ཡིན་པའི་དོན་གྱིས་སོ། །ཁ་ན་མ་ཐོབ་དང་བཅས་པ་ནི་མི་མཁས་པས་བསྔགས་པའི་དོན་གྱིས་སམ། སྨད་པའི་དོན་གྱིས་སོ། །བསྟན་པར་བྱ་བ་མ་ཡིན་པ་ནི་མངོན་དུ་བྱ་བ་མ་ཡིན་པའི་དོན་གྱིས་ཏེ། མི་ཕན་པ་ཡིན་པའི་ཕྱིར་བསྟེན་པར་འོས་པ་མ་ཡིན་པས་སོ། །ཚིམ་པར་བྱེད་པ་མ་ཡིན་པ་ནི་ལུས་དང་སེམས་ཚིམ་པར་བྱེད་པ་མ་ཡིན་པའི་དོན་གྱིས་ཏེ་ཤིན་ཏུ་སྦྱངས་པ་མ་ཡིན་པའི་བྱེ་བྲག་དང་ལྡན་པའི་ཕྱིར་རོ། །ནག་པོ་ནི་དྲི་མ་མེད་པ་ཡིན་པའི་དོན་གྱིས་ཏེ། ཇི་ལྟ་ཞེ་ན་ཟག་པ་དང་བཅས་པ་ཡིན་པའི་ཕྱིར་རོ། །མི་མཐུན་པའི་ཕྱོགས་དང་འདྲ་བའི་རྟེན་ཅིང་འབྲེལ་བར་འབྱུང་བ་ནི་བྱང་ཆུབ་ཀྱི་ཕྱོགས་དེ་དག་ཉིད་མི་མཐུན་པའི་ཕྱོགས་དང་བཅས་པ་ཡིན་ནོ། །ཇི་ལྟ་ཞེ་ན་དེའི་ཕྱིར་སྐྱེས་བུ་དམ་པ་དང༌། སྐྱེས་བུ་དམ་པ་མ་ཡིན་པ་ལ་བརྟེན་པ་ལ་སོགས་པ་དང་ཚེ་རབས་སྔ་མའི་རྒྱུ་ལ་བརྟེན་ཏེ་བྱུང་བའི་ཕྱིར་རོ་ཞེས་སྨྲས་སོ། །རེག་པའི་སྐྱེ་མཆེད་དྲུག་ཡང་དག་པ་ཇི་ལྟ་བ་བཞིན་དུ་ཁོང་དུ་ཆུད་པར་མི་ཤེས་པ་གང་ཡིན་པ་དེ་ནི་མངོན་པར་ང་རྒྱལ་དང་མཚུངས་པར་ལྡན་པའི་མ་རིག་པ་ཡིན་པར་བསྟན་ཏོ། །དེ་ལ་རེག་པའི་སྐྱེ་མཆེད་དྲུག་ནི་མིག་དང་རྣ་བ་དང༌། སྣ་དང་ལྕེ་དང༌། ལུས་དང་ཡིད་ཀྱི་སྐྱེ་མཆེད་རྣམས་ཏེ་དེ་སྐྱེ་བའི་སྒོའི་དོན་གྱིས་སོ། །དེ་ལ་དམིགས་པ་འཇིག་རྟེན་ལས་འདས་པ་བདག་མེད་པའི་ཡེ་ཤེས་ཀྱིས་ནི་དེ་དག་ཡང་དག་པ་ཇི་ལྟ་བ་བཞིན་དུ་ཁོང་དུ་ཆུད་པ་ཡིན་ནོ་ཞེས་བྱ་བ་ནི་མཐོང་བ་དང༌། ཐོས་པ་དང་བསྣམས་པ་དང༌། རོ་མྱངས་པ་དང་རེག་པ་དང༌། རྣམ་པར་ཤེས་པའི་སྒོ་ནས་དེ་དག་ལ་འཇིག་ཚོགས་ལ་ལྟ་བ་འབྱུང་བར་འགྱུར་རོ། །དེའི་ཕྱིར་བདག་མེད་པའི་ཡེ་ཤེས་ནི་དེ་དག་ཡང་དག་པ་ཇི་ལྟ་བ་བཞིན་དུ་ཁོང་དུ་ཆུད་པ་ཞེས་བྱ་སྟེ། དེའི་གཉེན་པོ་ཡིན་པའི་ཕྱིར་རོ། །མི་རྟག་པ་དང་སྡུག་བསྔལ་བའི་རྣམ་པ་དང་ལྡན་པ་སྨོན་པ་མེད་པའི་ཤེས་པ་ནི་དེ་དག་ཡང་དག་པ་ཇི་ལྟ་བ་བཞིན་དུ་ཁོད་དུ་ཆུད་པ་མ་ཡིན་པ་མ་ཡིན་ཏེ། ཡང་དག་པ་ཇི་ལྟ་བ་བཞིན་དུ་ཁོང་དུ་ཆུད་པ་སྨོས་པ་ནི་འཇིག་རྟེན་པའི་བདག་མེད་པ་ཤེས་པ་ལས་བྱེ་བྲག་ཏུ་བྱ་བའི་ཕྱིར་རོ། །དེ་ཉིད་ཀྱི་ཕྱིར་དེ་ལ་དམིགས་པ་འཇིག་རྟེན་ལས་འདས་པ་ཞེས་བྱ་བ་སྨོས་ཏེ། ཡང་དག་པ་ཇི་ལྟ་བ་བཞིན་དུ་ཁོང་དུ་ཆུད་པ་དེ་ནི་འཇིག་རྟེན་པ་མ་ཡིན་ནོ། །ལམ་མི་ཤེས་པ་དང་ཡང་དག་པ་ཇི་ལྟ་བ་བཞིན་དུ་རྟོགས་པ་མི་ཤེས་པ་ལ་བྱེ།
བྲག་ཅི་ཡོད་ཅེ་ན་ཞེས་བྱ་བ་ནི་ཡང་དག་པ་ཇི་ལྟ་བ་བཞིན་རྟོགས་པ་ལ་ཡང་ལམ་ཡིན་ཏེ། ལམ་ལ་མི་ཤེས་པ་ཡང་བསྟན་པ་ཡིན་ནོ་ཞེ་ན། དེའི་ཕྱིར་དེས་ནི་ཇི་ལྟར་མུ་སྟེགས་ཅན་བཞིན་དུ་ལམ་ལ་ལམ་ཡིན་པར་མི་མོས་སོ་ཞེས་རྒྱས་པར་སྨྲས་སོ། །འཇུག་པ་གང་ཡིན་པ་དེ་ནི་འོང་བ་དང་འགྲོ་བ་དང་ཞེས་བྱ་བ་ནི་སྔོན་གྱི་མཐའ་དང་ཕྱི་མའི་མཐའ་དང་གཉི་ག་ཞེས་བྱ་བ་ཡིན་ཏེ། སྔོན་གྱི་མཐའ་མི་ཤེས་པ་ཞེས་རྒྱས་པར་བསྟན་པ་ཡིན་ནོ། །དེ་ལ་སྔོན་གྱི་མཐའ་ནས་ཕྱི་མའི་མཐའ་ཞེས་བྱ་བ་ནི་འོང་བ་ཡིན་ནོ། །ཕྱི་མའི་མཐའ་ནས་སྔོན་གྱི་མཐའ་ཞེས་བྱ་བ་ནི་འགྲོ་བ་ཡིན་ནོ། །སེམས་ཅན་ཞེས་བྱ་བ་འཇུག་པ་གང་ཡིན་པ་ཡང་རང་དང་གཞན་གྱི་རྒྱུད་ཀྱི་ཞེས་བྱ་བ་ནི་ནང་མི་ཤེས་པ་དང་ཞེས་རྒྱས་པར་བསྟན་པ་ཡིན་པའི་ཕྱིར་རོ། །དེ་ཡང་སྔོན་གྱི་མཐའ་དང་ཕྱི་མའི་མཐའ་འོང་བ་དང་འགྲོ་བའི་མཚན་ཉིད་དེ་སེམས་ཅན་ཞེས་བྱ་བའི་དངོས་པོ་འཇུག་པ་ཡིན་ནོ། །དེ་ལྟར་འཇུག་པ་ཡང་སོ་སོའི་ལས་ཀྱི་རྣམ་པར་སྨིན་པ་འབྱིན་པར་བྱེད་པའི་ཕྱིར་ཏེ་ཞེས་བྱ་བ་ཡིན་ཏེ། ལས་མི་ཤེས་པ་ཞེས་རྒྱས་པར་བསྟན་པ་ཡིན་པའི་ཕྱིར་རོ། །ལས་ཀྱིས་སྔོན་གྱི་མཐའ་ལས་ཕྱི་མའི་མཐའ་འགྲུབ་པར་བྱེད་ལ་དེ་དང་ལྡན་པ་ནི་རྣམ་པར་སྨིན་པ་མངོན་པར་འགྲུབ་པར་བྱེད་པའི་ཕྱིར་རོ། །འདི་ནི་འཇུག་པའི་ཕྱོགས་ལས་བརྩམས་ཏེ་མ་རིག་པའི་དམིགས་པའི་དབྱེ་བ་ཡིན་པར་རིག་པར་བྱའོ། །ལྡོག་པ་གང་ཡིན་པ་དེ་ནི་རྟེན་དང་ཞེས་རྒྱས་པར་འབྱུང་བ་དེ་ལ་ལོག་པའི་རྟེན་ནི་སྐྱབས་གསུམ་མོ་ཞེས་བྱ་བ་ནི་སངས་རྒྱས་དང་ཆོས་དང་དགེ་འདུན་ཡིན་ཏེ། ཇི་སྐད་དུ་སངས་རྒྱས་མི་ཤེས་པ་དང༌། ཆོས་དང་དགེ་འདུན་མི་ཤེས་པ་ཞེས་གང་སྨྲས་པ་ཡིན་ལ་ཡང་དག་པ་ཇི་ལྟ་བ་བཞིན་དུ་ཁོང་དུ་ཆུད་པའི་ཤེས་པ་ཡང་དཀོན་མཆོག་གསུམ་ལ་བརྟེན་ནས་སྐྱེ་བའི་ཕྱིར་རོ། །དམིགས་པ་ནི་མདོར་བསྡུས་ན་བདེན་པ་བཞིའོ་ཞེས་བྱ་བ་ནི་སྡུག་བསྔལ་ལ་སོགས་པ་ཡང་དག་པ་ཇི་ལྟ་བ་བཞིན་དུ་ཁོང་དུ་ཆུད་པའི་དམིགས་པ་ནི་སྡུག་བསྔལ་ལ་སོགས་པ་ཡིན་པའི་ཕྱིར་ཏེ་མཐའ་དག་མདོར་བསྡུ་ན་ཡང་དག་པ་ཇི་ལྟ་བ་བཞིན་དུ་ཁོང་དུ་ཆུད་པའི་ཤེས་པའི་དབང་དུ་བྱས་ནས་སྡུག་བསྔལ་མི་ཤེས་པ་དང་ཞེས་རྒྱས་པར་བསྟན་པའི་ཕྱིར་རོ། །རྒྱས་པར་ནི་རྟེན་ཅིང་འབྲེལ་བར་འབྱུང་བའི་ཡན་ལག་བཅུ་གཉིས་སོ་ཞེས་བྱ་བ་ནི་སྡུག་བསྔལ་དང་ཀུན་འབྱུང་གི་བདེན་པ་སོ་སོར་དབྱེ་བ་བྱས་
ནས་རྒྱུ་དང་རྒྱུ་ལས་ཡང་དག་པར་བྱུང་བའི་ཆོས་མི་ཤེས་པ་ཞེས་སྨྲས་པའི་ཕྱིར་དང་དེ་ལ་ཡན་ལག་སྔ་མ་ནི་རྒྱུ་ཡིན་ནོ། །ཕྱི་མ་ནི་རྒྱུ་ལས་ཡང་དག་པར་འབྱུང་བ་ཡིན་ནོ་ཞེས་སྨྲས་པའི་ཕྱིར་རོ། །ཚོགས་པ་དང་བར་དུ་གཅོད་པ་གཉིས་ནི་བྱང་ཆུབ་ཀྱི་ཕྱོགས་ཀྱི་ཆོས་རྣམས་དང་དེའི་མི་མཐུན་པའི་ཕྱོགས་སོ་ཞེས་བྱ་བ་ལ་བྱང་ཆུབ་ཀྱི་ཕྱོགས་ནི་ཚོགས་ཡིན་ནོ། །དེའི་མི་མཐུན་པའི་ཕྱོགས་ནི་བར་དུ་གཅོད་པའི་ཕྱིར་དགེ་བ་དང་མི་དགེ་བ་ཞེས་བྱ་བ་ནས་རྟེན་ཅིང་འབྲེལ་པར་འབྱུང་བ་རྣམ་པར་དབྱེ་བ་ཞེས་བྱ་བའི་བར་དུ་སྨྲས་པའི་ཕྱིར་རོ། །ངོ་བོ་ཉིད་ནི་རེག་པའི་སྐྱེ་མཆེད་དྲུག་ཡང་དག་པ་ཇི་ལྟ་བ་བཞིན་དུ་ཁོང་དུ་ཆུད་པ་ཡིན་ཏེ་ཞེས་བྱ་བ་ནི་རེག་པའི་སྐྱེ་མཆེད་དྲུག་ཡང་དག་པ་ཇི་ལྟ་བ་བཞིན་དུ་ཁོང་དུ་ཆུད་པའི་ཤེས་པ་ནི་ལྡོག་པའི་ངོ་བོ་ཉིད་ཡིན་ནོ་ཞེས་སྟོན་པར་བྱེད་དོ། །བདག་གིས་མཐོང་ངོ་ཞེས་བྱ་བ་ནས་རྣམ་པར་ཤེས་སོ་ཞེས་བྱ་བའི་བར་ལ་བདག་ཏུ་ལྟ་བའི་མཚན་ཉིད་འཇིག་ཚོགས་ལ་ལྟ་བའི་གཉེན་པོ་ཡིན་པའི་ཕྱིར་རོ་ཞེས་བྱ་བ་ནི་འཇིག་ཚོགས་ལ་ལྟ་བ་ལྡོག་པའི་དོན་གྱིས་ཡང་དག་པ་ཇི་ལྟ་བ་བཞིན་དུ་ཁོང་དུ་ཆུད་པའི་ཤེས་པ་ནི་ལྡོག་པ་ཡིན་ནོ་ཞེས་བསྟན་ཏོ། །འདི་དག་ནི་མ་རིག་པ་ལྡོག་པའི་དབང་དུ་བྱས་ནས་དམིགས་པའི་དབྱེ་བ་ཡིན་ནོ། །གང་དེ་དང་དེར་ཞེས་བྱ་བ་ཡང་ཅིའི་ཕྱིར་ཞེ་ན་ཞེས་བྱ་བ་ནི་གང་དེར་ཞེས་བྱ་བ་དེ་དག་ཉིད་ཀྱིས་དེ་དང་དིར་གསུངས་པ་རྨོངས་པར་བྱེད་པ་ཡིན་པའི་ཕྱིར་རོ། །དེའི་ཕྱིར་སྔོན་གྱི་མཐའ་ལ་སོགས་པ་རེ་རེར་ཡང་ཞེས་རྒྱས་པར་སྨོས་ཏེ། སྔོན་གྱི་མཐའ་གང་ཡིན་པ་ནས་རེག་པའི་སྐྱེ་མཆེད་དྲུག་ཡང་དག་པ་ཇི་ལྟ་བ་བཞིན་དུ་ཁོང་དུ་ཆུད་པ་ལ་ཐུག་པའི་བར་དུ་ཚིག་གི་དོན་མི་ཤེས་པ་དང༌། མ་མཐོང་བ་དང༌། མངོན་པར་མ་རྟོགས་པ་དང༌། རྨོངས་པ་དང༌། ཀུན་དུ་རྨོངས་པ་དང༌། མ་རིག་པ་དང༌། མུན་པའི་རྣམ་པ་ཞེས་བྱ་བདག་ནི་མ་རིག་པའི་རྣམ་གྲངས་བདུན་ཡིན་ནོ། །འགའ་ཞིག་ཇི་ལྟར་ཡང་དེའི་དོན་ཁོང་དུ་ཆུད་པར་བྱ་བའི་ཕྱིར་དང་ཞེས་བྱ་བ་ནི་ཉན་པ་པོ་འགའ་ཞིག་ཇི་ལྟར་ཡང་རྣམ་གྲངས་ཐ་དད་པ་དག་གིས་ཀྱང་དེའི་དོན་རྟོགས་པར་བྱ་བའི་ཕྱིར་ཏེ། ཁ་ཅིག་ལ་ནི་ཚིག་གི་དོན་ཁ་ཅིག་གྲགས་པ་ཡིན་ནོ། །དེའི་ཚེ་རྣམ་པར་གཡེངས་པ་རྣམས་དེའི་དོན་ཐོས་པར་བྱ་བའི་ཕྱིར་རོ་ཞེས་བྱ་བ་ནི་ཉན་པའི་ཚེ་གཡེངས་པ་རྣམས་དེའི་སྐབས་ཀྱི་དོན་ཐོས་པར་བྱ་བའི་ཕྱིར་ཏེ། རྣམ་གྲངས་ཀྱི་ཚིག་ནི་སྐྱོན་མེད་པའི་དོན་དང་ལྡན་པ་ཡིན་ནོ། །དེ་ཉིད་
བརྗོད་ན་ནི་གཞན་དག་གིས་དཔྱད་པར་འགྱུར་རོ་ཞེས་བྱ་བ་ནི་དེ་ཁོ་ནས་ཀྱང་དེའི་ཚེ་གཡེངས་པ་རྣམས་ཀྱིས་རྟོགས་པར་བྱ་བ་དེའི་ཚེ་གཡེངས་པ་རྣམས་ལ་ནུས་མོད་ཀྱི་ཞེས་བྱ་བའོ། །ཡིད་རྟུལ་པོ་དག་ཀྱང་ཡང་ནས་ཡང་དུ་དེའི་དོན་རྟོགས་པས་མི་བརྗོད་པར་བྱ་བའི་ཕྱིར་རོ་ཞེས་བྱ་བ་ནི་ཡིད་རྟུལ་པོ་རྣམས་མི་བརྗོད་པར་བྱ་བའི་ཕྱིར་ཞེས་བྱ་བ་གང་ཞེ་ན། རྣམ་གྲངས་ཀྱི་ཚིག་ཡིན་ནོ། །དེ་དག་གིས་ཡང་ནས་ཡང་དུ་དེའི་དོན་རྟོགས་པས་ཞེས་བྱ་བ་ལ་དེ་དག་གིས་ཞེས་བྱ་བ་ནི་རྣམ་གྲངས་ཀྱི་ཚིག་དེ་དག་གིས་སོ། །དེའི་དོན་རྟོགས་པས་ཞེས་བྱ་བ་ནི་སྐབས་ཀྱི་དོན་རྟོགས་པས་ཞེས་བྱ་བའི་ཐ་ཚིག་གོ །དེ་ཁོ་ནས་ཀྱང་ཡང་ནས་ཡང་དུ་དེའི་དོན་རྟོགས་པར་བྱེད་ནུས་མོད་ཀྱི་དཔྱད་པར་འགྱུར་རོ་ཞེས་བྱ་བ་སྨྲས་ཟིན་ཏོ། །སྒྲ་གཅིག་ལ་དོན་དུ་མ་ཡོད་པས་དོན་ཐ་དད་པར་རྟོག་པ་བསལ་བའི་ཕྱིར་དང་ཞེས་བྱ་བ་ནི་སྒྲ་གཅིག་ལ་ཡང་དོན་དུ་མ་ཡོད་པ་ཉིད་དུ་མཐོང་སྟེ། དཔེར་ན་གོ་ཞེས་བྱ་བའི་སྒྲ་དེ་ནི་ངག་དང་ཕྱོགས་དང་ས་ལ་སོགས་པ་དོན་དགུ་ལ་འཇུག་པ་ཡིན་ནོ། །དེ་བས་ན་རྣམ་གྲངས་ཀྱི་ཚིག་ནི་དོན་ཐ་དད་པ་ཡིན་པར་རྣམ་པར་རྟོག་པ་བསལ་བར་བྱ་བའི་ཕྱིར་རོ། །ཇི་ལྟ་ཞེ་ན། རྣམ་གྲངས་གཉིས་པ་ལ་སོགས་པས་ནི་རྣམ་གྲངས་དང་པོའི་དོན་ཁོ་ན་ཤེས་པར་བྱེད་པའི་ཕྱིར་རོ། །ཆོས་སྨྲ་བ་རྣམས་ཀྱིས་དེའི་དོན་ཐོབ་པར་བྱ་བ་དང༌། ཚིག་ཉེ་བར་སྦྱར་བ་གཉིས་དང་རྗེས་སུ་མཐུན་པར་བྱ་བའི་ཕྱིར་དང་ཞེས་བྱ་བ་ནི་ཚིག་གི་དོན་གྲགས་པ་དག་རྣམ་གྲངས་བརྗོད་ན་སྐབས་ཀྱི་དོན་ཐོབ་པ་དང་རྗེས་སུ་མཐུན་པར་འགྱུར་རོ། །ཡང་ན་ཉན་པ་པོའི་བྱེ་བྲག་གིས་འགའ་ལ་ཚིག་གི་དོན་འགའ་ཞིག་གྲགས་པ་ཡིན་ཏེ། ཡི་གེ་དགོད་པ་ནི་སྔར་བཞག་པ་དང་ཕྱིས་གཞག་པ་དང༌། བར་དུ་བཞག་པ་དང༌། ལྕི་བ་དང༌། ཡང་བ་ཡིན་པའི་ཕྱིར་འགའ་ཞིག་ལ་འགའ་ཞིག་ཚིག་སྦྱར་བ་དང་རྗེས་སུ་མཐུན་པ་ཡིན་པས་སོ། །བདག་ཉིད་ཆོས་སོ་སོ་ཡང་དག་པར་རིག་པ་ཡིན་པར་བརྗོད་པར་བྱ་བའི་ཕྱིར་དང་ཞེས་བྱ་བ་ནི་དེ་ལྟར་དེ་བཞིན་གཤེགས་པའི་ཆོས་སྟོན་པ་ནི་དཔག་ཏུ་མེད་པ་ཡིན་ཏེ། དེ་ལྟར་ཆོས་ཀྱི་ཚིག་དང་ཡི་གེ་ཡང་དཔག་ཏུ་མེད་པ་ཡིན། དེ་ལྟར་བླ་ན་མེད་པའི་ཤེས་རབ་དང་སྤོབས་པ་དཔག་ཏུ་མེད་པ་ཡིན་པས་བཅོམ་ལྡན་འདས་བདག་ཉིད་ཆོས་སོ་སོ་ཡང་དག་པར་རིག་པ་ཅན་ཡིན་པར་
བརྗོད་པའི་ཕྱིར་དོན་གཅིག་ཁོ་ན་ལ་རྣམ་གྲངས་ཀྱི་ཚིག་མང་པོ་འཆད་པར་མཛད་དེ། མིང་གི་ཚོགས་དང་ཚིག་གི་ཚོགས་དང་ཡི་གེའི་ཚོགས་ལ་ཐོགས་པ་མེད་པའི་ཡེ་ཤེས་ནི་ཆོས་སོ་སོ་ཡང་དག་པར་རིག་པའི་མཚན་ཉིད་ཡིན་པའི་ཕྱིར་རོ། །དེ་དག་ནི་མདོ་སྡེའི་རྗེས་སུ་འབྲང་བ་རྣམས་ཀྱི་སྟོན་པར་བྱེད་པའི་ངོ་བོ་ཡིན་ཏེ། སྒྲ་བསྡུས་པའི་བདག་ཉིད་ཡིན་པའི་ཕྱིར་རོ། །ཅིའི་ཕྱིར་བཅོམ་ལྡན་འདས་ཆོས་འཆད་པའི་ཚེ་བདག་ཉིད་ཆོས་སོ་སོ་ཡང་དག་པར་རིག་པར་བརྗོད་པར་མཛད་ཅེ་ན་གདུལ་བྱ་རྣམས་ཀྱི་དགོས་པ་བསྒྲུབ་པར་བྱ་བའི་ཕྱིར་ཏེ། ཁ་ཅིག་དེའི་སྒོ་ནས་མངོན་པར་ཡིད་ཆེས་པ་སྐྱེ་བའི་ཕྱིར་རོ། །ཇི་སྐད་དུ། ཆོ་འཕྲུལ་གང་མཛད་སེང་གེའི་སྒྲ། །རང་གི་ཡོན་ཏན་གང་སྒྲོགས་པ། །འདོད་མེད་རྣམ་པར་འགྱུར་བྲལ་བའི། །ཐུགས་རྗེའི་འབྱུང་ཁུངས་ཡོད་པས་ཡིན། །ཞེས་གསུངས་སོ། །གཞན་དག་ལ་དེའི་ས་བོན་གཞག་པའི་ཕྱིར་རོ་ཞེས་བྱ་བ་ནི་ཉན་པ་པོ་རྣམས་ལ་རྣམ་གྲངས་ཀྱི་ཚིག་གི་ས་བོན་གཞག་པའི་ཕྱིར་ཞེས་བྱ་བའི་ཐ་ཚིག་དང་ཆོས་སོ་སོ་ཡང་དག་པར་རིག་པའི་ས་བོན་གཞག་པའི་ཕྱིར་ཡང་ཡིན་ནོ། །ཅིའི་ཕྱིར་མ་རིག་པ་ཁོ་ན་ལ་མ་རིག་པའི་རྣམ་གྲངས་བསྟན་ཞེ་ན་ཞེས་བྱ་བ་ཇི་ལྟ་བུ་ཞེ་ན་མི་ཤེས་པ་དང༌། མི་མཐོང་བ་དང་མངོན་པར་མི་རྟོགས་པ་ཞེས་བྱ་བ་དེ་དག་གིས་རྨོངས་པ་དང་ཀུན་དུ་རྨོངས་པ་དང༌། མ་རིག་པ་དང༌། མུན་པའི་རྣམ་པ་ཞེས་བྱ་བ་ཡིན་ནོ། །དེའི་ཕྱིར་རྣམ་གྲངས་སོ་སོ་རྣམས་དེ་བཞིན་དུ་དོན་གྱི་བྱེ་བྲག་མེད་པར་བསྟན་པའི་ཕྱིར་རོ་ཞེས་བྱ་བ་སྨྲས་ཏེ། དཔེར་ན་མ་རིག་པ་གང་ཞེ་ན་མ་རིག་པ་ཡིན་ནོ་ཞེས་བྱས་ན་འདིའི་རྣམ་གྲངས་བརྗོད་པའི་དོན་གྱི་བྱེ་བྲག་ཡོད་པ་མ་ཡིན་པ་ལྟར། མི་ཤེས་པ་ལ་སོགས་པ་ཡང་དེ་བཞིན་ནོ། །གཞན་ཡང་གང་དག་གི་མི་མཐུན་པའི་ཕྱོགས་མ་རིག་པ་ཡིན་ནོ་ཞེས་རྒྱས་པར་འབྱུང་བ་ནི་གང་གི་མི་མཐུན་པའི་ཕྱོགས་མ་རིག་པ་ཡིན་པ་དེ་ནི་མི་ཤེས་པ་དང་མི་མཐོང་བ་དང་མངོན་པར་མི་རྟོགས་པ་ཞེས་བྱ་བ་རྣམ་གྲངས་རྣམ་པ་གསུམ་གྱིས་མ་རིག་པ་བསྟན་ཏོ། །ཇི་ལྟར་མ་རིག་པ་དེ་མི་མཐུན་པའི་ཕྱོགས་ཡིན་པ་དེ་ནི་རྨོངས་པ་དང་ཀུན་ཏུ་རྨོངས་པ་དང༌། མ་རིག་པ་དང༌། མུན་པའི་རྣམ་པ་ཞེས་བྱ་བ་རྣམ་གྲངས་བཞིས་བསྟན་ཏོ། །གང་དག་གི་མི་མཐུན་པའི་ཕྱོགས་མ་རིག་པ་ཡིན་ཞེ་ན་ཞེས་རྒྱས་པར་འབྱུང་བ་ནི་ཐོས་པ་ལས་བྱུང་བའི་ཤེས་རབ་ཤེས་པ་ཞེས་བྱ་བ་ནི་རབ་ཏུ་མཐོང་བ་མ་
ཡིན་པ་ཞེས་བྱ་སྟེ། ཡང་དག་པར་ངེས་པར་རྟོགས་པར་བྱེད་པའི་རྣམ་པ་མ་ཡིན་པའི་ཕྱིར་རོ། །དེའི་མི་མཐུན་པའི་ཕྱོགས་ནི་མི་ཤེས་པའི་རྣམ་གྲངས་ཀྱིས་བསྟན་ཏོ། །བསམས་པ་ལས་བྱུང་བ་ནི་མཐོང་བ་དང་ཞེས་བྱ་བ་ཡིན་ཏེ། ཡང་དག་པར་ངེས་པར་རྟོགས་པའི་རྣམ་པ་ཡིན་པའི་ཕྱིར་རོ། །དེའི་མི་མཐུན་པའི་ཕྱོགས་ནི་མཐོང་བའི་རྣམ་གྲངས་ཀྱིས་བསྟན་ཏོ། །བསྒོམས་པ་ལས་བྱུང་བ་ནི་མངོན་པར་རྟོགས་པ་ཞེས་བྱ་བ་ཡིན་ཏེ། ཉོན་མོངས་པ་སྤོང་བ་མངོན་དུ་གྱུར་ཅིང་ཕྱིན་ཅི་མ་ལོག་པར་རྟོགས་པའི་མཚན་ཉིད་ཡིན་པའི་ཕྱིར་རོ། །མངོན་པར་ཞེས་བྱ་བ་འདི་ནི་མངོན་སུམ་གྱི་དོན་ཡིན་པར་རིག་པར་བྱའོ། །དེའི་མི་མཐུན་པའི་ཕྱོགས་ནི་མངོན་པར་མ་རྟོགས་པ་ཞེས་བྱ་བའི་རྣམ་གྲངས་ཀྱིས་བསྟན་ཏོ། །དེའི་ཡུལ་བཀབ་པའི་དོན་གྱིས་ཞེས་བྱ་བ་ནི་རིག་པ་དེ་དག་གི་ཡུལ་ཞེས་བྱ་བའི་ཐ་ཚིག་གོ །མུན་པར་གྱུར་པའི་ཕྱིར་ཞེས་བྱ་བ་ནི་ཇི་ལྟར་མུན་པ་དེའི་ཐོག་ཏུ་བབ་པའི་ཕྱིར་དང༌། སྣང་བའི་བགེགས་སུ་གྱུར་པའི་སྣང་བར་བྱ་བའི་དོན་འགེབས་པར་བྱེད་དོ། །མ་རིག་པ་ཡང་དེ་བཞིན་ཏེ། དེ་ལ་དམིགས་ཤིང་སྐྱེས་པས་རིག་པར་བྱ་བའི་དོན་དང་རིག་པ་ཀུན་དུ་འབྱུང་བ་གཉེན་པོ་ལ་ཡང་གཡོགས་པར་བྱེད་པ་བཞིན་དུ་འགེབས་པར་བྱེད་དོ། །དེ་ལྟར་ན་འདི་ནི་མ་འདྲེས་པའི་མ་རིག་པ་ཡིན་ཏེ། རྨོངས་པ་ཞེས་བྱ་བའི་རྣམ་གྲངས་ཀྱིས་བསྟན་ཏོ། །ལོག་པར་མཐོང་བར་བྱེད་པའི་དོན་གྱིས་ཀྱང་མི་མཐུན་པའི་ཕྱོགས་ཡིན་ནོ། །ལོག་པར་མཐོང་བ་ནི་ཕྱིན་ཅི་ལོག་ཏུ་འཛིན་པའི་རྣམ་པ་ཡིན་ནོ། །ཇི་ལྟར་ཡིན་ཞེ་ན། ཡིད་གཉིས་དང༌། བློ་ངན་པ་དང༌། བློ་མེད་པའི་ཉོན་མོངས་པ་དང་མཚུངས་པར་ལྡན་པའི་ཕྱིར་རོ། །འདི་ལྟར་ཡིད་གཉིས་ཀྱི་ཉོན་མོངས་པ་དང་རབ་ཏུ་སྦྱོར་བ་ནི་ཐེ་ཚོམ་གྱིས་སོ། །བློ་ངན་པའི་ཉོན་མོངས་པ་དང་རབ་ཏུ་སྦྱོར་བ་ནི་ལོག་པར་ལྟ་བ་ལ་སོགས་པས་སོ། །བློ་མེད་པའི་ཉོན་མོངས་པ་དང་རབ་ཏུ་སྦྱོར་བ་ནི་འདོད་ཆགས་ལ་སོགས་པས་སོ། །དེ་ལ་གང་ཡིད་གཉིས་ཀྱི་ཉོན་མོངས་པ་དང་རབ་ཏུ་སྦྱོར་བ་དེ་ནི་ཀུན་དུ་རྨོངས་པའི་རྣམ་གྲངས་ཀྱིས་བསྟན་ཏོ། །གང་བློ་ངན་པ་དང་གང་ཡིན་པ་དེ་ནི་མ་རིག་པའི་རྣམ་གྲངས་ཀྱིས་སོ། །བློ་མེད་པའི་ཉོན་མོངས་པ་གང་ཡིན་པ་དེ་ནི་མུན་པའི་རྣམ་གྲངས་ཀྱིས་སོ། །རེ་ཞིག་ཀུན་དུ་རྨོངས་པ་དང་ཡིད་གཉིས་
ཀྱིས་ཉོན་མོངས་པར་རབ་ཏུ་སྦྱོར་བར་སྟོན་པ་གང་ཡིན་པ་དེ་ནི་རིགས་ཏེ། ཀུན་དུ་རྨོངས་པ་ནི་ཐེ་ཚོམ་ཟ་བ་ཡིན་པའི་ཕྱིར་རོ། །མུན་པའི་རྣམ་པ་དང་བློ་མེད་པའི་ཉོན་མོངས་པར་རབ་ཏུ་སྦྱོར་བར་སྟོན་པ་ནི་རིགས་ཏེ། འདོད་ཆགས་ལ་སོགས་པ་མངོན་དུ་གྱུར་ན་ཅི་ཡང་མཐོང་བ་མེད་པ་ཡིན་ཏེ། ཆགས་པ་པོ་ནི་ཆོས་མི་ཤེས། །ཆགས་པ་པོ་ནི་ཆོས་མི་མཐོང༌། །ཞེས་གསུངས་པའི་ཕྱིར་རོ། །མ་རིག་པ་དང་བློ་ངན་པའི་ཉོན་མོངས་པ་རབ་ཏུ་སྦྱོར་བར་ཇི་ལྟར་བསྟན་དུ་རུང་ཞེ་ན་ཞེས་བྱ་བ་ནི་ཅིའི་ཕྱིར་བསྟན་པར་མི་བྱ་ཞེ་ན། རིག་པའི་མི་མཐུན་པའི་ཕྱོགས་ཆོས་གཞན་མ་རིག་པ་ཡིན་ནོ་ཞེས་བསྟན་པར་བྱ་བའི་ཕྱིར་རོ་ཞེ་ན། དེའི་ཕྱིར་ཚོར་བ་དང་རིག་པ་དང་ཤེས་རབ་ཅེས་བྱ་བ་ནི་ཞེས་བྱ་བ་རྒྱས་པར་སྨོས་ཏེ་ཚོར་བ་དང་རིག་པ་ནི་སྒྲ་ལ་འཆེལ་བ་རྣམས་ཀྱི་ཤེས་རབ་དང་དོན་ཐ་དད་པ་མ་ཡིན་པར་བཤད་དོ། །མའི་རྣམ་པ་ནི་སྨད་པའི་དོན་ཡིན་ཏེ། ཆུང་མ་མེད་པ་དང་བུ་མེད་པ་བཞིན་ནོ། །སྨད་པའི་རིག་པ་དེ་ལྟ་བ་ལྔའི་རང་བཞིན་ཏེ། རིག་པའི་མི་མཐུན་པའི་ཕྱོགས་ཀྱི་མཚན་ཉིད་འདི་ལ་ཡོད་པས་མ་རིག་པ་ནི་འབྲུ་མང་པོ་པའི་དོན་གྱིས་མ་རིག་པའི་རྣམ་གྲངས་ཀྱི་སྒྲ་སྟོན་པར་བྱེད་དོ། །དངོས་སུ་ནི་མ་རིག་པའི་སྒྲ་མི་མཐུན་པའི་ཕྱོགས་ལ་བྱའོ། །དེ་ལྟར་བྱས་ན་མ་རིག་པ་དང་བློ་ངན་པར་རབ་ཏུ་སྦྱོར་བར་སྟོན་པ་ཡིན་ནོ། །སློབ་དཔོན་འཆང་བ་ནི་ཞེས་བྱ་བ་ནི་སློབ་དཔོན་ཐོགས་མེད་དོ། །སྔོན་གྱི་མཐའ་ལ་སོགས་པ་མི་ཤེས་པ་ཞེས་བྱ་བ་ནི་ཇི་སྐད་དུ་རེག་པའི་སྐྱེ་མཆེད་དྲུག་ཡང་དག་པ་ཇི་ལྟ་བ་བཞིན་ཁོད་དུ་ཆུད་པ་ལ་ཐུག་པའི་བར་དུ་མི་ཤེས་པ་ཞེས་སྟོན་ཏོ། །གཏན་ཚིགས་རྣམ་པ་གཉིས་སུ་རིག་པར་བྱ་སྟེ། བདག་ཏུ་འཛིན་པ་དང་རྗེས་སུ་མཐུན་པའི་གཏན་ཚིགས་དང༌། དེ་ལས་གྲོལ་བའི་བགེགས་བྱེད་པའི་གཏན་ཚིགས་ཀྱིས་སོ། །བདག་ཏུ་འཛིན་པ་དེ་ལས་གྲོལ་བ་ནི་དེ་ལས་གྲོལ་བའོ། །དེའི་བགེགས་བྱེད་པ་ནི་དེ་དག་གི་བགེགས་བྱེད་པ་སྟེ། དེའི་བགེགས་བྱེད་པ་ཉིད་དུ་མི་ཤེས་པ་ཡིན་པར་རིག་པར་བྱའོ། །བདག་ཏུ་འཛིན་པ་ཡང་རྣམ་པ་གསུམ་སྟེ་ཞེས་རྒྱས་པར་འབྱུང་བ་ལ། རྟག་པར་འཛིན་པ་ནི་བདག་རྟག་པའི་རྫས་སུ་མངོན་པར་ཞེན་པའོ། །དེ་དང་རྗེས་སུ་མཐུན་པ་ནི་སྔོན་གྱི་མཐའ་མི་ཤེས་པ་དང༌། ཕྱི་མའི་མཐའ་མི་ཤེས་པ་དང༌། སྔོན་གྱི་མཐའ་དང་ཕྱི་མའི་མཐའ་མི་ཤེས་པ་ཞེས་བྱ་བ་ཡིན་ཏེ། དུས་ལ་རྨོངས་པ་ནི་
རྟག་པའི་ལྟ་བར་ལྟུང་བ་ཡིན་ནོ། །དངོས་པོ་འཛིན་པ་ནི་བདག་མེད་པའི་དངོས་པོ་ལ་བདག་གི་དངོས་པོར་མངོན་པར་ཞེན་པའོ། །དེ་དང་རྗེས་སུ་མཐུན་པ་ནི་ནང་མི་ཤེས་པ་དང༌། ཕྱི་མི་ཤེས་པ་དང༌། ནང་དང་ཕྱི་མི་ཤེས་པ་ཞེས་བྱ་བ་ཡིན་ཏེ། སྐྱེ་མཆེད་དྲུག་ལ་རྨོངས་པ་ནི་དེ་ལ་བདག་ཏུ་རྟོགས་པར་བྱེད་དོ། །བྱེད་པ་པོ་དང་ཟབ་པོར་འཛིན་པ་ནི་ལས་དང་རྣམ་པར་སྨིན་པ་དང༌། །དུས་དང་སྐྱེ་གནས་ལ་བྱེད་པ་པོ་དང༌། ཟབ་པོར་བདག་གི་རྫས་སུ་མངོན་པར་ཞེན་པའོ། །དེ་དང་རྗེས་སུ་མཐུན་པ་ནི་ལས་མི་ཤེས་པ་དང༌། རྣམ་པར་སྨིན་པ་མི་ཤེས་པ་དང༌། ལས་དང་རྣམ་པར་སྨིན་པ་མི་ཤེས་པ་ཞེས་བྱ་བ་ཡིན་ཏེ། ལས་དང་རྣམ་པར་སྨིན་པ་ལ་རྨོངས་པ་ནི་བྱེད་པ་པོ་དང་ཟ་བ་པོ་གཞན་ཞིག་ཡན་པར་རྟོག་པར་བྱེད་དེ། རྟེན་ཅིང་འབྲེལ་པར་འབྱུང་བ་མངོན་པར་མི་ཤེས་པའི་ཕྱིར་རོ། །དེ་ལྟར་སྔོན་གྱི་མཐའ་ལ་སོགས་པ་དངོས་པོ་དྲུག་མི་ཤེས་པ་གང་ཡིན་པ་དེ་ནི་བདག་ཏུ་འཛིན་པ་དང་རྗེས་སུ་མཐུན་པ་ཡིན་པར་རིག་པར་བྱའོ། །བདག་ཏུ་འཛིན་པ་རྣམ་པ་གསུམ་སྟེ་དེ་བཞིན་དུ་འཇུག་པའི་གཏན་ཚིགས་བསྟན་པའི་ཕྱིར་རོ། །གལ་ཏེ་བདག་གི་དངོས་པོ་ཞིག་ཡོད་པ་ཡིན་ན་ནི་དེ་ཡང་རྟག་པ་དང་རང་དབང་ཅན་དང་བྱེད་པ་པོ་དང་ཟབ་པོར་གྱུར་པ་ཡིན་ནོ། །དེ་ལྟ་ན་ནི་འཇུག་པར་རིགས་ཀྱི་གཞན་དུ་མ་ཡིན་ནོ། །དེ་ལས་ཐར་པའི་བགེགས་བྱེད་པ་ཡང་རྣམ་པ་བཞི་སྟེ། སྐྱབས་སུ་འགྲོ་བ་མི་ཤེས་པ་ཞེས་བྱ་བ་ནི་སངས་རྒྱས་མི་ཤེས་པ་དང༌། ཆོས་དང་དགེ་འདུན་ལ་ཞེས་གང་སྨྲས་པ་ཡིན་ཏེ། འདི་ནི་དེ་ལས་ཐར་པའི་བགེགས་བྱེད་པ་ཉིད་དུ་རིག་པར་བྱ་སྟེ། དཀོན་མཆོག་གསུམ་ལ་མི་བརྟེན་པའི་ཕྱིར་རོ། །བདག་ཏུ་འཛིན་པ་སྤང་བའི་མངོན་པར་བྱ་བའི་དོན་ནི་བདེན་པ་རྣམས་ཡིན་པར་རིག་པར་བྱ་སྟེ། དེ་བས་ན་མཐོང་བར་བྱ་བའི་དོན་ཞེས་བྱ་སྟེ། མཐོང་བར་བྱ་བའི་དོན་དེ་ཉིད་ཅི་ཞེ་ན། ཁོང་དུ་མི་ཆུད་པ་ཞེས་སྐབས་དང་སྦྱར་ཏེ་སྡུག་བསྔལ་མི་ཤེས་པ་ནས་ལམ་མི་ཤེས་པ་ཞེས་བྱ་བའི་བར་འདི་ནི་དེ་ལས་གྲལ་བའི་བགེགས་བྱེད་པ་ཉིད་དུ་རིག་པར་བྱ་སྟེ། བདེན་པ་མཐོང་བ་ནི་བདག་ཏུ་འཛིན་པའི་གཉེན་པོ་ཡིན་པའི་ཕྱིར་རོ། །མི་མཐུན་པའི་ཕྱོགས་དང༌། གཉེན་པོ་སྤངས་པ་དང་སྐྱེད་པ་ཅི་ཞེ་ན་མི་ཤེས་པ་ཞེས་བྱ་སྟེ། དེ་ལ་མི་མཐུན་པའི་ཕྱོགས་སྤང་བ་ཁོང་དུ་ཆུད་པ་ནི་རྒྱུ་མི་ཤེས་པ་ཞེས་བྱ་བ་ནས་རྒྱུ་
ལས་ཡང་དག་པར་བྱུང་བ་དང༌། མི་དགེ་བ་དང༌། ཟག་པ་དང་བཅས་པ་ལ་སོགས་པ་ནས་རྟེན་ཅིང་འབྲེལ་པར་འབྱུང་བ་ཞེས་བྱ་བའི་བར་དུ་མི་ཤེས་པ་གང་ཡིན་པ་སྨྲས་པ་འདི་ཡང་དེ་ལ་གྲོལ་བའི་བགེགས་བྱེད་པ་ཉིད་ཡིན་པར་རིག་པར་བྱ་སྟེ། བདག་ཏུ་འཛིན་པ་ནི་དེའི་རྗེས་ལས་བྱུང་བའི་ཕྱིར་རོ། །རྒྱུ་ལས་ཡང་དག་པར་བྱུང་བ་ཞེས་བསྟན་ནས་ཡང་རྟེན་ཅིང་འབྲེལ་པར་འབྱུང་བ་ཞེས་སྨོས་པའི་དགོངས་པ་ནི་མ་རྟོགས་སོ། །གཉེན་པོ་སྐྱེད་པ་མི་ཤེས་པ་ནི་རྒྱུ་མི་ཤེས་པ་ནས་རྒྱུ་ལས་ཡང་དག་པར་བྱུང་བ་དང༌། དགེ་བ་དང་ཁ་ན་མཐོ་བ་མེད་པ་དང༌། རྟེན་ཅིང་འབྲེལ་པར་འབྱུང་བའི་བར་དུ་མི་ཤེས་པ་གང་ཡིན་པ་གང་སྨྲས་པ་འདི་ནི་དེ་ལས་གྲོལ་བའི་བགེགས་བྱེད་པ་ཉིད་ཡིན་པར་རིག་པར་བྱ་སྟེ། བྱང་ཆུབ་ཀྱི་ཕྱོགས་རྣམས་ནི་བདག་ཏུ་འཛིན་པའི་གཉེན་པོ་ཡིན་པའི་ཕྱིར་རོ། །གཉེན་པོ་ལ་མངོན་པའི་ང་རྒྱལ་མེད་པ་ཅི་ཞེ་ན། མི་རྟོགས་པ་ཞེས་སྐབས་དང་སྦྱར་ཏེ་རེག་པའི་སྐྱེ་མཆེད་དྲུག་ཡང་དག་པ་ཇི་ལྟ་བ་བཞིན་དུ་ཁོང་དུ་ཆུད་པ་མི་ཤེས་པ་འདི་ཡང་ང་ལས་གྲོལ་བའི་བགེགས་བྱེད་པ་ཉིད་ཡིན་པར་རིག་པར་བྱ་སྟེ། ཡང་དག་པ་ཇི་ལྟ་བ་བཞིན་དུ་ཁོང་དུ་ཆུད་པ་ནི་བདག་ཏུ་འཛིན་པའི་གཉེན་པོ་ཡིན་པའི་ཕྱིར་རོ། །སྐྱབས་སུ་འགྲོ་བ་ལ་ཉེ་བར་བརྟེན་པ་ནི་སྡུག་བསྔལ་ལ་སོགས་པའི་བདེན་པ་ལ་དམིགས་པ་མཉན་པ་དང་བསམ་བ་དང་གོམས་པའི་སྦྱོར་བས་མི་མཐུན་པའི་ཕྱོགས་དང་བྲལ་ཞིང་གཉེན་པོ་འཕེལ་བ་ཡིན་ཏེ། བདེན་པ་རྟོགས་ན་ཕྱིན་ཅི་མ་ལོག་པའི་སེམས་ནི་བདག་ཏུ་འཛིན་པ་སྤོང་བ་ཡིན་ནོ། །དེ་ལས་བཟློག་པ་ནི་སྤོང་བ་མ་ཡིན་ནོ་ཞེས་བྱ་བར་གྲུབ་པ་ཡིན་ནོ། །རྣལ་འབྱོར་སྤྱོད་པའི་ས་ལས་བསྟན་པ་ཞེས་རྒྱས་པར་འབྱུང་བ་ནི་དེ་ལ་སྔོན་གྱི་མཐའ་དང་ཕྱི་མའི་མཐའ་མི་ཤེས་པ་ནི་སྔར་བསྟན་པ་ལས་བྱེ་བྲག་འགའ་ཡང་ཡོད་པ་མ་ཡིན་ཏེ། སྔར་བཤད་ཟིན་ཏོ། །དེ་བཞིན་དུ་ནང་དུ་མི་ཤེས་པ་ཡང་བྱེ་བྲག་མེད་དོ། །ཕྱི་ལ་ནི་ཡོད་དེ་སེམས་ཅན་གྱི་གྲངས་སུ་མ་གཏོགས་པ་ཡུལ་རྗོད་པར་བྱེད་པའི་ཕྱིར་རོ། །ནང་དང་ཕྱི་མི་ཤེས་པ་ལ་བྱེ་བྲག་ཡོད་དེ་རྒྱུད་གཞན་གྱི་འདུ་བྱེད་རྣམས་ལ་ཚུལ་བཞིན་མ་ཡིན་པར་མཛའ་བོ་དང་མི་མཛའ་བ་དང་ཐ་མལ་བའི་སེམས་ཅན་དུ་བལྟས་པས་འདུ་བྱེད་ཙམ་ཡིན་པར་ནི་མི་རྟོགས་པའི་མི་ཤེས་པ་གང་ཡིན་པ་སྟེ་དེ་ཡང་འཇིག་ཚོགས་ལ་ལྟ་བ་རྗེས་སུ་ཆགས་པ་དང་ཁོང་ཁྲོ་བ་དང་སོ་སོར་མ་བརྟགས་པའི་བཏང་སྙོམས་དང་མཚུངས་
པར་ལྡན་པའི་མ་རིག་པ་ཡིན་པར་བསྟན་ཏེ། རྒྱུད་གཞན་གྱི་འདུ་བྱེད་ནི་སེམས་ཅན་གྱི་གྲངས་སུ་གཏོགས་པའི་ཕྱིར་ནང་ཡིན་ནོ། །རང་གི་རྒྱུད་ལས་ཕྱི་རོལ་ཡིན་པས་ཕྱི་ཞེས་བྱའོ། །དེ་དག་མི་ཤེས་པས་ནི་ནང་དང་ཕྱི་ལ་ཞེས་བྱ་བར་གྲུབ་པ་ཡིན་ནོ། །ལས་མི་ཤེས་པ་གང་ཞེ་ན། ལས་ཀྱི་བྱེད་པ་པོར་ཚུལ་བཞིན་མ་ཡིན་པར་རྟོགས་པའི་མི་ཤེས་པ་གང་ཡིན་པའོ་ཞེས་བྱ་བ་ནི་ལས་བྱེད་པ་དང་དབང་ཅན་ལ་སོགས་པར་རྟོག་པའོ། །དེ་ལྟ་ནི་དེ་ཚུལ་བཞིན་མ་ཡིན་པར་བརྟགས་པ་ཡིན་ནོ། །དེ་ཡང་འཇིག་ཚོགས་ལ་ལྟ་བས་བསྐྱེད་པའི་ཚུལ་ཁྲིམས་དང་བརྟུལ་ཞུགས་མཆོག་ཏུ་འཛིན་པ་དང། མཚུངས་པར་ལྡན་པའི་མ་རིག་པ་ཡིན་པར་བསྟན་ཏོ། །རྣམ་པར་སྨིན་པ་མི་ཤེས་པ་གང་ཞེ་ན་རྣམ་པར་སྨིན་པས་བསྡུས་པའི་འདུ་བྱེད་རྣམས་ལ་མྱོང་བ་པོ་ཉིད་དུ་ཚུལ་བཞིན་མ་ཡིན་པར་རྟོགས་པའི་མི་ཤེས་པ་གང་ཡིན་པའོ་ཞེས་བྱ་བ་ནི་བདག་སྣ་ཚོགས་པ་ཅན་ལ་ལྟ་བས་མཆོག་ཏུ་བཟུང་ནས་མྱོང་བ་པོ་ཉིད་དུ་རྟོག་པར་བྱེད་ཅེས་བྱ་བའི་ཐ་ཚིག་གོ །ཡང་ན་ཚོར་བའི་རྣམ་པ་ནི་དེ་ལ་ཕན་པ་དང་གནོད་པ་བྱེད་པའི་དབང་དུ་བྱས་ནས་མྱོང་བ་པོ་ཉིད་དུ་རྟོག་པར་བྱེད་ཀྱི་ཚུལ་བཞིན་མ་ཡིན་པར་བརྟགས་པ་ནི་མ་ཡིན་ནོ། །ལས་དང་རྣམ་པར་སྨིན་པ་མི་ཤེས་པ་གང་ཞེ་ན། ལས་དང་དེའི་འབྲས་བུ་ཡང་ཕྱིན་ཅི་ལོག་ཏུ་ཞེས་བྱ་བ་ནི་ཇི་ལྟར་ཕྱིན་ཅི་ལོག་ཅེ་ན། དེའི་ཕྱིར་ཚུལ་བཞིན་མ་ཡིན་པར་རྟོགས་པ་ཞེས་སྨྲས་ཏེ། དེ་ལྟར་ཡིན་ན་དེ་ཕྱིན་ཅི་ལོག་ཏུ་བརྟགས་པ་ཡིན་ཏེ། ཚུལ་བཞིན་མ་ཡིན་པར་ཡིད་ལ་བྱེད་པས་ལོག་པར་བརྟགས་པའི་ཕྱིར་རོ། །ཇི་ལྟར་པར་སིག་ལ་སོགས་པ་དག་མ་ལ་སོགས་པའི་གན་དུ་སོང་བའི་ཕྱིར་མཐོ་རིས་སུ་འགྲོ་བ་ལ་སོགས་པར་རྟོག་པ་བཞིན་ནོ། །དེ་ཡང་ཚུལ་ཁྲིམས་དང་བརྟུལ་ཞུགས་དང་མཚུངས་པར་ལྡན་པ་དང༌། ལོག་པར་ལྟ་བ་དང་མཚུངས་པར་ལྡན་པའི་མ་རིག་པ་ཡང་ཡིན་པར་བསྟན་ཏེ། རྒྱུ་དང་འབྲས་བུ་ཕྱིན་ཅི་ལོག་ཏུ་ལྟ་བ་དང་མཚུངས་པར་ལྡན་པའི་ཕྱིར་རོ།། སངས་རྒྱས་མི་ཤེས་པ་གང་ཞེ་ན། སངས་རྒྱས་རྣམས་ནི་བྱང་ཆུབ་ཡིན་པར་ཡིད་ལ་མི་བྱེད་པའམ། ཕྱིན་ཅི་ལོག་ཏུ་ཡིད་ལ་བྱེད་པའམ། ཞེས་བྱ་བ་ནི་བསྟན་པའི་ཚིག་ཡིན་ནོ། །དེ་ལྟར་ཡིད་ལ་མི་བྱེད་པ་ཡིན་ཞེ་ན། དེའི་ཕྱིར་བག་མེད་པའམ་ཞེས་སྨྲས་ཏེ་བག་མེད་པ་དང་མཚུངས་པར་ལྡན་པའི་
མ་རིག་པ་ཡིན་པར་བསྟན་ཏོ། །ཇི་ལྟར་ཕྱིན་ཅི་ལོག་ཏུ་ཡིད་ལ་བྱེད་ཅེ་ན། ཐེ་ཚོམ་ཟ་བའམ་སྐུར་པ་འདེབས་པ་ཞེས་བྱ་བ་ཡིན་ནོ། །སྔ་མ་བཞིན་ཞེས་བྱ་བ་ནི་ཀུན་ལ་ཡང་ཡིད་ལ་མི་བྱེད་པའམ། ཕྱིན་ཅི་ལོག་ཏུ་ཡིད་ལ་བྱེད་པའམ། བག་མེད་པའམ་ཐེ་ཚོམ་ཟ་བའམ། སྐུར་པ་འདེབས་པའོ་ཞེས་བྱ་བར་སྟོན་ཏོ། །དེ་བཞིན་དུ་ལམ་གྱི་བར་དུ་ཇི་ལྟར་རིགས་པར་བརྗོད་པར་བྱའོ་ཞེས་བྱ་བ་ནི་ཇི་ལྟ་བུ་ཞེ་ན། ཀུན་འབྱུང་ལ་ཀུན་འབྱུང་བར་ཡིད་ལ་མི་བྱེད་པའམ་ཞེས་བྱ་བ་སྔ་མ་བཞིན་ནོ། །འགོག་པ་ལ་འགོག་པར་ཡིད་ལ་མི་བྱེད་པའམ་ཞེས་བྱ་བ་སྔ་མ་བཞིན་ནོ། །ལམ་ལ་ལམ་ཉིད་དུ་ཡིད་ལ་མི་བྱེད་པའམ། ཕྱིན་ཅི་ལོག་ཏུ་ཡིད་ལ་བྱེད་པའམ་ཞེས་བྱ་བ་སྔ་མ་བཞིན་ནོ། །རྒྱུ་མི་ཤེས་པ་གང་ཞེ་ན། རྒྱུ་མེད་པའམ། མི་མཐུན་པ་དབང་ཕྱུག་ལ་སོགས་པ་ཞེས་རྒྱས་པར་འབྱུང་བ་ནི་གལ་ཏེ་རྒྱུ་ཡོད་པ་མ་ཡིན་ནོ་ཞེས་རྒྱུ་མེད་པར་རྟོག་ན་ལོག་པར་ལྟ་བ་དང་མཚུངས་པར་ལྡན་པ་ཡིན་ནོ། །འོན་ཏེ་མི་མཐུན་པ་དབང་ཕྱུག་ལ་སོགས་པ་རྒྱུར་རྟོག་ན་ཚུལ་ཁྲིམས་དང་བརྟུལ་ཞུགས་མཆོག་ཏུ་འཛིན་པ་དང་མཚུངས་པར་ལྡན་པའི་མ་རིག་པ་ཡིན་ནོ། །རྒྱུ་ལ་ཇི་ལྟ་བར་རྒྱུ་ལས་ཡང་དག་པར་བྱུང་བའི་ཆོས་ལ་ཡང་དེ་བཞིན་ནོ་ཞེས་བྱ་བ་ནི་གལ་ཏེ་དེ་དག་རྒྱུ་མེད་པར་བྱུང་བའམ། མི་མཐུན་པའི་རྒྱུ་ལས་བྱུང་བའི་ཆོས་ཡིན་པར་རྟོག་ན་འདི་ཡང་ལོག་པར་ལྟ་བ་དང་མཚུངས་པར་ལྡན་པའི་མ་རིག་པ་ཡིན་པ་བསྟན་ཏེ། རྒྱུ་ལ་སྐུར་པ་འདེབས་པའི་ཕྱིར་རོ། །ཚུལ་ཁྲིམས་དང་བརྟུལ་ཞུགས་མཆོག་ཏུ་འཛིན་པ་དང་མཚུངས་པར་ལྡན་པ་ཡང་ཡིན་ཏེ། རྒྱུ་མ་ཡིན་པ་ལ་རྒྱུར་རྟོག་པའི་ཕྱིར་རོ། །རྒྱུ་དང་འབྲས་བུ་ཕྱིན་ཅི་ལོག་ཏུ་ལྟ་བ་དང་སྐུར་པ་འདེབས་པ་ནི་ལོག་པར་ལྟ་བ་ཡིན་པས་ལོག་པར་ལྟ་བ་དང་མཚུངས་པར་ལྡན་པ་ཉིད་དུ་ཡང་རྟོགས་པ་ཡིན་ནོ། །དེ་དག་ཀྱང་དགེ་བ་ནི་ཁ་ན་མཐོ་བ་མེད་པ་ཉིད་ཡིན་པའི་ཕྱིར་རོ་ཞེས་བྱ་བ་ནི་དེ་དག་རྒྱུ་ལས་ཡང་དག་པར་བྱུང་བའི་ཆོས་ཞེས་བྱ་བའི་དོན་གང་ཡིན་པའོ། །ཁ་ན་མཐོ་བ་མེད་པའི་དོན་ཀྱང་མཁས་པས་བསྔགས་པའི་དོན་གྱི་ཞེས་སྔར་བསྟན་པ་ཡིན་ནོ། །མི་དགེ་བ་ནི་ཁ་ན་མཐོ་བ་དང་བཅས་པ་ཉིད་ཡིན་པའི་ཕྱིར་རོ་ཞེས་བྱ་བ་ནི་མཁས་པས་སྨད་པའི་ཕྱིར་ཞེས་བྱ་བའི་ཐ་ཚིག་གོ །དེ་ལྟ་ན་འདིར་ཚིག་སྔ་མ་གཉིས་ནི་བསྟན་པ་ཡིན་ལ་ཕྱི་མ་གཉིས་ནི་འཆད་པར་འགྱུར་བ་ཡིན་ནོ། །བསྟེན་
པར་བྱ་བ་དང་བསྟེན་པར་བྱ་བ་མ་ཡིན་པ་གཉིས་ནི་བསྟན་པའི་ཚིག་ཡིན་ལ། ངན་པ་དང་གྱ་ནོམ་པ་ཞེས་བྱ་བ་གཉིས་ནི་སོ་སོར་འཆད་པའི་ཚིག་ཡིན་ནོ། །དེ་ལ་གྱ་ནོམ་པ་ཉིད་ཡིན་པའི་ཕྱིར་བསྟེན་པར་བྱ་བ་ཉིད་ཡིན་ནོ། །དེ་ཉིད་ཀྱི་ཕྱིར་ཕན་པ་ཉིད་ཡིན་པའི་ཕྱིར་རོ་ཞེས་བྱ་བ་སྨྲས་སོ། །ངན་པ་ཡིན་པའི་ཕྱིར་བསྟེན་པར་བྱ་བ་མ་ཡིན་པ་ཉིད་ཡིན་པའི་ཕྱིར་རོ། །དེ་ཉིད་ཀྱི་ཕྱིར་མི་ཕན་པ་ཉིད་ཡིན་པའི་ཕྱིར་ཞེས་སྨྲས་སོ། །ཁ་ན་མཐོ་བ་དང་བཅས་པ་དང་ཁ་ན་མཐོ་བ་མེད་པ་ཉིད་ཀྱི་དོན་ནི་རྗོད་པར་བྱེད་དོ། །ཁ་ན་མ་ཐོ་བ་དང་བཅས་པ་ནི་ནག་པོ་ཉིད་ཡིན་པའི་ཕྱིར་རོ་ཞེས་སྨྲས་སོ། །དེ་ལྟར་ན་དེ་ནི་མཁས་པས་སྨད་པ་ཡིན་ནོ། །ཁ་ན་མཐོ་བ་མེད་པ་ནི་དཀར་པོ་ཉིད་ཡིན་པའི་ཕྱིར་རོ། །དེ་ཉིད་ཀྱི་ཕྱིར་དེ་དག་ནི་མཁས་པས་བསྟོད་པ་ཞེས་བྱའོ། །རྣམ་པར་དབྱེ་བའི་ཆ་དང་བཅས་པ་ནི་འདྲེན་མ་ཉིད་ཡིན་པའི་ཕྱིར་རོ་ཞེས་བྱ་བ་ནི་གཉེན་པོ་དང་མི་མཐུན་པའི་ཆ་ནི་རྣམ་པར་དབྱེ་བ་བའི་ཆའོ། །རྣམ་པར་དབྱེ་བའི་ཆ་དང་ལྷན་ཅིག་པ་ནི་རྣམ་པར་དབྱེ་བའི་ཆ་དང་བཅས་པ་སྟེ། མི་མཐུན་པའི་ཕྱོགས་དང་འདྲེས་པ་ཞེས་བྱ་བའི་དོན་གང་ཡིན་པའོ། །རེག་པའི་སྐྱེ་མཆེད་དྲུག་ཡང་དག་པ་ཇི་ལྟ་བ་བཞིན་དུ་ཁོང་དུ་ཆུད་པ་མི་ཤེས་པ་གང་ཞེ་ན། རྟོགས་པ་ལ་ཞེས་རྒྱས་པར་འབྱུང་བ་ནི་རེག་པའི་སྐྱེ་མཆེད་དྲུག་ཡང་དག་པ་ཇི་ལྟ་བ་བཞིན་དུ་ཁོང་དུ་ཆུད་པ་ནི་རྟོགས་པའི་ཆོས་ཀྱི་ནང་དུ་འདུས་པའི་ཕྱིར་རོ། །དེ་ལ་སེམས་ཕྱིན་ཅི་ལོག་རྣམ་པ་དུ་མ་ཡོད་དེ་དེ་བས་ན་མངོན་པའི་ང་རྒྱལ་ཅན་མི་ཤེས་པ་གང་ཡིན་པའོ་ཞེས་སྨྲས་སོ། །མ་རྟོགས་པར་རྟོགས་སོ་སྙམ་པའི་འདུ་ཤེས་གང་ཡིན་པའི་དོན་ཏོ། །མི་ཤེས་པ་དེ་དག་ཐམས་ཅད་མདོར་བསྡུ་ན་ཀུན་དུ་རྨོངས་པ་རྣམ་པ་བདུན་ཏེ་ཞེས་རྒྱས་པར་འབྱུང་བ་ལ་དུས་ལ་རྨོངས་པ་ནི་ཇི་སྐད་དུ་སྔོན་གྱི་མཐའ་མི་ཤེས་པ་ནས་སྔོན་དང་ཕྱི་མའི་མཐའ་ཞེས་བྱ་བའི་བར་དུ་སྨྲས་པ་གང་ཡིན་པའོ། །དངོས་པོ་ལ་ཀུན་དུ་རྨོངས་པ་ནི་ནང་མི་ཤེས་པ་ནས་ནང་དང་ཕྱི་མི་ཤེས་པའི་བར་དུ་སྨྲས་པ་གང་ཡིན་པ་སྟེ། སྐྱེ་མཆེད་དྲུག་ནི་བདག་ཏུ་མངོན་པར་ཞེན་པའི་རྒྱུ་ཡིན་པའི་ཕྱིར་རོ། །འཕོ་བ་ལ་ཀུན་དུ་རྨོངས་པ་ནི་ལས་མི་ཤེས་པ་ཞེས་བྱ་བ་ནས་ལས་དང་རྣམ་པར་སྨིན་པ་མི་ཤེས་པ་ཞེས་གང་སྨྲས་པ་ཡིན་ཏེ། ལས་ཀྱི་རྣམ་པར་སྨིན་པ་འབྱིན་པའི་ཕྱིར་རིས་མཐུན་པ་གཞན་
དུ་འཕོ་བའི་ཕྱིར་རོ། །མཆོག་ལ་ཀུན་དུ་རྨོངས་པ་ནི་སངས་རྒྱས་དང་ཆོས་དང་དགེ་འདུན་མི་ཤེས་པ་ཞེས་གང་སྨྲས་པ་ཡིན་ཏེ། དཀོན་མཆོག་གསུམ་ནི་ཆོས་རྣམས་ཐམས་ཅད་ཀྱི་ཚོགས་ཀྱི་མཆོག་ཡིན་པའི་ཕྱིར་རོ། །སེམས་ཅན་རྣམས་ཀྱི་མཆོག་ནི་སངས་རྒྱས་བཅོམ་ལྡན་འདས་མངོན་པར་རྫོགས་པར་སངས་རྒྱས་པ་ཡིན་ནོ། །དེ་ལ་བརྟེན་ནས་ཆོས་རྣམས་མཆོག་ཡིན་ཏེ། ཆོས་རྣམ་པ་གསུམ་ཆར་ཡང་རྟག་ཏུ་དགེ་བ་ཉིད་ཡིན་པའི་ཕྱིར་དང༌། ངེས་པར་འབྱིན་པ་ཉིད་ཀྱི་ཕྱིར་དང༌། ལེགས་པར་གསུངས་པ་ཉིད་ཀྱི་ཕྱིར་ཏེ། གོ་རིམས་བཞིན་ནོ། །ཚོགས་རྣམས་ཀྱི་མཆོག་ནི་དགེ་འདུན་ཏེ། ཞིབ་ཐོབ་པར་བྱ་བའི་ཕྱིར་ལེགས་པར་ཞུགས་པ་ཡིན་པས་སོ། །དེ་ཁོ་ན་ཉིད་ལ་ཀུན་དུ་རྨོངས་པ་ནི་སྡུག་བསྔལ་མི་ཤེས་པ་ནས་ལམ་མི་ཤེས་པའི་བར་དུ་སྨྲས་པ་གང་ཡིན་པའོ། །སྡུག་བསྔལ་ལ་སོགས་པ་ཕྱིན་ཅི་མ་ལོག་པ་ཡིན་པའི་ཕྱིར་རོ། །ཀུན་ནས་ཉོན་མོངས་པ་དང༌། རྣམ་པར་བྱང་བ་ལ་ཀུན་དུ་རྨོངས་པ་ནི་རྒྱུ་མི་ཤེས་པ་ནས་རྣམ་པར་དབྱེ་བ་དང་བཅས་པའི་རྟེན་ཅིང་འབྲེལ་པར་འབྱུང་བ་ཞེས་བྱ་བའི་བར་དུ་སྨྲས་པ་གང་ཡིན་པ་སྟེ། དེ་ལ་བྱང་ཆུབ་ཀྱི་ཕྱོགས་ཀྱི་མི་མཐུན་པའི་ཕྱོགས་མི་དགེ་བ་ལ་སོགས་པ་ཡིན་ཏེ། ཀུན་ནས་ཉོན་མོངས་པ་ནི་འཁོར་བའི་ཕྱོགས་ཉིད་ཡིན་པའི་ཕྱིར་རོ། །དྲན་པ་ཉེ་བར་གཞག་པ་ལ་སོགས་པ་བྱང་ཆུབ་ཀྱི་ཕྱོགས་རྣམས་ནི་རྣམ་པར་བྱང་བ་ཡིན་ཏེ། མྱ་ངན་ལས་འདས་པའི་ཕྱོགས་ཉིད་ཡིན་པའི་ཕྱིར་རོ། །མངོན་པའི་ང་རྒྱལ་ཅན་ཀུན་དུ་རྨོངས་པ་ཞེས་བྱ་བ་ནི་རེག་པའི་སྐྱེ་མཆེད་དྲུག་ཡང་དག་པ་ཇི་ལྟ་བ་བཞིན་དུ་ཁོང་དུ་ཆུད་པ་མི་ཤེས་པ་གང་ཡིན་པ་ཞེས་སྨྲས་པ་གང་ཡིན་པ་སྟེ། དེ་མངོན་པའི་ང་རྒྱལ་ཅན་ཡིན་པས་དེའི་ཕྱིར་མངོན་པའི་ང་རྒྱལ་ཅན་ཀུན་དུ་རྨོངས་པ་ཞེས་བྱའོ། །མི་ཤེས་པ་ནས་མ་རིག་པ་དང་མུན་པའི་བར་གྱི་མ་རིག་པའི་རྣམ་གྲངས་དྲུག་པོ་དེ་དག་ནི་ཀུན་དུ་རྨོངས་པའི་དངོས་པོ་བདུན་ཡིན་པར་རིག་པར་བྱའོ་ཞེས་བྱ་བ་ཇི་ལྟར་ཡིན་ཞེ་ན། དེའི་ཕྱིར་ཀུན་དུ་རྨོངས་པའི་དངོས་པོ་ཐ་མ་གཉིས་གཅིག་ཏུ་བྱས་པ་ནི་ཀུན་ནས་ཉོན་མོངས་པ་དང་རྣམ་པར་བྱང་བ་ལ་ཀུན་དུ་རྨོངས་པའི་དངོས་པོ་དང་མངོན་པའི་ང་རྒྱལ་གྱི་ཀུན་དུ་རྨོངས་པ་ཡིན་ནོ། །དེའི་ཕྱིར་བསམ་པ་མི་ཤེས་པས་ན། དེར་མ་རིག་པ་དང་མུན་པའི་རྣམ་པའི་རྣམ་གྲངས་གཉིས་ཡིན་པར་བལྟ་བར་
བྱའོ་ཞེས་བྱ་སྟེ། ཀུན་དུ་རྨོངས་པའི་དངོས་པོ་དེའི་ནང་དུ་དེ་དག་གང་ཡིན་པ་གཅིག་ཏུ་བྱ་བའི་ཐ་ཚིག་གོ །དེ་ལྟར་བྱས་ན་དུས་ལ་ཀུན་དུ་རྨོངས་པ་ནི་མི་ཤེས་པའི་སྒྲས་བསྟན་ཏོ། །དངོས་པོ་ལ་ཀུན་དུ་རྨོངས་པ་ནི་མི་མཐོང་བའི་སྒྲས་སོ། །འཕོ་བ་ལ་ཀུན་དུ་རྨོངས་པ་ནི་མངོན་པར་མི་རྟོགས་པའི་སྒྲས་སོ། །མཆོག་ལ་ཀུན་དུ་རྨོངས་པ་ནི་རྨོངས་པའི་སྒྲས་སོ། །དེ་ཁོ་ན་ཉིད་ལ་རྨོངས་པ་ནི་ཀུན་དུ་རྨོངས་པའི་སྒྲས་སོ། །ཀུན་དུ་ཉོན་མོངས་པ་དང་རྣམ་པར་བྱང་བ་ལ་ཀུན་དུ་རྨོངས་པ་དང་མངོན་པའི་ང་རྒྱལ་ཅན་གྱི་ཀུན་དུ་རྨོངས་བ་ནི་མ་རིག་པ་དང་མུན་པའི་རྣམ་པའི་སྒྲ་ཡིན་ཏེ། དེ་ཉིད་ཀྱི་ཕྱིར་འདིར་རྣམ་གྲངས་གཉིས་གཅིག་ཏུ་བྱས་པ་ཡིན་ནོ། །རྣམ་གྲངས་གཞན་ཡང་མཉན་པ་དང་བསམས་པ་དང་ཞེས་རྒྱས་པར་འབྱུང་བ་ནི་མཉན་པ་དང༌། བསམས་པ་དང༌། བསྒོམས་པ་ལས་བྱུང་བའི་ཤེས་རབ་རྣམས་ཀྱི་མི་མཐུན་པའི་ཕྱོགས་ནི་རྣམ་གྲངས་གསུམ་གོ་རིམས་བཞིན་དུ་མི་ཤེས་པ་དང་མི་མཐོང་བ་དང་མངོན་པར་མི་རྟོགས་པ་ཞེས་བྱ་བ་ཡིན་ནོ། །དེའི་མི་མཐུན་པའི་ཕྱོགས་སུ་གྱུར་པ་དེ་དག་ནི་ཆུང་དུ་དང་འབྲིང་དང་ཆེན་པོའི་བྱེ་བྲག་ཡིན་པའི་ཕྱིར་གཞན་ཡང་གསུམ་མོ་ཞེས་བྱ་བ་ནི་རྨོངས་པ་དང༌། ཀུན་དུ་རྨོངས་པ་དང༌། མ་རིག་པ་དང་མུན་པའི་རྣམ་པ་ཞེས་བྱ་བ་ཡིན་ཏེ། ཆུང་དུ་གང་ཡིན་པ་དེ་ནི་རྨོངས་པའི་སྒྲས་བསྟན་ཏོ། །འབྲིང་གང་ཡིན་པ་དེ་ནི་ཀུན་དུ་རྨོངས་པའི་སྒྲས་སོ། །ཆེན་པོ་གང་ཡིན་པ་དེ་ནི་མ་རིག་པ་དང་མུན་པའི་རྣམ་པའི་སྒྲས་སོ། །འདི་ལྟར་རྨོངས་པའི་ཚེ་ནི་མ་ངེས་པ་ཅུང་ཟད་ཅིག་མཐོང་ངོ༌། །ཀུན་དུ་རྨོངས་པས་ནི་ཕྱིན་ཅི་ལོག་ཏུ་མཐོང་ངོ༌། །མུན་པའི་རྣམ་བས་ནི་ཅི་ཡང་མི་མཐོང་སྟེ། མུན་པའི་རྣམ་པ་བཞིན་དུ་བྱེད་པ་ནི་མུན་པ་བཞིན་ཡིན་པའི་ཕྱིར་རོ། །མི་མཐུན་པའི་ཕྱོགས་རབ་ཏུ་དབྱེ་བ་དང༌། ངོ་བོ་ཉིད་རབ་ཏུ་དབྱེ་བས་ཀྱང་རྣམ་གྲངས་དྲུག་ཡིན་པར་རིག་པར་བྱའོ་ཞེས་བྱ་བ་དེ་ལ་མི་མཐུན་པའི་ཕྱོགས་རབ་ཏུ་དབྱེ་བ་ནི་མཉན་པ་དང་བསམས་པ་དང་བསྒོམས་པ་ལས་བྱུང་བའི་ཤེས་རབ་ཀྱི་མི་མཐུན་པའི་ཕྱོགས་ཡིན་པའི་ཕྱིར་རོ། །ངོ་བོ་ཉིད་རབ་ཏུ་དབྱེ་བ་ནི་ཆུང་དུ་དང་འབྲིང་དང་ཆེན་པོའི་བྱེ་བྲག་གིས་སོ། །དང་པོ་བྱེ་བྲག་རྣམ་པར་འབྱེད་པའི་ཆོས་ཀྱི་རྣམ་གྲངས་ལས་ཀྱང་ཞེས་རྒྱས་པར་འབྱུང་བ་ལ། རྣམ་པ་ཐམས་ཅད་དུ་འཇུག་པའི་རྟེན་སྦྱིན་པའི་ལས་ཅན་གྱི་མ་རིག་པ་ཞེས་བྱ་བ་ལ། རྣམ་པ་
ཐམས་ཅད་དུ་ཞེས་བྱ་བ་ནི་རྣམ་པ་ཀུན་དུའོ། །འཇུག་པ་ནི་འོད་བ་དང་འགྲོ་བའི་དངོས་པོའོ། །རྟེན་སྦྱིན་པའི་ལས་ཅན་ནི་རྒྱུའི་དངོས་པོའོ། །ཀུན་དུ་སྦྱིན་པའི་ལས་བྱེད་པ་སྟེ། རྣམ་པ་ཐམས་ཅད་དུ་འཇུག་པའི་རྟེན་སྦྱིན་པའི་ལས་འདི་ལ་ཡོད་པས་དེ་ནི་རྣམ་པ་ཐམས་ཅད་འཇུག་པའི་རྟེན་སྦྱིན་པའི་ལས་ཅན་གྱི་མ་རིག་པའོ། །རྣམ་པ་ཐམས་ཅད་དུ་ལྡོག་པའི་བར་དུ་གཅོད་པའི་ལས་ཅན་ཞེས་བྱ་བ་ལ། ལྡོག་པ་ནི་འདིར་འཁོར་བ་ལྡོག་པ་ཡིན་པར་རིག་པར་བྱའོ། །ཇི་སྐད་དུ་འཇུག་པའི་གཉེན་པོའི་སྒོ་ནས་སོ་ཞེས་གསུངས་སོ། །བར་དུ་གཅོད་པ་ནི་མི་མཐུན་པ་དང་གགས་བྱེད་པ་ཞེས་བྱ་བའི་དོན་གང་ཡིན་པའོ། །རྣམ་པ་ཐམས་ཅད་ལྡོག་པ་དག་གི་བར་དུ་གཅོད་པ་ནི་རྣམ་པ་ཐམས་ཅད་དུ་ལྡོག་པའི་བར་དུ་གཅོད་པའོ། །དེའི་ལས་གང་ཡིན་པ་འདི་ལ་ཡོད་པས་རྣམ་པ་ཐམས་ཅད་དུ་ལྡོག་པའི་བར་དུ་གཅོད་པའི་ལས་ཅན་ནོ།། །།རྟེན་ཅིང་འབྲེལ་པར་འབྱུང་བ་དང་པོ་དང་རྣམ་པར་དབྱེ་བ་བསྟན་པ་རྒྱ་ཆེར་བཤད་པ། བམ་པོ་བཞི་པ། བཙུན་པ་གང་ལ་འཇུག་ཅེས་རྒྱས་པར་འབྱུང་བ་ལ། དགེ་སློང་དག་བདག་ཏུ་རྣམ་པར་རྟོག་པས་དུས་ལ་འཇུག་གོ་ཞེས་བྱ་བ་ནི་བདག་གོ་ཞེས་དེའི་སྒོ་ནས་རྣམ་པར་རྟོག་པའོ། །དེ་ཇི་ལྟ་བུ་ཞེ་ན། འདས་པའི་དུས་སུ་བྱུང་བ་ཞིག་གམ་འོན་ཏེ་མ་བྱུང་བ་ཞིག་ཅེས་རྒྱས་པར་འབྱུང་བ་ཡིན་ནོ། །འདིའི་བཤད་པ་ཡང་འོག་ནས་དེ་ལ་འཆད་པར་བྱེད་པ་བདག་ཇི་ལྟར་རྣལ་འབྱོར་སྤྱོད་པའི་ས་ལས་འབྱུང་བ་བཞིན་ཞེས་རྒྱས་པར་འབྱུང་བའོ། །བཙུན་པ་གང་འཇུག་ཅེ་ན། དགེ་སློང་དག་བདག་ཏུ་འཛིན་པས་ནང་དང་ཕྱིའི་སྐྱེ་མཆེད་ལའོ་ཞེས་བྱ་བ་ནི་དེ་ལ་མངོན་པར་ཞེན་པའི་ཕྱིར་རོ། །འདི་ཡང་ནང་ལ་སོགས་པ་ལ་ནི་ཞེས་རྒྱས་པར་འབྱུང་བས་འདིའི་བཤད་པ་དེ་མ་ཐག་ཏུ་བྱེད་པར་འགྱུར་རོ། །བཙུན་པ་ཇི་ལྟར་འཇུག་ཅེ་ན། དགེ་སློང་དག་བདག་ཏུ་རྣམ་པར་རྟོག་པ་དང༌། ལོག་པར་ཡོངས་སུ་རྟོག་པ་ལས་དང་རྣམ་པར་སྨིན་པའི་རྒྱུན་འཇུག་པའི་ཕྱིར་རོ་ཞེས་བྱ་བ་ནི་ལས་དང་རྣམ་པར་སྨིན་པ་གཉིས་ཀྱི་རྒྱུན་ནི་ལས་དང་རྣམ་པར་སྨིན་པའི་རྒྱུན་ནོ། །ལས་ལས་རྣམ་པར་སྨིན་པའོ། །ཡང་ལས་སོ། །དེ་ལས་ཡང་རྣམ་པར་སྨིན་པའོ། །ཇི་ལྟར་ལས་དང་རྣམ་པར་སྨིན་པའི་རྒྱུན་འཇུག་ཅེ་ན། བདག་ཏུ་རྣམ་པར་རྟོག་པ་སྟེ་ལས་
ཀྱི་ཚེ་དེའི་བྱེད་པ་པོ་བདག་ཡིན་པར་རྟོག་པར་བྱེད་དོ། །རྣམ་པར་སྨིན་པའི་ཚེ་ནི་མྱོང་བ་པོར་རོ། །ལོག་པར་ཡོངས་སུ་རྟོག་པས་ཞེས་བྱ་བ་ནི་གཞན་གྱི་ལས་ཀྱིས་གཞན་གྱི་རྣམ་པར་སྨིན་པ་ཡིན་པར་རྟོག་པའི་ཕྱིར་འདི་ནི་ལས་རྣམ་པར་སྨིན་པ་མི་ཤེས་པ་ཡིན་ནོ། །བཙུན་པ་རྣམ་པ་ཐམས་ཅད་དུ་ལྡོག་པ་གང་ཞེ་ན་ཞེས་རྒྱས་པར་འབྱུང་བ་ལ། ལྡོག་པའི་རྟེན་དང་ཞེས་བྱ་བ་ནི་སངས་རྒྱས་མི་ཤེས་པ་དང༌། ཆོས་དང་དགེ་འདུན་ལ་ཞེས་གང་སྨྲས་པ་ཡིན་ཏེ། དཀོན་མཆོག་གསུམ་ལ་བརྟེན་ནས་ལོག་པར་འབྱུང་བ་ཡིན་ནོ། །ལྡོག་པའི་དམིགས་པ་དང་ཞེས་བྱ་བ་ནི་སྡུག་བསྔལ་མི་ཤེས་པ་དང་ཞེས་བྱ་བ་ནས་ལམ་གྱི་བར་ལ་ཡིན་ཏེ། ལྡོག་པའི་གཉེན་པོའི་མཚན་ཉིད་ཀྱི་ཡུལ་ནི་འཕགས་པའི་བདེན་པ་ཡིན་པའི་ཕྱིར་རོ། །ལྡོག་པའི་ཡིད་ལ་བྱེད་པ་དང་ཞེས་བྱ་བ་ནི་ལྡོག་པའི་ཡིད་ལ་བྱེད་པ་ནི་དེ་མ་ཐག་ཏུ་འཆད་པར་འགྱུར་རོ། །ལྡོག་པའི་འབྲས་བུ་འགྲུབ་བས་ཀྱང་ཞེས་བྱ་བ་ནི་རེག་པའི་སྐྱེ་མཆེད་དྲུག་ཡང་དག་པ་ཇི་ལྟ་བ་བཞིན་དུ་ཁོང་དུ་ཆུད་པ་ཞེས་གང་སྨྲས་པ་ཡིན་ཏེ། ལྡོག་པ་ཉིད་འབྲས་བུ་ཡིན་པས་ལྡོག་པའི་འབྲས་བུའོ། །དེ་འགྲུབ་པ་ནི་ལྡོག་པའི་འབྲས་བུ་འགྲུབ་པ་སྟེ། དེ་སྐྱེ་བ་ཞེས་བྱ་བའི་དོན་གང་ཡིན་པའོ། །དེ་ལྟར་བྱས་ན་རྟེན་གང་གིས་དང་དམིགས་པ་གང་གིས་དང༌། ཡིད་ལ་བྱེད་པ་གང་གིས་འཁོར་བ་ལས་ལྡོག་པ་དེ་ནི་ལྡོག་པ་ཡིན་ནོ་ཞེས་བསྟན་ཏོ། །བཙུན་པ་གང་དུ་འཇུག་ཅེས་རྒྱས་པར་འབྱུང་བ་གང་ཡིན་པ་འདིའི་བཤད་པ་ནི་དེ་མ་ཐག་ཏུ་ཕྱིས་བྱེད་པར་འགྱུར་རོ་ཞེས་སྨྲས་པ་གང་ཡིན་པ་དེ་ལ་བཤད་པ་ནི་འདི་ཡིན་ཏེ། དེ་ལ་ཡང་འཆད་པར་བྱེད་པ་དག་ཇི་ལྟར་རྣལ་འབྱོར་སྤྱོད་པའི་ས་ལས་འབྱུང་བ་བཞིན་དུས་མི་ཤེས་པ་ཡིན་ནོ་ཞེས་བརྗོད་དོ་ཞེས་བྱ་བ་ཡིན་ཏེ་རྣལ་འབྱོར་སྤྱོད་པའི་ས་ལས་ཇི་ལྟ་བུས་འབྱུང་ཞེ་ན། སྔོན་གྱི་མཐའ་མི་ཤེས་པ་གང་ཞེ་ན། འདས་པའི་འདུ་བྱེད་རྣམས་ལ་ཚུལ་བཞིན་མ་ཡིན་པར་རྟོག་ཅིང། ཅི་བདག་འདས་པའི་དུས་ན་བྱུང་བ་ཞིག་གམ་ཞེས་བྱ་བ་ལ་སོགས་པའི་མི་ཤེས་པ་གང་ཡིན་པའོ། །ཕྱི་མའི་མཐའ་མི་ཤེས་པ་གང་ཞེ་ན། མ་འོངས་པའི་འདུ་བྱེད་རྣམས་ལ་ཚུལ་བཞིན་མ་ཡིན་པར་རྟོག་ཅིང༌། ཅི་མ་འོངས་པའི་དུས་ན་འབྱུང་བར་འགྱུར་རམ་ཞེས་བྱ་བ་ལ་སོགས་པའི་
མི་ཤེས་པ་གང་ཡིན་པའོ། །སྔོན་གྱི་མཐའ་དང་ཕྱི་མའི་མཐའ་མི་ཤེས་པ་གང་ཞེ་ན། ནང་ལ་ཚུལ་བཞིན་མ་ཡིན་པར་ཇི་ལྟ་བུ་ཞིག་ཏུ་འདུག་པ་གང་ཡིན། ཕྱིས་གང་ཞིག་འབྱུང༌། སེམས་ཅན་འདི་གང་ནས་འོངས། འདི་ནས་ཤི་ནས་གང་དུ་འགྲོ་བར་འགྱུར་ཞེས་བྱ་བ་ལ་སོགས་པའི་མི་ཤེས་པ་གང་ཡིན་པའོ། །བཙུན་པ་གང་འཇུག་ཅེ་ན་ཞེས་བྱ་བ་འདིའི་བཤད་པ་ནི་དེ་མ་ཐག་ཏུ་བྱེད་པར་འགྱུར་རོ་ཞེས་འབྱུང་བ་དེ་ལ། ནང་ལ་སོགས་པ་ལ་ནི་ཞེས་རྒྱས་པར་འབྱུང་བ་ནི་འཆད་པར་བྱེད་པ་ཡིན་ནོ། །ནང་དང་ཕྱིའི་སྐྱེ་མཆེད་ཀྱི་དབྱེ་བས་དང་ཞེས་བྱ་བ་ལ་ནང་གི་མིག་ལ་སོགས་པ་མི་ཤེས་པ་དེ་ནི་ནང་མི་ཤེས་པའོ། །གཟུགས་ལ་སོགས་པའི་ཕྱིའི་སྐྱེ་མཆེད་མི་ཤེས་པ་གང་ཡིན་པ་དེ་ནི་ཕྱི་མི་ཤེས་པའོ། །ནང་གི་སྐྱེ་མཆེད་ཀྱི་གནས་ཀྱི་དབྱེ་བས་སོ་ཞེས་བྱ་བ་དེ་ནི་ནང་དང་ཕྱི་མི་ཤེས་པ་ཡིན་ཏེ། དེའི་གནས་ཀྱང་མིག་ལ་སོགས་པའི་རྟེན་ཡིན་ནོ། །དེ་ཡང་ནང་གི་སྐྱེ་མཆེད་ཀྱིས་མ་བསྡུས་པའི་ཕྱིར་ཕྱི་ཡིན་ལ་དེ་དང་ཐ་མི་དད་ཅིང་ཟིན་པ་ཡིན་པའི་ཕྱིར་ནང་ཞེས་བྱ་བའོ། །ལྡོག་པའི་ཡིད་ལ་བྱེད་པ་ནི་དེ་མ་ཐག་ཏུ་འཆད་པར་འགྱུར་རོ་ཞེས་བྱ་བ་གང་ཡིན་པ་དེ་བརྗོད་པ་ནི་ལྡོག་པའི་ཡིད་ལ་བྱེད་པ་ནི་རྒྱུ་དང་རྒྱུ་ལས་བྱུང་བའི་ཆོས་རྣམས་ལའོ། །རྒྱུ་ལས་བྱུང་བའི་ཆོས་དེ་ལ་ཡང་དགེ་བ་ནི་མ་རིག་པའི་གཉེན་པོའི་དོན་ཡིན་གྱིས་ཏེ། རེ་ཞིག་པ་དང་གཏན་དུ་བ་ནི་ཟག་པ་དང་བཅས་པ་དང་ཟག་པ་མེད་པའི་བྱེ་བྲག་གིས་ཏེ། མ་སྨད་པ་དང་ཞི་བའི་ཁོངས་སུ་གཏོགས་པའི་ཕྱིར་དང་གནོད་པ་སེལ་བའི་དོན་གྱིས་སོ། །མི་དགེ་བ་ནི་དེའི་མི་མཐུན་པའི་ཕྱོགས་ཀྱི་དོན་གྱིས་སོ་ཞེས་བྱ་བ་ནི་དགེ་བའི་མི་མཐུན་པའི་ཕྱོགས་ཀྱི་དོན་གྱིས་ཞེས་བྱ་བའི་དོན་གང་ཡིན་པའོ། །དགེ་བ་དེ་དག་ཀྱང་འདི་ལས་ཕྱི་རོལ་པ་རྣམས་ཀྱི་ནི་ཁ་ན་མཐོ་བ་དང་བཅས་པ་ཡིན་ནོ་ཞེས་བྱ་བ་ནི་ཟག་པ་དང་བཅས་པ་ཡིན་པའི་ཕྱིར་རོ། །དེ་ལས་གཞན་བ་ནི་འདྲེན་པ་ཡིན་པའི་ཕྱིར་རྣམ་པར་དབྱེ་བ་དང་བཅས་པའོ་ཞེས་བྱ་བ་ལ་ནག་པོ་ནི་དཀར་པོ་ལས་ཞེས་བྱ་བའི་ཐ་ཚིག་སྟེ། མི་དགེ་བ་ལ་སོགས་པ་ནི་ནག་པོའོ། །ཟག་པ་མེད་པ་ནི་དཀར་པོའོ། །དེ་ལས་གཞན་དགེ་བ་ཟག་པ་དང་བཅས་པ་དེ་དག་ནི་དགེ་བ་ཟག་པ་དང་བཅས་པ་ཉིད་ཀྱིས་ན། འདྲེན་མ་ཡིན་པའི་ཕྱིར་རྣམ་པར་དབྱེ་བ་དང་བཅས་པའོ། །ཐམས་ཅད་ཀྱང་རྟེན་ཅིང་
འབྲེལ་པར་འབྱུང་བ་ཡིན་པའི་ཕྱིར་རྟེན་ཅིང་འབྲེལ་བར་འབྱུང་བ་ཞེས་བྱའོ་ཞེས་བྱ་བ་དེ་དག་ནི་དགེ་བ་དང་མི་དགེ་བ་ལ་སོགས་པ་ཇི་སྐད་དུ་གསུངས་པ་རྣམས་ཡིན་ནོ། །དེ་ཉིད་ལས་ཀྱང་ཞེས་བྱ་བ་ནི་དང་པོའི་བྱེ་བྲག་རྣམ་པར་འབྱེད་པའི་ཆོས་ཀྱི་རྣམ་གྲངས་ལས་སོ། །དགེ་སློང་དག་དབང་པོ་ལྔ་ཞེས་བྱ་བ་ནི་དད་པ་དང༌། བརྩོན་འགྲུས་དང༌། དྲན་པ་དང༌། ཏིང་ངེ་འཛིན་དང༌། ཤེས་རབ་ཀྱི་དབང་པོ་རྣམས་སོ། །དད་པ་དང༌། བརྩོན་འགྲུས་དང༌། དྲན་པ་དང༌། ཏིང་ངེ་འཛིན་དང༌། ཤེས་རབ་ཀྱི་དབང་པོ་རྣམས་ཀྱི་ནང་ནས་འདི་ནི་བླང་བར་བྱ་བ་ཞེས་བྱ་བ་ནི་བསྟན་པར་བྱ་བ་སྟེ། དེའི་མི་མཐུན་པའི་ཕྱོགས་ཟིལ་གྱིས་མནོན་པའི་ཕྱིར་རོ། །འདི་ནི་བསྟེན་པར་བྱ་བ་སྟེ་ཞེས་བྱ་བ་ནི་ཡོད་པར་བྱ་བ་ཡིན་ཏེ། འདི་ལྟ་སྟེ་ཤེས་རབ་ཀྱི་དབང་པོའོ། །དེའི་མི་མཐུན་པའི་ཕྱོགས་ནི་མ་རིག་པ་ཡིན་ཏེ་ཞེས་བྱ་བ་ནི་མ་རིག་པ་ནི་མི་མཐུན་པའི་ཕྱོགས་ཀྱི་མཚན་ཉིད་ཡིན་པས་རྩ་བའི་མ་རིག་པ་ཉིད་ཡིན་པར་བསྟན་ཏོ། །བཙུན་པ་ཇི་ལྟར་རྒྱ་ཆེན་པོའི་ཆོས་ཀྱི་མི་མཐུན་པའི་ཕྱོགས་མ་རིག་པ་ལགས་ཞེས་རྒྱས་པར་འབྱུང་བ་དེ་ལ་ཐོས་པ་ལས་བྱུང་བའི་ཤེས་པ་གང་ཡིན་པའི་མི་མཐུན་པའི་ཕྱོགས་མ་རིག་པ་དེ་ནི་མི་ཤེས་པའི་སྒྲས་བསྟན་ཏོ། །བསམས་པ་ལས་བྱུང་བའི་གང་ཡིན་པ་དེ་ནི་མི་མཐོང་བའི་སྒྲས་སོ། །བསྒོམས་པ་ལས་བྱུང་བའི་གང་ཡིན་པ་དེ་ནི། མངོན་པར་མི་རྟོགས་པའི་སྒྲས་སོ། །བཙུན་པ་མ་རིག་པ་དང་རྗེས་སུ་འབྲེལ་པའི་བྱེ་བྲག་གང་ལགས་ཞེས་རྒྱས་པར་འབྱུང་བས་ནི་མ་རིག་པ་དང་རྗེས་སུ་འབྲེལ་པའི་བྱེ་བྲག་ཁོ་ན་སྟོན་ཏོ། །དེ་ནི་དུམ་བུར་མ་བྱས་པ། གསོང་ལྡོར་དུ་མ་བྱས་པ། བག་ལ་ཉལ་དང་རྗེས་སུ་འབྲེལ་པ་ཡིན་ནོ་ཞེས་བྱ་བ་ནི་མི་ཤེས་པ་དེ་ཡིན་ཏེ། དེ་ལ་དུམ་བུར་མ་བྱས་པ་ནི་མཐོང་བའི་ལམ་གྱིས་བཤིག་པ་མ་ཡིན་པའི་ཕྱིར་རོ། །གསོང་ལྡོར་དུ་མ་བྱས་པ་ནི་བསྒོམ་པའི་ལམ་གྱིས་མ་བཅོམ་པའི་ཕྱིར་རོ། བག་ལ་ཉལ་རྗེས་སུ་འབྲེལ་པ་ནི་ས་བོན་དང་རྗེས་སུ་འབྲེལ་པ་ཞེས་བྱ་བའི་ཐ་ཚིག་གོ །གང་ཡང་བདེ་འགྲོ་དང་ངན་འགྲོའི་ཞེས་བྱ་བ་རྒྱས་པར་འབྱུང་བ་ལ། བདེ་འགྲོའི་རྒྱུ་དང་འབྲས་བུ་རྣམ་པར་དབྱེ་བ་མི་ཤེས་པ་དང༌། ངན་འགྲོའི་རྒྱུ་དང་འབྲས་བུ་རྣམ་པར་དབྱེ་བ་མི་ཤེས་པ་གང་ཡིན་པ།
དེ་ཡང་ཤིན་ཏུ་ཆུང་བ་ནི་གཟུགས་མེད་པ་ན་སྤྱོད་པའི་སེམས་ཅན་རྣམས་ཀྱི་སྟེ། རྨོངས་པའི་སྒྲས་བསྟན་ཏོ། །བར་མ་ནི་གཟུགས་ན་སྤྱོད་པ་རྣམས་ཀྱི་སྟེ། ཀུན་དུ་རྨོངས་པའི་སྒྲས་སོ། །ཆེན་པོ་ནི་འདོད་པ་ན་སྤྱོད་པའི་སེམས་ཅན་རྣམས་ཀྱི་སྟེ། མ་རིག་པ་དང་མུན་པའི་རྣམ་པའི་སྒྲས་བསྟན་ཏོ། །དེ་དག་ནི་མི་མཐུན་པའི་ཕྱོགས་ཀྱི་རབ་ཏུ་དབྱེ་བ་དང་ཁམས་ཀྱི་རབ་ཏུ་དབྱེ་བས་ཀྱང་རྣམ་གྲངས་དྲུག་ཡིན་ནོ། །མ་རིག་པའི་དོན་བསྡུས་པ་ཡང༌། འདིར་རྣམ་པ་བཅུར་རྣམ་པར་གཞག་པར་བསྟན་ཏེ། རང་གི་རིགས་རྐྱེན་དུ་གཞག་པ་ནི་ཇི་སྐད་དུ་རང་གི་རིགས་ཀྱི་རྐྱེན་ལས་མ་རིག་པ་ཡིན་ནོ་ཞེས་བསྟན་པ་ཡིན་ནོ། །གཞན་རིགས་རྐྱེན་དུ་རྣམ་པར་གཞག་པ་ནི་ཇི་སྐད་དུ་རང་གི་རིགས་གཅིག་ལས་གཅིག་འབྱུང་བས་ན་ཚུལ་བཞིན་མ་ཡིན་པར་ཡིད་ལ་བྱེད་པ་ལ་སོགས་པས་ལྷག་པར་རྒྱས་པར་འབྱུང་བར་བྱེད་དོ་ཞེས་བསྟན་པ་ཡིན་ནོ། །འདུ་བྱེད་ཀྱི་རྐྱེན་དུ་རྣམ་པར་གཞག་པ་ནི་ཇི་སྐད་དུ་མ་རིག་པའི་རྐྱེན་གྱིས་འདུ་བྱེད་ཅེས་བསྟན་པ་ཡིན་ནོ། །མི་མཐུན་པའི་ཕྱོགས་ཀྱི་མཚན་ཉིད་རྣམ་པར་གཞག་པ་ནི་ཇི་སྐད་དུ་རིག་པའི་མི་མཐུན་པའི་ཕྱོགས་ཆོས་གཞན་མ་རིག་པ་ཡིན་ནོ་ཞེས་བསྟན་པ་ཡིན་ནོ། །རབ་ཏུ་དབྱེ་བ་རྣམ་པར་གཞག་པ་ནི་ཇི་སྐད་དུ་སྔོན་གྱི་མཐའ་མི་ཤེས་པ་ནས་རེག་པའི་སྐྱེ་མཆེད་དྲུག་ཡང་དག་པ་ཇི་ལྟ་བ་བཞིན་དུ་ཁོང་དུ་ཆུད་པར་ཞེས་བྱ་བའི་བར་དུ་བསྟན་པ་ཡིན་ནོ། །རྣམ་གྲངས་རྣམ་པར་གཞག་པ་ཇི་སྐད་དུ་མི་ཤེས་པ་དང་མི་མཐོང་བ་དང༌། མངོན་པར་མི་རྟོགས་པ་དང༌། རྨོངས་པ་དང་ཀུན་དུ་རྨོངས་པ་དང༌། མ་རིག་པ་དང་མུན་པའི་རྣམ་པ་ཞེས་བྱ་བར་བསྟན་པ་ཡིན་ནོ། །རྣམ་པ་རྣམ་པར་གཞག་པ་ནི་དེ་ཡང་རྣམ་པ་གཉིས་ཏེ། མི་མཐོང་བར་བྱེད་པའི་རྣམ་པ་རྣམ་པར་གཞག་པ་ནི་མུན་པའི་རྣམ་གྲངས་ཀྱིས་བསྟན་ཏོ། །ཕྱིན་ཅི་ལོག་གི་རྣམ་པ་རྣམ་པར་གཞག་པ་ནི་ཡིད་གཉིས་དང༌། བློ་མེད་པ་དང༌། བློ་ངན་པའི་ཉོན་མོངས་པ་དང༌། མཚུངས་པར་ལྡན་པ་ཡིན་པར་རྣམ་གྲངས་གསུམ་གྱིས་བསྟན་ཏོ། །མི་མཐུན་པའི་ཕྱོགས་རབ་ཏུ་དབྱེ་བ་རྣམ་པར་གཞག་པ་ནི་ཇི་སྐད་དུ་མཉན་པ་དང༌། བསམས་པ་དང༌། བསྒོམས་པ་ལས་བྱུང་བའི་ཤེས་རབ་ཀྱི་མི་མཐུན་པའི་ཕྱོགས་རྣམ་གྲངས་གསུམ་སྟེ། མི་ཤེས་པ་དང༌། མི་མཐོང་བ་དང༌། །མངོན་པར་
མ་རྟོགས་པ་ཞེས་བསྟན་པ་ཡིན་ནོ། །ངོ་བོ་ཉིད་རྣམ་པར་གཞག་པ་ནི་ཇི་སྐད་དུ་དེ་དག་ཉིད་ཀྱི་མི་མཐུན་པའི་ཕྱོགས་སུ་གྱུར་བ་ནི་ཆུང་ངུ་དང་འབྲིང་དང་ཆེན་པོར་རབ་ཏུ་དབྱེ་བ་གཞན་གསུམ་ཡིན་ཏེ། འདི་ལྟ་སྟེ་རྨོངས་པ་དང༌། མ་རིག་པ་དང༌། མུན་པའི་རྣམ་པ་ཞེས་བྱ་བ་བསྟན་པ་ཡིན་ནོ། །བྱེད་པར་རྣམ་པར་གཞག་པ་ནི་ཇི་སྐད་དུ་སྔོན་གྱི་མཐའ་ལ་སོགས་པ་མི་ཤེས་པ་ནི་བདག་ཏུ་འཛིན་པ་དང་རྗེས་སུ་མཐུན་པ་དང༌། དེ་ལས་གྲོལ་བའི་བགེགས་བྱེད་པ་ཉིད་ཀྱིས་ན་གཏན་ཚིགས་གཉིས་ཀྱིས་རིག་པར་བྱ་སྟེ། ཇི་སྐད་དུ་རྣམ་པ་ཐམས་ཅད་དུ་འཇུག་པའི་རྟེན་སྦྱིན་པའི་ལས་ཅན་གྱི་མ་རིག་པ་དང༌། རྣམ་པ་ཐམས་ཅད་དུ་ལྡོག་པའི་བར་དུ་གཅོད་པའི་ལས་ཅན་ཞེས་བསྟན་པ་ཡིན་ནོ། །མ་རིག་པའི་རྣམ་པར་དབྱེ་བ་རྫོགས་སོ།། །།མ་རིག་པའི་རྐྱེན་གྱིས་འདུ་བྱེད་ཅེས་བྱ་བའི་འདུ་བྱེད་གང་ཞེ་ན་ཞེས་བྱ་བའི་འདུ་བྱེད་ཀྱི་སྒྲ་འདི་ཡང་འདུས་བྱས་ཐམས་ཅད་ལ་ཡང་མཐོང་སྟེ། འདུ་བྱེད་ཐམས་ཅད་མི་རྟག་ཅེས་བྱའོ། །དེའི་ཕྱོགས་གཅིག་ལ་ཡང་མཐོང་སྟེ། འདུ་བྱེད་ཀྱི་ཕུང་པོ་ཇི་ལྟ་བ་བཞིན་ནོ། །སེམས་པ་ལ་ཡང་མཐོང་སྟེ། འདུ་བྱེད་ཀྱི་ཉེ་བར་ལེན་པའི་ཕུང་པོ་གང་ཞེ་ན། སེམས་པའི་ཆོག་དྲུག་གོ་ཞེས་བྱ་བའོ། །གཟུགས་ཀྱི་ཕུང་པོའི་ཕྱོགས་གཅིག་ལ་ཡང་མཐོང་སྟེ། ཇི་ལྟར་དབུགས་རྒྱུ་བ་དང༌། རྔུབ་པ་གཉིས་སོ། །རྣམ་པར་རྟོག་པ་དང༌། རྣམ་པར་དཔྱོད་པ་གཉིས་ལ་ཡང་མཐོང་ངོ༌། །འདུ་ཤེས་དང་སེམས་པ་ལ་ཡང་མཐོང་སྟེ། འདུ་ཤེས་དང་སེམས་པ་འདུ་བྱེད་ཅེས་བྱ་བ་ཡིན་ནོ། །སྲོག་གི་དབང་པོ་ལ་ཡང་མཐོང་སྟེ། ཚེའི་འདུ་བྱེད་སྲོག་གི་འདུ་བྱེད་ཅེས་བྱ་བ་ཡིན་ནོ། །དེའི་ཕྱིར་དམིགས་མི་ཕྱེད་ན་འདིར་མ་རིག་པའི་རྐྱེན་གྱིས་འདུ་བྱེད་ཅེས་བྱ་བ་གང་ཞེ་ན། དེ་བས་ན་དམིགས་ཀྱིས་དབྱེ་བའི་ཕྱིར་བཅོམ་ལྡན་འདས་ཀྱིས། འདུ་བྱེད་ནི་རྣམ་པ་གསུམ་སྟེ། ལུས་ཀྱི་འདུ་བྱེད་དང༌། ངག་གི་འདུ་བྱེད་དང༌། ཡིད་ཀྱི་འདུ་བྱེད་དོ་ཞེས་གསུངས་སོ། །དེ་ལ་བཅོམ་ལྡན་འདས་ཀྱིས་འདུ་བྱེད་རྣམས་ནི་ལུས་ལ་སོགས་པའི་དབྱེ་བས་རབ་ཏུ་དབྱེ་བ་བསྟན་གྱི་ངོ་བོ་ཉིད་ཀྱིས་ནི་མ་ཡིན་ནོ་ཞེས་བྱ་བ་ལ། ལུས་ལ་སོགས་པའི་དབྱེ་བས་ཞེས་བྱའི། ལུས་དང་ངག་དང་ཡིད་ཀྱི་དབྱེ་བས་ཡིན་གྱི། ངོ་བོ་ཉིད་ཀྱིས་ནི་
མ་ཡིན་པར་བསྟན་ཏོ་ཞེས་བྱ་བ་ཅི་དེ་རྣམས་འདུ་བྱེད་ཐམས་ཅད་ཀྱི་ངོ་བོ་ཉིད་ཡིན་པ་ལས་ལུས་དང་ངག་དང་ཡིད་ཀྱིས་མངོན་པར་འདུ་བྱས་པ་ཡིན་པའི་ཕྱིར་ཡིན་ནམ། ཅི་ལུས་དང་ངག་དང་ཡིད་འབའ་ཞིག་འདུ་བྱས་པའི་དོན་གྱིས་ཡིན། གཉི་ག་སེམས་པའི་ངོ་བོ་ཡིན་ལ། ཡང་སྲིད་པ་མངོན་པར་འདུ་བྱེད་པའི་དོན་གྱིས་ཡིན། འོན་ཏེ་དབུགས་ཕྱི་ནང་དུ་རྒྱུ་བ་དང་རྣམ་པར་རྟོག་པ་དང༌། རྣམ་པར་དཔྱོད་པ་དང༌། འདུ་ཤེས་དང༌། སེམས་ཀྱི་ངོ་བོ་རྣམས་ལུས་དང༌། ངག་དང༌། ཡིད་ཀྱི་འདུས་བྱས་པའི་དོན་གྱིས་ཡིན། འོན་ཏེ་སྲོག་གི་དབང་པོའི་ངོ་བོ་ནི་ལུས་དང་ངག་དང་ཡིད་ཀྱི་ལས་ཀྱིས་མངོན་པར་འདུ་བྱས་པའི་དོན་གྱིས་ཡིན་ཞེས་བྱ་བ་ལ་སོགས་པ་ཡོང་ན་ཅིའི་ཕྱིར་ངོ་བོ་ཉིད་མ་བསྟན་ཞེ་ན། འཕྲལ་དུ་ཉེ་བར་གནས་པའི་གདུལ་བྱའི་བྱེ་བྲག་ལ་ལྟོས་པ་སྟེ། དེ་དག་ནི་ངོ་བོ་ཉིད་བཤད་པ་མེད་པར་ཡང་ལུས་ལ་སོགས་པའི་འདུ་བྱེད་རྣམས་ཀྱི་ངོ་བོ་ཉིད་ཁོང་དུ་ཆུད་པར་འགྱུར་བའམ། སྔོན་ཉིད་དུ་མདོ་སྡེ་གཞན་ལས་ལུས་ལ་སོགས་པའི་འདུ་བྱེད་ཀྱི་ངོ་བོ་རྟོགས་པའི་ཕྱིར་རོ། །མ་འོངས་པའི་གདུལ་བྱ་ལ་ལྟོས་ནས་ཀྱང་བསྟན་ཏེ། མདོ་སྡེ་གཞན་གྱི་ཤུགས་ཉིད་ཀྱིས་དེའི་ངོ་བོ་ཁོང་དུ་ཆུད་པར་འགྱུར་བས་སོ། །ཇི་ལྟར་ཡིན་པ་དེ་འདིར་བསྟན་ཏེ། མདོ་སྡེ་གཞན་ལས་ཀྱང་དབུགས་ཕྱི་ནང་དུ་རྒྱུ་བ་ནི་ལུས་ཀྱི་འདུ་བྱེད་དོ་ཞེས་རྒྱས་པར་འབྱུང་བ་ནི་བཙུན་པ་འདོད་པ་ཅན། འདུ་བྱེད་འདུ་བྱེད་ཅེས་བགྱི་བའི་འདུ་བྱེད་ཇི་ལྟ་བུ་ལགས། ཁྱིམ་བདག་འདུ་བྱེད་ཅེས་བྱ་བ་ནི་གསུམ་པོ་འདི་དག་སྟེ་ལུས་ཀྱི་འདུ་བྱེད་དང༌། ངག་གི་འདུ་བྱེད་དང༌། ཡིད་ཀྱི་འདུ་བྱེད་དོ། །བཙུན་པ་འདོད་པ་ཅན་ལུས་ཀྱི་འདུ་བྱེད་ནས་ཡིད་ཀྱི་འདུ་བྱེད་ཀྱི་བར་དུ་གང་ལགས། ཁྱིམ་བདག་དབུགས་ཕྱི་ནང་དུ་རྒྱུ་བ་ནི་ལུས་ཀྱི་འདུ་བྱེད་ཅེས་བྱའོ། །རྣམ་པར་རྟོག་པ་དང་རྣམ་པར་དཔྱོད་པ་ནི་ངག་གི་འདུ་བྱེད་ཅེས་བྱའོ། །འདུ་ཤེས་དང་སེམས་པ་ནི་ཡིད་ཀྱི་འདུ་བྱེད་ཅེས་བྱའོ། །བཙུན་པ་ཅིའི་ཕྱིར་དབུགས་ཕྱི་ནང་དུ་རྒྱུ་བ་ནི་ལུས་ཀྱི་འདུ་བྱེད་ཅེས་བྱ་བ་ནས་འདུ་ཤེས་དང་སེམས་པ་ནི་ཡིད་ཀྱི་འདུ་བྱེད་ཅེས་བྱ་ཞེ་ན། ཁྱིམ་བདག་དབུགས་ཕྱི་ནང་དུ་རྒྱུ་བ་དེ་དག་ནི་ལུས་སུ་གཏོགས་པའི་ཆོས། ལུས་ཀྱི་རྗེས་སུ་འགྲོ་བ་ལུས་ལ་བརྟེན་པ། ལུས་དང་རྗེས་སུ་འབྲེལ་པ། ལུས་ལ་བརྟེན་ནས་འབྱུང་སྟེ། དེ་བས་
ན་དབུགས་ཕྱི་ནང་དུ་རྒྱུ་བ་ནི་ལུས་ཀྱི་འདུ་བྱེད་ཅེས་བྱའོ། །དེ་ལྟར་ན་འདིར་ལུས་ཀྱིས་མངོན་པར་འདུས་བྱས་པའི་དོན་གྱིས་ལུས་ཀྱི་འདུ་བྱེད་ཅེས་བྱ་བར་གྲུབ་པ་ཡིན་ནོ། །ཁ་ཅིག་ན་རེ་ལུས་ལ་འདུ་བྱེད་པས་ལུས་ཀྱི་འདུ་བྱེད་ཅེས་བྱ་སྟེ། ལུས་དང་དབུགས་ཕྱི་ནང་དུ་རྒྱུ་བ་འབྲེལ་ཏེ། འབྱུང་བའི་ཕྱིར་རོ་ཞེས་ཟེར་རོ། །བརྟགས་དཔྱད་ནས་ངག་བརྗོད་ཀྱི་མ་བརྟགས་མ་དཔྱད་པར་ནི་མ་ཡིན་ནོ། །དེ་བས་ན་རྣམ་པར་རྟོག་པ་དང་རྣམ་པར་དཔྱོད་པ་ནི་ངག་གི་འདུ་བྱེད་དོ་ཞེས་བྱ་སྟེ། ངག་མངོན་པར་འདུ་བྱེད་པའི་དོན་གྱིས་ཡིན་ནོ་ཞེས་བསྟན་པ་ཡིན་ནོ། །འདུ་ཤེས་དང་སེམས་པ་ཡང་དེ་དག་སེམས་ལས་བྱུང་བའི་ཆོས་ཡིན་ཏེ། སེམས་ལ་གནས་པ། སེམས་ལ་བརྟེན་པ། སེམས་དང་འབྲེལ་པ། སེམས་ལ་བརྟེན་ནས་འབྱུང་ངོ༌། །དེ་བས་ན་འདུ་ཤེས་དང་སེམས་པ་ནི་ཡིད་ཀྱི་འདུ་བྱེད་དོ་ཞེས་མདོ་སྡེ་འདིར། ཡིད་ཀྱིས་མངོན་པར་འདུས་བྱས་པའི་དོན་གྱིས། ཡིད་ཀྱི་འདུ་བྱེད་དང༌། ཡང་ན་ཡིད་མངོན་པར་འདུ་བྱེད་པ་ཡིན་པས་ཞེས་བསྟན་ཏེ། ལུས་གཡོ་བར་བྱེད་པ་ནི་ལུས་ཀྱི་འདུ་བྱེད་དོ། །ངག་ཀུན་ནས་སློང་བར་བྱེད་པ་ནི་ངག་གི་འདུ་བྱེད་དོ། །ཡིད་དང་མཚུངས་པར་ལྡན་པའི་འདུ་བྱེད་ནི་ཡིད་ཀྱི་འདུ་བྱེད་ཅེས་བྱ་བའི་ཕྱིར་རོ། །དེ་དག་ཅི་འདིར་དེ་ཁོ་ན་བཞིན་དུ་བལྟ་བར་བྱའམ། མ་ཡིན་ཞེ་ན་ཞེས་བྱ་བ་ལ། འདིར་ཞེས་བྱ་བ་ནི་རྟེན་ཅིང་འབྲེལ་པར་འབྱུང་བའི་མདོ་སྡེ་འདིར་རོ། །དེ་ཁོ་ན་བཞིན་དུ་ཞེས་བྱ་བ་ནི་དབུགས་ཕྱི་ནང་དུ་རྒྱུ་བ་ལ་སོགས་པ་ལ་བྱའོ། །སྨྲས་པ། ལུས་དང་ངག་དང་ཡིད་ཀྱི་ལས་ཀྱི་བྱེ་བྲག་ལ་འདིར་ལུས་ལ་སོགས་པའི་འདུ་བྱེད་དུ་བཞེད་དོ་ཞེས་བྱ་བ་ནི་འདུ་བྱེད་རྣམ་པ་གསུམ་ཆར་ཡང༌། ཡང་སྲིད་མངོན་པར་འདུ་བྱེད་པའི་དོན་གྱིས་ཡིན་གྱི། ལུས་ལ་སོགས་པ་མངོན་པར་འདུ་བྱེད་པའི་དོན་གྱིས་སམ། མངོན་པར་འདུ་བྱེད་པའི་དོན་གྱིས་འདི་མ་ཡིན་ནོ། །དེ་ཉིད་ཀྱི་ཕྱིར་ལས་ཀྱི་བྱེ་བྲག་སྨོས་སོ། །ལས་སྨོས་པས་ནི་ཡང་སྲིད་ཀྱི་རྒྱུ་འདུ་བྱེད་གཞན་བསལ་ཏེ། བྱེ་བྲག་སྨོས་པས་ནི་ཟག་པ་མེད་པ་དང་ལུང་དུ་མ་བསྟན་པ་དང༌། ཟག་པ་ཟད་པའི་རྒྱུ་ལས་དགེ་བ་ཟག་པ་དང་བཅས་པའི་ལས་ཡོད་པ་བསལ་ཏོ། །དེ་དག་ནི་ཡང་སྲིད་པ་མངོན་པར་འདུ་བྱེད་པས་ཡང་སྲིད་མངོན་པར་འདུ་
བྱེད་པའི་དོན་གྱི་ལུས་ལ་སོགས་པ་འདུ་བྱེད་སྒྲ་ཐོབ་པ་མ་ཡིན་གྱི། འོ་ན་ཅི་ཞེ་ན། མངོན་པར་འདུས་བྱས་པའི་དོན་གྱིས་ཡིན་ནོ། །ལུས་དང་ངག་དང་ཡིད་ཀྱི་ལས་ཀྱི་བྱེ་བྲག་གང་ཡིན་པ་དེ་འདིར་ལུས་ལ་སོགས་པའི་འདུ་བྱེད་དུ་དགོངས་པ་ཡིན་གྱི། དབུགས་ཕྱི་ནང་དུ་རྒྱུ་བ་ནི་མ་ཡིན་ནོ་ཞེས་བྱ་བ་འདི་ཇི་ལྟར་མངོན་ཞེ་ན། དེའི་ཕྱིར་མདོ་སྡེ་དང་རིགས་པས་སོ་ཞེས་སྨྲས་སོ། །རེ་ཞིག་བུམ་པ་ལྟ་བུའི་མདོ་སྡེ་ལས། བཅོམ་ལྡན་འདས་ཀྱིས་ཞེས་རྒྱས་པར་འབྱུང་བ་དེར་ནི་མ་རིག་པའི་རྐྱེན་གྱིས་འདུ་བྱེད། བསོད་ནམས་དང་བསོད་ནམས་མ་ཡིན་པ་དང༌། མི་གཡོ་བ་ཡིན་པར་གསུངས་སོ་བསྟན་གྱི། དབུགས་ཕྱི་ནང་དུ་རྒྱུ་བ་ནི་བསོད་ནམས་དང༌། བསོད་ནམས་མ་ཡིན་པ་དང༌། མི་གཡོ་བ་ཡིན་པར་བཞེད་པ་མ་ཡིན་ཏེ། འབྱུང་བ་ཆེན་པོའི་རང་བཞིན་ཡིན་པའི་ཕྱིར་རོ། །འབྱུང་བ་ཆེན་པོ་དག་ཀྱང་གྲུབ་པའི་མཐའ་ལས་མ་བསྒྲིབས་ལ་ལུང་དུ་མ་བསྟན་པ་ཡིན་པར་འབྱུང་ངོ༌། །འོ་ན་རྣམ་པར་རྟོག་པ་དང༌། རྣམ་པར་དཔྱོད་པ་དང༌། འདུ་ཤེས་རྣམས་བསོད་ནམས་དང་བསོད་ནམས་མ་ཡིན་པ་དང༌། མི་གཡོ་བའི་མཚན་ཉིད་མ་ཡིན་པར་འགོག་པར་བྱེད་པ་གང་ཞེ་ན། འགོག་པ་འདི་ཉིད་ཡིན་ནོ། །ཇི་ལྟ་ཞེ་ན། ལུས་ཀྱི་ལས་ཀྱི་བྱེ་བྲག་ནི་ལུས་ཀྱི་འདུ་བྱེད་ཀྱི་སྒྲར་བསྟན་ཏེ། ཡང་སྲིད་མངོན་པར་འདུ་བྱེད་པའི་དོན་གྱིས་སོ་ཞེས་བྱ་བས་དབུགས་ཕྱི་ནང་དུ་རྒྱུ་བ་གཉིས་བསོད་ནམས་དང་བསོད་ནམས་མ་ཡིན་པ་དང་མི་གཡོ་བའི་ལུས་ཀྱི་འདུ་བྱེད་དུ་བཀག་པ་ཡིན་པས་འདི་གྲུབ་པ་ཡིན་ནོ། །སེམས་པ་ཡང་གཙོར་སྲིད་པ་མངོན་པར་འདུ་བྱེད་པ་ཡིན་ནོ། །ངག་དང་ཡིད་ཀྱི་འདུ་བྱེད་ཀྱི་སྒྲས་ནི་ངག་དང་ཡིད་ཀྱི་ལས་ཡིན་པར་བསྟན་པར་ངེས་པར་བྱའི། རྣམ་པར་རྟོག་པ་དང་རྣམ་པར་དཔྱོད་པ་དང་འདུ་ཤེས་ནི་མ་ཡིན་ནོ། །ཡང་བུམ་པ་ལྟ་བུའི་མདོ་དེ་ལས་གསུངས་པ་དེ་གལ་ཏེ་བསོད་ནམས་ཀྱི་འདུ་བྱེད་མངོན་པར་འདུ་བྱེད་ན་ཞེས་རྒྱས་པར་འབྱུང་བ་དེར་ཡང་མ་རིག་པའི་རྐྱེན་དང་འདུ་བྱེད་ཀྱི་རྐྱེན་གྱིས་རྣམ་པར་ཤེས་པ་ཡིན་པར་གསུངས་ཏེ། བསོད་ནམས་ཀྱིས་ཉེ་བར་འགྲོ་བ་ནི་རྣམ་པར་ཤེས་པ་འདི་ཡིན་ནོ། །དེ་བཞིན་དུ་མི་གཡོ་བའི་བར་དུ་ཉེ་བར་འགྲོ་བར་འགྱུར་རོ་ཞེས་གསུངས་པའི་ཕྱིར་རོ། །དེ་ཇི་ལྟར་
གྱུར་ཞེ་ན། འདིར་འདུ་བྱེད་ཀྱི་རྐྱེན་གྱིས་རྣམ་པར་ཤེས་པ་ཡིན་པར་ཡང་གསུངས་ཏེ་ཞེས་རྒྱས་པར་སྨྲས་ཏེ། འདིར་ཞེས་བྱ་བ་ནི་རྟེན་ཅིང་འབྲེལ་པར་འབྱུང་བའི་མདོ་སྡེ་འདིར་རོ། །དེ་བས་ན་གང་འདུ་བྱེད་ཀྱིས་ཉེ་བར་འགྲོ་བ་ཞེས་བྱ་བ་ནི་དེར་རྣམ་པར་ཤེས་པ་ཡིན་པར་གསུངས་ལ། དེ་ནི་འདིར་འདུ་བྱེད་ཀྱི་རྐྱེན་ཅན་ཡིན་ནོ་ཞེས་ངེས་པར་གཟུང་ངོ་ཞེས་བྱ་བ་དེ་དག་གིས་ཅི་བསྒྲུབས་པ་ཡིན་ཞེ་ན། དེ་ཡང་བསོད་ནམས་དང་བསོད་ནམས་མ་ཡིན་པ་ལ་སོགས་པའི་འདུ་བྱེད་ཀྱིས་ཉེ་བར་འགྲོ་བ་ཡིན་པར་དེ་ལས་བསྟན་ལ། འདིར་ཡང་བསོད་ནམས་དང་བསོད་ནམས་མ་ཡིན་པ་ལ་སོགས་པའི་འདུ་བྱེད་ཀྱི་རྐྱེན་ཅན་ཡིན་ནོ་ཞེས་གྲུབ་པ་ཡིན་གྱི། དབུགས་ཕྱི་ནང་དུ་རྒྱུ་བ་ནི་བསོད་ནམས་དང་བསོད་ནམས་མ་ཡིན་པ་དང༌། མི་གཡོ་བ་ཡིན་པར་བཞེད་པ་ཡང་མ་ཡིན་ལ། འདིར་ལུས་ལ་སོགས་པའི་འདུ་བྱེད་ཀྱི་སྒྲས་དབུགས་ཕྱི་ནང་དུ་རྒྱུ་བ་ལ་སོགས་པ་ཡང་མ་ཡིན་ནོ། །བསོད་ནམས་ཀྱིས་ཉེ་བར་འགྲོ་བ་ཞེས་བྱ་བའི་དོན་གང་ཞེ་ན། ཉེ་བར་འགྲོ་བར་བྱེད་པས་ཉེ་བར་འགྲོ་བའོ། །དེ་བས་ན་གང་བསོད་ནམས་ཀྱིས་འགྲོ་བ་གཞན་དུ་ཉེ་བར་འགྲོ་བ་དེ་ནི་བསོད་ནམས་ཀྱིས་ཉེ་བར་འགྲོ་བ་ཡིན་ནོ། །དེ་བཞིན་དུ་བསོད་ནམས་མ་ཡིན་པས་ཉེ་བར་འགྲོ་བར་དང་མི་གཡོ་བས་ཉེ་བར་འགྲོ་བ་ཡང་བརྗོད་པར་བྱའོ། །ཡང་གནོད་པ་དང་བཅས་པའི་ལུས་ཀྱི་འདུ་བྱེད་འདུས་བྱས་པས་ཞེས་རྒྱས་པར་འབྱུང་བ་ལ། དབུགས་ཕྱི་ནང་དུ་སྐྱེ་བའི་རྒྱུ་ཡང་མ་ཡིན་ནོ་ཞེས་བྱ་བ་ནི་འབྱུང་བ་ཆེན་པོ་རྣམས་གཅིག་ཁོ་ནར་མ་བསྒྲིབས་པའི་ལུང་དུ་མ་བསྟན་པ་ཡིན་པའི་ཕྱིར་རོ། །རེ་ཞིག་མདོ་སྡེ་ལས་ནི་དེ་ལྟ་བུ་ཡིན་ནོ་ཞེས་བྱ་བ་ནི་ཅི་ཞེ་ན། དབུགས་ཕྱི་ནང་དུ་རྒྱུ་བ་ལ་སོགས་པ་ནི་འདིར་ལུས་ལ་སོགས་པའི་འདུ་བྱེད་ཀྱི་སྒྲས་བསྟན་པ་མ་ཡིན་ནོ། །དགྲ་བཅོམ་པ་ལ་ཡོད་པར་མི་འགྱུར་རོ་ཞེས་བྱ་བ་ནི་མ་རིག་པ་མ་ལུས་པར་སྤངས་པའི་ཕྱིར་ཏེ། དབུགས་ཕྱི་ནང་དུ་རྒྱུ་བ་འཇུག་པའི་རྒྱུ་ཡོད་པ་མ་ཡིན་པའི་ཕྱིར་རོ། །གལ་ཏེ་ཡང་དེའི་རྐྱེན་གྱིས་ཡང་སྲིད་པའི་རྣམ་པར་ཤེས་པ་ཡིན་ན་ནི་ཞེས་བྱ་བ་ནི་དབུགས་ཕྱི་ནང་དུ་རྒྱུ་བའི་རྐྱེན་གྱིས་ཡང་སྲིད་པ་པའི་ཞེས་བྱ་བ་ཡང་སྲིད་པ་མངོན་པར་འགྲུབ་པར་བྱེད་པ་ཞེས་བྱ་བའི་ཐ་ཚིག་གོ །དགྲ་བཅོམ་པ་
ལ་ཡང་ཡོད་པར་འགྱུར་རོ་ཞེས་བྱ་བ་དེ་ལ་ཡང་དབུགས་ཕྱི་ནང་དུ་རྒྱུ་བ་ཡོད་པའི་ཕྱིར་རོ། །དེ་ལྟར་ནི་འདོད་པ་མ་ཡིན་ནོ། །ཅི་ཞེ་ན། འདི་ལྟ་སྟེ། དབུགས་ཕྱི་ནང་དུ་རྒྱུ་བ་མེད་པའམ། ཡང་སྲིད་ཀྱི་རྣམ་པར་ཤེས་པ་ཡོད་པར་མི་འདོད་དོ། །དེ་དག་ནི་དགྲ་བཅོམ་པ་ལ་ཡང་མེད་པ་མི་ཡིན་ནོ་ཞེས་བྱ་བ་ནི་ལུས་ལ་སོགས་པའི་ལས་དེ་དག་གོ །དབུགས་ཕྱི་ནང་རྒྱུ་བ་ལ་སོགས་པ་ཡང་དེ་བཞིན་དུ་འགྱུར་རོ་ཞེས་བྱ་བ་ནི་མ་རིག་པའི་རྐྱེན་ཉིད་དུ་ཟིན་ཀྱང་མ་རིག་པ་ཡང་སྤངས་པ་ཡིན་ནོ། །དེ་དག་ནི་ལུས་ལ་སོགས་པའི་ལས་མ་ཡིན་ནོ། །ཡང་སྲིད་པ་མངོན་པར་འདུ་བྱེད་པ་མ་ཡིན་པའི་ཕྱིར་རོ་ཞེས་བྱ་བ་ནི་དེ་དག་ནི་དགྲ་བཅོམ་པའི་ལས་ལ་ཡོད་པ་མ་ཡིན་ཏེ། འདིར་ལུས་ལ་སོགས་པའི་ལས་ཙམ་ནི་མ་རིག་པའི་རྐྱེན་གྱིས་འདུ་བྱེད་ཅེས་བྱ་བའི་སྒྲས་བསྟན་པ་མ་ཡིན་གྱི། འོ་ན་ཅི་ཞེ་ན། ཡང་སྲིད་པ་མངོན་པར་འདུ་བྱེད་པ་ཡིན་ནོ། །དེ་བས་ན་དགྲ་བཅོམ་པའི་ལུས་ལ་སོགས་པའི་ལས་ནི་དོན་འདིས་འདུ་བྱེད་ཀྱི་མིང་ཐོབ་པ་མ་ཡིན་གྱི་དེ་དག་ནི་མ་རིག་པ་ཡོད་པ་ཙམ་གྱིས་ཡིན་ནོ་ཞེས་བྱ་བར་རིགས་པ་ཡིན་ནོ། །དེ་ལྟ་བུ་ནི་དབུགས་ཕྱི་ནང་དུ་རྒྱུ་བ་ལ་སོགས་པ་མ་ཡིན་ནོ་ཞེས་བྱ་བ་ཅི་ཞེ་ན། དགྲ་བཅོམ་པའི་ལུས་ལ་སོགས་པ་འདུ་བྱེད་ཀྱི་མིང་ཐོབ་པའོ། །ཅིའི་ཕྱིར་ཞེ་ན། ལུས་མངོན་པར་འདུས་བྱས་པའི་དོན་གྱིས་ལུས་ཀྱི་འདུ་བྱེད་ཡིན་པར་མདོ་སྡེ་དེ་ལས་བསྟན་ཏེ། དགྲ་བཅོམ་པའི་ཡང་དེ་བཞིན་ནོ། །ངག་མངོན་པར་འདུ་བྱེད་པའི་དོན་གྱིས་ངག་གི་འདུ་བྱེད་ཡིན་ལ། དགྲ་བཅོམ་པའི་ཡང་རྣམ་པར་རྟོག་པ་དང་རྣམ་པར་དཔྱོད་པ་ནི་ངག་མངོན་པར་འདུ་བྱེད་པས་སོ།། ཡིད་ཀྱིས་མངོན་པར་འདུ་བྱེད་པའི་དོན་གྱིས་ཡིད་ཀྱི་འདུ་བྱེད་ཡིན་པར་མདོ་སྡེ་དེ་ལས་བསྟན་ཏེ། དགྲ་བཅོམ་པའི་ཡང་དེ་བཞིན་ནོ། །ལུས་ཀྱིས་མངོན་པར་འདུ་བྱེད་པའི་དོན་གྱིས་ཀྱང་ལུས་ཀྱི་འདུ་བྱེད་ཅེས་བྱ་སྟེ། དེ་ལུས་ལ་རག་ལུས་པའི་ཕྱིར་རོ། །དགྲ་བཅོམ་པའི་ཡང་དེ་བཞིན་ནོ། །དེའི་སྒོ་ནས་ལུས་ཀྱི་འདུ་བྱེད་ཅེས་མི་བྱའོ། །དེ་བཞིན་དུ་ཡིད་མངོན་པར་འདུ་བྱེད་པའི་དོན་གྱིས་ཡིན་ཏེ། དམིགས་པ་གཞན་ལ་ཡིད་མངོན་པར་འདུ་བྱེད་པའོ། །དགྲ་བཅོམ་པའི་ཡང་དེ་བཞིན་ཡིན་ན། འདིར་ཆོས་འདྲ་བ་ཅི་ཞིག་ཡོད། བསོད་ནམས་ཀྱང་ཅི་ཞིག་ཡིན། བསོད་ནམས་མ་
ཡིན་པ་ཡང་ཅི་ཡིན། མི་གཡོ་བ་ཡང་ཅི་ཡིན་ཞེས་བྱ་བ་འབྲེལ་པ་གང་ཡིན་ཞེ་ན། བསོད་ནམས་དང་བསོད་ནམས་མ་ཡིན་པ་དང་མི་གཡོ་བ་ནི་ལུས་ལ་སོགས་པའི་འདུ་བྱེད་ཡིན་པར་བུམ་པ་ལྟ་བུའི་མདོ་སྡེ་ལ་བརྟེན་ནས་དེ་མ་རིག་པའི་རྐྱེན་གྱིས་བསོད་ནམས་ཀྱི་འདུ་བྱེད་མངོན་པར་འདུ་བྱེད་པ་ཞེས་རྒྱས་པར་བསྟན་ཟིན་ཏེ། དེ་གལ་ཏེ་བསོད་ནམས་ཀྱི་འདུ་བྱེད་མངོན་པར་འདུ་བྱེད་ན་བསོད་ནམས་ཀྱིས་ཉེ་བར་འགྲོ་བ་ནི་རྣམ་པར་ཤེས་པ་འདི་ཡིན་ནོ་ཞེས་རྒྱས་པར་བྱས་ནས་དེ་ནི་འདིར་འདུ་བྱེད་ཀྱི་རྐྱེན་ཅན་ཡིན་ནོ་ཞེས་ངེས་པར་གཟུང་ངོ་ཞེས་བྱ་བའི་བར་དུ་གསུངས་པའི་ཕྱིར་རོ། །འདི་སྐད་དུ་བརྗོད་དེ་ཞེས་བྱ་བ་ནི་རྣམ་པར་སྨྲ་བ་ལ་སོགས་པ་འཆད་པར་བྱེད་པ་ཡིན་ནོ་ཞེས་སྟོན་ཏོ། །འདོད་པ་ན་སྤྱོད་པའི་དགེ་བའི་ལས་ནི་བསོད་ནམས་སོ་ཞེས་བྱ་བ་ལ། དགེ་བ་སྨོས་པ་ནི་མི་དགེ་བ་བསལ་བའི་ཕྱིར་རོ། །འདོད་པ་ན་སྤྱོད་པ་སྨོས་པ་ནི་གཟུགས་དང་གཟུགས་མེད་པ་ན་སྤྱོད་པ་དང་ཟག་པ་མེད་པ་བསལ་བའི་ཕྱིར་རོ། །མི་དགེ་བ་ནི་བསོད་ནམས་མ་ཡིན་པའོ་ཞེས་བྱ་བ་ནི་དེ་ཡང་འདོད་པའི་ཁམས་ཁོ་ན་ན་ཡོད་ཀྱི་གཞན་ན་མེད་དོ། །དེ་བས་ན་འདོད་པ་ན་སྤྱོད་ཅེས་མ་སྨོས་སོ། །གཟུགས་དང་གཟུགས་མེད་པ་ན་སྤྱོད་པའི་དགེ་བ་ནི་མི་གཡོ་བ་ཞེས་བྱའོ་ཞེས་བྱ་བ་ལ། དགེ་བ་སྨོས་པ་ནི་ཉོན་མོངས་པ་ཅན་དང་མ་བསྒྲིབས་ལ་ལུང་དུ་བསྟན་པ་བསལ་བའི་ཕྱིར་རོ། །གཟུགས་དང་གཟུགས་མེད་པ་ན་སྤྱོད་པ་སྨོས་པ་ནི་འདོད་པ་ན་སྤྱོད་པ་དང་ཟག་པ་མེད་པ་བསལ་བའི་ཕྱིར་རོ། །གཟུགས་དང་གཟུགས་མེད་པ་ན་སྤྱོད་པའི་དགེ་བ་ལ། ཅིའི་ཕྱིར་མི་གཡོ་བ་ཞེས་བྱ་ཞེ་ན། དེའི་ཕྱིར་གཡོ་བ་ནི་འགུལ་བ་སྟེ། རང་བཞིན་གཞན་དུ་འགྱུར་བར་འདོད་པར་བྱའོ་ཞེས་སྨྲས་ཏེ། སྐད་ཀྱི་བྱིངས་བརྗོད་པ་ལས་གཡོ་བ་ནི་འགུལ་བ་ཡིན་ནོ་ཞེས་བྱ་བ་འདི་སྐད་ཀྱི་དབྱིངས་ལ་ཡོད་དེ། དེ་ནི་གཡོ་བར་གྱུར་པ་ལ་བྱའོ། །དེའི་ཕྱིར་རང་བཞིན་གཞན་དུ་འགྱུར་བར་འདོད་པར་བྱའོ་ཞེས་སྨྲས་སོ། །དེ་ནི་མི་གཡོ་བའི་ངོ་བོ་ཡིན་པས་མི་གཡོ་བ་ཅན་ཏེ། བསམ་གཏན་དང་གཟུགས་མེད་པ་དག་འདིས་གཡོས་པར་མི་ནུས་པས་མི་གཡོ་བ་ཡིན་ཏེ། ས་འོག་མ་པའི་མི་མཐུན་པའི་ཕྱོགས་དེས་མི་བསྒལ་བའི་ཕྱིར་རོ་ཞེས་བྱ་བ་ནི་ས་འོག་མ་པའི་ཉོན་མོངས་པས་ཞེས་བྱ་བའི་
ཐ་ཚིག་སྟེ། བསམ་གཏན་དང་གཟུགས་མེད་པ་ནི་ས་འོག་མ་པའི་ཉོན་མོངས་པ་རྣམས་ཀྱི་ནི་གཉེན་པོ་ཡིན་ལ། ས་འོག་མའི་ཉོན་མོངས་པ་ནི་མི་མཐུན་པའི་ཕྱོགས་ཡིན་ནོ་ཞེས་བྱ་བ་གྲུབ་པ་ཡིན་ནོ། །དེར་འབྱུང་བའི་ལས་ནི་མི་གཡོ་བ་ཡིན་ནོ་ཞེས་བྱ་བ་ནི་བསམ་གཏན་དང་གཟུགས་མེད་པ་དེར་ཞེས་བྱ་བའི་ཐ་ཚིག་གོ །གཞན་དག་ན་རེ་ས་དེ་ལས་གང་གི་ཕྱིར་ལས་ཀྱི་རྣམ་པར་སྨིན་པ་མི་གཡོ་བ་ཡིན་ནོ་ཞེའོ་ཞེས་རྒྱས་པར་འབྱུང་བ་ལ། ས་དེ་ལས་ཞེས་བྱ་བ་ནི་གཟུགས་དང་གཟུགས་མེད་པའི་ས་ལས་ཞེས་བྱ་བའི་དོན་གང་ཡིན་པའོ། །སྨོན་ལམ་ལ་སོགས་པའི་རྐྱེན་གཞན་གྱིས་ཡོངས་སུ་ཟིན་པས་ཞེས་བྱ་བ་ལ་སོགས་པའི་སྒྲས་རྒྱུད་ཀྱི་བྱེ་བྲག་རྐྱེན་གཞན་ཡོངས་སུ་བཟུང་བས་ཏེ། རྒྱུད་ཀྱི་བྱེ་བྲག་ཁ་ཅིག་ནི་གཉེན་པོ་དང་བཅས་པ་མ་ཡིན་ནོ། །ཁ་ཅིག་ནི་གཉེན་པོ་དང་བཅས་པ་ཡིན་ནོ། །ཇི་སྐད་དུ་མི་སྐལ་བ་མེད་པ་ལ་སོགས་པ་དང་ལན་ཚྭ་སྲང་གཅིག་ལྟ་བུ་དང་རྣ་རིགས་ཞེས་བྱ་བའི་མདོ་སྡེ་ལས་གསུངས་ཏེ། རེ་ཞིག་མི་སྐལ་བ་མེད་པའི་མདོ་སྡེ་ལས་ནི་དགེ་སློང་དག་འདི་ནི་ཁ་ཅིག་གིས་སྦྱིན་པ་ལས་བྱུང་བའི་བསོད་ནམས་བྱ་བའི་དངོས་པོ་ཅུང་ཟད་ཙམ་བྱས་ཤིང་བསགས་པ་དང༌། ཚུལ་ཁྲིམས་ལས་བྱུང་བ་ཅུང་ཟད་ཅམ་བྱས་ཀྱི་བསྒོམས་པ་ལས་བྱུང་བ་ནི་ཡོད་པ་མ་ཡིན་ལ་མི་སྐལ་བ་མེད་པ་ཡང་འདིས་མཐོང་སྟེ། དེ་འདི་སྙམ་དུ་ཀྱེ་མ་བདག་ནི་སྐལ་བ་ཆུང་བའི་མི་དང་སྐལ་བ་མཉམ་པར་སྐྱེའོ་སྙམ་ནས་དེ་སེམས་དེ་བསྟེན། བསྒོམས་ལན་མང་དུ་བྱས་སོ། །དེ་སེམས་དེ་བསྟན་ཅིང་བསྒོམས་ལན་མང་དུ་བྱས་པས་དམན་པར་འདུག་འདུག་པ་ལས་གོང་དུ་འཕོའོ། །དེ་ཉིད་མ་བསྒོམས་ཡིད་ལ་མ་བྱས་པ་ནི་མི་སྐལ་བ་ཆུང་པ་དང་སྐལ་བ་མཉམ་པར་སྐྱེ་བ་གང་ཡིན་པའི་གནས་ཡོད་པ་ཡིན་ནོ། །དེ་ལ་འདི་དག་ནི་མི་སྐལ་བ་ཆུང་བ་ཡིན་ཏེ། འདི་ལྟ་སྟེ་རིགས་ངན་ནམ་གདོལ་བའི་རིགས་སམ་ཤིང་རྟ་བྱེད་པའི་རིགས་སོ། །གཞན་ཡང་དམན་པ་སྨད་པ་འོག་མ་ངན་པ་བྱེད་པ་ཆུང་བ་ཟས་སྐོམ་མེད་པ་དེ་འདྲའི་རིགས་དང་སྐལ་བ་མཉམ་པར་སྐྱེ་སྟེ། དེ་དག་ནི་སྐལ་བ་ཆུང་བའི་མིའི་མདོ་ལས་ཡིན་ནོ། །སྐལ་བ་ཅན་གྱི་མིའི་མདོ་ལས་ཀྱང༌། དགེ་སློང་དག་འདི་ན་ཁ་ཅིག་གིས་སྦྱིན་པ་ལས་བྱུང་བའི་བསོད་ནམས་བྱ་བའི་དངོས་པོ་ཅུང་ཟད་ཙམ་བྱས་ཤིང་བསགས་པ་དང་
ཚུལ་ཁྲིམས་ལས་བྱུང་བ་ཅུང་ཟད་ཙམ་བྱས་ཀྱི་བསྒོམས་པ་ལས་བྱུང་བ་ནི་ཡོད་པ་མ་ཡིན་ལ། མི་སྐལ་བ་ཅན་ཡང་འདིས་མཐོང་སྟེ། དེ་འདི་སྙམ་དུ་ཀྱེ་མ་བདག་ནི་མི་སྐལ་བ་ཅན་རྣམས་དང་སྐལ་བ་མཉམ་པར་སྐྱེའོ་སྙམ་ནས་དེའི་སེམས་བསྟེན་ཅིང་བསྒོམས་ལན་མང་དུ་བྱས་སོ། །དེའི་སེམས་བསྟེན་ཅིང་བསྒོམས་ལན་མང་དུ་བྱས་པ་དམན་པར་འདུག་ཅིང་དམན་པར་ཤིན་ཏུ་འདུག་པ་ལས་གོང་དུ་ཤིན་ཏུ་འཕོའོ། ཤིན་ཏུ་ཚད་མེད་པར་བསྒོམས་ཤིང་ལན་མང་དུ་བྱས་པ་ནི་གང་མི་སྐལ་བ་ཅན་རྣམས་དང༌། སྐལ་བ་མཉམ་པར་སྐྱེ་བའི་གནས་ཡོད་པ་ཡིན་ནོ། །དེ་ལ་འདི་དག་ནི་མི་སྐལ་བ་ཅན་ཡིན་ཏེ། འདི་ལྟ་སྟེ་རྒྱལ་རིགས་ཤིང་སཱ་ལ་ཆེན་པོ་ལྟ་བུའམ། བྲམ་ཟེའི་རིགས་ཤིང་སཱ་ལ་ཆེན་པོ་ལྟ་བུ་འམ། ཁྱིམ་བདག་གི་རིགས་ཤིང་སཱ་ལ་ཆེན་པོ་ལྟ་བུའམ། གང་གཞན་ཡང་ཤིན་ཏུ་ཕྱུག་ཅིང་ལོངས་སྤྱོད་ཆེ་བ་དང་ནོར་མང་པོ་ཡོད་པ་ལ་དབང་བྱེད་པ་དང། ནོར་དང་ཡོ་བྱད་མང་པོ་དང༌། ནོར་དང་འབྲུ་དང༌། མཛོད་དང༌། བང་བ་ལ་སོགས་པ་ཚོགས་མང་བ་དང༌། བྲན་ཕོ་དང༌། བྲན་མོ་དང༌། ལས་བྱེད་པའི་མི་མང་བ་དང༌། མཛའ་བཤེས་དང༌། བློན་པོ་དང༌། གཉེན་དང༌། སྤུན་ཚན་རབ་ཏུ་མང་བ་ལྟ་བུ་དེའི་རིགས་དང་སྐལ་བ་མཉམ་པར་སྐྱེ་བ་ཡིན་ནོ། །འདི་ལྟ་སྟེ་དགེ་སློང་དག་འདིར་ཁ་ཅིག་གིས་སྦྱིན་པ་ལས་བྱུང་བའི་བསོད་ནམས་བྱ་བའི་དངོས་པོ་ཆུང་བ་ཡང་ཞེས་སྔ་མ་བཞིན་དུ་བྱས་ནས་ཐོས་པ་ཡང་ཡོད་ཅིང་འདིས་རྒྱལ་ཆེན་བཞིའི་རིས་ཀྱི་ལྷ་དང་གཞན་འཕྲུལ་དབང་བྱེད་ཀྱི་ལྷའི་བར་དུ་འགྱུར་རོ། །འདི་སྙམ་དུ་སེམས་ཏེ། ཀྱེ་མ་བདག་ནི་རྒྱལ་ཆེན་བཞིའི་རིས་ཀྱི་ལྷ་རྣམས་དང་སྐལ་བ་མཉམ་པར་སྐྱེ་བར་འགྱུར་རོ་ཞེས་བྱ་བ་ནས་གཞན་འཕྲུལ་དབང་བྱེད་ཀྱི་ལྷ་རྣམས་དང་སྐལ་བ་མཉམ་པར་སྐྱེ་བར་འགྱུར་རོ་སྙམ་ནས་དེའི་སེམས་བརྟེན་ཅིང་བསྒོམ་མོ་ཞེས་སྔ་མ་བཞིན་ནོ། །ལན་ཚྭ་སྲང་གཅིག་ལྟ་བུ་ལས་ཀྱང་རྒྱས་པར་གསུངས་ནས། དགེ་སློང་དག་འདི་ལ་ཁ་ཅིག་གིས་རེ་ཞིག་མི་དགེ་བའི་ལས་བྱས་ཤིང་བསགས་པ་གང་ཡིན་པ་དེ་ནི་མཐོང་བའི་ཆོས་ལ་མྱོང་བར་འགྱུར་བ་ལས་དམྱལ་བ་མྱོང་བར་འགྱུར་བར་གྱུར་ཏོ། །དགེ་སློང་དག་གང་ཟག་ཇི་ལྟ་བུས་རེ་ཞིག་སྡིག་པ་མི་དགེ་བའི་ལས་བྱས་ཤིང་བསགས་
པ་དག་འདི་མཐོང་བའི་ཆོས་ལ་མྱོང་བར་འགྱུར་བ་གང་ཡིན་པ་དེ་ནི་དམྱལ་བ་མྱོང་བར་འགྱུར་བར་གྱུར་ཞེ་ན། འདི་ལ་དགེ་སློང་དག་གང་ཟག་ཁ་ཅིག་ནི་ལུས་མ་བསྒོམས་པ། ཚུལ་ཁྲིམས་མ་བསྒོམས་པ། སེམས་མ་བསྒོམས་པ། ཤེས་རབ་མ་བསྒོམས་པ་ཞེས་བྱ་བ་དེ་ལྟ་བུ་གང་ཟག་རྒྱས་པར་བྱས་ནས་ཅུང་ཟད་ཅིག་བྱས་པ་ལ་ཡང་ཆེན་པོ་ཁོ་ནར་སྣང་བའོ། །རྣ་རིགས་ཀྱི་མདོ་ལས་ཀྱང་རྒྱས་པར་སྨྲས་ནས། བྲམ་ཟེ་དག་འདིས་ཁ་ཅིག་ནི་སྲོག་གཅོད་པ་ཡིན་པ་ནས་ལོག་པར་ལྟ་བ་པོའི་བར་དུ་ཡིན་ནོ། །དགེ་སྦྱོང་བྲམ་ཟེ་དག་ལ་སྦྱིན་པ་ཡང་བྱིན་པ་ཡིན་ཏེ་ཞེས་རྒྱས་པར་སྨྲས་ནས། གང་ཟག་དེ་ཚུལ་ཁྲིམས་འཆལ་བ་ཡིན་ལ། ལས་དེའི་རྣམ་པར་སྨིན་པས་གླང་པོ་ཆེ་དང་སྐལ་བ་མཉམ་པར་སྐྱེ་བར་འགྱུར་རོ། །དེ་སྦྱིན་པ་བྱིན་པ་གང་ཡིན་པ་དེའི་ལས་ཀྱི་རྣམ་པར་སྨན་པ་ནི་གླང་པོ་ཆེར་གྱུར་ན་ཡང༌། བཟའ་བ་དང་བཏུང་བ་ནས། གླང་པོ་ཆེའི་རྒྱན་གྱི་བར་དུ་རྙེད་པར་འགྱུར་རོ་ཞེས་རྒྱས་པར་བྱས་ནས་བྲམ་ཟེ་འདིར་ཁ་ཅིག་དག་སྲོག་གཅོད་པ་སྤངས་ཏེ། སྲོག་གཅོད་པ་ལས་སླར་ལོག་པ་ནས་ཡང་དག་པར་ལྟ་བའི་བར་དུ་ཡིན་ནོ། །སྦྱིན་པ་ཡང་དགེ་སློང་ངམ་བྲམ་ཟེ་དག་ལ་བྱིན་ཏེ་ཞེས་རྒྱས་པར་བྱས་ནས་དེ་ཚུལ་ཁྲིམས་དང་ལྡན་པ་ཡིན་ཏེ། དེའི་ལས་ཀྱི་རྣམ་པར་སྨིན་པས་ལྷ་རྣམས་དང་སྐལ་བ་མཉམ་པར་སྐྱེ་བར་འགྱུར་རོ། །གང་སྦྱིན་པ་དེ་བྱིན་པ་དེའི་ལས་ཀྱི་རྣམ་པར་སྨིན་པས་ནི་ལྷར་གྱུར་བ་ན་ཡང་བཟའ་བ་དང་བཏུང་བ་ནས་ལྷ་རྣམས་ཀྱི་རྒྱན་རྣམ་པ་སྣ་ཚོགས་ཀྱི་བར་དུ་རྙེད་པར་འགྱུར་རོ། །དེ་བཞིན་དུ་མི་རྣམས་དང་སྐལ་བ་མཉམ་པར་སྐྱེ་བར་འགྱུར་རོ། །དེའི་ལས་ཀྱི་རྣམ་པར་སྨིན་པས་ནི་མིར་གྱུར་བ་ན་ཡང་བཟའ་བ་དང་བཏུང་བ་ནས་མིའི་རྒྱན་སྣ་ཚོགས་ཀྱི་བར་དུ་རྙེད་པར་འགྱུར་རོ། །དེ་ལྟར་ན་མདོ་སྡེ་དེ་དག་ལས། འདོད་པ་ན་སྤྱོད་པའི་ལས་ཀྱི་རྣམ་པར་སྨིན་པ་ནི་གཡོ་བར་བསྟན་པ་ཡིན་ནོ། །བསོད་ནམས་ཟད་ནས་ཞེས་བྱ་བ་འདིར་དཔེ་ན་ཇི་ལྟར་གཟུགས་ན་སྤྱོད་པའི་དགེ་བའི་ལས་ལ་བསོད་ནམས་ཞེས་བྱ་བ་བཞིན་ནོ། །བསོད་ནམས་དེ་ནི་ཡོད་དེ་ཞེས་བྱ་བ་ནི་འོད་གསལ་བ་དེའི་དགེ་བའི་ལས་ནི་འབྲས་བུ་ཡིད་དུ་འོང་བ་ཉིད་ཡིན་པའི་ཕྱིར་རོ། །ཁྱད་པར་བརྗོད་པར་བྱ་བའི་ཕྱིར་ཏེ་ཞེས་བྱ་བ་ནི་གང་གི་ཕྱིར་ས་དེ་ལས་ལས་ཀྱི་རྣམ་
པར་སྨིན་པ་མི་གཡོ་བ་ཡིན་ནོ་ཞེས་འདིའི་ཁྱད་པར་དུ་བརྗོད་པའི་ཕྱིར་རོ། །ལན་ཅིག་ཕྱིར་འོང་བ་ལ་སོགས་པ་བཞིན་ཏེ་ཞེས་བྱ་བ་ལན་ཅིག་ཕྱིར་འོང་བ་དང༌། ཕྱིར་མི་འོང་བ་དང༌། དགྲ་བཅོམ་པ་བཞིན་ཏེ། ལན་ཅིག་ཕྱིར་འོང་བ་དང༌། ཕྱིར་མི་འོང་བ་དང༌། དགྲ་བཅོམ་པ་དེ་དག་རྒྱུན་དུ་ཞུགས་པ་མ་ཡིན་པ་མ་ཡིན་ཏེ། ཅིའི་ཕྱིར་ཞེ་ན། མྱ་ངན་ལས་འདས་པའི་ལས་ཀྱི་རྒྱུན་དེ་ནས་སོང་བའི་ཕྱིར། དེ་དག་ནི་དེར་ཞུགས་ཤིང་ཐོབ་པ་ཡིན་པས་རྒྱུན་དུ་ཞུགས་པ་ཡིན་ཡང༌། ཁྱད་པར་གྱི་མིང་གིས་བསྟན་ཏེ། རྒྱུན་དུ་ཞུགས་པ་ལས་འབྲས་བུ་ཐོག་མ་ལ་གནས་པ་དང་འབྲས་བུ་ཇི་ལྟ་བུ་ཞེ་ན། དེ་ནི་དེ་ལྟར་ཐོགས་ན་སྲིད་པ་ལན་བདུན་པ་ཞེས་བསྟན་ཏོ། །ལན་ཅིག་ཕྱིར་འོང་བ་ནི་འཇིག་རྟེན་འདིར་ལན་ཅིག་ཕྱིར་འོངས་ནས་སྡུག་བསྔལ་གྱི་ཐ་མ་བྱེད་པར་འགྱུར་བའོ། །ལན་ཅིག་ཕྱིར་མི་འོང་བ་ནི་དེ་ཉིད་དུ་ཡོངས་སུ་མྱ་ངན་ལས་འདའ་བའི་ཕྱིར་འཇིག་རྟེན་འདིར་འོང་བར་མི་འགྱུར་བའོ། །དགྲ་ཞེས་བྱ་བ་ནི་ཁམས་གསུམ་པའི་ཉོན་མོངས་པ་ལ་བྱ་སྟེ། དེ་དག་དེས་མ་ལུས་པར་བཅོམ་པས་དགྲ་བཅོམ་པ་ཞེས་བྱ་སྟེ། དེ་དག་བཞིན་ནོ། །བདེ་བ་མྱོང་བར་འགྱུར་བའི་ལས་ནི་བསོད་ནམས་སོ་ཞེས་བྱ་བ་ནི་བདེ་བའི་ཚོར་བ་ནི་འདོད་པའི་ཁམས་དང༌། བསམ་གཏན་གསུམ་པའི་བར་དུའོ། །དེའི་ཕྱིར་བསམ་གཏན་གསུམ་པའི་བར་དུ་དགེ་བའི་ལས་ནི་བསོད་ནམས་ཡིན་པར་བསྟན་ཏོ་ཞེས་གསུངས་སོ། །སྡུག་བསྔལ་ཡང་མ་ཡིན་བདེ་བ་ཡང་མ་ཡིན་པ་མྱོང་བར་འགྱུར་བ་ནི་མི་གཡོ་བ་སྟེ་ཞེས་བྱ་བ་ནི་སྡུག་བསྔལ་ཡང་མ་ཡིན། བདེ་བ་ཡང་མ་ཡིན་བའི་ཚོར་བ་ནི་བསམ་གཏན་བཞི་པ་ནས་བཟུང་སྟེ། སྲིད་པའི་རྩེ་མོའི་བར་དུའོ། །དེ་ལྟར་བྱས་ན་བསམ་གཏན་བཞི་པའི་ས་པའི་དགེ་བའི་ལས་དང༌། གཟུགས་མེད་པ་ན་སྤྱོད་པའི་ཐམས་ཅད་ནི་མི་གཡོ་བ་ཞེས་བྱའོ། །དེ་བས་ན་བསམ་གཏན་གསུམ་པའི་གོང་མའི་འོ་ཞེས་སྨྲས་སོ། །འདིར་ཁུངས་ཅི་ཡོད་ཅེ་ན། དེ་ལྟར་ནི་བཅོམ་ལྡན་འདས་ཀྱིས་བསམ་གཏན་གསུམ་པོ་འདི་ན་ནི་འཕགས་པ་འདི་དག་གཡོ་བ་ཡིན་ནོ་ཞེས་གསུངས་སོ། །བསམ་གཏན་བཞི་པ་འདིར་ནི་འཕགས་པ་འདི་དག་མི་གཡོ་བ་ཡིན་པར་གསུངས་སོ་ཞེའོ། །ཇི་ལྟ་ཞེ་ན། དགེ་སློང་འཆར་ཀ་འདི་ལྟར་འདོད་པ་ལས་
རྣམ་པར་དབེན་པ། སྡིག་པ་མི་དགེ་བའི་ཆོས་ལས་དབེན་པ། རྣམ་པར་རྟོག་པ་དང་བཅས་ཤིང༌། རྣམ་པར་དཔྱོད་པ་དང་བཅས་པ། དབེན་པ་ལས་སྐྱེས་པའི་དགའ་བ་དང་བདེ་བ་ཅན་བསམ་གཏན་དང་པོ་ཉེ་བར་བསྒྲུབས་ཏེ་གནས་སོ། །འདི་ནི་འདིར་འཕགས་པ་རྣམས་གཡོ་བ་ཡིན་པར་བསྟན་ཏོ། །ཅིའི་ཕྱིར་འདིར་འཕགས་པ་རྣམས་གཡོ་བ་ཡིན་པར་བསྟན་ཞེ་ན། འདིར་རྣམ་པར་རྟོག་པ་དང་རྣམ་པར་དཔྱོད་པ་གང་ཡིན་པ་སྟེ། འདི་ནི་འདིར་འཕགས་པ་རྣམས་གཡོ་བ་ཡིན་པར་བསྟན་ཏོ། །དགེ་སློང་འཆར་ཀ་གཞན་ཡང༌། རྣམ་པར་རྟོག་པ་དང་རྣམ་པར་དཔྱོད་པ་ཉེ་བར་ཞི་ནས་ནད་ཡོངས་སུ་དང་བས་སེམས་ཀྱི་རྒྱུད་གཅིག་ཏུ་གྱུར་བའི་ཕྱིར་རྣམ་པར་རྟོག་པ་མེད་ཅིང༌། རྣམ་པར་དཔྱོད་པ་མེད་པའི་ཏིང་ངེ་འཛིན་ལས་སྐྱེས་པའི་དགའ་བ་དང་བདེ་བ་ཅན་བསམ་གཏན་གཉིས་པ་ཉེ་བར་བསྒྲུབས་ཏེ་གནས་སོ། །འདི་ནི་འདིར་འཕགས་པ་དག་གཡོ་བ་ཡིན་པར་བསྟན་ཏོ། །ཅིའི་ཕྱིར་འདིར་འཕགས་པ་དག་གཡོ་བ་ཡིན་པར་བསྟན་ཞེ་ན། འདིར་གང་བདེ་བ་དང་མ་བྲལ་བ་གང་ཡིན་པ་སྟེ། འདི་ནི་འདིར་འཕགས་པ་དག་གཡོ་བ་ཡིན་པར་བསྟན་ཏོ། །གཞན་ཡང་དགེ་སློང་འཆར་ཀ་དགའ་བའི་འདོད་ཆགས་དང་བྲལ་ཏེ། བཏང་སྙོམས་སུ་གནས་པ་དྲན་པ་དང་ཤེས་བཞིན་ཅན་བདེ་བ་ལུས་ཀྱིས་སོ་སོར་མྱོང་བ་གང་འཕགས་པ་རྣམས་ཀྱིས་བཀའ་སྩལ་བ་གང་ཡིན་པ་སྟེ། བཏང་སྙོམས་ཅན་དྲན་པ་དང་ལྡན་ཞིང་བདེ་བ་ལ་གནས་པ་བསམ་གཏན་གསུམ་པ་ཉེ་བར་བསྒྲུབས་ཏེ་གནས་སོ། །འདི་ནི་འདིར་འཕགས་པ་རྣམས་གཡོ་བ་ཡིན་པར་བསྟན་ཏོ། །ཅིའི་ཕྱིར་འཕགས་པ་རྣམས་གཡོ་བར་བསྟན་ཞེ་ན། འདི་ལྟ་སྟེ་འདི་ནི་བདེ་བའོ། །འདི་ནི་བདེ་བའོ་ཞེས་སེམས་ཀྱིས་རྩོལ་བ་ཡིན་ཏེ། འདི་ནི་འདིར་འཕགས་པ་རྣམས་གཡོ་བ་ཡིན་པར་བསྟན་ཏོ། །དགེ་སློང་འཆར་ཀ་གཞན་ཡང་བདེ་བ་ཡང་སྤངས་སྡུག་བསྔལ་ཡང་སྤངས་ཏེ། ཡིད་བདེ་བ་དང༌། ཡིད་མི་བདེ་བ་ནི་སྔ་ནས་མེད་ཅིང༌། བདེ་བ་ཡང་མེད། སྡུག་བསྔལ་བ་ཡང་མེད་ཅིང་བཏང་སྙོམས་དང་དྲན་པ་ཡོངས་སུ་དག་ཅིང༌། བསམ་གཏན་བཞི་པ་ཉེ་བར་བསྒྲུབས་ནས་གནས་ཏེ། འདི་ནི་འདིར་འཕགས་པ་རྣམས་མི་གཡོ་བ་ཡིན་པར་བསྟན་ཏོ། །གལ་ཏེ་ས་འོག་མ་མི་གཡོ་
བ་ཡིན་ན་ནི་ས་གོང་མ་འདི་དག་མི་གཡོ་བ་ཡིན་པར་འགྲུབ་སྟེ། གཟུགས་མེད་པའི་ས་རྣམས་མི་གཡོ་བ་ཡིན་པར་བསྟན་ཏོ། །དེ་ལྟ་ན་འོག་མ་རྣམས་ཀྱི་བདེ་བ་ཡང་མ་ཡིན་སྡུག་བསྔལ་ཡང་མ་ཡིན་པའི་ཚོར་བ་ནི་རྣམ་པར་སྨིན་པ་མ་ཡིན་པར་འགྱུར་རོ་ཞེས་བྱ་བ་ནི་བསམ་གཏན་བཞི་པ་ལས་འོག་མན་སྡུག་བསྔལ་ཡང་མ་ཡིན། བདེ་བ་ཡང་མ་ཡིན་པ་མྱོང་བར་འགྱུར་བའི་མི་གཡོ་བའི་ལས་ཡོད་པ་མ་ཡིན་པའི་ཕྱིར་རོ། །སྡུག་བསྔལ་ཡང་མ་ཡིན། བདེ་བ་ཡང་མ་ཡིན་པའི་ཚོར་བ་ནི་བསམ་གཏན་གཞན་གྱི་ལས་ཀྱི་རྣམ་པར་སྨིན་པ་ཡིན་པར་འདོད་པ་ཡང་ཡིན་ནོ། །མདོ་སྡེ་དང་ཡང་འགལ་བར་འགྱུར་ཏེ་ཞེས་རྒྱས་པར་འབྱུང་བ་ལས། བསོད་ནམས་ཟད་ནས་ཞེས་བྱ་བ་འདི་ནི་བསམ་གཏན་གསུམ་པའི་གོང་མ་ན་ཡང་བསོད་ནམས་ཡོད་དོ་ཞེས་བྱ་བའི་དཔེར་འདི་ཡིན་ནོ། །བསམ་གཏན་བཞི་པ་ན་ནི་རང་གི་ས་པའི་གཡོ་བ་མེད་པས་མི་གཡོ་བ་ཡིན་པར་བསྟན་ཏོ་ཞེས་བྱ་བ་ནི་རྐྱེན་བརྒྱད་སྤངས་པའི་ཕྱིར་ཏེ། དེ་དག་ཀྱང་རྣམ་པར་རྟོག་པ་དང་རྣམ་པར་དཔྱོད་པ་དང་བདེ་བ་དང་སྡུག་བསྔལ་བ་དང་ཡིད་བདེ་བ་དང་དབུགས་རྔུབ་པ་དང་དབུགས་འབྱུང་བ་ཡིན་ནོ། །བསམ་གཏན་གཞན་དག་ཀྱང་མི་གཡོ་བ་མེད་པ་ནི་མ་ཡིན་ཏེ། ས་འོག་མའི་གཡོ་བ་མེད་པའི་ཕྱིར་རོ་ཞེས་བྱ་བ་ལ། བསམ་གཏན་དང་པོ་ནི་འདོད་པ་ན་སྤྱོད་པའི་ཉོན་མོངས་པ་དང་ཉེ་བའི་ཉོན་མོངས་བས་མི་བསྐྱོད་པ་ཡིན་པས་མི་གཡོ་བའོ། །བསམ་གཏན་གཉིས་པ་ནི་བསམ་གཏན་དང་པོར་གཏོགས་པའི་རྣམ་པར་རྟོག་པ་དང་རྣམ་པར་དཔྱོད་པས་མི་གཡོས་པ་ཡིན་པའི་ཕྱིར་མི་གཡོ་བའོ། །བསམ་གཏན་གསུམ་པ་ནི་བསམ་གཏན་གཉིས་པར་གཏོགས་པའི་དགའ་བ་གང་ཡིན་པས་མི་གཡོས་པའི་ཕྱིར་མི་གཡོ་བ་ཡིན་ནོ། །རྣམ་གྲངས་ཀྱིས་མི་གཡོ་བ་ཡིན་པར་བརྗོད་པར་རིགས་ཏེ་ཞེས་བྱ་བ་ནི་གཡོ་བ་དང་བཅས་པ་ཡིན་དུ་ཟིན་ཀྱང༌། རྣམ་པ་གཞན་གྱི་སྒོ་ནས་བསྟན་ཏོ། །ཇི་ལྟ་ཞེ་ན། དེའི་ཕྱིར། དེའི་ཡན་ལག་གིས་མྱ་ངན་ལས་འདས་པ་ཞེས་བྱ་བ་བཞིན་ཞེས་བྱ་བ་སྨྲས་ཏེ། ས་འོག་མ་པའི་ཉོན་མོངས་པ་དེ་དག་གི་ཡན་ལག་གིས་མྱ་ངན་ལས་འདས་པ་ཡིན་ཏེ། དེའི་ཡན་ལག་གིས་མྱ་ངན་ལས་འདས་པ་ཞེས་བྱ་བ་གང་ཡིན་པ་བཞིན་ནོ། །དེའི་ཡན་ལག་གིས་མྱ་ངན་ལས་འདས་
པ་ཞེས་བྱ་བ་ཇི་ལྟ་བུ་ཞེ་ན་ཞེས་བྱ་བ་རྒྱས་པར་བསྟན་ནས། ཚེ་དང་ལྡན་པ་ཀུན་དགའ་ལོ་དེའི་ཡན་ལག་གིས་མྱ་ངན་ལས་འདས་པ་ཞེས་བསྟན་ན་ཚེ་དང་ལྡན་པ་ཀུན་དགའ་བོ་དེའི་ཡན་ལག་གིས་མྱ་ངན་ལས་འདས་པར་བཅོམ་ལྡན་འདས་ཀྱིས་གསུངས་པ་གང་ལགས། ཚེ་དང་ལྡན་པ་དགེ་སློང་འདོད་པ་ཅན་འདོད་པ་ལས་དབེན་པ། སྡིག་པ་མི་དགེ་བའི་ཆོས་ལས་རྣམ་པར་དབེན་པ་རྣམ་པར་རྟོག་པ་དང་བཅས། རྣམ་པར་དཔྱོད་པ་དང་བཅས་པ། དབེན་པ་ལས་སྐྱེས་པའི་དགའ་བ་དང་བདེ་བ་ཅན་བསམ་གཏན་དང་པོ་ཉེ་བར་བསྒྲུབས་ཏེ་གནས་སོ། །དེ་ནི་དེའི་ཡན་ལག་གིས་མྱ་ངན་ལས་འདས་པ་ཡིན་པར་བཅོམ་ལྡན་འདས་ཀྱིས་རྣམ་གྲངས་ཀྱིས་བསྟན་ཏོ། །འདུ་ཤེས་མེད་འདུ་ཤེས་མེད་མིན་སྐྱེ་མཆེད་ཉེ་བར་བསྒྲུབས་ཏེ་གནས་སོ་ཞེས་བྱ་བའི་བར་དུ་རྒྱས་པར་བྱས་ནས་འདི་ནི་རྣམ་གྲངས་ཀྱིས་དེའི་ཡན་ལག་གིས་མྱ་ངན་ལས་འདས་པ་ཡིན་པར་བཅོམ་ལྡན་འདས་ཀྱིས་བསྟན་ཏོ། །ཚེ་དང་ལྡན་པ་དགེ་སློང་འདོད་པ་ཅན་གཞན་ཡང་ཐམས་ཅད་དུ་འདུ་ཤེས་མེད་འདུ་ཤེས་མེད་མིན་སྐྱེ་མཆེད་ལས་ཡང་དག་པར་འདས་ཏེ་འདུ་ཤེས་དང་ཚོར་བ་འགོག་པ་ལུས་ཀྱིས་མངོན་དུ་བྱས་ནས་ཉེ་བར་གནས་སོ། །འདིས་ཤེས་རབ་ཀྱིས་ཀྱང་ཟག་པ་རྣམས་ཟག་པ་མཐོང་སྟེ། ཡོངས་སུ་ཟད་པ་འདི་ནི་དེའི་ཡན་ལག་གིས་མྱ་ངན་ལས་འདས་པ་རྣམ་གྲངས་མེད་པར་བཅོམ་ལྡན་འདས་ཀྱིས་བསྟན་ཏོ། །ནུས་པ་ཞེས་བྱ་བ་དེ་ཆོས་གང་ཞེ་ན། རྒྱུའི་དངོས་པོ་ཡིན་ནོ་ཞེས་བྱ་བ་ནི་རྒྱུའི་དངོས་པོ་ནི་འབྲས་བུ་བསྐྱེད་པས་རྣམ་པར་ཕྱེ་བ་ཡིན་ནོ། །དེ་ཉིད་ཀྱི་ཕྱིར་དཔེར་ན་འབྲུའི་འབྲས་བུ་ནི་རྐྱེན་གྱི་བྱེ་བྲགས་གཞི་དང་ཞེས་རྒྱས་པར་འབྱུང་བ་ཡིན་ནོ། །འདིར་འདི་དཔྱད་པར་བྱ་སྟེ། རྒྱུའི་དངོས་པོ་འདི་ཅི་ཡིན། དངོས་པོ་ལས་གཞན་མ་ཡིན་པ་ཡིན། ཅི་ཉེས་གལ་ཏེ་གཞན་ཡིན་ན་ནི་ས་བོན་ལ་སོགས་པའི་ཆོས་ནི་འདི་མ་ཡིན་པར་འགྱུར་རོ། །གལ་ཏེ་གཞན་མ་ཡིན་པ་ཡིན་ན་ནི་རྒྱུའི་དངོས་པོ་དུ་མ་ལས་རྣམ་པར་མ་ལོག་པ་གཅིག་ཡིན་པར་ཇི་ལྟར་འགྲུབ་པར་འགྱུར། ཡང་རྒྱུ་ཞེས་བྱ་བའི་དངོས་པོ་དག་གང་ལས་རྣམ་པར་ལོག་ཅིང་རྫས་སུ་ཡོད་པའི་ཆོས་ནི་འགའ་ཡང་ཡོད་པ་མ་ཡིན་ནོ། །ཡང་རྣམ་པར་ལོག་པའམ། མ་ལོག་པ་ཡང་རུང་སྟེ།
ས་བོན་ལ་སོགས་པ་ཡིན་པ་བརྗོད་པའི་དངོས་པོ་དེ་ནི་རྒྱུ་དུ་མ་གཞན་དང་གཞན་སྔ་བ་ཡིན་པ་ལས་དེ་ལྟར་མངོན་པར་གྲུབ་པ་ཡིན་ཏེ། དཔེར་ན་རྐྱེན་ལ་ལྟོས་ནས་དེའི་འབྲས་བུ་འགྲུབ་པ་གཞན་ནོ། །ལུས་གང་ཡིན་ལས་ཅི་ཡིན་ཅིའི་ཕྱིར་ན་ལུས་ཞེས་བྱ་བ་རྒྱས་པར་འབྱུང་བ་དང། དེ་བཞིན་དུ་ཡིད་ཀྱི་ལས་ཀྱི་བར་དུའོ་ཞེས་བྱ་བ་ནི་ཇི་ལྟར་ལུས་ལས་ཅི་ཡིན་ཅིའི་ཕྱིར་ན་ལུས་ཞེས་བྱ། ལས་ཞེས་བྱ་བ་ཡང་གང་ཡིན་ཞེས་བྱ་བ་དེ་བཞིན་དུ་ངག་གང་ཡིན། ཅིའི་ཕྱིར་ངག་ཅེས་བྱ་བ་དང༌། ངག་གི་ལས་ཀྱང་གང༌། ཡིད་ཀྱི་ལས་ཅི་ཡིན་ཅིའི་ཕྱིར་ན་ཡིད་ཀྱི་ལས་ཞེས་བྱ། ཡིད་ཀྱི་ལས་ཀྱང་གང་ཡིན་ཞེས་བྱའོ། །དེ་བས་ན་དེ་དག་ནི་གྲུབ་པ་ལས་གཟུང་བར་བྱ་སྟེ། ལས་གྲུབ་པ་ལས་ལུས་ལ་སོགས་པ་ཡང་ཇི་ལྟར་བསྟན་ཞེ་ན། ལུས་ནི་དབང་པོ་དང་བཅས་པའི་ལུས་འབྱུང་བ་དང་འབྱུང་བ་ལས་གྱུར་བ་འདུས་པའི་བྱེ་བྲག་གོ །བསགས་པའི་དོན་གྱིས་ལུས་ཞེས་བྱ་སྟེ། འབྱུང་བ་དང་འབྱུང་བ་ལས་གྱུར་བའི་རྡུལ་ཕྲ་རབ་བསགས་པ་ཡིན་པའི་ཕྱིར་རོ། །ཁ་ཅིག་ན་རེ་སྨད་པའི་དོན་གྱིས་ཡིན་ཏེ། མི་གཙང་བའི་རྫས་ཀྱི་འབྱུང་ཁུངས་ཡིན་པའི་ཕྱིར་རོ་ཞེ་ན། དེ་ལྟ་ན་ནི་ལྷའི་ལུས་ལུས་མ་ཡིན་པར་འགྱུར་རོ། །ངེས་པའི་ཚིག་གི་ཚུལ་གྱི་བྱེད་པ་པོ་ཡིད་ཀྱིས་མངོན་པར་འདུ་བྱེད་པ་ནི་ལས་ཡིན་པ་དང༌། ལུས་སྐྱོབ་པར་བྱེད་པའི་ལས་ནི་ལུས་ཀྱི་ལས་ཞེས་བྱ་བ་ལ། སེམས་པ་ཡང་རྣམ་པ་གསུམ་སྟེ། ཤིན་ཏུ་བསྐྱོད་པ་དང༌། ངེས་པ་དང་བསྐྱོད་པ་སྟེ་གང་གིས་ལུས་སྐྱོང་པར་བྱེད་པ་དེ་ནི་དེའི་རྒྱུན་ཡུལ་གཞན་དུ་འབྱུང་བར་བྱེད་པའི་རྒྱུ་རླུང་སྒྲུབ་པར་བྱེད་པའི་ཕྱིར་ཏེ། དེ་ནི་ལུས་ཀྱི་ལས་ཞེས་བྱ་སྟེ། ཚིག་བར་མ་མི་མངོན་པར་བྱས་པའི་ཕྱིར་འབྲུ་མར་གྱི་སྟོབས་དང་རླུང་གི་རྡུལ་བཞིན་ནོ། །ལས་ཀྱི་ལམ་ལ་ནི་ལས་རྣམ་པ་གསུམ་ཡིན་པར་འདོད་པ། སྲོག་གཅོད་པ་དང༌། མ་བྱིན་པར་ལེན་པ་དང༌། འདོད་པ་ལོག་པར་སྤྱོད་པ་ཡིན་ན་སེམས་པ་ལ་དེ་དག་ཇི་ལྟར་བརྗོད་པར་བྱ་ཞེ་ན། ངེས་ཤིན་ཏུ་གསོད་པ་དང་ལེན་པ་དང་ལོག་པར་སྤྱོད་པའི་ཕྱིར་དང༌། དེས་བསྐྱོད་པའི་ལུས་ཀྱི་རྒྱུན་བྱས་པ་ནི་དེས་བྱས་པ་ཞེས་བྱ་སྟེ། དཔེར་ན་རྐུན་པོས་གྲོང་བསྲེགས་པ་དང༌། རྩྭས་འབྲས་ཆན་ཚོས་པ་བཞིན་ནོ། །ཇི་ལྟར་
སེམས་པ་ལས་ཀྱི་ལམ་ཡིན་ཞེ་ན། དེ་ནི་ལས་ཀྱང་ཡིན། ངན་འགྲོ་རྣམས་ཀྱི་ལས་ཀྱང་ཡིན་པས་ལས་ཀྱི་ལམ་ཡིན་པའམ། ལུས་སྐྱོད་པར་བྱེད་པའི་སེམས་པ་ཞེས་བྱ་བ་རྣམ་པ་གསུམ་ཆར་ཡང་ལས་ཀྱི་ལམ་ཡིན་ནོ། །དེ་གང་ཞེ་ན། དེའི་དབང་གིས་འཇུག་པའི་ཕྱིར་དང༌། དེས་སྲོག་ལ་སོགས་པ་གཅོད་པ་དང༌། ལེན་པ་དང༌། ལོག་པར་སྤྱོད་པའི་ཕྱིར་རོ། །འཇིག་རྟེན་དང་རྗེས་སུ་མཐུན་པར་བྱ་བའི་ཕྱིར་དེ་ནི་ལུས་ཀྱི་ལས་ཡིན་ནོ་ཞེས་ཀྱང་སྟོན་ཏོ། །དགེ་བ་དང་མི་དགེ་བ་ཉིད་ནི་དེ་མ་ཡིན་ནོ། །གདགས་ན་ནི་སེམས་པ་དེའི་སྒོ་ནས་འཇིག་རྟེན་པའི་འཇུག་པ་དང་ལྡོག་པ་ཤིན་ཏུ་སྦྱོར་བའི་ཕྱིར་རོ། །གལ་ཏེ་སེམས་པ་ཁོ་ན་དགེ་བ་དང་མི་དགེ་བའི་ལས་ཡིན་ན་ནི་མདོ་སྡེ་ལས་བསམས་ནས་བྱས་པའི་ལུས་ཀྱི་ལས་རྣམ་པ་གསུམ་བྱས་ཤིང་ཉེ་བར་བསགས་པའི་མི་དགེ་བ་སྡུག་བསྔལ་འབྱུང་བར་བྱེད་པ་རྣམ་པར་སྨིན་པ་སྡུག་བསྔལ་བའོ་ཞེས་བྱ་བ་ཅིའི་ཕྱིར་གསུང་བར་འགྱུར་སྒོ་དེ་ནས་བྱས་པའི་ཕྱིར་རོ་ཞེས་དགོངས་པའོ། །དེ་ལས་གཞན་པའི་སེམས་པ་ནི་ཡིད་ཀྱི་ལས་ཡིན་ནོ་ཞེས་བསྟན་ཏེ། ཡིད་དང་མཚུངས་པར་ལྡན་པའི་ཕྱིར་དང༌། ལུས་དང་ངག་འཇུག་པར་མི་བྱེད་པའི་ཕྱིར་རོ། །འོ་ན་ཅིའི་ཕྱིར་སེམས་པའི་ལས་དང་བསམས་པའི་ལས་ཞེས་བཅོམ་ལྡན་འདས་ཀྱིས་གསུངས་ཤེ་ན། སྔར་སེམས་པ་རྣམ་པ་གསུམ་བསྟན་པ་དེ་ལ་གཉིས་ནི་བསམས་ནས་སོ། །གསུམ་པས་ནི་འཇུག་པར་བྱེད་པ་ཡིན་ཏེ། འདི་ཡང་བསམས་པའི་ལས་ཞེས་བྱའོ། །ཚིག་ནི་ངག་ཡིན་ཏེ། བརྗོད་པ་གང་གིས་དོན་ཁོང་དུ་ཆུད་པར་བྱེད་པའི་ལས་ཏེ་ཀུན་ནས་སློང་བར་བྱེད་པའི་སེམས་པ་ནི་ཡི་གེའི་རྣམ་པ་དང་ལྡན་པའི་ངག་གི་ལས་ཡིན་ཏེ་སྔ་མ་བཞིན་ནོ། །ངག་ཀུན་ནས་སློང་བར་བྱེད་པའི་ལས་ནི་ངག་གི་ལས་ཞེས་བྱ་སྟེ། ཚིག་བར་མ་མི་མངོན་པར་བྱས་པ་སྔ་མ་བཞིན་ནོ། །ཡིད་ནི་རྣམ་པར་ཤེས་པ་ལ་བྱ་སྟེ། མཉམ་པར་མ་བཞག་པ་ཡིན་པའི་ཕྱིར་དང༌། སྐྱེ་གནས་གཞན་དང༌། ཡུལ་ལ་འདུད་པར་བྱེད་པའི་ཕྱིར་རོ། །ཡིད་ཀྱི་ལས་ནི་དེ་དང་མཚུངས་པར་ལྡན་པའི་སེམས་པ་ཡིན་ཏེ། ཡིད་དང་མཚུངས་པར་ལྡན་པའི་ལས་ནི་ཡིད་ཀྱི་ལས་སོ་ཞེས་བྱ་བ་སྔ་མ་བཞིན་ནོ། །མ་རིག་པའི་རྐྱེན་གྱིས་འདུ་བྱེད་
ཅེས་བྱ་བ་འདིར་རྐྱེན་དང་རྐྱེན་ཅན་གཉིས་ངེས་པ་དང་མ་ངེས་པ་ལ་སྐྱོན་ཡོད་པ་ཡིན་ཏེ་ཞེས་བྱ་བ་ལ་རྐྱེན་དང་རྐྱེན་ཅན་ངེས་པ་ལ་སྐྱོན་ཡོད་པ་དང༌། གཉི་ག་ངེས་པ་ལ་སྐྱོན་ཡོད་པ་དང་མ་ངེས་པ་ལ་སྐྱོན་ཡོད་པའོ། །ཇི་ལྟ་ཞེ་ན། གལ་ཏེ་མ་རིག་པ་ཁོ་ན་འདུ་བྱེད་ཀྱི་རྐྱེན་ཡིན་ན་ནི་ཞེས་བྱ་བ་རྒྱས་པར་འབྱུང་བ་ཡིན་ནོ། །དགེ་བ་དང་མི་དགེ་བ་དང་འདུན་པ་དང་རྩོལ་བ་ལ་སོགས་པ་མེད་པར་ཡང་ཞེས་བྱ་བ་ནི་དགེ་བ་དང་འདུན་ཅིང་ལུས་དང་ངག་དགེ་བའི་རྩ་བ་ལ་རྩོལ་བ་དང༌། མི་དགེ་བ་དང་འདུན་ཅིང་ལུས་དང་ངག་མི་དགེ་བའི་རྩ་བ་རྩོལ་བ་དང༌། དགེ་བའི་རྩ་བ་དང་འདུན་ཅིང་ལུས་དང་ངག་དགེ་བའི་ལས་ལ་རྩོལ་བ་མེད་པར་ཡང༌། མ་རིག་པ་ཙམ་ལས་བསོད་ནམས་དང༌། བསོད་ནམས་མ་ཡིན་པ་དང༌། མི་གཡོ་བའི་འདུ་བྱེད་རྣམས་རྒྱུན་དུ་འབྱུང་བར་ཐལ་བར་འགྱུར་རོ་ཞེས་བྱ་བ་རྒྱས་པར་འབྱུང་བ་ཡིན་ནོ། །ཡང་མདོ་སྡེ་གཞན་ལས་དགེ་བའི་རྩ་བ་ཡང་གསུམ་མོ། །མི་དགེ་བའི་རྩ་བ་ཡང་གསུམ་སྟེ། གསུམ་པ་ནི་ལས་ཀྱི་གཞི་དང་ཀུན་འབྱུང་བ་ཡིན་ནོ་ཞེས་བྱ་བ་ནི་ཆགས་པ་ནི་ལས་ཀྱི་གཞི་དང་ཀུན་འབྱུང་བ་ཡིན་ཏེ། ཞེ་སྡང་དང་རྨོངས་པ་ཡང་ཡིན་ནོ། །ཆགས་པ་མེད་པ་ལ་སོགས་པ་ཡང་དེ་བཞིན་ནོ། །དེ་ལ་སོགས་པ་དང་འགལ་བར་འགྱུར་རོ་ཞེས་བྱ་བ་ནི་མ་རིག་པ་ཁོ་ན་དེ་དག་གི་རྐྱེན་ཡིན་ན་དགེ་བའི་རྩ་བ་ལ་སོགས་པ་དག་འདུ་བྱེད་རྣམས་ཀྱི་རྐྱེན་ཡིན་པར་འབྱུང་བ་དང་འགལ་བར་འགྱུར་རོ། །དེ་བཞིན་དུ་རེག་པ་ནི་སེམས་པའི་རྐྱེན་ཡིན་པར་འབྱུང་བ་དང་འགལ་བར་འགྱུར་རོ། །རྣམ་པར་རྟོག་པ་ཡང་རྣམ་པར་དཔྱོད་པ་གཉིས་ངག་གི་རྐྱེན་ཡིན་པར་འབྱུང་བ་ལ་སོགས་པ་དང་འགལ་ལོ། །དེ་ལྟར་ན་རེ་ཞིག་མ་རིག་པ་ཁོ་ན་འདུ་བྱེད་དེ་དག་གི་རྐྱེན་ཡིན་ན་ནི་དེ་དག་གི་རྐྱེན་མ་རིག་པ་ཡིན་པས་རྐྱེན་ངེས་པར་བྱས་ན་སྐྱོན་ཡོད་པ་ཡིན་ནོ། །འོན་ཏེ་འདུ་བྱེད་ཁོ་ནའི་རྐྱེན་མ་རིག་པ་ཡིན་ཏེ་ཞེས་བྱ་བ་ནི་རྐྱེན་ཅན་ངེས་པར་བྱས་ན་སྐྱོན་ཡོད་པ་ཡིན་ནོ། །རྐྱེན་ཅན་ངེས་པ་ཡིན་ན་ནི། མ་རིག་པའི་རྣམ་པར་སྨིན་པའི་འབྲས་བུ་མེད་པར་འགྱུར་རོ། །འོན་ཏེ་མ་ངེས་པ་ཡིན་ན་ནི་མ་རིག་པའི་རྐྱེན་གྱིས་འདུ་བྱེད་ཅེས་བརྗོད་པ་ཇི་ལྟར་དོན་མེད་པར་མི་འགྱུར་ཏེ། གལ་ཏེ་རེ་ཞིག་འདུ་བྱེད་ཀྱི་རྒྱུ་བརྗོད་པར་
འདོད་དེ་མ་རིག་པའི་རྐྱེན་གྱིས་འདུ་བྱེད་ཅེས་བྱ་བ་འདི་སྨྲས་པ་ཡིན་ན་ནི་འདུ་བྱེད་ཐམས་ཅད་ཀྱི་རྒྱུ་ཡིན་པར་བརྗོད་པར་བྱ་དགོས་སོ། །འོན་ཏེ་མ་རིག་པའི་འབྲས་བུ་བརྗོད་པར་འདོད་ན་ནི་མ་རིག་པའི་འབྲས་བུ་ཐམས་ཅད་བརྗོད་པར་བྱ་དགོས་སོ། །འོན་ཏེ་རྒྱུ་བརྗོད་པར་བྱ་བའི་ཕྱིར་ཡང་མ་ཡིན་ནོ། །འབྲས་བུ་བརྗོད་པར་བྱ་བའི་ཕྱིར་ཡང་མ་ཡིན་ན་ནི་འོ་ན་ནི་མ་རིག་པའི་རྐྱེན་གྱིས་འདུ་བྱེད་ཅེས་འཆད་པ་འདི་དོན་མེད་པར་འགྱུར་རོ་ཞེ་ན། འདིར་ངེས་པ་དང་མ་ངེས་པ་གཉི་ག་ཡིན་ན་ཡང་བཤད་པ་དོན་མེད་པར་མི་འགྱུར་ཏེ། དེ་བཞིན་དུ་བསྟན་པ་ནི་འདུ་བྱེད་རྣམས་ཀྱི་རྐྱེན་གྱི་གཙོ་བོ་བསྟན་པའི་ཕྱིར་རོ་ཞེས་བྱ་བ་འདི་སྐད་བསྟན་ཏེ། རྐྱེན་བསྟན་པའི་ཕྱིར་མ་རིག་པའི་རྐྱེན་གྱིས་འདུ་བྱེད་ཅེས་བྱ་བ་དེ་བཞིན་དུ་བསྟན་དུ་ཟིན་ཀྱང་རྐྱེན་ཐམས་ཅད་བསྟན་པའི་ཕྱིར་ནི་མ་ཡིན་ནོ། །འོ་ན་ཅི་ཞེ་ན། གཙོ་བོའི་རྐྱེན་བརྗོད་པར་བྱ་བའི་ཕྱིར་རོ། །དེ་བས་ན་སྟོན་པ་དོན་མེད་པ་མ་ཡིན་ནོ། །བསོད་ནམས་ལ་སོགས་པའི་ལས་རྣམས་འདུ་བྱེད་ཉིད་ཡིན་པར་ནི་དེའི་དབང་གིས་ཡིན་པའི་ཕྱིར་དང་ཞེས་བྱ་བ་ལ་དེའི་དབང་གིས་ཡིན་པའི་ཕྱིར་དང་ཞེས་བྱ་བ་ནི་བསོད་ནམས་དང༌། བསོད་ནམས་མ་ཡིན་པ་དང༌། མི་གཡོ་བའི་ལས་རྣམས་ཀྱིས་ཡང་སྲིད་པ་མངོན་པར་འདུ་བྱེད་པ་ནི་མ་རིག་པའི་དབང་གིས་ཡིན་པའི་ཕྱིར་རོ་ཞེས་བྱ་བའི་ཐ་ཚིག་གོ །དེ་ཁོང་དུ་ཆུད་པར་བྱེད་པ་སྨྲས་པ་ནི་འདི་ལྟ་སྟེ་རིག་པ་དེ་མ་སྐྱེས་ན་ནི་ཡང་སྲིད་པ་མངོན་པར་འདུ་བྱེད་པ་ཡིན་གྱི་རིག་པ་སྐྱེས་ན་ནི་མ་ཡིན་ནོ་ཞེས་བྱ་བ་དང༌། ཀུན་ནས་འབྱུང་བ་ན་ཡང་ཅིའི་རྐྱེན་ཡིན་པའི་ཕྱིར་རོ་ཞེས་བྱ་བ་ཅི་ཞེ་ན། བསོད་ནམས་ལ་སོགས་པའི་ལས་ཀྱི་གཙོ་བོའི་རྐྱེན་ནི་མ་རིག་པ་ཡིན་ནོ་ཞེས་བྱ་བའོ། །ཇི་ལྟར་ཀུན་ནས་འབྱུང་བ་ན་མ་རིག་པའི་སྤྱིའི་རྐྱེན་ཡིན་པ་དེ་བཞིན་དུ་སྟོན་པ་ནི་བསོད་ནམས་མ་ཡིན་པའི་འདུ་བྱེད་རྣམས་ཀུན་ནས་འབྱུང་བ་ན་ཉོན་མོངས་པ་ཐམས་ཅད་དང་མཚུངས་པར་ལྡན་པའི་ཕྱིར་སྤྱིའི་རྐྱེན་ཡིན་ནོ་ཞེས་བྱ་བ་ནི་འདོད་ཆགས་དང་ཞེ་སྡང་ལ་སོགས་པའི་ཉོན་མོངས་པ་དང༌། ཉེ་བའི་ཉོན་མོངས་པ་ཐམས་ཅད་ཀྱིས་བསྒྲུབས་པའི་ལས་ཀུན་ནས་འབྱུང་བ་ན་ཉོན་མོངས་པའི་ས་ཆེན་པོ་པ་ཡིན་པའི་ཕྱིར་མ་རིག་པ་ནི་སྤྱིའི་རྐྱེན་ཡིན་ནོ། །གང་དུ་འདོད་ཆགས་ཀྱིས་ཀུན་ནས་བསླང་བའི་ལས་དེའི་རྐྱེན་ནི་ཞེ་
སྡང་མ་ཡིན་ནོ། །ཞེ་སྡང་གིས་ཀུན་ནས་བསླང་བའི་ལས་དེའི་རྐྱེན་ནི་འདོད་ཆགས་མ་ཡིན་ནོ་ཞེས་བྱ་བ་ལ་སོགས་པ་ཡིན་ནོ། །ཇི་ལྟར་ཉོན་མོངས་པ་ཐམས་ཅད་མ་རིག་པའི་རྐྱེན་གྱིས་ཀུན་ནས་བསླང་བ་དེ་བཞིན་དུ་དེ་དང་མཚུངས་པར་ལྡན་པ་སེམས་པ་རྣམས་ཀྱི་ཡང་ཡིན་ནོ་ཞེས་བྱ་བ་ནི་ཉོན་མོངས་པ་ཐམས་ཅད་དང་མཚུངས་པར་ལྡན་པ་རྣམས་ཀྱི་ཡང་ཡིན་ཞེས་བྱ་བའི་ཐ་ཚིག་གོ །ཉོན་མོངས་པ་ཐམས་ཅད་ཀུན་ནས་འབྱུང་བའི་རྐྱེན་མ་རིག་པ་ཇི་ལྟར་ཡིན། །ཅི་བྲག་པ་ཀུན་དུ་འབྱུང་བ་ཡང་དག་པ་ཇི་ལྟ་བ་བཞིན་དུ་རབ་ཏུ་ཤེས་སམ་ཞེ་ན། མ་རིག་པ་ཀུན་འབྱུང་གིས་ཟག་པ་ཀུན་འབྱུང་སྟེ། ཇི་སྐད་དུ་རྨོངས་པ་ཁོ་ནས་དེ་དག་སྐྱེ་བའི་ཕྱིར་ཞེས་བྱ་བ་ལ་སོགས་པ་གསུངས་པ་ཡིན་ནོ། །རེ་ཞིག་བསོད་ནམས་མ་ཡིན་པ་ནི་དེ་ལྟ་བུ་ཡིན་ནོ། །བསོད་ནམས་ཀྱི་འདུ་བྱེད་རྣམས་ཀྱི་ཡང་རྐྱེན་ཡིན་ཏེ། སྲིད་པ་དང་ལོངས་སྤྱོད་ཐ་དད་པ་མངོན་པར་སྒྲུབ་པ་དང་རྗེས་སུ་མཐུན་པ་ཀུན་ནས་དབྱུང་བ་ན་ཡང་ཞེས་རྒྱས་པར་འབྱུང་བ་དེ་ལ་སྲིད་པ་ནི་ལྷ་དང་མི་ལ་སོགས་པའི་ལུས་ལ་བྱའོ། །ལོངས་སྤྱོད་ནི་གཟུགས་དང་སྒྲ་ལ་སོགས་པའི་ཡུལ་རྣམས་སོ། །སྲིད་པ་དང་ལོངས་སྤྱོད་དེ་དག་གི་དབྱེ་བ་ནི་སྲིད་པ་དང་ལོངས་སྤྱོད་དབྱེ་བ་ཐ་དད་པའོ། །མངོན་པར་སྒྲུབ་པ་དེ་འདུ་བྱེད་གང་ཡིན་པ་དེ་དག་གི་རྒྱུ་བྱེད་པ་ལ་རྗེས་སུ་མཐུན་པ་ཞེས་བྱ་བ་ཡིན་པས་དེ་ནི་སྲིད་པ་དང་ལོངས་སྤྱོད་དབྱེ་བ་ཐ་དད་པ་མངོན་པར་སྒྲུབ་པ་དང་རྗེས་སུ་མཐུན་པ་ཞེས་བྱའོ། །དེ་དག་ཀུན་ནས་འབྱུང་བ་ན་ཡང་དེ་དག་དང་ལྷན་ཅིག་འབྱུང་བའི་མ་རིག་པ་ནི་སྤྱིའི་རྐྱེན་ཡིན་ཞེས་བྱ་བ་དེ་ལ་མངོན་པར་སྒྲུབ་པ་ནི་འདོད་པ་སྟེ། ལྷར་ཤོག་ཤིག །མིར་ཤོག་ཤིག །བདག་གི་ལོངས་སྤྱོད་ཀྱང་ཁྱད་པར་ཅན་དུ་ཤོག་ཤིག་ཅེས་བྱ་བ་ཡིན་ནོ། །མངོན་པར་སྒྲུབ་པ་དེ་དང་མཚུངས་པར་ལྡན་པའི་མ་རིག་པ་ནི་དེ་དག་དང་ལྷན་ཅིག་འབྱུང་བ་ཡིན་ནོ། །ས་དེར་ངེས་པར་འབྱུང་བར་ལྟ་བས་ཀུན་ནས་བསླང་བ་མི་གཡོ་བ་རྣམས་ཀྱི་ཡང་ཞེས་རྒྱས་པར་འབྱུང་བ་ལ་བསམ་གཏན་དང་པོ་ནས་སྲིད་པའི་རྩེ་མོའི་བར་དུ་ས་དེར་ཐར་པར་འདོད་པས་ངེས་པར་འབྱུང་བར་ལྟ་བ་ནི་ས་དེར་ངེས་པར་འབྱུང་བར་ལྟ་བའོ། །ས་དེར་ངེས་པར་འབྱུང་བར་ལྟ་བས་ཀུན་ནས་བསླང་བ་ནི་ས་དེར་ངེས་པར་འབྱུང་བས་ཀུན་ནས་བསླང་བའོ། །ས་དེར་ངེས་པར་འབྱུང་བས་
ཀུན་ནས་བསླང་བ་མི་གཡོ་བའི་འདུ་བྱེད་དེ་དག་གི་ཡང་དེ་དག་དང་ལྷན་ཅིག་འབྱུང་བར་ལྟ་བ་དེ་དང་མཚུངས་པར་ལྡན་པའི་མ་རིག་པ་ནི་ཅི་ཞེ་ན། སྤྱིའི་རྐྱེན་ཡིན་ནོ་ཞེས་བྱའོ། །དོན་དེ་དག་ཉིད་ཚིགས་སུ་བཅད་དེ་བརྗོད་པ་ཞེས་རྒྱས་པར་འབྱུང་བ་ནི་ཉོན་མོངས་པ་གཞན་དང་མཚུངས་པར་ལྡན་པའི་མ་རིག་པ་ཡང་འདུ་བྱེད་ཀྱི་རྐྱེན་ཡིན། མཚུངས་པར་ལྡན་པ་མ་ཡིན་པ་ཡང་གཙོ་བོའི་རྐྱེན་ཡིན་ནོ་ཞེས་བསྟན་མ་ཐག་པ་རྣམས་ཚིགས་སུ་བཅད་པས་བརྗོད་པ་ནི། འདུ་བྱེད་རྣམས་ཀྱི་རྐྱེན་ཉིད་དུ། །མ་རིག་བསྟན་པ་རྣམ་གཉིས་ཏེ། །ཞེས་བྱ་བ་ནི་རྣམ་པ་གཉིས་ནི་རྣམ་གཉིས་སོ། །ཇི་ལྟ་ཞེ་ན། དེའི་ཕྱིར། ཉོན་མོངས་གཞན་ལྡན་སྤྱི་ཡི་རྐྱེན། །དེ་མེད་པ་ནི་གཙོ་བོའི་རྐྱེན། །ཅེས་སྨྲས་ཏེ། ཅི་ཞེ་ན། ཉོན་མོངས་པ་གཞན་དང་མཚུངས་པར་ལྡན་པ་མ་ཡིན་པ་ནི་གཙོ་བོའི་རྐྱེན་ཡིན་ནོ་ཞེས་བྱ་བའི་ཐ་ཚིག་གོ །གལ་ཏེ་དེ་དག་གི་རྐྱེན་ཀྱང་མ་རིག་པ་ཡིན་པའི་ཕྱིར་ཞེས་རྒྱས་པར་འབྱུང་པ་ནི་གལ་ཏེ་ཉོན་མོངས་པ་དེ་དག་གི་རྐྱེན་ཡང་མ་རིག་པ་ཡིན་བཞིན་དུ་མ་རིག་པའི་ཡན་ལག་ཁོ་ན་བསྟན་གྱི། ཉོན་མོངས་པ་གཞན་མ་ཡིན་ན་གོ །མ་རིག་པ་ནི་ཉོན་མོངས་པ་རྣམས་ཀྱི་རྐྱེན་ཡིན་ལ། ཉོན་མོངས་པ་ཡང་འདུ་བྱེད་རྣམས་ཀྱི་ཡིན་པས། ཡན་ལག་ལྟག་པར་ཇི་ལྟར་ཐལ་བར་མི་འགྱུར་ཞེས་རྒོལ་པ་ནི་གླགས་མི་ཐོད་པ་ཡིན་ཏེ། གཙོ་བོའི་རྐྱེན་བརྗོད་པར་བཞེད་པའི་ཕྱིར་རོ། །མ་རིག་པ་ལས་གཞན་པའི་ཉོན་མོངས་པ་ནི་འདུ་བྱེད་རྣམས་ཀྱི་རྐྱེན་ཡིན་དུ་ཟིན་ཀྱང་གཙོ་བོའི་རྐྱེན་མ་ཡིན་ནོ། །འདུ་བྱེད་རྣམས་ཀྱིས་བསྡུས་པའི་དོན་རྣམ་པར་གཞག་པ་འདིར་རྣམ་པ་བཅུར་རིག་པར་བྱ་སྟེ། རབ་ཏུ་དབྱེ་བ་རྣམས་པར་གཞག་པ་ནི་ཇི་སྐད་དུ་འདུ་བྱེད་ནི་གསུམ་སྟེ། ལུས་ཀྱི་འདུ་བྱེད་དང༌། ངག་གི་འདུ་བྱེད་དང༌། ཡིད་ཀྱི་འདུ་བྱེད་དོ་ཞེས་བསྟན་པ་ཡིན་ནོ། །བྱ་བ་བྱེད་པའི་མཚན་ཉིད་རྣམ་པར་གཞག་པ་ནི། ཇི་སྐད་དུ་ལུས་དང་ངག་དང་ཡིད་ཀྱི་ལས་ཀྱི་བྱེ་བྲག་ནི་འདིར་ལུས་ལ་སོགས་པའི་འདུ་བྱེད་ཡིན་པར་དགོངས་པའོ། །འདི་ཇི་ལྟར་མངོན་ཞེ་ན། མདོ་སྡེ་དང་རིགས་པ་ལས་ཞེས་རྒྱས་པར་བསྟན་པ་ཡིན་ནོ། །བྱེ་བྲག་རྣམ་པར་གཞག་པ་ནི་བསོད་ནམས་དང༌། བསོད་ནམས་མ་ཡིན་པ་དང༌། མི་གཡོ་བ་ཞེས་བྱ་བའོ། །འདུ་བྱེད་ཀྱི་
མཚན་ཉིད་རྣམ་པར་གཞག་པ་ནི། ཇི་སྐད་དུ་ལས་ཀྱི་བྱེ་བྲག་དབྱེ་བའི་ཕྱིར་འདུ་བྱེད་སྨོས་ཏེ། ལས་གང་ཡང་སྲིད་པ་མངོན་པར་འདུ་བྱེད་པ་དེ་ཉིད་ཇི་ལྟར་ཤེས་པར་འགྱུར་བ་དེ་ཡིན་ནོ་ཞེས་བསྟན་པ་ཡིན་ནོ། །ཡང་སྲིད་མངོན་པར་འདུ་བྱེད་པ་རྣམ་པར་གཞག་པ་ནི་ཇི་སྐད་དུ་མ་བཏབ་པ་དེ་འདེབས་པ་སྟེ། རྣམ་པར་ཤེས་པའི་རྒྱུད་ལ་ཐོག་མ་ཉིད་དུ་དེ་ས་བོན་གཞག་པའི་ཕྱིར་རོ་ཞེས་བསྟན་པའོ། །རྗེས་སུ་འབྲེལ་པ་རྣམ་པར་དབྱེ་བ་རྣམ་པར་གཞག་པ་ནི། ཇི་སྐད་དུ་ས་བོན་ཞེས་བྱ་བ་འདི་ཅི་ཡིན་ནུས་པའི་བྱེ་བྲག་གོ །ནུས་པ་ཞེས་བྱ་བ་དེ་ཆོས་གང་ཞེ་ན་ཞེས་རྒྱས་པར་བསྟན་པའོ། །མཐར་ཐུག་པར་རྣམ་པར་གཞག་པ་ནི་ཇི་སྐད་དུ་ས་བོན་རྒྱས་པ་དེ་སེམས་ཀྱི་རྒྱུད་ལ་ཡུན་ཇི་སྲིད་གཅིག་ཏུ་གནས་ཤེ་ན། ཇི་སྲིད་འབྲས་བུ་མ་སྐྱེས་པའི་བར་དུའོ་ཞེས་བསྟན་ཏོ། །རང་གི་མཚན་ཉིད་རྣམ་པར་གཞག་པ་ནི་ཇི་སྐད་དུ་དེ་བས་ན་དེ་དག་ནི་ལས་གྲུབ་པ་ལས་གཟུང་བར་བྱའོ། །དེ་ལས་ཀྱང་སེམས་པའི་རང་གི་མཚན་ཉིད་ནི་ལས་ཡིན་ནོ་ཞེས་བསྟན་པ་ཡིན་ནོ། །བྱེད་པ་རྣམ་པར་གཞག་པ་ནི་དེ་ཉིད་ལས་ཇི་སྐད་དུ་ལུས་སྐྱོད་པར་བྱེད་པའི་ལས་ནི་ལུས་ཀྱི་ལས་སོ། །དག་ཀུན་ནས་སློང་བར་བྱེད་པའི་ལས་ནི་ངག་གི་ལས་སོ། །བྱེད་པ་པོ་ཡིད་ཀྱི་མངོན་པར་འདུ་བྱེད་པ་ནི་ཡིད་ཀྱི་ལས་སོ་ཞེས་བསྟན་པའོ། །གཙོ་བོའི་རྐྱེན་རྣམ་པར་གཞག་པ་སྟེ། ཇི་སྐད་དུ། འདུ་བྱེད་རྣམས་ཀྱི་རྐྱེན་ཉིད་དུ། །མ་རིག་བསྟན་པ་རྣམ་གཉིས་ཏེ། །ཉོན་མོངས་གཞན་ལྡན་སྤྱི་ཡི་རྐྱེན། །དེ་མེད་པ་ནི་གཙོ་བོའི་རྐྱེན། །ཅེས་བསྟན་པའོ། །འདུ་བྱེད་རྣམ་པར་དབྱེ་བ་རྫོགས་སོ།། །།རྣམ་པར་ཤེས་པ་གང་ཞེ་ན་ཞེས་བྱ་བ་མདོ་སྡེ་གཞན་ལས་ནི་རྣམ་པར་ཤེས་པའི་ཚོགས་དྲུག་ལ་བྱ་བར་གྲགས་སོ། །འདིར་ནི་འདུ་བྱེད་ཀྱི་རྐྱེན་གྱིས་རྣམ་པར་ཤེས་པ་ཡིན་པར་གསུངས་ཏེ་དེའི་ཕྱིར་གཏན་ལ་དབབ་པར་བྱ་སྟེ། ཅི་འདུ་བྱེད་ཀྱི་རྐྱེན་གྱིས་ཐམས་ཅད་ཡིན་ནམ། འོན་ཏེ་འགའ་ཞིག་ཡིན་ཞེ་ན། དེའི་ཕྱིར་རྣམ་པར་ཤེས་པའི་ཚོགས་དྲུག་སྟེ་ཞེས་བྱ་བ་འདི་བསྟན་ཏོ། །དེ་ནི་རེ་ཞིག་རྣམ་པར་ངེས་པ་དང་བཅས་པ་རྒྱས་པར་བཤད་པ་བྱས་ན་ཤུགས་ཀྱིས་ཞེས་བྱ་བ་ནི་རྣམ་པར་ངེས་པའི་ཤུགས་ནི་རྣམ་པར་ངེས་པའི་ཤུགས་
སོ། །རྣམ་པར་ངེས་པ་དང་བཅས་པའི་ཤུགས་ཞེས་བྱ་བ་ནི་རྣམ་པར་ངེས་པ་དང་ལྷན་ཅིག་པའི་ཤུགས་ཏེ། དེའི་དོན་རྒྱས་པར་བཤད་པར་བྱས་ན་རྒྱས་པའི་ཤུགས་ཀྱིས་ཕྱིས་དགོངས་པའི་དོན་གྱིས་དེ་ཁོ་ན་ཉིད་ལེགས་པར་ཁོང་དུ་ཆུད་པར་འགྱུར་ཏེ། ཤུགས་ཀྱི་ཚུལ་གྱིས་ཀུན་གཞིའི་རྣམ་པར་ཤེས་པ་ཡིན་ནོ། །གདུལ་བྱ་གནས་པའི་བྱེ་བྲག་ལ་ལྟོས་ནས་ཞེས་བྱ་བ་ནི་དེའི་ཚེའི་གདུལ་བྱའི་བྱེ་བྲག་ལ་ལྟོས་ནས་ནི་དེ་དག་ནི་འདུ་བྱེད་ཀྱི་རྐྱེན་གྱིས་རྣམ་པར་ཤེས་པའི་རང་གི་ངོ་བོ་ཐེ་ཚོམ་ཟ་བ་མ་ཡིན་གྱི། འོ་ན་ཅི་ཞེ་ན། ཅི་འདུ་བྱེད་ཀྱི་རྐྱེན་གྱིས་རྣམ་པར་ཤེས་པ་ཐམས་ཅད་ཡིན་ནམ། འོན་ཏེ་འགའ་ཞིག་ཡིན་ཐེ་ཚོམ་ཟ་བའོ། །མ་འོངས་པའི་གདུལ་བྱའི་བྱེ་བྲག་ལ་ལྟོས་ནས་ཀྱང་ངོ་བོ་ཉིད་ནི་གསུངས་པ་མ་ཡིན་ཏེ། ངོ་བོ་ཉིད་བསྟན་པའི་སྐབས་སུ་མ་བབ་པའི་ཕྱིར་རོ། །འདིར་དགོས་པ་ནི་འདི་ཡིན་ནོ་ཞེས་བྱ་བར་ཇི་ལྟར་མངོན་ཞེ་ན། དེའི་ཕྱིར་འདི་ལྟ་སྟེ་ཁ་ཅིག་ཏུ་ནི་རྣམ་པར་དབྱེ་བ་ཡང་མི་སྟོན་ཏོ་ཞེས་བྱ་བ་སྨོས་ཏེ། གང་གི་ཕྱིར་མདོ་སྡེ་གཞན་ལས་བཅོམ་ལྡན་འདས་ཀྱིས་གདུལ་བྱ་གནས་པའི་བྱེ་བྲག་ལ་སྟོས་ནས་རྣམ་པར་ཤེས་པ་གནས་པའི་བྱེ་བྲག་ཀྱང་མ་གསུངས་ཀྱི་བསྟན་པ་ཙམ་ཁོ་ན་ཞིག་གསུངས་ཏེ། དཔེར་ན་དགེ་སློང་ཁྱེད་ལ་རྟེན་ཅིང་འབྲེལ་བར་འབྱུང་བ་དང་རྟེན་ཅིང་འབྲེལ་བར་འབྱུང་བའི་ཆོས་རྣམས་བཤད་པར་བྱ་སྟེ། ཉོན་ལ་ལེགས་པར་རབ་ཏུ་ཡིད་ལ་ཟུང་ཤིག་དང་བཤད་དོ། །རྟེན་ཅིང་འབྲེལ་བར་འབྱུང་བ་གང་ཞེ་ན། འདི་ལྟ་སྟེ་འདི་ཡོད་ན་འདི་འབྱུང་འདི་སྐྱེས་པས་འདི་སྐྱེ་བའོ། །རྟེན་ཅིང་འབྲེལ་བར་འབྱུང་བའི་ཆོས་རྣམས་གང་ཞེ་ན། འདི་ལྟ་སྟེ་མ་རིག་པའི་རྐྱེན་གྱིས་འདུ་བྱེད་ཅེས་རྒྱས་པར་འབྱུང་བའོ། །དེ་བཞིན་དུ་དགེ་སློང་དག་བྱེད་ལ་ཆོས་རྣམས་ཀྱི་འདུ་བ་དང་བྲལ་བ་ཡང་བཤད་པར་བྱའོ། །ཆོས་རྣམས་ཀྱི་འདུ་བ་གང་ཞེ་ན། འདི་ལྟ་སྟེ་འདི་ཡོད་ན་འདི་འབྱུང་ཞེས་བྱ་བ་སྔ་མ་བཞིན་ཏེ་དེ་ལ་སོགས་པའོ། །ཚོགས་ཀྱི་སྒྲས་ནི་དམིགས་པ་ལ་འཇུག་པའི་དབྱེ་བ་ཡང་བསྟན་པ་ཡིན་ཏེ་ཞེས་རྒྱས་པར་འབྱུང་བ་ལ་རྣམ་པར་ཤེས་པའི་ཚོགས་དྲུག་ཅེས་བྱ་བའི་ཚོགས་ཀྱི་སྒྲས་འདིས་གཟུགས་ལ་སོགས་པའི་དམིགས་པ་ལ་མིག་གི་རྣམ་པར་ཤེས་པ་ལ་སོགས་པ་དེ་དག་གི་འཇུག་པའི་དབྱེ་བ་ཡང་
བསྟན་པ་ཡིན་ནོ། །ཇི་ལྟར་བྱས་ནས་ཤེ་ན། ཚོགས་ཀྱི་སྒྲས་ནི་མིག་གི་རྣམ་པར་ཤེས་པ་ལ་སོགས་པ་རེ་རེ་ཡང་རྣམ་པ་མང་བར་བསྟན་པ་ཡིན་ཏེ། དེ་ལ་སྔོན་པོ་ལ་སོགས་པའི་དམིགས་པ་ཐ་དད་པའི་ཕྱིར་ཚོགས་ཀྱི་སྒྲས་མིག་གི་རྣམ་པར་ཤེས་པ་རྣམ་པ་མང་བར་བསྟན་ཏོ། །དེ་ལ་སྔོན་པོ་ལ་སོགས་པའི་དམིགས་པ་ཐ་དད་པའི་ཕྱིར་མིག་གི་རྣམ་པར་ཤེས་པ་རྣམ་པ་མང་བ་དེ་བཞིན་དུ་ཆོས་ཐ་དད་པའི་ཕྱིར་ཡིད་ཀྱི་རྣམ་པར་ཤེས་པའི་བར་དུའོ། །དེ་ལྟ་མ་ཡིན་ཏེ། གལ་ཏེ་ཚོགས་ཀྱི་སྒྲས་དམིགས་པ་ལ་འཇུག་པའི་དབྱེ་བ་མི་སྟོན་ན་ནི། རྣམ་པར་ཤེས་པ་དྲུག་ཅེས་དེ་ཙམ་ཞིག་གསུངས་པར་འགྱུར་ཏེ། ཚོགས་ཀྱི་སྒྲ་དགོས་པ་མེད་པའི་ཕྱིར་རོ། །ཚོགས་ཀྱི་སྒྲའི་དོན་བྱས་ཟིན་པའི་ཕྱིར་དང་ཞེས་བྱ་བ་ནི་ཚོགས་ཀྱི་སྒྲ་ཁོ་ནས་དམིགས་པ་ལ་འཇུག་པའི་དབྱེ་བ་བསྟན་ཟིན་པའི་ཕྱིར་རོ། །རྣམ་པར་ཤེས་པ་ལས་གཞན་ཚོགས་ཞེས་བྱ་བ་མེད་པར་བསྟན་པའི་ཕྱིར་རོ་ཞེས་བྱ་བ་ནི་རྣམ་པར་ཤེས་པའི་ཚོགས་དྲུག་བསྟན་ནས་མིག་གི་རྣམ་པར་ཤེས་པ་ལ་སོགས་པ་འཆད་པར་བྱེད་པ་ནི་མིག་གི་རྣམ་པར་ཤེས་པ་ལས་གཞན་ཚོགས་མེད་པ་ཡིན་ནོ་ཞེས་བྱ་བ་གང་ཡིན་པ་དེ་སྟོན་པ་ཡིན་ནོ། དེ་ལྟ་མ་ཡིན་ན་རྣམ་པར་ཤེས་པའི་ཚོགས་དྲུག་འཆད་པར་བྱེད་པ་ཁོ་ན་ཡིན་པར་གཟུང་བར་འགྱུར་རོ། །མིག་གི་རྣམ་པར་ཤེས་པ་ཡང་གང་ཞེ་ན། མིག་ལ་བརྟེན་ཅིང་གཟུགས་སོ་སོ་རྣམ་པར་རིག་པ་ནི་མིག་གི་རྣམ་པར་ཤེས་པའོ། །དེ་བཞིན་དུ་ཡིད་ཀྱི་རྣམ་པར་ཤེས་པའི་བར་དུ་ཅི་རིགས་པར་བརྗོད་པར་བྱའོ་ཞེས་བྱ་བ་ནི་རྣ་བ་ལ་བརྟེན་ཅིང་སྒྲ་སོ་སོ་རྣམ་པར་རིག་པ་ནི་རྣ་བའི་རྣམ་པར་ཤེས་པའོ། །སྣ་ལ་བརྟེན་ཅིང་དྲི་སོ་སོ་རྣམ་པར་རིག་པ་ནི་སྣའི་རྣམ་པར་ཤེས་པའོ། །ལྕེ་ལ་བརྟེན་ཅིང་རོ་སོ་སོ་རྣམ་པར་རིག་པ་ནི་ལྕེའི་རྣམ་པར་ཤེས་པའོ། །ལུས་ལ་བརྟེན་ཅིང་རེག་བྱ་སོ་སོ་རྣམ་པར་རིག་པ་ནི་ལུས་ཀྱི་རྣམ་པར་ཤེས་པའོ། །ཡིད་ལ་བརྟེན་ཅིང་ཆོས་སོ་སོ་རྣམ་པར་རིག་པ་ནི་ཡིད་ཀྱི་རྣམ་པར་ཤེས་པའོ་ཞེས་བྱ་བ་ཡིན་ནོ། །མིག་ནི་འདིའི་རྟེན་ཡིན་པས་འདི་ནི་མིག་ལ་བརྟེན་ཅིང་གཟུགས་སོ་སོ་རྣམ་པར་རིག་པའོ། །ཐུན་མོང་དང་ཐུན་མོང་མ་
ཡིན་པའི་རྒྱུ་ཉིད་གྱིས་གཙོ་བོའི་རྒྱུ་ཡིན་པའི་ཕྱིར་རོ་ཞེས་བྱ་བ་ནི་རྟེན་སྟོན་པའོ། །གཟུགས་ཀྱི་གཟུགས་བརྙན་ལྟ་བུའི་མིག་གི་རྣམ་པར་ཤེས་པ་ནི་གཟུགས་སྣང་བའི་དོན་གྱིས་གཟུགས་སོ་སོ་རྣམ་པར་རིག་པའོ་ཞེས་བསྟན་ཏོ། །སོ་སོ་རྣམ་པར་རིག་པ་མིག་གི་རྣམ་པར་ཤེས་པ་ཡིན་ནོ་ཞེས་སྨྲས་ན་ནི་རྣམ་པར་ཤེས་པ་ཐམས་ཅད་ཀྱི་སྤྱིའི་མཚན་ཉིད་སྨྲས་པར་འགྱུར་གྱི་བྱེ་བྲག་གི་མཚན་ཉིད་ནི་མ་ཡིན་པར་འགྱུར་རོ། །གཟུགས་སོ་སོ་རྣམ་པར་རིག་པ་ཡིན་ནོ་ཞེས་སྨྲས་ན་ནི་ཡིད་ཀྱི་རྣམ་པར་ཤེས་པ་ཡང་མིག་གི་རྣམ་པར་ཤེས་པ་ཡིན་པར་རྟོགས་པར་འགྱུར་ཏེ། དེ་ཡང་གཟུགས་སོ་སོ་རྣམ་པར་རིག་པའི་མཚན་ཉིད་ཡིན་པའི་ཕྱིར་རོ། །དེ་བས་ན་མིག་ལ་བརྟེན་ཅིང་ཞེས་བྱ་བས་ཁྱད་པར་དུ་བྱས་སོ། །ཚོར་བ་ལ་སོགས་པ་ཡང་མིག་ལ་བརྟེན་པ་དེ་བས་ན་སོ་སོ་རྣམ་པར་རིག་པ་ཞེས་སྨྲས་སོ། །དེ་དག་ཀྱང་བྱེ་བྲག་སྣང་བ་ཡིན་པའི་ཕྱིར་གཟུགས་ཀྱི་བྱེ་བྲག་དགའ་བ་དང་ཡོངས་སུ་གདུང་བ་ལ་སོགས་པའི་རྣམ་པར་སྣང་བ་ཡིན་པས་གཟུགས་སྨོས་སོ། །དེ་ལྟ་མ་ཡིན་ན་ཅི་ཞིག་རྣམ་པར་རིག་པ་ངེས་པར་མི་ཟིན་ཏོ། །དེ་བཞིན་དུ་ལུས་ཀྱི་རྣམ་པར་ཤེས་པའི་བར་དུ་ཐམས་ཅད་བརྗོད་པར་བྱའོ། །ཡིད་ཀྱི་རྣམ་པར་ཤེས་པ་ནི་ཡིད་ལ་བརྟེན་ཅིང་ཆོས་སོ་སོ་རྣམ་པར་རིག་པའོ་ཞེས་བྱ་བ་ལ་རྟེན་གྱི་དོན་ནི་སྔ་མ་བཞིན་ནོ། །སོ་སོ་རྣམ་པར་རིག་པའི་དོན་ནི་མདོར་ན་མིག་ལ་སོགས་པའི་རྣམ་པར་ཤེས་པ་གཞན་ཡང་ཡིད་ལ་བརྟེན་པ་ཡིན་ཡང་ཡིད་འབའ་ཞིག་ལ་བརྟེན་པ་མ་ཡིན་ནོ། །ཡིད་ཀྱི་རྣམ་པར་ཤེས་པ་ནི་ཡིད་འབའ་ཞིག་ལ་བརྟེན་པ་ཡིན་པས་དེ་བས་ན་རྟེན་གྱིས་ཀྱང་མིག་ལ་སོགས་པའི་རྣམ་པར་ཤེས་པ་ལ་བྱེ་བྲག་ཡོད་པ་ཡིན་ནོ། །དམིགས་པ་ཡང་བྱེ་བྲག་ཡོད་དེ་ཆོས་སོ་སོ་རྣམ་པར་རིག་པ་ཞེས་བསྟན་པའི་ཕྱིར་རོ། །གཞན་ཡང་ཆོས་སོ་སོ་རྣམ་པར་རིག་པ་སྨོས་པ་མེད་པ་ན་ནི་ཚོར་བ་ལ་སོགས་པ་ལ་ཡང་ཐལ་བར་འགྱུར་ཏེ། དེ་དག་ཀྱང་ཡིད་ལ་བརྟེན་པས་སོ། །ཡིད་ལ་བརྟེན་པ་ཞེས་མ་སྨོས་ན་ནི་རྟེན་ཅི་ཡིན་པ་ངེས་པར་མི་ཟིན་པར་འགྱུར་རོ། །མིག་ལ་སོགས་པ་ནི་གཅིག་ཁོ་ནར་སེམས་ཅན་གྱི་གྲངས་སུ་གཏོགས་པའི་ཕྱིར་ཅི་ཞེ་ན། གཟུགས་ཀྱི་རྣམ་པར་ཤེས་པ་ནས་ཆོས་ཀྱི་རྣམ་པར་ཤེས་པའི་བར་དུ་མི་བརྗོད་དོ། །སེམས་
ཅན་གྱི་གྲངས་སུ་གཏོགས་པ་ནི་དབང་བྱེད་པའི་དངོས་པོ་སྟོན་པའི་ཕྱིར་དེ་དག་གང་ཡིན་པ་དང་དབང་བྱེད་པ་དང་འབྲེལ་བའི་མཚན་ཉིད་ཀྱི་དྲུག་པ་ཡིན་པར་བརྟག་པར་བྱའོ། །གཟུགས་ལ་སོགས་པའི་ཡུལ་ནི་སེམས་ཅན་གྱི་གྲངས་སུ་གཏོགས་པ་དང༌། སེམས་ཅན་གྱི་གྲངས་སུ་མ་གཏོགས་པ་ཡང་ཡིན་ནོ། །ཐུན་མོང་དང་ཐུན་མོང་མ་ཡིན་པའི་རྒྱུ་ཉིད་ཀྱི་གཙོ་བོའི་རྒྱུ་ཡིན་པའི་ཕྱིར་རོ་ཞེས་བྱ་བ་ཅི་ཞེ་ན། མིག་ལ་སོགས་པ་ནི་གཅིག་ཁོ་ནར་སེམས་ཅན་གྱི་གྲངས་སུ་གཏོགས་པའི་ཕྱིར་གཟུགས་ཀྱི་རྣམ་པར་ཤེས་པ་ཞེས་མ་བསྟན་ཏོ། །ཆོས་ཀྱི་རྣམ་པར་ཤེས་པ་ཞེས་བྱ་བའི་བར་དུ་མ་བསྟན་ཏོ། །གཟུགས་དང་སྒྲ་ལ་སོགས་པའི་ཡུལ་རྣམས་ནི་ཐུན་མོང་གི་རྒྱུ་ཁོ་ན་ཡིན་ནོ། །གཙོ་བོའི་རྒྱུས་ཀྱང་འབྲས་བུ་སྟོན་པར་བྱེད་དེ། དཔེར་ན་རྔའི་སྒྲ་ལྟ་བུའོ། །ཐུན་མོང་གི་རྒྱུ་ཉིད་ནི་མིག་ནི་གཟུགས་སྔོན་པོ་ལ་སོགས་པའི་རྣམ་པར་ཤེས་པ་ཐམས་ཅད་ཀྱི་རྒྱུ་ཡིན་པའི་ཕྱིར་རོ། །རིགས་ཐ་དད་པ་མེད་པའི་དབང་དུ་བྱས་ནས་དེ་སྐད་བསྟན་ཏེ་རྣམ་པར་ཤེས་པ་སོ་སོའི་ནི་མིག་གི་དབང་པོའི་སྐད་ཅིག་མ་གཞན་དང་གཞན་ཡིན་ནོ། །གཟུགས་ལ་ནི་གཉི་ག་ཡོད་དེ་འདི་ལྟ་སྟེ་རྣམ་པ་ཐ་དད་པ་དང་སྐད་ཅིག་མ་ཐ་དད་པའོ། །འདིར་ནི་སྐད་ཅིག་མ་གཞན་ཐ་དད་པའི་དབང་དུ་བྱས་ཏེ་བསྟན་པ་མ་ཡིན་ནོ།། །།རྟེན་ཅིང་འབྲེལ་བར་འབྱུང་བ་དང་པོ་དང་རྣམ་པར་དབྱེ་བ་བསྟན་པ་རྒྱ་ཆེར་འགྲེལ་པ། བམ་པོ་ལྔ་པ། ཐུན་མོང་གི་རྒྱུ་ཞེས་བྱ་བ་ནི་མིག་ནི་སྔོན་པོ་ལ་སོགས་པའི་གཟུགས་ཀྱི་རྣམ་པར་ཤེས་པ་ཐམས་ཅད་ཀྱི་རྒྱུ་ཡིན་པའི་ཕྱིར་རོ་ཞེས་བྱ་བ་ཇི་ལྟ་བུ་ཞེ་ན་རྣམ་པ་ཐ་དད་པའི་དབང་དུ་བྱས་པ་ཡིན་ནོ། །གཟུགས་ལ་ནི་རྣམ་པ་ཐ་དད་པ་ཡོད་དུ་ཟིན་ཀྱང་རྣམ་པར་ཤེས་པ་རྣམ་པ་ཐ་དད་པའི་རྒྱུ་མ་ཡིན་པའི་ཕྱིར་རོ། །ཐུན་མོང་མ་ཡིན་པའི་རྒྱུ་ནི་རྒྱུད་གཅིག་པའི་རྣམ་པར་ཤེས་པའི་རྒྱུ་ཡིན་པའི་ཕྱིར་རོ་ཞེས་བྱ་བ་ནི་གཟུགས་ནི་རྒྱུད་ཐ་དད་པའི་རྣམ་པར་ཤེས་པའི་རྒྱུ་ཡིན་པའི་ཕྱིར་ཐུན་མོང་གི་རྒྱུ་ཡིན་ནོ་ཞེས་བསྟན་ཏོ། །དེ་བཞིན་དུ་ཡིད་ཀྱི་བར་དུ་ཅི་རིགས་པར་བརྗོད་པར་བྱའོ་ཞེས་བྱ་བ་ཇི་ལྟ་བུ་ཞེ་ན། རྣ་བ་ནི་ཐུན་མོང་གི་རྒྱུ་སྟེ། སྒྲ་ཐམས་ཅད་ཀྱི་རྣམ་པར་ཤེས་པའི་རྒྱུ་ཡིན་པའི་ཕྱིར་རོ། །ཐུན་མོང་མ་ཡིན་པའི་རྒྱུ་ནི་རྒྱུད་གཅིག་པའི་རྣམ་པར་ཤེས་པའི་རྒྱུ་ཡིན་པའི་ཕྱིར་རོ། །དེ་བཞིན་
དུ་སྣ་ལ་སོགས་པ་ལ་ཡང་དེ་བཞིན་དུ་སྦྱར་རོ། །དབང་པོ་དང་དོན་ངེས་པས་རྣམ་པར་ཤེས་པ་ངེས་པ་ཞེས་རྒྱས་པར་འབྱུང་བ་ནི་མིག་ལ་སོགས་པ་དབང་པོ་རྣམས་དང༌། གཟུགས་ལ་སོགས་པ་དོན་རྣམས་ཡུལ་དང་ཡུལ་ཅན་གཉིས་སུ་ངེས་པ་ནི་མ་ངེས་པར་ཇི་ལྟར་འགྱུར་ཏེ། མིག་གི་དབང་པོའི་དོན་ཡུལ་གང་ཡིན་པ་དེ་ཉིད་གཟུགས་ཡིན་ནོ། །ལུས་ཅན་ནི་མིག་གི་དབང་པོ་ཡིན་ནོ། །དེ་བཞིན་དུ་ལུས་ཀྱི་དབང་པོའི་དོན་ཡུལ་གང་ཡིན་པ་དེ་ཉིད་རེག་བྱ་ཡིན་ནོ། །ཡུལ་ཅན་ནི་ལུས་ཀྱི་དབང་པོ་ཡིན་ནོ། །དྲུག་པ་ཡིད་རྣམ་པར་ཤེས་པ་དྲུག་གི་མཚན་ཉིད་དང༌། ཆོས་དང་གཉིས་ཡུལ་དང་ཡུལ་ཅན་དུ་ངེས་པ་ནི་རྣམ་པ་གཞན་ཡིན་ནོ། །ཅིའི་ཕྱིར་ཞེ་ན། གལ་ཏེ་རེ་ཞིག་མིག་ལ་སོགས་པ་བཞིན་དུ་ངེས་པར་བྱེད་ན་ནི་ཡིད་གང་ཡིན་པའི་ཡུལ་དེ་ཉིད་ནི་ཆོས་ཀྱི་སྐྱེ་མཆེད་དང་ཆོས་སུ་མ་གཏོགས་པ་ཡང་ཡིན་པས་དེ་ལྟ་ཡིན་ན་ཆོས་ཀྱི་སྐྱེ་མཆེད་རྫས་བདུན་པོ་འདི་ཡིན་ནོ་ཞེས་བྱ་བ་འགྲུབ་པར་མི་འགྱུར་ཏེ། མིག་ལ་སོགས་པ་དང༌། གཟུགས་ལ་སོགས་པ་ཐམས་ཅད་ཡིད་ཀྱི་ཡུལ་ཡིན་པའི་ཕྱིར་རོ། །འོན་ཏེ་ཡིད་ཁོ་ནའི་ཡུལ་གང་ཡིན་པ་ཡིན་གྱི་མིག་ལ་སོགས་པའི་མ་ཡིན་ན་ནི་དེ་ལྟ་ན་ཡང་གཟུགས་ལ་སོགས་པ་ལྔ་ནི་བསལ་བ་ཡིན་ན་མིག་ལ་སོགས་པ་ལྔ་དང༌། རྣམ་པར་ཤེས་པའི་ཚོགས་དྲུག་དང༌། ཚོར་བ་ལ་སོགས་པ་བདུན་ཡང་དེའི་ཡུལ་ཉིད་ཡིན་པའི་ཕྱིར་ཆོས་ཀྱི་སྐྱེ་མཆེད་ཡིན་པར་ཐལ་བར་འགྱུར་རོ། །དེ་བས་ན་ངེས་པ་རྣམ་པ་གཉིས་བྱས་ཏེ། ཡིད་ཁོ་ནའི་ཡུལ་གང་ཡིན་པ་ཡིན་གྱི་མིག་ལ་སོགས་པའི་ནི་མ་ཡིན་ནོ་ཞེས་བྱ་བས་གཟུགས་ལ་སོགས་པ་བསལ་བར་གྱུར་བ་དང༌། ཡུལ་ཁོ་ན་ཡིན་གྱི་རྟེན་བྱེད་པ་ནི་མ་ཡིན་ནོ་ཞེས་བྱ་བས་མིག་ལ་སོགས་པ་དང་རྣམ་པར་ཤེས་པའི་ཚོགས་དྲུག་བསལ་བར་འགྱུར་བ་ཡིན་ནོ། །དེ་ལྟར་བྱས་ན་ཆོས་ཀྱི་སྐྱེ་མཆེད་རྫས་བདུན་ནི་ཆོས་ཀྱི་སྒྲས་བསྟན་པ་ཡིན་ནོ་ཞེས་བྱ་བ་གྲུབ་པ་ཡིན་ནོ། །དེ་ལྟར་ན་དབང་པོ་དང་དོན་ངེས་པས་རྣམ་པར་ཤེས་པ་རྣམ་པ་དྲུག་སྐྱེ་བ་ངེས་པ་རབ་ཏུ་བསྟེན་པའི་ཕྱིར་ཏེ། ཇི་ལྟ་ཞེ་ན། མིག་དང་གཟུགས་ནི་མིག་གི་རྣམ་པར་ཤེས་པའི་རྐྱེན་ཡིན་པ་ནས་ཡིད་དང་ཆོས་ནི་ཡིད་ཀྱི་རྣམ་པར་ཤེས་པའི་ཡིན་པས། གཉིས་ལ་བརྟེན་ནས་རྣམ་པར་ཤེས་པ་ཞེས་གསུངས་སོ། །དེ་ལྟ་བུའི་དོན་དེ་དག་ཉིད་ཅེས་བྱ་བ་དབང་པོ་དང་དོན་ངེས་
པ་བསྟན་མ་ཐག་པ་གང་ཡིན་པ་རྣམས་ཚིགས་སུ་བཅད་དེ་གསུངས་པ་ནི། ལྔ་པོ་གཉིས་ནི་དབང་པོ་རྣམས། །ཞེས་རྒྱས་པར་འབྱུང་བའོ། །ལྔ་པོ་གཉིས་གང་ཞེ་ན། དབང་པོ་རྣམས་གང་གི་དོན་གང་ཡིན་པ་དེའི་དོན་དེ་དག་ཉིད་ཡིན་གྱི་གཞན་མ་ཡིན་ཏེ། དཔེར་ན་མིག་གི་དབང་པོའི་དོན་གཟུགས་ཁོ་ན་ཡིན་པ་ནས་ལུས་ཀྱི་དབང་པོའི་ནི་རེག་བྱ་ཡིན་ནོ་ཞེས་བྱ་བའི་བར་དུའོ། །མིག་དང་གཟུགས་ནས་ལུས་དང་རེག་བྱའི་བར་དེ་དག་ནི་ལྔ་པོ་གཉིས་ཁོ་ན་ཡིན་ནོ། །མིག་དང་གཟུགས་ནས་ལུས་དང་རེག་བྱའི་བར་ལྔ་པོ་དེ་དག་ནི་སྐྱེ་མཆེད་དུ་ནི་བཅུ་ཡིན་ནོ། །ཡིད་གང་ཡིན་པ་དེ་ཉིད་ཀྱི་དོན་ཡིན་གྱི་གཞན་གྱི་མ་ཡིན་པ་དང༌། དོན་གང་ཡིན་པ་དེ་ཉིད་ཡིན་གྱི་རྟེན་ནི་མ་ཡིན་པ་སྟེ། དེ་ལྟར་ན་དྲུག་པའི་སྐྱེ་མཆེད་གཉིས་ནི་ཡིད་ཀྱི་སྐྱེ་མཆེད་དང༌། ཆོས་ཀྱི་སྐྱེ་མཆེད་དོ། །དེ་ལྟར་ན་རེ་ཞིག་མདོ་སྡེ་གཞན་ལས། གཉིས་ལ་བརྟེན་ནས་རྣམ་པར་ཤེས་པ་འབྱུང་ངོ་ཞེས་གསུངས་པའི་དགོངས་པ་རྒྱས་པར་བསྟན་པ་ཡིན་ནོ། །ཡང་གཞན་ལས་འཕགས་པ་ཤཱ་རིའི་བུས་ཚེ་དང་ལྡན་པ་གང་གི་ཕྱིར་ཞེས་བྱ་བ་ནས། དེ་སྐྱེད་པ་ཡིད་ལ་བྱེད་པ་ཉེ་བར་གནས་ན་དེ་ལས་སྐྱེས་པའི་མིག་གི་རྣམ་པར་ཤེས་པ་འབྱུང་བར་འགྱུར་རོ་ཞེས་གསུངས་པས་ཡིད་ལ་བྱེད་པ་ཡང་རྐྱེན་ཡིན་པར་གསུངས་སོ། །ཞེས་བྱ་བ་འདིའི་དགོངས་པ་སྟོན་པ་ནི། ཡིད་ལ་བྱེད་པ་ནི་རིགས་མི་དབྱེ་བར་ཐམས་ཅད་ཀྱི་སྤྱིའི་རྐྱེན་ཡིན་ཏེ་ཞེས་རྒྱས་པར་སྨོས། རིགས་དབྱེ་བ་མེད་པ་ཇི་ལྟ་བུ་ཞེ་ན། དཔེར་ན་མིག་ལ་སོགས་པ་དང༌། གཟུགས་ལ་སོགས་པ་མིག་གི་རྣམ་པར་ཤེས་པ་སྐྱེ་བའི་རྐྱེན་ནི། རིགས་ཐ་དད་པའི་དངོས་པོ་ཡིན་གྱི། དེ་ལྟར་ཡིད་ལ་བྱེད་པའི་ནི་མ་ཡིན་ཏེ། ཡིད་ལ་བྱེད་པའི་རིགས་ནི་ཐ་དད་པ་མེད་པ་ཡིན་པས་རིགས་ཐ་དད་པ་མེད་པའི་དབང་དུ་བྱས་པ་ཡིན་གྱི། སྐད་ཅིག་མ་སོ་སོ་ནི་ཐ་དད་པ་ཡིན་ནོ། །མིག་གི་རྣམ་པར་ཤེས་པའི་རྐྱེན་གང་ཡིན་པ་དེ་ནི་རྣ་བའི་རྣམ་པར་ཤེས་པའི་མ་ཡིན་ནོ། །གང་ཡང་མིག་གི་རྣམ་པར་ཤེས་པ་ཆུང་ངུའི་གང་ཡིན་པ་དེ་ནི་ཤིན་ཏུ་ཆེན་པོ་མ་ཡིན་ནོ། །དེ་ཉིད་ཀྱི་ཕྱིར་རིགས་མི་དབྱེ་བར་ཞེས་སྨྲས་ཏེ། ཅི་ཞེ་ན། མིག་གི་རྣམ་པར་ཤེས་པ་ལ་སོགས་པ་ཐམས་ཅད་ཀྱི་སྤྱིའི་རྐྱེན་ནི་ཡིད་ལ་བྱེད་པ་ཡིན་ནོ། །དེ་བསྐྱེད་པ་ཞེས་བྱ་བ་ནི་ངེས་པའི་ཚིག་ཚུལ་གྱིས་དེ་སྐྱེད་པར་བྱེད་པ་ནི་དེ་སྐྱེད་པའོ། །
དེ་ནི་ཕྱིས་ཡིད་ལ་གཅགས་པ་སྐྱེད་པར་འགྱུར་རོ་ཞེས་བྱ་བ་ནི་ཡིད་ལ་གཅགས་པ་སྐྱེད་པར་བྱེད་པ་ཡིན་ཞེས་བྱ་བར་མངོན་ནོ། །ཡང་ན་དེའི་ཆེད་དུ་སྐྱེས་པ་ཡིན་ཞེས་བྱ་བར་མངོན་ཏེ། རྣམ་པར་ཤེས་པའི་དོན་དུའམ། རྣམ་པར་ཤེས་པའི་རྒྱུ་མཚན་དུ་ཞེས་བྱ་བའི་ཐ་ཚིག་གོ །དཔེར་ན་པགས་པའི་ཕྱིར་ནི་གཟིག་བསད་དོ་ཞེས་རྒྱས་པར་འབྱུང་བ་ལ་པགས་པའི་ཆེད་དང་པགས་པའི་རྒྱུ་མཚན་དང་པགས་པའི་དོན་དུ་ཞེས་བྱ་བ་དང༌། བ་སོའི་ཕྱིར་ནི་བ་སོའི་རྒྱུ་མཚན་ཞེས་བྱ་བ་དང༌། རྔ་མའི་ཕྱིར་ཞེས་བྱ་བ་རྔ་མའི་རྒྱུ་མཚན་དང་ཞེས་བྱ་བ་དང༌། བུད་མེད་ཀྱི་ཕྱིར་ཞེས་བྱ་བ་བུད་མེད་ཀྱི་རྒྱུ་མཚན་ཞེས་བྱ་བ་ཡིན་ཏེ། རྒྱུ་མཚན་གྱི་བདུན་པ་ཡིན་ཞེས་བྱ་བར་མངོན་པ་དེ་བཞིན་ནོ། །དེ་ལས་གཞན་པ་གཉིས་ཚོགས་པ་ཡོད་དུ་ཟིན་ཀྱང་ཞེས་བྱ་བ་ནི་ཡིད་ལ་བྱེད་པ་དེ་ལས་གཞན་པ་དབང་པོ་དང་དོན་གཉིས་ཚོགས་པ་ཡོད་དུ་ཟིན་ཀྱང་ཞེས་བྱའོ། །དེ་དང་མི་མཐུན་པའི་ཡིད་ལ་བྱེད་པ་ཀུན་དུ་འབྱུང་བའི་ཕྱིར་རོ་ཞེས་བྱ་བ་ནི་དབང་པོ་དང་དོན་གཉིས་ཀྱི་རྐྱེན་གྱིས་རྣམ་པར་ཤེས་པ་འབྱུང་བ་དང་མི་མཐུན་པའི་ཡིད་ལ་བྱེད་པ་ཀུན་དུ་འབྱུང་བའི་ཕྱིར་རོ་ཞེས་བྱ་བའི་ཐ་ཚིག་གོ །ཕྱིས་ཡང་འབྱུང་སྟེ། དེ་དང་བྲལ་བའི་ཕྱིར་རོ་ཞེས་བྱ་བ་ནི་དེ་དང་མི་མཐུན་པའི་ཡིད་ལ་བྱེད་པ་དང་བྲལ་བའི་ཕྱིར་ཞེས་བྱ་བའི་ཐ་ཚིག་གོ །ཡང་མདོ་སྡེ་གཞན་ལས་མིང་དང་གཟུགས་ཀྱི་རྐྱེན་གྱིས་རྣམ་པར་ཤེས་པ་ཞེས་གསུངས་པའི་དགོངས་པ་ནི། དབང་པོ་དང་དོན་དང་ཡིད་ལ་བྱེད་པ་དེ་དག་ཉིད་བསྡུས་པའི་མིང་གཟུགས་ཀྱི་རྐྱེན་གྱིས་ཞེས་རྒྱས་པར་འབྱུང་བ་ཡིན་ནོ། །བསྡུས་པའི་ཞེས་བྱ་བ་ནི་མདོར་བསྡུས་ན་ཞེས་བྱ་བ་ཡིན་ནོ། །ཇི་ལྟ་ཞེ་ན། གང་ཡིད་དང་མཚུངས་པར་ལྡན་པ་དང༌། ཆོས་རྣམས་ནི་མིང་ཡིན་ནོ། །དབང་པོ་ལྔ་གང་ཡིན་པ་དང༌། །དེའི་དོན་ལྔ་པོ་དེ་ནི་གཟུགས་ཡིན་ནོ། །དེ་ལྟར་ན་མིང་དང་གཟུགས་ཀྱི་རྐྱེན་གྱིས་རྣམ་པར་ཤེས་པ་ཞེས་གསུངས་སོ། །ཡང་སྲིད་པ་འབྱུང་བར་བྱ་བའི་ཕྱིར་ནུས་པ་སྐྱེ་བར་བྱ་བའི་ཆེད་དུ་འདུ་བྱེད་ཀྱི་རྐྱེན་གྱིས་རྣམ་པར་ཤེས་པ་ཞེས་གསུངས་ཏེ། དབང་པོ་དང་དོན་དང་ཡིད་ལ་བྱེད་པ་དེ་དག་ཉིད་ཀྱི་རྐྱེན་གྱིས་ཞེས་རྒྱས་པར་འབྱུང་བ་ནི་མདོ་སྡེ་འདིའི་དགོངས་པ་ཡིན་ནོ། །དེའི་སྟོབས་ཀྱི་མཐུས་ནུས་པ་ཡིན་ཏེ་ཞེས་བྱ་བ་ནི་འདུ་བྱེད་ཀྱི་སྟོབས་ཀྱི་མཐུས་ཞེས་བྱ་བའི་ཐ་ཚིག་གོ །ཇི་ལྟར་སེམས་མེད་པའི་སྙོམས་པར་འཇུག་པ་དང༌།
སེམས་མེད་པ་ཞེས་བྱ་བ་ལ་སེམས་མེད་པའི་སྙོམས་པར་འཇུག་པ་ནི་རྣམ་པ་གཉིས་ཏེ། འགོག་པའི་སྙོམས་པར་འཇུག་པ། འདུ་ཤེས་མེད་པའི་སྙོམས་པར་འཇུག་པའོ། །འདུ་ཤེས་མེད་པ་ནི་འདུ་ཤེས་མེད་པའི་སེམས་ཅན་ལྷ་རྣམས་ཀྱི་ནང་དུ་རྣམ་པར་སྨིན་པ་སྐྱེས་པ་སྟེ། གནས་སྐབས་དེ་དག་ན་ནི་རྣམ་པར་སྨྲ་བ་པ་དག་ནི་རྣམ་པར་ཤེས་པའི་རྒྱུན་ཐམས་ཅད་ནས་ཐམས་ཅད་རྒྱུན་ཆད་པ་ཡིན་ནོ་ཞེས་བསམས་པའོ། །བཙུན་པ་བ་སུ་མི་ཏྲ་ན་རེ། མདོ་སྡེ་ལས་ནི་འགོག་པའི་སྙོམས་པར་འཇུག་པ་སེམས་དང་བཅས་པར་གསུངས་ཏེ། ཇི་ལྟ་ཞེ་ན། བཙུན་པ་འདོད་པ་ཅན་ཤི་ནས་དུས་ལས་འདས་པ་གང་ཡིན་པ་དང༌། འགོག་པའི་སྙོམས་པར་ཞུགས་པ་གང་ཡིན་པ་འདི་རྣམ་གཉིས་ལ་བྱེ་བྲག་ནི་ཅི་ཡོད། ཐ་དད་དུ་བྱ་བའི་དགོངས་པ་ནི་ཅི་ཡོད། ཁྱིམ་བདག་ཤི་ནས་དུས་ལས་འདས་པ་གང་ཡིན་པ་དང༌། འགོག་པའི་སྙོམས་པར་ཞུགས་པ་གང་ཡིན་པ་འདི་གཉིས་ལ་བྱེ་བྲག་དང་ཐ་དད་དུ་བྱ་བའི་དགོངས་པ་མང་དུ་ཡོད་དེ། ཤི་ནས་དུས་ལས་འདས་པ་ནི་ལུས་ཀྱི་འདུ་བྱེད་འགགས་པ་ཡིན། ངག་གི་འདུ་བྱེད་དང་ཡིད་ཀྱི་འདུ་བྱེད་འགགས་པ་ཡིན། དྲོད་ཡལ་བ་ཡིན། དབང་པོ་ཡོངས་སུ་གྱུར་པ་ཡིན་ནོ། །ཁྱིམ་བདག་འགོག་པའི་སྙོམས་པར་ཞུགས་པ་ནི་ལུས་ཀྱི་འདུ་བྱེད་མ་འགགས་པ་ཡིན། ངག་གི་འདུ་བྱེད་མ་འགགས་པ་ཡིན། ཡིད་ཀྱི་འདུ་བྱེད་མ་འགགས་པ་ཡིན། ཚེ་དང་མ་བྲལ་བ་ཡིན། དྲོད་དང་མ་བྲལ་བ་ཡིན། དབང་པོ་རྣམས་ཡོངས་སུ་མ་གྱུར་པ་ཡིན། རྣམ་པར་ཤེས་པ་ལུས་དང་མ་བྲལ་བ་ཡིན་ནོ། །ཁྱིམ་བདག་ཤི་ནས་དུས་ལས་འདས་པ་གང་ཡིན་པ་དང་འགོག་པའི་སྙོམས་པར་ཞུགས་པ་གང་ཡིན་པ་འདི་གཉིས་གྱི་བྱེ་བྲག་ཏུ་བྱ་བ་ནི་འདི་ཡིན་ནོ། །འདི་གཉིས་ཐ་དད་དུ་བྱ་བའི་དགོངས་པ་ཡང་འདི་ཡིན་ནོ། །འོ་ན་བཅོམ་ལྡན་འདས་ཀྱིས་ཡིད་དང་ཆོས་ལ་བརྟེན་ནས་ཡིད་ཀྱི་རྣམ་པར་ཤེས་པ་སྐྱེ་བ་དང་ཞེས་རྒྱས་པར་འབྱུང་བ་ནི་བཙུན་པ་སྒྲ་དབྱངས་ཀྱི་ཡིན་ནོ། །རེ་ཞིག་ཚོར་བའི་རྐྱེན་གྱིས་སྲེད་པ་ཞེས་བཅོམ་ལྡན་འདས་ཀྱིས་དེ་ལྟར་གསུངས་ཞེས་རྒྱས་པར་འབྱུང་བ་ནི་བཙུན་པ་བ་སུ་མི་ཏྲའི་ཡིན་ནོ། །མདོ་གཞན་ལས་མ་རིག་པའི་འདུས་ཏེ་རེག་པ་ལས་སྐྱེས་པའི་ཚོར་བ་ལ་བརྟེན་ནས་སྲེད་པ་འབྱུང་ངོ་ཞེས་བྱེ་བྲག་ཏུ་བྱས་ཀྱི། རེག་པ་ནི་གང་དུ་ཡང་བྱེ་བྲག་ཏུ་བྱས་པ་མེད་དོ་ཞེས་བྱ་བ་ནི་མདོ་སྡེ་གཞན་
ལས། རེག་པའི་རྐྱེན་གྱིས་ཚོར་བ་དང་འདུ་ཤེས་དང་སེམས་པའོ་ཞེས་བྱེ་བྲག་ཏུ་མ་བྱས་པར་གསུངས་སོ། །དགྲ་བཅོམ་པའི་སྲིད་པ་ནི་རྩ་བ་ནས་བཅད་པ་ཡིན་གྱི་ཞེས་བྱ་བ་ནི་དེའི་བག་ལ་ཉལ་བཅོམ་པའི་ཕྱིར་དང༌། འཇིག་ཚོགས་ལ་ལྟ་བ་སྤངས་པའི་ཕྱིར་རོ། །འགོག་པའི་སྙོམས་པར་འཇུག་པ་ལ་སོགས་པའི་འདུ་ཤེས་དང་ཚོར་བ་གཉིས་ནི་ཅི་ཞེ་ན། རྩ་བ་ནས་བཅད་པ་མ་ཡིན་ཏེ། ཡང་དེ་མངོན་པར་འབྱུང་བའི་ཕྱིར་རོ། །གཞན་ན་རེ་ནུས་པ་ནི་འདུས་པ་ཡིན་ན་ཞེས་བྱ་བ་ནི་བཙུན་པ་དགའ་བའི་སྡེ་ནུས་པར་བྱ་བའི་ཆེད་དུ་བསྡུས་པ་ཡིན་ན། དེའི་ཚེ་ནི་ཚོགས་པ་ཙམ་དུ་ཟད་ཀྱི་འདུས་པ་ནི་མ་ཡིན་ཏེ། འདུ་ཤེས་དང་ཚོར་བ་སྐྱེས་པའི་མཐུ་མེད་པའི་ཕྱིར་རོ། །ཇི་ལྟར་མཐུ་མེད་ཅེ་ན། དེའི་ཕྱིར་དེ་སུན་འབྱིན་པས་དེ་བསལ་བའི་ཕྱིར་རོ་ཞེས་སྨྲས་ཏེ། དེ་སུན་འབྱིན་པ་ཞེས་བྱ་བ་ནི་འདུ་ཤེས་དང་ཚོར་བ་སུན་འབྱིན་པས་སོ། །དེ་བསལ་བའི་ཕྱིར་རོ་ཞེས་བྱ་བ་ནི་འགོག་པའི་སྙོམས་པར་འཇུག་པ་དེ་བསལ་བའི་ཕྱིར་རོ། །གལ་ཏེ་དགེ་བ་ཡིན་ན་དགེ་བའི་རྩ་བ་མེད་པར་ཇི་ལྟར་དགེ་བ་ཡིན་ཞེས་བྱ་བ་ནི་དགེ་བ་ནི་རྣམ་པ་གསུམ་དུ་རྣམ་པར་གཞག་སྟེ། ངོ་བོ་ཉིད་ཀྱིས་དགེ་བ་ནི་འདི་ལྟ་སྟེ། དགེ་བའི་རྩ་བ་རྣམས་དང༌། ངོ་ཚ་ཤེས་པ་དང་ཁྲེལ་ཡོད་པའོ། །མཚུངས་པར་ལྡན་པས་དགེ་བ་ནི་འདི་ལྟ་སྟེ་དེ་ལས་གཞན་པའི་སེམས་པས་བྱུང་བའི་ཆོས་རྣམས་སོ། །ཀུན་ནས་བསློང་བས་དགེ་བ་ནི་འདི་ལྟ་སྟེ་ལུས་དང་ངག་གི་ལས་ལ་སོགས་པའོ། །དེ་བས་ན་དགེ་བའི་རྩ་བ་མེད་པ་དང་དེ་དང་མཚུངས་པར་ལྡན་པ་མེད་ན་དེའི་ཡིད་ཀྱི་རྣམ་པར་ཤེས་པ་ཇི་ལྟར་དགེ་བ་ཡིན། དེ་དག་ཀྱང་རེག་པ་མེད་པར་ཇི་ལྟར་ཡིན་ཏེ་ཞེས་བྱ་བ་ནི་དགེ་བའི་རྩ་བ་དེ་དག་ཀྱང་རེག་པ་མེད་པར་དགེ་བའི་རྩ་བར་རུང་བ་མ་ཡིན་ཏེ། གང་ཇི་སྙེད་ཚོར་བའི་ཕུང་པོ་དང༌། འདུ་ཤེས་ཀྱི་ཕུང་པོ་དང་འདུ་བྱེད་ཀྱི་ཕུང་པོ་དང༌། དེ་ཐམས་ཅད་རེག་པའི་རྐྱེན་གྱིས་ཞེས་མདོ་སྡེ་ལས་གསུངས་པའི་ཕྱིར་རོ། །དགེ་བའི་དེ་མ་ཐག་པའི་རྐྱེན་གྱིས་འཕངས་པའི་ཕྱིར་གལ་ཏེ་དགེ་བ་ཡིན་ན་ནི་ཞེས་བྱ་བ་ནི་དགེ་བའི་དེ་མ་ཐག་པའི་རྐྱེན་གྱིས་འཕངས་བའི་ཕྱིར་དེ་དགེ་བར་འགྱུར་རོ་སྙམ་དུ་གལ་ཏེ་སེམས་ན་དེ་མི་རུང་སྟེ། དགེ་བ་ལ་སོགས་པའི་སེམས་ཀྱི་མཇུག་ཐོགས་སུ་སེམས་རྣམ་པ་གསུམ་སྐྱེ་བའི་ཕྱིར་རོ་ཞེས་བྱ་བ་ནི་དགེ་བའི་དེ་མ་ཐག་པའི་རྐྱེན་གྱིས་དགེ་བ་ཉིད་དུ་འགྲུབ་པར་བྱས་
པ་མ་ཡིན་ཏེ། དགེ་བ་དང་མི་དགེ་བ་དང་ལུང་དུ་མ་བསྟན་པའི་སེམས་སོ་སོའི་མཇུག་ཐོགས་སུ་དགེ་བ་དང་མི་དགེ་བ་དང་ལུང་དུ་མ་བསྟན་པའི་སེམས་སྐྱེ་བའི་ཕྱིར་རོ། །དགེ་བའི་རྩ་བའི་སྟོབས་ཀྱིས་འཕངས་ཏེ། སེམས་དགེ་བའི་ངོ་བོ་ཡིན་ན་ཡང་དེ་ཟློག་པར་བྱེད་པའི་རྒྱུ་མེད་པའི་ཕྱིར་རོ་ཞེས་བྱ་བ་ནི་དགེ་བའི་རྩ་བའི་དེ་མ་ཐག་པའི་རྐྱེན་གྱིས་འཕངས་ཏེ་དེ་དགེ་བ་ཉིད་ཡིན་ན་ནི་དེར་དགེ་བའི་རྩ་བ་རྣམས་ཟློག་པར་བྱེད་པའི་རྒྱུ་གང་ཞིག་ཡིན་ཟློག་པར་བྱེད་པའི་རྒྱུ་ཡོད་ན་ཡང་དེས་བྱས་པས་དགེ་བ་དེ་དག་ཀྱང་ཡོད་པར་མི་འགྱུར་ཏེ། དེའི་ནུས་པ་ལ་གནོད་པ་བྱས་པའི་ཕྱིར་རོ།། དེ་བས་ན་དེར་དགེ་བའི་རྩ་བ་གདོན་མི་ཟ་བར་ཡོད་པར་བྱ་དགོས་སོ། །མི་དགེ་བ་ལ་ཡང་དེ་དག་ཐལ་བར་འགྱུར་རོ་ཞེས་བྱ་བ་ནི་མི་དགེ་བའི་དེ་མ་ཐག་པའི་རྐྱེན་གྱིས་འཕངས་པའི་ཕྱིར་མི་དགེ་བ་ཉིད་ཡིན་པར་ཐལ་བར་འགྱུར་ཏེ། མི་དགེ་བའི་རྩ་བ་དང་མཚུངས་པར་ལྡན་པའི་ཕྱིར་ནི་མ་ཡིན་ནོ། །དེ་ལྟར་ནི་འདོད་པ་ཡང་མ་ཡིན་ནོ། །དེའི་ཕྱིར་ཡང་དེ་དགེ་བ་ཡིན་པར་མི་རིགས་སོ།། འདིར་སྨྲས་པ་རེ་ཞིག་འགོག་པའི་སྙོམས་པར་འཇུག་པ་ནི་དགེ་བའི་རྩ་བ་དང་མཚུངས་པར་ལྡན་པ་ཡང་ཇི་ལྟར་ཡིན་ཏེ་མ་ཡིན་ནོ། །ཟག་པ་དང་བཅས་པ་དང་ཟག་པ་མེད་པའི་ལམ་བཞིན་དུ་དགེ་བའི་རྩ་བ་དང་མཚུངས་པར་ལྡན་པ་ཡིན་ཏེ། སེམས་མེད་པ་ཉིད་ཡིན་པའི་ཕྱིར་རོ། །འབྲས་བུ་ཡིད་དུ་འོང་བ་ཉིད་ཡིན་པའི་ཕྱིར་དགེ་བ་ཉིད་ཀྱང་མ་ཡིན་ཏེ། འབྲས་བུ་ལ་གནས་པ་རྣམས་ནི་ཟག་པ་དང་བཅས་པའི་དགེ་བ་རྣམ་པར་སྨིན་པ་དང་བཅས་པ་ཅན་མ་ཡིན་ཏེ། རྣལ་འབྱོར་སྤྱོད་པའི་ལུགས་ཀྱི་སྲིད་པ་ལ་རྒྱབ་ཀྱིས་ཕྱོགས་པ་ཉིད་ཡིན་པའི་ཕྱིར་རོ། །འོན་ཏེ་དགེ་བའི་དེ་མ་ཐག་པའི་རྐྱེན་གྱིས་འཕངས་པའི་ཕྱིར་དགེ་བ་ཉིད་ཡིན་ལ། དེ་ལྟར་འདི་ཡང་དགེ་བ་ཉིད་ཡིན་ནོ། །དེའི་ཕྱིར་འགོག་པའི་སྙོམས་པར་འཇུག་པ་ནི་འགོག་པ་བཞིན་དུ་དགེ་བ་ཉིད་ཡིན་ནོ་ཞེས་སྨྲས་ཏེ། ཇི་ལྟར་འགོག་པ་ནི་སྡུག་བསྔལ་གྱི་རྒྱུ་རྣམ་པར་ལོག་པའི་ཕྱིར་དགེ་བ་ཉིད་ཡིན་པ་དེ་བཞིན་དུ་འགོག་པའི་སྙོམས་པར་འཇུག་པ་ཡང་སྡུག་བསྔལ་བར་གནས་པ་རྣམ་པར་ལོག་པའི་ཕྱིར་དགེ་བ་ཡིན་ནོ། །ས་འོག་མ་གཞན་བདུན་གྱིས་བར་དུ་ཆོད་པའི་ཕྱིར་རོ་ཞེས་བྱ་བ་ནི་འདོད་པའི་ཁམས་སུ་སྐྱེས་པར་གྱུར་པ་འགོག་པའི་སྙོམས་པར་འཇུག་པ་ལ་སྙོམས་པར་འཇུག་པ་གང་ཡིན་པ་
དེའི་འདོད་པ་ན་སྤྱོད་པའི་རྣམ་པར་སྨིན་པའི་སེམས་ནི་ས་འོག་མ་གཞན་བདུན་ཏེ། གཟུགས་མེད་པ་གསུམ་དང༌། བསམ་གཏན་བཞིས་བར་དུ་ཆོད་པའི་རྩེ་མོའི་སྙོམས་པར་འཇུག་པའི་སེམས་ཀྱི་མཇུག་ཐོགས་པ་མངོན་དུ་བྱེད་པ་ཡིན་ནོ་ཞེས་བྱ་བར་རིགས་པ་མ་ཡིན་ནོ། །ཐོད་རྒལ་བའི་སྙོམས་པར་འཇུག་པ་དག་འདི་མཉམ་པར་གཞག་པའི་སེམས་ས་འོག་མ་པས་ནི་གསུམ་ལས་གོང་དུ་མངོན་དུ་བྱེད་པར་ནུས་པ་མ་ཡིན་ན། འདོད་པ་སྤྱོད་པས་ས་འོག་མ་གཞན་བདུན་གྱིས་བར་དུ་ཆོད་པ་ལ་ལྟ་སྨོས་ཀྱང་ཅི་དགོས། །མི་གཡོ་བའི་ལས་ནི་འདོད་པའི་ཁམས་སུ་རྣམ་པར་སྨིན་པར་བྱེད་པ་མ་ཡིན་ནོ་ཞེས་བྱ་བ་ནི་གང་གི་ཕྱིར་ས་དེ་ལས་ལས་ཀྱི་རྣམ་པར་སྨིན་པ་སོ་སོ་མི་གཡོ་བའི་ཡིན་ནོ་ཞེས་འབྱུང་བའི་ཕྱིར་རོ། །དེའི་ཕྱིར་འདོད་པའི་ཁམས་སུ་སྐྱེས་པ་ནི་སྲིད་པའི་རྩེ་མོ་པའི་རྣམ་པར་སྨིན་པའི་སེམས་ཡིན་པར་མི་སྲིད་དོ། །སྙོམས་པར་འཇུག་པ་དེ་ལ་སྙོམས་པར་འཇུག་པ་པོ་རྣམས་ནི་ཅི་དགར་བྱར་ཡོད་པ་ཡང་ཡིན་པས་ཞེས་བྱ་བ་ནི་འདོད་ན་དེ་མངོན་སུམ་དུ་བྱེད་པའི་ཕྱིར་དང༌། སྔར་སྨོན་ལམ་བཏབ་པ་བཞིན་ལྡང་བའི་དུས་མི་འགྱུར་བའི་ཕྱིར་རོ། །མིག་ལ་སོགས་པ་རྣམ་པར་སྨིན་པ་ལ་ནི་ཆོས་འདི་དག་མ་མཐོང་ངོ༌། །འགོག་པའི་སྙོམས་པར་འཇུག་པ་ནི་འདོད་པ་ན་སྤྱོད་པས་འཐོབ་པ་ཡིན་ལ། དེའི་རྣམ་པར་སྨིན་པའི་སེམས་ནི་འདོད་པའི་ཁམས་སུ་གཏོགས་པའི་ཕྱིར་རོ། །སེམས་མངོན་པར་འདུ་བྱེད་པ་དེ་ཡང་རེག་པ་མེད་པར་ཇི་ལྟར་རུང་ཞེས་བྱ་བ་ཞི་དེ་ལ་ཡིད་ལ་བྱེད་པ་དག་སེམས་པ་ཡང་ཡོད་དོ། །མདོ་སྡེ་གཞན་ལས་གང་ཅི་ཡང་རུང་འདུ་བྱེད་ཀྱི་ཕུང་པོ་དེ་ཐམས་ཅད་ནི་རིག་པ་ལ་བརྟེན་ནས་ཞེས་གསུངས་པའི་ཕྱིར་རོ། །གལ་ཏེ་ཡང་དེའི་ཚེ་ཡིད་ཀྱི་རྣམ་པར་ཤེས་པ་ལུང་དུ་མ་བསྟན་པ་གཞན་ཞིག་ཡིན་པར་རྣམ་པར་རྟོག་པར་བྱེད་ན་ཞེས་བྱ་བ་ལ་གཞན་གཞིག་ཅེས་བྱ་བ་ནི་རྣམ་པ་གཞན་དུའོ། །ཇི་སྐད་དུ། རྣམ་བཞིར་མ་གཏོགས་རྣམ་སྨིན་མིན། །མངོན་པར་འདུ་བྱེད་འཇུག་པ་མིན། །ཞེས་བྱ་བ། ཆོས་མངོན་ལུགས་ལ་མ་བརྟེན་ལུང་མ་བསྟན། །རྣམ་བཞིར་མ་བསྟན་ཐུབ་པའི་ས། །ཞེས་བསྟན་ཏོ། །སེམས་ལས་སུ་རུང་ཞིང་སེམས་མཚན་མ་མེད་པའི་ཏིང་ངེ་འཛིན་ལ་གནས་པ་དག་ཇི་ལྟར་དམིགས་པ་དང༌། རྣམ་པའི་གཡེང་བ་བྱེད་པར་འགྱུར། ལུང་དུ་མ་བསྟན་པའི་སེམས་མངོན་དུ་གྱུར་པར་
འདོད་པ་ཡང་མ་ཡིན་པའི་ཕྱིར་རོ་ཞེས་བྱ་བ་ལ་དེ་ལྟར་སེམས་ལས་སུ་རུང་བ་དེ་ལྟ་བུ་ནི་གང་དེ་མ་ཐག་ཏུ་འདུ་ཤེས་དང་ཚོར་བ་ཀུན་དུ་བྱུང་བ་ལྡོག་པར་འགྱུར་བ་ཡིན་ནོ། །སེམས་མཚན་མ་མེད་པའི་ཏིང་ངེ་འཛིན་ལ་གནས་པ་ནི་འདུ་ཤེས་དང་ཚོར་བ་འགོག་པ་ལ་དམིགས་ཤིང་སེམས་ཏིང་ངེ་འཛིན་ལ་གནས་པ་ཞེས་བྱ་བའི་ཐ་ཚིག་གོ །དམིགས་པ་དང་རྣམ་པའི་གཡེང་བ་ཞེས་བྱ་བ་ནི་འདུ་ཤེས་དང་ཚོར་བ་འགོག་པ་ལ་དམིགས་པའི་ཞི་བའི་རྣམ་པ་ཡོངས་སུ་བཏང་བའི་ཕྱིར་རོ། །གལ་ཏེ་འགོག་པ་དང་ཞི་པའི་རྣམ་པ་ལ་དམིགས་པ་ཉིད་ཡིན་ན་ནི་ལུང་དུ་མ་བསྟན་པ་ཡིན་པར་མི་འགྱུར་གྱི། འོ་ན་ཅི་ཞེ་ན། དགེ་བ་ཡིན་ནོ། །འདོད་པ་ཡང་མ་ཡིན་ཞེས་སྨོས་པ་ནི་གལ་ཏེ་དམིགས་པ་རྣམ་པའི་གཡེང་བ་འདོད་པར་གྱུར་ན་སེམས་གཡེངས་པ་མ་ཡིན་པར་འགྱུར་རོ། །ཉེས་པར་བྱས་པ་ནི་གཡེངས་པ་ཞེས་བརྗོད་དོ། །དེ་ལྟར་རིགས་པས་སེམས་ཐམས་ཅད་ཡོངས་སུ་བཀག་ནས་ལུང་གིས་ཀྱང་སྟོན་པ་ནི་རྣམ་པ་གང་གིས་ཀྱང་འདུ་ཤེས་མེད་འདུ་ཤེས་མེད་མིན་སྐྱེ་མཆེད་ཀྱི་ས་པའི་ཡིད་ཀྱི་རྣམ་པར་ཤེས་པ་དག་འགོག་པའི་སྙོམས་པར་ཞུགས་པ་ལ་ཡོད་པ་མ་ཡིན་ནས་གཞན་བ་ལྟ་སྨོས་ཀྱང་ཅི་དགོས་ཞེས་བྱ་བ་ནི། བཅོམ་ལྡན་འདས་ཀྱིས་ཀྱང་ཞེས་རྒྱ་ཆེར་འབྱུང་བ་ཡིན་ནོ། །རྣམ་པ་ཐམས་ཅད་དུ་ཞེས་བྱ་བ་ནི་རྣམ་པ་གང་གི་སྒོ་ནས་ཀྱང༌། དེའི་ཚེ་ནི་དེའི་ས་པའི་སེམས་མངོན་དུ་བྱེད་པ་མ་ཡིན་ནོ་ཞེས་སྟོན་ཏོ། །ལུས་ཀྱིས་མངོན་དུ་བྱེད་པ་རྣམས་ལ་མེད་པ་མ་ཡིན་པའི་ཕྱིར་རོ་ཞེས་བྱ་བ་ནི་འགོག་པའི་སྙོམས་པར་འཇུག་པ་ཐོབ་པའི་ཕྱིར་མི་འོང་བ་རྣམས་ལ་འགོག་པའི་སྙོམས་པར་འཇུག་པ་མེད་པ་མ་ཡིན་པའི་ཕྱིར་ཏེ། དེ་དག་ནི་རྣམ་པ་ཐམས་ཅད་དུ་འདོད་ཆགས་དང་བྲལ་ནས་འདུ་ཤེས་མེད་འདུ་ཤེས་མེད་མིན་སྐྱེ་མཆེད་ལས་ཡང་དག་པར་འདས་པ་མ་ཡིན་པས་སོ། །འདིར་ཚིགས་སུ་བཅད་པ་ཞེས་བྱ་བ་ནི་སྲིད་པའི་རྩེ་མོའི་ས་པ་ཇི་ལྟ་བ་དེའི་ཡིད་ཀྱི་རྣམ་པར་ཤེས་པ་མ་ཡིན་གྱི། འོ་ན་ཅི་ཞེ་ན། དེ་ནི་གཞན་ཞིག་ཡིན་ནོ་ཞེས་བྱ་བ་ནི། སྲིད་རྩེའི་མཚན་ཉིད་འདུ་ཤེས་མེད། །ཅེས་རྒྱས་པར་འབྱུང་བ་ཡིན་ནོ། །སྲིད་རྩེའི་མཚན་ཉིད་ཅི་ཞེ་ན། འདུ་ཤེས་མེད་འདུ་ཤེས་མེད་པ་མིན་ཉིད་འདོད་ཅེས་བྱ་བ་ཡིན་ཏེ། འདི་འདུ་ཤེས་མེད་འདུ་ཤེས་མེད་མིན་ཡིན་པས་
འདི་ནི་འདུ་ཤེས་མེད་འདུ་ཤེས་མེད་མིན་ནོ། །དེའི་དངོས་པོ་ནི་འདུ་ཤེས་མེད་འདུ་ཤེས་མེད་མིན་ཉིད་དོ། །འདོད་པ་ཅི་ཞེ་ན། སྐབས་ཀྱི་མཚན་ཉིད་ལ་བསམས་པའོ། །འགོག་ལ་དེ་ཡི་ས་སེམས་མེད། །ཅེས་བྱ་བ་ནི་འགོག་པའི་སྙོམས་པར་ཞུགས་པའི་འགོག་པ་དེ་ལ་འདུ་ཤེས་མེད་འདུ་ཤེས་མེད་མིན་དེ་ན་ཡོད་པའི་དེའི་ས་སེམས་མེད་དོ། །ཇི་ལྟར་འགགས་ཤེ་ན། འདུ་ཤེས་དང་ཚོར་བ་གཉིས་འགགས་པའི་ཕྱིར་ཏེ། སྲིད་པའི་རྩེ་མོའི་སའི་སེམས་མེད་དོ་ཞེས་བྱ་བའི་ཐ་ཚིག་གོ །དོན་མཚོན་པའི་ཕྱིར་དེ་དག་བརྟག་པར་བྱས་ཏེ། རྣམ་པར་རྟོག་པ་དང་བཅས་པ་དང༌། རྣམ་པར་དཔྱོད་པ་དང་བཅས་པ་བསམ་གཏན་བཞིན་ནོ། །དེའི་ཕྱིར་འགགས་སུ་ཟིན་ཀྱང་སྲིད་པའི་རྩེ་མོའི་ས་པའི་ཡིད་ཀྱི་རྣམ་པར་ཤེས་པ་ཡོད་དོ་ཞེ་ན། འོ་ན་ནི་རྣམ་པ་ཐམས་ཅད་དུ་འདུ་ཤེས་མེད་འདུ་ཤེས་མེད་མིན་སྐྱེ་མཆེད་ལས་ཡང་དག་པར་འདས་ཏེ་ཞེས་འབྱུང་བའི་མདོ་སྡེ་དང་འགལ་བར་འགྱུར་རོ་ཞེ་ན། འདི་ནི་ཐམས་ཅད་དུ་ཡང་ཡང་དག་པར་འདས་པ་མ་ཡིན་གྱི། དེས་ན་དེ་ནི་གཞན་ཞིག་ཡིན་ཏེ། སྲིད་པའི་རྩེ་མོ་དེའི་སེམས་མི་སྲིད་པ་དང༌། འགོག་པའི་སྙོམས་པར་འཇུག་པ་སེམས་དང་བཅས་པ་ཡིན་པའི་གཏན་ཚིགས་གང་ཡིན་པ་དེ་དག་གིས་ན། དེས་ན་དེ་ནི་གཞན་ཞིག་ཡིན་ཏེ། སེམས་དེ་ནི་ཀུན་གཞི་རྣམ་པར་ཤེས་པ་ཡིན་ནོ། །ཇི་ལྟར་ཡིད་ཀྱི་བག་ཆགས་ལ་ཡང་མིང་ཡིད་ཅེས་ལན་འགའ་བརྗོད་དེ་ཞེས་བྱ་བ་ནི་སེམས་མེད་པའི་གནས་སྐབས་ལས་ལྡང་བའི་ཚེ་འབྲས་བུས་རྒྱུ་འདོགས་པ་ཡོད་དོ། །དེ་བས་ན་ཇི་ལྟར་ལས་ཀྱི་བག་ཆགས་ལ་ཡང་ལས་ཞེས་བྱ་བ་དང༌། གང་གི་ཚེ་ལས་ཀྱི་རྣམ་པར་སྨིན་པ་ཞེས་ཟེར་ན་ཞེས་བྱ་བ་ནི་རྣམ་པར་སྨིན་པ་ནི་དངོས་སུ་ལས་ཀྱིས་མ་ཡིན་གྱི། འོ་ན་ཅི་ཞེ་ན། དེ་ནི་བག་ཆགས་ཀྱིས་ཡིན་ནོ། །དེའི་ཕྱིར། རྣམ་པར་རྟོག་པ་འདི་ལ་ཡིད་ཀྱི་རྣམ་པར་ཤེས་པའི་ས་བོན་རྒྱུད་གཉིས་ལ་ཡོད་པར་འགྱུར་ཏེ་ཞེས་བྱ་བ་ནི་རྒྱུད་ཐ་དད་པའི་ཡིད་ཀྱི་རྣམ་པར་ཤེས་པ་གཉིས་བཞིན་ནོ། །སེམས་དང་བཅས་པའི་གནས་སྐབས་ཀྱི་དབང་དུ་བྱས་ཏེ། དེ་སྐད་བསྟན་གྱི་སེམས་མེད་པ་ལས་ལྡང་བའི་ཚེ་ནི་སེམས་ཀྱི་རྒྱུད་ཉིད་ཡོད་པ་མ་ཡིན་ན་དེ་གནས་པ་ཡིད་ཀྱི་རྣམ་པར་ཤེས་པའི་ས་བོན་ལྟ་ག་ལ་ཡོད་དེ། ཡིད་ཀྱི་རྣམ་པར་ཤེས་པའི་ས་བོན་གྱི་རྒྱུན་གྱི་དབྱེ་བ་བརྟག་པར་མི་བྱའོ། །
ཅིའི་ཕྱིར་གཅིག་ལས་འབྱུང་བ་དེའི་ཚེ་ཅིག་ཤོས་ལས་མ་ཡིན་ཞེས་བྱ་བ་དེ་ནི་བདག་པོའི་རྐྱེན་དང༌། དམིགས་པའི་རྐྱེན་དང་རྒྱུའི་རྐྱེན་དག་ཡོད་ན་ཞེས་བྱ་བ་ཡིན་ནོ། །འོན་ཏེ་དེ་མ་ཐག་པའི་རྐྱེན་གཅིག་ཡིན་པའི་ཕྱིར་རོ་ཞེས་ཟེར་ན་དེ་ལ་འདི་སྐད་བརྗོད་པར་བྱ་སྟེ། འོ་ན་ནི་སེམས་མེད་པའི་གནས་སྐབས་ལས་ལྡང་བ་འགྲུབ་པར་མི་འགྱུར་ཏེ། དེ་མ་ཐག་པའི་རྐྱེན་མེད་པའི་ཕྱིར་རོ། །འགགས་ནས་ཡུན་རིང་དུ་ལོན་པ་ནི་དེ་མ་ཐག་པའི་རྐྱེན་དུ་འགྲུབ་པ་མ་ཡིན་ནོ། །གལ་ཏེ་ཡང་རྣམ་པར་ཤེས་པ་ལ་ཇི་ལྟ་བ་དེ་བཞིན་དུ་ལུས་ཀྱི་དབང་པོ་ལ་ཡང་ཞེས་རྒྱས་པར་འབྱུང་བ་ལ། དེ་ཡང་བསོད་ནམས་ལ་སོགས་པའི་འདུ་བྱེད་ཀྱིས་ཞེས་བྱ་བ་ནི་ལུས་ཀྱི་དབང་པོ་དེ་ལ་ཡང༌། བསོད་ནམས་ལ་སོགས་པའི་འདུ་བྱེད་ཀྱིས་ཡོངས་སུ་བསྒོས་པ་ཡིན་པའི་ཕྱིར་ཞེས་བྱ་བ་ནི་བསོད་ནམས་དང༌། བསོད་ནམས་མ་ཡིན་པ་དང༌། མི་གཡོ་བའི་འདུ་བྱེད་ཀྱིས་ཡོངས་སུ་བསྒོས་པ་ཡིན་པའི་ཕྱིར་ཞེས་བྱ་བའི་ཐ་ཚིག་གོ །རྣམ་པར་ཤེས་པ་ཉི་ཚེ་ལ་འདུ་བྱེད་ཀྱི་རྐྱེན་གྱིས་ཞེས་བརྗོད་པར་བྱ་བ་མ་ཡིན་པར་འགྱུར་རོ། །འོ་ན་ཅི་ཞེ་ན། འདུ་བྱེད་ཀྱི་རྐྱེན་གྱིས་ལུས་ཀྱི་དབང་པོ་ཡང་ཡིན་ནོ་ཞེས་བརྗོད་པར་བྱ་དགོས་པར་འགྱུར་རོ། །རྣམ་པར་ཤེས་པ་ཉི་ཚེ་བའི་རྐྱེན་གྱིས་མིང་དང་གཟུགས་ཅི་ཞེ་ན། བརྗོད་པར་བྱ་བ་མ་ཡིན་གྱི། འོ་ན་ཅི་ཞེ་ན། ལུས་ཀྱི་དབང་པོ་ལ་ཡང་བརྗོད་པར་བྱ་དགོས་པར་འགྱུར་རོ། །སེམས་ཉི་ཚེ་ལ་ཡང་བསོད་ནམས་དང་བསོད་ནམས་མ་ཡིན་པ་ལ་སོགས་པའི་འདུ་བྱེད་དགོས་པར་ཅིའི་ཕྱིར་བསྟན། ལུས་ཀྱི་དབང་པོ་ཡང་དེ་ལ་མིང་དང་གཟུགས་དེ་ལ་མཐུ་ཡོད་པའི་ཕྱིར་རོ། །གང་ཡང་འདི་སྐད་ཅེས་བྱ་བ་ནས་རྒྱས་པར་བྱས་ནས། དད་པ་དང༌། ཚུལ་ཁྲིམས་དང༌། ཐོས་པ་དང༌། གཏོང་བ་དང༌། ཤེས་རབ་ཡོངས་སུ་བསྒོས་པ་ཡིན་ནོ་ཞེས་བྱ་བའི་བར་དུ་རྒྱས་པར་འབྱུང་བ་དང༌། ཁ་ཅིག་ལས་ལུས་བསྒོམས་པ་དང༌། ལུས་མ་བསྒོམས་པ་ཞེས་བསྟན་པ་ནི་དེ་རྣམ་པར་བསྒོམ་པའི་དབང་དུ་བྱས་ནས། ལུས་འདི་ལ་སྐྲ་དང་ཞེས་རྒྱས་པར་འབྱུང་བ་ཡིན་ནོ། །དེ་ལྟར་རེ་ཞིག་རྣམ་པར་ཤེས་པའི་ཚོགས་དྲུག་གི་རྒྱུན་ལ་བསོད་ནམས་ལ་སོགས་པའི་འདུ་བྱེད་ཀྱིས་བསྒོས་ཤིང་འདུ་བྱེད་ཀྱི་རྐྱེན་གྱིས་རྣམ་པར་ཤེས་པ་ཡིན་པར་མི་སྲིད་པར་བསྒྲུབས་པ་ཡིན་ནོ། །གཞན་དག་ན་རེ་འདུ་བྱེད་ཀྱི་
རྐྱེན་གྱིས་ནི་མངལ་དུ་ཉིད་མཚམས་སྦྱོར་བའི་རྣམ་པར་ཤེས་པ་ཡིན་ཏེ། ཇི་སྐད་དུ་ཆོས་མངོན་པའི་མཛོད་ལས། མཚམས་སྦྱོར་ཕུང་བོའི་རྣམ་པར་ཤེས། །ཞེས་སྨྲས་པ་དང༌། དེ་ལྟར་ནི་རྒྱུའི་རྣམ་གྲངས་ཆེན་པོ་ལས་ཞེས་རྒྱས་པར་འབྱུང་སྟེ། དེ་ལྟར་ནི་ཞེས་བྱ་བ་ནི་དེ་བས་ན་ཞེས་བྱ་བའི་དོན་ཏོ། །མདོ་སྡེ་འདི་དང་འགལ་བར་འགྱུར་ཏེ། དེ་བས་ན་འདུ་བྱེད་ཀྱི་རྐྱེན་གྱིས་ནི་མངལ་དུ་ཉིད་མཚམས་སྦྱོར་བའི་རྣམ་པར་ཤེས་པ་ཡིན་པར་གྲུབ་པ་ཡིན་ནོ་ཞེ་ན། གང་འདུ་བྱེད་ཀྱི་རྐྱེན་གྱིས་མངལ་དུ་ཉིང་མཚམས་སྦྱོར་བའི་རྣམ་པར་ཤེས་པ་ཡིན་ཏེ་ཞེས་སྨྲས་པ་དེའི་ཁུངས་སུ་འདི་མི་རུང་སྟེ། གལ་ཏེ་ཆ་འདི་ཁོ་ན་ལ། འདུ་བྱེད་ཀྱི་རྐྱེན་གྱིས་རྣམ་པར་ཤེས་པ་མ་ཡིན་ན་ནི་མའི་མངལ་དུ་འཇུག་པར་མི་འགྱུར་ཞེས་བྱ་བ་ཡིན་ནོ། །མདོ་སྡེ་དང་འགལ་བར་འགྱུར་ཞེས་སྨྲས་པ་གང་ཡིན་པ་འདིའི་ལན་ནི་ཁ་ཅིག་ན་རེ་འགལ་བ་མེད་དེ་ཞེས་རྒྱས་པར་སྨྲས་པ་ཡིན་ནོ། །འདུ་བྱེད་ཀྱི་རྐྱེན་གྱིས་ནི་ཇི་ལྟར་རིགས་པར་ན་ཉིང་མཚམས་སྦྱོར་བ་ཡིན་པར་རིག་པར་བྱའོ། །ཇི་སྙེད་ཡོད་ན་ནི་ཡིད་ཀྱི་རྣམ་པར་ཤེས་པ་དེ་ན་ཡོད་པ་ཡིན་ནོ། །རྣམ་པར་ཤེས་པའི་རྐྱེན་གྱིས་མིང་དང་གཟུགས་རྣམ་པར་འཇོག་པ་ན་ཇི་སྙེད་ཡོད་པ་རྣམ་པར་གཞག་པ་ཡིན་ནོ་ཞེའོ་ཞེས་བྱ་བ་ནི་མངལ་དུ་གཟུགས་གང་སྲིད་པ་དེ་ཁོ་ན་དེར་རྣམ་པར་གཞག་པར་བྱའོ། །མིག་ལ་སོགས་པ་ནི་མ་ཡིན་ནོ། །གནས་སྐབས་དེ་ན་གཟུགས་གང་ཡིན་པ་དེ་ཐམས་ཅད་ཅེས་རྒྱས་པར་འབྱུང་བ་ནི་མིང་དང་གཟུགས་ཀྱི་གནས་སྐབས་དེ་ན་ཡང༌། གཟུགས་གང་ཡིན་པ་དེ་ཐམས་ཅད་འབྱུང་བ་ཆེན་པོ་བཞི་དག་དང་དེ་དག་རྒྱུར་བྱས་པའོ་ཞེས་གཟུགས་གང་ཞེ་ན། དེ་ཐམས་ཅད་ཅེས་རྒྱས་པར་ཇི་ལྟར་བསྟན་པ་ནི་རིགས་པ་ཡིན་གྱི་ཉིང་མཚམས་སྦྱོར་བ་ན་རྣམ་པར་ཤེས་པ་གང་ཡིན་པ་དེ་རྣམ་པར་ཤེས་པའི་ཚོགས་དྲུག་ནི་མ་ཡིན་པས་འདིར་ཆོས་འདྲ་བ་ཅི་ཡོད། གཞན་དག་ཡང་མདོ་སྡེ་དང་འགལ་བའི་ལན་སྨྲ་བ། དེ་ལས་གཞན་ལ་བསྟན་པ་ཡང་སྐྱེ་མཆེད་དྲུག་གི་བར་དུ་ཞེས་རྒྱས་པར་འབྱུང་བ་ཡིན་ཏེ། ཉིད་མཚམས་སྦྱོར་བའི་རྣམ་པར་ཤེས་པ་ཁོ་ན་འདུ་བྱེད་ཀྱི་རྐྱེན་ཅན་ཡིན་ནོ། །རྣམ་པར་ཤེས་པའི་ཚོགས་དྲུག་སྨོས་པ་ནི་སྐྱེ་མཆེད་དྲུག་གི་བར་དུ་ལས་ཀྱི་རྗེས་སུ་འཇུག་པ་ཡིན་པར་བསྟན་པའི་ཕྱིར་ཏེ། རྣམ་པར་ཤེས་པའི་ཚོགས་དྲུག་གི་མཚན་ཉིད་ཀྱིས་ནི་སྐྱེ་མཆེད་དྲུག་ལ་སྐྱེ་
མཆེད་དྲུག་གི་འབྲས་བུ་དང་བྲལ་བ་མ་ཡིན་པར་བསྟན་ལ། དེ་དང་མ་བྲལ་བ་ཡང་ལས་ཀྱིས་བྱས་པ་ཡིན་པས་སྐྱེ་མཆེད་དྲུག་གི་བར་དུ་ལས་ཀྱི་རྗེས་སུ་འཇུག་པ་ཡིན་པར་བསྟན་ཏོ། །དེ་སྨོས་པ་དོན་མེད་དེ་ཞེས་རྒྱས་པར་འབྱུང་བ་ནི་སྐྱེ་མཆེད་དྲུག་གི་བར་དུ་ལས་ཀྱི་རྗེས་སུ་འཇུག་པ་ཡིན་པར་བསྟན་པའི་ཕྱིར་རྣམ་པར་ཤེས་པའི་ཚོགས་དྲུག་སྨོས་པ་དོན་མེད་པ་ཡིན་ཏེ། རྣམ་པར་ཤེས་པའི་ཚོགས་དྲུག་སྨོས་པ་མེད་པར་ཡང་ལས་ཀྱི་བྱེ་བྲག་གིས་རྣམ་པར་ཤེས་པ་བྱེ་བྲག་ཏུ་འགྱུར། དེའི་བྱེ་བྲག་ལས་མིང་དང་གཟུགས་བྱེ་བྲག་ཏུ་འགྱུར་མིང་དང་གཟུགས་ཀྱི་བྱེ་བྲག་ལས་སྐྱེ་མཆེད་དྲུག་བྱེ་བྲག་ཏུ་འགྱུར་བར་ཤེས་པའི་ཕྱིར་རོ། །ཇི་ལྟར་བསྟན་ཞེ་ན། དེ་རྐྱེན་དུ་བསྟན་པའི་ཕྱིར་རོ། །དེ་ཉིད་ཀྱི་ཕྱིར། གལ་ཏེ་བྱེ་བྲག་གིས་དེ་བྱེ་བྲག་ཏུ་མི་འགྱུར་ན་ནི་ཇི་ལྟར་སྔ་མ་ནི་ཕྱི་མའི་རྐྱེན་དུ་འགྲུབ་པར་མི་འགྱུར་ཞེས་སྨྲས་པ་ཡིན་ཏེ། དེ་ལྟར་མི་འདོད་ན་ནི་ཡན་ལག་སྔ་མ་ནི་ཡན་ལག་ཅན་ཕྱི་མའི་རྐྱེན་དུ་འགྲུབ་པར་མི་འགྱུར་རོ། །རྐྱེན་གྱི་བྱེ་བྲག་ལས་རྐྱེན་དང་ལྡན་པ་བྱེ་བྲག་ཏུ་མི་འགྱུར་བ་ནི་མ་ཡིན་ནོ། །གལ་ཏེ་འདིའི་དོན་མི་འཇུག་པ་ཡིན་ནོ་ཞེ་ན་ཞེས་བྱ་བ་ནི་མངལ་དུ་ཉིད་མཚམས་སྦྱོར་བའི་རྣམ་པར་ཤེས་པ་དེའོ། །སྐྱེ་བར་ཉིང་མཚམས་སྦྱོར་བའི་རྣམ་པར་ཤེས་པ་ནི། མའི་མངལ་དུ་འཇུག་པར་རིགས་པ་མ་ཡིན་ཏེ་ཞེས་བྱ་བ་ནི་མ་ཞུགས་པ་ནི་འཇུག་པ་ལ་མངོན་དུ་ཕྱོགས་པའི་ཕྱིར་འཇུག་པ་ཞེས་བྱ་བའི་ཞུགས་པ་དེ་ནི་མའི་མངལ་དུ་ཞུགས་ཟིན་པ་ཡིན་པས་ཞུགས་པ་ཡིན་ན་ཇི་ལྟར་འཇུག་པ་ཞེས་བྱ་བ་འདུ་བྱེད་ཀྱིས་ཡོངས་སུ་བསྒོས་པའི་རྣམ་པར་ཤེས་པ་ནི་སྲིད་པ་བར་མའི་རྒྱུན་གྱིས་མའི་མངལ་དུ་འཇུག་པ་ཡིན་པར་རིགས་ཏེ། ཅིའི་ཕྱིར་ཞེ་ན། དེ་མ་ཞུགས་པ་ཡིན་པའི་ཕྱིར་དང༌། འཇུག་པ་ལ་མངོན་དུ་ཕྱོགས་པ་ཡིན་པའི་ཕྱིར་རོ། །དེ་དང་འབྲེལ་བའི་ཕྱིར་ཞེས་རྒྱས་པར་འབྱུང་བ་ནི་སྲིད་པ་བར་མའི་རྣམ་པར་ཤེས་པའི་སྐད་ཅིག་མ་གཞན་དང་འབྲེལ་བའི་ཕྱིར་རོ་ཞེས་བྱ་བའི་ཐ་ཚིག་གོ །ཁྲག་དང་ཁུ་བ་འདུས་པའི་མིང་དང་གཟུགས་རྣམ་པར་སྨིན་པ་ནི་ཀུན་དུ་བརྒྱལ་བ་ཡིན་ཏེ་ཞེས་བྱ་བ་ན་གཅིག་ལ་གཅིག་རྒྱུ་མཚན་གྱི་དངོས་པོར་མིང་དང་གཟུགས་དང་འདྲེས་པར་གྱུར་ཅེས་བྱ་བའི་དོན་ཏེ། གང་ལས་རྒྱུ་གང་
གིས་མིང་དང་གཟུགས་སུ་རྣམ་པར་སྨིན་པ་ནུར་ནུར་པོར་རྣམ་པར་གཞག་པའོ། །འོན་ཏེ་འདིའི་དོན་མའི་མངལ་དུ་མི་སྐྱེ་བ་མི་འབྱུང་བ་ཡིན་ན་ནི་དེའི་ཚེ་རྣམ་པར་ཤེས་པ་བདག་ཉིད་ཐོབ་པའི་ཚེ། མིང་དང་གཟུགས་སྐྱེས་པ་ཁོ་ན་ཡིན་པས་དེའི་རྐྱེན་གྱིས་རྣམ་པར་ཤེས་པ་དེའི་རྐྱེན་གྱིས་དེ་སྐྱེ་བར་མི་རིགས་ཏེ། མིང་དང་གཟུགས་སྐྱེ་བར་མི་རིགས་ཏེ། དེ་ཉིད་སྐྱེས་ཟིན་པའི་ཕྱིར་རོ། །དེ་ལས་ཀྱང་རྒྱུ་ཆེན་པོའི་རྣམ་གྲངས་དེ་ལས་ཀྱང༌། ནམ་མ་ཤིའི་བར་དུ་རྣམ་པར་ཤེས་པ་ནི་མིང་དང་གཟུགས་ཀྱི་རྐྱེན་གྱིས་དངོས་པོར་བསྟན་པས་འདུ་བྱེད་ཀྱི་རྐྱེན་གྱིས་དེ་ཇི་ལྟར་ཉིད་མཚམས་སྦྱོར་བའི་རྣམ་པར་ཤེས་པར་རུང༌། རྟེན་ཅིང་འབྲེལ་པར་འབྱུང་བའི་མདོ་སྡེ་འདི་ལས། རྣམ་པར་ཤེས་པའི་རྐྱེན་གྱིས་ཕུང་པོ་ལྔ་པའི་མིང་དང་གཟུགས་བསྟན་པས་ཉིད་མཚམས་སྦྱོར་བའི་རྣམ་པར་ཤེས་པ་དེ་ཇི་ལྟར་དེ་དང་ལྷན་ཅིག་འབྱུང་བ་ཉིང་མཚམས་སྦྱོར་བའི་རྣམ་པར་ཤེས་པ་དང་ལྷན་ཅིག་འབྱུང་བ་ཕུང་པོ་ལྔ་པ་ཅན་གྱི་མིང་དང་གཟུགས་ཀྱི་རྐྱེན་དུ་རུང༌། དུས་ཕྱི་མའི་རྐྱེན་ཡིན་ནོ་ཞེ་ན་ཡང་ཞེས་བྱ་བ་ནི། འོན་ཏེ་ཉིད་མཚམས་སྦྱོར་བའི་རྣམ་པར་ཤེས་པ་དེ་ལྷན་ཅིག་འབྱུང་བའི་མིང་དང་གཟུགས་ཀྱི་རྐྱེན་མ་ཡིན་གྱི། འོན་ཀྱང་དུས་ཕྱི་མའི་མིང་དང་གཟུགས་ཀྱི་རྐྱེན་ཡིན་ནོ་སྙམ་ན། དེའི་ཕྱིར་འོན་དེའི་དུས་ཀྱི་མིང་དང་གཟུགས་ཀྱི་རྐྱེན་གང་ཡིན་ཞེས་སྨྲས་ཏེ། དེའི་དུས་ཀྱི་ཞེས་བྱ་བ་ནི་ཉིད་མཚམས་སྦྱོར་བའི་རྣམ་པར་ཤེས་པའི་དུས་ཀྱིའོ། །རྐྱེན་འདུ་བྱེད་ཡིན་ནོ་ཞེ་ན་ཡང་ཞེས་བྱ་བ་ནི། འོན་ཏེ་འདི་སྙམ་དུ་དེ་ཡང་འདུ་བྱེད་ཀྱི་རྐྱེན་གྱིས་ཡིན་ནོ་སྙམ་ན། ཉིང་མཚམས་སྦྱོར་བའི་རྣམ་པར་ཤེས་པ་དང༌། མིང་དང་གཟུགས་དེ་གཉི་གའི་རྐྱེན་ཡིན་པའི་ཕྱིར་ཞེས་བྱ་བ་འདུ་བྱེད་ནི་གཉི་གའི་རྐྱེན་ཡིན་པའི་ཕྱིར་དེ་སྐྱེ་བར་བྱ་བའི་དོན་དུ། ཅིའི་ཕྱིར་རྣམ་པར་ཤེས་པའི་ཡན་ལག་བརྟག་པར་བྱ། མིང་དང་གཟུགས་ཁོ་ནའི་རྐྱེན་འདུ་བྱེད་ཡིན་ན་བརྟག་ཏུ་མི་རུང་སྟེ། དེ་དང་སྐད་ཅིག་ཕྱི་མར་ཁྱད་པར་ཡང་ཅི་ཞིག་ཡོད་ཅེས་བྱ་བ་ལ་དེ་དང་ཞེས་བྱ་བ་ནི་ཉིང་མཚམས་སྦྱོར་བའི་རྣམ་པར་ཤེས་པ་དང་ལྷན་ཅིག་འབྱུང་བའི་མིང་དང་གཟུགས་དེ་དང་ངོ༌། །སྐད་ཅིག་ཕྱི་མ་ཞེས་བྱ་བ་ནི་སྐད་ཅིག་མ་གཉིས་པ་སྟེ། གང་གི་རྐྱེན་དུ་རྣམ་པར་ཤེས་པ་དེ་ཡིན་པར་བརྟག་པར་བྱེད་པའོ། །འོན་ཏེ་སྐད་ཅིག་མ་ལས་སྐད་ཅིག་མ་ཕྱི་མ་ངེས་པར་ཁྱད་པར་ཡོད་དོ་ཞེས་
བརྗོད་ན་དེ་ལྟ་ན་ཡན་ལག་ཐམས་ཅད་ལ་ཡང་འདི་ཉིད་ཐལ་བར་འགྱུར་རོ། །དེ་བས་ན་རྫས་ཐ་དད་པའི་བྱེ་བྲག་ཡོད་པ་དེ་གླེངས་པ་ཡིན་པར་རིག་པར་བྱའོ། །འོན་ཏེ་འདིར་ཇི་ལྟར་སྲིད་པ་རྐྱེན་གྱི་དངོས་པོར་འདོད་ན་ནི་ཞེས་བྱ་བ་ནི། འོན་ཏེ་རྣམ་པར་ཤས་པའི་རྐྱེན་གྱིས་མིང་དང་གཟུགས་ཞེས་བྱ་བ་འདིར་ཇི་ལྟར་སྲིད་པའི་རྐྱེན་གྱི་དངོས་པོར་འདོད་དེ། གང་ན་མིང་དང་གཟུགས་སྲིད་པ་དེར་ནི་མིང་དང་གཟུགས་ཀྱི་རྐྱེན་ཡིན་ནོ། །གང་ན་མིང་འབའ་ཞིག་སྲིད་པ་གཟུགས་མེད་པ་དེར་ནི་མིང་ཉི་ཚེའི་རྐྱེན་ཡིན་ནོ། །འདུ་བྱེད་ཀྱི་རྐྱེན་གྱིས་མིང་དང་གཟུགས་ལ་ཡང་ཇི་ལྟར་སྲིད་པའི་རྐྱེན་གྱིས་དངོས་པོ་ཡིན་པ་དེ་བཞིན་དུ་ཅིའི་ཕྱིར་མི་འདོད་དེ། གང་ན་མིང་དང་གཟུགས་སྲིད་པ་དེར་ནི་འདུ་བྱེད་ཀྱི་རྐྱེན་གྱིས་མིང་དང་གཟུགས་ཡིན་ནོ། །གང་ན་མིང་ཉི་ཚེ་སྲིད་པ་གཟུགས་མེད་པ་དེར་ནི་མིང་ཉི་ཚེའི་རྐྱེན་ཡིན་ནོ་ཞེས་བྱ་བར་སྦྱར་རོ། །འདུ་བྱེད་ཀྱི་རྐྱེན་གྱིས་ཉིང་མཚམས་སྦྱོར་བའི་རྣམ་པར་ཤེས་པ་ཡིན་ན་ནི་འདས་པའི་འདུ་བྱེད་ཀྱིས་རྣམ་པར་ཤེས་པ་སྐྱེད་པར་ཐལ་བར་འགྱུར་རོ་ཞེས་བྱ་བ་ནི་ཉིང་མཚམས་སྦྱོར་བའི་རྣམ་པར་ཤེས་པ་ཁོ་ནའི་རྐྱེན་ཉིད་དེ་ཡིན་ལ། གཅིག་ནས་གཅིག་ཏུ་བརྒྱུད་པ་མེད་པའི་ཕྱིར་རོ། །འདི་ནི་གློ་བུར་དུ་ཉམ་ང་བར་ཞུགས་པ་ཡིན་ནོ་ཞེས་བྱ་བ་ནི་སྒྲུབ་པ་གཞན་ཡོད་བཞིན་དུ་རྒྱུ་མེད་པར་སྐྱུར་བ་ཉིད་སྐྱེ་བ་ནི་ཉམ་ང་པར་ཞུགས་པའི་དོན་ཡིན་ནོ། །འོ་ན་དེ་ག་ལས་ཤེ་ན། དེ་ལས་སྐྱེས་པའི་མཐུའི་བྱེ་བྲག་དང་ལྡན་པ་ཞེས་བྱ་བ་ནི་སྐྱུར་བ་དེ་ལས་སྐྱེས་པའི་མཐུའི་བྱེ་བྲག་ནི་དེ་ལས་སྐྱེས་པའི་མཐུའི་བྱེ་བྲག་སྟེ། དེ་རྒྱུན་ཡོངས་སུ་འགྱུར་བའི་བྱེ་བྲག་འདི་ལ་ཡོད་བས་དེ་ནི་དེ་ལས་སྐྱེས་པའི་མཐུའི་བྱེ་བྲག་སྟེ་དེ་ལས་སོ། །དེ་དག་གིས་ནི་དམར་བ་ཉིད་དང་ཞེས་རྒྱས་པར་འབྱུང་བ་ལ། དེ་དག་གིས་ནི་ཕྱིས་དམར་བ་དང༌། རྩ་དམར་བ་ཉིད་ཀྱི་ལན་ཀྱང་བཏབ་པ་ཡིན་ཏེ། ཇི་ལྟ་ཞེ་ན། དེ་ནས་སྐྱེས་པའི་མཐུའི་བྱེ་བྲག་གི་རྒྱུན་ཡོངས་སུ་འགྱུར་བའི་བྱེ་བྲག་ལས་དེའི་བྲས་བུ་གེ་སར་དམར་པོ་ཉིད་ཡིན་ནོ།། དེ་སྐྱེ་བ་དང་མི་མཐུན་པའི་རྐྱེན་བསལ་ན་ཞེས་བྱ་བ་ནི་རྩ་དམར་བ་དེ་སྐྱེ་བ་དང་མི་མཐུན་པའི་རྐྱེན་མི་བསལ་ན་རང་བཞིན་གྱི་ངོ་བོ་ཉིད་ཀྱིས་ལྕགས་ཀྱི་ཐུ་ལུམ་འབྱུང་བ་ཆེན་པོ་དེ་འབྱུང་བ་དང་རྗེས་སུ་མཐུན་པ་ཡིན་པའི་ཕྱིར་ཞེས་བྱ་བ་ནི་རྩ་དམར་པོ་འབྱུང་བ་དང་རྗེས་སུ་མཐུན་པ་ཇི་ལྟ་བུ་ཞེ་ན། རྩ་དམར་པོ་སྐྱེ་བར་འགྱུར་
བ་ལ་བྱའོ། །འདིར་ཚིགས་སུ་བཅད་པ་འདི་ཇི་ལྟར་རྒྱུ་རྣམ་པར་ཞིག་པ་ལས་འབྲས་བུར་མི་འགྱུར་ཏེ། རྒྱུ་རྣམ་པར་ཞིག་པ་ལས་འབྲས་བུ་མ་ཡིན་ནོ། །གལ་ཏེ། རྣམ་ཞིག་རྒྱུ་ལས་འབྲས་འབྱུང་ན། །དབང་པོ་ལ་སོགས་རྣམ་ཞིག་ལས། །ཞེས་རྒྱས་པར་འབྱུང་བ་སྟེ། རྣམ་པར་ཞིག་པ་ལས་ཡིན་ན་ནི་དབང་པོ་དང་དོན་རྣམ་པར་ཞིག་པ་ལས་མཐོང་བ་དང་ཐོས་པ་ལ་སོགས་པའི་བྱ་བ་བྱེད་པ་ཇི་ལྟར་རིགས་པར་འགྱུར་རོ། །ཆུ་སྐམས་པས་གཤེར་བར་འགྱུར་བ་དང༌། རླུང་ཞི་བས་སྐམས་པར་འགྱུར་བ་དང༌། བརྡུངས་པ་ཡང་རྣམ་པར་ཞིག་ན་སྒྲ་འབྱུང་བར་འགྱུར་རོ། །དེ་བཞིན་དུ་མེ་ཤིན་དུ་བ་འབྱུང་བར་འགྱུར་གྱི་ཞི་བར་མི་འགྱུར་རོ། །ལས་དང་ཉོན་མོངས་པ་སྤངས་ཀྱང་མྱ་ངན་ལས་འདས་པར་མི་འགྱུར་གྱི་ཡང་སྲིད་སྐྱེ་བར་འགྱུར་རོ་ཞེས་བྱའོ། །འོ་ན་ཇི་ལྟར་ཞེ་ན། དེ་ལས་སྐྱེས་པ་བསྒོས་པ་གནས་པའི་ཕྱིར་རོ་ཞེས་བྱ་བ་ལ་ལས་དེ་ལས་སྐྱེས་པ་ཡིན་ཏེ། དེ་ལས་སྐྱེས་པ་དེ་ནི་བསྒོས་པ་ཡིན་པས་དེ་ལས་སྐྱེས་པ་བསྒོས་པ་ཡིན་ཏེ། དེ་གནས་པ་ནི་དེ་ལས་སྐྱེ་བ་བསྒོས་པ་གནས་པ་ཞེས་བྱའོ། །དེ་ལས་བྱུང་བའི་འབྲས་བུ་སྦྱིན་པར་ནུས་པ་མ་སྤྱད་པ་ཉིད་ཡིན་པའི་ཕྱིར་རོ་ཞེས་བྱ་བ་ནི་དེ་ལས་བྱུང་བའི་འབྲས་བུ་སྦྱིན་པར་ནུས་པ་མ་སྤྱད་པ་ཉིད་གཟུང་བ་ཡིན་ནོ་ཞེས་བྱ་བའི་དོན་ཏོ། །དེ་ལྟ་མ་ཡིན་ན་དེ་འདས་པ་ཉིད་ཡིན་པར་འགྲུབ་པར་མི་འགྱུར་རོ་ཞེས་བྱ་བ་ནི་གལ་ཏེ་ད་ལྟར་བྱུང་བ་བཞིན་དུ་རང་གི་མཚན་ཉིད་ཡོད་པའི་ཕྱིར་ཡོད་དོ་ཞེས་སྨྲ་ན་ནི་དེ་ལ་ད་ལྟར་བྱུང་བའི་ཆོས་གཞན་སྐྱེ་བའམ། འཇིག་པ་ཅུང་ཟད་ཀྱང་རྣམ་པར་གཞག་པར་མི་ནུས་ཏེ། ཞིབ་ཏུ་ནི་ཆོས་མངོན་པའི་མཛོད་ལས་གཟུང་བར་བྱའོ། །འདི་ལྟར་རྒྱུན་རྣམ་པར་བཞག་ནས་འདུ་བྱེད་འགགས་ལ་དེ་དང་རྗེས་སུ་མཐུན་པའི་འབྲས་བུ་གཅིག་ནས་གཅིག་ཏུ་འཕངས་ནས་ཞེས་རྒྱས་པར་འབྱུང་བ་ལ་ས་བོན་གྱི་རྒྱུན་བཞིན་དུ་ཞེས་བྱ་བ་ནི་ཇི་ལྟར་མྱུ་གུ་ལ་སོགས་པའི་རྒྱུན་རྣམ་པར་བཞག་ནས་ས་བོན་འགག་ལ་དེ་དང་རྗེས་སུ་མཐུན་པའི་འབྲས་བུ་གཅིག་ནས་གཅིག་ཏུ་འཕངས་པ་དེ་བཞིན་དུ་འདུ་བྱེད་ཀྱི་རྒྱན་རྣམ་པར་བཞག་ནས་འགག་ལ་དེ་དང་རྗེས་སུ་མཐུན་པའི་འབྲས་བུ་གཅིག་ཏུ་འཕངས་པ་ཡིན་ནོ། །དེའི་འོག་ཏུ་འབྱུང་བར་འགྱུར་བས་ཞེས་བྱ་བ་ནི་བསོད་ནམས་ལ་སོགས་པའི་འདུ་བྱེད་ཀྱི་འོག་ཏུ་ཞེས་བྱ་
བའི་ཐ་ཚིག་གོ །ཇི་ལྟར་ན་དེའི་རྐྱེན་གྱིས་ལུང་དུ་མ་བསྟན་པའི་སེམས་པའི་རྒྱུན་གྱི་རྐྱེན་གྱིས། ཉིང་མཚམས་སྦྱོར་བའི་ཚེ་རྣམ་པར་ཤེས་པ་ཡིན་པར་རིགས་པར་འགྱུར། ལུང་དུ་མ་བསྟན་པའི་ཆོས་ས་བོན་རུལ་བ་དང་འདྲ་བ་ནི་ཉིང་མཚམས་སྦྱོར་བའི་རྣམ་པར་ཤེས་པའི་མྱུ་གུ་སྐྱེད་པར་ནུས་པ་མ་ཡིན་ནོ། །ཇི་ལྟར་ན་ཡང་གང་དེའི་འོག་ཏུ་ལུང་དུ་མ་བསྟན་པ་འབྱུང་བའི་སེམས་པའི་རྒྱུན་འདི་བསོད་ནམས་ལ་སོགས་པའི་འདུ་བྱེད་ཀྱི་རྣམ་པར་གཞག་པ་ཡིན། དེ་ཉིད་ལ་འདུ་བྱེད་རྣམས་ཀྱི་ནུས་པ་ཡིན་གྱི་ཞེས་བྱ་བ་ནི་བག་ཆགས་ཀྱི་རྒྱུན་དེ་ལའོ། །ཉིང་མཚམས་སྦྱོར་བའི་རྣམ་པར་ཤེས་པའི་དུས་ན་ནི་ཡང་སྲིད་པ་མངོན་པར་གྲུབ་པ་ཁོ་ན་ཡིན་པས་ཞེས་བྱ་བ་ནི་ཉིང་མཚམས་སྦྱོར་བའི་རྣམ་པར་ཤེས་པ་དེ་དང་ལྷན་ཅིག་འབྱུང་བའི་ཆོས་རྣམས་ཀྱིས་ཡང་སྲིད་ཀུན་དུ་བསྡུས་པའི་ཕྱིར་རོ། །དེའི་ཚེ་འདུ་བྱེད་ཀྱི་རྐྱེན་གྱིས་ཉིང་མཚམས་སྦྱོར་བའི་རྣམ་པར་ཤེས་པ་དེ་གང་གི་ས་བོན་ཡིན་ན་གང་འདི་སྐད་དུ་རྣམ་པར་ཤེས་པ་ས་བོན་ཡང་སྲིད་ཀྱི་ཞིང་ལས་སྐྱེད་དོ་ཞེས་བརྗོད། སྔོན་གྱི་སྲིད་པའི་རྣམ་པར་ཤེས་པ་ནི་མ་རིག་པའི་རྐྱེན་ཅན་གྱིས་འདུ་བྱེད་ཀྱི་རྐྱེན་གྱིས་མིང་དང་གཟུགས་ཀྱི་མྱུ་གུའི་རྒྱུའི་དངོས་པོ་ཉེ་བར་བཟུང་ནས་སྲིད་པ་བར་མའི་རྒྱུན་གྱིས་ཡང་སྲིད་ཞིང་ལ་སྐྱེད་དོ་ཞེས་བྱ་བ་ནི་རིགས་པ་ཡིན་ནོ། །དེ་ཉིད་ཀྱི་ཕྱིར་མ་རིག་པའི་རྐྱན་གྱིས་འདུ་བྱེད་ཡིན་ལ། དེས་བསྒོས་པའི་རྣམ་པར་ཤེས་པ་ནི་འདུ་བྱེད་ཀྱི་རྐྱེན་གྱིས་ཡིན་ནོ་ཞེས་བྱ་བ་ལ་སོགས་པ་སྨོས་སོ། །དེ་ལྟར་བྱས་ན་མདོ་སྡེ་གཞན་ལས་རྣམ་པར་ཤེས་པ་ས་བོན་ཞེས་གསུངས་པ་གང་ཡིན་པ་དེ་རིགས་པ་ཡིན་ནོ་ཞེས་བྱ་བ་ལ་དེ་ལྟར་བྱས་ན་ཞེས་བྱ་བ་ནི་ཇི་སྐད་དུ་ཁོ་བོས་གོང་ཉིད་དུ་མ་རིག་པའི་རྐྱེན་གྱིས་འདུ་བྱེད་ཡིན་ལ་ཞེས་རྒྱས་པར་བསྟན་པ་ཡིན་ནོ། །མདོ་སྡེ་གཞན་ལས་རྣམ་པར་ཤེས་པ་ས་བོན་ཡིན་པ་ཇི་ལྟར་བསྟན་ཞེ་ན། ཀུན་དགའ་བོ་གལ་ཏེ། འདོད་པ་དང་རབ་ཏུ་ལྡན་པའི་ལས་མེད་པར་གྱུར་ན། འོན་ཀྱང་འགའ་ཡང་གང་དུ་ཡང་འདོད་པའི་སྲིད་པ་འགྲུབ་བམ། བཙུན་པ་མ་ལགས་སོ། །ཀུན་དགའ་བོ་འོན་ཀྱང་ལས་ཞིང་དང་སྲེད་པ་རླན་དང༌། རྣམ་པར་ཤེས་པ་ས་བོན་དང༌། མ་རིག་པའི་མུན་པ་ཅན་གྱི་སེམས་ཅན་མ་རིག་པས་ལྡོངས་པར་གྱུར་པ་དེ་དག་ནི་འདི་ལྟ་སྟེ་འདོད་པའི་སྲིད་པ་ན་སེམས་དམན་པ་ལ་རྣམ་པར་
ཤེས་པ་རབ་ཏུ་གནས་པ་ཡིན་ནོ། །ཀུན་དགའ་བོ་གལ་ཏེ་གཟུགས་དང་རབ་ཏུ་ལྡན་པའི་ལས་མེད་པར་གྱུར་ན། འོན་ཀྱང་འགའ་ཡང་གང་དུ་ཡང་གཟུགས་ཀྱི་སྲིད་པ་འགྲུབ་བམ། བཙུན་པ་མ་ལགས་སོ། །ཀུན་དགའ་བོ་འོན་ཀྱང་ལས་དང་ཞིང་དང་ཞེས་རྒྱས་པར་འབྱུང་བ་ནས་འདི་ལྟ་སྟེ། གཟུགས་ཀྱི་སྲིད་པ་ནས་སེམས་པ་བར་མ་ལ་རྣམ་པར་ཤེས་པ་གནས་པ་ཡིན་ནོ། །ཀུན་དགའ་བོ་གལ་ཏེ་གཟུགས་མེད་པ་དང་རབ་ཏུ་ལྡན་པའི་ལས་མེད་པར་གྱུར་ན། འོན་ཀྱང་འགའ་ཡང་གང་དུ་ཡང་གཟུགས་མེད་པའི་སྲིད་པ་འགྲུབ་བམ། བཙུན་པ་མ་ལགས་སོ། །ཀུན་དགའ་བོ་འོན་ཀྱང་ལས་ཞིང་དང་ཞེས་རྒྱས་པར་འབྱུང་བ་ནས། འདི་ལྟ་སྟེ་གཟུགས་མེད་པའི་སྲིད་པ་ན། སེམས་པ་གྱ་ནོམ་པ་ལ་རྣམ་པར་ཤེས་པ་རབ་ཏུ་གནས་པ་ཡིན་ནོ་ཞེས་བྱ་བ་ཡིན་ནོ། །འོན་ཀྱང་ཁ་ཅིག་ན་རེ་དེའི་རྒྱུ་ཅན་རྣམ་པར་མ་ཞིག་པ་ལས་ཡིན་ནོ་ཞེས་བྱ་བ་ནི་བསོད་ནམས་ལ་སོགས་པའི་འདུ་བྱེད་ཀྱི་རྒྱུ་ཅན་ཡིན་པའི་ཕྱིར་རོ་ཞེས་བྱ་བའི་དོན་ཏོ། །ཁ་ཅིག་ན་རེ་རྣམ་པར་མ་ཞིག་པ་ལས་ཡིན་ནོ་ཞེའོ་ཞེས་བྱ་བ་ནི་འཕགས་པ་ཀུན་གྱིས་བཀུར་པ་ཡིན་ནོ། །ཁ་ཅིག་ན་རེ་བསགས་པ་ལས་ཡིན་ནོ་ཞེའོ་ཞེས་བྱ་བ་ནི་དགེ་འདུན་ཕལ་ཆེན་པོའོ། །སེམས་དང་མི་ལྡན་པའི་ཆོས་གཞན་ཞེས་བྱ་བ་ནི་གཟུགས་དང་སེམས་དང་སེམས་ལས་བྱུང་བས་མ་བསྡུས་པའི་འདུས་བྱས་ནི་སེམས་དང་མཚུངས་པར་ལྡན་པ་མ་ཡིན་པའི་ཕྱིར་སེམས་དང་མི་ལྡན་པ་ཡིན་པར་གཞག་སྟེ། དོགས་པ་རྣམ་པར་བཟློག་པའི་ཕྱིར་རོ། །ནམ་འབྲས་བུ་འབྱིན་པའི་བར་དུ་རྗེས་སུ་འཇུག་པ་དེ་ཡིན་ཞེས་བྱ་བ་ནི་སེམས་དང་མི་ལྡན་པའི་ཆོས་གཞན་ནོ། །དེས་བྱས་པ་ལ་དེ་ཉེ་བར་འདོགས་པ་ཡིན་ནོ་ཞེས་བྱ་བ་ནི་འདུ་བྱེད་ཀྱིས་བྱས་པའི་རྣམ་པར་མ་ཞིག་པ་དང་བསགས་པ་ལ་འདུ་བྱེད་ཉེ་བར་འདོགས་སོ་ཞེས་བྱ་བའི་དོན་ཏོ། །ཡང་ན་རྣམ་པར་མ་ཞིག་པ་དང་བསགས་པས་བྱས་པའི་འབྲས་བུ་ལ་འདུ་བྱེད་ཉེ་བར་བཏགས་པ་ཡིན་ནོ། །འདུ་བྱེད་རྣམས་ཉེ་བར་བཏགས་པ་ནི་འདུ་བྱེད་ཉེ་བར་བཏགས་པ་སྟེ། འདུ་བྱེད་ཀྱི་རྐྱེན་གྱིས་ཉིང་མཚམས་སྦྱོར་བའི་རྣམ་པར་ཤེས་པ་ཞེས་རྐྱེན་ཉིད་ཉེ་བར་འདོགས་པའི་ཕྱིར་རོ། །དཔེར་ན་རྐུན་པོས་གྲོང་ཁྱེར་བསྲེགས་པ་དང་ཞེས་བྱ་བ་ནི་རྐུན་པོས་བསྒྲུབས་པའི་མེ་ལ་རྐུན་པོ་བཞིན་
དུ་ཉེ་བར་འདོགས་པའམ། རྐུན་པོས་བསྒྲུབས་པའི་མེས་བསྲེགས་པ་ལ་རྐུན་པོས་གྲོང་ཁྱེར་བསྲེགས་སོ་ཞེས་རྐུན་པོར་ཉེ་བར་འདོགས་སོ། །རྩྭས་འབྲས་ཆན་ཚོས་པ་དང་ཞེས་བྱ་བ་ནི་རྩ་ལས་བྱུང་བའི་མ་ལ་རྩ་ཉེ་བར་འདོགས་པར་བྱེད་པའམ། རྩ་ལས་བྱུང་བའི་མེས་བྱས་པ་ལ་རྩྭས་འབྲས་ཆན་ཚོས་སོ་ཞེས་རྩྭ་རྣམས་ཀྱིས་བྱས་པ་ཉིང་དུ་ཉེ་བར་འདོགས་སོ། །འཕགས་པ་རྣམས་ནི་མཐོང་བ་བདེ། །ཞེས་བྱ་པ་ནི། འཕགས་པ་མཐོང་བ་ཁོ་ན་བདེ་བ་མ་ཡིན་གྱི། བདེ་བའི་རྒྱུ་ཉིད་ཡིན་པའི་ཕྱིར་བདེ་བ་ཞེས་ཉེ་བར་འདོགས་པ་ལྟ་བུའོ། །དེ་དག་གི་ཡང་མདོ་སྡེ་དང་འགལ་བ་དེ་ཁོ་ན་བཞིན་དུ་གནས་པ་ཡིན་ནོ་ཞེས་བྱ་བ་ནི་ཇི་ལྟར་ཡིན་ཞེ་ན། འདི་ལྟར་རྣམ་པར་ཤེས་པའི་ཡན་ལག་རྣམ་པར་དབྱེ་བ་ལས་རྣམ་པར་ཤེས་པ་གང་ཞེ་ན། རྣམ་པར་ཤེས་པའི་ཚོགས་དྲུག་གོ་ཞེས་གསུངས་ཀྱང་ཡིད་ཀྱི་རྣམ་པར་ཤེས་པ་ཁོ་ནས་ཉིང་མཚམས་སྤྲེལ་བ་ཡིན་པས་ཇི་ལྟར་ན་རྣམ་པར་ཤེས་པའི་ཚོགས་དྲུག་འདུ་བྱེད་ཀྱི་རྐྱེན་གྱིས་རྣམ་པར་ཤེས་པ་ཡིན་པར་འགྱུར་ཞེས་བྱ་བའོ། །ཐོབ་པ་ལ་སོགས་པ་ནི་མ་ཡིན་ནོ་ཞེས་བྱ་བ་ནི་ཐོབ་པ་དང་མ་ཐོབ་པ་དང་རིས་འདྲ་བ་ཉིད་དང་འདུ་ཤེས་མེད་བ་པ་དང༌། འདུ་ཤེས་མེད་པའི་སྙོམས་པར་འཇུག་པ་དང༌། འགོག་པའི་སྙོམས་པར་འཇུག་པ་དང༌། སྲོག་གི་དབང་པོའི་མཚན་ཉིད་ལ་སོགས་པ་ཅི་རེག་པ་ལ་བརྟེན་ནས་འབྱུང་ངམ། རེག་པ་མེད་པར་ཡང་འགོག་པའི་སྙོམས་པར་འཇུག་པ་ལ་སོགས་པ་ནི་ཐོབ་པ་ལས་སྐྱེ་བའི་ཕྱིར་རོ། །དེ་བས་ན་སེམས་དང་མི་ལྡན་པའི་འདུ་བྱེད་རྫས་སུ་ཡོད་པ་ཡང་མ་ཡིན་ཏེ། གཟུགས་ལ་སོགས་པ་རྫས་སུ་ཡོད་པའི་གནས་སྐབས་གཞན་ལ་བཏགས་པ་ཡིན་ལ་ཞེས་བྱ་བ་ནི་གཟུགས་དང་སེམས་དང་སེམས་ལས་བྱུང་བའི་གནས་སྐབས་གཞན་ལ་ཞེས་བྱ་བའི་ཐ་ཚིག་སྟེ། མི་ལྡན་པ་རྣམས་དང་འདུས་མ་བྱས་རྣམས་རྫས་སུ་ཡོད་པ་མ་ཡིན་ནོ་ཞེས་རྒྱས་པར་གསུངས་པའི་ཕྱིར་རོ། །དཔེར་ན་ནུས་པ་དང༌། ཀུན་དུ་སྦྱོར་བ་དང་རྣམ་པར་ཕྱེ་བ་དང༌། ཕ་རོལ་ཉིད་དང༌། ཚུ་རོལ་ཉིད་དང༌། རྒྱང་རིང་བ་དང༌། ཐག་ཉེ་བ་ཉིད་ལྟ་བུའོ་ཞེས་བྱ་བ་ཅི་ཞེ་ན། གཟུགས་ལ་སོགས་པའི་གནས་སྐབས་གཞན་ལ་བཏགས་པ་ཡིན་ནོ་ཞེས་བྱ་སྟེ། འབྲས་བུ་སྐྱེ་བའི་རྒྱུའི་དངོས་པོར་ཉེ་བར་གནས་པའི་
གནས་སྐབས་ལ་ནུས་པ་བཏགས་པ་ཡིན་ནོ། །གཟུགས་རྒྱུན་མི་འཆད་པར་སྐྱེ་བའི་གནས་སྐབས་ལ་ཀུན་དུ་སྦྱོར་བས་སོ། །རྒྱུན་མི་འཆད་པར་སྐྱེ་བར་ཀུན་དུ་སྦྱོར་བས་སོ། །རྣམ་པར་ཕྱེ་སྟེ་སྐྱེ་བའི་གནས་སྐབས་ལ་ནི་རྣམ་པར་ཕྱེ་བའོ། །སེམས་དང་སེམས་ལས་བྱུང་བ་ལྷན་ཅིག་ཏུ་སྐྱེ་བའི་གནས་སྐབས་ལ་ཡང་ཀུན་དུ་སྦྱོར་བ་བཏགས་པ་ཡིན་ཏེ། དུས་དང༌། རྟེན་དང༌། དམིགས་པ་མཚུངས་པར་ལྡན་པའི་ཕྱིར་རོ། །ཕ་རོལ་ཉིད་དང་ཚུ་རོལ་ཉིད་ཀྱང་བར་ན་གཟུགས་མང་བ་དང་ཉུང་བ་ཉིད་ཀྱི་གནས་སྐབས་ལ་བཏགས་པ་ཡིན་ཏེ། མཐོང་བའི་ཡུལ་ལས་བར་ན་གཟུགས་མང་བ་ལ་ཕ་རོལ་ཞེས་བཏགས་སོ། །བར་ན་ཉུང་བ་ལ་ཆུ་རོལ་ཞེས་བཏགས་པ་དེ་བཞིན་དུ་དུས་དང་ངོ་བོ་ཉིད་ལ་སོགས་པ་ཐ་དད་པ་ཡིན་དུ་ཟིན་ཀྱང༌། རྒྱུད་ཐ་དད་པ་ལ་ཕ་རོལ་དང་ཚུ་རོལ་ཞེས་བཏགས་སོ། །དེ་བཞིན་དུ་གཟུགས་ལ་སོགས་པའི་གནས་སྐབས་གཞན་ལ་ཐོབ་པ་ལ་སོགས་པ་བཏགས་པ་ཡིན་ཏེ། ཇི་ལྟ་ཞེ་ན། རེ་ཞིག་ཐོབ་པ་ནི་དགེ་བ་ལ་སོགས་པའི་ཆོས་རྣམས་ཀྱི་ས་བོན་མ་ཉམས་པའི་གནས་སྐབས་དང༌། དེ་སྐྱེ་བའི་དབང་མ་ཉམས་པ་དང༌། མངོན་དུ་གྱུར་པའི་གནས་སྐབས་ལ་བཏགས་པ་ཡིན་ནོ། །མ་ཐོབ་པ་ནི་དེའི་ས་བོན་མེད་པ་ཤིན་ཏུ་ཀུན་དུ་འབྱུང་བའི་གནས་སྐབས་ལ་བཏགས་པ་ཡིན་ནོ། །རིས་འདྲ་བ་ཉིད་ནི་སེམས་འདྲ་བ་ཙམ་ལ་བཏགས་པ་ཡིན་ཏེ། མི་འདྲ་བའི་རྫས་གཞན་ནི་འདྲ་བ་མ་ཡིན་ཏེ། འབྲས་ལ་སོགས་པའི་སྡོང་བུ་འདྲ་བ་བཞིན་ནོ། །དེ་ལྟར་ན་དེ་ལྟ་བུ་ཡིན་པའི་གཟུགས་ལ་སོགས་པ་ཕུང་པོ་སྐྱེ་བའི་གནས་སྐབས་གཞན་ཐོབ་པ་ནི་རིས་འདྲ་བ་ཞེས་བྱ་བ་འཐོབ་སྟེ། མི་ལ་སོགས་པ་བྱེ་བྲག་ཏུ་གདགས་པའི་རྒྱུ་ཡིན་པའི་ཕྱིར་རོ། །དེ་བཞིན་དུ་སེམས་མེད་པའི་སྙོམས་པར་འཇུག་པ་གཉིས་ནི་སེམས་དང་སེམས་ལས་བྱུང་བ་སྐྱེ་བ་དང་མི་མཐུན་པའི་ལུས་སྐྱེས་པའི་གནས་སྐབས་ལ་གདགས་སོ། །འདུ་ཤེས་མེད་པ་བ་ཡང་དེ་བཞིན་དུ་རིག་པར་བྱའོ། སྲོག་གི་དབང་པོ་ནི་སྔོན་གྱི་ཚེ་རབས་ཀྱི་ལས་ཀྱིས་འཕངས་ཏེ། རིས་མཐུན་པར་གནས་པའི་རྒྱུའི་དངོས་པོ་ཙམ་ལ་གདགས་སོ། །མ་བྱུང་བ་ལས་བྱུང་བ་ལ་སྐྱེ་བ་གདགས་སོ། །འབྲས་བུ་དང་རྒྱུའི་རྒྱུན་ལ་གནས་པའོ། །རྒྱུན་སྔ་ཕྱིའི་བྱེ་བྲག་ལ་ནི་རྒལ་བའོ། །བྱུང་ནས་མེད་པ་ཙམ་ལ་མི་རྟག་
པ་ཉིད་གདགས་སོ་ཞེས་བྱ་བ་ལ་སོགས་པའོ། །དེ་དག་ཇི་ལྟར་རྫས་སུ་ཡོད་པ་མ་ཡིན་པ་ནི་ཆོས་མངོན་པའི་མཛོད་ལས་ཤེས་པར་བྱའོ་ཞེས་བྱ་བ་ཇི་ལྟར་ཡིན་ཞེ་ན། ཐོབ་པ་ལ་སོགས་པ་ནི་རྫས་སུ་ཡོད་པ་མ་ཡིན་ནོ། །ཅིའི་ཕྱིར་ཞེ་ན། དེ་དག་གི་རང་གི་ངོ་བོ་ནི་འདོད་ཆགས་དང་ཞེ་སྡང་ལ་སོགས་པས་བཅིངས་པ་རྣམས་ལ་གཟུགས་དང་སྒྲ་ལ་སོགས་པ་བཞིན་དུ་མི་མངོན་པའི་ཕྱིར་དང༌། མིག་དང་རྣ་བ་ལ་སོགས་པ་བཞིན་དུ་བྱེད་པ་ཡང་མེད་དོ། །དེ་བས་ན་རྫས་ཀྱིས་ཆོས་མེད་པའི་ཕྱིར་བཏགས་པའི་ཡོད་པ་ཡིན་ནོ། །ཡང་ན་ཐོབ་པ་ལ་སོགས་པ་ནི་ཇི་ལྟར་བཏགས་པའི་རྣམས་རྫས་སུ་ཡོད་པ་མ་ཡིན་ཏེ། ཇི་ལྟ་ཞེ་ན། ཚད་མ་མེད་པའི་ཕྱིར་རོ། །དེ་དག་རྫས་སུ་ཡོད་པ་ཉིད་དུ་བྱེད་པའི་ཚད་མ་མངོན་སུམ་མམ། རྗེས་སུ་དཔག་པའམ། ཡིད་ཆེས་པའི་ལུང་ནི་ཅུང་ཟད་ཀྱང་ཡོད་པ་མ་ཡིན་ཏེ། ཇི་ལྟར་གཟུགས་ལ་སོགས་པ་བཞིན་དུའོ། །འོ་ན་མདོ་སྡེ་ལས་ཆོས་བཅུ་པོ་དེ་དག་རྣམས་ཞེས་རྒྱས་པར་གསུངས་པ་ནི་དེ་ཉིད་ལས་ཇི་ལྟར་རིགས་པར་རྣམ་པར་ངེས་པ་གཟུང་བར་བྱའོ། །རྣམ་པར་མ་ཞིག་པ་དང༌། བསགས་པ་ཡང་ཡོང་ཡེ་ཡོད་པ་མ་ཡིན་ལ། གནས་སྐབས་གཞན་དེ་དག་ལ་དེ་ཉིད་བཏགས་ཡང་མ་ཡིན་ནོ། །བསོད་ནམས་ལ་སོགས་པའི་འདུ་བྱེད་ཀྱི་བག་ཆགས་དང་རྗེས་སུ་འབྲེལ་པ་ཉིད་ཡིན་ན་ཡང་དེ་ཕན་པ་བྱེད་པ་ཡིན་ནོ། །གང་ཡང་སེམས་མེད་པའི་སྙོམས་པར་འཇུག་པ་དང་འདུ་ཤེས་མེད་པ་པའི་མཇུག་ཏུ་ལྡང་བའི་སེམས་སྐྱེ་བ་དང་ཞེས་བྱ་བ་ལ་སེམས་མེད་པའི་སྙོམས་པར་འཇུག་པ་སྨོས་པས་ནི་འགོག་པའི་སྙོམས་པར་འཇུག་པ་དང་འདུ་ཤེས་མེད་པའི་སྙོམས་པར་འཇུག་པ་གཟུང་ངོ༌། །དེ་ལ་སེམས་མེད་པའི་སྙོམས་པར་འཇུག་པའི་མཇུག་ཏུ་ལྡང་བ་ནི་ལྡང་བའི་དུས་སོ། །འདུ་ཤེས་མེད་པ་པའི་མཇུག་ནི་འཆི་བའི་དུས་སོ། །གང་ཡང་ཡི་གེའི་གཞུང་ལན་མང་དུ་སྟོན་པ་ལས་ཅི་ཞེ་ན། དྲན་པ་སྐྱེ་བར་འགྱུར་རེ་ཞེས་ཕྱིས་འཆད་པར་འགྱུར་རོ། །དོན་རྟག་ཏུ་མཐོང་བ་ལ་སོགས་པ་ལས་ཞེས་བྱ་བ་ནི་གཟུགས་ལ་སོགས་པའི་ཡུལ་ལ་ཡང་ནས་ཡང་དུ་མཐོང་བ་དང༌། ཐོས་པ་དང༌། བསྣམས་བ་དང༌། མྱངས་པ་དང༌། རེག་པ་སྟེ། ཐོས་པ་དང༌། བསྣམས་པ་དང༌། མྱངས་པ་དང༌། རེག་པ་དང༌། རྣམ་པར་ཤེས་པ་ལས་ཕྱིས་དྲན་
པ་སྐྱེ་བ་ནི་དུས་ཕྱི་ནས་སོ། །ཅི་སེམས་དང་ལྡན་པ་མ་ཡིན་པའི་ཆོས་གཞན་བར་སྐབས་སུ་འགའ་ཡང་གང་ལས་དེ་ལས་ལྡང་བའི་སེམས་དང་ལྡན་པ་དེ་དང་གེ་སར་དམར་པོ་དེ་ཡང་དུས་གཞན་ན་སྐྱེ་བར་འགྱུར་བ་ལ་ཡོད་དམ། གང་གོམས་པ་དྲན་པ་སྐྱེ་བར་འགྱུར་བ་སྐད་ཅིག་མ་གང་ལ་དེའི་སྐྱེ་བར་བརྟག་པར་ནུས་ཞེས་བྱ་བ་ནི་གལ་ཏེ་རེ་ཞིག་སྐད་ཅིག་མ་དང་པོ་ཁོ་ན་དེ་སྐྱེ་བ་ཡིན་ན་ནི་སྐད་ཅིག་མ་གཞན་གྱི་ཚེ་གོམས་པར་བྱེད་པ་དོན་མེད་པར་འགྱུར་རོ། །འོན་ཏེ་སྐད་ཅིག་མ་གཉིས་པ་ལ་སོགས་པ་གཞན་གྱི་ཚེ་དེ་སྐྱེ་བ་ཡིན་ན་ནི་འདི་བརྗོད་པར་བྱ་སྟེ། ཅི་སྐད་ཅིག་མ་གཉིས་པ་ལ་སོགས་པ་དེ་དག་ལ་སྐད་ཅིག་མ་དང་པོ་ལ་སྟོན་པ་དང༌། མཐོང་བ་ལ་སོགས་པ་སྔར་སོང་བའི་བྱེ་བྲག་ཡོད་དམ། འོན་ཏེ་མེད་པ་ཡིན་ཅི་ཉེས་ཇི་སྟེ་ཡོད་ན་ནི་དེ་བཞིན་དུ་བདག་ཉིད་ཐོབ་པའི་བྱེ་བྲག་ཡོད་པའི་ཕྱིར་སེམས་དང་སེམས་ལས་བྱུང་བའི་དྲན་པ་ཕྱིས་སྐྱེ་བར་འགྱུར་བས་རྟོག་པ་དེ་དོན་མེད་པར་འགྱུར་རོ། །འོན་ཏེ་མེད་ན་ནི་སྐད་ཅིག་མ་དང་པོ་བཞིན་དུ་མི་རྩོམ་སྟེ་དེ་མི་སྐྱེ་བས་དྲན་པ་མེད་པར་ཐལ་བར་འགྱུར་ཏེ། སྐད་ཅིག་མ་གཉིས་པ་ལ་སོགས་པ་ནི་སྐད་ཅིག་མ་དང་པོ་དང་བྱེ་བྲག་མེད་པའི་ཕྱིར་ཏེ། སྐད་ཅིག་མ་སྔ་མ་བཞིན་ནོ། །གོམས་པ་སྨོས་པས་ནི་ཆོས་གཞན་སྐྱེད་པར་མི་ནུས་པ་ཡང་མ་ཡིན་ཏེ། །ཁ་ཅིག་ཡི་གེའི་གཞུང་སྟོན་པ་ཅིག་ཅར་དུ་དྲན་པ་ཡོད་དོ། །མཐོང་བ་ལ་སོགས་པའི་དོན་ཀྱང་ཅིག་ཅར་དུ་དྲན་པ་ཡོད་པས་གང་གོམས་པས་དྲན་པ་སྐྱེད་པར་འགྱུར་བ་སྐད་ཅིག་མ་གང་ལ་དེ་སྐྱེ་བར་བརྟག་པར་ནུས་ཞེས་བྱ་བའི་སྐྱོན་འདི་དེ་ལ་བརྗོད་པར་བྱ་བ་མ་ཡིན་ནོ། །དེ་བས་ན་འདུ་བྱེད་ཀྱིས་ཡོངས་སུ་བསྒོས་པའི་རྣམ་པར་ཤེས་པའི་ཚོགས་དྲུག་ལ་ཞེས་རྒྱས་པར་འབྱུང་བ་ལ། དེ་བས་ན་ཞེས་སྨོས་པ་ནི་ཇི་སྐད་དུ་བསྟན་པའི་རྣམ་པར་རབ་ཏུ་བསྟན་པའི་ཕྱིར་རོ། །དེ་ལ་ཡང་དབང་པོ་ཐ་དད་པས་རྣམ་པར་ཤེས་པ་ཐ་དད་པ་ཞེས་བྱ་བ་ནས་བརྩམས་ཏེ། འདུ་བྱེད་ཀྱི་རྐྱེན་གྱིས་རྣམ་པར་ཤེས་པ་ནི་རྣམ་པར་ཤེས་པའི་ཚོགས་དྲུག་ཡིན་པར་ཁས་ལེན་ཀྱང་རུང་སྟེ། སྒྲའི་དོན་ཇི་ལྟ་བ་བཞིན་དུ་དྲངས་ནས་དོན་དེ་བཞིན་དུ་འགྲོར་མི་རུང་ངོ༌། །སེམས་དང་བཅས་པ་དང་སེམས་མེད་པ་པའི་འགོག་པའི་སྙོམས་པར་འཇུག་པ་ལ་སོགས་པ་ཁས་ལེན་ཀྱང་རུང་ཞེས་བྱ་བ་ཇི་ལྟ་བུ་ཞེ་ན། དེའི་གནས་སྐབས་ན་གང་གི་སེམས་ཡོད་པ་མ་
ཡིན་ནོ་ཞེས་རྒྱས་པར་འབྱུང་བ་ནས་སེམས་དང་བཅས་པའི་འགོག་པའི་སྙོམས་པར་འཇུག་པ་ལ་སོགས་པ་ཁས་ལེན་ཀྱང་རུང༌། དེ་བཞིན་སེམས་མེད་པའི་འགོག་པའི་སྙོམས་པར་འཇུག་པ་ཡིན་ནོ་ཞེས་རྒྱས་པར་འབྱུང་བ་ནས་སེམས་དང་བཅས་པའི་སྙོམས་པར་འཇུག་པ་ལ་སོགས་པ་ཡིན་པར་ཁས་ལེན་ཀྱང་རུང་སྟེ། སྒྲའི་དོན་ཇི་ལྟ་བ་བཞིན་དུ་དྲངས་ན་དོན་དེ་བཞིན་དུ་འགྲོར་མི་རུང་ངོ༌། །མངལ་དུ་ཉིད་མཚམས་སྦྱོར་བའི་རྣམ་པར་ཤེས་པ་འདུ་བྱེད་ཀྱི་རྐྱེན་གྱིས་ཡིན་ནོ་ཞེས་རྒྱས་པར་འབྱུང་བ་ནས། འདས་པའི་འདུ་བྱེད་ཀྱི་ཉིང་མཚམས་སྦྱོར་བའི་རྣམ་པར་ཤེས་པ་ཁས་ལེན་ཀྱང་རུང་སྟེ། སྒྲའི་དོན་ཇི་ལྟ་བ་བཞིན་དུ་དྲངས་ནས་དོན་དེ་བཞིན་འགྲོར་མི་རུང་ངོ༌། །ཁ་ཅིག་ན་རེ་ཉིང་མཚམས་སྦྱོར་བའི་རྣམ་པར་ཤེས་པ་ནི་འདུ་བྱེད་ཀྱི་རྐྱེན་གྱིས་ཡིན་ཀྱང་འདས་པའི་ལས་ལས་དེ་སྐྱེ་བ་མ་ཡིན་གྱི། འོན་ཀྱང་དེའི་རྒྱུ་ཅན་གྱི་རྣམ་པར་མ་ཞིག་པ་ལས་ཡིན་ནོ་ཞེས་བྱ་བ་ལ་སོགས་པ་བརྗོད་པ་དེའི་རྒྱུ་ཅན་གྱི་རྣམ་པར་ཞིག་པ་ལ་སོགས་པ་རྐྱེན་ཡིན་པར་ཁས་ལེན་ཀྱང་རུང་སྟེ། གང་གི་ཕྱིར་དེ་ལྟར་གྱུར་པ། དེ་བས་ན་འདིར་དོན་ཉིད་ནི་དགོངས་པ་ཅན་ཡིན་པར་རིག་པར་བྱའོ་ཞེས་རྒྱས་པར་འབྱུང་བ་ཡིན་ནོ། །གནས་པས་གནས་བསྟན་པ་ཞེས་བྱ་བ་ནི་གནས་པ་མིག་གི་རྣམ་པར་ཤེས་པ་ལ་སོགས་པས་གནས་ཀུན་གཞི་རྣམ་པར་ཤེས་པ་བསྟན་ཏེ། ཀུན་གཞི་རྣམ་པར་ཤེས་པ་ནི་རྣམ་པར་ཤེས་པ་དྲུག་གི་གནས་ཡིན་ཏེ། གཙོ་བོའི་རྒྱུ་ཡིན་པའི་ཕྱིར་རོ། །འབྲུའི་སྣོད་ལྟ་བུར་དེ་དེ་དག་གི་གནས་ནི་མ་ཡིན་གྱི། དེའི་ས་བོན་གྱི་གནས་ཡིན་ནོ། །དེའི་ས་བོན་གྱི་གནས་ཞེས་བྱ་སྟེ། དེ་སྐྱེ་བར་ནུས་པ་དང་ལྡན་པའི་ཕྱིར་རོ། །དེ་ལ་ས་བོན་རྣམས་སྦྱང་བར་བླུགས་པ་ལྟ་བུ་ནི་མ་ཡིན་གྱི། འོ་ན་ཇི་ལྟ་བུ་ཡིན་ཞེ་ན། དཔེར་ན་ས་བོན་དང༌། མྱུ་གུ་དང༌། ཐལ་བ་དང༌། ལུས་དང༌། དུ་བ་དང༌། མེ་དང༌། ས་གཞི་ལ་སོགས་པ་རྣམས་འབྲས་བུ་ལ་ནུས་པ་དང་ལྡན་པའི་ཕྱིར་དེའི་རྒྱུའི་དངོས་པོ་ནི་གནས་ཞེས་བྱའོ། །དེ་བཞིན་དུ་འབྲས་བུས་རྒྱུ་སྟེ་བསྟན་ཏོ་ཞེས་བྱ་བར་སྦྱར་ཏེ། འབྲས་བུ་མིག་གི་རྣམ་པར་ཤེས་པ་ལ་སོགས་པས་རྒྱུ་ཀུན་གཞིའི་རྣམ་པར་ཤེས་པ་བསྟན་ཏོ། །ཅིའི་ཕྱིར་ཞེ་ན། དེ་དང་ལྡན་པའི་རྣམ་པར་ཤེས་པའི་རྒྱུན་འབབ་པ་བསྟན་པའི་ཕྱིར་ཏེ་རྣམ་པར་ཤེས་པ་དྲུག་དེ་དག་དང་ལྡན་པའི་ཀུན་གཞི་རྣམ་པར་
ཤེས་པའི་རྒྱུན་འབབ་པ་བསྟན་པའི་ཕྱིར་རོ། །རྒྱུ་དང་འབྲས་བུར་འབྲེལ་བའི་དངོས་པོ་ཡིན་པའི་ཕྱིར་རོ། ཀུན་གཞི་རྣམ་པར་ཤེས་པའི་རྒྱུན་བབ་པ་ནི་རྣམ་པར་ཤེས་པའི་ཚོགས་དྲུག་དང་ལྡན་པ་ཞེས་བྱ་སྟེ། འབྲེལ་པ་ཡིན་ཞེས་བྱ་བའི་དོན་ཏོ། །དེའི་དབང་པོ་རྣམས་གཞན་དུ་གྱུར་པ་ཉིད་མ་ཡིན་ཏེ། གཟིགས་པ་མངའ་བའི་ཕྱིར་རོ་ཞེས་བྱ་བ་ནི་དབང་པོ་རྣམས་ལ་མཐོང་བ་ལ་སོགས་པའི་བྱ་བ་བྱེད་པ་ལས་རྗེས་སུ་དཔག་པའི་ཕྱིར་རོ། །དབང་པོ་རྣམས་བསལ་བ་ནི་མཐོང་བར་ཡང་མི་ནུས་ཀྱི་ཞེས་བྱ་བ་ནི་དབང་པོ་རྣམས་དབང་པོའི་ཡུལ་ལས་འདས་པའི་ཕྱིར་དང༌། ཡིད་ཀྱི་རྣམ་པར་ཤེས་པས་ཤེས་པར་བྱ་བ་ཡིན་པའི་ཕྱིར་རོ། །འཇིག་རྟེན་ན་ཡང་འདིའི་ལྟ་བ་ནི་ཉམས་དགའ་བ་ཡིན་ཏེ། གདོང་གི་མིག་ནི་ཨུཏྤ་ལ་སྔོན་པོའི་འདབ་མ་ལྟ་བུའོ་ཞེས་བྱ་བ་ལྟ་བ་དང་མིག་གིས་དེའི་གནས་ཇི་ལྟ་བ་བསྟན་ཏོ། །ལྟ་བ་ནི་འདིར་མིག་གི་དབང་པོ་ལ་བྱའོ། །མིག་ཀྱང་དེའོ། །མིག་གི་དབང་པོ་ནི་ཉམས་དགའ་བ་མ་ཡིན་ཏེ། མངོན་སུམ་མ་ཡིན་པའི་ཕྱིར་རོ། །གདོང་གི་མིག་ནི་ཨུཏྤ་ལ་སྔོན་པོའི་འདབ་མ་ལྟ་བུ་ཡང་མ་ཡིན་ཏེ། མདོག་དང་དབྱིབས་ཀྱིས་མ་ཟིན་པའི་ཕྱིར་དང༌། ཟླུམ་པོ་ཡིན་པའི་ཕྱིར་རོ། །དེའི་ཕྱིར་ལྟ་བ་དང༌། མིག་གིས་དེའི་གནས་ཇི་ལྟ་བ་བཞིན་དུ་སྟོན་པ་འདི་གྲུབ་པ་ཡིན་ནོ། །མིག་གི་དབང་པོའི་གནས་དེ་ནི་ཤིན་ཏུ་སྔོ་བ་དང༌། ཁྱོན་ཡངས་པ་དང་ཉམས་དགའ་བའང་ཡིན་ཏེ། མངོན་སུམ་ཉིད་ཡིན་པའི་ཕྱིར་རོ། །དེ་ལྟར་ན་རེ་ཞིག་ངས་པས་གནས་བསྟན་པ་ཤེས་པར་བྱས་པ་ཡིན་ནོ། །འབྲས་བུས་ཀྱང་རྒྱུ་ཇི་ལྟར་སྟོན་པ་དེ་བཞིན་དུ་བརྗོད་པ་ནི། དགེ་སློང་དག་རླུང་ནི་ནད་ཡིན་ནོ་ནད་ཆེན་པོ་ཡིན་ནོ། །སྨན་ཆེན་པོ་ནི་ཏིལ་མར་རམ་ཏིལ་མར་དང་སྦྱར་བའོ། །དགེ་སློང་དག་མཁྲིས་པའི་ནད་ཀྱི་སྨན་ཆེན་པོ་ནི་ཞུན་མར་རམ་ཞུན་མར་དང་སྦྱར་བའོ། །དགེ་སློང་དག་བད་ཀན་གྱི་ནད་དང་ནད་ཆེན་པོའི་སྨན་ཆེན་པོ་ནི་སྦྲང་རྩིའམ་སྦྲང་རྩི་དང་སྦྱར་བའོ། །རླུང་དང་མཁྲིས་པ་དང་བད་ཀན་ནི་ནད་མ་ཡིན་གྱི་ནད་ཀྱི་རྒྱུ་ཡིན་པས་ནད་ཅེས་བསྟན་ཏོ། །འདོད་ཆགས་ཀྱི་རྒྱུན་ཉེ་བར་བཅད་པ་མ་ཡིན་ཏེ། དེ་མངོན་སུམ་དུ་མ་གྱུར་བའི་ཕྱིར་རོ་ཞེས་བྱ་བ་ནི་གཉེན་པོ་མངོན་སུམ་དུ་གྱུར་པའི་ཚེ་ན། མི་མཐུན་པའི་ཕྱོགས་མངོན་དུ་གྱུར་པར་མི་རིགས་པའི་ཕྱིར་རོ། །འོ་ན་ཅི་ཞེ་ན་དེའི་རྒྱུ་
དང་ས་བོན་ཏེ། དེའི་ཞེས་བྱ་བ་ནི་འདོད་ཆགས་ཀྱིའོ། །དེ་ལས་ཡང་དེ་འབྱུང་བ་ནི་དེའི་རྒྱུ་དང༌། ཕྲ་རྒྱས་དང༌། ས་བོན་ཞེས་བྱའོ། །དེ་གཉིས་ནི་རེག་བྱ་མ་ཡིན་གྱི་དེ་གཉིས་ཀྱི་རྒྱུ་རེག་བྱ་ཡིན་ནོ་ཞེས་བྱ་བ་ལ། དེ་གཉིས་ཀྱི་ཞེས་བྱ་བ་ནི་བཀྲེས་པ་དང་སྐོམ་པ་གཉིས་ཀྱིའོ། །ཟན་འདོད་པ་ནི་བཀྲེས་པ་སྟེ། སེམས་ལས་བྱུང་བའི་ཆོས་སོ། །དེའི་རྒྱུ་རེག་བྱའི་བྱེ་བྲག་ལ་བཀྲེས་པ་ཞེས་སྟོན་ཏོ། །དེ་བཞིན་དུ་འཐུང་འདོད་པ་ནི་སྐོམ་པ་སྟེ། དེའི་རྒྱུ་རེག་བྱའི་བྱེ་བྲག་ལ་སྐོམ་པ་ཞེས་སྟོན་ཏོ། །ཆོས་ཐམས་ཅད་ཀྱི་ས་བོན་གྱི་གཞི་གང་ཡིན་པའོ་ཞེས་བྱ་བའི་ཆོས་ཐམས་ཅད་ཀྱི་ས་བོན་གྱི་གཞི་བྱེད་པའི་སྒོ་ནས་ཀུན་གཞི་རྣམ་པར་ཤེས་པ་བསྟན་ཏེ། གཞན་ཆོས་ཐམས་ཅད་ཀྱི་ས་བོན་གྱི་གཞི་བྱེད་པར་མི་རིགས་པའི་ཕྱིར་རོ། །འགོག་པའི་སྙོམས་པར་ཞུགས་པ་རྣམས་ལ་དེ་ལས་གཞན་པའི་རྣམ་པར་ཤེས་པ་ཡོད་པ་མ་ཡིན་པས་ཆོས་ཐམས་ཅད་ཀྱི་ས་བོན་ཆད་པར་ཐལ་བར་འགྱུར་རོ། །ཀུན་གཞི་རྣམ་པར་ཤེས་པ་ནི་གཙོ་བོ་དང༌། བདག་གི་རྫས་སུ་གྱུར་བར་ཐལ་བར་ཡང་མི་འགྱུར་ཏེ། མི་རྟག་པ་དང༌། སྡུག་བསྔལ་བ་དང༌། སྟོང་པ་དང༌། བདག་མེད་པའི་མཚན་ཉིད་ཡིན་པའི་ཕྱིར་རོ། །གང་དག་གིས་རྣམ་པར་ཤེས་པའི་ཚོགས་དྲུག་ཆོས་ཐམས་ཅད་སྐྱེ་བར་ནུས་པ་དང་ལྡན་ནོ་ཞེས་པ་དེས་ཀྱང་དེ་ཉིད་གཙོ་བོ་དང་བདག་གི་རྫས་དང༌། ཆོས་མི་མཐུན་པ་ཡི་ན་པར་བརྗོད་པར་ནུས་ཀྱི་གཞན་ལ་མ་ཡིན་ནོ། །ཆོས་ཐམས་ཅད་སྐྱེ་བར་ནུས་པ་དང་ལྡན་པ་མ་ཡིན་ནོ་ཞེས་བརྗོད་པར་མི་ནུས་སོ། །མདོ་སྡེ་པ་རྣམས་ལ་ནི་ལྡན་པ་མ་ཡིན་པའི་འདུ་བྱེད་མེད་པ་ན་གཞན་དུ་ཇི་ལྟར་དགེ་བ་དང༌། མི་དགེ་བ་དང༌། ལུང་དུ་མ་བསྟན་པའི་ཆོས་སྐྱེ་བར་འགྱུར། མདོ་སྡེ་ལས་ཀྱང་འདི་སྐད་དུ་སེམས་ཞེས་བྱ་བའམ། ཡིད་དང་རྣམ་པར་ཤེས་པ་ཞེས་བྱ་བ་ལ་ཡུན་རིང་པོར་དད་པ་ཡོངས་སུ་བསྒོས། ཚུལ་ཁྲིམས་དང་ཐོས་པ་དང་གཏོང་བ་དང་ཤེས་རབ་ཡོངས་སུ་བསྒོས་ན། གོང་དུ་འགྲོ་བར་འགྱུར་ཁྱད་པར་དུ་འགྲོ་ཞིང་མཐོ་རིས་སུ་འགྲོ་བ་སྟོན་ཏོ་ཞེས་གསུངས་སོ། །ལེན་པའི་རྣམ་པར་ཤེས་པ་ཡང་དེ་ཡིན་ཏེ། རིས་མཐུན་པ་གཞན་དུ་ཉིང་མཚམས་སྦྱར་བ་ནས་བརྩམས་ཏེ་ནམ་མ་ཤིའི་བར་དུ་ལུས་འཛིན་པར་
བྱེད་པར་སྟོན་ཏེ། གཞན་དེ་ལྟ་བུ་མི་རིགས་པའི་ཕྱིར་རོ་ཞེས་ཕྱིས་འཆད་པར་འགྱུར་རོ། །རྣམ་པར་སྨིན་པའི་རྣམ་པར་ཤེས་པ་ཡང་དེ་ཡིན་ཏེ་ཞེས་བྱ་བ་ནི་མི་ལ་སོགས་པའི་ལུས་ཀྱི་དངོས་པོའི་རྟེན་བྱེད་པའི་སྒོ་ནས་སྟོན་ཏེ། གཞན་ལ་རྣམ་པར་སྨིན་པའི་མཚན་ཉིད་དང་འཐད་པ་དེ་དག་མི་རིགས་པར་ཕྱིས་འཆད་པར་འགྱུར་རོ། །སྐྱེ་བ་སོ་སོ་ནི་ལས་ཐ་དད་པའི་རྣམ་པར་སྨིན་པ་ཡིན་པའི་ཕྱིར་རོ་ཞེས་བྱ་བ་ནི་དེ་བས་ན་ཀུན་གཞི་རྣམ་པར་ཤེས་པ་ནི་ལས་ཐ་དད་པའི་རྣམ་པར་སྨིན་པ་སོ་སོར་སྐྱེ་བ་ཡིན་ཏེ། དེ་བས་ན་རྣམ་པར་སྨིན་པའི་རྣམ་པར་ཤེས་པ་བསྟན་ཏོ། །ཇི་ལྟར་ན་དེ་སྐྱེ་བ་སོ་སོ་ལས་ཐར་པའི་རྣམ་པར་སྨིན་པ་ཡིན་ན། དེའི་ཕྱིར་ལས་ཐ་དད་པའི་ཤུགས་ཡོངས་སུ་ཟད་པའི་ཕྱིར་དང་ཞེས་སྨྲས་ཏེ། ལས་ཐ་དད་པའི་འཕེན་པ་ཡོངས་སུ་ཟད་པའི་ཕྱིར་ཞེས་བྱ་བའི་ཐ་ཚིག་སྟེ། འཆི་བའི་དུས་ཀྱི་ཚེ་སྐྱེ་བ་སྔ་མའི་ལས་ཀྱིས་འཕངས་པའི་རྣམ་པར་སྨིན་པའི་རྣམ་པར་ཤེས་པའི་ཤུགས་ཡོངས་སུ་གཏུགས་ནས། སྐྱེས་ནས་དང་ལན་གྲངས་གཞན་ལ་མྱོང་བར་འགྱུར་བའི་ལས་གཞན་གོམས་པའི་འཇུག་པ་རྙེད་པའི་ཕྱིར་ལུས་ཀྱི་དངོས་པོ་དེ་དང་དེའི་གནས་ཉིད་དུ་རྣམ་པར་སྨིན་ཏེ། དེ་ནི་ཡང་སྲིད་པ་མངོན་པར་འགྲུབ་པར་བྱ་བའི་ཕྱིར་བག་ཆགས་ཀྱི་གནས་སྐབས་ཀྱི་ལས་འཇུག་པ་རྙེད་དེ། སྲིད་པར་གྱུར་ན་ལུས་ཀྱི་དངོས་པོ་དེ་དང་དེའི་གནས་ཉིད་དུ་ཀུན་གཞི་རྣམ་པར་ཤེས་པ་རྣམ་པར་སྨིན་པར་བྱེད་དོ། །དེ་དང་དེའི་ཞེས་བྱ་བ་ནི་ལྷ་དང་མི་ལ་སོགས་པའི་ལུས་ཀྱི་དངོས་པོའི་གནས་ཉིད་ལ་བྱའོ། །ལུས་ཀྱི་དངོས་པོའི་གནས་ཡིན་པ་ཡང་ཀུན་གཞི་རྣམ་པར་ཤེས་པ་ནི་ལུས་ཀྱི་དངོས་པོ་དེ་དང་དེ་འབྲེལ་པར་འཇུག་པ་ཡིན་པའི་ཕྱིར་ཏེ། གཟུགས་མེད་པའི་ཁམས་དང་ས་གཞན་དག་ན་ལུས་ཀྱི་དངོས་པོར་གྱུར་པ་དག་རྣམ་པར་སྨིན་པ་མ་ཡིན་པ་མེད་པའི་ཕྱིར་རོ། །བཙུན་པ་ས་སྟོན་པ་རྣམས་ཀྱིས་སྲིད་པའི་ཡན་ལག་གི་རྣམ་པར་ཤེས་པ་ཡང་དེ་ཡིན་ཏེ་ཞེས་བྱ་བ་ནི་ཉི་ཚེ་བ་གཞན་གྱི་ཆོས་མངོན་པ་ལས་སྲིད་པའི་གནས་བྱེད་པར་རབ་ཏུ་གྲགས་པ་སྟོན་ཏོ། །ཡན་ལག་དང་གནས་དང་ལུས་ཞེས་བྱ་བ་དོན་ཐ་དད་པ་མ་ཡིན་ཏེ། ལུས་མེད་པ་ནི་ཡན་ལག་མེད་པ་ཞེས་སྟོན་པའི་ཕྱིར་རོ། །དེ་ཉིད་ཀྱི་ཕྱིར་དེ་གནས་ཡོངས་སུ་མ་གྱུར་ན་སྲིད་པ་རྒྱུན་མི་འཆད་པའི་ཕྱིར་རོ་ཞེས་སྨྲས་ཏེ། དེ་གནས་
གྱུར་པ་ཡང་གཉེན་པོ་སྐྱེས་པས་ཀུན་ནས་ཉོན་མོངས་པ་ཅན་གྱི་ཆོས་ཀྱི་བག་ཆགས་མ་ལུས་པར་བཅོམ་པ་ཡོད་ན་གཞན་དུ་སྐྱེས་པ་ཡིན་ཏེ། གང་ལ་ཡང་སྲིད་པའི་ཡན་ལག་གི་རྣམ་པར་ཤེས་པ་གཞག་པ་མ་ཡིན་ནོ། །དམིགས་པ་དང་རྣམ་པ་ཡོངས་སུ་ཆད་པའོ་ཞེས་བྱ་བ་ནི་རྒྱུ་བ་ཤིན་ཏུ་ཕྲ་བས་དེའི་དམིགས་པ་དང་རྣམ་པ་ཡོངས་སུ་ཆད་པའམ། དམིགས་པ་དང་རྣམ་པ་ཆད་པ་མངོན་དུ་གྱུར་པའི་ཕྱིར་དམིགས་པ་དང་རྣམ་པ་ཡོངས་སུ་མ་ཆད་པ་ཡིན་པར་རིག་པར་བྱའོ། །ཉེ་བར་ལེན་པའི་ཕུང་པོ་གང་གི་ནང་དུ་འདུས་ཤེ་ན་ཞེས་བྱ་བ་ནི་ཉེ་བར་ལེན་པ་དང་བཅས་པ་ཐམས་ཅད་ཉེ་བར་ལེན་པའི་ཕུང་པོར་འདུས་པ་ཡིན་པས་དེ་ནི་ཉེ་བར་ལེན་པའི་ཕུང་པོར་བསྡུ་བ་བརྗོད་པར་བྱ་དགོས་པའོ། །རྣམ་པར་ཤེས་པ་ཉེ་བར་ལེན་པའི་ཕུང་པོར་རོ་ཞེས་བྱ་བ་ནི་རྣམ་པར་ཤེས་པའི་མཚན་ཉིད་ཡིན་པའི་ཕྱིར་མཚན་ཉིད་ཀྱིས་འདུས་པ་ཡིན་པར་བསྟན་ཏོ། །སེམས་པའི་ཚོགས་དྲུག་གོ་ཞེས་བྱ་བ་ནི་གཞན་འདུན་པ་དང༌། རེག་པ་དང་ཡིད་ལ་བྱེད་པ་ལ་སོགས་པ་འདུ་བྱེད་ཉེ་བར་ལེན་པའི་ཕུང་པོར་འདུས་པ་མེད་པ་ཡང་མ་ཡིན་ནོ། །ཚེ་དང་ལྡན་པ་གསུས་པོ་ཆེ་མི་དགེ་བ་ཞེས་བྱ་བ་ནི་ལུས་ཀྱི་ལས་མི་དགེ་བ་དང་ཞེས་རྒྱས་པར་འབྱུང་བ་ནི་འདོད་ཆགས་དང་ཞེ་སྡང་ལ་སོགས་པ་གཞན་ཡང་མི་དགེ་བ་མ་ཡིན་པ་ནི་ཡོད་པ་མ་ཡིན་ནོ། །དེ་ལྟར་རྣམ་པར་ཤེས་པའི་ཚོགས་དྲུག་ཅེས་བྱ་བ་འདི་ནི་ཡོངས་སུ་མ་རྫོགས་པ་ཡིན་པར་སྟོན་པར་འགྱུར་རོ། །དེ་ནི་དགོངས་པ་ཅན་དུ་རིགས་ཏེ། དེ་ལས་གཞན་པའི་ཆོས་དེ་དག་རྣམས་ཞེས་རྒྱས་པར་འབྱུང་བ་ལ་སེམས་པའི་ཚོགས་དྲུག་པོ་དེ་ལས་གཞན་པའི་ཆོས་འདུན་པ་དང༌། རེག་པ་དང་ཡིད་ལ་བྱེད་པ་ལ་སོགས་པ་རྣམས་མདོ་སྡེ་གཞན་ལས་གསུངས་པའི་ཕྱིར་ཅི་ཞེ་ན། འདུ་བྱེད་ཉེ་བར་ལེན་པའི་ཕུང་པོ་གང་ཞེ་ན། སེམས་པའི་ཚོགས་དྲུག་གོ་ཞེས་བསྟན་པ་འདི་དགོངས་པ་ཅན་དུ་རིགས་པ་ཡིན་ནོ། །ལུས་ཀྱི་ལས་མི་དགེ་བ་ལ་སོགས་པ་དེ་དག་ལས་གཞན་མི་དགེ་བའི་ཆོས་འདོད་ཆགས་དང་ཞེ་སྡང་ལ་སོགས་པ་རྣམས་མདོ་སྡེ་གཞན་ལས་གསུངས་པའི་ཕྱིར་ཅི་ཞེ་ན། ལུས་ཀྱི་ལས་མི་དགེ་བ་ཞེས་རྒྱས་པར་འབྱུང་བ་རྣམས་དགོངས་པ་ཅན་དུ་རིགས་པ་ཡིན་ནོ། །ཀུན་གཞི་རྣམ་པར་ཤེས་པ་ནི་གང་དུ་ཡང་མ་
གསུངས་ཏེ། དེ་བས་འདི་བསྟན་པ་དགོངས་པ་ཅན་ཡིན་པར་བརྟག་བར་ནུས་པ་མ་ཡིན་ཞེས་སྟོན་ཏོ། །ཞལ་ནས་གསུངས་པའི་མདོ་སྡེ་ཡང་ཕལ་ཆེར་ནུབ་ལ་ཞེས་བྱ་བ་འདིས་ནི་གང་དུ་ཡང་མ་གསུངས་སོ་ཞེས་བྱ་བར་མི་རུང་རིང་བའི་གཏན་ཚིགས་སྟོན་ཏེ་ཞལ་ནས་གསུངས་པ་མང་དུ་ནུབ་པ་ཡིན་ན་གང་དུ་ཡང་མ་གསུངས་པ་འདི་ཇི་ལྟར་ངེས་པར་བྱ། གསུང་རབ་འདི་ཡང་ད་ལྟར་ནི་ཕལ་ཆེར་འཕྲོས་པ་དང་ཞེས་བྱ་བ་ནི་ཉི་ཚེ་བའི་མདོ་སྡེ་དང༌། ཆོས་མངོན་པ་དང༌། འདུལ་བ་དག་འཕྲོས་ཏེ་ཁ་ཅིག་ཏུ་ནི་ཅུང་ཟད་ཀྱང་མ་གསུངས་པ་དེ་ཉིད་གཞན་ནས་གསུངས་སོ། །ཁ་ཅིག་ཏུ་ནི་གཞན་དུ་གསུངས་སོ། །གཞན་ལས་ནི་གཞན་དུ་གསུངས་པས་ཉི་ཚེ་བའི་མདོ་སྡེ་དང༌། འདུལ་བ་དང༌། ཆོས་མངོན་པ་ཐམས་ཅད་མངོན་དུ་མ་གྱུར་པས་ཀུན་གཞི་རྣམ་པར་ཤེས་པ་ནི་གང་དུ་ཡང་མ་གསུངས་སོ་ཞེས་བྱ་བ་འདི་ཇི་ལྟར་ངེས་པར་བྱ། འགྲོ་བའི་རྩ་བ་དག་ནུབ་པའི་ཕྱིར་ཅི་ཞེ་ན། ཞལ་ནས་གསུངས་པ་ཕལ་ཆེར་ནུབ་པ་ཡིན་ཏེ། གསུང་རབ་འདི་ཡང་ད་ལྟར་ནི་ཕལ་ཆེར་འཕྲོས་པར་སྟོན་ཏེ། དེ་ལྟ་མ་ཡིན་ན་ཉི་ཚེ་བ་ཐ་དད་པ་ཉིད་དུ་མི་འགྱུར་རོ། །ཉི་ཚེ་བ་གཞན་ལས་རྣམ་གྲངས་ཀྱི་སྲིད་པའི་ཡན་ལག་གི་རྣམ་པར་ཤེས་པ་དང༌། ཀུན་གཞི་རྣམ་པར་ཤེས་པ་དང༌། རྣམ་གྲངས་ཀྱི་རྩ་བའི་རྣམ་པར་ཤེས་པ་ཞེས་གསུངས་པ་ན་ཀུན་གཞི་རྣམ་པར་ཤེས་པ་ནི་གང་དུ་ཡང་མ་གསུངས་སོ་ཞེས་ཇི་སྐད་དུ་འདི་བརྗོད། དེ་ལས་ཀུན་གཞི་རྣམ་པར་ཤེས་པ་ཞེས་རང་གི་སྒྲས་གང་དུ་ཡང་མ་གསུངས་སོ་ཞེས་ཟེར་ན་དེ་ལ་ཅི་དེ་ཙམ་གྱིས་རབ་ཏུ་བཀག་པ་ཡིན་ཞེས་བརྗོད་པར་བྱའོ། །རྣམ་པར་ཤེས་པའི་ཚོགས་དྲུག་ལ་མ་གཏོགས་པའི་དངོས་པོ་ཡོད་པ་ཡིན་པས་རྣམ་པར་ཤེས་པའི་ཚོགས་དྲུག་བསྟན་པ་ནི་དགོངས་པ་ཅན་ཉིད་ཡིན་པར་གྲུབ་པ་ཡིན་ནོ། །རྣམ་པར་ཤེས་པ་བདུན་པ་ཡོད་པས་དེ་ཇི་ལྟར་འདོད་པ་དོན་དང་རྗེས་སུ་མཐུན་པའི་མིང་བྱེད་པ་ནི་སྲིད་པའི་ཡན་ལག་གི་རྣམ་པར་ཤེས་པ་ཞེས་བྱ་བའམ། རྣམ་པར་སྨིན་པའི་རྣམ་པར་ཤེས་པ་དང་ལེན་པའི་རྣམ་པར་ཤེས་པའམ། རྩ་བའི་རྣམ་པར་ཤེས་པ་དང༌། རྐྱེན་གྱི་རྣམ་པར་ཤེས་པ་ཞེས་བྱ་བ་དེ་ལ་སོགས་པ་ཡིན་ནོ། །འདིར་སྨྲས་པ། གལ་ཏེ་ཞལ་ནས་གསུངས་པ་
ཡང་མང་དུ་ནུབ་ལ། གསུང་རབ་འདི་ཡང་ད་ལྟར་ནི་ཕལ་ཆེར་འཕྲོས་པ་ཡིན་པས་ཀུན་གཞི་རྣམ་པར་ཤེས་པ་བརྟག་པར་བྱ་བ་ཡིན་ནི། འོ་ན་གཙོ་བོ་དང་སྐྱེས་བུ་ལ་སོགས་པ་ཡང་དེ་ལྟ་བུ་ཡིན་པས་མུ་སྟེགས་བྱེད་ཀྱིས་ཡོངས་སུ་བརྟགས་པ་ཡང་བརྟག་པར་བྱ་བ་ཡིན་པར་འགྱུར་རོ་ཞེ་ན། དེ་ནི་རྣར་མི་འོང་སྟེ། ཁོ་བོ་གཏན་ཚིགས་འདིས་ཀུན་གཞི་རྣམ་པར་ཤེས་པ་སྒྲུབ་པར་བྱེད་པ་ནི་མ་ཡིན་གྱི། འོན་ཀྱང་མ་གསུངས་པའི་ཕྱིར་རོ་ཞེས་ཁྱོད་འགག་པར་བྱེད་པ་དེ་བས་ན་ཞལ་ནས་གསུངས་པ་ཡང་མང་དུ་ནུབ་ལ། གསུང་རབ་འདི་ཡང་འཕྲོས་པ་ཡིན་པས། ཞལ་ནས་མ་གསུངས་སོ་ཞེས་ཇི་ལྟར་ངེས་པར་བྱ་ཞེས་བྱ་བ་འདི་སྨྲས་ཏེ། དེ་བས་ན་ཇི་ལྟར་མ་གསུངས་པ་དེ་ལྟར་ཁྱེད་ཅག་གིས་བརྗོད་པར་བྱ་དགོས་སོ་ཞེས་བྱ་བ་ཡིན་ནོ། །གཙོ་བོ་དང་སྐྱེས་བུ་ལ་སོགས་པ་གང་ཡིན་པ་ནི་ཆོས་ཀྱི་ཕྱག་རྒྱ་དང་འགལ་བའི་ཕྱིར་དང༌། རྗེས་སུ་དཔག་པ་མེད་པའི་ཕྱིར་བརྟག་པར་བྱ་བ་ཡིན་ཏེ། རྟག་པ་དང༌། བདེ་བ་དང༌། བདག་དང༌། མི་སྟོང་བར་རྣམ་པར་ཤེས་པ་ལ་སོགས་པ་ལ་ནི་རྗེས་སུ་དཔག་པའི་ཕྱིར་རོ། །ཀུན་གཞི་རྣམ་པར་ཤེས་པ་ནི་མི་རྟག་པ་དང༌། སྡུག་བསྔལ་བ་དང༌། བདག་མེད་པ་དང༌། སྟོང་པའི་མཚན་ཉིད་ཡིན་པའི་ཕྱིར་ཆོས་ཀྱི་ཕྱག་རྒྱ་དང་འགལ་བ་མེད་པ་ཡིན་ནོ། །རྗེས་སུ་དཔག་པ་དང་བཅས་པ་ཡང་ཡིན་ནོ། །འགོག་པའི་སྙོམས་པར་ཞུགས་པ་རྣམས་ལ་དེ་ལས་གཞན་པའི་རྣམ་པར་ཤེས་པ་མེད་པའི་ཕྱིར་ལུས་མཐའ་དག་མ་ཟིན་པ་ཡིན་པར་ཐལ་བར་འགྱུར་ཏེ། དེ་ལས་གཞན་པའི་རྣམ་པར་ཤེས་པ་མི་འཐད་པའི་ཕྱིར་རོ། །སྲིད་པའི་རྩེ་མོར་སྐྱེས་པ་རྣམས་ཟག་པ་མེད་པའི་ལམ་མངོན་དུ་གྱུར་པ་ན་དེ་ལས་གཞན་སྲིད་པའི་རྩེ་མོ་པའི་ལུས་ཀྱི་དངོས་པོ་མི་རིགས་པའི་ཕྱིར་རོ། །ཉི་ཚེ་བ་གཞན་ལས་ཀྱང་རྣམ་གྲངས་ཀྱིས་སྲིད་པའི་ཡན་ལག་གི་རྣམ་པར་ཤེས་པ་དང་རྩ་བའི་རྣམ་པར་ཤེས་པ་ཞེས་གསུངས་པའི་ཕྱིར་རོ། ཡང་འདིར་རིགས་པ་ནི་ཀུན་གཞི་རྣམ་པར་ཤེས་པ་མེད་པར་འདུ་བྱེད་ཀྱི་རྐྱེན་གྱིས་རྣམ་པར་ཤེས་པ་གཞག་པར་མི་ནུས་པ་དང་ཞེས་བྱ་བ་ནི་འགོག་པའི་སྙོམས་པར་ཞུགས་པ་རྣམས་ལ་དེ་མི་རིགས་སོ་ཞེས་སྔར་བསྟན་ཟིན་ཏོ། །ཉིང་མཚམས་སྦྱོར་བའི་རྣམ་པར་ཤེས་པ་ཡང་འདུ་བྱེད་ཀྱི་རྐྱེན་
གྱིས་རྣམ་པར་ཤེས་པ་ཡིན་པར་གང་གི་ཕྱིར་མི་སྲིད་པ་ཡིན་ཏེ། དེ་མི་སྲིད་པ་ཡང་སྔར་བསྟན་ཟིན་ཏོ། །ལུས་ཟིན་པ་ཉིད་ཀྱང་ཀུན་གཞི་རྣམ་པར་ཤེས་པ་མེད་པར་གཞག་པར་མི་ནུས་སོ། །ཇི་ལྟ་ཞེ་ན། དེའི་ཕྱིར་དེ་ལས་གཞན་པའི་རྣམ་པར་ཤེས་པ་ནི་ནམ་མ་ཤིའི་བར་ལུས་མཐའ་དག་ཁྱབ་པར་གནས་པ་མ་ཡིན་ནོ་ཞེས་སྨྲས་ཏེ། མིག་ལ་སོགས་པའི་རྣམ་པར་ཤེས་པ་ནི་མིག་ལ་སོགས་པའི་དབང་པོ་ལ་བརྟེན་ཏེ་སྐྱེ་བའི་ཕྱིར་ལུས་མཐའ་དག་ལ་ཁྱབ་པ་མ་ཡིན་ནོ། །ལུས་ཀྱི་རྣམ་པར་ཤེས་པ་ཡང་ལུས་མཐའ་དག་ལ་ཁྱབ་པ་མ་ཡིན་ཏེ། རེག་བྱའི་ཡུལ་དང་འབྲེལ་པའི་ཕྱོགས་ལ་བརྟེན་ཏེ་སྐྱེ་བའི་ཕྱིར་ཏེ། ལུས་ཀྱི་དབང་པོའི་ཕྱོགས་ཙམ་ལ་ལུས་ཀྱི་རྣམ་པར་ཤེས་པ་སྐྱེ་བ་དེ་ཙམ་ཉིད་ལ་ཚོར་བ་ཡོངས་སུ་གཅོད་པ་ཡིན་ནོ། །དེ་བས་ན་དེ་ཉིད་དེས་ཟིན་པ་ཡིན་པར་གྲུབ་པ་ཡིན་ནོ། །ཡིད་ཀྱི་རྣམ་པར་ཤེས་པ་ཡང་མངོན་པར་འདུ་བྱེད་པ་དང་བཅས་པས་དོན་ཟབ་མོ་སེམས་པ་ནི་སྙིང་ག་ཁོ་ནར་གནས་པས་ལུས་ཐམས་ཅད་ལ་ཁྱབ་པ་མ་ཡིན་ནོ། །དེ་ལས་གཞན་ཡང་མ་ཤིའི་བར་དུ་གནས་པ་མ་ཡིན་ཏེ། འདི་ལྟར་མིག་གི་རྣམ་པར་ཤེས་པའི་མཇུག་ཐོགས་སུ་རྣ་བའི་རྣམ་པར་ཤེས་པ་སྐྱེ་བ་ལ་སོགས་པ་ཡིན་ནོ། །ཀུན་གཞི་རྣམ་པར་ཤེས་པ་ནི་ལུས་ཐམས་ཅད་ཉེ་བར་ལེན་ཅིང༌། ལུས་ཀུན་ལ་ཁྱབ་པ་ཡིན་ཏེ། རྣམ་པར་སྨིན་པའི་རྣམ་པར་ཤེས་པ་དང་འབྲེལ་པའི་ཕྱིར་ལུས་དང་ལུས་ཀྱི་དབང་པོ་བཞིན་དུ་མ་ཤིའི་བར་དུ་གནས་པ་ཡིན་ནོ། །ཀུན་གཞི་རྣམ་པར་ཤེས་པ་ཡུལ་ན་མི་གནས་པར་ཇི་ལྟར་འགྲུབ་ཅེ་ན། ཀུན་གཞི་རྣམ་པར་ཤེས་པ་རླུང་གི་ཁམས་བཞིན་དུ་ཞུམ་པའམ། རྒྱས་ཤིང་ལུས་མཐའ་དག་ལ་ཁྱབ་པ་མ་ཡིན་ནོ་ཞེས་བརྗོད་པར་བྱའོ། །འོན་ཀྱང་ལུས་མཐའ་དག་དང༌། ཀུན་གཞི་རྣམ་པར་ཤེས་པ་གཉིས་ཕན་ཚུན་འབྲེལ་ཅིང་འཇུག་པ་ཡིན་པའི་ཕྱིར་ལུས་མཐའ་དག་ལ་ཁྱབ་པ་ཡིན་ནོ་ཞེས་བརྗོད་པར་བྱའོ། །དེ་བས་ན་བརྒལ་དུ་མེད་པའོ། །གཟུགས་མེད་པའི་ཁམས་སུ་སྐྱེས་པ་རྣམས་ཀྱི་ཉོན་མོངས་པ་ཅན་གྱི་དགེ་བ་དང་ཞེས་རྒྱ་ཆེར་འབྱུང་བ་ནི་འདོད་པ་དང་གཟུགས་ཀྱི་ཁམས་སུ་སྐྱེས་པ་རྣམས་ལ་ནི་ཉོན་མོངས་པ་ཅན་གྱི་དགེ་བ་དང༌། ཟག་པ་མེད་པའི་སེམས་ལ་གཟུགས་སུ་རྣམ་པར་སྨིན་པ་དེའི་འགྲོ་བས་བསྡུས་པ་རྣམས་ལ་སྨིན་པའི་རྫས་ཡོད་པ་
ཡིན་ནོ། །གཟུགས་མེད་པའི་ཁམས་ན་ནི་གཟུགས་ཡོད་པ་མ་ཡིན་པ་དེ་བས་ན་དེར་སྐྱེས་པ་རྣམས་ཀྱི་དགེ་བ་ཉོན་མོངས་པ་ཅན་དང༌། ཟག་པ་མེད་པའི་སེམས་ལ་ཀུན་གཞི་རྣམ་པར་ཤེས་པ་ལ་མ་གཏོགས་པ་རྣམ་པར་སྨིན་པའི་རྫས་གཞག་པར་མི་ནུས་ཏེ། རྣམ་སྨིན་ལུང་བསྟན་མ་ཡིན་ཆོས། །ཞེས་འབྱུང་བའི་ཕྱིར་རོ། །དགེ་བ་ཉོན་མོངས་པ་ཅན་དང༌། ཟག་པ་མེད་པའི་སེམས་དག་ནི་རྣམ་པར་སྨིན་པ་དང་འབྲེལ་པའི་ཕྱིར་ལུས་ཀྱི་དངོས་པོ་དང༌། འགྲོ་བར་གཏོགས་པ་དང༌། རྣམ་པར་སྨིན་པས་བསྡུས་པ་ཡིན་ནོ་ཞེས་བྱ་བ་ཐམས་ཅད་དང་འགལ་བ་ཡིན་ནོ།། རིས་མཐུན་པ་དང༌། སྲོག་གི་དབང་བོའི་རྫས་གཞན་ནི་ཅུང་ཟད་ཀྱང་ཡོད་པ་མ་ཡིན་ན། དགེ་བ་ལ་སོགས་པའི་སེམས་གང་ཞིག་དེའི་འགྲོ་བས་བསྡུས་པར་འགྱུར་ཅིའི་ཕྱིར་ཞེ་ན། རྣམ་པར་སྨིན་པའི་ཕུང་པོ་འདྲ་བ་འཕངས་པ་ཙམ་ལ་དེ་ཉེ་བར་གདགས་པའི་ཕྱིར་རོ། །འདྲ་བ་འཕངས་པ་ཙམ་ནི་རྫས་གཞན་མ་ཡིན་ཏེ། འབྲས་ལ་སོགས་པའི་སྡོང་བུ་འདྲ་བ་འཕེན་པ་བཞིན་ནོ། །སྲིད་པའི་རྩེ་མོར་འཕགས་པའི་ལམ་དང་ལྡན་པ་རྣམས་ལ་ཞེས་རྒྱས་པར་འབྱུང་བ་ལ། དེའི་ས་པའི་ལུས་ཀྱི་དངོས་པོའི་རྫས་ཞེས་བྱ་བ་ནི་སྲིད་པའི་རྩེ་མོའི་ས་པའི་ཞེས་བྱ་བའི་ཐ་ཚིག་སྟེ། གཞག་པར་མི་ནུས་ཞེས་བྱ་བའི་སྐབས་དང་སྦྱར་རོ། །དེའི་ས་པའི་འཕགས་པའི་ལམ་ནི་ཡོད་པ་མ་ཡིན་ནོ་ཞེས་བྱ་བ་ནི་སྲིད་པའི་རྩེ་མོའི་ས་པའིའོ། །དེ་ཉིད་ཀྱི་ཕྱིར་འཕགས་པ་དག །ཅི་ཡང་མེད་པ་མངོན་བྱས་ནས། །སྲིད་རྩེའི་ཟག་པ་ཟད་པར་བྱེད། །ཅེས་སྨྲས་སོ། །ཇི་ལྟར་དེ་དག་ཤི་བ་ཡིན། །ཞེས་བརྗོད་པར་མི་བྱ། རིས་མཐུན་པའམ་སྲོག་གི་དབང་པོའི་རྫས་གཞན་ནི་ཅུང་ཟད་ཀྱང་ཡོད་པ་མ་ཡིན་ན་གང་ལ་དེ་དག་ལུས་ཀྱི་དངོས་པོའི་རྫས་རྣམ་པར་གཞག་པར་བྱ། མེས་བསྲེགས་པའི་དངོས་པོའི་ཕྱོགས་བཞིན་དུ་སྲིད་པའི་རྩེ་མོ་པའི་ཕྲ་རྒྱས་རང་འགག་པ་ན་འགྲུབ་པ་ཡང་མ་ཡིན་ཏེ། སྲིད་པའི་རྩེ་མོར་སྐྱེ་བའི་རྒྱུ་ཉིད་སྟོབས་ཅན་མ་ཡིན་པ་ཉིད་དུ་མ་གྲུབ་པའི་ཕྱིར་རོ། །སྲིད་པར་སྐྱེ་བའི་མཐུ་འཇོམས་པར་བྱེད་པ་ཡིན་ན་ཡང་འཕགས་པའི་ལམ་གྱི་མཐུས་ཅི་ཞིག་བྱར་ཡོད་དེ། འཇིག་རྟེན་པའི་ལམ་བས་ཀྱང་མི་དགོས་པ་ཐལ་བར་འགྱུར་བའི་ཕྱིར་རོ།། །།
རྟེན་ཅིང་འབྲེལ་པར་འབྱུང་བ་དང་པོ་དང་རྣམ་པར་དབྱེ་བ་བསྟན་པ་རྒྱ་ཆེར་འགྲེལ་པ། བམ་པོ་དྲུག་པ། འཇིག་རྟེན་པའི་ལམ་གྱིས་སྤངས་པའི་ཕྲ་རྒྱས་དེ་དག་ཉིད་ས་དེར་སྐྱེ་བའི་རྒྱུ་ཡང་མ་ཡིན་ནོ། །ཉམས་སྨད་པ་ཙམ་གྱིས་སྤངས་པ་དག་འཕགས་པའི་ལམ་གྱིས་ཡིན་པར་རིགས་པ་ཡང་མ་ཡིན་ཏེ་གཅིག་ཁོ་ནར་ཉོན་མོངས་པ་རྣམས་ཉེ་བར་འབྱུང་བ་དང་མི་མཐུན་པ་ཡིན་པའི་ཕྱིར་རོ། །ཉོན་མོངས་པའི་དངོས་པོའི་ཕྱོགས་ཀྱི་དཔེ་ཡང་རིགས་པ་མ་ཡིན་ནོ། །ཡིད་ཀྱི་རྣམ་པར་ཤེས་པ་ཡིན་ནོ་ཞེ་ན་ཡང་ཕྱོགས་ཏེ་སྔར་དཔྱད་ཟིན་ཏོ་ཞེས་བྱ་བ་ནི་ཇི་ལྟར་བྱས་ཤེ་ན། དེའི་ཚེ་རྣམ་པར་ཤེས་པ་འདོད་པ་གང་ཞིག་ཡིན་ཁ་ཅིག་ན་རེ་ཡིད་ཀྱི་རྣམ་པར་ཤེས་པའོ་ཞེའོ། །དམིགས་པ་དང་རྣམ་པ་ཅི་ཡིན་ཞེ་ན་ཞེས་བྱ་བ་རྒྱས་པར་འབྱུང་བ་ཐམས་ཅད་རིག་པར་བྱའོ། །གལ་ཏེ་འགགས་ན་གང་ལས་ཡང་འབྱུང་བར་འགྱུར་ཞེ་ན། ཕྱོགས་དེ་ཡང་སྔར་དཔྱད་ཟིན་ཏོ་ཞེས་བྱ་བ་ཇི་ལྟར་བྱས་ཤེ་ན། གཞན་དག་ན་རེ་འགོག་པའི་སྙོམས་པར་འཇུག་པ་སེམས་མེད་པ་ཉིད་ཡིན་ནོ་ཞེས་བྱ་བ་དང༌། སེམས་ཀྱི་རྒྱུན་ཆད་པ་དག་ཀྱང་འདུ་བྱེད་ཀྱིས་ཡོངས་སུ་བསྒོས་པའི་སེམས་ཇི་ལྟར་འབྱུང་ཞེས་སྨྲས་པ་མ་ཡིན་ནམ་ཞེས་བྱ་བ་དང༌། ལུས་ཀྱང་དབང་པོ་ལ། ས་བོན་གནས་པ་ཡིན་ནོ་ཞེས་རྒྱས་པར་འབྱུང་བ་ཐམས་ཅད་ཡིན་པར་རིག་པར་བྱའོ། །དེ་ལྟར་རིགས་པ་དང་ཞེས་བྱ་བ་ནི་རིགས་པས་ཀྱང་ཇི་ལྟར་བསྟན་ཟིན་པ་ནི་ཀུན་གཞི་རྣམ་པར་ཤེས་པ་མེད་ན་འདུ་བྱེད་ཀྱི་རྐྱེན་གྱིས་རྣམ་པར་ཤེས་པ་གཞག་པར་མི་ནུས་སོ་ཞེས་རྒྱས་པར་འབྱུང་བའོ། །མདོ་སྡེ་ནི་འགོག་པའི་སྙོམས་པར་ཞུགས་པ་རྣམས་ལུས་ཀྱི་འདུ་བྱེད་མ་འགགས་པ་ཡིན་ནོ་ཞེས་རྒྱས་པར་འབྱུང་བའོ། །བསྟན་བཅོས་ལས་ཀྱང་ཞེས་བྱ་བ་ནི་བཙུན་པས་སྟོན་པའི་ཆོས་མངོན་པའི་ཆོས་ཀྱི་རྣམ་གྲངས་ལས་དེ་ཉིད་བརྗོད་དོ་ཞེས་བྱ་བ་སྟེ། དེ་ལྟར་ན་ཀུན་གཞི་རྣམ་པར་ཤེས་པ་ཡིན་པར་གྲུབ་པ་ཡིན་ནོ་ཞེས་བྱའོ། །འདུ་བྱེད་ཀྱི་རྐྱེན་གྱིས་རྣམ་པར་ཤེས་པ་གང་གི་བར་དུ་རྣམ་པར་གཞག་ཅེ་ན། སྲིད་པའི་གནས་སྐབས་ལ་ཐུག་གི་བར་དུའོ་ཞེས་བྱ་བ་ལ་སྲིད་པའི་གནས་སྐབས་ནི་སྲིད་པའི་རྐྱེན་ཅན་གྱི་ལེན་པའི་མཐུས་འདུ་བྱེད་ཀྱིས་བསྒོས་པའི་འཇུག་པ་སྙེད་པ་ཡང་སྲིད་མངོན་པར་འགྲུབ་པའི་རྣམ་པར་ཤེས་པ་དེ་ནི་སྲིད་པ་ཞེས་རྣམ་
པར་གཞག་གི་རྣམ་པར་ཤེས་པར་མ་ཡིན་ནོ། །འོ་ན་རྒྱུ་ཆེན་པོའི་ཆོས་ཀྱི་རྣམ་གྲངས་ལས་ཞེས་རྒྱས་པར་འབྱུང་བ་ནི་དེ་ལས་འདུ་བྱེད་ཀྱི་རྐྱེན་གྱིས་རྣམ་པར་ཤེས་པ་ནི་སྲིད་པ་ཕན་ཆད་ནམ་མ་ཤིའི་བར་དུ་མིང་དང་གཟུགས་ཀྱི་རྐྱེན་ཉིད་དུ་བསྟན་ན་ཇི་ལྟར་དེ་སྲིད་པ་ལ་ཐུག་གི་བར་དུ་རྣམ་པར་གཞག་གི་ནམ་མ་ཤིའི་བར་དུ་མ་ཡིན་ཞེ་ན། དེའི་འབྲས་བུ་མིང་དང་གཟུགས་སྐྱེས་པ་ན་ཞེས་རྒྱས་པར་འབྱུང་བ་ཡིན་ཏེ། དེའི་འབྲས་བུ་ཞེས་བྱ་བ་འདུ་བྱེད་ཀྱི་རྐྱེན་གྱིས་རྣམ་པར་ཤེས་པའི་འབྲས་བུ་མིང་དང་གཟུགས་སྐྱེས་པ་ན་རྣམ་པར་སྨིན་པའི་རྣམ་པར་ཤེས་པ་ཀུན་གཞི་རྣམ་པར་ཤེས་པ་དེ་དང༌། དེ་ལས་གཞན་པའི་མིང་དང་གཟུགས་ཞེས་བྱ་བ་ནི་འདུ་བྱེད་ཀྱི་རྐྱེན་གྱིས་རྣམ་པར་ཤེས་པའི་འབྲས་བུའི་མིང་དང་གཟུགས་ནི་དེ་ལས་གཞན་པའི་མིང་དང་གཟུགས་སོ། །དེ་ཡང་གང་ཞེ་ན། སྐྱེ་མཆེད་དྲུག་ནས་བརྩམས་ཏེ་རྒྱུན་གྱིས་འཇུག་པ་སྟེ། དེ་མ་ཤིའི་བར་དུ་གཅིག་ལ་གཅིག་བརྟེན་པའི་རྒྱུན་རྗེས་སུ་འཇུག་པ་ཉིད་ཀྱི་ཕྱིར་ཞེས་བྱ་བའོ། །གཅིག་ལ་གཅིག་བརྟེན་པ་ནི་གཅིག་ལ་གཅིག་བརྟེན་པའོ། །གཅིག་ལ་གཅིག་བརྟེན་པའི་རྒྱུན་རྗེས་སུ་འཇུག་པ་ནི། གཉིས་ཡིན་པས། དེ་གཉིས་ནི་གཅིག་ལ་གཅིག་བརྟེན་པའི་རྒྱུན་རྗེས་སུ་འཇུག་པའོ། །དེའི་དངོས་པོ་གཅིག་ལ་གཅིག་བརྟེན་པའི་རྒྱུན་རྗེས་སུ་འཇུག་པ་ཉིད་དོ། །ཕྱིར་ནི་གཟུགས་ནས་གཅིག་ལ་གཅིག་རྐྱེན་དུ་བསྟན་ཏེ། རྣམ་པར་སྨིན་པའི་རྣམ་པར་ཤེས་པ་དེ་ནི་མིང་དང་གཟུགས་ཀྱི་ཡིན་ནོ། །དེ་ཡང་དེའི་ཡིན་ནོ། །མདོ་སྡེ་འདི་ལས་ཀྱང་རྟེན་ཅིང་འབྲེལ་པར་འབྱུང་བའི་མདོ་ལས་འདུ་བྱེད་ཀྱི་རྐྱེན་གྱིས་རྣམ་པར་ཤེས་པ་ནི་མ་འོངས་པ་ནི་ཚེ་རབས་གཞན་དུ་དེའི་འབྲས་བུ་ཞེས་བྱ་བ་རྣམ་པར་ཤེས་པའི་འབྲས་བུ་མིང་དང་གཟུགས་མ་བྱུང་བ་འབྱུང་བའི་རྐྱེན་དུ་དགོངས་པ་ཡིན་གྱི། སྐྱེས་པའི་རྒྱུན་རྗེས་སུ་འཇུག་པའི་རྐྱེན་ནི་མ་ཡིན་ཏེ། དེ་ཇི་ཙམ་འབྲེལ་བའི་བར་དུ་དེ་རྣམ་པར་གཞག་གོ་ཞེས་བྱ་བ་མིང་དང་གཟུགས་དང་འབྲེལ་བའི་བར་དུ་ཞེས་བྱ་བའི་དོན་ཏེ། དེ་དང་འབྲེལ་པའི་ངོ་བོ་གནས་སྐབས་འདི་ལ་རྣམ་པར་གཞག་གོ །མིང་དང་གཟུགས་ནི་སྐྱེ་མཆེད་དྲུག་ལ་ཐུག་གི་བར་དུ་ཡིན་གྱི་དེ་ཕན་ཆད་མ་ཡིན་ནོ་ཞེས་བྱ་བ་ནི་རྣམ་པར་གཞག་གོ་ཞེས་བྱ་བའི་སྐབས་དང་སྦྱར་རོ། །འདུ་བྱེད་ཀྱིས་ཡོངས་སུ་བསྒོས་པ་
པའི་རྣམ་པར་ཤེས་པའི་རྐྱེན་གྱིས་མིང་དང་གཟུགས་གང་ཡིན་པ་དེ་ནི་སྐྱེ་མཆེད་དྲུག་ལ་ཐུག་གི་བར་དུ་ཡིན་གྱི། ཕན་ཆད་རྣམ་པར་གཞག་པ་ནི་མ་ཡིན་ནོ། །གཞན་ནི་ནམ་མ་ཤིའི་བར་དུ་རྣམ་པར་མི་དགག་གོ །མིང་དང་གཟུགས་དེ་སྐྱེས་ནས་ཀྱང་དེ་ལ་ཡོད་པའི་ཞེས་རྒྱས་པར་འབྱུང་བ་ལ། དེ་ལ་ཡོད་པ་ནི་མིང་དང་གཟུགས་ལ་ཡོད་པ་སྟེ། རྣམ་པར་སྨིན་པའི་རྣམ་པར་ཤེས་པ་ཞེས་བྱ་བ་ཀུན་གཞི་རྣམ་པར་ཤེས་པ་སྟེ། ཚེ་སྔ་མའི་ལས་ཀྱིས་འཕངས་པ་ཞེས་རྒྱས་པར་འབྱུང་བ་འདིས་ནི་གལ་ཏེ་ན་འདུ་བྱེད་ཀྱི་རྐྱེན་གྱིས་རྣམ་པར་ཤེས་པ་མ་ཡིན་པ་ཡང་ཡོད་པས། འདུ་བྱེད་ཀྱི་རྐྱེན་གྱིས་རྣམ་པར་ཤེས་པའི་ཡན་ལག་ཡིན་པར་སྲིད་པ་ལ་ཐུག་གི་བར་དུ་རྣམ་པར་གཞག་གི་དེ་ནས་ནི་མ་ཡིན་པར་སྟོན་ཏོ། དེས་བྱས་པ་དེ་སྐྱེ་བར་ནུས་པ་ཞེས་བྱ་བ་ནི་འདུ་བྱེད་ཀྱིས་བྱས་པ་མིང་དང་གཟུགས་སྐྱེ་བར་ནུས་པ་མ་སྤྱད་པའི་ཕྱིར་རོ་ཞེས་བྱ་བ་ནི་བཟུང་ནས་དང༌། སེམས་ལ་བཞག་ནས་བྱ་བའི་དོན་གང་ཡིན་པའོ། །མིང་དང་གཟུགས་གང་ལ་དེ་འཕེན་པར་བྱེད་པའི་འདུ་བྱེད་ཀྱིས་བསྒོས་པ་དང་ལྡན་པའི་ཕྱིར་ཞེས་བྱ་བ་ནི་མིང་དང་གཟུགས་དེ་འཕེན་པར་བྱེད་པའི་འདུ་བྱེད་ཀྱིས་བསྒོས་པ་དང་ལྡན་པའི་ཕྱིར་ཞེས་བྱ་བའི་དོན་ཏོ། །དེའི་དོན་དུ་མིང་དང་གཟུགས་ཀྱི་ཆེད་དུ་འདུ་བྱེད་ཀྱི་རྐྱེན་གྱིས་རྣམ་པར་ཤེས་པའི་ཡན་ལག་རྣམ་པར་གཞག་གི །གང་དུ་ནུས་པ་དཔྱད་ཟིན་ན་ནི་མ་ཡིན་ནོ་ཞེས་བྱ་བ་ནི་མིང་དང་གཟུགས་གང་ལ་ནུས་པ་སྤྱད་ཟིན་པ་དེ་འདུ་བྱེད་ཀྱི་རྐྱེན་གྱིས་ཀུན་གཞི་རྣམ་པར་ཤེས་པ་ཡིན་ཞིང་དེ་ལས་བརྩམས་ཏེ། འདུ་བྱེད་ཀྱི་རྐྱེན་གྱིས་རྣམ་པར་ཤེས་པའི་ཡན་ལག་རྣམ་པར་གཞག་པ་མ་ཡིན་ནོ། །དེ་ལྟར་ན་དེའི་རྗེས་ལ་སེམས་ཅན་རྣམས་ཀྱི་ལས་ཀྱི་རྣམ་པར་སྨིན་བ་བསམ་གྱིས་མི་ཁྱབ་པ་ཡིན་ནོ་ཞེས་སྨྲས་ཏེ། ལས་རྣམས་ཀྱི་རྣམ་པར་སྨིན་པ་ནི་ལས་ཀྱི་རྣམ་པར་སྨིན་པ་སྟེ། ཀུན་གཞི་རྣམ་པར་ཤེས་པ་ལ་འདུ་བྱེད་ཀྱིས་ཤིན་ཏུ་རྣམ་པ་མང་པོར་བསྒོས་པ་རྣམས་ཉེ་བར་སྤྱད་པ་དང༌། ཉེ་བར་མ་སྤྱད་པ་རྣམས་བསམ་གྱིས་མི་ཁྱབ་པའི་ཕྱིར་རོ། །འདུ་བྱེད་རྣམས་ནི་སྐྱེ་བའི་དབང་དུ་བྱས་ཏེ། རབ་ཏུ་འཇིག་པ་ཡིན་པའི་ཕྱིར་དང་ཞེས་བྱ་བ་ནི་གང་གི་ཕྱིར། ལྷ་ལ་སོགས་པར་སྐྱེ་བའི་དབང་དུ་བྱས་ཏེ། བསོད་ནམས་ལ་སོགས་པའི་འདུ་བྱེད་རྣམས་འདུག་
པ་ཡིན་གྱི་སྲིད་པ་བར་མའི་ནི་མ་ཡིན་ནོ། །འགའ་ཡང་སྲིད་པ་བར་མ་ཙམ་གྱི་ཆེད་དུ་བསོད་ནམས་ལ་སོགས་པའི་འདུ་བྱེད་མངོན་པར་འདུ་བྱེད་པ་མ་ཡིན་པའི་ཕྱིར་རོ། །དེ་མེད་པར་ཡང་དེར་སྐྱེ་བ་མེད་པའི་ཕྱིར་རོ། །དེ་བས་ན་སྲིད་པ་བར་མའི་མིང་དང་གཟུགས་ཀྱི་རྐྱེན་དུ་རྣམ་པར་ཤེས་པ་མི་གཞག་གོ །དེར་ཡང་རྣམ་པར་སྨིན་པ་ཡོངས་སུ་མ་རྫོགས་པའི་ཕྱིར་རོ་ཞེས་བྱ་བ་ནི་ལྷ་ལ་སོགས་པར་སྐྱེ་བ་དེ་རྣམ་པར་སྨིན་པ་མ་ཡིན་ཏེ། བསོད་ནམས་ལ་སོགས་པའི་འདུ་བྱེད་གང་གིས་རྣམ་པར་ཤེས་པ་དེ་ལ་བསྒོས་པ་དེ་དག་གི་རྣམ་པར་སྨིན་པ་གང་ཡིན་པའི་རྣམ་པར་སྨིན་པ་དེ་ཡང་ཡོངས་སུ་མ་རྫོགས་པའི་ཕྱིར་རམ། འདུ་བྱེད་ཀྱིས་ཡོངས་སུ་བསྒོས་པའི་རྣམ་པར་ཤེས་པ་རྣམ་པར་སྨིན་པ་ནི་དེར་ཡོངས་སུ་མ་རྫོགས་པའི་ཕྱིར་ཏེ། སྲིད་པ་བར་མའི་མིང་དང་གཟུགས་ལ་ནི་རྣམ་པར་སྨིན་པ་དེ་ཐམས་ཅད་ཡོངས་སུ་མ་རྫོགས་པ་ཡིན་ཏེ། སྐྱེ་བས་བསྡུས་པ་དེ་མ་སྐྱེས་པའི་ཕྱིར་རོ། །ལས་ཀྱི་བྱེ་བྲག་གིས་ནི་ནུས་པའི་བྱེ་བྲག་སྐྱེ་པའི་ཕྱིར་རོ་ཞེས་བྱ་བ་ནི་རྣམ་པར་ཤེས་པའི་ནུས་པའི་བྱེ་བྲག་སྐྱེ་བའི་ཕྱིར་རོ་ཞེས་བྱ་བའི་དོན་ཏོ། །ཡང་སྲིད་མངོན་པར་འགྲུབ་པར་བྱ་བ་ལ་ནུས་པ་སྐྱེས་པ་ནི་འདུ་བྱེད་ཀྱི་རྐྱེན་གྱིས་རྣམ་པར་ཤེས་པ་ཡིན་པར་བསྟན་ཏོ། །རྣམ་བར་ཤེས་པའི་ནུས་པའི་བྱེ་བྲག་དེ་ཡང་ལས་ཀྱི་བྱེ་བྲག་གིས་འགྱུར་བས་རྣམ་པར་ཤེས་པ་བསྐྱེད་པ་ལ་འདུ་བྱེད་རྣམས་གཙོ་བོ་ཉིད་དུ་གྲགས་པ་ཡིན་ནོ། །འདིར་ལས་ཀྱི་བྱེ་བྲག་སྨོས་པ་ནི་འདུ་བྱེད་ཀྱི་མཚན་ཉིད་ཀྱི་ལས་བསྟན་པའི་ཕྱིར་རོ། །ནུས་པའི་བྱེ་བྲག་སྨོས་པ་འདི་ཡང་སྲིད་ཀྱི་མིང་དང་གཟུགས་སྐྱེད་པའི་ནུས་པ་རབ་ཏུ་བསྟན་པའི་ཕྱིར་རོ། །དེ་དག་གིས་ནི་འདུ་བྱེད་ཀྱི་མཚན་ཉིད་ཀྱི་ལས་ནི་སེམས་དང་སེམས་ལས་བྱུང་བའི་རྟེན་གྱི་རྒྱུན་འཇུག་པ་དང༌། རྣམ་པར་ཤེས་པའི་ནུས་པ་བསལ་ཏོ། །ཡང་ན་ཉོན་མོངས་པས་བྱས་པའི་རྣམ་པར་ཤེས་པའི་བྱེ་བྲག་གིས་ཡང་སྲིད་མངོན་པར་འགྲུབ་པར་ནུས་པ་ཡིན་ལ། ལས་ཀྱི་བྱེ་བྲག་གིས་ནུས་པའི་བྱེ་བྲག་ཡིན་ཏེ། རིས་མཐུན་པ་ཁྱད་པར་ཅན་གྱི་མིང་དང་གཟུགས་ཀྱི་རྒྱུར་གྱུར་པ་ཡིན་ནོ། །ཇི་སྐད་དུ་གལ་ཏེ་དེ་བསོད་ནམས་ཀྱི་འདུ་བྱེད་མངོན་པར་འདུ་བྱེད་ན་རྣམ་པར་ཤེས་པའི་བསོད་ནམས་སུ་ཉེ་བར་འགྱུར་རོ། །མི་གཡོ་བའི་བར་དུ་
ཉེ་བར་འགྱུར་རོ་ཞེས་གསུངས་སོ། །རྣམ་པར་ཤེས་པའི་དོན་བསྡུས་པ་རྣམ་པར་གཞག་པ་ནི་རྣམ་པ་བཅོ་བརྒྱད་འདིར་བསྟན་ཏེ། རབ་ཏུ་དབྱེ་བ་རྣམ་པར་གཞག་པ་ནི་ཇི་སྐད་དུ། དེ་ལ་དབང་པོ་ཐ་དད་པའི་སྒོ་ནས་རྣམ་པར་ཤེས་པའི་རབ་ཏུ་དབྱེ་བ་བསྟན་ཏོ་ཞེས་བྱ་བ་རྒྱས་པར་བསྟན་ཏོ། །འཇུག་བའི་དབྱེ་བ་རྣམ་པར་གཞག་པ་ནི། ཇི་སྐད་དུ་ཚོགས་ཀྱི་སྒྲས་ནི་དམིགས་པ་ལ་འཇུག་པའི་དབྱེ་བ་ཡང་བསྟན་ཏོ་ཞེས་བསྟན་པའོ། །རང་གི་མཚན་ཉིད་རྣམ་པར་གཞག་པ་ནི་ཇི་སྐད་དུ་མིག་ལ་བརྟེན་ནས་གཟུགས་སོ་སོར་རྣམ་པར་རིག་པའོ་ཞེས་བྱ་བ་ལ་སོགས་པ་བསྟན་པའོ། །གདགས་པ་རྣམ་པར་གཞག་པ་ནི་ཇི་སྐད་དུ་གལ་ཏེ་རྣམ་པར་ཤེས་པས། གཟུགས་ལ་སོགས་པ་སོ་སོར་རྣམ་པར་རིག་པ་ཡིན་ན་ཅིའི་ཕྱིར་མིག་གི་རྣམ་པར་ཤེས་པ་ཞེས་བྱ་ཞེས་རྒྱས་པར་བསྟན་པའོ། །རྒྱུ་རྣམ་པར་གཞག་པ་ནི། ཇི་སྐད་དུ་མདོ་སྡེ་གཞན་ལས། གཉིས་ལ་བརྟེན་ནས་རྣམ་པར་ཤེས་པ་འབྱུང༌། །ཞེས་རྒྱས་པར་བསྟན་པ་དང༌། མདོ་སྡེ་འདི་ལས་འདུ་བྱེད་ཀྱི་རྐྱེན་གྱིས་རྣམ་པར་ཤེས་པ་ཞེས་གསུངས་ན་ཇི་ལྟར་སྔ་ཕྱི་འགལ་བར་མི་འགྱུར་ཞེས་བྱ་བ་དང༌། དགོངས་བ་ཐ་དད་པའི་ཕྱིར་ཞེས་རྒྱས་པར་འབྱུང་བའི་བར་དུ་བསྟན་པའོ། །རྣམ་པར་ངེས་པ་རྣམ་པར་གཞག་པ་ནི་ཇི་སྐད་དུ་གལ་ཏེ་འདུ་བྱེད་ཀྱིས་ཡོངས་སུ་བསྒོས་པའི་རྣམ་པར་ཤེས་པའི་རྒྱུན་ལས་མ་འོངས་པའི་མིང་དང་གཟུགས་སྐྱེ་བར་འགྱུར་ན་སེམས་མེད་པའི་སྙོམས་པར་འཇུག་པ་དང༌། འདུ་ཤེས་མེད་པ་དག་ནི་རྒྱུན་ཆད་ན་ཡང་འདུ་བྱེད་ཀྱིས་བསྒོས་པའི་རྣམ་པར་ཤེས་པ་ཇི་ལྟར་འབྱུང་ཞེས་རྒྱས་པར་བསྟན་པའོ། །དགོངས་པ་རྣམ་པར་གཞག་པ་ནི་ཇི་སྐད་དུ་གནས་པས་གནས་བསྟན་ཏོ་ཞེས་རྒྱས་པར་བསྟན་པའོ། །ས་བོན་གྱི་རྟེན་རྣམ་པར་གཞག་པ་ནི་ཇི་སྐད་དུ། ཆོས་ཐམས་ཅད་ཀྱི་ས་བོན་གྱི་གནས་གང་ཡིན་པའོ་ཞེས་བསྟན་པའོ། །ཉེ་བར་འཛིན་པ་རྣམ་པར་གཞག་པ་ནི་ཇི་སྐད་དུ། ལེན་པ་ནི་རྣམ་པར་ཤེས་པ་ཡང་དེ་ཡིན་ཏེ་ཞེས་རྒྱས་པར་བསྟན་པའོ། །ལུས་ཀྱི་གཞི་རྣམ་པར་གཞག་པ་ནི་ཇི་སྐད་དུ། རྣམ་པར་སྨིན་པའི་རྣམ་པར་ཤེས་པ་ཡང༌། དེ་ཡིན་ཞེས་རྒྱས་པར་འབྱུང་བ་ནས་ལུས་ཀྱི་དངོས་པོ་དེ་དང་དེའི་རྟེན་ཉིད་དུ་རྣམ་པར་སྨིན་པ་ཞེས་བསྟན་པའོ། །དམིགས་པ་དང་རྣམ་པ་རྣམ་
པར་གཞག་པ་ནི་ཇི་སྐད་དུ། འོ་ན་དམིགས་པ་དང་རྣམ་པ་ཅི་ཡིན། དམིགས་པ་དང་རྣམ་པ་ཡོངས་སུ་མ་ཆད་པའོ་ཞེས་བསྟན་པའོ། །བསྡུ་བ་རྣམ་པར་གཞག་པ་ཇི་སྐད་དུ། ཉེ་བར་ལེན་པའི་ཕུང་པོ་གང་གི་ནང་དུ་འདུས། རྣམ་པར་ཤེས་པ་ཉེ་བར་ལེན་པའི་ཕུང་པོར་ཞེས་བསྟན་པའོ། །རིགས་པ་རྣམ་པར་གཞག་པ་ནི་ཇི་སྐད་དུ་ཀུན་གཞི་རྣམ་པར་ཤེས་པ་མེད་ན་ཞེས་རྒྱས་པར་བསྟན་པའོ། །ལུང་རྣམ་པར་གཞག་པ་ནི་ཇི་སྐད་དུ། མདོ་སྡེ་དང་བསྟན་བཅོས་དང་ཞེས་བསྟན་པའོ། །ཁྱབ་པ་རྣམ་པར་གཞག་བ་ནི་ཇི་སྐད་དུ། སྲིད་པའི་གནས་སྐབས་ལ་ཐུག་གི་བར་དུ་ཞེས་བསྟན་པའོ། །ངེས་པ་རྣམ་པར་གཞག་པ་ཇི་སྐད་དུ། མིང་དང་གཟུགས་གང་དུ་དེ་འཕེན་པར་བྱེད་པའི་འདུ་བྱེད་ཀྱིས་བསྒོས་པ་དང་ལྡན་པའི་ཕྱིར་ནུས་པ་མ་སྤྱད་པ་ཡིན་ལ། དེའི་ཆེད་དུ་འདུ་བྱེད་ཀྱི་རྐྱེན་གྱིས་རྣམ་པར་ཤེས་པའི་ཡན་ལག་རྣམ་པར་གཞག་གི་གང་དུ་ནུས་པ་སྤྱད་པ་ནི་མ་ཡིན་ནོ་ཞེས་བསྟན་པའོ། །འབྲས་བུ་རྣམ་པར་གཞག་པ་ནི་ཇི་སྐད་དུ། ཅིའི་ཕྱིར་སྲིད་པ་བར་མའི་མིང་དང་གཟུགས་ཀྱི་རྐྱེན་དུ་རྣམ་པར་ཤེས་པ་མི་གཞག །འདུ་བྱེད་རྣམས་ནི་སྐྱེ་བའི་ཆེད་དུ་བྱས་ཏེ། འཇུག་པ་ཡིན་པའི་ཕྱིར་ཞེས་རྒྱས་པར་བསྟན་པ་ཡིན་ནོ། །རྐྱེན་གཙོ་བོར་རྣམ་པར་གཞག་པ་ནི་ཇི་སྐད་དུ། ལས་ཀྱི་བྱེ་བྲག་གིས་དེའི་ནུས་པའི་བྱེ་བྲག་སྐྱེ་བའི་ཕྱིར་རོ་ཞེས་བསྟན་པའོ། །རྣམ་པར་ཤེས་པ་རབ་ཏུ་དབྱེ་བ་རྫོགས་སོ།། །།མིང་གང་ཞེ་ན་ཞེས་རྒྱས་པར་འབྱུང་བ་ནི། རྣམ་པར་ཤེས་པའི་རྐྱེན་གྱིས་མིང་དང་གཟུགས་ཞེས་གསུངས་པ་ལ། མིང་འདི་ནི་འཇིག་རྟེན་དང༌། གསུང་རབ་ལས་སྒྲ་དང༌། ཚིག་བླ་དགས་ཡིན་ནོ་ཞེས་གྲགས་སོ། །གསུང་རབ་ལས་གཟུགས་ཅན་མ་ཡིན་པའི་ཕུང་པོ་བཞི་ཡིན་པར་ཡང་གྲགས་སོ། །ཚིག་བླ་དགས་ཙམ་བསལ་བའི་ཕྱིར་གསུང་རབ་ཉིད་ལས་གཟུགས་ཅན་མ་ཡིན་པའི་ཕུང་པོ་བཞི་སྟེ་ཞེས་གསུངས་སོ། །ཚིག་བླ་དགས་ནི་མདོ་སྡེའི་ལུགས་ཀྱི་དག་གི་ངོ་བོ་ཡིན་པའི་ཕྱིར་གཟུགས་སུ་འདུས་པའོ། །རྣམ་པར་སྨྲ་བའི་ལུགས་ཀྱི་མི་ལྡན་པའི་འདུ་བྱེད་དུ་བསྡུས་པ་ཡིན་པའི་ཕྱིར་མིང་དུ་འདུས་པ་ཡིན་ནོ། །མདོ་སྡེ་འདི་ལས་ནི་ཀུན་བསྡུས་ཏེ། རྣམ་པར་ཤེས་པའི་རྐྱེན་གྱིས་མིང་ཡིན་པར་དགོངས་ཀྱི། ཚིག་བླ་དགས་ཙམ་ནི་མ་ཡིན་ནོ། །གཟུགས་གང་ཞེ་ན། གང་ཅུང་ཟད་གཟུགས་
གང་ཡིན་པ་ཞེས་རྒྱས་པར་འབྱུང་བ་དེས་ནི་འབྱུང་བ་དང་འབྱུང་བ་ལས་གྱུར་པ་མ་གཏོགས་པའི་གཟུགས་ཡོད་པ་མ་ཡིན་ནོ་ཞེས་བསྟན་ཏོ། །དེ་ལྟར་རེ་ཞིག་རྣམ་པར་ཤེས་པའི་རྐྱེན་གྱིས་གཟུགས་ནི་འདི་ལྟ་སྟེ་འབྱུང་བ་རྣམས་དང་འབྱུང་བ་ལས་ཡིན་ཞེས་བྱའོ། །འདིར་ནི་འབྱུང་བ་དང་འབྱུང་བ་ལས་གྱུར་པས་བསྡུས་པའི་གཟུགས་འདི་ཐམས་ཅད་རྣམ་པར་ཤེས་པའི་རྐྱེན་གྱིས་ཡིན་པར་ངེས་པར་གཟུང་བར་བྱ་བ་མ་ཡིན་ནོ། །སྐྱེ་མཆེད་དྲུག་མ་དོད་ཀྱི་བར་དུ་ཞེས་བྱ་བ་ནི་འདི་ལྟར་རྣམ་པར་ཤེས་པའི་རྐྱེན་གྱིས་མིང་དང་གཟུགས་ནི་སྐྱེ་མཆེད་དྲུག་ལ་ཐུག་གི་བར་དུ་རྣམ་པར་གཞག་ཀྱང༌། སྐྱེ་མཆེད་དྲུག་མན་ཆད་དུ་མིང་དང་གཟུགས་དགག་པ་ནི་མ་ཡིན་ནོ། །དེ་ཉིད་ཀྱི་ཕྱིར་རྣམ་པར་ཤེས་པའི་རྐྱེན་གྱིས་མིང་དང་གཟུགས་ཞེས་བྱ་སྟེ་ཞེས་སྨྲས་ཏེ། འདི་ལྟར་དེས་བསྒོས་པའི་ཞེས་རྒྱས་པར་འབྱུང་བ་ལ། འདི་ལྟར་གང་གི་ཕྱིར་དེས་བསྒོས་པའི་བྱེ་བྲག་གིས་ཞེས་བྱ་བ་རྣམ་པར་ཤེས་པ་ལ་འདུ་བྱེད་ཀྱིས་གཞག་པའི་བསྒོས་པའི་བྱེ་བྲག་གིས། རིས་མཐུན་པ་གཞན་དུ་མིང་དང་གཟུགས་དེ་བྱེ་བྲག་ཐམས་ཅད་དུ་འགྲུབ་པར་འགྱུར་ཏེ། འཇིག་རྟེན་སྣ་ཚོགས་ལས་ལས་སྐྱེས། །ཞེས་འབྱུང་ངོ༌། །དེ་ཉིད་ཀྱི་ཕྱིར་བཅོམ་ལྡན་འདས་ཀྱིས་སྐྱེ་བའི་རྒྱུ་ནི་ལས་ཡིན་ནོ། །མངོན་པར་འགྲུབ་པའི་རྒྱུ་ནི་སྲེད་པ་ཡིན་ནོ་ཞེས་གསུངས་སོ། །དེ་ལ་བདེ་བ་ལ་སོགས་པ་རྣམ་པ་གསུམ་མྱོང་བ་ནི་ཚོར་བའོ་ཞེས་བྱ་བ་ནི་བདེ་བ་དང་སྡུག་བསྔལ་དང་བདེ་བ་ཡང་མ་ཡིན་སྡུག་བསྔལ་ཡང་མ་ཡིན་པ་མྱོང་བ་ནི་མྱོང་བར་གྱུར་པ་སྟེ། བདེ་བ་དང་སྡུག་བསྔལ་དང་བདེ་བ་ཡང་མ་ཡིན་སྡུག་བསྔལ་ཡང་མ་ཡིན་པའི་ཚོར་བ་སྐྱེས་པ་ནི་ཉམས་བདེ་བ་དང༌། སྡུག་བསྔལ་བ་དང་གཉི་ག་ལས་རྣམ་པར་གྲོལ་བའི་ཡུལ་ཡིད་ཀྱིས་ཉམས་སུ་མྱོང་བའོ། །དམིགས་པའི་མཚན་མ་འཛིན་པ་ནི་འདུ་ཤེས་ཏེ། དམིགས་པའི་བྱེ་བྲག་འཛིན་པ་ཞེས་བྱ་བའི་དོན་གང་ཡིན་པ་སྟེ། དམིགས་པ་ནི་གཟུགས་ལ་སོགས་པའི་སྔོན་པོ་དང་སེར་པོ་དང་རིང་པོ་དང་ཐུང་དུ་དང་བུད་མེད་དང་སྐྱེས་པ་དང་མཛའ་བོ་དང་དགྲ་དང་བདེ་བ་དང་སྡུག་བསྔལ་གྱི་བྱེ་བྲག་འཛིན་པ་འདི་ནི་འདུ་ཤེས་སོ། །དེ་ལས་གཞན་པའི་སེམས་ལས་བྱུང་བའི་ཆོས་རྣམས་དང༌། སེམས་དང་མཚུངས་པར་ལྡན་པ་མ་ཡིན་པའི་འདུ་བྱེད་དོ་ཞེས་བྱ་བ་ནི་ཚོར་བ་དང་འདུ་ཤེས་དེ་གཉིས་ལས་གཞན་པ་དེ་
དག་གང་ཞེ་ན། འདུན་པ་དང་རེག་པ་དང་ཡིད་ལ་བྱེད་པ་དང་བློ་དང་དྲན་པ་ལ་སོགས་པའོ། །སེམས་དང་མཚུངས་པར་ལྡན་པ་མ་ཡིན་པ་ནི་ཐོབ་པ་ལ་སོགས་པའོ། །ཡུལ་ཉེ་བར་དམིགས་པ་ནི་རྣམ་པར་ཤེས་པའོ་ཞེས་བྱ་བ་ལ། བྱེ་བྲག་བོར་ནས་དངོས་པོ་ཙམ་ལ་ལྟ་བའོ།། འོ་ན་ནི་མིག་གི་རྣམ་པར་ཤེས་པས་ནི་སྔོན་པོ་ཤེས་ཀྱི་སྔོན་པོའོ་སྙམ་དུ་ནི་མ་ཡིན་ནོ། །ཡིད་ཀྱི་རྣམ་པར་ཤེས་པས་ནི་སྔོན་པོ་ཤེས་ཤིང་སྔོན་པོའོ་སྙམ་དུ་ཡང་ཡིན་ནོ་ཞེས་འབྱུང་བ་དང་འདི་འགལ་བར་འགྱུར་རོ་ཞེ་ན། རྣམ་པར་ཤེས་པས་སྔོན་པོ་སྙམ་དུ་རྣམ་པར་ཤེས་ཀྱི་ཞེས་བྱ་བ་ནི་མཚུངས་པར་ལྡན་པ་ཡིན་ཏེ། སེམས་དང་སེམས་ལས་བྱུང་བ་རྣམས་གནས་དང༌། དམིགས་པ་དང་རྣམ་པར་མཚུངས་པའི་ཕྱིར་ཏེ་འགལ་བ་མེད་དོ། །མིག་ལ་སོགས་པའི་རྣམ་པར་ཤེས་པའི་ཚོགས་དང་མཚུངས་པར་ལྡན་པའི་འདུ་ཤེས་ནི་ཞེན་པ་ཡིན་པའི་ཕྱིར་དང༌། མིག་ལ་སོགས་པའི་རྣམ་པར་ཤེས་པའི་རྣམ་པའི་རྗེས་སུ་བྱེད་པས་ན། བྱེ་བྲག་ཡོངས་སུ་གཅོད་པ་མ་ཡིན་ནོ། །དེ་ལ་ཁ་ཅིག་ན་རེ་ཅུང་ཟད་ཤེས་པ་ནི་རྣམ་པར་ཤེས་པ་སྟེ། ཅུང་ཟད་ཟོས་པ་བཞིན་ནོ་ཞེས་བྱ་བ་ནི། ཇི་ལྟར་ཅུང་ཟད་ཟོས་པ་ལ་ཆུང་དུ་ཟོས། ཅུང་ཟད་ཟོས་ཞེས་བྱ་བ་བཞིན་ནོ། །མི་བཟད་པའི་ཤེས་པ་ནི་རྣམ་པར་ཤེས་པ་སྟེ། གཟུགས་ངན་པ་བཞིན་ནོ་ཞེས་བྱ་བ་ནི་ཇི་ལྟར་མི་སྡུག་པའི་གཟུགས་ལ་གཟུགས་ངན་པ་ཞེས་བྱ་བ་བཞིན་ནོ། །ཤེས་པའི་ལས་ནུས་པ་མེད་པའི་ཤེས་པ་ནི་རྣམ་པར་ཤེས་པ་སྟེ། སེམས་གཡེངས་པ་བཞིན་ནོ་ཞེས་བྱ་བ་ནི་ཇི་ལྟར་སེམས་ཀྱི་ལས་མི་ནུས་པའི་སེམས་ལ་སེམས་གཡེངས་པ་ཞེས་བྱ་བ་བཞིན་ནོ། །ཡོངས་སུ་མ་རྫོགས་པའི་ཤེས་པ་ནི་རྣམ་པར་ཤེས་པ་སྟེ། ཡན་ལག་མ་ཚང་བ་བཞིན་ནོ་ཞེས་བྱ་བ་ནི་ཇི་ལྟར་ཡན་ལག་མ་རྫོགས་པ་ལ་ཡན་ལག་མ་ཚང་བ་ཞེས་བྱ་བ་བཞིན་ནོ། །མི་གསལ་བའི་ཤེས་པ་ནི་རྣམ་པར་ཤེས་པ་སྟེ། ཁ་ཟས་མ་ཞུ་བ་བཞིན་ནོ་ཞེས་བྱ་བ་ནི་ཇི་ལྟར་བསལ་བར་ཞུ་བར་མ་གྱུར་པའི་ཟས་ལ་ཟས་མ་ཞུ་བ་ཞེས་བྱ་བ་བཞིན་ནོ། །དེ་ལྟར་བྱས་ན་མིག་གི་རྣམ་པར་ཤེས་པ་ནས་ལུས་ཀྱི་རྣམ་པར་ཤེས་པའི་བར་དུ་ཅུང་ཟད་ཤེས་པ་ཡིན་པར་ཐལ་བར་འགྱུར་ཏེ། བྱེ་བྲག་ཡོངས་སུ་མི་གཅོད་པའི་ཕྱིར་རོ། །ཉོན་མོངས་པ་
ཅན་ནི་མི་བཟད་པ་ཡིན་པར་ཐལ་པར་འགྱུར་ཏེ། ཕྱིན་ཅི་ལོག་ཏུ་དམིགས་པའི་ཕྱིར་རོ། །སེམས་གཡེངས་པའི་ཤེས་པ་ནི་ལས་ནུས་པ་མ་ཡིན་པར་ཐལ་བར་འགྱུར་ཏེ། འཁྲུགས་པ་ཡིན་པའི་ཕྱིར་ར། །ཡོངས་སུ་མ་རྫོགས་པ་ནི་བྱིས་པ་གཞོན་ནུ་ལ་སོགས་པ་ཡིན་ཏེ། འགའ་ཞིག་ཡོངས་སུ་གཅོད་པའི་ཕྱིར་རོ། །མི་གསལ་བ་ནི་ལེ་ལོ་དང་རྨུགས་པ་དང་གཉིད་ལ་སོགས་པ་དང་མཚུངས་པར་ལྡན་པ་ཡིན་ཏེ། དེ་དག་གིས་དེ་དག་གསལ་བར་ཡོངས་སུ་མི་གཅོད་པའི་ཕྱིར་རོ། །དེ་ལྟར་འདོད་ན་ནི་རྣམ་པར་ཤེས་པ་ཞེས་བྱ་བ་ནི་ཤེས་པའི་བྱེ་བྲག་ཁོ་ན་ཡིན་པར་འགྱུར་རོ་ཞེས་བྱ་བ་ནི་ཇི་སྐད་དུ་བསྟན་པ་དེ་དག་ནི་ཤེས་པའི་བྱེ་བྲག་གཞན་འགའ་ཞིག་ཡིན་གྱི་སེམས་ནི་མ་ཡིན་ནོ། །ཅི་ཉེས་ཤེ་ན། དེའི་ཕྱིར་ཤེས་པ་དང་རྣམ་པར་ཤེས་པ་གཉིས་མཚུངས་པར་ལྡན་པར་ཡང་མི་འགྱུར་རོ་ཞེས་སྨྲས་ཏེ། རྫས་མཉམ་པ་ཉིད་དང་འགལ་བའི་ཕྱིར་ཏེ་ཤེས་པ་ནི་ཤེས་རབ་ཀྱི་རང་བཞིན་ཡང་ཡིན། རྣམ་པར་ཤེས་པ་ཡང་ཡིན་པས་སོ། །རྣམ་པར་ཤེས་པ་ཉིད་སེམས་ཡིན་གྱི་རྣམ་པར་ཤེས་པ་སེམས་ལས་བྱུང་བ་ཡིན་པར་མི་འགྲུབ་སྟེ། རྣམ་པར་ཤེས་པའི་མཚན་ཉིད་སེམས་དང་མཚུངས་པར་ལྡན་པ་མ་ཡིན་པའི་ཕྱིར་རོ། །ཤེས་པ་ཞེས་བྱ་བ་སེམས་ལས་བྱུང་བའི་ཆོས་ཀྱང་འདུ་བྱེད་ཀྱི་ཕུང་པོར་བསྡུས་པར་མི་འགྱུར་རོ་ཞེས་བྱ་བ་ནི་སེམས་དང་ཡིད་དང་རྣམ་པར་ཤེས་པ་ཞེས་བྱ་བ་ནི་རྣམ་གྲངས་ཡིན་པའི་ཕྱིར་དང༌། རྣམ་པར་ཤེས་པའི་ཕུང་པོར་བསྡུས་པ་ཡིན་པའི་ཕྱིར། འདུ་བྱེད་ཀྱི་ཕུང་པོར་བསྡུས་པ་ཐོབ་པ་མ་ཡིན་ནོ། །ཤེས་པའི་རང་གི་ངོ་བོ་ནི་རྣམ་པར་ཤེས་པ་ཡིན་པར་འགྱུར་ལ། དེ་ཡང་རྣམ་པར་ཤེས་པའི་ཕུང་པོར་ཡིན་ཏེ། ཤེས་པ་ནི་རྣམ་པར་ཤེས་པའི་ཕུང་པོར་བསྡུས་པ་ཐལ་བར་འགྱུར་བ་དང༌། འདི་ལྟ་སྟེ་ཤེས་པ་དང་རྣམ་པར་ཤེས་པ་གཉིས་མཚུངས་པར་མི་ལྡན་པ་དང་ཤེས་པ་ཞེས་བྱ་བ་སེམས་ལས་བྱུང་བའི་ཆོས་ཀྱང་འདུ་བྱེད་ཀྱི་ཕུང་པོར་བསྡུས་པར་མི་འགྱུར་ལ། དེ་ལྟ་བུ་གྲུབ་པ་ནི་གྲུབ་པའི་མཐའ་ཡང་མ་ཡིན་ནོ། །དེ་བས་ན་ཤེས་པ་ལས་རྣམ་པར་ཤེས་པ་རིགས་པ་གཞན་ཡིན་ཞེས་བྱ་སྟེ། སྔོན་མ་བྱུང་བ་ཤེས་པ་རྣམ་པར་ཤེས་པ་ཡིན་ཞེས་བྱ་བ་ནི་མེད་པ་ཡིན་ནོ་ཞེས་སྟོན་ཏོ། །དཔེར་ན་བྲེ་ལས་གཞལ་མེད་ཁང་དང་ཞེས་
བྱ་བ་ནི་སྔོན་མ་བྱུང་བ་བྲེ་ཉིད་གཞལ་མེད་ཁང་ཡིན་ནོ་ཞེས་ངེས་པར་བྱར་མི་རུང་སྟེ། འོ་ན་ཅི་ཞེ་ན། རིགས་ཐ་དད་པ་ཉིད་ཡིན་ཏེ། སྣོད་གང་གིས་འཇལ་བ་དེ་ནི་བྲེ་དང་བྲེའུ་ཆུང་ལ་སོགས་པ་ཡིན་ནོ། །ལྷ་ལ་སོགས་པའི་ཁང་པ་ནི་གཞལ་མེད་ཁང་ངོ༌། །མུ་ཏིག་གི་ཆུན་པོ་ལས་གཙུག་ལག་ཁང་ལྟ་བུའོ་ཞེས་བྱ་བ་ཅི་ཞེ་ན། རིགས་ཐ་དད་པ་ཡིན་ནོ་ཞེས་སྐབས་དང་སྦྱར་རོ། །སྔོན་མ་བྱུང་བ་མུ་ཏིག་གི་ཆུན་པོ་ཉིད་གཙུག་ལག་ཁང་ཡིན་པ་མེད་དེ། མུ་ཏིག་གི་ཆུན་པོ་ནི་སྐུད་པས་བརྒྱུས་པའི་མུ་ཏིག་གི་ཚོགས་སོ། །གཙུག་ལག་ཁང་ནི་སྡོམ་བརྩོན་རྣམས་ཀྱི་གནས་ཡིན་ནོ། མིང་དང་གཟུགས་ཞེས་བྱ་བ་བསྟན་ཟིན་ཏོ། །འབྱུང་བ་ཆེན་པོ་བཞི་ནི་ས་དང༌། ཆུ་དང༌། མེ་དང༌། རླུང་གི་ཁམས་རྣམས་ཏེ་ཞེས་བྱ་བ་ལ་ཁམས་སྨོས་པས་ནི་ཁ་དོག་དང་དབྱིབས་གསལ་བའི་ཕྱིར་རོ། །སྲ་བ་དང་གཤེར་བ་དང་དྲོ་བ་དང་གཡོ་བའི་མཚན་ཉིད་དོ་ཞེས་བྱ་བ་ལ། སྲ་བ་ནི་སའི་ཁམས་སོ། །གཤེར་བ་ནི་ཆུའི་ཁམས་སོ། །དྲོ་བ་ནི་མེའི་ཁམས་སོ། །གཡོ་བ་ནི་རླུང་གི་ཁམས་ཏེ་གསུམ་ནི་རང་གི་ངོ་བོ་ཉིད་མཚན་ཉིད་དུ་བསྟན་ཏེ། དེ་མཚོན་པར་བྱེད་པས་མཚན་ཉིད་དོ་ཞེས་བྱ་བའི་ཕྱིར་རོ། །རླུང་གི་ཁམས་ནི་ཉེ་བར་མཚོན་པར་བྱེད་པའི་མཚན་ཉིད་དུ་བསྟན་ཏོ། །ཡང་བ་ཉིད་ཀྱི་མཚན་ཉིད་ནི་རླུང་གི་ཁམས་ཡིན་ཏེ། །དེ་ཡང་བ་ཉིད་ཡིན་པའི་ཕྱིར་རོ། །ཡང་བ་ཉིད་ནི་རྒྱུར་བྱས་པའི་གཟུགས་ལ་ཡང་ཡོད་དེ། དེ་བས་ན་གཡོ་བའི་མཚན་ཉིད་ནི་རླུང་གི་ཁམས་སོ་ཞེས་དེའི་ལས་ཀྱི་བྱེ་བྲག་ཏུ་བྱས་ཏེ། འབྱུང་བ་དང་འབྱུང་བ་འདུས་པ་རྣམས་ཡུལ་གཞན་དུ་ཕྱིན་པའི་རྒྱུ་ཡིན་པའི་ཕྱིར་རོ། །རྒྱུར་བྱས་པའི་གཟུགས་ནི་ཞེས་རྒྱས་པར་འབྱུང་བ་དེ་ལ་མིག་གི་དབང་པོ་ནི་མིག་གི་རྣམ་པར་ཤེས་པའི་རྟེན་གཟུགས་དང་བའོ་ཞེས་བྱ་བ་ནས། ལུས་ཀྱི་དང་པོ་ནི་ལུས་ཀྱི་རྣམ་པར་ཤེས་པའི་རྟེན་གཟུགས་དང་པའོ་ཞེས་བྱ་བའི་བར་དུའོ། །དེའི་ཡུལ་ཡང་ཞེས་རྒྱས་པར་འབྱུང་བ་ལ། དེའི་ཡུལ་ནི་མིག་ལ་སོགས་པའི་དབང་པོའི་ཡུལ་ཞེས་བྱ་བའི་དོན་ཏོ། །དེ་ལ་གཟུགས་ནི་སྔོན་པོ་ལ་སོགས་པར་རྣམ་པ་བཞི་དང༌། དེ་དག་གི་རྣམ་པར་དབྱེ་བ་གྱུར་པ་གཞན་ཡང་ངོ༌། །ཁ་ཅིག་ནི་གཟུགས་རྣམ་པ་གཉིས་སུ་བརྗོད་དེ་ཁ་དོག་དང་དབྱིབས་སོ། །
དེ་ལ་ཁ་དོག་ནི་སྔ་མ་བཞིན་ནོ། །དབྱིབས་ནི་རྣམ་པ་བརྒྱད་དེ། རིང་བ་དང༌། ཐུང་ངུ་དང༌། གྲུ་བཞི་དང༌། ཀུན་དུ་དཀྱིལ་འཁོར་དང༌། ཕྱལ་ལེ་བ་དང༌། ཕྱལ་ལེ་བ་མ་ཡིན་པ་དང༌། མཐོན་པོ་དང་དམའ་བའོ། །མཚན་ཉིད་ཀྱང་ཡང་རྣམ་པ་ཉི་ཤུར་བརྗོད་དེ། ཇི་ལྟར་ཆོས་མངོན་པ་མཛོད་པས་འབྱུང་བ་བཞིན་ནོ། །སྒྲ་ནི་རྣམ་པ་བརྒྱད་དེ། ཟིན་པའི་འབྱུང་བ་ཆེན་པོའི་རྒྱུ་ལས་བྱུང་བ་དང༌། མ་ཟིན་པའི་འབྱུང་བ་དང༌། སེམས་ཅན་དུ་སྟོན་པ་དང༌། སེམས་ཅན་དུ་སྟོན་པ་མ་ཡིན་པ་རྣམས་ཡིད་དུ་འོང་བ་དང༌། ཡིད་དུ་འོང་བ་མ་ཡིན་པའི་དབྱེ་བས་རྣམ་པ་བརྒྱད་དོ། །དྲི་ནི་བཞི་སྟེ། དྲི་ཞིམ་པ་དང༌། དྲི་ང་བ་དང༌། དྲི་མཉམ་པ་དང༌། དྲི་མི་མཉམ་པའོ། །ཁ་ཅིག་གསུམ་དུ་བརྗོད་དོ། །དྲི་ཞིམ་པ་དང༌། དྲི་ཞིམ་པ་མ་ཡིན་པ་དང་ཐ་མལ་པའོ། །རོ་ནི་དྲུག་སྟེ་མངར་བ་དང༌། སྐྱུར་བ་དང༌། ལན་ཚྭ་དང༌། ཚ་བ་དང༌། ཁ་བ་དང༌། བསྐ་བའི་དབྱེ་བས་སོ། །རེག་བྱ་ནི་འབྱུང་བ་ཆེན་པོ་བཞི་མ་གཏོགས་པར་རྣམ་པ་བདུན་ཏེ། འཇམ་པ་ཉིད་དང༌། རྩུབ་པ་ཉིད་དང༌། ཡང་བ་ཉིད་དང༌། དྲོ་བ་ཉིད་དང༌། བཀྲེས་པ་ཉིད་དང༌། སྐོམ་པའོ། །འབྱུང་བ་ཆེན་པོ་མ་གཏོགས་པར་ཞེས་སྨོས་པ་ནི་རྒྱུར་བྱས་པའི་མཚན་ཉིད་ཀྱི་སྐབས་ཡིན་པའི་ཕྱིར་རོ། །ཡིད་ཀྱི་ཡུལ་ཡང་རྣམ་པར་རིག་བྱེད་མ་ཡིན་པའོ་ཞེས་བྱ་བ་ནི་ཆོས་ཀྱི་སྐྱེ་མཆེད་པ་སྡོམ་པ་ལ་སོགས་པའི་གཟུགས་སོ། །འདིར་ལུས་ཀྱི་དབང་པོ་དང༌། གཟུགས་དང༌། དྲི་དང༌། རོ་དང༌། རེག་བྱའི་ཕྱོགས་གཅིག་ཡིན་པར་རིག་པར་བྱའོ་ཞེས་བྱ་བ་ལ། རྣམ་པར་ཤེས་པའི་རྐྱེན་གྱིས་མིང་དང་གཟུགས་ཡིན་པ་འདིར་མིག་ལ་སོགས་པ་ནི་དེའི་ཚེ་མངོན་པར་མ་གྲུབ་པའི་ཕྱིར་རོ། །ལུས་ཀྱི་དབང་པོ་ཁོ་ན་ཡོད་དེ་གཞན་མ་ཡིན་ནོ། །སྒྲ་ནི་གནས་སྐབས་མ་ངེས་པ་ཡིན་པའི་ཕྱིར་གཟུགས་དང༌། དྲི་དང༌། རོ་ཉི་ཚེ་སྟོན་གྱི་སྒྲ་མ་ཡིན་ནོ། །དེའི་ཚེ་བཀྲེས་པ་དང༌། སྐོམ་པ་ཡང་མེད་པའི་ཕྱིར་རེག་བྱའི་ཕྱོགས་གཅིག་སྨོས་པ་ཡིན་ནོ། །གཉིས་གཅིག་ཏུ་སྟོན་པ་ནི་ཞེས་བྱ་བ་ནི་མིང་དང་གཟུགས་ནི་མིང་དང་གཟུགས་སོ། །གཞན་དུ་ཚིག་སྦྱོར་བའི་རྟོག་པ་བསལ་བའི་ཕྱིར་རོ་ཞེས་བྱ་བ་ནི་མིང་མཚན་ཉིད་གཟུགས་ཡིན་པས་མིང་དང་གཟུགས་སོ་ཞེས་ཚིག་སྦྱོར་ན་ནི། རྣམ་པར་ཤེས་པའི་རྐྱེན་གྱིས་མིང་ཙམ་ཡིན་པར་ངེས་པར་
འགྱུར་གྱི། གཟུགས་ནི་མ་ཡིན་ནོ། །མིང་གི་ཕྱིར་གཟུགས་དང་མིང་གི་གཟུགས་སོ་ཞེས་ཚིག་སྦྱོར་ན་ནི་གནས་སུ་གྱུར་བའི་གཟུགས་ཙམ་ཞིག་རྣམ་པར་ཤེས་པའི་རྐྱེན་གྱིས་ཡིན་པར་གྲགས་པར་འགྱུར་རོ། །མིང་གི་གཞི་ལ་གཟུགས་དང༌། མིང་ལ་གཟུགས་དང༌། མིང་གིས་གཟུགས་ཞེས་ཚིག་སྦྱོར་བ་ནི་དེ་བཞིན་དུ་ཚིག་ཙམ་ཞིག་གྲགས་པར་འགྱུར་རོ། །གཟུགས་ཀྱི་མིང་འདི་ཡིན་བས་མིང་དང་གཟུགས་སོ་ཞེས་ཚིག་སྦྱོར་བ་དང༌། མིང་ལས་གཟུགས་སོ་ཞེ་ན། ཇི་ལྟར་བརྗོད་པར་བྱ་ཇི་ལྟར་ན་ཡང་དེ་ལས་གཞན་པའི་གཟུགས་ཡིན་ཏེ། དེ་ཙམ་ཞིག་རྣམ་པར་ཤེས་པའི་རྐྱེན་གྱིས་ཡིན་པར་གྲགས་པར་འགྱུར་གྱི་མིང་ནི་མ་ཡིན་ནོ། །སྐྱེས་པའི་སྐད་ཅིག་མ་ཕྱི་མ་རྣམས་མིང་དང་གཟུགས་ཀྱི་རྐྱེན་གྱིས་མིང་དང་གཟུགས་མ་ཡིན་ནམ་ཞེས་རྒྱས་པར་འབྱུང་བ་ནི་རྒྱུ་ཅན་ཡིན་ལ། དེ་ལ་སྐད་ཅིག་མ་དང་པོ་ཁོ་ནའི་རྐྱེན་ནི་རྣམ་པར་ཤེས་པ་ཡིན་གྱི་སྐད་ཅིག་མ་གཉིས་པ་རྣམས་ཀྱི་ནི་མ་ཡིན་ནོ། །དེ་དག་ཀྱང་སྔ་མ་ལ་བརྟེན་ནས་འབྱུང་བ་ཡིན་པས། མིང་དང་གཟུགས་ཉིད་ཀྱི་རྐྱེན་གྱིས་མིང་དང་གཟུགས་མ་ཡིན་ནམ། ཇི་ལྟར་དེ་དག་རྣམ་པར་ཤེས་པའི་རྐྱེན་གྱིས་ཡིན་ཞེས་བྱ་ཞེ་ན། རང་གི་རིགས་སྐད་ཅིག་མ་གཞན་ཡན་ལག་གི་རྐྱེན་གྱི་དངོས་པོར་ནི་འདིར་བརྗོད་པར་བཞེད་པ་མ་ཡིན་གྱི་ཞེས་རྒྱས་པར་འབྱུང་བ་ལ། འདིར་ཞེས་བྱ་བ་ནི་རྟེན་ཅིང་འབྲེལ་བར་འབྱུང་བའི་མདོ་སྡེ་འདིར་ཡན་ལག་རྣམས་ཀྱི་རང་གི་རིགས་རྐྱེན་གྱི་དངོས་པོར་བརྗོད་པར་བཞེད་པ་མ་ཡིན་ན་ནི་སྐད་ཅིག་མ་གཞན་རྐྱེན་གྱི་དངོས་པོར་མ་ཡིན་ནོ། །འོ་ན་ཇི་ལྟ་བུ་ཞེ་ན། རིགས་དང་མི་མཐུན་པ་རྐྱེན་གྱི་དངོས་པོར་ཡིན་ནོ། །ཡང་ན། རང་གི་རིགས་སྐད་ཅིག་མ་གཞན་རྐྱེན་གྱི་དངོས་པོ་ནི་རང་གི་རིགས་ཀྱི་སྐད་ཅིག་མ་གཞན་གྱི་རྐྱེན་དེའི་དངོས་པོ་སྟེ། རང་གི་རིགས་ཀྱི་སྐད་ཅིག་མ་གཞན་གྱི་རྐྱེན་གྱི་དངོས་པོའོ། །ཡང་ན་རང་གི་རིགས་ཀྱི་སྐད་ཅིག་མ་གཞན་ལ་རྐྱེན་རྣམས་ཀྱི་དངོས་པོ་ནི་རང་གི་རིགས་སྐད་ཅིག་མ་གཞན་རྐྱེན་གྱི་དངོས་པོ་སྟེ། དེ་འདིར་བརྗོད་པར་བཞེད་པ་མ་ཡིན་ནོ། །དེ་ཉིད་ཀྱི་ཕྱིར། ཁྱད་པར་ཅན་གྱི་རྫས་གཞན་རྐྱེན་གྱི་དངོས་པོར་བརྗོད་པར་བཞེད་པ་ཡིན་པས་དང་པོར་སྐྱེ་བ་ཉིད་ཀྱི་རྐྱེན་ཡིན་པར་བསྟན་
གྱི་ཞེས་བྱ་བ་ནི་ཁྱད་པར་ཅན་གྱི་རྫས་གཞན་རྐྱེན་གྱི་དངོས་པོར་གཞག་པ་ཡིན་ནོ། །སྐྱེས་པའི་རྒྱུན་གྱི་རྐྱེན་ནི་མ་ཡིན་ནོ་ཞེས་བྱ་བ་ནི་རང་གི་རིགས་ཀྱི་སྐད་ཅིག་མ་གཞན་གྱི་རྐྱེན་གྱི་དངོས་པོར་གཞག་པ་མ་ཡིན་ནོ། །དེ་ལྟ་མ་ཡིན་ན་མ་རིག་པ་ཡང་མ་རིག་པའི་རྐྱེན་ཡིན་པར་ཞེས་རྒྱས་པར་འབྱུང་བ་ནི་དེ་ལྟ་མ་ཡིན་ཏེ། གལ་ཏེ་སྐད་ཅིག་མ་གཞན་གྱི་རྐྱེན་དུ་རང་གི་རིགས་ཡིན་པར་བརྗོད་པར་བཞེད་པར་གྱུར་ན་ནི། མ་རིག་པ་ཡང་མ་རིག་པའི་རྐྱེན་ཡིན་པར་བརྗོད་པར་བྱ་དགོས་པར་འགྱུར་ཏེ། འདི་ལྟར་མ་རིག་པ་ཐམས་ཅད་མ་རིག་པའི་རྐྱེན་ཡིན་ཏེ། ཇི་སྐད་དུ་མ་རིག་པའི་རྐྱེན་ནི་རང་གི་རིགས་ཡིན་ཏེ། རྨོངས་པ་ཁོ་ན་ལས་དེ་སྐྱེ་བར་འགྱུར་རོ་ཞེས་རྒྱས་པར་གསུངས་པ་ཡིན་ནོ། །རྣམ་པར་ཤེས་པ་ཡང་རྣམ་པར་ཤེས་པའི་རྐྱེན་ཡིན་པར་ཅི་ཞེ་ན། བརྗོད་པར་བྱ་དགོས་པར་འགྱུར་ཞེས་བྱ་བའོ། །གལ་ཏེ་སྐད་ཅིག་མ་གཞན་གྱི་ཡན་ལག་གི་རྐྱེན་རང་གི་རིགས་ཡིན་པར་འདིར་བརྗོད་པར་བཞེད་པས་སྐད་ཅིག་མ་གཉིས་པ་ལ་སོགས་པ་གཞན་གྱི་རྐྱེན་ནི་རྣམ་པར་ཤེས་པ་ཉིད་ཡིན་པས། འདུ་བྱེད་ཀྱི་དགོས་པའི་སྐད་ཅིག་མ་དང་པོ་ནི་འོག་མའི་རྐྱེན་ཡིན་པར་བརྗོད་པར་བྱ་དགོས་པར་འགྱུར་རོ། །ཡང་ན་དེ་ལྟ་མ་ཡིན་ན་ཞེས་བྱ་བ་ནི་གལ་ཏེ་རྒྱུན་སྐྱེ་བའི་རྐྱེན་ཡིན་པར་བརྗོད་པར་བཞེད་ན་ཞེས་བྱ་བ་ཡིན་ནོ། །འགྱུར་བས་ན་མིང་ཞེས་བྱ་སྟེ་ཞེས་བྱ་བ་ནི་ཡོངས་སུ་འགྱུར་ཞེས་བྱ་བའི་ཐ་ཚིག་གོ །དེ་ཉིད་ཀྱི་ཕྱིར། དམིགས་པ་དང་རྣམ་པ་དང་རབ་ཏུ་དབྱེ་བའི་བྱེ་བྲག་གིས་རྒྱུན་མི་འཆད་པར་དེའི་རྒྱུན་ཡོངས་སུ་འགྱུར་བའི་ཕྱིར་རོ་ཞེས་སྨྲས་ཏེ། དེ་ལ་དམིགས་པའི་བྱེ་བྲག་ནི་གཟུགས་དང་སྒྲ་དང་དྲི་དང་རོ་དང་རེག་བྱ་དང་ཆོས་རྣམས་དམིགས་པའི་བྱེ་བྲག་ཡིན་པར་རིག་པར་བྱའོ། །རྣམ་པའི་བྱེ་བྲག་ནི་གཟུགས་ལ་སོགས་པ་དེ་དག་ཉིད་ཀྱི་སྔོན་པོ་དང་སེར་པོ་ལ་སོགས་པའི་རྣམ་པའི་བྱེ་བྲག་གིས་སོ། །རབ་ཏུ་དབྱེ་བའི་བྱེ་བྲག་ནི་ཆུང་དུ་དང༌། འབྲིང་དང༌། ཆེན་པོའི་རང་གི་ངོ་བོའི་བྱེ་བྲག་གིས་སོ། །ཡང་ན་དགེ་བ་དང༌། མི་དགེ་བ་དང༌། ལུང་དུ་མ་བསྟན་པའི་བྱེ་བྲག་གིས་ཡིན་པར་རིག་པར་བྱའོ། །ཤི་སྟེ་གཟུགས་ཀྱི་ལུས་བོར་ནས། །ཞེས་རྒྱས་པར་འབྱུང་བ་ནི་ཤི་སྟེ་གཟུགས་ཀྱི་ལུས་འདི་ཉིད་བོར་བ་སྐྱེ་བ་གཞན་གྱི་དངོས་པོར་ཡོངས་སུ་འགྱུར་བ་ཡིན་ནོ། །མིང་གི་
རྒྱུན་ལ་ནི་དད་པ་དང༌། ཚུལ་ཁྲིམས་དང༌། ཐོས་པ་དང༌། གཏོང་བ་དང༌། ཤེས་རབ་ཡོངས་སུ་བསྒོས་པས་སྐྱེ་བ་གཞན་གྱི་དངོས་པོར་ཡོངས་སུ་འགྱུར་ཏེ། དེ་ལ་ཡང་སྲིད་ཀྱི་རྒྱུ་ལས་དང་ཉོན་མོངས་པས་ཡོངས་སུ་བསྒོས་པའི་ཕྱིར་རོ། །ཡོངས་སུ་འགྱུར་བ་ནི་གཞན་དུ་སྐྱེ་བ་ཡིན་པར་རིག་པར་བྱའོ། །གྲངས་ཅན་རྣམས་ཀྱི་གནས་པའི་རྫས་ཀྱི་ཆོས་གཞན་ལོག་ན་ཆོས་གཞན་འབྱུང་བ་ནི་ཡོངས་སུ་འགྱུར་བ་ཡིན་ནོ་ཞེས་བྱ་བ་ལྟ་བུ་མ་ཡིན་ནོ། །འོ་ན་གང་སེམས་དང་མི་ལྡན་པའི་འདུ་བྱེད་ཚིག་བླ་དགས་མིང་ཞེས་རྒྱས་པར་འབྱུང་བ་ནི་ཚིག་གིས་ཆེད་དུ་བྱས་པ་ནི་ཚིག་བླ་དགས་ཡིན་ཏེ། ཇི་སྐད་དུ། ངག་ནི་མིང་ལ་བརྟེན་པ་ཡིན། །ཞེས་བསྟན་པ་ལྟ་བུའོ། །ཡང་ན་ལྷག་པའི་ཚིག་ནི་བླ་དགས་ཏེ། ངག་ནི་ཡིད་ཀྱི་བརྗོད་པ་ལས་གཞན་ཡིན་པའི་ཕྱིར་རོ། །ཇི་སྐད་དུ་བསྟན་པ་ཞེས་རྒྱས་པར་འབྱུང་བ་ནི་ཕུང་པོ་བཞི་པ་དེ་དག་ཇི་སྐད་དུ་བསྟན་པ་ནི། འདས་པ་དང༌། མ་འོངས་པའི་དམིགས་པ་གཞན་བསྐལ་པ་རྣམས་ལ་ཡང་མིང་གིས་འདུད་པར་བྱེད་པས་མིང་ཞེས་བྱའོ་ཞེས་བྱ་བ་ཡིན་ཏེ། མིང་གིས་འདུད་པར་བྱེད་པ་ནི་གཞན་དུ་སྐྱེ་བར་བྱེད་ཅེས་བྱ་བའི་ཐ་ཚིག་གོ །ཡང་ན་འདུད་པར་བྱེད་པ་བཞིན་དུ་འདུད་པར་བྱེད་པས་ཏེ། འདས་པ་དང་མ་འོངས་པ་ལ་སོགས་པ་ལ་གཏོད་པར་བྱེད་པའི་ཕྱིར་ཏེ་ཕྱིན་པར་བྱེད་ཅེས་བྱ་བའི་དོན་གང་ཡིན་པའོ། །བསྐལ་པ་རྣམས་ལ་ཡང་ཞེས་བྱ་བའི་སྒྲས་ནི་ད་ལྟར་བྱུང་བ་ཉེ་བའི་དམིགས་པ་ལ་ཡང་ངེས་པར་བྱེད་པ་སྟེ། གང་དུ་མིང་ཐོས་པ་ཙམ་གྱིས་ཀྱང་མངོན་སུམ་མ་ཡིན་པ་ལ་ཡང་རྣམ་པར་ཤེས་པ་སྐྱེ་ཞེས་བྱ་བ་ཡིན་ནོ། །མིག་གི་ཡུལ་ནི་གཟུགས་ཞེས་འཇིག་རྟེན་ན་གྲགས་ན་ཞེས་བྱ་བ་ནི་སྔོན་པོ་ལ་སོགས་པའོ། །འདིར་འབྱུང་བ་དང་འབྱུང་བ་ལས་གྱུར་པ་ཐམས་ཅད་ལ་ཅིའི་ཕྱིར་གཟུགས་ཞེས་བྱ་ཞེ་ན་ཞེས་བྱ་བ་ནི་གསུངས་རབ་འདིར་རམ། རྟེན་ཅིང་འབྲེལ་པར་འབྱུང་བའི་མདོ་སྡེ་འདིར་གཟུགས་གང་ཡིན་པ་ཅི་ཡང་རུང་སྟེ། དེ་ཐམས་ཅད་འབྱུང་བ་ཆེན་པོ་བཞི་དང༌། འབྱུང་བ་ཆེན་པོ་བཞི་དག་རྒྱུར་བྱས་པའོ་ཞེས་བྱ་བ་ལའོ། །དེའི་ཕྱིར། གནོད་པར་གྱུར་པ་དེ་བས་ན་གཟུགས་ཞེས་མདོ་གཞན་ལས་བསྟན་ཏེ་ཞེས་བྱ་བ་ནི་དགེ་སློང་དེ་དག་གནོད་
པར་གྱུར་པ་དེ་བས་ན་གཟུགས་ཉེ་བར་ལེན་པའི་ཕུང་པོ་ཞེས་བྱའོ། །ཅིས་གནོད་པར་གྱུར་ཅེ་ན། ལག་པའི་འདུས་ཏེ་རེག་པ་དང༌། དབྱུག་པའི་འདུས་ཏེ་རེག་པས་ཀྱང་ཞེས་རྒྱས་པར་འབྱུང་བ་ཡིན་ན། །གཟུགས་ཞེས་བྱ་བ་ནི་གནོད་པར་གྱུར་པ་ཞེས་བྱའོ་ཞེས་བྱ་བ་ནི་རྣམ་པར་གྱུར་བ་ཞེས་བྱ་བའི་དོན་གང་ཡིན་པ་ཡིན་གྱི། སྡུག་བསྔལ་གྱི་ཚོར་བ་བསྐྱེད་པས་གནོད་པར་གྱུར་པ་ནི་མ་ཡིན་ནོ། །ནད་པ་གཉིད་ནི་ག་ལ་ཡོད། །ཐུག་རྔུས་ཟུག་བཞིན་གནོད་པར་འགྱུར། །ཞེས་བྱ་བར་མངོན་པ་ཡིན་ཏེ། ཇི་ལྟར་ཟུག་རྔུས་ཟུག་པ་བཞིན་དུ་གནོད་པར་འགྱུར། །ཞེས་བྱ་བར་མངོན་པ་ཡིན་ནོ། །འབྱུང་བ་དང་འབྱུང་བ་ལས་གྱུར་པ་ལ་ཅིས་གནོད་ཅེ་ན་ཞེས་བྱ་བ་ནི་སེམས་པ་མེད་པ་ལ་སྡུག་བསྔལ་གྱི་ཚོར་བ་མེད་པའི་ཕྱིར་རོ་ཞེས་བསམ་པའོ། །དེའི་ཕྱིར་ལག་པའི་འདུས་ཏེ་རེག་པ་ལ་སོགས་པས་གཞན་དུ་འགྱུར་པར་བྱས་པའོ་ཞེས་སྨྲས་པའོ། །གཟུགས་ན་སྤྱོད་པ་དག་ལ་ཇི་ལྟར་གནོད་པར་འགྱུར། །ཞེས་བྱ་བ་ནི་དེ་དག་ནི་བསལ་བ་ཡིན་པའི་ཕྱིར་ལག་པ་དང་དབྱུག་པ་དང་བོང་བའི་འདུས་ཏེ་རེག་པས་རྣམ་པར་གྱུར་པར་བྱར་མི་ནུས་སོ། །དེའི་ཕྱིར་དེའི་ས་པའི་མེས་ཞེས་སྨྲས་ཏེ། འཇིག་པའི་དུས་ཀྱི་ཚེ་ཞེས་བྱ་བར་རིག་པར་བྱའོ། །སེམས་ཅན་གྱི་གྲངས་སུ་གཏོགས་པ་ལ་ཇི་ལྟར་ཡིན་ཏེ། སྣོད་ཀྱི་འཇིག་རྟེན་ཉིད་ན་མེས་འཇིག་པར་འགྱུར་གྱི། སེམས་ཅན་གྱི་འཇིག་རྟེན་ནི་མ་ཡིན་ཏེ། རྫུས་ཏེ་སྐྱེས་པ་རྣམས་ལ་ལུས་ཤི་བ་མེད་པའི་ཕྱིར་རོ་ཞེ་ན། དེ་ཉིད་ཀྱི་ཕྱིར་དེ་ཉིད་ཀྱི་མེས་ཞེས་སྨྲས་ཏེ། ཅི་ཞེ་ན། གནོད་པར་བྱར་ནུས་ཞེས་འོག་ཉིད་ནས་འཆད་དེ་སྣོད་ཀྱི་འཇིག་རྟེན་གྱི་གྲངས་སུ་གཏོགས་པའི་གཟུགས་དེ་དག་ཀྱང༌། གལ་ཏེ་ཕྲད་ན་གནོད་པར་བྱར་ནུས་པ་དག་གཟུགས་ཀྱི་མཚན་ཉིད་འཐོབ་པའི་ཕྱིར་གཟུགས་ཞེས་བརྗོད་དོ། །མཐུ་ཁྱད་པར་ཅན་དང་ལྡན་པས་གནོད་པར་གྱུར་པའི་ཕྱིར་རོ་ཞེས་བྱ་སྟེ། ཁམས་གསུམ་གྱི་འདོད་ཆགས་དང་བྲལ་བརྫུ་འཕྲུལ་དང་ལྡན་པ་ཞེས་བྱ་བའི་ཐ་ཚིག་གོ །ཇི་ལྟར་མེས་ཇི་ལྟ་བ་དེ་བཞིན་དུ་ཆུ་དང་རླུང་གིས་ཀྱང་དེ་དག་འཇིག་པའི་དུས་ཀྱི་ཚེ་གནོད་པར་འགྱུར་ཞིང་གནོད་པར་བྱར་ཡང་ནུས་པའི་ཕྱིར་གཟུགས་ཞེས་བྱའོ། །གནོད་པར་བྱར་མེད་པ་ཡིན་ཡང་ཞེས་རྒྱས་པར་འབྱུང་བ་ནི་
བསམ་གཏན་བཞི་པའི་ས་པ་དང༌། པར་མ་དོའི་སྲིད་པའི་གཟུགས་ལ་སོགས་པ་རྣམས་གནོད་པར་བྱར་མེད་པ་ཡིན་ཡང༌། དེའི་རིགས་ཡིན་པའི་ཕྱིར་ཏེ། གནོད་པར་བྱར་མེད་དུ་ཟིན་ཀྱང་གཟུགས་ཀྱི་རིགས་ཡིན་པའི་ཕྱིར་གཟུགས་ཞེས་བྱའོ། །སངས་རྒྱས་ཀྱི་སྤྲུལ་པ་བཞིན་ནོ་ཞེས་བྱ་བ་ནི་ཇི་ལྟར་སངས་རྒྱས་ཀྱི་སྤྲུལ་པ་རྣམས་ལ་གནོད་པ་བྱར་མེད་དུ་ཟིན་ཀྱང་དེའི་རིགས་ཡིན་པའི་ཕྱིར་གཟུགས་ཞེས་བྱའོ། །སྲིད་པ་བར་མའི་གཟུགས་ཀྱང་མཐུ་ཁྱད་པར་ཅན་དང་ལྡན་པས་ཀྱང་གནོད་པར་བྱར་མི་ནུས་སོ། །བསམ་གཏན་བཞི་པའི་གཟུགས་ནི་དེ་དག་བསྐལ་པས་འཇིག་པ་མེད་པའི་ཕྱིར་གནོད་པར་བྱར་མེད་དུ་ཟིན་ཀྱང་དེའི་རིགས་ཡིན་པའི་ཕྱིར་རོ་ཞེས་བསྟན་ཏོ། །གཞན་དག་ན་རེ་གཟུགས་ཞེས་བྱ་བ་ནི་གགས་བྱེད་པ་ཡིན་ནོ་ཞེའོ་ཞེས་བྱ་བ་ནི་ལག་པ་དང༌། དབྱུག་པ་དང་བོང་བ་ལ་སོགས་པས་རང་གི་ཡུལ་དུ་འབྱུང་བའི་གགས་བྱེད་པའི་མཚན་ཉིད་དེ་ཐོགས་པར་བྱེད་པ་ནི་གཟུགས་ཡིན་གྱི། གནོད་པས་ནི་མ་ཡིན་ནོ། །དེའི་ཕྱིར་ཚིགས་སུ་བཅད་པ་དེ་གཉིས་དང་ཡང་མི་འབྱོར་པ་ཡིན་ནོ་ཞེས་སྨྲས་ཏེ། གཟུགས་ཀྱི་མཚན་ཉིད་ཀྱི་ཚིགས་སུ་བཅད་པ་འདི་གཉིས་པོ་དེ་ནི། ནད་པ་གཉིད་ནི་ག་ལ་ཡོད། །ཅེས་རྒྱས་པར་འབྱུང་བ་དང༌། འདོད་པ་སྐྱེས་པའི་ལུས་ཅན་དེ། །ཞེས་རྒྱས་པར་འབྱུང་བ་འདི་གཉིས་དང་འདི་མི་འབྱོར་ཞིང་མི་མཐུན་པ་ཡིན་ཏེ། ཟུག་རྔུས་ཟུག་བཞིན་གནོད་པར་འགྱུར། །ཞེས་སྨྲས་པས་ནི་གགས་བྱེད་པ་ཡིན་པར་ཁོང་དུ་ཆུད་པར་བྱེད་པ་མ་ཡིན་ནོ། །འོ་ན་ཅི་ཞེ་ན། གནོད་པར་གྱུར་པ་ཡིན་ནོ་ཞེས་ཁོང་དུ་ཆུད་པར་བྱེད་པ་ཡིན་ནོ། །གཉིས་པ། ཡང་དེ་བཞིན་ནོ། །གྲང་བ་དང་དྲོ་བ་དང༌། བཀྲེས་པ་ལ་སོགས་པས་ཀྱང་ཞེས་བྱ་བ་ནི། སོགས་པའི་སྒྲས་རླུང་དང་ཆར་པ་ལ་སོགས་པས་ཀྱང་ཞེས་བྱ་སྟེ། ཅི་ཞེ་ན། གགས་བྱེད་དོ་ཞེས་བྱར་མི་རུང་སྟེ། རང་གི་ཡུལ་དུ་འབྱུང་བའི་མཚན་ཉིད་གེགས་བྱེད་པ་མེད་པའི་ཕྱིར་རོ། །རྣམ་པར་རིག་བྱེད་མ་ཡིན་པ། །ཞེས་རྒྱས་པར་འབྱུང་བ་ནི་གང་གིས་གནོད་པར་བྱེད་པའི་དོན་ནི་གཟུགས་ཀྱི་དོན་ཡིན་པ་དེའི་ནི་རྣམ་པར་རིག་བྱེད་མ་ཡིན་པའི་གཟུགས་ཀྱང་གཟུགས་ཡིན་པར་མི་འགྲུབ་སྟེ། ཐོགས་པ་མེད་ཅིང་ཡུལ་ན་མི་གནས་པ་ལ་ནི་ལག་པ་ལ་སོགས་པས་བྱར་མེད་པའི་ཕྱིར་རོ། །གང་
དག་གི་གགས་བྱེད་པ་ནི་གཟུགས་ཡིན་ནོ་ཞེས་བྱ་བ་དེའི་ཡང་མི་འགྲུབ་སྟེ། ཡུལ་ན་མི་གནས་པ་ལ་གགས་བྱེད་པ་མེད་པའི་ཕྱིར་རོ་ཞེ་ན། དེའི་ཕྱིར། རྣམ་པར་རིག་བྱེད་མ་ཡིན་པ། །ཞེས་བྱ་བ་རྫས་གཞན་དུ་ནི་ཅུང་ཟད་ཀྱང་ཡོད་པ་མ་ཡིན་གྱི། ཁས་བླངས་པ་དང་ཆོས་ཉིད་ཀྱིས་ཞེས་རྒྱས་པར་འབྱུང་བ་ནི་ཁས་བླངས་པས་ལུས་དང༌། ངག་ལྡོག་པ་ཙམ་སོ་སོར་ཐར་པའི་སྡོམ་པ་ཞེས་བྱ་བ་དེ་ཉེ་བར་བརྟགས་པའི་ཕྱིར་རོ་ཞེས་བྱ་བའི་ཕྱིར་རོ་ཞེས་བྱ་བའི་དོན་ཏོ། །དེ་བཞིན་དུ་ཁས་བླངས་པ་ཙམ་ལུས་དང་ངག་མི་ལྡོག་པ་མ་ཡིན་པ་ཞེས་བྱ་བ་ལ་ཉེ་བར་བརྟགས་པའི་ཕྱིར་རོ། །ཆོས་ཉིད་ཀྱིས་ཀྱང་ཅི་ཞེ་ན། ལུས་དང་ངག་ལྡོག་པ་ཙམ་བསམ་གཏན་དང་ཟག་པ་མེད་པའི་སྡོམ་པ་ཞེས་བྱ་བ་ལ་དེ་ཉེ་བར་བརྟགས་པའི་ཕྱིར་རོ། །བཏགས་པ་ཅན་དེ་ནི་གཟུགས་མེད་པ་ཉིད་ཡིན་ཏེ། མཚན་ཉིད་དང་ལྡན་པ་ནི་མ་ཡིན་ནོ་ཞེས་བྱ་བ་ནི་བརྟགས་པས་གྲུབ་པ་ནི་བཏགས་པ་ཅན་ནོ། །མཚན་ཉིད་མངོན་པར་གྲུབ་པ་མ་ཡིན་པས་མཚན་ཉིད་དང་ལྡན་པ་མ་ཡིན་ནོ། །གཟུགས་ཡོད་པ་ལ་དེ་བརྟགས་པ་ཡིན་པའི་ཕྱིར་རོ་ཞེས་བྱ་བ་ནི་ལུས་ཀྱི་གཟུགས་ཡོད་པ་ལ་རྣམ་པར་རིག་བྱེད་མ་ཡིན་པ་བརྟགས་པའི་ཕྱིར་རོ་ཞེས་བྱ་བའི་དོན་ཏོ། །དེ་ཉིད་ཀྱི་ཕྱིར་གཟུགས་མེད་པའི་ཁམས་ན་སྡོམ་པ་དང་སྡོམ་པ་མ་ཡིན་པ་ཡིན་པ་དང༌། ཅིག་ཤོས་ཀྱི་རིག་བྱེད་མ་ཡིན་པའི་གཟུགས་བརྟགས་པ་མེད་དོ། །ཡང་ན་གཟུགས་ཡོད་པ་ལ་ཞེས་བྱ་བ་ནི་ལུས་དང་ངག་གི་རྣམ་པར་རིག་བྱེད་ཀྱི་གཟུགས་ལའོ། །དེ་ཉིད་ཀྱི་ཕྱིར་ལུས་དང་ངག་ལྡོག་པ་དང༌། ལྡོག་པ་མ་ཡིན་པ་ཙམ་ལ་དེ་ཉེ་བར་བརྟགས་པའི་ཕྱིར་རོ་ཞེས་སྨྲས་སོ། །རྣམ་པར་རིག་བྱེད་མ་ཡིན་པ་ལ་བརྗོད་པར་བྱ་བ་མང་དུ་ཡོད་དེ། རེ་ཞིག་འདིར་ཤིན་ཏུ་འཕྲོས་པ་གཞག་གོ་ཞེས་བྱ་བ་ནི། ཇི་ལྟར་བརྗོད་པར་བྱ་བ་མང་བ་དེ་ལྟར་ལས་གྲུབ་པ་དང༌། ཆོས་མངོན་པའི་མཛོད་ལས་བལྟ་བར་བྱའོ། །ཇི་ལྟར་མིང་དང་གཟུགས་ཉིད་ཡིན་པར་བསྟན་ཟིན་ཏོ་ཞེས་བྱ་བ་ནི་རྣམ་པ་གང་གིས་མིང་ཉིད་ཡིན་པ་ནི་མིང་ནི་འདུད་པར་བྱེད་པས་མིང་ཞེས་བྱ་བ་དང༌། དེ་བཞིན་དུ་རྣམ་པ་གང་གིས་གཟུགས་ཉིད་ཡིན་པར་བསྟན་པ་ནི་གནོད་པར་གྱུར་པས་གཟུགས་ཞེས་བྱའོ་ཞེས་བསྟན་པ་དག་ཡིན་ནོ། །ཅིའི་ཕྱིར་ཕུང་པོ་ལྔ་ལ་མིང་དང་གཟུགས་ཉིད་
དུ་རྣམ་པར་གཞག་ཅེ་ན་ཞེས་བྱ་བ་ནི། ཕུང་པོ་དང་ཁམས་དང་སྐྱེ་མཆེད་ལ་སོགས་པ་རྣམ་པར་གཞག་པ་ཐམས་ཅད་ནི་སངས་རྒྱས་བཅོམ་ལྡན་འདས་ཀྱི་དགོངས་པ་དང་བཅས་པ་ཡིན་ཏེ། གདུལ་བྱའི་སྤྱོད་པ་ཐ་དད་པ་ལ་ལྟོས་པ་ཡིན་པའི་ཕྱིར་རོ། །ཇི་སྐད་དུ། རྨོངས་དང་དབང་པོ་འདོད་གསུམ་ལ། །ཕུང་པོ་ལ་སོགས་རྣམ་གསུམ་བཤད། །ཅེས་བསྟན་པ་ཡིན་ནོ། །དེ་བས་ན་ཕུང་པོ་ལྔ་རྣམས་མིང་དང་གཟུགས་ཉིད་དུ་རྣམ་པར་གཞག་པ་འདི་ཡང་དགོས་པ་དང་བཅས་པ་ཡིན་པས་དེའི་དགོས་པ་བརྗོད་པར་བྱ་དགོས་ཏེ། དེ་བས་ན་བྱིས་པ་ཕལ་ཆེར་དེ་གཉིས་ལ། །ལུས་ཅན་དང་ལུས་སུ་མངོན་པའི་ང་རྒྱལ་བྱེད་པར་བསྟན་པའི་ཕྱིར་རོ་ཞེས་སྨྲས་ཏེ། དེ་གཉིས་ལ་ཞེས་བྱ་བ་ནི་མིང་དང་གཟུགས་གཉིས་ལ་སྟེ། དེ་ལ་ལུས་ཅན་ལ་མངོན་པའི་ང་རྒྱལ་བྱེད་པ་ནི་མིང་ལ་སྟེ། གང་ཐོས་པར་བྱེད་པ་དང༌། མཐོང་པར་བྱེད་པ་དང༌། སྣོམ་པར་བྱེད་པ་དང༌། རོ་མྱོང་བར་བྱེད་པ་དང༌། རེག་པར་བྱེད་པ་དང༌། རྣམ་པར་ཤེས་པར་བྱེད་པའམ། བདེ་བ་དང་སྡུག་བསྔལ་བར་སེམས་པ་དེ་ནི་ལུས་ཅན་ལ་སྟེ། དྲན་པ་དང༌། ངོ་ཤེས་པ་དང༌། དགའ་བ་དང༌། ཞེན་པ་དང༌། རྨོངས་པ་ནི་ལུས་འདི་ལ་གནས་པའི་བདག་ཡིན་པར་མངོན་པའི་ང་རྒྱལ་བྱེད་པའི་ཕྱིར་རོ། །ལུས་ལ་མངོན་པའི་ང་རྒྱལ་བྱེད་པ་ནི་ཞེས་བྱ་བ་ནི་གཟུགས་ལ་འདི་ནི་བདག་འདིའི་ལུས་སོ། །དེ་ཡང་འདི་ལ་བརྟེན་པ་ཡིན་ནོ་ཞེས་མངོན་པའི་ང་རྒྱལ་བྱེད་པའི་ཕྱིར་རོ། །མིང་སྔར་སྨོས་པ་ནི་དེས་གཟུགས་གཟུང་བ་ཡིན་པའི་ཕྱིར་རོ་ཞེས་བྱ་བ་ནི་མིང་དེས་གཟུགས་ལ་གཟུང་བ་ཡིན་པའི་ཕྱིར་རོ། །མིང་གིས་གཟུགས་གཟུང་གི །གཟུགས་ཀྱིས་མིང་མ་ཡིན་ནོ་ཞེས་བྱ་བ་འདི་ཇི་ལྟར་ངེས་པར་བྱ་ཞེ་ན། དེའི་ཕྱིར། འདི་ལྟར་དེ་ལ་ནི་དེས་བདག་དང་བདག་གི་ཞེས་རྒྱས་པར་སྨྲས་ཏེ། འདི་ལྟར་མིང་དེས། བདག་དང་བདག་གིའོ་ཞེས་བདག་དང་བདག་གིར་གཟུགས་དེ་ལ། བདག་གིར་བྱེད་དོ། །ཡུལ་ན་མི་གནས་པའི་མིང་གིས་ནི་བདག་གི་སྙམ་པ་ལ་སོགས་པར་ཞེན་པ་ལ་མ་གཏོགས་པར་གཞན་དུ་གཟུགས་ཉེ་བར་འཛིན་པར་ནུས་པ་མ་ཡིན་ནོ། །གཟུགས་ནི་དམིགས་པ་མེད་པའི་ཕྱིར་མིང་ལ་དེ་བཞིན་དུ་འཛིན་པར་ནུས་པ་མ་ཡིན་པས་སོ། །
དེས་བཏང་ན་ཡང་རུལ་པར་འགྱུར་རོ་ཞེས་བྱ་སྟེ། མིང་དེས་གཟུགས་དེ་བཏང་ན་ཡང་གང་གི་ཕྱིར་དེ་རུལ་བར་འགྱུར་བ་དེ་བས་ན་ཡོངས་སུ་སྐྱོང་བ་ཉིད་ཀྱིས་མ་རུལ་བའི་རྒྱུའི་དངོས་པོ་བྱེད་པས་དེས་དེ་གཟུང་བ་ཞེས་བྱའི། མིང་གིས་གཟུགས་བཏང་བའི་གཟུགས་ལ་ནི་དེ་ལྟར་རྣམ་པར་འགྱུར་བར་འགྲོ་བས་དེ་ནི་དེས་གཟུང་བ་མ་ཡིན་ནོ། །དེའི་དབང་གིས་ཀྱང་བྱ་བ་དག་ལ་འཇུག་གོ་ཞེས་བྱ་བ་ནི་གནས་པ་དང༌། འགྲོ་བ་དང༌། ཁྲུས་བྱེད་པ་དང༌། སྟན་ལ་འདུག་པ་དང༌། ཟས་ཟ་བ་ལ་སོགས་པའི་བྱ་བ་དག་ལ་མིང་གི་དབང་གིས་འཇུག་སྟེ། འདུན་པའི་རྗེས་སུ་བྱེད་པའི་ཕྱིར་རོ། །དེ་ལྟར་ན་གདོན་མི་ཟ་བ་ཁོ་ནར་སྒྲུབ་པར་བྱེད་པའི་དོན་གྱིས་ན་གཟུགས་ནི་མིང་གིས་བསྡུས་ཤིང་ཟིན་པ་ཞེས་བྱའོ། །དཔེར་ན་གྲོང་ཁྱེར་གཟུང་ངོ༌། །རྒྱལ་སྲིད་འབྱུང་ངོ་ཞེས་བྱ་བ་བཞིན་ནོ། །འཇིག་རྟེན་ན་ཡང་མིང་འདོད་པའི་རྗེས་སུ་གཟུགས་བྱེད་པ་ཡིན་ནོ། །ཅིའི་ཕྱིར་ཞེ་ན། གང་གི་ཕྱིར་འདོད་པའི་མཚན་ཉིད་དག་གཟུགས་ལ་ཡོད་པ་མ་ཡིན་པས། གཟུགས་ཀྱི་མིང་གཟུང་ཞེས་མི་བྱའོ། །དེ་མེད་པང་ཡང་རིས་མཐུན་པ་གཞན་དུ་འགྲུབ་པ་མ་ཡིན་གྱི་ཞེས་རྒྱས་པར་འབྱུང་བ་ནི་མིང་དེ་དག་མེད་པར་ནི་རིས་མཐུན་པ་གཞན་དུ་གཟུགས་མངོན་པར་འགྲུབ་པ་མ་ཡིན་ནོ། །དེའི་ཕྱིར་ཡང་མིང་ཁོ་ནས་གཟུགས་གཟུང་བ་ཡིན་ཏེ། དེ་ཡོད་ན་དེ་ཡོད་པ་ཡིན་པའི་ཕྱིར་རོ། །གཟུགས་ནི་མེད་པར་ཡང་གཟུགས་མེད་པ་དག་ཏུ་མིང་མངོན་པར་འབྱུང་བར་འགྱུར་བས་དེའི་ཕྱིར་མ་ཟིན་པ་ཡིན་ནོ་ཞེས་སྟོན་ཏོ། །མིང་ནི་རྒྱུན་ལ་བརྟེན་ནས་རིས་མཐུན་པ་གཞན་དག་ཏུ་ཞེས་རྒྱས་པར་འབྱུང་བ་ནི་མིང་གི་རྒྱུན་ལ་བརྟེན་ནས་སྲིད་པ་བར་མའི་རྒྱུན་གྱིས་རིས་མཐུན་པ་གཞན་དུ་སྔོན་མ་བྱུང་བའི་གཟུགས་ཀྱི་རྒྱུན་ལེན་པར་བྱེད་ཀྱི། རིས་མཐུན་པའི་གཟུགས་ཀྱི་རྒྱུན་སྔོན་བྱུང་བས་ཇི་ལྟར་མིང་གི་རྒྱུན་བཞིན་དུ་རིས་མཐུན་པ་གཞན་དུ་མིང་མངོན་པར་འགྲུབ་པར་བྱེད་པ་ནི་མ་ཡིན་ནོ། །དེ་བས་ན་རིས་མཐུན་པ་གཞན་དུ་སྔོན་མ་བྱུང་བའི་གཟུགས་ཀྱི་རྒྱུན་མིང་གིས་ལེན་ཏོ་ཞེས་བྱའོ། །གཟུགས་ཀྱི་རྒྱུན་ནི་སྔོན་མ་བྱུང་བའི་མིང་གི་རྒྱུན་ལེན་པར་བྱེད་པ་མ་ཡིན་ནོ་ཞེས་བྱ་བ་ནི། སྔོན་གྱི་རིས་མཐུན་པའི་མིང་གི་རྒྱུན་ནི་སྔོན་བཞིན་དུ་རིས་མཐུན་པ་གཞན་དུ་མིང་གི་རྒྱུན་རྗེས་སུ་འཇུག་གོ །དེའི་
ཕྱིར་ཡང་མིང་ཉིད་ཀྱིས་གཟུགས་བཟུང་བ་ཡིན་ཏེ། འཛིན་པ་ཉིད་ཀྱི་མཚན་ཉིད་ཡིན་པའི་ཕྱིར་རོ། །འཛིན་པར་བྱེད་པ་ནི་སྔོན་གཟུང་བའི་གཟུང་བར་བྱ་བ་བོར་ནས་དེ་ལས་གཞན་པ་སྔོན་མེད་པ་འཛིན་པར་བྱེད་དོ། །གཟུགས་ནི་གཟུང་བར་བྱ་བ་ཡིན་ཏེ། གཟུང་བར་བྱ་བའི་མཚན་ཉིད་ཡིན་པའི་ཕྱིར་རོ། །དེ་དག་ཀྱང་སྔར་གཟུང་བ་ནི་འདོར་ལ། སྔོན་མེད་པ་ནི་ལེན་པར་བྱེད་དོ། །གང་ཡང་འབྱུང་བ་རྒྱུར་བྱས་པའི་གཟུགས་སྐྱེས་པ་དག་ཅེས་བྱ་བ་ལ། རྒྱུར་བྱས་པའི་གཟུགས་ནི་མིག་ལ་སོགས་པ་དང༌། གཟུགས་ལ་སོགས་པའོ། །དེ་དག་ཇི་ལྟར་རྣམ་པར་ཤེས་པའི་རྐྱེན་གྱིས་ཡིན་ཞེ་ན་ཞེས་བྱ་བ་ནི་འབྱུང་བའི་རྐྱེན་གྱིས་དེ་ལས་གཞན་པ་རྒྱུར་བྱས་པ་དེ་སྐྱེས་པའི་ཕྱིར་རོ། །གལ་ཏེ་འབྱུང་བ་དང་འབྱུང་བ་ལ་བརྟེན་པའི་གཟུགས་རྣམས་ཞེས་རྒྱས་པར་འབྱུང་བ་ནི་འབྱུང་བ་དང་འབྱུང་བ་ལས་གྱུར་པ་དེ་དག་ཐམས་ཅད་སྤྱིར་ལས་ཀྱིས་ཡོངས་སུ་བསྒོས་པའི་རྣམ་པར་ཤེས་པའི་རྐྱེན་གྱིས་སྐྱེ་བ་ཡིན་གྱི། འབྱུང་བ་ཉི་ཚེས་ནི་མ་ཡིན་ནོ། །འདིར་སྨྲས་པ། འོ་ན་ཇི་ལྟར་དེ་དག་འབྱུང་བ་ལས་གྱུར་པ་ཞེས་བྱ་ཞེ་ན། དེའི་ཕྱིར་འབྱུང་བ་དང་ཐ་དད་པ་མེད་པར་སྐྱེ་བ་ན་འབྱུང་བ་ལས་གྱུར་པ་ཞེས་བྱ་སྟེ་ཞེས་སྨྲས་སོ། །དེ་ནི་དེ་དག་ཐ་དད་པ་མེད་པར་སྟོན་པ་ནི། དེ་འཛིན་པ་དང་འཕྲོག་པ་དང་ཡོངས་སུ་གྱུར་ན་དེ་འཛིན་པ་ལ་སོགས་པ་ཡོད་པའི་ཕྱིར་རོ་ཞེས་བྱ་བ་ཡིན་ཏེ། འབྱུང་བ་བཟུང་ནས་འབྱུང་བ་ལས་གྱུར་པ་ཡང་བཟུང་བའི་ཕྱིར་རོ། །འབྱུང་བ་ཡོངས་སུ་གྱུར་ན་འབྱུང་བ་ལས་གྱུར་པ་ཡང་ཡོངས་སུ་གྱུར་པའི་ཕྱིར་རོ་ཞེས་བྱ་བ་ཡིན་ནོ། །རེ་ཞིག་འཇིག་རྟེན་ན་ཡང་དབང་པོ་དང་དོན་གཉིས་ལས་བདེ་བ་དང་སྡུག་བསྔལ་སྐྱེ་བ་དང་ཞེས་བྱ་བ་འཇིག་རྟེན་ན་གྲུབ་པ་ཡིན་ཏེ། དེ་ཡོད་ན་དེ་ཡོད་པའི་ཕྱིར་རོ། །དེ་ཡང་དེ་གཉིས་ལས་མཚན་ཉིད་མི་མཐུན་པ་ཡིན་ནོ། །བརྡབས་པ་ལས་སྒྲ་དང་ཞེས་བྱ་བ་ཅི་ཞེ་ན། སྐྱེ་ཞེས་བྱ་བའི་སྐབས་དང་སྦྱར་ཏེ། དེ་ཡང་དེ་ལས་མཚན་ཉིད་མི་མཐུན་པ་ཡིན་ནོ། །རྭ་ལས་འདམ་བུ་དང་ཞེས་བྱ་བ་ནི་གལ་ཏེ་རྭ་ནི་ས་ལ་སོགས་པའི་བདག་ཉིད་ཡིན་དུ་ཟིན་ཀྱང༌། འདམ་བུ་ཡང་དེ་འདུས་པ་ཡིན་པའི་ཕྱིར་རོ། །དེ་ལྟ་མོད་ཀྱི། རྭ་དང་འདམ་བུའི་རིགས་ནི་ཐ་དད་པ་ཡོད་དོ། །མེ་དང་ཤིང་ལས་དུ་བ་དང་ཞེས་བྱ་བ་
འདི་ལ་ཡང་རིགས་ཐ་དད་པ་ཡོད་པ་ཡིན་ཏེ། མེ་ནི་དྲོ་བའི་བདག་ཉིད་ཀྱི་མེ་ཡིན་ནོ། །ཤིང་ནི་དུ་བ་མ་ཡིན་གྱི་དུ་བའི་རིགས་ཡིན་ནོ། རྡོ་ཐལ་དང་ཆུ་ལས་མེ་དང་ཞེས་བྱ་བ་ཅི་ཞེ་ན། སྐྱེ་ཞེས་བྱ་བའི་སྐབས་དང་སྦྱར་རོ། །འདི་ལ་ཡང་འབྱུང་བའི་རིགས་ཐ་དད་པའི་ཕྱིར་མཚན་ཉིད་མི་མཐུན་པ་ཉིད་གྲུབ་པ་ཡིན་ཏེ། །རྡོ་ཐལ་དང་ཆུ་གཉིས་འབྱུང་བ་གཞན་ཡིན་པའི་ཕྱིར་རོ། །ཀླུའི་སེམས་ཀྱི་མཐུས་ཆུ་དང་ཞེས་བྱ་བ་ཅི་ཞེ་ན་སྐྱེ་ཞེས་བྱ་བའི་སྐབས་དང་སྦྱར་ཏེ། །ཆུ་ནི་ཀླུ་ལ་སློང་ངོ་ཞེས་བྱ་བར་གྲུབ་པ་ཡིན་ནོ། །ཏིང་ངེ་འཛིན་གྱི་བྱེ་བྲག་ལས། ལྷའི་མིག་དང་རྣ་བ་ཞེས་བྱ་བ་ནི་སྣང་བར་ལྷག་པར་མོས་པ་དང༌། སྒྲ་མཉན་པའི་རྩོལ་བ་རབ་ཏུ་སྦྱོར་བའི་ཕྱིར་རོ། །སྤྲུལ་པའི་སེམས་ལས་སྤྲུལ་པ་དང་ཞེས་བྱ་བ་ཅི་ཞེན་གཟུགས་མེད་པ་ལས་ཀྱང་གཟུགས་སྐྱེའོ་ཞེས་བྱ་བའི་སྐབས་དང་སྦྱར་རོ། །རླུང་གི་སྟོབས་འཆང་བ་ལ་སོགས་པ་རྩེ་བར་མངོན་པར་དགའ་བ་ལས་རླུང་དང་ཆར་པ་ལ་སོགས་པ་དང་ཞེས་བྱ་བ་ལ་སོགས་པ་ཞེས་བྱ་བའི་སྒྲས་འབྲུག་གི་སྟོབས་འཆང་བ་དང༌། ཆར་པའི་སྟོབས་འཆང་བ་ལ་སོགས་པ་ཡང་ཡིན་པར་རིག་པར་བྱའོ། །ཀླུའི་སེམས་ཀྱི་མཐུས་ཆུའི་ཞེས་བྱ་བ་ཅི་ཞེ་ན། གཟུགས་མེད་པ་ལས་ཀྱང་གཟུགས་སྐྱེའོ་ཞེས་སྐབས་དང་སྦྱར་ཏེ། ཀླུ་ཆེན་པོས་བྱིན་གྱིས་བརླབས་པའི་མཚོ་ནི་སྐམ་པར་མི་འགྱུར་བ་ཡིན་ནོ། །གཟུགས་ལས་ཀྱང་གཟུགས་མེད་པ་སྐྱེ་བ་ནི་མིག་ལ་སོགས་པ་ལས། རྣམ་པར་ཤེས་པའི་ཚོགས་ལྔ་མཚུངས་པར་ལྡན་པ་དང་བཅས་པའོ་ཞེས་བྱ་བ་ནི་སེམས་ལས་བྱུང་བ་དང་བཅས་ཞེས་བྱ་བའི་དོན་གང་ཡིན་པའོ། །མཚན་ཉིད་མི་མཐུན་པ་ལས་ཀྱང་ཡིན་པ་ནི་དགེ་བ་དང་མི་དགེ་བ་ལ་ལུང་དུ་མ་བསྟན་པ་དང་ཞེས་བྱ་བ་ནི་དགེ་བ་དང་མི་དགེ་བའི་སེམས་ནི་ལུང་དུ་མ་བསྟན་པ་ལས་དགེ་བ་དང་མི་དགེ་བ་ཉིད་ཀྱིས་མཚན་ཉིད་མི་མཐུན་པ་ཡིན་ནོ། །དེ་གཉིས་ལས་ལུང་དུ་མ་བསྟན་པ་ནི་ལུང་དུ་མ་བསྟན་པ་ཉིད་ཀྱིས་མཚན་ཉིད་མི་མཐུན་པ་ཡིན་ནོ། །འདོད་མ་ཆགས་པ་ལས་ཀྱང་འདོད་ཆགས་སྐྱེ་བ་དང་ཞེས་བྱ་བ་ནི་དབང་པོ་དང་དོན་དད། ཚུལ་བཞིན་མ་ཡིན་པ་ཡིད་ལ་བྱེད་པ་ལ་སོགས་པ་ལས་སོ། །འདོད་ཆགས་ལས་ཀྱང་འདོད་མ་ཆགས་པ་སྟེ་ཞེས་བྱ་བ་ནི་སེམས་པ་དང་མ་རིག་པ་ལ་སོགས་པའོ། །གྲངས་ཅན་པའི་བསྟན་བཅོས་ལས་ཀྱང༌། དེའི་བདག་
ཉིད་མ་ཡིན་པའི་ངའོ་སྙམ་པ་ལས་ཀྱང་ཆེན་པོའམ་ཞེས་བྱ་བ་ནི་སྒྲའི་བདག་ཉིད་མ་ཡིན་པ་ལས་ཀྱང་ཞེས་བྱ་བའི་ཐ་ཚིག་གོ །སྙིང་སྟོབས་ལ་སོགས་པའི་བདག་ཉིད་ཡིན་པས་ཆེན་པོའམ་ངའོ་སྙམ་པ་ཡང་སྒྲ་ལ་སོགས་པའི་བདག་ཉིད་ཡིན་དུ་ཟིན་ཀྱང༌། སྙིང་སྟོབས་དང་རྡུལ་དང་མུན་པ་རྣམས་ལ་བྱེ་བྲག་གང་དང་ལྡན་པས་སྒྲ་དང་རེག་བྱ་དང་གཟུགས་དང་རོ་དང་དྲི་ཡིན་པར་བརྗོད་པ་འཐོབ་པར་འགྱུར་གྱི། དེའི་བདག་ཉིད་ཆེན་པོའམ་ངའོ་སྙམ་པ་ནི་མ་ཡིན་ནོ། །ཡང་ན་ཆེན་པོ་དང་ངའོ་སྙམ་པ་དེ་བྱེ་བྲག་ཡོད་མོད་ཀྱི། འོན་ཀྱང་ཆེན་པོ་དང་ངའོ་སྙམ་པ་ལས་སྒྲ་ལ་སོགས་པ་མི་འབྱུང་བ་ནི་མ་ཡིན་ཏེ། ཆེན་པོ་དང་ངའོ་སྙམ་པ་དག་སྐྱེ་གནས་ཡིན་པར་མཐུན་པའི་ཕྱིར་རོ། །རིགས་མི་མཐུན་པ་རྫས་དང་ལས་གཉིས་ལས་ཡོན་ཏན་སྐྱེ་བ་དང་ཞེས་བྱ་བ་ནི་ཀུན་དུ་ལྡན་པ་དང་བྲལ་པ་དེ་གཉིས་ཀྱི་རྒྱུ་ནི་འདུ་བ་ཅན་ཡིན་པའི་ཕྱིར་རོ། །འདུ་བ་ཅན་གྱི་རྒྱུ་ནི་ཀུན་དུ་ལྡན་པ་དང་བྲལ་པ་གཉིས་ཀྱི་རྫས་ཡིན་ནོ། །འདུ་བ་ཅན་མ་ཡིན་པའི་རྒྱུ་ནི་ལས་ཡིན་ནོ། །རྫས་ནི་ལས་རྣམས་འདུ་བ་ཅན་གྱི་རྒྱུ་ཡིན་ནོ། །འབྲས་ཅན་གྱིས་ཕོངས་པ་ལ་སོགས་པ་ནི་ཡོན་ཏན་འདུ་བ་ཅན་གྱི་རྒྱུ་མ་ཡིན་ནོ། །ཡོན་ཏན་གྱི་བྱེད་པ་ལ་ནི་ཡོན་ཏན་ཅན་གྱི་བྱེད་པ་ཡོད་པ་ཡིན་པས་རྫས་ནི་ལས་ལ་སོགས་པའི་རྒྱུ་ཡིན་ནོ། །བདག་དང་དབང་པོ་དང་ཡིད་དང་དོན་འདུས་པ་ལས་བདེ་བ་དང་སྡུག་བསྔལ་ལ་སོགས་པའོ་ཞེས་བྱ་བ་ནི་རིགས་མི་མཐུན་པའི་ཡོན་ཏན་ལས་ཡོན་ཏན་སྐྱེ་ཞེས་བྱ་བར་སྟོན་ཏོ། །ཇི་ལྟར་མཚན་ཉིད་མི་མཐུན་པའི་རྒྱུ་ལས་འབྲས་བུ་འབྱུང་བ་ཡིན། དེ་ལྟ་ན་ནི་ཐམས་ཅད་ལས་ཐམས་ཅད་ཅིའི་ཕྱིར་མི་འབྱུང་ཞེ་ན་ཞེས་བྱ་བ་ནི་ཐ་དད་པར་བྱེ་བྲག་མེད་པའི་ཕྱིར་རོ། །གང་ཞིག་རྒྱུ་དང་རིགས་མཐུན་པ་དེ་ནི་ངེས་པ་ཡིན་པར་རིགས་ན་ཐམས་ཅད་ནི་ཐམས་ཅད་དང་རིགས་མཐུན་པ་མ་ཡིན་ནོ། །དཔེ་དེ་བདག་ཉིད་ཀྱིས་རེ་ཞིག་མཚན་ཉིད་མི་མཐུན་པའི་རྒྱུ་ལས་འབྲས་བུ་འབྱུང་ཡང་ཐམས་ཅད་ལས་ཐམས་ཅད་འབྱུང་བ་མ་ཡིན་ནོ་ཞེས་བྱ་བ་དེ་དག་གྲུབ་པ་ཡིན་ན་འདི་ལ་དྲི་བར་བྱ་ཅི་དགོས་ཞེས་བྱ་བ་ལ། དཔེ་དག་ཉིད་ཀྱིས་ཞེས་བྱ་བ་ནི་ཇི་སྐད་དུ་སྨོས་པ་དེ་དག་གིས་ཞེས་སྟོན་པ་ནི་གང་ཡང་དབང་པོ་དང་དོན་གཉིས་ལས་བདེ་བ་དང་སྡུག་བསྔལ་སྐྱེ་བ་དང༌། བརྡབས་པ་ལས་སྒྲ་དང་མེ་དང༌། ཤིང་གཉིས་
ལས་ངུ་བ་དང་རྡོ་ཐལ་དང་ཆུ་གཉིས་ལས་མེ་དང་ཞེས་བྱ་བ་ནས་བདག་དང་དབང་པོ་དང་ཡིད་དང་དོན་ཚོགས་པ་ལས་བདེ་བ་དང༌། སྡུག་བསྔལ་ལ་སོགས་པ་ཡིན་ནོ་ཞེས་བྱ་བའི་བར་དུ་གང་སྨོས་པ་རྣམས་ཀྱིས་རེ་ཞིག་མཚན་ཉིད་མི་མཐུན་པའི་རྒྱུ་ལས་འབྲས་བུ་འབྱུང་ཡང་ཐམས་ཅད་ལས་ཐམས་ཅད་འབྱུང་བ་མ་ཡིན་ནོ་ཞེས་བྱ་བ་དེ་དག་གྲུབ་པ་ཡིན་ཏེ། དབང་པོ་དང་དོན་གཉིས་ལས་བདེ་བ་དང་སྡུག་བསྔལ་ཡིན་པར་ཁམས་གསུམ་དུ་མ་གྲགས་པ་མ་ཡིན་ནོ་ཞེས་བྱ་བ་ཡིན་ནོ། །ཆོས་ཉིད་ཀྱིས་ཞེས་བྱ་བ་ནི་ངོ་བོ་ཉིད་དང་རང་བཞིན་གྱིས་ཞེས་བྱ་བའི་དོན་གང་ཡིན་པའོ། །དེ་བས་ན་དེ་གཉི་གས་ཀྱང་བརྒལ་དུ་མེད་དོ་ཞེས་བྱ་བ་ནི་རེ་ཞིག་རྣམ་པར་ཤེས་པའི་རྐྱེན་གྱིས་མིང་སྐྱེའོ་ཞེས་བྱ་བ་ནི་རིགས་ན་གཟུགས་མཚན་ཉིད་མི་མཐུན་པ་དག་རྣམ་པར་ཤེས་པ་ལས་ཇི་ལྟར་སྐྱེ་ཞེས་སྨྲས་པ་གང་ཡིན་པ་དང༌། དེ་ལྟ་ན་འོ་ན་ཐམས་ཅད་ལས་ཐམས་ཅད་ཅིའི་ཕྱིར་མི་འབྱུང་ཞེས་སྨྲས་པ་གང་ཡིན་པ་ད་གཉི་གས་ཀྱང་བརྒལ་དུ་མེད་དོ། །འདིར་ཡང་རྐྱེན་དང་རྐྱེན་ཅན་གཉིས་ངེས་པ་དང་ཞེས་རྒྱས་པར་འབྱུང་བ་ནི་རྐྱེན་ངེས་པ་ལ་སྐྱོན་དང༌། རྐྱེན་ཅན་ངེས་པ་དང༌། གཉི་ག་ངེས་པ་དང༌། མ་ངེས་པ་ཡང་སྐྱོན་ཡིན་ནོ་ཞེས་བྱའོ། །རྐྱེན་ངེས་པའི་དབང་དུ་བྱས་ཏེ། གལ་ཏེ་རྣམ་པར་ཤེས་པ་ཁོ་ནའི་རྐྱེན་གྱིས་མིང་དང་གཟུགས་ཡིན་ན་དགའ་བའི་ཀུན་འབྱུང་བ་ལས་གཟུགས་ཀུན་འབྱུང་བ་དང་ཞེས་བྱ་བའི་མདོ་སྡེ་དང་འགལ་བར་འགྱུར་རོ། །མདོ་སྡེ་ནི་འོག་ནས་འཆད་པ་ཡིན་ཏེ། དགའ་བའི་རྐྱེན་གྱིས་ཀྱང་གཟུགས་ཡིན་ཞེས་བསྟན་པ་ཡིན་ནོ། །རེག་པའི་ཀུན་འབྱུང་བ་ལས་ཤེས་ཞེས་རྒྱས་པར་འབྱུང་བ་ནི་རྣམ་པར་ཤེས་པ་མ་ཏོགས་པར་སེམས་ལས་བྱུང་བ་ཐམས་ཅད་ཀྱི་སྤྱིའི་རྒྱུ་ཡིན་པའི་ཕྱིར་མིང་གི་རྐྱེན་རེག་པ་ཡིན་པར་བཅོམ་ལྡན་འདས་ཀྱིས་བསྟན་ཏོ། །མིང་དང་གཟུགས་ཀུན་འབྱུང་བ་ལས་རྣམ་པར་ཤེས་པ་ཀུན་འབྱུང་བ་ཞེས་བྱ་བ་ནི་མིང་གི་ཕྱོགས་གཅིག་ཏུ་གྱུར་པ་རྣམ་པར་ཤེས་པ་ནི་མིང་དང་གཟུགས་ཀྱི་རྐྱེན་གྱིས་ཡིན་པར་བསྟན་ཏེ། རྐྱེན་ངེས་པ་ལ་ཇི་སྐད་དུ་གསུངས་པའི་མདོ་སྡེ་དང་འགལ་བ་ཡིན་ནོ། །རྐྱེན་ཅན་ངེས་པའི་དབང་དུ་བྱས་ནས། འོན་ཏེ་མིང་དང་གཟུགས་ཁོ་ན་རྣམ་པར་ཤེས་པའི་རྐྱེན་གྱིས་ཡིན་ན་ནི་རྫུས་ཏེ་བྱུང་བ་རྣམས་ལ་ལོགས་ཤིག་ན་མིང་དང་གཟུགས་མེད་པའི་ཕྱིར་སྐྱེ་
མཆེད་དྲུག་རྣམ་པར་ཤེས་པའི་རྐྱེན་གྱིས་མ་ཡིན་པར་འགྱུར་རོ་ཞེས་སྨྲས་ཏེ། རྫུས་ཏེ་འབྱུང་བ་ནི་སྐྱེ་མཆེད་དྲུག་ཡོངས་སུ་ཚང་བ་ཁོ་ནར་ཅིག་ཅར་སྐྱེ་བ་ཡིན་ཏེ། དེ་དག་ལ་སྐྱེ་མཆེད་དྲུག་མ་གཏོགས་པར་མིང་དང་གཟུགས་རྣམ་པར་གཞག་ཏུ་མེད་དོ། །དེ་བས་ན་རྣམ་པར་ཤེས་པའི་རྐྱེན་གྱིས་མིང་དང་གཟུགས་ཀྱི་ཡན་ལག་རྣམ་པར་གཞག་པར་བྱ་བ་མ་ཡིན་གྱི། འོ་ན་ཅི་ཞེ་ན། སྐྱེ་མཆེད་དྲུག་གོ །འོན་ཏེ་དེ་དག་ཀྱང་མིང་དང་གཟུགས་ཙམ་ཡིན་བས་མིང་དང་གཟུགས་རྣམ་པར་གཞག་ན་ནི་མིང་དང་གཟུགས་ཀྱི་རྐྱེན་གྱིས་སྐྱེ་མཆེད་དྲུག་ཅེས་བྱ་བར་བརྗོད་དུ་མེད་པར་འགྱུར་ཞིང་རང་གི་རིགས་ཀྱི་སྐད་ཅིག་མ་གཞན་གང་ཡིན་པ་རྐྱེན་ཡིན་པར་ནི་འདི་ལས་བརྗོད་པར་བཞེད་པ་མ་ཡིན་པའི་ཕྱིར་རོ། །དེ་ལྟར་ན་རྣམ་པར་ཤེས་པའི་འབྲས་བུ་གཞན་ཡང་ཡོད་པས་རྐྱེན་ཅན་ངེས་པར་རིགས་པ་མ་ཡིན་ནོ། །རྣམ་པར་ཤེས་པའི་ཡན་ལག་ལ་ཡང་གསུམ་འདུས་པ་ལས་རེག་པ་མ་ཡིན་པར་འགྱུར་རོ་ཞེས་བྱ་བ་ནི་རྣམ་པར་ཤེས་པའི་ཡན་ལག་རྣམ་པར་གཞག་པའི་དུས་སུ་མིང་དང་གཟུགས་རྣམ་པར་གཞག་ཏུ་མེད་པས་རེག་པ་ནི་དེའི་ཚེ་མིང་མ་ཡིན་ལ། དེ་ཡང་གསུམ་འདུས་པ་ལས་བྱུང་བ་ཡིན་ཞིང༌། དེའི་རྐྱེན་ཀྱང་རྣམ་པར་ཤེས་པ་ཡིན་ན་ནི་མིང་དང་གཟུགས་ཁོ་ན་རྣམ་པར་ཤེས་པའི་རྐྱེན་གྱིས་ཡིན་གྱི་གཞན་མ་ཡིན་ནོ་ཞེས་རྐྱེན་ཅན་ངེས་པར་བྱེད་ན་རྣམ་པར་ཤེས་པ་ནི་རེག་པ་དེའི་རྐྱེན་མ་ཡིན་པར་འགྱུར་རོ། །འོན་ཏེ་མ་དེས་པ་ཡིན་ན་ནི་བཤད་པ་དོན་མེད་པར་འགྱུར་རོ་ཞེས་བྱ་བ་ཇི་ལྟ་བུ་ཞེ་ན། གལ་ཏེ། རེ་ཞིག་བསྟན་པའི་དོན་རྒྱུ་དང་རྐྱེན་འདི་དག་ཡིན་ན་ནི་མིང་དང་གཟུགས་ཀྱི་རྒྱུ་ཐམས་ཅད་བརྗོད་པར་བྱ་དགོས་ཀྱི། རྣམ་པར་ཤེས་པ་འབའ་ཞིག་ནི་མ་ཡིན་ནོ། །འབྲས་བུ་ཤེས་པར་བྱ་བའི་ཕྱིར་ཡིན་ན་ནི་རྣམ་པར་ཤེས་པའི་འབྲས་བུ་ཐམས་ཅད་བརྗོད་པར་བྱ་བ་ཡིན་གྱི། མིང་དང་གཟུགས་འབའ་ཞིག་ནི་མ་ཡིན་ནོ། །འོན་ཏེ་གཉི་ག་མ་ཡིན་པ་ཤེས་པར་བྱ་བའི་ཕྱིར་ཡིན་ན་ནི་འོ་ན་འདི་དག་ཅིའི་ཕྱིར་བསྟན་ཏེ། འཆད་པར་བྱེད་པ་དགོས་པ་མེད་པའི་ཕྱིར་རོ་ཞེ་ན། རྣམ་པར་ཤེས་པའི་རྐྱེན་གྱིས་མིང་དང་གཟུགས་ཞེས་བྱ་བ་ནི་མིང་དང་གཟུགས་ཀྱི་རྐྱེན་གཙོ་བོའི་དབང་དུ་བྱས་ཏེ། དེ་སྐད་བཤད་པ་ཡིན་ཏེ། རྣམ་པར་ཤེས་པ་ཁོ་ན་མིང་དང་
གཟུགས་ཀྱི་རྐྱེན་ཡིན་ནོ་ཞེས་རྐྱེན་གྱི་དབང་དུ་བྱས་པ་ཡིན་ནོ། །དེའི་བྱེ་བྲག་གིས་ཞེས་བྱ་བ་ནི་འདུ་བྱེད་ཀྱིས་ཡོངས་སུ་བསྒོས་པའི་རྣམ་པར་ཤེས་པའི་བྱེ་བྲག་གིས་སོ། །རིས་མཐུན་པ་དེ་དག་ཐ་དད་པའི་ཕྱིར་རོ་ཞེས་བྱ་བ་ནི་མིང་དང་གཟུགས་དེའི་རིས་མཐུན་པ་ཐད་དཔའི་ཕྱིར་ཞེས་བྱ་བའི་དོན་ཏེ། མིང་དང་གཟུགས་ནི་ལྷ་དང་མི་ལ་སོགས་པའི་རིས་ཐ་དད་པ་ལ་ལྟོས་པར་བྱ་བ་མ་ཡིན་ནོ། །འབྲས་སཱ་ལུ་དང༌། ནས་ལ་སོགས་པའི་མྱུ་གུ་ཐ་དད་པ་ནི་ས་བོན་གཙོ་བོར་གྱུར་པ་བཞིན་ནོ་ཞེས་བྱ་བ་ནི་ཇི་ལྟར་འབྲས་སཱ་ལུ་དང༌། ནས་ཀྱི་མྱུ་གུ་ཐ་དད་པ་ལ་ནི་ས་བོན་གཙོ་བོ་ཡིན་ཏེ། དེ་ཐུན་མོང་མ་ཡིན་པའི་ཕྱིར་རོ། །ས་ལ་སོགས་པ་ནི་མ་ཡིན་ཏེ། འདྲ་བའི་ཕྱིར་རོ་དེ་བཞིན་དུ་མིང་དང་གཟུགས་རིས་མཐུན་པ་ཐ་དད་པ་དག་འདུ་བྱེད་ཀྱིས་ཡོངས་སུ་བསྒོས་པའི་རྣམ་པར་ཤེས་པའི་བྱེ་བྲག་གིས་འགྱུར་ཏེ། སྐྱེ་བའི་རྒྱུ་ནི་ལས་ཀྱི་ཡིན་པའི་ཕྱིར་རོ། །འདིར་ཡང་སྐྱེ་བའི་རིམ་པ་ཡོངས་སུ་རྫོགས་པར་རྗོད་པར་བཞེད་པས་ཞེས་བྱ་བ་ནི་རྟེན་ཅིང་འབྲེལ་པར་འབྱུང་བ་འདི་ལས་ཡན་ལག་བཅུ་གཉིས་ཀྱི་མཚན་ཉིད་ཡིན་ནོ། །འདིར་སྐྱེ་མཆེད་དྲུག་གི་རྐྱེན་གྱིས་གཙོ་བོ་ཡང་རྣམ་པར་ཤེས་པ་མ་ཡིན་ནོ་ཞེས་བྱ་བ་ནི་རྟེན་ཅིང་འབྲེལ་པར་འབྱུང་བའི་མོད་སྡེ་འདི་ལས་ན་བརྒྱུད་པའི་ཚུལ་གྱི་གཙོ་བོ་མ་ཡིན་ཏེ། བདག་པོའི་རྐྱེན་ཡིན་ནོ། །རྫུས་ཏེ་བྱུང་བ་རྣམས་ཀྱི་སྐྱེ་མཆེད་དྲུག་སྐྱེ་བ་ལ་ནི་རྣམ་པར་ཤེས་པ་གཙོ་པོའི་རྐྱེན་ཡིན་པར་གྲུབ་པ་ཡིན་ནོ། །ཁྱད་པར་དུ་ནི་མིང་དང་གཟུགས་ཀྱི་ཡང་ཅི་ཞེ་ན། རྣམ་པར་གཏན་ལ་དབབ་པའི་ཟླ་ལ་ནུས་མོད་ཀྱི། །ཞེས་བྱ་བ་ཡིན་ནོ། །རྟེན་ཅིང་འབྲེལ་པར་འབྱུང་པའི་མདོ་སྡེ་འདིར་རྒྱུ་དང་འབྲས་བུར་འབྲེལ་པའི་གསུང་རབ་མཐའ་དག་བླངས་ཏེ་བཤད་པར་ནུས་ཏེ། གསུང་རབ་ཀྱི་ངོ་བོ་ཡུལ་ཡིན་པའི་ཕྱིར་རོ། །མིང་དང་གཟུགས་ཀྱིས་བསྡུས་པའི་དོན་ཡང་འདིར་རྣམ་པ་བཅུར་རྣམ་པར་གཞག་པ་ཡིན་པར་རིག་པར་བྱ་སྟེ། རང་གི་ངོ་བོ་རྣམ་པར་གཞག་པ་ནི་མིང་དང་གཟུགས་ཀྱི་རང་གི་ངོ་བོ་བརྗོད་པའི་ཕྱིར་རོ། །དེ་ལ་མིང་གི་རང་གི་ངོ་བོ་རྣམ་པར་གཞག་པ་ནི་ཚོར་བ་དང༌། འདུ་ཤེས་དང༌། འདུ་བྱེད་དང༌། རྣམ་པར་ཤེས་པའི་རང་གི་ངོ་བོ་བརྗོད་པ་ལས་རིག་པར་བྱའོ། །གཟུགས་ཀྱི་རང་གི་ངོ་བོ་རྣམ་པར་གཞག་པ་ནི་ས་ལ་སོགས་པའི་རང་
གི་ངོ་བོ་བརྗོད་པ་ལས་སོ། །རབ་ཏུ་དབྱེ་བ་རྣམ་པར་གཞག་པ་ནི་ཇི་སྐད་དུ་གཟུགས་ཅན་མ་ཡིན་པའི་ཕུང་པོ་བཞི་དང༌། གཟུགས་གང་ཡིན་པ་ཅི་ཡང་རུང་སྟེ་ཞེས་རྒྱས་པར་བསྟན་པའོ། །བསྡུས་པར་རྣམ་པར་གཞག་པ་ནི་ཇི་སྐད་དུ་གཟུགས་འདི་དང༌། སྔ་མའི་མིང་དེ་དག་གཅིག་ཏུ་བསྡུས་ནས་ཞེས་རྒྱས་པར་བསྟན་པ་ཡིན་ནོ། །ཐོག་མའི་རྐྱེན་རྣམ་པར་གཞག་པ་ནི་ཇི་སྐད་དུ། རང་གི་རིགས་སྐད་ཅིག་མ་གཞན་གྱི་རྐྱེན་གྱི་དངོས་པོ་འདིར་མ་ཡིན་ནོ་ཞེས་རྒྱས་པར་བསྟན་པའོ། །ངེས་པའི་ཚིག་རྣམ་པར་གཞག་པ་ནི་ཇི་སྐད་དུ། འདུད་པས་ན་མིང་ཞེས་བྱ་བ་དང་གནོད་པར་གྱུར་པ་དེ་བས་ན་གཟུགས་ཡིན་ནོ་ཞེས་བསྟན་པའོ། །རྣམ་པར་གཞག་པའི་དངོས་པོ་རྣམ་པར་གཞག་པ་ནི་ཇི་སྐད་དུ། ཅིའི་ཕྱིར་ཕུང་པོ་ལྔ་རྣམས་མིང་ཉིད་དུ་རྣམ་པར་གཞག་ཅེ་ན་ཞེས་རྒྱས་པར་བསྟན་པ་ཡིན་ནོ། །ཉེ་བར་འཛིན་པ་རྣམ་པར་གཞག་པ་ནི་ཇི་སྐད་དུ། མིང་སྔར་སྨོས་པ་ནི་དེས་གཟུགས་བཟུང་བའི་ཕྱིར་རོ་ཞེས་རྒྱས་པར་བསྟན་པ་ཡིན་ནོ། །རིགས་མི་མཐུན་པ་རྐྱེན་ཡིན་པར་རྣམ་པར་གཞག་པ་ནི་ཇི་སྐད་དུ། མཚན་ཉིད་མི་མཐུན་པའི་རྣམ་པར་ཤེས་པ་ལས་གཟུགས་ཇི་ལྟར་སྐྱེ་ཞེས་རྒྱས་པར་བསྟན་པ་ཡིན་ནོ། །རྐྱེན་ངེས་པ་རྣམ་པར་གཞག་པ་ནི་ཇི་སྐད་དུ། དེ་ལྟ་ན་འོ་ན་ཐམས་ཅད་ལས་ཐམས་ཅད་ཅིའི་ཕྱིར་མི་འབྱུང་ཞེས་རྒྱས་པར་བྱས་ནས་ཆོས་ཉིད་ཀྱིས་རང་གི་ངོ་བོ་ཐ་དད་པ་ཆོས་དེ་དག་གི་ནུས་པ་ཐ་དད་པ་ཡིན་ནོ་ཞེས་བྱ་བའི་བར་དུ་བསྟན་པ་ཡིན་ནོ། །གཙོ་བོའི་རྐྱེན་རྣམ་པར་གཞག་པ་ནི་ཇི་སྐད་དུ། དེའི་བྱེ་བྲག་གིས་རིས་མཐུན་པ་དེ་དག་ཐ་དད་པའི་ཕྱིར་རོ་ཞེས་བསྟན་པ་ཡིན་ནོ། །མིང་དང་གཟུགས་རྣམ་པར་དབྱེ་བའོ། །སྐྱེ་མཆེད་དྲུག་གང་ཞེ་ན་ཞེས་བྱ་བ་ནི་མིང་དང་གཟུགས་ཀྱི་རྐྱེན་གྱིས་སྐྱེ་མཆེད་དྲུག་ཅེས་བསྟན་པ་དེ་ལ་སྐྱེ་མཆེད་དྲུག་ཀྱང་ཕྱི་དང་ནང་རྣམ་པ་གཉིས་སོ། །དེ་བས་ན་ཕྱི་རོལ་གྱི་བསལ་བའི་ཕྱིར། ནང་གི་སྐྱེ་མཆེད་དྲུག་སྟེ་ཞེས་རྒྱས་པར་མདོ་སྡེ་ཇི་ལྟ་བ་བཞིན་ནོ། །དྲུག་ཉིད་སྐྱེ་མཆེད་ཡིན་པས་སྐྱེ་མཆེད་དྲུག་སྟེ། ཇི་ལྟར་ས་གསུམ་དང་འབྲས་བུ་གསུམ་དང༌། ཚ་བ་གསུམ་ལྟ་བུའོ་ཞེས་བྱ་བ་ནི་ཇི་ལྟར་གསུམ་ཉིད་ས་ཡིན་པས་ས་གསུམ་དང༌། གསུམ་ཉིད་ཚ་བ་ཡིན་པས་ཚ་བ་གསུམ་དང༌། གསུམ་ཉིད་འབྲས་བུ་ཡིན་པས་འབྲས་བུ་ཞེས་བྱ་བ་དེ་བཞིན་དུ་དཔེ་
གསུམ་པོ་འདིས་སྐྱེ་མཆེད་དྲུག་ཅེས་བྱ་བ་ནི་མིང་དང་སྒྲ་ཉིད་ཡིན་པར་བསྟན་ཏེ། གཞི་གཅིག་ཏུ་བྱས་པ་ཡང་ཡིན་ནོ། །མིང་དང་སྒྲ་ཡིན་པ་དེ་ཉིད་ཀྱི་ཕྱིར་མང་པོའི་ཚིག་ཏུ་མ་ཡིན་ཏེ། ཇི་ལྟར་ཤིང་ཏོག་ཨ་མྲ་ལྔ་དང་བཅུ་ཞེས་བྱ་བ་ལྟ་བུའོ། །སྒྲ་སྦྱར་བ་བསྟན་པ་ནི་སྒྲ་སྦྱར་བ་གཞན་དུ་རྟོག་པ་བསལ་བའི་ཕྱིར་ཏེ། དྲུག་གི་སྐྱེ་མཆེད་ནི་སྐྱེ་མཆེད་དྲུག་གོ་ཞེས་སྒྲ་སྦྱར་ན་ནི་དྲུག་གི་གནས་ཙམ་ཞིག་ཡིན་པར་གྲགས་པར་འགྱུར་བའམ། ཡིད་ཀྱི་སྐྱེ་མཆེད་ཙམ་ཞིག་ཡིན་པར་གྲགས་པར་འགྱུར་ཏེ། དེ་ཡང་རྣམ་པར་ཤེས་པའི་ཚོགས་དྲུག་ནི་སྐྱེ་བའི་སྒོའི་དོན་གྱིས་སྐྱེ་མཆེད་ཡིན་ནོ། །དྲུག་གི་སྐྱེ་མཆེད་ནི་སྐྱེ་མཆེད་དྲུག་གོ་ཞེས་སྒྲ་སྤྱར་ན་ནི་དྲུག་གིས་ཞེས་བྱ་བ་ཡང་གང་ཡིན། སྐྱེ་མཆེད་ཀྱང་གང་ཡིན། རྟོགས་པར་བྱ་བ་ཅི་ཡིན་པ་ངེས་པར་མ་ཟིན་པས་དེ་ཙམ་ནི་མིང་དང་གཟུགས་ཀྱི་རྐྱེན་གྱིས་མ་ཡིན་ནོ། །དྲུག་ལས་སྐྱེ་མཆེད་དམ། དྲུག་ཏུ་སྐྱེ་མཆེད་ཅེས་སྒྲ་སྦྱར་ན་ནི་དྲུག་ཀྱང་ངེས་པར་བྱར་མེད་ལ། དེ་ལས་དང་དེ་དག་ཏུ་སྐྱེ་མཆེད་ཅེས་བྱ་བ་གཞན་ཅི་ཞིག་ཡིན་པ་བརྗོད་པར་བྱ་དགོས་སོ། །དེ་ཙམ་ཡང་མིང་དང་གཟུགས་ཀྱི་རྐྱེན་གྱིས་མ་ཡིན་ནོ། །དྲུག་དང་སྐྱེ་མཆེད་དང་ཞེས་སྒྲ་སྦྱར་ན་ནི། །གཞན་དྲུག་དང་སྐྱེ་མཆེད་བཅུ་གཉིས་སུ་ངེས་པར་འགྱུར་ཏེ། དྲུག་དང་སྐྱེ་མཆེད་ཙམ་ནི་མིང་དང་གཟུགས་ཀྱི་རྐྱེན་གྱིས་ཡིན་པར་འདོད་པ་ཡང་མ་ཡིན་ནོ། །སྐྱེ་མཆེད་དྲུག་རྣམས་དེ་ནི་འདིའི་ཡིན་པས་འདི་ནི་སྐྱེ་མཆེད་དྲུག་གོ་ཞེས་སྒྲ་སྦྱར་ན་ནི་སྐྱེ་མཆེད་དྲུག་ལ་མ་གཏོགས་པ་སེམས་ཅན་ཞེས་བྱ་བའི་དངོས་པོ་གྲགས་པར་འགྱུར་བ་དང་སེམས་དང་སེམས་ལས་བྱུང་བའམ། སེམས་ལས་བྱུང་པའི་རྒྱུན་ཙམ་གྲགས་པར་འགྱུར་ཏེ། དེ་ཡང་མིང་དང་གཟུགས་ཀྱི་རྐྱེན་གྱིས་ཡིན་པར་དགོངས་པ་ཡིན་ནོ། །སྐྱེ་མཆེད་རྣམས་སོ་ཞེས་མང་པོའི་ཚིག་ཕྱུང་ནས་སྒྲ་སྦྱར་ན་ནི་སྐྱེ་མཆེད་དྲུག་རྣམས་སོ་ཞེས་བྱ་བ་འགྲུབ་པར་འགྱུར་ཏེ། ཇི་ལྟར་རྩ་བ་ལྔ་རྣམས་སོ་ཞེས་བྱ་བ་ལྟ་བུའོ། །བདག་ཡོད་པ་མ་ཡིན་ན་ཇི་ལྟར་ན་ནང་གི་ཞེས་བྱ་ཞེ་ན། དེའི་ཕྱིར་འདི་དག་ལ་བདག་ཏུ་ང་རྒྱལ་སྐྱེད་པར་བྱེད་པས་བདག་ནི་སོ་སོའི་ལུས་དང་སེམས་ཀྱི་རྒྱུན་ཡིན་ཏེ། དེའི་དབང་དུ་བྱས་པ་ཡིན་པས་ན་ཞེས་བྱའོ་ཞེས་རྒྱས་
བར་སྨོས་སོ། །འདི་དག་ལ་བདག་ཏུ་ང་རྒྱལ་སྐྱེད་པར་བྱེད་པས་བདག་གོ་ཞེས་བྱ་བ་ནི་ངེས་པའི་ཚིག་གི་ཚུལ་གྱིས་སོ། །དེ་གང་ཞེ་ན། དེའི་ཕྱིར་སོ་སོའི་ལུས་དང་སེམས་ཀྱི་རྒྱུན་ཡིན་ཏེ་ཞེས་སྨྲས་སོ། །བདག་དེའི་དབང་དུ་ཆེད་དུ་བྱས་ཏེ་ནང་ཞེས་བྱའོ། །དེར་བྱུང་བ་ཞེས་བྱ་བ་ནི་ནང་དེར་བྱུང་བའི་སྐྱེ་མཆེད་གང་ཡིན་པ་སྟེ། སྐྱེ་མཆེད་དྲུག་དེ་ནི་ནང་གི་ཞེས་བྱའོ། །རྒྱུ་མཚན་བདུན་པ་ཡིན་པའི་ཕྱིར་རོ་ཞེས་བྱ་བ་ནི་དེར་བྱུང་བ་ཞེས་བྱ་བ་བདུན་པ་ཡིན་པའི་བདུན་པ་དེ་ནི་རྒྱུ་མཚན་གྱི་བདུན་པ་ཡིན་པའི་ཕྱིར་རོ། །ཇི་ལྟ་ཞེ་ན། དེའི་ཕྱིར་བྱུང་བ་དང་དེའི་རྒྱུ་མཚན་དུ་བྱུང་བ་ལ་དེར་བྱུང་བ་ཞེས་བྱ་བ་ཡིན་ནོ། །གཟུགས་ལ་སོགས་པ་ནི་མ་ཡིན་ཏེ། གཞན་གྱི་རྣམ་པར་ཤེས་པའི་རྒྱུ་དང་ཐུན་མོང་ཡིན་པའི་ཕྱིར་རོ་ཞེས་བྱ་བ་ལ་སོགས་པ་ནི་ནང་གི་སྐྱེ་མཆེད་མ་ཡིན་ཏེ། འདི་ལྟར་དེ་ནི་གཞན་དག་གི་རྣམ་པར་ཤེས་པའི་རྒྱུ་དང་ཐུན་མོང་ཡིན་པ་དང་སྐྱེ་མཆེད་ཀྱང་ངོ༌། །ཡང་ན་ནང་ཉིད་ནང་གི་ཡིན་ཏེ། རྣམ་པར་གདུལ་བར་བྱ་བ་ལ་སོགས་པ་བཞིན་ནོ་ཞེས་བྱ་བ་ནི་བདག་གི་ཆེད་དུ་བྱས་པའི་སྐྱེ་མཆེད་གང་ཡིན་པ་དེ་ནི་ནང་གི་ཞེས་བྱ་སྟེ། ཇི་ལྟར་བུད་མེད་ཀྱི་ཆེད་དུ་བྱས་པ་གང་ཡིན་པ་དེ་ནི་བུད་མེད་ཀྱི་ཆེད་དུ་ཡིན་པ་བཞིན་ནོ། །ནང་ཉིད་ནང་གི་ཡིན་ཏེ། དེ་ནི་རང་གི་དོན་ཉིད་ཡིན་པར་སྟོན་པ་དེ་ཡིན་ནོ། །ཇི་ལྟར་གདུལ་བྱ་ཉིད་གདུལ་བར་བྱ་བ་ཡིན་པ་དང༌། ཚུལ་བཟང་ཉིད་ཚུལ་བཟང་བ་པ་ཡིན་པ་དང༌། དམ་ཚིག་ཉིད་དམ་ཚིག་པ་ཡིན་པ་དང༌། བྱེ་བྲག་ཉིད་བྱེ་བྲག་པ་ཡིན་པ་བཞིན་ནོ། །དེ་ལྟར་བྱས་ན་དེར་བྱུང་བ་ཞེས་བྱ་བ་ཡང་བརྗོད་དགོས་པར་འགྱུར་རོ། །བདག་གི་སྒྲ་ལྷག་པར་སྔར་བྱས་པའམ་ཞེས་བྱ་བ་ཇི་ལྟ་བུ་ཞེ་ན། བདག་ཏུ་ང་རྒྱལ་ལྷག་པར་འདི་ཉིད་ལ་སྐྱེད་པའི་སོ་སོའི་ལུས་དང་སེམས་ཀྱི་རྒྱུན་ནི་ངེས་པའི་ཚིག་གི་ཚུལ་གྱི་ནང་ཡིན་ནོ། །དེའི་དགོས་པ་ཡིན་པ་ནི་དེའི་ཆེད་ཡིན་པ་དང་སོ་སོའི་ལུས་དང་སེམས་ཀྱི་རྒྱུན་གྱི་དོན་ཡིན་པ་དང༌། དེ་སྐྱེ་བའི་རྒྱུན་གྱི་རྒྱུ་མཚན་ནི་ནང་གི་ཞེས་བྱ་བ་ཡིན་ནོ། །དེ་ལྟར་བྱས་ན་བདག་གི་ཆེད་དུ་ཞེས་བྱ་བ་ཡང་བརྗོད་པར་མ་དགོས་པར་འགྱུར་རོ། །ཕྱི་རོལ་ནི་དེ་ལས་གཞན་ཡིན་ནོ་ཞེས་བྱ་བ་ནི་ནང་གི་མཚན་ཉིད་ཇི་སྐད་དུ་བསྟན་པ་དེ་ལས་ཞེས་བྱ་བའི་ཐ་ཚིག་གོ །འབྱུང་བའི་དོན་
ནི་སྐྱེ་མཆེད་ཀྱི་དོན་ཏེ་ཞེས་བྱ་བ་ནི་འདི་ནས་འགྲོ་བས་ན་སྐྱེ་ཞེས་བྱ་བ་འབྱུང་ཞེས་བྱ་བར་མངོན་པ་ཡིན་ནོ། །རྒྱས་པས་ན་མཆེད་པ་སྟེ། རྒྱ་ཆེར་གྱུར་ཅེས་བྱ་བའི་ཐ་ཚིག་གོ །སྐྱེ་བ་ཉིད་མཆེད་པ་ཡིན་པས་སྐྱེ་མཆེད་དོ། །ཡང་ན་འོང་བས་ན་སྐྱེ་ཞེས་བྱ་སྟེ། འབྱུང་བ་ཞེས་བྱ་བའི་དོན་གང་ཡིན་པའོ། །འབྱུང་བ་དེ་མཆེད་པར་བྱེད་པས་སྐྱེ་མཆེད་དེ་འབྲས་བུའི་རྒྱུན་འབྱུང་བར་བྱེད་ཅེས་བྱ་བའི་དོན་གང་ཡིན་པའོ། །དེ་ལྟར་ན་འབྱུང་བའི་དོན་ནི་སྐྱེ་མཆེད་ཀྱི་དོན་ཡིན་ནོ་ཞེས་བྱ་བ་ཡིན་ནོ། །གཞན་དག་ན་རེ་སྒོའི་དོན་ཡིན་ཏེ་ཞེས་བྱ་བ་ཅི་ཞེ་ན། སྐྱེ་མཆེད་ཀྱི་དོན་ཏོ་ཞེས་བྱ་བའི་སྐབས་དང་སྦྱར་རོ། །དེ་དག་གིས་ཕྱི་རོལ་རྣམས་གང་གི་སྒོ་ཡིན་པར་བརྗོད་པར་བྱ་དགོས་སོ་ཞེས་བྱ་བ་ནི་སྐྱེ་མཆེད་སྒོའི་དོན་ཡིན་པར་སྨྲ་བ་དེ་དག་གིས་ཕྱི་རོལ་གཟུགས་ལ་སོགས་པ་རྣམས་གང་ཞིག་མཐོང་བར་བྱ་བའི་ཕྱིར་སྒོ་ཞེས་བརྗོད་པར་བྱ་དགོས་སོ། །གཞན་དག་ནི་མིག་གི་གཟུགས་ཡིན་པས་གཟུགས་རྣམས་མཐོང་བར་བྱ་བའི་ཕྱིར་མིག་སྒོ་ཡིན་པར་ནི་རིགས་ན་གཟུགས་ནི་གང་ཞིག་མཐོང་བར་བྱ་བའི་ཕྱིར་གང་གི་སྒོ་ཡིན། དེ་ཉིད་དེ་ཉིད་ཀྱིས་མཐོང་བར་བྱེད་པའི་སྒོ་ཡིན་པར་ནི་རིགས་པ་མ་ཡིན་ནོ། །དོན་ནི་རྒྱུའི་རྣམ་གྲངས་ཀྱི་སྒྲ་ཡིན་པའི་ཕྱིར་སྒོའི་སྒྲ་ནི་གཟུགས་མཐོང་བའི་རྒྱུ་ཡིན་པའི་ཕྱིར་གཟུགས་རྣམས་མཐོང་བར་བྱ་བའི་ཕྱིར་སྒོ་གཟུགས་ཡིན་ནོ་ཞེས་བསྟན་པ་ཡིན་ནོ། །དེ་ལྟར་བྱས་ན་འབྱུང་བའི་དོན་ཉིད་སྐྱེ་མཆེད་ཀྱི་དོན་ཡིན་ནོ་ཞེས་སྨྲས་པ་ཡིན་པས་དེད་ལ་ཅི་གནོད། སྒྲ་ལ་སོགས་པ་ལ་ཡང་དེ་བཞིན་སྦྱར་རོ། །གཞན་དག་ན་རེ་གནས་ཀྱི་དོན་ཡིན་ཏེ། ལྷའི་སྐྱེ་མཆེད་བཞིན་ནོ་ཞེས་བྱ་བ་ནི་ཇི་ལྟར་ལྷའི་གནས་ལ་ལྷའི་སྐྱེ་མཆེད་ཅེས་བྱ་བ་བཞིན་ནོ། །མིག་གཉིས་ལས་རྣམ་པར་ཤེས་པ་གཅིག་སྐྱེ་ན་དེའི་གནས་གང་ཡིན་ཞེས་བྱ་བ་ནི་མིག་གཉི་ག་ཡང་སྐྱེ་མཆེད་ཡིན་པའི་ཕྱིར་དང༌། གཉི་ག་ཡང་རྒྱུ་གཙོ་བོ་ཡིན་པའི་ཕྱིར་མིག་གི་རྣམ་པར་ཤེས་པ་དེའི་གནས་གཅིག་ཅིག་ཡིན་པར་ནི་འགྲུབ་པར་མི་འགྱུར་རོ། །དེའི་ཕྱིར་གཉི་ག་ཡིན་ནོ་ཞེ་ན་ཞེས་རྒྱས་པར་སྨྲས་ཏེ། གཉི་ག་ཡང་མིག་གི་རྣམ་པར་ཤེས་པ་དེའི་གནས་ཡིན་ནོ་ཞེ་ན། བར་ན་དེ་མེད་པའི་ཕྱིར་ཞེས་བྱ་བ་མིག་དེ་མེད་པའི་ཕྱིར་ཞེས་བྱ་བའི་དོན་ཏེ། རྣམ་པར་ཤེས་པ་ཡང་རྣམ་པ་གཉིས་སུ་འགྱུར་ཏེ། དེའི་རྣམ་པར་ཤེས་པ་རྣམ་པ་གཉིས་སུ་
འགྱུར་རོ་ཞེས་བྱ་བའི་ཐ་ཚིག་གོ །ཡང་ན་དེ་ཡང་དེའི་གནས་ཡིན་ནོ་ཞེས་བྱ་བ་ནི་དེའི་བར་ན་ཡང་ཡོད་ན་ནི་རྣམ་པ་ཐམས་ཅད་དུ་རྣམ་པར་ཤེས་པ་ཆ་ཤས་དང་བཅས་པ་ཡིན་པར་འགྱུར་ཏེ། བྱེ་བྲག་པ་ཡན་ལག་ཅན་སྨྲ་བ་དག་དང་མཐུན་པའི་ཕྱིར་རོ། །གཅིག་པུ་དུ་མ་ལ་བརྟེན་པར་སྨྲ་བ་འདི་ཡང་ངོ་མཚར་ཆེའོ། །གཉི་ག་ལས་གཅིག་སྐྱེ་བ་མ་ཡིན་ནོ་ཞེ་ན་ཡང་ཞེས་བྱ་བ་ནི་འོན་ཏེ་འདི་སྙམ་དུ་མིག་གི་རྣམ་པར་ཤེས་པ་གཅིག་མིག་གཉི་ག་ལས་སྐྱེ་བ་མ་ཡིན་ནོ་སྙམ་ན་དེ་ཡང༌། མི་རུང་སྟེ་གཉིས་ཀྱིས་ཞེས་རྒྱས་པར་འབྱུང་བ་ཡིན་ཏེ། མིག་གཉིས་ཀྱིས་ནི་ཤིན་ཏུ་གསལ་བ་ཡིན་ཏེ། མཐོང་བ་ཤིན་ཏུ་གསལ་བ་ཞེས་བྱ་བའི་དོན་གང་ཡིན་པའོ། །གཅིག་གིས་ནི་གསལ་བ་མ་ཡིན་པར་མངོན་སུམ་དུ་གྲུབ་པ་ཡིན་ནོ། །དེ་བས་ན་གཅིག་གིས་རིམ་གྱིས་མཐོང་བ་མ་ཡིན་ནོ། །མིག་ཕྱེ་བ་དང་ཕྱེད་བཙུམས་པ་གཉིས་ཀྱིས་ཅིག་ཅར་ཞེས་རྒྱས་པར་འབྱུང་བ་ནི་མིག་གཅིག་ཕྱེ་བ་དང༌། གཅིག་ཕྱེད་བཙུམས་པ་ནི་མིག་བྱེ་བ་དང་ཕྱེད་བཙུམས་པ་སྟེ། གལ་ཏེ་གཅིག་ནས་མཐོང་བ་ཡིན་ན་ཡ་གཅིག་ཕྱེ་བ་དང་ཡ་གཅིག་ཕྱེད་བཙུམས་པ་དེ་གཉིས་ཀྱིས། ཅིག་ཅར་དུས་གཅིག་ཏུ་ཟླ་བ་གཉིས་ལ་སོགས་པ་མཐོང་བར་མི་འགྱུར་རོ། །ཇི་ལྟར་མིག་གཉི་ག་ཕྱེ་བས་ཅིག་ཅར་དུ་མ་ཡིན་པ་དང༌། གཉི་ག་ཕྱེད་བཙུམས་པས་ཅིག་ཅར་དུ་མ་ཡིན་པ་བཞིན་ནོ། །གཉི་ག་འབྱུང་བ་ཡང་ཡོད་དེ་དེ་བས་ན་དེ་ལྟ་བུ་ཡིན་ན་ནི་དེའི་རྒྱུ་ཡིན་ནོ་ཞེས་ངེས་པར་བྱར་རུང་ངོ༌། །ཕྱི་རོལ་གྱི་མ་ཟིན་པ་རྣམས་ཀྱང་ཞེས་རྒྱས་པར་འབྱུང་བ་ནི་ཕྱི་རོལ་གྱི་གཟུགས་ལ་སོགས་པ་མ་ཟིན་པ་རྣམས་ཀྱང་ཇི་ལྟར་གནས་ཉིད་ཡིན། གང་གི་ཕྱིར་གནས་ཀྱི་དོན་གྱིས་དེ་དག་སྐྱེ་མཆེད་ཅེས་རྗོད་པར་བྱེད། མ་ཟིན་པ་སྨོས་པས་ནི་དབང་པོ་དང་ལྷན་ཅིག་འདུག་པ་བསལ་བའི་ཕྱིར་ཏེ། དེ་དག་དབང་པོ་དང་ལྷན་ཅིག་འདུག་པའི་ཕྱིར་གནས་ཀྱི་དོན་ནི་སྐྱེ་མཆེད་ཀྱི་དོན་ཏེ་ཞེས་བྱ་བར་འགྲུབ་བོ། །ཡིད་ཀྱི་རྣམ་པར་ཤེས་པ་དང་དུས་མི་མཚུངས་པའི་ཡིད་དང་ཆོས་གཉིས་ཀྱང་ཇི་ལྟར་གནས་ཉིད་ཡིན་ཞེས་བྱ་བའི་སྐབས་ཡིན། ཡོད་ལ་དུས་མཚུངས་པ་ཡིན་ན་ནི་གནས་ལ་གནས་པ་པོ་གནས་སོ་ཞེས་མངོན་སུམ་དུ་འགྲུབ་པ་ཡིན་ན་ཡིད་ནི་འདས་མ་
ཐག་པ་ཡིན་པས་ཡད་པ་མ་ཡིན་ནོ། །ཆོས་ནི་འདས་པ་དང་མ་འོངས་པ་ཡིན་པས་ཡོད་པ་མ་ཡིན་ན་ཇི་ལྟར་དེ་ལ་ཡིད་ཀྱི་རྣམ་པར་ཤེས་པ་གནས་པ་ཡིན། ལྷའི་གནས་བཞིན་དུ་མིག་ལ་སོགས་པ་ནི་གནས་ཉིད་མ་ཡིན་ཏེ་ཞེས་བྱ་བ་ནི་དཔེར་ན་མ་ཟིན་པ་རྣམས་སྐྱེ་མཆེད་ཉིད་ཡིན་པ་དང༌། ཡིད་དང་ཆོས་གཉིས་ཀྱང་སྐྱེ་མཆེད་ཡིན་པར་འདོད་པ་བཞིན་ནོ། །ལུས་ཅན་མ་ཡིན་ཞིང་གཟུགས་ཅན་ཡིན་པའི་ཆོས་རྣམས་ཀྱི་གནས་ཞེས་རྒྱས་པར་འབྱུང་བ་ལ། ལུས་ཅན་མ་ཡིན་པ་ན་ལུས་མེད་པའོ། །གཟུགས་ཅན་མ་ཡིན་པ་ནི་གཟུགས་ཀྱི་མཚན་ཉིད་ཀྱི་ལུས་ལ་བྱེ་བྲག་ཏུ་གྱུར་པའོ། །ལུས་ཅན་མ་ཡིན་པ་ལ་ནི་དེ་དག་གི་རང་གི་མཚན་ཉིད་ཀྱི་ལུས་མེད་པ་མ་ཡིན་ནོ། །དེ་ཉིད་ཀྱི་ཕྱིར་དགུ་བརྒྱ་པ་ལས་གསུངས་པ་ཡིན་ནོ། །དེ་བས་ན་ལུས་ཅན་མ་ཡིན་ཞིང་གཟུགས་ཅན་མ་ཡིན་པའི་ཆོས་རྣམས་ཀྱི་གནས་རྣམ་པར་གཞག་པར་ནུས་པ་མ་ཡིན་ནོ། །འོ་ན་བདག་གི་ཀླད་པའི་ཕྱིར་དུ་ཚོར་རོ། །བདག་གི་ཀླད་པའི་ཕྱེད་དུ་ཚོར་རོ་ཞེས་བྱ་བ་འདི་ཇི་ལྟར་ཡོངས་སུ་གཅོད་ཅི་ན་ཞེས་རྒྱས་པར་འབྱུང་བ་ལ། ལུས་ཀྱི་ཕྱོགས་དེ་དག་ན་དེ་ཡོད་པའི་ཡུལ་ལས་ཞེས་བྱ་བ་ནི་ལུས་ཀྱི་ཕྱོགས་དེ་དག་ལས་ཞེས་བྱ་བའི་ཐ་ཚིག་གོ །དེ་སྐྱེ་བའི་ཕྱིར་རོ་ཞེས་བྱ་བ་ནི་ཚོར་བ་དེ་སྐྱེ་བའི་ཕྱིར་ཅི་ཞེ་ན། བདག་གི་ཀླད་པར་ཚོར་རོ་བདག་གི་ཀླད་པའི་ཕྱེད་དུ་ཆོར་རོ་ཞེས་ཡོངས་སུ་གཅོད་པར་བྱེད་དོ། །འདི་ནི་དེ་ལྟ་བུ་ཁོ་ན་ཡིན་ཏེ་ཞེས་རྒྱས་པར་འབྱུང་བ་ནི་ནད་ཅན་གྱི་ལུས་ཀྱི་ཕྱོགས་ལ་ལག་པའི་སོར་མོའི་རྩེ་མོའམ། གཞན་གང་ཡང་རུང་བས་མ་བཟུང་བར་ཚོར་བའི་རང་བཞིན་ཡོངས་སུ་གཅོད་པ་མེད་དོ། །དེ་བས་ན་རྣམ་པ་དེ་དག་གིས་ནི་ལུས་ཀྱི་ཕྱོགས་དེ་དག་ན་དེ་ཡོད་པའི་ཡུལ་ལས་དེ་སྐྱེ་བའི་ཕྱིར་ཚོར་བའི་ཡུལ་ཡོངས་སུ་གཅོད་པར་མངོན་པའི་ང་རྒྱལ་བྱེད་དོ་ཞེས་བྱ་བ་གྲུབ་པ་ཡིན་ནོ། །འདིས་ནི་ནད་ཅན་གྱི་ལུས་ཀྱི་ཕྱོགས་ན་དེ་གནས་པ་ནི་ལག་པ་ལ་སོགས་པའི་ཡུལ་ཡིན་པར་བསྒྲུབས་པ་ཡིན་ནོ། །རྒྱུ་ལ་ཡང་གནས་ཞེས་བྱ་བ་ནི་གནས་ཀྱི་དོན་ཉིད་སྐྱེ་མཆེད་ཀྱི་དོན་ཡིན་ལ། གནས་ཀྱི་དོན་ཡང་འདིར་རྒྱུའི་དོན་ཡིན་ནོ་ཞེས་སྟོན་པར་བྱེད་ཀྱི། གནས་ཀྱི་དོན་ལྷའི་གནས་ལྟ་བུ་ནི་མ་ཡིན་ནོ། །གནས་ཀྱི་དོན་རྒྱུའི་དོན་ཡིན་པར་ཇི་ལྟར་གང་དུ་མཐོང་ཞེ་ན།
ཇི་སྐད་དུ་ཚིགས་སུ་བཅད་པ་ལས། བདེན་པར་སྨྲ་ཞིང་ཁྲོ་མི་བྱེད། །སློང་ལ་ཆུང་ཡང་སྦྱིན་པར་བྱེད། །རྣམ་པ་འདི་གསུམ་གནས་ཀྱིས་ནི། །ལྷ་ཡི་ནང་དུ་སྐྱེ་བར་འགྱུར། །ཞེས་གསུངས་ཏེ། རྒྱུ་འདི་གསུམ་གྱིས་ཞེས་བྱ་བར་མངོན་པ་ཡིན་ནོ། །རྣམ་པར་ཤེས་པའི་ཚོགས་དྲུག་རྣམས་སྐྱེ་བ་མཆེད་པར་བྱེད་པས་སྐྱེ་མཆེད་དེ་ཞེས་བྱ་བ་ནི་རྒྱ་ཆེར་བྱེད་ཅེས་བྱ་བའི་དོན་གང་ཡིན་པའོ། །དེ་ཉིད་ཀྱི་ཕྱིར། དེ་སྐྱེ་བའི་རྒྱུན་གྱི་རྒྱུ་ཡིན་པའི་ཕྱིར་རོ་ཞེས་སྨྲས་ཏེ། རྣམ་པར་ཤེས་པའི་ཚོགས་དྲུག་སྐྱེ་བའི་རྒྱུན་གྱི་རྒྱུ་ཡིན་པའི་ཕྱིར་ཞེས་བྱ་བའི་དོན་ཏོ། །དེ་སྐྱེ་བའི་རྒྱུན་ནི་རྒྱས་པ་དང༌། འོང་བ་དང༌། སྐྱེ་བའོ། །རྣམ་པར་ཤེས་པའི་ཚོགས་དྲུག་སྐྱེ་བ་ནི་དེའི་རྒྱུན་རྒྱས་པ་ཡིན་ནོ། །དེའི་ཕྱིར་རྒྱུན་གྱི་རྒྱུ་ཡིན་པའི་ཕྱིར་རྣམ་པར་ཤེས་པའི་ཚོགས་རྣམས་སྐྱེ་བ་མཆེད་པར་བྱེད་པས་སྐྱེ་མཆེད་དོ་ཞེས་བྱ་བ་ནི་ངེས་པའི་ཚིག་ཡིན་ནོ། །དེ་ལ་གཟུགས་དང༌། སྒྲ་དང༌། དྲི་དང༌། རོ་དང༌། རེག་བྱ་ཡུལ་གཟུགས་དང་བའི་བྱེ་བྲག་མིག་ལ་སོགས་པ་ལྔ་གོ་རིམས་བཞིན་ནོ་ཞེས་བྱ་བ་འདི་ལ་གཟུགས་ལ་སོགས་པ་ཡུལ་ཞེས་བྱ་བ་འདིས་ནི་གཟུགས་ཀྱི་སྐྱེ་མཆེད་དུ་དང་བ་བསྡུས་པར་འགྱུར་བ་བསལ་བ་ཡིན་ཏེ། འདི་དག་ནི་གཟུགས་ལ་སོགས་པ་ཡུལ་མ་ཡིན་ནོ་ཞེས་ངེས་པར་བྱའོ། །གོ་རིམས་བཞིན་ནོ་ཞེས་བྱ་བ་ཡང་ཇི་ལྟ་བུ་ཞེ་ན། གཟུགས་ལ་སོགས་པ་ལྔ་དང༌། མིག་ལ་སོགས་པ་ལྔ་ཉིད་གོ་རིམས་བཞིན་དུ་བྱ་བར་ནུས་པ་ཡིན་ནོ། །བྱེ་བྲག་སྨོས་པ་ནི་ཡུལ་དང་འདྲེས་པར་འགྱུར་བ་བསལ་བའི་ཕྱིར་རོ། །གཟུགས་དང་བ་ཉིད་ཀྱི་བྱེ་བྲག་ཀྱང་དེ་དག་ལ་ཡོད་པ་ཡིན་ཏེ། དང་བའི་བྱེ་བྲག་ཅན་ཁ་ཅིག་གི་ཡུལ་ནི་གཟུགས་ཡིན། ཁ་ཅིག་གི་ཡུལ་ནི་སྒྲའོ། །དེ་བཞིན་དུ་དྲི་དང་རོ་དང་རེག་བྱ་ཡུལ་ཡིན་ནོ། །དེ་དག་ཀྱང་རང་གི་ཡུལ་ལ་དམིགས་པར་བྱེད་པར་ཡོད་དོ་ཞེས་བྱ་བ་ནི་ཡིད་ཆེས་པའི་ལུང་དང་རིགས་པས་ངེས་པར་བྱར་རུང་སྟེ། ཇི་སྐད་དུ་མིག་གི་དབང་པོ་གང་ཞེ་ན། མིག་གི་རྣམ་པར་ཤེས་པའི་རྟེན་ནི་གཟུགས་དང་བའོ་ཞེས་བྱ་བ་རྒྱས་པར་འབྱུང་པ་དང༌། མིང་དང་གཟུགས་ལ་བརྟེན་ནས་མིག་གི་རྣམ་པར་ཤེས་པ་སྐྱེ་བ་ནས་ལུས་དང་རེག་བྱ་ལ་བརྟེན་ནས་ལུས་ཀྱི་རྣམ་པར་ཤེས་པ་སྐྱེའོ་ཞེས་བྱ་བའི་བར་དུ་གསུངས་པ་ཐམས་ཅད་ཡིན་ཏེ། ལོང་བ་ལ་སོགས་པ་ལ་གཟུགས་ལ་སོགས་པ་
མཐོང་བ་མེད་པའི་ཕྱིར་གཟུགས་ལ་སོགས་པའི་ཡུལ་ལ་གཟུགས་དང་བའི་བྱེ་བྲག་མིག་ལ་སོགས་པ་ཡོད་དོ་ཞེས་བྱ་བ་འགྲུབ་པ་ཡིན་ནོ། །ཅིའི་ཕྱིར་འདི་ལས་རེག་བྱ་ཡུལ་ཞེས་རྒྱས་པར་འབྱུང་བ་ནི་ཅིའི་ཕྱིར་རྟེན་ཅིང་འབྲེལ་པར་འབྱུང་བའི་མདོ་སྡེ་འདི་ལས་རེག་བྱ་ཡུལ་དང་བའི་བྱེ་བྲག་ལུས་ཞེས་བྱ་བ་སྟེ། ཇི་ལྟར་ལུས་ལ་ལུས་ཞེས་བྱ་བ་བཞིན་དུ་གཟུགས་ལ་སོགས་པ་ཡུལ་དང་བའི་བྱེ་བྲག་མིག་ལ་སོགས་པ་ནི་ལུས་ཞེས་མ་བསྟན་ལ། ཇི་ལྟར་ན་འདི་ལས་ཡུལ་རེག་བྱ་དང་བའི་བྱེ་བྲག་ལུས་ཡིན་ནོ་ཞེས་བསྟན་ཏེ། ལུས་ཀྱི་སྐྱེ་མཆེད་ཅེས་གསུངས་པའི་ཕྱིར་རོ་ཞེ་ན། དེའི་ཕྱིར། ལུས་ལ་ཁྱབ་པ་ཉིད་ཀྱི་ཕྱིར། །ཞེས་སྨྲས་ཏེ། འདི་ལྟར་ལུས་འདི་ནི་ལུས་ཀྱི་མཚན་ཉིད་ལ་ཁྱབ་པར་གནས་པ་ཡིན་གྱི་མིག་ལ་སོགས་པ་ནི་མ་ཡིན་ནོ། །དེ་བས་ན་གནས་ནི་གནས་པ་ལ་བསྟན་པའམ། ལུས་བཞིན་དུ་གནས་ཡིན་པས་ལུས་ཀྱི་སྐྱེ་མཆེད་ཅེས་བྱའོ། །རྡུལ་ཕྲ་མོ་བསགས་པའི་བྱེ་བྲག་ཅན་ཡིན་བའི་ཕྱིར་རོ་ཞེས་བྱ་བ་ནི་ཅི་ཞེ་ན། ལུས་ཡིན་ནོ་ཞེས་བྱའོ། །མིག་ལ་སོགས་པ་རྟེན་ཀྱང་རྡུལ་ཕྲ་མོ་བསགས་པ་ཡིན་མོད་ཀྱི། འདི་ནི་རྡུལ་ཕྲ་མོ་བསགས་པ་བྱེ་བྲག་ཅན་ཡིན་ནོ། །བྱེ་བྲག་ཅན་ཉིད་ནི་ཕལ་ཆེ་བའི་ཕྱིར་རོ། །ཁྱད་པར་དུ་གྱུར་པ་འདིས་ན་བསགས་པ་གང་ཡིན་པ་དེ་ནི་ལུས་ཡིན་པར་འདི་ལས་གསུངས་པ་ཡིན་ནོ་ཞེས་སྟོན་པ་ཡིན་གྱི། ཐམས་ཅད་དམ་མིག་ལ་སོགས་པ་ཐམས་ཅད་ནི་བསགས་པའི་དོན་གྱིས་ལུས་ཞེས་མི་བྱའོ། །བྱེ་བྲག་ཏུ་བྱ་བའི་ཕྱིར་ནི་མིག་གི་སྐྱེ་མཆེད་དང་ཞེས་བྱ་བ་ནས་ལྕེའི་སྐྱེ་མཆེད་དང་ཞེས་བྱ་བའི་བར་དུ་བྱེ་བྲག་གི་མིང་སྟོན་ཏོ། །དེ་བས་ན་བྱེ་བྲག་དུ་ཡང་བྱས་པ་ཡིན་ལ། ལུས་ཀྱི་མིང་ཡང་ཡིན་པ་དེ་ནི་དེ་ཉིད་ཀྱིས་བྱེ་བྲག་ཏུ་བྱེད་པ་ནི་ལུས་ཀྱི་སྐྱེ་མཆེད་ཅེས་བྱའོ། །གང་གི་ཚེ་ལུས་ཀྱི་ཚོར་བ་ཞེས་སྟོན་པ་དེའི་ཚེ་ནི་མིག་ལ་སོགས་པ་ལྔ་ལ་ཡང་མིང་ལུས་ཞེས་བྱའོ། །ཅིའི་ཕྱིར་ཞེ་ན། དེའི་ཕྱིར་རེ་རེ་ཡང་རྡུལ་ཕྲ་མོ་བསགས་པ་ཡིན་པའི་ཕྱིར་དང་ཞེས་སྨྲས་ཏེ། མིག་ལ་སོགས་པ་ལ་བྱ་བར་མངོན་ཏེ། བསགས་པའི་དོན་གྱིས་ལུས་ཞེས་བརྗོད་པ་ནི་ཐུན་མོང་གི་ཚིག་ཡིན་པའི་ཕྱིར་རོ། །ལུས་ལ་གནས་པ་ཉིད་ཀྱི་ཕྱིར་རོ་ཞེས་བྱ་བ་ནི་ལྔ་ཆར་ཡང་མིང་ལུས་
ཞེས་བྱ་སྟེ་ཞེས་བྱ་བའི་སྐབས་དང་སྦྱར་ཏེ། གནས་ནི་གནས་པ་ལ་ཉེ་བར་བཏགས་པའི་ཕྱིར་རོ། །དེ་ཉིད་ཀྱི་ཕྱིར། གནས་ལ་གནས་འདོགས་པ་ཡང་ཡོད་དོ། །ཁྲིའུ་སྨྲ་བ་དང་རི་འཛག་པ་དང་ཞེས་སྨྲས་ཏེ། ཁྲིའུའི་སྟེང་ན་མི་འདུག་པ་ལ་ཁྲིའུ་རུ་ཉེ་བར་བཏགས་ནས་འདི་སྐད་དུ་ཁྲིའུ་སྨྲའོ་ཞེས་བྱ་བ་དང༌། རི་ལ་ཡོད་པའི་ཆུ་ལ་རིར་ཉེ་བར་བཏགས་ནས་རི་འཛག་གོ་ཞེས་ཟེར་ཡང་རི་འཛག་པ་ནི་མ་ཡིན་ནོ། །བྱམས་པ་དང་ལྡན་པའི་སེམས་ཀྱིས་ཕྱོགས་གཅིག་ལ་མོས་པར་བྱས་ནས་ཞེས་བྱ་བ་འདིར་ཡང་ཕྱོགས་གཅིག་ན་གནས་པའི་སྲོག་ཆགས་ལ་ཕྱོགས་གཅིག་གི་སྒྲར་བསྟན་པ་ཡིན་ཏེ། བྱམས་པས་སེམས་ཅན་ལ་དམིགས་པའི་ཕྱིར་རོ། །སྐྱེ་མཆེད་ལྔ་བསྟན་ཟིན་ཏོ། །དྲུག་པ་ཡིད་ཀྱི་སྐྱེ་མཆེད་བརྗོད་པར་བྱེད་པ་ནི། ཡིད་ཀྱི་སྐྱེ་མཆེད་ཀྱི་ཕུང་པོའི་ནང་དུ་ནི་རྣམ་པར་ཤེས་པའི་ཕུང་པོ་གང་ཡིན་པའོ་ཞེས་བྱ་བ་ནི་རྣམ་པར་ཤེས་པའི་ཚོགས་དྲུག་གི་མཚན་ཉིད་དོ། །ཁམས་ཀྱི་ནང་དུ་ནི་ཡིད་ཀྱི་ཁམས་གང་ཡིན་པ་རྣམ་པར་གཞག་པ་དང༌། རྣམ་པར་ཤེས་པའི་ཁམས་དྲུག་གོ །དེ་ལྟར་བྱས་ན་རྣམ་པར་ཤེས་པ་དྲུག་གི་མཚན་ཉིད་ནི་ཡིད་ཀྱི་སྐྱེ་མཆེད་དུ་བསྟན་པ་ཡིན་ནོ། །དེ་དག་ལས་གཞན་གང་ཞིག་ཡིད་ཀྱི་ཁམས་ཡིན་ཞེ་ན་ཞེས་བྱ་བ་ནི་རྣམ་པར་ཤེས་པའི་ཁམས་དྲུག་དེ་དག་ལས་ཞེས་བྱ་བའི་ཐ་ཚིག་གོ །གཞན་ནི་གང་ཡང་མེད་ཀྱི་དེ་དག་གང་ཡིན་པ་ཉིད་ཅེས་རྒྱས་པར་འབྱུང་བ་ནི་ཇི་སྐད་དུ། དྲུག་པོ་འདས་མ་ཐག་པ་ཡིན། །རྣམ་ཤེས་གང་ཡིན་དེ་ཡོད་དོ། །ཞེས་སྟོན་ཏོ། །རྣམ་པར་ཤེས་པ་དྲུག་པའི་གནས་བསྟན་པའི་ཕྱིར་རོ་ཞེས་བྱ་བ་མིག་ལ་སོགས་པའི་རྣམ་པར་ཤེས་པའི་གནས་ནི་མིག་ལ་སོགས་པ་ལྔ་པོ་ཉིད་གོ་རིམས་བཞིན་དུ་ཡིན་ན་དྲུག་པ་ཡིད་ཀྱི་རྣམ་པར་ཤེས་པའི་གནས་ནི་རྣམ་པར་ཤེས་པའི་ཚོགས་དྲུག་ལ་མ་གཏོགས་པར་ཡོད་པ་མ་ཡིན་པས་དེའི་གནས་བསྟན་པར་བྱ་བའི་ཕྱིར་དྲུག་པོས་འདས་མ་ཐག་པ་དེ་དག་ཉིད་ཡིད་ཀྱི་ཁམས་ཡིན་པར་རྣམ་པར་གཞག་སྟེ། ཇི་སྐད་དུ་ཆོས་མངོན་པའི་མཛོད་ལས། དྲུག་པའི་གནས་ནི་གྲུབ་བྱའི་ཕྱིར། ཁམས་ནི་བཅོ་བརྒྱད་རྣམས་སུ་དྲན། །ཞེས་སྟོན་ཏོ། །དེ་ལྟར་ཡིན་དུ་ཟིན་
ཀྱང་མིང་དང་གཟུགས་ཀྱི་ཚེ་སྐྱེ་མཆེད་དྲུག་ཡོད་པ་མ་ཡིན་ན་ཞེས་བྱ་བ་ནི་མིང་དང་གཟུགས་ཀྱི་གནས་སྐབས་ན་མངལ་དུ་ངེས་པར་འཆི་བ་རྣམས་ཀྱིའོ། །སྐྱེ་མཆེད་དྲུག་ཐམས་ཅད་ཀྱི་དང་པོ་ནི་མིང་དང་གཟུགས་ཀྱི་རྐྱེན་གྱིས་ཡིན་པར་ངེས་པར་བྱའོ་ཞེས་བྱ་བ་ནི་རྫུས་ཏེ་བྱུང་བ་རྣམས་ཀྱི་སྐྱེ་མཆེད་དྲུག་གི་དང་པོ་ནི་མིང་དང་གཟུགས་ཀྱི་རྐྱེན་གྱིས་མ་ཡིན་ན། ཇི་ལྟར་འདི་སྐད་དུ་ཐམས་ཅད་ཀྱི་ཞེས་སྨྲ་བར་བྱེད་ཅེ་ན། འདིར་ནི་སྐྱེ་བའི་རིམ་པ་ཡོངས་སུ་རྫོགས་པའི་དབང་དུ་བྱས་ཏེ་བསྟན་པ་ཡིན་ནོ། །དང་པོ་ནི་ཞེས་བྱ་བ་ནི་སྐད་ཅིག་མ་དང་པོའོ། །སྐད་ཅིག་མ་གཉིས་པ་ལ་སོགས་པ་གཞན་ནི་སྐྱེ་མཆེད་དྲུག་གི་རྐྱེན་གྱིས་སྐྱེ་མཆེད་དྲུག་ཉིད་ཡིན་པས་སོ། །མིང་དང་གཟུགས་ཐམས་ཅད་སྐྱེ་མཆེད་དྲུག་གི་རྐྱེན་མ་ཡིན་ནོ་ཞེས་བྱ་བ་ཅི་ཞེ་ན་ངེས་པར་བྱའོ་ཞེས་བྱ་བའི་སྐབས་དང་སྦྱར་རོ། །འདིས་ནི་མིང་དང་གཟུགས་ཀྱི་གནས་སྐབས་ཉིད་དུ་ངེས་པར་འཆི་བ་རྣམས་ཀྱི་མིང་དང་གཟུགས་ནི་སྐྱེ་མཆེད་དྲུག་གི་རྐྱེན་ཉིད་མ་ཡིན་པར་བསྟན་པ་ཡིན་ནོ། །སྤྲིན་ལས་ཆར་ལ་སོགས་པ་བཞིན་དུ་ཞེས་བྱ་བ་ནི་དཔེར་ན་ཆར་པ་ཐམས་ཅད་ནི་སྤྲིན་གྱི་རྐྱེན་གྱིས་ཡིན་པར་ངེས་པ་ཡིན་གྱི། སྤྲིན་ཐམས་ཅད་ཆར་པའི་རྐྱེན་ནི་མ་ཡིན་ནོ། །འབྲས་བུ་ཐམས་ཅད་མེ་ཏོག་གི་རྐྱེན་གྱིས་ཡིན་ཏེ། མེ་ཏོག་ལས་བྱུང་བའི་འབྲས་བུའི་དབང་དུ་བྱས་པ་ཡིན་གྱི། མེ་ཏོག་ཐམས་ཅད་འབྲས་བུའི་རྐྱེན་ནི་མ་ཡིན་ནོ། །ནར་ནར་པོ་ཐམས་ཅད་ནུར་ནུར་པོའི་རྐྱེན་གྱིས་ཡིན་པར་ངེས་པ་ཡིན་ཏེ། མངལ་གྱིས་བསྡུས་པའི་ནར་ནར་པོ་ནི་ནུར་ནུར་པོའི་རྐྱེན་གྱིས་ཡིན་པར་ངེས་པ་ཡིན་ཏེ། མངལ་གྱིས་བསྡུས་པའི་ནུར་ནུར་པོའི་དབང་དུ་བྱས་པ་ཡིན་ནོ། །ནུར་ནུར་པོ་ཐམས་ཅད་ནི་ནར་ནར་པོའི་རྐྱེན་མ་ཡིན་ཏེ། དེ་དག་བཞིན་ནོ། །ཇི་ལྟར་དེའི་རྐྱེན་གྱིས་སྐྱེ་མཆེད་དྲུག་ཡིན་ཞེ་ན་ཞེས་བྱ་བ་ནི་མིང་དང་གཟུགས་ཀྱི་རྐྱེན་གྱིས་སྐྱེ་མཆེད་བཞི་ནི་དེའི་རྐྱེན་གྱིས་ཡིན་པར་བརྗོད་པར་བྱ་དགོས་ཏེ། ལུས་དང་ཡིད་ཀྱི་སྐྱེ་མཆེད་གཉིས་ནི་མིང་དང་གཟུགས་ཀྱི་གནས་སྐབས་ཉིད་ནི་ཡོད་པ་ཡིན་པའི་ཕྱིར་རོ། །མངོན་པར་འགྲུབ་པ་དང་ཡོངས་སུ་རྫོགས་པའི་རྐྱེན་ཡིན་པའི་ཕྱིར་ཇི་ལྟར་རིགས་པར་སྦྱར་ཏེ་ཞེས་བྱ་བ་ནི་ཇི་ལྟར་འོས་པར་སྦྱར་རོ། །ཇི་ལྟར་ཡིན་ཞེ་ན། མིག་ལ་སོགས་པ་མངོན་པར་འགྲུབ་པའི་རྐྱེན་ཡིན་པའི་ཕྱིར་དང༌། ལུས་དང་ཡིད་
ཀྱི་སྐྱེ་མཆེད་གཉིས་ཡོངས་སུ་རྫོགས་པའི་རྐྱེན་ཡིན་པའི་ཕྱིར་རོ། །རེ་ཞིག་མིག་ལ་སོགས་པ་མངོན་པར་འགྲུབ་པའི་རྐྱེན་མིང་དང་གཟུགས་ཡིན་པ་ནི་གྲུབ་པ་ཡིན་ཏེ། མིག་ལ་སོགས་པ་སྔར་མེད་པའི་ཕྱིར་རོ། །ལུས་དང་ཡིད་ཀྱི་སྐྱེ་མཆེད་ཡོངས་སུ་རྫོགས་པའི་རྐྱེན་ཇི་ལྟར་ཡིན་ཞེ་ན། དེའི་ཕྱིར། མིག་ལ་སོགས་པ་མངོན་པར་གྲུབ་པའི་གནས་སྐབས་ན་ནི་ཞེས་རྒྱས་པར་སྨྲས་སོ། །བཞི་པོ་དེ་ལ་གནས་པ་ཡོངས་སུ་རྫོགས་པའི་ཕྱིར་ཞེས་བྱ་བ་ནི་མིག་ལ་སོགས་པ་རྣམས་ལུས་ཀྱི་སྐྱེ་མཆེད་ལ་གནས་པའི་ཕྱིར་རོ་ཞེས་བྱ་བའི་ཐ་ཚིག་གོ །མིག་ལ་སོགས་པ་ནི་ལུས་ཀྱི་ཕྱོགས་ཀྱི་འབྱུང་བ་ཆེན་པོ་ལ་བརྟེན་པ་ཡིན་གྱི་ལུས་ཀྱི་སྐྱེ་མཆེད་ལ་བརྟེན་པ་ནི་མ་ཡིན་ཏེ། འབྱུང་བ་ལས་གྱུར་པ་ནི་འབྱུང་བ་ལས་གྱུར་པ་ལ་བརྟེན་པ་ནི་མ་ཡིན་གྱི། འོ་ན་ཅི་ཞེ་ན། འབྱུང་བ་ལ་བརྟེན་པ་ཡིན་ན། བཞི་པོ་དེ་དག་དེ་ལ་བརྟེན་པའི་ཕྱིར་རོ་ཞེས་བྱ་བ་ཇི་ལྟར་བརྗོད་ཅེ་ན། དེའི་ཕྱིར། དེ་དང་འབྲེལ་བར་འཇུག་པ་ཡིན་པའི་ཕྱིར་རོ་ཞེས་སྨྲས་ཏེ། མིག་ལ་སོགས་པ་ནི་ལུས་ཀྱི་སྐྱེ་མཆེད་དང་འབྲེལ་པར་འཇུག་པ་ཉིད་ཡིན་པ་བཟུང་ནས་ཞེས་བྱ་བའི་དོན་གང་ཡིན་པ་སྟེ། ལུས་ཀྱི་སྐྱེ་མཆེད་མ་ལུས་པར་འགགས་པ་ལ་མིག་ལ་སོགས་པ་གནས་པ་མེད་པའི་ཕྱིར་རོ། །ཡིད་ཀྱི་སྐྱེ་མཆེད་ཡོངས་སུ་རྫོགས་པ་ཡིན་ཏེ། གནས་ཡོངས་སུ་རྫོགས་པའི་ཕྱིར་རོ་ཞེས་བྱ་བ་ནི་མིག་ལ་སོགས་པ་ནི་ཡིད་ཀྱི་སྐྱེ་མཆེད་ཀྱི་གནས་ཡིན་ནོ། །དེ་དག་ཀྱང་དེའི་ཚེ་ཡོངས་སུ་རྫོགས་པ་ཡིན་ནོ། །ཡིད་ཀྱི་སྐྱེ་མཆེད་ཀྱང་གནས་ཡོངས་སུ་རྫོགས་པ་དེའི་ཚེ་ཁོ་ན་ཡོངས་སུ་རྫོགས་པ་ཡིན་ཏེ། མཐའ་དག་ཡིན་པའི་ཕྱིར་རོ། །དེ་ཉིད་ཀྱི་ཕྱིར། རྣམ་པར་ཤེས་པ་དྲུག་གིས་བསྡུས་པ་ཡིད་ཀྱི་སྐྱེ་མཆེད་ཀྱི་གནས་ནི་དེའི་ཚེ་ཡོངས་སུ་རྫོགས་པ་ཡིན་ནོ་ཞེས་སྨྲས་སོ། །དེ་ལྟར་མ་བསྟན་ན་ནི་ཞེས་རྒྱས་པར་འབྱུང་བ་ནི་ཇི་ལྟར་མ་བསྟན་ཞེ་ན། མིང་དང་གཟུགས་ཀྱི་རྐྱེན་གྱིས་སྐྱེ་མཆེད་དྲུག་ཅེས་བྱ་བར་རོ། །སྐྱེ་མཆེད་བཞིའི་སྐབས་ཡིན་པའི་ཕྱིར་དང་ཞེས་བྱ་བ་ནི་དེ་སྐད་དུ་མ་བརྗོད་ན་མིང་དང་གཟུགས་ཀྱི་རྐྱེན་གྱིས་སྐྱེ་མཆེད་བཞིའི་རྐྱེན་གྱིས་རེག་པ་ཞེས་དེ་སྐད་དུ་བརྗོད་པར་བྱ་དགོས་པར་འགྱུར་རོ། །ཅིའི་ཕྱིར་ཞེ་ན། སྐྱེ་མཆེད་བཞིའི་སྐབས་ལ་བབ་པ་ཡིན་པས་སྐྱེ་
མཆེད་དྲུག་གི་རྐྱེན་གྱིས་རེག་པ་ཞེས་བརྗོད་པར་ནུས་པ་མ་ཡིན་ཏེ། སྐྱེ་མཆེད་དྲུག་གི་སྐབས་མེད་པའི་ཕྱིར་རོ། །རེག་པའི་གནས་ཡོངས་སུ་མ་རྫོགས་པར་བསྟན་པ་ཡིན་པའི་ཕྱིར་རོ་ཞེས་བྱ་བ་ནི་གནས་སྐྱེ་མཆེད་དྲུག་ནི་སྐྱེ་མཆེད་བཞིའི་མཚན་ཉིད་དུ་གྱུར་པའི་སྐྱོན་འདི་འདིར་ཡོད་པས་སོ། །རེག་པ་གང་ཞེ་ན། རེག་པའི་ཚོགས་དྲུག་གོ་ཞེས་བྱ་བ་ཡང་བརྗོད་པར་ནུས་པ་མ་ཡིན་ནོ་ཞེས་བྱ་བ་ནི་རེག་པའི་ཡན་ལག་རྣམ་པར་དབྱེ་བའི་དབང་དུ་བྱས་ནས་སྐྱེ་མཆེད་བཞི་བསྟན་པ་ཡིན་པའི་ཕྱིར་སྟོན་པའི་ཚེ་རིག་པའི་ཚོགས་བཞིའོ་ཞེས་བརྗོད་པར་བྱ་དགོས་པར་འགྱུར་རོ། །འདི་ཉིད་ཀྱི་ཕྱིར་མངོན་པར་གྲུབ་པ་དང༌། ཡོངས་སུ་རྫོགས་པ་མཐའ་དག་གི་རྐྱེན་ཉིད་ཡིན་པའི་ཕྱིར་ཞེས་བྱ་བ་ཇི་ལྟར་རིགས་པར་ཡིན་ནོ། །གཙོ་བོའི་རྒྱུ་བསྟན་པའི་ཕྱིར་ཏེ། ཇི་སྐད་དུ་སྔར་བསྟན་པ་ཡིན་ནོ་ཞེས་བྱ་བ་ནི་རྣམ་པར་ཤེས་པའི་ཡན་ལག་གི་ཚེ་ཐུན་མོང་དང་ཐུན་མོང་མ་ཡིན་པའི་ཕྱིར་རོ་ཞེས་རྒྱས་པར་འབྱུང་བ་ཡིན་ནོ། །ཆོས་མངོན་པའི་མཛོད་ལས་ཀྱང༌། དེ་གྱུར་ན་ནི་རྣམ་འགྱུར་ཕྱིར། །མིག་ལ་སོགས་པ་གནས་ཡིན་ནོ། །ཞེས་བསྟན་པ་ཡིན་ཏེ། དེར་ཡང་གཙོ་བོའི་རྒྱུའི་དོན་ཉིད་གནས་ཀྱི་དོན་ཡིན་པར་ཡོངས་སུ་བསྟན་ཏེ། འབྲས་བུ་ནི་གཙོ་བོའི་རྒྱུ་རྣམ་པར་འགྱུར་བའི་རྗེས་སུ་བྱེད་པ་ཡིན་པའི་ཕྱིར་རོ། །ཁ་ཅིག་རྟོག་པ་མིང་དང་གཟུགས་ཀྱི་གནས་སྐབས་ན་ཞེས་རྒྱས་པར་འབྱུང་བ་ནི་གལ་ཏེ་ཉིད་འཚམས་སྦྱོར་བའི་སྐད་ཅིག་མ་ནས་བརྩམས་ཏེ། མིང་དང་གཟུགས་ཀྱི་གནས་སྐབས་ན། ལུས་ཀྱི་སྐྱེ་མཆེད་དང་ཡིད་ཀྱི་སྐྱེ་མཆེད་ཡོད་དོ་ཞེས་སྨྲ་བ་གང་ཡིན་བ་དེའི་ལན་དུ། མིང་དང་གཟུགས་ཀྱི་གནས་སྐབས་ན་ལུས་ཡོད་ཀྱང་ལུས་ཀྱི་སྐྱེ་མཆེད་མ་ཡིན་ལ། ཡིད་ཡོད་ཀྱང་ཡིད་ཀྱི་སྐྱེ་མཆེད་མ་ཡིན་ནོ་ཞེས་བྱ་བ་ཡིན་ནོ། །རེག་པའི་གནས་ནི་སྐྱེ་མཆེད་ཅེས་བྱ་བ་ཡིན་ཞེས་བྱ་བ་ནི་མིང་ལ་སོགས་པའི་སྐྱེ་མཆེད་ཉིད་ཡིན་པར་གཏན་ཚིགས་སྟོན་པ་ནི་མདོ་སྡེ་ལས། རེག་པའི་སྐྱེ་མཆེད་ཅེས་གསུངས་པའི་ཕྱིར་རོ། །དེ་བས་ན་མིང་དང་གཟུགས་ཀྱི་གནས་སྐབས་ན་དེ་གཉིས་སྐྱེ་མཆེད་མ་ཡིན་ཏེ། རེག་པ་མེད་པའི་ཕྱིར་རོ། །འདིར་སྐྱེ་མཆེད་ཡིན་པའི་མིང་དང་གཟུགས་རྐྱེན་ཡིན་པར་བརྗོད་པར་བཞེད་པས་སྐྱེ་མཆེད་དྲུག་ནི་དེའི་རྐྱེན་གྱིས་ཡིན་ནོ་
ཞེས་བྱའོ། །རེག་པ་ནི་དེའི་ཚེ་ཡོད་པ་མ་ཡིན་ནོ་ཞེས་བྱ་བ་ནི་མིང་དང་གཟུགས་ཀྱི་གནས་སྐབས་ནའོ། །མདོ་སྡེ་འདི་ཉིད་ལས་ཞེས་བྱ་བ་ནི་རྟེན་ཅིང་འབྲེལ་བར་འབྱུང་བ་ནི་མདོ་སྡེ་འདི་ལས་ཡིན་ཏེ། འདི་ལས་ནི་སྐྱེ་མཆེད་དྲུག་གི་རྐྱེན་གྱིས་རེག་པ་ཞེས་སྐྱེ་མཆེད་དྲུག་གི་འོག་ཏུ་རེག་པ་བསྟན་གྱི་སྔར་ནི་མ་ཡིན་ནོ། །དེ་ནི་ཁུངས་སུ་མི་རུང་སྟེ་གསུངས་པ་དེ་ནི་དགོངས་པ་ཅན་ཡིན་པའི་ཕྱིར་རོ་ཞེས་བྱ་བ་ནི་འདི་ལྟར་གོང་ཉིད་དུ་སྐྱེ་མཆེད་དྲུག་གི་རྐྱེན་ཉིད་དུ་མིང་དང་གཟུགས་ལ་བསམས་ཏེ། མངོན་པར་གྲུབ་པ་དང་ཡོངས་སུ་རྫོགས་པའི་རྐྱེན་ཡིན་པའི་ཕྱིར་ཇི་ལྟར་རིགས་པར་ཡིན་ནོ་ཞེས་ངེད་ཀྱིས་བསྟན་ཟིན་ཏོ། །འདིས་ནི་སྐྱེ་མཆེད་དྲུག་ནི་རེག་པའི་རྐྱེན་ཉིད་ཡིན་པར་བསམས་སྨྲས་པ་ཡིན་ཏེ། གནས་ཡོངས་སུ་རྫོགས་ན་དེའི་ཚེ་རིག་པ་ཡོངས་སུ་རྫོགས་པ་ཡིན་ནོ། །མིང་དང་གཟུགས་ཀྱི་གནས་སྐབས་ན་རེག་པ་མེད་པ་མ་ཡིན་ནོ། །གལ་ཏེ་ཡང་དེའི་ཚེ་རིག་པ་མེད་པར་གྱུར་ན་ཞེས་རྒྱས་པར་འབྱུང་བ་ནི་གལ་ཏེ་ཡང་མིང་དང་གཟུགས་ཀྱི་གནས་སྐབས་ན་དེའི་ཚེ། རེག་པ་མེད་པར་གྱུར་ན་ཚོར་བ་ལ་སོགས་པ་ཡང་མེད་པར་འགྱུར་ཏེ། ཚོར་བ་ལ་སོགས་པའི་རྐྱེན་རེག་པ་ཡིན་པའི་ཕྱིར་རོ།། །།རྟེན་ཅིང་འབྲེལ་པར་འབྱུང་བའི་དང་པོ་དང་རྣམ་པར་དབྱེ་བ་བསྟན་པ་རྒྱ་ཆེར་འགྲེལ་པ། བམ་པོ་བདུན་པ། ཚོར་བའི་ཕུང་པོ་གང་ཡིན་པ་དང་འདུ་ཤེས་ཀྱི་ཕུང་པོ་དང༌། འདུ་བྱེད་ཀྱི་ཕུང་པོ་གང་ཡིན་པ་དེ་ཐམས་ཅད་རེག་པ་ལ་བརྟེན་ནས་ཡིན་ནོ་ཞེས་མདོ་སྡེ་ལས་གསུངས་པའི་ཕྱིར། །ཚོར་བ་ལ་སོགས་པ་མེད་ན་ཉེས་པ་ཅི་ཡོད་ཅེ་ན། དེའི་ཕྱིར་རྣམ་པར་ཤེས་པའི་རྐྱེན་གྱིས་མིང་དང་གཟུགས་ཞེས་བྱ་བའི་མིང་གང་ཞེ་ན། གཟུགས་ཅན་མ་ཡིན་པའི་ཕུང་པོ་བཞི་སྟེ་ཞེས་བསྟན་པ་འདི་དང་ཡང་འགལ་བར་འགྱུར་རོ་ཞེས་སྨྲས་སོ། །མིང་དང་གཟུགས་ཀྱི་གནས་སྐབས་ན་ཚོར་བ་ལ་སོགས་པ་མེད་ན་ནི་ཇི་ལྟར་ན་མིང་ཕུང་པོ་བཞི་ཡིན་ཏེ། དེ་ཕུང་པོ་གཅིག་ཡིན་པར་འགྱུར་ཏེ། རྣམ་པར་ཤེས་པ་ཙམ་ཡོད་པའི་ཕྱིར་རོ། །ཡང་ན་གལ་ཏེ་སེམས་དང་ལྡན་པ་མ་ཡིན་པ་ཡོད་ན་ནི་ཕུང་པོ་གཉིས་ཡིན་ཏེ། དེ་དག་འདུ་བྱེད་ཀྱི་ཕུང་པོས་བསྡུས་པའི་ཕྱིར་རོ། །མིང་མཐའ་དག་ལ་དགོངས་ནས་དེ་
སྐད་དུ་རྣམ་པར་ཕྱེ་བ་ཡིན་ནོ་ཞེ་ན་ཡང་ཞེས་བྱ་བ་དེར་འདི་སྙམ་དུ་ཚེ་གཅིག་རིལ་མཐའ་དག་གི་མིང་ལ་དགོངས་ནས་མིང་གང་ཞེ་ན། གཟུགས་ཅན་མ་ཡིན་པའི་ཕུང་པོ་བཞིའོ་ཞེས་ད་སྐད་དུ་རྣམ་པར་ཕྱེ་བ་ཡིན་ནོ་ཞེ་ན། མི་རུང་སྟེ་སྐྱེ་མཆེད་དྲུག་གི་རྐྱེན་དུ་གྱུར་པའི་མིང་དང་གཟུགས་འདིར་བརྗོད་པར་བཞེད་པའི་ཕྱིར་ཡིན་གྱི། ཚེ་མཐའ་དག་གི་མིང་ལ་དགོངས་ནས་དེ་སྐད་དུ་རྣམ་པར་ཕྱེ་བ་ནི་མ་ཡིན་ཏེ། འདི་ལྟར་རྟེན་ཅིང་འབྲེལ་བར་འབྱུང་བའི་མདོ་སྡེ་འདི་ལས་སྐྱེ་མཆེད་དྲུག་གི་རྐྱེན་དུ་གྱུར་པའི་མིང་དང་གཟུགས་བརྗོད་པར་བཞེད་པ་ཡིན་གྱི་གཞན་ནི་མ་ཡིན་ནོ། ཚེ་མཐའ་དག་གི་མིང་དང་གཟུགས་ཀྱང་སྐྱེ་མཆེད་དྲུག་གི་རྐྱེན་མ་ཡིན་པས་དེ་རྣམ་པར་ཕྱེ་བ་འདི་མ་ཡིན་པར་ངེས་པར་བྱའོ། །ཅིའི་མིང་གཟུགས་ཤེ་ན། འདི་རྣམ་པར་ཤེས་པའི་རྐྱེན་གྱིས་མིང་དང་གཟུགས་ཞེས་བརྗོད་པར་བཞེད་པའི་ཕྱིར་རོ། །འདི་ལྟར་ཁ་ཅིག་ནི་ཚེ་མཐའ་དག་གི་མིང་དང་གཟུགས་ནི་རྣམ་པར་ཤེས་པའི་རྐྱེན་གྱིས་ཡིན་པར་འདོད་དེ་འདིར་ཡང་འདི་ལ་དགོངས་པ་ཡིན་གྱི་ཞེས་བྱ་བ་ནི་ཕུང་པོ་བཞི་པའི་མིང་དང་གཟུགས་བསྟན་པ་འདིར་ཡང་མིང་མཐའ་དག་ལ་དགོངས་ནས་དེ་སྐད་དུ་རྣམ་པར་ཕྱེ་བ་ཡིན་ནོ་ཞེས་བྱ་བ་འདི་ལ་དགོངས་པ་ཡིན་ནོ། །སྐྱེ་མཆེད་དྲུག་གི་ཚིག་དེ་ལ་དགོངས་པ་མ་ཡིན་ནོ་ཞེས་བྱ་བ་ནི་འདི་སྐད་དུ་མངོན་པར་འགྲུབ་པ་དང་ཡོངས་སུ་རྫོགས་པའི་རྐྱེན་ཡིན་པའི་ཕྱིར་ཇི་ལྟར་རིགས་པར་ཡིན་ནོ་ཞེས་གང་སྨྲས་པ་དེ་ལ་དགོངས་པ་མ་ཡིན་ནོ། །མིང་མཐའ་དག་ལ་དགོངས་ནས་དེ་ལྟར་རྣམ་པར་ཕྱེ་བ་ཡིན་ནོ་ཞེས་དེ་ལ་དགོངས་པ་ཡིན་ན་ནི་དགོངས་པ་འདི་ལྡོག་པར་འགྱུར་ཏེ། སྔར་མིང་དང་གཟུགས་ཀྱི་གནས་སྐབས་ཉིད་ན་སྐྱེ་མཆེད་གཉིས་ཡོད་པ་དེ་བས་ན་རེག་པ་ཡང་ཡོད་པའི་ཕྱིར་ཚོར་བ་ལ་སོགས་པ་ཡང་ཡོད་པ་ཡིན་པས་མིང་དང་གཟུགས་ཀྱིས་བསྡུས་པ་ཉིད་ཡིན་གྱི་དེ་ལྟ་མ་ཡིན་ན་མིང་ཕུང་པོ་བཞི་པར་ཇི་ལྟར་འགྲུབ་པར་འགྱུར། དེ་ལ་གཏན་ཚིགས་ཅི་ཡོད་ཅེས་སྨྲས་པའི་གཏན་ཚིགས་ནི། རྒྱུ་ཆེན་པོའི་རྣམ་གྲངས་ལས་མཐའ་དག་སྨོས་པའི་ཕྱིར་རོ་ཞེས་སྨྲས་ཏེ། འདི་ལྟར་རྒྱུ་ཆེན་པོའི་རྣམ་གྲངས་ལས་ཚེ་གཅིག་མ་ལུས་པ་མཐའ་དག་གི་རྣམ་པར་ཤེས་པའི་རྐྱེན་གྱིས་མིང་དང་གཟུགས་སྨོས་པ་ཡིན་ཏེ། ཇི་ལྟ་ཞེ་ན། གལ་ཏེ་ཁྱེའུ་འམ་བུ་མོའི་རྣམ་པར་
ཤེས་པ་ཆད་ཅིང་ཞིགས་ཏེ་མེད་པར་གྱུར་ན་དེའི་མིང་དང་གཟུགས་རྒྱ་ཆེ་བ་དང་འཕེལ་བ་དང༌། ཡངས་པར་འགྱུར་རམ་ཞེས་བྱ་བ་ཡིན་ནོ་ཞེ་ན། གཞན་དུ་དེ་རྣམ་པར་གཞག་པའི་ཕྱོགས་དེ་ནི་ལན་བཏབ་ཟིན་ཏེ། ཇི་སྐད་དུ་རྣམ་པར་ཤེས་པའི་ཡན་ལག་རྣམ་པར་དབྱེ་བ་ལས་དེ་འདུ་བྱེད་ཀྱི་རྐྱེན་གྱིས་རྣམ་པར་ཤེས་པ་ལ་དགོངས་ནས་བསྟན་པ་མ་ཡིན་ནོ་ཞེས་རྒྱས་པར་སྨྲས་པ་ཡིན་ནོ། །གཞན་ཡང་གལ་ཏེ་རེག་པའི་སྔ་རོལ་དུ་སེམས་ལས་བྱུང་བའམ་ཞེས་རྒྱས་པར་འབྱུང་བ་ནི་གལ་ཏེ་རེག་པའི་སྔ་རོལ་དུ་དེའི་གནས་སྐབས་ན་མིང་དང་གཟུགས་ཀྱི་གནས་སྐབས་ན། སེམས་ལས་བྱུང་བ་ཚོར་བ་ལ་སོགས་པ་ཡོད་པ་མ་ཡིན་ཞིང་མི་ལྡན་པ་སྲོག་གི་དབང་པོ་ལ་སོགས་པའི་རྫས་ཡོད་པ་མ་ཡིན་ན་དེའི་ཚེ་འདུ་བྱེད་ཀྱིས་ཡོངས་སུ་བསྒོས་པའི་རྣམ་པར་ཤེས་པའི་རྐྱེན་གྱིས་མིང་ཕུང་པོ་བཞི་པ་གང་ཞིག་ཡིན་པ་བརྗོད་པར་བྱ་དགོས་ཏེ་ནུར་ནུར་པོ་ལ་སོགས་པའི་གནས་སྐབས་ན་རེག་པ་མེད་ན་ཡང་ཚོར་བ་ལ་སོགས་པ་ཡང་ཡོད་པ་མ་ཡིན་ནོ། །རེག་པའི་འོག་ཏུ་ཡང་མིང་ཇི་ལྟར་ཡིན་ན་རྣམ་པ་གང་གིས་མིང་ཕུང་པོ་བཞི་པ་ཡོད་པར་འགྱུར། རྒྱུ་ཆེན་པོའི་རྣམ་གྲངས་ལས་མཐའ་དག་སྨོས་པའི་ཕྱིར་རོ་ཞེས་སྨྲས་པ་གང་ཡིན་པ་དེར་ཡང་མིང་དང་གཟུགས་མ་གཏོགས་པར་རྣམ་པར་ཤེས་པ་ཡོད་པར་བྱ་དགོས་ཤིང༌། རྣམ་པར་ཤེས་པ་ལ་མ་གཏོགས་པར་ཡང་ཕུང་པོ་ལྔ་པའི་མིང་དང་གཟུགས་ཡོད་པར་བྱ་དགོས་ན་ཚོར་བ་ལ་སོགས་པ་དང་མཚུངས་པར་ལྡན་པའི་རྣམ་པར་ཤེས་པའི་ཕུང་པོ་དེ་ནི་མིང་ཕུང་པོ་བཞི་པ་ཡིན་ནོ་ཞེས་བརྗོད་པ་ཡང་རིགས་པ་མ་ཡིན་ཏེ། དེའི་རྐྱེན་མེད་པའི་ཕྱིར་དང༌། མིང་ཉིད་མིང་གི་རྐྱེན་མ་ཡིན་ཞིང་རྣམ་པར་ཤེས་པ་ཡང་རྣམ་པར་ཤེས་པའི་རྐྱེན་མ་ཡིན་པའི་ཕྱིར་རོ། །དེ་བས་ན་གཉིས་པོ་དེ་འདོད་པར་བྱོས་ཤིག་ཅེས་བྱ་བ་ནི་གང་གི་ཕྱིར་དེ་ལྟར་རེག་པའི་སྔ་རོལ་དུ་མིང་ཡོད་པ་མ་ཡིན་ཏེ། ནུར་ནུར་པོ་ལ་སོགས་པའི་གནས་སྐབས་ན་རེག་པ་མེད་པའི་ཕྱིར་རོ། །རེག་པའི་འོག་ཏུ་ཡང་ཚོར་བ་ལ་སོགས་པའི་གནས་སྐབས་ན་ཕུང་པོ་བཞི་པའི་མིང་ཡོད་པར་མི་འགྱུར་ཏེ། མིང་དང་གཟུགས་ལ་མ་གཏོགས་པའི་རྣམ་པར་ཤེས་པ་མེད་པའི་ཕྱིར་རོ། །
དེ་བས་ན་དེ་གཉིས་ནི་འདོད་པར་བྱ་དགོས་པ་ནི་འདི་ལྟ་སྟེ་རེག་པའི་སྔ་རོལ་མིང་དང་གཟུགས་ཀྱི་གནས་སྐབས་ན་རེག་པ་དང་རེག་པའི་འོག་ཏུ་ཚོར་བ་ལ་སོགས་པའི་གནས་སྐབས་ན་ཀུན་གཞི་རྣམ་པར་ཤེས་པའོ། །དེ་ལྟར་བྱས་ན་ཅིར་འགྱུར་ཞེ་ན། ནུར་ནུར་པོ་ལ་སོགས་པའི་གནས་སྐབས་ན་མིང་འགྲུབ་པར་འགྱུར་རོ། །རེག་པའི་འོག་ཏུ་ཡང་ཚོར་བ་ལ་སོགས་པའི་གནས་སྐབས་ན་ཕུང་པོ་བཞི་པའི་མིང་འགྲུབ་པར་འགྱུར་རོ། །དེ་ལྟར་བྱས་ན་གང་ཡང་རྒྱུ་ཆེན་པོའི་རྣམ་གྲངས་ནམ་མ་ཤིའི་བར་དུ་མིང་དང་གཟུགས་ནི་རྣམ་པར་ཤེས་པའི་རྐྱེན་གྱིས་ཡིན་ནོ་ཞེས་བྱ་བ་དེ་རུད་བར་འགྱུར་ཏེ། ཕུང་པོ་བཞི་པའི་མིང་ལམ་གཏོགས་པར་ཀུན་གཞི་རྣམ་པར་ཤེས་པ་ཡོད་པའི་ཕྱིར་རོ། །དེ་ལས་སྐྱེས་པའི་ཚོར་བ་དང་འདུ་ཤེས་དང་འདུ་བྱེད་དང༌། རྣམ་པར་ཤེས་པ་འདི་ནི་མིང་ཡིན་ཏེ་ཞེས་རྒྱས་པར་འབྱུང་བ་ནི་ལུས་ཀྱི་བདག་ཉིད་ནུར་ནུར་པོ་དེ་ལས་སྐྱེ་བའམ་དེར་སྐྱེས་པས་ན་དེ་ལས་སྐྱེས་པ་ཞེས་བྱ་སྟེ། ནུར་པོ་ནུར་པོའི་གནས་སྐབས་ན་རེག་པ་ཡོད་པའི་ཁུངས་ནི་མདོ་སྡེ་འདི་ཡིན་ཏེ། རེག་པ་མེད་པར་ཚོར་བ་ལ་སོགས་པ་ཡོད་པ་མ་ཡིན་ནོ། །དེ་ལྟར་ན་ནི་ལུས་དང་ཡིད་གཉིས་ཀྱང་སྐྱེ་མཆེད་ཉིད་ཡིན་པར་དེའི་ཚེ་འགྲུབ་པར་འགྱུར་རོ། །ཡང་གསུངས་པ་དེ་དེའི་དུས་ཀྱི་ཚེ་དབང་པོ་གསུམ་འཐོབ་པར་འགྱུར་ཏེ་ཞེས་རྒྱས་པར་འབྱུང་བ་ནི་མངལ་དུ་འཇུག་པའི་མདོ་སྡེ་དེ་ཉིད་ལས་ཡང་གསུངས་པ་ནུར་ནུར་པོ་ལ་སོགས་པའི་གནས་སྐབས་དེའི་དུས་ཀྱི་ཚེ་དེས་དབང་པོ་གསུམ་འཐོབ་པ་ནི་ལུས་ཀྱི་དབང་པོ་དང༌། ཡིད་ཀྱི་དབང་པོ་དང༌། སྲོག་གི་དབང་པོ་སྟེ། དེ་ནི་སྐྱེ་མཆེད་དྲུག་གནད་དུ་འདུས་པའི་དབང་པོ་ལུས་ཀྱི་དབང་པོ་དང༌། ཡིད་ཀྱི་དབང་པོ་དག་གཞི་དང་བཅས་པའི་དབང་དུ་བྱས་ཏེ་ཞེས་བྱ་བ་ནི་གཉི་གའི་གཞི་ཡང་སྲོག་གི་དབང་པོ་གང་ཡིན་པ་དེ་ཡིན་ཏེ། དེ་ལ་བརྟེན་ཏེ་འཇུག་པ་ཉིད་ཡིན་པའི་ཕྱིར་རོ། །དེ་ལྟ་མ་ཡིན་ན་དོན་གྱི་ཚུལ་མེད་པའི་ཕྱིར་རོ་ཞེས་བྱ་བ་ནི་དེའི་ཚེ་ཚོར་བ་བཏང་སྙོམས་ཀྱི་དབང་པོ་ཡོད་དུ་ཟིན་ཀྱང་དབང་པོ་འདི་གསུམ་ཁོ་ན་བསྟན་པ་ནི་འདིའི་དོན་གྱི་ཚུལ་རྣམ་པ་གཞན་དུ་མི་སྲིད་པའི་ཕྱིར་རོ། །ཅིའི་ཕྱིར་སྐྱེ་མཆེད་དྲུག་གི་ནང་དུ་འདུས་པ་ཁོ་ན་བསྟན་གྱི་གཞན་མ་ཡིན་ཞེ་ན། མིང་དང་གཟུགས་ཀྱི་འོག་ཏུ་སྐྱེ་མཆེད་དྲུག་ཁོ་ན་སྐྱེ་བ་ཡིན་གྱི་གཞན་མ་ཡིན་པས་སོ། །དགེ་
འདུན་ཕལ་ཆེར་སྡེ་པ་དག་འདོན་པ། རྨོངས་པ་དང་ནི་སྲེད་པ་དག །ཅེས་རྒྱས་པར་འབྱུང་བ་ནི་རྨོངས་པ་དང༌། སྲེད་པ་གཉི་ག་ཡང་མ་སྤངས་པ་ཉིད་ཡིན་ཏེ། དེ་ལས་སྐྱེས་པའི་ལས་ཀྱི་རྣམ་པར་སྨིན་པ་ནི་མའི་མངལ་དུ་གནས་པ་ཡིན་ནོ། །སེམས་ལས་བྱུང་བའི་ཆོས་གང་ཡིན་པ་དེ་དག་ནི་མིང་ཡིན་པར་བསྟན་ཏེ། འདི་ནི་ནུར་ནུར་པོའི་གནས་སྐབས་ན་རེག་པ་ཇི་ལྟར་ཡོད་པའི་ཁུངས་འདིར་ཡིན་ནོ། །དེ་གཉི་ག་ཡང་ཞེས་བྱ་བ་ནི་མངལ་དུ་འཇུག་པའི་མདོ་སྡེ་དང༌། གནས་བརྟན་གྱི་མདོ་སྡེའོ། །ཀྱེ་མ་རང་གི་ལྟ་བ་མཆོག་ཏུ་འཛིན་པ་ལ་གནས་པ་དག་ཅེས་བྱ་བ་ནི་རང་གི་ལྟ་བ་ལ་མཆོག་ཏུ་འཛིན་པ་ནི་རང་གི་ལྟ་བ་མཆོག་ཏུ་འཛིན་པའོ། །དེ་ལ་གནས་པའི་ངང་ཚུལ་ཡོད་པ་གང་དག་ཡིན་པ་ཞེས་སྦྱར་རོ། །ཉི་ཚེ་བ་ཐ་དད་པ་དེ་དག་གི་ལུང་དང་ཞེས་རྒྱས་པར་འབྱུང་བ་ནི་ཉི་ཚེ་བ་ཐ་དད་པ་དག་གི་ལུང་དང༌། འདོན་པ་ཐ་དད་པ་རྣམས་གལ་ཏེ་བསྡུས་པའི་རྩ་བ་ཉམས་པ་མ་ཡིན་ན་ཇི་ལྟར་ལུང་ཐ་དད་པ་དང༌། འདོན་པ་ཐ་དད་པར་འགྱུར་ཞེས་བྱ་བ་ཡིན་ནོ། །སོ་སོའི་ལུང་ཐ་དད་པ་དེ་དག་ལ་ཁ་ཅིག་གིས་མདོ་སྡེ་རྣམས་སྡུད་པ་དག་ཀྱང་སྨྲས་པ་ཡིན་ནོ་ཞེས་བྱ་བ་ནི་འདིའི་ཕྱིར་ཡང་བསྡུས་པའི་རྩ་བ་ཉམས་པ་ཡིན་པར་མངོན་པ་ཡིན་ནོ། །འདི་ལྟར་བཤད་པ་ཆེན་པོ་ལས་ཚིག་རྣམ་པ་གསུམ་གསུངས་ཏེ། ཆོས་ཉིད་དང་མི་འགལ་བ་དང་ཞེས་བྱ་བ་ནི་རྟེན་ཅིང་འབྲེལ་བར་འབྱུང་པའི་ཆོས་ཉིད་འདི་ལྟ་སྟེ་འདི་ཡོད་ན་འདི་འབྱུང་འདི་སྐྱེས་པས་འདི་སྐྱེ་བ་སྟེ་ཞེས་བྱ་བའམ་ཆོས་ཀྱི་ཕྱག་རྒྱའོ། །གསུམ་པོ་འདི་བསྟན་པར་ཇི་ལྟར་བྱས་ཤེ་ན། དགེ་སློང་དེ་ལ་འདི་སྐད་དུ་སྨྲའོ། །ཚེ་དང་ལྡན་པ་བདག་གིས་ནི་ཆོས་འདི་དང་འདུལ་བ་འདི་དང་སྟོན་པའི་བསྟན་པ་འདི་བཅོམ་ལྡན་འདས་ལས་ཐོས། མངོན་སུམ་དུ་བཟུང་བ་ཡིན་ནོ། །དེ་དག་གིས་སྨྲས་པ། དེ་ནི་སྤྲོ་བར་བྱ་བ་མ་ཡིན་ནམ། དོར་བར་བྱ་བ་ཡང་མ་ཡིན་ནོ། །སྤྲོ་བར་ཡང་མ་བྱེད། འདོར་བར་ཡང་མ་བྱེད་པར་རྣམ་པར་གཏད་པའི་ཕྱིར་ཚིག་དང་ཡི་གེ་ཟུང་ཤིག །མདོ་སྡེ་ལ་འཇུག་པར་བྱ་འདུལ་བ་མཐོང་བར་བྱའོ། །གལ་ཏེ་མདོ་སྡེ་ལ་ཞུགས་འདུལ་བ་བསྟེན་ན། མདོ་སྡེ་ལས་མི་འབྱུང༌། འདུལ་བ་ལ་མི་སྣང༌། ཆོས་ཉིད་དང་ཡང་འགལ་བར་འགྱུར་ན་དགེ་སློང་
དེ་ལ་འདི་སྐད་ཅེས་བྱའོ། །ཚེ་དང་ལྡན་པ་ཆོས་འདི་དག་ནི་བཅོམ་ལྡན་འདས་ཀྱིས་ངེས་པར་བཀའ་སྩལ་ན། ཚེ་དང་ལྡན་པས་ནི་ལོག་པར་ཟིན་ཏོ་ཞེས་རྒྱས་པར་འབྱུང་ངོ༌། །ཚེ་དང་ལྡན་པའི་ཆེད་ཀྱི་ལ་སོགས་པ་དང༌། ཚེ་དང་ལྡན་པའི་ཆེད་ཀ་དང་དགའ་བའི་མདོ་སྡེ་ལ་སོགས་པའོ། །མིང་དང་གཟུགས་ཀྱི་གནས་སྐབས་ན་ལུས་དང་ཡིད་གཉིས་སྐྱེ་མཆེད་མ་ཡིན་པའི་ཕྱིར་སྐྱེ་མཆེད་བཅུ་གཉིས་ཀྱིས་ཐམས་ཅད་བསྡུས་པ་མ་ཡིན་པར་ཐལ་བར་འགྱུར་བའི་ཕྱིར་དང་ཞེས་བྱ་བ་ནི་མིང་དང་གཟུགས་ཀྱི་གནས་སྐབས་ཀྱི་ལུས་དང་ཡིད་གཉིས་སྐྱེ་མཆེད་མ་ཡིན་པའི་ཕྱིར་དང༌། ལུས་ནི་སྐྱེ་མཆེད་གཟུགས་ཅན་གྱི་ནང་དུ་འདུས་པར་ནུས་པ་མ་ཡིན་ཏེ། ལུས་ཀྱི་དབང་པོའི་རྡུལ་ཕྲ་རབ་རྣམས་ནི་མིག་ལ་སོགས་པའི་དབང་པོའི་རྡུལ་ཕྲ་རབ་རྣམས་ལ་དབང་པོའི་མཚན་ཉིད་ཐ་དད་པའི་ཕྱིར་རོ། །ཡིད་དེ་ཡང་ཡིད་ཀྱི་སྐྱེ་མཆེད་དང༌། ཆོས་ཀྱི་སྐྱེ་མཆེད་མ་ཡིན་ཏེ། རེ་ཞིག་ཡིད་ཀྱི་སྐྱེ་མཆེད་ཀྱི་ནང་དུ་ནི་འདུས་པ་མ་ཡིན་ཏེ། སྐྱེ་མཆེད་མ་ཡིན་པའི་ཕྱིར་རོ། །ཆོས་ཀྱི་སྐྱེ་མཆེད་ཀྱི་ནང་དུ་ནི་མཚན་ཉིད་ཐ་དད་པའི་ཕྱིར་རོ། །རྗེས་སུ་འགྲོ་བ་ལ་ཡང་དེ་སྐད་དུ་བརྗོད་དེ་ཞེས་རྒྱས་པར་འབྱུང་བ་ནི། འོན་ཏེ་ཡང་འདི་སྙམ་དུ་རྗེས་སུ་འགྲོ་བ་དང༌། དེའི་རྒྱུ་ལ་ཡང་དེ་སྐད་དུ་བརྗོད་དེ་ཞེས་བྱ་བ་ནི་སྐྱེ་མཆེད་ཀྱི་རྗེས་སུ་འགྲོ་བ་དང་ས་བོན་ལ་ཞེས་བྱ་བའི་དོན་གང་ཡིན་པའོ། །ལུས་དང་ཡིད་དེ་གཉིས་ཀྱང་ལུས་ཀྱི་སྐྱེ་མཆེད་དང༌། ཡིད་ཀྱི་སྐྱེ་མཆེད་ཀྱི་རྗེས་སུ་འགྲོ་བ་ཡིན་པས་ན་དེ་སྐད་དུ་བརྗོད་པ་འཐོབ་པ་ཡིན་ནོ། །ཇི་ལྟར་ཞེ་ན། མ་བཏབ་པའི་ས་བོན་བཞིན་ཏེ། དཔེར་ན་མ་བཏབ་པའི་ས་བོན་ནི་རེ་ཞིག་མྱུ་གུ་མངོན་དུ་སྐྱེད་པར་བྱེད་པའི་ས་བོན་མ་ཡིན་ནོ། །འོན་ཀྱང་དེའི་རྗེས་སུ་འགྲོ་བ་ཡིན་པའི་ཕྱིར་དེ་ཡང་ས་བོན་ཡིན་ནོ་ཞེས་བྱ་བ་དེ་བཞིན་ནོ་ཞེ་ན། མིག་ལ་སོགས་པ་མངོན་པར་གྲུབ་པ་ཡང་ཞེས་རྒྱས་པར་འབྱུང་བ་ནི་དེ་ལྟ་ཡིན་ན་ནི་མིག་ལ་སོགས་པ་སྐྱེ་མཆེད་དྲུག་མངོན་པར་གྲུབ་པ་ཡང་རེག་པ་མེད་ན་སྐྱེ་མཆེད་མ་ཡིན་པར་འགྱུར་ཏེ། གང་གི་ཚེ་མིག་ལ་སོགས་པ་གཅིག་ཁོ་ན་ཞིག་རྣམ་པར་ཤེས་པ་དང་བཅས་པ་ཡིན་ན་ནི་དེ་ཁོ་ན་རེག་པའི་སྐྱེ་མཆེད་ཡིན་པར་འགྱུར་གྱི་ལྷག་མ་ལྡ་ནི་དེའི་ཚེ་རེག་པ་མེ་དཔས་དེའི་སྐྱེ་མཆེད་ཉིད་ཡིན་པར་
མི་འགྱུར་ཏེ། ཇི་ལྟར་ནུར་ནུར་པོ་ལ་སོགས་པའི་གནས་སྐབས་ཀྱི་ལུས་དང་ཡིད་བཞིན་ནོ། །ནུས་པ་ཡིན་པའི་ཕྱིར་དེའི་སྐྱེ་མཆེད་ཡིན་ན་ནི་ཞེས་བྱ་བ་ནི་འོན་ཏེ་འདི་སྙམ་དུ་རེག་པ་མེད་དུ་ཟིན་ཀྱང་རེག་པ་དེ་སྐྱེད་པར་ནུས་པའི་ཕྱིར་དེའི་སྐྱེ་མཆེད་ཡིན་ནོ་ཞེ་ན་ཡང་དེ་ལྟ་བུ་དེ་ནི་ཡོད་མོད་ཀྱི་མིང་དང་གཟུགས་ཀྱི་གནས་སྐབས་ན་ལུས་དང་ཡིད་གཉིས་ཀྱིས་རེག་པ་སྐྱེད་པར་སྔར་གང་གིས་ནུས་པ་མེད་པར་འགྱུར། གང་གིས་ནི་སྐྱེ་མཆེད་ཡིན་པར་མི་འདོད་ཅེས་བྱ་བ་འདི་ནི་བརྗོད་པར་བྱ་དགོས་སོ། །ཞན་པས་སོ་ཞེ་ན་ཡང་ཞེས་བྱ་བ་ནི་འོན་ཏེ་འདི་སྙམ་དུ་དེ་གཉིས་ཞན་པ་ཡིན་པས་སྔར་ནུས་པ་ཉིད་མེད་དོ་སྙམ་ན་དེའི་ཕྱིར་ཞན་པ་ནི་ཞན་པ་ལ་ནུས་པ་ཡིན་ཏེ་ཞེས་སྨྲས་ཏེ། ལུས་ཞན་པ་དང་ཡིད་ཞན་པ་ནི་རེག་པ་ཞན་པ་ལ་ནུས་པ་ཡོད་དོ། །ཇི་ལྟར་ཡིད་ཞན་པ་ནི་ཡིད་ཀྱི་རྣམ་པར་ཤེས་པ་ཞན་པ་ལ་དེའི་ཚེ་ནུས་པ་ཡིན་ནོ། །ཡིད་ཀྱི་སྐྱ་མཆེད་དང་ཡིད་ལ་བྱེད་པ་མེད་པར་ཇི་ལྟར་ཡིད་ཀྱི་རྣམ་པར་ཤེས་པ་འབྱུང་བར་འགྱུར་ཞེས་བྱ་བ་ནི་མིང་དང་གཟུགས་ཀྱི་གནས་སྐབས་དེའི་ཚེ་ཡིད་ཀྱི་སྐྱ་མཆེད་དང་ཡིད་མངོན་པར་འདུ་བྱེད་པ་ནི་ཡོད་པ་མ་ཡིན་ཏེ། རེག་པ་མེད་པའི་ཕྱིར་རོ། །འདིར་ཡིད་ཀྱི་སྐྱེ་མཆེད་ཡིན་པར་སྐྱེ་མཆེད་ཀྱི་དབང་དུ་བྱས་ཏེ། རྗེས་སུ་འགྲོ་བ་ལ་ཡང་དེ་སྐད་ཅེས་བྱ་སྟེ་ཞེས་དེ་དག་གིས་ལན་བཏབ་པ་ཡིན་ནོ། །ཡིད་མངོན་པར་འདུ་བྱེད་པའི་དབང་དུ་བྱས་ནས་ཡིད་ཀྱི་རྣམ་པར་ཤེས་པ་གོམས་པའི་འཇུག་པ་རྙེད་པ་ནི་དེ་སྐྱེད་པ་ཡིད་ལ་བྱེད་པ་ཡིན་གྱི་ཞེས་བྱ་བ་ནི་འཇུག་པ་རྙེད་པ་དེ་ཡང་རེག་པའི་རྐྱེན་གྱིས་ནི་མ་ཡིན་པས་དེ་བས་ན་དེའི་ཚེ་རེག་པ་མི་འགྲུབ་པོ། །མ་ཡིན་ཏེ་མདོ་སྡེ་གཞན་ལས་ཡིད་ལ་བྱེད་པའི་དམིགས་པ་དང་ཞེས་རྒྱས་པར་འབྱུང་བ་ལ་དེ་ལྟར་ནི་མ་ཡིན་ཏེ། མདོ་སྡེ་གཞན་ལས་ཡིད་ལ་བྱེད་པའི་དམིགས་པ་ཡང་བསྟན་པའི་ཕྱིར་རོ། །རྣམ་པ་ཡང་བསྟན་པའི་ཕྱིར་རོ། །ཡོངས་སུ་བཅད་པར་བྱ་བ་ཡང་བསྟན་པའི་ཕྱིར་རོ། །ཆོས་མངོན་པར་ཁོང་དུ་ཆུད་པར་འདོད་པས་ཉེ་བར་ལེན་པའི་ཕུད་པོ་ལྔ་རྣམས་ལ་ཞེས་རྒྱས་པར་འབྱུང་བ་ནི་འདིར་ཡིད་ལ་བྱེད་པའི་དམིགས་པ་དང་རྣམ་པ་ཡང་བསྟན་པ་ཡིན་ཏེ། དམིགས་པ་ནི་ཉེ་བར་ལེན་པའི་ཕུང་པོ་ལྔའོ། །རྣམ་པ་ནི་སྡུག་བསྔལ་བའི་རྣམ་པ་སྟེ། ནད་ཡིན་
པར་ཡིད་ལ་བྱའོ་ཞེས་གསུངས་པའི་ཕྱིར་རོ། །ཡང་ན་ནད་ཉིད་རྣམ་པ་ཡིན་ནོ། །ཆོས་འདི་དག་བདག་གིས་ཡིད་ལ་བྱེད་པ་ན་ཞེས་རྒྱས་པར་འབྱུང་བ་འདིར་ནི་སྐྱེ་བ་དང་དམིགས་པ་ཡང་བསྟན་ཏེ། ཆོས་འདི་དག་བདག་གིས་ཡིད་ལ་བྱེད་པ་ན་ཞེས་གསུངས་པའི་ཕྱིར་དང་དམིགས་པ་ནི། འདོད་པའི་ཟག་པ་བྱུང་བ་འབྱུང་བར་འགྱུར་རོ་ཞེས་བྱ་བ་ཡིན་ནོ། །སྐྱེ་བ་ཡང་བསྟན་ཏེ་དེ་དག་དང་མཚུངས་པར་ལྡན་པ་ཡིན་པའི་ཕྱིར་རོ། །འདི་ལྟར་ཚུལ་བཞིན་མ་ཡིན་པར་ཡིད་ལ་བྱེད་པ་ན་ཅི་བདག་འདས་པའི་དུས་ན་བྱུང་བ་ཞིག་གམ་ཞེས་རྒྱས་པར་འབྱུང་བ་དེ་ལ་འདས་པ་ནི་དམིགས་པ་ཡིན་པར་བསྟན་ཏོ། །བྱུང་བ་ཞིག་གམ་ཞེས་བྱ་བ་ནི་རྣམ་པའོ། །འདི་ཡིད་ལ་བྱེད་ཅིང་འདི་ཡིད་ལ་མི་བྱེད་པར་ཞེས་རྒྱས་པར་འབྱུང་བ་དེར་ཡང་དམིགས་པ་དང་རྣམ་པ་བསྟན་ཏེ། གཟུགས་ལ་ཚུལ་བཞིན་དུ་ཡིད་ལ་བྱེད་པ་ཞེས་གསུངས་པའི་ཕྱིར་རོ། །དགེ་སློང་དག་དྲན་པ་ཡང་དག་བྱང་ཆུབ་ཀྱི་ཡན་ལག་ལ་ཞེས་རྒྱས་པར་འབྱུང་བ་ལ། ཡིད་ལ་བྱེད་པ་ཤེས་པར་འགྱུར་རོ་ཞེས་བྱ་བ་ནི་ཡིད་ལ་བྱེད་པ་ལ་ཡོངས་སུ་གཅོད་པ་ནུས་སོ་ཞེས་བྱ་བའི་དོན་གང་ཡིན་པ་སྟེ། ཤིན་ཏུ་དྲན་པ་ཉེ་བར་གནས་པའི་ཕྱིར་རོ། །ཡིད་ལ་བྱེད་པ་ནི་ཡོངས་སུ་བཅད་པར་བྱ་བ་ཡིན་པར་བསྟན་ཏོ། །འདི་ལ་ནི་འཇུག་པ་རྙེད་པ་དེ་བསྐྱེད་པའི་ཆེད་དུ་འདོད་པ་བཞིན་བྱེད་པ་འགའ་ཡང་མེད་དོ། །ཁ་ཅིག་ཏུ་རྩོལ་བ་ནི་ཡིད་ལ་བྱེད་པ་ཡིན་ནོ་ཞེས་རྒྱས་པར་འབྱུང་བ་ནི་འོན་ཏེ་ཡང་འདི་སྙམ་དུ་ཁ་ཅིག་ཏུ་ནི་རྩོལ་བ་ནི་ཡིད་ལ་བྱེད་པ་ཡིན་ཏེ། གང་དུ་དམིགས་པ་དང་རྣམ་པ་ལ་སོགས་པ་ཡོངས་སུ་ཆོད་པའོ། །ཁ་ཅིག་ཏུ་ནི་འཇུག་པ་རྙེད་པ་སྟེ། གང་དུ་དེ་ཡོངས་སུ་མི་ཆོད་པའོ། །དེའི་ཕྱིར་ཁ་ཅིག་ཏུ་གང་རྩོལ་བ་ནི་ཡིད་ལ་བྱེད་པ་ཡིན་ཁ་ཅིག་ཏུ་ནི་འཇུག་པ་རྙེད་པའོ་ཞེས་བྱ་བ་འདི་ལ་རིགས་པ་ཅི་ཡོད་ཅེས་སྨྲས་སོ། །རྩོལ་བ་མེད་ན་རྣམ་པར་ཤེས་པ་དེ་སྐྱེ་བར་མི་འགྱུར་རོ་ཞེ་ན་ཡང་ཞེས་བྱ་བ་ནི་འོན་ཏེ་ཡང་ཁྱོད་ཉིད་ལ་རིགས་པ་བརྗོད་པར་བྱ་སྟེ། དམིགས་པ་གང་ལ་གང་གི་རྩོལ་བ་ཡོད་པ་མ་ཡིན་པ་དེའི་རྩོལ་བ་མེད་ན་རྣམ་པར་ཤེས་པ་སྐྱེ་བར་མི་འགྱུར་བ་ནི་དམིགས་པ་དེ་ལ་རྣམ་པར་ཤེས་པ་སྐྱེ་བ་མེད་དོ་ཞེས་བྱ་བའི་དོན་གང་ཡིན་པའོ། །གང་གི་ཚེ་དམིགས་པ་གཞན་ལ་རྩོལ་བ་བྱ་བ་ལས་དེ་
ལས་གཞན་པའི་དམིགས་པ་ལ་རྣམ་པར་ཤེས་པ་སྐྱེས་པའི་ཚེ་རྩོལ་བ་མེད་པར་སྐྱེ་བ་ཡིན་པས་དེའི་ཕྱིར། དེ་འགལ་བ་མེད་དེ་ཡིད་ལ་བྱེད་པ་ནི་དེ་སྐྱེད་པར་བྱེད་པ་ཡིན་ལ་དེ་རྩོལ་བ་མེད་པ་ཡང་ཡིན་ནོ་ཞེས་སྔར་ཤེས་པར་བྱས་སོ་ཞེས་སྨྲས་ཏེ། དེ་འགལ་བ་མེད་དེ་ཞེས་བྱ་བ་ནི་དམིགས་པ་དེ་ལ་རྣམ་པར་ཤེས་པ་སྐྱེ་བ་འགལ་བ་མེད་པ་ཡིན་ནོ། །ཡིད་ལ་བྱེད་པ་ནི་དེ་སྐྱེད་པར་བྱེད་པ་ཡིན་ཞེས་བྱ་བ་ནི་དེ་སྐྱེད་པར་བྱེད་པ་ཡིན་པའི་ཕྱིར་རོ། །དེ་རྩོལ་བ་མེད་པ་ཡང་ཡིན་ནོ་ཞེས་བྱ་བ་ནི་དམིགས་པ་དེ་ལ་རྩོལ་བ་མེད་པ་ཁོ་ན་ཡང་ཡིན་ནོ། །ཡང་ཞེས་སྨོས་པས་ནི་དེ་རྩོལ་བ་དང་བཅས་པ་ཡང་ཡིན་ནོ་ཞེས་ཁང་དུ་ཆུད་པར་བྱའོ། །སྔར་ཤེས་པར་བྱས་སོ་ཞེས་བྱ་བ་ནི་སྔ་ཁོ་ནར་གཏན་ལ་ཕབ་པར་ཤེས་པར་བྱས་རྟོགས་པར་བྱས་ཏེ། ཇི་ལྟར་དེ་སྐྱེད་པ་ཡིན་ཞེ་ན། དེ་སྐྱེད་པར་བྱེད་པ་ཡིན་པས་དེ་སྐྱེད་པའོ་ཞེས་རྒྱས་པར་ངེས་པའི་ཚིག་གི་ཚུལ་གྱིས་རྣམ་པར་ཤེས་པའི་ཡན་ལག་སྟོན་པའི་ཚེ་རྒྱས་པར་བྱས་སོ། །ཁམས་དྲུག་ལ་བརྟེན་ནས་མའི་མངལ་དུ་ཞེས་རྒྱས་པར་འབྱུང་བ་ལ། ཁམས་དྲུག་ནི་ས་དང་ཆུ་དང་མེ་དང་རླུང་དང་ནམ་མཁའ་དང་རྣམ་པར་ཤེས་པའི་ཁམས་ཞེས་བྱ་བའི་ཐ་ཚིག་གོ །འདིར་ནི་ཆོས་ཀྱི་ཁམས་མ་གསུངས་པའི་ཕྱིར་དེའི་ཚེ་རེག་པ་ལ་སོགས་པ་དེ་དག་ཀྱང་ཡོད་པ་མ་ཡིན་ནོ། །དེའི་ཕྱིར་དེ་བས་ན་དེའི་ཚེ་ཁམས་དྲུག་ཉིད་མིང་དང་གཟུགས་ཡིན་ནོ་ཞེས་སྨྲས་སོ། །དེའི་གནས་སྐབས་ཀྱི་ཞེས་བྱ་བ་ནི་ཁྲག་དང་ཁུ་བའི་གནས་སྐབས་ཀྱི་ཞེས་བྱ་བའི་དོན་ཏོ། །དེ་དང་འབྲེལ་བའི་སྲིད་པ་བར་མའི་གནས་སྐབས་ཀྱི་རྣམ་པར་ཤེས་པའི་ཁམས་ཞེས་བྱ་བ་ནི་ཁྲག་དང་ཁུ་བའི་གནས་སྐབས་ས་དང་ཆུ་དང་མེ་དང་རླུང་དང་ནམ་མཁའི་ཁམས་རྣམས་དང་འབྲེལ་བའི་སྲིད་པ་བར་མའི་གནས་སྐབས་ཀྱི་རྣམ་པར་ཤེས་པའི་ཁམས་ཞེས་བྱ་བའི་དོན་ཏོ། །གོ་རིམས་བཞིན་དུ་བསྟན་ཏོ་ཞེས་བྱ་བ་ནི་སྐྱེས་བུ་འདི་ནི་ཁམས་དྲུག་པ་དང་ཞེས་བྱ་བ་ནི། མིང་དང་གཟུགས་ཀྱི་གནས་སྐབས་ཀྱི་སྐྱེས་བུ་ཡིན་པར་བསྟན་ཏེ། གནས་སྐབས་གཞན་ན་ཁམས་དྲུག་པ་ཙམ་ཡིན་པར་མི་སྲིད་པའི་ཕྱིར་རོ། །རེག་པའི་སྐྱེ་མཆེད་དྲུག་དང་ཞེས་བྱ་བ་ནི་རེག་
པའི་སྐྱེ་མཆེད་དྲུག་གི་གནས་སྐབས་ཡིན་པར་བསྟན་ཏོ། །ཡིད་ཉེ་བར་རྒྱུ་བ་བཅོ་བརྒྱད་ནི་ཚོར་བའི་གནས་སྐབས་ཡིན་པར་བསྟན་ཏོ། །ཅིང་དོན་གྱི་ཚུལ་དེ་ལྟར་བརྟག་པར་བྱའམ་ཞེས་བྱ་བ་ནི་ཇི་ལྟར་རེག་པའི་སྐྱེ་མཆེད་ཀྱི་གནས་སྐབས་ན་ཁམས་དེ་དག་ཉིད་ཉེ་བར་རྒྱུ་བ་ཡོད་མོད་ཀྱི་འོན་ཀྱང་རེག་པའི་སྐྱེ་མཆེད་དྲུག་ཅེས་བསྟན་པ་དང་དེ་བཞིན་དུ་ཁམས་དྲུག་གི་གནས་སྐབས་ན་གཞན་དག་ཀྱང་ཡོད་མོད་ཀྱི། འོན་ཀྱང་སྐྱེས་བུ་འདི་ནི་ཁམས་དྲུག་པའོ་ཞེས་བསྟན་པ་དག་ཅིང་དོན་གྱི་ཚུལ་དེ་ལྟར་བརྟག་པར་བྱའམ། མིང་དང་གཟུགས་ཀྱི་གནས་སྐབས་ན་ཁམས་དྲུག་ཙམ་ཁོ་ན་སྐྱེས་བུ་ཡིན་ནམ། མིང་དང་གཟུགས་ཀྱི་གནས་སྐབས་སྐྱེས་བུ་འདི་ཡིན་པར་བསྟན་ཏོ་ཞེས་ཅིང་དོན་གྱི་ཚུལ་དེ་ལྟར་བརྟག་པར་བྱའམ་ཞེས་བྱ་བ་ཡིན་ནོ། །ཇི་ལྟར་མདོ་སྡེ་འདི་ཉིད་ལས་མཇུག་ཟད་དུ་ནང་གི་སའི་ཁམས་ལ་སོགས་པ་རྣམ་པར་ཕྱེ་བ་ཞེས་བྱ་བ་ནི་སྐྲ་དང་བ་སྤུ་དང་སེན་མོ་ལ་སོགས་པ་རྣམ་པར་ཕྱེ་བའོ། །དེ་བཞིན་དུ་རེག་པའི་སྐྱེ་མཆེད་ཀྱི་གནས་སྐབས་ན་ཤིན་ཏུ་རིགས་པ་ཁོ་ན་ཡིན་ནོ་ཞེས་བྱ་བ་འདི་ནི་མིང་དང་གཟུགས་ཀྱི་གནས་སྐབས་ཀྱི་སྐྱེས་བུར་བསྟན་པ་མ་ཡིན་ནོ་ཞེས་སྟོན་ཏོ། །གནས་སྐབས་གང་ན་ཡང་ལུས་ཀྱི་ཁམས་དང་གཟུགས་ལ་སོགས་པའི་ཁམས་མེད་པར་ཞེས་བྱ་བ་ནི་གཟུགས་དང་དྲི་དང་རོ་དང་རེག་བྱ་ཞེས་བྱ་བ་རྣམས་སོ། །རྣམ་པར་ཤེས་པའི་ཁམས་མེད་པའི་ཕྱིར་རོ་ཞེས་བྱ་བ་ནི་སའི་ཁམས་ལ་སོགས་པ་ཙམ་ནི་རྣམ་པར་ཤེས་པའི་གནས་ཡིན་པར་གང་དུ་ཡང་མ་མཐོང་བའི་ཕྱིར་རོ། །དེ་བས་ན་ཇི་ལྟར་ལུས་དང་གཟུགས་ལ་སོགས་པ་ཡོད་པ་ལ་སའི་ཁམས་ལ་སོགས་པ་ཙམ་བསྟན་པ་དེ་བཞིན་དུ་རེག་པ་ལ་སོགས་པ་ཡོད་པ་ལ་རྣམ་པར་ཤེས་པའི་ཁམས་ཙམ་བསྟན་པ་ཡིན་པས་མིང་དང་གཟུགས་ཀྱི་གནས་སྐབས་ན་རེག་པ་ལ་སོགས་པ་མེད་པར་འགྲུབ་པ་ཡིན་ནོ་ཞེ་ན། མདོ་སྡེ་འདིའི་དོན་ནི་འདི་མ་ཡིན་ནོ་ཞེས་བྱ་བ་ནི་དེར་གོ་རིམས་བཞིན་ནོ་ཞེས་རྒྱས་པར་བསྟན་པ་གང་ཡིན་པའོ། །འོ་ན་ཅིའི་ཕྱིར་ཁམས་ལ་སོགས་པ་གསུམ་སྨོས་ཤེ་ན་ཞེས་བྱ་བ་ནི་གལ་ཏེ་དོན་འདི་མ་ཡིན་ན་ཁམས་ལ་སོགས་པ་ཞེས་བྱ་བ་རེག་པའི་སྐྱེ་མཆེད་དང་ཡིད་ཉེ་བར་རྒྱུ་བ་དང་རྣམ་པ་གཉིས་དང་གསུམ་ཅིའི་ཕྱིར་སྨོས་ཤེ་ན། དེའི་ཕྱིར་གནས་དང་གནས་པ་བསྟན་
པའི་ཕྱིར་རོ་ཞེས་སྨྲས་ཏེ། གནས་བསྟན་པའི་ཕྱིར་དང༌། གནས་པ་བསྟན་པའི་ཕྱིར་རོ། །དེ་ལ་བརྟེན་ཏེ་འཇུག་པ་ཉིད་ཡིན་པའི་ཕྱིར་ཞེས་བྱ་བ་ནི་རེག་པའི་སྐྱེ་མཆེད་ནི་ཁམས་ལ་བསྟན་ཏེ། འཇུག་པ་ཡིན་པའི་ཕྱིར་རོ་ཞེས་བྱ་བའི་དོན་ཏོ། །དེ་ཡང་ཡིད་ཉེ་བར་རྒྱུ་བ་རྣམས་ཀྱི་གནས་ཡིན་ཏེ་ཞེས་བྱ་བའི་དོན་ཏེ། དེ་ཡང་ཞེས་བྱ་བ་ནི་རེག་པའི་སྐྱེ་མཆེད་ལ་བྱ་སྟེ། ཅི་ཞེ་ན། གནས་ཡིན་ནོ་ཞེས་སྐབས་དང་སྦྱར་རོ། །ལུས་ལ་ཁམས་སོ་སོར་བརྟག་པར་བྱ་བ་ནི་བདག་མེད་པར་བསྟན་པའི་ཕྱིར་ཅི་ཞེ་ན། ཁམས་སྨོས་པ་ཡིན་ནོ། །འདི་ལྟར་ཕྱིའི་སའི་ཁམས་ལ་སོགས་པ་དང་ཞེས་རྒྱས་པར་འབྱུང་བ་ནི་དེ་ལས་ཕྱི་རོལ་གྱི་སའི་ཁམས་ལ་སོགས་པ་དང་ནང་གི་རྣམས་མཉམ་པར་བྱས་ནས་བདག་མེད་པ་མཐོང་བ་ཡོད་པ་ནི་རིགས་པ་དང་ལྡན་པ་ཡིན་ནོ། །དེ་བས་ན་ཁམས་སྨོས་པའི་དགོངས་པ་དེ་ཡིན་པར་གྲུབ་པ་ཡིན་ནོ། །ཇི་ལྟ་ཞེ་ན། ནང་གི་སའི་ཁམས་གང་ཡིན་པ་དང་ཕྱིའི་སའི་ཁམས་གང་ཡིན་པའི་ཁམས་དེ་དག་ཐ་དད་པ་ཡོད་པ་མ་ཡིན་ཏེ། དེ་དག་ཐམས་ཅད་བདག་གི་མ་ཡིན་ལ་འདི་ལ་ཡང་བདག་མ་ཡིན། བདག་གི་བདག་འདི་མ་ཡིན་ནོ་ཞེས་ཡང་དག་པའི་ཤེས་རབ་ཀྱིས་ཡང་དག་པ་ཇི་ལྟ་བ་བཞིན་དུ་མཐོང་ན་སའི་ཁམས་ལ་འདོད་ཆགས་དང་བྲལ་བར་འགྱུར་རོ། །ནམ་མཁའི་ཁམས་ཀྱི་བར་དུ་ཡང་དེ་བཞིན་ནོ། །བདག་མེད་པ་ཡིན་ཡང་ཀུན་ནས་ཉོན་མོངས་པའི་ཚོར་བ་འབྱུང་ངོ་ཞེས་རྒྱས་པར་འབྱུང་བ་ནི་བདག་མེད་པ་ཡིན་ཡང་རེག་པའི་སྐྱེ་མཆེད་དྲུག་ལ་བརྟེན་ནས་ཡིད་ཉེ་བར་རྒྱུ་བ་བཅོ་བརྒྱད་ཀྱི་མཚན་ཉིད་ཀྱི་ཚོར་བ་ཀུན་ནས་ཉོན་མོངས་པ་ཅན་འབྱུང་ངོ་ཞེས་བསྟན་པར་བྱ་བའི་ཕྱིར་རེག་པའི་སྐྱེ་མཆེད་དྲུག་ཀྱང་སྨོས། ཡིད་ཉེ་བར་རྒྱུ་བ་བཅོ་བརྒྱད་ཀྱང་སྨོས་པ་ཡིན་ཏེ། སྐྱེས་བུ་འདིའི་གནས་སྐབས་ཐ་དད་པ་མེད་པ་བསྟན་པ་ཡིན་ནོ། །དེ་བས་ན་ཐོག་མ་ཁོ་ནར་མངལ་དུ་ཕུང་པོ་ལྔ་པའི་མིང་དང་གཟུགས་ཞེས་བྱ་བ་ནུར་ནུར་པོ་ལ་སོགས་པའི་གནས་སྐབས་ན་འདི་གྲུབ་པ་ཡིན་ཏེ། ཇི་སྐད་དུ་མངོན་པར་འགྲུབ་པ་དང་ཡོངས་སུ་རྫོགས་པའི་རྐྱེན་ཡིན་པའི་ཕྱིར་ཇི་ལྟར་རིགས་པར་ཡིན་ནོ་ཞེས་སྨྲས་པ་ཡིན་ཏེ། མིང་དང་གཟུགས་ཀྱི་གནས་སྐབས་ཉིད་ན་ལུས་དང་ཡིད་ཀྱི་སྐྱེ་མཆེད་གཉིས་ཡོད་པའི་ཕྱིར་རོ། །དྲུག་ཆར་གྱི་ཡང་གཉི་ག་ཚོགས་པ་ཡིན་ཏེ་ཞེས་བྱ་བ་
ནི་སྐྱེ་མཆེད་དྲུག་ཅར་གྱི་རྐྱེན་ཡང་མིང་དང་གཟུགས་ཚོགས་པ་ཡིན་ནོ། །ཇི་ལྟ་ཞེ་ན། ལུས་དང་སེམས་གཉིས་གཅིག་ལ་གཅིག་རྗེས་སུ་བྱེད་པར་མཐོང་བའི་ཕྱིར་ཏེ། འབྲས་བུ་ནི་རྒྱུའི་རྗེས་སུ་བྱེད་པ་ཡིན་ལ་ལུས་དང་སེམས་གཉིས་ཀྱང་གཅིག་ལ་གཅིག་རྗེས་སུ་བྱེད་པར་སྣང་སྟེ། དེ་བས་ན་ལུས་ནི་སེམས་ཀྱི་རྒྱུ་ཡིན་ལ་སེམས་ཀྱང་ལུས་ཀྱི་ཡིན་པར་གྲུབ་སྟེ་ངེས་པ་ཡིན་ནོ། །མིང་དང་གཟུགས་ཀྱི་གནས་སྐབས་ཀྱི་གཟུགས་ནི་སྐྱེ་མཆེད་དྲུག་གི་གནས་སྐབས་ཀྱི་ཡིད་ཀྱི་རྒྱུ་ཡང་ཡིན་ལ། མིང་ནི་མིག་ལ་སོགས་པའི་རྒྱུ་ཡང་ཡིན་ནོ། །སྐྲག་པ་དང་མྱ་ངན་དང་དགའ་བ་དང༌། ནད་དང་རྒ་བ་ལ་སོགས་པའི་གནས་སྐབས་ན་ཞེས་བྱ་བ་ནི་སྐྲག་པ་དང་མྱ་ངན་དང་དགའ་བའི་གནས་སྐབས་ན་ལུས་ནི་སེམས་ཀྱི་རྗེས་སུ་འབྲང་སྟེ། སྐྲག་ན་ལུས་འདར་བ་དང་རེངས་པར་འགྱུར་བའོ། །མྱ་ངན་གྱིས་ཉམ་ཐག་པ་ན་ལུས་མྱོགས་པའོ། །དགའ་ན་བདེ་བ་དང་མིག་མེ་ཏོག་ཁ་བྱེ་བ་ལྟ་བུའོ། །ནད་དང་རྒ་བའི་གནས་སྐབས་ན་སེམས་ནི་ལུས་ཀྱི་རྗེས་སུ་འབྲང་སྟེ། ནད་ཀྱིས་ཉེན་ན་སེམས་འཁྲུག་པར་འགྱུར་རོ། །རྒས་ན་དྲན་པ་ཆུང་ཞིང་ཤེས་རབ་ཞན་པའོ། །སོགས་པའི་སྒྲས་ངལ་བ་ལ་སོགས་པའི་གནས་སྐབས་དང་བྱིས་པ་ལ་སོགས་པའི་གནས་སྐབས་ལ་ཡང་བརྗོད་པར་བྱའོ། །འོ་ན་ཅིའི་ཕྱིར་ཕྱིའི་སྐྱེ་མཆེད་དྲུག་གི་རྐྱེན་འདིར་མ་བསྟན་ཅེ་ན། དེ་ནི་ཡན་ལག་ཐ་དད་པར་ཡོད་པ་མ་ཡིན་ཏེ་ཞེས་བྱ་བ་ལ་དེ་ནི་ཞེས་བྱ་བ་ནི་ཕྱིའི་སྐྱེ་མཆེད་དྲུག་གཟུགས་ལ་སོགས་པ་ནས་ཆོས་ཀྱི་སྐྱེ་མཆེད་ལ་ཐུག་པ་རྣམས་སོ། །མིང་དང་གཟུགས་ཀྱི་སྐད་ཅིག་མ་དང་པོའི་ཚེ་ན་ཡང་དེ་ཡོད་པ་ཡིན་པའི་ཕྱིར་དང་ཞེས་བྱ་བ་ནི་ཕྱིའི་སྐྱེ་མཆེད་དྲུག་དེ་ཡོད་པའི་ཕྱིར་རོ་ཞེས་བྱ་བའི་ཐ་ཚིག་གོ །མིང་དང་གཟུགས་ཀྱང་རྐྱེན་ཡིན་པར་བསྟན་ཟིན་པའི་ཕྱིར་དང་ཞེས་བྱ་བ་ནི་དེའི་རྐྱེན་ཡིན་པར་བསྟན་ཟིན་ཏོ་ཞེས་སྟོན་ཏེ། མིང་གཟུགས་ཀྱིས་བསྡུས་པ་ཡིན་པའི་ཕྱིར་རོ། །སྒྲ་ཡང་གནས་སྐབས་མ་ངེས་པ་ཡིན་པའི་ཕྱིར་དང་ཞེས་བྱ་བ་ནི་དེ་ནི་ནུར་ནུར་པོ་ལ་སོགས་པའི་གནས་སྐབས་སམ་སྐྱེ་མཆེད་དྲུག་གི་གནས་སྐབས་ཡིན་ནོ་ཞེས་བྱ་བའི་གནས་སྐབས་ངེས་པ་ཡང་ཡོད་པ་མ་ཡིན་པས་དེའི་རྐྱེན་དུ་མ་བསྟན་ཏོ། །གནས་སྐབས་ངེས་པའི་རྐྱེན་ནི་འདིར་བསྟན་ཏོ། །ལྔ་པོ་ཡང་གང་ཞེ་ན། གཟུགས་དང་སྒྲ་
དང་དྲི་དང་རེག་བྱའི་སྐྱེ་མཆེད་རྣམས་ནི། གཅིག་ཁོ་ནར་སེམས་ཅན་གྱི་གྲངས་སུ་གཏོགས་པ་མ་ཡིན་པའི་ཕྱིར་རོ། །སེམས་ཅན་གྱི་གྲངས་སུ་གཏོགས་པ་རྣམས་ཀྱི་རྐྱེན་ནི་འདིར་བསྟན་ཏོ། །འདིའི་ཕྱིར་ཡང་རྐྱེན་མ་བསྟན་ཏོ། །གཞན་ཡང་ཆོས་ཀྱི་སྐྱེ་མཆེད་ཀྱིས་བསྡུས་པའི་རེག་པ་ལ་སོགས་པའི་ཡང་རྐྱེན་ཡིན་པར་བསྟན་ཟིན་པའི་ཕྱིར་རོ་ཞེས་བྱ་བ་ལ་སོགས་པའི་སྒྲས་ནི་ཤེས་རབ་དང༌། དྲན་པ་དང༌། ཡིད་ལ་བྱེད་པ་དང༌། འདུན་པ་དང༌། མོས་པ་ལ་སོགས་པ་རྣམས་ཏེ། ཅི་ཞེ་ན། ཆོས་ཀྱི་སྐྱེ་མཆེད་སེམས་ཅན་གྱི་གྲངས་སུ་གཏོགས་པ་རྣམས་ཀྱི་རྐྱེན་ཡིན་པར་བསྟན་ཟིན་ཏོ། །ཇི་ལྟར་རེག་པ་ལ་སོགས་པའི་རྐྱེན་ཡིན་པར་བསྟན་ཅེ་ན། ཇི་ལྟར་མིང་དང་གཟུགས་ནི་སྐྱེ་མཆེད་དྲུག་གི་གནས་སྐབས་ཀྱི་ཡིད་ཀྱི་སྐྱེ་མཆེད་ཀྱི་རྐྱེན་ཡིན་པ་དེ་བཞིན་དུ་དེ་དང་མཚུངས་པར་ལྡན་པ་རེག་པ་ལ་སོགས་པ་ཆོས་ཀྱི་སྐྱེ་མཆེད་དུ་གཏོགས་པ་རྣམས་ཀྱི་ཡང་རྐྱེན་ཡིན་ནོ། །མིང་དང་གཟུགས་ལ་ནུས་པའི་བྱེ་བྲག་ཡོད་པའི་ཕྱིར་རོ་ཞེས་སྔར་བསྟན་ཟིན་ཏོ་ཞེས་བྱ་བ་ནི་རྣམ་པར་ཤེས་པའི་ཡན་ལག་དབྱེ་བ་ལས་སོ། །ཇི་ལྟར་ཞེ་ན། ལས་ཀྱི་ཁྱད་པར་ལས་རྣམ་པར་ཤེས་པ་ཁྱད་པར་དུ་འགྱུར་རོ། །དེ་ལས་མིང་དང་གཟུགས་ཁྱད་པར་དུ་འགྱུར་རོ། །དེ་ལས་སྐྱེ་མཆེད་དྲུག་གིའོ་ཞེས་བྱ་བ་ཡིན་ནོ། །གལ་ཏེ་མིང་དང་གཟུགས་ཁོ་ནའི་རྐྱེན་གྱིས་སྐྱེ་མཆེད་དྲུག་ཡིན་ན་ནི་རྫུས་ཏེ་བྱུང་བ་རྣམས་ཀྱི་དེའི་རྐྱེན་རྣམ་པར་ཤེས་པ་མ་ཡིན་པར་འགྱུར་རོ་ཞེས་བྱ་བ་ནི་གལ་ཏེ་རྐྱེན་ངེས་པར་བྱེད་དེ་མིང་དང་གཟུགས་ཁོ་ན་སྐྱེ་མཆེད་དྲུག་གི་རྐྱེན་ཡིན་གྱི། གཞན་མ་ཡིན་ན་ནི་རྫུས་ཏེ་བྱུང་བ་རྣམས་ཀྱི་སྐྱེ་མཆེད་དྲུག་གི་རྐྱེན་མིང་དང་གཟུགས་ཡིན་ཞེས་བྱ་བར་མིང་དང་གཟུགས་སོགས་ཤིན་ཏུ་དབྱེར་མེད་པའི་ཕྱིར་རོ། །འོ་ན་ཅི་ཞེ་ན། རྣམ་པར་ཤེས་པའི་རྐྱེན་གྱིས་ཡིན་ནོ། །འོན་ཏེ་སྐྱེ་མཆེད་དྲུག་ཁོ་ན་མིང་དང་གཟུགས་ཀྱི་རྐྱེན་གྱིས་ཡིན་ན་ནི་དེ་དག་ལ་གནས་པའི་གཟུགས་ཞེས་བྱ་བ་ནི་སྐྱེ་མཆེད་དྲུག་ལ་གནས་པའི་གཟུགས་འབྱུང་བ་དང་འབྱུང་བ་ལས་གྱུར་པ་འདུས་པའི་མཚན་ཉིད་ཀྱི་རྐྱེན་མིང་དང་གཟུགས་མ་ཡིན་པར་འགྱུར་རོ། །ཡིད་ཀྱི་སྐྱེ་མཆེད་དང་མཚུངས་པར་ལྡན་པའི་ཆོས་
རེག་པ་ལ་སོགས་པ་རྣམས་ཀྱི་རྐྱེན་མིང་དང་གཟུགས་མ་ཡིན་པར་འགྱུར་རོ། །སྒྲའི་སྐྱེ་མཆེད་དེ་ཡང་གནས་སྐབས་མ་ངེས་པའི་ཕྱིར་སྐྱེ་མཆེད་དྲུག་གི་གནས་སྐབས་ན་ཡང་ཡོད་པས་དེའི་རྐྱེན་ཡང་མིང་དང་གཟུགས་མ་ཡིན་པར་འགྱུར་ཏེ་གལ་ཏེ་རྐྱེན་ཅན་ངེས་པར་བྱེད་དེ་སྐྱེ་མཆེད་དྲུག་ཁོ་ནའི་རྐྱེན་མིང་དང་གཟུགས་ཡིན་གྱི་གཞན་གྱི་མ་ཡིན་པས་སོ། །སྐྱེ་བའི་རིམ་པ་ཡོངས་སུ་རྫོགས་པའི་གནས་སྐབས་ཀྱི་ཞེས་རྒྱས་པར་འབྱུང་བ་ནི་སྐྱེ་བའི་རིམ་པ་ཡོངས་སུ་རྫོགས་པ་ལ་གནས་སྐབས་བཅུ་གཉིས་ཡོད་པ་ཡིན་པས་སྐྱེ་བའི་རིམ་པ་ཡོངས་སུ་རྫོགས་པའི་གནས་སྐབས་སོ། །སྐྱེ་བའི་རིམ་པ་ཡོངས་སུ་རྫོགས་པའི་གནས་སྐབས་དེའི་གང་ཟག་གི་ཆེད་དུ་མིང་དང་གཟུགས་ཀྱི་རྐྱེན་གྱིས་སྐྱེ་མཆེད་དྲུག་གོ་ཞེས་རྐྱེན་བཤད་པ་ཡིན་པའི་ཕྱིར་རོ། །འདིས་ནི་རྐྱེན་ངེས་པ་བསལ་བ་ཡིན་ཏེ་སྐྱེ་བའི་རིམ་པ་ཡོངས་སུ་མ་རྫོགས་པའི་གནས་སྐབས་ན་ནི་རྣམ་པར་ཤེས་པའི་རྐྱེན་གྱིས་སྐྱེ་མཆེད་དྲུག་ཡིན་ནོ། །ཡན་ལག་ཐ་དད་པ་ཡང་ཅི་ཞེ་ན། རྐྱེན་བཤད་པའི་ཕྱིར་ཞེས་སྐབས་དང་སྦྱར་རོ། །འདིས་ནི་རྐྱེན་བསལ་ཏོ། །དེ་ཉིད་ཀྱི་ཕྱིར་དེ་ལ་གནས་པའི་གཟུགས་ལ་སོགས་པ་ནི་ཡན་ལག་ཐ་དད་པར་འགྱུར་བ་མ་ཡིན་ཏེ། སྔོན་མེད་པའི་རྫས་གཞན་མི་སྲིད་པའི་ཕྱིར་རོ་ཞེས་སྨྲས་ཏེ། དེ་ལ་གནས་པའི་གཟུགས་ལ་སོགས་པ་དེ་དག་ནི་མིང་དང་གཟུགས་ཀྱི་གནས་སྐབས་ཉིད་ན་ཡོད་དོ། །དེའི་ཕྱིར་སྐྱེ་མཆེད་དྲུག་གི་གནས་སྐབས་ན་སྔོན་མེད་པའི་རྫས་གཞན་མེད་པ་ཡིན་ནོ། །སྒྲ་ཡང་གནས་སྐབས་མ་ངེས་པ་ཡིན་པའི་ཕྱིར་རོ་ཞེས་བྱ་བ་ནི་སྐྱེ་མཆེད་དྲུག་གི་གནས་སྐབས་ན་སྔོན་མ་བྱུང་བའི་སྒྲ་ལན་འགའ་ཞིག་ཡོད་དུ་ཟིན་ཀྱང་དེའི་མིང་དང་གཟུགས་ཀྱི་རྐྱེན་གྱིས་ཡིན་པར་མི་བརྗོད་དེ། དེ་ནི་གལ་ཏེ་ན་མིང་དང་གཟུགས་ཀྱི་གནས་སྐབས་ཉིད་ན་ཡང་ཡོད་པ་ཡིན་ཏེ། གནས་སྐབས་མ་ངེས་པའི་ཕྱིར་རོ། །འདིར་ནི་གནས་སྐབས་ངེས་པའི་རྐྱེན་བསྟན་པ་ཡིན་ནོ། །སྐྱེ་མཆེད་དྲུག་གིས་བསྡུས་པའི་དོན་རྣམ་པར་གཞག་པ་རྣམས་བཅུ་དྲུག་འདིར་བསྟན་པ་ཡིན་ཏེ། རབ་ཏུ་དབྱེ་བ་རྣམ་པར་གཞག་པ་ནི་ཇི་སྐད་དུ། ནང་གི་སྐྱེ་མཆེད་དྲུག་ཅེས་བསྟན་པ་ཡིན་ནོ། །སྒྲ་སྦྱོར་བ་རྣམ་པར་གཞག་པ་ནི་ཇི་སྐད་དུ་དྲུག་ཉིད་སྐྱེ་མཆེད་
ཡིན་པས་སྐྱེ་མཆེད་དྲུག་སྟེ། ཇི་ལྟར་ས་གསུམ་དང་འབྲས་བུ་གསུམ་དང་ཚ་བ་གསུམ་ལྟ་བུའོ་ཞེས་བསྟན་པ་ཡིན་ནོ། །ཐུན་མོང་མ་ཡིན་པ་རྣམ་པར་གཞག་པ་ནི་ཇི་སྐད་དུ་གཟུགས་ལ་སོགས་པ་ནི་མ་ཡིན་ཏེ། གཞན་གྱི་རྣམ་པར་ཤེས་པའི་རྒྱུན་དང་ཐུན་མོང་ཡིན་པའི་ཕྱིར་རོ་ཞེས་བསྟན་པ་ཡིན་ནོ། །དེའི་དོན་རྣམ་པར་གཞག་པ་ནི་གནས་ཀྱི་དོན་ནི་སྐྱེ་མཆེད་ཡིན་ནོ་ཞེས་བསྟན་པ་ཡིན་ནོ། །ངེས་པའི་ཚིག་རྣམ་པར་གཞག་པ་ནི་རྣམ་པར་ཤེས་པའི་ཚོགས་དྲུག་རྣམས་སྐྱེ་བ་མཆེད་པར་བྱེད་པས་སྐྱེ་མཆེད་དེ་ཞེས་བསྟན་པ་ཡིན་ནོ། །རང་གི་དངོས་པོ་རྣམ་པར་གཞག་པ་ནི་ཇི་སྐད་དུ་གཟུགས་དང་བའི་བྱེ་བྲག་ཅན་མིག་ལ་སོགས་པ་ལྔ་ཡིན་ནོ་ཞེས་བྱ་བ་དང༌། ཡིད་ཀྱི་སྐྱེ་མཆེད་ནི་ཕུང་པོའི་ནང་དུ་ནི་རྣམ་པར་ཤེས་པའི་ཕུང་པོ་གང་ཡིན་པའོ་ཞེས་རྒྱས་པར་བསྟན་པ་ཡིན་ནོ། །ངེས་པའི་རྣམ་པར་གཞག་པ་ནི་ཇི་སྐད་དུ། ཐམས་ཅད་ཀྱི་སྐྱེ་མཆེད་དྲུག་གི་དང་པོ་ནི་མིང་དང་གཟུགས་ཀྱི་རྐྱེན་གྱིས་ཡིན་པར་ངེས་པར་བྱའོ་མིང་དང་གཟུགས་ཐམས་ཅད་སྤྲིན་ལས་ཆར་ལ་སོགས་པ་བཞིན་དུ་སྐྱེ་མཆེད་དྲུག་གི་རྐྱེན་མ་ཡིན་ནོ་ཞེས་བསྟན་པ་ཡིན་ནོ། །མངོན་པར་འགྲུབ་པ་དང་ཡོངས་སུ་རྫོགས་པའི་རྐྱེན་རྣམ་པར་གཞག་པ་ནི་ཇི་སྐད་དུ། མངོན་པར་འགྲུབ་པ་དང་ཡོངས་སུ་རྫོགས་པའི་རྐྱེན་ཡིན་པའི་ཕྱིར་ཇི་ལྟར་རིགས་པར་སྦྱར་ཏེ་ཞེས་བསྟན་པ་ཡིན་ནོ། །རྣམ་པར་ཤེས་པའི་ཚོགས་དྲུག་གི་རྟེན་གྱི་དངོས་པོ་རྣམ་པར་གཞག་པ་ནི་ཇི་སྐད་དུ། གཙོ་བོའི་རྒྱུ་ཡིན་པའི་ཇི་སྐད་དུ་སྔར་བསྟན་པ་ཡིན་ནོ་ཞེས་བསྟན་པ་ཡིན་ནོ། །རྣམ་པར་ངེས་པ་རྣམ་པར་གཞག་པ་ནི་ཇི་སྐད་དུ་ཁ་ཅིག་རྟོག་པ་མིང་དང་གཟུགས་ཀྱི་གནས་སྐབས་ན་ལུས་ཡོད་ཀྱང་ཞེས་བྱ་བ་ནས་དེ་བས་ན་ཐོག་མ་ཁོ་ནར་མངལ་དུ་ཕུང་པོ་ལྔ་པའི་མིང་དང་གཟུགས་གྲུབ་པ་ཡིན་ནོ་ཞེས་བྱ་བའི་བར་དུ་བསྟན་པ་ཡིན་ནོ། །འདུས་པ་རྐྱེན་ཡིན་པར་རྣམ་པར་གཞག་པ་ནི་ཇི་སྐད་དུ། དྲུག་ཅར་གྱི་ཡང་གཉི་ག་ཚོགས་པ་ཡིན་ཏེ་ཞེས་བྱ་བ་ནས་ལུས་དང་སེམས་གཉིས་གཅིག་ལ་གཅིག་རྗེས་སུ་བྱེད་པར་མཐོང་བའི་ཕྱིར་རོ་ཞེས་བསྟན་པ་ཡིན་ནོ། །ཡན་ལག་གཞན་རྣམ་པར་གཞག་པ་ནི་ཇི་སྐད་དུ། །ཕྱིའི་སྐྱེ་མཆེད་ལས་
བརྩམས་ནས་དེ་ནི་ཡན་ལག་ཐ་དད་པ་ཡོད་པ་མ་ཡིན་ཏེ། མིང་དང་གཟུགས་ཀྱི་སྐད་ཅིག་མ་དང་པོའི་ཚེ་ན་ཡང་དེ་ཡོད་པ་ཡིན་པའི་ཕྱིར་དང་ཞེས་བསྟན་པ་ཡིན་ནོ། །གནས་སྐབས་ངེས་པ་རྣམ་པར་གཞག་པ་ནི་ཇི་སྐད་དུ། སྒྲ་ཡང་གནས་སྐབས་མ་ངེས་པ་ཡིན་པའི་ཕྱིར་དང་ཞེས་བསྟན་པ་ཡིན་ནོ། །སེམས་ཅན་གྱི་གྲངས་སུ་གཏོགས་པ་རྣམ་པར་གཞག་པ་ནི་ཇི་སྐད་དུ་ལྔ་པོ་ཡང་གཅིག་ཁོ་ནར་སེམས་ཅན་གྱི་གྲངས་སུ་གཏོགས་པ་མ་ཡིན་པའི་ཕྱིར་རོ་ཞེས་བསྟན་པ་ཡིན་ནོ། །རྐྱེན་མཐའ་དང་བྲལ་བ་རྣམ་པར་གཞག་པ་ནི་ཇི་སྐད་དུ། མིང་དང་གཟུགས་ལ་ནུས་པའི་བྱེ་བྲག་ཡོད་པའི་ཕྱིར་རོ་ཞེས་སྔར་བསྟན་ཟིན་ཏོ་ཞེས་བསྟན་པ་ཡིན་ནོ། །མ་ངེས་པ་རྣམ་པར་གཞག་པ་ནི་ཇི་སྐད་དུ། སྐྱེ་བའི་རིམ་པ་ཡོངས་སུ་རྫོགས་པའི་གནས་སྐབས་ཀྱི་ཆེད་དུ་རྐྱེན་བཤད་པ་ཡིན་པའི་ཕྱིར་དང༌། ཡན་ལག་ཐ་དད་པ་ཡང་ཞེས་བསྟན་པ་ཡིན་ནོ། །སྐྱེ་མཆེད་དྲུག་རྒྱ་ཆེར་བཤད་པ་རྫོགས་སོ།། །།སྐྱེ་མཆེད་དྲུག་གི་རྐྱེན་གྱིས་རེག་པ་ཞེས་བྱ་བའི་རེག་པ་གང་ཞེ་ན་ཞེས་བྱ་བའི་རེག་པའི་སྒྲ་འདི་ནི་རེག་བྱ་ལ་ཡང་མཐོང༌། ཕྲད་པ་ལ་ཡང་མཐོང༌། སེམས་ལས་བྱུང་བ་ལ་ཡང་མཐོང་སྟེ། གསུང་རབ་ལས་རབ་ཏུ་དབྱེ་བ་རྣམ་པ་དྲུག་ཅེས་འབྱུང་ངོ༌། །དེ་བས་ན་དེའི་ཕྱིར་དམིགས་མི་ཕྱེད་ན་འདིར་སྐྱེ་མཆེད་དྲུག་གི་རྐྱེན་གྱིས་རེག་པ་ཞེས་བྱ་བ་གང་ཞེ་ན། དེ་དམིགས་ཀྱིས་དབྱེ་བའི་ཕྱིར། རེག་པའི་ཚོགས་དྲུག་སྟེ་ཞེས་རྒྱས་པར་འབྱུང་བ་དེ་ལ་བཅོམ་ལྡན་འདས་ཀྱིས་གདུལ་བྱའི་བྱེ་བྲག་ལ་ལྟོས་ནས་རེག་པའི་རྟེན་ཐ་དད་པའི་སྒོ་ནས་རབ་ཏུ་དབྱེ་བ་བསྟན་གྱི་ཞེས་སྨྲས་ཏེ། མིག་ལ་སོགས་པ་རྟེན་ཐ་དད་པའི་སྒོ་ནས་མིག་གི་འདུས་ཏེ་རེག་པ་ནས་ཡིད་ཀྱི་འདུས་ཏེ་རེག་པའི་བར་དུ་ཡིན་གྱི། ངོ་བོ་ཉིད་ནི་མ་ཡིན་ནོ། །གདུལ་བྱའི་བྱེ་བྲག་ལ་ལྟོས་ནས་ཞེས་བྱ་བ་ནི་དེའི་ཚེ་གདུལ་བྱའི་བྱེ་བྲག་ལ་ལྟོས་པ་དང་མ་འོངས་པའི་གདུལ་བྱའི་བྱེ་བྲག་ལ་ལྟོས་ནས་ཀྱང་གསུངས་པ་མ་ཡིན་ཏེ། ཇི་ལྟ་བ་བཞིན་དུ་མ་དྲིས་པར་འཆད་པར་ཐལ་བར་འགྱུར་བའི་ཕྱིར་དང༌། རབ་ཏུ་དབྱེ་བ་ནི་དྲིས་པ་ཡིན་པས་སོ། །གསུམ་པ་འདུས་བྱས་པས་རེག་པ་ཡིན་ནོ་ཞེས་མདོ་སྡེ་གཞན་ལས་གསུངས་པ་ཡིན་ནོ་ཞེས་བྱ་བ་ཇི་ལྟ་བུ་ཞེ་ན། མིང་དང་གཟུགས་ལ་བརྟེན་ནས་མིག་གི་རྣམ་
པར་ཤེས་པ་སྐྱེའོ། །གསུམ་འདུས་པ་ལས་རེག་པའོ་འབྱུང་བའི་མདོ་སྡེ་ལས་ཀྱང༌། གསུམ་འདུས་པ་ལས་ཞེས་བྱ་བ་ནི་རྒྱུ་བསྟན་པ་ཡིན་གྱི་ངོ་བོ་ཉིད་ནི་མ་ཡིན་ནོ། །གང་ལ་བརྟེན་ནས་སེམས་ལས་བྱུང་བའི་ཆོས་ཐམས་ཅད་སྐྱེའོ་ཞེས་བྱ་བ་ནི་སེམས་ལས་བྱུང་བའི་ཆོས་ཐམས་ཅད་སྐྱེད་པར་བྱེད་པའི་སྒོ་ནས་རེག་པ་བསྟན་ཏོ། །བྱེད་པ་དེ་ཡང་མངོན་སུམ་མམ། རྗེས་སུ་དཔག་པས་མི་འགྲུབ་པས་དེ་བས་ན་ཇི་སྐད་དུ་དྲིས་པ་བཅུའི་མདོ་སྡེ་ལས་ཞེས་བྱ་བ་ནས་གང་ཡིན་པ་དེ་ཐམས་ཅད་རེག་པ་ལ་བརྟེན་ནས་སོ་ཞེས་བྱ་བའི་དབང་དུ་གསུངས་སོ། །དེ་ཡིད་ཀྱིས་འགའ་ཡང་ཡོངས་སུ་མི་ཆོད་དོ་ཞེས་བྱ་བ་ནི་རེག་པ་འདིའོ། །དེའི་ཚོར་བ་ལ་སོགས་པ་བཞིན་དུ་ཞེས་བྱ་བ་ནི་ཚོར་བ་དང༌། སེམས་པ་དང་ཡིད་ལ་བྱེད་པ་ལ་སོགས་པ་ཇི་ལྟར་འོས་པ་རང་གི་མཚན་ཉིད་ཡིད་ཀྱིས་ཡོངས་སུ་ཆོད་པ་ཡིན་གྱི། དེ་ལྟར་རེག་པ་ནི་མ་ཡིན་ནོ། །ཇི་ལྟ་བ་བཞིན་དུ་ཡོད་དོ་ཞེས་བྱ་བ་འདི་ཇི་ལྟར་ཡིད་ཆེས་པར་བྱ་ཞེ་ན། དེའི་ཕྱིར་ཡིད་བརྟན་དུ་རུང་བའི་ལུང་ལས་སོ་ཞེས་སྨྲས་སོ། །ཇི་ལྟ་ཞེ་ན། སྐྱེ་མཆེད་དྲུག་གི་རྐྱེན་གྱིས་རེག་པ་གསུམ་འདུས་པ་ལས་རེག་པའི་རྒྱུ་བསྟན་པ་ནི། ཡིད་བརྟན་དུ་རུང་བའི་ལུང་ལས་སོ། །གང་ཡང་ཚོར་བའི་ཕུང་པོ་དང༌། འདུ་ཤེས་ཀྱི་ཕུང་པོ་དང༌། འདུ་བྱེད་ཀྱི་ཕུང་པོ་གང་ཡིན་པ་དེ་ཐམས་ཅད་རེག་པ་ལ་བརྟེན་ནས་ཚོར་བ་གང་ཡིན་པ་དང་ཞེས་བྱ་བ་ནི་རེག་པའི་འབྲས་བུ་སྟོན་པའི་ཡིད་བརྟན་དུ་རུང་བའི་ལུང་ལས་སོ། །འདིར་སྨྲ་བ་ཡིད་ཀྱིས་ཡོངས་སུ་མི་ཆོད་པ་ཡིན་ན་ཡིད་བརྟན་དུ་རུང་བའི་ལུང་ཙམ་གྱིས་ཡོད་པར་ཇི་ལྟར་ཡིད་ཆེས་པར་བྱ་ཞེ་ན། དེའི་ཕྱིར་ཡིད་བརྟན་དུ་རུང་བའི་ལུང་ཡང་རྣམ་པ་གསུམ་སྟེ། མངོན་སུམ་གྱི་དོན་དང་རྗེས་སུ་དཔག་པར་བྱ་བའི་དོན་དང༌། དད་པར་བྱ་བའི་དོན་སྟོན་ཏོ་ཞེས་སྨྲས་སོ། །དེ་ལ་མངོན་སུམ་གྱི་དོན་ནི་འདི་ལྟ་སྟེ། ཁྲོས་པས་མདོག་ནི་མི་སྡུག་འགྱུར། །གཏུམ་པ་ཉལ་ན་སྡུག་བསྔལ་ཡིན། །ཞེས་བྱ་བ་ལ་སོགས་པའོ། །རྗེས་སུ་དཔག་པར་བྱ་པའི་དོན་ནི་བྲམ་ཟེའི་ཁྱེའུ་འདི་ལྟ་སྟེ་མདོག་ངན་པར་འགྲོ་བའི་ལམ་ནི་འདི་དག་སྟེ། འདི་ལྟ་སྟེ་ཁ་ཅིག་ཁྲོ་བ་ཡིན། འཁྲུག་པ་མང་བ་ཡིན་ཞེས་བྱ་བ་ལ་སོགས་པ་ཡིན་ནོ། །དད་པར་བྱ་བའི་དོན་ནི་འདི་ལྟ་སྟེ།
རྣམ་པ་གསུམ་གྱི་གནས་ཀྱིས་བྱང་གི་སྒྲ་མི་སྙན་གྱི་མི་དང༌། སུམ་ཅུ་རྩ་གསུམ་གྱི་ལྷ་དང༌། འཛམ་བུའི་གླིང་གི་མི་རྣམས་ཟིལ་གྱིས་གནོན་པར་འགྱུར་རོ། གསུམ་པོ་གང་གིས་ཤེ་ན། བདག་གི་བ་མེད་ཅིང་ཡོངས་སུ་འཛིན་པ་མེད་པ་དང༌། ཚེ་ངེས་པ་དང༌། ངེས་པར་ཁྱད་པར་དུ་འགྲོ་བའོ་ཞེས་རྒྱས་པར་འབྱུང་བ་ཡིན་ནོ། །ཡིད་བརྟན་དུ་རུང་བའི་ལུང་རྣམ་པ་གསུམ་པོ་དེ་ལ་མངོན་སུམ་གྱི་དོན་དང༌། རྗེས་སུ་དཔག་པར་བྱ་བའི་དོན་གཉིས་ནི་མངོན་སུམ་དང་རྗེས་སུ་དཔག་པ་གཉིས་ཀྱི་གོ་རིམས་བཞིན་དུ་ཡིད་ཆེས་པར་བྱ་སྟེ། གང་དེ་དག་དང་འགལ་བ་མེད་པ་མངོན་སུམ་གྱི་དོན་གྱི་ཚིག་ལ་ནི་མངོན་སུམ་གྱི་ཚད་མའི་སྒོ་ནས་སོ། །རྗེས་སུ་དཔག་པར་བྱ་བའི་དོན་གྱི་ཚིག་ལ་ནི་རྗེས་སུ་དཔག་པའི་ཚད་མའི་སྒོ་ནས་ཡིད་ཆེས་པར་བྱའོ། །དད་པར་བྱ་བའི་དོན་དེ་ལ་ཡང་ཡིད་ཆེས་པར་བྱའོ། །དེ་ནི་རང་གི་སྡེ་པ་རྣམས་ཀྱིས་རྟོགས་པར་མི་ནུས་པ་ཡིན་ཡང་ཞེས་བྱ་བ་དེ་ནི་སྡུག་བསྔལ་ཡང་མ་ཡིན། བདེ་བ་ཡང་མ་ཡིན་པའི་ཚོར་བའོ། །ཚོར་བ་གསུམ་ཞེས་གསུངས་པའི་ཕྱིར་རོ་ཞེས་བྱ་བ་ནི་བདེ་བ་དང༌། སྡུག་བསྔལ་དང༌། བདེ་བ་ཡང་མ་ཡིན། སྡུག་བསྔལ་བ་ཡང་མ་ཡིན་པའོ། །བསམ་གཏན་བཞི་པ་དང༌། གཟུགས་མེད་པ་ན་ཚོར་བ་མེད་པར་ཐལ་བར་འགྱུར་བའི་ཕྱིར་རོ་ཞེས་བྱ་བ་ནི་དེ་དག་ན་ཚོར་བ་གཞན་བཀག་པའི་ཕྱིར་ཏེ། དེ་བདེ་བ་ཡང་སྤངས་སྡུག་བསྔལ་ཡང་སྤངས་ཤིང་ཡིད་བདེ་བ་དང༌། ཡིད་མི་བདེ་བ་ལྔ་ནས་མེད་པ་ཞེས་བྱ་བ་ཡིན་ནོ། །མིག་ལ་སོགས་པའི་ཞེས་རྒྱས་པར་འབྱུང་བ་ནི་མིག་ལ་སོགས་པའི་གཟུགས་དང་བའི་བྱེ་བྲག་ཀྱང་ཡོངས་སུ་མི་ཆོད་པ་ཡིན་ཏེ། སྐྱེ་མཆེད་ཀྱི་གཟུགས་དང་བ་ཡང་ཤེལ་སྒོང་ལ་སོགས་པ་རབ་ཏུ་གྲགས་པ་དེ་ལས་རིགས་གཞན་དུ་གྱུར་པ་གང་དབང་པོ་དང་ཞེས་བྱ་བ་ནི་ཡིད་ཀྱིས་ཡོངས་སུ་ཆོད་པར་མི་ནུས་སོ། །མ་རིག་པ་ཡང་མཚན་ཉིད་མི་མངོན་པ་ཡིན་པས་མངོན་པ་མེད་པ་ནི་ཁྱད་པར་དུ་ཡོངས་སུ་ཆོད་པར་མི་ནུས་སོ། །ཡོངས་སུ་མི་ཆོད་པའི་མཚན་ཉིད་ཡིན་དུ་ཟིན་ཀྱང་ཞེས་རྒྱས་པར་འབྱུང་བ་དེ་དག་ནི་ཡོངས་སུ་མི་ཆོད་པའི་མཚན་ཉིད་ཀྱི་དོན་གང་ཡིན་པ་དེ་ནི་ཡིད་བརྟན་དུ་དུད་པའི་ལུང་ལས་ཁོང་དུ་ཆུད་པར་བྱས་ཏེ། དད་པར་བྱ་བའི་དོན་ནི་ཡིད་བརྟན་དུ་རུང་བའི་
ལུང་ཡིན་པའི་ཕྱིར་རོ། །དེ་དག་ནི་རྒྱུ་ལ་འབྲས་བུ་གདགས་པ་ཡིན་ཏེ་ཞེས་བྱ་བ་ནི་གསུམ་པོ་རྣམས་ཕྲད་པ་དང༌། ཚོགས་པ་དང་འདུས་པ་ནི་རེག་པའི་རྒྱུ་ཡིན་ནོ། །དེ་བས་ན་དེ་ལ་རེག་པ་བཏགས་པ་ཡིན་ནོ། །དཔེར་ན། འཕགས་པ་རྣམས་ནི་མཐོང་བ་བདེ། །ཞེས་བྱ་བ་ནི་རྒྱུ་ལ་འབྲས་བུ་བཏགས་པ་སྟོན་ཏེ། འཕགས་པ་རྣམས་མཐོང་བ་ཁོ་ན་བདེ་བ་མ་ཡིན་གྱི། དེ་ནི་བདེ་བའི་རྒྱུ་ཡིན་པས་བདེ་བ་ཞེས་བྱའོ། །ཚངས་སྤྱོད་དྲི་མ་བུད་མེད་ཡིན། །ཞེས་བྱ་བ་ནི་བུད་མེད་ནི་ཚངས་པར་སྤྱོད་པའི་དྲི་མ་ཡིན་ཏེ་ཚངས་པར་སྤྱོད་པ་དགྲ་བཅོམ་པ་ལ་ཡང་དྲི་མ་ཡོད་པར་ཐལ་བར་འགྱུར་བའི་ཕྱིར་རོ། །ཚངས་པར་སྤྱོད་པའི་དྲི་མ་འདོད་ཆགས་ཀྱི་རྒྱུ་ཡིན་པས་ཚངས་པར་སྤྱོད་པའི་དྲི་མ་ཞེས་བཤད་དོ། །འཇིག་རྟེན་ན་ཡང་མེ་ནི་བདེ་བའོ། །མེ་ནི་སྡུག་བསྔལ་བའོ་ཞེས་པ་ནི་ཇི་ལྟར་རྒྱུ་ལ་འབྲས་བུ་བཏགས་པ་བསྟན་པ་ཡིན་ཏེ། བདེ་བ་དང་སྡུག་བསྔལ་གྱི་རྒྱུ་མེ་ལ་བདེ་བ་དང་སྡུག་བསྔལ་འདོགས་པར་བྱེད་དོ། །དེ་བཞིན་དུ་རེག་པའི་རྒྱུ་ཕྲད་པ་ལ་སོགས་པ་ལ་རེག་པ་འདོགས་པ་ཡིན་ནོ། །འཇིག་རྟེན་ན་ཡང་ཕྲད་པ་ལ་རེག་གོ་ཞེས་བརྗོད་དོ་ཞེ་ན་ཞེས་བྱ་བ་ནི་ཕྲད་པ་ལས་གཞན་མེད་དེ། སྒྲ་ལ་སོགས་པ་ལྟར་ཞེས་བསྟན་ཏོ། །འདིས་ནི་ཕྲད་པ་ཙམ་ཁོ་ན་རེག་པ་ཡིན་ནོ་ཞེས་བྱ་བའི་རིགས་པ་སྟོན་པ་ཡིན་ནོ། །སྐྱེ་མཆེད་དྲུག་ནི་གསུམ་གྱི་ནང་དུ་འདུས་པའི་ཕྱིར་དང་ཞེས་བྱ་བ་ནི་སྐྱེ་མཆེད་དྲུག་ནི་དབང་པོ་དང༌། ཡུལ་དང་རྣམ་པར་ཤེས་པ་གསུམ་གྱི་ནང་དུ་འདུས་པ་ཡིན་ནོ། །ཇི་ལྟ་ཞེ་ན་རེ་ཞིག་མིག་གི་སྐྱེ་མཆེད་ནི་མིག་དང་གཟུགས་དང་མིག་གི་རྣམ་པར་ཤེས་པ་གསུམ་གྱི་ནང་དུ་ཡན་ལག་གིས་འདུས་པ་ཡིན་ནོ། །དེ་བཞིན་དུ་ཡིད་ཀྱི་སྐྱེ་མཆེད་ནི་ཡིད་དང་ཆོས་དང་ཡིད་ཀྱི་རྣམ་པར་ཤེས་པ་གསུམ་གྱི་ནང་དུ་ཡན་ལག་ཉིད་ཀྱིས་འདུས་པའི་བར་དུའོ། །འདི་ནི་རེ་ཞིག་སྐྱེ་མཆེད་དྲུག་གི་རྐྱེན་གྱིས་རེག་པ་ཞེས་འབྱུང་བའི་མདོ་སྡེ་དང་འགལ་བ་ཡིན་ཏེ་ཞེས་བྱ་བ་ནི་སྐྱེ་མཆེད་དྲུག་ནི་གསུམ་གྱི་ནང་དུ་འདུས་པའི་སྐྱེ་མཆེད་དྲུག་གི་རྐྱེན་ཡིན་པར་འོས་པ་མ་ཡིན་ཏེ། དེ་གསུམ་ཕྲད་པ་ནི་རེག་པ་ཡིན་ལ་དེ་གསུམ་ཕྲད་པ་ལས་རེག་པ་གཞན་ཡོད་པ་མ་ཡིན་ཏེ། དོན་ཐ་དད་པ་ཡིན་པའི་ཕྱིར་རོ། །གསུམ་འདུས་པ་ནི་སེམས་ལས་བྱུང་བའི་རེག་པ་ཡང་
མ་ཡིན་ནོ་ཞེས་བྱ་བ་ནི་ཕྲད་པ་ནི་བཏགས་པའི་ཆོས་ཡིན་པའི་ཕྱིར་དང༌། གསུམ་ཕྲད་པ་ནི་གསུམ་ཉིད་ཀྱི་ཆོས་ཡིན་གྱི། འགའི་ནི་མ་ཡིན་ནོ། །རེག་པ་ནི་བཏགས་པ་ཡིན་ཏེ་ཞེས་བྱ་བ་ནི་ཐ་སྙད་པའོ། །འདིས་ནི་སེམས་ལས་བྱུང་བའི་རེག་པ་བརྟགས་པ་ཡིན་ནོ་ཞེས་སྟོན་ཏོ། །དེ་ལྟ་ན་མི་ལྡན་པ་ཡིན་པར་འགྱུར་ལ་ཞེས་བྱ་བ་ནི་རིས་འདྲ་བ་བཞིན་ཞེས་བྱ་བའི་ཐ་ཚིག་གོ །དེ་ལྟ་ན་ཡང་རེག་པ་སེམས་ལས་བྱུང་བ་ཡིན་པར་མི་འགྲུབ་བོ་ཞེས་སྟོན་ཏོ། །མི་ལྡན་པ་རེག་པ་ཡིན་ནོ་ཞེས་བྱ་བ་དེ་ལྟ་བུ་ནི་སྡེ་པ་གང་གི་གྲུབ་པའི་མཐའ་ཡང་མ་ཡིན་ནོ། །བཙུན་བ་གོས་དམར་པ་དང༌། མདོ་སྡེ་འདི་ཉིད་ལས་ཀྱང་གསུངས་པ་ཞེས་བྱ་བ་ནི་རྟེན་ཅིང་འབྲེལ་བར་འབྱུང་བའི་མདོ་སྡེ་འདི་ཉིད་ལས་ཞེས་བྱ་བའི་དོན་ཏོ། །ཚོར་བ་དང་འདུ་ཤེས་དང་སེམས་པ་དང༌། རེག་པ་དང་ཡིད་ལ་བྱེད་པའོ་ཞེས་བྱ་བ་འདིས་ནི་རེག་པ་ནི་བཏགས་པ་ཡང་མ་ཡིན་ལ། མི་ལྡན་པ་ཡང་མ་ཡིན་ནོ་ཞེས་སྟོན་ཏོ། །སེམས་ལས་བྱུང་བ་རྫས་སུ་ཡོད་པ་རྣམས་ཚོར་བ་ལ་སོགས་པ་མིང་གི་དངོས་པོར་བརྗོད་པའི་ཕྱིར་རོ། །སྡེ་ཚན་དྲུག་པ་དྲུག་ལས་ཀྱང་སྡེ་ཚན་དྲུག་རྣམས་ནི་ཞེས་རྒྱས་པར་འབྱུང་བ་ལ། སྡེ་ཚན་དྲུག་པ་དྲུག་ཅེས་བྱ་བའི་མདོ་སྡེ་ལས་སྡེ་ཚན་དྲུག་ནི་སྡེ་ཚན་དྲུག་པོ་གང་ཡིན་པའི་དྲུག་པོ་འདི་དག་སྟེ། ནང་གི་སྐྱེ་མཆེད་དྲུག་ནི་སྡེ་ཚན་དྲུག་པ་དང་པོ་ཡིན་ནོ། །ཕྱིའི་སྐྱེ་མཆེད་དྲུག་ནི་གཉིས་པའོ། །རྣམ་པར་ཤེས་པའི་ཚོགས་དྲུག་ནི་གསུམ་པའོ། །རེག་པའི་ཚོགས་དྲུག་ནི་བཞི་པའོ། །ཚོར་བའི་ཚོགས་དྲུག་ནི་ལྔ་པའོ། །སྲེད་པའི་ཚོགས་རྣམས་ནི་དྲུག་པ་ཡིན་ནོ། །དྲུག་ཚད་དྲུག་པོ་ཇི་ལྟ་བ་དེ་དག་ནི་རིགས་ཐ་དད་པ་ལས་རྣམ་པར་གཞག་པ་ཡིན་ཏེ། གཞན་ནི་ནང་གི་སྐྱེ་མཆེད་དྲུག་གོ །གཞན་ནི་ཕྱིའི་འོ། །གཞན་ནི་རྣམ་པར་ཤེས་པའི་ཚོགས་སོ་ཞེས་བྱ་བ་དེ་བཞིན་དུ་རེག་པའི་ཚོགས་དྲུག་གི་དྲུག་ཚན་ཡང་རིགས་ཐ་དད་པ་ལས་རྣམ་པར་གཞག་པ་ཡིན་གྱི། གསུམ་འདུས་པ་ཉིད་ནི་རེག་པ་མ་ཡིན་ནོ། །མིང་དང་གཟུགས་ལ་བརྟེན་ནས་མིག་གི་རྣམ་པར་ཤེས་པ་སྐྱེ་པ་དང༌། གསུམ་འདུས་པས་རེག་པ་མ་ཡིན་ནོ་ཞེས་འབྱུང་བའི་མདོ་སྡེ་གཞན་དང༌། དེ་བཞིན་དུ་གཉིས་པོ་འདི་ལ་བརྟེན་ནས་རེག་པའོ་ཞེས་འབྱུང་བ་ཅི་མདོ་སྡེ་གཞན་དང༌། དེ་བཞིན་དུ་གཉིས་པོ་འདི་ལ་བརྟེན་ནས་རེག་པའོ་ཞེས་འབྱུང་བ་ཅི་ཞེ་ན། མདོ་སྡེ་
གཞན་སྤངས་པར་འགྱུར་རོ་ཞེས་བྱ་བའི་སྐབས་དང་སྦྱར་རོ། །ཇི་ལྟ་ཞེ་ན། དགེ་སློང་དག་མ་རིག་པས་བསྒྲིབས་པའི་བྱིས་པ་སྲེད་པ་དང་མཚུངས་པར་ལྡན་པ་རྣམས་ཀྱི་རྣམ་པར་ཤེས་པ་དང་བཅས་པའི་ལུས་འདི་གྲུབ་སྟེ། འདིའི་རྣམ་པར་ཤེས་པ་དང་བཅས་པའི་ལུས་འདི་དང་ཕྱི་རོལ་གྱི་ནི་མིང་དང་གཟུགས་ཏེ། དེ་ནི་གཉིས་སོ། །དགེ་སློང་དག །གཉིས་པོ་འདི་ལ་བརྟེན་ནས་རེག་པའོ་ཞེས་འབྱུང་བ་སྤངས་པར་འགྱུར་རོ། །འོན་ཏེ་རེག་པ་ཁོ་ན་སྐྱེ་མཆེད་དྲུག་གི་རྐྱེན་གྱིས་ཡིན་ན་ནི་ཞེས་རྒྱས་པར་འབྱུང་བ་ནི་རྐྱེན་ཅན་ངེས་པ་ལ་སྐྱོན་སྟོན་པར་བྱེད་དོ། །གཉིས་པ་ལ་བརྟེན་ནས་རྣམ་པར་ཤེས་པ་སྐྱེའོ་ཞེས་བྱ་བའི་གཉིས་གང་ཞེ་ན། མིང་དང༌། གཟུགས་དང༌། ཡིད་དང་ཆོས་ཀྱི་བར་དུ་ཡིན་ཏེ། འདིར་ནི་རྣམ་པར་ཤེས་པ་ཡང་སྐྱེ་མཆེད་དྲུག་གུ་རྐྱེན་གྱིས་ཡིན་ནོ་ཞེས་བསྟན་ཏོ། །གཙོ་བོའི་རྐྱེན་སྐྱེ་མཆེད་དྲུག་ཡིན་ཏེ། ཐུན་མོང་དང་ཐུན་མོང་མ་ཡིན་པའི་རྒྱུ་ཡིན་པའི་ཕྱིར་སྔ་མ་བཞིན་ཏེ་ཞེས་བྱ་བ་ནི་གཙོ་བོའི་རྐྱེན་བརྗོད་པར་བཞེད་པའི་ཕྱིར། སྐྱེ་མཆེད་དྲུག་གི་རྐྱེན་གྱིས་རེག་པ་ཞེས་བསྟན་པ་ཡིན་གྱི། རྐྱེན་ངེས་པ་བརྗོད་པར་བཞེད་པས་ནི་མ་ཡིན་ནོ། །སྐྱེ་མཆེད་དྲུག་གཙོ་བོའི་རྐྱེན་ཡིད་ཡིན་པ་དེ་ཡང་ཐུན་མོང་དང་ཐུན་མོང་མ་ཡིན་པའི་རྒྱུ་ཡིན་པ་ཉིད་ཀྱིས་སྟོན་ཏོ། །སྔ་མ་བཞིན་ཏེ་ཞེས་བྱ་བ་ནི་རྣམ་པར་ཤེས་པའི་ཡན་ལག་ལས་ཇི་ལྟར་སྔར་བསྟན་པ་ནི། གལ་ཏེ་གཟུགས་ལ་སོགས་པ་སོ་སོར་རྣམ་པར་རིག་པའི་རྣམ་པར་ཤེས་པ་ཡིན་ན་ཅིའི་ཕྱིར་མིག་གི་རྣམ་པར་ཤེས་པ་ཞེས་བྱ་བ་ནས་ཡིད་ཀྱི་རྣམ་པར་ཤེས་པ་ཡིན་ཞེས་བྱ་བའི་བར་དུ་དྲིས་པ་དང༌། མིག་ལ་སོགས་པ་ནི་གཅིག་ཏུ་སེམས་ཅན་གྱི་གྲངས་སུ་གཏོགས་པ་ཡིན་པའི་ཕྱིར་རོ་ཞེས་ལན་སྨྲས་ནས་ཡང་ཐུན་མོང་དང་ཐུན་མོང་མ་ཡིན་པའི་རྒྱུ་ཉིད་ནི་གཙོ་བོའི་རྒྱུ་ཡིན་པའི་ཕྱིར་ཞེས་རྒྱས་པར་སྨྲས་པ་དེ་བཞིན་དུ་འདིར་ཡང་གཟུགས་ལ་སོགས་པ་གཞན་དག་ཀྱང་རེག་པའི་རྐྱེན་ཡིན་དུ་ཟིན་ཀྱང་རེག་པ་བསྐྱེད་པར་བྱ་བ་ལ་སྐྱེ་མཆེད་དྲུག་ནི་གཙོ་བོའི་རྐྱེན་ཉིད་ཡིན་ཏེ། ཐུན་མོང་དང་ཐུན་མོང་མ་ཡིན་པའི་རྒྱུ་ཡིན་པའི་ཕྱིར་རོ། །ཐུན་མོང་གི་རྒྱུ་མིག་གི་སྐྱེ་མཆེད་ནི་སྔོན་པོ་ལ་སོགས་པའི་
གཟུགས་ཐམས་ཅད་ལ་དམིགས་པའི་མིག་གི་འདུས་ཏེ་རེག་པའི་རྒྱུ་ཡིན་པའི་ཕྱིར་རོ། །ཐུན་མོང་མ་ཡིན་པའི་རྒྱུ་ཡིན་པའི་ཡང་ཕྱིར་ཏེ། ཡིད་ཀྱི་སྐྱེ་མཆེད་ཀྱི་བར་དུ་ཡང་དེ་བཞིན་དུ་ཇི་ལྟར་རིགས་པར་བརྗོད་པར་བྱའོ། །འདིའི་ཕྱིར་ཡང་སྐྱེ་མཆེད་དྲུག་ནི་རྐྱེན་གཙོ་བོ་ཉིད་ཡིན་ནོ། །ཅིའི་ཕྱིར་ཞེ་ན། དེ་ཡོད་ན་ངེས་པར་ཡུལ་དང་རྣམ་པར་ཤེས་པ་དེ་གཉིས་ཀྱང་ཞེས་རྒྱས་པར་འབྱུང་པ་ལ། དེ་ཡོད་ན་སྐྱེ་མཆེད་དྲུག་དེ་ཡོད་ན་ངེས་པར་ཡུལ་དང་རྣམ་པར་ཤེས་པ་དེ་གཉིས་ཀྱང་ཡོད་པའི་ཕྱིར་རོ་ཞེས་བྱ་བ་ནི་ཡུལ་གཟུགས་ལ་སོགས་པ་ཡོད་པའི་ཕྱིར་དང༌། རྣམ་པར་ཤེས་པ་ཡང་མིག་གི་རྣམ་པར་ཤེས་པ་ལ་སོགས་པ་གང་ཡང་རུང་བ་ཡོད་པའི་ཕྱིར་རོ། །དེ་ཉིད་ཀྱི་ཕྱིར་འདི་ལས་ཞེས་རྒྱས་པར་འབྱུང་བ་ནི་དེ་ཁོ་ནའི་ཕྱིར་ཏེ། རྟེན་ཅིང་འབྲེལ་པར་འབྱུང་བའི་མདོ་སྡེ་ལས་སྐྱེ་མཆེད་དྲུག་ནི་རྐྱེན་གྱི་གཙོ་བོ་ཡིན་པའི་ཕྱིར། མིག་ལ་སོགས་པའི་སྒོ་ནས་མིག་གི་འདུས་ཏེ་རེག་པ་ནས་ཡིད་ཀྱི་འདུས་ཏེ་རེག་པ་ཞེས་རེག་པ་བསྟན་པ་ཡིན་གྱི་གཟུགས་ལ་སོགས་པའི་སྒོ་ནས་ཞེས་བྱ་བ་གཟུགས་དང༌། སྒྲ་དང༌། དྲི་དང༌། རོ་ལ་སོགས་པའི་སོག་ནས་གཟུགས་ཀྱི་འདུས་ཏེ་རེག་པ་ནས་ཆོས་ཀྱི་འདུས་ཏེ་རེག་པ་ཞེས་བསྟན་པ་མ་ཡིན་ཏེ། རྔ་སྒྲ་བཞིན་ནོ། །དཔེར་ན་རྔ་ནི་རྒྱུའི་གཙོ་བོ་ཡིན་པའི་ཕྱིར་རྔའི་སྒྲ་ཞེས་བརྗོད་ཀྱི་དབྱུ་གུའི་སྒྲ་ཞེས་མི་བྱ་བ་དེ་བཞིན་ནོ། །རྔ་སྒྲ་དེའི་རྒྱུའི་གཙོ་བོ་ཡིན་པ་ཡང་དེའི་གནས་ཡིན་པའི་ཕྱིར་དང༌། ཐུན་མོང་མ་ཡིན་པའི་རྒྱུ་ཡིན་པའི་ཕྱིར་རོ། །དབྱུ་གུ་ལ་སོགས་པས་ནི་ཅང་ཏེའུ་ལ་སོགས་པའི་སྒྲའི་རྒྱུ་ཡང་བྱེད་དོ། །དེ་བཞིན་དུ་སྐྱེ་མཆེད་དྲུག་ནི་རེག་པའི་རྐྱེན་གྱི་གཙོ་བོ་ཡིན་ནོ། །སྒྲིབ་པའི་མདོ་སྡེ་ལས་གཉིས་པོ་འདི་ལ་བརྟེན་ནས་རེག་པ་ཞེས་ཇི་སྐད་དུ་རྒྱས་པར་གསུངས་པ་ལ་རྟེན་དང་དམིགས་པ་ཐ་དད་པའི་སྒོ་ནས་ཞེས་བྱ་བ་ནི་རྟེན་ཐ་དད་པའི་སྒོ་ནས་དང༌། དམིགས་པ་ཐ་དད་པའི་སྒོ་ནས་སོ། །སྒྲིབ་པའི་མདོ་སྡེ་ལས་རེག་པའི་རྐྱེན་གཉིས་སུ་ཇི་ལྟར་གསུངས་ཤེ་ན། ཇི་སྐད་དུ་དགེ་སློང་དག་བྱིས་པ་མ་རིག་པས་བསྒྲིབས་ཤིང་སྲེད་པ་དང་མཚུངས་པར་ལྡན་པའི་རྣམ་པར་ཤེས་པ་དང་བཅས་པའི་ལུས་འདི་གྲུབ་སྟེ། འདིའི་རྣམ་པར་ཤེས་པ་དང་བཅས་པའི་ལུས་འདི་དང་ཕྱི་མའི་མིང་དང་གཟུགས་ཏེ་
དེ་ལྟར་གཉིས་སོ། །དགེ་སློང་དག་གཉིས་པོ་འདི་ལ་བརྟེན་ནས་རེག་པའོ་ཞེས་གསུངས་པ་ཡིན་ནོ། །འདི་ལས་ཇི་ལྟར་རྟེན་དང་དམིགས་པ་ཅན་གྱི་རེག་པ་ཐ་དད་པར་བསྟན་ཅེ་ན། དེའི་ཕྱིར་རྣམ་པར་ཤེས་པ་དང་བཅས་པའི་ལུས་ཀྱིས་ནི་དེར་ནང་གི་སྐྱེ་མཆེད་བསྟན་ཏེ། ལུས་སྨོས་པས་ནི་ལྔ་ཆར་སྨོས་པ་ཡིན་ནོ་ཞེས་སྨྲས་སོ། །དེའི་ཕྱིར་འདི་ལྟར་དེ་ལ་བརྟེན་པའི་ཚོར་བ་ནི་ལུས་ཀྱི་ཞེས་སྟོན་པ་བཞིན་ནོ་ཞེས་སྨྲས་སོ། །འདི་ལྟར་ཞེས་བྱ་བ་ནི་གང་གི་ཕྱིར་ཞེས་བྱ་བའི་དོན་ཏོ། །ལུས་ཀྱི་ཕྱོགས་གཅིག་ཡིན་པའི་ཕྱིར་དང༌། ལུས་ལ་བརྟེན་པའི་ཕྱིར་དང་རྡུལ་ཕྲ་རབ་བསགས་པ་ཡིན་པའི་ཕྱིར་ལུས་སྨོས་པས་ནི་ལྔ་ཆར་སྨོས་པ་ཡིན་ནོ། །རྣམ་པར་ཤེས་པ་སྨོས་པས་ནི་སྐྱེ་མཆེད་ཡིན་པར་རོ། །ཕྱི་རོལ་གྱི་མིང་དང་གཟུགས་ནི་ཕྱི་ཡིན་ཏེ་ཞེས་བྱ་བ་ཇི་ཞེ་ན། སྐྱེ་མཆེད་དྲུག་བསྟན་པ་ཡིན་ནོ་ཞེས་སྐབས་དང་སྦྱར་རོ། །དེ་ལ་མིག་གིས་ནི་ཆོས་ཀྱི་སྐྱེ་མཆེད་བསྟན་ཏོ། །གཟུགས་ཀྱིས་ནི་གཟུགས་ཀྱི་སྐྱེ་མཆེད་ལ་སོགས་པ་བསྟན་ཏོ། །གཉིས་པོ་དེ་དག་ཉིད་ཀྱིས་ཞེས་བྱ་བ་ནི་ནང་གི་སྐྱེ་མཆེད་དྲུག་དང་ཕྱིའི་ཞེས་སྟོན་ཏོ། །དེ་ལས་གསུངས་པ་ཞེས་བྱ་བ་མོད་སྡེ་ལས་རེག་པའི་སྐྱེ་མཆེད་དྲུག་པོ་འདི་དག་གང་གིས་རེག་པའི་བྱིས་པ་ཞེས་རྒྱས་པར་འབྱུང་བ་ནི་ནང་དང་ཕྱིའི་སྐྱེ་མཆེད་ཐ་དད་པའི་སོག་ནས་རེག་པ་འབྱུང་གི་གཞན་དུ་མ་ཡིན་ནོ། །དགོངས་པ་གང་གིས་བཤད་པ་དེ་དག་བདག་གིས་སྨྲས་ཟིན་ཏོ་ཞེས་བྱ་བ་ནི་ཇི་ལྟར་ཞེ་ན། སྐྱེ་མཆེད་དྲུག་ནི་གཙོ་བོའི་རྐྱེན་ཡིན་པའི་ཕྱིར་སྐྱེ་མཆེད་དྲུག་རྐྱེན་དུ་བསྟན་པ་དང༌། རྟེན་དང་དམིགས་པ་ཐ་དད་པའི་སྒོ་ནས་རེག་པ་ཐ་དད་པར་བསྟན་པའི་ཕྱིར་རྐྱེན་གཉིས་སྨྲས་སོ། །རེག་པའི་རྐྱེན་གསུམ་ཡང་འདོད་པ་ཁོ་ན་ཡིན་ནོ། །དེ་བས་ན་འདི་འཆད་པའི་བསམ་པའི་དབྱེ་བ་ཕྱིས་ཡང་བརྗོད་པར་མི་བྱའོ། །གང་གི་ཕྱིར་སྐྱེ་མཆེད་དྲུག་གི་འོག་ཏུ་རྣམ་པར་གཞག་ཅེ་ན་ཞེས་བྱ་བ་ནི་སྐྱེ་མཆེད་དྲུག་གི་རྐྱེན་གྱིས་རེག་པ་རེག་པའི་རྐྱེན་གྱིས་ཚོར་བ་ཞེས་བྱ་བ་ཡིན་ཏེ། སྐྱེ་མཆེད་དྲུག་གི་འོག་ཏུ་གསུངས་པའི་ཕྱིར་རོ། །ཇི་ལྟར་ལུས་དང་ཡིད་ཀྱི་སྐྱེ་མཆེད་གཉིས་དེའི་ཚེ་ཡོངས་སུ་རྫོགས་པའི་ཕྱིར་ཡན་ལག་གཞན་དུ་རྣམ་པར་མ་བཞག་པ་ལྟར་རེག་པ་དང་ཚོར་བ་གཉིས་ཀྱང་དེའི་ཚེ་ཡོངས་སུ་རྫོགས་པའི་ཕྱིར་ཡན་
ལག་གཞན་ཉིད་དུ་རྣམ་པར་མི་གཞག་གོ །གལ་ཏེ་སྐྱེ་མཆེད་དྲུག་གི་རྐྱེན་གྱིས་རེག་པ་རེག་པའི་རྐྱེན་གྱིས་ཚོར་བ་ཡིན་ན། རྒྱུ་ཆེན་པོའི་ཆོས་ཀྱི་རྣམ་གྲངས་ལས་ཅིའི་ཕྱིར་མིང་དང་གཟུགས་རྐྱེན་དུ་གསུངས་ཤེ་ན་ཞེས་བྱ་བ་ཇི་སྐད་འབྱུང་ཞེ་ན། ཀུན་དགའ་བོ་རེག་པ་རེག་པའི་རྐྱེན་དུ་བརྗོད་པར་བྱ་བ་ཡོ་དོ། །ཀུན་དགའ་བོ་རེག་པ་རེག་པའི་རྐྱེན་དུ་བརྗོད་པར་བྱ་བ་ཅི་ཞེ་ན། ཀུན་དགའ་བོ་མིང་དང་གཟུགས་ཀྱི་རྐྱེན་གྱིས་རེག་པ་ཡིན་ནོ་ཞེས་བྱའོ། །དེར་ནི་ཐོགས་པ་དང་ཚིག་བླ་དགས་འདུས་ཏེ་རེག་པ་བརྗོད་པར་བཞེད་པའི་ཕྱིར་རོ་ཞེས་བྱ་བ་ནི་རྒྱུ་ཆེན་པོའི་རྣམ་གྲགས་ཀྱི་མདོ་སྡེ་ལས། ཐོགས་པ་འདུས་ཏེ་རེག་པ་ནི་དབང་པོ་གཟུགས་ཅན་ལྔ་ལ་བརྟེན་པའོ། །ཚིག་བླ་དགས་འདུས་ཏེ་རེག་པ་ནི་དྲུག་པ་ཡིད་ཀྱི་དབང་པོ་ལ་བརྟེན་པ་ཡིན་པར་བརྗོད་པར་བཞེད་པའི་ཕྱིར་ཏེ། མིག་ལ་སོགས་པའི་འདུས་ཏེ་རེག་པ་ནི་ཐོགས་པ་དང་བཅས་པའི་དབང་པོ་ལ་བརྟེན་པའི་ཕྱིར་ཐོགས་པ་འདུས་ཏེ་རེག་པ་ཞེས་བསྟན་ཏོ། །ཚིག་ལ་བརྟེན་ནས་དོན་ལ་འཇུག་པ་ནི་ཚིག་བླ་དགས་པ་ཞེས་བསྟན་ཏོ། །ཡང་ན་ཚིག་ལྷག་པར་བྱེད་པའི་ཡིད་ནི་ཚིག་བླ་དགས་པ་ཞེས་བྱའོ། །དེ་བས་ན་ཡིད་ཀྱི་འདུས་ཏེ་རེག་པ་ནི་ཚིག་བླ་དགས་འདུས་ཏེ་རེག་པ་ཞེས་བསྟན་ཏོ། །དེ་ལ་གཟུགས་ཀྱི་རྐྱེན་གྱིས་འདུས་ཏེ་རེག་པ་དང་མིག་གི་རྐྱེན་གྱིས་འདུས་ཏེ་རེག་པ་ཞེས་བསྟན་ཏོ། །རྒྱུ་ཆེན་པོའི་རྣམ་གྲངས་དེ་ལས་སྐྱེ་མཆེད་དྲུག་རྐྱེན་ཉིད་ཡིན་པ་ཡང་བསྟན་ཟིན་ཏེ། ཇི་ལྟར་ཞེ་ན། དེའི་ཕྱིར། མིག་གི་འདུས་ཏེ་རེག་པ་ལ་སོགས་པ་གསུངས་པའི་ཕྱིར་རོ་ཞེས་སྨྲས་ཏེ། ཀུན་དགའ་བོ་གལ་ཏེ་མིག་གི་འདུས་ཏེ་རེག་པ་ཡོད་ཀྱང་འགའ་ལ་གང་དུ་མིག་གི་འདུས་ཏེ་རེག་པའི་རྐྱེན་གྱིས་ནང་དུ་ཚོར་བ་བདེ་བའམ། སྡུག་བསྔལ་བའམ། བདེ་བ་ཡང་མ་ཡིན། སྡུག་བསྔལ་བ་ཡང་མ་ཡིན་པ་མི་འབྱུང་བ་ཡིན་ནམ། བཙུན་པ་མ་ལགས་སོ། །ཀུན་དགའ་བོ་རྣ་བ་དང་སྣ་དང་ལྕེ་དང་ཡིད་ཀྱི་འདུས་ཏེ་རེག་པ་ཡོད་ཀྱང་འགའ་ལ་གང་དུ་ཡང་ཡིད་ཀྱི་འདུས་ཏེ་རེག་པའི་རྐྱེན་གྱི་ནང་དུ་ཚོར་བ་བདེ་བའམ། སྡུག་བསྔལ་བའམ། བདེ་བ་ཡང་མ་ཡིན། སྡུག་བསྔལ་པ་ཡང་མ་ཡིན་པ་མི་འབྱུང་བ་ཡིན་ནམ། བཙུན་པ་མ་ལགས་སོ་ཞེས་རྒྱས་པར་འབྱུང་པ་ཡིན་ནོ། །འོན་ཏེ་
ཡང་གསུམ་འདུས་པ་ལས་རེག་པ་ཞེས་གསུངས་ན་འདུས་པ་ཞེས་བྱ་བ་དེ་ཅི་ཡིན་ཞེས་བྱ་བ་ནི་འདུས་པའི་མཚན་ཉིད་མ་བསྟན་པའི་ཕྱིར་ཅི་འདི་ཡུལ་གཅིག་ཏུ་ཚོགས་པ་ཡིན་ནམ། འོན་ཏེ་དུས་གཅིག་ཏུ་ཚོགས་པ་ཡིན་པ་དམིགས་ཀྱིས་མི་ཕྱེད་དོ། །གཞན་འགའ་ཞིག་འདིར་འདུས་པ་ཡིན་པར་འདོད་ནས་ཚོགས་པ་ཡིན་ནོ་ཞེ་ན་ཡང་ཞེས་བྱ་བ་ནི་ཚོགས་པ་ནི་འདུས་པ་ཡིན་ནོ་སྙམ་སེམས་ན་དེ་ལ་དེ་དག་གི་ཚོགས་པ་ཡུལ་དུ་འམ། དུས་སུ་འམ། གཞན་དུ་ཡིན་ཞེས་བརྗོད་པར་བྱའོ། །གལ་ཏེ་ལྷན་ཅིག་འབྱུང་བའི་ཕྱིར་རོ་ཞེས་བྱ་བ་ནི་དུས་གཅིག་ཏུ་སྐྱེས་པའི་ཕྱིར་རོ་ཞེས་བྱ་བའི་ཐ་ཚིག་གོ །དེ་ལྟར་ཡིན་ན་དབང་པོ་དང་དོན་གཉིས་རྣམ་པར་ཤེས་པའི་རྒྱུ་མ་ཡིན་པར་འགྱུར་ཏེ། རྣམ་པར་ཤེས་པ་སྐྱེས་ཟིན་ན་ནི་དེ་གཉིས་ནུས་པ་དང་མི་ལྡན་པའི་ཕྱིར་རོ་ཞེས་བྱ་བ་ནི་དེ་ཡང་དེ་དག་དང་ལྷན་ཅིག་སྐྱེས་པ་ཡིན་ན་ནི་བདག་ཉིད་ཐོབ་པ་དེ་ལ་དེ་བསྐྱེད་པར་བྱ་བའི་ཕྱིར་དབང་པོ་དང་དོན་གཉིས་ཀྱི་ནུས་པ་རིགས་པ་མ་ཡིན་ནོ། །འོ་ན་མ་སྐྱེས་པ་དེ་ལ་དེ་བསྐྱེད་པར་ནུས་པ་དེ་གཉིས་ལ་ཡོད་དོ་ཞེ་ན། དེའི་ཕྱིར་མ་སྐྱེས་པ་ཡིན་ན་ཡང་མེད་པའི་ཕྱིར་རོ་ཞེས་སྨྲས་ཏེ། རྣམ་པར་ཤེས་པ་མ་སྐྱེས་པ་དེ་ལ་ནི་དབང་པོ་དང་དོན་དེ་གཉིས་ནུས་པ་མེད་པའི་ཕྱིར་ཏེ། མ་སྐྱེས་པ་དེ་ལ་ནུས་པ་ཅི་ཞིག་ཡོད། དེ་མི་རིགས་པ་ཡིན་ནོ། །འདི་ལྟར་བདག་ཉིད་ཐོབ་པ་ནི་བདག་ཉིད་ཐོབ་པར་བྱའི་རྒྱུར་རིགས་པ་མ་ཡིན་ན། །མདོ་སྡེ་དང་གཉི་ག་ཡང་འགལ་བར་འགྱུར་རོ་ཞེས་བྱ་བ་ནི་རྣམ་པར་ཤེས་པ་སྐྱེས་པ་དང༌། མ་སྐྱེས་པ་ལ་དབང་པོ་དང་དོན་གཉིས་ནུས་པ་མེད་པའི་ཕྱིར་ཞེས་བྱ་བ་ནི། གཉིས་ལ་བརྟེན་ནས་རྣམ་པར་ཤེས་པ་སྐྱེའོ་ཞེས་འབྱུང་བའི་མདོ་སྡེ་དང་འགལ་བར་འགྱུར་རོ། །དེ་ལྟར་ན་རེ་ཞིག་རྣམ་པ་གཅིག་མདོ་སྡེ་དང་འགལ་བ་ཡིན་ནོ། །གཅིག་ལ་གཅིག་རྒྱུ་ཉིད་ཡིན་ན་ཡང་གཉིས་ལ་བརྟེན་ནས་རྣམ་པར་ཤེས་པ་སྐྱེའོ་ཞེས་འབྱུང་བའི་མདོ་སྡེ་དང་འགལ་བ་རྣམ་པ་གཉིས་པ་ཡིན་ནོ་ཞེས་བསྟན་ཏོ། །གཉིས་གང་ཞེ་ན། མིག་དང་གཟུགས་ནས་ཡིད་དང་ཆོས་ཀྱི་བར་དུ་ཡིན་ཏེ། རྣམ་པར་ཤེས་པ་ལ་བརྟེན་ནས་གཉིས་སྐྱེ་བ་ནི་མ་ཡིན་ནོ་ཞེས་བསྟན་ཏོ། །དེ་ལྟར་
ན་གཉི་ག་ཡང་མདོ་སྡེ་དང་འགལ་བ་ཡིན་ནོ། །དྲུག་པའི་གསུམ་ཡང་དུས་ཐ་དད་པ་ཡིན་པའི་ཕྱིར་ཇི་ལྟར་ཚོགས་ཡིན་ཞེས་བྱ་བ་ནི་ཡིད་དང་ཆོས་དང་ཡིད་ཀྱི་རྣམ་པར་ཤེས་པ་རྣམས་དུས་ཐ་དད་པ་ཉིད་ནི་ཡིད་ནི་འདས་མ་ཐག་པ་ཡིན་ནོ། །རྣམ་པར་ཤེས་པ་ནི་ད་ལྟར་བྱུང་བའོ། །ཆོས་ནི་རེས་འགའ་མ་འོངས་པའོ། །རེས་འགའ་ད་ལྟར་བྱུང་བའོ། །རེས་འགའ་དུས་གསུམ་པའོ། །རེས་འགའ་དུས་ལས་རྣམ་པར་གྲོལ་བ་ཡིན་ནོ། །དེ་ལྟར་ན་དུས་ཐ་དད་པ་ཡིན་པའི་ཕྱིར། ཇི་ལྟར་ཚོགས་པ་ཡིན་པར་ཞེས་བྱ་བ་ནི་ལྷན་ཅིག་ཏུ་འཇུག་པ་ཡིན་ནོ་ཞེས་བྱ་བ་ནི་དུས་ལ་དང་ཡུལ་དུ་དང་དགོས་པ་འགའ་ཞིག་ལ་ཞེས་བྱ་བ་ཡིན་ནོ། །འོན་ཏེ་སྔར་སྐྱེས་པའི་དབང་པོ་དང་དོན་གཉིས་ཞེས་རྒྱས་པར་འབྱུང་བ་འདིས་ནི་དབང་པོ་དང་དོན་གཉིས་རྣམ་པར་ཤེས་པ་སྐྱེས་པ་ལ་ནུས་པ་དང་ལྡན་པ་ནི་ལྷན་ཅིག་འཇུག་པའི་མཚན་ཉིད་ཚོགས་པ་ཡིན་པར་སྟོན་ཏོ། །དེ་ལྟར་ཡིན་ན་དབང་པོ་དང་དོན་གཉིས་སྐད་ཅིག་མ་ཡིན་པ་ཉིད་དུ་ཐལ་བར་འགྱུར་རོ་ཞེས་བྱ་བ་ནི་སྐད་ཅིག་སྔ་མ་ལ་སྐྱེད་པ་གཉིས་རྣམ་པར་ཤེས་པའི་སྐད་ཅིག་མའི་ཚེ་རྣམ་པར་གནས་པའི་ཕྱིར་རོ། །དྲུག་པའི་གསུམ་པ་ལ་ཡང་ཡིད་དང་ཡིད་ཀྱི་རྣམ་པར་ཤེས་པ་གཉིས་ལྷན་ཅིག་ཚོགས་པ་ཡིན་པར་ཐལ་བར་འགྱུར་བ་ནི་དབང་པོ་དང་དོན་གཉིས་རྣམ་པར་ཤེས་པའི་ཚེ་གནས་པའི་ཕྱིར་རོ། །རྒྱུ་དང་འབྲས་བུའི་དངོས་པོར་ཞེས་རྒྱས་པར་འབྱུང་བ་ནི་འོན་ཏེ་འདི་སྙམ་དུ་རྒྱུ་དང་འབྲས་བུའི་དངོས་པོ་ནི་གསུམ་འདུས་པ་ཡིན་ཏེ། དབང་པོ་དང་དོན་ནི་རྒྱུ་ཡིན། རྣམ་པར་ཤེས་པ་ནི་འབྲས་བུ་ཡིན་ནོ། །ལྔའི་གསུམ་དག་ཅེས་བྱ་བ་ནི་མིག་དང་གཟུགས་དང་རྣམ་པར་ཤེས་པ་ལ་སོགས་པའོ། །ལྷན་ཅིག་འབྱུང་བའི་ཕྱིར་ཞེས་བྱ་བ་ནི་དབང་པོ་དང་དོན་དང་རྣམ་པར་ཤེས་པ་རྣམས་ཀྱི་རྟེན་དང་དམིགས་པ་ད་ལྟར་བྱུང་བ་ཡིན་པའི་ཕྱིར་རོ། །མིག་ལ་སོགས་པ་དང་རྣམ་པར་ཤེས་པ་རྣམས་རྒྱུ་དང་འབྲས་བུའི་དངོས་པོར་མི་རིགས་ཏེ། སྔ་མ་བཞིན་ནོ་ཞེས་བྱ་བ་ནི་རྣམ་པར་ཤེས་པ་སྐྱེས་པ་ལ་ནི་དེ་གཉིས་ཀྱི་ནུས་པ་མེད་པའི་ཕྱིར་རོ། །མ་སྐྱེས་པ་ཡིན་ན་ཡང་མེད་པའི་ཕྱིར་རོ་ཞེས་རྒྱས་པར་བྱས་པ་ཡིན་ནོ། །དབང་པོ་དང་དོན་གཉིས་ནི་མ་ཡིན་ཏེ། རྣམ་པར་ཤེས་པའི་དུས་ན་དེ་དག་མེད་པའི་ཕྱིར་རོ་ཞེས་བྱ་བ་ནི་དབང་པོ་དང་དོན་དེ་གཉིས་མེད་པའི་ཕྱིར་རོ། །གཅིག་
ཁོ་ན་དེ་ལ་ནུས་པ་ཡིན་པའི་ཕྱིར་རོ་ཞེས་བྱ་བ་ནི་རེག་པ་དེ་ལ་རྣམ་པར་ཤེས་པ་ཁོ་ན་ནུས་པ་ཡིན་པའི་ཕྱིར་རོ་ཞེས་བྱ་བའི་དོན་ཏོ། །རྣམ་པར་ཤེས་པ་དང་རེག་པ་ལྷན་ཅིག་བྱུང་བ་ཡིན་ནོ་ཞེ་ན་ཡང་ཞེས་བྱ་བ་ནི་འོན་ཏེ་ཡང་འདི་སྙམ་དུ་སྔར་བྱུང་བའི་དབང་པོ་དང་དོན་ལ་བརྟེན་ནས་རྣམ་པར་ཤེས་པ་དང་རེག་པ་ལྷན་ཅིག་འབྱུང་ངོ་སྙམ་པ་ཡིན་ནོ་རྣམ་པར་ཤེས་པ་ནི་རེག་པའི་རྒྱུ་ཡིན་པར་མི་འགྱུར་ཏེ། ཇི་སྐད་དུ་སྔར་བསྟན་པ་ཡིན་ནོ་ཞེས་བྱ་བ་ནི་རེག་པ་སྐྱེས་པ་ལ་ནི་རྣམ་པར་ཤེས་པའི་ནུས་པ་དང་མི་ལྡན་པའི་ཕྱིར་དང༌། མ་སྐྱེས་ན་ཡང་མེད་པའི་ཕྱིར་རོ་ཞེས་བྱ་བ་ལ་སོགས་པ་ཡིན་ནོ། །དེ་ལྟ་ན་ཡང་གསུམ་འདུས་པ་ལས་རེག་པ་འགྲུབ་པར་མི་འགྱུར་ཏེ། གཉིས་ཁོ་ན་དེ་ལ་ནུས་པ་ཡིན་པའི་ཕྱིར་རོ། །གང་དག་ཡང་གསུམ་འདུས་པ་ཁོ་ན་རེག་པ་ཡིན་ཏེ་ཞེས་རྒྱས་པར་འབྱུང་བ་ནི་གང་དག་ཡང་དབང་པོ་དང༌། ཡུལ་དང༌། རྣམ་པར་ཤེས་པ་གསུམ་འདུས་པ་ཁོ་ན་རེག་པ་ཡིན་གྱི་འདུས་པ་ལ་མ་གཏོགས་པ་རེག་པ་ཡོད་པ་མ་ཡིན་ནོ། །འདུས་པ་ཞེས་བྱ་བ་ནི་གསུམ་པོ་རྣམས་རྒྱུ་དང་འབྲས་བུར་འདུག་བ་ཙམ་ཡིན་ནོ། །ལྷན་ཅིག་འབྱུང་བ་རྒྱུར་མི་འདོད་དོ། །འོ་ན་ཅི་ཞེ་ན། སྔར་བྱུང་བ་ཡིན་ནོ། །དེའི་ཡང་དབང་པོ་དང་དོན་གཉིས་རྣམ་པར་ཤེས་པའི་ཚེ་འགག་པའི་ཕྱིར་ཚོར་བ་སྐྱེ་བའི་རྒྱུའི་དབང་པོར་རིགས་པ་མ་ཡིན་པས་ཞེས་བྱ་བ་ནི་དབང་པོ་དང་དོན་གྱི་སྐད་ཅིག་མ་སྔར་བྱུང་བ་ལ་བརྟེན་ནས་སྐད་ཅིག་མ་གཉིས་པ་ལ་རྣམ་པར་ཤེས་པ་སྐྱེའོ། །རྣམ་པར་ཤེས་པ་སྐྱེས་པའི་ཚེ་གསུམ་རྣམས་སོ་རྒྱུ་དང་འབྲས་བུའི་དངོས་པོའི་མཚན་ཉིད་དུ་འདུས་པ་ཡིན་ན་དེའི་ཚེ་ཡང་དབང་པོ་དང་དོན་དེ་གཉིས་འགག་པའི་ཕྱིར་རེག་པ་ནི་ཚོར་བ་སྐྱེ་བའི་རྒྱུའི་དངོས་པོར་རིགས་པ་མ་ཡིན་པས་རེག་པའི་རྐྱེན་གྱིས་ཚོར་བ་འགྲུབ་པར་མི་གྱུར་ཏེ། དེ་ཅིའི་ཕྱིར་ཞེ་ན། དེའི་ཕྱིར་དེ་དག་གི་གསུམ་པོ་རྒྱུ་དང་འབྲས་བུར་གྱུར་པ་ནི་རེག་པ་ཡིན་གྱི་རྣམ་པར་ཤེས་པ་འབའ་ཞིག་ནི་མ་ཡིན་པས་སོ་ཞེས་སྨྲས་སོ། །དེ་དག་གི་ཞེས་བྱ་བ་ནི་འདུས་པ་ཙམ་རེག་པ་ཡིན་པར་སྨྲ་བ་དེ་དག་གིའོ། །འདུས་པའི་དོན་ནི་རྒྱུ་དང་འབྲས་བུའི་དངོས་པོ་ཁོ་ན་ཡིན་ལ། གསུམ་འདུས་པ་ཡང་ལྷན་ཅིག་པའམ་ཞེས་རྒྱས་པར་འབྱུང་བ་ནི་སློབ་དཔོན་གྱི་ཡིན་ནོ། །ཇི་ལྟར་
རིགས་པར་འབྱུང་བ་ཞེས་བྱ་བ་ནི་ལྔ་པོའི་གསུམ་རྣམས་ནི་ལྷན་ཅིག་འབྱུང་ངོ༌། །དྲུག་པའི་ནི་རིམ་གྱིས་སོ། །ཇི་ལྟར་གྲིབ་མ་དང་མྱུ་གུ་བཞིན་ནོ་ཞེས་བྱ་བ་ནི་ཅི་ཞིག་ཅེ་ན། རྒྱུ་དང་འབྲས་བུའི་དངོས་པོ་ལྷན་ཅིག་འབྱུང་བ་ཡིན་དུ་ཟིན་ཀྱང་གཅིག་ལ་གཅིག་རྒྱུ་ཉིད་མ་ཡིན་ཏེ། མྱུ་གུ་ནི་གྲིབ་མའི་རྒྱུ་ཡིན་ཏེ། དེ་ལྷན་ཅིག་འབྱུང་བ་ཡིན་དུ་ཟིན་ཀྱང༌། དེ་རྒྱུར་བྱས་པའི་གཟུགས་ཡིན་པའི་ཕྱིར་དང༌། རང་གི་རྟེན་འབྱུང་བ་ཆེན་པོ་དང་དུས་ཐ་དད་པ་མེད་པའི་ཕྱིར་ཏེ། མྱུ་གུའི་རྒྱུ་ནི་གྲིབ་མ་མ་ཡིན་ནོ། །དེ་ལྟར་ན་རེ་ཞིག་ལྔ་པོའི་གསུམ་རྣམས་ལྷན་ཅིག་འབྱུང་དུ་ཟིན་ཀྱང་རྒྱུ་དང་འབྲས་བུ་ཡིན་གྱི། གཅིག་ལ་གཅིག་རྒྱུ་ཉིད་ནི་མ་ཡིན་ནོ་ཞེས་བསྒྲུབས་པ་ཡིན་ནོ། །ད་ནི་དྲུག་པའི་གསུམ་གྱི་དབང་དུ་བྱས་ནས། རིམ་གྱིས་འབྱུང་བ་ཡང་ཇི་ལྟར་རྒྱུ་དང་འབྲས་བུའི་དངོས་པོ་ཡིན། འབྲས་བུའི་དུས་ན་རྒྱུ་ཡོད་པ་ཡང་མ་ཡིན་ནོ་ཞེ་ན་ཞེས་སྨྲས་སོ། །ཇི་ལྟར་ས་བོན་དང་མྱུ་གུ་རིམ་གྱིས་བྱུང་ཡང་རྒྱུ་དང་འབྲས་བུ་ཡིན་ལ། མྱུ་གུའི་དུས་ན་ས་བོན་ཡོད་པ་ཡང་མ་ཡིན་པ་བཞིན་ནོ། །ཅིའི་ཕྱིར་ཞེ་ན། ཅིའི་ཕྱིར་དེ་འགག་པ་དང་སྐྱེ་བ་གཉིས་དུས་མཚུངས་པ་ཡིན་པའི་ཕྱིར་ཏེ་ཞེས་སྨྲས་ཏེ། ས་བོན་འགག་པ་དང༌། མྱུ་གུ་སྐྱེ་བ་གཉིས་དུས་མཚུངས་པའི་ཕྱིར་ཞེས་བྱ་བའི་དོན་ཏེ། ས་བོན་འགག་པའི་དུས་གང་ཡིན་པ་ཉིད་མྱུ་གུ་སྐྱེ་བའི་དུས་ཉིད་དེ་མ་ཡིན་ནོ། །གལ་ཏེ་འབྲས་བུའི་དུས་ན་རྒྱུ་ཡོད་པ་མ་ཡིན་ན། དངོས་པོ་མེད་པ་སྔོན་དུ་སོང་བའི་འབྲས་བུ་ཡིན་པར་ཇི་ལྟར་མི་འགྱུར་ཞེ་ན། དེའི་ཕྱིར་ཇི་ལྟར་རྒྱུ་མེད་པ་དག་གི་མེད་པ་སྔོན་དུ་སོང་བ་མ་ཡིན་པ་ཞེས་སྐབས་དང་སྦྱར་རོ། །ཇི་ལྟར་ན་འབྲས་བུ་དེ་ནི་མེད་པ་སྔོན་དུ་སོང་བ་མ་ཡིན་ཞེ་ན། དེའི་ཕྱིར་དེ་དང་འབྲས་བུ་དུས་མཉམ་པའི་ཕྱིར་རོ་ཞེས་སྨྲས་ཏེ། རྒྱུ་མེད་པ་དང་དུས་མཉམ་པ་ཞེས་བྱ་བའི་ཐ་ཚིག་གོ །གང་འདས་ནས་ཡུན་རིང་དུ་ལོན་པའམ། མ་འོངས་པའི་ཆོས་རྣམས་དག་ཅེས་བྱ་བ་ནི་གང་འདས་ནས་ཡུན་རིན་དུ་ལོན་པ་དང་མ་འོངས་པ་དག་གོ །དེའི་དབང་གིས་དེ་སྐྱེ་བའི་ཕྱིར་རོ་ཞེས་བྱ་བ་ནི་ཡིད་ཀྱི་དབང་གིས་དེ་སྐྱེ་བའི་ཕྱིར་ཏེ། ཡིད་ཀྱི་དབང་གིས་ཡིད་ཀྱི་རྣམ་པར་ཤེས་པ་དེ་སྐྱེ་བའི་ཕྱིར་རོ། །དེ་ལྟར་མ་ཡིན་ན་ཆོས་རྣམས་དེའི་དམིགས་པ་ཙམ་ཡིན་པར་འགྱུར་རོ། །
དམིགས་པ་ཙམ་ཡིན་པར་ཇི་ལྟར་འགྱུར་ཞེ་ན། དེའི་ཕྱིར་གལ་ཏེ་དེ་སྐྱེས་ལ་འགགས་པ་དང༌། ཕྱིས་འབྱུང་བར་འགྱུར་བ་དག་ཅེས་སྨྲས་ཏེ་གང་འགགས་ནས་ཡུན་རིང་དུ་ལོན་པ་དང༌། མ་འོངས་པ་དེ་དག་ལ་འབྱུང་བར་འགྱུར་བའི་རྐྱེན་རྙེད་པ་ཡོད་པ་མ་ཡིན་ན་དེ་དག་ལ་རྣམ་པར་ཤེས་པ་འདི་སྐྱེ་བར་མི་འགྱུར་རོ་ཞེས་བྱ་བ་ནི་མི་སྐྱེ་བར་འགྱུར་རོ་ཞེས་བྱ་བ་ཡིན་ནོ། །འདི་ཞེས་བྱ་བ་ནི་འདི་ལ་བྱའོ། །ཇི་ལྟ་ཞེ་ན། རྐྱེན་རྙེད་པ་ཡོད་ན་ནི་དེ་དག་ལ་རྣམ་པར་ཤེས་པ་སྐྱེས་པར་འགྱུར་རོ་ཞེས་བྱ་བ་ཡིན་ནོ། །རྣལ་འབྱོར་པ་རྣམས་ཞེས་རྒྱས་པར་འབྱུང་བ་ནི་གལ་ཏེ་དེ་སྐྱེས་ལ་འགགས་པ་དང༌། འབྱུང་བར་འགྱུར་བ་དག་ལ་འབྱུང་བར་འགྱུར་བ་མེད་ན་ཅི་ཞེ་ན། རྣལ་འབྱོར་པ་རྣམས་ཀྱི་མཐུའི་བྱེ་བྲག་གིས་དེ་དག་ལ་ཤེས་བ་སྐྱེ་བར་མི་འགྱུར་ཏེ། མི་སྐྱེ་བར་འགྱུར་རོ་ཞེས་བྱ་བའི་ཐ་ཚིག་གོ་ཞེས་བྱ་བའི་སྐབས་དང་སྦྱར་རོ། །རྣལ་འབྱོར་པ་ལས་གཞན་དག་གི་དེ་ལས་སྐྱེས་པའི་རྣམ་པར་ཤེས་པ་བསྒོས་པའི་རྒྱུད་ཡོངས་སུ་འགྱུར་བའི་བྱེ་བྲག་གིས་ཞེས་བྱ་བ་ནི་དེ་དག་ལས་སྐྱེས་པ་ནི་དེ་ལས་སྐྱེས་པའོ། །དེ་ལས་སྐྱེས་པ་ཡང་ཡིན། རྣམ་པར་ཤེས་པ་ཡང་དེ་ཡིན་པས་དེ་ལས་སྐྱེས་པའི་རྣམ་པར་ཤེས་པ་སྟེ། མངོན་སུམ་གྱི་དོན་དེ་ལ་དམིགས་པའི་རྣམ་པར་ཤེས་པའོ། །དེས་བསྒོས་པའི་རྒྱུད་ནི་དེ་ལས་སྐྱེས་པའི་རྣམ་པར་ཤེས་པས་བསྒོས་པའི་རྒྱུད་དོ། །དེའི་ཡོངས་སུ་འགྱུར་བའི་བྱེ་བྲག་ནི་དེ་ལས་སྐྱེས་པའི་རྣམ་པར་ཤེས་པས་ཡོངས་སུ་བསྒོས་པའི་རྒྱུད་ཡོངས་སུ་འགྱུར་བའི་བྱེ་བྲག་གོ །དེ་ནི་གལ་ཏེ་དེ་སྐྱེས་ལ་འགགས་པ་འདས་པ་རྣམས་ལ་དྲན་པའི་ཤེས་པ་དེ་སྐྱེ་བར་མི་འགྱུར་རོ། །མ་འོངས་པ་ལ་ཞེས་རྒྱས་པར་འབྱུང་བ་ནི་མ་འོངས་པ་ཕྱིས་འབྱུང་བ་རྣམས་ལ། རྗེས་སུ་དཔོག་པའམ། མངོན་པར་འདོད་པ་སྔོན་མྱོང་བའི་རྗེས་སུ་དེ་དང་རིགས་གཅིག་པའི་རྗེས་སུ་དཔོག་པ་དང༌། མངོན་པར་འདོད་པས་ཀྱང་གལ་ཏེ་འབྱུང་བར་འགྱུར་བའི་རྐྱེན་རྙེད་པ་ཡོད་པ་མ་ཡིན་ན་ཤེས་པ་སྐྱེ་བར་མི་འགྱུར་རོ། །ཕྱིས་འབྱུང་བ་ལ་རྗེས་སུ་དཔོག་པར་བྱེད་པ་ཡིད་ཀྱི་རྣམ་པར་ཤེས་པ་དང་མཚུངས་པར་ལྡན་པའི་ཤེས་པ་ནི། རྗེས་སུ་དཔོག་པར་བྱེད་པའོ། །དེ་བཞིན་དུ་མངོན་པར་འདོད་པ་དང་མཚུངས་པར་ལྡན་པའི་ཤེས་པ་ནི་མངོན་པར་འདོད་པའོ། །
དེ་གཉི་ག་ཡང་སྔོན་མྱོང་བའི་རྗེས་སུ་ཞེས་བྱ་བ་ནི་སྔོན་ཡུལ་མངོན་སུམ་དུ་ཇི་ལྟར་མྱོང་བར་གྱུར་པ་དེའི་རྗེས་སུ་དེ་དང་མཐུན་པར་རོ། །དེ་དང་རིགས་གཅིག་པའི་རྗེས་སུ་དཔོག་པར་བྱེད་པ་དང་མངོན་པར་འདོད་པས་ཞེས་བྱ་བ་ནི་དེ་དང་རིགས་གཅིག་པའི་རྗེས་སུ་དཔོག་པ་ཡིན་པ་དེ་བས་ན་དེ་དང་རིགས་གཅིག་པའི་རྗེས་སུ་དཔོག་པས་སོ། །དེ་བཞིན་དུ་དེ་དང་རིགས་གཅིག་པའི་མངོན་པར་འདོད་པ་ཡིན་པ་དེ་བས་ན་དེ་དང་རིགས་གཅིག་པའི་མངོན་པར་འདོད་པ་སྟེ། དེ་དང་རིགས་གཅིག་པའི་མངོན་པར་འདོད་པས་ཀྱང་འབྱུང་བར་འགྱུར་བ་མེད་ན་དེ་དག་ལ་རྣམ་པར་ཤེས་པ་འདི་སྐྱེ་བར་མི་འགྱུར་རོ། །དེ་ཤི་བས་ཞེས་བྱ་བ་ནི་ཕ་ཤི་བས་སོ། །རེག་པའི་བསྡུས་པའི་དོན་རྣམ་པར་གཞག་པ་ནི་རྣམ་པ་བཅུར་བསྟན་ཏེ། རབ་ཏུ་དབྱེ་བ་རྣམ་བར་གཞག་པ་ནི་རེག་པ་གང་ཞེ་ན། རེག་པའི་ཚོགས་དྲུག་སྟེ་ཞེས་ཇི་སྐད་དུ་རྒྱས་པར་བསྟན་པའོ། །བྱེད་པ་རྣམ་པར་གཞག་པ་ནི་ཇི་སྐད་དུ་སེམས་ལས་བྱུང་བའི་ཆོས་གཞན་ལ་རེག་པ་ཞེས་བྱ་སྟེ། གང་ལ་བརྟེན་ནས་སེམས་ལས་བྱུང་བའི་ཆོས་ཐམས་ཅད་སྐྱེ་བའོ་ཞེས་རྒྱས་པར་བསྟན་ཏོ། །ཡིད་ཆེས་པར་བྱ་བ་རྣམ་པར་གཞག་པ་ནི་ཇི་སྐད་དུ། ཡིད་བརྟེན་དུ་རུང་བའི་ལུང་ཡང་རྣམ་པ་གསུམ་སྟེ་ཞེས་རྒྱས་པར་བསྟན་པའོ། །རིགས་ཐ་དད་པར་རྣམ་པར་གཞག་པ་ནི་ཇི་སྐད་དུ། དེ་དག་ནི་རྒྱུ་ལ་འབྲས་བུ་གདགས་པ་ཡིན་ཏེ་ཞེས་རྒྱས་པར་བསྟན་པའོ། །སེམས་ལས་བྱུང་བ་ཡིན་པར་རྣམ་པར་གཞག་པ་ནི་ཇི་སྐད་དུ། དེ་ལྟ་བུ་ནི་སྡེ་པ་གང་གི་གྲུབ་པའི་མཐའ་ཡང་མ་ཡིན་ནོ་ཞེས་རྒྱས་པར་བསྟན་པའོ། །གཙོ་བོའི་རྐྱེན་རྣམ་པར་གཞག་པ་ནི་ཇི་སྐད་དུ། གཙོ་བོའི་རྐྱེན་ནི་སྐྱེ་མཆེད་དྲུག་ཡིན་ཏེ། ཐུན་མོང་དང་ཐུན་མོང་མ་ཡིན་པའི་རྒྱུ་ཡིན་པའི་ཕྱིར་སྔ་མ་བཞིན་ནོ་ཞེས་རྒྱས་པར་བསྟན་པའོ། །རྐྱེན་གཞན་གྱི་བསམ་པ་རྣམ་པར་གཞག་པ་ནི་ཇི་སྐད་དུ། སྐྱེ་མཆེད་དྲུག་དང་གཉིས་དང་རེག་པའི་རྐྱེན་གསུམ་པ་ལ་བྱེ་བྲག་ཅི་ཡོད་ཅེ་ན་ཞེས་རྒྱས་པར་བསྟན་པའོ། །རྐྱེན་ཡོངས་སུ་རྫོགས་པ་རྣམ་པར་གཞག་པ་ནི་ཇི་སྐད་དུ་མིང་དང་གཟུགས་ཀྱི་གནས་སྐབས་ན་རེག་པའམ། ཚོར་བ་ཡོད་པ་མ་ཡིན་ནམ་ཅི་ཞེས་རྒྱས་པར་བསྟན་པའོ། །རྣམ་པར་ངེས་པ་རྣམ་པར་གཞག་པ་ནི་
ཇི་སྐད་དུ། འདུས་པ་ཞེས་བྱ་བ་དེ་ཅི་ཡིན་ཞེས་རྒྱས་པར་བསྟན་པའོ། །འདུས་པ་རྣམ་པར་གཞག་པ་ནི་ཇི་སྐད་དུ་རྒྱུ་དང་འབྲས་བུའི་དངོས་པོར་གསུམ་ཚོགས་པ་ཡིན་ནོ་ཞེ་ན་ཡང་ཞེས་རྒྱས་པར་བསྟན་པའོ། །རེག་པའི་ཡན་ལག་རྣམ་པར་དབྱེ་བའོ།། །།རྟེན་ཅིང་འབྲེལ་བར་འབྱུང་བ་དང་པོ་དང་རྣམ་པར་དབྱེ་བ་བསྟན་པ་རྒྱ་ཆེར་འགྲེལ་པ། བམ་པོ་བརྒྱད་པ། རེག་པའི་རྐྱེན་གྱིས་ཚོར་བ་ཞེས་བསྟན་པའི་ཚོར་བ་གང་ཞེ་ན་ཞེས་བྱ་བ་ནི་ཚོར་བ་ཡང་རྣམ་པ་གསུམ་ཡོད་ན་རེག་པའི་རྐྱེན་གྱིས་ཚོར་བ་ཞེས་བྱ་བ་གང་ཞིག་འདིར་དགོངས་པ་ཡིན་ཞེ་ན། དེའི་ཕྱིར་ཚོར་བ་རྣམ་པ་གསུམ་སྟེ་ཞེས་རྒྱས་པར་འབྱུང་བ་སྨྲས་ཏེ། རྒྱས་པའི་ཚིག་གིས་ཇི་ལྟ་བ་བཞིན་དུ་སྟོན་ཏོ། །དེ་དག་གིས་ནི་ཚོར་བའི་རབ་ཏུ་དབྱེ་བ་སྟོན་ཏོ་ཞེས་བྱ་བ་ནི་ཚོར་བའི་ཡན་ལག་རྣམ་པར་འབྱེད་པ་དེ་དག་གིས་ཏེ། དེའི་ཚེ་གདུལ་བྱ་རྣམས་ནི་རབ་ཏུ་དབྱེ་བ་ཙམ་ལ་ཐེ་ཚོམ་ཡོད་པའི་ཕྱིར་རོ། །གང་སྐྱེས་ན་མི་འབྲལ་བར་འདོད་པ་འབྱུང་བའོ་ཞེས་བྱ་བ་ནི་འབྲས་བུ་མི་འབྲལ་བར་འདོད་པའི་སྒོ་ནས་བདེ་བའི་ཚོར་བ་བྱེ་བྲག་ཏུ་བྱས་སོ། །དགྲ་བཅོམ་པ་རྣམས་བདེ་བའི་ཚོར་བ་བྱུང་བ་ལ་བྲལ་བར་འདོད་པ་འབྱུང་བ་མ་ཡིན་ནམ་ཞེ་ན། འབྱུང་བ་བདེན་ཏེ། དེ་དག་གི་ནི་དེའི་རྒྱུ་ཅན་མ་ཡིན་ནོ། །འོ་ན་ཅི་ཞེ་ན། དེ་ནི་སུན་འབྱིན་པའི་རྒྱུ་ཅན་ཡིན་ཏེ། དེ་ནི་འདུ་བྱེད་དང་ཡོངས་སུ་འགྱུར་བའི་སྡུག་བསྔལ་ཉིད་དང་འབྲེལ་པའི་ཕྱིར་རོ། །གང་སྐྱེས་ན་འབྲེལ་པར་འདོད་པ་འབྱུང་བའོ་ཞེས་བྱ་བ་ནི་འབྲས་བུ་འབྲལ་བར་འདོད་པའི་སྒོ་ནས་སྡུག་བསྔལ་གྱི་ཚོར་བ་བྱེ་བྲག་ཏུ་བྱས་སོ། །གཅེར་བུ་པ་རྣམས་ཀྱི་ཀུན་དུ་གདུང་བ་དང༌། ཡོངས་སུ་གདུང་བ་ལ་སོགས་པའི་སྡུག་བསྔལ་དག་བྲལ་པར་འདོད་པའི་རྒྱུ་མ་ཡིན་པ་ནི། ཚུལ་ཁྲིམས་དང་བརྟུལ་ཞུགས་མཆོག་ཏུ་འཛིན་པར་ལྟ་བའི་མཐུས་དེ་དག་ཡང་སྐྱེད་པར་བྱེད་ཀྱི། མངོན་པར་ཆགས་པའི་དབང་གིས་ནི་མ་ཡིན་ནོ། །གང་སྐྱེས་ན་གཉི་ག་མི་འབྱུང་བའོ་ཞེས་བྱ་བ་ནི་སྡུག་བསྔལ་ཡང་མ་ཡིན། བདེ་བ་ཡང་མ་ཡིན་པའི་ཚོར་བའི་གནས་སྐབས་ལ་མི་འབྲལ་བར་འདོད་པ་དང༌། བྲལ་བར་འདོད་པ་གཉི་གའི་སྐབས་མི་འབྱུང་བའོ། །གང་དག་བདེ་
གཡང་མ་ཡིན། སྡུག་བསྔལ་བ་ཡང་མ་ཡིན་པའི་གནས་སྐབས་ན་བདེ་བའི་གནས་སྐབས་ཚོལ་བ་འདི་དག་གི་བདེ་བ་དང་ལྡན་པར་འདོད་པ་ནི་དེའི་རྒྱུ་ཅན་མ་ཡིན་ནོ། །འོ་ན་ཅི་ཞེ་ན། བདེ་བའི་ཚོར་བ་ལ་ཆགས་པའི་རྒྱུ་ཅན་ཡིན་ནོ། །གང་སྐྱེས་པ་ནི་འབྲལ་བར་མི་འདོད་ཅེས་རྒྱས་པར་འབྱུང་བ་ལ། རྒྱུ་གང་ཚོར་བ་ཞེས་བྱ་བ་ནི་བྲལ་བར་མི་འདོད་པ་དང༌། བྲལ་བར་འདོད་པའི་རྒྱུ་ནི་ཚོར་བ་གང་སྐྱེས་པ་ཡིན་ནོ་ཞེས་འཆད་པར་འགྱུར་རོ། །གཉིས་མིན་ཞེས་བྱ་བ་ནི་བྲལ་བར་འདོད་པ་ཡང་མ་ཡིན་མི་འབྲལ་བར་འདོད་པ་ཡང་མ་ཡིན་པའོ་ཞེས་བྱ་སྟེ་ཞེས་བྱ་བ་ནི་རིག་པར་བྱ་བའོ། །དེ་ནི་བདེ་སོགས་གོ་རིམས་བཞིན། །ཞེས་བྱ་བ་ནི་བྲལ་བར་མི་འདོད་བའི་རྒྱུ་ནི་བདེ་བ་ཡིན་པར་རིག་པར་བྱའོ། །བྲལ་བར་འདོད་པའི་རྒྱུ་ནི་སྡུག་བསྔལ་ལོ། །གཉི་ག་མ་ཡིན་པའི་རྒྱུ་ནི་སྡུག་བསྔལ་ཡང་མ་ཡིན། བདེ་བ་ཡང་མ་ཡིན་པའོ། །འོ་ན་ཅི་ལས་ཤེ་ན། དེའི་བདེ་བ་ནི་ཚུལ་ཁྲིམས་དང༌། ཏིང་ངེ་འཛིན་གྱི་བར་དུ་གཅོད་པ་ཉིད་དུ་མཐོང་ནས་དེ་སུན་འབྱིན་པ་ལས་སོ་ཞེས་བྱ་བ་ནི་ཚུལ་ཁྲིམས་དང་ཏིང་ངེ་འཛིན་གྱི་བར་དུ་གཅོད་པར་མཐོང་བ་ནི་ཚུལ་ཁྲིམས་དང་ཏིང་ངེ་འཛིན་དང་མི་མཐུན་པ་ཉིད་ཡིན་པར་དེའི་འདོད་ཆགས་ལས་སྐྱེས་པའི་བདེ་བ་ལ་མཐོང་ཞེས་བྱ་བའི་དོན་གང་ཡིན་པའོ། །དེ་སུན་འབྱིན་པ་ལས་སོ་ཞེས་བྱ་བ་ནི་བདེ་བའི་ཚོར་བ་སུན་འབྱིན་པ་ལས་བྲལ་བར་འདོད་བ་འབྱུང་བ་ཡིན་ནོ། །དེ་ཡང་ཚོར་བ་གཉིས་ལ་ངོ་བོ་ཉིད་ཀྱིས་སྡུག་བསྔལ་མེད་པས་ན་ཞེས་རྒྱས་པར་འབྱུང་བ་ནི་སྡུག་བསྔལ་ཡང་མ་ཡིན་པ་དང་བདེ་བའི་ཚོར་བ་སྟེ། ཚོར་བ་འདི་གཉིས་ལ་ངོ་བོ་ཉིད་ཀྱིས་སྡུག་བསྔལ་བ་མེད་པས་ན་དགོངས་པ་ཅན་གྱི་སྡུག་བསྔལ་བ་ཉིད་ཡིན་པར་བསྟན་ཏོ་ཞེས་བྱ་བ་ནི་སྡུག་བསྔལ་བ་ཡང་མ་ཡིན། བདེ་བ་ཡང་མ་ཡིན་པ་ནི་འདུ་བྱེད་མི་རྟག་པ་ཉིད་ཀྱི་སྡུག་བསྔལ་ཉིད་ཡིན་པར་བསྟན་ཏོ། །བདེ་བ་ནི་འགྱུར་བའི་སྡུག་བསྔལ་ཉིད་ཀྱི་སྡུག་བསྔལ་ཡིན་པར་བསྟན་ཏོ། །སྡུག་བསྔལ་ནི་ངོ་བོ་ཉིད་ཀྱི་སྡུག་བསྔལ་ཡིན་ནོ། །སྡུག་བསྔལ་ཡང་མ་ཡིན། བདེ་བ་ཡང་མ་ཡིན་པ་ནི་འདུ་བྱེད་མི་རྟག་པ་ཉིད་ཀྱི་སྡུག་བསྔལ་ཉིད་ཡིན་པར་བསྟན་ཏོ་ཞེས་སྨྲས་པ་གང་ཡིན་པ་དག་ཇི་ལྟར་འདུ་བྱེད་མི་རྟག་པ་ཉིད་ཀྱི་སྡུག་བསྔལ་
བ་ཉིད་ཡིན་ཞེ་ན། འཕགས་པ་རྣམས་ལ་མི་མཐུན་པ་ཡིན་པའི་ཕྱིར་ཏེ། ཇི་སྐད་དུ། གང་མི་རྟག་པ་དེ་སྡུག་བསྔལ་བ་ཡིན་ནོ་ཞེས་གསུངས་ཏེ། ཟག་པ་དང་བཅས་པའི་དངོས་པོ་ཐམས་ཅད་འདུ་བྱེད་མི་རྟག་པ་ཉིད་ཀྱིས་འཕགས་བ་རྣམས་ལ་མི་མཐུན་པ་ཡིན་ནོ། །འདུ་བྱེད་སྡུག་བསྔལ་བ་ཉིད་ཀྱིས་དེ་ཡང་འཕགས་པ་རྣམས་ལ་མངོན་སུམ་ཁོ་ན་ཡིན་གྱི། བྱིས་པ་རྣམས་ལ་མ་ཡིན་ནོ། །ཇི་སྐད་དུ། ལག་མཐིལ་སྤུ་ཉག་གཅིག་གཞག་པ། །མི་རྣམས་ཀྱིས་ནི་མི་རྟོགས་ལ། །མིག་ཏུ་སོང་ན་དེ་ཉིད་ཀྱིས། །ཉམ་ང་བ་དང་གནོད་སྐྱེད་བཞིན། །བྱིས་པ་རྣམས་ནི་ལག་མཐིལ་འདྲ། །འདུ་བྱེད་སྡུག་བསྔལ་སྤུ་མི་རྟོགས། །འཕགས་པ་རྣམས་ནི་མིག་དང་འདྲ། །དེ་ཡིས་ཤིན་ཏུ་ཡིད་ཀྱང་འབྱུང༌། །ཞེས་གསུངས་པ་ཡིན་ནོ། །ཅིའི་ཕྱིར་བཅོམ་ལྡན་འདས་ཀྱིས་ཡོངས་སུ་འགྱུར་བ་ཉིད་གསུངས་ཀྱི་ཞེས་རྒྱས་པར་འབྱུང་བ་ལ། བཅོམ་ལྡན་འདས་ཀྱིས་ནི་སྡུག་བསྔལ་རྣམ་པ་གསུམ་བསྟན་པ་ཡིན་ལ་ཞེས་བྱ་བ་ནི་སྡུག་བསྔལ་གྱི་སྡུག་བསྔལ་ཉིད་དང༌། འགྱུར་བའི་སྡུག་བསྔལ་ཉིད་དང༌། འདུ་བྱེད་ཀྱི་སྡུག་བསྔལ་ཉིད་དོ། །དེ་ལ་སྡུག་བསྔལ་ནི་སྡུག་བསྔལ་བའི་སྡུག་བསྔལ་ཉིད་ཡིན་ནོ། །བདེ་བ་ནི་འགྱུར་བའི་སྡུག་བསྔལ་ཉིད་ཡིན་ནོ། །སྡུག་བསྔལ་ཡང་མ་ཡིན། བདེ་བ་ཡང་མ་ཡིན་པ་ནི་འདུ་བྱེད་ཀྱི་སྡུག་བསྔལ་ཉིད་ཡིན་ནོ། །དེ་ཁྱབ་པ་ཡིན་པའི་ཕྱིར་རོ་ཞེས་བྱ་བ་ནི་འདུ་བྱེད་ཀྱི་སྡུག་བསྔལ་ལ་བྱ་སྟེ། དེ་ནི་ཚོར་བ་ཐམས་ཅད་ལ་ཁྱབ་པས་སོ། །མི་འགྱུར་ཏེ་ཉེ་བར་ལེན་པའི་ཕུང་པོ་ལྔ་ལ་དགོངས་ཏེ་གསུངས་པའི་ཕྱིར་རོ་ཞེས་བྱ་བ་ནི་དེ་ལྟར་ལམ་ལ་ཐལ་བར་འགྱུར་བ་ཉིད་མ་ཡིན་ཏེ། འདི་ལྟར་ཉེ་བར་ལེན་པའི་ཕུང་པོ་ལྔ་ལ་དགོངས་ནས་གང་མི་རྟག་པ་དེ་སྡུག་བསྔལ་བའོ་ཞེས་དེ་སྐད་གསུངས་སོ། །ཅིའི་ཕྱིར་ཞེ་ན་ཞེས་བྱ་བ་ནི་གང་མི་རྟག་པ་དེ་སྡུག་བསྔལ་བ་ཡིན་པར་བསྟན་ན་གོ །ལམ་ཡང་མི་རྟག་པ་ཡིན་ན་འདིར་ཅིའི་ཕྱིར་ཉེ་བར་ལེན་པའི་ཕུང་པོ་གང་ཡིན་པ་དེ་ཁོ་ན་མི་རྟག་པ་ཡིན་པའི་ཕྱིར་སྡུག་བསྔལ་བ་ཡིན་གྱི། ལམ་མ་ཡིན་ཞེ་ན་ཞེས་བྱ་བ་ཡིན་ནོ། །དེའི་ཕྱིར་འདུན་པ་དང་འདོད་ཆགས་ཀྱི་དངོས་པོ་གང་ཡིན་པ་དེ་ཉིད་ལ་ཞེས་རྒྱས་པར་སྨྲས་ཏེ། འདུན་པ་དང་འདོད་ཆགས་ཀྱི་དམིགས་པ་ནི་འདུན་པ་
དང་འདོད་ཆགས་ཀྱི་དངོས་པོའོ། །དེ་ལ་འདུན་པ་ནི་ཐོབ་པར་འགྱུར་བའི་ཡུལ་ལ་འདོད་པའོ། །འདོད་ཆགས་ནི་ཐོབ་ཟིན་པའི་ཡུལ་ལ་མངོན་པར་ཆགས་པའོ། །དེ་ཉིད་ལ་མི་རྟག་པའི་འདུ་ཤེས་ཀྱིས་ནི་མི་མཐུན་པའི་འདུ་ཤེས་འདྲེན་པར་བྱེད་དོ་ཞེས་བྱ་བ་ནི་དེ་ལ་འདུན་པ་དང་འདོད་ཆགས་ཀྱི་དངོས་པོ་དེ་ལ་སྐྱོན་དུ་མཐོང་བའི་ཕྱིར་རོ། །ཚོལ་བ་དང་ཆགས་པ་ཡང་དེ་ལ་སྐྱོན་དུ་མཐོང་ན་མི་མཐུན་པའི་འདུ་ཤེས་འདྲེན་པར་བྱེད་པ་ཡིན་གྱི། གཞན་དུ་མ་ཡིན་ནོ། །མི་མཐུན་པ་སྡུག་བསྔལ་བ་དེ་ལ་དགོངས་ནས་གང་མི་རྟག་པ་དེ་སྡུག་བསྔལ་བའོ་ཞེས་བསྟན་ཏོ་ཞེས་བྱ་བ་དེ་ལ་འདུན་པ་དང་འདོད་ཆགས་ཀྱི་དངོས་པོ་ནི་མི་མཐུན་པ་ཡིན་གྱི། ལམ་ནི་འདུན་པ་དང༌། འདོད་ཆགས་ཀྱི་དངོས་པོ་མ་ཡིན་ནོ། །དེའི་འདུན་པ་དང་འདོད་ཆགས་ཀྱི་དམིགས་པ་མ་ཡིན་ཏེ། དེ་གཉེན་པོ་ཡིན་པའི་ཕྱིར་རོ། །དེ་ཚོལ་བ་ནི་དགེ་བའི་ཆོས་འདུན་པ་ཡིན་ལ་གུས་པ་གཅེས་སུ་བྱེད་པ་ནི་འདོད་ཆགས་མ་ཡིན་ནོ། །དེ་བས་ན་དེར་ནི་མི་རྟག་པའི་འདུ་ཤེས་ཀྱིས་མི་མཐུན་པའི་འདུ་ཤེས་འདྲེན་པར་བྱེད་པ་མ་ཡིན་ཏེ། མི་མཐུན་པ་ནི་སྡུག་བསྔལ་ཡིན་པས་སོ། །དེ་བས་ན་ལམ་ལ་ཐལ་བར་འགྱུར་བ་མེད་དོ་ཞེས་བྱ་བ་ནི་ལྷག་མ་མ་ལུས་པར་གཏན་དུ་སྡུག་བསྔལ་ལས་ངེས་པར་འབྱིན་པའི་ཐབས་ཡིན་པའི་ཕྱིར་རོ། །འཕགས་པ་ཤཱ་རིའི་བུས་ཀྱང༌། དངོས་པོ་གང་ཞེས་རྒྱས་པར་འབྱུང་བ་ལ་དངོས་པོ་གང་དགའ་བའི་ཡུལ་ཞེས་བྱ་བ་ནི་དགའ་བའི་དམིགས་པའོ། །དགའ་བ་ནི་འདིར་འདོད་ཆགས་དང་མཚུངས་པར་ལྡན་པའི་ཡིད་བདེ་བ་ཡིན་པར་དགོངས་སོ། །དེ་མི་རྟག་པ་ཉིད་དུ་མཐོང་ན་མི་མཐུན་པར་འགྱུར་རོ་ཞེས་བྱ་བ་ནི་སྐྱོན་མེད་པར་མཐོང་ན་ནི་དེ་ལ་རྗེས་སུ་མཐུན་པའི་འདུ་ཤེས་སུ་འགྱུར་ཞིང་དགའ་བ་ཡིན་ནོ། །དེ་བས་ན་མི་རྟག་པ་སྐྱོན་དུ་མཐོང་ན་མི་མཐུན་པའི་འདུ་ཤེས་སུ་གྱུར་པ་ཡིན་ནོ། །བདག་གི་དགའ་བ་ནི་དེ་ཕྲ་རྒྱས་སུ་གནས་པར་མི་འགྱུར་རོ་ཞེས་བྱ་བ་ལ་དེར་ཞེས་བྱ་བ་ནི་དངོས་པོ་དེར་རོ། །ཕྲ་རྒྱས་སུ་ཞེས་བྱ་བ་ནི་འདོད་ཆགས་ཕྲ་རྒྱས་སུ་དམིགས་ཤིང་ཕྲ་རྒྱས་སུ་དགའ་བ་ལ་གནས་པ་མ་ཡིན་ནོ་ཞེས་བྱའོ། །དེ་ལྟར་ན་ལམ་ནི་དགའ་བའི་ཡུལ་མ་ཡིན་པས་དེ་ལ་མི་རྟག་པའི་འདུ་ཤེས་ཀྱིས་མི་མཐུན་པའི་འདུ་ཤེས་འབྲེལ་པར་བྱེད་
པ་མ་ཡིན་བས་ལམ་ལ་ཐལ་བར་འགྱུར་བ་ཡོད་པ་མ་ཡིན་ནོ། །སྡུག་བསྔལ་ལ་སོགས་པའི་ཆོར་བའི་གནས་སུ་གྱུར་པའི་དངོས་པོ་ཞེས་རྒྱས་པར་འབྱུང་བ་ལ། དངོས་པོ་གང་ཡིན་པ་ནི་ཞེས་བྱ་བ་ནི་ཉེ་བར་ལན་པའི་ཕུང་པོ་ལྔའི་མཚན་ཉིད་དོ། །སྡུག་བསྔལ་ལ་སོགས་པའི་ཚོར་བ་གནས་སུ་གྱུར་པ་ནི་སྡུག་བསྔལ་གྱི་ཚོར་བའི་གནས་སུ་གྱུར་པ་དང༌། སྡུག་བསྔལ་ཡང་མ་ཡིན། བདེ་བ་ཡང་མ་ཡིན་པའི་ཚོར་བའི་གནས་སུ་གྱུར་པའོ། །སྐྱེ་བ་དང་འཇིག་པ་གཉིས་དང་རྗེས་སུ་འབྲེལ་བའི་ཕྱིར་རོ། །རིམ་བཞིན་དུ་མི་མཐུན་པ་ཡིན་ཏེ་ཞེས་བྱ་བ་ནི་སྡུག་བསྔལ་གྱི་ཚོར་བའི་གནས་སུ་གྱུར་པ་ནི་སྐྱེ་བ་དང་རྗེས་སུ་འབྲེལ་པའི་ཕྱིར་མི་མཐུན་པ་ཡིན་ཏེ། འདི་ལྟར་དེ་ནི་སྐྱ་བ་ཉིད་ནི་གནོད་པ་དང་བཅས་པ་ཡིན་པའི་ཕྱིར་རོ། །ཇི་སྐད་དུ། བཅོམ་ལྡན་འདས་ཀྱིས་སྡུག་བསྔལ་གྱི་ཚོར་བ་ནི་སྐྱེ་བ་སྡུག་བསྔལ་བ། གནས་པ་སྡུག་བསྔལ་བ། ཡོངས་སུ་འགྱུར་བ་སྡུག་བསྔལ་བའོ་ཞེས་གསུངས་སོ། །དེ་བཞིན་དུ་སྡུག་བསྔལ་གྱི་ཚོར་བའི་གནས་སུ་གྱུར་པའི་དངོས་པོ་ལ་ཡང་རིག་པར་བྱའོ། །བདེ་བའི་ཚོར་བའི་གནས་སུ་གྱུར་པ་ནི་འབྲལ་བ་དང་རྗེས་སུ་འབྲེལ་བའི་ཕྱིར་མི་མཐུན་པ་ཡིན་ཏེ། དེ་ནི་རྣམ་པར་འཇིག་པ་གནོད་པ་དང་བཅས་པ་ཡིན་པའི་ཕྱིར་རོ། །ཇི་སྐད་མདོ་སྡེ་གཞན་ལས། བདེ་བའི་ཚོར་བ་སྐྱེ་བ་བདེ་བའོ། །གནས་པ་བདེ་བའོ། །ཡོངས་སུ་འགྱུར་བ་སྡུག་བསྔལ་བའོ་ཞེས་གསུངས་སོ། །དེ་བཞིན་དུ་བདེ་བའི་ཚོར་བའི་གནས་སུ་གྱུར་པའི་དངོས་པོ་ལ་ཡང་རིག་པར་བྱའོ། །བདེ་བ་ཡང་མ་ཡིན་སྡུག་བསྔལ་བ་ཡང་མ་ཡིན་པའི་ཚོར་བའི་གནས་སུ་གྱུར་པ་ནི་གཉི་ག་དང་རྗེས་སུ་འབྲེལ་པ་ཡིན་ཏེ། སྐྱེ་བ་དང་འཇིག་པ་དང་རྗེས་སུ་འབྲལ་པའི་ཕྱིར་མི་མཐུན་པ་ཡིན་ནོ། །དེ་ནི་སྔོན་མ་བྱུང་པ་ལས་འབྱུང་བ་དང༌། བྱུང་ནས་ཀྱང་མེད་པར་འགྱུར་བའི་ཕྱིར་མི་རྟག་པ་ཉིད་ཀྱིས་མི་མཐུན་པ་ཡིན་ནོ། །ཇི་སྐད་དུ་མདོ་སྡེ་གཞན་ལས། གང་མི་རྟག་པ་དེ་སྡུག་བསྔལ་བའོ་ཞེས་བསྟན་ཏོ། །ལམ་ནི་དེ་ལྟ་བུ་མ་ཡིན་པས་ཞེས་བྱ་བ་ནི་དགའ་བའི་ཡུལ་དུ་གྱུར་པ། ཉེ་བར་ལེན་པའི་ཕུང་པོ་དེ་མ་ཡིན་ལ། དངོས་པོ་དེ་ནི་སྡུག་བསྔལ་ལ་སོགས་པའི་ཚོར་བའི་གནས་སུ་གྱུར་པ་ཡང་མ་ཡིན་པས་ལམ་ལ་སྡུག་བསྔལ་ཡིན་པར་ཐལ་
བར་འགྱུར་བ་མེད་དོ། །གཞན་དག་ན་རེ་ཚོར་བ་གསུམ་བསྟན་པ་ནི་དགོངས་པ་ཅན་ཡིན་གྱི་ཞེས་བྱ་བ་ནི་ཚོར་བ་གསུམ་བསྟན་པ་གང་ཡིན་པའི་ཚོར་བ་གསུམ་ནི་བདེ་བ་དང༌། སྡུག་བསྔལ་ཡང་མ་ཡིན་བདེ་བ་ཡང་མ་ཡིན་པ་ཡིན་ཏེ། འདི་ནི་དགོངས་པ་ཅན་ཡིན་ནོ་ཞེ་ན། ཚོར་བ་གསུམ་བསྟན་པ་དགོངས་པ་ཅན་ཡིན་ནོ་ཞེས་བྱ་བ་དེ་ནི་འདི་ལ་ལོག་པར་བརྟགས་པ་ཡིན་ཏེ། ཇི་ལྟ་ཞེ་ན། དེའི་ཕྱིར་བཅོམ་ལྡན་འདས་ཀྱིས་ཚོར་བ་ཐམས་ཅད་སྡུག་བསྔལ་བ་ཡིན་པར་དགོངས་ཏེ་བཀའ་སྩལ་ཏེ་ཞེས་རྒྱས་པར་སྨྲས་སོ། །རེ་ཞིག་ཚོར་བ་གསུམ་བསྟན་པ་དགོངས་པ་ཅན་ཡིན་པར་བརྟག་པ་གང་ཞེ་ན་ཞེས་བྱ་བ་ནི་ཚོར་བ་གསུམ་བསྟན་པ་དག་གང་གི་དབང་དུ་བྱས་ཏེ་དགོངས་པ་ཅན་ཡིན་པར་བསྟན་ཞེས་བྱ་བ་ཡིན་ནོ། །དེའི་ཕྱིར་སྡུག་བསྔལ་ཆུང་བའི་ཚོར་བ་ནི་པ་དེ་བ་ཞེས་བྱའོ་ཞེས་རྒྱས་པར་སྨྲས་སོ། །ཅིའི་ཕྱིར་ཞེ་ན། དེའི་ཕྱིར་འཇིག་རྟེན་དང་རྗེས་སུ་མཐུན་པ་ཡིན་ཏེ་ཞེས་སྨྲས་ཏེ། དཔེར་ན་བུམ་པ་དང་སེམས་ཅན་འགྲོའོ་ཞེས་བྱ་བ་འཇིག་རྟེན་དང་རྗེས་སུ་མཐུན་པ་ཡིན་པ་བཞིན་ཏེ། འཇིག་རྟེན་པ་རྣམས་ནི་དེ་དག་ལ་བདེ་བ་ལ་སོགས་པ་ཡིན་པར་རྟོགས་སོ་ཞེས་བྱ་བ་ནི་ཆུང་ངུ་དང༌། བར་མ་དང༌། ཆེན་པོའི་ཚོར་བ་ལ་སོགས་པ་དེ་དག་ལ་ཞེས་བྱ་བའི་དོན་གང་ཡིན་པ་སྟེ། སྡུག་བསྔལ་གྱི་སྡུག་བསྔལ་སྡུག་བསྔལ་ཆེན་པོས་གཟིར་བ་ལས། སྡུག་བསྔལ་ཆུང་ངུའི་ཚོར་བ་ལ་བདེ་བ་ཡིན་པར་རྟོགས་ཏེ། དཔེར་ན་ཆུ་ཤིན་ཏུ་དྲོན་པོས་གདུངས་པ་ན་ཆུ་ཅུང་ཟད་དྲོ་བ་ལ་གྲང་བ་ཞེས་བྱ་བ་བཞིན་ནོ། །སྡུག་བསྔལ་ཆེན་པོའི་ཚོར་བས་གཟིར་བ་ལས་ཚོར་བ་བར་མ་ལ་སྡུག་བསྔལ་ཡང་མ་ཡིན་བདེ་བ་ཡང་མ་ཡིན་པར་རྟོགས་སོ། །དཔེར་ན་དཔྱིད་ཀྱི་ཉི་ཚན་གྱིས་ཡོངས་སུ་གདུངས་པས་སྔར་དགུན་གྱི་ཉི་མ་ལ་དྲོ་བ་ཡང་མ་ཡིན་གྲང་བ་མ་ཡིན་ཞེས་བྱ་བ་བཞིན་ནོ། །སྡུག་བསྔལ་ཆེན་པོའི་ཚོར་བ་སྡུག་བསྔལ་ཡིན་པར་རྟོགས་སོ། །སྡུག་བསྔལ་གྱི་ཚོར་བའི་མཚན་ཉིད་ཀྱང་ཅི་ཡིན་ཞེས་རྒྱ་པར་འབྱུང་བ་ལ། གང་སྐྱེས་ན་མི་འབྲལ་བར་འདོད་པ་འབྱུང་བ་ཞེས་བྱ་བ་ནི་འབྲས་བུས་ཉེ་བར་མཚན་བའི་དབང་དུ་བྱས་པའོ། །དེ་སྡུག་བསྔལ་དུ་ཇི་ལྟར་འགྲུབ་པར་འགྱུར་ཞེས་བྱ་བ་ནི་སྡུག་བསྔལ་གྱི་ཚོར་བ་དང་མི་མཐུན་པའི་འབྲས་བུ་ཡིན་པར་རྟོགས་པ་ཡོད་པས་སོ། །འོན་ཏེ་ཆུང་ངུ་དང༌། འབྲིང་དང༌། ཆེན་པོ་ཐ་དད་པའི་
ཕྱིར་འབྲས་བུ་འདི་ཐ་དད་པ་ཡིན་ནོ་ཞེས་སྨྲ་ན། འོ་ན་ནི་གང་སྐྱེས་ན་བྲལ་བར་འདོད་པ་འབྱུང་བ་ཞེས་བྱ་བར་ཚོར་བ་འདི་ཐམས་ཅད་སྡུག་བསྔལ་ཡིན་པར་མི་འགྱུར་རོ། །འོན་ཏེ་གང་ལ་བརྟེན་ན་གནོད་པར་འགྱུར་བ་དེ་ཞེས་བྱ་བ་ནི་བྱེད་པས་ཉེ་བར་མཚན་པའི་དབང་དུ་བྱས་པའོ། །གང་ལ་བརྟེན་ན་ཕན་པར་འགྱུར་བ་དེ་ཇི་ལྟར་སྡུག་བསྔལ་ཡིན་པར་འགྲུབ་པར་འགྱུར་ཞེས་བྱ་བ་ནི་དེ་དང་མི་མཐུན་པར་བྱེད་པའི་ཉེ་བར་མཚོན་པ་ཡོད་པས་སོ། །འོན་ཏེ་ཇི་ལྟར་འཕགས་པས་སྡུག་བསྔལ་བར་གཟིགས་ཏེ་ཞེས་རྒྱས་པར་འབྱུང་བ་ལ། འདུ་བྱེད་སྡུག་བསྔལ་ཉིད་ཀྱིས་ཚོར་བ་རྣམས་འཕགས་པས་སྡུག་བསྔལ་བར་གཟིགས་སོ་ཞེ་ན་ཞེས་བྱ་བ་འདིས་ནི་ཚོར་བ་ཐམས་ཅད་ཀྱི་སྤྱིའི་མཚན་ཉིད་ནི་སྡུག་བསྔལ་གྱི་མཚན་ཉིད་ཡིན་པར་བསྟན་གྱི། རང་གི་མཚན་ཉིད་ནི་མ་ཡིན་ནོ་ཞེས་སྟོན་ཏོ། །དེ་བས་ན་ཚོར་བའི་རང་གི་མཚན་ཉིད་འདི་ལ་ཐ་དད་པ་ཡོད་དུ་ཟིན་ཀྱང་འགྲུབ་པར་མི་འགྱུར་ཏེ། དེ་ཡང་ཐ་དད་པ་མེད་པ་ཡིན་པས་འདུ་བྱེད་ཀྱི་སྡུག་བསྔལ་དེ་ཡང་མི་རྟག་པ་ཉིད་དུ་མཐུན་པའི་ངོ་བོ་ཡིན་པའི་ཕྱིར་རོ། །ཇི་ལྟར་དེའི་སྒོ་ནས་ཚོར་བ་ལ་སྡུག་བསྔལ་ཆུང་བ་ཉིད་དང༌། བར་མ་དང༌། ཆེན་པོ་ཉིད་འགྲུབ་པར་འགྱུར་ཞེས་བྱ་བ་ནི་འདུ་བྱེད་མི་རྟག་པ་ཉིད་ཀྱི་སྒོ་ནས་ཐ་དད་པ་མེད་པ་ཉིད་ཡིན་ན་ནི་འདུ་བྱེད་མི་རྟག་པ་དེའི་སྒོ་ནས་ཁ་ཅིག་ཏུ་ནི་ཆུང་དུ་ཡིན་ནོ། །ཁ་ཅིག་ཏུ་ནི་འབྲིང་ཡིན་ནོ། །ཁ་ཅིག་ཏུ་ནི་ཆེན་པོ་ཡིན་ནོ་ཞེས་བྱ་བར་མི་རུང་ངོ༌། །སྡུག་བསྔལ་གྱི་རང་གི་མཚན་ཉིད་གང་ཡིན་པ་དེ་ལ་ནི་ཆུང་ངུ་དང༌། འབྲིང་དང༌། ཆེན་པོ་ཐ་དད་པར་རིགས་པ་ཡིན་ཏེ། རང་གི་མཚན་ཉིད་ཀྱི་རྐྱེན་ཐ་དད་པས་ཐ་དད་པ་ཡིན་པའི་ཕྱིར་རོ། །གལ་ཏེ་ཡང་འདུ་བྱེད་སྡུག་བསྔལ་ཉིད་ཁོ་ནས་ཚོར་བ་ཞེས་བྱ་བ་ཉིད་ཡིན་ན་ནི་ཞེས་རྒྱས་པར་འབྱུང་བ་ལ་སྡུག་བསྔལ་གསུམ་ཞེས་བྱ་བའི་མདོ་སྡེ་ཡོད་པར་མི་འགྱུར་རོ་ཞེས་བྱ་བ་ནི་ཡོངས་སུ་འགྱུར་བ་དང༌། སྡུག་བསྔལ་བའི་སྡུག་བསྔལ་གཉིས་མེད་པའི་ཕྱིར་རོ། །འོན་ཏེ་ཆུང་ངུ་དང༌། འབྲིང་དང༌། ཆེན་པོ་སོ་སོ་ཐ་དད་པར་མྱོང་བ་དེ་དག་སྡུག་བསྔལ་ཡིན་ནོ་ཞེས་ཇི་ལྟར་སྲིད་པར་སྨྲ་བ་དེ་ལ་འདི་བརྗོད་པར་བྱ་བ་སྟེ། སྡུག་བསྔལ་བའི་སྡུག་བསྔལ་བ་འདི་གང་
ཡིན། གང་སྡུག་བསྔལ་ཆེན་པོ་ཡིན་ནོ་ཞེས་བརྗོད་དོ། །ཡོངས་སུ་འགྱུར་བའི་སྡུག་བསྔལ་ཉིད་ཀྱང༌། གང་ཡིན་པར་མ་ཡིན་ནོ་ཞེའོ། །གལ་ཏེ་དེ་དག་འདུ་བྱེད་ཀྱི་སྡུག་བསྔལ་ཉིད་ཡིན་ན་ནི། སྡུག་བསྔལ་གསུམ་ཞེས་བརྗོད་དུ་མེད་པར་འགྱུར་རོ། །གལ་ཏེ་ཆུང་ངུ་དང༌། བར་མ་དང༌། ཆེན་པོ་ཐ་དད་པ་ཡིན་ནོ་ཞེ་ན་ནི་མིང་གཞན་དུ་བརྗོད་པ་ཡིན་ཏེ། སྡུག་བསྔལ་ལ་ཆུང་ངུ་དང༌། བར་མ་དང༌། ཆེན་པོའི་བྱེ་བྲག་ཉིད་འགྲུབ་པར་མི་འགྱུར་ཏེ། སྡུག་བསྔལ་གྱི་མཚན་ཉིད་ལ་ཐ་དད་པ་མེད་པའི་ཕྱིར་རོ། །འོན་ཏེ་སྡུག་བསྔལ་བའི་སྡུག་བསྔལ་ཉིད་ཀྱང་གཞན། འདུ་བྱེད་ཀྱི་སྡུག་བསྔལ་ཡང་གཞན། ཡོངས་སུ་འགྱུར་བའི་སྡུག་བསྔལ་ཡང་གཞན་ཡིན་ནོ་ཞེས་སྨྲ་ན་ནི་དེ་ལྟར་ཚོར་བ་ཐམས་ཅད་སྡུག་བསྔལ་བ་ནི་ཡིན་ན་བདེ་བ་དང༌། སྡུག་བསྔལ་ཡང་མ་ཡིན། བདེ་བ་ཡང་མ་ཡིན་པའི་ཚོར་བའི་དངོས་པོ་ནི་འགྲུབ་པར་མི་འགྱུར་རོ། །གང་ཅི་ཚོར་ཡང་རུང་དེ་ནི་འདིར་སྡུག་བསྔལ་འབྱུང་བའོ་ཞེས་འབྱུང་བའི་མདོ་སྡེ་དང་ཡང་འགལ་བར་མི་འགྱུར་ཏེ། ཀུན་དགའ་བོ་འདུ་བྱེད་མི་རྟག་པ་ཉིད་དང་ཡང་འདུ་བྱེད་ཡོངས་སུ་འགྱུར་བ་ཉིད་ལ་ངས་དགོངས་ནས་གང་ཅི་ཚོར་ཡང་རུང་དེ་ནི་འདིར་སྡུག་བསྔལ་བའོ་ཞེས་བཤད་དོ། །ཚོར་བ་གསུམ་ནི་འདི་དག་སྟེ། བདེ་བ་དང༌། སྡུག་བསྔལ་བ་དང༌། སྡུག་བསྔལ་ཡང་མ་ཡིན། བདེ་བ་ཡང་མ་ཡིན་ནོ་ཞེས་བྱ་བ་ནི་སྡུག་བསྔལ་གྱི་ཚོར་བ་སྐྱེ་བ་སྡུག་བསྔལ་བའོ། །ཡོངས་སུ་འགྱུར་བ་བདེ་བ་ཡིན་ནོ། །བདེ་བའི་ཚོར་བ་སྐྱེ་བ་བདེ་བ་ཡིན་ནོ། །གནས་པ་བདེ་བ་ཡིན་ནོ། །ཡོངས་སུ་འགྱུར་བ་སྡུག་བསྔལ་ཡིན་ནོ་ཞེས་བྱ་བ་ལ་སོགས་པ་ཡིན་ནོ། །བསམ་གཏན་གསུམ་པ་ན་སྡུག་བསྔལ་ཆུང་བའི་ཚོར་བ་ཡོད་པར་འགྲུབ་པར་འགྱུར་ཏེ། བདེ་བའི་ཚོར་བ་བསྟན་པའི་ཕྱིར་རོ་ཞེས་བྱ་བ་ནི་དབེན་པ་ལས་སྐྱེས་པའི་དགའ་བ་དང་བདེ་བ་ཅན་བསམ་གཏན་དང་པོ་ཡིན་ནོ་ཞེས་གསུངས་པའི་ཕྱིར་རྣམ་པར་རྟོག་པ་དང༌། རྣམ་པར་དཔྱོད་པ་ཉེ་བར་ཞི་ནས་ནང་ཡོངས་སུ་དང་བས་སེམས་རྩེ་གཅིག་ཏུ་གྱུར་པའི་ཕྱིར་རྣམ་པར་རྟོག་པ་མེད་ཅིང་རྣམ་པར་དཔྱོད་པ་མེད་པ། དབེན་པ་ལས་སྐྱེས་པའི་དགའ་བ་དང་བདེ་བ་ཅན་བསམ་གཏན་གཉིས་པ་ཉེ་བར་བསྒྲུབས་ཏེ་གནས་སོ་ཞེས་གསུངས་པའི་ཕྱིར་དང༌། བཏང་སྙོམས་ཅན་དྲན་པ་དང་ལྡན་པ་བདེ་
བལ་གནས་པ་བསམ་གཏན་གསུམ་པ་ཉེ་བར་བསྒྲུབས་ཏེ་གནས་སོ་ཞེས་གསུངས་པའི་ཕྱིར་རོ། །དེའི་གོང་མར་བར་མ་སྡུག་བསྔལ་ཡང་མ་ཡིན་བདེ་བ་ཡང་མ་ཡིན་པའི་ཚོར་བ་བསྟན་པའི་ཕྱིར་རོ་ཞེས་བྱ་བ་ནི་བསམ་གཏན་བཞི་པ་ནས་སྲིད་པའི་རྩེ་མོའི་བར་དུ་དེ་བདེ་བ་ཡང་སྤངས་སྡུག་བསྔལ་ཡང་སྤངས་ནས་ཡིད་བདེ་བ་དང༌། ཡིད་མི་བདེ་བ་སྔ་ནས་མེད་པས་ཡིད་མི་བདེ་བ་ལ་སོགས་པ་སྤངས་པར་གསུངས་པའི་ཕྱིར་རོ། །ཇི་ལྟར་ཤིན་ཏུ་ཞི་བའི་སྙོམས་པར་ཞུགས་པ་ལ་སྡུག་བསྔལ་གྱི་ཚོར་བ་ལྷག་པར་ཡོད་པར་འཐད་ཅེས་བྱ་བ་ནི་སྙོམས་པར་འཇུག་པ་འོག་མའི་རྫས་ལས་གོང་མ་པའི་སྙོམས་པར་འཇུག་པའི་རྫས་ཤིན་ཏུ་ཞི་བ་ཡིན་ཏེ། དེའི་གཉེན་པོ་ཡིན་པའི་ཕྱིར་རོ། །དེ་ལ་ཇི་ལྟར་ན་སྡུག་བསྔལ་གྱི་ཚོར་བ་ལྷག་པར་ཡོད་པར་འཐད། བར་མ་ནི་སྡུག་བསྔལ་ཡང་མ་ཡིན། བདེ་བ་ཡང་མ་ཡིན་པའི་ཚོར་བ་ཡིན་ནོ་ཞེས་སྟོན་པའི་ཕྱིར་འདོད་པའི་ཁམས་ལས་གོང་ན་སྡུག་བསྔལ་གྱི་ཚོར་བ་ཡོད་པ་མ་ཡིན་ནོ། །འོན་ཀྱང་བཅོམ་ལྡན་འདས་ཀྱིས་སྡུག་བསྔལ་བདེ་བར་འདུ་ཤེས་པ་གང་ཡིན་པ་ནི་ཕྱིན་ཅི་ལོག་ཡིན་ནོ་ཞེས་གསུངས་པ་ཡང་ཞེས་བྱ་བ་ནི་བདེ་བའོ་སྙམ་པའི་འདུ་ཤེས་ནི་བདེ་བར་འདུ་ཤེས་པའོ། །བདེ་བར་ཕྱིན་ཅི་ལོག་པ་ཡང་ལོག་པར་འཛིན་པའོ། །སྡུག་བསྔལ་རྣམ་པ་གཉིས་ལ་ཞེས་རྒྱས་པར་འབྱུང་བ་ལ། སྡུག་བསྔལ་གཉིས་ནི་ཡོངས་སུ་འགྱུར་བའི་སྡུག་བསྔལ་དང༌། འདུ་བྱེད་ཀྱི་སྡུག་བསྔལ་ལོ། །སྡུག་བསྔལ་དེ་ལ་སྡུག་བསྔལ་ཉིད་དུ་ཡོངས་སུ་མི་ཤེས་ནས་ཞེས་བྱ་བ་ནི་སྡུག་བསྔལ་གཉིས་པོ་དེ་སྡུག་བསྔལ་ཡིན་པ་ཡོངས་སུ་མི་ཤེས་ནས་གཅིག་ཁོ་ནར་བདེ་བར་འདུ་ཤེས་པ་ནི་ཕྱིན་ཅི་ལོག་ཡིན་ནོ། །སྡུག་བསྔལ་ཉིད་གཉིས་ཡིན་པར་མཐོང་བ་ལ་སྦྱོར་བར་བྱ་བའི་ཕྱིར་ཏེ་ཞེས་བྱ་བ་ནི་འགྱུར་བའི་སྡུག་བསྔལ་ཉིད་མཐོང་བར་བྱ་བ་དང༌། འདུ་བྱེད་ཀྱི་སྡུག་བསྔལ་ཉིད་མཐོང་བར་བྱ་བ་ལ་སྦྱོར་བར་བྱ་བའི་ཕྱིར་རོ། །དེ་ལ་ཆགས་པ་དང་བྲལ་བའི་ཐབས་ཡིན་པའི་ཕྱིར་དང་ཞེས་བྱ་བ་ནི་དེ་ལ་སྡུག་བསྔལ་རྣམ་པ་གཉིས་ཡོད་པར་མཐོང་བ་ནི་སྡུག་བསྔལ་རྣམ་པ་དེ་གཉིས་ཀྱི་རང་གི་མཚན་ཉིད་ཀྱི་རྣམ་པ་མཐོང་བ་ནི་དེ་ལ་ཕྱིར་ཕྱོགས་པར་མི་འགྱུར་རོ། །སྡུག་བསྔལ་མང་པོ་དང་ལྡན་པའི་ཕྱིར་ཞེས་བྱ་བ་ནི་ཅི་ཞེ་ན། བདེ་བའི་
ཚོར་བ་ནི་སྡུག་བསྔལ་ཉིད་ཡིན་པར་བལྟ་བར་བྱའོ་ཞེས་བསྟན་པ་ཡིན་ནོ། །སྲན་མ་ཤའི་ཕུང་པོ་བཞིན་ནོ་ཞེས་བྱ་བ་ནི། དཔེར་ན་སྲན་མ་ཤའི་ནང་ན་སྲན་མུད་ག་ལ་སོགས་པ་མེད་པ་མ་ཡིན་ཡང་སྲན་མ་ཤ་མང་བའི་ཕྱིར་མ་ཤའི་ཕུང་པོ་ཞེས་བྱ་བ་དེ་བཞིན་ནོ། །བཙུན་པ་གཞོན་ནུ་ལེན་གྱིས་ནི་བདེ་བ་ཁས་བླངས་ནས་ཇི་ལྟར་དེ་ལ་སྡུག་བསྔལ་གྱི་བློ་འབྱུང་བ་སྨྲ་བར་བྱེད་དོ། །སྡུག་བསྔལ་གྱི་རྒྱུ་ཡིན་པའི་ཕྱིར་དང་ཞེས་རྒྱས་པར་འབྱུང་བའི་སྡུག་བསྔལ་གྱི་རྒྱུ་ཡིན་པའི་ཕྱིར་ཏེ། འདི་ལྟར་བདེ་བ་ནི་འགྱུར་བའི་སྡུག་བསྔལ་འབྱུང་བའམ། སྲེད་པ་དང༌། ལེན་པ་དང༌། སྲིད་པའི་རིམ་གྱིས་འདི་ལྟར་བདེ་བའི་ཚོར་བ་ནི་ཡང་སྲིད་ཀྱི་རྒྱུར་འགྱུར་བ་ཡིན་ཏེ། དེ་བས་ན་སྡུག་བསྔལ་གྱི་རྒྱུ་ཡིན་ནོ། །སྡུག་བསྔལ་མང་པོས་བསྐྱེད་པའི་ཕྱིར་ཏེ་ཞེས་བྱ་བ་ནི་འདི་ལྟར་བདེ་བ་ནི་ཞིང་རྨོ་བ་དང༌། ཚོང་བྱ་བ་ལ་སོགས་པའི་སྡུག་བསྔལ་མི་ཉུང་བས་བསྐྱེད་ཅིང་འབྱུང་བ་ཡིན་ནོ། །སྡུག་བསྔལ་ཡིན་པ་ལ་དེ་ཡིད་དུ་འོང་བ་ཡིན་ཞིང་ཞེས་བྱ་བ་ནི་འདི་ལྟར་བཀྲེས་པ་དང༌། སྐོམ་པ་དང༌། ལུས་ཀྱི་ནད་དང༌། ངལ་བ་ལ་སོགས་པའི་རབ་ཏུ་དབྱེ་བ་སྡུག་བསྔལ་བ་ཡིན་ཡང་དེ་ལ་འདོད་པ་འབྱུང་ངོ༌། །གཏན་ཚིགས་དེ་དག་ཀུན་གྱི་ཕྱིར། སྡུག་བསྔལ་ཡིན་ན་བདེ་བར་འཛིན་ཏོ། །བདེ་བའི་རྒྱུ་རྣམ་པར་མི་གནས་པའི་ཕྱིར་རོ་ཞེས་བྱ་བ་ནི་གཞན་ལ་གྲགས་པའི་སྒོ་ནས་བསྟན་པ་ཡིན་ཏེ། དེ་དག་ནི་བདེ་བ་ཡང་ཡོད་པ་མ་ཡིན། བདེ་བའི་རྒྱུ་ཡང་ཡོད་པ་མ་ཡིན་ཞེས་བྱ་བ་ཡིན་ནོ། །འདི་ལྟར་བཏུང་བ་དང༌། བཟའ་བ་དང༌། བགོ་བ་ལ་སོགས་པ་དེ་དག་བདེ་བའི་རྒྱུར་བརྟགས་པ་དེ་དག་ནི་བདེ་བའི་རྒྱུ་མ་ཡིན་ནོ། །སྡུག་བསྔལ་གཞན་ཞི་བ་བདེ་བ་ཡིན་པར་སེམས་ཏེ་ཞེས་བྱ་བ་ནི་བདེ་བ་མེད་དུ་ཟིན་ཀྱང་བདེ་བའི་བློ་འགྲུབ་པར་འགྱུར་རོ་ཞེས་སྟོན་ཏོ། །དེ་ལ་རེ་ཞིག་འདི་དྲི་བར་བྱ་སྟེ། ཅི་བཏུང་བ་དང༌། བཟའ་བ་ལ་སོགས་པ་དེ་དག་བཀྲེས་པ་དང༌། སྐོམ་པ་དང༌། གྲང་བ་དང༌། དྲོ་བ་ལ་སོགས་པའི་སྡུག་བསྔལ་ཞི་བའི་རྒྱུ་ཡིན་ནམ། འོན་ཏེ་སྡུག་བསྔལ་གྱི་རྒྱུ་ཡིན། དེས་ཅིར་འགྱུར། གལ་ཏེ་སྡུག་བསྔལ་ཞི་བའི་རྒྱུ་ཡིན་ན་ནི་ཇི་ལྟར་སྡུག་བསྔལ་གྱི་རྒྱུ་ཡིན་པར་འགྲུབ་པར་འགྱུར། འདི་ལ་ཡང་སྡུག་བསྔལ་གྱི་ཚོར་བ་ནི་ཡོད་པ་མ་ཡིན་པ་དེ་ཁོ་ན་ཡིན་ཏེ།
སྡུག་བསྔལ་གྱི་རྒྱུ་རྣམ་པར་མི་གནས་པའི་ཕྱིར་རོ་ཞེས་བྱ་བ་དེ་ཁོ་ན་བཞིན་དུ་གནས་སོ། །བཏུང་བ་དང༌། བཟའ་བ་དང༌། གོས་ལ་སོགས་པ་གང་ཡིན་པ་དེ་དག་ཤིན་ཏུ་མང་བ་དང༌། དུས་མ་ཡིན་པར་བསྟེན་ན་སྡུག་བསྔལ་འབྱུང་བར་འགྱུར་བ་དེ་དག་ཉིད་ཚོད་ཟིན་པ་དང༌། དུས་སུ་བསྟེན་ན་སྡུག་བསྔལ་ཞི་བར་འགྱུར་རོ། །རྒྱུ་གང་ཁོ་ནས་སྡུག་བསྔལ་བར་འགྱུར་བ་དེ་ཁོ་ནས་སྡུག་བསྔལ་ཞི་བར་འགྱུར་བ་ཡང་རིགས་པ་མ་ཡིན་ནོ། །འོན་ཏེ་བཀྲེས་པ་དང༌། སྐོམ་པ་དང༌། གྲང་བ་དང༌། དྲོ་བ་ལ་སོགས་པའི་སྡུག་བསྔལ་གྱིས་གཟིར་བ་རྣམས་ཀྱིས་སྡུག་བསྔལ་གྱི་རྒྱུ་རྣམས་བསྟེན་ན་ཇི་ལྟར་བདེ་བའི་བློ་འབྱུང་བར་འགྱུར། འོན་ཏེ་སྡུག་བསྔལ་གཞན་ལ། དེའི་ཚེ་བདེ་བ་ཡིན་པར་མངོན་པའི་ང་རྒྱལ་བྱེད་ན་ནི་བཏུང་བ་དང་བཟའ་བ་ལ་སོགས་པའི་དུས་ལས་དུས་གཞན་གྱི་ཚེ་ན་ཡང་ཤིན་ཏུ་བདེ་བ་ཡིན་པར་མངོན་པའི་ང་རྒྱལ་བྱེད་པ་འཐོབ་པར་འགྱུར་ཏེ། སྡུག་བསྔལ་གྱི་རྒྱུ་ཡང་མེད་པའི་ཕྱིར་རོ། །གང་དག་སྡུག་བསྔལ་གཞན་ལ་བདེ་བ་ཡིན་པར་མངོན་པའི་ང་རྒྱལ་བྱེད་པ་དེ་ནི་དེ་མེད་ན་ཤིན་ཏུ་བདེ་བ་ཡིན་པར་མངོན་པའི་ང་རྒྱལ་བྱེད་པ་འཐོབ་པར་འགྱུར་རོ། །བདེ་བའི་རྒྱུ་རྣམ་པར་མི་གནས་པ་མ་ཡིན་ཏེ་ཞེས་བྱ་བ་འདིས་ནི་གཏན་ཚིགས་མ་གྲུབ་པའི་དོན་ཉིད་བརྗོད་པ་ཡིན་ནོ། །དེ་ལྟ་མ་ཡིན་ན་ཞེས་རྒྱས་པར་འབྱུང་བ་ནི་འདི་ལྟ་མ་ཡིན་ཏེ། གལ་ཏེ་སྡུག་བསྔལ་ཉེ་བར་ཞི་བ་ཁོ་ན་ལ་བདེ་བའི་བློ་འབྱུང་བ་ཡིན་ན་ནི། ངལ་བའི་ལུས་སྐུ་མཉེ་བྱེད་པ་དང༌། སྤྱོད་ལམ་གཞན་བྱེད་པ་གཉིས་བདེ་བ་ཉིད་ལ་བདེ་བའི་བློ་འབྱུང་བ་མ་ཡིན་ན། དུས་རིང་པོས་ཞེས་བྱ་བ་ནི་སྐུ་མཉེ་བྱེད་པའི་དུས་ལས་རིང་དུ་ལེན་པ་དང༌། སྤྱོད་ལམ་གཞན་བྱེད་པ་ལས་ཡུན་རིང་དུ་ལོན་ཏེ། ངལ་བ་ཞི་བ་དེ་འདྲ་བ་ཁོ་ནའི་བློ་འབྱུང་བར་འགྱུར་གྱི་ཞེས་བྱ་བ་ནི་དེའི་ཚེ་ན་ཡང་སྡུག་བསྔལ་ཞི་བ་ཡོད་པས་སོ། །ལན་འགའ་ཡང་བདེ་བ་ལ་ཡོངས་སུ་གཅོད་པར་མི་འགྱུར་ཞེས་རྒྱས་པར་འབྱུང་བ་དེས་ནི་སྡུག་བསྔལ་ཉེ་བར་ཞི་བ་ཙམ་ལ་བདེ་བའི་བློ་འབྱུང་བ་ཡོད་མོད་ཀྱི། འོན་ཀྱང་བདེ་བ་ཉེ་བར་བརྟགས་པ་ཙམ་ཡིན་པར་སྟོན་ཏོ། །བདེ་བའི་བློ་ཡང་མ་ཡིན་ཏེ་ཚོར་བ་གཞན་བདེ་བའི་ཚོར་བ་གཞན་ལ་ཡོངས་སུ་མི་གཅོད་པའི་ཕྱིར་རོ། །འདིར་ནི་སྡུག་བསྔལ་ཉེ་
བར་ཞི་བ་ལ་བདེ་བའི་བློ་འབྱུང་བ་མ་ཡིན་པ་དེ་ལྟ་བུ་ཁོ་ན་ཡིན་ཏེ། དེ་ལྟ་མ་ཡིན་ན་གང་ཕལ་ཆེར་བཟའ་བ་དང་བཏུང་བ་འབད་དེ་ཞིམ་པོ་ཚོལ་བར་བྱེད་པར་མི་འགྱུར་ཏེ། འབྲས་ཆན་ཕལ་བ་དང་འབྲས་ཀུལ་མ་ས་དང་རྩ་བ་མོ་དང་ཆུ་ཙམ་གྱིས་ཀྱང་བཀྲེས་པ་དང༌། སྐོམ་པའི་སྡུག་བསྔལ་ཉེ་བར་ཞི་བ་ནི་གདོན་མི་ཟ་བར་འགྱུར་བ་ཡིན་ནོ། །བཟའ་བ་དང་བཏུང་བ་ཞིམ་པོ་ལ་ལོངས་སྤྱོད་པའི་ཚེ་ནི་བདེ་བའི་ཚོར་བ་ཡིན་ནོ། །གང་གི་ཚེ་བཀྲེས་པ་དང༌། སྐོམ་པ་དང་བྲལ་ནས་ཞེས་རྒྱས་པར་འབྱུང་བ་དེས་ཀྱང་སྡུག་བསྔལ་ཉེ་བར་ཞི་བ་ཙམ་ལ་བདེ་བ་ཡིན་པར་མངོན་པའི་ང་རྒྱལ་བྱང་པར་སྟོན་ཏོ། །རོ་ཞིམ་པའམ། སྣ་ལ་དྲི་ཞིམ་པ་རྫས་གཞན་ཤིན་ཏུ་ཞིམ་པའམ། ཤིན་ཏུ་ཆེས་ཞིམ་པའི་ཁྱད་པར་ལས་ཞེས་བྱ་བ་ནི་ཞིམ་པའི་རྫས་གཞན་ཤིན་ཏུ་ཞིམ་པ་དང་ཤིན་ཏུ་ཆེས་ཞིམ་པའི་ཁྱད་པར་ལས་རོ་ཞིམ་པ་དང༌། ཤིན་ཏུ་ཆེས་ཞིམ་མོ་སྙམ་པ་དང༌། ཇི་ལྟར་དྲི་ཞིམ་པའི་རྫས་གཞན་ཤིན་ཏུ་ཞིམ་པ་དང༌། ཤིན་ཏུ་ཆེས་ཞིམ་པའི་ཁྱད་པར་ལས་དྲི་ཞིམ་པོར་ཤིན་ཏུ་ཞིམ་པ་དང་དྲི་ཤིན་ཏུ་ཆེས་ཞིམ་མོ་སྙམ་པ་དེ་བཞིན་ནོ། །རྣ་བས་ཀྱང་ཡིད་དུ་འོང་སྙན་པ་སྣ་ཚོགས་པའི་སྒྲ་རྣམས་ལ་ཞེས་རྒྱས་པར་འབྱུང་བ་ལ་ཡང་སྡུག་བསྔལ་གཞན་ཉེ་བར་ཞི་བ་གང་ཞིག་ཡིན། སྙན་པ་སྣ་ཚོགས་པའི་སྒྲ་རྣམས་ལ་ཉན་པར་བྱེད་པའི་ཕྱིར་རོ་ཞེས་བྱ་བ་ནི་སྙན་པའི་སྒྲ་ཡང་ཡིན། སྣ་ཚོགས་ཀྱི་སྒྲ་ཡང་ཡིན་པས་སྙན་པ་སྣ་ཚོགས་ཀྱི་སྒྲའོ། །ཡིད་དུ་འོང་ལ་སྙན་པ་སྣ་ཚོགས་ཀྱི་སྒྲ་ནི་ཡིད་དུ་འོང་བ་སྙན་པ་སྣ་ཚོགས་ཀྱི་སྒྲའོ། །ཡིད་དུ་འོང་བ་སྙན་པ་སྣ་ཚོགས་ཀྱི་སྒྲ་དེ་དག་ལ་ཉན་པས་ནི་བདེ་བ་ཁྱད་པར་གྱི་བློ་སྐྱེད་པར་བྱེད་དོ། །སྡུག་བསྔལ་གཞན་ཉེ་བར་ཞི་བ་འབའ་ཞིག་ལ་མ་ཡིན་པར་ནི་ལུང་མདོ་སྡེ་འདི་ཉིད་ལས་ཀྱང་ཚོར་བ་གང་ཞེ་ན། ཚོར་བ་གསུམ་སྟེ་ཞས་རྒྱས་པར་འབྱུང་བ་ཡིན་ནོ། །རིགས་པས་ཀྱང་ཞེས་བྱ་བ་ནི་བདེ་བའི་རྒྱུ་རྣམ་པར་གནས་པ་ལ་སོགས་པའི་རིགས་པས་ཚོར་བ་གསུམ་གྲུབ་པ་ཡིན་ནོ། །འདིར་ཡང་རྐྱེན་དང་རྐྱེན་ཅན་གཉིས། །ཞེས་རྒྱས་པར་འབྱུང་བ་ལ། རྒྱུ་གཞན་དང་དེ་མ་ཐག་པ་དང༌། དམིགས་པ་རྣམས་རྐྱེན་ཡིན་པར་མི་འགྱུར་རོ་ཞེས་བྱ་བ་ནི་རེག་པ་ལས་
གཞན་དེ་ལ་ཚོར་བའི་རྒྱུ་དང་རྐྱེན་སྐལ་བ་མཉམ་པའི་རྒྱུ་ལ་སོགས་པ་ཡིན་པར་རིག་པར་བྱའོ། །དེ་མ་ཐག་པའི་རྐྱན་ནི་སེམས་དང་སེམས་ལས་བྱུང་བ་འདས་མ་ཐག་པ་ཡིན་ནོ། །དམིགས་པའི་རྐྱེན་ནི་གང་ལ་དམིགས་ནས་སྐྱེ་བའོ། །དེ་ཐམས་ཅད་ཀྱི་འབྱུང་གནས་ཕུང་པོ་ཡིན་ནོ་ཞེས་བྱ་བ་ལ་ཕུང་པོ་ནི་གནས་དང་བཅས་པའི་སྐྱེ་མཆེད་དྲུག་གོ །རྐྱེན་ཅན་ངེས་པ་ཡིན་ན་ནི་རེག་པའི་རྐྱེན་གྱིས་གཞན་སེམས་ལས་བྱུང་བའི་ཆོས་རྣམས་མ་ཡིན་པར་འགྱུར་རོ་ཞེས་བྱ་བ་ནི་སེམས་ལས་བྱུང་བ་ཐམས་ཅད་ཀྱི་རྐྱེན་རེག་པ་ཡིན་ཏེ། ཇི་སྐད་དུ་མདོ་སྡེ་ལས། ཚོར་བའི་ཕུང་པོ་དང༌། འདུ་ཤེས་ཀྱི་ཕུང་པོ་དང༌། འདུ་བྱེད་ཀྱི་ཕུང་པོ་གང་ཡིན་པ་དེ་ཐམས་ཅད་རེག་པ་ལ་བརྟེན་ནས་ཡིན་ནོ་ཞེས་གསུངས་སོ། །རེག་པ་གཙོ་བོའི་རྐྱེན་ཡིན་པར་ཡང་བདེ་བ་མྱོང་བར་འགྱུར་བ་ལ་སོགས་པའི་རེག་པ་ཐ་དད་པས་ཞེས་བྱ་བ་ནི་བདེ་བ་མྱོང་བར་འགྱུར་བའི་རེག་པ་དང༌། སྡུག་བསྔལ་མྱོང་བར་འགྱུར་བ་དང༌། སྡུག་བསྔལ་ཡང་མ་ཡིན་བདེ་བ་ཡང་མ་ཡིན་པ་མྱོང་བར་འགྱུར་བ་དེ་ལྟ་བུའི་བདེ་བ་མྱོང་བར་འགྱུར་བའི་རེག་པ་ཐ་དད་པ་ལས། བདེ་བ་ལ་སོགས་པའི་ཚོར་བ་སྐྱེ་བའི་ཕྱིར་རོ་ཞེས་བྱ་བ་ནི་བདེ་བ་དང༌། སྡུག་བསྔལ་དང༌། སྡུག་བསྔལ་ཡང་མ་ཡིན། བདེ་བ་ཡང་མ་ཡིན་པའི་ཚོར་བ་སྐྱེ་བའི་ཕྱིར་རོ། །འདི་ལྟར་ཞེས་བྱ་བ་ལ། འདི་ལྟར་ཞེས་བྱ་བ་ནི་གང་གི་ཕྱིར་ཞེས་བྱ་བ་ཡིན་ནོ། །དེ་སྐྱེས་པ་ན་ཞེས་བྱ་བ་ཚོར་བ་སྐྱེས་པ་ན་རྐྱེན་གཞན་དང་ཞེས་བྱ་བ་རྒྱུ་དང་དེ་མ་ཐག་པ་དང༌། དམིགས་པའི་རྐྱེན་དང༌། འདུན་པ་དང་རྣམ་པར་རྟོག་པ་ལ་སོགས་པ་ཡང་ཞེས་བྱ་བའི་སོགས་པའི་སྒྲས་འབྱུང་གནས་ཕུང་པོ་ལ་སོགས་པ་ཡང་རེག་པ་ལ་ལྟོས་པ་ཡིན་གྱི་གང་གི་ཚེ་ཡུལ་གྱི་སྟོབས་ཀྱིས་ཚོར་བ་སྐྱེ་བར་འགྱུར་བ་ན་རེག་པ་ནི་ངེས་པར་དེ་དག་ལ་ལྟོས་པ་མ་ཡིན་ནོ། །ཚོར་བའི་བསྡུས་པའི་དོན་རྣམ་པར་གཞག་པ་ཡང་འདིར་རྣམ་པ་ལྔར་བསྟན་ཏེ། རབ་ཏུ་དབྱེ་བ་རྣམ་པར་གཞག་པ་ནི་ཇི་སྐད་དུ་ཚོར་བ་རྣམ་པ་གསུམ་སྟེ་ཞེས་རྒྱས་པར་བསྟན་པའོ། །ཉེ་བར་མཚོན་པ་རྣམ་པར་གཞག་པ་ནི་ཇི་སྐད་དུ། གང་སྐྱེས་ན་མི་འབྲལ་བར་འདོད་པ་འབྱུང་བའོ་ཞེས་རྒྱས་པར་བསྟན་པའོ། །ཚོར་བ་གསུམ་པར་གཞག་པ་ནི་ཇི་
སྐད་དུ་དེར་ཡང་ཚོར་བ་གཉིས་ལ་ངོ་བོ་ཉིད་ཀྱིས་སྡུག་བསྔལ་བ་མེད་པས་ན་ཞེས་རྒྱས་པར་བསྟན་པའོ། །རྣམ་པར་ངེས་པར་རྣམ་པར་གཞག་པ་ནི་ཇི་སྐད་དུ། གཞན་དག་ན་རེ་ཚོར་བ་གསུམ་བསྟན་པ་ནི་དགོངས་པ་ཅན་ཡིན་གྱི། སྡུག་བསྔལ་ཉིད་ནི་ཚོར་བ་གཅིག་ཁོ་ན་ཡིན་ནོ་ཞེ་ན་ཞེས་རྒྱས་པར་བསྟན་པའི་གཙོ་བོའི་རྐྱེན་རྣམ་པར་གཞག་པ་ནི་ཇི་སྐད་དུ། བདེ་བ་མྱོང་བར་འགྱུར་བ་ལ་སོགས་པའི་རེག་པ་ཐ་དད་པས་ཞེས་རྒྱས་པར་བསྟན་པའོ། །ཚོར་བ་རྣམ་པར་དབྱེ་བའོ། །སྲིད་པ་གང་ཞེ་ན་ཞེས་བྱ་བ་ནི་ཚོར་བའི་རྐྱེན་གྱིས་སྲེད་པ་ཞེས་གསུངས་ན་དེ་ཡང་གནས་ཐ་དད་པས་ནི་རྣམ་པ་དྲུག །ཁམས་ཐ་དད་པས་ནི་རྣམ་པ་གསུམ། དམིགས་པ་ཐ་དད་པས་ནི་རྣམ་པ་བཞི་སྟེ། བདག་གིས་དངོས་པོ་དང་ཡུལ་གཉིས་ཀྱིས་ཐོབ་པ་དང༌། མ་ཐོབ་པ་གཉིས་ལས་སོ་ཞེས་འོག་ནས་འཆད་དོ། །དེ་བས་ན་དམིགས་མི་ཕྱེད་ན་ཚོར་བའི་རྐྱེན་གྱིས་སྲེད་པར་འདིར་དགོངས་པ་གང་ཞེ་ན། དེ་དམིགས་ཀྱིས་དབྱེ་བའི་ཕྱིར་སྲེད་པ་གསུམ་སྟེ་ཞེས་རྒྱས་པར་འབྱུང་བ་ཞེས་སྨྲས་སོ། །རྒྱས་པར་སྨོས་པ་ནི་འདོད་པའི་སྲེད་པ་དང༌། གཟུགས་ཀྱི་སྲེད་པ་དང༌། གཟུགས་མེད་པའི་སྲེད་པ་ཞེས་མདོ་སྡེ་ལས་ཇི་སྐད་འབྱུང་བ་བསྟན་པར་བྱ་བའི་ཕྱིར་རོ། །གདུལ་བྱའི་བྱེ་བྲག་ལ་ལྟོས་ནས་དེ་སྔ་མ་བཞིན་ནོ་ཞེས་བྱ་བ་ནི་འཕྲལ་དུ་ཉེ་བར་གནས་པའི་གདུལ་བྱའི་བྱེ་བྲག་ལ་ལྟོས་ནས་ཇི་སྐད་དུ་སྔར་བསྟན་པའོ། །དེ་བཞིན་དུ་ཁ་ཅིག་ཏུ་ནི་རྣམ་པར་དབྱེ་བ་ཡང་མ་གསུངས་སོ་ཞེས་བསྟན་པའོ། །ཁྱིའི་སྦྲང་བུ་བཞིན་དང་ཞེས་བྱ་བ་ནི་ཇི་ལྟར་ཁྱི་ལ་སྦྲང་བུ་རྒྱུ་བ་ལ་ཁྱིའི་སྦྲང་བུ་ཞེས་སྟོན་ཏོ། ཚིག་བར་མ་མི་མངོན་པ་ཡིན་པའི་ཕྱིར་རོ། །གྲོང་གི་ཕག་པ་བཞིན་ནོ་ཞེས་བྱ་བ་ནི་ཇི་ལྟར་གྲོང་ན་རྒྱུ་བའི་ཕག་པ་ལ་གྲོང་གི་ཕག་པ་ཞེས་བརྗོད་དེ། ཚིག་བར་མ་མི་མངོན་པར་བྱས་པ་དེ་བཞིན་ནོ། །ཅི་རིགས་པར་བྱ་སྟེ་ཞེས་བྱ་བ་ནི་ཇི་ལྟ་བུ་ཞེ་ན། འདོད་པ་ན་སྤྱོད་པའི་སྲེད་པ་ནི་འདོད་པའི་སྲེད་པའོ། །གཟུགས་ན་སྤྱོད་པའི་སྲེད་པ་ནི་གཟུགས་ཀྱི་སྲེད་པ་སྟེ། ཚིག་བར་མ་མི་མངོན་པ་ཡིན་པའི་ཕྱིར་སྔ་མ་བཞིན་ནོ། །དེ་བཞིན་དུ་གཟུགས་མེད་པ་ན་སྤྱོད་པ་ཞེས་སྦྱར་བར་བྱའོ། །དེ་དག་ཉིད་ཁམས་གསུམ་པའི་སྲེད་པ་ཡིན་པར་
བསྟན་ཏོ་ཞེས་བྱ་བ་ནི་དེ་བཞིན་དུ་སྤྱོད་པའི་སྒྲ་མི་མངོན་པར་བྱས་ནས་བསྟན་ཏོ། །གོ་རིམས་བཞིན་ཏེ་ཞེས་བྱ་བ་ནི་འདོད་པའི་འདོད་ཆགས་དང་མ་བྲལ་བ་རྣམས་ཀྱི་ནི་འདོད་པ་ན་སྤྱོད་པའོ། །གཟུགས་ཀྱི་འདོད་ཆགས་དང་མ་བྲལ་བ་རྣམས་ཀྱི་ནི་གཟུགས་ན་སྤྱོད་པའོ། །གཟུགས་མེད་པའི་འདོད་ཆགས་དང་མ་བྲལ་བ་རྣམས་ཀྱི་ནི་གཟུགས་མེད་པ་ན་སྤྱོད་པ་ཞེས་བྱ་བ་ཡིན་ནོ། །ས་གང་ཡིན་པའི་ཚོར་བ་གང་ཡིན་པ་དེ་ཡང་ས་དེ་ཉིད་ཀྱི་སྲེད་པའི་རྐྱེན་ཡིན་ནོ་ཞེས་བྱ་བ་ནི་བསམ་གཏན་དང་པོའི་ཚོར་བ་ནི་བསམ་གཏན་དང་པོའི་སའི་སྲེད་པའི་རྐྱེན་ཡིན་ནོ། །རྒྱས་པར་སྲིད་པའི་རྩེ་མོའི་བར་གྱི་སའི་ཚོར་བ་ནི་སྲིད་པའི་རྩེ་མོའི་བར་གྱི་སའི་སྲེད་པའི་རྐྱེན་ཡིན་ནོ། །བདེ་བའི་ཚོར་བ་ནི་དེ་དང་ལྡན་ཞིང་མི་འབྲལ་བར་སྲེད་པའི་རྐྱེན་ཡིན་ནོ་ཞེས་བྱ་བ་ནི་བདེ་བའི་ཚོར་བ་ནི་དེ་དང་ལྡན་པར་སྲེད་པ་དང༌། དེ་དང་མི་འབྲལ་བར་སྲེད་པའི་རྐྱེན་ཡིན་ནོ། །སྡུག་བསྔལ་ནི་དེ་དང་མི་ལྡན་ཞིང་འབྲལ་བར་སྲེད་པའི་རྐྱེན་ཡིན་ནོ། །སྡུག་བསྔལ་ཡང་མ་ཡིན་བདེ་བ་ཡང་མ་ཡིན་པ་ནི་དེའི་གནས་སྐབས་ལ་མངོན་པར་དགའ་བའི་སྲེད་པའི་རྐྱེན་ཡིན་ནོ་ཞེས་བྱ་བ་ནི་སྡུག་བསྔལ་ཡང་མ་ཡིན་བདེ་བ་ཡང་མ་ཡིན་པ་གང་ཡིན་པ་དེའི་གནས་སྐབས་དེ་ལ་མངོན་པར་དགའ་བ་ནི་དེའི་གནས་སྐབས་ལ་མངོན་པར་དགའ་བའོ། །དེའི་གནས་སྐབས་ལ་མངོན་པར་དགའ་བ་ཉིད་སྲེད་པ་ཡིན་པས་དེའི་གནས་སྐབས་ལ་མངོན་པར་དགའ་བའི་སྲེད་པ་སྟེ། དེའི་གནས་སྐབས་ལ་མངོན་པར་དགའ་བའི་སྲེད་པ་དེའི་རྐྱེན་ཡིན་ནོ། །བསམ་གཏན་ཁ་ཅིག་ཏུ་ནི་དེ་དང་ལྡན་ཞིང་མི་འབྲལ་བར་སྲེད་པའི་རྐྱེན་ཡིན་ནོ་ཞེས་བྱ་བ་ནི་སྡུག་བསྔལ་ཡང་མ་ཡིན། བདེ་བ་ཡང་མ་ཡིན་པའི་ཚོར་བ་ནི་དེ་དང་ལྡན་ཞིང་མི་འབྲལ་བར་སྲེད་པའི་རྐྱེན་ཡིན་ནོ་ཞེས་བྱ་བའི་ཐ་ཚིག་གོ །བསམ་གཏན་ཁ་ཅིག་ཏུ་ནི་ཞེས་བྱ་བ་ནི་བསམ་གཏན་བཞི་པ་ལ་སྙོམས་པར་འཇུག་པ་དང༌། གཟུགས་མེད་པའི་སྙོམས་པར་འཇུག་པ་དེ་དག་གི་ཚེའོ། །དེ་ལྟར་བྱས་ན་བདེ་བའི་ཚོར་བ་ནི་འདོད་པའི་ཁམས་ནས་བསམ་གཏན་གསུམ་པའི་བར་དུ་སྲེད་པའི་རྐྱེན་ཡིན་པར་བསྟན་ཏོ། །སྡུག་བསྔལ་ནི་འདོད་པའི་ཁམས་ཁོ་ན་ན་ཡོད་པའི་ཕྱིར་རོ། །སྡུག་བསྔལ་ཡང་མ་ཡིན་བདེ་བ་ཡང་མ་ཡིན་པ་ནི་དེའི་གནས་སྐབས་ལ་མངོན་པར་དགའ་བའི་སྲེད་པ་འདོད་པའི་
ཁམས་ནས་བསམ་གཏན་གསུམ་པའི་བར་དུ་ཡོད་པའི་རྐྱེན་ཡིན་པར་བསྟན་ཏོ། །དེ་དག་ན་དེ་དང་ལྡན་ཞིང་མི་འབྲལ་བར་སྲེད་པ་ནི་ཡོད་པ་མ་ཡིན་ནོ། །འོ་ན་ཅི་ཞེ་ན། དེའི་གནས་སྐབས་ལ་མངོན་པའི་སྲེད་པ་ཁོ་ན་ཡིན་ནོ། །དེ་ཡན་ཆད་ནི་དེ་དང་ལྡན་ཞིང་མི་འབྲལ་བར་སྲེད་པའི་རྐྱེན་ཡིན་པར་བསྟན་ཏོ། །གཞན་ཡང་ཚོར་བ་གསུམ་དང་ཞེས་རྒྱས་པར་འབྱུང་བས་ནི་རྣམ་གྲངས་གཞན་ཡིན་ནོ། །སྤྱི་དྲིལ་དུ་ཕུང་པོའི་རྒྱུན་ལ་བྱེ་བྲག་མེད་པར་ཞེས་བྱ་བ་ནི་ཕུང་པོ་འདི་ཐམས་ཅད་ཀྱི་སྤྱི་ལ་བདག་ཏུ་སྲེད་པ་དང་བདག་ཏུ་ལྟ་བ་ལྷན་ཅིག་སྐྱེས་པ་དང་ལྷན་ཅིག་འབྱུང་སྟེ་ཞེས་བྱ་བ་ལ་བདག་ཏུ་ལྟ་བ་ལྷན་ཅིག་སྐྱེས་པ་དང་ལྷན་ཅིག་འབྱུང་བ་ནི་དུས་མཉམ་དུ་འབྱུང་ཞེས་བྱ་བ་ཡིན་ནོ། །རྣལ་འབྱོར་སྤྱོད་པའི་ལུགས་ཀྱིས་ནི་བདག་ཏུ་ལྟ་བ་ལྷན་ཅིག་སྐྱེས་པ་དང་འདྲེས་པར་འབྱུང་ཞེས་བྱ་བའི་དོན་ཏོ། །དཔེར་ན་བྱམས་པ་དང་ལྡན་པའི་དྲན་པ་ཡང་དག་བྱང་ཆུབ་ཀྱི་ཡན་ལག་སྒོམ་མོ་ཞེས་བྱ་བ་ཡང་བྱམས་པ་དང་དྲན་པ་ཡང་དག་བྱང་ཆུབ་ཀྱི་ཡན་ལག་གཉིས་སེམས་གཅིག་ལ་ནི་ལྡན་པ་མ་ཡིན་ཏེ། ཟག་པ་དང་བཅས་པ་དང་ཟག་པ་མེད་པ་ཡིན་པའི་ཕྱིར་རོ། །བྱམས་པ་ནི་ཟག་པ་དང་བཅས་པ་དང༌། ཟག་པ་མེད་པའོ། །བྱང་ཆུབ་ཀྱི་ཡན་ལག་ནི་ཟག་པ་མེད་པའོ། །བདག་ཏུ་ལྟ་བ་ལྷན་ཅིག་སྐྱེས་པ་ཡང་རི་དགས་དང་བྱ་རྣམས་དང༌། བྱིས་པ་ཆུང་དུ་ལ་ཡང་འབྱུང་བ་གང་ཡིན་པའོ། །ཀུན་དགའ་བོ་གང་ལ་ཚོར་བ་མེད་ཅིང་ཞེས་རྒྱས་པར་འབྱུང་བ་དེས་འདི་སྐད་བསྟན་ཏེ། ཚོར་བ་ཡོད་ན་སྲེད་པ་འབྱུང་ངོ༌། །སྲེད་པ་ཡོད་ན་བདག་གོ་སྙམ་བྱེད་དོ་ཞེས་བྱ་བ་ཡིན་ནོ། །དེ་དག་ལ་དགོངས་ནས་བཅོམ་ལྡན་འདས་ཀྱིས་ཞེས་བྱ་བ་ནི་ཀུན་དུ་བརྟགས་པའི་བདག་ཏུ་ལྟ་བ་དེ་དག་ལ་དགོངས་ནས་བཅོམ་ལྡན་འདས་ཀྱིས་གསུངས་སོ་ཞེས་སའི་འོག་གི་མདོ་སྡེ་ལས་འབྱུང་ངོ༌། །མ་རིག་པའི་འདུས་ཏེ་རེག་པ་ལས་སྐྱེས་པའི་ཚོར་བ་ལ་བརྟེན་ནས་ཞེས་རྒྱས་པར་འབྱུང་བ་ལ། མ་རིག་པ་དང་མཚུངས་པར་ལྡན་པའི་རེག་པ་ནི་མ་རིག་པའི་འདུས་ཏེ་རེག་པའོ། །མ་རིག་པའི་འདུས་ཏེ་རེག་པ་ལས་སྐྱེས་པའོ། །མ་རིག་པའི་འདུས་ཏེ་རེག་པ་ལས་སྐྱེས་པའི་ཚོར་བ་ལ་བརྟེན་ནས་སྲེད་པ་སྐྱེའོ། །སྲེད་པ་
དེ་ལས་འདུ་བྱེད་དེ་དག་གོ་ཞེས་བྱ་བ་ནི་ཀུན་དུ་བརྟགས་པའི་བདག་ཏུ་ལྟ་བ་ནི་རྣམ་པ་ཡིན་པར་ས་འོག་གི་མདོ་སྡེ་ལས་གསུངས་པ་གང་ཡིན་པ་ཡིན་གྱི་རྟེན་ཅིང་འབྲེལ་བར་འབྱུང་བའི་མདོ་སྡེ་ལས་བདེ་བ་ལ་སོགས་པ་བསྟན་པ་ནི་མ་ཡིན་ནོ། །འདིས་ནི་ཚོར་བའི་སྒོ་ཁོ་ན་ནས་བདག་ཏུ་ལྟ་བའི་སྲེད་པ་འབྱུང་ངོ་ཞེས་བསྟན་པའི་ཕྱིར་བྱེད་པ་གཞན་བསྟན་པ་ཡིན་ནོ། །དེ་ཡང་འདི་ནི་བདག་ཏུ་སྨྲ་བ་ཞེས་རྒྱས་པར་འབྱུང་བ་ལ། དེ་ཡང་ཀུན་དུ་བརྟགས་པའི་བདག་ཏུ་ལྟ་བ་དེ་ནི་རྟེན་ཅིང་འབྲེལ་བར་འབྱུང་བའི་མདོ་སྡེ་འདི་ལས་བདག་ཏུ་སྨྲ་བ་ཉེ་བར་ལེན་པ་ཡིན་པར་གཞག་གོ །དེ་ལྟ་མ་ཡིན་ཏེ། མ་རིག་པའི་འདུས་ཏེ་རེག་པ་ལས་སྐྱེས་པའི་ཞེས་རྒྱས་པར་འབྱུང་བའི་གོ་རིམས་འདི་གལ་ཏེ་མི་འདོད་ན། བདག་ཏུ་སྨྲ་བ་ཉེ་བར་ལེན་པ་ཇི་ལྟར་སྲེད་པའི་རྐྱེན་གྱིས་འགྲུབ་པར་འགྱུར། འོ་ན་གལ་ཏེ་ཚོར་བ་གསུམ་གྱི་རྐྱེན་གྱིས་སྲེད་པ་ཡིན་ན་ཞེས་རྒྱས་པར་འབྱུང་བ་ནི་འོ་ན་ཇི་སྐད་དུ་བསྟན་པའི་རིམ་པས་ཚོར་བ་གསུམ་གྱི་རྐྱེན་གྱིས་སྲེད་པ་ཡིན་ན། ཅིའི་ཕྱིར་བདེ་བའི་ཚོར་བ་ལ་འདོད་ཆགས་ཕྲ་རྒྱས་སུ་འགྱུར་བར་བཤད་ལ་སྡུག་བསྔལ་དང་སྡུག་བསྔལ་ཡང་མ་ཡིན་བདེ་བ་ཡང་མ་ཡིན་ཞེ་ན། སྲེད་པའི་རྐྱེན་རྣམ་པ་གསུམ་ཆར་ཡིན་དུ་ཟིན་ཀྱང་བདེ་བའི་ཚོར་བ་ལ་འདོད་ཆགས་ཕྲ་རྒྱས་སུ་འགྱུར་བར་བསྟན་པ་ནི་རང་གི་རྒྱུད་ཀྱི་དབང་དུ་བྱས་ནས་དེ་ལ་དམིགས་པ་གང་དེ་དང་མཚུངས་པར་ལྡན་པ་ཡིན་པའི་ཕྱིར་ཏེ། དེ་ལ་དམིགས་པའི་ཕྱིར་དང༌། དེ་དང་མཚུངས་པར་ལྡན་པ་ཡིན་པའི་ཕྱིར་རོ། །རང་གི་རྒྱུད་ཀྱི་བདེ་བའི་ཚོར་བའི་དབང་དུ་བྱས་ནས་ཞེས་བྱ་བ་འདིས་ནི་སྡུག་བསྔལ་ཡང་དམིགས་པ་ཡིན་དུ་ཟིན་ཀྱང་ཕྲ་རྒྱས་སུ་འགྱུར་བ་མ་ཡིན་གཞན་གྱི་རྒྱུད་ཀྱི་ནི་ཚིག་གི་གོ་སྐབས་ཡོད་པ་མ་ཡིན་ནོ། །ཚིག་སྦྱར་བ་ནི་བདེ་བའི་རྒྱུ་ཚོར་བ་དེ་འདོད་ཆགས་འདིའི་དམིགས་པ་ཡིན་པས་འདི་ནི་དེའི་དམིགས་པ་ཡིན་ནོ། །དེ་དང་རབ་ཏུ་སྦྱོར་བས་ན་དེ་དང་མཚུངས་པར་ལྡན་པ་ཡིན་ནོ། །དེའི་དམིགས་པ་ཡང་འདི་ཡིན། མཚུངས་པར་ལྡན་པ་ཡང་འདི་ཡིན་པས་དེའི་དམིགས་པ་དང་མཚུངས་པར་ལྡན་པ་དེའི་དངོས་པོ་ཞེས་སྦྱར་རོ། །ངེས་པར་འབྱུང་བ་ལ་བརྟེན་པའི་ཡིད་བདེ་བ་ལ་སོགས་པ་ཡང་མེད་པར་ཐལ་བར་འགྱུར་རོ་ཞེས་
བྱ་བ་ལ་ངེས་པར་འབྱུང་བ་ལ་བརྟེན་པ་ཡིད་བདེ་བ་དྲུག་དང་ཡིད་མི་བདེ་བ་དྲུག་དང༌། བཏང་སྙོམས་དྲུག་མེད་པར་ཐལ་བར་འགྱུར་ཏེ། སྲིད་པའི་གཉེན་པོར་གྱུར་བ་ནི་ངེས་པར་འབྱུང་བ་ལ་བརྟེན་པ་ཡིན་པས་སོ། །ངེས་པར་འབྱུང་བ་ཡང་འདོད་ཆགས་དང་བྲལ་བ་ལ་བྱའོ། །འདིའི་ས་བོན་ཉིད་གནས་ནས་བཏོན་པའམ་ཞེས་བྱ་བ་ནི་དེའི་གཉེན་པོར་གྱུར་པ་འཇིག་རྟེན་ལས་འདས་པའི་ལམ་གྱིས་སོ། །མནན་པ་ཡིན་ཏེ་ཞེས་བྱ་བ་ནི་འཇིག་རྟེན་པའི་ལམ་གྱིས་སོ། །གཞན་ལས་བཅོམ་ལྡན་འདས་ཀྱིས་བྱེ་བྲག་ཏུ་བྱས་པ་ཡོད་དེ། མ་རིག་པའི་འདུས་ཏེ་རེག་པ་ལས་སྐྱེས་པའི་ཚོར་བའི་རྐྱེན་གྱིས་སྲེད་པ་སྐྱེས་སོ་ཞེས་བྱ་བ་དང་དེ་བཞིན་དུ་བདེ་བའི་ཚོར་བ་མྱོང་བ་ན་ཚོར་བ་རྣམས་མ་ཤེས་པས་ཞེས་རྒྱས་པར་འབྱུང་བ་ནི་དགྲ་བཅོམ་པའི་ཚོར་བ་ནི་མ་རིག་པའི་འདུས་ཏེ་རེག་པ་ལས་སྐྱེས་པ་ཡང་མ་ཡིན། ཡོངས་སུ་མ་ཤེས་པ་ཡང་མ་ཡིན། སྲེད་པའི་རྐྱེན་ཡང་མ་ཡིན་ནོ། །འོ་ན་འདིར་ཡང་དེ་བཞིན་དུ་ཞེས་རྒྱས་པར་འབྱུང་བ་ནི་འོ་ན་རྟེན་ཅིང་འབྲེལ་བར་འབྱུང་བའི་མདོ་སྡེ་འདིར་ཡང་མ་རིག་པའི་འདུས་ཏེ་རེག་པ་ལས་སྐྱེས་པའི་ཚོར་བའི་རྐྱེན་གྱིས་སྲེད་པ་ཞེས་དེ་བཞིན་དུ་ཅིའི་ཕྱིར་བྱེ་བྲག་ཏུ་མ་བྱས་ཤེ་ན་ཞེས་བྱ་བ་ཡིན་ནོ། །མ་རིག་པ་ནི་འདུ་བྱེད་ཀྱི་ཞེས་རྒྱས་པར་འབྱུང་བ་ནི་མ་རིག་པ་ནི་བསོད་ནམས་ལ་སོགས་པ་འདུ་བྱེད་རྣམས་ཀྱི་སྤྱིའི་རྐྱེན་ཉིད་ཡིན་ཏེ། འདུ་བྱེད་ཀྱི་ཡན་ལག་རྣམ་པར་འབྱེད་པ་ལས་འདིའི་དོན་བསྟན་ཟིན་པའི་ཕྱིར་རོ་ཞེས་བྱ་བ་ནི་མ་རིག་པ་ནི་སྲེད་པའི་རྐྱེན་ཡིན་ནོ་ཞེས་བྱ་བ་འདིའི་དོན་བསྟན་ཟིན་པའི་ཕྱིར་རོ་ཞེས་བྱ་བའི་ཐ་ཚིག་གོ །འདུ་བྱེད་ཀྱི་ཡན་ལག་རྣམ་པར་འབྱེད་པ་ལས་ཀྱང་བསྟན་པ་ཇི་ལྟར་མ་རིག་པའི་འདུ་བྱེད་རྣམས་ཀྱི་གཙོ་བོའི་རྐྱེན་ཡིན་ཞེ་ན། ཇི་ལྟར་ཉོན་མོངས་པ་ཐམས་ཅད་ཀུན་ནས་ལྡང་བའི་རྐྱེན་མ་རིག་པ་དེ་བཞིན་དུ་དེ་དང་མཚུངས་པར་ལྡན་པ་སེམས་པ་རྣམས་ཀྱི་ཡང་ཡིན་ནོ་ཞེས་བྱ་བ་འདིའི་དོན་ཀྱང་བསྟན་ཟིན་པའི་ཕྱིར་སྲེད་པ་རྣམ་པར་འབྱེད་པ་འདི་ལས་བསྟན་པར་བྱ་ཅི་དགོས། མ་རིག་པ་ནི་སྲེད་པའི་སྤྱིའི་རྐྱེན་ཡིན་པར་དགོངས་ནས་ཞེས་རྒྱས་པར་འབྱུང་བ་ནི་སྲེད་པའི་སྤྱིའི་རྐྱེན་མ་རིག་པ་ཡིན་པར་དགོངས་ནས་གསུངས་སོ། །དགེ་སློང་དག་མ་རིག་པ་ནི་སྲེད་པའི་རྒྱུ་ཡིན་ནོ་ཞེས་རྒྱས་པར་བསྟན་པས་ལྡན་པ་
དང་མི་འབྲལ་བ་ལ་སོགས་པར་སྲེད་པའི་ཐུན་མོང་གི་རྒྱུ་ཡིན་པའི་ཕྱིར་རོ། །རེག་པ་ཡང་དེ་བཞིན་ཏེ། སྲེད་པའི་སྤྱིའི་རྐྱེན་ཡིན་པར་དགོངས་ནས་སྲེད་པའི་ཚོགས་དྲུག་ནི་ཞེས་རྒྱས་པར་བསྟན་པས་དེ་དག་གི་ཐུན་མོང་གི་རྒྱུ་ཡིན་པའི་ཕྱིར་དང་སེམས་ལས་བྱུང་བ་ཐམས་ཅད་ཀྱི་སྤྱིའི་རྐྱེན་ཡིན་པའི་ཕྱིར་རོ། །ཚོར་བ་ནི་ཁྱད་པར་དུ་རྐྱེན་ཡིན་པར་དགོངས་ནས་ཚོར་བའི་རྐྱེན་གྱིས་སྲེད་པ་ཞེས་གསུངས་སོ། །ཁྱད་པར་དུ་རྐྱེན་ཡིན་པར་ཇི་ལྟར་ཤེས་ཤེ་ན། ཁམས་གསུམ་ཆར་ན་ཡང་ཀུན་དུ་རྨོངས་པའི་ཚོར་བ་ཞེས་རྒྱས་པར་འབྱུང་བ་ཡིན་ཏེ། ཁམས་གསུམ་ཆར་ན་ཡང་ཀུན་དུ་རྨོངས་པ་ནི་ཁམས་གསུམ་པའི་སྡུག་བསྔལ་ལ་སོགས་པའི་བདེན་པ་ཡོངས་སུ་མི་ཤེས་པའི་ཕྱིར་རོ། །འདོད་པའི་ཁམས་དང་བསམ་གཏན་དང་པོ་ལ་སོགས་པའི་ས་པའི་ཚོར་བ་ས་པ་གང་ཡིན་པས་ནི་ས་པའི་སྲེད་པ་ཀུན་དུ་འབྱུང་བར་བྱེད་པའི་ཕྱིར་རོ། །ས་གཅིག་ན་ཡང་མ་རིག་པ་འདྲ་བ་ལས་ཞེས་རྒྱས་པར་འབྱུང་བ་ནི། ས་གཅིག་ན་ཡང་མ་རིག་པ་འདྲ་བ་ལ་དེའི་ཚོར་བ་བདེ་བ་དང༌། སྡུག་བསྔལ་དང་སྡུག་བསྔལ་ཡང་མ་ཡིན། བདེ་བ་ཡང་མ་ཡིན་པའི་བྱེ་བྲག་ལས་ཚོར་བ་དེ་དག་རེ་རེ་ལ་ཡང་ཆེ་ཆུང་གི་བྱེ་བྲག་ཆུང་ངུ་དང༌། བར་མ་དང༌། ཆེན་པོའི་བྱེ་བྲག་གིས་སྲེད་པའི་བྱེ་བྲག་ཀུན་དུ་འབྱུང་བའི་ཕྱིར་ཏེ། ལྡན་པ་དང་མི་འབྲལ་བ་ལ་སོགས་པར་སྲེད་པའི་བྱེ་བྲག་ཀུན་དུ་འབྱུང་བའི་ཕྱིར་དང༌། ཆུང་ངུ་དང༌། བར་མ་དང༌། ཆེན་པོའི་སྲེད་པའི་བྱེ་བྲག་ཀུན་དུ་འབྱུང་བའི་ཕྱིར་ཚོར་བའི་བྱེ་བྲག་གི་རྐྱེན་གྱིས་ཞེས་བྱ་བ། སྲེད་པ་ཀུན་དུ་འབྱུང་བར་བྱ་བའི་ཕྱིར་བདེ་བ་མྱོང་བར་འགྱུར་བ་ལ་སོགས་པའི་རེག་པའི་ཚོར་བའི་བྱེ་བྲག་ལ་ལྟོས་པའི་ཕྱིར་རོ་ཞེས་བྱ་བ་ཅི་ཞེ་ན། ཚོར་བའི་བྱེ་བྲག་རྐྱེན་ཡིན་ཞེས་བྱའོ། །ཇི་ལྟ་ཞེ་ན། བདེ་བ་མྱོང་བར་འགྱུར་བའི་རེག་པ་དང༌། བདེ་བའི་ཚོར་བ་དང་མཚུངས་པར་ལྡན་པ་ནི་དེ་དང་ལྡན་ཞིང་མི་འབྲལ་བར་སྲེད་པ་ཀུན་དུ་འབྱུང་བར་བྱ་བའི་ཕྱིར་བདེ་བའི་ཚོར་བ་ལ་ལྟོས་པ་ཡིན་ཏེ། དེ་སྐྱེ་བར་བྱ་བའི་ཕྱིར་དེའི་དམིགས་པ་དང་བདག་པོའི་རྐྱེན་ཡིན་པའི་ཕྱིར་རོ། །བདེ་བའི་ཚོར་བ་ལས་སྲེད་པ་སྐྱེ་བ་ནི་རེག་པ་ལ་ལྟོས་པ་མ་ཡིན་ཏེ། འདི་ལྟར་ཚོར་བ་
ལ་སྲེད་པ་ཡིན་གྱི། རེག་པ་ལ་ནི་མ་ཡིན་ནོ། །དེ་བཞིན་དུ་སྡུག་བསྔལ་མྱོང་བར་འགྱུར་བའི་རེག་པ་སྡུག་བསྔལ་གྱི་ཚོར་བ་དང་མཚུངས་པ་ལྡན་པ་ནི་དེ་དང་མི་ལྡན་ཞིང་འབྲལ་བར་སྲེད་པ་ཀུན་དུ་འབྱུང་བར་བྱ་བའི་ཕྱིར་དེ་ཉིད་ལ་ལྟོས་པ་ཡིན་ཏེ། དེ་འབྱུང་བར་བྱ་བའི་ཕྱིར་དེ་ནི་དེའི་དམིགས་པ་དང༌། བདག་པོའི་རྐྱེན་ཡིན་བའི་ཕྱིར་རོ། །དེ་བཞིན་དུ་སྡུག་བསྔལ་ཡང་མ་ཡིན་བདེ་བ་ཡང་མ་ཡིན་པ་མྱོང་བར་འགྱུར་བའི་རེག་པ་དེ་དང་མཚུངས་པར་ལྡན་པ་ནི་དེའི་གནས་སྐབས་ལ་མངོན་པར་དགའ་བའི་སྲེད་པ་ཀུན་དུ་འབྱུང་བར་བྱ་བའི་ཕྱིར་སྡུག་བསྔལ་ཡང་མ་ཡིན་བདེ་བ་ཡང་མ་ཡིན་པའི་ཚོར་བ་ལ་ལྟོས་པའམ། དེ་དང་ལྡན་ཞིང་མི་འབྲལ་བར་སྲེད་པ་ཀུན་དུ་འབྱུང་བར་བྱ་བའི་ཕྱིར་དེ་ནི་དེ་སྐྱེ་བའི་དམིགས་པ་དང༌། བདག་པོའི་རྐྱེན་ཡིན་པའི་ཕྱིར་རོ། །ཚོར་བའི་སྲེད་པའི་བྱེ་བྲག་ཀུན་དུ་འབྱུང་བར་བྱ་བའི་ཕྱིར་རེག་པ་ལ་ལྟོས་པ་མ་ཡིན་ཏེ། འདི་ལྟར་ཚོར་བ་ལ་སྲེད་པ་ཡིན་གྱི་རེག་པ་ལ་ནི་མ་ཡིན་པས་སོ། །འདིར་རྐྱེན་ངེས་པ་ཡིན་ན་ནི་ཇི་སྐད་དུ་བསྟན་པའི་སྐྱོན་ཡིན་པར་ཐལ་བར་འགྱུར་རོ་ཞེས་བྱ་བ་ནི་དགེ་སློང་དག་མ་རིག་པ་ནི་སྲེད་པའི་རྒྱུ་ཡིན་ནོ་ཞེས་རྒྱས་པར་འབྱུང་བ་དང༌། སྲེད་པའི་ཚོགས་དྲུག་ནི་མིག་གི་འདུས་ཏེ་རེག་པ་ལས་སྐྱེས་པའི་སྲེད་པའོ་ཞེས་ཇི་སྐད་དུ་རྒྱས་པར་བསྟན་པ་དང༌། དེ་བཞིན་དུ་ཚོར་བའི་ཕུང་པོ་གང་ཡིན་པ་ཞེས་རྒྱས་པར་བསྟན་པའོ། །རྐྱེན་ངེས་པ་ཡིན་ན་མ་རིག་པ་དང་རེག་པ་དག་སྲེད་པའི་རྐྱེན་ཡིན་པར་མི་འགྱུར་ཏེ། དེ་ལྟར་ན་ཇི་སྐད་དུ་བསྟན་པ་རྣམས་རྐྱེན་ཡིན་པར་ཐལ་བར་འགྱུར་བ་ཡིན་ནོ། །སྡུག་བསྔལ་ཀྱི་ཚོར་བ་ལ་ཁོང་ཁྲོང་བ་ཕྲ་རྒྱས་སུ་འགྱུར་རོ་ཞེས་བྱ་བ་ནི་རྐྱེན་ཅན་ངེས་པ་ཡིན་ན་སྡུག་བསྔལ་གྱི་ཚོར་བ་ཁོང་ཁྲོ་བའི་དམིགས་པའི་རྐྱེན་ཡིན་པར་མི་འགྱུར་རོ་ཞེས་བྱ་བ་ཡིན་ནོ། །བདེ་བ་དང་ལྡན་ན་སེམས་མཉམ་པར་འཇོག་གོ་ཞེས་བྱ་བ་ནི་བདེ་བའི་ཚོར་བ་ནི་ཏིང་ངེ་འཛིན་གྱི་བདག་པོའི་རྐྱེན་ཡིན་པར་མི་འགྱུར་རོ་ཞེས་བྱ་བ་ཡིན་ནོ། །བདེ་བ་དང་ལྡན་ན་ཆོས་མངོན་པར་བརྗོད་དོ་ཞེས་བྱ་བ་ལ་ཆོས་ནི་ཐོས་པ་ལ་སོགས་པའོ། །མངོན་པར་བརྗོད་པ་ནི་མངོན་སུམ་དུ་བྱེད་པའོ། །བདེ་བའི་ཚོར་བ་ནི་ཆོས་དེ་དག་མངོན་སུམ་དུ་བྱེད་པའི་རྐྱེན་དུ་མི་འགྱུར་བས་མདོ་སྡེ་དང་འགལ་བ་ཡིན་ཏེ། དེ་ལྟ་བུ་གཞན་དག་ཀྱང་བརྗོད་པར་བྱའོ། །དེ་
བཞིན་དུ་བཤད་པའི་ཕྱིར་ཏེ་ཞེས་བྱ་བ་ནི་ཚོར་བའི་རྐྱེན་གྱིས་སྲེད་པ་ཞེས་བྱ་བ་ཡིན་ནོ། །སྔ་མ་བཞིན་ནོ་ཞེས་བྱ་བ་ཇི་ལྟ་བུ་ཞེ་ན། ཚོར་བ་ཆེ་ཆུང་གི་བྱེ་བྲག་གིས་སྲེད་པའི་བྱེ་བྲག་ཀུན་དུ་འབྱུང་བའི་ཕྱིར་ཞེས་བྱ་བ་ཡིན་ཏེ། དེ་ལྟར་ན་སྲེད་པའི་བྱེ་བྲག་གི་རྐྱེན་ཤེས་པར་བྱ་བའི་ཕྱིར་རོ། ཚོར་བ་ནི་གཙོ་བོའི་རྐྱེན་ཡིན་ཏེ། དེ་བས་ན་བཤད་པ་དོན་མེད་པ་མ་ཡིན་ནོ། །ཇི་ལྟར་ན་གཙོ་བོའི་རྐྱེན་ཡིན་ཞེ་ན་འདི་ལྟར་བདེ་བ་ལ་སོགས་པའི་ཚོར་བ་དང་ལྡན་པ་ལ་སོགས་པའི་སྒོ་ནས་སྲེད་པ་ཀུན་དུ་འབྱུང་བའི་ཕྱིར་ཏེ། བདེ་བའི་ཚོར་བ་དང་ལྡན་ཞིང་མི་འབྲལ་བའི་སྒོ་ནས་སྲེད་པ་ཀུན་དུ་འབྱུང་བ་དང༌། སྡུག་བསྔལ་གྱི་ཚོར་བ་དང་མི་ལྡན་ཞིང་འབྲལ་བའི་སྒོ་ནས་དང༌། སྡུག་བསྔལ་ཡང་མ་ཡིན། བདེ་བ་ཡང་མ་ཡིན་པའི་གནས་སྐབས་ཀྱི་སྒོ་ནས་མངོན་པར་དགའ་བའི་སྲེད་པ་ཀུན་དུ་འབྱུང་བའམ། དེ་དང་ལྡན་ཞིང་མི་འབྲལ་བའི་སྒོ་ནས་ཀྱང་ཡིན་ནོ། །སྲེད་པའི་བསྡུས་པའི་དོན་རྣམ་པར་གཞག་པ་དེ་ནི་རྣམ་པ་བདུན་དུ་བསྟན་ཏེ། རབ་ཏུ་དབྱེ་བ་རྣམ་པར་གཞག་པ་ནི་ཇི་སྐད་དུ། སྲེད་པ་གསུམ་སྟེ་ཞེས་རྒྱས་པར་བསྟན་པ་ཡིན་ནོ། །མཚན་ཉིད་རྣམ་པར་གཞག་པ་ཇི་སྐད་དུ། ཉོན་མོངས་པ་ཅན་ཚོལ་བ་དང༌། ཆགས་པ་དང༌། ཞེན་པ་གང་ཡིན་པ་ཞེས་བསྟན་པའོ། །རབ་ཏུ་དབྱེ་བའི་རྐྱེན་རྣམ་པར་གཞག་པ་ནི་ཇི་སྐད་དུ། བདེ་བའི་ཚོར་བ་ནི་དེ་དང་ལྡན་ཞིང་མི་འབྲལ་བར་སྲེད་པའི་རྐྱེན་ཡིན་ནོ་ཞེས་བྱ་བ་ལ་སོགས་པ་བསྟན་པའོ། །དབྱེ་བ་མེད་པའི་རྐྱེན་རྣམ་པར་གཞག་པ་ནི་ཇི་སྐད་དུ་གཞན་ཡང་ཚོར་བ་གསུམ་དང་སྤྱི་དྲིལ་དུ་ཕུང་པོ་རྒྱུན་ལ་བྱེ་བྲག་མེད་པར་ཞེས་རྒྱས་པར་བསྟན་པའོ། །རྐྱེན་གཞན་གྱི་དགོངས་པ་རྣམ་པར་གཞག་པ་ནི་ཇི་སྐད་དུ། དགོངས་པ་ཐ་དད་པའི་ཕྱིར་རོ། །མ་རིག་པ་ནི་སྲེད་པའི་སྤྱིའི་རྐྱེན་ཡིན་པར་དགོངས་ནས་གསུངས་སོ། །རེག་པ་ཡང་དེ་བཞིན་ནོ་ཞེས་བསྟན་པའོ། །ཁྱད་པར་གྱི་རྐྱེན་རྣམ་པར་གཞག་པ་ནི་ཇི་སྐད་དུ། སྲིད་པའི་རྐྱེན་གྱི་བྱེ་བྲག་བསྟན་པའི་ཕྱིར་དང་དེ་བཞིན་དུ་བཤད་པའི་ཕྱིར་ཏེ། སྔ་མ་བཞིན་ནོ་ཞེས་བསྟན་པའོ། །གཙོ་བོའི་རྐྱེན་རྣམ་པར་གཞག་པ་ནི་ཇི་སྐད་དུ། ཚོར་བའི་གཙོ་བོའི་རྐྱེན་ཡིན་ཏེ། འདི་ལྟར་བདེ་བ་ལ་སོགས་པའི་ཚོར་བ་དང་ལྡན་པ་ལ་སོགས་པའི་སྒོ་ནས་སྲེད་པ་ཀུན་དུ་འབྱུང་བའི་ཕྱིར་རོ་ཞེས་བསྟན་པ་གང་ཡིན་པའོ། །སྲེད་པ་རྣམ་པར་དབྱེ་
པའོ། །ལེན་པ་གང་ཡིན་ཞེ་ན་ཞེས་བྱ་བ་ནི་སྲེད་པའི་རྐྱེན་གྱིས་ལེན་པ་ཞེས་གསུངས་པ་དེ་ཡང་འདོད་པ་དང༌། ལྟ་བ་དང༌། ཚུལ་ཁྲིམས་དང་བརྟུལ་ཞུགས་དང༌། བདག་ཏུ་སྨྲ་བ་ཐ་དད་པས་རྣམ་པ་བཞི་ཡིན་ནོ། །འཇིག་རྟེན་ན་ཡང་ཡོངས་སུ་གཟུང་བར་བྱ་བའི་དངོས་པོ་གང་བླང་བར་བྱ་བ་དེ་ལེན་པ་ཡིན་པར་གྲགས་པ་ནི་འདིར་སྲེད་པའི་རྐྱེན་གྱིས་ལེན་པར་དགོངས་པ་གང་ཞེ་ན། དེའི་ཕྱིར། ལེན་པ་རྣམ་པ་བཞི་སྟེ་ཞེས་གསུངས་སོ། །རྒྱས་པའི་ཚིག་གིས་ནི་མདོ་སྡེ་ལས། འདོད་པ་ཉེ་བར་ལེན་པ་དང༌། ལྟ་བ་ཉེ་བར་ལེན་པ་དང༌། ཚུལ་ཁྲིམས་དང་བརྟུལ་ཞུགས་ཉེ་བར་ལེན་པ་དང་བདག་ཏུ་སྨྲ་བ་ཉེ་བར་ལེན་པའོ་ཞེས་ཇི་ལྟར་མདོ་སྡེ་ལས་འབྱུང་བ་ཉེ་བར་བསྟན་པའི་ཕྱིར་རོ། །ཅི་གཟུགས་ལས་མཐོང་བ་བཞིན་དུ་རིག་པར་བྱ་འམ་ཞེས་བྱ་བ་ནི་ཇི་ལྟར་གཟུགས་ལ་མཐོང་བ་ནི་གཟུགས་མཐོང་བ་ཞེས་བྱ་བ་དེ་བཞིན་དུ་འདོད་པ་རྣམས་ལ་ཉེ་བར་ལེན་པ་ནི་འདོད་པ་ཉེ་བར་ལེན་པ་ཞེས་བྱ་བ་ནས་བདག་ཏུ་སྨྲ་བ་ལ་ཉེ་བར་ལེན་པ་ནི་བདག་ཏུ་སྨྲ་བ་ཉེ་བར་ལེན་པ་ཞེས་བྱ་བ་ཡིན་ནམ། འོན་ཏེ་གཟུགས་ཀྱི་སྐྱེ་མཆེད་བཞིན་དུ་ཡིན་ཞེས་བྱ་བ་ནི་ཇི་ལྟར་གཟུགས་ཉིད་སྐྱེ་མཆེད་ཡིན་པས་གཟུགས་ཀྱི་སྐྱེ་མཆེད་ཅེས་བྱ་བ་དེ་བཞིན་དུ་འདོད་པ་ཉིད་ཉེ་བར་ལེན་པ་ཡིན་པས་འདོད་པ་ཉེ་བར་ལེན་པ་ཞེས་བྱ་བ་ནས་བདག་ཏུ་སྨྲ་བ་ཉིད་ཉེ་བར་ལེན་པ་ཡིན་པས་བདག་ཏུ་སྨྲ་བ་ཉེ་བར་ལེན་པ་ཞེས་བྱ་བ་ཡིན། འདོད་པ་ལ་སོགས་པ་ལ་ཞེས་བྱ་བ་ནི་འདོད་པ་དང༌། ལྟ་བ་དང༌། ཚུལ་ཁྲིམས་དང་བརྟུལ་ཞུགས་དང༌། བདག་ཏུ་སྨྲ་བ་རྣམས་ལ་ཉེ་བར་ལེན་པས་ཉེ་བར་ལེན་པ་ཞེས་བྱ་སྟེ། ཉེ་བར་བླང་བ་ཐ་དད་པའི་སྒོ་ནས་ཉེ་བར་ལེན་པའི་རབ་ཏུ་དབྱེ་བ་ཁོ་ན་བསྟན་པ་ཡིན་གྱི། ངོ་བོ་ཉིད་ནི་མ་ཡིན་ནོ་ཞེས་བྱ་བ་ཅི་ཞེ་ན། འདུན་པ་དང་འདོད་ཆགས་ཀྱི་ངོ་བོ་ཉིད་ཡིན་ནམ། འོན་ཏེ་གཞན་གྱི་ངོ་བོ་ཉིད་ཡིན་ཞེས་བྱ་བ་ཡིན་ནོ། །དེ་ལ་འདོད་པ་ལ་སོགས་པ་ཞེས་བྱ་བ་འདོད་པ་དང༌། ལྟ་བ་དང༌། ཚུལ་ཁྲིམས་དང་བརྟུལ་ཞུགས་དང༌། བདག་ཏུ་སྨྲ་བ་ཡང་གང་ཡིན་ཞེས་བྱ་བ་ཡིན་ནོ། །དེ་དག་གི་ཉེ་བར་ལེན་པ་ཡང་འདུན་པ་དང་འདོད་ཆགས་སམ་གཞན་འགའ། གང་ཞིག་ཡིན་པར་བསྟན་པར་བྱ། །ཞེས་བྱ་བ་ཡིན་ནོ། །འདོད་པ་ལ་སོགས་པ་ཉིད་ཉེ་བར་ལེན་པ་ཡིན་པས་ཞེས་བྱ་བ་ནི་
འདོད་པ་ཉིད་ཉེ་བར་ལེན་པ་ཡིན་པས་འདོད་པ་ཉེ་བར་ལེན་པ་ཞེས་བྱ་བ་ནས་བདག་ཏུ་སྨྲ་བ་ཉིད་ཉེ་བར་ལེན་པ་ཡིན་པས་བདག་ཏུ་སྨྲ་བ་ཉེ་བར་ལེན་པ་ཞེས་བྱ་བས་སོ། །ཉེ་བར་ལེན་པའི་རང་གི་ངོ་བོ་དང༌། རབ་ཏུ་དབྱེ་བ་ཡང་བསྟན་པ་བྱས་པ་ཡིན་ན་ཞེས་བྱ་བ་ནི། དེ་ལ་རང་གི་ངོ་བོ་ནི་འདོད་པ་ནས་བདག་ཏུ་སྨྲ་བའི་བར་དུ་ཡིན་ནོ། །རབ་ཏུ་དབྱེ་བ་ནི། འདོད་པ་ཉེ་བར་ལེན་པ་ནས་བདག་ཏུ་སྨྲ་བ་ཉེ་བར་ལེན་པའི་བར་དུ་ཡིན་ནོ། །འདོད་པ་ལ་སོགས་པ་ཡང་གང་ཞིག་ཡིན་ཞེས་བྱ་བ་ནི་འདོད་པ་གང་ཡིན། བདག་ཏུ་སྨྲ་བའི་བར་དུ་གང་ཡིན་ཞེས་བྱ་བ་ཡིན་ནོ། །ཉེ་བར་ལེན་པ་ཡིན་པར་ཇི་ལྟར་བསྟན་པར་བྱ་ཞེས་བྱ་བ་ནི་འདོད་པ་ལ་སོགས་པ་དེ་དག་ཇི་ལྟར་ཉེ་བར་ལེན་པ་ཡིན། ཅི་ཉེ་བར་བླང་བར་བྱ་བ་ཡིན་པས་ཉེ་བར་ལེན་པ་ཡིན་ནམ། འོན་ཏེ་ཡང་སྲིད་པ་ལེན་པར་བྱེད་པས་ཉེ་བར་ལེན་པ་ཞེས་བྱ་ཞེ་ན། གཟུགས་ལ་མཐོང་བ་བཞིན་ནོ་ཞེས་ཚིག་སྦྱར་བ་འདི་བྱའོ་ཞེས་བྱ་བ་ནི་ཇི་ལྟར་གཟུགས་ལ་མཐོང་བ་ལ་གཟུགས་མཐོང་བ་ཞེས་བྱ་བ་དེ་བཞིན་དུ་འདོད་པ་རྣམས་ལ་ཉེ་བར་ལེན་པ་ནི་འདོད་པ་ཉེ་བར་ལེན་པ་ཞེས་བྱ་བ་ནས་བདག་ཏུ་སྨྲ་བ་ལ་ཉེ་བར་ལེན་པ་ནི་བདག་ཏུ་སྨྲ་བ་ཉེ་བར་ལེན་པ་ཡིན་ནོ་ཞེས་བྱ་བའི་བར་དུ་ཡིན་ནོ། །དེ་ལྟར་ན་རབ་ཏུ་དབྱེ་བ་ཁོ་ན་བསྟན་པ་ཡིན་གྱི། ངོ་བོ་ཉིད་མ་ཡིན་ནོ་ཞེས་སྨྲས་པ་གང་ཡིན་པ་དེའི་ལན་དུ་རབ་ཏུ་དབྱེ་བ་ཁོ་ནས་ཀྱང་ཁ་ཅིག་གིས་རང་གི་ངོ་བོ་རྟོགས་པར་འགྱུར་རོ་ཞེས་སྔར་བསྟན་ཟིན་ཏོ་ཞེས་སྨྲས་སོ། །ཇི་ལྟ་ཞེ་ན། འཕྲལ་དུ་ཉེ་བར་གནས་པའི་གདུལ་བྱའི་བྱེ་བྲག་ལ་ལྟོས་ནས་འདི་ལྟར་ཁ་ཅིག་ཏུ་ནི་རྣམ་པར་དབྱེ་བ་ཡང་མི་གསུང་ངོ་ཞེས་བྱ་བ་ཡིན་ནོ། །དེ་ལ་འདོད་པ་ལ་སོགས་པ་ཡང་གང་ཞེ་ན་ཞེས་གང་སྨྲས་པ་དེ་ལ་འདོད་པ་ལ་སོགས་པ་གང་སྟོན་པ་ནི། དེ་ལ་འདོད་པ་ནི་འདོད་པའི་ཡོན་ཏན་ལྔ་ཡིན་པར་འདིར་དགོངས་པའོ་ཞེས་བྱ་བ་ཡིན་ཏེ། གཟུགས་དང་སྒྲ་དང་དྲི་དང་རོ་དང་རེག་བྱ་རྣམས་ནི་ཀུན་དུ་རྟོག་པའི་འདོད་ཆགས་ཀྱི་མཚན་ཉིད་ཀྱི་འདོད་པས་བསྟེན་པར་བྱ་ཞིང་རྣམ་པར་བརྟག་པར་བྱ་བ་ཡིན་པས་འདོད་པའི་ཡོན་ཏན་ནོ། །འདོད་པ་ཞེས་བྱ་བ་ནི་འདི་ལྟར་འདོད་པར་བྱ་བ་ཡིན་པས་སོ། །ལྟ་བའི་ཚིག་སྦྱར་བ་ནི་ཞེས་རྒྱས་པར་འབྱུང་བ་ལ་ཡོད་པར་ལྟ་བ་ནི་རྟག་པར་ལྟ་བའོ། །རྣམ་པར་འཇིག་པར་ལྟ་བ་ནི་ཆད་པར་ལྟ་བའོ། །
དེའི་སྒོ་ནས་ལྟ་བ་གཞན་དུ་སོང་བ་ནི་ཞེས་རྒྱས་པར་འབྱུང་བ་ལ། དེའི་སྒོ་ནས་ཞེས་བྱ་བ་ནི་ཡོད་པར་ལྟ་བ་དང་རྣམ་པར་འཇིག་པར་ལྟ་བའི་སྒོ་ནས་ལྟ་བ་གཞན་དུ་སོང་བ་ནི་ཚངས་པའི་དྲ་བའི་མདོ་ལས་ཇི་སྐད་དུ་གསུངས་པའོ། །དེ་དང་འབྲེལ་བའི་ཞེས་རྒྱས་པར་འབྱུང་བ་ནི་ཡོད་པར་ལྟ་བ་ལ་སོགས་པ་དང་འབྲེལ་པ་དང༌། དེ་དང་རྗེས་སུ་མཐུན་པ་དང༌། དེ་དང་རྗེས་སུ་ལྡན་པ་ཞེས་བྱ་བའི་དོན་ཏོ། །དེ་ལ་བྱ་བ་མ་ཡིན་པ་ལས་ལྡོག་པར་དམ་བཅས་པ་ནི་ཚུལ་ཁྲིམས་སོ་ཞེས་བྱ་བ་ནི་སྲོག་གཅོད་པ་ལ་སོགས་པ་བྱ་བ་མ་ཡིན་པ་ལས་སོ། །སྤྱོད་པ་དྲག་པོ་ལ་སོགས་པའི་ཞེས་བྱ་བ་ལ་སོགས་པའི་སྒྲས་ནི་སྐྱེས་བུ་མཐུན་པ་པ་དང༌། ཟླ་བ་ཅན་ལ་སོགས་པ་ལས་འབྱུང་བའོ། །བདག་ཏུ་སྨྲ་བ་སྟེ། དེའི་སྒོ་ནས་བདག་གོ་ཞེས་སྨྲ་བའི་ཕྱིར་ཞེས་བྱ་བ་ནི་བདག་ཏུ་ལྟ་བའི་སྒོ་ནས་སོ། །ཇི་ལྟར་དེའི་སྒོ་ནས་བདག་གོ་ཞེས་སྨྲ་ཞེ་ན། དེའི་ཕྱིར་བདག་ཏུ་ལྟ་བ་ཅན་ནི་བདག་ཏུ་སྨྲ་བར་འགྱུར་རོ་ཞེས་སྨྲས་ཏེ། དེ་ལྟར་འདུ་ཤེས་པ་ཡིན། དེ་ལྟར་ཐ་སྙད་དུ་བྱེད་པ་ཡིན་ཞེས་བྱའོ། །བདག་ཏུ་ལྟ་བ་ནི་གཞི་ཅན་མ་ཡིན་པའི་ཕྱིར་རོ་ཞེས་བྱ་བ་ནི་ཡུལ་མེད་པའི་ཕྱིར་ཞེས་བྱ་བའི་ཐ་ཚིག་སྟེ། བྱེད་པ་པོ་དང༌། ཟབ་པ་པོ་དང༌། རྟག་པ་དང༌། རང་དབང་ཅན་གྱི་མཚན་ཉིད་ཀྱི་བདག་ཡོད་པ་མ་ཡིན་ཡང་བྱིས་པ་ཐོས་པ་དང་མི་ལྡན་པ་སོ་སོའི་སྐྱེ་བོ་རྣམས་རྣམ་པ་དེ་དག་གི་སྒོ་ནས་བདག་ཏུ་རྟོག་པར་བྱེད་ཀྱི། ཉེ་བར་ལེན་པའི་ཕུང་པོ་ལྔ་ཡང་རྣམ་པ་དེ་ལྟ་བུ་མ་ཡིན་ལ་དེ་དག་ལས་གཞན་ན་ཡང་རྣམ་པ་དེ་ལྟ་བུ་ཡོད་པ་མ་ཡིན་པས་འཇིག་ཚོགས་ལ་ལྟ་བ་ནི་གཞི་ཅན་མ་ཡིན་པར་གྲུབ་པ་ཡིན་ནོ། །ཉེ་བར་ལེན་པའི་ཕུང་པོ་ལྔ་ལ་བདག་གོ་ཞེས་སྨྲ་བར་མངོན་པར་ཞེན་པ་འདིའི་ཚིག་ཐ་མ་མི་མངོན་པར་བྱས་ནས་བདག་ཏུ་སྨྲ་བ་སྟེ། བདག་ཏུ་སྨྲ་བར་ཞེན་པ་ཡིན་པར་བསྟན་ཏོ། །དཔེར་ན་ཚིག་ཕྱེད་སྨྲ་བར་བྱེད་པ་ལ་སོགས་པ་ལ་ཚིག་ཕྱེད་སྨྲ་བ་བཞིན་ནོ་ཞེས་བྱ་བ་ནི་ཚིགས་སྔ་མའི་ཐ་མ་མི་མངོན་པར་བྱས་ནས་སོ། །སྨྲ་བ་ཅིའི་ཕྱིར་སྨོས་ཤེ་ན་ཞེས་བྱ་བ་ནི་བདག་ཉེ་བར་ལེན་པ་ཞེས་བརྗོད་པར་བྱ་བ་ཡིན་པ་ལས་བདག་ཏུ་སྨྲ་བ་ཉེ་བར་ལེན་པ་ཞེས་བསྟན་པ་ཅིའི་ཕྱིར་ཞེ་ན་ཞེས་བྱའོ། །སྨྲ་བ་ཙམ་ལ་མངོན་པར་
ཞེན་པ་ཡིན་ནོ་ཞེས་བསྟན་པའི་ཕྱིར་རོ་ཞེས་བྱ་བ་ནི་འདི་ལྟར་གཏན་ལ་བབ་པ་ཡིན་ཏེ། ཇི་ལྟར་བདག་ཏུ་སྨྲ་བ་ཉེ་བར་ལེན་པར་བསྟན་ན་ནི་བདག་ཏུ་མངོན་པར་ཞེན་པ་ཡིན་པར་གྲགས་པར་འགྱུར་ཏེ། མེད་པ་ལ་བདག་ཏུ་སྨྲ་ཞིང་མངོན་པར་ཞེན་པ་ཡིན་པས་སོ། །དེ་བས་ན་སྨྲ་བ་ཙམ་ལ་མངོན་པར་ཞེན་པ་བསྟན་པའི་ཕྱིར་སྨྲ་བ་སྨོས་པ་ཡིན་ནོ། །བདག་ཡོད་པ་མ་ཡིན་ཡང་སྨྲ་བ་ཙམ་དེ་ལ་མངོན་པར་ཞེན་པ་ནི་དེ་ལ་མངོན་པར་ཞེན་པ་ཡིན་ནོ། །གཞན་དག་ན་རེ་འདི་ལ་བདག་གོ་ཞེས་སྨྲ་བས་བདག་ཏུ་སྨྲ་བ་ཡིན་ཏེ་ཞེས་བྱ་བ་ནི་གཞི་ལ་སྒྲུབ་པ་བྱུང་བ་ཡིན་ནོ། །དེ་ཡང་གང་ཞེ་ན། དེའི་ཕྱིར་ལུས་ཀྱི་དངོས་པོ་གང་ལ་ཞེས་སྨྲས་སོ། །ལུས་ཀྱི་དངོས་པོ་གང་ལ་ཞེ་ན། དེའི་ཕྱིར་གང་ལ་བདག་གོ་ཞེས་བཏགས་པའོ་ཞེས་སྨྲས་སོ། །གང་ལ་བདག་གོ་ཞེས་བཏགས་ཤེ་ན། ཉེ་བར་ལེན་པའི་ཕུང་པོ་ལྔ་ལ་སྟེ། ཇི་སྐད་དུ་བཅོམ་ལྡན་འདས་ཀྱིས་དགེ་སྦྱོང་དང་བྲམ་ཟེ་དག་ཇི་ཙམ་དུ་བདག་ཏུ་ཡང་དག་པར་མཐོང་ཞིང་ཡང་དག་ལྟ་བ་དེ་དག་ཐམས་ཅད་ནི་ཉེ་བར་ལེན་པའི་ཕུང་པོ་འདི་ཉིད་ལ་ཡིན་ནོ་ཞེས་གསུངས་པ་ཡིན་ནོ། །འོ་ན་དེ་ལྟ་ན་ཕུང་པོ་ཉིད་བདག་ཏུ་སྨྲ་བ་ཡིན་པར་འགྱུར་ན་ཞེས་བྱ་བ་ནི་དེ་དག་བདག་ཏུ་སྨྲ་བའི་གཞི་ཡིན་པའི་ཕྱིར་རོ། །གང་ཕུང་པོ་ལྔ་པོ་དེ་དག་ལ་བདག་ཏུ་སྨྲ་བར་མངོན་པར་ཞེན་པ་ཞེས་རྒྱས་པར་འབྱུང་བ་ནི་དེ་ལྟ་ན་མདོ་སྡེ་ལས་ཉེ་བར་ལེན་པའི་ཕུང་པོ་ལྔ་ལས་བདག་ཏུ་སྨྲ་བ་གཞན་ཡིན་པར་བསྟན་པ་ཡིན་གྱི་ཕུང་པོ་ཉིད་ནི་མ་ཡིན་ནོ། །གལ་ཏེ་བདག་ཏུ་སྨྲ་བའི་གཞི་ཡིན་པའི་ཕྱིར་ཕུང་པོ་ཉིད་བདག་ཏུ་སྨྲ་བ་ཡིན་ནོ་ཞེས་བྱ་བ་ཇི་ལྟར་རུང་བ་ཡིན་ཞེ་ན། དེར་ནི་ཚིག་སྦྱར་བ་གཞན་དུ་བྱ་ཞིང༌། འདིར་ཡང་གཞན་དུ་ཡིན་པས་ཞེས་བྱ་བ་ནི་མདོ་སྡེ་དེར་ནི་ཚིག་སྦྱར་བ་གཞན་དུ་བྱ་བ་ཡིན་ནོ། །ཇི་ལྟར་གཞན་དུ་བྱ་ཞེ་ན། བདག་ཏུ་སྨྲ་བ་ནི་ཚིག་ཙམ་ཡིན་ལ། དེ་ལ་མངོན་པར་ཞེན་པ་ནི་བདག་ཏུ་སྨྲ་བར་མངོན་པར་ཞེན་པའོ། །དེའི་ཕྲ་རྒྱས་ནི་བདག་ཏུ་སྨྲ་བར་མངོན་པར་ཞེན་པའི་ཕྲ་རྒྱས་སུ་འགྱུར་ཞེས་བྱ་བ་ཡིན་ནོ། །འདིར་ཡང་གཞན་དུ་ཡིན་པས་ཞེས་བྱ་བ་ཇི་ལྟ་ཞེ་ན། འདི་ལ་བདག་གོ་ཞེས་སྨྲ་བས་བདག་ཏུ་སྨྲ་བ་ཡིན་ནོ་ཞེས་བྱའོ། །འདོད་པ་ལ་སོགས་པ་གསུངས་པ་ནི་འདོད་པ་དང༌། ལྟ་བ་དང༌། ཚུལ་ཁྲིམས་དང་བརྟུལ་
ཞུགས་དང༌། བདག་ཏུ་སྨྲ་བ་སྟེ། དེ་དག་ལ་འདུན་པ་དང་འདོད་ཆགས་གང་ཡིན་པ་དེ་ཉེ་བར་ལེན་པ་ཡིན་ཏེ་ཞེས་བྱ་བ་ནི་འདོད་པ་ལ་སོགས་པ་དེ་དག་ལ་འདོད་པ་ལ་འདུན་པ་དང་འདོད་ཆགས་གང་ཡིན་པ་འདོད་པ་ཉེ་བར་ལེན་པའོ། །ལྟ་བ་ལ་འདུན་པ་དང་འདོད་ཆགས་གང་ཡིན་པ་ནི་ལྟ་བ་ཉེ་བར་ལེན་པའོ། །ཚུལ་ཁྲིམས་དང་བརྟུལ་ཞུགས་ལ་འདུན་པ་དང་འདོད་ཆགས་གང་ཡིན་པ་ནི་ཚུལ་ཁྲིམས་དང་བརྟུལ་ཞུགས་ཉེ་བར་ལེན་པའོ། །བདག་ཏུ་སྨྲ་བ་ལ་འདུན་པ་དང་འདོད་ཆགས་གང་ཡིན་པ་དེ་ནི་བདག་ཏུ་སྨྲ་བ་ཉེ་བར་ལེན་པའོ། །དེ་ལ་ལྡན་པར་མངོན་པར་འདོད་པ་ནི་འདུན་པའོ་ཞེས་བྱ་བ་ནི་འདོད་པ་ལ་སོགས་པ་དང་ལྡན་པར་ཚོལ་བའོ། །དེ་དང་ལྡན་པ་མངོན་པར་དགའ་བ་ནི་དེ་ལ་འདོད་ཆགས་པའོ་ཞེས་བྱ་བ་ནི་འདོད་ཆགས་ནི་ཞེན་པའི་མཚན་ཉིད་ཡིན་པའི་ཕྱིར་རོ། །ཇི་ལྟར་ན་འདུན་པ་དང་འདོད་ཆགས་ཉེ་བར་ལེན་པ་ཡིན་ཞེ་ན་ཞེས་བྱ་བ་ནི་བྱེད་པ་པོའི་རྣམ་པ་དེས་ཞེས་བྱ་བ་ཡིན་ནོ། །དེས་འདོད་པ་ལ་སོགས་པ་དེ་དག་ལེན་པར་བྱེད་དོ་ཞེས་བྱ་བ་ནི་འདུན་པ་དང་འདོད་ཆགས་དེ་དག་གིས་ཏེ། དེའི་ཕྱིར་རྒྱུ་ལ་བྱེད་པ་པོར་བྱས་ནས་འདུན་པ་དང༌། འདོད་ཆགས་ནི་ཉེ་བར་ལེན་པ་ཡིན་པར་སྟོན་པ་ནི། དེ་དག་ཉིད་དེ་དག་ལ་ལེན་པ་ཉིད་དོ་ཞེས་བྱ་བ་ཡིན་ཏེ། འདུན་པ་དང་འདོད་ཆགས་དེ་དག་ཉིད་འདོད་པ་ལ་སོགས་པ་དེ་དག་ལ་ལེན་པར་བྱེད་པ་ཡིན་ཏེ། དངོས་པོ་གྲུབ་པའི་རྐྱེན་ཡིན་པའི་ཕྱིར་རོ། །ཇི་ལྟ་ཞེ་ན། དེའི་ཕྱིར་དེ་སྐྱེས་ན་དེའི་ཡིད་ལེན་པ་པོ་ཡིན་པར་འགྱུར་རོ་ཞེས་སྨྲས་ཏེ། དེར་འདུན་པ་དང་འདོད་ཆགས་སྐྱེས་ན་ཡིད་ཀྱིས་འདོད་པ་ལ་སོགས་པ་ལེན་པར་བྱེད་པར་འགྱུར་རོ། །གལ་ཏེ་བདག་ཏུ་སྨྲ་བ་ཉེ་བར་ལེན་པ་འདུན་པ་དང་འདོད་ཆགས་ཡིན་གྱི་ཕུང་པོ་ལྔ་མ་ཡིན་ན་མི་སྡུག་པའི་མདོ་སྡེ་ལས་ཉེ་བར་ལེན་པའི་ཕུང་པོ་ལྔའི་དབང་དུ་བྱས་ཏེ་གང་གསུངས་པ་དགེ་སློང་དག་དེ་ལ་བདག་ཏུ་སྨྲ་བ་ཉེ་བར་ལེན་པ་རྟག་པ་དང༌། ཐེར་ཟུག་པ་དང༌། གཞན་མ་དང༌། ཡོངས་སུ་མི་འགྱུར་བའི་ཆོས་ཅན་དང༌། ཡང་དག་པ་དེ་བཞིན་དུ་གནས་པ་ཞེས་བྱ་བ་བདག་ཏུ་སྨྲ་བ་ཉེ་བར་ལེན་པ་གང་ཡིན་པ་དག་ཁྱེད་ཀྱིས་ཉེ་བར་བླངས་སམ་ཞེས་གང་གསུངས་པ་དེ་དག་ཇི་ལྟ་བུར་རུང་བར་འགྱུར།
དེ་ལ་བདག་ཏུ་སྨྲ་བས་གང་ལ་བདག་ཏུ་བཏགས་པའི་དངོས་པོ་གང་བླངས་བ་དེ་དག་བདག་ཏུ་སྨྲ་པ་ཉེ་བར་ལེན་པར་བསྟན་ཏེ་ཞེས་བྱ་བ་ནི་ལས་ལ་བྱེད་པ་པོར་བྱས་ནས་སོ། །བདག་ཏུ་སྨྲ་བས་ཅི་ཞིག་ལེན་ཅེ་ན། དེའི་ཕྱིར། གང་ལ་བདག་ཏུ་གདགས་པའི་དངོས་པོ་ཞེས་སྨྲས་ཏེ། ཉེ་བར་ལེན་པའི་ཕུང་པོ་ལྔ་ལ་ཞེས་བྱ་བ་ཡིན་ནོ། །གལ་ཏེ་འདུན་པ་དང་འདོད་ཆགས་དག་ཉེ་བར་ལེན་པ་ཡིན་ན་ནི་སྲེད་པའི་རྐྱེན་གྱིས་ལེན་པའི་རྣམ་གྲངས་སྲེད་པ་ཉིད་སྨྲས་པར་གྱུར་པ་མ་ཡིན་ནམ་ཞེ་ན་ཞེས་བྱ་བ་ནི་འདུན་པ་དང་འདོད་ཆགས་ནི་སྲེད་བ་ཡིན་ལ། དེ་ཡང་ལེན་པ་ཡིན་པས་སྲེད་པའི་རྐྱེན་གྱིས་ལེན་པ་ཞེས་སྨྲས་ན་ནི་སྲེད་པའི་རྐྱེན་གྱིས་སྲེད་པ་ཞེས་སྨྲས་པར་འགྱུར་རོ། །གལ་ཏེ་ཚོར་བ་ལ་སྲེད་པ་ནི་འདོད་པ་ལ་སོགས་པ་ལ་སྲེད་པའི་རྣམ་གྲངས་ཀྱི་རྐྱེན་ཡིན་པར་བསྟན་ན་དེ་ལ་ཉེས་པ་ཅི་ཡོད་ཅེས་བྱ་བ་ནི་ཚོར་བའི་སྲེད་པ་ལ་བརྟེན་ནས་འདོད་པ་དང༌། ལྟ་བ་དང༌། ཚུལ་ཁྲིམས་དང་བརྟུལ་ཞུགས་དང༌། བདག་ཏུ་སྨྲ་བར་སྲེད་པ་སྐྱེ་བས་སྲེད་པའི་རྐྱེན་གྱིས་ལེན་པ་ཡིན་པར་བསྟན་པ་ཡིན་ནོ། །དེ་ལྟར་མ་བསྟན་ན་ཡང་འདི་ཇི་ལྟར་ཤེས་པར་བྱས་པ་ཡིན་ཞེས་རྒྱས་པར་འབྱུང་བ་ནི་དེ་ལྟར་མ་བཤད་ན་སྲེད་པའི་རྐྱེན་གྱིས་ལེན་པ་ཞེས་བྱ་བ་འདི་ཇི་ལྟར་ཤེས་པར་བྱས་པ་ཡིན། ཚོར་བ་ལ་སྲེད་པས་ནི་ཇི་ལྟར་རིགས་པར་ཇི་ལྟར་སྲིད་པར་ཁམས་གསུམ་པའི་བདེ་བ་ལ་སོགས་པའི་ཚོར་བ་དང་ལྡན་པ་ལ་སོགས་པའི་རྒྱུ་མཚན་དུ་ཞེས་བྱ་བ་ནི་བདེ་བ་དང་སྡུག་བསྔལ་དང༌། སྡུག་བསྔལ་ཡང་མ་ཡིན། བདེ་བ་ཡང་མ་ཡིན་པའི་ཚོར་བ་དང་ལྡན་པ་དང་བྲལ་བ་དང་མི་འབྲལ་བ་ལ་སོགས་པའི་རྒྱུ་མཚན་དུ་འདོད་པ་ལ་སོགས་པ་ཚོལ་ཞིང་ཞེས་བྱ་བ་ནི་འདོད་པ་དང༌། ལྟ་བ་དང༌། ཚུལ་ཁྲིམས་དང་བརྟུལ་ཞུགས་དང༌། བདག་ཏུ་སྨྲ་བ་ཚོལ་ཞིང་འདོད་པ་ལ་སོགས་པ་དེ་དག་ལ་ཆགས་པར་བྱེད་དོ། །གང་གིས་འདོད་པར་བྱེད་པ་ཞེས་བྱ་བ་ནི་ཀུན་དུ་རྟོག་ཅིང་རྣམ་པར་རྟོག་པའི་མཚན་ཉིད་ཀྱིས་སོ། །གང་ལ་འདོད་པ་གང་ལ་ཆགས་པའོ། །དོན་དེ་ཉིད་ཅེས་བྱ་བ་ནི་དེ་ཉིད་ལེན་པ་ཡིན་ན་ནི་གཅིག་ཁོ་ནར་མ་ངེས་པ་ཡིན་ནོ་ཞེས་བྱ་བའོ། །འདོད་པ་ཡུལ་ལ་ཡིན་པར་འདོད་པ་རྣམས་ཀྱིས་ཉེ་
བར་ལེན་པ་གང་ཞིག་ཡིན་ཞེས་བྱ་བ་ནི། ཐམས་ཅད་ཀྱིས་ཀྱང་ཡང་སྲིད་དོ། །ལེན་ཏོ་ཞེས་བྱ་བ་ཡིན་ནོ། །ཇི་ལྟར་ལེན་ཞེ་ན། དེ་ཐ་དད་པས་ཡང་སྲིད་པར་འགྱུར་བའི་ལས་རྣམས་སྲིད་པར་འགྱུར་བར་བྱེད་པའི་ཕྱིར་རོ་ཞེས་བྱ་བ་ནི་འདོད་པ་ལ་སོགས་པ་ལ་ལེན་པ་ཐ་དད་པས་ཡང་སྲིད་པར་འགྱུར་བའི་ལས་རྣམས་དེ་མ་ཐག་ཏུ་ཡང་སྲིད་པ་སྐྱེ་བའི་རྒྱུ་ཉིད་དུ་འགྲོ་བའི་དོན་ཏོ། །ཡང་ན་འདོད་པ་ལ་སོགས་པ་དེ་དག་ཉིད་ཞེས་རྒྱས་པར་འབྱུང་བ་ནི་ཡུལ་ལ་འདོད་པ་དང༌། ལྟ་བ་དང༌། ཚུལ་ཁྲིམས་དང་བརྟུལ་ཞུགས་དང༌། བདག་ཏུ་སྨྲ་བ་དེ་དག་ཉིད་ཚོར་བ་ལ་སྲེད་པ་རྣམས་ཀྱིས་དེ་དང་ལྡན་པ་ལ་སོགས་པའི་རྒྱུ་མཚན་དུ་མངོན་པར་ཞེན་པའི་ཚུལ་གྱིས་བདེ་བའི་ཚོར་བ་དང་ལྡན་པ་ལ་སོགས་པའི་རྒྱུ་མཚན་དུ་མངོན་པར་ཞེན་པའི་དོན་གྱིས་ལེན་པས་ན་ལེན་པ་ཞེས་བྱ་སྟེ། གཟུགས་ཀྱི་སྐྱེ་མཆེད་བཞིན་དུ་ཚིག་སྦྱར་བ་བྱས་པའི་ཕྱིར་རོ། །དཔེར་ན་སྦྱིན་པའི་སྦྱིན་པ་པོ་ཡིན་ནོ་ཞེས་བྱ་བ་ནི་འདིར་གང་སྦྱིན་པ་དེ་སྦྱིན་པའོ་ཞེས་སྟོན་པ་བཞིན་ནོ་ཞེས་བྱ་བའི་མདོ་སྡེ་འདི་ལས་ཟས་ལ་སོགས་པ་གང་སྦྱིན་པ་དེ་སྦྱིན་པ་ཡིན་པར་བསྟན་གྱི། གང་གི་སྦྱིན་པ་ནི་མ་ཡིན་ནོ། །རབ་ཏུ་བྱེད་པ་པ་དག་འདོན་པ་ཞེས་རྒྱས་པར་འབྱུང་བ་ནི་དེ་དག་གི་ལེན་པ་ནི་གཞན་དུ་རྣམ་པར་འཇོག་པ་ཡིན་ནོ་ཞེས་སྟོན་ཏོ། །འདོད་པ་དང་རབ་ཏུ་ལྡན་པའི་ཀུན་དུ་སྦྱོར་བ་དང༌། འཆིང་བ་དང༌། ཕྲ་རྒྱས་དང༌། ཉེ་བའི་ཉོན་མོངས་པ་དང༌། ཀུན་ནས་བཀྲིས་པ་དང་ཞེས་བྱ་བ་དེ་ལ་ཀུན་དུ་སྦྱོར་བ་ནི་རྗེས་སུ་ཆགས་པ་དང༌། ཁོང་ཁྲོ་བ་དང༌། ང་རྒྱལ་དང༌། མ་རིག་པ་དང༌། ལྟ་བ་དང༌། མཆོག་ཏུ་འཛིན་པ་དང༌། ཐེ་ཚོམ་དང༌། ཕྲག་དོག་དང༌། སེར་སྣའི་ཀུན་དུ་སྦྱོར་བ་རྣམས་ཏེ། ཉོན་མོངས་པ་ཅན་གྱི་དངོས་པོ་ལ་ཀུན་དུ་སྦྱོར་བའི་དོན་གྱིས་ཀུན་དུ་སྦྱོར་བ་ཡིན་པའམ། སྡུག་བསྔལ་སྣ་ཚོགས་ལ་ཀུན་དུ་སྦྱོར་བའི་དོན་གྱིས་ཡིན་ནོ། །དེ་ལ་རྗེས་སུ་ཆགས་པའི་ཀུན་དུ་སྦྱོར་བ་ནི་འདོད་ཆགས་ཏེ། དེས་སེམས་ཅན་རྣམས་སྐྱེ་བ་དང་དམིགས་པ་ལ་ཉེ་བར་ཁྲིད་པར་བྱེད་པའི་ཕྱིར་རོ། །ཁོང་ཁྲོ་བའི་ཀུན་དུ་སྦྱོར་བ་ནི་སེམས་ཅན་ལ་མནར་སེམས་པའོ། །ང་རྒྱལ་གྱི་ཀུན་དུ་སྦྱོང་བ་ནི་ང་རྒྱལ་བདུན་ཏེ། ང་རྒྱལ་དང༌། ཆེ་བའི་
ང་རྒྱལ་དང༌། ཆེ་བས་ཀྱང་ཆེའོ་སྙམ་པའི་ང་རྒྱལ་དང༌། ངའོ་སྙམ་པའི་ང་རྒྱལ་དང༌། མངོན་པའི་ང་རྒྱལ་དང༌། ཆུང་བའི་ང་རྒྱལ་དང༌། ལོག་པའི་ང་རྒྱལ་ལོ། །མ་རིག་པའི་ཀུན་དུ་སྦྱོར་བ་ནི་མི་ཤེས་པའོ། །ལྟ་བའི་ཀུན་དུ་སྦྱོར་བ་ནི་ལྟ་བ་གསུམ་སྟེ། འཇིག་ཚོགས་ལ་ལྟ་བ་དང༌། མཐར་འཛིན་པར་ལྟ་བ་དང༌། ལོག་པར་ལྟ་བའོ། །མཆོག་ཏུ་འཛིན་པའི་ཀུན་དུ་སྦྱོར་བ་ནི་མཆོག་ཏུ་འཛིན་པ་གཉིས་ཏེ། ལྟ་བ་མཆོག་ཏུ་འཛིན་པ་དང༌། ཚུལ་ཁྲིམས་དང་བརྟུལ་ཞུགས་མཆོག་ཏུ་འཛིན་པའོ། །ཐེ་ཚོམ་གྱི་ཀུན་དུ་སྦྱོར་བ་ནི་བདེན་པ་ལ་ཡིད། གཉིས་ཟ་བའོ། །ཕྲག་དོག་གི་ཀུན་དུ་སྦྱོར་བ་ནི་གཞན་གྱི་ཕུན་སུམ་ཚོགས་པ་ལ་སེམས་ཁོང་ནས་འཁྲུགས་པའོ། །སེར་སྣའི་ཀུན་ཏུ་སྦྱོར་བ་ནི་གཏོང་བ་དང་མི་མཐུན་པ་སེམས་ཀྱིས་ཀུན་དུ་འཛིན་པའོ། །དེ་བས་ན་ལྟ་བའི་ཀུན་ཏུ་སྦྱོར་བ་དང༌། མཆོག་ཏུ་འཛིན་པའི་ཀུན་དུ་སྦྱོར་བ་བཀོལ་ཏེ། །ལྷག་མ་བདུན་ནི་འདོད་པ་ཉེ་བར་ལེན་པ་ཡིན་ནོ། །བཅིང་བ་ནི་གསུམ་སྟེ། ཁམས་གསུམ་པའི་འདོད་ཆགས་དང༌། ཞེ་སྡང་དང༌། གཏི་མུག་སྟེ། མྱ་ངན་ལས་འདས་པར་འགྲོ་བའི་གགས་བྱེད་པའི་དོན་གྱིས་ཡིན་ནོ། །ཕྲ་རྒྱས་ནི་མདོར་ན་དྲུག་སྟེ། འདོད་ཆགས་དང༌། ཁོང་ཁྲོ་བ་དང༌། ང་རྒྱལ་དང༌། མ་རིག་པ་དང༌། ལྟ་བ་དང༌། ཐེ་ཚོམ་གྱི་ཕྲ་རྒྱས་སོ། །དེ་ལ་ཆགས་པའི་རྣམ་པ་ཅན་གྱི་སེམས་ལས་བྱུང་བའི་ཆོས་ནི་འདོད་ཆགས་སོ། །དེ་ཞེ་འགྲས་པའི་རྣམ་པ་ཅན་ནི་ཁོང་ཁྲོ་བའོ། །ཁེངས་པའི་རྣམ་པ་ཅན་ནི་ང་རྒྱལ་ལོ། །མིག་མི་གསལ་བའི་རྣམ་པ་ཅན་ནི་མ་རིག་པའོ། །ཡང་དག་པར་རྟོག་པའི་རྣམ་པ་ཅན་ནི་ལྟ་བའོ། །དོན་དུ་མར་འདོགས་པའི་རྣམ་པ་ཅན་ནི་ཐེ་ཚོམ་མོ། །དེ་བས་ན་ལྟ་བའི་ཕྲ་རྒྱས་མ་གཏོགས་པར་ཉོན་མོངས་པ་ལས་གཞན་སེམས་ལས་བྱུང་བའི་ཆོས་ཉོན་མོངས་པ་ཅན་འདུ་བྱེད་ཀྱི་ཕུང་པོས་བསྡུས་པ་ནི་ཉེ་པའི་ཉོན་མོངས་པའོ། །གང་དག་ཕྲན་ཚེགས་དང་གཞི་ལས་གསུངས་པ་མི་དགའ་བ་ལ་སོགས་པ་ཡང་ཡིན་ནོ། །ཀུན་ནས་དཀྲིས་པ་ནི་རྣམ་པ་བརྒྱད་དེ། ངོ་ཚ་མེད་པ་དང༌། ཁྲེལ་མེད་པ་དང༌། ཕྲག་དོག་དང༌། སེར་སྣ་དང༌། རྒོད་པ་དང༌། འགྱོད་པ་དང༌། རྨུགས་
པ་དང༌། གཉིད་དོ། །དེ་ལ་ངོ་ཚ་མེད་པ་དང༌། ཁྲེལ་མེད་པ་ནི་བདག་དང་གཞན་ལ་ལྟོས་ནས་གོ་རིམས་བཞིན་དུ་ཉེས་པས་ངོ་ཚ་མེད་པའོ། །ཕྲག་དོག་དང་སེར་སྣ་གཉིས་ནི་ཇི་ལྟར་སྔར་སྨྲས་པ་ཡིན་ནོ། །རྒོད་པ་ནི་སེམས་མ་ཞི་བའོ། །འགྱོད་པ་ནི་སེམས་ལ་གཅགས་པའོ། །དེ་ཡང་ཉོན་མོངས་པ་ཅན་ཁོ་ན་ཀུན་ནས་དཀྲིས་པ་ཡིན་གྱི་དགེ་བ་ནི་མ་ཡིན་ནོ། །རྨུགས་པ་ནི་སེམས་ལས་སུ་མི་རུང་བའོ། །ལུས་འཛིན་མི་ནུས་ཤིང་སེམས་སྡུད་པ་ནི་གཉིད་དོ། །དེ་ཡང་ཉོན་མོངས་པ་ཅན་ཁོ་ན་ཀུན་ནས་དཀྲིས་པ་ཡིན་གྱི། དགེ་བའམ་ལུང་དུ་མ་བསྟན་པ་ནི་མ་ཡིན་ནོ། །འདི་དག་ནི་འདོད་པ་ཉེ་བར་ལེན་པ་ཞེས་བྱ་སྟེ། གཟུགས་ཀྱི་སྐྱེ་མཆེད་བཞིན་དུ་ཚིག་སྦྱར་བ་བྱས་པའི་ཕྱིར་རོ། །དཔེར་ན་གཟུགས་ཉིད་སྐྱེ་མཆེད་ཡིན་པས་གཟུགས་ཀྱི་སྐྱེ་མཆེད་ཅེས་བྱ་བ་དེ་བཞིན་དུ་འདོད་པ་དང་རབ་ཏུ་ལྡན་པ་ཉིད་ཉེ་བར་ལེན་པ་ཡིན་པས་འདོད་པ་ཉེ་བར་ལེན་པ་ཞེས་བྱ་སྟེ། ཚིག་བར་མི་མངོན་པའི་ཕྱིར་འབྲུ་མར་གྱི་སྟོབས་བཞིན་ནོ། །ལྟ་བ་བཞི་ནི་ཇི་ལྟ་བའི་ཉེ་བར་ལེན་པ་སྟེ། འཇིག་ཚོགས་ལ་ལྟ་བ་ནས་ལྟ་བ་མཆོག་ཏུ་འཛིན་པའི་བར་དུ་ཡིན་ནོ་ཞེས་བྱ་བ་ནི་འཇིག་ཚོགས་ལ་ལྟ་བ་དང༌། མཐར་འཛིན་པར་ལྟ་བ་དང༌། ལོག་པར་ལྟ་བ་དང༌། མཆོག་ཏུ་འཛིན་པ་སྟེ། ལྟ་བ་ཉིད་ཉེ་བར་ལེན་པ་ཡིན་པས་ལྟ་བ་ཉེ་བར་ལེན་པའོ། །ཚུལ་ཁྲིམས་དང་བརྟུལ་ཞུགས་ཉེ་བར་ལེན་པ་གང་ཞེ་ན། ཇི་ལྟར་ཡང་དེ་དག་ཁ་ཅིག་ནི་ཚུལ་ཁྲིམས་ལ་མཆོག་ཏུ་འཛིན་ཅིང་ཚུལ་ཁྲིམས་ཀྱིས་དག་པ་དང་ཞེས་རྒྱས་པར་འབྱུང་བ་དེ་དག་གིས་ཚུལ་ཁྲིམས་དང་བརྟུལ་ཞུགས་མཆོག་ཏུ་འཛིན་པ་ནི་ཚུལ་ཁྲིམས་བརྟུལ་ཞུགས་ཉེ་བར་ལེན་པ་ཡིན་པར་བསྟན་ཏོ། །བདག་ཏུ་སྨྲ་བ་ཉེ་བར་ལེན་པ་གང་ཞེ་ན་ཞེས་རྒྱས་པར་འབྱུང་བ་ལ། བདག་ཏུ་སྨྲ་བ་ཉེ་བར་ལེན་པ་གོ་མི་ཤེས་ན། ཅི་གཟུགས་དང་གཟུགས་མེད་པ་ཉིད་ཀྱི་བདག་ཏུ་སྨྲ་བ་དེ་དང་རབ་ཏུ་ལྡན་པའི་ཉེ་བར་ལེན་པ་རྣམས་ཇི་ལྟར་འདོད་པ་དང་རབ་ཏུ་ལྡན་པའི་ཉེ་བར་ལེན་པ་རྣམས་འདོད་པའི་ཉེ་བར་ལེན་པ་ཞེས་བྱ་བ་དེ་བཞིན་དུ། བདག་ཏུ་སྨྲ་བ་ཉེ་བར་ལེན་པ་ཡིན་ནམ། འོན་ཏེ་གཟུགས་དང་གཟུགས་མེད་པ་དང་རབ་ཏུ་ལྡན་པའི་ཀུན་དུ་སྦྱོར་བ་ལ་སོགས་པ་དེ་དག་ཡིན་ཏེ། བདག་ཏུ་སྨྲ་བ་ཡང་
ཡིན་ལ། ཉེ་བར་ལེན་པ་ཡང་ཡིན་ནམ། ཇི་ལྟར་གཟུགས་དང་གཟུགས་མེད་པར་རྟོགས་པ་དེ་དང་གཟུགས་དང་གཟུགས་མེད་པ་དང་རབ་ཏུ་ལྡན་པའི་ཀུན་དུ་སྦྱོར་བ་ལ་སོགས་པ་དེ་དག་ལ་བདག་ཏུ་སྨྲ་བ་ཞེས་བྱ། ཅི་དེ་ལས་གཞན་ཇི་སྐད་དུ་སྨྲས་ཟིན་པ་ལ་མ་གཏོགས་པ་གསུམ་པ་མིང་བདག་ཏུ་སྨྲ་བ་ཞེས་བརྗོད་པ་ཞིག་ཡིན་པ་ཁྱེད་ཀྱིས་བརྗོད་པར་བྱ་དགོས་ན་ཐམས་ཅད་ཀྱིས་ཀྱང་འདོད་པའི་ཉེ་བར་ལེན་པ་ཡང་བདག་ཏུ་སྨྲ་བ་ཉེ་བར་ལེན་པ་ཡིན་པར་ཐལ་བར་འགྱུར་རོ། །ཇི་ལྟ་ཞེ་ན། རེ་ཞིག་གལ་ཏེ། འདི་དག་ལ་བདག་གོ་ཞེས་སྨྲ་བས་གཟུགས་དང་གཟུགས་མེད་པ་བདག་ཏུ་སྨྲ་བ་ཡིན་ན་ནི་འདོད་པའི་ཁམས་ཀྱང་བདག་ཏུ་སྨྲ་བ་ཡིན་པར་འགྱུར་རོ། །དེ་ལྟར་གྱུར་པ་དང༌། དེ་དང་རབ་ཏུ་ལྡན་པའི་ཉེ་བར་ལེན་པ་ཡང་འདོད་པ་ཉེ་བར་ལེན་པ་ནི་མ་ཡིན་གྱི། བདག་ཏུ་སྨྲ་བ་ཉེ་བར་ལེན་པ་ཡིན་པར་འགྲུབ་པར་འགྱུར་རོ། །འོན་ཏེ་གཟུགས་དང་གཟུགས་མེད་པ་དང་རབ་ཏུ་ལྡན་པའི་ཀུན་དུ་སྦྱོར་བ་ལ་སོགས་པ་རྣམས་གལ་ཏེ་རྣམ་པ་གཞན་འགའ་ཞིག་གི་སྒོ་ནས་དེ་དག་ཐམས་ཅད་ཀྱིས་བདག་གོ་ཞེས་སྨྲས་པས་བདག་ཏུ་སྨྲ་བ་ཡིན་གྱི་ཉ་བར་ལེན་པ་གཞན་མ་ཡིན་ནོ་ཞེ་ན་ནི་འདོད་པ་དང་རབ་ཏུ་ལྡན་པའི་ཀུན་དུ་སྦྱོར་བ་ལ་སོགས་པ་ཡང་རྣམ་པ་དེ་ལྟ་བུ་ཉིད་ཀྱི་སྒོ་ནས་བདག་ཏུ་སྨྲ་བ་ཡིན་པ་ཐོབ་པར་འགྱུར་རོ། །འདོད་པའི་སྦྱོར་བ་ཇི་ལྟ་བར་སྲིད་པའི་སྦྱོར་བ་དང་ལྟ་བའི་སྦྱོར་བ་ཡང་དེ་བཞིན་ནོ་ཞེས་བྱ་བ་ཇི་ལྟ་ཞེ་ན། དགེ་སློང་དག་བྱིས་པ་ཐོས་པ་དང་མི་ལྡན་པ་སོ་སོའི་སྐྱེ་བོ་རྣམས་ཀྱི་སྲིད་པ་ནི་ཀུན་འབྱུང་བ་ཡིན། ནུབ་པ་ཡང་ཡིན་ནོ་ཞེས་རྒྱས་པར་བྱས་ནས་སྲིད་པ་ལ་སྲིད་པའི་འདུན་པ་དང༌། སྲིད་པའི་དགའ་བའི་བར་དུ་འདི་འབྱུང་བར་འགྱུར་རོ། །སྲིད་པའི་ལྷག་པར་ཞེན་པའི་བར་དུ་འདིའི་སེམས་མཐར་ཐུག་པར་གནས་ཏེ། འདི་ནི་སྲིད་པའི་སྦྱོར་བ་ཞེས་བྱ་བའོ། །ལྟ་བའི་སྦྱོར་བ་ཡང་དགེ་སློང་དག་བྱིས་པ་ཐོས་པ་དང་མི་ལྡན་པ་སོ་སོའི་སྐྱ་བོ་རྣམས་ཀྱི་ལྟ་བ་ནི་ཀུན་འབྱུང་བ་ཡང་ཡིན། ནུབ་པ་ཡང་ཡིན། རོ་མྱང་བ་ཡང་ཡིན། ཉེས་དམིགས་ཀྱང་ཡིན་ནོ་ཞེས་རྒྱས་པར་བྱས་ནས་ལྟ་བ་རྣམས་ལ་ལྟ་བའི་འདུན་པ་དང༌། ལྟ་བའི་དགའ་བའི་བར་དུ་འདི་འབྱུང་བར་འགྱུར་རོ། །ལྟ་བའི་ལྷག་པར་ཞེན་
པའི་བར་དུ་འདི་སེམས་མཐར་ཐུག་པར་གནས་ཏེ། འདི་ནི་ལྟ་བའི་སྦྱོར་བ་ཞེས་བྱའོ། །མ་རིག་པའི་སྦྱོར་བ་གང་ཞེ་ན། དགེ་སློང་དག་བྱིས་པ་ཐོས་པ་དང་མི་ལྡན་པ་སོ་སོའི་སྐྱེ་བོ་རྣམས་ཀྱི་རེག་པའི་སྐྱེ་མཆེད་དྲུག་རྣམས་ཀུན་འབྱུང་བ་ཡང་ཡིན། ནུབ་པ་ཡང་ཡིན་ནོ་ཞེས་རྒྱས་པར་བྱས་ནས་རེག་པའི་སྐྱེ་མཆེད་དྲུག་མི་ཤེས་པ་ནི་མ་རིག་པ་ཕྲ་རྒྱས་སུ་འགྱུར་རོ་ཞེས་བྱ་བའི་བར་ནི་མ་རིག་པའི་སྦྱོར་བ་ཡིན་ཏེ། འདིར་ཡང་མ་རིག་པ་ཉིད་མ་རིག་པའི་སྦྱོར་བ་ཡིན་པར་རིག་པར་བྱའོ། །རབ་ཏུ་བྱེད་པ་པ་དག་དེ་ལ་སྒྲོ་འདོགས་པར་བྱེད་པ་ཞེས་བྱ་བ་ནི་མདོ་སྡེ་དེ་ལས་འདོད་པ་ལ་སོགས་པའི་སྦྱོར་བ་བསྟན་པ་རྣམས་མདོ་སྡེ་ལས་འདོད་པ་དང་འདུན་པ་ལ་སོགས་པ་གསུངས་པ་ལས་ལྷག་པར་སྒྲུབ་པ་ཡིན་ནོ། །དེ་བས་ན་ཉེ་བར་ལེན་པ་ལ་ཡང་སྒྲོ་བཏགས་པ་ཞེས་རྒྱས་པར་འབྱུང་བ་ནི་འདི་ལྟར་འདོད་པའི་སྦྱོར་བ་ལ་སོགས་པ་མདོ་སྡེ་ལས་གསུངས་པ་རྣམས་ལ་ཁྱད་ཀྱིས་སྒྲོ་བཏགས་པ་བྱས་ལ། དེའི་ཕྱིར་མདོ་སྡེ་དེ་ལས་གསུངས་པའི་ཉེ་བར་ལེན་པ་ལ་ཡང་ཁྱེད་ཀྱིས་སྒྲོ་བཏགས་པ་བྱས་པར་སྲིད་པ་ཡིན་ནོ། །ཉེ་བར་ལེན་པ་རྣམས་དང་པོར་ཇི་ལྟར་བསྟན་པ་ཞེས་བྱ་བ་ནི་དེར་འདུན་པ་དང་འདོད་ཆགས་ཡིན་ནོ། །དེ་ལྟར་ན་སྒྲོ་བཏགས་པ་བྱས་པ་ཡང་མ་ཡིན་ལ་ཞེས་རྒྱས་པར་འབྱུང་བའོ། །འདོད་པ་ལ་སོགས་པའི་སྦྱོར་བ་ཡང་ཞེས་བྱ་བ་འདོད་པའི་སྦྱོར་བ་དང་ལྟ་བའི་སྦྱོར་བའོ།། །།འདོད་པ་ལ་སོགས་པའི་ཉེ་བར་ལེན་པ་ཞེས་བྱ་བ་འདོད་པའི་ཉེ་བར་ལེན་པ་དང༌། ལྟ་བའི་ཉེ་བར་ལེན་པ་དང་ཤིན་ཏུ་མཐུན་པར་བྱས་པ་ཡིན་ནོ། །འདི་ཡང་ཡེ་ཤེས་ལ་འཇུག་པ་ལས་འབྱུང་བ་དང༌། དང་པོ་ཇི་ལྟར་ཉེ་བར་ལེན་པ་བསྟན་པ་དང་ཤིན་ཏུ་མཐུན་པར་བྱས་པ་ཡིན་ནོ། །གཞུང་དེ་དག་ནི་བདག་ཏུ་སྨྲ་བ་ལ་འདུན་པ་དང་འདོད་ཆགས་ནི་བདག་ཏུ་སྨྲ་བ་ཉེ་བར་ལེན་པ་དང་བདག་ཏུ་མངོན་པར་ཞེན་པ་ཡིན་ནོ་ཞེས་བྱ་བའི་དོན་འདི་དང་ཤིན་ཏུ་མཐུན་པ་ཡིན་གྱི་ཞེས་བྱ་བ་ཇི་ལྟ་ཞེ་ན། ཡུན་རིང་པོར་བདག་ཏུ་མངོན་པར་ཞེན་ཅིང་སེམས་ཅན་དང༌། སྲོག་དང༌། འགྲོ་བ་པོ་དང༌། གསོ་བ་པོ་དང༌། གང་ཟག་ཏུ་མངོན་པར་ཞེན་པ་ཡིན་པར་བསྟན་པའི་ཕྱིར་ཡུན་རིང་པོར་བདག་ཏུ་མངོན་པར་ཞེན་ཅིང་སེམས་ཅན་དང༌། སྲོག་དང༌། འགྲོ་བ་པོ་དང༌། གང་ཟག་ཏུ་མངོན་པར་ཞེན་པ་ཡིན་ཏེ། དེ་དག་གིས་ཇི་ལྟར་བདག་
ཏུ་སྨྲ་བ་དང༌། འདུན་པ་དང༌། འདོད་ཆགས་དང༌། མངོན་པར་ཞེན་པ་ཡོངས་སུ་གཏོང་བར་འགྱུར་ཏེ། དེ་དག་དང་བྲལ་བ་མ་ཡིན་པ་ནི་རིགས་པར་སྨྲ་བ་ཡིན་ནོ། །བརྡ་སྤྲོད་པ་པ་དག་ནི་བདག་གང་ཡིན་པ་ནི་ཡོད་པ་ཡིན་ཏེ། དེའི་སྤད་བ་དང༌། ཡོངས་སུ་ཤེས་པ་བཤད་པར་བྱའོ་ཞེས་བྱ་བ་དང༌། གཟུགས་དང་གཟུགས་མེད་པ་དང་རབ་ཏུ་ལྡན་པའི་ཀུན་དུ་སྦྱོར་བ་ལ་སོགས་པ་ནི་བདག་ཏུ་སྨྲ་བ་ཉེ་བར་ལེན་པ་ཡིན་ནོ་ཞེས་བྱ་བའི་དོན་འདི་དང་ཤིན་ཏུ་མཐུན་པ་ཡིན་ནོ། །ཇི་ལྟ་ཞེ་ན། ཡུན་རིང་པོར་བདག་ཏུ་མངོན་པར་ཞེན་ཅིང་སེམས་ཅན་དང༌། སྲོག་དང༌། འགྲོ་བ་པོ་དང༌། གང་ཟག་ཏུ་མངོན་པར་ཞེན་པ་རྣམས་ནི་འཇིག་ཚོགས་ལ་ལྟ་བ་མ་སྤངས་པའི་ཕྱིར་གཟུགས་དང་གཟུགས་མེད་པ་དང་རབ་ཏུ་ལྡན་པའི་ཀུན་དུ་སྦྱོར་བ་ལ་སོགས་པ་ཡང་མ་སྤངས་པ་ཡིན་ཏེ། དེ་ལྟར་ན་དོན་འདི་དང་ཡང་དེ་དག་ཏུ་ཤིན་ཏུ་མཐུན་པ་ཡིན་ནོ། །དེ་དག་གིས་ནི་འདོད་པ་ལ་སོགས་པའི་ཉེ་བར་ལེན་པའི་སྤང་བ་དང༌། ཡོངས་སུ་ཤེས་པ་ཡང་བཤད་པ་ཡིན་ཏེ། ཀུན་དུ་སྦྱོར་བ་ལ་སོགས་པ་ཐུན་མོང་ཡིན་པའི་ཕྱིར་དང༌། འཇིག་ཚོགས་ལ་ལྟ་བས་རྒྱས་པ་ཡིན་པའི་ཕྱིར་རོ།། །།རྟེན་ཅིང་འབྲེལ་པར་འབྱུང་བ་དང་པོ་དང་རྣམ་པར་དབྱེ་བ་བསྟན་པ་རྒྱ་ཆེར་འགྲེལ་པ། བམ་པོ་དགུ་པ། ཅིའི་ཕྱིར་ལེན་པ་རྣམ་པ་བཞིར་གཞག །ཇི་སྐད་དུ་མདོ་སྡེ་གཞན་ལས། དགེ་སློང་དག་ཉེ་བར་ལེན་པར་འགྱུར་བའི་ཆོས་རྣམས་དང༌། ཉེ་བར་ལེན་པ་ཡང་བཤད་པར་བྱའོ། །ཉེ་བར་ལན་བར་འགྱུར་བའི་ཆོས་རྣམས་གང་ཞེ་ན། མིང་དང་གཟུགས་ནས་ཡིད་དང་ཆོས་ཞེས་བྱ་བའོ། །ཉེ་བར་ལེན་པ་གང་ཞེ་ན། འདི་ལ་འདུན་པ་དང་འདོད་ཆགས་གང་ཡིན་པ་འདི་ནི་འདིར་ཉེ་བར་ལེན་པ་ཡིན་ནོ་ཞེས་གསུངས་པ་ལྟར་མ་ཡིན་ནམ་ཞེ་ན། ཁྱིམ་པ་རྣམས་ནི་ཕལ་ཆེར་འདོད་པ་ཉེ་བར་ལེན་པ་ཡིན་ནོ་ཞེས་བྱ་བ་ནི་ཁྱིམ་པ་མང་དུ་འདོད་པ་ཉེ་བར་ལེན་པ་ཡིན་གྱི། ལྟ་བ་ཉེ་བར་ལེན་པ་ཡང་མེད་པ་ནི་མ་ཡིན་ནོ། །རབ་ཏུ་བྱུང་བ་འདི་ལས་ཕྱི་རོལ་པ་ཕལ་ཆེར་ནི་དེ་ལས་གཞན་པ་ལ་སྟེ། འདོད་པ་ཉེ་བར་ལེན་པ་དེ་ལས་གཞན་པ་ལའོ། །ཕལ་ཆེར་ཞེས་བྱ་བ་ནི་མང་དུ་སྟེ། འདོད་པ་ཉེ་བར་ལེན་པ་ཡང་མེད་པ་ནི་མ་ཡིན་ནོ། །འདི་ལས་ཕྱི་རོལ་པ་ཞེས་བྱ་བ་ནི་བསྟན་པ་
འདི་ལ་ཕྱི་རོལ་པ་སྟེ། མུ་སྟེགས་ཅན་གཞན་ཞེས་བྱ་བའི་དོན་ཏོ། །འདི་ལྟ་སྟེ་ཞེས་རྒྱས་པར་འབྱུང་བ་ནི་འདི་ལྟ་སྟེ་འདི་ལས་ཕྱི་རོལ་པ་དེ་དག་ནི་དེ་ལས་གཞན་པ་ལ་ཡིན་ནོ། །དེ་སྟོན་པ་ནི་འདི་ལྟ་སྟེ་འདི་ལས་ཕྱི་རོལ་པ་དེ་དག་འདོད་པ་རྣམས་སྦངས་ནས་རབ་ཏུ་བྱུང་སྟེ་མ་འོངས་པ་ན་འདོད་པ་དང་མི་འདོད་པ་མྱོང་བ་རྣམས་དང་ལྡན་པ་དང་བྲལ་བར་འདོད་པས་ཡོད་པར་བྱ་བའི་ཕྱིར་རམ། མེད་པར་བྱ་བའི་ཕྱིར་རབ་ཏུ་འབྱུང་ངོ་ཞེས་བྱ་བ་ནི་འདོད་པ་འབྱུང་བ་རྣམས་དང་ལྡན་པར་འདོད་པས་ཕྱིས་ཀྱང་བདེ་བ་འབྱུང་བར་བྱའོ་ཞེས་ཡོད་པར་བྱ་བའི་ཕྱིར་རབ་ཏུ་འབྱུང་ངོ༌། །མི་འདོད་པ་བྱུང་བ་རྣམས་དང་བྲལ་བར་འདོད་ནས་འཁོར་བ་ན་ཕྱིས་ཀྱང་སྡུག་བསྔལ་མང་པོ་མེད་པར་བྱའོ་ཞེས་མེད་པར་བྱ་བའི་ཕྱིར་རབ་ཏུ་འབྱུང་ངོ༌། །རབ་ཏུ་བྱུང་ནས་ཀྱང་བསམ་གཏན་དང་རྟོག་པའི་བྱེ་བྲག་ལ་བརྟེན་ནས་རྟག་པར་ལྟ་བའམ། ཆད་པར་ལྟ་བ་འབྱུང་བར་འགྱུར་རོ་ཞེས་བྱ་བ་ནི་ཚངས་པའི་དྲ་བའི་མདོ་ལས་རྒྱས་པར་ཇི་སྐད་དུ་གསུངས་པ་ལྟ་བུའོ། །དེ་དག་ཀྱང་གོ་རིམས་བཞིན་དུ་ཡོད་པར་ལྟ་བ་ལ་བརྟེན་པའམ། མེད་པར་ལྟ་བ་ལ་བརྟེན་པ་ཡིན་ནོ་ཞེས་བྱ་བ་ནི་རྟག་པར་ལྟ་བ་ནི་ཡོད་པར་ལྟ་བ་ལ་བརྟེན་པ་ཡིན་ནོ། །ཆད་པར་ལྟ་བ་ནི་མེད་པར་ལྟ་བ་ལ་བརྟེན་པ་ཡིན་ནོ། །དེ་ལྟར་ན་རེ་ཞིག་དེ་དག་ནི་ལྟ་བ་ཉེ་བར་ལེན་པ་ཡིན་ནོ། །ཚུལ་ཁྲིམས་དང་བརྟུལ་ཞུགས་ཀྱང་དེ་དང་རྗེས་སུ་འབྲེལ་པ་ཡིན་ནོ་ཞེས་བྱ་བ་ནི་ཡོད་པར་ལྟ་བ་དང༌། མེད་པར་ལྟ་བ་དེ་གཉིས་དང་རྗེས་སུ་འབྲེལ་པ་ནི་དེས་བསྐྱེད་པ་དང་རྗེས་སུ་མཐུན་པའོ། །དེ་ལྟར་ན་དེ་དག་ནི་ཚུལ་ཁྲིམས་དང་བརྟུལ་ཞུགས་ཉེ་བར་ལེན་པ་ཡིན་ནོ། །གཞན་ལྟ་བར་གཏོགས་པ་དེ་དག་ཀྱང་ལྟ་བ་གཉིས་ལ་བརྟེན་པ་ཡིན་བར། ཇི་སྐད་དུ་བཅོམ་ལྡན་འདས་ཀྱིས་ཞེས་རྒྱས་པར་འབྱུང་བ་ཡིན་ནོ། །བདག་ཏུ་སྨྲ་བ་ཡང་ཡོད་པར་ལྟ་བ་དང༌། མེད་པར་ལྟ་བ་གཉིས་ལ་བརྟེན་བ་ཡིན་ཏེ། མ་འོངས་པ་ན་བདག་ཡོད་པ་དང་མེད་པར་ཡོངས་སུ་རྟོག་པའི་ཕྱིར་ཏེ། ཡོད་པར་ལྟ་བ་ནི་མ་འོངས་པ་ན་ཡང་བདག་ཡོད་པར་རྟོག་པར་བྱེད་དེ། །མེད་པར་ལྟ་བ་ནི་མེད་པར་རོ། །དེ་ཉིད་ཀྱི་ཕྱིར་བདག་ཏུ་ལྟ་ནི་ལྟ་བ་ཉེ་བར་ལེན་པའི་ནང་དུ་འདུས་པ་ཡིན་ཏེ་ཞེས་བྱ་བ་ནི་གང་གི་ཕྱིར་དེ་ནི་གཉིས་ལ་བརྟེན་པ་ཡང་ཡིན་པས་སོ། །འདི་ལས་ཕྱི་རོལ་པ་ཐམས་ཅད་ཀྱིས་དེ་ཉེ་བར་ལེན་པའི་ཕྱིར་རོ་ཞེས་བྱ་བ་ནི་དེའི་
ཕྱིར་འདི་ལས་ཕྱི་རོལ་པ་དེ་དག་ཐམས་ཅད་བདག་ཏུ་སྨྲ་བ་ཉེ་བར་ལེན་པར་མཐུན་པ་ཡིན་ནོ། །དེ་བས་ན་བདག་ཏུ་སྨྲ་བ་ཉེ་བར་ལེན་པ་སྤངས་པ་དང་ཡོངས་སུ་ཤེས་པ་འཆད་པར་མི་བྱེད་དེ། འདི་ལྟར་བདག་ཏུ་ལྟ་བ་ཅན་རྣམས་ནི་བདག་ཏུ་སྨྲ་བ་ཉེ་བར་ལེན་པ་སྤངས་པར་འཆད་པ་རིགས་པ་མ་ཡིན་ནོ། །གལ་ཏེ་འཆད་པར་བྱེད་ན་དེའི་ཕྱིར་ཕྱི་རོལ་པ་མ་ཡིན་པར་འགྱུར་རོ། །དེ་ཉིད་ཀྱི་ཕྱིར་བཅོམ་ལྡན་འདས་ཀྱིས་དགེ་སློང་ངམ་ཞེས་རྒྱས་པར་གསུངས་སོ། །སྲེད་པ་ནི་གསུམ་དུ་བསྟན་ལ་ཞེས་བྱ་བ་ནི་འདོད་པའི་སྲེད་པ་དང༌། གཟུགས་ཀྱི་སྲེད་པ་དང༌། གཟུགས་མེད་པའི་སྲེད་པའོ། །ཉེ་བར་ལེན་པ་ནི་བཞི་ཡིན་ན་ཞེས་བྱ་བ་ནི་འདོད་པ་ཉེ་བར་ལེན་པ་ལ་སོགས་པ་ཇི་སྐད་དུ་བསྟན་པ་རྣམས་སོ། །གང་ཞིག་གང་གི་རྐྱེན་གྱིས་ཡིན་ཞེ་ན་ཞེས་བྱ་བ་ནི་ཉེ་བར་ལེན་པ་གང་ཞིག་སྲེད་པ་གང་གི་རྐྱེན་གྱིས་ཡིན་ཞེས་བྱ་བའི་དོན་ཏོ། །འདོད་པའི་སྲེད་པའི་རྐྱེན་གྱིས་འདོད་པ་ཉེ་བར་ལེན་པ་ཡིན་ཏེ་ཞེས་བྱ་བ་ནི་གཟུགས་དང་གཟུགས་མེད་པའི་སྲེད་པའི་རྐྱེན་གྱིས་ནི་མ་ཡིན་ཏེ། འདོད་པའི་འདོད་ཆགས་དང་བྲལ་བ་རྣམས་ལ་ངེས་སྲིད་པ་ཀུན་དུ་མི་འབྱུང་བའི་ཕྱིར་རོ། །མཐོང་བའི་ཆོས་ཁོ་ན་ལ་ཞེས་བྱ་བ་ནི་མ་འོངས་པ་ན་བདེ་བ་དང་སྡུག་བསྔལ་དང་ལྡན་པ་དང་བྲལ་བར་བྱ་བའི་ཕྱིར་མ་ཡིན་གྱི། འོ་ན་ཅི་ཞེ་ན། ད་ལྟར་བྱུང་བའི་ཚེ་ལ་བདེ་བ་དང་ལྡན་པར་འདོད་པ་དང༌། སྡུག་བསྔལ་དང་བྲལ་བར་འདོད་པ་རྣམས་ཀྱི་ནི། འདོད་པ་ན་སྤྱོད་པའི་སྲེད་པ་གང་ཡིན་པ་འདོད་པའི་ཁམས་སུ་གཏོགས་པ་དེ་ལ་བརྟེན་ནས་དེ་འབྱུང་བ་ཡིན་ཏེ། སྲེད་པ་ལ་བརྟེན་ནས་དེའི་འདོད་པ་ཉེ་བར་ལེན་པ་འབྱུང་བ་ཡིན་ནོ། །དེ་དག་མ་འོངས་པ་ན་འདོད་པ་དང་མི་འདོད་པ་ཞེས་རྒྱས་པར་འབྱུང་བ་ལ། འདོད་པ་མྱོང་བ་དང་ལྡན་པར་འདོད་པ་དང༌། མི་འདོད་པ་མྱོང་བ་དང་བྲལ་བར་འདོད་པ་རྣམས་ཀྱི། འདོད་པ་ན་སྤྱོད་པ་ཉིད་ཀྱི་ཡོད་པར་སྲེད་པ་དང་མེད་པར་སྲེད་པ་རྣམས་ཏེ། དེ་ལ་འདོད་པ་མྱོང་བ་དང་ལྡན་པར་འདོད་པ་རྣམས་ཀྱི་ནི་ཡོད་པར་སྲེད་པ་དང༌། མི་འདོད་པ་མྱོང་བ་དང་བྲལ་བར་འདོད་པ་རྣམས་ཀྱི་ནི་མེད་པར་སྲེད་པ་དང༌། གང་ཡང་གཟུགས་དང་གཟུགས་མེད་པ་ན་སྤྱོད་པའི་ཡོད་པར་སྲེད་པའམ། མེད་པར་སྲེད་པ་དེ་དག་གི་རྐྱེན་གྱིས་ནི་གཞན་ཡིན་ནོ་ཞེས་བྱ་བ་ནི་ལྟ་བ་དང༌། ཚུལ་ཁྲིམས་དང་བརྟུལ་ཞུགས་དང༌། བདག་ཏུ་སྨྲ་བ་ཉེ་བར་ལེན་པ་རྣམས་སོ། །སྲེད་
པ་གང་གི་རྐྱེན་གྱིས་བདག་ཏུ་སྨྲ་བ་ཉེ་བར་ལེན་པ་ཡིན་ཞེ་ན་ཞེས་བྱ་བ་ནི་མ་འོངས་པ་ན་འདོད་པ་དང་མི་འདོད་པའི་ཚོར་བ་དང་ལྡན་པ་དང་བྲལ་བར་འདོད་པ་རྣམས་ཀྱི་ཚོར་བ་ལ་སྲེད་པ་བརྟེན་ནས་བདག་ཏུ་སྨྲ་བའམ། བདག་ཏུ་སྨྲ་བར་མངོན་པར་ཞེན་པ་འདུན་པ་དང་འདོད་ཆགས་འབྱུང་བ་ནི་མ་ཡིན་གྱི། བདག་ཏུ་ལྟ་བ་ཡོད་ན་ནི་བདག་ལ་དགའ་བ་རིགས་པ་ཡིན་ནོ་ཞེ་ན་ཞེས་བྱ་བ་ཡིན་ནོ། །དེའི་ཕྱིར་ས་གང་བའི་ཚོར་བ་ལ་སྲེད་པ་ཀུན་དུ་འབྱུང་ན་ཞེས་རྒྱས་པར་སྨྲས་ཏེ། ས་དེ་བའི་ལུས་ལ་ཉེ་བར་ལེན་པའི་ཕུང་པོ་ལྔའི་མཚན་ཉིད་ལ། བྱིས་པ་བདེན་པ་མ་མཐོང་བ་རྣམས་བདག་རྟག་པ་དང༌། རང་དབང་ཅན་དང༌། བྱེད་པ་པོ་དང༌། ཚོར་བ་པོ་ལ་སོགས་པའི་དངོས་པོར་མངོན་པར་ཞེན་ཅིང་མངོན་པར་དགའ་སྟེ། ཚོལ་བར་བྱེད། འདོད་ཆགས་ཀྱིས་དེ་ལ་ཆགས་པར་བྱེད་དོ། །དེ་ལྟར་ན་བདག་ཏུ་སྨྲ་བ་ཉེ་བར་ལེན་པ་འདུན་པ་དང་འདོད་ཆགས་ཀྱི་མཚན་ཉིད་ནི་ཚོར་བ་ལ་སྲེད་པའི་རྐྱེན་གྱིས་ཡིན་ཏེ། དེ་བས་ན་བཅོམ་ལྡན་འདས་ཀྱིས་ས་འོག་གི་མདོ་སྡེ་ལས་རྒྱས་པར་གསུངས་པ་ཡིན་ནོ། །དེ་ལས་འདུ་བྱེད་དེ་དག་གོ་ཞེས་བྱ་བ་ནི་སྲེད་པ་དེ་ལས་སྔར་བསྟན་པའི་འདུ་བྱེད་བདག་ཏུ་ལྟ་བ་ཀུན་དུ་བརྟགས་པ་དེ་དག་རབ་ཏུ་འབྱུང་ཞེས་བྱ་བའི་དོན་ཡིན་ནོ། །འདོད་ཆགས་དང་མ་བྲལ་བ་རྣམས་ཀྱི་འདོད་པ་ཉེ་བར་ལེན་པའོ་ཞེས་བྱ་བ་ནི་བདག་ཏུ་འདུན་པ་དང་འདོད་ཆགས་མ་སྤངས་པའི་ཕྱིར་རོ། །འདོད་ཆགས་དང་བྲལ་བ་རྣམས་ཀྱི་ནི་གཞན་ཡིན་ཏེ་ཞེས་བྱ་བ་ནི་དེ་ཡང་འོག་ཉིད་ནས། དེ་དག་ལ་སྲེད་པའི་ཉོན་མོངས་པ་ནི་ཡོད་དེ། ས་གང་ལ་འདོད་ཆགས་དང་མ་བྲལ་བ་དེ་ལ་འདུན་པ་དང་འདོད་ཆགས་ཉེ་བར་ལེན་པ་ཡིན་ནོ་ཞེས་འཆད་པར་བྱེད་པ་ཡིན་ནོ། །ཉོན་མོངས་པ་ཡོངས་སུ་རྫོགས་པའི་ཞེས་རྒྱས་པར་འབྱུང་བ་ལ། ཉོན་མོངས་པ་ཡོངས་སུ་རྫོགས་པ་ནི་གང་ལ་ལྟ་བའི་ཀུན་ནས་ཉོན་མོངས་པ་ཡང་ཡོད། སྲེད་པའི་ཀུན་ནས་ཉོན་མོངས་པ་ཡང་ཡོད་པ་སྟེ། ཉོན་མོངས་པ་ཡོངས་སུ་རྫོགས་པའི་གང་ཟག་གི་དབང་དུ་བྱས་ནས། བཅོམ་ལྡན་འདས་ཀྱིས་ཉེ་བར་ལེན་པ་འདི་བཞི་གསུངས་པ་ཡིན་ནོ། །གཞན་དུ་ནི་ཐ་དད་པ་མེད་པར་གསུངས་ཏེ་ཞེས་རྒྱས་པར་འབྱུང་བ་ནི། གཞན་དུ་ཞེས་བྱ་
བ་ནི་མདོ་སྡེ་གཞན་ལས། བཅོམ་ལྡན་འདས་ཀྱིས་ཐ་དད་པ་རྣམ་པ་བཞི་ནི་མ་ཡིན་གྱི། ཐ་དད་པ་མེད་པར་བསྟན་པ་ནི་ཉ་བར་ལེན་པར་འགྱུར་བའི་ཆོས་རྣམས་གང་ཞེ་ན། མིག་དང་གཟུགས་དང་ཞེས་རྒྱས་པར་འབྱུང་བ་དང༌། ཉེ་བར་ལེན་ལེན་པ་གང་ཞེ་ན། གང་ལ་འདུན་པ་དང་འདོད་ཆགས་གང་ཡིན་པ་སྟེ། འདི་ནི་འདིར་ཉེ་བར་ལེན་པ་ཡིན་ནོ་ཞེས་བྱ་བ་ཡིན་ཏེ། ཆོས་འདི་པ་རྣམས་དང༌། འདི་ལ་ཕྱི་རོལ་པ་རྣམས་དང་མཐུན་པའི་ཉེ་བར་ལེན་པ་ཡིན་ནོ། །གཞན་དག་ན་རེ་བདག་ཏུ་སྨྲ་བ་ཉེ་བར་ལེན་པ་ཡང་དེ་དག་ལ་ཡོད་པ་ཡིན་ཏེ་ཞེས་བྱ་བ་ལ། དེ་དག་ལ་ཞེས་བྱ་བ་ནི་ཆོས་འདི་པ་རྣམས་ལའོ། །ལུས་ལ་བདག་གོ་སྙམ་པའི་འདུན་པ་དང༌། འདོད་ཆགས་གང་ཡིན་པའོ་ཞེས་བྱ་བ་ནི་ལུས་ལ་བདག་གོ་སྙམ་དུ་འདུན་པ་དང་འདོད་ཆགས་ལ་སོགས་ཀྱི་སྒོ་ནས་ཀྱང་བདག་ཏུ་ལྟ་བ་འབྱུང་བ་ཡིན་ནོ། །ཡང་ཞེས་བྱ་བ་ནི་ངའོ་སྙམ་པ་དང༌། སྲེད་པ་ཡང་ཞེས་བྱ་བ་ཡིན་ནོ། །དེ་བས་ན་བདག་ཏུ་སྨྲ་བ་ཉེ་བར་ལེན་པ་ཡང་དེ་དག་ལ་ཡོད་པ་ཡིན་ནོ་ཞེས་གཞན་དག་སྨྲའོ། །གཞན་རྒྱུ་དང༌། དེ་མ་ཐག་པ་དང༌། དམིགས་པའི་རྐྱེན་རྣམས་ཉེ་བར་ལེན་པ་མ་ཡིན་པར་འགྱུར་རོ་ཞེས་བྱ་བ་ནི་སྲེད་པ་ཁོ་ན་ཉེ་བར་ལེན་པའི་རྐྱེན་ཡིན་པས་སོ། །འདིར་ཉེ་བར་ལེན་པའི་རྒྱུའི་རྐྱེན་ནི་སྐལ་བ་མཉམ་པའི་རྒྱུ་ལ་སོགས་པ་ཡིན་པར་རིག་པར་བྱའོ། །དེ་མ་ཐག་པའི་རྐྱེན་ནི་སེམས་དང་སེམས་ལས་བྱུང་བ་འདས་མ་ཐག་པའོ། །དམིགས་པའི་རྐྱེན་ནི་འདོད་པ་དང༌། ལྟ་བ་དང༌། ཚུལ་ཁྲིམས་དང་བརྟུལ་ཞུགས་དང༌། བདག་ཏུ་སྨྲ་བ་ཡིན་ཏེ། འདིར་འདུན་པ་དང་འདོད་ཆགས་གང་ཡིན་པ་དེ་ཉེ་བར་ལེན་པ་ཡིན་པས་སོ། །མདོ་སྡེ་གཞན་ཡང་ཡོངས་སུ་སྤངས་པ་ཡིན་ཏེ། མ་རིག་པའི་རྒྱུས་ཀུན་དུ་འདོད་ཆགས་པ་དང༌། ཀུན་དུ་ཞེ་སྡང་བ་དང༌། ཀུན་དུ་གཏི་མུག་པའོ་ཞེས་བྱ་བ་ལ་ཀུན་དུ་འདོད་ཆགས་པ་ནི་འདིར་ལེན་པ་ཡིན་ནོ། །ཉེ་བར་ལེན་པའི་རྐྱེན་མ་རིག་པ་ཡིན་ཏེ། སྲེད་པ་འབའ་ཞིག་ནི་མ་ཡིན་ནོ། །དེ་བཞིན་དུ་གང་ཅུང་ཟད་འདོད་པ་མི་དགེ་བའི་ཆོས་ཞེས་རྒྱས་པར་འབྱུང་བ་འདིར་ཚིག་བྱེ་བྲག་ཏུ་མ་བྱས་པའི་ཕྱིར་འདོད་ཆགས་ཀྱང་མ་རིག་པའི་རྐྱེན་གྱིས་ཡིན་ནོ་ཞེས་བྱའོ། །དེ་བཞིན་དུ་འདུས་བྱས་གང་ཡིན་པ་དེ་ཐམས་ཅད་ཅེས་རྒྱས་པར་འབྱུང་བ་ནི་འདོད་ཆགས་ཀྱང་འདུ་བྱེད་ཀྱི་ཕུང་
པོར་བསྡུས་པ་ཡིན་ལ། དེའི་རྐྱེན་རེག་པ་ཡིན་པར་གྲུབ་བ་ཡིན་ནོ། །གལ་ཏེ་རྐྱེན་ཅན་ངེས་པ་ཡིན་ན་ནི་ཉེ་བར་ལེན་པ་ཁོ་ནའི་རྐྱེན་སྲེད་པ་ཡིན་གྱི། གཞན་གྱི་མ་ཡིན་པས་ཆོས་གཞན་གྱི་རྒྱུ་དང༌། དེ་མ་ཐག་པ་དང་དམིགས་པ་དང་བདག་པོའི་རྐྱེན་དུ་སྲེད་པ་ཡིན་པར་མི་འགྱུར་རོ་ཞེས་བྱ་བ་ནི་སྲེད་པ་ཡང་སེམས་དང་སེམས་ལས་བྱུང་བ་རྣམས་ཀྱི་རྒྱུའི་རྐྱེན་ཡང་ཡིན་ཏེ། སྐལ་པ་མཉམ་པའི་རྒྱུ་ལ་སོགས་པས་བསྡུས་པའོ། །དེ་མ་ཐག་པའི་རྐྱེན་ཡང་ཡིན་ཏེ། འདས་མ་ཐག་པའོ། །དམིགས་པའི་རྐྱེན་ཡང་ཡིན་ཏེ། དེ་ལ་དམིགས་པའི་སེམས་དང་སེམས་ལས་བྱུང་བ་སྐྱེ་བའི་ཕྱིར་རོ། །བདག་པོའི་རྐྱེན་ཡང་ཡིན་ཏེ། དེའི་དབང་གིས་མི་དགེ་བའི་སེམས་དང་སེམས་ལས་བྱུང་བ་སྐྱེ་བའི་ཕྱིར་རོ། །དགེ་སློང་དག་ལས་ཀྱི་རྒྱུ་ནི་སྲེད་པ་རྐྱེན་ནི་སྲེད་པ་ཞེས་བྱ་བ་ལ་སོགས་པ་ཡོངས་སུ་སྤངས་པར་འགྱུར་རོ་ཞེས་བྱ་བ་ནི་རྐྱེན་ཅན་ངེས་པ་ཡིན་ན་ནི་སྲེད་པ་ནི་ལས་ཀྱི་རྒྱུ་ཡིན་པར་མི་འགྲུབ་པར་འགྱུར་རོ། །ངེས་པ་མེད་ཀྱང་བཤད་པ་དོན་མེད་པ་མ་ཡིན་ཏེ། གཙོ་བོའི་རྐྱེན་བསྟན་པའི་ཕྱིར་དང༌། དེ་བཞིན་དུ་བཤད་པའི་ཕྱིར་རོ་ཞེས་བྱ་བ་ནི་སྲེད་པའི་རྐྱེན་གྱིས་ལེན་པ་ཞེས་དེ་བཞིན་དུ་བཤད་པའི་ཕྱིར་རོ། །ཇི་ལྟར་སྲེད་པ་ནི་ལེན་པའི་གཙོ་བོའི་རྐྱེན་ཡིན་པ་དེ་ལྟར་སྟོན་པ་ནི། འདི་ལྟར་བ་ལ་སྲེད་པས་དེ་དང་ལྡན་པ་བྲལ་བར་བྱ་བའི་ཕྱིར་འདོད་པ་ལ་སོགས་པ་ཉེ་བར་ལེན་པ་ཡིན་ནོ་ཞེས་བྱ་བའོ། །དེ་ཡང་མཐོང་བའི་ཆོས་ཁོ་ན་ལ་བདེ་བ་དང་སྡུག་བསྔལ་དང་ལྡན་པ་དང་བྲལ་བར་འདོད་པ་རྣམས་ཀྱི་ནི་འདོད་པ་ན་སྤྱོད་པའི་སྲིད་པ་གང་ཡིན་པ་དེ་ལ་བརྟེན་ནས་དེ་འབྱུང་བ་ཡིན་ནོ། །གང་དག་མ་འོངས་པ་ན་འདོད་པ་དང་མི་འདོད་པ་མྱོང་བ་རྣམས་དང༌། ལྡན་པ་དང་བྲལ་བར་འདོད་པ་རྣམས་ཀྱི་ནི་འདོད་པ་ན་སྤྱོད་པ་ཉིད་ཀྱི་ཡོད་པར་སྲེད་པ་དང་མེད་པར་སྲེད་པ་རྣམས་དང༌། གང་ཡང་གཟུགས་དང་གཟུགས་མེད་པ་ན་སྤྱོད་པ་སྟེ། དེ་དག་གི་རྐྱེན་གྱིས་ནི་གཞན་ཡིན་ནོ་ཞེས་བྱ་བ་སྔར་སྨྲས་ཟིན་ཏོ། །ཉེ་བར་ལེན་པ་ཐ་དད་པ་སོ་སོ་ནི་མ་རིག་པ་ལ་སོགས་པ་དང༌། ཚོར་བའི་སྲེད་པ་ལ་ལྟོས་པ་ཡིན་གྱི་དེ་ལ་མ་རིག་པ་ལ་སོགས་པ་ནི་མ་ཡིན་ནོ་ཞེས་བྱ་བ་ནི་མ་རིག་པ་ལ་སོགས་པ་ནི་བྱེ་བྲག་མེད་པར་འདུན་པ་དང་འདོད་ཆགས་ཀྱི་རྒྱུ་ཡིན་པའི་ཕྱིར་རོ། །ལེན་པའི་དོན་བསྡུས་པ་རྣམ་པར་གཞག་པ་ནི་འདིར་
རྣམ་པ་བཅུར་བསྟན་ཏེ། རབ་ཏུ་དབྱེ་བ་རྣམ་པར་གཞག་པ་ནི་ཇི་སྐད་དུ། ལེན་པ་གང་ཞེ་ན། ལེན་པ་རྣམ་པ་བཞི་སྟེ་ཞེས་རྒྱས་པར་བསྟན་པ་ཡིན་ནོ། །རང་གི་ངོ་བོ་རྣམ་པར་གཞག་པ་ནི་ཇི་སྐད་དུ། འདོད་པ་ལ་སོགས་པ་གསུངས་པ་དེ་དག་ལ་འདུན་པ་དང་འདོད་ཆགས་གང་ཡིན་པ་དེ་ཉེ་བར་ལེན་པ་ཡིན་ཏེ་ཞེས་བསྟན་པའོ། །བྱེད་པ་རྣམ་པར་གཞག་པ་ནི་ཇི་སྐད་དུ། དེས་འདོད་པ་ལ་སོགས་པ་དེ་དག་ལེན་པར་བྱེད་དེ། དེ་དག་ཉིད་དེ་དག་ལ་ལེན་པ་ཉིད་དེ་ཞེས་བསྟན་པའོ། །བྱེད་པ་རྣམ་པར་གཞག་པ་ནི་ཇི་སྐད་དེས་འདོད་པ་ལ་སོགས་པ་དེ་དག་ལེན་པར་བྱེད་དེ། དེ་དག་ཉིད་དེ་དག་ལ་ལེན་པ་ཉིད་དེ་ཞེས་བསྟན་པའོ། །རྐྱེན་ཁྱད་པར་ཅན་རྣམ་པར་གཞག་པ་ནི་ཇི་སྐད་དུ། གལ་ཏེ་ཚོར་བ་ལ་སྲེད་པ་ནི་འདོད་པ་ལ་སོགས་པ་ལ་སྲེད་པའི་རྣམ་གྲངས་ཀྱི་རྐྱེན་ཡིན་པར་བསྟན་ན་དེ་ལ་ཉེས་པ་ཅི་ཡོད་ཅེས་བསྟན་པ་ཡིན་ནོ། །འདོད་པ་ཐ་དད་པ་རྣམ་པར་གཞག་པ་ནི་ཇི་སྐད་དུ། དེ་བས་ན་ཀུན་དུ་རྟོག་པའི་འདོད་ཆགས་ཉིད་འདིར་འདོད་པ་ཡིན་ལ། དེ་ཉིད་ཉེ་བར་ལེན་པ་ཡིན་ནོ། །ལྟ་བ་དང་ཚུལ་ཁྲིམས་དང་བརྟུལ་ཞུགས་དང༌། བདག་ཏུ་སྨྲ་བའི་ཡང་དེ་བཞིན་ཏེ། དང་པོ་ཇི་ལྟར་བསྟན་པ་བཞིན་ཏེ། དེ་དག་ཉིད་ལེན་པ་ཡིན་ནོ་ཞེས་རྒྱས་པར་བསྟན་པ་ཡིན་ནོ། །རབ་ཏུ་དབྱེ་བ་འདོད་པ་དགག་པ་རྣམ་པར་གཞག་པ་ནི་ཇི་སྐད་དུ་རབ་ཏུ་བྱེད་པ་པ་དག་དེ་ལ་སྒྲོ་འདོགས་པར་བྱེད་པ་ཞེས་བྱ་བ་རྒྱས་པར་བྱས་ནས་དེ་བས་ཉེ་བར་ལེན་པ་ལ་ཡང་སྒྲོ་བཏགས་ལ་བྱས་པར་སྲིད་པ་ཡིན་ནོ་ཞེས་བྱ་བ་ལ་སོགས་པའི་བར་དུ་ཡིན་ནོ། །དགོས་པ་རྣམ་པར་གཞག་པ་ནི་ཇི་སྐད་དུ། ཅིའི་ཕྱིར་ལེན་པ་རྣམ་པ་བཞིར་གཞག་ཅེ་ན། ཁྱིམ་པའི་ཕྱོགས་དང༌། རབ་ཏུ་བྱུང་བའི་ཕྱོགས་ལས་བརྩམས་ཏེ་ཞེས་རྒྱས་པར་བསྟན་པའོ། །རྐྱེན་རབ་ཏུ་དབྱེ་བ་རྣམ་པར་གཞག་པ་ནི་ཇི་སྐད་དུ། སྲེད་པ་ནི་གསུམ་དུ་བསྟན་ལ། ཉེ་བར་ལེན་པ་ནི་བཞི་ཡིན་ན་གང་ཞིག་གང་གི་རྐྱེན་གྱིས་ཡིན་ཞེ་ན་ཞེས་རྒྱས་པར་བསྟན་པ་ཡིན་ནོ། །ཉེ་བར་ལེན་པ་ཐ་དད་པ་མེད་པར་རྣམ་པར་གཞག་པ་ནི་ཇི་སྐད་དུ། གཞན་དུ་ནི་ཐ་དད་པ་མེད་པར་གསུངས་ཏེ། ཉེ་བར་ལེན་པར་འགྱུར་བའི་ཆོས་རྣམས་གང་ཞེ་ན། མིག་དང་གཟུགས་དང་ཞེས་རྒྱས་པར་འབྱུང་བ་དང༌། ཉེ་བར་ལེན་པ་གང་ཞེ་ན། གང་ལ་
འདུན་པ་དང་འདོད་ཆགས་གང་ཡིན་པ་སྟེ། དེ་ནི་འདིར་ཉེ་བར་ལེན་པ་ཡིན་ནོ་ཞེས་བསྟན་པའོ། །གཙོ་བོའི་རྐྱེན་རྣམ་པར་གཞག་པ་ནི་ཇི་སྐད་དུ། གཙོ་བོའི་རྐྱེན་བསྟན་པའི་ཕྱིར་དང༌། དེ་བཞིན་དུ་བཤད་པའི་ཕྱིར་རོ་ཞེས་རྒྱས་པར་བསྟན་པའོ། །ལེན་པ་རྣམ་པར་འབྱེད་པའོ།། །། ལེན་པའི་རྐྱེན་གྱིས་སྲིད་པ་ཞེས་རྒྱ་ཆེར་འབྱུང་བ་ལ། ལེན་པའི་རྐྱེན་གྱིས་སྲིད་པ་ཞེས་ཀྱང་གསུངས། སྲེད་པ་གང་ཞེ་ན། ཉེ་བར་ལེན་པའི་ཕུང་པོ་ལྔའོ་ཞེས་མདོ་སྡེ་གཞན་ལས། བཅོམ་ལྡན་འདས་ཀྱིས་ཐ་དད་པ་མེད་པར་ཡང་གསུངས། མདོ་སྡེ་གཞན་ལས། དམྱལ་བའི་སྲིད་པ་དང༌།། ཡི་དགས་ཀྱི་སྲིད་པ་དང༌། བྱོལ་སོང་གི་སྲིད་པ་དང༌། མིའི་སྲིད་པ་དང༌། ལྷའི་སྲིད་པ་དང༌། ལས་ཀྱི་སྲིད་པ་དང༌། བར་མ་དོའི་སྲིད་པའོ་ཞེས་སྲིད་པ་བདུན་ཐ་དད་པར་གསུངས་ན། སྲེད་པ་གང་ཞེ་ན། དེའི་ཕྱིར་སྲིད་པ་གསུམ་སྟེ། འདོད་པའི་སྲིད་པ་དང༌། གཟུགས་ཀྱི་སྲིད་པ་དང༌། གཟུགས་མེད་པའི་སྲིད་པའོ་ཞེས་བསྟན་ཏོ། །འདིར་ཡང་ཚིག་སྦྱར་ན་ཐལ་བར་འགྱུར་བ་སྔ་མ་བཞིན་དུ་གནས་ཏེ། ཇི་ལྟ་ཞེ་ན། ཅི་གཟུགས་མཐོང་བ་བཞིན་དུ་རིག་པར་བྱ་སྟེ། ཇི་ལྟར་གཟུགས་ལ་མཐོང་བ་ཞེས་བྱ་བ་དེ་བཞིན་དུ་འདོད་པ་ལ་སོགས་པའི་སྲིད་པ་ནི་འདོད་པའི་སྲིད་པ་དང༌། གཟུགས་ཀྱི་སྲིད་པ་དང༌། གཟུགས་མེད་པའི་སྲིད་པ་ཡིན་ནམ། འོན་ཏེ་གཟུགས་ཀྱི་སྐྱེ་མཆེད་བཞིན་ཏེ། ཇི་ལྟར་གཟུགས་ཉིད་སྐྱེ་མཆེད་ཡིན་པས་གཟུགས་ཀྱི་སྐྱེ་མཆེད་ཅེས་བྱ་བ་དེ་བཞིན་དུ་འདོད་པ་ལ་སོགས་པ་ཉིད་སྲིད་པ་ཡིན་པས་འདོད་པའི་སྲིད་པ་དང༌། གཟུགས་ཀྱི་སྲིད་པ་དང༌། གཟུགས་མེད་པའི་སྲིད་པ་ཞེས་བྱ་ཞེ་ན། འདོད་པ་དང་རབ་ཏུ་ལྡན་པའི་སྲིད་པའོ། །དེ་བཞིན་དུ་ལྷག་མ་རྣམས་ཀྱང་ཞེས་བྱ་བ་ནི་གཟུགས་དང་རབ་ཏུ་ལྡན་པའི་སྲིད་པ་དང༌། གཟུགས་མེད་པ་དང་རབ་ཏུ་ལྡན་པའི་སྲིད་པ་ནི་གཟུགས་མེད་པའི་སྲིད་པ་ཞེས་བྱ་བ་ཡིན་ནོ། །ཚིག་པར་མ་མི་མངོན་པའི་ཕྱིར་སྦྲང་རྩིའི་ཆུ་ལྟ་བུ་དང་ཞེས་བྱ་བ་ནི་རབ་ཏུ་ལྡན་པའི་ཚིག་བར་མ་མི་མངོན་པར་བྱས་ཏེ། དཔེར་ན་སྦྲང་རྩི་དང་བསྲེས་པའི་ཆུ་ལ་སྦྲང་རྩིའི་ཆུ་ཞེས་ཚིག་བར་མ་མི་མངོན་པར་བྱས་ནས་སྦྲང་རྩིའི་ཆུ་ཞེས་བྱ་བ་ཡིན་ནོ། །བུ་རམ་འོ་མ་བཞིན་ནོ་ཞེས་བྱ་བ་
ནི་ཇི་ལྟར་བུ་རམ་དང་བསྲེས་པའི་འོ་མ་ལ་བུ་རམ་འོ་མ་ཞེས་ཚིག་བར་མ་མི་མངོན་པ་ཡིན་པ་དེ་བཞིན་ནོ། །འདོད་པ་དང་རབ་ཏུ་ལྡན་པའི་སྲིད་པ་ནི་འདོད་པའི་སྲིད་པ་དང༌། གཟུགས་དང་རབ་ཏུ་ལྡན་པའི་སྲིད་པ་ནི་གཟུགས་ཀྱི་སྲིད་པ་དང༌། གཟུགས་མེད་པ་དང་རབ་ཏུ་ལྡན་པའི་སྲིད་པ་ནི་གཟུགས་མེད་པའི་སྲིད་པ་ཞེས་གསུངས་ཀྱི། ངོ་བོ་ཉིད་ནི་མ་གསུངས་ན། སྲིད་པ་ཡང་གང་ཞེ་ན། དེའི་ཕྱིར་ཉེ་བར་ལེན་པའི་ཕུང་པོ་ལྔའོ་ཞེས་རྒྱས་པར་སྨྲས་སོ། །དེ་དག་ཀྱང་ཁམས་གསུམ་དུ་ཇི་ལྟར་རིག་པར་བྱའོ་ཞེས་བྱ་བ་ནི་ཕུང་པོ་ལྔ་པོ་དེ་དག་འདོད་པའི་ཁམས་དང་གཟུགས་ཀྱི་ཁམས་ན་ནི་ལྔ་ཆར་རོ། །གཟུགས་མེད་པའི་ཁམས་ན་ནི་བཞིའོ། །དེ་ལྟ་ན་འོ་ན་ཞེས་རྒྱས་པར་འབྱུང་བ་ནི་འོ་ན་དེ་ལྟ་ན་ཉེ་བར་ལེན་པའི་ཕུང་པོ་ལྔ་དང་བཞི་དག་ཁམས་གསུམ་དུ་སྲིད་པ་ཡིན་ལ། སྲིད་པ་ཉིད་སྐྱེ་བ་ཡིན་ན་སྲིད་པའི་རྐྱེན་གྱིས་སྐྱེ་བ་ཞེས་བྱ་བ་ཕུང་པོ་ལྔ་ལ་མ་གཏོགས་པ་སྐྱེ་བ་གང་ཞིག་སྲིད་པའི་རྐྱེན་གྱིས་ཡིན་ཏེ། སྐྱེ་བ་ཉིད་སྐྱེ་བའི་རྐྱེན་གྱིས་ཡིན་ནོ་ཞེས་བསྟན་པར་འགྱུར་རོ་ཞེ་ན། འདིར་གཞན་ལས་ཀྱི་ངོ་བོ་དག་ནི་སྲིད་པ་ཡིན་པར་དགོངས་ལ། གཞན་དག་ནི་སྲིད་པའི་རྐྱེན་གྱིས་སྐྱེ་བ་རྣམ་པར་སྨིན་པའི་ངོ་བོ་ཡིན་ནོ། །དོན་དེ་ཉིད་སྟོན་པར་བྱེད་པ་ནི་འདི་སྐད་དུ། སྲིད་པ་གསུམ་པོ་དེ་དག་ཉིད་མདོ་སྡེ་གཞན་ལས་སྲིད་པ་བདུན་དུ་གསུངས་ཏེ། དམྱལ་བའི་སྲིད་པ་དང༌། བྱོལ་སོང་གི་སྲིད་པ་དང༌། ཡི་དགས་ཀྱི་སྲིད་པ་དང༌། ལྷའི་སྲིད་པ་དང༌། མིའི་སྲིད་པ་དང༌། ལས་ཀྱི་སྲིད་པ་དང༌། བར་མ་དོའི་སྲིད་པ་རྣམས་སོ། །འདོད་པའི་སྲིད་པ་ནི་བདུན་ཆར་ཡིན་ནོ། །གཟུགས་ཀྱི་སྲིད་པ་ནི་སྲིད་པ་གསུམ་ཡིན་ཏེ། ལྷའི་སྲིད་པ་དང༌། ལས་ཀྱི་སྲིད་པ་དང༌། བར་མ་དོའི་སྲིད་པའོ། །གཟུགས་མེད་པའི་སྲིད་པ་ནི་སྲིད་པ་གཉིས་ཏེ། ལྷའི་སྲིད་པ་དང༌། ལས་ཀྱི་སྲིད་པའོ། །སེམས་ཅན་རྣམས་གང་དུ་གང་གིས་འབྱུང་བ་དེ་སྲིད་པ་ཡིན་པའི་ཕྱིར་སྲིད་པ་བདུན་ཡིན་ཏེ། དམྱལ་བ་ལ་སོགས་པ་གང་དུ་དེ་དག་གི་སྲིད་པ་འབྱུང་བ་ནི་དམྱལ་པའི་སྲིད་པ་དང༌། བྱོལ་སོང་གི་སྲིད་པ་དང༌། ཡི་དགས་གི་སྲིད་པ་དང༌། མིའི་སྲིད་པ་དང༌། ལྷའི་སྲིད་པ་སྟེ། འདིར་འབྱུང་བས་ན་སྲིད་པ་ཞེས་བྱའོ། །རྒྱུ་གང་གིས་འབྱུང་བ་ནི་ལས་ཀྱི་སྟེ།
དེ་ནི་ལས་ཀྱི་སྲིད་པ་ཞེས་བསྟན་པ་ཡིན་ནོ། །རིམ་པ་གང་གིས་འབྱུང་བ་ནི་བར་མ་དོའི་སྲིད་པའི་རིམ་པ་སྟེ། དེ་ཡང་སྲིད་པ་ཡིན་པར་གསུངས་ཏེ། འདིས་འབྱུང་བར་བྱེད་པས་ན་ཞེས་བསྟན་ཏོ། །མདོ་སྡེ་གཞན་ལས་ཀྱང༌། ཀུན་དགའ་བོ་ལས་ནི་ཞེས་རྒྱས་པར་འབྱུང་བ་ནི་ཡང་སྲིད་པ་མངོན་པར་འབྱུང་བར་བྱེད་པའི་ལས་ནི་སྲིད་པའི་རང་གི་མཚན་ཉིད་ཡིན་པ་དང༌། མདོ་སྡེ་འདི་ལས་ཀྱང་མ་འོངས་པའི་སྐྱེ་བའི་རྐྱེན་ལས་ཉིད་སྲིད་པའི་སྒྲས་བསྟན་པ་ཡིན་ནོ་ཞེས་སྟོན་ཏོ། །རབ་ཏུ་བྱེད་པ་ལས་ཀྱང་འདོད་པའི་སྲིད་པ་གང་ཞེ་ན་ཞེས་རྒྱས་པར་འབྱུང་བ་འདིས་ཀྱང་ལས་ཀྱི་སྲིད་པ་ཉིད་གཟུགས་དང་གཟུགས་མེད་པ་དང་རབ་ཏུ་ལྡན་པའི་མ་འོངས་པ་ན་སྐྱེ་བའི་རྐྱེན་ཉིད་ཡིན་པར་འདི་ལས་གསུངས་སོ་ཞེས་སྟོན་ཏོ། །མ་འོངས་པ་ན་མངོན་པར་འགྲུབ་པར་མངོན་དུ་ཕྱོགས་པ་དང་ཞེས་བྱ་བ་ནི་མངོན་པར་འགྲུབ་པར་མངོན་དུ་གྱུར་པ་ནི་མངོན་པར་འགྲུབ་པར་མངོན་དུ་ཕྱོགས་པ་ཡིན་པས་སོ། །ལས་གང་ཞིག་གཟུགས་དང་རབ་ཏུ་ལྡན་པའི་ཞེས་བྱ་བ་སྔ་མ་བཞིན་ནོ་ཞེས་བྱ་བ་ཇི་ལྟར་ཡིན་ཞེ་ན། ལས་གང་ཞིག་གཟུགས་དང་རབ་ཏུ་ལྡན་པའི་ཉེ་བར་ལེན་པའི་རྐྱེན་གྱིས་ནི་མ་འོངས་པ་ན་མངོན་པར་འགྲུབ་པར་མངོན་དུ་ཕྱོགས་པ་དང༌། ལས་དེའི་རྣམ་པར་སྨིན་པ་གང་ཡིན་པའོ། །གཟུགས་མེད་པ་དང་རབ་ཏུ་ལྡན་པའི་ཞེས་བྱ་བ་སྔ་མ་བཞིན་ནོ་ཞེས་བྱ་བ་ཇི་ལྟར་ཡིན་ཞེ་ན། ལས་གང་ཞིག་གཟུགས་མེད་པ་དང་རབ་ཏུ་ལྡན་པའི་ཉེ་བར་ལེན་པའི་རྐྱེན་གྱིས་ཞེས་བྱ་བ་རྒྱས་པར་ཡིན་ནོ། །དེ་ནི་རྣམ་པར་སྨིན་པའི་རྐྱེན་གྱིས་མ་ཡིན་ནོ་ཞེས་བྱ་བ་ནི་ལས་ཀྱི་རྣམ་པར་སྨིན་པའི་རྐྱེན་གྱིས་མ་ཡིན་ནོ་ཞེས་བྱ་བའི་དོན་ཏོ། །འོན་ཀྱང་དེ་ནི་སྲིད་པ་ཡིན་ནོ་ཞེས་བྱ་བ་ནི་ལས་དེ་ལས་རྣམ་པར་སྨིན་པ་འབྱུང་བར་བྱེད་པ་ཡིན་པའི་ཕྱིར་རོ། །དེ་ལྟར་ན་འོ་ན་འདུ་བྱེད་རྣམས་དང་ཞེས་རྒྱས་པར་འབྱུང་བ་ནི་གལ་ཏེ་འདུ་བྱེད་རྣམས་ཅད་ལས་ཀྱི་ངོ་བོ་ཡིན། སྲིད་པ་ཡང་ལས་ཀྱི་ངོ་བོ་ཡིན་ན། འོ་ན་དེ་ལྟ་ན་འདུ་བྱེད་རྣམས་དང་སྲིད་པ་ལ་བྱེ་བྲག་ཅི་ཡོད་ཅེ་ན། ལས་ནི་གནས་སྐབས་གཉིས་ཏེ་ཞེས་རྒྱས་པར་འབྱུང་བ་ལ་རང་གི་ངོ་བོའི་གནས་སྐབས་ནི་རང་གི་མཚན་ཉིད་ཀྱི་གནས་སྐབས་ཞེས་བྱ་བའི་དོན་ཏོ། །བག་ཆགས་ཀྱི་གནས་སྐབས་ནི་དེ་ལས་སྐྱེས་པའི་འབྲས་བུ་སྨིན་པར་ནུས་པའི་གནས་སྐབས་སོ། །རང་གི་ངོ་བོའི་གནས་སྐབས་
ཉིད་ལས་ཀྱི་སྲིད་པ་མ་ཡིན་ནམ། བག་ཆགས་ཀྱི་གནས་སྐབས་ནི་མ་ཡིན་ན། ཇི་ལྟར་ལས་ཀྱི་བག་ཆགས་ཀྱི་གནས་སྐབས་བརྗོད་ཅེ་ན། དེའི་ཕྱིར། ལས་ནི་གནས་སྐབས་གཉིས་ཏེ། རང་གི་ངོ་བོའི་གནས་སྐབས་དང༌། བག་ཆགས་ཀྱི་གནས་སྐབས་སོ། །སེམས་ཀྱི་རྒྱུན་ལ་བག་ཆགས་ཀྱི་བྱེ་བྲག་དེ་ལས་སྐྱེས་པ་ཡོད་པ་ཡང་ཞེས་རྒྱས་པར་སྨྲས་སོ། །ནུས་པའི་བྱེ་བྲག་དང་ལྡན་པའི་རྣམ་པར་ཤེས་པའི་རྒྱུན་ནི་དེའི་རྐྱེན་གྱིས་ཡིན་པའི་ཕྱིར་རོ་ཞེས་བྱ་བ་ནི་ཡང་སྲིད་པ་སྐྱེ་བར་ནུས་པ་དང་ལྡན་པའི་རྣམ་པར་ཤེས་པའི་རྒྱུན་གྱི་རྐྱེན་ནི་རང་གི་ངོ་བོར་གནས་པའི་ལས་ཡིན་པའི་ཕྱིར་རོ། །གལ་ཏེ་དེའི་བག་ཆགས་དེ་ཡང་སྲིད་མངོན་པར་འགྲུབ་པར་བྱེད་པ་ཡིན་ན་ནི་འཇུག་པ་རྙེད་པ་ཡིན་ནོ་ཞེས་བྱ་བ་ནི་དེ་ལྟ་ན་བག་ཆགས་ཀྱི་གནས་སྐབས་ཀྱི་ལས་ནི་སྲིད་པའི་མིང་འཐོབ་པ་ཡིན་ནོ། །འཇུག་པ་མ་རྙེད་པ་ཇི་ལྟར་བརྗོད་པར་བྱ་ཞེ་ན། དེའི་ཕྱིར། འཇུག་པ་མ་རྙེད་པ་ཡིན་ན་ནི་ལས་ཀྱི་མིང་དང་འདུ་བྱེད་ཀྱི་མིང་ཐོབ་པ་ཡིན་ནོ་ཞེས་སྨྲས་སོ། །འདུལ་བ་ལས་ཇི་སྐད་དུ། ལས་རྣམས་ཆུད་ཟད་མི་འགྱུར་ཏེ། །ཞེས་རྒྱས་པར་འབྱུང་བ་འདི་ནི་དེར་དཔེ་ཡིན་ཏེ། འཇུག་པ་མ་རྙེད་པའི་བག་ཆགས་དེ་ནི་ལས་ཀྱི་མིང་ཐོབ་པ་ཡིན་ནོ་ཞེས་བྱ་བ་ཡིན་ནོ། །གང་ཟག་གཅིག་ཏུ་ལ་དུས་གཅིག་ཏུ་བསོད་ནམས་ལ་སོགས་པའི་འདུ་བྱེད་རྣམ་པ་གསུམ་ཡོད་པར་ཁས་བླངས་སུ་ཟིན་ཀྱང་ཞེས་བྱ་བ་ནི་འཇུག་པ་མ་རྙེད་པའི་བག་ཆགས་དེ་ནི་འདུ་བྱེད་ཀྱི་མིང་ཐོབ་པ་ཡིན་གྱི། མིང་སྲིད་པ་ཞེས་བྱ་བ་ཅི་ཞེ་ན། འཐོབ་པ་མ་ཡིན་ཏེ་ཞེས་བྱ་བ་སྐབས་ཡིན་ནོ། །བསོད་ནམས་དང༌། བསོད་ནམས་མ་ཡིན་པ་དང༌། མི་གཡོ་བའི་འདུ་བྱེད་ཀྱི་བག་ཆགས་ཙམ་ཉིད་ཡིན་ན་ནི་སྲིད་པའི་རྐྱེན་གྱིས་ཅིག་ཆར་དུ་སྐྱེ་བ་གཅིག་འགྲུབ་པར་འགྱུར་རོ། །འདི་ནི་དེ་ལྟ་བུ་ཡིན་ཏེ་བག་ཆགས་ཀྱི་གནས་ཀྱི་འདུ་བྱེད་ནི་ཡང་སྲིད་པ་མངོན་པར་འགྲུབ་པ་ལ་འདུག་པ་རྙེད་པས་གནས་སྐབས་ཐམས་ཅད་སྲིད་པའི་མིང་འཐོབ་པ་ཡིན་ནོ་ཞེ་ན། འདི་ལྟར་མ་རིག་པའི་རྐྱེན་གྱིས་འདུ་བྱེད་ཅེས་བྱ་བ་ཡོད་དུ་ཟིན་ཀྱང་རེས་འགའ་ཡང་སྲིད་མངོན་པར་འགྲུབ་པར་མི་བྱེད་དོ་ཞེས་རྒྱས་པར་འབྱུང་བ་ཡིན་ནོ། །དེ་ཡང་ཉེ་བར་ལེན་པ་ཡོད་ན་འདུ་བྱེད་སྲིད་པའི་
གནས་སྐབས་ཡིན་པར་འགྲོ་བར་འགྱུར་གྱི་ཞེས་བྱ་བ་ནི་འདུན་པ་དང་འདོད་ཆགས་ཡོད་ན་ཡང་སྲིད་པ་མངོན་པར་འགྲུབ་པར་བྱ་བ་ལ་འཇུག་པ་རྙེད་པ་ཡིན་གྱི་མེད་ན་ནི་མ་ཡིན་ནོ། །དེ་བས་ན་འཇུག་པ་རྙེད་པའི་ལས་ཀྱི་བག་ཆགས་ནི་ལེན་པའི་རྐྱེན་གྱིས་ཡིན་པའི་ཕྱིར། ལེན་པའི་རྐྱེན་གྱིས་སྲིད་པ་ཞེས་བསྟན་ཏོ། །འདི་ལྟར་མ་རིག་པའི་རྐྱེན་གྱིས་འདུ་བྱེད་ཡོད་དུ་ཟིན་ཀྱང་ཞེས་རྒྱས་པར་འབྱུང་བ་ནི་འདི་ལྟར་ཁམས་སམ་འགྲོ་བ་གང་ན་མ་རིག་པའི་རྐྱེན་གྱིས་འདུ་བྱེད་ཡོད་པ་ཡང་འདུན་པ་དང་འདོད་ཆགས་དེས་འཕངས་པའི་ཡང་སྲིད་དང་རྗེས་སུ་མཐུན་པ་མ་ཡིན་ན་དེར་ནི་ཡང་སྲིད་མངོན་པར་འགྲུབ་པར་བྱེད་པ་མ་ཡིན་ནོ་ཞེས་བྱ་བ་ནི་འདི་ལྟ་སྟེ་འདོད་པའི་ཁམས་སུ་གཏོགས་པའི་མ་རིག་པའི་རྐྱེན་གྱིས་འདུ་བྱེད་ཡོད་པ་ཡང་གཟུགས་ན་སྤྱོད་པའི་འདུན་པ་དང༌། འདོད་ཆགས་སམ། གཟུགས་མེད་པ་ན་སྤྱོད་པའི་འདུན་པ་དང༌། འདོད་ཆགས་པ་དེས་འཕངས་པའི་ཡང་སྲིད་དང་རྗེས་སུ་མཐུན་པ་མ་ཡིན་ན་ཁམས་དང་དེར་རམ། བདེ་འགྲོར་ཡང་སྲིད་མངོན་པར་འགྲུབ་པར་བྱེད་པ་མ་ཡིན་ནོ། །ལས་སྔ་མ་རྣམས་རང་གི་འབྲས་བུ་ཡོངས་སུ་འཛིན་པར་བྱེད་པ་ཡིན་དུ་ཟིན་ཀྱང་ཞེས་རྒྱས་པར་འབྱུང་བ་ནི་ལས་སྔ་མ་རྣམས་རང་གི་འབྲས་བུ་ཡོངས་སུ་འཛིན་པར་བྱེད་པ་ཡིན་དུ་ཟིན་ཀྱང་འདུན་པ་དང་འདོད་ཆགས་པ་མེད་པར་ཡང་བག་ཆགས་ཡོངས་སུ་གྱུར་པའི་བྱེ་བྲག་ལས་དུས་ཇི་ལྟ་བ་བཞིན་དུ་ཕྱིས་འབྲས་བུ་སྦྱིན་པར་བྱ་བའི་ཕྱིར་ཉེ་བར་གནས་པ་ཡིན་ཞེས་བྱ་བ་ལ་རང་གི་འབྲས་བུ་ཡོངས་སུ་འཛིན་པར་བྱེད་པ་ནི་ལས་དེ་དག་གིས་སོ། །ལས་དེ་དག་གིས་ཞེས་བྱ་བ་ནི་རང་གི་འབྲས་བུ་ཡོངས་སུ་འཛིན་པར་བྱེད་པ་ཉིད་ཡིན་ནོ། །བག་ཆགས་ཡོངས་སུ་གྱུར་པའི་བྱེ་བྲག་ལས་སྟོབས་ཇི་ལྟ་བ་བཞིན་དུ་ཞེས་བྱ་བ་ནི་སྐད་ཅིག་མ་ཡིན་པའི་ཕྱིར་སྐད་ཅིག་རེ་རེ་ལ་དེའི་བག་ཆགས་ཡོངས་སུ་གྱུར་པའི་བྱེ་བྲག་ཡོད་པ་ཡིན་ཏེ། འདི་ལྟར་ཡོངས་སུ་འགྱུར་བའི་བྱེ་བྲག་དེ་ལྟ་བུའི་ངོ་བོ་ཅུང་ཟད་འགྲུབ་པར་འགྱུར་ཏེ། གང་གིས་དེ་མ་ཐག་ཏུ་ཡང་སྲིད་མངོན་པར་འགྲུབ་པར་བྱ་བ་ལ་ནུས་པ་ཡོད་པའོ། །ནུས་པ་ཡང་སྟོབས་ཡིན་ཏེ། སྟོབས་ཇི་ལྟ་བ་བཞིན་ཞེས་བྱ་བ་ནི་སྟོབས་གང་དང་གང་ཡོད་པ་དེ་དང་དེ་ལས་ཕྱིས་འབྲས་བུ་སྦྱིན་པར་བྱ་བའི་ཕྱིར་ཉེ་བར་གནས་པ་ཡིན་པ་དེ་
ལྟར་ཅིའི་ཕྱིར་མི་འདོད། ས་གང་ལ་འདུན་པ་དང་འདོད་ཆགས་པ་ནི་ཞེས་རྒྱས་པར་འབྱུང་བ་ནི་འདོད་པའི་ཁམས་ནས་སྲིད་པའི་རྩེ་མོའི་བར་ལའོ། །དེས་འཕངས་པའི་ཡང་སྲིད་དང་རྗེས་སུ་མཐུན་པ་ཡིན་པ་ཞེས་བྱ་བ་ནི་ལས་ཀྱིས་འཕངས་པའི་ཡང་སྲིད་དང་རྗེས་སུ་འཚམ་པ་ཞེས་བྱ་བའི་དོན་ཏོ།། དེར་ནི་དེ་ལྟ་བུ་ཁོ་ན་ཡིན་གྱི་ཞེས་བྱ་བ་ནི་སྟོབས་ཇི་ལྟ་བ་བཞིན་དུ་འབྲས་བུ་སྦྱིན་པར་བྱ་བའི་ཕྱིར་ཉེ་བར་གནས་པ་ཡིན་ནོ་ཞེས་བྱ་བ་ཡིན་ནོ། །འདུན་པ་དང་འདོད་ཆགས་མེད་པ་མ་ཡིན་པའི་ལས་རྣམས་ལ་ཡང་སྲིད་མངོན་པར་འགྲུབ་པར་བྱེད་པའི་ནུས་པ་ཐོབ་པ་ཡོད་པས། ལེན་པའི་རྐྱེན་གྱིས་སྲིད་པ་ཞེས་བསྟན་ཏོ། །འདོད་ཆགས་དང་བྲལ་བ་གང་ཞིག་ས་འོག་མར་སྐྱེ་བ་ཞེས་རྒྱས་པར་འབྱུང་བ་ནི་ས་གོང་མར་སྐྱེས་ནས་འདོད་ཆགས་དང་བྲལ་བ་ཞིག་འཆི་བའི་དུས་བྱས་ནས་གང་གི་ཚེ་ས་འོག་མར་སྐྱེ་བ་དེའི་ཚེ་འཆི་བའི་དུས་ཀྱི་ཚེ་དེ་ལས་འོག་མ་བའི་འདུན་པ་དང་འདོད་ཆགས་ནི་ཀུན་དུ་འབྱུང་བ་མ་ཡིན་ཏེ། འདོད་ཆགས་དང་བྲལ་བ་ཡིན་པའི་ཕྱིར་རོ། །ས་འོག་མ་དེ་ལ་འདུན་པ་དང་འདོད་ཆགས་དག་ཅེས་བྱ་བ་ལ། དེ་ལ་ཞེས་བྱ་བ་ནི་ས་འོག་མ་ལའོ། །མངོན་དུ་མ་གྱུར་ན་ས་འོག་མར་ལན་གྲངས་གཞན་ལ་མྱོང་བར་འགྱུར་བའི་ལས་ཀྱིས་འཕངས་པའི་ཡང་སྲིད་དང་རྗེས་སུ་མཐུན་པ་ཇི་ལྟར་ཡིན་ཞེ་ན། འཆི་བའི་གནས་སྐབས་ན་དེའི་བག་ཆགས་རྣམས་འཇུག་པ་རྙེད་པའི་ཕྱིར་རོ་ཞེས་བྱ་བ་ནི་ས་འོག་མ་པའི་འདུན་པ་དང་འདོད་ཆགས་ཀྱི་བག་ཆགས་དག་འཇུག་པ་རྙེད་པའི་ཕྱིར་རོ་ཞེས་བྱ་བའི་དོན་ཏོ། །འཇུག་པ་ཇི་ལྟར་རྙེད་པ་བཞིན་ལས་ཀྱི་བག་ཆགས་ཀྱིས་ཡང་སྲིད་འགྲུབ་པར་བྱེད་དོ། །དེ་ལྟར་ན་ས་འོག་མ་པའི་འདུན་པ་དང་འདོད་ཆགས་ཀྱི་བག་ཆགས་ཀྱི་འཇུག་པ་རྙེད་པ་ནི་ལེན་པ་ཡིན་ལ། དེས་ནི་ལས་ཀྱི་བག་ཆགས་ཀྱི་གནས་སྐབས་དག་སྲིད་པ་ཡིན་པར་བྱེད་དོ། །འདོད་ཆགས་མ་བྲལ་བ་རྣམས་བདེན་པ་མཐོང་ན་ཞེས་རྒྱས་པར་འབྱུང་བ་ནི་བདེན་པ་མཐོང་ལ་འདོད་ཆགས་དང་མ་བྲལ་བ་རྒྱུན་དུ་ཞུགས་པའམ། ལན་ཅིག་ཕྱིར་འོང་བ་དག་འདོད་པ་ན་སྤྱོད་པའི་འདུན་པ་དང་འདོད་ཆགས་མ་སྤངས་ཤིང་འདོད་པའི་ཁམས་སུ་གཏོགས་པ་ཡིན་ཡང་ངན་སོང་དུ་སྐྱེ་བར་མི་འགྱུར་ན་ཅི་དེའི་ལེན་པ་དག་མེད་པ་ཡིན་ནམ་གང་གི་ཕྱིར་མི་སྐྱེ་བ་དེ་དག་གིས་ནི་ཇི་སྐད་དུ་ལས་སྔ་མ་རྣམས་རང་གི་འབྲས་བུ་ཡོངས་སུ་འཛིན་པར་བྱེད་པ་ཡིན་དུ་ཟིན་ཀྱང་བག་
ཆགས་ཡོངས་སུ་གྱུར་པའི་བྱེ་བྲག་ལས་ཞེས་བྱ་བ་ནས་དེ་ལྟར་ཅིའི་ཕྱིར་མི་འདོད་ཅེས་བྱ་བའི་བར་དུ་དེ་དག་རྒྱས་པར་བསྟན་པ་ཡིན་ནོ། །དེའི་ཕྱིར་ངན་སོང་དང་རྗེས་སུ་མཐུན་པ་མ་ཡིན་ཏེ་ཞེས་སྨྲས་སོ། །ཇི་ལྟར་མ་ཡིན་པ་དེ་སྟོན་པ་ནི། མཐོང་བས་སྤང་བར་བྱ་བའི་འདུན་པ་དང་འདོད་ཆགས་སྤངས་པའི་ཕྱིར་རོ་ཞེས་བྱ་བ་ཡིན་ཏེ། བདེན་པ་མཐོང་ན་མཐོང་བས་སྤང་བར་བྱ་བའི་འདུན་པ་དང་འདོད་ཆགས་སྤངས་པ་ཡིན་ལ། དེ་ཡང་ངན་སོང་དང་རྗེས་སུ་མཐུན་པ་མ་ཡིན་ཏེ། ལོག་པར་ལྟ་བ་བསྒྱུར་ཟིན་པའི་ཕྱིར་རོ། །དེ་ལས་གཞན་ཡང་ཕྱིས་འཇོམས་པའི་ཕྱིར་རོ་ཞེས་བྱ་བ་ནི་བསྒོམ་པས་སྤང་བར་བྱ་བ་ཡིན་ཏེ། བསྒོམ་པས་སྤང་བར་བྱ་བའི་འདུན་པ་དང་འདོད་ཆགས་དང་ངན་སོང་དང་རྗེས་སུ་མཐུན་པ་སྤངས་པ་མ་ཡིན་ཏེ། བདེན་པ་མཐོང་བ་ལ་ཡང་ཀུན་དུ་རྒྱུ་བ་ཡིན་ནོ། །ལོག་པར་ལྟ་བས་རྒྱས་པ་ཡིན་པའི་ཕྱིར་དེ་དག་ནི་བདེན་པ་མཐོང་བ་ཁོ་ནས་སྤངས་པའི་ཕྱིར་རོ། །འཆི་བའི་ཚེ་གདོན་མི་ཟ་བར་འགྱུར་རོ་ཞེས་བྱ་བ་ནི་སྔར་ངེས་པ་མ་ཡིན་པ་ནི་འཆི་བའི་ཚེ་ལེན་པ་དང་བཅས་པའི་ལས་རྣམས་གདོན་མི་ཟ་བར་སྲིད་པ་ཡིན་པར་འགྱུར་རོ། །དེ་ལྟ་མ་ཡིན་ན་ཡང་སྲིད་ཉིད་དུ་མི་རུང་ངོ༌། །ལས་ངེས་པ་གང་ཡིན་པ་ནི་དུས་སྔར་ཡང་ཡིན་ཏེ་ཞེས་བྱ་བ་ནི་དེའི་ཚེ་གདོན་མི་ཟ་བར་སྲིད་པར་གྱུར་པ་ཡིན་ནོ། །སྐྱེས་ནས་མྱོང་བར་འགྱུར་བའི་ལས་མཚམས་མེད་པ་ལ་སོགས་པ་ཞེས་བྱ་བའི་སོགས་པའི་སྒྲས་ནི་མཚམས་མེད་པ་ལས་གཞན། ལྷ་ལ་སོགས་པའི་ནང་དུ་སྐྱེས་ནས་མྱོང་བར་འགྱུར་བའི་ལས་གཞན་ཡང་གང་ཡིན་པའོ། །སྔོན་གྱི་ཚེའི་ལས་ཀྱི་རྣམ་པར་སྨིན་པ་ཞེས་རྒྱས་པར་འབྱུང་བ་ནི་དེའི་ཚེ་ལས་སྲིད་པར་གྱུར་པ་ཡོད་དུ་ཟིན་ཀྱང་དེ་མ་ཐག་ཏུ་ཡང་སྲིད་མངོན་པར་འགྲུབ་པར་མི་བྱེད་དེ། སྔོན་གྱི་ཚེ་ལས་ཀྱི་རྣམ་པར་སྨིན་པ་རིས་མཐུན་པར་སྐལ་བ་མཉམ་པའི་ལྷག་མ་དང་འབྲེལ་པའི་ཕྱིར་རོ། །ཇི་ཙམ་ན་སྐྱེ་བའི་སྲིད་པ་ཡིན་པ་དེའི་བར་དུ་ལྡོག་པ་མེད་དོ་ཞེས་བྱ་བ་ནི་དེ་སྲིད་དུ་ལས་རྣམས་སྲིད་པར་གྱུར་པ་ཡིན་ནོ་ཞེས་བྱ་བའི་དོན་ཏོ། །ཅིའི་ཕྱིར་ནམ་བར་མ་དོའི་སྲིད་པ་མངོན་པར་མ་གྲུབ་པ་དེའི་བར་དུ་སྲིད་པ་རྣམ་པར་མི་གཞག་ཅེ་ན། དེའི་ཕྱིར་ལུང་ལས་སྲིད་པ་ནི་གཉིས་ཏེ་ཞེས་རྒྱས་པར་སྨྲས་སོ། །དེ་གཉི་ག་
གཅིག་ཏུ་བསྡུས་ཏེ་སྲིད་པ་ཞེས་བརྗོད་དོ་ཞེས་བྱ་བ་ནི་གཞོལ་བའི་སྲིད་པ་དེ་དང༌། ཞུགས་པའི་སྲིད་པ་ཞེས་བྱ་བ་གཉིས་གཅིག་ཏུ་བསྡུས་པ་ནི་མངོན་པར་བསྡུས་པ་ཡིན་ནོ། །འོ་ན་བར་མ་དོ་ན་སྲིད་པ་ཡོད་པའི་རྐྱེན་གང་ཞེ་ན་ཞེས་བྱ་བ་ནི་འདིའི་སྔོན་གྱི་དུས་ཀྱི་སྲིད་པས་བསྡུས་པའམ། འཆི་བའི་སྲིད་པས་བསྡུས་པ་ནི་མ་ཡིན་ནོ། །དེའི་ཕྱིར་དེའི་རྐྱེན་བརྗོད་པར་བྱ་དགོས་སོ་ཞེ་ན། དེའི་ཕྱིར་རྐྱེན་གཞོལ་བའི་སྲིད་པ་ཡིན་ནོ་ཞེས་སྨྲས་སོ། །འོ་ན་དེ་ལྟ་ན་ཇི་སྲིད་དུ་བར་མ་དོའི་སྲིད་པ་ཡིན་པ་དེ་སྲིད་དུ་ལས་དག་སྲིད་པ་ཡིན་པར་རྗེས་སུ་འབྲང་བ་ཐོབ་པར་འགྱུར་རོ་ཞེ་ན། དེའི་ཕྱིར་དེ་ཡང་ལས་ཀྱི་སྲིད་པ་གཙོ་བོ་ཡིན་གྱི་རྣམ་པར་སྨིན་པ་ནི་གཙོ་བོ་མ་ཡིན་ཏེ་ཞེས་སྨྲས་སོ། །དེ་ཡང་ཞེས་བྱ་བ་ནི་བར་མ་དོའི་སྲིད་པའོ། །ཅིའི་ཕྱིར་ཞེ་ན། སྐྱེས་པ་ན་རྣམ་པར་སྨིན་པ་འཕངས་པ་ཡོངས་སུ་རྫོགས་པའི་ཕྱིར་ཏེ། ལས་དེས་རྣམ་པར་སྨིན་པ་འཕངས་པ་སྐྱེས་པ་ན་ཡོངས་སུ་རྫོགས་པར་གྱུར་པ་ཡིན་གྱི་བར་མ་དོའི་སྲིད་པའི་གནས་སྐབས་སུ་མ་ཡིན་ཏེ། དེ་བས་ན་བར་མ་དོའི་སྲིད་པ་སྐྱེས་སུ་ཟིན་ཀྱང་དེའི་ལས་རྣམས་སྲིད་པ་ཉིད་ཡིན་པ་ལས་ལྡོག་པ་མེད་དེ། རྣམ་པར་སྨིན་པ་ལྷག་མ་དང་བཅས་པ་ཡིན་པའི་ཕྱིར་རོ། །སྐྱེ་བར་བྱ་བའི་ཕྱིར་ཡང་ཞེས་རྒྱས་པར་འབྱུང་བ་ནི་ལྷ་ལ་སོགས་པའི་ནང་དུ་སྐྱེ་བར་བྱ་བའི་ཕྱིར་ལས་མངོན་པར་འདུ་བྱེད་པ་ནི་ལྷར་གྱུར་ཅིག །མིར་གྱུར་ཅིག་ཅེས་བྱ་བ་ལ་སོགས་པ་ཡིན་གྱི། བར་མ་དོའི་སྲིད་པ་སྐྱེ་བར་བྱ་བའི་ཕྱིར་མ་ཡིན་ནོ། །དེ་བས་ན་སྲིད་པ་ཉིད་ནང་དུ་གཏོགས་པར་བྱས་པ་ནི་བར་མ་དོའི་སྲིད་པ་དེར་ཡིན་གྱི། སྐྱེ་བའི་ནང་དུ་མ་ཡིན་ནོ་ཞེས་བྱ་བ་ནི་རང་གི་དགོས་པ་མཐར་ཐུག་པར་བྱ་བ་བྱེད་པ་ཡིན་ལ། ལས་ཀྱི་དགོས་པ་ནི་སྐྱེ་བ་ཡིན་གྱི། བར་མ་དོའི་སྲིད་པ་ནི་དགོས་པ་མ་ཡིན་ནོ། །དེ་བས་ན་ཇི་ཙམ་དུ་སྐྱེ་བའི་སྲིད་པ་ཡིན་པ་དེའི་བར་དུ་ལྡོག་པ་མེད་དེ། དེ་སྲིད་དུ་སྲིད་པ་ཉིད་དེའི་རྗེས་སུ་འཇུག་པ་ཡིན་ནོ་ཞེས་བྱ་བ་འདི་ནི་མདོའི་དོན་ཏོ། །གང་ཡང་སྲོག་གཅོད་པ་དང་བྲལ་བ་མ་ཡིན་ནོ་ཞེས་བྱ་བ་ནས་ཞེས་རྒྱས་པར་འབྱུང་བ་ནི་བསྟན་པའོ། །བཤད་པ་ནི་འདི་ལ་ཡང་དགའ་བ་མ་ཡིན་ཞིང་ཞེས་བྱ་བ་ནི། སྲོག་གཅོད་པ་སྤོང་བ་ལེན་པར་མི་བྱེད་པའི་ཕྱིར་རོ། །སྤོང་བ་མ་ཡིན་པ་ཞེས་བྱ་བ་ནི་བླངས་པ་མི་སྲུང་པའི་ཕྱིར་རོ། །གང་འདི་ལ་སྲོག་
གཅོད་མ་ལ་སོགས་པ་དང་བྲལ་བར་མི་དགའ་བ་དེ་ནི་རྒྱུ་དེ་དང་རྐྱེན་དེས་ལུས་ཤི་ནས། བདེ་འགྲོ་མཐོ་རིས་ཀྱི་འཇིག་རྟེན་དུ་ལྷའི་ནང་དུ་སྐྱེ་བ་མ་ཡིན་ནོ། །འོན་ཀྱང་དེས་སྔོན་དགེ་བའི་ལས་བྱས་ཤིང་བསགས་པ་ཡོད་དེ་ཞེས་རྒྱས་པར་འབྱུང་བ་ལ་སྔོན་བྱས་པ་ཡོད་པ་ཞེས་བྱ་བ་ནི་སྲོག་གཅོད་པ་ལ་སོགས་པ་དང་བྲལ་བ་དེ་ཡང་སྔོན་བྱས་པ་ཡིན་ནོ་ཞེས་བྱ་བའི་དོན་ཏེ་ཇི་སྐད་དུ། འོན་ཀྱང་འདིས་སྔོན་དགེ་པའི་ལས་བྱས་ཤིང་བསགས་པ་ཡོད་དེ་ཞེས་སྨྲས་པ་ཡིན་ནོ། །གང་གི་རྐྱེན་གྱིས་སྲིད་པར་གྱུར་ཞེ་ན། རྐྱེན་དགེ་བའི་སེམས་དང་སེམས་ལས་བྱུང་བའི་ཆོས་རྣམས་ཐོབ་པ་ཡང་དག་པའི་ལྟ་བ་དང༌། མཚུངས་པར་ལྡན་པ་དེའི་རྐྱེན་གྱིས་སྲིད་པར་གྱུར་པ་ཡིན་ཏེ། དེ་ཉིད་སྲིད་པའི་རྐྱེན་ཡིན་གྱི་གཞན་མ་ཡིན་ནོ། །རྐྱེན་ངེས་པ་ཡིན་ན་ནི་དགེ་བའི་སེམས་དང་སེམས་ལས་བྱུང་པའི་ཆོས་ཡང་དག་པའི་ལྟ་བ་དང་མཚུངས་པར་ལྡན་པ་རྣམས་སྲིད་པའི་རྐྱེན་ཡིན་པར་འགྲུབ་པར་མི་འགྱུར་རོ། །ལས་རྣམ་པར་འབྱེད་པ་ཆེན་པོའི་མདོ་སྡེ་ལས། དེ་དག་སྲིད་པའི་རྐྱེན་ཉིད་དུ་གསུངས་པ་དེ་ཡང༌། ཡོངས་སུ་སྤངས་པར་འགྱུར་རོ། །འོན་ཏེ་འདི་འཆི་བའི་དུས་ཀྱི་ཚེ་ཞེས་རྒྱས་པར་འབྱུང་བ་ནི་གལ་ཏེ་འཆི་བའི་དུས་ཀྱི་ཚེ་དགེ་བའི་སེམས་པ་མཚུངས་པར་ལྡན་པ་དང་བཅས་པ་སྲིད་པ་ཡིན་པར་གྱུར་ན་ནི་དེ་ལྟ་ན་མི་དགེ་བའི་སེམས་དང་སེམས་ལས་བྱུང་བའི་ཆོས་རྣམས་ཀྱི་རྐྱེན་གྱིས་ལས་དེ་སྲིད་པར་གྱུར་པ་མ་ཡིན་ཞིང་རྐྱེན་ངེས་པ་ཡིན་ཏེ། ཉེ་བར་ལེན་པ་ཁོ་ན་སྲིད་པའི་རྐྱེན་ཡིན་གྱི་གཞན་མ་ཡིན་ནོ་ཞེས་བྱ་བ་ལ་ཡང་གྲུབ་པ་ཡིན་ནོ། །ལས་རྣམ་པར་འབྱེད་པའི་མདོ་སྡེ་ཆེན་པོ་ལས་གསུངས་པ་དེ་དག་སྲིད་པའི་རྐྱེན་ཉིད་ཡིན་པར་བསྟན་པ་ཡང་སྤངས་པ་མ་ཡིན་ཏེ། དེར་ནི་དེ་དག་སྲིད་པ་ཉིད་ཡིན་པར་གསུངས་ཀྱི། སྲིད་པའི་རྐྱེན་ཉིད་དུ་ནི་མ་ཡིན་ནོ་ཞེ་ན། དེ་ལྟ་ན་དེ་ཡང་སྔོན་བྱས་པ་ཡོད་པ་དེའི་རྐྱེན་ཡང་འདི་སྟེ་ཞེས་བྱུང་བ་དང་འགལ་བར་འགྱུར་ཏེ། སྔོན་བྱས་པ་ཡོད་པ་སྲིད་པ་དེའི་རྐྱེན་ཉིད་ཡིན་པར་གསུངས་པ་ཡིན་གྱི་སྲིད་པ་ཉིད་དུ་མ་ཡིན་ནོ། །གཤེད་མ་པ་དབུགས་ཞེས་བྱ་བས་ཞེས་རྒྱས་པར་འབྱུང་བ་འདི་ཡང་སྤང་བར་བྱས་པ་ཡིན་ཏེ། གལ་ཏེ་ལེན་པ་ཁོ་ན་སྲིད་པའི་རྐྱེན་ཡིན་ན་ཞེས་སྐབས་དང་སྦྱར་རོ། །བསམ་གཏན་བཞི་པ་ཐོབ་པའི་དགེ་སློང་ཞེས་རྒྱས་
པར་འབྱུང་བ་ནི་བསམ་གཏན་བཞི་པ་ཐོབ་པའི་དགེ་སློང་འགའ་ཞིག་བསམ་གཏན་དང་པོ་ཐོབ་པ་དང་བདག་གིས་ཐོག་མའི་འབྲས་བུ་འཐོབ་པོ་ཞེས་མངོན་པའི་ང་རྒྱལ་སྐྱེས་ཞེས་གྲག་གོ །དེ་བཞིན་དུ་བསམ་གཏན་བཞི་པའི་བར་དུ་ཐོབ་པ་དང༌། འབྲས་བུ་བཞི་པ་དགྲ་བཅོམ་པ་ཐོབ་བོ་སྙམ་བྱེད་དོ། །བསམ་གཏན་བཞི་པ་ཐོབ་པའི་དགེ་སློང་མངོན་པའི་ང་རྒྱལ་ཅན་ཏེ། འཆི་ཀར་སྐྱེ་བར་འགྱུར་བ་མཐོང་བ་དང༌། འཇིག་རྟེན་ན་རྒྱུན་དུ་ཞུགས་པ་ནས་དགྲ་བཅོམ་པའི་བར་དུ་ཡོད་པ་མ་ཡིན་ནོ་ཞེས་འཕགས་པ་རྣམས་ལ་སྐུར་པ་འདེབས་པའི་ལོག་པར་ལྟ་བ་སྐྱེས་སོ། །དེ་འཕགས་པ་ལ་སྐུར་པ་འདེབས་པའི་ལོག་པར་ལྟ་བ་དེ་ནི་དམྱལ་བར་སྐྱེ་བར་འགྱུར་བའི་ལས་སྲིད་པ་ཉིད་དུ་བྱེད་པའི་རྐྱེན་ཡིན་ནོ་ཞེས་སྐབས་དང་སྦྱར་རོ། །འདི་ཉིད་ཀྱི་མདོ་སྡེའི་རྗེས་སུ་འབྲངས་ནས་རིག་པར་བྱ་སྟེ་ཞེས་བྱ་བ་ཇི་ལྟ་བུ་ཞེ་ན། འདིས་བསམ་གཏན་གྱི་སྡོམ་པ་ཐོབ་ནས་སྲོག་གཅོད་པ་ལ་སོགས་པ་ལས་རྣམ་པར་ལྡོག་པའི་རྒྱུ་དེ་དང་རྐྱེན་དེས་ལུས་ཞིག་ནས་ངན་སོང་དམྱལ་བར་སྐྱེ་བར་འགྱུར་བ་མ་ཡིན་གྱི། འོན་ཀྱང་འདི་སྔོན་མི་དགེ་བའི་ལས་བྱས་ཤིང་བསགས་པ་ཡོད་དེ། དེ་ཡང་སྔོན་བྱས་པ་ཡོད་པ་དེའི་རྐྱེན་ཡང་འདི་ལྟ་སྟེ་འཆི་བའི་དུས་ཀྱི་ཚེ་མི་དགེ་བའི་སེམས་དང་སེམས་ལས་བྱུང་བའི་ཆོས་ཐོབ་པ་ལོག་པར་ལྟ་བ་དང་མཚུངས་པར་ལྡན་པ་དེའི་རྒྱུ་དང༌། དེའི་རྐྱེན་གྱིས་ལུས་ཞིག་ནས་ཞེས་རྒྱས་པར་འབྱུང་བ་ཡིན་ཏེ། གལ་ཏེ་ལེན་པ་ཁོ་ན་རྐྱེན་ཡིན་ཏེ། རྐྱེན་ངེས་པ་ཡིན་ན་འདི་ཡང་སྤང་བར་འགྱུར་རོ། །གལ་ཏེ་རྐྱེན་ཅན་ངེས་པ་ཡིན་ན་ནི་ལེན་པའི་རྐྱེན་གྱིས་སྲིད་པ་ཁོ་ན་ཡིན་གྱི། གཞན་མ་ཡིན་པས་ལེན་པའི་རྣམ་པར་སྨིན་པ་དང༌། རྒྱུ་མཐུན་པ་དང༌། བདག་པོའི་འབྲས་བུ་གཞན་མེད་པར་འགྱུར་རོ་ཞེས་བྱ་བ་ནི་རྣམ་པར་སྨིན་པའི་རྒྱུར་གྱུར་པའི་འབྲས་བུ་རྣམ་པར་སྨིན་པ་མེད་པར་འགྱུར་རོ། །སྐལ་པ་མཉམ་པ་དང༌། ཀུན་དུ་འགྲོ་བར་གྱུར་པའི་རྒྱུ་མཐུན་པའི་འབྲས་བུ་མེད་པར་འགྱུར་རོ། །གཙོ་བོའི་རྒྱུར་གྱུར་པའི་བདག་པོའི་འབྲས་བུ་མེད་པར་འགྱུར་རོ། །རྐྱེན་གཙོ་བོ་འཆད་པའི་ཕྱིར་རོ་ཞེས་བྱ་བ་ནི་ལེན་པའི་རྐྱེན་གྱིས་སྲིད་པ་ཞེས་བྱ་བ་རྐྱེན་གཙོ་བོའི་དབང་དུ་བྱས་ཏེ་འཆད་པའི་ཕྱིར་རོ། །ལེན་པ་ནི་སྲིད་པའི་རྐྱེན་གྱི་
གཙོ་བོ་ཡིན་ཏེ། ས་གང་བའི་ལེན་པ་ཡིན་པས་ནི་ས་དེ་པ་ཁོ་ནའི་ལས་དག་སྲིད་པར་བྱེད་པའི་ཕྱིར་རོ་ཞེས་བྱ་བ་ནི་དེ་ཡང་སྔར་བསྟན་ཟིན་ཏེ། ཇི་ལྟ་ཞེ་ན། མ་རིག་པའི་རྐྱེན་གྱིས་འདུ་བྱེད་ཡོད་དུ་ཟིན་ཀྱང་གང་འདུན་པ་དང་འདོད་ཆགས་པ་དེས་འཕངས་པའི་ཡང་སྲིད་དང་རྗེས་སུ་མཐུན་པ་མེད་ན་དེར་ཡང་སྲིད་མངོན་པར་འགྲུབ་པར་མི་འགྱུར་རོ་ཞེས་བྱ་བ་ཡིན་ནོ། །ས་གང་པའི་དགེ་བའི་སེམས་དང་ཞེས་རྒྱས་པར་འབྱུང་བ་ནི་ས་གང་བའི་དགེ་བའི་སེམས་དང་སེམས་ལས་བྱུང་བ་ནི་འཆི་བའི་ཚེ། དུས་ཐ་མའི་ཚེ་ས་དེ་པའི་ལས་དག་སྲིད་པར་བྱེད་པ་མ་ཡིན་ཏེ། འདོད་པའི་ཁམས་ཀྱི་འདོད་ཆགས་དང་བྲལ་བདག་འཆི་བའི་དུས་ཀྱི་ཚེ་འདོད་པ་ན་སྤྱོད་པའི་དགེ་བའི་སེམས་དང་སེམས་ལས་བྱུང་བའི་ཀུན་དུ་འབྱུང་ཡང་འདོད་པ་ན་སྤྱོད་པའི་ལས་དག་སྲིད་པར་བྱེད་པ་མ་ཡིན་ནོ། །འོ་ན་དགེ་བའི་སེམས་ཀྱི་ལས་གང་དག་ཅེས་རྒྱས་པར་འབྱུང་བ་ནི་དགེ་བའི་སེམས་ཀྱི་ལས་སྔོན་བྱས་པ་བག་ཆགས་ཀྱི་གནས་སྐབས་པ་དག་འཆི་བའི་དུས་ཀྱི་ཚེ་སྲིད་པར་གྱུར་པ་ཡིན་པ་ནི་ཇི་ལྟར་སྔར་སྨྲས་པ་ཡིན་ནོ། །དེ་དག་ཇི་ལྟར་ཉེ་བར་ལེན་པའི་རྐྱེན་གྱིས་སྲིད་པ་ཡིན་ཞེ་ན་ཞེས་བྱ་བ་ནི་དེའི་ཚེ་དེའི་སེམས་དང་སེམས་ལས་བྱུང་བ་དགེ་བ་ཀུན་དུ་འབྱུང་བ་དང་མི་མཐུན་པའི་ཕྱིར་འདུན་པ་དང་འདོད་ཆགས་མངོན་དུ་འབྱུང་བའི་དངོས་པོ་ནི་ཡོད་པ་མ་ཡིན་ནོ། །གལ་ཏེ་དེའི་ཚེ་རྣམ་པར་ཤེས་པ་ལ་ཞེས་རྒྱས་པར་འབྱུང་བ་ནི་འཆི་བའི་དུས་དེའི་ཚེ་དགེ་བའི་སེམས་ཀྱི་རྣམ་པར་ཤེས་པ་དང༌། ཀུན་གཞིའི་རྣམ་པར་ཤེས་པ་ལ་ལེན་པ་མེད་པར་གྱུར་ན། དེའི་ལས་དག་སྲིད་པ་ཡིན་པར་མི་འགྱུར་ཏེ། ཇི་ལྟར་དགྲ་བཅོམ་པ་བཞིན་ནོ་ཞེས་བྱ་བ་ནི་ཀུན་གཞི་རྣམ་པར་ཤེས་པ་ལ་ལེན་པ་མེད་པའི་ཕྱིར་རོ། །གལ་ཏེ་རྣམ་པར་ཤེས་པ་ལ་ལེན་པ་མེད་པར་ཡང་བག་ཆགས་ཀྱི་གནས་སྐབས་དག་སྲིད་པ་ཡིན་པར་གྱུར་ན་ནི་སྲིད་པར་གྱུར་པ་དེ་ནི་ལས་ཀྱི་བག་ཆགས་ཀྱི་ནང་དུ་གཏོགས་པ་ཡང་སྲིད་ཀྱི་ས་བོན་དུ་གྱུར་པ་ཡིན་ན། དེ་ལྟ་ཡིན་ན་དགེ་སློང་དག་ས་བོན་གྱི་རིགས་ལྔ་ནི་ལེན་པ་དང་བཅས་པའི་ཚིག་བླ་དགས་ཡིན་ནོ་ཞེས་འབྱུང་བའི་མདོ་འདི་དང་འགལ་བར་འགྱུར་རོ། །ཇི་ལྟར་ན་དགེ་བའི་རྣམ་པར་ཤེས་པ་ལེན་པ་དང་བཅས་པ་ཡིན་ཞེ་ན་ཞེས་བྱ་བ་ནི་དགེ་བ་ནི་འདུན་
པ་དང་འདོད་ཆགས་དང་རབ་ཏུ་སྦྱོར་བ་མ་ཡིན་པས་དེའི་ཕྱིར་འདྲི་བ་ཡིན་ནོ། །ལེན་པས་གྲོགས་བྱས་ཏེ་འབྲས་བུ་སྦྱིན་པའི་ཕྱིར་ཏེ་ཞེས་བྱ་བ་ནི་སྐྱེད་པ་ཡིན་ཏེ། འཇུག་པའི་རྣམ་པར་ཤེས་པ་དགེ་བ་དེ་ནི་ལེན་པས་བསྟངས་ཏེ། འབྲས་བུ་སྦྱིན་པར་བྱེད་ཀྱི་འབའ་ཞིག་གིས་ནི་མ་ཡིན་ནོ། །དེ་བས་ན་དེ་ལེན་པ་དང་བཅས་པ་ཡིན་གྱི་ཞེས་བྱ་སྟེ། ལེན་པ་ལ་ལྟོས་ནས་དེས་འབྲས་བུ་མངོན་དུ་སྦྱིན་པར་བྱེད་པ་ཡིན་ཏེ། ཀུན་གཞི་རྣམ་པར་ཤེས་པ་ལ་འབྲས་བུའི་རྒྱུ་བག་ཆགས་རྒྱུ་ཡོད་པས་འབྲས་བུ་སྦྱིན་པར་བྱེད་པ་ཡིན་ནོ། །དེ་ས་བོན་ཡིན་པར་དགོངས་པ་ནི་མ་ཡིན་ནོ་ཞེས་བྱ་བ་ནི་དགེ་བའི་འཇུག་པའི་རྣམ་པར་ཤེས་པ་དེའོ། །ཀུན་གཞི་རྣམ་པར་ཤེས་པ་ནི་ས་བོན་ཡིན་ཏེ། དེའི་དབང་དུ་བྱས་ནས་བཅོམ་ལྡན་འདས་ཀྱིས་དགེ་སློང་དག་ས་བོན་ཞེས་བྱ་བ་ནི་ལེན་པ་དང་བཅས་པའི་རྣམ་པར་ཤེས་པའི་ཚིག་བླ་དགས་ཡིན་ནོ་ཞེས་གསུངས་སོ། །དེ་ལ་ལེན་པ་གང་ཡིན་པའི་བག་ཆགས་ཞེས་རྒྱས་པར་འབྱུང་བ་ནི། དེ་ལ་ཞེས་བྱ་བ་ནི་ཀུན་གཞི་རྣམ་པར་ཤེས་པ་ལའོ། །ལེན་པ་གང་ཡིན་པ་ཞེས་བྱ་བ་འདོད་པ་ཉེ་བར་ལེན་པ་ནས་བདག་ཏུ་སྨྲ་བ་ཉེ་བར་ལེན་པའི་བར་གྱི་བག་ཆགས་ཡོངས་སུ་ཤིན་དུ་བརྟས་པར་གྱུར་ན་ཞེས་བྱ་བ་ནི་དེ་ཀུན་དུ་འབྱུང་བ་ན་འཇུག་པ་རྙེད་པའོ། །དེས་ནི་དེ་ལེན་པ་དང་བཅས་པ་ཡིན་ཏེ་ཞེས་བྱ་བ་ནི་ལེན་པ་དེས་བག་ཆགས་ཡོངས་སུ་བརྟས་པ་མ་ཡིན་ན་ཀུན་གཞི་རྣམ་པར་ཤེས་པ་དེ་ལེན་པ་དང་བཅས་པ་མ་ཡིན་ནོ། །ས་གང་པའི་ལེན་པ་དེ་ཡོངས་སུ་ཤིན་ཏུ་བརྟས་པར་གྱུར་ན་ཞེས་རྒྱས་པར་འབྱུང་བ་ནི་འདོད་པ་ན་སྤྱོད་པ་དང༌། བསམ་གཏན་དང་པོའི་ས་པ་ནས་སྲིད་པའི་རྩེ་མོའི་ས་པའི་བར་གྱིའོ། །དེའི་སྒོ་ནས་ས་དེ་པ་ཉིད་ཀྱི་ལས་ཀྱི་བག་ཆགས་བསགས་པའི་ཞེས་བྱ་བ་ནི་ལེན་པའི་སྒོ་ནས་བསགས་པ་ཞེས་བྱ་བའི་ཐ་ཚིག་གོ །དེ་མ་ཐག་ཏུ་ཚེ་གཞན་མངོན་པར་འགྲུབ་པར་བྱ་བའི་ཕྱིར་འཇུག་པ་རྙེད་པ་ཡིན་པས་ཞེས་བྱ་བ་ནི་ཡོངས་སུ་གྱུར་པའི་བྱེ་བྲག་གི་གནས་སྐབས་རྙེད་པའི་ལས་དེ་ནི་སྲིད་པ་ཡིན་པར་བསྟན་ཏོ། །རྣམ་པ་འདིས་ནི་དགེ་བའི་སེམས་ཀྱི་ཡང་འཆི་ཀར་ལེན་པའི་རྐྱེན་ཉིད་ཀྱིས་སྲིད་པ་ཡིན་ནོ་ཞེས་བྱའོ། །དེ་མ་ཐག་ཏུ་སྐྱེ་བ་མངོན་པར་འགྲུབ་པར་བྱ་བའི་ཕྱིར་འཇུག་པ་རྙེད་པ་ཞེས་གང་སྨྲས་པའི། འཇུག་པ་ཞེས་བྱ་བ་དེ་ཅི་ཡིན་ཞེ་ན། དེའི་ཕྱིར།
གང་ལ་ལས་ཀྱི་བག་ཆགས་ཡོངས་སུ་གྱུར་པའི་བྱེ་བྲག་ཡོད་པ་ཞེས་རྒྱས་པར་སྨྲས་ཏེ། འདུ་བྱེད་སྐད་ཅིག་མ་རྣམས་ནི་སྐད་ཅིག་རེ་རེ་ལ་ཡོངས་སུ་གྱུར་པའི་བྱེ་བྲག་ཡོད་པ་ཡིན་ནོ། །དེ་བས་ན་ཡོངས་སུ་གྱུར་པའི་བྱེ་བྲག་འགའ་ཞིག་སྟོན་པར་བྱེད་པ་ནི་གང་ལ་ལས་ཀྱི་བག་ཆགས་ཀྱི་གནས་སྐབས་ཡོངས་སུ་གྱུར་པའི་བྱེ་བྲག་ཡོད་པ་རང་གི་འབྲས་བུ་མངོན་པར་འགྲུབ་པར་བྱེད་པ་དེ་ནི་འདིའི་འཇུག་པ་ཞེས་བྱ་བ་ཡིན་ཏེ་ཡོངས་སུ་གྱུར་པའི་བྱེ་བྲག་དེ་ནི་བག་ཆགས་འདིའི་འཇུག་པ་ཡིན་པར་བསྟན་ཏེ། དཔེར་ན་མ་དུ་ལུང་གའི་མེ་ཏོག་ལ་རྒྱ་སྐྱེགས་ཀྱི་ཁུ་བས་བསྒོས་པ་ཅི་ཞེ་ན། ཡོངས་སུ་གྱུར་པའི་བྱེ་བྲག་གིས་གེ་སར་དམར་པོར་མངོན་པར་འགྲུབ་པར་བྱེད་པ་ནི་འཇུག་པ་ཡིན་ནོ་ཞེས་བྱ་བ་བཞིན་ནོ། །གང་གི་ཕྱིར་སྲིད་པའི་རྐྱེན་གྱིས་ལེན་པ་ཡིན་པར་རྟོག་པར་བྱེད་ཅེ་ན། དེའི་ཕྱིར། ཚོར་བ་ལ་སྲེད་པ་ནི་གདོན་མི་ཟ་བར་ཞེས་བྱ་བ་རྒྱས་པར་སྨྲས་ཏེ། དེ་དང་ལྡན་པ་དང་བྲལ་བར་བྱ་བའི་ཕྱིར་ཞེས་བྱ་བ་ནི་ཚོར་བ་དང་ལྡན་པ་དང་བྲལ་བར་བྱ་བའི་ཕྱིར་ཏེ། དེ་བས་ན་བདེ་བའི་ཚོར་བ་དང་ལྡན་པར་བྱ་བའི་ཕྱིར་དང༌། སྡུག་བསྔལ་གྱི་ཚོར་བ་དང་བྲལ་བར་བྱ་བའི་ཕྱིར་འདོད་པ་ལ་སོགས་པ་ལེན་པར་བྱེད་ལ་ཞེས་བྱ་བ་ནི་འདོད་པ་དང༌། ལྟ་བ་དང༌། ཚུལ་ཁྲིམས་དང་བརྟུལ་ཞུགས་དང༌། བདག་ཏུ་སྨྲ་བ་རྣམས་ཞེས་བྱ་བའི་ཐ་ཚིག་གོ །མེད་ན་མི་འབྱུང་བ་ཉིད་ཡིན་པར་སྟོན་པ་ནི་བདེ་བ་དང་སྡུག་བསྔལ་གཉིས་ཀྱི་ཚོར་བ་ལ་ལྡན་པ་དང་བྲལ་བར་སྲེད་པ་ནི་གདོན་མི་ཟ་བར་འདོད་པ་ལ་སོགས་པ་ལ་འདུན་པ་དང་འདོད་ཆགས་པར་བྱེད་དོ་ཞེས་བྱ་བ་འདི་ནི་བསྡུས་པའི་དོན་ཡིན་ཏེ། དེ་ལྟར་ན་ལེན་པ་མེད་པར་ཡང་ལས་རྣམས་སྲིད་པར་འགྱུར་བ་མ་ཡིན་ནོ། །དེ་བས་ན་སྲིད་པའི་རྐྱེན་ཁོ་ནས་སྲིད་པ་ཡིན་པར་འདོད་པ་མ་ཡིན་ཞེས་བྱའོ། །འདོད་པ་ལ་སོགས་པ་ལེན་པ་མེད་པར་ཡང་ཞེས་བྱ་བ་ནི་འདོད་པ་དང༌། ལྟ་བ་དང༌། ཚུལ་ཁྲིམས་དང་བརྟུལ་ཞུགས་དང༌། བདག་ཏུ་སྨྲ་བ་ལེན་པའོ། །ཅི་ཞེ་ན། ཚོར་བ་ཙམ་ལ་སྲེད་པས་ནི་ལས་སྣ་ཚོགས་ཀུན་ནས་སློང་བར་བྱེད་པ་མ་ཡིན་ལ་ཞེས་བྱ་བ་ནི་བདེ་བ་དང༌། སྡུག་བསྔལ་དང༌། བདེ་བ་ཡང་མ་ཡིན་སྡུག་བསྔལ་ཡང་མ་ཡིན་པའི་ཚོར་བ་རྣམས་ལྡན་པ་དང་བྲལ་བ་ལ་སོགས་པར་སྲེད་པ་སྣ་ཚོགས་མ་ཡིན་པ་ལུས་དང་ལོངས་སྤྱོད་
སྒྲུབ་པར་བྱེད་པ་ཅན་གྱིས་ནི། ལས་སྣ་ཚོགས་ཀུན་ནས་སློང་བར་བྱེད་པ་མ་ཡིན་གྱི། ལེན་པས་ཡིན་ཏེ། འདོད་པ་དང༌། ལྟ་བ་དང༌། ཚུལ་ཁྲིམས་དང་བརྟུལ་ཞུགས་དང༌། བདག་ཏུ་སྨྲ་བ་སྣ་ཚོགས་ལས་བྱུང་པའི་འདོད་ཆགས་རྣམ་པ་སྣ་ཚོགས་འགྲུབ་པའི་ཕྱིར་རོ།། འདོད་པ་ལ་སོགས་པ་ལ་འདུན་པ་དང་འདོད་ཆགས་ཀྱི་སྒོ་ནས་ཀུན་ནས་བསླང་བའི་ལས་སྣ་ཚོགས་ནི་འདོད་པ་དང༌། ལྟ་བ་དང༌། ཚུལ་ཁྲིམས་དང་བརྟུལ་ཞུགས་དང༌། བདག་ཏུ་སྨྲ་བ་སྣ་ཚོགས་ལ་འདུན་པ་དང་འདོད་ཆགས་ཀྱི་སྒོ་ནས་ཏེ། སྒོ་དེ་ཁོ་ན་ནས་ཕྱིས་སྲིད་པ་ཡིན་པར་འགྱུར་རོ་ཞེས་བྱ་བ་ནི་འདོད་པ་ལ་སོགས་པ་ལ་འདུན་པ་དང་འདོད་ཆགས་ཀྱི་སྒོ་ཁོ་ན་ནས་ཞེས་བྱ་བའི་ཐ་ཚིག་གོ །དེ་ལྟར་ན་ཡང་སྲེད་པའི་རྐྱེན་ཁོ་ནས་སྲིད་པ་ཡིན་པར་འདོད་པ་མ་ཡིན་ནོ། །ངན་སོང་དུ་འགྲོ་བས་སྐྲག་པ་དང་བདེ་འགྲོ་འདོད་པ་རྣམས་ཀྱི་འགྲོ་བ་དེ་དང་མི་མཐུན་པའི་སྲེད་པ་ངན་སོང་དུ་འགྲོ་བ་དང་མི་མཐུན་ཞིང་དེ་དང་མི་འཕྲོད་པ་ཞེས་བྱ་བའི་དོན་གང་ཡིན་པ་དེ་ནི་ངན་སོང་དུ་འགྲོ་བའི་ལས་རྣམས་སྲིད་པར་བྱེད་པའི་རྐྱེན་དུ་འཐད་པ་མ་ཡིན་ཏེ། ངན་སོང་ལས་ཕྱིར་ཕྱོགས་པ་ཡིན་པའི་ཕྱིར་རོ། །བདེ་འགྲོའི་ཚོར་བ་ལ་སྲེད་པ་སྔོན་དུ་སོང་བའི་འདོད་པ་ལ་སོགས་པ་ལ་འདུན་པ་དང་འདོད་ཆགས་ནི་འཐད་པ་ཡིན་ནོ་ཞེས་བྱ་བ་ནི་ངན་སོང་བའི་འགྲོ་བ་ལ་སྐྲག་པ་དང༌། བདེ་འགྲོ་འདོད་པ་དེ་དག་རྣམས་ཀྱིའོ། །དེ་ལྟར་ན་སྲིད་པའི་རྐྱེན་གྱིས་ལེན་པ་ཉིད་ཡིན་པ་ནི་ཐམས་ཅད་དུ་འགལ་བ་མེད་པ་ཡིན་ནོ། །གང་དག་གི་སྲེད་པ་སྲིད་པ་ལ་རྒྱབ་ཀྱིས་ཕྱོགས་པ་དང༌། ཡང་སྲིད་དང་མི་མཐུན་པར་བྱེད་པ་དག་གི་ནི་དེའི་རྐྱེན་གྱིས་སྲིད་པ་ལ་རྒྱབ་ཀྱིས་ཕྱོགས་པའི་སྲེད་པའི་རྐྱེན་གྱིས། ཇི་ལྟར་ལས་དག་སྲིད་པར་འགྲུབ་པར་འགྱུར་ཞེས་བྱ་བ་ནི་སྲིད་པ་ལ་རྒྱབ་ཀྱིས་ཕྱོགས་པའི་སྲེད་པ་ཡང་སྲིད་དང་རྗེས་སུ་མཐུན་པ་མ་ཡིན་པ་ནི་སྡུག་བསྔལ་གྱི་ཚོར་བ་དང་བྲལ་བར་འདོད་པ་ཡིན་ཏེ། སྲིད་པ་ལ་རྒྱབ་ཀྱིས་ཕྱོགས་པའི་སྲིད་པའི་རྐྱེན་གྱིས་ལྟ་བ་ལ་སོགས་པའི་ལེན་པ་འགྲུབ་པར་འགྱུར་རོ། །དེའི་ཕྱིར་ཡང་སྲིད་པའི་རྐྱེན་ཁོ་ནས་སྲིད་པ་ཡིན་པར་བསྟན་པ་མ་ཡིན་ནོ། །འོ་ན་གང་བཅོམ་ལྡན་འདས་ཀྱིས་གཞན་ནས་དགའ་བ་ཉིད་ལེན་པ་ཡིན་པར་གསུངས་ལ། དེའི་རྐྱེན་གྱིས་ཀྱང་སྲིད་པ་
ཡིན་པར་ཚོར་བའི་མདོ་སྡེ་ལས་གསུངས་པར་རྒྱས་པར་འབྱུང་བ་དེ་དག་གིས་ནི་སྲེད་པའི་རྐྱེན་ཁོ་ནས་སྲིད་པར་འགྱུར་བ་ཡིན་པར་སྟོན་པར་བྱེད་པ་ནི་དགའ་བ་དེ་ནི་སྲེད་པ་ཡིན་པར་བསམས་པའོ། །དེ་ཉིད་ཀྱི་ཕྱིར་ཡང་འབྱུང་བ་པའི་སྲེད་པ་དགའ་བ་འདོད་ཆགས་དང་མཚུངས་པར་ལྡན་པའོ་ཞེས་འབྱུང་བས་མདོ་སྡེའི་ཚིག་འདི་དག་སྲེད་པ་ཡིན་པར་རུང་ལ། དེར་ཡང་ལྷ་རྣམས་མགུ་བ་ནི་དགའ་བ་ལ་བརྟེན་པ་ཡིན་ནོ་ཞེས་ཀྱང་གསུངས་སོ་ཞེ་ན་ཞེས་སྨྲས་སོ། །སྲིད་པ་དང་འདོད་ཆགས་མཚུངས་པར་ལྡན་པ་སྲེད་པ་ཡིན་ནོ་ཞེས་བྱ་བར་མི་རུང་ངོ་ཞེས་བྱ་བ་ནི་གཞན་དང་གཞན་འདྲེས་པ་ལ་དེ་དང་མཚུངས་པར་ལྡན་པ་ཞེས་བྱ་བ་སྟེ། དཔེར་ན་བྱམས་པ་དང་ལྡན་པའི་དྲན་པ་ཡང་དག་བྱང་ཆུབ་ཀྱི་ཡན་ལག་བསྒོམ་མོ་ཞེས་བྱ་བ་བཞིན་ནོ། །དགའ་བ་ཡང་དགའ་བར་བྱེད་པ་ཡིན་ཏེ། ཉོན་མོངས་པ་ཅན་གྱི་ཡིད་དགའ་བ་ཞེས་བྱ་བ་ནི་འདོད་ཆགས་དང་མཚུངས་པར་ལྡན་པའོ། །ལེན་པ་ནི་ཚོར་བ་ཁོ་ན་ཡིན་ནོ་ཞེས་བྱ་བར་རིགས་པ་མ་ཡིན་ཏེ་ཞེས་བྱ་བ་ནི་དངོས་པོའི་རང་གི་མཚན་ཉིད་ཡིན་པའི་ཕྱིར་དང༌། འདིར་འདུན་པ་དང་འདོད་ཆགས་གང་ཡིན་པ་ཉེ་བར་ལེན་པ་ཡིན་པར་གསུངས་པའི་ཕྱིར་རོ། །ཚོར་བ་ལ་དགའ་བ་ནི་སྲིད་པའི་རྒྱུ་ཡིན་ནོ་ཞེས་བྱ་བ་ནི་དེ་དང་ལྡན་པ་དང་བྲལ་བ་སྲེད་པ་ཡིན་ཏེ། དགའ་བ་ནི་བདེ་བའི་ཚོར་བའི་བྱེ་བྲག་ཡིན་པའི་ཕྱིར་རོ། །དེ་ཡང་ལེན་པ་ཡིན་ཏེ་ཞེས་བྱ་བ་ནི་སྲེད་པ་དེ་ཡང་རྒྱུ་ཡིན་ནོ་ཞེས་སྐབས་དང་སྦྱར་རོ། །རྒྱུའི་རྒྱུ་ལ་དེའི་ལེན་པ་ཡིན་ནོ་ཞེས་བྱ་བ་ནི་ལེན་པའི་རྒྱུ་ནི་སྲེད་པ་ཡིན། སྲེད་པའི་རྒྱུ་ནི་དགའ་བ་ཡིན་པས་རྒྱུའི་རྒྱུ་ཡིན་ནོ། །དེའི་ཞེས་གང་སྨྲས་པ་ནི་དེའི་ཞེས་བྱ་བ་གང་ཟག་དང་སྦྱར་ཏེ། གང་ཟག་དེའི་ལེན་པའི་རྒྱུ་ལ་ལེན་པ་ཡིན་ནོ་ཞེས་བསྟན་ཏོ། །ཅིའི་ཕྱིར་ཞེ་ན། ཚོར་བ་ལ་དགའ་བ་མང་བ་རྣམས་ཡིད་འབྱུང་བ་སྐྱེད་པའི་ཕྱིར་ཏེ། དགའ་བ་ཉིད་ལེན་པ་ཡིན་ནོ་ཞེས་བྱས་ན་དེ་དག་ཚོར་བ་ལ་ཡིད་འབྱུང་བ་སྐྱེ་བར་འགྱུར་ཏེ། དགའ་བའི་ཉེས་དམིགས་མཐོང་བའི་ཕྱིར་རོ། །དེས་དེ་ལ་བར་ཆད་བྱེད་པའི་ཕྱིར་རོ་ཞེས་བྱ་བ་ནི་འདོད་ཆགས་དེས་ཚངས་པར་སྤྱོད་པ་དེ་ལ་བར་ཆད་བྱེད་པའི་ཕྱིར་རོ་ཞེས་བྱ་བའི་དོན་ཏོ། །དྲི་མ་བརྒྱུད་པའི་རྒྱུ་ཡིན་པས་བུད་མེད་ལ་དྲི་མའོ་ཞེས་ཉེ་བར་གདགས་ཏེ་ཞེས་བྱ་བ་ནི་བུད་མེད་མཐོང་ན་ཞེས་རྒྱས་པར་ཇི་སྐད་དུ་སྨྲས་པའི་རིམ་པས་སོ། །དཔེར་ན། སངས་
རྒྱས་རྣམས་ནི་འབྱུང་བ་བདེ། །ཞེས་བྱ་བ་སངས་རྒྱས་འབྱུང་བ་ཁོ་ན་བདེ་བ་མ་ཡིན་གྱི། ཞལ་མཐོང་ན་དང་བ་སྐྱེ་བར་འགྱུར་ལ། དང་བ་ལས་བདེ་བར་འགྱུར་བ་ཡིན་ནོ། །ཆོས་བསྟན་པ་ཡང་བདེ་བའོ། །ཞེས་བྱ་བ་ཡང་དེ་བཞིན་དུ་སྦྱར་རོ། །སོགས་པའི་སྒྲས་རྒྱུའི་རྒྱུ་གཞན་ལ་ཡང་དེ་བཞིན་དུ་ཉེ་བར་གདགས་པ་བསྒྲུབ་པར་བྱའོ། །སྨྲས་པ། གལ་ཏེ་སྲིད་པའི་བརྒྱུད་པའི་རྒྱུ་སྲེད་པ་ཡིན་ན། འོ་ན་ཅིའི་ཕྱིར་མདོ་སྡེ་གཞན་ལས་སྲིད་པ་ཉིད་ཀུན་འབྱུང་བའི་བདེན་པར་གསུངས། སྲིད་པ་ཉིད་ཀུན་འབྱུང་བའི་བདེན་པར་བརྗོད་པར་བྱ་དགོས་སོ་ཞེས་བསམས་པ་སྟེ། སྲིད་པས་ཡང་སྲིད་འབྱུང་བའི་ཕྱིར་རོ། །ཡང་ན་སྲིད་པའི་རྒྱུའི་རྒྱུ་སྲིད་པ་ཡང་ཀུན་འབྱུང་གི་བདེན་པར་བསྟན་ན། ལེན་པ་ནི་སྲིད་པའི་མངོན་སུམ་གྱི་རྒྱུ་ཡིན་ཡང་ཀུན་འབྱུང་གི་བདེན་པར་མ་བསྟན་ན་ཅིའི་ཕྱིར་སྲིད་པ་ཀུན་འབྱུང་གི་བདེན་པར་མདོ་སྡེ་ལས་བསྟན། སྡུག་བསྔལ་གྱི་བདེན་པ་རྒྱས་པར་བསྟན་ནས་ཀུན་འབྱུང་གི་བདེན་པ་གང་ཞེ་ན། སྲིད་པ་ཡང་འབྱུང་བ་དགའ་བ་འདོད་ཆགས་དང་མཚུངས་པར་ལྡན་པ་དེ་དང་དེ་ལ་མངོན་པར་དགའ་བ་ཡིན་ནོ་ཞེས་རྒྱས་པར་འབྱུང་བ་ཡིན་ནོ། །རྩ་བ་བཅད་ཕྱིར་དེ་སྐད་དུ་གསུངས་སོ་ཞེས་བྱ་བ་ནི་ཡང་སྲིད་ཀྱི་རྩ་བ་བཅད་པའི་ཕྱིར་སྲེད་པ་དེ་ཉིད་ཀུན་འབྱུང་གི་བདེན་པ་ཡིན་པར་གསུངས་ཏེ། དེ་རྒྱུན་བཅད་ན་རྩ་བ་བྱུང་བས་ཡང་སྲིད་འགྲུབ་པར་མི་འགྱུར་རོ། །དེ་རྒྱུན་བཅད་པ་ཉིད་ཀྱིས་ལན་པ་རྒྱུན་བཅད་པ་ཡིན་པས་སྲིད་པའི་མངོན་སུམ་གྱི་རྒྱུ་ཉིད་ཡིན་པ་ནི་ཀུན་འབྱུང་གི་བདེན་པར་མ་གསུངས་སོ། །ཡང་ན་ལེན་པ་དང་ལྷན་ཅིག་པ་དེ་ལ་བསྟན་ཏེ་ཞེས་བྱ་བ་ནི་སྲེད་པ་དེ་ལ་ཀུན་འབྱུང་བའི་བདེན་པར་བསྟན་ཏེ། དེས་ཉེ་བར་ལེན་པ་ཡིན་པས་ཀུན་འབྱུང་གི་བདེན་པའོ་ཞེས་སྟོན་ཏོ། །དེ་ལ་ཐ་དད་པ་མེད་པར་ཡང་སྲིད་འདོད་པ་ནི་ཡང་འབྱུང་བ་པའི་སྲེད་པ་ཡིན་ནོ་ཞེས་བྱ་བ་ཡིན་ཏེ། གང་གིས་འདི་ལ་འདོད་པ་ཡིན་གྱི། ལྷར་ཤོག་ཅིག་ཅེའམ། མིར་ཤོག་ཅིག་ཅེས་བྱ་བ་ནི་མ་ཡིན་ནོ། །ཐོབ་པའི་དངོས་པོ་ལ་དམིགས་པའི་དགའ་བ་དང་འདོད་ཆགས་གཉིས་འདྲེས་པའི་ཕྱིར་དགའ་བ་འདོད་ཆགས་དང་ལྡན་པ་ཡིན་ནོ་ཞེས་བྱ་བ་ནི་ད་ལྟར་བྱུང་བའི་ལུས་དང་ལོངས་སྤྱོད་ཀྱི་དངོས་པོ་ལ་དམིགས་པའི་དགའ་བ་དང་འདོད་ཆགས་གཉིས་རིམ་གྱིས་འབྱུང་བ་ན་དེ་
གཉིས་འདྲེས་པའི་ཕྱིར་དེ་དང་ལྡན་པ་ཞེས་བྱའོ། །དེ་ལ་དགའ་བ་ནི་ཉོན་མོངས་པ་ཅན་གྱི་ཡིད་ཡིན་ནོ་ཞེས་སྔར་བསྟན་ཟིན་ཏོ། །འདོད་ཆགས་ནི་ཆགས་པའི་མཚན་ཉིད་ཡིན་པར་གྲགས་པ་ཉིད་ཡིན་ནོ། །ཐོབ་པའི་ལོངས་སྤྱོད་སྣ་ཚོགས་དང་ལུས་ཀྱི་དངོས་པོ་འདོད་པ་ནི་དེ་དང་དེ་ལ་མངོན་པར་དགའ་བ་དང༌། ཡང་འབྱུང་བའི་སྲེད་པ་ཡིན་ནོ་ཞེས་སྐབས་དང་སྦྱར་རོ། །མ་ཐོབ་པའི་ལོངས་སྤྱོད་སྣ་ཚོགས་འདོད་པ་འདི་ཡང་སྣ་ཚོགས་ལ་དམིགས་པ་ཡིན་པའི་ཕྱིར་ཐ་དད་པར་ཕྱེ་སྟེ། ཡང་སྲིད་ཀྱི་མཚན་ཉིད་ལ་སྲེད་པ་ཡིན་ནོ། །དེ་ཉིད་ཀྱི་ཕྱིར་དེ་དང་དེ་ལ་མངོན་པར་དགའ་བར་བྱེད་དོ་ཞེས་གསུངས་སོ། །ཐོབ་པ་དང་མ་ཐོབ་པའི་ལུས་ཀྱི་དངོས་པོ་གཉིས་དང་ཡུལ་གཉིས་ལ་ཞེས་རྒྱས་པར་འབྱུང་བ་ནི་ཐོབ་པའི་ལུས་ལ་ནི་ཡང་འབྱུང་བའི་སྲེད་པའོ། །ཐོབ་པའི་ཡུལ་ལ་ནི་དགའ་བ་འདོད་ཆགས་དང་ལྡན་པའི་སྲེད་པའོ། །མ་ཐོབ་པའི་ཡུལ་ལ་ནི་དེ་དང་དེ་ལ་མངོན་པར་དགའ་བའི་སྲེད་པའོ། །དེ་ལྟར་སྲེད་པ་རྣམ་པ་བཞི་གོ་རིམས་བཞིན་དུ་རིག་པར་བྱའོ་ཞེས་བྱ་བ་ནི་དེ་ལྟར་ན་དང་པོ་ནི་རྣམ་གྲངས་ཀྱི་སྲེད་པ་ཡང་འབྱུང་བ་པ་ཡིན་ཏེ། དེ་ལྟར་མ་ཕྱེ་བར་གཅིག་གིས་བསྟན་ཏོ། །གཉིས་པ་ནི་རྣལ་འབྱོར་སྤྱོད་པའི་ཚུལ་དུ་བཤད་པར་ཕྱེ་ནས་སྲེད་པ་རྣམ་པ་གཉིས་སུ་བསྟན་ཏོ། །ཡང་འབྱུང་བ་པའི་སྲེད་པ་ལོགས་ཤིག་ཏུ་བསྟན་པ་ཡང་ཐ་དད་པར་དབྱེའོ། །དེ་བས་ན་ལེན་པའི་མཚན་ཉིད་འདུན་པ་དང་འདོད་ཆགས་ཀྱང་འདིར་འདུས་པ་ཡིན་ནོ་ཞེས་བྱ་བ་ནི་ཀུན་འབྱུང་གི་བདེན་པ་འདིར་ཡིན་ཏེ། དགའ་བ་འདོད་ཆགས་དང་ལྡན་པ་དང་དེ་དང་དེ་ལ་མངོན་པར་དགའ་བར་བྱེད་དོ་ཞེས་གསུངས་པའི་ཕྱིར་རོ། །དེ་དག་མདོ་སྡེ་འདི་ལས་ཇི་ལྟར་རིག་པར་བྱ་ཞེ་ན་ཞེས་བྱ་བ་ནི་ལས་ནི་ཞིང༌། སྲེད་པ་ནི་རླན། རྣམ་པར་ཤེས་པ་ནི་ས་བོན་ཞེས་བསྟན་པ་རྣམས་རྟེན་ཅིང་འབྲེལ་པར་འབྱུང་བའི་མདོ་སྡེ་འདིར་ཇི་ལྟར་རིགས་པར་བྱ་ཞེས་བྱ་བ་ཡིན་ནོ། །དེ་དག་འདིར་བསྟན་པའི་ཕྱིར་སྲིད་པའི་གནས་སྐབས་ཀྱི་ལས་ནི་ཞིང་ཡིན་ནོ་ཞེས་སྨྲས་ཏེ། དེ་ལ་རྣམ་པར་གནས་པའི་ལས་ནི་འདུ་བྱེད་ཀྱི་གནས་སྐབས་དང་སྲིད་པའི་གནས་སྐབས་སོ། །དེ་ལ་འདིར་སྲིད་པའི་གནས་སྐབས་ཀྱི་ལས་ནི་ཞིང་དུ་བསྟན་པ་ཡིན་ནོ། །དེར་ཉེ་བར་འགྲོ་བ་ལན་པ་དང་བཅས་པའི་རྣམ་པར་ཤེས་
པ་ནི་ས་བོན་ཡིན་ནོ་ཞེས་བྱ་བ་ནི་ཉེ་བར་འགྲོ་བས་ན་འགྲོ་བ་སྟེ་ལས་དེ་འགྲོ་བ་ནི་ཉེ་བར་འགྲོ་བ་ཡིན་ཏེ། ཇི་སྐད་དུ་བཅོམ་ལྡན་འདས་ཀྱིས། གལ་ཏེ་བསོད་ནམས་ཀྱི་འདུ་བྱེད་མངོན་པར་འདུ་བྱེད་ན་བསོད་ནམས་ཀྱིས་རྣམ་པར་ཤེས་པ་ཉེ་བར་འགྲོ་བ་ཡིན་ནོ་ཞེས་རྒྱས་པར་གསུངས་པ་ཡིན་ཏེ། ལེན་པ་གང་གིས་ལེན་པ་དང་བཅས་པའི་རྣམ་པར་ཤེས་པ་དེ་ས་བོན་ཡིན་ནོ། །ལེན་པ་དེ་ཉིད་ནི་རླན་ཡིན་ནོ། །རྣམ་པ་དེ་གསུམ་ཞེས་བྱ་བ་ནི་ལས་ཞིང་དང༌། རྣམ་པར་ཤེས་པ་ས་བོན་དང༌། ལེན་པ་རླན་རྣམས་ཡིན་ནོ། །མ་རིག་པ་ནི་རླན་མི་ཟད་པའི་རྒྱུ་ཡིན་པར་བསྟན་པའི་ཕྱིར་ཞེས་རྒྱས་པར་འབྱུང་བ་ལ། རླན་མི་ཟད་པའི་རྒྱུ་ཞེས་བྱ་བ་ནི་ལེན་པའི་རླན་མི་ཟད་པའི་རྒྱུ་ཞེས་བྱ་བའི་ཐ་ཚིག་གོ །འདིའི་ནང་ནས་འབྱུང་བ་ཡིན་ཏེ་ཞེས་བྱ་བ་ནི་མདོ་སྡེ་འདིའི་ནང་ནས་སེམས་ཅན་དེ་དག་གི་མ་རིག་པ་མུན་པར་གྱུར་པ་ནི་ཞེས་འབྱུང་བ་ཡིན་ནོ། །གཞན་ལས་ནི་རྣམ་གྲངས་ཀྱིས་རྣམ་པར་ཤེས་པའི་གནས་བཞི་སྟེ་ཞེས་རྒྱས་པར་འབྱུང་བ་ལ། མདོ་སྡེ་གཞན་ལས་ནི་རྣམ་པར་ཤེས་པའི་གནས་བཞི་སྟེ། གཟུགས་ལ་ཉེ་བར་འགྲོ་བའི་རྣམ་པར་ཤེས་པ་གནས་པ་དང༌། ཚོར་བ་ལ་ཉེ་བར་འགྲོ་བ་དང༌། འདུ་ཤེས་ལ་ཉེ་བར་འགྲོ་བ་དང༌། འདུ་བྱེད་ལ་ཉེ་བར་འགྲོ་བ་སྟེ། རྣམ་པར་ཤེས་པའི་གནས་བཞི་པོ་དེ་དག་རྣམ་གྲངས་ཀྱིས་ཞིང་ཡིན་པར་སྟོན་ཏོ། །ཇི་ལྟ་ཞེ་ན། དགེ་སློང་དག་རྣམ་པར་ཤེས་པའི་གནས་ཞེས་རྒྱས་པར་འབྱུང་བ་ཡིན་ཏེ། སའི་ཁམས་ཀྱི་ཚིག་བླ་དགས་ཞེས་གསུངས་པའི་ཕྱིར་རྣམ་པར་ཤེས་པའི་གནས་བཞི་ནི་རྣམ་གྲངས་ཀྱིས་ཞིང་ཡིན་པར་སྟོན་ལ། སའི་ཁམས་ནི་ཞིང་ཡིན་པར་སྟོན་ཏེ། ཇི་སྐད་དུ། དགེ་སློང་དག་རྣམ་པར་ཤེས་པའི་གནས་བཞི་ལ་ཞིང་ཞེས་བྱ་བ་ནི་དེའི་ཚིག་བླ་དགས་ཡིན་ནོ་ཞེས་གསུངས་སོ། །དེ་ལས་ཅིར་འགྱུར་ཞེ་ན། ཡུལ་གང་ལ་དགའ་བ་དང་འདོད་ཆགས་པ་ནི་ཞེས་རྒྱས་པར་འབྱུང་བ་ལ། ཡུལ་གང་ལ་དགའ་བ་དང༌། འདོད་ཆགས་པ་ནི་རྣམ་པར་ཤེས་པའི་གནས་བཞི་ཡུལ་དེ་ལ་དམིགས་པ་ཞེས་བྱ་བའི་དོན་གང་ཡིན་པ་སྟེ། ལེན་པ་དང་བཅས་པའི་རྣམ་པར་ཤེས་པ་བརླན་པར་བྱེད་དོ། །མིང་དང་གཟུགས་དེ་ནི་ཞེས་བྱ་བ་ནི་རྣམ་པར་ཤེས་པའི་གནས་བཞིའོ། །དེའི་ཞིང་ཡིན་པར་འདིར་གསུངས་སོ་ཞེས་བྱ་བ་
ནི་ལེན་པ་དང་བཅས་པའི་རྣམ་པར་ཤེས་པ་དེའི་འོ། །འདིར་ཞེས་བྱ་བ་ནི་མདོ་སྡེ་འདིར་རོ། །དཔེར་ན་གང་ལ་བརྟེན་ནས་ཆུས་ས་བོན་བརླན་པར་བྱེད་པ་དེ། ས་བོན་གྱི་ཞིང་ཡིན་པར་སྨྲས་པ་དེ་བཞིན་ནོ། །དེ་ལ་གཟུགས་ལ་ཉེ་བར་འགྲོ་ཞིང་རྣམ་པར་ཤེས་པ་གནས་པ་ནི་འདོད་པའི་ཁམས་སོ། །ཚོར་བ་ལ་ཉེ་བར་འགྲོ་བ་ནི་བསམ་གཏན་ནོ། །འདུ་ཤེས་ལ་ཉེ་བར་འགྲོ་བ་ནི་གཟུགས་མེད་པ་གསུམ་མོ། །འདུ་བྱེད་ལ་ཉེ་བར་འགྲོ་བ་ནི་སྲིད་པའི་རྩེ་མོ་པ་ཡིན་ནོ་ཞེས་བརྗོད་དེ། གཟུགས་དང་ཚོར་བ་དང་འདུ་ཤེས་དང་འདུ་བྱེད་ཀྱི་ཕུང་པོ་ལ་སྲེད་པའི་དབང་གིས་རྣམ་པར་ཤེས་པ་གནས་པ་ཡིན་ནོ་ཞེས་བྱ་སྟེ། ཕུང་པོ་བཞི་ནི་ཇི་ལྟར་སྲིད་པར་རྣམ་པར་ཤེས་པའི་གནས་བཞི་ཡིན་ནོ། །ལས་ཀྱི་སྲིད་པ་ལ་མ་བརྟེན་པར་ཞེས་རྒྱས་པར་འབྱུང་བ་ནི་ལས་ཀྱི་སྲིད་པའི་སྟོབས་ཀྱིས་རིས་མཐུན་པ་གཞན་དུ་རྣམ་པར་ཤེས་པ་སྐྱེ་བར་འགྱུར་བས་ལས་ནི་ཞིང་ཡིན་པར་མདོ་སྡེ་དེ་ལས་བསྟན་པ་ཡིན་ཏེ། དཔེར་ན་ཞིང་གི་སའི་སྟོབས་ཀྱིས་འབྲས་བུ་ལ་སོགས་པའི་ས་བོན་སྐྱེ་བ་བཞིན་ནོ། །འདི་གཉིས་ལ་ཐ་དད་དུ་བྱ་བ་ཅི་ཡོད་ཅེས་བྱ་བ་ནི་སྐྱེ་བ་དང་མངོན་པར་འགྲུབ་པ་དེ་གཉིས་ལའོ། །ཇི་ལྟར་ན་ལས་དང་སྲེད་པ་དེ་གཉིས་རྒྱུ་ཡིན་ཞེ་ན་ཞེས་བྱ་བ་ནི་ལས་རྒྱུ་ཡིན་པར་ཇི་ལྟར་འཐད། མངོན་པར་འགྲུབ་པར་བྱེད་པའི་རྒྱུ་ཡང་སྲེད་པ་ཇི་ལྟར་ཡིན་ཞེས་བྱ་བ་ཡིན་ནོ། །སེམས་ཅན་གྱི་རིས་དེ་དང་དེར་ཞེས་རྒྱས་པར་འབྱུང་བ་ལ་སེམས་ཅན་གྱི་རིས་དེ་དང་དེར་ཞེས་བྱ་བ་ནི་ལྷ་དང་མི་ལ་སོགས་པའི་སེམས་ཅན་གྱི་རིས་སུའོ། །སྐལ་བ་འདྲ་བར་འགྲོ་བ་ཞེས་བྱ་བ་ནི་འདྲ་བར་འགྲོ་བ་སྟེ། ཇི་ལྟ་ཞེ་ན། སྐྱེ་བ་འདྲ་བར་འགྲོ་བས་ན་དེ་དང་མཐུན་པར་འགྲོ་བ་ཡིན་ནོ། །དེ་ལྟར་ན་རེ་ཞིག་ལྷ་ལ་སོགས་པའི་སེམས་ཅན་གྱི་རིས་སུ་འདྲ་བར་ཉེ་བར་འགྲོ་བ་ནི་སྐྱེ་བ་ཡིན་པར་བསྟན་ཏོ། །ལས་དང་རྗེས་སུ་མཐུན་པར་ཉེ་བར་འགྲོ་བ་ནི་སེམས་ཅན་གྱི་རིས་དེ་དང་དེར་སྐྱེ་བ་ནི་ངེས་པའི་ཚིག་གི་ཚུལ་གྱིས་སོ། །དེའི་རྒྱུ་ནི་ལས་ཡིན་ཏེ་ཞེས་བྱ་བ་ནི་སྐྱེ་བ་དེའིའོ། །ལས་སྣ་ཚོགས་ཡིན་པའི་ཕྱིར་དང༌། རྣམ་པར་སྨིན་པ་དང་བཅས་པ་ཡིན་པའི་ཕྱིར་རོ་ཞེས་བྱ་བ་ནི་དཔེར་ན་ས་བོན་དང་མཐུན་པར་མྱུ་གུ་མང་པོ་འབྱུང་
བ་ནི་ས་བོན་རྣམ་པ་མང་པོ་ཡིན་པའི་ཕྱིར་རོ། །དེ་བས་ན་རྗེས་སུ་མཐུན་པ་གང་ཡིན་པ་དེ་ནི་ཐམས་ཅད་དུ་དེ་ས་བོན་དང་མཐུན་པ་ཡིན་པའི་ཕྱིར་རོ། །དེ་ལྟར་ན་ལས་སྣ་ཚོགས་ཡིན་པའི་ཕྱིར་རིས་མཐུན་པ་རྣམ་པ་མང་པོ་ཐ་དད་པར་སྐྱེ་བའི་རྒྱུ་ཉིད་དུ་འཐད་པ་ཉིད་དོ། །དགེ་བ་དང་མི་དགེ་བ་ཡིན་པའི་ཕྱིར་ཡང་ལས་ནི་རྣམ་པར་སྨིན་པ་དང་བཅས་པ་ཡིན་ཏེ། དེ་བས་ན་དེ་ནི་སྐྱེ་བའི་རྒྱུ་ཉིད་དུ་རིགས་པ་ཡིན་ནོ། །དེ་ལྟར་ན་སྐྱེ་བའི་རྒྱུ་ལས་ཡིན་ནོ་ཞེས་རིགས་པ་བསྟན་པ་ཡིན་ནོ། །ལུང་ཡང་ཡོད་དོ་ཞེས་སྟོན་པ་ནི། ཇི་སྐད་དུ་དེ་བས་ན་བདག་ནི་སེམས་ཅན་རྣམས་ཞེས་རྒྱས་པར་གསུངས་པ་ཡིན་ནོ། །ཐ་དད་པ་མེད་པར་སྲིད་པ་ནི་མངོན་པར་འདོད་པ་ཡིན་ནོ། །མངོན་པར་འགྲུབ་པ་ནི་འགྲུབ་པ་ཡིན་ཏེ་ཞེས་བྱ་བ་ངེས་པའི་ཚིག་གི་ཚུལ་གྱིས་ཏེ། ཐ་དད་པ་མེད་པར་སྲེད་པ་གང་ཡིན་པ་ནི་འདི་འབའ་ཞིག་ལ་མངོན་པར་འདོད་པ་གང་ཡིན་པའོ། །དེའི་མཚན་ཉིད་ཀྱང་འདི་ལྟ་སྟེ། རིས་མཐུན་པའི་སྐལ་པ་འདྲ་བ་ཐམས་ཅད་དུ་ཕུང་པོར་གཞན་འབྱུང་པ་ཙམ་སྟེ་ཞེས་བྱ་བ་ཡིན་ཏེ། ཙམ་སྨོས་པ་ནི་བྱེ་བྲག་བསལ་བ་ཡིན་ནོ། །དེའི་རྒྱུ་ནི་སྲེད་པ་ཡིན་ནོ་ཞེས་བྱ་བ་ནི་མངོན་པར་འགྲུབ་པ་དེའིའོ། །དེ་ལ་ཐ་དད་པ་མེད་པའི་ཕྱིར་དང་ཞེས་བྱ་བ་ནི་ལྷ་དང་མིའི་མདོག་དང་ཚུལ་དང་གནས་པའི་རྣམ་པ་ཐ་དད་པ་མེད་པར་ཕྱིས་ཀྱང་ཡོད་པར་འདོད་པའི་སྲེད་པ་དེ་ལའོ། །རྣམ་པར་སྨིན་པ་མེད་པའི་ཕྱིར་ཏེ་ཞེས་བྱ་བ་ནི་དེ་ལ་ཞེས་བྱ་བའི་སྐབས་དང་སྦྱར་རོ། །འདི་ལྟར་དེ་ནི་བསྒྲིབས་ལ་ལུང་དུ་མ་བསྟན་པ་ཡིན་པས་སོ། །དམིགས་ཀྱིས་ཕྱེ་བའི་དངོས་པོ་པ་ནི་འདོད་པ་ན་སྤྱོད་པའི་དགེ་བ་ཡིན་ནོ་ཞེས་བྱ་བ་ནི་དམིགས་ཀྱིས་ཕྱེ་བའི་ལུས་ལ་སྲེད་པ་ནི་དམིགས་ཀྱིས་ཕྱེ་བའི་དངོས་པོ་པ་འདོད་པ་ན་སྤྱོད་པའི་དགེ་བ་ཡིན་གྱི་གཟུགས་ན་སྤྱོད་པ་མ་ཡིན་ནོ། །སྤྱིར་འཇུག་པ་ནི་གལ་ཏེ་འདོད་ཆགས་དང་བྲལ་བ་མ་ཡིན་ན་གང་དུ་སྐྱེས་པ་ས་དེ་པའི་ཡིན་པའི་རྣམ་པར་གཞག་གོ་ཞེས་བྱ་བ་ནི་དམིགས་ཀྱིས་མ་ཕྱེ་བའི་དངོས་པོ་པ་འདོད་པའི་ཁམས་སམ་གཞན་གང་དུ་ཡང་རུང་སྐྱེས་པར་སྲིད་པ་ནི་ས་དེ་པར་རྣམ་པར་གཞག་གོ །གལ་ཏེ་འདོད་ཆགས་དང་བྲལ་བ་མ་ཡིན་ན་ཞེས་བྱ་བ་ནི་ས་དེ་ལས་འདོད་ཆགས་དང་བྲལ་བ་ཞེས་བྱ་བའི་ཐ་ཚིག་སྟེ། དེ་ནི་བསྒྲིབས་ལ་ལུང་དུ་མ་བསྟན་པ་ཡིན་པར་རིག་པར་བྱའོ།།
ལས་མེད་པར་ནི་ལུས་སྣ་ཚོགས་པར་མི་འགྱུར་ལ་ཞེས་བྱ་བ་ནི་རྒྱུ་ཡིན་པའི་ཕྱིར་རོ། །དེ་བཞིན་དུ་སྲེད་པ་མེད་པར་ནི་མངོན་པར་འགྲུབ་པ་ཉིད་དུ་མི་འགྱུར་རོ་ཞེས་བྱ་བ་ནི་ལས་ཡོད་དུ་ཟིན་ཀྱང་སྲེད་པ་མེད་ན་མངོན་པར་འགྲུབ་པ་མེད་པའི་ཕྱིར་རོ། །དཔེར་ན་ས་བོན་ཐ་དད་པ་མེད་པར་ཞེས་རྒྱས་པར་འབྱུང་བ་ནི་ས་བོན་ལྟ་བུ་ནི་ལས་ཡིན་ནོ། །ཆུ་ལྟ་བུ་ནི་སྲེད་པ་ཡིན་ནོ། །ཡང་དཔེར་ན་ཆུས་བརླན་པའི་འཇིམ་པ་ལས་ཞེས་རྒྱས་པར་འབྱུང་བ་ལ། དེ་ཡང་བརྐོས་པ་དང་རྗེས་སུ་མཐུན་པ་ཡིན་ནོ་ཞེས་བྱ་བ་ལ་དེ་ཡང་ཞེས་བྱ་བ་ནི་རྒྱའི་འབུར་ཏེ། དེ་ནི་བརྐོས་པ་དང་རྗེས་སུ་མཐུན་པ་ཡིན་ཏེ། ཡང་སྲིད་ཀྱང་དེ་འདྲ་ཞེས་བྱ་བའི་དོན་ཏོ། །འཇིམ་གོང་གཤེར་བ་ལྟ་བུ་ནི་སྲེད་པ་དང་བཅས་པའི་རྣམ་པར་ཤེས་པའོ། །བརྐོས་པ་ལྟ་བུ་ནི་ལས་ཡིན་ནོ། །སྐྱེ་བ་དང་མངོན་པར་འགྲུབ་པ་གཉིས་ལ་ཐ་དད་དུ་བྱ་བ་ནི་སྨྲས་ཟིན་ཏོ། །ལས་དང་སྲེད་པ་དེ་གཉིས་རྒྱུ་ཡིན་པ་དེ་ཡང་སྨྲས་ཟིན་ཏོ། །འོ་ན་རྟེན་ཅིང་འབྲེལ་པར་འབྱུང་བ་འདིར་ཞེས་རྒྱས་པར་འབྱུང་བ་ནི་གལ་ཏེ་ལས་ནི་སྐྱེ་བའི་རྒྱུ་ཡིན། སྲིད་པ་ནི་མངོན་པར་འགྲུབ་པའི་རྒྱུ་ཡིན་ན། འོ་ན་རྟེན་ཅིང་འབྲེལ་པར་འབྱུང་བ་འདིར་ཚོར་བའི་རྐྱེན་གྱིས་སྲེད་པ། སྲེད་པའི་རྐྱེན་གྱིས་ལེན་པ། ལེན་པའི་རྐྱེན་གྱིས་སྲིད་པ་ཞེས། སྲེད་པ་དང་ལས་ཀྱི་བར་དུ་ཅིའི་ཕྱིར་ལེན་པ་བཅུག་ཅེ་ན་ཞེས་བྱ་བ་ཡིན་ནོ། །དེའི་བྱེ་བྲག་གིས་ཞེས་བྱ་བ་ནི་ལེན་པའི་བྱེ་བྲག་གིས་སོ། །ལས་བྱེ་བྲག་ཏུ་ཞེས་བྱ་བ་ནི་ལེན་པའི་བྱེ་བྲག་གིས་ལས་བྱེ་བྲག་ཏུ་སྲིད་པའི་དངོས་པོ་ཡིན་པར་བསྟན་པའི་ཕྱིར་རོ། །ཅི་ཞེ་ན། སྲེད་པ་དང་ལས་ཀྱི་བར་དུ་ལེན་པ་བཅུག་པ་ཡིན་ནོ་ཞེས་སྐབས་དང་སྦྱར་རོ། །གང་དག་འབྱུང་བ་མེད་པར་སྲེད་པར་བྱེད་པ་ཞེས་བྱ་བ་ནི་རྒྱུན་ཆད་པ་ལའོ། །དེ་དག་གི་ནི་མངོན་པར་འགྲུབ་པ་གང་གི་རྒྱུ་ཞེ་ན་ཞེས་བྱ་བ་ནི་དེ་དག་ལ་ཡང་སྲིད་པ་སྲེད་པ་ཡོད་པ་མ་ཡིན་ནོ། །དེ་དག་གི་ཡང་ཞེས་རྒྱས་པར་འབྱུང་བ་ལ་བདག་ཏུ་ལྟ་བར་ཞེན་པའི་ཕྱིར་རོ་ཞེས་བྱ་བ་ནི་འཇིག་ཚོགས་ལ་ལྟ་བར་མངོན་པར་ཞེན་ཅེས་བྱ་བའི་དོན་ཏེ། འཇིག་ཚོགས་ལ་ལྟ་བ་ཡོད་ན་ནི་གདོན་མི་ཟ་བར་ཕུང་པོ་ལ་སྲེད་པ་ཡོད་པ་ཡིན་ནོ། །གནམ་ལྕགས་ཀྱི་སྒྲ་ལ་སོགས་པས་སྐྲག་ནས་ཞེས་བྱ་བ་ནི་ཅི་ཞེ་ན། དེ་དག་ལ་ཡང་བདག་ཏུ་སྲེད་པ་ཡོད་པ་ཁོ་ན་ཡིན་ནོ་ཞེས་བྱ་བ་སྟེ། བདག་ལ་སྲེད་པ་མ་ཡིན་པ་ཉིད་ཡིན་ཏེ། བདག་ལ་སྲེད་པ་དང་བྲལ་ན་འཇིགས་པའི་རྒྱུ་ཡོད་པ་མ་ཡིན་ནོ། །
འཆི་བ་རྣམས་ཀྱང་ལུས་ལ་མངོན་པར་དགའ་བའི་ཕྱིར་ཏེ་ཞེས་བྱ་བ་ནི་ཇི་སྐད་དུ་སེམས་ཅན་འཆི་བའི་ཚེ་འདུ་ཤེས་གསལ་བ་མ་ཡིན་པ་ཐམས་ཅད་ཀྱང་སྔོན་གོམས་པའི་བདག་ལ་ཆགས་པ་འབྱུང་བ་ཡིན་ནོ་ཞེས་གསུངས་པ་ཡིན་ཏེ། དེ་བས་ན་བདག་ནི་མེད་པར་འགྱུར་རོ་ཞེས་ལུས་ལ་མངོན་པར་དགའ་བའི་ཕྱིར་རོ། །འཕགས་པ་རྣམས་ནི་དེ་ཚར་གཅོད་པར་བྱེད་དེ། ལན་ཅིག་ཕྱིར་འོང་བ་ལ་དེའི་ཚེ་དེ་ཡོད་པ་མ་ཡིན་ནོ། །དེ་བས་ན་དེ་དག་ལ་ཡང་ལུས་ལ་སྲེད་པ་ཁོ་ན་ཡིན་ཏེ། དེ་ཉིད་དེ་དག་གི་མངོན་པར་འགྲུབ་པའི་རྒྱུ་ཡིན་ནོ་ཞེས་བྱ་བ་ནི་དེ་དག་གི་ལུས་ལ་སྲེད་པ་དེ་ཉིད་མངོན་པར་འགྲུབ་པའི་རྒྱུ་ཡིན་ནོ། །སྡུག་བསྔལ་གྱི་ཚོར་བ་ལ་ཞེ་སྡང་ནས་དེ་ལུས་རྒྱུན་ཆད་པར་འདོད་པ་ནི་ཞེས་བྱ་བ་ནི་སྡུག་བསྔལ་གྱི་ཚོར་བའི་ལུས་མེད་པར་རོ། །ལུས་ལ་ཡང་དག་པ་ཇི་ལྟ་བ་བཞིན་ཡིད་བྱུང་བར་ཡོངས་སུ་མི་ཤེས་པའི་ཕྱིར་རོ་ཞེས་བྱ་བ་ནི་དཔེར་ན་དགྲ་བཅོམ་པ་ཚངས་པར་སྤྱོད་པ་ལ་ལེགས་པར་ཞུགས་པ་ལམ་འདི་ཉིད་ལ་ཡང་ལེགས་པར་བསྒོམས་པ་དག་ཚེ་ཟད་ན་ཇི་ལྟར་ནད་དང་བྲལ་བ་བཞིན་དུ་ཤིན་ཏུ་དགའ་བ་ལྟར་དེ་དག་ནི་ལུས་ལ་ཡང་དག་ཇི་ལྟ་བ་བཞིན་དུ་ཤེས་པ་ཁོ་ནས་ཆགས་པ་དང་བྲལ་བར་འགྱུར་བ་ཡོད་པ་མ་ཡིན་ནོ། །དེ་བས་ན་དེ་དག་ལུས་ལ་སྲེད་པ་མེད་པ་གྲུབ་པ་མ་ཡིན་ཏེ། འདི་ལྟར་འབྱུང་བ་མེད་པར་འདོད་པའི་ཕྱིར་རོ། །གཞན་དག་ནི་མངོན་པར་འགྲུབ་པའི་རྒྱུ་ཇི་ལྟར་སྲེད་པ་ཡིན་ཞེས་བྱ་བ་ལ་ཞེས་རྒྱས་པར་འབྱུང་བ་ནི་བཙུན་པ་དཔལ་ལེན་ནོ། །དེ་ལ་འཆི་ཀར་འཆི་ཀའི་སེམས་ཐ་མ་ལས་གཞན་པ་སྲིད་པ་བར་མའི་གཟུགས་ལ་མངོན་པར་དགའ་བས་དེ་ལྟར་ན་མངོན་པར་སྲེད་པ་ནི་མངོན་པར་འགྲུབ་པའི་རྒྱུ་ཡིན་པར་སྟོན་པར་བྱེད་ལ། སྲིད་པ་བར་མ་ནི་མངོན་པར་འགྲུབ་པ་ཡིན་ནོ་ཞེས་འཆད་པར་བྱེད་དོ། །སྔར་ནི་སྲིད་པ་བར་མའི་གཟུགས་བྱུང་ལ། དེ་ལ་མངོན་པར་དགའ་བ་ལ་བརྟེན་ནས་ཕྱིས་ཕུང་པོ་ལྔ་པའི་སྲིད་པ་བར་མ་ཡིན་ནོ་ཞེས་བྱ་བ་ཡིན་ནོ། །སྲིད་པ་བར་མའི་སེམས་ཀྱི་འཇུག་ཐ་མས་ཀྱང་ཁྲག་དང་ཁུ་བ་ལ་སོགས་པ་ཞེས་བྱ་བ་སྩོགས་པའི་སྒྲས་གང་དུ་ལས་དང་ཉོན་མོངས་པ་ཅན་དང་བདག་ལ་སོགས་པ་བསྡུས་པ་ལ་ཅུང་ཟད་མངོན་པར་དགའ་ནས་ཞེས་བྱ་བ་མངོན་པར་དགའ་བའི་སྲེད་པས་སོ། །དེ་ལྟར་ན་ཡང་སྲེད་པ་དེ་རྒྱུ་ཡིན་ཏེ། ཕུང་པོ་གཞན་འབྱུང་བའི་རྒྱུའི་མཚན་ཉིད་ལས་མངོན་པར་འགྲུབ་པ་ཡིན་ནོ་ཞེས་བྱ་བ་
ཡིན་ནོ། །རགས་པ་དང་ཕྲ་བ་ཞེས་བྱ་བ་ལ། རགས་པ་ནི་འཆི་ཀའི་གནས་སྐབས་ནའོ། །ཕྲ་བ་ནི་སྲིད་པ་བར་མའོ། །སྣང་བ་ནི་འཆི་ཀའི་གནས་སྐབས་ནའོ། །མི་སྣང་བ་ནི་སྲིད་པ་བར་མའོ། །རྣམ་པར་སྨིན་པ་ལས་སྐྱེས་པའི་མིག་གི་དབང་དུ་བྱས་ནས་འགྲོ་བ་གཞན་དང་འགྲོ་བ་གཞན་གཉིས་ཀྱང་ཞེས་བྱ་སྟེ། ཐ་མའི་གནས་སྐབས་ཀྱི་ལུས་ཀྱི་དངོས་པོ་རེས་འགའ་མིའི་འགྲོ་བས་བསྡུས་པ་ཡིན་ལ། སྲིད་པ་བར་མ་ནི་ལྷ་ལ་སོགས་པས་བསྡུས་པ་ཡིན་ནོ། །འོན་ཏེ་སེམས་ཅན་གྱི་གྲངས་སུ་མ་གཏོགས་པ་ཡིན་ན་ནི་ཞེས་བྱ་བ་ནི་སྲིད་པ་བར་མའི་གཟུགས་ཞེས་བྱ་བའི་སྐབས་དང་སྦྱར་རོ།། འདི་ལྟར་སེམས་ཅན་གྱི་གྲངས་སུ་གཏོགས་པའི་སྲིད་པ་བར་མ་ནི་ཡོད་པ་མ་ཡིན་པའི་ཕྱིར་རོ་ཞེས་བྱ་བ་ནི་སྲིད་པ་སེམས་ཅན་གྱི་གྲངས་སུ་གཏོགས་པའི་ཕྱིར་དང༌། གསུང་རབ་ལས་སྲིད་པ་བར་མ་སེམས་ཅན་གྱི་གྲངས་སུ་གཏོགས་པར་འབྱུང་བའི་ཕྱིར་རོ། །གལ་ཏེ་ཤའི་མིག་གིས་མཐོང་ནས་ཡིན་ན་ནི་ཞེས་བྱ་བ་ནི་སྲིད་པ་བར་མའི་གཟུགས་ལའོ། །དེའི་ཚེ་མིག་གི་རྣམ་པར་ཤེས་པ་མི་སྲིད་པའི་ཕྱིར་རོ་ཞེས་བྱ་བ་ནི་འཆི་ཀའི་གནས་སྐབས་ན་ཡིད་ཀྱི་རྣམ་པར་ཤེས་པའི་གནས་སྐབས་ལ་འཆི་བ་ཡིན་ནོ། །སྲིད་པ་བར་མའི་གཟུགས་ཀྱང་ལྷའི་མིག་གི་ཡུལ་ཡིན་པའི་ཕྱིར་རོ་ཞེས་བྱ་བ་ནི་ཅི་ཞེ་ན། ཤའི་མིག་གིས་མཐོང་ནས་མངོན་པར་དགའ་བའོ་ཞེས་བྱ་བ་མི་རིགས་པའི་ཕྱིར་རོ། །འོན་ཏེ་རྨི་ལམ་བཞིན་དུ་ཞེས་རྒྱས་པར་འབྱུང་བ་ལ་དེ་ལ་སྲིད་པ་བར་མའི་གཟུགས་དགོས་པ་ཅི་ཞིག་ཡོད་ཅེས་བྱ་བ་ནི་ཡོད་པ་མ་ཡིན་པ་ཡང་སྲིད་པ་བར་མའི་གཟུགས་ནི་དེའི་ཚེ་ཆོས་ཀྱི་དབང་གིས་རྨི་ལམ་བཞིན་དུ་བརྟགས་ནས་མངོན་པར་དགའ་ཞིང་མངོན་པར་དགའ་བར་འགྲུབ་པར་བྱེད་དོ་ཞེས་བྱ་བར་འགྱུར་རོ། །སྐལ་བ་མི་འདྲ་བའི་ས་པ་གཉིས་ཡིན་ན་ཡང་ཞེས་རྒྱས་པར་འབྱུང་བ་ནི་གང་གི་ཚེ་འཆི་ཀའི་སེམས་འདོད་པ་ན་སྤྱོད་པ་ཡིན་ན་ནི་སྲིད་པ་བར་མའི་གཟུགས་གཟུགས་ན་སྤྱོད་པ་ཡིན་པ་དང༌། འཆི་ཀའི་སེམས་གཟུགས་ན་སྤྱོད་པ་ཡིན་ན་ནི་སྲིད་པ་བར་མའི་གཟུགས་འདོད་པ་ན་སྤྱོད་པ་ཡིན་ཏོ་དེ་ལྟར་ན་སྐལ་བ་མི་འདྲ་བའི་ས། འཆི་ཀའི་སེམས་དང་སྲིད་པ་བར་མའི་གཟུགས་གཉིས་གང་གིས་པ་ཡིན་ཡང་རུང་སྟེ། སྲིད་པ་བར་མའི་
གཟུགས་ལ་མངོན་པར་དགའ་བར་བྱེད་པ་མི་རིགས་སོ་ཞེས་བྱ་བ་ནི་འདོད་པ་ན་སྤྱོད་པའི་མངོན་པར་དགའ་བས་ནི་གཟུགས་ན་སྤྱོད་པའི་གཟུགས་ལ་མངོན་པར་དགའ་བར་བྱེད་པ་མ་ཡིན་ཏེ། སྲེད་པ་ནི་སའི་རིས་ཡོངས་སུ་ཆད་པའི་ཕྱིར་རོ། །གཟུགས་ན་སྤྱོད་པའི་མངོན་པར་དགའ་བས་ཀྱང་འདོད་པ་ན་སྤྱོད་པའི་གཟུགས་ལ་མངོན་པར་དགའ་བར་བྱེད་པ་མ་ཡིན་ཏེ། དེ་ཉིད་ཀྱི་ཕྱིར་ས་རྣམས་ཀྱི་རིས་ཡོངས་སུ་ཆད་པའི་ཕྱིར་དང་ས་འོག་མའི་འདོད་ཆགས་དང་བྲལ་བའི་ཡང་ཕྱིར་རོ། །གཟུགས་མེད་པ་ན་ཡང་སྲིད་པ་བར་མ་ཡོད་པ་མ་ཡིན་པས་ཞེས་རྒྱས་པར་འབྱུང་བ་ལ་དེར་ཇི་ལྟ་བ་དེ་བཞིན་དུ་འདོད་པའི་ཁམས་དང་གཟུགས་ཀྱི་ཁམས་གཞན་དུ་ཡང་དེ་མེད་པར་ཡང་མངོན་པར་འགྲུབ་པའི་རྒྱུ་སྲེད་པ་ཡིན་པར་ཇི་སྟེ་མི་འདོད་ཅེས་བྱ་བ་ནི་དེ་ཞེས་བྱ་བ་ནི་སྲིད་པ་བར་མིའི་གཟུགས་ལ་མངོན་པར་དགའ་བ་ཞེས་བྱ་བའི་དོན་ཏོ། །དེ་དག་ཐམས་ཅད་ཀྱི་ལུས་ལ་སྲེད་པ་མ་སྤངས་པ་ནི་ཞེས་རྒྱས་པར་འབྱུང་བ་ནི་འདོད་པའི་ཁམས་དང་བསམ་གཏན་དང་པོ་ལ་སོགས་པར་སྐྱེས་པ་རྣམས་ཀྱི་ལུས་ལ་སྲིད་པ་མ་སྤངས་པ་ནི་ས་དེ་ལས་འདོད་ཆགས་དང་མ་བྲལ་བ་རྣམས་ཞེས་བྱ་བ་ནི་ས་གང་དུ་སྐྱེས་པ་དེ་ལས་འདོད་ཆགས་དང་མ་བྲལ་བ་རྣམས་འདོད་པའི་ཁམས་ནས་སྲིད་པའི་རྩེ་མོའི་བར་དུ་གང་དུ་སྐྱེ་བར་འགྱུར་བ་དེར་མངོན་པར་འགྲུབ་པའི་རྒྱུ་ཡིན་པ་སྐྱོན་ཉེས་པ་མེད་པ་ཡིན་ནོ། །གཟུགས་མེད་པའི་ཁམས་སུ་སྐྱེས་པ་ནི་ས་དེ་པ་ཉིད་ཀྱི་ལུས་ལ་སྲེད་པ་ཡིན་པར་རྣམ་པར་གཞག་པ་མ་ཡིན་ནམ། ཇི་ལྟར་འདི་འདོད་པའི་ཁམས་མངོན་པར་འགྲུབ་པའི་རྒྱུ་ཡིན་ཞེ་ན། དེ་ཉིད་འདོད་པའི་ཁམས་འདི་མངོན་པར་འགྲུབ་པར་བྱེད་པའི་རྒྱུ་ཡིན་ནོ་ཞེས་མི་སྟོན་ཏོ། །འོན་ཀྱང་ལས་ཀྱིས་དེ་འདོད་པའི་ཁམས་སུ་སྐྱེ་བར་སྟོན་ཏོ། །དེ་བས་ན་དེར་མངོན་པར་འགྲུབ་པའི་རྒྱུ་ནི་འགྲུབ་པའི་རྒྱུ་ཞེས་བྱའོ། །དེའི་ཕྲ་རྒྱས་མ་བཅོམ་པའི་ཕྱིར་རམ་ཞེས་བྱ་བ་ནི་ལུས་ལ་སྲེད་པའི་ཕྲ་རྒྱས་འཇིག་རྟེན་ལས་འདས་པའི་ལམ་གྱིས་མ་བཅོམ་པའི་ཕྱིར་རོ། །འཇིག་པའི་ལམ་གྱིས་ཉམས་མ་སྨད་པའི་ཕྱིར་རོ་ཞེས་བྱ་བ་ནི་འཇིག་རྟེན་པའི་ལམ་གྱིས་དེའི་ཕྲ་རྒྱས་ཡང་དག་པར་བཅོམ་པ་མ་ཡིན་ཏེ། འོན་ཀྱང་ཉམས་སྨད་པ་ཡིན་ཏེ། དེ་ཕྱིས་ཀྱང་མངོན་དུ་འགྱུར་བའི་ཕྱིར་རོ། །འོ་ན་བཅོམ་ལྡན་འདས་ཀྱིས་གང་འདི་སྐད་དུ་ཞེས་རྒྱས་
པ་ནས་མུ་བཞིའོ་ཞེས་བྱ་བ་ཇི་ལྟར་ཡིན་ཞེ་ན། གང་ཟག་གང་ཞིག་སྐྱེ་བའི་ཀུན་དུ་སྦྱོར་བ་ནི་སྤངས་ལ་མངོན་པར་འགྲུབ་པའི་ཀུན་དུ་སྦྱོར་བ་ནི་མ་སྤངས་པ་ཡང་ཡོད། །གང་ཞིག་མངོན་པར་འགྲུབ་པའི་ཀུན་དུ་སྦྱོར་བ་ནི་སྤངས་ལ། སྐྱེ་བའི་ཀུན་དུ་སྦྱོར་བ་ནི་མ་སྤངས་པ་ཡང་ཡོད། གཉི་ག་སྤངས་པ་ཡང་ཡོད། གཉི་ག་མ་ཡིན་པ་ཡང་ཡོད་ཅེས་བྱ་བ་ཡིན་ནོ། །དེ་ལ་མངོན་དུ་ཕྱོགས་པ་ཡིན་པའི་ཕྱིར་རོ་ཞེས་བྱ་བ་ནི་སྐྱེ་བ་ལ་མངོན་དུ་ཕྱོགས་པ་ཡིན་པའི་ཕྱིར་རོ་ཞེས་བྱ་བའི་དོན་ཏོ། །དེ་གཉིས་ལ་ཞེས་བྱ་བ་ནི་སྐྱེ་བ་དང་མངོན་དུ་ཕྱོགས་པ་གཉིས་ལའོ། །དེ་ནི་དེ་གཉིས་ཀྱི་ཀུན་དུ་སྦྱོང་བ་ཡིན་ནོ་ཞེས་བྱ་བ་ནི་སྐྱེ་བ་དང་མངོན་པར་འགྲུབ་པ་གཉིས་ཀྱིའོ། །དེ་ཡང་གང་གིས་སྐྱེ་བར་ཀུན་དུ་སྦྱོར་བ་ཞེས་བྱ་བ་ལ། བར་མ་དོར་ཡོངས་སུ་མྱ་ངན་ལས་འདའ་བ་དེ་ཡང༌། དེ་ནི་འདིའི་ཞེས་བྱ་བ་ཀུན་དུ་སྦྱོར་བ་དེ་ནི་བར་མ་དོར་ཡོངས་སུ་མྱ་ངན་ལས་འདས་པ་འདིའི། སོ་སོར་མ་བརྟགས་པས་འགོག་པའི་ཚུལ་དུ་འགག་པ་སྟེ་ཞེས་བྱ་བ་སོ་སོར་བརྟགས་པས་འགོག་པ་ནི་མ་ཡིན་ཏེ། ས་དེ་ལ་འདོད་ཆགས་དང་བྲལ་བ་མ་ཡིན་པའི་ཕྱིར་རོ། །དབང་པོ་རྣམས་ཡོངས་སུ་སྨིན་པའི་ཕྱིར་ཏེ་ཞེས་བྱ་བ་ནི་དད་པ་དང༌། བརྩོན་འགྲུས་དང༌། དྲན་པ་དང༌། ཏིང་ངེ་འཛིན་དང༌། ཤེས་རབ་ཀྱི་དབང་པོ་རྣམས་ཤིན་ཏུ་ཆེར་གྱུར་པའི་ཕྱིར་རོ། །སྲིད་པ་བར་མ་ཉིད་དེའི་གཉེན་པོ་ངེས་པར་སྐྱེ་བར་འགྱུར་བ་ཉིད་ཀྱི་ཚུལ་དུ་རྒྱུན་གནས་པས་ན་དེ་བས་ན་སྤངས་པ་ཞེས་བྱའོ་ཞེས་བྱ་བ་ནི་ཀུན་དུ་སྦྱོར་བ་དེའི་གཉེན་པོ་གང་ཡིན་པ་སྤོང་བའི་ལམ་ངེས་པར་སྐྱེ་བའི་ཚུལ་དུ་སྲིད་པ་བར་མའི་རྒྱུན་ཉིད་གནས་པའི་ཕྱིར་དེའི་གཉེན་པོ་མ་སྐྱེས་སུ་ཟིན་ཀྱང་སྐྱེ་བར་ཀུན་དུ་སྦྱོར་བ་སྤངས་པ་ཞེས་བྱའོ། །སོ་སོར་བརྟགས་པས་འགོག་པ་ཡང་ཞེས་བྱ་བ་རྒྱས་པར་འབྱུང་བ་ལ། ས་དེ་པའི་ཞེས་བྱ་བ་ནི་བསམ་གཏན་དང་པོ་ལ་སོགས་པའི་ས་པའི་ཐམས་ཅད་དུ་རྣམ་པ་དགུ་པ་ཡིན་པའི་ཕྱིར་རོ། །ཐམས་ཅད་ཅེས་བྱ་བ་ནི་སྲིད་པ་བར་མ་བར་གཏོགས་པ་དང༌། སྐྱེ་བ་པའི་ནང་དུ་གཏོགས་པ་བསྟན་པ་ཡིན་ནོ། །གཟུགས་ལ་འདོད་ཆགས་དང་བྲལ་བའི་འཕགས་པ་གང་ཡིན་པ་དེས་ནི་མངོན་པར་འགྲུབ་པའི་ཀུན་དུ་སྦྱོར་བ་སྤངས་པ་ཡིན་ནོ་ཞེས་བྱ་བ་ནི་ཀུན་དུ་སྦྱོར་བ་གང་གིས་སྲིད་པ་བར་མར་ཀུན་དུ་སྦྱོར་བར་བྱེད་པ་དེ་ནི་འདིས་སྤངས་
པ་ཡིན་ཏེ། གཟུགས་ལ་འདོད་ཆགས་དང་བྲལ་བའི་ཕྱིར་རོ། །སྐྱེ་བའི་ཀུན་དུ་སྦྱོར་བ་ནི་མ་སྤངས་པ་ཡིན་ཏེ། གཟུགས་མེད་པ་ན་སྤྱོད་པ་མ་སྤངས་པའི་ཕྱིར་རོ། །འཕགས་པ་སྨོས་པས་ནི་འཇིག་རྟེན་པ་ལས་བྱེ་བྲག་ཏུ་བྱ་བའི་ཕྱིར་རོ། །ཁམས་གསུམ་ལ་འདོད་ཆགས་དང་བྲལ་བ་ཡང་ཡིན་པ་དེས་ནི་དེ་གཉི་ག་སྤངས་པ་ཡིན་ནོ་ཞེས་བྱ་བ་ནི་སྐྱེ་བར་ཀུན་དུ་སྦྱོར་བ་དང་མངོན་བར་འགྲུབ་པར་ཀུན་དུ་སྦྱོར་བའོ། །དེས་ཀྱང་ཀུན་དུ་སྦྱོར་བ་གང་གིས་སྲིད་པ་བར་མར་ཀུན་དུ་སྦྱོར་བར་བྱེད་པ་དང༌། སྐྱེ་བར་ཀུན་དུ་སྦྱོར་བ་གཉི་ག་སྤངས་པ་ཡིན་ནོ། །དེ་ལས་གཞན་གྱིས་གཉི་ག་མ་སྤངས་སོ་ཞེས་བྱ་བ་ནི་ཇི་སྐད་དུ་སྨྲས་པ་གསུམ་པོ་དེ་དག་ལས་གཞན་བདག་ཅག་ལ་སོགས་པ་དེ་དག་གིས་ནི་སྐྱེ་བར་ཀུན་དུ་སྦྱོར་བ་དང༌། མངོན་པར་འགྲུབ་པར་ཀུན་དུ་སྦྱོར་བ་གཉི་ག་སྤངས་པ་མ་ཡིན་ནོ། །འོ་ན་གང་ལས་སྲེད་པ་ནི་ཞེས་རྒྱས་པར་འབྱུང་བ་དེ་དག་གིས་ནི་ཐ་དད་པ་མེད་པའི་སྲེད་པ་ནི་མངོན་པར་འདོད་པ་ཡིན་ནོ། །མངོན་པར་འགྲུབ་པ་ནི་འགྲུབ་པ་ཡིན་ནོ་ཞེས་སྨྲས་པ་གང་ཡིན་པ་དེའི་ཕྱོགས་སུ་གཏོགས་པ་ཡིན་པས་ན་སྲེད་པ་ནི་མངོན་པར་འགྲུབ་པའི་རྒྱུ་ཡིན་ནོ་ཞེས་སྨྲས་པ་ཡང་སྲིད་པ་བར་མ་འདི་མངོན་པར་འགྲུབ་པ་ཡིན་བར་ཇི་ལྟར་འགྲུབ་པར་འགྱུར། དེ་བས་ན་སྲིད་པ་བར་མའི་རྒྱུ་སྲིད་པ་མ་ཡིན་ནོ་ཞེས་བྱ་བ་དེར་གྱུར་ཏེ། ཇི་སྐད་དུ་འཆི་ཀའི་སེམས་དང་སྲིད་པ་བར་མའི་གཟུགས་གཉིས་གཅིག་ཏུ་ཚོགས་པར་འབྱུང་ལ་ཞེས་རྒྱས་པར་སྨྲས་པ་ཡིན་ནོ། །དེ་ལྟ་ཡིན་ན་ནི་སྲིད་པ་བར་མའི་རྒྱུ་ཞེས་རྒྱས་པར་འབྱུང་བ་ནི་དེར་ཡང་གལ་ཏེ་མངོན་པར་འགྲུབ་པ་ནི་སྲིད་པ་བར་མ་ཁོ་ན་ཡིན་པར་འདོད་ན། དེ་ལྟ་ཡིན་ན་སྲིད་པ་བར་མའི་རྒྱུ་སྲེད་པ་ཁོ་ན་ཡིན་པར་འགྱུར་གྱི། ལས་ནི་མ་ཡིན་པར་འགྱུར་རོ། །ཅིའི་ཕྱིར་ཞེ་ན། ལས་ནི་སྐྱེ་བའི་རྒྱུ་ཡིན། སྲིད་པ་ནི་མངོན་པར་འགྲུབ་པའི་རྒྱུ་ཡིན་ཞེས་སྨྲས་པའི་ཕྱིར་རོ། །དེ་ལས་ཉེས་པ་ཅི་ཡོད་ཅེ་ན། དེའི་ཕྱིར་དམྱལ་བ་ལ་སོགས་པའི་སྲིད་པ་བར་མ་ཐ་དད་པ་ཇི་ལྟར་འཐད་པར་འགྱུར་ཞེས་སྨྲས་ཏེ། དམྱལ་བ་མྱོང་བར་འགྱུར་བའི་ལས་བྱས་པས་ནི་དམྱལ་བ་ལ་སོགས་པའི་སྲིད་པ་བར་མ་ཐ་དད་པ་ཡིན་གྱི། སྲེད་པས་བྱས་པ་ནི་མ་ཡིན་ནོ། །འདིར་ཡང་སྔར་ལས་སྣ་ཚོགས་པའི་ཕྱིར་ཞེས་བྱ་བ་ལ་སོགས་པ་བསྟན་ཟིན་
ཏོ། །ཉེས་པ་གཞན་འདི་ཡང་ཡོད་དེ། སྐྱེ་བའི་རྒྱུ་ཡང་ལས་ཉིད་ཡིན་པར་འགྱུར་གྱི། སྲེད་པ་ནི་མ་ཡིན་པར་འགྱུར་རོ་ཞེས་བྱ་བ་ཡིན་ནོ། །ཅིའི་ཕྱིར་ཞེ་ན། ལས་ནི་སྐྱེ་བའི་རྒྱུ་ཡིན། སྲེད་པ་ནི་མངོན་པར་འགྲུབ་པའི་རྒྱུ་ཡིན་ཞེས་སྨྲས་པའི་ཕྱིར་རོ། །དེས་ཉེས་པ་ཅི་ཡོད་ཅེ་ན། དེའི་ཕྱིར་ན། འདོད་ཆགས་དང་བྲལ་བ་ཡང་གཟུགས་མེད་པར་སྐྱེ་བར་འགྱུར་རོ་ཞེས་སྨྲས་ཏེ། དེ་ལ་སྲིད་པ་བར་མའི་རྒྱུ་ནི་མེད་དེ། སྲེད་པ་མེད་པའི་ཕྱིར་རོ། །སྐྱེ་བའི་རྒྱུ་ནི་ཡོད་དེ། དེ་ལས་ཡིན་ནོ། །དེ་བས་ན་དེ་ནི་གཟུགས་མེད་པར་སྐྱེ་བར་འགྱུར་རོ། །གཟུགས་མེད་པ་སྨོས་པས་དེར་ནི་སྲིད་པ་བར་མ་མེད་པར་ཡང་སྐྱེ་བར་སྲིད་པ་བསྟན་པ་ཉིད་ཀྱི་ཕྱིར་རོ། །དེའི་ཕྱིར་སྲིད་པ་བར་མར་ཡོངས་སུ་མྱ་ངན་ལས་འདའ་བ་ཡང་མེད་པར་འགྱུར་རོ་ཞེས་བྱ་སྟེ། སྐྱེ་བའི་རྒྱུ་ནི་ལས་ཡིན་པའི་ཕྱིར་དང༌། སྲིད་པ་བར་མའི་སྲེད་པ་ནི་སྤངས་ཀྱི། སྐྱེ་བའི་རྒྱུ་ལས་ཡོད་པའི་ཕྱིར་ཕྱིས་ཀྱང་སྐྱེ་བར་འགྱུར་གྱི། ཡོངས་སུ་མྱ་ངན་ལས་འདའ་པ་མ་ཡིན་ནོ། །དེ་བས་ན་སྲིད་པ་བར་མ་ཐམས་ཅད་མངོན་པར་འགྲུབ་པ་ཁོ་ན་ཡིན་པར་འདོད་པ་མ་ཡིན་ནོ་ཞེས་བྱ་བ་ནི། ཁ་ཅིག་ལས་ནི་མངོན་པར་འགྲུབ་པ་སྲིད་པ་བར་མ་ཡིན་པར་ཡང་འདོད་དེ། ཇི་སྐད་དུ། གང་ཟག་གང་ཞིག་སྐྱེ་བར་ཀུན་དུ་སྦྱོར་བ་སྤངས་པ་ལ། མངོན་པར་འགྲུབ་པར་ཀུན་དུ་སྦྱོར་བ་སྤངས་པ་མ་ཡིན་པ་ཞེས་རྒྱ་ཆེར་འབྱུང་བ་ཡིན་ནོ། །ཁ་ཅིག་ལས་ནི་ཕུང་པོ་གཞན་འབྱུང་བ་ཙམ་མངོན་པར་འགྲུབ་པ་ཡིན་པར་འདོད་དེ། གང་ནས་སྲེད་པ་ནི་མངོན་པར་འགྲུབ་པའི་རྒྱུ་ཡིན་ནོ་ཞེས་སྨྲས་པ་ཡིན་ནོ། །གཞན་དག་ན་རེ། ཁྲག་དང་ཁུ་བས་གྲོགས་བྱེད་པའི་ལས་ནི་འདིར་སྲིད་པ་ཡིན་པར་བསམས་སོ་ཞེ་ན་ཞེས་བྱ་བ་ལ། འདིར་ཞེས་བྱ་བ་ནི་ད་ལྟར་གྱི་སྐྱེ་བའི་ཚེ་ལའོ། །གཞན་དག་ཅེས་བྱ་བ་ནི་བཙུན་པ་དབལ་ལེན་དེ་ཉིད་དོ། །དེའི་ཞེས་རྒྱས་པར་འབྱུང་བ་ལ་དེ་སྐད་དུ་སྨྲ་བ་དེ་དག་ནི་རིས་གསུམ་དུ་རྣམ་པར་གཞག་པར་འདོད་དེ། སྔོན་གྱི་རིས་ནི་མ་རིག་པའི་རྐྱེན་གྱིས་འདུ་བྱེད་ཡིན་པའོ། །དེའི་ནི་འདུ་བྱེད་ལ་ཡང་དེ་དག་ཐལ་བར་འགྱུར་རོ་ཞེས་བྱ་བ་ནི་སྲིད་པ་ཡིན་པར་ཐལ་བར་འགྱུར་རོ་ཞེས་བྱ་བའི་དོན་ཏོ། །སྔོན་གྱི་མཐའི་སྐྱེ་བའི་རིས་དེ་དག་ལ་ཁྲག་དང་ཁུ་བས་གྲོགས་བྱེད་པའི་དོན་ཡོད་པ་མ་ཡིན་གྱི། རིས་གཉིས་པ་སྐྱེ་བ་འདི་ལ་ཡིན་ནོ། །སྲིད་པ་ནི་གསུམ་སྟེ་ཞེས་རྒྱས་པར་འབྱུང་
བ་ནི་འདོད་པའི་སྲིད་པ་དང༌། གཟུགས་ཀྱི་སྲིད་པ་དང༌། གཟུགས་མེད་པའི་སྲིད་བའོ། །འདིར་སྲིད་པ་གཉིས་ཏེ། གཟུགས་དང་གཟུགས་མེད་པའི་སྲིད་པ་གཉིས་ལ་ཁྲག་དང་ཁུ་བས་གྲོགས་བྱེད་པའི་ལས་ནི་འདིར་སྲིད་པ་ཡིན་ནོ་ཞེས་སྨྲས་པ་གང་ཡིན་པ་འདིའི་དོན་མི་འཐད་པ་ཡིན་ཏེ། གཟུགས་དང་གཟུགས་མེད་པ་དང་རབ་ཏུ་ལྡན་པའི་ལས་ཀྱི་སྲིད་པ་ནི་ཡང་སྲིད་མངོན་པར་འགྲུབ་པར་བྱ་བ་ལ་ཁྲག་དང་ཁུ་བ་ལ་ལྟོས་པ་མ་ཡིན་ནོ། །རྟེན་ཅིང་འབྲེལ་པར་འབྱུང་བའི་མདོ་སྡེ་འདིར་མ་རིག་པ་ལ་སོགས་པ་རང་གི་རྒྱུད་ལ་ཡོད་པ་རྐྱེན་དུ་སྟོན་པ་ཡིན་ནོ། །དེ་བས་ན་གཞན་གྱི་རྒྱུད་ལ་ཡོད་པ་ཁྲག་དང་ཁུ་བ་དེ་ནི་འདིར་གཞུག་པར་མི་རིགས་སོ། །ཇི་ལྟར་ན། དེར་ལེན་པ་རྐྱེན་གྱི་དངོས་པོ་ཡིན་ཞེས་བྱ་བ་ནི་ཁྲག་དང་ཁུ་བ་དེ་ལ་མཚན་ཉིད་ཇི་སྐད་དུ་སྨོས་པ་ནི་ལེན་པ་དེ་ལས་དེའི་ཁྲག་དང་ཁུ་བ་དག་སྲིད་པ་ཡིན་པར་གྱུར་པའི་ཕྱིར་ཞེས་བྱའམ། རྣམ་པ་གང་གིས་རྐྱེན་གྱི་དངོས་པོ་ཡིན། འོན་ཏེ་ཁྲག་དང་ཁུ་བ་དག་ལེན་པ་དེའི་རྐྱེན་གྱིས་མ་ཡིན་པ་ཁོ་ན་ཡིན་ན་ནི་འོ་ན་ནི་ལེན་པའི་རྐྱེན་གྱིས་སྲིད་པ་ཞེས་བྱ་བ་འདི་ཅིའི་ཕྱིར་སྨྲས། ཁྲག་དང་ཁུ་བའི་རྐྱེན་ཀྱང་བརྗོད་པར་བྱ་དགོས་སོ། །འོན་ཏེ་ཁྲག་དང་ཁུ་བ་ཉིད་ནི་ལེན་པ་ཡིན་ལ། དེའི་རྐྱེན་གྱིས་སྲིད་པའོ་ཞེ་ན་ནི་འདི་ནི་རིགས་པ་མ་ཡིན་ཏེ། འདིར་འདུན་པ་དང་འདོད་ཆགས་གང་ཡིན་པ་ནི་ལེན་པ་ཡིན་ནོ་ཞེས་སྨྲས་པའི་ཕྱིར་རོ། །གཞན་ཡང་འདིར་ཇི་ལྟར་ཁྲག་དང་ཁུ་བས་གྲོགས་བྱེད་པའི་ལས་ནི་སྲིད་པ་ཡིན་པའི་ཁུངས་བརྗོད་པར་བྱ་དགོས་སོ། །སྲིད་པའི་བསྡུས་པའི་དོན་ནི་རྣམ་པར་གཞག་པ་རྣམ་པ་བཅོ་ལྔ་ཡིན་པར་འདིར་བསྟན་ཏེ། རབ་ཏུ་དབྱེ་བ་རྣམ་པར་གཞག་པ་ནི་ཇི་སྐད་དུ། སྲིད་པ་གང་ཞེ་ན། སྲིད་པ་གསུམ་སྟེ་ཞེས་རྒྱས་པར་བསྟན་པའོ། །ལས་རྣམ་པར་གཞག་པ་ནི་ཇི་སྐད་དུ། མདོ་སྡེ་འདི་ལས་ནི་ལས་ཀྱི་སྲིད་པས་བསྡུས་པ་ནི་སྲིད་པ་གསུམ་ཡིན་པར་རིག་པར་བྱའོ་ཞེས་སྨྲས་པ་ཡིན་ནོ། །བྱེད་པ་རྣམ་པར་གཞག་པ་འདིས་བར་མཆོད་པར་ཡང་སྲིད་འབྱུང་བར་བྱེད་པས་སྲིད་པ་ཞེས་བྱའོ། །དཔེར་ན་འདིས་ངེས་པར་བྱེད་པས་དེད་པ་ཞེས་བྱ་བ་བཞིན་ནོ་ཞེས་སྨྲས་པ་ཡིན་ནོ། །ཁྱད་པར་རྣམ་པར་གཞག་པ་ནི་ཇི་སྐད་དུ། ལས་ནི་གནས་སྐབས་གཉིས་ཏེ། རང་གི་ངོ་བོའི་གནས་སྐབས་དང་བག་ཆགས་ཀྱི་གནས་སྐབས་
སོ་ཞེས་རྒྱས་པར་སྨྲས་པ་ཡིན་ནོ། །ལེན་པ་རྐྱེན་དུ་རྣམ་པར་གཞག་པ་ནི་ཇི་སྐད་དུ། དེ་ཡང་ཉེ་བར་ལེན་པ་ཡོད་ན་སྲེད་པའི་གནས་སྐབས་ཡིན་པར་འགྲོ་བར་འགྱུར་གྱི་ཞེས་རྒྱས་པར་སྨྲས་པ་ཡིན་ནོ། །དེའི་བདག་ཉིད་ཐོབ་པ་རྣམ་པར་གཞག་པ་ནི་ཇི་སྐད་དུ། འོ་ན་སྐབས་གང་གི་ཚེ་ལེན་པ་དང་བཅས་པའི་ལས་རྣམས་སྟོབས་ཇི་ལྟ་བ་བཞིན་དུ་གདོན་མི་ཟ་བར་སྲིད་པར་འགྱུར་ཞེ་ན། འཆི་བའི་གདོན་མི་ཟ་བར་འགྱུར་རོ་ཞེས་རྒྱས་པར་སྨྲས་པ་ཡིན་ནོ། །འབྲེལ་པ་རྣམ་པར་གཞག་པ་ནི་ཇི་སྐད་དུ་སྔོན་གྱི་ཚེའི་ལས་ཀྱི་རྣམ་པར་སྨིན་པ་རིས་མཐུན་པར་སྐལ་པ་མཉམ་པའི་ལྷག་མ་དང་འབྲེལ་པའི་ཕྱིར་རོ་ཞས་སྨྲས་པ་ཡིན་ནོ། །མི་ལྡོག་པ་རྣམ་པར་གཞག་པ་ནི་ཇི་སྐད་དུ། ཇི་ཙམ་ན་སྐྱེ་བའི་སྲིད་པ་ཡིན་པ་དེའི་བར་དུ་ལྡོག་པ་མེད་དོ་ཞེས་རྒྱས་པར་སྨྲས་པ་ཡིན་ནོ། །གཙོ་བོའི་རྐྱེན་རྣམ་པར་གཞག་པ་ནི་ཇི་སྐད་དུ། འཆད་པ་དོན་མེད་པ་ཡང་མ་ཡིན་ཏེ། རྐྱེན་གཙོ་བོ་འཆད་པའི་ཕྱིར་རོ། །ལེན་པ་ནི་སྲིད་པའི་རྐྱེན་གྱི་གཙོ་པོ་ཡིན་ཏེ་ཞེས་རྒྱས་པར་སྨྲས་པ་ཡིན་ནོ། །དགེ་བ་ཀུན་དུ་འབྱུང་དུ་ཟིན་ཀྱང་ལེན་པའི་རྐྱེན་ཉིད་དུ་རྣམ་པར་གཞག་པ་ནི་ཇི་སྐད་དུ། གལ་ཏེ་དེའི་ཚེ་རྣམ་པར་ཤེས་པ་ལ་ལེན་པ་མེད་པར་གྱུར་ན་ཞེས་རྒྱས་པར་སྨྲས་པ་ཡིན་ནོ། །རང་གི་ངོ་བོ་རྣམ་པར་གཞག་པ་ནི་ཇི་སྐད་དུ། འཇུག་པ་ཞེས་བྱ་བ་དེ་ཅི་ཞེ་ན། གང་ལ་ལས་ཀྱི་བག་ཆགས་ཡོངས་སུ་གྱུར་པའི་བྱེ་བྲག་ཡོད་པ་ཞེས་རྒྱས་པར་སྨྲས་པ་ཡིན་ནོ། །རྣམ་པར་ངེས་པ་རྣམ་པར་གཞག་པ་ནི་ཅིའི་ཕྱིར་སྲེད་པ་ཁོ་ན་སྲིད་པའི་རྐྱེན་ཡིན་པར་འདོད་ཅེ་ན་ཞེས་རྒྱས་པར་སྨྲས་པ་ཡིན་ནོ། །ཞིང་གི་དངོས་པོ་རྣམ་པར་གཞག་པ་ནི་མདོ་སྡེ་གཞན་གླེང་བསླང་བའི་ཕྱིར་ཇི་སྐད་དུ་སྲིད་པའི་གནས་སྐབས་ཀྱི་ལས་ནི་ཞིང་ཡིན་ནོ་ཞེས་རྒྱས་པར་སྨྲས་པ་ཡིན་ནོ། །རྐྱེན་ཁྱད་པར་ཅན་རྣམ་པར་གཞག་པ་ནི་ཇི་སྐད་དུ། སེམས་ཅན་གྱི་རིས་དེ་དང་དེར་རིས་འདྲ་བར་འགྲོ་བ་ནི་སྐྱེ་བ་ཡིན་པའམ། ལས་དང་རྗེས་སུ་མཐུན་པར་འགྲོ་བ་ནི་སྐྱེ་བ་ཡིན་ལ་དེའི་རྒྱུ་ནི་ལས་ཡིན་ཏེ་ཞེས་རྒྱས་པར་སྨྲས་པ་ཡིན་ནོ། །གཞུང་ལུགས་གཞན་དགག་པ་རྣམ་པར་གཞག་པ་ནི་ཇི་སྐད་དུ། གཞན་དག་ན་རེ་ཁྲག་དང་ཁུ་བས་གྲོགས་བྱེད་པའི་ལས་ནི་འདིར་སྲིད་པ་ཡིན་པར་བསམས་སོ་ཞེ་ན། དེའི་ནི་འདུ་བྱེད་ལ་ཡང་དེ་དག་ཐལ་བར་འགྱུར་རོ་ཞེས་རྒྱས་པར་སྨྲས་པ་ཡིན་ནོ། །སྲིད་
པའི་ཡན་ལག་རྣམ་པར་དབྱེ་བའོ།། །།རྟེན་ཅིང་འབྲེལ་པར་འབྱུང་བ་དང་པོ་དང་རྣམ་པར་དབྱེ་བ་བསྟན་པ་རྒྱ་ཆེར་འགྲེལ་པ། བམ་པོ་བཅུ་པ། སྐྱེ་བ་གང་ཞེ་ན། གང་སེམས་ཅན་དེ་དང་དེ་དག་གི་ཞེས་རྒྱས་པར་འབྱུང་བ་ཞེས་བྱ་བ་ལ། རྒྱས་པའི་ཚིག་ནི་མདོ་སྡེ་ལས་ཇི་ལྟ་བ་བསྟན་པའི་ཕྱིར་རོ། །ཇི་ལྟ་ཞེ་ན། སེམས་ཅན་གྱི་རིས་དེ་དང་དེར་སྐྱེ་བ་དང་ཤིན་ཏུ་སྐྱེ་བ་དང༌། འཕོས་པ་དང༌། མངོན་པར་འབྱུང་བ་དང༌། རབ་ཏུ་སྐྱེས་པ་དང༌། ཕུང་པོ་སོ་སོར་ཐོབ་པ་དང༌། ཁམས་སོ་སོར་ཐོབ་པ་དང༌། སྐྱེ་མཆེད་སོ་སོར་ཐོབ་པ་དང༌། ཕུང་པོ་རྣམས་མངོན་པར་གྲུབ་པ་དང༌། སྲོག་གི་དབང་པོ་རབ་ཏུ་སྐྱེས་པ་འདི་ནི་སྐྱེ་བ་ཞེས་བྱ་བ་ཡིན་ནོ། །དེ་དག་གིས་ནི་ཞེས་རྒྱས་པར་འབྱུང་བ་ནི་སྐྱེ་བ་རྣམ་པར་འབྱེད་པ་དེ་དག་གིས་ནི་གང་སེམས་ཅན་དེ་དང་དེ་དག་གི་ཞེས་བྱ་བ་ཚིག་འདིས་གང་དག་གི་སྐྱེ་བ་ཡིན་པ་བསྟན་པ་ཡིན་ནོ། །སེམས་ཅན་གྱི་རིས་དེ་དང་དེར་ཞེས་བྱ་བ་ཚིག་འདིས་ནི་གང་དུ་སྐྱེ་བ་དེ་བསྟན་ཏོ། །གང་སྐྱེ་བ་དང་ཤིན་ཏུ་སྐྱེ་བ་དང་ཞེས་བྱ་བ་ནས་སྲོག་གི་དབང་པོ་རབ་ཏུ་སྐྱེས་པ་འདི་ནི་སྐྱེ་བ་ཞེས་བྱའོ་ཞེས་བྱ་བའི་བར་དུ་རྒྱས་པར་འབྱུང་བས་ནི་ཇི་ལྟར་སྐྱེ་བའི་མཚན་ཉིད་དེ་བསྟན་ཏོ། །དེ་དང་དེ་དག་གི་ཞེས་གང་སྨྲས་པ་དེ་སྟོན་པ་ནི་ཁམས་དང༌། འགྲོ་བ་དང༌། སྐྱེ་གནས་དང༌། གནས་དང༌། ལུས་ཀྱི་དབང་པོ་དབྱེ་བ་ཐ་དད་པའི་ཞེས་སྨྲས་པ་ཡིན་ནོ། །དེ་ལ་ཁམས་དབྱེ་བ་ནི་འདོད་པ་དང༌། གཟུགས་དང༌། གཟུགས་མེད་པ་ན་སྤྱོད་པ་ཐ་དད་པ་ལས་རིག་པར་བྱའོ། །འགྲོ་བ་དབྱེ་བ་ནི། དམྱལ་བ་དང༌། བྱོལ་སོང་དང༌། ཡི་དགས་དང༌། མི་དང་ལྷའི་འགྲོ་བ་ཐ་དད་པའོ། །སྐྱེ་གནས་དབྱེ་བ་ནི་མངལ་ནས་སྐྱེ་བ་དང༌། སྒོ་ང་ལས་སྐྱེ་བ་དང༌། དྲོད་གཤེར་ལས་སྐྱེ་བ་དང༌། རྫུས་ཏེ་སྐྱེ་བ་ཐ་དད་པའོ། །གནས་དབྱེ་བ་ནི་བྱང་གི་སྒྲ་མི་སྙན་དང༌། ཤར་གྱི་ལུས་འཕགས་དང༌། ལྷོའི་འཛམ་བུའི་གླིང་དང༌། ནུབ་ཀྱི་བ་ལང་སྤྱོད་ཐ་དད་པའོ། །ལུས་ཀྱི་དངོས་པོ་དབྱེ་བ་ནི་མདོག་བཟང་བ་དང༌། མདོག་ངན་པ་དང༌། བོང་ཚོད་དང༌། ཚེ་རིང་བ་ལ་སོགས་པ་ཐ་དད་པའོ། །སེམས་ཅན་རྣམས་ཀྱི་ཞེས་གང་སྨྲས་པ་དེ་སྟོན་པ་ནི། མིང་དང་གཟུགས་དེ་འབྲེལ་པ་ནི་སེམས་ཅན་ཞེས་བྱ་སྟེ་ཞེས་སྨྲས་པ་ཡིན་ཏེ། དེ་འབྲེལ་པ་ནི་མིང་དང་འབྲེལ་པ་
ཡིན་གྱི། ཕྱིའི་དང་མ་ཡིན་ནོ་ཞེས་བྱ་བའི་དོན་ཏོ། །དེ་ལ་མིང་ནི་སྔར་བསྟན་པ་གཟུགས་ཅན་མ་ཡིན་པའི་ཕུང་པོ་བཞིའོ། །དེ་དང་འབྲེལ་པའི་གཟུགས་ནི་དབང་པོ་གཟུགས་ཅན་རྣམས་ཏེ། དེ་དང་ཐ་དད་པར་འཇུག་པ་མ་ཡིན་པར་རིག་པར་བྱ་སྟེ། ཕན་པ་དང༌། གནོད་པ་གཉིས་གཅིག་ལ་གཅིག་རྗེས་སུ་བྱེད་པའི་ཕྱིར་རོ། །ཆགས་པའི་དབང་གིས་རྒྱས་པར་འབྱུང་བ་ལ། དེ་ལྟར་ངེས་ཚིག་ཡིན་པའི་ཕྱིར་ཞེས་བྱ་བ་ནི་ངེས་པའི་ཚིག་གི་ཚུལ་གྱིས་སོ། །ཇི་ལྟ་ཞེ་ན། སེམས་ཅན་ཞེས་བྱ་བ་ནི་སའི་རྣམ་པ་དང༌། རྟའི་རྣམ་པ་དང༌། བའི་རྣམ་པ་བཟུང་ནས་ཚིག་སྦྱར་བ་ནི་སེམས་ཅན་ཡིན་ཏེ། སའི་དོན་ནི་ཆགས་པའོ། །རྟའི་དོན་ནི་འབྲེལ་པའི་རྒྱུན་ནོ། །བའི་དོན་ནི་གནས་པ་སྟེ། ཆགས་པའི་དབང་གིས་འབྲེལ་པའི་རྒྱུན་གནས་པ་ཞེས་གང་སྨྲས་པ་ཡིན་ནོ། །འབྲེལ་པའི་རྒྱུན་ཅེས་བྱ་བ་འདི་ཅི་ཞེ་ན། རྒྱུ་དང་འབྲས་བུའི་དངོས་པོ་འབྲེལ་བའི་རྒྱུན་ཅེས་བྱ་སྟེ་ཞེས་བྱ་བ་ལ་འབྲེལ་པ་སྨོས་པ་ནི་རྗེས་སུ་འབྲེལ་པའི་དོན་ཏེ། རྒྱུ་དང་འབྲས་བུ་འབྲེལ་ཏེ་འཚམ་པའི་རྒྱུན་ཡིན་ནོ། །དེ་ཡང་བྲེང་ཆགས་པའོ་ཞེས་བྱ་བ་ནི་རྒྱུན་དེ་ཡང་བྲེང་མ་ཆད་པ་དང་འཕེལ་བ་དང༌། རྒྱས་པ་ཞེས་འདོན་པའི་ཕྱིར་རོ། །སེམས་ཅན་གྱི་རིས་དེ་དང་དེར་ཞེས་གང་བསྟན་པ་དེ་སྟོན་པ་ནི། གང་ཞིག་གང་དང་འདྲ་བའི་སེམས་ཅན་གྱི་ཚོགས་ཞེས་བྱ་བ་ཡིན་ཏེ། ལྷ་ལ་སོགས་པའི་སེམས་ཅན་གྱི་ཚོགས་ཞེས་བྱ་བའི་དོན་ཏོ། །སྐྱེ་བའི་རྣམ་གྲངས་དགོས་པ་དང་བཅས་པ་ཡིན་པར་སྟོན་པ་ནི། སྐྱེ་བ་དང་ཤིན་ཏུ་སྐྱེ་བ་ཞེས་རྒྱས་པར་འབྱུང་བ་ནི་རྗེས་སུ་མཐུན་པར་རྣམ་པར་འཆད་པ་ནི་སྐྱེ་བའི་རྣམ་གྲངས་ཡིན་ནོ་ཞེས་བྱ་བ་ཡིན་ཏེ། ཇི་ལྟ་ཞེ་ན་ཚིག་དང་པོ་ཚིག་གཉིས་པས་བཤད་དོ། །ཚིག་གཉིས་པ་ལ་སོགས་པ་ནི་གསུམ་ལ་སོགས་པས་སོ་ཞེས་བྱ་བ་འདི་ནི་རྗེས་སུ་མཐུན་པར་རྣམ་པར་འཆད་པ་ཡིན་ནོ། །སྐྱེ་བ་ཞེས་བྱ་བ་ཇི་སྐད་དུ་བསྟན་ཅེ་ན། ཤིན་ཏུ་སྐྱེ་བ་ཞེས་བསྟན་པ་ཡིན་ནོ། །ཤིན་ཏུ་སྐྱེ་བ་ཇི་སྐད་དུ་བསྟན་ཅེ་ན། འཕོས་པ་ཞེས་བསྟན་པ་ཡིན་ནོ། །འཕོས་པ་ཞེས་བྱ་བ་ཇི་སྐད་དུ་བསྟན་ཅེ་ན། མངོན་པར་འབྱུང་བ་ཞེས་བསྟན་པ་ཡིན་ནོ་རྒྱས་པར་བྱ་སྟེ། འགའ་ལ་ཁ་ཅིག་གི་ཚིག་གི་དོན་གྲགས་པ་ཡིན་པས། རྣམ་གྲངས་གཞན་འཆད་པ་རིགས་པ་ཡིན་ཏེ། སྐྱེ་བ་ལ་
སོགས་པའི་རྣམ་གྲངས་གཞན་གྱི་ཚིག་གི་དོན་ཁ་ཅིག་གྲགས་པ་ཡིན་ནོ། །གང་ཡང་སྐྱེ་བ་གང་ཞེ་ན། གང་སྐྱེ་བའོ་ཞེས་བྱ་བའི་ཚིག་གི་ལུགས་འདི་ནི་སྔོན་མ་བྱུང་བའོ་ཞེ་ན་ཞེས་བྱ་བ་ནི་གཏན་ཚིགས་མེད་པ་སྟེ། ཇི་ལྟ་ཞེ་ན། རྣམ་གྲངས་གཅིག་པོ་དེ་ཉིད་ཀྱི་ཚིག་གི་དོན་གྲགས་པ་མ་ཡིན་ལ། ཚིག་གི་དོན་གྲགས་པ་མ་ཡིན་པས་ན་གང་གི་ཚིག་གི་དོན་གྲགས་པ་གང་ཡིན་པ་དེ་བརྗོད་པར་རིགས་པ་ཡིན་ན་འདི་ནི་འདིས་དེའི་དོན་གོ་བར་བྱེད་པ་མ་ཡིན་ནོ་ཞེ་ན། འདི་སྔོན་མ་བྱུང་བ་མ་ཡིན་གྱི། དེ་དག་སྔོན་བྱུང་བ་ཡིན་ཏེ་ཞེས་རྒྱས་པར་འབྱུང་བ་ནི་ཚིག་གི་ལུགས་འདི་སྔོན་མ་བྱུང་བ་མ་ཡིན་ཏེ། ག་ལས་ཤེ་ན། བློ་སྔ་བའི་ཕྱིར་ཏེ། ཇི་ལྟ་ཞེ་ན། དེའི་ཕྱིར་དེ་བཞིན་དུ་གཞན་གྱི་དོན་རྣམས་ཀྱི་ཡང་དོན་ལ་ཁྱད་པར་མེད་པར་བསྟན་པའི་ཕྱིར་རོ་ཞེས་སྨྲས་ཏེ། ཇི་ལྟར་གང་ཡང་སྐྱེ་བ་གང་ཞེ་ན། གང་སྐྱེ་བའོ་ཞེས་བྱ་བ་རྣམ་གྲངས་ཀྱི་དོན་མཐུན་པ་ཁྱད་པར་ཡོད་པ་མ་ཡིན་པ་སྔར་བསྟན་པའི་སྐྱེ་བའི་མཚན་ཉིད་ཁོ་ན་སྟོན་པར་བྱེད་དེ། ཁྱད་པར་ཡོད་པ་མ་ཡིན་པ་དེ་བཞིན་དུ་ཤིན་ཏུ་སྐྱེ་བ་ལ་སོགས་པ་རྣམ་གྲངས་ཀྱི་ཁྱད་པར་ཐ་དད་པ་གཞན་རྣམས་ཀྱང་དོན་ཁྱད་པར་མེད་པར་བསྟན་པའི་ཕྱིར་ཏེ། དེ་དག་ཀྱང་སྐྱེ་བའི་དོན་དེ་ཉིད་ཀྱི་དོན་ཡིན་ཏེ་ཁྱད་པར་མེད་དོ། །གནས་སྐབས་ཀྱི་བྱེ་བྲག་སྟོན་པའི་དོན་ནི་རྣམ་གྲངས་གཞན་ཡིན་ཏེ་ཞེས་བྱ་བ་ཇི་ལྟ་ཞེ་ན། སྐྱེ་བ་གང་ཞེ་ན་ཞེས་བྱ་བ་འདི་ནི་སྐྱེ་བ་འཇུག་པ་མཐའ་དག་ལ་དམིགས་མ་ཕྱེ་བར་འདིའི་བར་བརྗོད་པར་བྱའོ། །གཉིས་པ་ཤིན་ཏུ་སྐྱེ་བ་ནི་རྣམ་གྲངས་ཡིན་ཏེ། གནས་སྐབས་དང་བཅས་པའི་བྱེ་བྲག་བསྟན་པའི་ཕྱིར་རོ། །དེ་ལྟར་ཤིན་ཏུ་སྐྱེ་བ་ལ་སོགས་པ་གནས་སྐབས་ཀྱི་བྱེ་བྲག་བསྟན་པའི་ཕྱིར་ཞེས་བྱ་བ་ཇི་ལྟར་ཡིན་ཞེ་ན། དེའི་ཕྱིར་ཇི་ལྟར་འཕངས་པ་བཞིན་དུ་མིང་དང་གཟུགས་ལ་སོགས་པ་ཞེས་རྒྱས་པར་སྨྲས་པ་ལ། དང་པོ་བྱུང་བ་ནི་སྐྱེ་བ་ཡིན་ཏེ་ཞེས་བྱ་བ་ནི་དང་པོ་མའི་མངལ་དུ་སྐྱེས་པ་དེ་ནི་དང་པོ་སྐྱེས་པ་ཞེས་བྱ་བའི་དོན་ཏོ། །ཅིའི་ཕྱིར་དེ་སྐྱེས་པ་ཞེས་བྱ་ཞེ་ན། དེའི་ཕྱིར་དེའི་ཚེ་སེམས་ཅན་གྱི་རིས་སྐལ་པ་འདྲ་བ་དེར་སྐྱེས་པའི་ཕྱིར་རོ། །སྐྱེས་ནས་མིང་དང་གཟུགས་ཡོངས་སུ་རྫོགས་པ་ནི་ཤིན་ཏུ་སྐྱེས་པ་ཡིན་ནོ་ཞེས་སྨྲས་ཏེ། ཤིན་ཏུ་སྐྱེས་པ་ཞེས་བྱ་བ་ནི་ཇི་ལྟར་སྟོབས་ཡོངས་སུ་རྫོགས་པ་ལ་འཇིག་རྟེན་ན་
སྟོབས་རྫོགས་པ་ཞེས་བྱ་བ་བཞིན་ནོ། །མིང་དང་གཟུགས་ཀུན་དུ་རྫོགས་པ་དབང་པོ་མ་ཚང་བ་མེད་པའི་གནས་སྐབས་སུ་འགྲོ་བ་ནི་འཕོས་པའོ་ཞེས་བྱ་བ་ནི་མིང་དང་གཟུགས་ཀྱི་གནས་སྐབས་གང་ཡིན་པ་ལས་སྐྱེ་མཆེད་དྲུག་གིས་བསྡུས་པའི་དབང་པོའི་གནས་སྐབས་དེར་འགྲོ་བ་ནི་འཕོས་ལ་ཡིན་ཏེ། དཔེར་ན་སྐྱོན་མེད་པའི་གནས་སྐབས་སུ་འགྲོ་བ་ནི་སྐྱོན་མེད་པར་འཇུག་པ་ཞེས་བྱ་བ་བཞིན་ནོ། །མངལ་གྱི་སྒོ་ནས་བྱུང་བ་ཡིན་ནོ་ཞེས་བྱ་བ་དེ་ནི། ཡུལ་ལ་དམིགས་པར་མངོན་དུ་ཕྱོགས་པར་འཇུག་པ་ཞེས་བྱ་བ་ཡིན་ཏེ། དེའི་ཚེ་གཟུགས་ལ་སོགས་པའི་ཡུལ་ལ་འཛིན་པར་མངོན་དུ་ཕྱོགས་བའི་ཕྱིར་རོ། །བཙས་ཕྱིན་ཆད་འདུག་པ་ནི་རབ་ཏུ་བྱུང་བ་ཡིན་ནོ་ཞེས་བྱ་བ་ནི་ངེས་པའི་ཚིག་གི་ཚུལ་གྱིས་ཏེ། ཁ་དོག་གྱུར་ནས་དེ་ཡང་དེའི་འོག་ཏུ་ནམ་མ་ཤིའི་བར་དུ་ཕུང་པོའི་རྒྱུན་ལ་བྱའོ། །དེ་ཉིད་ཀྱི་ཕྱིར། དེ་ལྟར་སྲིད་པའི་རྐྱེན་གྱིས་སྐྱེ་བ་ཞེས་བྱ་བ་སྐྱེ་བ་ཡོངས་སུ་རྫོགས་པའི་སྐྱེ་བས་བསྡུས་པ་ཡིན་ནོ་ཞེས་སྨྲས་ཏེ། དེ་ནི་འདི་ནི་སྐྱེ་བའི་གནས་སྐབས་ཐ་དད་པའི་མཚན་ཉིད་ཡིན་ནོ་ཞེས་བྱ་བ་ཡིན་ཏེ། གནས་སྐབས་ཐ་དད་པ་ཉིད་མཚན་ཉིད་ཡིན་པས་གནས་སྐབས་ཐ་དད་པའི་མཚན་ཉིད་ཡིན་ཏེ། ཇི་སྐད་དུ་སྨྲས་པའི་གནས་སྐབས་ཐ་དད་པའི་མཚན་ཉིད་ནི་སྐྱེ་བ་ཞེས་བྱའོ། །དེ་ལྟར་གནས་སྐབས་ཐ་དད་པའི་མཚན་ཉིད་སྨྲས་ནས། རང་གི་མཚན་ཉིད་སྟོན་པ་ནི་སྐྱེ་བའི་རང་གི་མཚན་ཉིད་ནི་སེམས་ཅན་རྣམས་ཀྱི་བདག་གི་དངོས་པོ་ཐོབ་པའོ་ཞེས་རྒྱས་པར་འབྱུང་བའོ། །ཕུང་པོ་སོ་སོར་ཐོབ་པ་དང༌། ཁམས་སོ་སོར་ཐོབ་པ་དང༌། སྐྱེ་མཆེད་སོ་སོར་ཐོབ་པ་དང་ཞེས་བྱ་བ་ནི་དེ་དག་སྐྱེ་བ་ནི་སོ་སོར་ཐོབ་པ་ཡིན་ནོ། །ཕུང་པོ་ལ་སོགས་པའི་རྒྱུན་ལ་སེམས་ཅན་དུ་འདུ་ཤེས་ཤིང་མངོན་པར་ཞེན་པའི་ཕྱིར་རོ་ཞེས་བྱ་བ་ནི་ཕུང་པོ་དང༌། ཁམས་དང་སྐྱེ་མཆེད་ཀྱི་རྒྱུན་ལ་ཞེས་བྱ་བའི་དོན་ཏེ། ཅི་ཞེ་ན་ཕུང་པོ་དང་ཁམས་ལ་སོགས་པ་ཐོབ་པ་ནི་སེམས་ཅན་རྣམས་ཀྱི་བདག་ཐོབ་པ་ཡིན་ནོ་ཞེས་བྱ་བའོ། །གསུམ་སྨོས་པ་ནི་གཅིག་པུ་དང་ལུས་ཅན་དང་ཡུལ་ལ་དམིགས་པར་བྱེད་པ་ཡང་བདག་གོ་ཞེས་བདག་ཏུ་རྟོག་པ་རྣམ་པ་གསུམ་བཙལ་བའི་ཕྱིར་རོ་ཞེས་བྱ་བ་ལ་བདག་ཏུ་རྟོག་པ་རྣམ་པ་གསུམ་སྨྲས་པ་གང་ཡིན་པ་དེ་སྟོན་པ་ནི། གཅིག་པུ་དང་ལུས་ཅན་དང༌། ཡུལ་ལ་དམིགས་པར་བྱེད་པ་ཡང་བདག་
གོ་ཞེས་བྱ་བ་ཡིན་ནོ། །སྤུངས་པའི་དོན་ནི་ཕུང་པོའི་དོན་ཡིན་པས་ཞེས་བྱ་བ་ནི་གཟུགས་གང་ཡིན་པ་ཅི་ཡང་རུང་སྟེ། འདས་པ་དང༌། མ་འོངས་པ་ཞེས་རྒྱས་པར་འབྱུང་བ་ནས་དེ་ཐམས་ཅད་གཅིག་ཏུ་མངོན་པར་བསྡུས་པ་ནི་གཟུགས་ཀྱི་ཕུང་པོ་ཞེས་བྱ་བའི་གྲངས་སུ་འགྲོ་ཞེས་གསུངས་པའི་ཕྱིར་རོ། །དེའི་ཕྱིར། ཕུང་པོ་སྨོས་པ་ནི་བདག་གཅིག་ཏུ་རྟོགས་པ་བསལ་བའི་ཕྱིར་རོ་ཞེས་བྱ་བ་ཡིན་ཏེ། དེ་དག་ལ་བདག་ཏུ་འཛིན་པ་ནི་རྟག་པ་དང་རིལ་པོར་འཛིན་པ་སྔོན་དུ་སོང་བ་ཡིན་ལ་སྤུངས་པའི་དོན་ནི་ཕུང་པོའི་དོན་ཡིན་ནོ་ཞེས་བྱ་བས་རིལ་པོར་འཛིན་པ་ལོག་གོ་ཞེས་བྱ་བ་ཡིན་ནོ། །ཆོས་ཙམ་གསོག་ནི་ཁམས་སོ་ཞེས་བྱ་བ་ངེས་ཚིག་ཡིན་པའི་ཕྱིར་ཞེས་བྱ་བ་ནི་ངེས་ཚིག་གི་ཚུལ་གྱིས་སོ། །ཅི་ཞེ་ན། ཁམས་སྨོས་པ་ནི་ལུས་ཅན་བདག་ཡིན་པར་རྟོག་པ་བསྩལ་བའི་ཕྱིར་ཏེ། ཆོས་ཙམ་གསོག་ནི་རྣམ་པར་ཤེས་པ་ཡིན་ཏེ། སྟོང་ཞེས་བྱ་བའི་ཐ་ཚིག་ཡིན་པས་ལུས་ཅན་བདག་ཡིན་པར་རྟོག་པ་བསྩལ་བ་ཡིན་ནོ། །མིག་ལ་སོགས་པ་ཡུལ་ལ་དམིགས་པར་བྱེད་པ་ནི་སྤུངས་པའི་དོན་དུ་ཡོད་པས་དམིགས་པར་བྱེད་པའི་བདག་ནི་གང་ཡང་ཡོད་པ་མ་ཡིན་པས་དེ་ལྟར་སྐྱེ་མཆེད་སྨོས་པ་ནི་བདག་ཏུ་རྟོག་པ་གསུམ་བསལ་བའི་ཕྱིར་ཡིན་ནོ། །དེ་ལྟར་གནས་སྐབས་དང་བཅས་པའི་སྐྱེ་བའི་མཚན་ཉིད་ཐ་དད་པ་ཞེས་སྨྲས་པ་གང་ཡིན་པ་ནི་གནས་སྐབས་ཐ་དད་པ་དང་ལྷན་ཅིག་པ་དེ་སྐྱེ་བའི་མཚན་ཉིད་ཡིན་ཏེ། གནས་སྐབས་ཐ་དད་པ་དང་ལྷན་ཅིག་པ་ཡིན་པས་གནས་སྐབས་ཐ་དད་པ་དང་བཅས་པ་ཡིན་གྱི། རང་གི་མཚན་ཉིད་ངེས་པའི་སྐྱེ་བའི་མཚན་ཉིད་བསྟན་པ་ནི་མ་ཡིན་ཏེ། དེ་དག་ནི་གནས་སྐབས་ཐ་དད་པ་དང་བཅས་པ་ནི་མ་ཡིན་ནོ། །དེ་ལྟ་བུ་སྐྱེ་བའི་མཚན་ཉིད་དེ་གང་ཞེ་ན། ཕུང་པོ་རྣམས་མངོན་པར་གྲུབ་པ་དང༌། སྲོག་གི་དབང་པོ་རབ་ཏུ་སྐྱེས་པ་ཡིན་ནོ། །དེ་ལྟར་བྱས་ན་ཞེས་རྒྱས་པར་འབྱུང་བ་ལ། དེ་ལྟར་མདོར་སྐྱེ་བའི་མཚན་ཉིད་ཡིན་ཏེ། སྐྱེ་བའི་མཚན་ཉིད་བསྟན་པས། དྲོད་གཤེར་ལས་སྐྱེ་བ་དང༌། རྫུས་ཏེ་བྱུང་བའི་སེམས་ཅན་རྣམས་ཀྱི་སྐྱེ་བའི་མཚན་ཉིད་ཀྱང་བསྟན་པ་ཡིན་ཏེ། དེ་དག་ལ་གནས་སྐབས་ཐ་དད་པ་དང་བཅས་པའི་སྐྱེ་བའི་མཚན་ཉིད་ཡོད་པ་མ་ཡིན་ནོ། །དེ་ལྟར་ན་མདོར་ན་རིས་མཐུན་པར་
མཚམས་སྦྱར་ནས་རྒྱུན་དང་བཅས་པ་ནི་སྐྱེ་བ་ཡིན་ནོ་ཞེས་བསྟན་པ་ཡིན་ཏེ། རྒྱུན་དང་ལྷན་ཅིག་པ་ནི་རྒྱུན་དང་བཅས་པའོ། །རྒྱུན་ཀྱང་འདིར་བདག་ཅག་ལ་སོགས་པའི་སྐྱེ་བའི་རྒྱུན་མཐའ་དག་ཡིན་ནོ། །དྲོད་གཤེར་ལས་སྐྱེས་པ་དང༌། རྫུས་ཏེ་བྱུང་བ་རྣམས་ཀྱི་སྐྱེ་བའི་མཚན་ཉིད་ཀྱང་མདོར་སྨྲས་པ་ཡིན་ནོ། །དེ་ལ་ཕུང་པོ་རྣམས་མངོན་པར་གྲུབ་པ་དང་ཞེས་བྱ་བ་འདིས་ནི་ཉིང་མཚམས་སྦྱར་བ་བསྟན་པ་ཡིན་ཏེ། གསར་དུ་བྱུང་བ་ནི་མངོན་པར་བྱུང་བ་ཡིན་པའི་ཕྱིར་རོ། །སྲོག་གི་དབང་པོ་རབ་ཏུ་སྐྱེས་པ་ཞེས་བྱ་བ་འདིས་ནི་རྒྱུན་དེ་བསྟན་པ་ཡིན་ནོ། །སྐྱེ་བ་རྣམ་པ་ལྔའི་ནང་ནས་ཞེས་བྱ་བ་ནི་སྐྱེ་བ་དང༌། ཤིན་ཏུ་སྐྱེ་བ་དང༌། འཕོས་པ་དང༌། མངོན་པར་བྱུང་བ་དང༌། རབ་ཏུ་སྐྱེས་པ་སྟེ། རྣམ་པ་འདི་ལྔའི་ནང་ནས་དང་པོའི་སྐྱེ་བ་ནི་སྲིད་པའི་རྐྱེན་གྱིས་ཡིན་པར་རིགས་ཏེ། དེའི་འོག་ཏུ་སྐྱེ་བའི་ཕྱིར་རོ། །དེའི་འོག་མ་དག་ནི་འོག་མ་འོག་མ་རྐྱེན་ཡིན་ན་ཞེས་བྱ་བ་ནི་སྐྱེ་བ་དེ་ལས་འོག་མ་ཤིན་ཏུ་སྐྱེ་བ་ལ་སོགས་པའི་ཚོགས་ཡིན་པར་བསྟན་ཏེ། འོག་མ་འོག་མ་རྐྱེན་ཡིན་ཏེ། འདིར་ཤིན་ཏུ་སྐྱེ་བ་ནི་སྐྱེ་བའི་རྐྱེན་གྱིས་ཡིན། འཕོས་པ་འགྲོ་བ་ནི་ཤིན་ཏུ་སྐྱེ་བའི་རྐྱེན་གྱིས་ཡིན། མངོན་པར་བྱུང་བ་ནི་འཕོས་པའི་རྐྱེན་གྱིས་ཡིན། རབ་ཏུ་སྐྱེས་པ་ནི་མངོན་པར་བྱུང་བའི་རྐྱེན་གྱིས་ཡིན་ན། ཇི་ལྟར་སྲིད་པའི་རྐྱེན་གྱིས་ཡིན་ཞེས་བྱ། འདིར་སྨྲས་པ། འཕོས་པ་ནི་འོག་མ་རྐྱེན་ཡིན་པར་བསྟན། སྐྱེ་བ་ནི་རྒྱུ་ཡིན་ཏེ། སྔ་ལ་ཤིན་ཏུ་སྐྱེ་བ་ནི་འོག་མ་ཡིན། ཚོར་བར་བྱུང་བ་དང༌། རབ་ཏུ་སྐྱེས་པ་ཡང་དེ་བཞིན་ནོ། །འོ་ན་ཤིན་ཏུ་སྐྱེས་པའི་རྐྱེན་འོག་མ་ཇི་ལྟར་ཡིན། སྐྱེ་བ་ནི་འོག་མ་མ་ཡིན་ནོ། །འོ་ན་ཅི་ཞེ་ན། སྔ་མ་ཡིན་ནོ། །དེའི་རྐྱེན་གྱིས་ནི་ཤིན་ཏུ་སྐྱེ་བ་ཡིན་ནོ་ཞེས་ཟེར་ན་འདུན་པ་དང་ལྡན་པ་སྟོན་པ་ཡིན་པས་དེའི་ཕྱིར་ཉེས་པ་མེད་དོ། ཡང་ན་སྐྱེ་བ་ཡང་འོག་མ་ཡིན་ཏེ། གང་ལས་ཤེ་ན། ལས་ཀྱི་སྲིད་པ་ལས་ཡིན་ཏེ། དེ་བས་ན་ཉེས་པ་མེད་དོ། །དེ་རྩ་བ་ཡིན་པའི་ཕྱིར་རོ་ཞེས་བྱ་བ་ནི་སྲིད་པ་རྩ་བ་ཡིན་པའི་ཕྱིར་ཞེས་བྱ་བའི་ཐ་ཚིག་གོ །དང་པོའི་བྱེ་བྲག་རྣམ་པར་འབྱེད་པའི་མདོ་སྡེ་ལས་ཀྱང་ཞེས་རྒྱས་པར་འབྱུང་བ་ལ། རིམ་པ་གང་གིས་སྐྱེ་བ་དང་ཞེས་བྱ་བ་ནི་སྐྱེ་བ་དང་ཤིན་ཏུ་སྐྱེ་བ་དང་ཞེས་བྱ་བ་ལ་སོགས་པས་སོ། །གང་སྐྱེ་བ་དང་ཞེས་བྱ་བ་ནི་ཕུང་པོ་དང༌། ཁམས་དང་སྐྱེ་
མཆེད་རྣམས་ཏེ། ཕུང་པོ་སོ་སོར་ཐོབ་པ་དང་ཞེས་རྒྱས་པར་འབྱུང་བའོ། །ཇི་ལྟར་སྐྱེ་བ་ཞེས་བྱ་བ་ནི་ཕུང་པོ་རྣམས་མངོན་པར་གྲུབ་པ་དང༌། སྲོག་གི་དབང་པོ་རབ་ཏུ་སྐྱེས་པ་ཞེས་བྱ་བའི་ཚིག་གཉིས་ཀྱིས་སོ། །རིམ་པ་གང་གིས་སྐྱེ་བ་དང་ཞེས་སྨྲས་པ་གང་ཡིན་པ་དེ་ལ་རིམ་པ་སྟོན་པ་ནི་འདི་དག་སྟེ། དང་པོར་ནི་ས་བོན་བཏབ་པའི་སྐྱ་བ་ཡིན་ཏེ། ཁྲག་དང་ཁུ་བ་ནུར་ནུར་པོའི་ནང་དུ་རྣམ་པར་ཤེས་པའི་ས་བོན་བཏབ་པའོ། །དེའི་འོག་ཏུ་དེ་འཕེལ་བའི་སྐྱེ་བ་དང་ཞེས་བྱ་བ་ནི་ཤིན་ཏུ་སྐྱེ་བ་ཡིན་ཏེ། གང་བར་སྐྱེས་པ་ནི་ཤིན་ཏུ་སྐྱེས་པ་སྟེ། ཉིང་མཚམས་སྦྱོར་བའི་སྐད་ཅིག་མ་མ་གཏོགས་པར་སྐྱེ་མཆེད་དྲུག་ལ་ཐུག་གི་བར་དུ་ཡིན་ནོ། །དེའི་འོག་ཏུ་བཅས་པའི་སྐྱེ་བ་དང་ཞེས་བྱ་བ་ནི་འཕོས་པ་ཡིན་ཏེ། མངལ་གྱི་སྒོ་ནས་འབྱུང་བ་ཡིན་ནོ། །དེའི་འོག་ཏུ་དེ་འཕེལ་བའི་སྐྱེ་བ་དང་ཞེས་བྱ་བ་ནི་མངོན་པར་འབྱུང་བ་སྟེ། མངོན་དུ་བྱུང་བ་ནི་མངོན་པར་བྱུང་བ་ཡིན་པའི་ཕྱིར་ཏེ། བྱིས་པའི་གནས་སྐབས་ནས་བཟུང་སྟེ། ལོངས་སྤྱོད་དང་ཐ་སྙད་བྱེད་པར་ནུས་པ་མ་ཐོབ་ཀྱི་བར་དུ་ཡིན་ནོ། །འཕེལ་ནས་ལོངས་སྤྱོད་དང་ཐ་སྙད་ནུས་པ་ཐོབ་པའི་སྐྱེ་བ་ཞེས་བྱ་བ་ནི་རབ་ཏུ་སྐྱེས་པ་དང་ཞེས་བྱ་བ་ཡིན་ཏེ། རྐྱེན་གང་ལས་ལོངས་སྤྱོད་དང་ཐ་སྙད་བྱེད་པར་ནུས་པའོ། །གང་སྐྱེ་བ་དང་ཞེས་བྱ་བ་སྨྲས་པ་གང་ཡིན་པ་དེའི་དབང་དུ་བྱས་ནས། སྐྱེ་བ་ཡང་གང་ཞེ་ན་ཞེས་སྨྲས་ཏེ། གང་སྐྱེ་བ་དེ་སྐྱེ་བ་ཡིན་ནོ། །དེའི་ཕྱིར་ཕུང་པོ་དང༌། ཁམས་དང༌། སྐྱེ་མཆེད་རྣམས་སྐྱེ་བ་ཡིན་གྱི། བདག་ནི་མ་ཡིན་ནོ་ཞེས་སྨྲས་ཏེ། ཅི་ཞེ་ན། སྐྱེ་བ་ཞེས་བྱ་བར་སྦྱར་རོ།། ཅིའི་ཕྱིར་ཞེ་ན་ཞེས་བྱ་བ་ནི་བདག་སྐྱེ་བ་མ་ཡིན་སྙམ་དུ་བསམས་པའོ། །དེའི་ཕྱིར། ཕུང་པོ་ལ་སོགས་པ་འཕེལ་བར་འགྲོ་བའི་ཕྱིར་རོ་ཞེས་སྨྲས་ཏེ། དང་པོར་ས་བོན་བཏབ་པའི་སྐྱེ་བ་དང་ཞེས་རྒྱས་པར་རིམ་པ་ཇི་སྐད་དུ་སྨྲས་པ་རྣམས་ཡིན་ནོ། །ཇི་ལྟར་སྐྱེ་ཞེས་སྨྲས་པ་གང་ཡིན་པ་དེའི་དབང་དུ་བྱས་ཏེ། མི་རྟག་པ་དང་སྲོག་གི་དབང་པོའི་དབང་གིས་དང་ཞེས་རྒྱས་པར་སྨྲས་ཏེ། མི་རྟག་པ་ཉིད་ཀྱང་ཕུང་པོ་ལ་སོགས་པ་མངོན་པར་གྲུབ་པ་ཞེས་བྱ་བའི་ཚིག་འདིས་ཡིན་ནོ། །སྲོག་གི་དབང་པོའི་དབང་གིས་དང་ཞེས་བྱ་བ་ནི་སྲོག་གི་དབང་པོ་རབ་སྐྱེས་པ་ཞེས་བྱ་བའི་ཚིག་འདིས་
ཡིན་ནོ། །དུས་དཔག་ཏུ་ཡོད་པར་གནས་པའི་ཆོས་ཉིད་ཡིན་པའི་ཡང་ཕྱིར་མི་རྟག་པ་ཉིད་སྐྱེ་བ་ཡིན་ནོ་ཞེས་བྱ་བ་ནི་བདག་རྟག་པ་ནི་མ་ཡིན་ཏེ། ཕུང་པོ་རྣམས་མངོན་པར་གྲུབ་པ་ཞེས་བྱ་བ་འདིས་མི་རྟག་པ་བསྟན་ཏོ། །གསར་དུ་བྱུང་བ་ནི་མངོན་བར་བྱུང་བ་ཡིན་པའི་ཕྱིར་རོ་ཞེས་བྱ་བ་འདིས་སྔོན་མ་བྱུང་བ་ལས་བྱུང་བ་སྟོན་པའི་ཕྱིར་རོ། །སྲོག་གི་དབང་པོ་རབ་ཏུ་སྐྱེས་པ་ཞེས་བྱ་བ་འདིས་ཀྱང་དུས་དཔག་ཏུ་ཡོད་པར་གནས་པའི་ཆོས་ཉིད་ཡིན་པའི་ཡང་ཕྱིར་བྱུང་བ་ལས་བྱུང་བའི་མཚན་ཉིད་དང་རབ་ཏུ་འཇིག་པའི་མི་རྟག་པ་བསྟན་ཏོ། །དེ་ལྟར་བཤད་པ་ནི་ཞེས་བྱ་བ་ནི་རིམ་པ་གང་གིས་སྐྱེ་བ་ཞེས་བྱ་བ་ནས་བརྩམས་ནས་མི་རྟག་པ་ཉིད་སྐྱེ་བ་ཡིན་ནོ་ཞེས་བྱ་བའི་བར་དུ་གོ་རིམས་བཞིན་དུ་སྐྱེ་བའི་རྣམ་གྲངས་བཅུ་ཡིན་པར་བརྗོད་དོ། །ཇི་ལྟ་ཞེ་ན། ས་བོན་བཏབ་པའི་སྐྱེ་བ་ནི་སྐྱེ་བ་ཡིན་ནོ་ཞེས་བྱ་བ་ནས་འཕེལ་ནས་ལོངས་སྤྱོད་དང་ཐ་སྙད་ནུས་པ་ཐོབ་པའི་སྐྱེ་བ་ནི་རབ་ཏུ་བྱུང་བ་ཡིན་ནོ་ཞེས་བྱ་བའི་བར་དུའོ། །ཕུང་པོ་སོ་སོར་ཐོབ་པ་དང༌། ཁམས་སོ་སོར་ཐོབ་པ་དང༌། སྐྱེ་མཆེད་སོ་སོར་ཐོབ་པ་ཞེས་བྱ་བ་འདིས་རྣམ་པར་འཆད་པ་ནི་ཕུང་པོ་དང༌། ཁམས་དང༌། སྐྱེ་མཆེད་རྣམས་སྐྱེ་བ་ཞེས་བྱ་བ་ཡིན་ནོ། །ཕུང་པོ་མངོན་པར་གྲུབ་པ་དང༌། སྲོག་གི་དབང་པོ་རབ་ཏུ་སྐྱེས་པ་ཞེས་བྱ་བ་འདི་ཉིད་ངེས་པར་འཆད་པ་ནི་མི་རྟག་པ་ཉིད་སྐྱེ་བ་ཡིན་ཏེ་ཞེས་བྱ་བ་ཡིན་ནོ། །གནས་གསུམ་ཚོགས་པས་མའི་མངལ་དུ་བུ་ཆགས་པར་འགྱུར་རོ་ཞེས་བྱ་བ་ནི་མ་ནི་རུང་བ་ཡིན་ཏེ། དུས་དང་ལྡན་པ་དང༌། ཕ་མ་གཉི་ག་ཆགས་པ་དང་ལྡན་པར་ཚོགས་པ་དང༌། དྲི་ཟ་ཉེ་བར་གནས་པ་སྟེ་གསུམ་ནི་དེ་དག་གོ །སྲིད་པར་གྱུར་པའི་ལས་ནི་རྒྱུ་མཐུན་པའི་འབྲས་བུའི་རྒྱུ་དང་རྐྱེན་མ་ཡིན་པར་འགྱུར་བ་དང་ཞེས་བྱ་བ་ནི་སྐལ་བ་འདྲ་བའི་རྒྱུད་བསྡུས་པའི་འབྲས་བུ་འདྲ་བའི་རྐྱེན་དུ་མི་འགྱུར་ཏེ། སྲེད་པའི་རྐྱེན་གྱིས་སྐྱེ་བ་ཁོ་ན་ཡིན་གྱི་གཞན་མ་ཡིན་པས་སོ། །དེ་ལ་དམིགས་པའི་སེམས་དང་སེམས་ལས་བྱུང་བའི་དམིགས་པའི་རྐྱེན་ཅི་ཞེ་ན་སྲིད་པར་གྱུར་པའི་ལས་མ་ཡིན་པར་འགྱུར་རོ་ཞེས་སྐབས་དང་སྦྱར་རོ། །དེ་ལ་དམིགས་པའི་ཞེས་བྱ་བ་ནི་སྲིད་པར་གྱུར་པའི་ལས་ལ་དམིགས་པ་ཞེས་བྱ་བའི་ཐ་ཚིག་གོ །འོན་ཏེ་མ་ངེས་པ་ཡིན་ན་ནི་བཤད་པ་དོན་མེད་པར་འགྱུར་རོ་ཞེས་བྱ་བ་ནི་རྒྱུ་གཏན་ལ་
དབབ་པའི་དོན་དུ་འཆད་ན་ཡང་རྒྱུ་ཐམས་ཅད་བརྗོད་པར་བྱ་དགོས་སོ། །འབྲས་བུ་གཏན་ལ་དབབ་ན་ཡང་འབྲས་བུ་ཐམས་ཅད་བརྗོད་དགོས་པར་འགྱུར་རོ། །འོན་ཏེ་རྒྱུ་གཏན་ལ་དབབ་པའི་ཆེད་དུ་ཡང་མ་ཡིན། འབྲས་བུ་གཏན་ལ་དབབ་པའི་ཆེད་དུ་ཡང་མ་ཡིན་ནོ། །སྲིད་པའི་རྐྱེན་གྱིས་སྐྱེ་བ་ཞེས་འཆད་པ་དོན་མེད་པར་འགྱུར་རོ། །དོན་མེད་པར་མི་འགྱུར་ཏེ། རྐྱེན་གཙོ་བོ་འཆད་པའི་ཕྱིར་རོ་ཞེས་བྱ་བ་ནི་རྒྱུ་གཏན་ལ་དབབ་པའི་ཕྱིར་དེ་འཆད་ན་ཡང་རྒྱུ་ཐམས་ཅད་བརྗོད་པར་བྱ་མི་དགོས་ཏེ། རྐྱེན་གཙོ་བོ་གཏན་ལ་དབབ་པའི་ཆེད་ཡིན་པའི་ཕྱིར་རོ། །དེ་མེད་པར་སྐྱེ་བ་མི་སྲིད་པའི་ཕྱིར་རོ་ཞེས་བྱ་བ་ནི་སྲིད་པ་དེ་མེད་པར་ཞེས་བྱ་བའི་དོན་ཏོ། །གནས་གཉིས་ཚོགས་སུ་ཟིན་ཀྱང་དིར་ཟ་ཡང་མེད་པར་འགྱུར་ཏེ། དེ་མེད་པར་ཞེས་བྱ་བ་སྐབས་དང་སྦྱར་རོ། །དེའི་ཕྱིར་ཡང་སྲིད་པ་ཉིད་རྐྱེན་གཙོ་བོ་ཡིན་གྱི། དྲི་ཟ་ནི་མ་ཡིན་ནོ། །གནས་རྣམ་པ་གསུམ་མེད་པར་ཡང་དྲོད་གཤེར་ལས་སྐྱེ་བ་དང༌། རྫུས་ཏེ་སྐྱེ་བ་རྣམས་དང༌། གཟུགས་མེད་པ་རྣམས་སུ་ཇི་ལྟར་རིགས་པར་ཇི་ལྟར་འོས་པ། སྐྱེ་བ་ཡོད་པ་ཉིད་དེ། དྲོད་གཤེར་ལས་སྐྱེ་བ་དང༌། རྫུས་ཏེ་སྐྱེ་བ་རྣམས་ནི་གནས་གཉིས་མེད་པར་ཡང་སྐྱེ་བ་ཡོད་པ་ཡིན་ཏེ། མ་ནི་རུང་བ་ཡིན་ཏེ། དུས་དང་ལྡན་པ་དང༌། ཕ་མ་གཉིས་ཆགས་པར་གྱུར་ཏེ། ཚོགས་པ་འདི་གཉིས་མེད་པར་ཡང་སྐྱེ་བ་ཡོད་པ་ཡིན་ནོ། །གཟུགས་མེད་པར་ནི་གནས་གསུམ་མེད་པར་ཡང་སྐྱེ་བ་ཡོད་པ་ཡིན་ཏེ། དེ་ན་ནི་ཕ་མའི་ལུགས་ཡོད་པ་མ་ཡིན་ལ། སྲིད་པ་བར་མ་ཡང་ཡོད་པ་པ་མ་ཡིན་ནོ། །དེའི་ཕྱིར་ཡང་སྲིད་པ་ཉིད་རྐྱེན་གཙོ་བོ་ཡིན་པར་འགྲུབ་པ་ཡིན་ནོ། །སྐྱེ་བའི་བསྡུས་པའི་དོན་ནི་རྣམ་པ་བཅུ་གཉིས་ཡིན་པར་འདིར་བསྟན་ཏེ། སེམས་ཅན་དུ་བགྲང་བ་རྣམ་པར་གཞག་པ་ནི་ཇི་སྐད་དུ། སེམས་ཅན་དེ་དང་དེ་དག་གི་ཞེས་བསྟན་པའོ། །མཐུན་པ་རྣམ་པར་གཞག་པ་ནི་ཇི་སྐད་དུ། སེམས་ཅན་གྱི་རིས་དེ་དང་དེར་ཞེས་བསྟན་པའོ། །རྣམ་གྲངས་ཀྱི་དགོས་པ་རྣམ་པར་གཞག་པ་ནི་ཇི་སྐད་དུ། རྗེས་སུ་མཐུན་པར་རྣམ་པར་འཆད་པ་ནི་སྐྱེ་བའི་རྣམ་གྲངས་ཡིན་ཏེ་ཞེས་བྱ་བ་དང༌། གནས་སྐབས་ཀྱི་བྱེ་བྲག་སྟོན་པའི་དོན་ནི་རྣམ་གྲངས་གཞན་ཡིན་ཏེ་ཞེས་བསྟན་
པ་ཡིན་ནོ། །གནས་སྐབས་ཐ་དད་པའི་མཚན་ཉིད་རྣམ་པར་གཞག་པ་ནི་ཇི་སྐད་དུ། ཇི་ལྟར་འཕངས་པ་བཞིན་དུ་མིང་དང་གཟུགས་ལ་སོགས་པ་མཐའ་ཚོར་བ་ལ་ཐུག་པའི་བར་གྱི་དང་པོ་བྱུང་བ་ནི་སྐྱེ་བ་ཡིན་ཏེ་ཞེས་བྱ་བ་དང༌། སྐྱེས་ནས་མིང་དང་གཟུགས་ཡོངས་སུ་རྫོགས་པ་ནི་ཤིན་ཏུ་སྐྱེ་བ་ཡིན་ནོ་ཞེས་རྒྱས་པར་བསྟན་པ་ཡིན་ནོ། །རང་གི་མཚན་ཉིད་རྣམ་པར་གཞག་པ་ནི་ཇི་སྐད་དུ། སྐྱེ་བའི་རང་གི་མཚན་ཉིད་ནི་སེམས་ཅན་རྣམས་ཀྱི་བདག་གི་དངོས་པོ་ཐོབ་པའོ་ཞེས་རྒྱས་པར་བསྟན་པའོ། བསྡུས་པ་རྣམ་པར་གཞག་པ་ནི་ཇི་སྐད་དུ། དེ་ལྟར་གནས་སྐབས་དང་བཅས་པའི་སྐྱེ་བའི་མཚན་ཉིད་ཐ་དད་པ་རྒྱས་པར་བསྟན་ནས་ཡང་མདོར་སྟོན་པ་ནི་ཕུང་པོ་རྣམས་མངོན་པར་གྲུབ་པ་དང༌། སྲོག་གི་དབང་པོ་རབ་ཏུ་སྐྱེས་པ་ཞེས་བསྟན་པ་ཡིན་ནོ། །སྲིད་པའི་རྐྱེན་དུ་རྣམ་པར་གཞག་པ་ནི་ཇི་སྐད་དུ། སྲིད་པས་ནི་སྐྱེ་བ་དང་པོ་ལ་དེའི་ངོ་བོའི་ནུས་པ་ཡོད་པར་བྱས་ནས་ཞེས་རྒྱས་པར་བསྟན་པ་ཡིན་ནོ། །གོ་རིམས་རྣམ་པར་གཞག་པ་ནི་ཇི་སྐད་དུ། ས་བོན་བཏབ་པའི་སྐྱེ་བ་དང༌། དེའི་འོག་ཏུ་དེ་འཕེལ་བའི་སྐྱེ་བ་དང་ཞེས་རྒྱས་པར་བསྟན་པ་ཡིན་ནོ། །ལུས་རྣམ་པར་གཞག་པ་ནི་ཇི་སྐད་དུ། ཕུང་པོ་དང༌། ཁམས་དང༌། སྐྱེ་མཆེད་རྣམས་སྐྱེ་བ་ཡིན་གྱི། བདག་ནི་མ་ཡིན་ནོ་ཞེས་བསྟན་པ་ཡིན་ཏེ། མ་བྱུང་བ་ལས་བྱུང་བའི་མཚན་ཉིད་སྐྱེ་བའི་ལུས་ཕུང་པོ་དང༌། ཁམས་དང༌། སྐྱེ་མཆེད་ཡིན་ཏེ། ཕུང་པོ་ལ་སོགས་པ་ནི་སྐྱེ་བ་ཡིན་ནོ། །དེ་མི་རྟག་པ་ཉིད་རྣམ་པར་གཞག་པ་ནི་ཇི་སྐད་དུ། མི་རྟག་པ་ཉིད་སྐྱེ་བ་ཡིན་ནོ་ཞེས་བསྟན་པ་ཡིན་ནོ། །རྐྱེན་གཙོ་བོ་རྣམ་པར་གཞག་པ་ནི་ཇི་སྐད་དུ། སྲིད་པ་ནི་རྐྱེན་གཙོ་བོ་ཉིད་ཡིན་ཏེ། དེ་མེད་པར་སྐྱེ་བ་མི་སྲིད་པའི་ཕྱིར་རོ་ཞེས་རྒྱས་པར་བསྟན་པ་ཡིན་ནོ། །སྐྱེ་བའི་ཡན་ལག་རྣམ་པར་འབྱེད་པའོ།། །།སྐྱེ་བའི་རྐྱེན་གྱིས་རྒ་ཤི་ཞེས་བྱ་བའི་རྒ་ཤི་གང་ཞེ་ན་ཞེས་སྨྲས་པའི་ངེས་པར་འཆད་པ་ཡང་ཇི་སྐད་དུ་བསྟན་པ་ཡིན་ནོ། །དེ་བས་ན་རྒ་བ་ངེས་པར་བཤད་པའི་ཕྱིར། རྒ་བ་གང་ཞེ་ན། གང་དེའི་སྤྱི་གཅེར་དང༌། སྐྲ་དཀར་དང་ཞེས་རྒྱས་པར་འབྱུང་བའི་ཚིག་རྣམ་པ་བཅོ་བརྒྱད་ཀྱིས་ཞེས་བྱ་བ་ཡིན་ཏེ། རྒྱས་པའི་ཚིག་ནི་མདོ་སྡེ་ལས་ཇི་ལྟར་འབྱུང་བ་བསྟན་པའི་ཕྱིར་རོ། །
ཇི་ལྟ་ཞེ་ན། གང་དེའི་སྤྱི་གཅེར་དང༌། སྐྲ་དཀར་དང༌། གཉེར་མ་འཚིགས་པ་དང༌། རྙིས་པ་དང༌། ཞུམ་པ་དང༌། བ་ལང་སྒུར་པོ་ཆུ་འཐུང་བ་ལྟར་གུག་པ་དང༌། ལུས་ལ་ནག་པོའི་ཐིག་ལེས་གང་བ་དང༌། ལུད་པ་ལུ་ཞིང་དབུགས་རྒོད་པ་དང༌། མདུན་དུ་ལུས་འབབ་པ་ལྟར་བྱེད་པ་དང༌། འཁར་བ་ལ་བརྟེན་པ་དང༌། བླུན་པས་མོང་རྟུལ་བ་དང༌། ཞན་པ་ཉིད་དང་ཉམས་པ་དང༌། ཡོངས་སུ་ཉམས་པ་དང༌། དབང་པོ་རྒུད་པ་དང༌། ཉམས་པ་དང༌། འདུ་བྱེད་རྙིངས་པ་དང༌། ཤིན་ཏུ་རྙིངས་པ་རྣམས་ཡིན་ནོ། །ཡོངས་སུ་འགྱུར་བའི་མཚན་ཉིད་རྣམ་པ་བདུན་ནི་ཡོངས་སུ་ཉམས་པའི་རྒས་པ་ཡིན་པར་སྟོན་ཏོ་ཞེས་བྱ་བ་ལ་རྒས་པ་ནི་གཉིས་ཏེ། ཡོངས་སུ་ཉམས་པའི་རྒས་པ་དང༌། ཉེ་བར་ཁྲིད་པའི་རྒས་པའོ། །དེ་ལ་ཡོངས་སུ་ཉམས་པའི་རྒས་པ་འདི་ནི་ཡོངས་སུ་འགྱུར་བའི་མཚན་ཉིད་རྣམ་པ་བདུན་བྱེ་བྲག་བདུན་ཏེ། དེ་ནི་ཡོངས་སུ་འགྱུར་བ་རྣམ་པ་བདུན་ཡིན་ནོ། །ཡོངས་སུ་འགྱུར་བའི་མཚན་ཉིད་རྣམ་པ་བདུན་པོ་དེ་ནི་ཡོངས་སུ་ཉམས་པའི་རྒས་པ་ཡིན་པར་སྟོན་ཏོ། །ཉེ་བར་ཁྲིད་པའི་རྒས་པ་ནི་གང་སྐད་ཅིག་མ་གཅིག་ནས་གཅིག་ཏུ་ཤི་བའི་བར་དུ་ཁྲིད་པར་བྱེད་པའོ། །གཟུགས་ཡོངས་སུ་འགྱུར་བའི་མཚན་ཉིད་ཅི་ཞེ་ན། ཡོངས་སུ་ཉམས་པའི་རྒས་པ་སྟོན་པ་ཡིན་ནོ། །ཇི་ལྟ་ཞེ་ན། དེའི་ཕྱིར་སྐྲ་འབྱི་ཞིང་སྐྲ་མདོག་གྱུར་པ་དང་ཞེས་སྨྲས་ཏེ། སྐྲ་འབྱི་ཞིང་སྐྲ་མདོག་གྱུར་པ་དང༌། སྤྱི་གཅེར་ཞེས་བྱ་བ་འདིས་ནི་སྐྲ་བྱི་བའོ། །སྐྲ་དཀར་ཞེས་བྱ་བ་འདིས་ནི་སྐྲ་མདོག་གྱུར་པའོ། །སྐྲ་མདོག་གྱུར་པ་གང་ཡིན་པ་ནི་གཟུགས་ཡོངས་སུ་འགྱུར་བའི་མཚན་ཉིད་ཡོངས་སུ་ཉམས་པའི་རྒས་པ་ཡིན་པར་སྟོན་པ་ནི་རིགས་པ་ཡིན་ཏེ། ཡོངས་སུ་འགྱུར་བ་ནི་གཞན་དུ་འགྱུར་བ་ཡིན་པའི་ཕྱིར་རོ། །སྐྲ་བྱི་བ་གོ་ཇི་ལྟར་ཡིན་ཞེ་ན། སྐྲ་བྱི་བ་ནི་དེ་མེད་ན་མི་འབྱུང་བ་ཡིན་པའི་ཕྱིར་ཏེ། གཟུགས་ཡོངས་སུ་འགྱུར་བ་མེད་པར་སྐྲ་བྱི་བ་ཡོད་པ་མ་ཡིན་པས་སོ། །པགས་པ་འཁུམས་པ་དང་ཞེས་བྱ་བ་ཅི་ཞེ་ན། གཟུགས་རྣམ་པར་འགྱུར་བའི་མཚན་ཉིད་ནི་ཡོངས་སུ་ཉམས་པའི་རྒས་པ་ཡིན་ནོ་ཞེས་གཉེར་མ་འཚིགས་པ་ཞེས་བྱ་བ་འདིས་སྟོན་ཏོ་ཞེས་སྐབས་དང་སྦྱར་ཏེ། པགས་པ་འཁུམས་པ་མེད་པར་གཉེར་མ་
འཚིགས་པ་ཡོད་པ་མ་ཡིན་པས་སོ། །མདངས་ཡོངས་སུ་ཉམས་པ་དང་ཞེས་བྱ་བ་ནི་རྙིས་པ་དང་ཞེས་བྱ་བ་འདིས་ཡིན་ཏེ། གཟུགས་རྣམ་པར་འགྱུར་བ་མེད་པར་མདོངས་ཡོངས་སུ་ཉམས་པ་ཡོད་པ་མ་ཡིན་ནོ། །ཤ་ལྷོད་པ་དང་ཞེས་བྱ་བ་ནི་ཞུམ་པ་དང་ཞེས་བྱ་བ་འདིས་ཡིན་ནོ། །དཔེ་དང་བཅས་པའི་ལུས་ཀྱི་དབྱིབས་ཡོངས་སུ་གྱུར་པ་དང་ཞེས་བྱ་བ་ནི་བ་ལང་སྒུར་པོ་ཆུ་འཐུང་བ་ལྟར་གུག་པ་དང་ཞེས་བྱ་བའི་ཚིག་འདིས་ཡིན་ཏེ། འདིས་ནི་དཔེ་དང་བཅས་པའི་ལུས་ཀྱི་དབྱིབས་གྱུར་པ་སྟོན་པ་ཡིན་ནོ། །མདོག་གྱུར་པས་ཞེས་བྱ་བ་ནི་ལུས་ལ་ནག་པོ་ཐིག་ལེས་གང་བ་དང་ཞེས་བྱ་བའི་ཚིག་འདིས་ཡིན་ཏེ། ཅི་ཞེ་ན། གཟུགས་རྣམ་པར་གྱུར་པའི་མཚན་ཉིད་ནི་ཡོངས་སུ་ཉམས་པའི་རྒས་པ་ཡིན་པར་སྟོན་པ་ཡིན་ཏེ། རེ་ཞིག་དེ་དག་ནི་ཡོངས་སུ་འགྱུར་བའི་རྣམ་པ་དང་པོ་ཡིན་ནོ། །སྟོབས་ཡོངས་སུ་འགྱུར་བའི་མཚན་ཉིད་ནི་ཡོངས་སུ་ཉམས་པའི་རྒས་པ་ཡིན་པར་སྟོན་ཏོ་ཞེས་སྐབས་དང་སྦྱར་རོ། །སྒྲ་དང་བཅས་ཤིང་ཤིན་ཏུ་དབུགས་རྒོད་པ་དང་ཞེས་བྱ་བ་ནི་ལུད་པ་ལུ་ཞིང་དབུགས་རྒོད་པ་ཞེས་བྱ་བའི་ཚིག་འདིས་ཡིན་ནོ། །འགྲེང་བ་དང་འགྲོ་བའི་གནས་སྐབས་གཉིས་ན་འབུབ་པ་ལྟ་བུར་མངོན་དུ་ཕྱོགས་པ་དང་ཞེས་བྱ་བ་ནི་འགྲེང་བའི་གནས་སྐབས་ན་འབུབ་པ་ལྟར་མངོན་དུ་ཕྱོགས་པ་ནི་མདུན་དུ་ལུས་འབུབ་པ་ལྟར་བྱེད་པ་དང་ཞེས་བྱ་བའི་ཚིག་འདིས་ཡིན་ནོ། །འགྲོ་བའི་གནས་སྐབས་ན་ནི་འཁར་བ་ལ་བརྟེན་པ་དང་ཞེས་བྱ་བའི་ཚིག་འདིས་ཡིན་ཏེ། ཅི་ཞེ་ན། རྣམ་པར་འགྱུར་བའི་མཚན་ཉིད་ནི་ཡོངས་སུ་ཉམས་པའི་རྒས་པ་ཡིན་པར་སྟོན་ཏོ་ཞེས་སྐབས་དང་སྦྱར་རོ། །འདི་ནི་ཡོངས་སུ་འགྱུར་བའི་རྣམ་པ་གཉིས་པའོ། །ཤེས་རབ་རྣམ་པར་འགྱུར་བའི་མཚན་ཉིད་ཅི་ཞེ་ན། །ཡོངས་སུ་ཉམས་པའི་རྒས་པ་ཡིན་པར་སྟོན་ཏེ། བླུན་པས་མོང་རྟུལ་བ་ཉིད་ཅེས་བྱ་བའི་ཚིག་འདིས་ཡིན་ནོ། །ལེགས་པར་བཤད་པ་དང་ཉེས་པར་བཤད་པའི་ཞེས་རྒྱས་པར་འབྱུང་བ་ལ། ལེགས་པར་བཤད་པ་ནི་ཁ་ན་མ་ཐོ་བ་མེད་པའི་ཆོས་རྣམས་དང༌། ཉེས་པར་བཤད་པ་ནི་ཁ་ན་མ་ཐོ་བ་དང་བཅས་པའི་དོན་ཤེས་པའི་སྟོབས་མེད་པའི་ཕྱིར་དང༌། བྱ་བ་དང་བྱ་བ་མ་ཡིན་པ་ཤེས་པའི་སྟོབས་མེད་པའི་ཕྱིར་བླུན་པ་ཡིན་ནོ་ཞེས་བྱ་སྟེ། འདི་དེ་ཉིད་ཀྱི་རྣམ་པར་འཆད་པ་ཡིན་ནོ། །འདི་དག་ནི་རྣམ་
པར་འགྱུར་བའི་རྣམ་པ་གསུམ་པ་ཡིན་ནོ། །དྲན་པ་རྣམ་པར་འགྱུར་བའི་མཚན་ཉིད་དག་ཡོངས་སུ་ཉམས་པའི་རྒས་པ་ཡིན་པར་སྟོན་ཏེ། ཇི་ལྟ་ཞེ་ན། དེའི་ཕྱིར་མྱུར་དུ་བརྗེད་པ་དང༌། དྲན་པ་མི་གསལ་བའོ་ཞེས་སྨྲས་ཏེ། ཞན་པ་ཉིད་ཅེས་བྱ་བའི་ཚིག་འདིས་ཡིན་ཏེ། མྱུར་དུ་བརྗེད་པ་དང༌། དྲན་པ་མི་གསལ་བ་འདི་ནི་རྣམ་པར་འགྱུར་བའི་རྣམ་པ་བཞི་པ་ཡིན་ནོ། །འཁྲིག་པ་དང་ཟས་ཀྱི་ལོངས་སྤྱོད་ཀྱི་བདེ་བ་རྣམ་པར་འགྱུར་བའི་མཚན་ཉིད་ནི་ཡོངས་སུ་ཉམས་པའི་རྒས་པ་ཡིན་པར་སྟོན་ཏེ། སྐྱེས་པ་ཉིད་ལ་གནོད་པར་འགྱུར་བའི་ཕྱིར་དང༌། འཇུ་བའི་མི་ཞན་པར་གྱུར་པས་སོ། །དེ་ལ་འཁྲིག་པའི་བདེ་བ་རྣམ་པར་འགྱུར་བའི་མཚན་ཉིད་ནི་སྐྱེས་པ་ཉིད་ལ། གནོད་པ་ཡིན་པས་ཉམས་པ་ཞེས་བྱ་བའི་ཚིག་འདིས་སྟོན་ཏོ། །ཟས་ཀྱི་ལོངས་སྤྱོད་བདེ་བ་རྣམ་པར་འགྱུར་བའི་མཚན་ཉིད་ནི་འཇུ་བའི་མེ་ཞན་པར་གྱུར་པས་ཏེ། ཡོངས་སུ་ཉམས་པ་ཞེས་བྱ་བའི་ཚིག་འདིས་ཡིན་ནོ། །འཁྲིག་པའི་ལོངས་སྤྱོད་ཀྱི་བདེ་བ་དེའི་ཚེ་རྣམ་པར་འགྱུར་བ་ནི་སྐྱེས་པ་ཉིད་ལ་གནོད་པར་གྱུར་པའི་ཕྱིར་རོ། །ཟས་ཀྱི་ལོངས་སྤྱོད་ཀྱི་བདེ་བ་རྣམ་པར་འགྱུར་བ་ནི་འཇུག་བའི་མེ་ཞན་པར་གྱུར་པའི་ཕྱིར་རོ། །འདི་ནི་རྣམ་པར་འགྱུར་བའི་རྣམ་པ་ལྔ་པ་ཡིན་ནོ། །དབང་པོ་ཡོངས་སུ་འགྱུར་བའི་མཚན་ཉིད་ཀྱང་ཡོངས་སུ་ཉམས་པའི་རྒས་པ་ཡིན་པར་སྟོན་པ་ནི། ཡུལ་ལ་དམིགས་པའི་སྟོབས་ཞན་པ་དང༌། ཉམས་པས་ཡིན་ཏེ། དབང་པོ་རྣམས་རྒུད་པ་དང་ཞེས་བྱ་བའི་ཚིག་འདི་དང༌། ཉམས་པ་ཞེས་བྱ་བའི་ཚིག་འདིས་ཡིན་ཏེ་གོ་རིམས་བཞིན་ནོ། །ཉམས་པ་ནི་རྣམ་པར་ཞིག་པའོ། །འདི་ནི་རྣམ་པར་འགྱུར་བའི་རྣམ་པ་དྲུག་པ་ཡིན་ནོ། །ཚེ་རྣམ་པར་འགྱུར་བའི་མཚན་ཉིད་ཀྱང་ཡོངས་སུ་ཉམས་པའི་རྒས་པ་ཡིན་པར་སྟོན་པ་ནི་ཇི་ལྟ་ཞེ་ན། ཚེའི་འདུ་བྱེད་རྣམས་འཆི་བར་ཉེ་བར་གྱུར་པས་ཏེ། འདུ་བྱེད་རྣམས་རྙིངས་བ་ཞེས་བྱ་བའི་ཚིག་འདིས་ཡིན་ནོ། །ཡོ་བྱད་ཉུང་པར་མི་བཟོད་པས་སོ་ཞེས་བྱ་བ་ནི་ཤིན་ཏུ་རྙིངས་པར་གྱུར་པ་ཞེས་བྱ་བའི་ཚིག་འདིས་ཡིན་ནོ། །འདི་རྣམ་པར་འགྱུར་བ་རྣམ་པ་བདུན་པ་ཡིན་ནོ། །དགེ་སློང་སྐྱེ་བ་རྣམ་པ་བཞི་པོ་ཞེས་བྱ་བ་ནི་མིང་དང་གཟུགས་དང༌། སྐྱེ་མཆེད་དྲུག་
དང༌། རེག་པ་དང༌། ཚོར་བའི་མཚན་ཉིད་དོ། །ཕོངས་པ་རྣམ་པ་ལྔ་ལ་སྐྲས་ཕོངས་བ་ནི་བྱི་བ་དང་མདོག་གྱུར་པའི་ཕྱིར་རོ་ཞེས་བྱ་བ་ནི་སྤྱི་གཅེར་དང་སྐྲ་དཀར་ཞེས་བྱ་བའི་ཚིག་གཉིས་ཀྱིས་གོ་རིམས་བཞིན་དུ་བསྟན་ཏོ། །ལུས་ཕོངས་པ་ནི་དབྱིབས་དང༌། ཤ་དང་སྟོབས་དང༌། མདོག་ཕོངས་པའི་ཕྱིར་རོ་ཞེས་བྱ་བ་དེ་ལ་དབྱིབས་ཕོངས་པ་ནི་གཉེར་མ་འཚིགས་པ་ཞེས་བྱ་བ་འདིས་བསྟན་ཏོ། །ཤ་ཕོངས་པ་ནི་རྙིངས་པ་ཞེས་བྱ་བ་འདིས་སོ། །སྟོབས་ཕོངས་པ་ནི་ཞུམ་པ་ཞེས་བྱ་བ་འདིས་ཡིན་ནོ། །མདོག་ཕོངས་པ་ནི་ལུས་ལ་ནག་པོ་ཐིག་ལེས་གང་བ་ཞེས་བྱ་བའི་ཚིག་འདིས་བསྟན་ཏོ། །འདིར་ཡང་གོ་རིམས་ནི་ཞུམ་པའི་མཇུག་ཐོགས་སུ་ལུས་ལ་ནག་པོ་ཐིག་ལེས་གང་བ་དང་ཞེས་བྱ་བ་འདི་ཉིད་ཡིན་ནོ། །ལས་ཕོངས་པ་ནི་ཞེས་རྒྱས་པར་འབྱུང་བ་འདི་ལ་ཡང༌། སྨྲ་བ་ན་ལུད་པ་ལུ་པ་དང་དབུགས་རྒོད་པ་ཞེས་བྱ་བ་ལ་སོགས་པའི་ཚིག་བཞིས་ནི་ལས་ཕོངས་བསྟན་ཏེ། སྨྲ་བ་ན་ལུད་པ་ལུ་ཞིང་དབུགས་རྒོད་པའི་ལུས་ཡིན་པའི་ཕྱིར་རོ་ཞེས་བྱ་བའི་ཚིག་འདིས་ནི་ངག་གི་ལས་ཕོངས་པ་བསྟན་ཏོ། །ལངས་པ་ན་གདུང་མ་གུག་པ་བཞིན་དུ་གུག་པོར་གྱུར་པའི་ཕྱིར་རོ། །འདུག་པ་ན་ལུས་མདུན་དུ་གུག་པའི་ཕྱིར་རོ། །འགྲོ་ཕན་འཁར་བ་ལ་བརྟེན་པའི་ཕྱིར་རོ་ཞེས་བྱ་བ་ཚིག་འདི་གསུམ་གྱིས་ནི་ལུས་ཀྱི་ལས་ཕོངས་པ་བསྟན་ཏོ། །ཡིད་ཀྱི་ནི་ཞེས་བྱ་བ་ཡིད་ཕོངས་པ་ནི། ཤེས་རབ་རྨོངས་པ་དང༌། དྲན་པ་ཞན་པའི་ཡང་ཕྱིར་རོ་ཞེས་བྱ་བ་ཡིན་ཏེ། རྨོངས་པ་དང༌། ཞན་པའི་ཚིག་འདི་གཉིས་གོ་རིམས་བཞིན་ནོ། །དེ་ལྟར་ན་ལས་ཕོངས་པ་རྣམ་པ་གསུམ་ཡིན་ཏེ། ལུས་དང་ངག་དང་ཡིད་ཀྱི་ལས་ཕོངས་པའམ། ཡང་ན་ལུས་ཕོངས་པ་དང་རྣམ་པ་གཉིས་སོ། །ལོངས་སྤྱོད་ཕོངས་པ་ནི་ཞེས་རྒྱས་པར་འབྱུང་བ་ལ། བཟའ་བ་དང་བཏུང་བ་ལ་སོགས་པའི་ཡོ་བྱད་ཡོད་ལ། ལོངས་སྤྱོད་པ་ཞན་པའི་ཕྱིར་དང་ཞེས་བྱ་བ་ནི་ཉམས་པ་ཉིད་ཅེས་བྱ་བའི་ཚིག་འདིས་བསྟན་ཏོ། །རྩེད་མོ་དང་དགའ་བའི་ཡོ་བྱད་ལ་ཞེས་བྱ་བ་ནི་གཟུགས་དང་རེག་པ་ཡིད་དུ་འོང་བ་ལའོ། །ཐམས་ཅད་ནས་ཐམས་ཅད་དུ་ལོངས་མི་སྤྱོད་པའི་ཕྱིར་དང་ཞེས་བྱ་བ་ནི་ཡོངས་སུ་ཉམས་པ་དང་ཞེས་བྱ་བའི་ཚིག་འདིས་བསྟན་ཏོ། །དབང་པོ་གཟུགས་ཅན་
རྣམས་ཞེས་རྒྱས་པར་འབྱུང་བ་ནི་མིག་ལ་སོགས་པའི་དབང་པོ་གཟུགས་ཅན་རྣམས་ནི་དེ་དག་གི་ཡུལ་གཟུགས་ལ་སོགས་པ་ལ། མི་གསལ་བ་རྒྱུ་དང་མི་རྒྱུ་བའི་ཕྱིར་ཞེས་བྱ་བ་ནི་འཇུག་བ་ཞན་པ་ཉིད་དང༌། འཇུག་པ་མེད་པའི་ཕྱིར་རོ་ཞེས་བྱ་བའི་ཐ་ཚིག་སྟེ། དབང་པོ་རྒུད་པ་དང༌། ཉམས་པ་དང་ཞེས་བྱ་བའི་ཚིག་གཉིས་ཀྱིས་བསྟན་ཏེ། ལོངས་སྤྱོད་ཕོངས་པ་ཞེས་བྱ་བའི་སྐབས་དང་སྦྱར་རོ། །སྲོག་གི་དབང་པོ་ཕོངས་པ་ནི་ཚེ་ཟད་པ་དང༌། ཤི་བ་དང་ཉེ་བ་ཡིན་པའི་ཕྱིར་རོ་ཞེས་བྱ་བ་ནི་འདུ་བྱེད་རྣམས་རྙིངས་པ་དང་ཞེས་བྱ་བའི་ཚིག་འདིས་བསྟན་ཏོ། །འཆི་བའི་རྐྱེན་ཅུང་ཟད་ཙམ་ཡང་མི་བཟོད་པའི་ཕྱིར་རོ་ཞེས་བྱ་བ་ནི་ཤིན་ཏུ་རྙིངས་པ་ཞེས་བྱ་བའི་ཚིག་འདིས་བསྟན་ཏོ། །རྒས་པ་རྣམ་པར་འབྱེད་པ་རྒྱ་ཆེར་འགྲེལ་པའོ།། །།འཆི་བ་གང་ཞེ་ན་འཕོས་པ་དང༌། འཕོ་བ་ཉིད་དང་ཞེས་བྱ་བ་རྒྱས་པར་རྣམ་གྲངས་བཅུ་འབྱུང་བ་ཡིན་ནོ་ཞེས་བྱ་བ་ནི་འཕོས་པ་དང༌། འཕོས་པ་ཉིད་དང༌། ཞིག་པ་དང༌། ནང་ཉམས་པ་དང༌། ཚེ་ཉམས་པ་དང༌། དྲོད་ཉམས་པ་དང༌། སྲོག་གི་དབང་པོ་འགག་པ་དང༌། ཕུང་པོ་རྣམས་འདོར་བ་དང༌། འཆི་བ་དང་འདུ་བྱེད་པའོ་ཞེས་བྱ་བ་ཡིན་ནོ། །དེ་ལ་འཕོས་པ་ནི་སེམས་ཅན་གྱི་རིས་དེ་དང་བྲལ་བའོ་ཞེས་བྱ་བ་ནི་འདི་ལྟར་སེམས་ཅན་གྱི་རིས་ནས་འཕོས་པ་སྟེ། སྐལ་བ་འདྲ་བ་དང་བྲལ་བ་ཞེས་བྱ་བའི་ཐ་ཚིག་གོ །འཕོ་བ་ཉིད་ནི་འཆི་བའི་གནས་སྐབས་ཏེ་ཞེས་བྱ་བ་ནི་འཕོ་བའི་གནས་སྐབས་གང་ཡིན་པའོ་ཞེས་འཆད་པར་འགྱུར་བའོ། །ཞིག་པ་ནི་གཟུགས་ཀྱི་ལུས་ལས་མིང་གི་ཚོགས་འབྲལ་བའོ་ཞེས་བྱ་བ་ལ་གཟུགས་ཅན་མ་ཡིན་པའི་མིང་གི་ཚོགས་རྣམས། གཟུགས་ཀྱི་ལུས་ལས་གང་གིས་ཇི་ལྟར་འབྲེལ་ཞེ་ན། ཕན་པ་དང་གནོད་པ་གཉིས་གཅིག་ལ་གཅིག་བྱེད་པའི་མཚན་ཉིད་ཀྱི་འབྲེལ་པ་མེད་པའོ། །ནང་ཉམས་པ་ནི་མདོ་སྡེ་དེ་ཉིད་ལས། གཟུགས་ཀྱི་ལུས་ལས་དབང་པོ་གཟུགས་ཅན་རྣམས་རྒྱུན་འཆད་པའོ་ཞེས་བྱ་བ་ནི་ཤི་བའི་གཟུགས་ཀྱི་ལུས་ནི་རྒྱུའི་རྗེས་སུ་འཇུག་པ་ཡོད་ཀྱི། མིག་ལ་སོགས་པའི་དབང་པོ་གཟུགས་ཅན་ནི་ཐམས་ཅད་ནས་ཐམས་ཅད་དུ་རྒྱུན་ཆད་དོ་ཞེས་བྱའོ། །ཚེ་ཉམས་པ་དང་དྲོད་ཡལ་པ་ཞེས་བྱ་བ་གཉི་ག་ཡང་གནས་པའི་རྒྱུ་ཞེས་རྒྱས་
པར་འབྱུང་བས་འདི་གཉིས་ཀྱི་བཤད་པ་བྱས་པ་ཡིན་ནོ། །དེར་སྔོན་གྱི་འཕེན་པ་དང་ཞེས་བྱ་བ་ནི་དེའི་སྐྱེ་བ་ནི་སྔོན་གྱི་ལས་ཀྱིས་འཕངས་པའི་ཕྱིར་རོ། །དྲོད་ཉེ་བ་སྟོན་པ་ནི་ཟས་སོ། །འདུ་བྱེད་གནས་པའང་དེ་བཞིན་ནོ་ཞེས་བྱ་བ་ནི་ཚེའི་འདུ་བྱེད་གནས་པ་ཞེས་བྱ་བའི་དོན་ཏོ། །ཚིག་གཉིས་གཉིས་ཀྱིས་འཕོས་པ་དང༌། འཕོ་བ་ཉིད་ཡིན་པར་བསྟན་ཏོ་ཞེས་བྱ་བ་ནི་ཇི་སྐད་བསྟན་པའི་ཚིག་གཉིས་གཉིས་ཀྱིས་འཕོས་པ་དང་འཕོ་བ་ཉིད་བསྟན་པ་སྟེ། ཞིག་པ་དང་ནང་ཉམས་པ་ཞེས་བྱ་བའི་ཚིག་འདི་གཉིས་ཀྱིས་ནི་གཟུགས་ཀྱི་ལུས་ལས་མིང་གི་ཚོགས་འབྲལ་བ་དང༌། དེ་ལས་ཀྱང་དབང་པོ་གཟུགས་ཅན་རྣམས་རྒྱུན་ཆད་པར་གྱུར་ན་འཕོས་པ་ཡིན་ཏེ། སྐལ་བ་འདྲ་བ་དེ་དང་བྲལ་བའི་ཕྱིར་རོ། །འཕོ་བ་ཉིད་ཀྱང་ཚེ་ཉམས་པ་དང༌། དྲོད་ཡལ་བ་ཞེས་བྱ་བའི་ཚིག་འདི་གཉིས་ཀྱིས་བསྟན་ཏེ། འདི་གཉིས་ཀྱིས་དེ་ཡོངས་སུ་ཉམས་པར་འགྱུར་བའི་གནས་སྐབས་ནི་འཕོ་བ་ཉིད་ཅེས་བྱའོ། །དེ་ལྟར་ན་རེ་ཞིག་ཚེ་ཟད་པ་རིམ་གྱིས་ཤི་བ་གང་ཡིན་པ་དང་ཞེས་རྒྱས་པར་འབྱུང་བ་ནི་དེ་ལྟར་ན་རེ་ཞིག་ཇི་སྐད་དུ་བསྟན་པའི་ཚེ་ཟད་པ་རིམ་གྱིས་ཤི་བ་གང་ཡིན་པ་དང༌། འཆི་བའི་གནས་སྐབས་གང་ཡིན་པ་ཤི་བ་དང་འཆི་བ་དེ་གཉི་ག་ཤི་བ་ཡིན་པར་བསྟན་པ་ནི་ཚིག་གཉིས་གཉིས་ཤི་བ་དང༌། འཆི་བ་ཉིད་ཡིན་པར་བསྟན་པའི་ཕྱིར་རོ། །གང་ཡང་ཚེའི་ལྷག་མ་ལུས་པ་དེ་ནི་གློ་བུར་དུ་འཆི་བ་སྟེ་ཞེས་རྒྱས་པར་འབྱུང་བ་ལ། གློ་བུར་དུ་འཆི་བ་ཞེས་བྱ་བ་ནི་ཅིག་ཅར་ཡིན་གྱི་རིམ་གྱིས་མ་ཡིན་པའོ། །མདོར་བསྟན་པ་ཇི་ལྟར་ཡིན་ཞེ་ན། སྲོག་གི་དབང་པོ་འགག་པ་དང༌། སྲོག་གི་དབང་པོ་དང་ལྡན་པ་ཡང་ཕུང་པོ་རྣམས་འདོར་བ་དང༌། འཆི་བ་ཞེས་བྱ་བ་ཡིན་ཏེ་ཞེས་བྱ་བ་ཡིན་ནོ། །རིས་མཐུན་པར་སྐལ་པ་འདྲ་བའི་ཕུང་པོ་གཏོང་བ་ནི་དེ་འདོར་བ་ཡིན་ནོ། །དེས་ནི་ཞེས་བྱ་བ་དུས་བྱེད་པ་བསྟན་པ་དེས། སྔོན་གྱི་ལས་ཀྱིས་འཕངས་པ་ཞེས་རྒྱས་པར་འབྱུང་བ་ཡིན་ནོ། །དང་པོའི་བྱེ་བྲག་རྣམ་པར་འབྱེད་པ་ལས་ཞེས་རྒྱས་པར་འབྱུང་བ་ལ། སྐྱེ་བའི་མཚན་ཉིད་རྣམ་པ་བཞི་པོ་ནི་མིང་དང༌། གཟུགས་དང༌། སྐྱེ་མཆེད་དྲུག་དང༌། རེག་པ་དང༌། ཚོར་བའི་རྣམ་པ་ཞེས་བྱ་བའི་དོན་ཏོ། །འཆི་བའི་རབ་ཏུ་དབྱེ་བ་རྣམ་པ་དྲུག་ཡིན་པར་རིག་པར་བྱ་སྟེ་ཞེས་བྱ་བ་ནི་དྲུག་ནི་ཤི་བའི་རབ་ཏུ་དབྱེ་བ་
ཡིན་ནོ་ཞེས་བྱ་བའི་དོན་ཏོ། །རྫོགས་པར་ཤི་བ་དང་ཞེས་བྱ་བ་ནི་ཤི་བ་ཡིན་ཏེ། རིས་མཐུན་པའི་སྐལ་པ་འདྲ་བ་དང་བྲལ་བ་ཡོད་ན་ལྷག་མ་མ་ལུས་པར་ཤི་བ་ཡིན་གྱི། ལྷག་མ་དང་བཅས་པ་མ་ཡིན་ནོ། །མ་རྫོགས་པར་ཤི་བ་དང་ཞེས་བྱ་བ་ནི་འཆི་བ་ཉིད་ཡིན་ཏེ། ལྷག་མ་དང་བཅས་པའི་འཆི་བ་ཡིན་བའི་ཕྱིར་རོ། །ཤི་བའི་རང་གི་མཚན་ཉིད་ནི་ཞེས་བྱ་བ་ནི་ཞིག་པ་དང་ནང་ཉམས་པ་ཞེས་བྱ་བ་ཡིན་ཏེ། དེ་དག་ནི་ཤི་བའི་མཚན་ཉིད་ཡིན་ཏེ། འདི་ལྟ་སྟེ་གཟུགས་ཀྱི་ལུས་ལས་མིང་གི་ཚོགས་འབྲལ་བ་དང༌། དེར་ཡང་དབང་པོ་གཟུགས་ཅན་རྣམས་རྒྱུན་ཆད་པ་ཡིན་པས་ཞེས་བྱ་བའི་དོན་ཏོ། །མ་རྫོགས་པར་འཆི་བ་རྣམ་པར་དབྱེ་བ་དང་ཞེས་བྱ་བ་ནི་ཚེ་ཉམས་པ་དང༌། དྲོད་ཉམས་པ་ཞེས་བྱ་བའི་ཚིག་གཉིས་ཀྱིས་མ་རྫོགས་པར་འཆི་བའི་མཚན་ཡིད་འཕོ་བ་ཉིད་ཅེས་བྱ་བ་རྣམ་པར་ཕྱེ་བ་ཡིན་ནོ། །རྫོགས་པར་ཤི་བ་རྣམ་པར་དབྱེ་བ་དང་ཞེས་བྱ་བ་ནི་སྲོག་གི་དབང་པོ་འགག་པ་དང༌། ཕུང་པོ་རྣམས་འདོར་བ་ཞེས་བྱ་བ་འདི་གཉིས་ཀྱིས་རྫོགས་པར་ཤི་བའི་མཚན་ཉིད་ཤི་བ་ཞེས་བྱ་བ་རྣམ་པར་ཕྱེ་བ་ཡིན་ནོ། །དུས་མ་ཡིན་པ་དང༌། དུས་སུ་ཤི་བའོ་ཞེས་བྱ་བ་ནི་ཤི་བ་དང་དུས་བྱེད་པ་ཞེས་བྱ་བ་དང་གོ་རིམས་བཞིན་ཏེ། དུས་མ་ཡིན་པར་འཆི་བ་ནི་ཉེ་བར་འཆི་བར་བྱེད་པའོ། །དུས་སུ་ཤི་བ་ནི་དུས་བྱེད་པ་སྟེ་དུས་རྫོགས་སོ་ཞེས་བྱ་བའི་དོན་ཏོ། །བསྟན་པ་ལས་ཅིའི་ཕྱིར་མྱ་ངན་ལ་སོགས་པ་གསུངས་ལ་ཞེས་རྒྱས་པར་འབྱུང་བ་ནི་བསྟན་པ་ལས་ནི་མྱ་ངན་ལ་སོགས་པ་གསུངས་ཏེ། སྐྱེ་བའི་རྐྱེན་གྱིས་རྒ་ཤི་དང༌། མྱ་ངན་དང༌། སྨྲེ་སྔགས་འདོན་པ་དང༌། སྡུག་བསྔལ་བ་དང༌། ཡིད་མི་བདེ་བ་དང༌། འཁྲུག་པ་རྣམས་འབྱུང་ངོ་ཞེས་བྱ་བ་ཡིན་ནོ། །རྣམ་པར་འབྱེད་པ་ལས་ནི་མ་ཕྱེ་ཞེས་བྱ་བ་ནི། མྱ་ངན་ལ་སོགས་པ་ལས་བརྩམས་ནས་མྱ་ངན་ལ་སོགས་པ་བསྟན་པ་ཡོད་པ་མ་ཡིན་ནོ་ཞེན་དེའི་ཕྱིར་རྒ་ཤི་ནི་སྲིད་པའི་ཡན་ལག་ཉིད་དུ་བརྗོད་པར་བཞེད་པའི་ཕྱིར་རོ་ཞེས་སྨྲས་ཏེ། སྲིད་པའི་ཡན་ལག་རྣམ་པར་དབྱེ་ན་རྒ་ཤི་ནི་དངོས་སུ་སྲིད་པའི་ཡན་ལག་ཉིད་ཡིན་པར་བཞེད་ཀྱི་མྱ་ངན་ལ་སོགས་པ་ནི་མ་ཡིན་ནོ། །དེ་བས་ན་མྱ་ངན་ལ་སོགས་པ་ནི་རྣམ་པར་མ་ཕྱེ་བའོ། །སྲིད་པའི་ཡན་ལག་ཉིད་དུ་བརྗོད་པར་བཞེད་
པ་ཡང་མ་ཡིན་ནོ། །འདི་ལ་ཁུངས་ཅི་ཡོད་ཅེ་ན། དེའི་ཕྱིར་འདི་ལྟར་རྟེན་ཅིང་འབྲེལ་པར་འབྱུང་བའི་ཆོས་རྣམས་གང་ཞེ་ན་ཞེས་རྒྱས་པར་སྨྲས་ཏེ། འདི་ལྟར་རྟེན་ཅིང་འབྲེལ་པར་འབྱུང་བའི་ཆོས་རྣམས་གང་ཞེ་ན། དེར་གཏོགས་པ། རྒ་ཤིའི་བར་དུ་ཡིན་ནོ་ཞེས་མདོ་སྡེ་གཞན་ལས་གསུངས་ཀྱི་མྱ་ངན་ལ་སོགས་པ་ནི་མི་ཡིན་ནོ། །ཅི་ཞེ་ན། རྟེན་ཅིང་འབྲེལ་པར་འབྱུང་བར་སྨྲས་པའོ། །ལུགས་ལས་བཟློག་པ་བརྟག་པའི་ཚེ་ཡང་ཞེས་རྒྱས་པར་འབྱུང་བ་སྟེ། མྱ་ངན་ལ་སོགས་པ་ནི་མ་ཡིན་ནོ་ཞེས་བྱ་བ་ཅི་ཞིག་ཡོད་ཅེ་ན། གང་ཞིག་མེད་ན་མྱ་ངན་ལ་སོགས་པ་མི་འབྱུང་བར་གསུངས་པའོ། །ཡིན་ན་ནི་སྲིད་པའི་ཡན་ལག་ཏུ་བརྗོད་པར་ཡང་བཞེད་དེ་མ་རིག་པ་ལ་སོགས་པ་བཞིན་དུ་རྟེན་ཅིང་འབྲེལ་པར་འབྱུང་བའི་ཆོས་ཡིན་པར་བརྗོད་པར་བྱ་དགོས་པར་འགྱུར་བ་དང༌། གང་ཞིག་མེད་ན་མྱ་ངན་ལ་སོགས་པ་མེད་པར་འགྱུར་ཞེས་བྱ་བ་ཡང་བརྗོད་པར་བྱ་དགོས་པར་འགྱུར་རོ། །འོ་ན་ཅི་དེ་དག་ཁས་མི་ལེན་ཏམ་ཞེས་བྱ་བ་ནི་མྱ་ངན་ལ་སོགས་པ་དེ་དག་སྲིད་པའི་ཡན་ལག་ཡིན་པར་ཅིའི་ཕྱིར་ཁས་མི་ལེན་ཅེས་བྱ་བའི་དོན་ཏོ། །དེ་ལ་གོ་རིམས་མ་ངེས་པའི་ཕྱིར་དང་གཅིག་ཏུ་ཆད་པ་མེད་པའི་ཕྱིར་རོ་ཞེས་སྨྲས་སོ། །དེ་དག་ལ་གོ་རིམས་ནི་ཡོད་པ་མ་ཡིན་ཏེ་ཞེས་རྒྱས་པར་འབྱུང་བ་ནི་གནས་སྐབས་ངེས་པ་ཡིན་ནི་འདིར་སྲིད་པའི་ཡན་ལག་ཏུ་བརྗོད་པར་བཞེད་ཀྱི། གནས་སྐབས་མ་ངེས་པ་མ་ཡིན་ནོ། །གདོན་མི་ཟ་པར་འབྱུང་བ་ཡིན་ན་ནི་དེའི་ཕྱིར་མ་རིག་པ་ལ་སོགས་པ་བཞིན་དུ་སྲིད་པའི་ཡན་ལག་ཏུ་ཡང་བྱས་པར་འགྱུར་རོ། །འདུས་བྱས་ཀྱི་མཚན་ཉིད་ཡིན་པའི་ཕྱིར་རོ་ཞེས་བྱ་བ་ནི་རྒ་བ་དང་ཤི་བ་གཉིས་སོ། །ཇི་ལྟ་ཞེ་ན། དེའི་ཕྱིར། འབྱུང་བ་ནི་སྐྱེ་བ་ཡིན་ནོ། །འཇིག་པ་ནི་ཤི་བ་ཡིན་ནོ། །གནས་པ་གཞན་དུ་འགྱུར་བ་ཉིད་ནི་རྒ་བ་ཡིན་ནོ་ཞེས་སྨྲས་སོ། །སྐད་ཅིག་མ་གཅིག་ཡིན་པའི་ཕྱིར་འདུས་བྱས་ལ་གནས་པ་གཞན་དུ་འགྱུར་བ་ཡོད་པ་མ་ཡིན་ནོ་ཞེ་ན། དེའི་ཕྱིར་གནས་པ་ཞེས་བྱ་བ་ནི་རྒྱུན་ཡིན་པར་སྟོན་ཏེ། རྒྱུན་གྱི་མཚན་ཉིད་གནས་པ་དེའི་སྔ་ཕྱིའི་བྱེ་བྲག་ནི་གཞན་དུ་འགྱུར་བ་ཉིད་ཡིན་ནོ་ཞེས་སྨྲས་སོ། །ཀུན་རྫོགས་པ་ལ་ཡོངས་སུ་ཉམས་པའི་དགའ་བ་ཡོད་པར་མདོ་སྡེ་འདི་ལས་བསྟན་ཏོ་ཞེས་བྱ་བ་ནི་རྟེན་ཅིང་འབྲེལ་པར་འབྱུང་བའི་མདོ་སྡེ་འདི་ལས་གང་དེའི་སྤྱི་གཅེར་དང༌། སྐྲ་དཀར་ཞེས་རྒྱས་པར་འགྱུར་བ་ཡིན་ནོ། །གལ་ཏེ་
གནས་པ་གཞན་དུ་འགྱུར་བ་རྒ་བ་ཡིན་ན་ཅིའི་ཕྱིར་སྐྱེ་བ་དང་འཇིག་པ་གཉིས་ཀྱི་བར་དུ་བསྟན། ཇི་ལྟ་ཞེ་ན། སྐྱེ་བའི་རྐྱེན་གྱིས་རྒ་ཤི་ཞེས་བྱ་བ་ཡིན་ནོ། །ཐ་མར་ཅིའི་ཕྱིར་མ་བསྟན། མདོ་སྡེ་ལས་ནི་གནས་པ་གཞན་དུ་འགྱུར་བ་ཐ་མར་ཡང་བསྟན་ཏེ། དགེ་སློང་དག་འདུས་བྱས་ཀྱི་སྐྱེ་བ་ཡང་སྣང་འཇིག་པ་དང་གནས་པ་གཞན་དུ་འགྱུར་བ་ཡང་སྣང་ངོ་ཞེས་འབྱུང་ངོ་ཞེ་ན། འདི་ཉིད་གོ་རིམས་ཡིན་ནོ། །ཇི་ལྟ་ཞེ་ན། དང་པོར་སྐྱེའོ། །དེ་ནས་རྒས་སོ། །དེ་ནས་ཤིའོ་ཞེས་བྱ་བ་ཡིན་ནོ། །འདུས་བྱས་ཀྱི་མཚན་ཉིད་ལས་ཅིའི་ཕྱིར་དེ་ལྟར་མ་ཡིན་ཞེན་ཞེས་བྱ་བ་ནི་འདི་ལྟར་རྟེན་ཅིང་འབྲེལ་པར་འབྱུང་བའི་མདོ་སྡེ་ལས་འདུས་བྱས་ཀྱི་མཚན་ཉིད་གང་དག་ཡིན་པ་ལས་གནས་པ་གཞན་དུ་འགྱུར་བ་ཐ་མར་བསྟན་ཏོ་ཞེ་ན། སྐྱེ་བ་དང་འཇིག་པའི་བྱེ་བྲག་ཉིད་ཅེས་རྒྱས་པར་བྱུང་བ་ལ། བྱེ་བྲག་སྨོས་པ་ནི་རྒྱུན་བསྟན་པའི་ཕྱིར་ཏེ། སྐྱེ་བ་དང་འཇིག་པ་དེ་གཉིས་ཀྱི་རྒྱུན་ཉིད་གནས་པ་གཞན་དུ་གྱུར་པ་ཡིན་ནོ་ཞེས་བསྟན་པའི་ཕྱིར་རོ། །འདུས་བྱས་ཀྱི་མཚན་ཉིད་ཀྱི་མདོ་སྡེ་ལས་ནི་གོ་རིམས་དེ་ལྟར་མ་ཡིན་ནོ། །གཞན་ཡང་གཉིས་ཀྱིས་ནི་སྔ་ན་མེད་པ་དང་ཞེས་རྒྱས་པར་འབྱུང་བ་ལ། འདུས་བྱས་ཀྱི་མཚན་ཉིད་གཉིས་ཀྱིས་ནི་སྔ་ན་མེད་པ་དང་ཞིགས་ནས་མེད་པའི་མི་རྟག་པ་ཉིད་སྟོན་ཏོ། །སྐྱེ་བས་ནི་སྔ་ན་མེད་པའི་མི་རྟག་པའོ། །འཇིག་པས་ནི་ཞིགས་ནས་མེད་པའི་མི་རྟག་པའོ། །གསུམ་པ་གནས་པ་གཞན་དུ་འགྱུར་བ་གཅིག་གིས་ནི་དངོས་པོ་རྣམ་པར་འགྱུར་བའི་མི་རྟག་པ་སྟོན་པ་ཡིན་ནོ། །དེ་ལྟར་དངོས་པོ་མེད་པའི་མཚན་ཉིད་མི་རྟག་པ་སྔར་བསྟན་ནས། གསུམ་པ་དངོས་པོ་རྣམ་པར་འགྱུར་བའི་མཚན་ཉིད་མི་རྟག་པ་ཕྱི་ནས་ཡིན་ཏེ། དེ་ལས་ནི་གོ་རིམས་དེ་ལྟ་བུ་ཡིན་ནོ། །ལོག་པར་ཅལ་ཅོལ་སྨྲ་བའི་རྒྱུ་རྣམ་པར་རྟོག་པ་ནི་མྱ་ངན་ཡིན་ནོ་ཞེས་བྱ་བ་འདི་ལ་ལོག་པར་ཅལ་ཅོལ་སྨྲ་བ་ནི་མ་འབྲེལ་བར་སྨྲ་བ་ཡིན་པར་རིག་པར་བྱའོ། །ལོག་པར་ཅལ་ཅོལ་སྨྲ་བ་ཡང་མྱ་ངན་གྱིས་བསྐྱེད་པ་ཡིན་ཏེ། རྣམ་པར་བརྟགས་ཤིང་དཔྱད་ནས་ཚིག་སྨྲ་བ་ཡིན་གྱི། མ་བརྟགས་མ་དཔྱད་པར་མ་ཡིན་ནོ་ཞེས་བྱ་བ་ཡིན་པས་ལོག་བར་ཅལ་ཅོལ་སྨྲ་བའི་རྒྱུ་རྣམ་པར་རྟོག་པ་ནི་མྱ་ངན་ནོ་ཞེས་བསྟན་ཏེ། མི་སྡུག་པ་
དང་ཕྲད་ན་ལུས་ཀྱིས་མི་འདོད་པ་སྡུག་བསྔལ་མྱོང་བ་ནི་སྡུག་བསྔལ་ཡིན་ནོ་ཞེས་བྱ་བ་ལ་མི་འདོད་པ་སྨོས་པ་ནི་བདེ་བ་ལས་བྱེ་བྲག་ཏུ་དབྱེ་བའི་ཕྱིར་ཏེ། དེ་ཡང་ལུས་ཀྱི་ཡིན་པའི་ཕྱིར་རོ། །སེམས་ལས་བྱུང་བ་ནི་ཡིད་མི་བདེ་བ་ཡིན་ནོ་ཞེས་བྱ་བ་ནི་མི་བདེ་བ་མྱོང་བ་ཞེས་བྱ་བའི་སྐབས་དང་སྦྱར་རོ། །སྡུག་བ་དང་བྲལ་བ་ཉིད་བྲང་རྡུང་བ་ལ་སོགས་པས་ཞེས་རྒྱས་པར་འབྱུང་བ་ནི་མྱ་ངན་ལ་སོགས་པ་ནི་སྡུག་པ་དང་བྲལ་བ་སྔོན་དུ་སོང་བ་ཅན་ཉིད་ཡིན་པར་འདིས་སྟོན་པར་བྱེད་པ་ཡིན་གྱི། མི་སྡུག་པ་དང་ཕྲད་པ་སྔོན་དུ་སོང་བ་ཅན་མ་ཡིན་ནོ། །དེ་ལྟར་བྱས་ན་མདོ་སྡེ་གཞན་ལས་ཞེས་རྒྱས་པར་འབྱུང་བ་ནི་སྡུག་བསྔལ་ལ་སོགས་པ་ནི་སྡུག་བ་དང་བྲལ་བ་སྔོན་དུ་སོང་བ་ཅན་ཉིད་ཡིན་པར་འདིས་སྟོན་པར་བྱེད་པ་ཡིན་གྱི། མི་སྡུག་པ་དང་ཕྲད་པ་སྔོན་དུ་སོང་བ་ཅན་མ་ཡིན་ནོ། །དེ་ལྟར་བྱས་ན་མདོ་སྡེ་གཞན་ལས་ཞེས་རྒྱས་པར་འབྱུང་བ་ནི་སྡུག་བསྔལ་ལ་སོགས་པ་ནི། སྡུག་པ་དང་བྲལ་བ་སྔོན་དུ་སོང་བ་ཅན་ཉིད་ཡིན་པར་ཇི་ལྟར་བརྗོད་པ་དེ་ལྟར་བྱས་པ་དང༌། ཇི་ལྟར་ཡང་ཐོག་མར་རྣམ་གྲངས་ཀྱིས་མྱ་ངན་གྱི་མཚན་ཉིད་བསྟན་པ་དེ་ལྟར་བྱས་ནས་མདོ་སྡེ་གཞན་ལས་གང་སྡུག་པའི་རིགས་ཅན་གྱི་སྡུག་པས་རབ་ཏུ་ཕྱེ་བའི་མྱ་ངན་དང༌། སྨྲེ་སྔགས་འདོན་པ་དང༌། སྡུག་བསྔལ་བ་དང༌། ཡིད་མི་བདེ་བ་དང༌། འཁྲུག་པ་རྣམས་འབྱུང་བར་འགྱུར་རོ་ཞེས་གང་གསུངས་པ་དེ་རིགས་པ་ཡིན་ནོ། །རྣམ་གྲངས་གཉིས་པ་ལ་ཡང་མི་སྡུག་པ་དང་ཕྲད་པས་རབ་ཏུ་ཕྱེ་བ་ནི་སྡུག་བསྔལ་ལ་སོགས་པ་ཡིན་ནོ་ཞེས་འབྱུང་བ་དེ་དང་ནི་རྗེས་སུ་མཐུན་པ་མ་ཡིན་ནོ། །འོ་ན་མི་སྡུག་པ་དང་ཕྲད་པ་འདི་སྡུག་བསྔལ་ཡིན་པར་གསུངས་སོ་ཞེ་ན། བདེན་ཏེ་མི་སྡུག་པ་དང་ཕྲད་པ་ནི་སྡུག་བསྔལ་གྱི་རྒྱུ་ཡིན་པས་སོ། །འདིར་ནི་སྔར་མྱ་ངན་དང་སྨྲེ་སྔགས་འདོན་པ་གཉིས་སྡུག་པ་དང་བྲལ་བ་སྔོན་དུ་སོང་བ་ཅན་ཉིད་ཡིན་པར་བསྟན་ལ། མྱ་ངན་ལ་སོགས་པ་ཐམས་ཅད་ཀྱང་སྡུག་པའི་རིགས་ཅན་ཡིན་པར་བསྟན་ཏེ། དེ་བས་ན་སྡུག་བསྔལ་ལ་སོགས་པ་ནི་མི་སྡུག་པ་དང་ཕྲད་པ་དང་སྔོན་དུ་སོང་བ་ཉིད་ཡིན་པར་བསྟན་པ་མ་ཡིན་ནོ། །སྡུག་པ་དང་བྲལ་བར་བྱེད་པ་ཡོད་པ་ནི་མྱ་ངན་ལ་སོགས་པའི་ཚོགས་རྣམས་ཏེ་དེ་ལས་སྡུག་པའི་རིགས་ཅན་ཞེས་གསུངས་
ལ། རྟེན་ཅིང་འབྲེལ་བར་འབྱུང་བའི་མདོ་སྡེ་འདི་ལས་ཀྱང་མྱ་ངན་ལ་སོགས་པའི་ཚོགས་དེ་ཡང་སྡུག་བ་དང་བྲལ་བ་དང་གཅིག་ཏུ་བྱས་ནས་མྱ་ངན་ལ་སོགས་པའི་དབང་དུ་བྱ་སྟེ་སྡུག་པའི་རིགས་ཅན་ཞེས་གང་གསུངས་པ་དེ་ནི་རིགས་པ་ཡིན་གྱི། གཞན་དུ་མ་ཡིན་ནོ། འདིར་ཉིད་མཚམས་སྦྱོར་བའི་སྐད་ཅིག་མ་དང་པོ་ཁོ་ན་སྐྱེ་བ་ཡིན་ནོ་ཞེས་དེ་སྐད་གསུངས་པ་ནི་མ་ཡིན་ནོ། །ཇི་ལྟར་ཡིན་པར་བྱས་ཤེ་ན། སྐྱེ་བ་རྣམ་པར་འབྱེད་པ་ལས་སྲིད་པའི་རྐྱེན་གྱིས་སྐྱེ་བ་ཞེས་བྱ་བ་ནི་སྐྱེས་ནས་ཚེ་ཡོངས་སུ་མ་རྫོགས་པ་བསྡུས་པ་ཡིན་ནོ་ཞེས་དེ་ལྟར་བྱས་པ་ཡིན་ནོ། །དེའི་ཕྱིར་སྐྱེ་པའི་རྐྱེན་གྱིས་རྒ་ཤི་ཡིན་དུ་ཟིན་ཀྱང་སྐྱེས་པ་ཙམ་ཁོ་ན་ནི་རྒས་པར་བྱ་དགོས་པ་དང་འཆི་བར་བྱ་དགོས་པ་ནི་མ་ཡིན་ནོ། །ཇི་ལྟར་ནུར་ནུར་པོ་ལ་སོགས་པའི་རྐྱེན་གྱིས་ནར་ནར་པོ་ལ་སོགས་པ་ཡིན་ནོ་ཞེས་རྒྱས་པར་འབྱུང་བ་དེ་དག་གིས་ནི་ནམ་ཡང་རུང༌། རྒ་ཤི་ནི་སྐྱེ་བའི་རྐྱེན་གྱིས་ཡིན་ནོ་ཞེས་ངེས་པར་གཟུང་བར་བྱ་བ་ཡིན་ཏེ། སྐྱེས་མ་ཐག་ཏུ་ནི་མ་ཡིན་ནོ་ཞེས་སྟོན་ཏོ། །དཔེ་སྔར་བསྟན་པ་ཡིན་ནོ་ཞེས་བྱ་བ་ནི་མིང་དང་གཟུགས་ཀྱི་ཡན་ལག་རྣམ་པར་འབྱེད་པ་ལ་སོགས་སོ། །ལམ་གྱིས་དུབ་པ་དང༌། ནད་དང་མྱ་ངན་དང༌། ཡ་ང་བ་མ་སྤངས་པ་དང༌། གཞན་གྱིས་བྱས་པ་དག་གིས་ཤིན་ཏུ་མྱུར་བར་རྒས་པ་དང་ཤི་བ་ཞེས་བྱ་བ་ཡིན་ནོ། །གལ་ཏེ་སྐྱེ་བ་ཁོ་ན་རྒ་ཤིའི་རྐྱེན་ཡིན་ན་ནི་ལམ་གྱིས་དུབ་པ་ལ་སོགས་པ་དེ་དག་ཁོ་ནས་ཤིན་ཏུ་མྱུར་བར་རྒས་ཤིང་ཤི་བར་མི་འགྱུར་བར་ཐལ་བར་འགྱུར་རོ། །འོན་ཏེ་རྒ་ཤི་ཁོ་ནའི་རྐྱེན་སྐྱེ་བ་ཡིན་ན་ནི་ཞེས་རྒྱས་པར་འབྱུང་བ་ལ། སྐྱེ་བས་བྱེ་བྲག་ཏུ་བྱས་པ་གཞན་ཀུན་ནས་ཉོན་མོངས་པ་དང༌། རྣམ་པར་བྱང་བའི་ཆོས་ཀུན་དུ་འབྱུང་བ་མེད་པར་ཐལ་བར་འགྱུར་བ་དང་ཞེས་བྱ་བ་ལ། སྐྱེ་བས་བྱེ་བྲག་ཏུ་བྱས་པ་སྨོས་པ་ནི་རིགས་ཐ་དད་པ་ཀུན་ནས་ཉོན་མོངས་པའི་ཆོས་ཁ་ཅིག་ཀུན་དུ་འབྱུང་བ་ཡང་གཏོགས་པ་དང༌། ལན་འགའ་ཆོས་མ་ཡིན་པ་ཁ་ཅིག་ཀུན་དུ་འབྱུང་བ་ཡང་གཏོགས་པ་དང༌། ཀུན་ནས་ཉོན་མོངས་པ་དང་རྣམ་པར་བྱང་བའི་ཆོས་ཁ་ཅིག་ཀུན་དུ་འབྱུང་བའང་གཏོགས་པ་དག་མེད་པར་ཐལ་བར་འགྱུར་བ་དང༌། བདེ་བ་དང༌། ཚོར་བ་བར་མ་དང་མྱ་ངན་ལ་སོགས་
པ་སྐྱེ་བས་བྱེ་བྲག་ཏུ་བྱས་པ་ཡང་མད་པར་ཐལ་བར་འགྱུར་རོ་ཞེས་བྱ་བའི་སྐབས་དང་སྦྱར་རོ། །དེ་ལ་ཚོར་བ་བར་མ་ནི་སྡུག་བསྔལ་ཡང་མ་ཡིན་བདེ་བ་ཡང་མ་ཡིན་པའོ། །མྱ་ངན་ལ་སོགས་པ་ནི་མྱ་ངན་དང༌། སྨྲེ་སྔགས་འདོན་པ་དང༌། སྡུག་བསྔལ་བ་དང༌། ཡིད་མི་བདེ་བ་དང༌། འཁྲུག་པ་རྣམས་སོ། །མ་སྐྱེས་པ་ལ་རྒ་ཤི་མེད་པའི་ཕྱིར་དང་ཞེས་བྱ་བ་ནི་རྒ་ཤི་གཉིས་ནི་འདུས་བྱས་ཀྱི་མཚན་ཉིད་ཡིན་པའི་ཕྱིར་མ་སྐྱེས་པ་ལ་རྒ་ཤི་ཡོད་པ་མ་ཡིན་ནོ། །ལམ་གྱིས་དུབ་པ་ལ་སོགས་པ་མེད་པར་ཡང་ཡོད་པའི་ཕྱིར་རོ་ཞེས་བྱ་བ་ནི་རྒ་ཤིའོ། །འདི་ནི་རྟེན་ཅིང་འབྲེལ་པར་འབྱུང་བ་རྣམ་པར་འབྱེད་པ་ཡིན་ནོ་ཞེས་བྱ་བ་ནི་རྟེན་ཅིང་འབྲེལ་པར་འབྱུང་བའི་ཡན་ལག་རྣམ་པར་འབྱེད་པ་རྫོགས་པར་སྟོན་པ་ཡིན་ནོ། །ཆོས་བརྟགས་པ་ཡིན་པའི་ཕྱིར་རྟེན་ཅིང་འབྲེལ་པར་འབྱུང་བའི་ཡན་ལག་ཡོངས་སུ་རྫོགས་པར་བསྟན་མི་ནུས་ཤེ་ན། དེའི་ཕྱིར་དེའི་ཡན་ལག་རྣམ་པར་འབྱེད་པ་རྫོགས་པར་སྟོན་པ་ཡིན་ནོ་ཞེས་སྨྲས་སོ། །དགེ་སློང་དག་རྟེན་ཅིང་འབྲེལ་པར་འབྱུང་བའི་དང་པོ་དང་རྣམ་པར་འབྱེད་པ་བཤད་པར་བྱའོ་ཞེས་ངས་སྨྲས་པ་གང་ཡིན་པ་དེའི་ཆེད་དུ་ངས་སྨྲས་པ་འདི་དག་ཡིན་ནོ་ཞེས་བྱ་བ་ནི་འདི་དག་སོ་སོ་དང༌། དེ་དག་གི་ཆེད་དུ་དང༌། དེ་དག་གི་དབང་དུ་བྱས་ཏེ། དེ་ལྟ་བུ་ཞེས་བྱ་བ་ནི་རྣམ་པར་འབྱེད་པའི་དབང་དུ་བྱས་ཏེ། དེ་དག་ངས་སྨྲས་སོ་ཞེས་བྱ་བའི་དོན་ཏོ། །དེ་དག་གིས་ནི་ཞེས་རྒྱས་པར་འབྱུང་བ་ལ། དེ་དག་གིས་ནི་ཞེས་བྱ་བ་ནི་ངས་སྨྲས་པ་གང་ཡིན་པ་དེའི་ཆེད་དུ་ཁོ་བོས་སྨྲས་པ་འདི་དག་ཡིན་ནོ་ཞེས་བསྟན་པ་དེ་དག་གིས་སོ། །སྔར་དོན་དང་ཡི་གེ་ཐུགས་སུ་ཆུད་པ་ཉིད་དེ་དང་ཞེས་བྱ་བ་ལ་སྔར་ཐུགས་སུ་ཆུད་པ་ནི་དོན་དང་ཡི་གེ་གཉིས་ཏེ། དེ་གང་ལ་ཡོད་པ་འདི་ནི་སྔར་དོན་དང་ཡི་གེ་ཐུགས་སུ་ཆུད་པ་ཉིད་དོ། །དེ་དང་ཞེས་བྱ་བ་སྔར་དོན་དང་ཡི་གེ་ཐུགས་སུ་ཆུད་པ་ཉིད་དེ་དང་ཤིན་ཏུ་ལྷན་ཏེ་བརྗོད་པ་དེ་ནི་བདག་ཉིད་ཡིན་ནོ་ཞེས་སྟོན་ཏོ། །དྲན་པ་ཉེ་བར་གནས་བ་དང་ལྷན་ཏེ་རྣམ་པར་བལྟས་ནས་བརྗོད་པའི་ངང་ཚུལ་ཅན་གང་ཡིན་པ་དེ་ནི་ཤིན་ཏུ་ལྷན་ཏེ་བརྗོད་པའོ། །དེའི་དངོས་པོ་ནི་ཤིན་ཏུ་ལྷན་ཏེ་བརྗོད་པ་ཉིད་དོ། །ཤིན་ཏུ་ལྷན་ཏེ་བརྗོད་པ་དེ་ནི་བདག་ཡིན་པར་སྟོན་པ་ཡིན་ཏེ། མི་ལྡན་པས་དེ་དག་བརྗོད་པ་ནི་མ་ཡིན་ནོ། །རང་གི་ཡོན་ཏན་བརྗོད་པ་ནི་
གདུལ་བྱ་རྣམས་ལ་དགོས་པ་བསྟན་པར་བྱ་བའི་ཕྱིར་རོ། །ཇི་སྐད་དུ། རྫུ་འཕྲུལ་སེང་གེའི་སྒྲ་སྒྲོགས་ཤིང༌། །རང་གི་ཡོན་ཏན་རྗོད་བྱེད་གང༌། །ཇི་སྲིད་དེ་འདོད་ཉེར་སྤྱོད་པའི། །ཐུགས་རྗེས་དབང་གིས་བྱུང་བ་ཡིན། །ཞེས་བསྟན་ཏོ། །རྒས་པའི་བསྡུས་པའི་དོན་རྣམ། པར་གཞག་པ་ནི་རྣམ་པ་ལྔར་འདིར་བསྟན་ཏེ། རབ་ཏུ་དབྱེ་བ་རྣམ་པར་གཞག་པ་ནི་ཇི་སྐད་དུ། གང་དེའི་སྤྱི་ཅེར་དང༌། སྐྲ་དཀར་དང་ཞེས་རྒྱས་པར་བསྟན་པ་ཡིན་ནོ། །རང་གི་མཚན་ཉིད་རྣམ་པར་གཞག་པ་ནི་ཇི་སྐད་དུ། ཡོངས་སུ་འགྱུར་བའི་མཚན་ཉིད་ཡོངས་སུ་ཉམས་པའི་རྒས་པ་ཡིན་པར་སྟོན་ཏོ་ཞེས་བསྟན་པ་གང་ཡིན་པའོ། །རང་གི་མཚན་ཉིད་ཀྱི་རབ་ཏུ་དབྱེ་བ་རྣམ་པར་གཞག་པ་ནི་ཇི་སྐད་དུ། ཡོངས་སུ་འགྱུར་བའི་མཚན་ཉིད་རྣམ་པ་བདུན་གྱི་དབང་དུ་བྱས་ཏེ་གཟུགས་ཡོངས་སུ་འགྱུར་བའི་མཚན་ཉིད་ནི་སྐྲ་འབྱི་ཞིང་སྐྲ་མདོག་འགྱུར་བ་དང་ཞེས་རྒྱས་པར་བསྟན་པ་ཡིན་ནོ། །གནོད་པ་རྣམ་པར་གཞག་པ་ནི་ཇི་སྐད་དུ། ཕོངས་པ་ནི་རྒས་པ་ཞེས་བྱའོ་ཞེས་བསྟན་པའོ། །གནོད་པའི་རབ་ཏུ་དབྱེ་བ་རྣམ་པར་གཞག་པ་ནི་ཕོངས་པ་རྣམ་པ་ལྔ་ལ་ཞེས་རྒྱས་པར་བསྟན་པའོ། །ཤི་བའི་བསྡུས་པའི་དོན་རྣམ་པར་གཞག་པ་རྣམ་པ་དགུ་འདིར་བསྟན་ཏེ་བསྟན་པ་རྣམ་པར་གཞག་པ་ནི་ཇི་སྐད་དུ། འཕོས་བ་དང་འཕོ་བ་ཉིད་རྣམ་པར་གཞག་པའོ། །དེ་དེས་པར་སྟོན་པ་རྣམ་པར་གཞག་པ་ནི་ཇི་སྐད་དུ་ཞིག་པ་དང༌། ནང་ཉམས་པ་དང༌། ཚེ་ཉམས་པ་དང༌། དྲོད་ཡལ་བ་ཞེས་བསྟན་པ་གང་ཡིན་པའོ། །མདོར་རྣམ་པར་གཞག་པ་ནི་ཇི་སྐད་དུ། སྲོག་གི་དབང་པོ་འགག་པ་དང༌། ཕུང་པོ་རྣམས་འདོར་བ་དང་འཆི་བ་ཞེས་བསྟན་པ་གང་ཡིན་པའོ། །སྲོག་གི་དབང་པོ་འགག་པ་ངེས་པར་འཆད་པ་རྣམ་པར་གཞག་པ་ནི་ཇི་སྐད་དུ། སྲོག་གི་དབང་པོ་འགག་པ་གང་ཡང་ཞེ་ན། དུས་བྱེད་པའོ་ཞེས་སྨྲས་ཏེ། དུས་ཡོངས་སུ་རྫོགས་པ་ཞེས་བྱ་བའི་ཐ་ཚིག་གོ་ཞེས་བསྟན་པ་གང་ཡིན་པའོ། །རྣམ་གྲངས་གཞན་ཡང་ལྷག་མ་མ་ལུས་པར་ཤི་བ་རྣམ་པར་གཞག་པ་ནི་ཇི་སྐད་དུ། རྫོགས་པར་ཤི་བ་དང་ཞེས་བསྟན་པའོ། །ལྷག་མ་དང་བཅས་པའི་ཤི་བ་རྣམ་པར་གཞག་པ་ནི་ཇི་སྐད་དུ། མ་རྫོགས་པར་ཤི་བ་དང་ཞེས་བསྟན་པའོ། །ཤི་བར་ངེས་པར་གཟུང་བའི་ཤི་བ་རྣམ་པར་གཞག་
པ་ནི་ཇི་སྐད་དུ་ཤི་བའི་རང་གི་མཚན་ཉིད་དང་ཞེས་བསྟན་པ་གང་ཡིན་པའོ། །འཆི་བ་ངེས་པར་འཆད་པ་རྣམ་པར་གཞག་པ་ནི་ཇི་སྐད་དུ་མ་རྫོགས་པར་འཆི་བ་རྣམ་པར་དབྱེ་བ་དང་ཞེས་བསྟན་པ་གང་ཡིན་པའོ། །ཡ་ང་བ་མ་སྤངས་པ་དང་འཕེན་པ་ཡོངས་སུ་ཟད་པ་རྣམ་པར་གཞག་པ་ནི་ཇི་སྐད་དུ། དུས་མ་ཡིན་པར་འཆི་བ་དང༌། དུས་སུ་འཆི་བ་ཞེས་བསྟན་པ་གང་ཡིན་པའོ། །འཆི་བ་རྣམ་པར་འབྱེད་པ་རྒྱ་ཆེར་འཆད་པའོ།། །།ཡན་ལག་བཅུ་གཉིས་རྣམ་འབྱེད་འདི། །ཡན་ལག་མ་ཡིན་ཡན་ལག་ཏུ། །དགོངས་མིན་ཡན་ལག་ངེས་རྟོགས་ནས། །ཡན་ལག་ཐ་དད་ཡན་ལག་བརྟེན། །ཡན་ལག་བཅུ་གཉིས་རྣམ་པར་འབྱེད་པ་འདི་ལ། ཁ་ཅིག་ན་རེ་འདིར་མ་རིག་པ་ལ་སོགས་པ་བསྟན་པའི་ཕྱིར་ཞེས་བྱ་བ་ནི་མ་རིག་པ་དང༌། འདུ་བྱེད་དང༌། རྣམ་པར་ཤེས་པ་ལ་སོགས་པ་ཡན་ལག་བཅུ་གཉིས་བསྟན་པའི་ཕྱིར་ཞེས་བྱ་བའི་ཐ་ཚིག་གོ །དེ་དང་ལྷན་ཅིག་བྱེད་པ་ཡོད་པ་ཡིན་ནོ་ཞེས་བྱ་བ་ནི་མ་རིག་པ་ལ་སོགས་པ་དང་ལྷན་ཅིག་བྱེད་པ་ཞེས་བྱ་བའི་ཐ་ཚིག་སྟེ། གནས་སྐབས་གང་ན་ཡང་མ་རིག་པ་ལ་སོགས་པ་ཉི་ཚེ་ཡོད་པ་ནི་མ་ཡིན་ན་གང་གི་ཕྱིར་མ་རིག་པ་ལ་སོགས་པ་འབའ་ཞིག་ཡན་ལག་ཉིད་ཡིན་པར་འགྱུར། ཕུང་པོ་ལྔ་པའི་གནས་སྐབས་བཅུ་གཉིས་པོ་དེ་དག་ལ་ཡན་ལག་བཅུ་གཉིས་ཞེས་བྱའོ་ཞེས་བྱ་བ་ནི་གནས་སྐབས་སུ་གཏོགས་པ་ལ་དགོངས་པ་ཡིན་པའི་ཕྱིར་རོ། །ཇི་སྐད་དུ་ཆོས་མངོན་པའི་མཛོད་ལས། གནས་སྐབས་ལ་ཡང་འདིར་འདོད་དེ། །ཡན་ལག་གཙོ་བོར་གྲགས་ཕྱིར་ལོ། །ཞེས་སྨྲས་པ་ཡིན་ནོ། །ཅིའི་ཕྱིར་མ་རིག་པ་ལ་སོགས་པ་ཉིད་མདོ་སྡེ་ལས་བསྟན་ཅེ་ན་ཞེས་བྱ་བ་ནི་གལ་ཏེ་ཕུང་པོ་ལྔའི་གནས་སྐབས་ཀྱི་ཡན་ལག་བཅུ་གཉིས་ལ་ཡན་ལག་བཅུ་གཉིས་ཡིན་ནོ་ཞེས་བྱ་བ་ནི་འོ་ན་ནི་འདི་སྐད་དུ་བསྟན་དགོས་ཏེ་མ་རིག་པ་གང་ཞེ་ན། ཕུང་པོ་ལྔ་པ་ཡིན་ནོ་ཞེས་རྒྱས་པར་བྱས་ནས་དེ་བཞིན་དུ་རྒ་ཤི་གང་ཞེ་ན། ཕུང་པོ་ལྔ་པ་ཡིན་ནོ་ཞེས་བྱ་བའི་བར་དུ་ངེས་པར་བརྗོད་དགོས་པར་འགྱུར་རོ་ཞེ་ན། དེའི་ཕྱིར་གནས་སྐབས་དེ་དག་གི་ནང་ན་གཙོ་བོ་ཡིན་པའི་ཕྱིར་རོ་ཞེས་སྨྲས་ཏེ། ཕུང་པོ་ལྔ་པའི་གནས་སྐབས་བཅུ་གཉིས་པོ་དེ་དག་གི་ནང་ན་མ་
རིག་པ་ལ་སོགས་པ་ཇི་སྐད་དུ་བསྟན་པའི་ཡན་ལག་བཅུ་གཉིས་རྣམས་གཙོ་བོ་ཡིན་པའི་ཕྱིར་རོ་ཞེས་བྱ་བའི་ཐ་ཚིག་སྟེ། ཆོས་མངོན་པའི་མཛོད་ལས། ཡན་ལག་གཙོ་བོར་གྲགས་ཕྱིར་ལོ། །ཞེས་སྨྲས་པ་ཡིན་ཏེ། དེ་ལྟ་བུ་ནི་རྣམ་པར་སྨྲ་བ་རྣམས་ཀྱིས་དོན་ཡོངས་སུ་བརྟགས་པ་ཡིན་པར་རིག་པར་བྱའོ། །གལ་ཏེ་མ་རིག་པ་ལ་སོགས་པ་དག་འདུ་བྱེད་ལ་སོགས་པའི་རྐྱེན་གཙོ་བོ་ཡིན་པར་ཇི་ལྟར་བསྟན་པ་མ་འདོད་ན་ཞེས་བྱ་བ་ནི་སློབ་དཔོན་གྱི་སྟེ། འདུ་བྱེད་རྣམས་ཀྱི་རྐྱེན་གཙོ་བོ་ནི་མ་རིག་པ་ཡིན་པར་རྣམ་པ་གཉིས་ལ་སོགས་པས་བསྟན་ཏེ། མ་རིག་པ་ལ་སོགས་པ་དག་འདུ་བྱེད་ལ་སོགས་པའི་རྐྱེན་གཙོ་བོ་ཉིད་ཡིན་པར་ཇི་སྐད་དུ་བསྟན་པ་དག་གལ་ཏེ་མི་འདོད་ན། དེའི་གནས་སྐབས་ན་མ་རིག་པ་ལ་སོགས་པ་ཞེས་རྒྱས་པར་འབྱུང་བ་ལ། དེའི་གནས་སྐབས་ན་མ་རིག་པ་ལ་སོགས་པ་རྐྱེན་གཙོ་བོ་ཉིད་ཡིན་པ་གཞན་ཅི་ཡོད་ན་གང་གི་ཕྱིར་གཙོ་བོ་ཡིན་པའི་ཕྱིར་མ་རིག་པ་ལ་སོགས་པའི་མིང་སྒྲོགས་པར་བྱེད་འོན་ཏེ་འདོད་ན་ཅི་ཞེ་ན། ཇི་སྐད་དུ་བསྟན་པའི་གཙོ་བོ་ཉིད་འདོད་ན། དེ་དག་ཡན་ལག་ཉིད་ཡིན་པར་ཡང་ཇི་ལྟར་ཁས་མ་བླངས་པ་ཡིན་ཞེས་བྱ་བ་ནི་མ་རིག་པ་ལ་སོགས་པ་ཇི་ལྟར་བསྟན་པ་དེ་དག་ཉིད་ཅེས་བྱ་བའི་དོན་ཏོ། །ཕུང་པོ་ལྔ་པ་ཡོད་དུ་ཟིན་ཀྱང་མ་རིག་པ་མེད་པའི་ཕྱིར་འདུ་བྱེད་མེད་པར་འགྱུར་ཏེ། དཔེར་ན་དགྲ་བཅོམ་ལྟ་བུའོ། །འདུ་བྱེད་མེད་པའི་ཕྱིར་ཡང་སྲིད་ཀྱི་རྣམ་པར་ཤེས་པ་མེད་དོ། །ཡང་སྲིད་ཀྱི་རྣམ་པར་ཤེས་པ་མེད་པའི་ཕྱིར་མིང་དང་གཟུགས་མེད་པ་ཡིན་ཏེ། ཐམས་ཅད་ཇི་ལྟར་རིགས་པར་སྦྱར་རོ། །ཐམས་ཅད་ཀྱང་ཕུང་པོ་ལྔ་པ་ཡིན་ན་ཞེས་རྒྱས་པར་འབྱུང་བ་ནི་མ་རིག་པ་ལ་སོགས་པ་ཕུང་པོ་ལྔ་པ་ཡིན་པར་ཀུན་དུ་བརྟགས་ཏེ། ཇི་སྐད་དུ་སྨྲས་པའི་དོན་ལྟ་བུ་ཡིན་ན་ཅིའི་ཕྱིར་མིང་དང་གཟུགས་འབའ་ཞིག་ཅེས་རྒྱས་པར་འབྱུང་བ་ལ་ཅིའི་ཕྱིར་མིང་དང་གཟུགས་གཅིག་པུ་འབའ་ཞིག་ཕུང་པོ་ལྔ་པ་ཡང་ཡིན་ཏེ། གཟུགས་གང་ཞེ་ན་གཟུགས་གང་ཡིན་པ་ཅི་ཡང་རུང་སྟེ་ཞེས་རྒྱས་པར་འབྱུང་བ་དང་མིང་གང་ཞེ་ན། གཟུགས་ཅན་མ་ཡིན་པའི་ཕུང་པོ་བཞི་ཡིན་པར་བསྟན་ལ། གཞན་མ་རིག་པ་ལ་སོགས་པ་ཕུང་པོ་ལྔ་པ་ཅི་སྟེ་མ་ཡིན། འདི་ལྟར་མ་རིག་པ་ལ་སོགས་པ་ལས་གཞན་གཙོ་བོ་ཡིན་པར་མི་སྲིད་ལ་ཕུང་པོ་ལྔ་པར་
ཡང་མིང་དང་གཟུགས་ཁོ་ན་བསྟན་གྱི་གཞན་མ་ཡིན་པ་དེ་བས་ན་འདུ་བྱེད་ལ་སོགས་པའི་རྐྱེན་གཙོ་བོ་རེ་རེ་ཉིད་ཅེས་རྒྱས་པར་འབྱུང་བ་ཡིན་ནོ། །མུ་བཞི་བརྟགས་པས་ཇི་སྐད་བསྟན་པ་ཡིན་ནོ་ཞེས་བྱ་བ་ནི་རྐྱེན་དང་རྐྱེན་ཅན་གཉིས་ངེས་པ་དང་མ་ངེས་ལ་མུ་བཞིར་བརྟགས་པས་སོ། །ཇི་ལྟར་ཡིན་ཞེ་ན། འདིར་ངེས་པ་ནི་མ་ཡིན་ཏེ། མ་ངེས་པ་ཡིན་པ་ཡང་འཆད་པ་དོན་མེད་པར་མི་འགྱུར་ཏེ། རྐྱེན་གཙོ་བོ་སྟོན་པའི་ཕྱིར་དང་དེ་བཞིན་དུ་ཡང་བསྟན་པའི་ཕྱིར་རོ་ཞེས་གང་སྨྲས་པ་ཡིན་ནོ། །གང་གི་ཆེད་དུ་ཡན་ལག་བཅུ་གཉིས་སྟོན་པ་དེ་ལ་མ་རིག་པ་རྐྱེན་དུ་འཆད་པ་དོན་མེད་པ་ཡིན་ནོ་ཞེ་ན། དེ་བསྟན་པའི་ཆེད་དུ་ཡན་ལག་བཅུ་གཉིས་བསྟན་པ་འདིས་མདོར་ཅི་བསྟན་ཞེ་ན་ཞེས་སྨྲས་སོ། །གང་གིས་ཇི་ལྟར་ཅི་ཞིག་འཕེན་པ་དང་འཕངས་པ་དེ་ཉིད་གང་གིས་མངོན་པར་བསྒྲུབ་པ་དང༌། ཇི་ལྟར་མངོན་པར་བསྒྲུབ་པ་དང་འཕངས་པ་དེ་མངོན་པར་གྲུབ་པ་གང་ཡིན་པ་དེ་དང་མངོན་པར་གྲུབ་པ་གང་ཡིན་པ་དེ་ལ་དེའི་ཉེས་དམིགས་གང་ཡིན་པ་དེ་དག་བསྟན་ཏོ། །གང་གིས་འཕེན་ཞེ་ན་རྒྱས་པར་འབྱུང་བ་མ་རིག་པ་མེད་ན་འདུ་བྱེད་ཀྱིས་ཡང་སྲིད་འཕེན་པར་བྱེད་པ་མ་ཡིན་པས་དེ་བས་ན་མ་རིག་པའི་རྐྱེན་གྱིས་འདུ་བྱེད་ཅེས་སྨྲས་སོ། །དེ་ལྟ་མ་ཡིན་ན་ཡན་ལག་བཅུ་གཅིག་གིས་དོན་འདི་བསྟན་པས་མ་རིག་པའི་ཡན་ལག་འཆད་པ་དོན་མེད་པར་འགྱུར་རོ། །ཇི་ལྟར་འཕེན་ཞེ་ན། རྣམ་པར་ཤེས་པ་ལ་བག་ཆགས་བསྒོས་པའི་ཕྱིར་རོ་ཞེས་བྱ་བ་ནི་དེ་ལྟར་མ་རིག་པའི་རྐྱེན་གྱིས་འདུ་བྱེད་ཀྱིས་བསྒོས་པ་ཡིན་གྱི་ཡང་སྲིད་འབྱུང་བར་བྱ་བའི་ཕྱིར་རྣམ་པར་ཤེས་པའི་རྒྱུན་ནི་ནུས་པའི་རྒྱུ་མ་ཡིན་ནོ། །ཅི་ཞིག་འཕེན་ཅེ་ན། ཡང་སྲིད་པ་པའི་མིང་དང་གཟུགས་དང་སྐྱེ་མཆེད་དྲུག་དང་རེག་པ་དང་ཚོར་བ་སྟེ་ཞེས་བྱ་བ་ནི་ལས་སྣ་ཚོགས་པའི་ཕྱིར་རོ། །ཡང་སྲིད་པ་པ་སྨོས་པ་ནི་ད་ལྟར་བྱུང་བ་ལས་བྱེ་བྲག་ཏུ་དབྱེ་བའི་ཕྱིར་རོ། །ཅི་རིགས་པར་མཐར་གྱིས་དང་ཅིག་ཅར་འབྱུང་བར་བྱ་བའི་ཕྱིར་རོ་ཞེས་བྱ་བ་ནི་མིང་དང་གཟུགས་དང་སྐྱེ་མཆེད་དྲུག་ནི་རིམ་གྱིས་འབྱུང་བར་བྱ་བའི་ཕྱིར་འཕེན་ཏོ་ཞེས་སྐབས་དང་སྦྱར་རོ། །རེག་པ་དང་ཚོར་བ་ནི་ཅིག་ཅར་འབྱུང་བར་བྱ་བའི་ཕྱིར་རོ། །འཕངས་པ་དེ་ཉིད་གང་ཞེ་ན། རྣམ་པར་ཤེས་པ་ལ་དེའི་ས་བོན་ཡོངས་སུ་བརྟས་པའོ། །
ཞེས་བྱ་བ་ནི་ཡང་སྲིད་པ་པའི་མིང་དང་གཟུགས་དང༌། སྐྱེ་མཆེད་དྲུག་དང༌། རེག་པ་དང༌། ཚོར་བ་རྣམས་ཀྱི་ས་བོན་ཡོངས་སུ་བརྟས་པ་ཞེས་བྱ་བའི་ཐ་ཚིག་སྟེ། དེ་ཡང་ཀུན་གཞི་རྣམ་པར་ཤེས་པ་ལ་འདུ་བྱེད་ཀྱིས་དེའི་ས་བོན་ཡོངས་སུ་བརྟས་པ་ཡིན་པར་རིག་པར་བྱའོ། །གང་གིས་ཇི་ལྟར་གང་འཕངས་ཞེས་སྨྲས་པ་གང་ཡིན་པ་དེའི་བཤད་པ་དེ་དག་ཡིན་ནོ། །གང་གིས་མངོན་པར་འགྲུབ་པར་བྱེད་ཅེ་ན། ཇི་སྐད་དུ་བསྟན་པའི་རིམ་གྱིས་ཞེས་བྱ་བ་མིང་དང་གཟུགས་དང་སྐྱེ་མཆེད་དྲུག་དང་རེག་པ་དང་ཚོར་བ་སྔར་བསྟན་མ་ཐག་པ་སྔོན་འཕངས་པས་འདིར་སྐྱེས་པའི་ཚོར་བ་ཞེས་བྱ་བ་ཚེ་སྔ་མའི་ལས་ཀྱིས་འཕངས་པས་ད་ལྟར་གྱི་ཚེ་འདི་ལ་སྐྱེས་པའི་ཚོར་བ་ལ་བརྟེན་ནས་སྲེད་པ་སྐྱེས་པ་གང་ཡིན་པ་སྟེ་ཚོར་བའི་རྐྱེན་གྱིས་སྲེད་པ་ཞེས་བྱ་བ་ཡིན་ནོ། །དེའི་རྐྱེན་གྱིས་ལེན་པས་སོ་ཞེས་བྱ་བ་ཅི་ཞེ་ན། མངོན་པར་འགྲུབ་པར་བྱེད་དོ་ཞེས་བྱ་བའི་སྐབས་ཡིན་ནོ། དེས་སྲིད་པར་བྱེད་པའི་ཕྱིར་རོ་ཞེས་བྱ་བ་ནི་སྲིད་པའི་རྐྱེན་གྱིས་ལེན་པ་དེས་སྲིད་པར་བྱེད་པའི་ཕྱིར་རོ་ཞེས་བྱ་བའི་དོན་ཏོ། །རྣམ་པར་ཤེས་པ་ལས་ཀྱི་བག་ཆགས་རྣམ་པ་མང་དུ་ཡོད་དེ་ཞེས་རྒྱས་པར་འབྱུང་བ་དེ་དག་གིས་ནི་སྲིད་པའི་རྐྱེན་ཉིད་ལེན་པ་ཡིན་པར་སྒྲུབ་པར་བྱེད་དོ། ལེན་པའི་བྱེ་བྲག་གིས་ཡོངས་སུ་ཟིན་པ་གང་གིས་འདི་ནས་གཉིས་པར་ཡང་སྲིད་འབྱུང་བར་བྱེད་པ་དེ་འདིར་སྲིད་པ་ཞེས་བྱའོ་ཞེས་བྱ་བ་དེ་ནི་ལས་ཀྱི་བག་ཆགས་ཡིན་ཏེ། ལེན་པའི་བྱེ་བྲག་གིས་ཡོངས་སུ་ཟིན་པ་གང་ལས་འདི་ནས་གཉིས་པར་ཡང་སྲིད་འབྱུང་བར་འགྱུར་བའོ། །གང་གིས་དེ་འཕངས་པ་དག་ཇི་ལྟར་སྒྲུབ་པར་བྱེད་པ་སྨྲས་པ་གང་ཡིན་པ་དེའི་བཤད་པ་འདི་ཡིན་ནོ། །མངོན་པར་གྲུབ་པ་དེ་གང་ཞེ་ན། མིང་དང་གཟུགས་ལ་སོགས་པ་འཕངས་པ་གང་ཡིན་པ་དེ་མ་འོངས་པ་ན་སྐྱེ་བའོ་ཞེས་བྱ་བ་ནི་བདག་ཐོབ་པའོ། །མངོན་པར་གྲུབ་པ་གང་ཡིན་པ་དེ་དང་ཞེས་སྨྲས་པ་གང་ཡིན་པའི་བཤད་པ་འདི་ཡིན་ནོ། །ཡིད་དུ་འོང་བའི་ལང་ཚོ་དང་སྲོག་ཞིག་པའི་ཕྱིར་རོ་ཞེས་བྱ་བ་ནི་ཡིད་དུ་འོང་བའི་ལང་ཚོ་ཞིག་པའི་ཕྱིར་དང༌། ཡིད་དུ་འོང་བའི་སྲོག་ཞིག་པའི་ཕྱིར་རྒ་བ་དང་ཤི་བ་གཉིས་གོ་རིམས་བཞིན་དུ་ཡིན་ཏེ། རྒ་ཤི་ཉེས་དམིགས་ཡིན་པར་གྲུབ་པ་ཡིན་ནོ། །དེའི་ཉེས་
དམིགས་གང་ཡིན་པ་དང་ཞེས་སྨྲས་པ་དེའི་བཤད་པ་འདི་ཡིན་ནོ། །འཕགས་པའི་བདེན་པ་ལ་རིག་པ་སྐྱེས་པའི་ཕྱིར་རོ་ཞེས་བྱ་བ་ནི་བདེན་པ་མཐོང་ན་སྡུག་བསྔལ་དང༌། ཀུན་འབྱུང་དང༌། འགོག་པ་དང༌། ལམ་གྱི་བདེན་པ་ལ་ཟག་པ་མེད་པའི་ཤེས་རབ་ཀྱི་མཚན་ཉིད་ཀྱི་རིག་པ་སྐྱེས་པ་ཡིན་ནོ། །གལ་ཏེ་མ་རིག་པའི་རྐྱེན་གྱིས་འདུ་བྱེད་མེད་པར་ཡང་སྲིད་འཕེན་པར་འགྱུར་ན་ནི་དེ་ཡང་འགྱུར་ཏེ། སྲིད་པའི་རྐྱེན་ངེས་པ་དང་མ་རིག་པའི་རྐྱེན་གྱིས་འདུ་བྱེད་མེད་པ་དག་ཀྱང་ཡང་སྲིད་འཕེན་པར་འགྱུར་བར་འོང་ངོ་ཞེས་བྱའོ། །རེ་ལྟར་ཐོགས་ན་སྲིད་པ་ལན་བདུན་པ་བདེན་པ་མཐོང་བ་ཡིན་པར་བསྟན་པ་གང་ཡིན་པ་དེ་ནི་སྔོན་གྱི་མ་རིག་པའི་རྐྱེན་གྱིས་འདུ་བྱེད་ཀྱི་ཡང་སྲིད་ཁྱད་པར་ཅན་འཕངས་པ་ལྷག་པར་བྱས་པ་ཡོད་པ་ཡིན་ནོ། །འདོད་ཆགས་དང་བྲལ་བའི་དགྲ་བཅོམ་པ་ཡང་སྔོན་གྱི་འཕེན་པ་ཡོད་དུ་ཟིན་ཀྱང་ཡང་སྲིད་མངོན་པར་སྒྲུབ་པ་མ་ཡིན་ནོ་ཞེས་བྱ་བ་ནི་གང་གི་ཕྱིར་ཞེས་བྱ་བའི་སྐབས་དང་སྦྱར་ཏེ། དེ་བས་ན་སྲིད་པའི་རྐྱེན་གྱིས་ལེན་པས་མངོན་པར་སྒྲུབ་པར་བྱེད་པ་མ་ཡིན་ནོ། །དོན་དེ་ཉིད་བསྡུ་བའི་ཕྱིར་ཚིགས་སུ་བཅད་པ་ལྔ་སྟེ་ཞེས་བྱ་བ་ནི་ཡན་ལག་བཅུ་གཉིས་བསྟན་པ་འདིས་མདོར་ཅི་བསྟན་ཅེ་ན་ཞེས་བྱ་བ་དེའི་དབང་དུ་བྱས་ནས། གང་གིས་འཕེན་དང་ཇི་ལྟར་གང༌། །དེ་སྒྲུབ་བྱེད་པའང་དེ་ལ་ཡང༌། །ཉེས་དམིགས་གང་ཡིན་དེ་དག་རྣམས། །ཡན་ལག་བཅུ་གཉིས་རྣམས་ཀྱིས་བསྟན། །ཞེས་བྱ་བ་ནི་བསྟན་པའི་ཚིགས་སུ་བཅད་པའོ། །གཉིས་ཀྱི་ཡན་ལག་གཅིག་གིས་དང༌། །རྣམ་པ་བཞི་དང་གཉིས་ཀྱིས་དང༌། གཅིག་གིས་གཅིག་གི་གཅིག་གིས་ནི། །དོན་བདུན་རབ་ཏུ་བསྟན་པ་ཡིན། །ཞེས་བྱ་བ་དེ་དག་ནི་ངེས་པར་འཆད་པའི་ཚིགས་སུ་བཅད་པའོ། །གཉིས་ཀྱིས་ཞེས་བྱ་བ་འདིས་ནི་གང་གིས་འཕེན་དང་ཞེས་བྱ་བ་འདི་ངེས་པར་འཆད་པར་བྱེད་པ་ཡིན་ནོ། །ཇི་ལྟར་ཡིན་ཞེ་ན། མ་རིག་པའི་རྐྱེན་གྱིས་འདུ་བྱེད་ཀྱིས་འཕེན་པར་བྱེད་པ་ཡིན་ནོ། །དེ་ཡང་སྟོན་པར་བྱེད་པ་ནི། །བདེན་པ་ཇི་བཞིན་མི་ཤེས་ཕྱིར། །ལས་ཀྱིས་ཞེས་བྱ་བ་ཡིན་ནོ། །ཡན་ལག་གཅིག་གིས་དང་ཞེས་བྱ་བས་ནི་ཇི་ལྟར་འཕེན་པ་འདི་ངེས་པར་འཆད་པར་བྱེད་པ་ཡིན་ནོ། །དེ་ཡང་སྟོན་པར་བྱེད་པ་ནི་སེམས་ལ་བསྒོས་ཕྱིར་དང་ཞེས་བྱ་བ་ཡིན་ཏེ།
ལས་ཀྱི་རྣམ་པར་ཤེས་པ་ལ་བག་ཆགས་བསྒོས་པས་ཡང་སྲིད་འཕེན་པར་བྱེད་དོ། །རྣམ་པ་བཞི་དང་ཞེས་བྱ་བ་ནི་གང་འཕེན་པ་ཞེས་བྱ་བ་འདི་ངེས་པར་འཆད་པར་བྱེད་པ་ཡིན་ཏེ། མིང་དང་གཟུགས་དང་སྐྱེ་མཆེད་དྲུག་དང་རེག་པ་དང་ཚོར་བ་དང་ཡན་ལག་བཞི་རྣམ་པ་འཕེན་པ་ཡིན་ནོ། །དེ་ཡང་སྟོན་པར་བྱེད་པ་ནི་ཡན་ལག་བཞི་ནི་རིམ་གྱིས་འཕེན་ཅེས་བྱ་བ་ཡིན་ནོ། །འཕངས་པ་དེ་ཉིད་གང་ཞེ་ན། རྣམ་པར་ཤེས་པ་ལ་དེའི་ས་བོན་བག་ཆགས་ཡོངས་སུ་བརྟས་པའོ་ཞེས་སྨྲས་པ་གང་ཡིན་པ་དེ་སྡུད་པར་བྱེད་པ་ནི། དེའི་ས་བོན་ཡོངས་སུ་བརྟས་ཕྱིར་ཞེས་བྱ་བ་འདི་ཡིན་ཏེ། གཉིས་ཀྱིས་དང་གཅིག་གིས་ཞེས་བྱ་བས་ནི་གང་གིས་ཇི་ལྟར་གང་ཞིག་དེ་སྒྲུབ་པར་བྱེད་པ་ཞེས་བྱ་བའི་དོན་འདི་བསྟན་ཏེ་སྲིད་པའི་རྐྱེན་གྱིས་ལེན་པས་སྒྲུབ་པར་བྱེད་པ་ཡིན་ནོ། །འདི་ཡང་སྟོན་པ་ནི་ཚོར་བས་བསྐྱེད་པའི་སྲིད་པ་ལས་ལེན་པ་བྱུང་བས་སོ། །ཇི་ལྟར་སྒྲུབ་པར་བྱེད་པ་ནི་གཅིག་གིས་བསྟན་པ་ལེན་པའི་རྐྱེན་གྱིས་བྱུང་བའི་སྲིད་པས་དེ་སྒྲུབ་པར་བྱེད་དོ། །དེ་ཡང་སྟོན་པ་ནི་དེའི་ལས་བསྒོས་པ་མངོན་དུ་གྱུར་པ་ཡིན་ཞེས་བྱ་བ་ཡིན་ནོ། །གཅིག་གིས་གྲུབ་པ་གང་ཡིན་པ་དེ་སྟོན་པ་ནི་སྐྱེ་བ་ནི་སྲིད་པ་ལས་གྲུབ་པ་ཡིན་ལ། དེ་ཡང་སྟོན་པ་ནི་གྲུབ་པ་སྐྱེ་བ་ཡིན་ཞེས་བྱ་བ་ཡིན་ནོ། །གཅིག་གིས་ནི་དེའི་ཉེས་དམིགས་བསྟན་ཏེ་རྒ་ཤིས་སོ། །དེའི་དབང་དུ་བྱས་ཏེ། དེ་ལ་ཡང༌། རྒས་སྩོགས་ཉེས་དམིགས་གང་གི་ཕྱིར། །ཞེས་སྨྲས་པ་ཡིན་ནོ། །གང་གི་ཕྱིར་བདེན་པ་མཐོང་བ་ལ་ནི་ཡང་སྲིད་པ་འཕེན་པ་ཡོད་པ་མ་ཡིན་ཏེ། བདེན་པ་ལ་རིག་པ་སྐྱེས་པའི་ཕྱིར་རོ་ཞེས་བྱ་བ་དང༌། འདོད་ཆགས་དང་བྲལ་བ་དགྲ་བཅོམ་པ་ལ་སྔོན་གྱི་འཕེན་པ་ཡོད་དུ་ཟིན་ཀྱང་ཡང་སྲིད་མངོན་པར་འགྲུབ་པ་མ་ཡིན་ནོ་ཞེས་སྨྲས་པ་གང་ཡིན་པ་དེ་སྡུད་པར་བྱེད་པ་ནི་གང་གི་ཕྱིར། བདེན་པ་མཐོང་བ་འཕེན་པ་མེད། །སྲེད་པ་བྲལ་ན་འབྱུང་བ་མེད། །ཅེས་བྱ་བ་ཡིན་ནོ། །ཅིའི་ཕྱིར་བདེན་པ་མཐོང་བ་ལ་མ་རིག་པ་མེད་པ་ཡིན། གང་གི་ཕྱིར་འདིའི་ལས་ཀྱིས་ཡང་སྲིད་འཕེན་པར་མི་བྱེད་ཅེ་ན་ཞེས་བྱ་བའི་འབྲེལ་བ་ནི་འདི་ཡིན་ཏེ། གང་གི་ཕྱིར་བདེན་པ་མཐོང་བ་ལ་ནི་ཡང་སྲིད་པ་འཕེན་པར་བྱེད་པ་ཡོད་པ་
མ་ཡིན་ཏེ། འཕགས་པའི་བདེན་པ་ལ་རིག་པ་སྐྱེས་པའི་ཕྱིར་རོ། །དེ་བས་ན་མ་རིག་པའི་རྐྱེན་གྱིས་འདུ་བྱེད་ཀྱི་འཕེན་པ་ཡིན་ནོ་ཞེ་ན། བདེན་པ་མཐོང་བ་ལ་བསྒོམ་པས་སྤང་བར་བྱ་བའི་མ་རིག་པ་མེད་པ་མ་ཡིན་ཏེ། དེ་བས་ན་གང་གི་ཡང་སྲིད་འཕེན་པར་བྱེད་པའི་ལས་ལ་དབང་བྱེད་པ་ནི་མེད་པ་མ་ཡིན་ནོ་ཞེས་རྒྱས་པར་འབྱུང་བ་ཡིན་ནོ། །ཡང་སྲིད་འཕེན་པར་བྱེད་པའི་ལས་དེ་ལ་དབང་བྱེད་པ་གང་ཞེ་ན། དེའི་ཕྱིར་རིག་པ་མེད་པས་མ་རིག་པ་གང་ཡིན་པའོ་ཞེས་སྨྲས་སོ། །དེ་གང་ཞེ་ན་ཞེས་བྱ་བ་ནི་རིག་པ་མེད་པས་མ་རིག་པ་གང་ཡིན་པ་དེའོ། །དེའི་ཕྱིར་བདེན་པ་མཐོང་བའི་མི་མཐུན་པའི་ཕྱོགས་གང་ཡིན་པའོ་ཞེས་སྨྲས་སོ། །བདེན་པ་མཐོང་བའི་མི་མཐུན་པའི་ཕྱོགས་སུ་གྱུར་བ་ནི་མ་རིག་པ་ཡིན་ཏེ། རིག་པ་མེད་པས་འབྱུང་བ་ཡིན་ནོ། །བདེན་པ་མཐོང་བ་མ་ཡིན་པ་ལ་ནི་རིག་པ་ཡོད་པ་ཡང་མ་ཡིན་ལ། བསྒོམ་པས་སྤང་བར་བྱ་བའི་མ་རིག་པ་ནི་རིག་པ་དང་ལྷན་ཅིག་ཏུ་བདེན་པ་མཐོང་བ་ལ་རྗེས་སུ་འཇུག་པ་ཡིན་ནོ། །སྲེད་པ་ཡང་དེ་བཞིན་དུ་ཅིའི་ཕྱིར་མི་འདོད་ཅེས་རྒྱས་པར་འབྱུང་བ་ལ། དེ་ནི་དེ་ལ་དབང་བྱེད་པ་ཡིན་ནོ་ཞེས་བྱ་བ་ནི་ཡང་སྲིད་འཕེན་པར་བྱེད་པའི་ལས་དེ་ལའོ་ཞེ་ན། མི་མཐོང་བ་ནི་མཐོང་བ་ཉིད་ཀྱི་མི་མཐུན་པའི་ཕྱོགས་ཡིན་པར་རིགས་པ་ཡིན་ཏེ་ཞེས་བྱ་བ་ནི་མ་རིག་པ་ཡིན་པར་བསྟན་ཏོ། །དེ་བས་ན་སྒྲིབ་པར་བྱེད་པའི་བདག་ཉིད་ཡིན་པའི་ཕྱིར་ཏེ་ཞེས་སྨྲས་ཏེ། མ་རིག་པས་ནི་བདེན་པ་མཐོང་བའི་ཡུལ་བཀག་སྟེ་འདུག་པ་ཡིན་ཏེ། དེ་དམིགས་པ་ལ་སྐྱེས་པས་མི་སྣང་བར་བྱེད་པའི་ཕྱིར་རོ།། །།རྟེན་ཅིང་འབྲེལ་བར་འབྱུང་བ་དང་པོ་དང་རྣམ་པར་འབྱེད་པ་རྒྱ་ཆེར་འགྲེལ་པ། བམ་པོ་བཅུ་གཅིག་པ། དཔེར་ན་སྣང་བའི་མུན་པ་ལྟ་བུར་སྒྲིབ་པར་བྱེད་པའི་བདག་ཉིད་ཡིན་པའི་ཕྱིར་མི་མཐུན་པའི་ཕྱོགས་ཡིན་པར་རིགས་པ་ཡིན་གྱི། སྲེད་པ་ནི་ཅི་ཞེ་ན། བདེན་པ་མཐོང་བའི་མི་མཐུན་པའི་ཕྱོགས་ཡིན་པར་རིགས་པ་མ་ཡིན་ཏེ། དེ་ནི་མི་མཐོང་བའི་མཚན་ཉིད་མ་ཡིན་གྱི་ཆགས་པའི་མཚན་ཉིད་ཡིན་པའི་ཕྱིར་རོ། །བདེན་པ་མཐོང་བའི་ཡུལ་ལ་ཁྱད་པར་བྱེད་པ་ཡང་མ་རིག་པ་ཡིན་པས་ཞེས་བྱ་བ་ནི་བདེན་པ་བཞི་ལ་དམིགས་པའི་ཕྱིར་དེ་ནི་མི་མཐུན་པའི་ཕྱོགས་ཡིན་པར་རིགས་ཀྱི་ཞེས་བྱ་བ་ནི་བདེན་པ་མཐོང་བའི་མི་མཐུན་པའི་ཕྱོགས་ཞེས་
བྱ་བའི་ཐ་ཚིག་གོ །སྲེད་པ་ནི་ཅི་ཞེ་ན། བདེན་པ་མཐོང་བའི་ཡུལ་ལ་ཁྱད་པར་བྱེད་པ་མ་ཡིན་ཏེ། འགོག་པ་དང་ལམ་གྱི་བདེན་པ་གཉིས་ལ་མེད་པའི་ཕྱིར་རོ་ཞེས་པ་ནི་སྲེད་པ་མེད་པའི་ཕྱིར་རོ་ཞེས་བྱ་བའི་ཐ་ཚིག་སྟེ། འགོག་པའི་བདེན་པ་དང་ལམ་ལ་དམིགས་པ་ནི་དགེ་བའི་ཆོས་འདུན་པ་ཞེས་བྱ་བ་ཡིན་གྱི་སྲེད་པ་ནི་མ་ཡིན་ནོ། །ཇི་སྐད་དུ། འདོད་ཆགས་མེད་དེ་སྤང་བྱའི་ཕྱིར། །ཞེས་གསུངས་པ་ཡིན་ནོ། །གལ་ཏེ་དེ་ལྟར་སྲེད་པ་ནི་བདེན་པ་མཐོང་བའི་མི་མཐུན་པའི་ཕྱོགས་ཡིན་ན་འགོག་པ་དང་ལམ་གྱི་བདེན་པ་གཉིས་མི་མཐོང་བ་མེད་པར་འགྱུར་ཏེ། མི་མཐུན་པའི་ཕྱོགས་མེད་པའི་ཕྱིར་རོ་ཞེས་བྱ་བའི་ཐ་ཚིག་གོ །ཇི་ལྟར་དུ་མི་མཐོང་བ་ནི་མཐོང་བ་ཉིད་ཀྱི་མི་མཐུན་པའི་ཕྱོགས་ཡིན་པར་རིགས་པ་ཡིན་ནོ་ཞེས་སྨྲས་པ་དེ་ནི་བདེན་ཏེ། སྲེད་པ་དང་མཚུངས་པར་ལྡན་པའི་མ་རིག་པ་ནི་བདེན་པ་མཐོང་བའི་མི་མཐུན་པའི་ཕྱོགས་ཡིན་པས་སྲེད་པ་ཡང་ཡིན་པར་རིགས་སོ་ཞེ་ན། དེའི་ཕྱིར་སྲེད་པ་མེད་པར་མ་རིག་པ་ནི་བདེན་པ་མཐོང་བའི་མི་མཐུན་པའི་ཕྱོགས་ཡིན་པར་གྲུབ་པ་ཡིན་ཏེ། འགོག་པ་དང་ལམ་གྱི་བདེན་པ་གཉིས་ལ་མ་འདྲེས་པ་ཡོད་པ་ཡིན་གྱི་ཞེས་བྱ་བ་ནི་མ་རིག་པ་ནི་བདེན་པ་མཐོང་བའི་མི་མཐུན་པའི་ཕྱོགས་ཡིན་པར་ངེས་པར་མ་ནུས་ཀྱི། སྲེད་པ་ནི་མ་རིག་པ་མེད་པར་ཅི་ཞེ་ན། བདེན་པ་མཐོང་བའི་མི་མཐུན་པའི་ཕྱོགས་ཡིན་པར་ངེས་པར་བྱ་བར་ནུས་པ་མ་ཡིན་ནོ། །དེ་ནི་བདེན་པ་མཐོང་བའི་མི་མཐུན་པའི་ཕྱོགས་ཉིད་ཡིན་པར་ངེས་པར་བྱར་རུང་སྟེ། ཇི་ལྟ་ཞེ་ན་བདེན་པ་མཐོང་བས་སྤང་བར་བྱ་བ་ཡང་མ་རིག་པ་ཡིན། དམིགས་པ་ཡང་མ་རིག་པ་ཡིན་པས་དམིགས་པ་ཡོངས་སུ་ཤེས་པས་སྤོང་བར་འགྱུར་རོ། །དེ་བས་ན་བདེན་པ་མཐོང་བའི་ཡུལ་འདྲ་བའི་ཕྱིར་བདེན་པ་མཐོང་བའི་མི་མཐུན་པའི་ཕྱོགས་ཡིན་པར་རིགས་སོ། །སྲེད་པ་ནི་དེ་ལ་དམིགས་པའི་ཉོན་མོངས་པ་སྤངས་པ་ཡིན་པས་ཞེས་བྱ་བ་ཅི་ཞེ་ན། སྤོང་བ་ཡིན་པས་ཞེས་སྐབས་དང་སྦྱར་ལ། འདི་ནི་བདེན་པ་མཐོང་བའི་མི་མཐུན་པའི་ཕྱོགས་མ་ཡིན་ནོ། །བདེན་པ་མཐོང་བའི་མི་མཐུན་པའི་ཕྱོགས་ཉིད་ཡིན་ན་ནི་དམིགས་པ་དེ་ཡོངས་སུ་ཤེས་པས་དེ་སྤོང་བར་འགྱུར་རོ། །གལ་
ཏེ་འདི་བདེན་པ་མཐོང་བའི་མི་མཐུན་པའི་ཕྱོགས་མ་ཡིན་ན། འོ་ན་དེའི་ཞེས་མཐོང་བས་སྤང་བར་བྱ་བ་སྲེད་པ་དེའི་གཉེན་པོ་བདེན་པ་མཐོང་བ་ཇི་ལྟར་ཡིན་ཞེ་ན་དེའི་ཕྱིར་མ་རིག་པ་མེད་པར་སྲེད་པ་མི་སྐྱེ་བའི་ཕྱིར་དང༌། དེ་ཡང་དེས་རྒྱུན་གཅོད་པའི་ཕྱིར་རོ་ཞེས་སྨྲས་ཏེ། མ་རིག་པ་དེ་ནི་བདེན་པ་མཐོང་བ་དེས་རྒྱུན་གཅོད་པའི་ཕྱིར་རོ་ཞེས་བྱ་བའི་དོན་ཏོ། །དེ་བས་ན་མ་རིག་པའི་གཉེན་པོར་གྱུར་པ་བདེན་པ་མཐོང་བ་ནི་སྲིད་པའི་གཉེན་པོ་ཡིན་པར་ཡང་གྲུབ་པ་ཡིན་ཏེ། ཀུན་ནས་སློང་བའི་གཉེན་པོ་ཡིན་པའི་ཕྱིར་རོ། །དེ་ཉིད་ཀྱི་ཕྱིར་དཔེར་ན་སྐྱོན་གྱི་གཉེན་པོ་གང་ཡིན་པ་དེ་ནི་དེ་ལས་བྱུང་བའི་ནད་ཀྱི་ཡང་གཉེན་པོ་ཡིན་པ་བཞིན་ནོ་ཞེས་སྨྲས་སོ། །གལ་ཏེ་ཡང་སྲེད་པ་ནི་ཡང་སྲིད་འཕེན་པར་བྱེད་པའི་ལས་ལ་དབང་བྱེད་པ་ཡིན་ན་ནི་ཞེས་རྒྱས་པར་འབྱུང་བ་ནི། གལ་ཏེ་ཡང་སྲེད་པ་ནི་ཡང་སྲིད་འཕེན་པར་བྱེད་པའི་ལས་ལ་དབང་བྱེད་པ་ཡིན་གྱི། མ་རིག་པ་ནི་མ་ཡིན་ན་དེ་ལྟ་ཡིན་ན་ནི། བདེན་པ་རྣམས་ལ་རྨོངས་པ་གང་ཞིག་སྲིད་པ་རྒྱུན་ཆད་པར་འདོད་ན་བདེན་པ་མ་མཐོང་བ་ཡིན་པས་བདེན་པ་མཐོང་བས་སྤང་བར་བྱ་བའི་སྲེད་པ་མ་སྤངས་པ་དེའི་ཡང་སྲིད་འཕེན་པར་བྱེད་པ་མ་ཡིན་པར་འགྱུར་ཏེ། སྲེད་པ་མ་སྤངས་པར་ཡིན་ནོ་ཞེས་སྟོན་ཏོ། །ཅིའི་ཕྱིར་ཞེ་ན། དེའི་ཕྱིར་སྲིད་པ་ལ་ཞེ་སྡང་ཞིང་ཡང་སྲིད་མེད་པར་སྲེད་པའི་དབང་གིས་ཞེས་རྒྱས་པར་སྨྲས་ཏེ། སྲིད་པ་ལ་ཞེ་སྡང་བའི་གང་ཟག་དག་སྲིད་པ་མེད་པར་སྲིད་པའི་དབང་གིས་ཡང་སྲིད་འཕེན་པར་བྱེད་པར་རིགས་པ་མ་ཡིན་ཏེ། སྲིད་པ་མེད་པར་སྲིད་པ་ནི་ཡང་སྲིད་ལ་རྒྱབ་ཀྱིས་བལྟས་པ་ཡིན་པའི་ཕྱིར་རོ། །དེ་ལ་ཡང་ཡང་སྲིད་འཕེན་པ་ནི་ཡོད་པར་འདོད་དོ། །དེ་བས་ན་མ་རིག་པ་ཁོ་ན་ཡང་སྲིད་འཕེན་པར་བྱེད་པའི་ལས་ལ་དབང་བྱེད་པ་ཡིན་གྱི། སྲེད་པ་ནི་མ་ཡིན་ནོ། །རེ་ཞིག་བསོད་ནམས་དང་བསོད་ནམས་མ་ཡིན་པའི་འདུ་བྱེད་ལ་ཞེས་རྒྱས་པར་འབྱུང་བ་ནི་བསོད་ནམས་དང་བསོད་ནམས་མ་ཡིན་པའི་འདུ་བྱེད་འདོད་པ་ན་སྤྱོད་པ་ཡང་སྲིད་འཕེན་པར་བྱེད་པ་ལ་སྲེད་པས་དབང་བྱེད་པ་ཡིན་ཏེ། འདོད་པའི་སྲེད་པས་དེ་ལྷག་པར་སྤྱོད་པའི་ཕྱིར་ཏེ། བསོད་ནམས་དང་བསོད་ནམས་མ་ཡིན་པའི་འདུ་བྱེད་ལྷག་པར་སྤྱོད་པའི་ཕྱིར་རོ་ཞེས་བྱ་བའི་དོན་ཏོ། །མི་གཡོ་བ་ལ་ནི་ཇི་ལྟར་ཡིན་ཞེས་བྱ་བ་ནི་གཟུགས་དང༌། གཟུགས་
མེད་པ་ན་སྤྱོད་པའི་འདུ་བྱེད་ལ་འདོད་པའི་སྲེད་པས་ཇི་ལྟར་དབང་བྱེད་པ་ཡིན། ཁམས་གོང་མ་ལ་དམིགས་པ་ནི་ས་འོག་མའི་སྲེད་པ་ཡོད་པ་མ་ཡིན་ཏེ། དེ་འདོད་པ་ནི་ཆོས་ལ་འདུན་པ་དང་རྗེས་སུ་མཐུན་པ་ཡིན་ནོ་ཞེས་གྲུབ་པའི་མཐའ་ཡིན་ནོ། །གཟུགས་དང་གཟུགས་མེད་པའི་སྲེད་པ་ཡང་དེ་ལ་དབང་བྱེད་པ་མ་ཡིན་ནོ། །ཇི་ལྟ་ཞེ་ན། དེའི་ཕྱིར་བསམ་གཏན་གཟུགས་མེད་པ་མ་བསྐྱེད་པར་ནི་དེ་ལ་དམིགས་པའི་སྲེད་པ་སྐྱེ་བའི་གནས་སྐབས་ཡོད་པ་མ་ཡིན་ནོ་ཞེས་སྨྲས་ཏེ། གཟུགས་དང་གཟུགས་མེད་པ་ལ་དམིགས་པའི་སྲེད་པ་ཀུན་དུ་འབྱུང་བའི་གནས་སྐབས་ཡོད་པ་མ་ཡིན་ནོ་ཞེས་བྱ་བའི་དོན་ཏོ། །འདི་ལྟར་སྲེད་པ་ནི་རང་གི་ཁམས་དང་ཞེས་རྒྱས་པར་འབྱུང་བ་ནི་འདི་ལྟར་སྲེད་པ་ནི་སྐལ་བ་མཐུན་པའི་ཁམས་དང་ས་ལ་དམིགས་པ་ཡིན་པར་ངེས་པ་ཡིན་ནོ། །རང་གི་ཁམས་དང་ས་ལ་དམིགས་པར་ངེས་པ་ཡིན་ན་ཡང་དེ་བས་ན་འདི་ནི་སྐལ་པ་མི་མཐུན་པའི་ཁམས་དང་སྐལ་པ་མི་མཐུན་པའི་ས་ལ་དམིགས་པ་མ་ཡིན་པས་འདོད་པའི་སྲེད་པས་གཟུགས་དང་གཟུགས་མེད་པ་ན་སྤྱོད་པའི་འདུ་བྱེད་ལ་དབང་བྱེད་པ་མ་ཡིན་ནོ། །གཟུགས་དང་གཟུགས་མེད་པའི་སྲེད་པ་ནི་བསམ་གཏན་ནམ་གཟུགས་མེད་པ་བསྐྱེད་ན་དེ་ལ་དམིགས་པ་ཀུན་དུ་འབྱུང་བ་ཡིན་པས་སྔར་སྐྱེས་ཟིན་པའི་མི་གཡོ་བའི་འདུ་བྱེད་ལ་དབང་བྱེད་པར་རིགས་པ་མ་ཡིན་ནོ། །མ་རིག་པ་ནི་ཅི་ཞེ་ན། རང་གི་ཁམས་དང་ས་ལ་དམིགས་པར་ངེས་པ་དེ་ལྟ་བུ་མ་ཡིན་ཏེ་དེ་ནི་སྐལ་པ་མི་འདྲ་བའི་ཁམས་དང་ས་ལ་ཡང་དམིགས་པ་ཡིན་པས་དེ་བས་ན་མ་རིག་པ་ཁོ་ན་ཡང་སྲིད་འཕེན་པར་བྱེད་པའི་ལས་ལ་དབང་བྱེད་པར་རིགས་པ་ཡིན་གྱི་ཞེས་བྱ་བ་ནི་ཁམས་གསུམ་ཆར་ལ་ཀུན་དུ་རྨོངས་པའི་མ་རིག་པའི་དབང་གིས་བསོད་ནམས་དང་བསོད་ནམས་མ་ཡིན་པ་དང་མི་གཡོ་བའི་འདུ་བྱེད་འབྱུང་བར་རིགས་པ་ཡིན་ནོ། །སྲེད་པ་ནི་ཅི་ཞེ་ན། ཡང་སྲིད་འཕེན་པར་བྱེད་པའི་ལས་ལ་དབང་བྱེད་པར་རིགས་པ་མ་ཡིན་ནོ། །ཇི་ལྟར་མི་རིགས་པ་ནི་དེ་ལྟར་བསྟན་ཟིན་ཏོ། །ཡང་སྲིད་འཕངས་པ་ལ་ཡང་ཞེས་རྒྱས་པར་འབྱུང་བ་ནི་ས་གང་ལ་འདོད་ཆགས་དང་མ་བྲལ་བའི་ས་དེ་བའི་ལས་ཀྱིས་ཡང་སྲིད་འཕངས་པ་དག་སྒྲུབ་
པར་བྱེད་པ་དེ་ལ་དབང་བྱེད་པ་ཡིན་ནོ་ཞེས་བྱའོ། །འོ་ན་གང་དག་རང་གི་ས་ལ་དམིགས་པར་ངེས་པ་མ་ཡིན་གྱི་ཞེས་རྒྱས་པར་འབྱུང་བ་ནི་གལ་ཏེ་རང་གི་ས་ལ་ངེས་པ་ཡིན་ཏེ། དམིགས་པ་ངེས་པའི་ཕྱིར་ཡང་སྲིད་འཕེན་པར་བྱེད་པའི་ལས་ལ་སྲེད་པས་དབང་བྱེད་པར་རིགས་པ་མ་ཡིན་ན། འོ་ན་གང་དག་རང་གི་ས་ལ་དམིགས་པར་ངེས་པ་མ་ཡིན་གྱི། སྐལ་བ་མི་འདྲ་བ་དང་ཁམས་ཐམས་ཅད་དུ་འགྲོ་བ་དག་དེ་དག་གི་ཡང་སྲིད་འཕེན་པར་བྱེད་པའི་ལས་ལ་དབང་བྱེད་པ་ཡིན་པར་ཅིའི་ཕྱིར་མི་བསྟན། དེ་དག་ཀྱང་མ་རིག་པ་དང་འགྲོགས་ཏེ་སྐལ་པ་མི་འདྲ་བའི་ཁམས་དང་ས་ལ་མི་དམིགས་པར་བྱེད་པ་ཡིན་ནོ་ཞེ་ན་དེའི་ཕྱིར། མ་རིག་པ་ཁོ་ན་དེ་ལ་གཙོ་བོ་ཡིན་ཏེ་ཞེས་སྨྲས་ཏེ། དེ་ལ་ཞེས་བྱ་བ་ནི་ཡང་སྲིད་འཕེན་པར་བྱེད་པའི་ལས་དེ་ལའོ། །ཅིའི་ཕྱིར་ཞེ་ན། དེའི་ཕྱིར་བདེན་པ་མཐོང་བའི་ཡུལ་ལ་ཁྱབ་པ་ཡིན་པའི་ཕྱིར་དང་ཞེས་སྨྲས་ཏེ། བདེན་པ་མཐོང་བའི་ཡང་སྲིད་འཕེན་པ་ཡིན་གྱི་བདེན་པ་མཐོང་བ་ནི་མ་ཡིན་ནོ། །དེ་བས་ན་བདེན་པ་མཐོང་བའི་མི་མཐུན་པའི་ཕྱོགས་ནི་ཡང་སྲིད་འཕེན་པར་བྱེད་པའི་ལས་ལ་དབང་བྱེད་པ་ཡིན་པར་མངོན་པ་ཡིན་ནོ། །བདེན་པ་མཐོང་བའི་ཡུལ་ལ་ཁྱབ་པ་ཡང་མ་རིག་པ་ཡིན་པས་བདེན་པ་མཐོང་བའི་མི་མཐུན་པའི་ཕྱོགས་ཡིན་པར་རིགས་སོ། །སྐལ་པ་མི་འདྲ་བ་དང༌། ཁམས་ཐམས་ཅད་དུ་འགྲོ་བ་ཡང་སྡུག་བསྔལ་དང༌། ཀུན་འབྱུང་ལ་དམིགས་པ་ཡིན་པའི་ཕྱིར་བདེན་པ་མཐོང་བའི་ཡུལ་ལ་ཁྱབ་པ་མ་ཡིན་པས་དེ་དག་ནི་དེ་ལ་དབང་བྱེད་པར་རིགས་པ་མ་ཡིན་ཏེ། དེ་དག་མེད་པར་ཡང་དེ་མཐུ་ཡོད་པའི་ཕྱིར་རོ་ཞེས་བྱ་བ་ནི་སྐལ་པ་མི་འདྲ་བ་དང༌། ཁམས་ཐམས་ཅད་དུ་འགྲོ་བ་དེ་དག་མེད་པར་ཡང་མ་རིག་པ་མ་འདྲེས་པ་ནི་ཡང་སྲིད་འཕེན་པར་བྱེད་པའི་ལས་ལ་ནུས་པ་ཡོད་དོ། །འགོག་པ་དང་ལམ་ལ་དམིགས་པས་ཀྱང་ཡིན་ནོ། །མ་རིག་པ་མེད་པར་དེ་དག་མེད་དོ་ཞེས་བྱ་བ་ནི་སྐལ་པ་མི་འདྲ་བའི་ཁམས་ཐམས་ཅད་དུ་འགྲོ་བ་དེ་དག་སྟེ། དེ་དག་ནི་མ་རིག་པ་མེད་པར་མངོན་དུ་འགྱུར་བ་མ་ཡིན་ཏེ། མ་རིག་པ་ནི་ས་ཆེན་པོ་པ་ཡིན་པའི་ཕྱིར་རོ། །ཡང་སྲིད་འཕེན་པར་བྱེད་པའི་ལས་ལ་མ་རིག་པ་ཁོ་ན་གཙོ་བོ་ཡིན་ནོ་ཞེས་བྱ་བ་འདི་གྲུབ་པ་མ་ཡིན་ནོ།།
དེ་བས་ན་དོན་བདུན་གྱི་དབང་དུ་བྱས་ཏེ་ཡན་ལག་བཅུ་གཉིས་འཆད་པ་དེ་དག་འཐད་པ་ཡིན་ནོ་ཞེས་བྱ་བ་ནི་དེ་ལྟར་གང་གི་ཕྱིར་ལས་ཀྱིས་ཡང་སྲིད་འཕངས་ལ་སྲེད་པས་མངོན་པར་སྒྲུབ་པར་བྱེད་པ་ཡིན་པས་སོ། །དོན་བདུན་གྱི་དབང་དུ་བྱས་ཏེ་ཞེས་བྱ་བ་ནི་གང་གིས་འཕེན་པ་དང༌། ཇི་ལྟར་འཕེན་པ་དང༌། གང་འཕེན་པ་དང༌། གང་གིས་སྒྲུབ་པར་བྱེད་པ་དང༌། ཇི་ལྟར་སྒྲུབ་པར་བྱེད་པ་དང༌། གྲུབ་པ་གང་ཡིན་པ་དང༌། དེའི་ཉེས་དམིགས་གང་ཡིན་པ་དང་དོན་བདུན་ཡིན་ནོ། །གཞན་དུ་ཡང་རྟེན་ཅིང་འབྲེལ་བར་འབྱུང་བ་རིམ་གྱིས་སོ་ཞེས་རྒྱས་པར་འབྱུང་བ་ནི་ཡན་ལག་བཅུ་གཉིས་བསྟན་པ་ནི་དོན་བདུན་གྱི་དབང་དུ་བྱས་པ་མ་ཡིན་ནོ་ཞེས་རྒྱས་པར་བསྟན་པ་ནི་ཡན་ལག་བཅུ་གཉིས་བསྟན་པ་ནི་དོན་བདུན་གྱི་དབང་དུ་བྱས་པ་མ་ཡིན་ནོ་ཞེས་ངེས་པར་བྱེད་པའོ། །དེ་ཅིའི་ཕྱིར་ཞེ་ན། འདི་ལྟར་རྟེན་ཅིང་འབྲེལ་བར་འབྱུང་བའི་རིམ་གྱིས་ཡང་སྲིད་སྐྱེ་བའི་དབང་དུ་བྱས་ཏེ། ཡན་ལག་བཅུ་གཉིས་འཆད་པར་བྱེད་པའོ། །གཞན་དུ་ཡང་ཡན་ལག་གཉིས་འཆད་པ་མེད་པར་འབྱུང་བའི་རིམ་གྱིས་མ་རིག་པའི་རྐྱེན་གྱིས་འདུ་བྱེད། འདུ་བྱེད་ཀྱི་རྐྱེན་གྱིས་རྣམ་པར་ཤེས་པ་ཞེས་བྱ་བ་ལ་སོགས་པས་སོ། །རིམ་གྱིས་ཡང་སྲིད་སྐྱེ་བར་འཆད་པ་ལ་ཡན་ལག་དུ་ཞིག་གིས་རྫོགས་པར་འགྱུར་ཞེ་ན། ཇི་སྙེད་ཀྱི་རྒྱུ་དང་བཅས་པའི་ཡང་སྲིད་བསྟན་པར་ནུས་པའོ་ཞེས་བྱ་བ་ནི་སློབ་དཔོན་ནོ། །བདུན་ནམ་ལྔས་ཡིན་ནོ་ཞེ་ན་ཞེས་བྱ་བ་ནི་གལ་ཏེ་ད་ལྟར་བྱུང་བའི་སྐྱེ་བས་བསྡུས་པ་བརྗོད་པར་འདོད་ན་ནི་ཡན་ལག་བདུན་གྱི་རྒྱུ་དང་བཅས་པར་བསྟན་པར་ནུས་ཏེ། མ་རིག་པའི་རྐྱེན་གྱིས་འདུ་བྱེད། འདུ་བྱེད་ཀྱི་རྐྱེན་གྱིས་རྣམ་པར་ཤེས་པ། རྣམ་པར་ཤེས་པའི་རྐྱེན་གྱིས་མིང་དང་གཟུགས། མིང་དང་གཟུགས་ཀྱི་རྐྱེན་གྱིས་སྐྱེ་མཆེད་དྲུག །སྐྱེ་མཆེད་དྲུག་གི་རྐྱེན་གྱིས་རེག་པ། རེག་པའི་རྐྱེན་གྱིས་ཚོར་བས་སོ། །འོན་ཏེ་མ་འོངས་པའི་སྐྱེ་བས་བསྡུས་པ་བརྗོད་པར་འདོད་ན་ནི་ཡན་ལག་ལྔས་རྒྱུ་དང་བཅས་པར་བསྟན་པར་ནུས་ཏེ། ཇི་ལྟ་ཞེ་ན། སྲེད་པའི་རྐྱེན་གྱིས་ལེན་པ། ལེན་པའི་རྐྱེན་གྱིས་སྲིད་པ། སྲིད་པའི་རྐྱེན་གྱིས་སྐྱེ་བ། སྐྱེ་བའི་རྐྱེན་གྱིས་རྒ་ཤི་ཞེས་བྱ་བ་ཡིན་ནོ། །དེ་ལ་ཉེས་པ་ཅི་ཡོད་ཅེ་ན། དེའི་ཕྱིར། གལ་ཏེ་བདུན་ཁོ་ནས་འཆད་པར་བྱེད་ན་ཞེས་
རྒྱས་པར་སྨྲས་སོ། །དེ་ཡང་སྲེད་པའི་རྐྱེན་གྱིས་ལེན་པའི་བྱེ་བྲག་གིས་འབྲས་བུ་སྦྱིན་པར་བྱ་བའི་ཕྱིར་མངོན་དུ་གྱུར་པ་ལས་འབྱུང་ངོ་ཞེས་མ་སྨྲས་པར་འགྱུར་རོ་ཞེས་བྱ་བ་ནི་ཡང་སྲེད་པའི་རྐྱེན་གྱིས་ལེན་པའི་བྱེ་བྲག་གིས་འབྲས་བུ་སྦྱིན་པར་བྱ་བའི་ཕྱིར་རྣམ་པར་ཤེས་པ་ལ་ལས་མངོན་དུ་གྱུར་པ་ཡོད་པ་དེ་ལས་ཡིན་ནོ་ཞེས་མ་སྨྲས་པར་འགྱུར་རོ། །དེ་དག་མེད་པས་ལེན་པ་དེ་དག་མེད་པར་དགྲ་བཅོམ་པ་ཡང་ཡང་སྲིད་འགྲུབ་པར་ཐལ་བར་འགྱུར་ཏེ་ཞེས་བྱ་བའི་དོན་ཏོ། །ཅིའི་ཕྱིར་ཞེ་ན། དེའི་ཕྱིར་མ་རིག་པའི་རྐྱེན་གྱིས་འདུ་བྱེད་ཀྱིས་ཡོངས་སུ་བསྒོས་པའི་རྣམ་པར་ཤེས་པ་ཡོད་པའི་ཕྱིར་རོ་ཞེས་སྨྲས་ཏེ། དགྲ་བཅོམ་པ་ལ་ཡང་མ་རིག་པའི་རྐྱེན་ཅན་གྱི་འདུ་བྱེད་རྣམ་པ་མང་པོས་བསྒོས་པའི་རྣམ་པར་ཤེས་པ་ཡོད་པ་ཡིན་ནོ། །འདིར་སྨྲས་པ། ཡོད་པ་བདེན་ཏེ་མངོན་པར་གྲུབ་པའི་རྒྱུ་མ་རིག་པ་སྤངས་པས་ཡང་སྲིད་མངོན་པར་འགྲུབ་པ་མ་ཡིན་ནོ་ཞེ་ན། དེའི་ཕྱིར་མ་རིག་པ་ནི་ཡང་སྲིད་མངོན་པར་འགྲུབ་པའི་རྒྱུ་ཡིན་པར་བསྟན་པ་ཡང་མ་ཡིན་ན་གང་གི་ཕྱིར་དེ་སྤངས་པ་ཞེས་བྱ་བ་ནི་མ་རིག་པ་སྤངས་པ་ཞེས་བྱ་བའི་དོན་ཏོ། །དེ་མི་འབྱུང་བར་འགྱུར་ཞེས་བྱ་བ་ནི་ཡང་སྲིད་མངོན་པར་འགྲུབ་པ་དེའོ། །འདུ་བྱེད་ཀྱི་རྐྱེན་དེ་ནི་སྔར་ཀུན་དུ་འབྱུང་ངོ་ཞེས་བྱ་བ་ནི་མ་སྤངས་པའི་གནས་སྐབས་ནའོ། །འདིར་སྲེད་པ་ནི་ཡང་སྲིད་མངོན་པར་འགྲུབ་པའི་རྒྱུ་ཡིན་པར་འཆད་དེ། མངོན་པར་འགྲུབ་པར་བྱེད་པའི་རྒྱུ་ནི་སྲེད་པ་ཡིན་ནོ་ཞེས་བྱ་བ་ཡིན་ནོ། །འོན་ཏེ་ལྔ་ཁོ་ནར་འཆད་པར་བྱེད་ན་ནི་ཞེས་རྒྱས་པར་འབྱུང་བ་ལ། དེ་ཡང་མ་རིག་པའི་རྐྱེན་གྱིས་འདུ་བྱེད་ཀྱིས་ཡོངས་སུ་བསྒོས་པའི་རྣམ་པར་ཤེས་པས་འཕངས་པའི་མིང་དང་གཟུགས་ལ་སོགས་པའི་རིམ་གྱིས་འབྱུང་ངོ་ཞེས་སྨྲས་པ་མེད་པར་འགྱུར་རོ་ཞེས་བྱ་བ་ལ། དེ་ཡང་ཞེས་བྱ་བ་ནི་ཡང་སྲིད་ལ་བྱའོ། །མིང་དང་གཟུགས་ལ་སོགས་པའི་རིམ་གྱིས་ཞེས་བྱ་བ་ནི་མིང་དང་གཟུགས་དང་སྐྱེ་མཆེད་དྲུག་དང་རེག་པ་དང་ཚོར་བ་ཞེས་བྱ་བ་འདི་དག་གིས་སོ། དེ་མེད་པར་བདེན་པ་མཐོང་བ་ལ་ཡང་བདེན་པ་མ་མཐོང་བ་བཞིན་དུ་གསར་དུ་ཡང་སྲིད་འཕེན་པ་ཡོད་པར་ཐལ་བར་འགྱུར་རོ་ཞེས་བྱ་བ་ལ་མ་རིག་པའི་རྐྱེན་གྱིས་འདུ་བྱེད་ཀྱིས་ཡོངས་སུ་བསྒོས་པའི་རྣམ་པར་ཤེས་པ་དེ་དག་མེད་པར་ཡང་ངོ༌།།
ཅིའི་ཕྱིར་ཞེ་ན། བདེན་པ་མཐོང་བ་ལ་ཡང་སྲེད་པའི་རྐྱེན་གྱིས་ལེན་པ་ཡོད་པ་ཡིན་ནོ། །ལས་ཟད་ན་ཡང་སྲིད་ག་ལས་ཡོད་པ་ཤེས་པར་མ་བྱས་པར་འགྱུར་རོ་ཞེས་འོག་ནས་འཆད་པ་དང་སྦྱར་ཏེ། ལས་ཟད་པ་ཡིན་ན་ལས་ཀྱིས་ཡོངས་སུ་བསྒོས་པའི་རྣམ་པར་ཤེས་པའི་རྒྱུན་ལས་ཡང་སྲིད་འབྱུང་བའི་དོན་འདི་ནི་ཡན་ལག་ལྔ་པའི་རྟེན་ཅིང་འབྲེལ་བར་འབྱུང་བ་འཆད་པ་ལས་ཤེས་པར་མ་བྱས་པར་འགྱུར་ཏེ། རྣམ་པར་ཤེས་པའི་ཡན་ལག་བཤད་པ་མེད་པའི་ཕྱིར་རོ། །ཡང་སྲིད་འབྱུང་བ་དེའི་རང་གི་ངོ་བོ་ཅི་ཡིན་པ་ཡང་ཤེས་པར་མ་བྱས་པར་འགྱུར་ཏེ། རང་གི་ངོ་བོ་མིང་དང་གཟུགས་ཡིན་པ་ནི་ཡོད་པ་མ་ཡིན་ཏེ། ཡན་ལག་ལྔ་བ་འཆད་པ་ལས་མིང་དང་གཟུགས་ཀྱི་ཡན་ལག་འཆད་པ་ཡོད་པ་མ་ཡིན་པའི་ཕྱིར་རོ། །ཡང་སྲིད་དེ་ཡོངས་སུ་རྫོགས་པ་གང་ཡིན་པ་ཡང་ཤེས་པར་མ་བྱས་པར་འགྱུར་ཏེ། སྐྱེ་མཆེད་དྲུག་སྐྱེས་ན་ནི་མིང་དང་གཟུགས་ཀྱི་ངོ་བོ་ལས་ཡང་སྲིད་ཡོངས་སུ་རྫོགས་པ་ཡིན་ན་ཡན་ལག་ལྔ་པ་འཆད་པ་ལས་སྐྱེ་མཆེད་དྲུག་འཆད་པ་མ་ཡིན་པའི་ཕྱིར་རོ། །ཡང་སྲིད་དེའི་ལོངས་སྤྱོད་ཅི་ཡིན་པ་ཡང་ཤེས་པར་མ་བྱས་པར་འགྱུར་ཏེ། ཡང་སྲིད་དེའི་ལོངས་སྤྱོད་ནི་རེག་པ་དང་ཚོར་བ་ཡིན་ཏེ། འདིར་རྒྱུ་དང་བཅས་པའི་ལོངས་སྤྱོད་ཡིན་པའི་དོན་ཡིན་ནོ། །ཡན་ལག་ལྔ་པ་འཆད་པ་ལས་རེག་པ་དང་ཚོར་བའི་ཡན་ལག་བཤད་པ་མེད་པའི་ཕྱིར་རོ། །སྲེད་པའི་རྐྱེན་ཀྱང་མ་བསྟན་པར་འགྱུར་རོ་ཞེས་བྱ་བ་ནི་ཡན་ལག་ལྔ་པ་འཆད་པ་ལས་ཚོར་བའི་ཡན་ལག་འཆད་པ་མེད་པའི་ཕྱིར་ཏེ། མིང་དང་གཟུགས་ལ་སོགས་པའི་རིམ་གྱིས་མ་ཡིན་པར་ནི་གསུམ་པོ་འདི་ཤེས་པར་མ་བྱས་པར་འགྱུར་ཏེ། སྲིད་པའི་རྐྱེན་གྱིས་རང་གི་ངོ་བོ་ཅི་ཡིན་པ་དང༌། ཡོངས་སུ་རྫོགས་པ་ཅི་ཡིན་པ་དང༌། ལོངས་སྤྱོད་ཅི་ཡིན་པ་མ་བསྟན་པ་ཡིན་པའི་ཕྱིར་རོ།། དེ་བས་ན་མ་རིག་པའི་རྐྱེན་གྱིས་འདུ་བྱེད་ཀྱིས་ཡོངས་སུ་བསྒོས་པའི་རྣམ་པར་ཤེས་པ་འཕངས་པའི་མིང་དང་གཟུགས་ལ་སོགས་པའི་རིམ་གྱིས་འགྱུར་རོ་ཞེས་གདོན་མི་ཟ་བར་བརྗོད་པར་བྱ་དགོས་སོ། །དེ་བས་ན་དོན་བདུན་གྱི་དབང་དུ་བྱས་ཏེ། ཡན་ལག་བཅུ་གཉིས་བཤད་པ་
ཡིན་ནོ་ཞེས་བྱ་བ་འདི་གྲུབ་པ་ཡིན་ནོ། །དོན་དེ་ཉིད་ལུང་དང་མཐུན་པ་ཡིན་པར་བསྟན་པའི་ཕྱིར། སྐྱེ་བར་བྱེད་པའི་རྒྱུ་ནི་ལས་ཇི་ལྟ་བ་བཞིན་ཡིན་ཏེ་ཞེས་རྒྱས་པར་འབྱུང་བ་དང༌། མངོན་པར་འགྲུབ་པར་བྱེད་པའི་རྒྱུ་ནི་སྲིད་པ་ཇི་ལྟ་བ་བཞིན་ཡིན་ཏེ་ཞེས་རྒྱས་པར་སྨྲས་ཏེ། སྐྱེ་བར་བྱེད་པའི་རྒྱུ་ནི་ལས་ཇི་ལྟ་བ་བཞིན་ཡིན་ཏེ། མིང་དང་གཟུགས་ལ་སོགས་པའི་རྣམ་པར་དབྱེ་བ་ཐ་དད་པའི་ལུས་ཀྱི་དངོས་པོ་འཕེན་པ་ལ་དབང་བྱེད་པའི་ཕྱིར་རོ་ཞེས་བྱ་བ་དེ་ལྟ་བུར་ནི་ཡན་ལག་བདུན་གྱིས་བསྟན་པ་ཡིན་ཏེ། མ་རིག་པ་དང༌། འདུ་བྱེད་དང༌། རྣམ་པར་ཤེས་པ་དང༌། མིང་དང་གཟུགས་དང༌། སྐྱེ་མཆེད་དྲུག་དང༌། རེག་པ་དང༌། ཚོར་བའི་ཡན་ལག་རྣམས་ཀྱི་གང་གིས་འཕེན་པ་ཇི་ལྟར་གང་ཡིན་པ་རྣམས་ཡིན་པའི་ཕྱིར་རོ། །མངོན་པར་འགྲུབ་པར་བྱེད་པའི་རྒྱུ་ནི་སྲེད་པ་ཇི་ལྟ་བ་བཞིན་ཡིན་ཏེ། རང་གི་ཁམས་སུ་འཕངས་པའི་ཡང་སྲིད་མཚམས་སྦྱོར་བ་ལ་བྱེད་པའི་ཕྱིར་རོ་ཞེས་བྱ་བ་དེ་ལྟ་བུར་ནི་ཡན་ལག་ལྔ་བསྟན་ཏེ། སྲེད་པ་དང༌། ལེན་པ་དང༌། སྲིད་པ་དང༌། སྐྱེ་བ་དང༌། རྒ་ཤིའི་ཡན་ལག་རྣམས་ཀྱི་སྟེ། གང་གིས་མངོན་པར་འགྲུབ་པར་བྱེད་ཇི་ལྟར་གང་ཡིན། དེའི་ཉེས་དམིགས་གང་ཡིན་པ་རྣམས་ཡིན་པའི་ཕྱིར་རོ། །དེ་བས་ན་ལུང་ལས་ཡན་ལག་བཅུ་གཉིས་འཆད་པ་ཉིད་ལེགས་པ་ཡིན་ནོ་ཞེས་བྱ་བ་ནི་དེ་དག་ལུང་ཡིན་གྱི། འདི་ནི་ལུང་དང་ལྡན་པ་ཡིན་ནོ་ཞེས་སྟོན་ཏོ། །དེ་ལྟར་བསྟན་བཅོས་དང་འགལ་བ་མ་ཡིན་ནམ་ཞེས་བྱ་བ་ཇི་ལྟ་ཞེ་ན། ཇི་ལྟར་སྔར། གང་གིས་འཕེན་དང་ཇི་ལྟར་གང༌། །དེ་སྒྲུབ་བྱེད་པ་དེ་ལ་ཡང༌། །ཉེས་དམིགས་གང་ཡིན་དེ་དག་རྣམས། །ཡན་ལག་བཅུ་གཉིས་རྣམས་ཀྱིས་བསྟན། །ཞེས་སྨྲས་པ་རྣམས་ཏེ། དེ་ལྟ་བུ་ཡིན་ན་ནི་མ་རིག་པ་དང༌། འདུ་བྱེད་དང༌། རྣམ་པར་ཤེས་པ་དང༌། སྲེད་པ་དང༌། ལེན་པ་དང༌། སྲིད་པ་རྣམས་ད་ལྟར་བྱུང་བའི་སྐྱེ་བས་བསྡུས་པ་ཡིན་པར་འགྱུར་རོ། །མིང་དང་གཟུགས་དང༌། སྐྱེ་མཆེད་དྲུག་དང་རེག་པ་དང༌། ཚོར་བ་དང༌། སྐྱེ་བ་དང༌། རྒ་ཤི་རྣམས་ནི་མ་འོངས་པའི་སྐྱེས་བས་བསྡུས་པ་ཡིན་པར་འགྱུར་བ་རྣམས་དང༌། བསྟན་བཅོས་ལས་དུམ་བུ་རྣམ་པར་གཞག་པ་ཐ་ད་པར་བསྟན་པ་དང་འགལ་བར་འགྱུར་ཏེ།
ཇི་སྐད་དུ་ཡེ་ཤེས་ལ་འཇུག་པ་ལས་གང་གསུངས་པ། གང་ཟག་གཅིག་གི་སྐྱེ་བ་འདི་ལ་འདས་པ་ནི་དུ་ཞིག་ཅེ་ན། སྨྲས་པ། གཉིས་ཏེ། མ་རིག་པ་དང་འདུ་བྱེད་དོ། །མ་འོངས་པ་དུ་ཞིག་ཅེ་ན། སྨྲས་པ། གཉིས་ཏེ། སྐྱེ་བ་དང་རྒ་ཤིའོ། །ད་ལྟར་བྱུང་བ་དུ་ཞིག་ཅེ་ན། སྨྲས་པ། བརྒྱད་དེ་རྣམ་པར་ཤེས་པ་ནས། སྲིད་པའི་བར་རོ་ཞེས་བྱ་བའོ་ཞེ་ན། དེ་ལྟ་ན་མ་རིག་པའི་རྐྱེན་གྱིས་འདུ་བྱེད་དང༌། ལེན་པའི་རྐྱེན་གྱིས་སྲིད་པ་ལ་ཐ་དད་དུ་བྱ་བ་ཅི་ཡོད་ཅེ་ན་ཞེས་རྒྱས་པར་འབྱུང་བ་སྟེ། འདིར་ནི་སྔོན་གྱི་ཚེ་རབས་གཞན་ན་མ་རིག་པའི་རྐྱེན་གྱིས་ལས་བྱས་ཤིང་བསགས་པ་དང་ད་ལྟར་གྱི་ཚེ་ན་རྣམ་པར་སྨིན་པ་འབྱིན་པར་བྱེད་པ་དེ་ནི་འདུ་བྱེད་ཀྱི་སྒྲར་བཏགས་ཏེ་བསྟན་པ་ཡིན་ནོ། །ལས་གང་ཞིག་ད་ལྟར་གྱི་སྐྱེ་བ་འདི་ན་ཉོན་མོངས་པ་ཐམས་ཅད་ཀྱི་རྐྱེན་གྱིས་བྱེད་ཅིང་བསགས་པ་མ་འོངས་པ་ན་རྣམ་པར་སྨིན་པ་འབྱིན་པའི་རྐྱེན་བྱེད་པ་ནི་སྲེད་པ་ཞེས་བྱ་བའི་སྒྲར་བཏགས་པ་དེ་དག་དང་འགལ་བ་ནི་གལ་ཏེ་ད་ལྟར་བྱུང་བ་ཚེ་བསྡུས་པ་མ་རིག་པའི་རྐྱེན་གྱི་ལས་ཀྱི་རང་གི་ངོ་བོར་གནས་པ་ལ་འདུ་བྱེད་ཀྱི་སྒྲར་བཏགས་པ་དང༌། བག་ཆགས་སུ་གནས་པ་ལེན་པའི་རྐྱེན་གྱིས་འཇུག་པ་རྙེད་པ་ནི་སྲིད་པའི་སྒྲར་བཏགས་པ་དག་ཡིན་ཏེ། དེ་ལྟར་ན་བསྟན་བཅོས་བསྟན་མ་ཐག་པ་གང་ཡིན་པ་འདི་དང་འགལ་བ་ཡོད་པ་ནི་ཇི་སྐད་དུ་སྔར་བསྟན་པ་དེ་བཞིན་དུ་མདོ་སྡེ་ལ་བརྟེན་པ་ཡིན་ནོ་ཞེས་བྱ་བ་ཡིན་ཏེ། གང་གིས་འཕེན་ཇི་ལྟར་གང་ཡིན་ཞེས་བྱ་བ་ལ་སོགས་པ་དང༌། སྐྱེ་བར་བྱེད་པའི་རྒྱུ་ནི་ལས་ཇི་ལྟ་བ་བཞིན་ཡིན། མངོན་པར་འགྲུབ་པར་བྱེད་པའི་རྒྱུ་ནི་སྲིད་པ་ཇི་ལྟ་བ་བཞིན་ཡིན་ཞེས་བྱ་བ་ཇི་སྐད་དུ་སྔར་བསྟན་པ་དེ་བཞིན་དུ་མདོ་སྡེ་ལ་བརྟེན་པ་ཡིན་པར་བསྟན་པ་ཡིན་ནོ། །དེ་བཞིན་དུ་མདོ་སྡེ་ལ་བརྟེན་པ་ནི་དང་པོའི་བྱེ་བྲག་རྣམ་པར་བྱེད་པའི་མདོ་སྡེ་དང༌། རྟེན་ཅིང་འབྲེལ་པར་འབྱུང་བའི་མདོ་སྡེ་འདི་ལའོ། །བསྟན་བཅོས་དང༌། མདོ་སྡེ་དང་འགལ་བ་གཉིས་ལས། བསྟན་བཅོས་དང་འགལ་བ་ཚོད་ཡོད་ཀྱི། མདོ་སྡེ་དང་འགལ་ན་མི་རུང་སྟེ། བསྟན་བཅོས་ནི་མདོ་སྡེ་ལ་རག་ལུས་པ་ཡིན་པའི་ཕྱིར་རོ། །དུམ་བུ་གསུམ་དུ་རྣམ་པར་འཇོག་པ་ཞེས་བྱ་བ་སྔོན་གྱི་མཐའ་དང་ཕྱི་མའི་མཐའ་ལ་
ཡན་ལག་གཉིས་གཉིས་དང༌། བར་གྱི་ལ་ཡན་ལག་བརྒྱད་དུ་རྣམ་པར་འཇོག་པ་སྨྲས་པ་གང་ཡིན་པ་འདི་ལ་བརྗོད་པར་བྱ་བ་མང་དུ་འབྱུང་སྟེ། ཇི་ལྟ་ཞེ་ན། དེའི་ཕྱིར་རྒྱུ་དང་བཅས་པའི་སྐྱེ་བ་རིམ་གྱིས་ཡིན་པར་འཆད་པ་དང༌། རྒྱུ་ཁྱད་པར་ཅན་ལས་སྐྱེ་བ་རིམ་གྱིས་ཡིན་པར་འཆད་པ་ལ་དགོས་པ་ཅི་ཡོད་ཅེས་སྨྲས་ཏེ། དུམ་བུ་གསུམ་རྣམ་པར་གཞག་པ་དེ་ལ་རྒྱུ་དང་བཅས་པའི་སྐྱེ་བའི་རིམ་པ་གསུམ་བསྟན་ཏེ། མ་རིག་པའི་རྐྱེན་གྱིས་འདུ་བྱེད། འདུ་བྱེད་ཀྱི་རྐྱེན་གྱིས་རྣམ་པར་ཤེས་པ། རྣམ་པར་ཤེས་པའི་རྐྱེན་གྱིས་མིང་དང་གཟུགས། མིང་དང་གཟུགས་ཀྱི་རྐྱེན་གྱིས་སྐྱེ་མཆེད་དྲུག །སྐྱེ་མཆེད་དྲུག་གི་རྐྱེན་གྱིས་རེག་པ། རེག་པའི་རྐྱེན་གྱིས་ཚོར་བ་སྟེ། རེ་ཞིག་འདི་ནི་རྒྱུ་དང་བཅས་པའི་སྐྱེ་བའི་རིམ་པ་བསྟན་པ་གཅིག་ཡིན་ནོ། །སྲེད་པའི་རྐྱེན་གྱིས་ལེན་པ། ལེན་པའི་རྐྱེན་གྱིས་སྲིད་པ། སྲིད་པའི་རྐྱེན་གྱིས་སྐྱེ་པ། སྐྱེ་བའི་རྐྱེན་གྱིས་རྒ་ཤི་ཞེས་བྱ་བ་འདི་ནི་རྒྱུ་དང་བཅས་པའི་སྐྱེ་བའི་རིམ་པ་བསྟན་པ་གཉིས་པ་ཡིན་ནོ། །གཅིག་ཁོ་ན་རྒྱུ་དང་བཅས་པའི་སྐྱེ་བའི་རིམ་པ་བསྟན་པ་ནི་དེ་ལྟར་ན་སྡུག་བསྔལ་གྱི་ཕུང་པོ་ཆེན་པོ་འདི་འབའ་ཞིག་འབྱུང་བར་འགྱུར་རོ་ཞེས་བྱ་བ་ཡིན་ཏེ། བསྟན་པས་འགྲུབ་པར་འགྱུར་ན་རྒྱུ་དང་བཅས་པའི་སྐྱེ་བའི་རིམ་པ་གཉིས་བསྟན་པ་ཅི་དགོས། །རྒྱུ་ཁྱད་པར་ཅན་ལ་སྐྱེ་བ་རིམ་གྱིས་ཡིན་པར་འཆད་པ་ལ་དགོས་པ་ཅི་ཡོད་ཅེས་བྱ་བ་ནི་རྒྱུ་ཁྱད་པར་ཅན་ལས་སྐྱེ་བ་རིམ་གྱིས་ཡིན་པ་བསྟན་ཟིན་ཏོ། །གཅིག་ནི་མ་རིག་པ་དང༌། འདུ་བྱེད་རྒྱུ་ཡིན་པར་འཆད་པའོ། །གཉིས་པ་ནི་སྲེད་པ་དང༌། ལེན་པ་དང༌། སྲིད་པའི་ཡན་ལག་རྣམས་རྒྱུ་ཡིན་པར་འཆད་པའོ། །དང་པོ་ལ་ཡང་རྒྱུ་གསུམ་བརྗོད་པར་བྱ་དགོས་ལ། གཉིས་པ་ལ་གཉིས་བརྗོད་པར་བྱ་དགོས་སོ། །དེ་བས་ན་རྒྱུ་ཁྱད་པར་ཅན་ལས་སྐྱེ་བ་རིམ་གྱིས་ཡིན་པར་འཆད་པ་ལ་དགོས་པ་བརྗོད་པར་བྱ་དགོས་སོ། །འདས་པའི་ལས་ལས་འདིར་ཉིང་མཚམས་སྦྱོར་བའི་རྣམ་པར་ཤེས་པ་ཇི་ལྟར་འབྱུང་ཞེས་བྱ་བ་ནི་དུ་མ་བུ་གསུམ་རྣམ་པར་འཇོག་པ་ལ་ཚེ་སྔ་མས་བསྡུས་པ་ནི་འདུ་བྱེད་ཡིན། ད་ལྟར་གྱི་ཚེས་བསྡུས་པ་རྣམ་པར་ཤེས་པ་ཡིན་ན་གལ་ཏེ་འདས་པའི་སྐྱེ་བས་བསྡུས་
པའི་འདུ་བྱེད་ཀྱི་རྐྱེན་གྱིས་འདིར་ཉིང་མཚམས་སྦྱོར་བའི་རྣམ་པར་ཤེས་པ་འབྱུང་བ་ཡིན་ན་ནི་འདས་པའི་ལས་དེ་ལས་འདིར་ཉིང་མཚམས་སྦྱོར་བའི་རྣམ་པར་ཤེས་པ་འབྱུང་ཞེས་བྱ། རྣམ་པར་ཞིག་པ་དེ་ལས་ཇི་ལྟར་འབྱུང་པར་འགྱུར་བ་བརྗོད་པར་བྱ་དགོས་སོ། །བསྟན་བཅོས་ལས་ནི་ཉིང་མཚམས་སྦྱོར་བའི་རྣམ་པར་ཤེས་པ་དེ། ཉོན་མོངས་པ་ཅན་ཁོ་ནར་འདོད་དེ། རང་གི་སའི་ཉོན་མོངས་ཐམས་ཅད་ཀྱིས་སྐྱེ་བའི་སྲིད་པ་ཉོན་མོངས་ཅན་ཞེས་འབྱུང་བ་ཡིན་ནོ། །ཇི་ལྟར་ན་ཉིང་མཚམས་སྦྱོར་བའི་རྣམ་པར་ཤེས་པ་ཉོན་མོངས་པ་ཅན་དེ་འདུ་བྱེད་ཀྱི་རྐྱེན་གྱིས་ཡིན་པར་རུང༌། རྣམ་སྨིན་ལུང་བསྟན་མ་ཡིན་ཆོས་ཞེས་སྟོན་པའི་ཕྱིར་རོ། །རྣམ་པར་ཤེས་པ་དང༌། མིང་དང་གཟུགས་ཀྱི་གནས་སྐབས་གཉིས་ལ་བྱེ་བྲག་ཅི་ཡོད་ཅེས་བྱ་བ་ནི་དུམ་བུ་གསུམ་རྣམ་པར་གཞག་པ་ལ་ཡང་རྣམ་པར་ཤེས་པའི་གནས་སྐབས་ཉིད་ཀྱང་ཡང་སྲིད་པའི་མིང་དང་གཟུགས་ཡིན་ཏེ། ཇི་ལྟ་ཞེ་ན། མཚམས་སྦྱོར་ཕུང་པོ་རྣམ་པར་ཤེས། །གང་ཡིན་དེ་ཉིད་མིང་དང་གཟུགས། །ཞེས་བྱ་བ་ཡིན་པས་རྣམ་པར་ཤེས་པའི་གནས་སྐབས་དང༌། མིང་དང་གཟུགས་གཉིས་བྱེ་བྲག་མེད་པར་བརྗོད་པར་བྱ་དགོས་སོ། །ཉིང་མཚམས་སྦྱོར་བའི་ཕུང་པོ་ལས་སྐད་ཅིག་མ་གཉིས་པ་འོག་ཏུ་སྐྱེས་པ་ལ་ཡང་གཞན་དུ་གྱུར་པ་ཅི་ཡང་མེད་དོ། །འགག་པའི་རིམ་པ་ལ་ཡང་ཞེས་རྒྱས་པར་འབྱུང་བ་ནི་མ་རིག་པ་འགགས་པས་འདུ་བྱེད་འགག །འདུ་བྱེད་འགགས་པས་རྣམ་པར་ཤེས་པ་འགག །རྣམ་པར་ཤེས་པ་འགགས་པས་མིང་དང་གཟུགས་འགག །མིང་དང་གཟུགས་འགགས་པས་སྐྱེ་མཆེད་དྲུག་འགག་སྐྱེ་མཆེད་དྲུག་འགས་པས་རེག་པ་འགག །རེག་པ་འགགས་པས་ཚོར་བ་འགག །ཚོར་བ་འགགས་པས་སྲེད་པ་འགག །སྲེད་པ་འགགས་པས་ལེན་པ་འགག །ལེན་པ་འགགས་པས་སྲིད་པ་འགག །སྲིད་པ་འགགས་པས་སྐྱེ་བ་འགག །སྐྱེ་བ་འགགས་པས་རྒ་ཤི་འགག་ཅེས་བྱ་བ་ཡིན་ཏེ། འགག་པའི་རིམ་པ་དེ་ལ་སོགས་པ་འགག་པ་ནི་རྣམ་པར་ཞིག་པ་ཡིན་པར་འདོད་ན་ནི་དེས་ན་རྒྱུ་རྣམ་པར་ཞིག་པ་ལས་འབྲས་བུ་རྣམ་པར་ཞིག་པ་ཡིན་པར་ཁས་བླངས་པའི་ཕྱིར་སྐད་ཅིག་མ་འཇིག་པ་ལ་གནོད་པར་འགྱུར་རོ་ཞེས་བྱ་བ་ནི་མ་རིག་པ་ནི་འདུ་བྱེད་ཀྱི་རྒྱུ་ཡིན་ཏེ། དེ་བས་ན་དེ་འགགས་པས་དེ་
འགག་ཅེས་བྱ་བ་རྒྱུ་འཇིག་པས་འབྲས་བུ་འཇིག་ཅེས་བྱ་བ་ཡིན་ནོ། །དེ་ལྟ་ན་ནི་སྐད་ཅིག་མ་འཇིག་པ་ལ་གནོད་པ་ཡིན་ཏེ། གལ་ཏེ་ནམ་འབྲས་བུ་སྐྱེས་པ་དེའི་བར་དུ་རྒྱུ་གནས་པ་ཡིན་ན་ནི་རྒྱུ་རྣམ་པར་འཇིག་པ་ལས་འབྲས་བུ་རྣམ་པར་འཇིག་པར་འགྱུར་བ་ཡིན་ནོ། །དེ་ལྟ་ན་ཡང་སྐད་ཅིག་མ་འཇིག་པ་ལ་གནོད་པ་ཡིན་ཏེ། རྒྱུའི་སྐད་ཅིག་མ་ནི་འབྲས་བུའི་སྐད་ཅིག་མའི་ཚེ་ན་ཡང་ཡོད་པའི་ཕྱིར་རོ། །དེ་ཉིད་ཀྱི་ཕྱིར་སྐད་ཅིག་མ་འཇིག་པ་ནི་རྒྱུ་དང་བར་མ་ཆད་པར་འབྲས་བུ་སྐྱེས་པའི་ཕྱིར་རོ། །རྒྱུ་རྣམ་པར་འཇིག་པའི་དུས་ཁོ་ན་ན་འབྲས་བུ་སྐྱེ་བ་ཡིན་ན་ནི་ཇི་ལྟར་ན་རྒྱུ་རྣམ་པར་འཇིག་པ་ལས་འབྲས་བུ་རྣམ་པར་འཇིག་པ་འགྲུབ་པར་འགྱུར་བ་སྔོན་གྱི་སྐྱེ་བ་རྣམ་པར་འཇིག་པ་ན་ཡང་དེའི་རྒྱུ་ཅན་སྐྱེ་བ་ཕྱི་མ་མི་གནས་པའི་ཕྱིར་དང་ཞེས་བྱ་བ་ནི་གལ་ཏེ་རྒྱུ་རྣམ་པར་འཇིག་པ་ལས་འབྲས་བུ་རྣམ་པར་འཇིག་པར་འགྱུར་བ་ཡིན་ན་ནི་སྔོན་གྱི་རྒྱུ་ཅན་ནི་ཕྱི་མ་ད་ལྟར་བྱུང་བའི་སྐྱེ་བ་ཡིན་ལ། སྔོན་གྱི་སྐྱེ་བ་རྣམ་པར་འཇིག་ན་དེའི་རྒྱུ་ཅན་ད་ལྟར་བྱུང་བའི་སྐྱེ་བ་མི་གནས་པའི་ཕྱིར་རོ། །སྐྱེ་བ་ཡང་མ་ཡིན་པ་དེ་ནི་སྔོན་གྱི་སྐྱེ་བའི་རྒྱུ་ཅན་སྐྱེ་བ་ཕྱི་མ་ལ་བྱ་སྟེ། དེ་དང་མི་མཐུན་པ་རྒྱུ་རྣམ་པར་འཇིག་པ་དེ་ནི་སྔར་ཡོད་པའི་ཕྱིར་རོ། །སྔོན་གྱི་སྐྱེ་བ་རྣམས་འཇིག་པས་སྐྱེ་བ་གཞན་དུ་གྱུར་པ་ཡིན་ན་ནི། མཉམ་དུ་འདུག་པར་ཡང་འགྱུར་རོ། །འོན་ཏེ་འགག་པ་ཞེས་བྱ་བ་སྤངས་པ་ཡིན་ན་ནི་ཞེས་བྱ་བ་ཅི་ལ་བྱ་ཞེ་ན། འདིར་མ་རིག་པ་ལ་སོགས་པ་ལ་བསམས་པའོ། །དེས་ན་མ་རིག་པ་དང༌། སྲེད་པ་དང་ལེན་པ་རྣམས་ཅིག་ཅར་སྤངས་པའི་ཕྱིར་དང་ཞེས་བྱ་བ་ནི་མ་རིག་པ་དང༌། སྲེད་པ་དང༌། ལེན་པ་སྡུག་བསྔལ་མཐོང་བས་སྤང་བར་བྱ་བ་རྣམས་ནི་ཅིག་ཅར་སྤོང་སྟེ། ལམ་མཐོང་བས་སྤང་བར་བྱ་བའི་བར་དུ་ཡང་དེ་བཞིན་ནོ། །བསྒོམ་པས་སྤང་བར་བྱ་བ་རྣམས་ནི་བསྒོམ་པས་སྤང་བར་བྱ་བ་རྣམ་པ་དགུ་ཆར་ཡང་རྣམ་པ་དགུའི་གཉེན་པོ་མངོན་དུ་གྱུར་པའི་ཕྱིར་རིམ་གྱིས་ཅིག་ཅར་སྤོང་བར་འགྱུར་རོ། །དེ་དག་སྤངས་ན་ཡང་གཞན་སྤངས་པར་འཇོག་པའི་ཕྱིར་ཞེས་བྱ་བ་ནི་མ་རིག་པ་དང༌། སྲེད་པ་དང༌། ལེན་པ་སྤངས་པས་འདུ་བྱེད་དང༌། རྣམ་པར་ཤེས་པ་དང༌། མིང་དང་གཟུགས་དང༌། སྐྱེ་
མཆེད་དྲུག་དང༌། རེག་པ་དང༌། ཚོར་བ་དང༌། སྲེད་པ་དང༌། ལེན་པ་དང༌། སྲིད་པ་དང༌། སྐྱེ་བ་དང༌། རྒ་ཤི་རྣམས་སྤངས་པ་ཡིན་པར་རྣམ་པར་འཇོག་པའི་ཕྱིར་རོ་ཞེས་བྱ་བའི་དོན་ཏོ། །རིམ་པས་འགག་པར་སྟོན་པ་རིགས་པ་མ་ཡིན་ནོ་ཞེས་བྱ་བ་ནི་མ་རིག་པ་འགགས་པས་འདུ་བྱེད་འགག །འདུ་བྱེད་འགགས་པས་རྣམ་པར་ཤེས་པ་འགག་ཅེས་བྱ་བ་ནས་སྐྱེ་བ་དང་རྒ་ཤི་འགག་ཅེས་བྱ་བའི་བར་དུ་ཡིན་ནོ། །ཇི་ལྟར་དེ་དག་སྤངས་ན་གཞན་དག་ཀྱང་སྤངས་པ་ཡིན་པ་དེ་སྟོན་པ་ནི། སྤངས་པ་ཞེས་བྱ་བ་ནི་ཉོན་མོངས་པ་ཅན་རྣམས་ཀྱི་ཐོབ་བ་རྒྱུན་ཆད་པའོ། །དེ་ལས་གཞན་པ་ནི་དེའི་དམིགས་པ་ཉོན་མོངས་པའི་ཐོབ་པ་རྒྱུན་ཆད་པའོ། །གང་ཞིག་མིག་ལ་འདུན་པ་དང་འདོད་ཆགས་སྤངས་ན་འདུན་པ་དང༌། འདོད་ཆགས་དེ་དག་སྤངས་པ་ཉིད་ཀྱིས་ཁྱོད་ཀྱི་མིག་སྤངས་པ་ཡིན་ནོ་ཞེས་མདོ་སྡེ་ལས་གསུངས་པའི་ཕྱིར་རོ་ཞེས་བྱ་བ་ནི་འོན་ཏེ་འདི་སྤངས་པ་ཡིན་ནོ་ཞེས་བྱ་བ་ནི་སྤངས་པའི་མཚན་ཉིད་སྟོན་པ་ཡིན་ནོ། །དེ་ཡང་མ་རིག་པ་ལ་སོགས་པ་ཅིག་ཅར་ཡིན་གྱི། རིམ་གྱིས་མ་ཡིན་པས་འགོགས་པའི་རིམ་པར་སྟོན་པ་རིགས་པ་མ་ཡིན་ནོ། །འོན་ཏེ་འགོག་པ་ཞེས་བྱ་བ་མ་སྐྱེས་པ་ཡིན་ན་ནི་ཞེས་བྱ་བ་ནི་མ་རིག་པ་འགགས་པས་འདུ་བྱེད་འགག་ཅེས་བྱ་བ་ནི་མ་རིག་པ་མ་སྐྱེས་པས་འདུ་བྱེད་མ་སྐྱེས་པ་ཡིན་ཞེས་བསམས་པ་སྟེ། དེ་བཞིན་དུ་སྐྱེ་བ་མ་སྐྱེས་པས་རྒ་ཤི་མ་སྐྱེས་པ་ཞེས་བྱ་བའི་བར་དུ་ཡིན་ནོ། །འདས་པ་དང་ད་ལྟར་བྱུང་བའི་སྐྱེ་བས་བསྡུས་པའི་ཡན་ལག་རྣམས་མ་སྐྱེས་པ་ཡིན་པར་ཇི་ལྟར་རུང་བ་ཡིན་ཞེས་བྱ་བ་ནི་དེ་དག་སྐྱེས་པ་ཡིན་པའི་ཕྱིར་རོ། །མ་འོངས་པའི་སྐྱེ་བས་བསྡུས་པ་སྐྱེ་བ་དང༌། རྒ་ཤི་རྣམས་ནི་མ་སྐྱེས་པ་ཡིན་པར་རུང་སྟེ། དེ་དག་མ་སྐྱེས་པའི་ཕྱིར་རོ། །དེ་ལྟ་ན་ནི་མི་རྟག་པའི་འགོག་པ་དང༌། སོ་སོར་བརྟགས་པ་དང༌། སོ་སོར་བརྟགས་པ་མ་ཡིན་པའི་འགོག་པའི་སྐྱོན་དུ་འགྱུར་ཏེ། རྣམ་གྲངས་ཀྱིས་དེ་འཆད་པའི་ཕྱིར་རོ་ཞེས་བྱ་བ་ནི་མི་རྟག་པ་དང༌། སོ་སོར་བརྟགས་པ་དང༌། སོ་སོར་བརྟགས་པ་མ་ཡིན་པའི་འགོག་པ་རྣམས་འཆད་པའི་ཕྱིར་རོ་ཞེས་བྱ་བའི་དོན་ཏོ། །རྣམ་པར་འཇིག་པའི་རྣམ་གྲངས་ཀྱིས་ནི་མི་
རྟག་པའི་འགོག་པ་སྟོན་པ་ཡིན་ནོ། །སྤངས་པའི་རྣམ་གྲངས་ཀྱིས་ནི་སོ་སོར་བརྟགས་པའི་འགོག་པའོ། །མ་སྐྱེས་པའི་རྣམ་གྲངས་ཀྱིས་ནི་སོ་སོར་བརྟགས་པ་མ་ཡིན་པའི་འགོག་པ་ཡིན་ནོ། །འོན་ཏེ་ཡང་འགོག་པའི་རིམ་པ་འཆད་པ་ལ་འདི་ལྟར་རྟོག་པར་བྱེད་དེ་ཞེས་རྒྱས་པར་འབྱུང་བ་ནི་འོན་ཏེ་ཡང་རིམ་པ་སྟོན་པ་སྨྲས་ཟིན་པ་རྣམས་ནི་དུམ་བུ་གསུམ་རྣམ་པར་འཇོག་པར་འདོད་པ་ཡིན་ནོ། །འགག་པའི་རིམ་པ་འཆད་པ་ལ་འདི་ལྟར་རྟོག་པར་བྱེད་དེ། སྐྱེ་བ་དེ་ཉིད་ལ་མ་རིག་པ་མ་སྐྱེས་པས་འདུ་བྱེད་རྣམས་མི་སྐྱེ་བ་ཡིན་ནོ། །དེ་ནས་སྐྱེ་བ་གཉིས་པ་ལ་ཡང་རྣམ་པར་ཤེས་པ་མ་སྐྱེས་པ་ཞེས་རྒྱས་པར་བྱས་ནས་སྲིད་པའི་བར་དུ་མ་སྐྱེས་པའི་ཕྱིར་ཞེས་བྱ་བ་ལ། རྒྱས་པའི་ཚིག་གིས་ནི་མིང་དང་གཟུགས་དང༌། སྐྱེ་མཆེད་དྲུག་དང༌། རེག་པ་དང༌། ཚོར་བ་དང༌། སྲེད་པ་དང༌། ལེན་པ་རྣམས་མ་སྐྱེས་པ་སྟོན་ཏོ། །མ་རིག་པ་འདིའི་ཚུལ་གྱིས་སྐྱེ་བ་གཉིས་པའི་སྲིད་པ་མ་སྐྱེས་པའི་ཕྱིར་སྐྱེ་བ་གསུམ་པའི་སྐྱེ་བ་མ་སྐྱེས་པ་དང༌། དེ་དག་ལས་རྒ་ཤིའོ་ཞེས་བྱ་བ་ནི་སྐྱེ་བ་གསུམ་པ་དེ་ཉིད་མ་སྐྱེས་པ་ཡིན་ནོ་ཞེས་སྐབས་དང་སྦྱར་རོ་ཞེ་ན། དེ་ལྟར་ན་སྐྱེ་བ་གསུམ་པ་མ་སྐྱེས་པའི་རིམ་པར་འཆད་པ་ནི་དོན་མེད་པར་འགྱུར་ཞེས་བྱ་བ་ནི་མ་རིག་པའི་རྐྱེན་གྱིས་འདུ་བྱེད་མ་སྐྱེས་པའི་ཕྱིར་ཡང་སྲིད་ཀྱི་རྒྱུ་མེད་པས་ད་ལྟར་བྱུང་བའི་སྐྱེ་བ་སྐྱེ་བ་གཉིས་པས་བསྡུས་པའི་རྣམ་པར་ཤེས་པ་རྣམས་སྐྱེ་བ་མེད་པར་འཆད་པ་ནི་རིགས་པ་ཡིན་ཏེ། རྒྱུ་མ་སྐྱེས་པའི་ཕྱིར་ཡང་སྲིད་སྐྱེ་བ་མེད་དོ་ཞེས་བསྟན་པའི་ཕྱིར་རོ། །སྐྱེ་བ་གསུམ་པའི་རིམ་པ་འཆད་པའི་དོན་ལ་ནི་ཡང་སྲིད་སྐྱེ་བ་མེད་པའི་རིམ་པ་བསྟན་ཟིན་པའི་ཕྱིར་རོ། །འོན་ཏེ་སྐྱེ་བ་གཉིས་པ་མ་སྐྱེས་པའི་ཕྱིར་སྐྱེ་བ་གསུམ་པ་སྐྱེ་བ་མེད་པ་ཡིན་ནོ་ཞེས་བསྟན་པའི་ཕྱིར་སྐྱེ་བ་གསུམ་པ་མ་སྐྱེས་པའི་རིམ་པ་སྟོན་ཏོ་ཞེ་ན། འདིའི་ལན་དུ་ཧ་ཅང་ཐལ་བར་ཡང་འགྱུར་རོ་ཞེས་སྨྲས་ཏེ། སྐྱེ་བ་གསུམ་པ་མ་སྐྱེས་པའི་ཕྱིར་སྐྱེ་བ་བཞི་པ་ཡང་མ་སྐྱེས་པར་འགྱུར་རོ་ཞེས་བྱ་བ་ཡིན་ཏེ། སྐྱེ་བ་བཞི་པ་མ་སྐྱེས་པར་འགྱུར་རོ་ཞེས་བྱ་བ་ནི་སྐྱེ་བ་བཞི་པ་མ་སྐྱེས་པའི་རིམ་པ་ཡང་བསྟན་པར་བྱ་དགོས་པར་འགྱུར་རོ་ཞེས་བྱ་བ་ཡིན་ནོ། །དེ་གང་གི་ཚེ་ལུགས་ལས་བཟློག་པའི་འགོག་པ་སྟོན་ཏེ་ཇི་ལྟ་ཞེ་ན། སྐྱེ་བ་མེད་ན་རྒ་
ཤི་མེད་པར་འགྱུར་རོ་ཞེས་བྱ་བ་དེ་ལྟ་བུ་ལ་བརྟེན་པ་ཡིན་ན་ནི་ཞེས་བྱ་བ་ནི་སྲིད་པ་མེད་ན་སྐྱེ་བ་མི་འབྱུང་ངོ་ཞེས་བྱ་བ་ནས་མ་རིག་པ་ཡོད་པ་མ་ཡིན་ན་འདུ་བྱེད་མི་འབྱུང་ངོ་ཞེས་བྱ་བ་དེའི་ཚེ་གལ་ཏེ་མ་འོངས་པ་སྐྱེ་བ་གསུམ་པའི་སྐྱེ་བ་ལ་རྟོག་ན་ནི་སྐྱོན་དེ་དག་ཉིད་དུ་འགྱུར་རོ་ཞེས་བྱ་བ་ནི་བསྟན་མ་ཐག་པ་དེ་དག་སྟེ། དེ་ལྟ་ན་སྐྱེ་བ་གསུམ་པ་མ་སྐྱེས་པའི་རིམ་པ་སྟོན་པ་དོན་མེད་པར་འགྱུར་བ་དང༌། ཧ་ཅང་ཐལ་བར་འགྱུར་རོ་ཞེས་བྱ་བ་དག་ཡིན་ནོ། །རྒྱུ་དང་བཅས་པ་ད་ལྟར་གྱི་སྐྱེ་བ་ལ་མ་སྐྱེས་པའི་རིམ་པ་སྟོན་པ་རིགས་པ་མ་ཡིན་ཏེ། ཅིའི་ཕྱིར་ཞེ་ན། དེའི་ཕྱིར་དེ་སྐྱེས་པ་ཡིན་པའི་ཕྱིར་དང་ཞེས་སྨྲས་ཏེ། རྒྱུ་དང་བཅས་པ་ད་ལྟར་བྱུང་བའི་སྐྱེ་བ་སྐྱེས་པ་ཡིན་པའི་ཕྱིར་རོ་ཞེས་བྱ་བའི་ཐ་ཚིག་གོ །དགོས་པ་ཡང་མེད་པའི་ཕྱིར་རོ་ཞེས་བྱ་བ་ནི་གལ་ཏེ་སྐྱེས་ཟིན་པ་ལ་ཡང་སྐྱེ་བ་མེད་པའི་རིམ་པ་སྟོན་པར་བྱེད་དོ། །དེ་ལྟར་སྐྱེ་བ་མེད་དོ་ཞེས་དེ་ལ་སྐྱེ་བ་མེད་པའི་རིམ་པ་སྟོན་པ་དགོས་པ་ཡོད་པ་མ་ཡིན་ནོ། །སྔར་ཡན་ལག་རྣམ་པར་གཞག་པ་ལ་ཞེས་བྱ་བ་སྔ་མ་གང་དུ་ཞེ་ན། གང་གིས་འཕེན་དང་ཇི་ལྟར་གང༌། །དེ་སྒྲུབ་བྱེད་པ་དེ་ལ་ཡང༌། །ཉེས་དམིགས་གང་ཡིན་དེ་དག་རྣམས། །ཡན་ལག་བཅུ་གཉིས་རྣམས་ཀྱིས་བསྟན། །ཞེས་བྱ་བ་དེར་ཡིན་ནོ། །གང་སྐྱེས་པས་གང་སྐྱེ་བའམ། འཕེན་པའམ་ཞེས་བྱ་བ་ནི་འདི་ལྟ་སྟེ་མ་རིག་པ་སྐྱེས་པས་འདུ་བྱེད་སྐྱེ་བ་དང༌། འདུ་བྱེད་སྐྱེས་པས་མ་འོངས་པའི་མིང་དང་གཟུགས་དང༌། སྐྱེ་མཆེད་དྲུག་དང༌། རེག་པ་དང༌། ཚོར་བ་འཕེན་པར་བྱེད་པ་ནི་རྣམ་པར་ཤེས་པའི་རྒྱུན་ལ་དེ་དག་གི་ས་བོན་ཡོངས་སུ་རྟས་པར་བྱེད་པའི་ཕྱིར་རོ། །འཕངས་པ་དེ་ལ་མངོན་པར་སྒྲུབ་པར་བྱེད་པ་ནི་གང་སྐྱེས་པས་ཞེས་བྱ་བའི་སྐབས་དང་སྦྱར་རོ། །འདི་ལྟ་སྟེ་སྲེད་པ་ལེན་པ་སྐྱེས་པས་འདུ་བྱེད་ཀྱིས་འཕངས་པའི་མིང་དང་གཟུགས་ལ་སོགས་པའི་ཚོར་བ་ལ་ཐུག་པའི་བར་དུ་རྣམ་པ་བཞི་སྒྲུབ་པར་བྱེད་པ་སྟེ། ལེན་པ་དེས་ལས་རྣམས་སྲིད་པར་གྱུར་པར་མངོན་དུ་བྱེད་པའི་ཕྱིར་རོ། །རྣམ་པར་སྨིན་པའི་ཕུང་པོ་འགྲུབ་པར་བྱ་བའི་ཆེད་དུ། དེ་མ་སྐྱེས་པས་དེ་མི་སྐྱེ་བའམ། མི་འཕེན་པ་འམ་ཞེས་བྱ་བ་ནི་འདི་ལྟ་སྟེ་མ་རིག་པ་མ་སྐྱེས་པས་འདུ་བྱེད་
མི་སྐྱེ་བ་དང་འདུ་བྱེད་མ་སྐྱེས་པས་མིང་དང་གཟུགས་ལ་སོགས་པ་ཚོར་བ་ལ་ཐུག་གི་བར་རྣམ་པ་བཞིའི་སྐྱེ་བ་འཕངས་པ་མེད་པའོ། །འཕངས་པ་ལ་མངོན་པར་སྒྲུབ་པར་བྱེད་པ་མེད་པ་ནི་དེ་མ་སྐྱེས་པས་ཞེས་བྱ་བའི་སྐབས་དང་སྦྱར་ཏེ། འདི་ལྟ་སྟེ་སྲེད་པའི་རྐྱེན་གྱིས་ལེན་པ་མ་སྐྱེས་པས་འདུ་བྱེད་ཀྱིས་འཕངས་པའི་མིང་དང་གཟུགས་ལ་སོགས་པ་ཚོར་བ་ཐུག་པ་རྣམ་པ་བཞིའི་སྐྱེ་བ་རྣམས་དགྲ་བཅོམ་པ་ལ་མངོན་པར་སྒྲུབ་པ་མེད་པའོ། །ཚེ་འདི་ལ་ཚོར་བ་དག་ཡོད་བཞིན་དུ་ཞེས་རྒྱས་པར་འབྱུང་བ་ལ་ཚོར་བ་དག་ཡོད་བཞིན་དུ་ཞེས་བྱ་བ་ནི་ད་ལྟར་བྱུང་བའི་སྐྱེ་བ་ལ་རེག་བའི་རྐྱེན་གྱིས་ཚོར་བ་མི་སྐྱེ་བ་མ་ཡིན། དེ་བས་ན་ཚོར་བ་མ་སྐྱེས་པས་སྲེད་པ་མ་སྐྱེས་པར་ཇི་ལྟར་རུང་བ་བརྗོད་པར་བྱ་དགོས་སོ། །དེ་ལྟར་ན་སྔར་ཡན་ལག་རྣམ་པར་འཇོག་པ་ལ་ཡང་འགོག་པའི་རིམ་པ་སྟོན་པར་སྦྱོར་ནུས་པ་མ་ཡིན་ནོ། །ཚོར་བ་གང་ཡིན་པ་ནི་སྲེད་བའི་རྐྱེན་ཡིན་ཏེ། དེ་མ་སྐྱེས་པའི་ཕྱིར་རོ་ཞེས་བྱ་བ་ཅི་ཞེ་ན། ད་ལྟར་བྱུང་བའི་སྐྱེ་བའི་སྲིད་པ་མ་སྐྱེས་པར་འགྲུབ་པར་འགྱུར་རོ་ཞེས་བྱ་བ་ཡིན་ནོ། །སྲེད་པའི་ས་བོན་གང་ཡིན་བ་དེ་ཡིན་ཏེ་ཞེས་བྱ་བ་ནི་སྲེད་པའི་ས་བོན་ཡིན་པས་དེ་སྲིད་པའི་ས་བོན་ནོ། །དེ་ཡང་སྲེད་པ་དང་མ་བྲལ་བའི་རྒྱུད་ལ་ཡོད་པ་ཡིན་པར་རིག་པར་བྱ་སྟེ། ཚོར་བ་ནི་སྲེད་པའི་བདག་པོའི་རྐྱེན་དང༌། སྲེད་པའི་ས་བོན་དང་རྒྱུ་དང་རྐྱེན་ཅེས་བྱ་བ་ཡིན་ནོ། །མ་རིག་པའི་འདུས་ཏེ་རེག་པ་ལས་སྐྱེས་པ་ཡིན་ནོ་ཞེས་བྱ་བ་ཅི་ཞེ་ན། ཚོར་བ་ནི་སྲེད་པའི་རྐྱེན་ཡིན་ཞེས་བྱ་བ་ཡིན་ཏེ། མ་རིག་པ་དང་མཚུངས་པར་ལྡན་པའི་རེག་པ་དེ་ལས་སྐྱེས་པ་ནི་མ་རིག་པའི་འདུས་ཏེ་རེག་པ་ལས་སྐྱེས་པའོ། །འདིར་ཡང་དུ་མ་བུ་གསུམ་པ་རྣམ་པར་གཞག་པ་བླངས་ཏེ། འགའ་ཞིག་ལན་འདེབས་པ་ཞེས་བྱ་བ་ནི་དེ་ལ་དུམ་བུ་གསུམ་རྣམ་པར་གཞག་པ་དེ་ལ་བརྗོད་པར་བྱ་བ་མང་དུ་འབྱུང་སྟེ། རྒྱུ་དང་བཅས་པའི་རིམ་གྱིས་སྐྱེ་བ་སྟོན་པ་ལ་དགོས་པ་ཅི་ཡོད་ཅེ་ན་ཞེས་བྱ་བ་འདིའི་ལན་ནི། དུས་གསུམ་ལ་རྨོངས་པ་བཟློག་པའི་ཕྱིར་བཅོམ་ལྡན་འདས་ཀྱིས་རྟེན་ཅིང་འབྲེལ་བར་འབྱུང་བའི་དུམ་བུ་གསུམ་བསྟན་ཏེ། འདི་ལྟར་མདོ་སྡེ་གཞན་ལས། བཅོམ་ལྡན་འདས་
ཀྱིས་རྟེན་ཅིང་འབྲེལ་པར་འབྱུང་བ་དང་ཞེས་རྒྱས་པར་འབྱུང་བ་ཡིན་ནོ། །འདི་ལྟར་ཞེས་བྱ་བ་ནི་གང་གི་ཕྱིར་ཞེས་བྱ་བའི་ཐ་ཚིག་གོ །གང་འདི་སྐད་དུ་རྒྱུ་ཁྱད་པར་ཅན་ལས་སྐྱེ་བའི་རིམ་པ་སྟོན་པ་ལ་ཡང་དགོས་པ་བརྗོད་དགོས་སོ། །ཅིའི་ཕྱིར་ཞེ་ན། ད་ལྟར་གྱི་སྐྱེ་བའི་རྒྱུ་ནི་རྣམ་པ་གཉིས་སུ་བསྟན་ཏེ། མ་རིག་པ་དང༌། འདུ་བྱེད་དོ། །མ་འོངས་པའི་སྐྱེ་བའི་རྒྱུ་ནི་རྣམ་པ་གསུམ་སྟེ། འདི་ལྟར་སྲེད་པ་དང༌། ལེན་པ་དང༌། སྲིད་པའོ་ཞེ་ན། འདི་ལ་ལན་ནི། སྔོན་གྱི་མཐར་ཡང་མ་རིག་པའི་སྒོ་ནས་སྲེད་པ་དང་ལེན་པ་ཡང་བསྟན་ཏོ། །ཇི་ལྟ་ཞེ་ན། དེའི་ཕྱིར། ཉོན་མོངས་པ་ཐམས་ཅད་མ་རིག་པ་དང་ལྷན་ཅིག་འབྱུང་བའི་ཕྱིར་རོ་ཞེས་སྨྲས་ཏེ། མ་རིག་པ་དང་ལྷན་ཅིག་འབྱུང་བ་ནི་འདོད་ཆགས་དང༌། ཞེ་སྡང་དང༌། གཏི་མུག་ལ་སོགས་པ་ཉོན་མོངས་པ་ཐམས་ཅད་ཡིན་ཏེ། མ་རིག་པ་ནི་ཉོན་མོངས་པའི་ས་ཆེན་པོ་པ་ཡིན་པའི་ཕྱིར་རོ། །ལས་གང་གིས་སྐྱེ་བ་བྱས་པ་དེ་ནི་འདུ་བྱེད་ཀྱི་སྒྲས་བསྟན་ཏོ། །གང་ལས་སྐྱེ་བ་གཞན་འབྱུང་བར་འགྱུར་བ་དེ་ནི་སྲིད་པའི་སྒྲས་སོ། །དེ་བས་ན་རྒྱུ་ཁྱད་པར་ཅན་མ་ཡིན་པ་ཁོ་ན་ལས་སྐྱེས་པའི་རིམ་པ་འདི་བསྟན་པ་ཡིན་ནོ། །ཁྱད་པར་ཅན་ལས་སྐྱེ་བའི་རིམ་པ་སྟོན་ལ། ཡང་དགོས་པ་བརྗོད་པར་བྱ་དགོས་ལ། འདས་པའི་ལས་ལས་འདིར་ཉིད་མཚམས་སྦྱོར་བའི་རྣམ་པར་ཤེས་པ་ཇི་ལྟར་འབྱུང་ཞེས་བྱ་བའི་ལན་ནི། འདས་པའི་ལས་ཀྱང་ཡོད་པ་ཉིད་ཡིན་ཏེ། དེ་ལས་ཉིང་མཚམས་སྦྱོར་བའི་རྣམ་པར་ཤེས་པ་འབྱུང་བ་ཡིན་གྱི། ལས་ཀྱིས་ཡོངས་སུ་བསྒོས་པའི་སྔོན་གྱི་སྐྱེ་བའི་རྣམ་པར་ཤེས་པའི་རྒྱུན་ལས་ནི་ཅི་ཞེ་ན། ཉིང་མཚམས་སྦྱོར་བའི་རྣམ་པར་ཤེས་པ་འབྱུང་བ་མ་ཡིན་ནོ་ཞེས་བྱ་བ་ཡིན་ནོ། །དེ་ཐམས་ཅད་ཀྱིས་ནུས་པ་མ་ཡིན་ཏེ་ཞེས་རྒྱས་པར་འབྱུང་བ་ནི་ཇི་སྐད་དུ་སྨོས་པའི་ཉེས་པ་སྤང་བའི་ཕྱིར་ལན་སྨྲས་པ་དེ་དག་ཐམས་ཅད་ཀྱིས་ནུས་པ་མ་ཡིན་པར་རིག་པར་བྱའོ། །རེ་ཞིག་དུས་གསུམ་ལ་རྨོངས་པ་བཟློག་པའི་ཕྱིར་བཅོམ་ལྡན་འདས་ཀྱིས་རྟེན་ཅིང་འབྲེལ་པར་འབྱུང་བ་དུམ་བུ་གསུམ་བསྟན་ཏེ་ཞེས་སྨྲས་པ་གང་ཡིན་པ་དེའི་ལན་ནི་གང་ཞིག་ལས་དང་ཉོན་མོངས་པ་ལས་སྐྱེ་བ་འབྱུང་པར་ཤེས་པ་དེ་ནི་དུམ་བུ་གསུམ་བསྟན་པ་མེད་པར་ཡང་སྔོན་གྱི་མཐའ་ལ་སོགས་པ་ལ་རྨོངས་པ་མི་
འབྱུང་ན་སྔོན་གྱི་མཐའ་ལ་སོགས་པའི་རྗེས་སུ་འབྲང་བར་ལྟ་ག་ལ་འགྱུར་ཞེས་བྱ་བ་ནི་ཇི་ལྟར་དུམ་བུ་གསུམ་བསྟན་པ་མེད་པར་ཉོན་མོངས་པ་དང་ལས་དང་ཚེའི་སྐྱེ་བ་འབྱུང་བར་ཤེས་ཤེ་ན། ད་ལྟར་བྱུང་བའམ། མ་འོངས་པའི་སྐྱེ་བའི་རྐྱེན་བཤད་པའི་ཕྱིར་རོ། །སྔོན་གྱི་མཐའ་ཡང་མ་རིག་པའི་སྒོ་ནས་སྲེད་པ་དང་ལེན་པ་ཡང་བསྟན་པ་ཡིན་ཏེ་ཞེས་སྨྲས་པ་གང་ཡིན་པ་དེའི་ལན་ནི། གལ་ཏེ་ཡང་མ་རིག་པའི་སྒོ་ནས་སྲེད་པ་དང་ལེན་པ་ཡང་བསྟན་པ་ཡིན་ན། བསྟན་བཅོས་འདི་དང་ཇི་ལྟར་འགལ་བར་མི་འགྱུར་ཏེ། དེའི་ལས་ནི་ཉོན་མོངས་བ་གཅིག་གི་རྐྱེན་གྱིས་ཡིན་ཏེ། འདི་ལྟ་སྟེ་མ་རིག་པའི་ཞེས་བཅོམ་ལྡན་འདས་ཀྱིས་གསུངས་པ་ཡིན་ནོ། །སྔོན་གྱི་མཐར་སྲེད་པ་དང་ལེན་པ་མ་རིག་པའི་སྒོ་ནས་བསྟན་པ་ཡིན་ན་ཅིའི་ཕྱིར་དབུས་ཀྱི་མཐར་མ་ཡིན་ཞེས་བྱ་བ་ནི་སྲེད་པ་དང་ལེན་པ་མ་རིག་པའི་སྒོ་ནས་མ་བསྟན་ཞེས་བྱ་བའི་སྐབས་དང་སྦྱར་ཏེ། དབུས་ཀྱི་མཐར་ཡང་ཉོན་མོངས་པ་ཐམས་ཅད་མ་རིག་པ་དང་ལྷན་ཅིག་འབྱུང་ངོ༌། །གལ་ཏེ་འདས་པའི་དུས་ལ་མུན་པའི་རྣམ་པར་གྱུར་པའི་ཕྱིར་ཞེས་བྱ་བ་ཅི་ཞེ་ན། འདས་པའི་དུས་ན་སྲེད་པ་དང་ལེན་པ་མ་རིག་པའི་སྒོ་ནས་བསྟན་པ་ཡིན་ཏེ། མུན་པའི་རྣམ་པ་ནི་མ་རིག་པ་ཡིན་ཏེ། འདས་པའི་དུས་ལ་མུན་པའི་རྣམ་པར་གྱུར་བ་དེ་བས་ན་སྲེད་པ་དང་ལེན་པ་མ་རིག་པའི་སྒོ་ནས་བསྟན་པ་ཡིན་གྱི། དབུས་སུ་མ་ཡིན་ནོ་ཞེ་ན། དེའི་ཕྱིར་འདི་གཉིས་ཤིན་ཏུ་ཡང་རྣམ་པར་ཕྱེ་སྟེ་བརྗོད་པར་བྱ་དགོས་སོ་ཞེས་བྱ་བ་ལ། དེ་ཉིད་ཀྱི་ཕྱིར་མུན་པའི་རྣམ་པར་གྱུར་པའི་ཕྱིར་དེ་ནི་འདས་པའི་དུས་སུ་ཤིན་ཏུ་རྣམ་པར་བྱེ་སྟེ་བརྗོད་པར་བྱ་དགོས་ཏེ། མ་རིག་པ་དང༌། འདུ་བྱེད་དང༌། སྲེད་པ་དང༌། ལེན་པའི་དབྱེ་བ་གསུམ་ཆར་ཡང་རྒྱུའི་དངོས་པོ་ཡིན་པར་བསྟན་པའི་ཕྱིར་རོ། །འོན་ཏེ་ད་ལྟར་བྱུང་བས་འདས་པ་གྲུབ་པའི་ཕྱིར་རོ་ཞེས་བྱ་བ་ཅི་ཞེ་ན། འདི་གཉིས་རྣམ་པར་ཕྱེ་སྟེ་བརྗོད་པར་བྱ་མི་དགོས་སོ། །ཇི་ལྟ་ཞེ་ན། ཇི་ལྟར་ད་ལྟར་བྱུང་བའི་སྐྱེ་བའི་ཚེ་སྲེད་པ་དང་ལེན་པ་དང་སྲིད་པ་མཐའ་དག་ཡང་སྲིད་ཀྱི་དངོས་པོ་ཡིན་པ་དེ་བཞིན་དུ་འདས་པ་ན་ཡང་ཡིན་ནོ། །ཆོས་མངོན་པའི་མཛོད་ལས་ཀྱང༌། མདོར་ན་རྒྱུ་དང་
འབྲས་བུ་གཉིས། །དབུས་ལས་རྗེས་སུ་དཔག་པར་བྱ། །ཞེས་སྨྲས་པ་ཡིན་ནོ་ཞེ་ན། དེ་ཉིད་ཀྱི་ཕྱིར་དེ་མ་བསྟན་པར་ཐལ་བར་འགྱུར་རོ་ཞེས་བྱ་བ་ལ། དེ་ཉིད་ཀྱི་ཕྱིར་ད་ལྟར་བྱུང་བས་འདས་པ་གྲུབ་པའི་ཕྱིར་འདས་པ་དེའི་རྒྱུ་མ་བསྟན་པར་ཐལ་བར་འགྱུར་ཏེ། དེ་ལྟར་སྲེད་པ་དང༌། ལེན་པ་དང༌། སྲིད་པ་ལ་བརྟེན་ནས་མ་འོངས་པའི་སྐྱེ་བ་བསྟན་པ་དེ་བཞིན་དུ་ད་ལྟར་བྱུང་བའི་ཡང་སྲེད་པ་དང༌། ལེན་པ་དང༌། སྲིད་པ་ལ་བརྟེན་ནས་ཞེས་རྗེས་སུ་དཔག་པར་ནུས་སོ། །དེ་ཉིད་ཀྱི་ཕྱིར་གང་ཞིག་ལས་དང་ཉོན་མོངས་པ་ལས་སྐྱེ་བ་འབྱུང་བར་ཤེས་པ་དེ་ནི་ཞེས་རྒྱས་པར་བསྟན་པ་ཡིན་ནོ། །ཅིའི་ཕྱིར་དབུས་ཀྱི་ས་ཐར་སྲེད་པའི་རྐྱེན་གྱིས་ལེན་པ་ཞེས་གསུངས་ལ། སྔོན་གྱི་མཐར་ཡང་མ་ཡིན་དབུས་སུ་ཡང་སྲེད་པ་དང་ལེན་པ་གཉིས་ནི་མ་རིག་པ་དང་ལྷན་ཅིག་འདུག་པའི་ཕྱིར་རོ། །ཡང་གི་སྒྲས་གཟུང་བར་བྱ་བ་ཡིན་ནོ། །ལས་གང་གི་སྐྱེ་བ་བྱས་བ་དེ་ནི་འདུ་བྱེད་ཡིན་ལ། གང་བྱེད་པར་འགྱུར་བ་དེ་འདུ་བྱེད་མ་ཡིན་ཏེ། འོ་ན་ཅི་ཞེ་ན། སྲིད་པའོ། །གང་ལས་སྐྱེ་བར་གྱུར་པ་དེ་ནི་སྲིད་པ་མ་ཡིན་ལ། འོ་ན་ཅི་ཞེ་ན། འདུ་བྱེད་དོ། །གང་ལས་འགྱུར་བ། དེ་ནི་སྲིད་པ་ཡིན་ཞེས་བྱ་བ་འདི་ལ་རིགས་པ་ཅི་ཡོད། ཡང་སྲིད་མངོན་པར་འདུ་བྱེད་པའི་དོན་གྱིས་འདུ་བྱེད་ཡིན་ན། སྲིད་པ་ཡང་དེ་བཞིན་ཡིན་ཏེ། འདིས་སྲིད་པར་འགྱུར་བ་ཡིན་ན་སྲིད་པ་ཇི་ལྟར་འདུ་བྱེད་མ་ཡིན། འོན་ཏེ་འདུ་བྱེད་ཡིན་ན་ནི་ཇི་ལྟར་འདུ་བྱེད་མ་ཡིན་ཞིང་སྲིད་པ་མ་ཡིན་པར་འགྱུར། འདས་པའི་ལས་ཡོད་པ་ཁོ་ན་ཡིན་ཏེ། དེ་ལས་ཉིང་མཚམས་སྦྱོར་བའི་རྣམ་པར་ཤེས་པ་འབྱུང་བ་ཡིན་ནོ་ཞེས་གང་སྨྲས་པ་དེའི་ལན་ནི་གང་རང་གི་ཉིད་ཀྱིས་ཡོད་པ་ཁོ་ན་ཡིན་ན་ཇི་ལྟར་དེ་འདས་པ་ཡིན་ཏེ། དེ་ནི་ད་ལྟར་ཉིད་ཅེས་བྱ་བའི་ཆོས་གཞན་ལས་ཅུང་ཟད་ཀྱང་ལོག་པ་མ་ཡིན་ནོ། །ཡང་ན་དེ་ཉིད་ཀྱང་འདས་པ་ཡིན་པར་འགྱུར་གྱི་འདིའི་ཆོས་ནི་མ་ཡིན་པར་འགྱུར་རོ། །གལ་ཏེ་དེ་ཉིད་དེའི་བདག་ཉིད་དུ་གྱུར་པ་ཡིན་ན་ནི་ལྡོག་པ་ཉིད་མི་འགྲུབ་པར་འགྱུར་ཏེ། ཆོས་ཀྱི་རང་གི་མཚན་ཉིད་ཡིན་ན་ལྡོག་པ་མེད་པའི་ཕྱིར་རོ། །དེ་ལ་འདས་པ་ཞེས་བྱ་བའི་ཆོས་གཞན་ཡང་ཅུང་ཟད་ཀྱང་ཡོད་པ་མ་ཡིན་
ནོ། །རྟེན་ཅིང་འབྲེལ་ཏེ་འབྱུང་བ་ཡིན་པའི་ཕྱིར་མ་བྱུང་བ་ལས་བྱུང་བ་ལས་བྱུང་བ་དེ་ཡང་འདས་པ་ཡིན་པར་ཐལ་བར་འགྱུར་རོ། །ཡང་ན་བདག་ཉིད་ཡོད་པ་ཐམས་ཅད་འདས་པ་ཡིན་པར་ཐལ་བར་འགྱུར་ཏེ། མ་འོངས་པའམ་ད་ལྟར་བྱུང་བ་ནི་མ་ཡིན་པར་འགྱུར་ཏེ། ཆོས་ཀྱི་མཚན་ཉིད་ནི་ནམ་ཡང་མེད་པ་མ་ཡིན་པའི་ཕྱིར་མ་འོངས་པ་དེ་ཡང་ཡོད་པ་ཁོ་ནར་འགྱུར་རོ། །འདས་པ་གང་ཡིན་པ་ཡོད་དོ་ཞེས་བྱ་བས་གང་དུ་གང་ལ་ཅི་ཞིག་ནུས་པ་ཡོད་ན་ཞེས་བྱ་བ་ནི་གང་དུ་དངོས་པོ་ཡང་དག་བ་པའི་ནུས་པ་ཅི་ཞིག་ཡོད། བསྐྱེད་པར་བྱ་བའི་ཕྱིར་རམ། དྲང་བར་བྱ་བའི་ཕྱིར་རམ། གནས་སྐབས་གཞན་དུ་སྤང་བར་བྱ་བའི་ཕྱིར་ཡིན། ཐམས་ཅད་དུ་བརྟགས་ན་སྲིད་པ་མ་ཡིན་ཏེ། སྐྱེ་བར་བྱ་བའི་ཕྱིར་ཡང་ནུས་པ་ཡོད་པ་མ་ཡིན་ཏེ། ཆོས་ཀྱི་རང་གི་མཚན་ཉིད་ནི་མ་བྱུང་བ་ལས་འབྱུང་བ་མ་ཡིན་པའི་ཕྱིར་རོ། །དྲང་བར་བྱ་བའི་ཕྱིར་ཡང་ནུས་པ་མ་ཡིན་ཏེ། འདུ་བྱེད་རྣམས་བྱ་བ་བྱེད་པ་མེད་པའི་ཕྱིར་རོ། །གནས་སྐབས་གཞན་དུ་སྤང་བར་བྱ་བའི་ཕྱིར་ཡང་ནུས་པ་མ་ཡིན་ཏེ། མ་འོངས་པ་ནི་ད་ལྟར་བྱུང་བ་ཞེས་བྱ་བར་འགའ་ཡང་རྒྱུ་དང་རྐྱེན་ལས་འབྱུང་བ་མ་ཡིན་ལ་བདག་ཉིད་ཀྱང་ཡོད་པ་མ་ཡིན་ནོ། །ཆོས་ཀྱི་རང་གི་མཚན་ཉིད་ནི་རྒྱུ་རྐྱེན་གྱིས་རབ་ཏུ་ཕྱེ་བ་མ་ཡིན་པའི་ཕྱིར་ཇི་ལྟར་འདུ་བྱེད་འདས་པ་དག་ནི་རང་གི་མཚན་ཉིད་ཡོད་པ་ཉིང་མཚམས་སྦྱོར་བའི་རྣམ་པར་ཤེས་པའི་རྐྱེན་ཡིན་གང་ཡང་ད་ལྟར་བྱུང་བ་ལས་གནས་སྐབས་གཞན་གཉིས་པོ་བྱེ་བྲག་ཡོད་པ་མ་ཡིན་ཞེས་བྱ་བ་ནི་གཉིས་པོ་ནི་འདས་པ་དང་མ་འོངས་པའི་གནས་སྐབས་ཏེ། འོན་ཏེ་འདི་ལས་གནས་སྐབས་གཉིས་པོ་བྱེ་བྲག་ཡོད་པ་མ་ཡིན་ན་མ་འོངས་པ་ཡང་ད་ལྟར་བྱུང་བ་ཡིན་པར་འགྱུར་རོ། །འདས་པ་ཡང་དེ་ལྟར་མ་འོངས་ན་གང་དུ་གང་ལ་ཅི་ཞིག་ནུས་པ་ཡོད། དེ་དག་འདི་ལས་བྱེ་བྲག་ཡོད་པ་མ་ཡིན་ན་མ་བྱུང་ས་ལས་བྱུང་བ་དང༌། བྱུང་ནས་ཀྱང་མེད་པ་ཡིན་པར་གྲུབ་པ་ཡིན་ནོ། །དེས་ཅིར་འགྱུར་ཅེ་ན། དེའི་ཕྱིར་དེ་ཉིད་དང་ལྡན་པ་ཡིན་ན་ཅིའི་ཕྱིར་མ་བྱུང་བ་ལས་བྱུང་བ་ལས། བྱུང་བ་ནས་མེད་པར་ཡང་མི་འདོད་ཅེས་སྨྲས་ཏེ། བྱེ་བྲག་ཅན་དེ་ཉིད་ཀྱི་བྱེ་བྲག་རང་གི་མཚན་ཉིད་མ་བྱུང་བ་ལས་བྱུང་བ་དང༌།
བྱུང་ནས་ཀྱང་མེད་པ་ཡིན་པར་ཅིའི་ཕྱིར་མི་འདོད། དེ་ལྟར་ན་འདུ་བྱེད་འདས་པ་ཁོ་ནའི་རྐྱེན་གྱིས་འདིར་ཉིང་མཚམས་སྦྱོར་བའི་རྣམ་པར་ཤེས་པ་འགྲུབ་བར་འགྱུར་བ་མ་ཡིན་ནོ། །དེ་བས་ན་ལས་གྱིས་ཀྱང་ཡོངས་སུ་བསྒོས་པའི་སྔོན་གྱི་སྐྱེ་བའི་རྣམ་པར་ཤེས་པ་ལས་འདིར་ཉིང་མཚམས་སྦྱོར་བའི་རྣམ་པར་ཤེས་པ་ཡིན་པར་གདོན་མི་ཟ་བར་ཁས་བླང་བར་བྱའོ། །དེ་ལྟར་ཡིན་ན་ཡང་རྣམ་པར་ཤེས་པ་ད་ལྟར་བྱུང་བ་ལྟར་བྱུང་པའི་ཡན་ལག་ཡིན་པར་ཇི་ལྟར་འགྲུབ་པར་འགྱུར། སྔོན་དང་ཕྱི་མར་གཉིས་གཉིས་བར་དུ་བརྒྱད་ཡིན་ནོ་ཞེས་བརྗོད་པར་བྱ་བ་ཡིན་ནོ། ཅི་དུམ་བུ་གསུམ་རྣམ་པར་གཞག་པ་མེད་པ་ཁོ་ན་ཡིན་ནམ། རྟེན་ཅིང་འབྲེལ་པར་འབྱུང་བ་ནི་དུམ་བུ་གསུམ་ཡིན་པའི་ཕྱིར་རོ་ཞེ་ན། སློབ་དཔོན་གྱིས་དེ་ཐམས་ཅད་ཕྱིན་ཅི་མ་ལོག་པར་རྟོགས་པ་དེའི་ཕྱིར་ཡོད་པ་ཡིན་ཏེ། གཞན་དུ་ཡིན་ནོ་ཞེས་སྨྲས་ཏེ། དུམ་བུ་གསུམ་རྣམ་པར་གཞག་པ་དེ་ཡང་རྣམ་པ་གཞན་གྱི་ཚུལ་དུ་ཡོད་པ་ཡིན་ཏེ། གང་གིས་ཇི་ལྟར་གང་འཕངས་པའི་དུམ་བུ་གཅིག་ཡིན་ཏེ། ད་ལྟར་གྱི་མ་རིག་པའི་རྐྱེན་གྱིས་བྱུང་བའི་འདུ་བྱེད་ཀྱིས་འཕངས་པ་དེ་ནི་རྣམ་པར་ཤེས་པའི་རྒྱུད་ལ་མིང་དང་གཟུགས་ལ་སོགས་པའི་ས་བོན་ཡོངས་སུ་བརྟས་པར་བྱས་པ་སྟེ། མིང་དང་གཟུགས་དང༌། སྐྱེ་མཆེད་དྲུག་དང༌། རེག་པ་དང༌། ཚོར་བ་རྣམ་པར་འཕངས་པ་ཡིན་ནོ། །དེ་ལྟར་བྱས་ན་འཕངས་པའི་དུམ་བུ་གཅིག་ནི་ཡན་ལག་བདུན་ཡིན་ནོ། །གང་གིས་ཇི་ལྟར་གང་མངོན་པར་འགྲུབ་པ་དེ་ནི་མངོན་པར་འགྲུབ་པ་དུམ་བུ་གཉིས་པ་ཡིན་ནོ་ཞེས་བྱ་བ་ནི་སྲེད་པའི་རྐྱེན་གྱིས་བྱུང་བའི་ལེན་པས་མངོན་པར་འགྲུབ་པར་བྱེད་དེ། དེ་གཉིས་ཀྱིས་འདུ་བྱེད་ཀྱིས་ཡོངས་སུ་བསྒོས་པ་རྣམས་མངོན་དུ་འགྱུར་པར་བྱེད་པའི་ཕྱིར་ཏེ། འདུ་བྱེད་ཀྱིས་འཕངས་པ་མིང་དང་གཟུགས་ནས་ཚོར་བ་ལ་ཐུག་གི་བར་དུ་སྐྱེ་བ་རྣམ་པ་བཞི་མ་འོངས་པ་ན་བདག་ཉིད་ཐོབ་པར་མངོན་དུ་གྲུབ་པར་བྱེད་དོ། །དེ་ལྟར་ན་མངོན་པར་འགྲུབ་པའི་དུམ་བུ་ནི་ཡན་ལག་བཞི་ཡིན་ཏེ། སྲེད་པ་དང༌། ལེན་པ་དང༌། སྲིད་པ་དང་སྐྱེ་བའོ། །དེ་མངོན་
པར་གྲུབ་ན་ཉེས་དམིགས་གང་ཡིན་པ་དེ་ནི་ཉེས་དམིགས་དུམ་བུ་གཅིག་སྟེ། གསུམ་པ་ཡིན་ནོ་ཞེས་བྱ་བ་ནི་རྒ་ཤི་ཉིད་དུམ་བུ་གསུམ་པ་སྟེ། རྟེན་ཅིང་འབྲེལ་པར་འབྱུང་བ་ཡིན་ནོ། །དུས་གསུམ་དུ་དབྱེ་བ་ཉིད་ཀྱིས་གཞན་དུ་དུམ་བུ་གསུམ་རྣམ་པར་གཞག་པ་ལས་བརྩམས་པའི་ལུང་ནི་འདི་ལྟ་སྟེ་ཞེས་བྱ་བ་ལ་གཞན་དུ་ཞེས་བྱ་བ་ནི་སྔོན་དང་ཕྱི་མའི་མཐའ་དང་དབུས་མ་ཡིན་གྱི་དུས་གསུམ་དུ་ཕྱེ་ནས་ཡིན་ནོ། །དེ་ཡང་འདི་སྐད་ཅེས་བསྟན་ཏེ། རྟེན་ཅིང་འབྲེལ་པར་འབྱུང་བ་ཡན་ལག་བཅུ་གཉིས་ལས་ཡན་ལག་དུ་ཞིག་འདས་པ་ལགས། བཀའ་སྩལ་པ་གཉིས་ཏེ། མ་རིག་པ་དང༌། འདུ་བྱེད་དོ། །སྐྱེས་པ་འགག་བའི་དོན་ཏེ་ཞེས་བྱ་བ་ནི་ད་ལྟར་བྱུང་བའི་སྐྱེ་བ་ཉིད་དེ་ལས་སྐྱེས་པ་འགག་པའི་ཕྱིར་རོ། །སྐྱེ་བ་སྔ་མ་པ་མ་ཡིན་པའི་དོན་གྱིས་སོ་ཞེས་བྱ་བ་ཅི་ཞེ་ན། འདས་པར་བསྟན་ཏོ། །མ་འོངས་པ་དུ་ཞིག །བཀའ་སྩལ་པ་གཉིས་ཏེ། སྐྱེ་བ་དང་རྒ་ཤིའོ། །ཡན་ལག་བཞི་པ་ཅན་གྱི་སྐྱེ་བ་ཉེས་དམིགས་དང་བཅས་པ་བར་མ་ཆད་པར་མངོན་པར་འགྲུབ་པ་ཐོབ་པའི་དོན་གྱིས་དང་ཞེས་བྱ་བ་ནི་མིང་དང་གཟུགས་དང་ཚོར་བ་ལ་ཐུག་པ་ཡན་ལག་བཞི་པ་འདུ་བྱེད་གྱིས་འཕངས་པའི་སྐྱེ་བ་དང༌། རྒ་ཤི་རྣམས་དེ་མ་ཐག་ཏུ་མངོན་པར་འགྲུབ་པའི་དོན་གྱིས་མ་འོངས་པར་རྣམ་པར་གཞག་གོ །ལན་གྲངས་གཞན་མ་ཡིན་པའི་དོན་གྱིས་སོ་ཞེས་བྱ་བ་ཅི་ཞེ་ན། མ་འོངས་པ་ཞེས་བྱའོ། །བར་མ་ཆད་པ་ནི་འདིར་མདོ་སྡེ་ལས་བརྗོད་པར་བཞེད་པའི་ཕྱིར་རོ། །དེ་ནི་མ་འོངས་པ་མ་ཡིན་ཏེ། སྐྱེས་པ་ཡིན་པའི་ཕྱིར་རོ།། ད་ལྟར་བྱུང་བ་དུ་ཞིག །བཀའ་སྩལ་པ། བརྒྱད་དེ། རྣམ་པར་ཤེས་པ་ནི་ནུས་པ་ཡོངས་སུ་འཛིན་པ་ད་ལྟར་བྱུང་བ་ཡིན་པའི་དོན་གྱིས་སོ་ཞེས་བྱ་བ་ཅི་ཞེ་ན། ད་ལྟར་བྱུང་བ་ནི་དབང་པོ་དང་ཡིད་ལ་བྱེད་པ་ལས་མངོན་པར་འགྲུབ་པའི་རྣམ་པར་ཤེས་པ་ཡིན་གྱི། རང་གི་མཚན་ཉིད་ད་ལྟར་བྱུང་བའི་དོན་གྱིས་ད་ལྟར་བྱུང་བ་ཅི་ཞེ་ན། རྣམ་པར་གཞག་པ་མ་ཡིན་གྱི། འོ་ན་ཅི་ཞེ་ན། འདུ་བྱེད་ཀྱིས་འཕངས་པ་མིང་དང་གཟུགས་ལ་སོགས་པ་སྐྱེ་བར་ནུས་པ་ཡོངས་སུ་འཛིན་པ་ད་ལྟར་བྱུང་བ་ཡིན་པའི་དོན་གྱིས་ཀྱང་ཡིན་ནོ། །མ་རིག་པའི་རྐྱེན་ལས་བྱུང་བའི་འདུ་བྱེད་ཀྱིས་འཕངས་
པའི་མིང་དང་གཟུགས་ལ་སོགས་པ་ནི་ས་བོན་གྱི་གནས་སྐབས་ཡིན་པའི་ཕྱིར་ས་བོན་གྱི་མཚན་ཉིད་ད་ལྟར་བྱུང་བའི་དོན་གྱིས་ད་ལྟར་བྱུང་བར་རྣམ་པར་གཞག་གོ །སྲེད་པ་ལ་སོགས་པ་ནི་ལས་བྱེད་པ་ད་ལྟར་བྱུང་བ་ཡིན་པའི་དོན་གྱིས་ཤེ་ན། ད་ལྟར་བྱུང་བའོ། །སྲིད་པ་ལ་སོགས་པ་ཞེས་བྱ་བ་ནི་སྲེད་པ་དང༌། ལེན་པ་དང༌། སྲིད་པའོ། །དེ་ལ་སྲེད་པ་དང་ལེན་པའི་ཡན་ལག་ནི་སྲེད་པར་བྱེད་པའི་ལས་ཅན་ཡིན་ནོ་ཞེས་བྱ་བ་ནི་སྲེད་པའི་རྐྱེན་གྱིས་བྱུང་བའི་ལེན་པས་རྣམ་པར་ཤེས་པའི་རྒྱུན་ལ་བག་ཆགས་སུ་འདུག་པའི་ལས་རྣམས་སྲིད་པར་གྱུར་པར་བྱེད་དོ། །སྲིད་པའི་ཡན་ལག་ནི་སྐྱེ་བའི་གནས་བྱེད་པའི་ལས་ཅན་ཡིན་ནོ་ཞེས་བྱ་བ་ལ། ཇི་སྐད་དུ། བཅོམ་ལྡན་འདས་ཀྱིས་ལས་ནི་ཞིང་ཡིན་ཞེས་གསུངས་ཏེ། ལས་དང་སྲིད་པ་ལ་མ་བརྟེན་པར་སྐྱེ་བ་ཡོད་པ་མ་ཡིན་པའི་ཕྱིར་རོ། །དེ་ལྟར་ན་དེ་དག་ནི་རིགས་པ་དང༌། ལུང་ལ་བརྟེན་ནས་བདག་གིས་སྟོན་ཏོ་ཞེས་བྱ་བ་ལ་རེ་ཞིག་རིགས་པ་ལ་བརྟེན་པ་ནི་འདི་ལྟར་འགོག་པའི་རིམ་པ་འཆད་པ་ནི་ཐམས་ཅད་དུ་མི་འགྲུབ་པ་དང༌། འདུ་བྱེད་འདས་པ་ཁོ་ནའི་རྐྱེན་གྱིས་འདིར་ཉིང་མཚམས་སྦྱོར་བའི་རྣམ་པར་ཤེས་པ་འགྲུབ་པར་འགྱུར་བར་མ་ཡིན་ཏེ། ས་བོན་འགགས་ནས་རིང་དུ་ལོན་པ་ལས་མྱུ་གུ་འབྱུང་བར་མ་མཐོང་བ་དང་རྒྱུ་དང་བཅས་པའི་སྐྱེ་བའི་རིམ་པ་ཡང་དགོས་པ་མེད་པར་མངོན་པ་དང་རྒྱུ་ཁྱད་པར་ཅན་ལས་སྐྱ་བའི་རིམ་པ་ཡང་དགོས་པ་མ་ཡིན་པ་དང༌། རྣམ་པར་ཤེས་པ་དང་མིང་དང་གཟུགས་ཀྱི་གནས་སྐབས་གཉིས་ལ་ཡང་བྱེ་བྲག་ངེས་པར་མི་ཟིན་པའོ། །ལུང་ལ་བརྟེན་པ་ནི་དང་པོའི་བྱེ་བྲག་རྣམ་པར་འབྱེད་པའི་ཆོས་ཀྱི་རྣམ་གྲངས་དང་དེ་བཞིན་དུ་ལས་ནི་སྐྱེ་བར་བྱ་བ་ལ་རྒྱུ་ཡིན་ནོ། །སྲིད་པ་ནི་མངོན་པར་འགྲུབ་པར་བྱ་བ་ལ་རྒྱུ་ཡིན་ནོ་ཞེས་བྱ་བ་མདོ་སྡེ་ཡིན་ཏེ། སྔོན་གྱི་སློབ་དཔོན་དག་ནི་ལུང་གཞན་དང་གཞན་ལ་བརྟེན་ཏོ། །ས་སྟོན་པའི་མདོ་སྡེ་ལས་འབྱུང་བ་དུས་གསུམ་ལས་ཞེས་རྒྱས་པར་འབྱུང་བ་དེ་དག་གིས་ནི་སྔར་བསྟན་པའི་རྣམ་པར་གཞག་པ་རྣམས་འགལ་བར་སྟོན་ཏོ། །འདི་དག་ལ་དགོངས་པ་ཅི་ཡོད་ཅེས་འདི་ལ་འབད་པར་བྱ་དགོས་ཏེ་ཞེས་
བྱ་བ་ནི་ཇི་ལྟར་འདི་མི་འགལ་བའི་འགྱུར་བའོ། །སེམས་ཅན་རྣམས་ཀྱི་མོས་པ་སྣ་ཚོགས་དང༌། ཁམས་སྣ་ཚོགས་དང༌། གཉེན་པོ་སྣ་ཚོགས་ལ་ལྟོས་ནས་དེ་འཇུག་པའི་ཕྱིར་རོ་ཞེས་བྱ་བ་ནི་བཤད་པ་འཇུག་པའི་ཕྱིར་ཞེས་བྱ་བའི་དོན་ཏོ། །མོས་པ་སྣ་ཚོགས་ལ་ལྟོས་ནས་སངས་རྒྱས་བཅོམ་ལྡན་འདས་ཀྱིས་ཆོས་སྟོན་པ་འཇུག་གོ །ཁམས་སྣ་ཚོགས་ལ་ལྟོས་པ་དང༌། གཉེན་པོ་སྣ་ཚོགས་ལ་ཡང་ལྟོས་པ་ཡིན་ནོ། །དེ་བས་ན་དགོངས་པ་ཐ་དད་པས་དེ་དག་ཐམས་ཅད་མི་འགལ་ལོ། །སེམས་ཅན་གྱི་བསམ་པ་ཐ་དད་པ་མི་རྟོགས་པས། འདི་བརྗོད་པར་བྱ་སྟེ་ཞེས་རྒྱས་པར་འབྱུང་བ་ལ། ཇི་ལྟར་མདོ་སྡེ་འདི་ལས་ཞེས་བྱ་བ་ནི་རྟེན་ཅིང་འབྲེལ་པར་འབྱུང་བའི་མདོ་སྡེ་འདི་ལས་སོ། །རྟེན་ཅིང་འབྲེལ་པར་འབྱུང་བའི་མདོ་སྡེ་འདི་ལས་ཀྱང་ཇི་ལྟར་ཡིན། འདི་ལས་རྟེན་ཅིང་འབྲེལ་པར་འབྱུང་བའི་རིམ་པ་ཇི་ལྟར་ཡིན་ཞེ་ན། མ་རིག་པའི་རྐྱེན་གྱིས་འདུ་བྱེད་དང༌། འདུ་བྱེད་ཀྱི་རྐྱེན་གྱིས་རྣམ་པར་ཤེས་པ། རྣམ་པར་ཤེས་པའི་རྐྱེན་གྱིས་མིང་དང་གཟུགས། མིང་དང་གཟུགས་ཀྱི་རྐྱེན་གྱིས་སྐྱེ་མཆེད་དྲུག་ཅེས་བྱ་བ་ལ་སོགས་པའོ། །རྒྱུ་དང་བཅས་རྐྱེན་དང་བཅས་གཞི་དང་བཅས་པའི་ཆོས་ཀྱི་རྣམ་གྲངས་ལས་གང་གསུངས་པ་ཞེས་རྒྱས་པར་འབྱུང་བ་དེ་ལ། རྒྱུ་དང་བཅས་རྐྱེན་དང་བཅས་གཞི་དང་བཅས་པའི་ཆོས་ཀྱི་རྣམ་གྲངས་ལས་རྟེན་ཅིང་འབྲེལ་པར་འབྱུང་བའི་རིམ་པ་གཞན་དུ་གསུངས་ཏེ། དགེ་སློང་དག་ཚུལ་བཞིན་མ་ཡིན་པ་ཡིད་ལ་བྱེད་པའི་རྒྱུ་ཅན་ནི་མ་རིག་པའོ་ཞེས་འབྱུང་ན་འདིར་ནི་མ་རིག་པའི་རྐྱེན་མ་གསུངས་སོ། །མ་རིག་པའི་རྒྱུ་ཅན་ནི་སྲེད་པའོ་ཞེས་འབྱུང་བ་འདིར་ནི་ཚོར་བའི་རྐྱེན་གྱིས་སྲེད་པ་ཞེས་གསུངས་ལ། མ་རིག་པའི་རྐྱེན་གྱིས་ནི་འདུ་བྱེད་ཅེས་གསུངས་སོ། །སྲིད་པའི་རྒྱུ་ཅན་ནི་ལས་སོ་ཞེས་གསུངས་ན་འདིར་ནི་སྲིད་པའི་རྒྱུ་ཅན་ནི་ལས་ཞེས་མ་གསུངས་སོ། །འོ་ན་ཅི་ཞེ་ན། མ་རིག་པའི་རྐྱེན་གྱིས་ལས་ཞེས་གསུངས་སོ། །ལས་ཀྱི་རྒྱུ་ཅན་ནི་མིག་ནས་ཡིད་ཀྱི་བར་དུ་ཡིན་ནོ་ཞེས་བྱ་བ་ལ། བར་གྱི་སྒྲས་རྣ་བ་དང༌། སྣ་དང༌། ལྕེ་དང༌། ལུས་རྣམས་གསུངས་ན་འདིར་ནི་ལས་ཀྱི་རྐྱེན་གྱིས་སྐྱེ་མཆེད་དྲུག་མ་གསུངས་སོ། །འོ་ན་ཅི་ཞེ་ན།
མིང་དང་གཟུགས་ཀྱི་རྐྱེན་གྱིས་ཞེས་གསུངས་སོ། །དེ་འགལ་བར་འགྱུར་རོ་ཞེས་བྱ་བ་ནི་རྒྱུ་དང་བཅས་རྐྱེན་དང་བཅས་གཞི་དང་བཅས་པའི་ཆོས་ཀྱི་རྣམ་གྲངས་ལས་གསུངས་པ་དེའོ། །འོན་ཏེ་རིམ་པ་དེ་ཁོ་ན་ལྟ་བུ་ཡིན་ན་ནི་ཞེས་བྱ་བ་ནི་རྒྱུ་དང་བཅས་རྐྱེན་དང་བཅས་གཞི་དང་བཅས་པའི་ཆོས་ཀྱི་རྣམ་གྲངས་འདི་ལས་ཚུལ་བཞིན་མ་ཡིན་པ་ཡིད་ལ་བྱེད་པའི་རྒྱུ་ཅན་ནི་མ་རིག་པའོ་ཞེས་རྒྱས་པར་འབྱུང་བའོ། །མདོ་སྡེ་འདི་འགལ་བར་འགྱུར་རོ་ཞེས་བྱ་བ་ནི་རྟེན་ཅིང་འབྲེལ་པར་འབྱུང་བ་དང་མདོ་སྡེ་འདི་སྟེ། འདི་ལྟར་དེ་ལས་རྟེན་ཅིང་འབྲེལ་པར་འབྱུང་བའི་རིམ་པ་གཞན་དུ་འབྱུང་ངོ༌། །འགལ་བ་མེད་དེ་དེ་ནི་དགོངས་པ་ཅན་ཡིན་པའི་ཕྱིར་རོ་ཞེས་བྱ་བ་ལ། དེ་ནི་ཞེས་བྱ་བ་ནི་རྒྱུ་དང་བཅས་རྐྱེན་དང་བཅས་གཞི་དང་བཅས་པའི་ཆོས་ཀྱི་རྣམ་གྲངས་ལས་གསུངས་པའོ། །ཇི་ལྟ་ཞེ་ན། དེའི་ཕྱིར་དེར་ནི་སྲེད་པ་དང༌། ལེན་པ་དག་ཡན་ལག་གཅིག་ཏུ་བྱས་ཏེ། མ་རིག་པའི་རྒྱུ་ཅན་ནི་སྲེད་པའོ་ཞེས་བསྟན་ཏོ། །ཅིའི་ཕྱིར་ཞེ་ན་དེའི་ཕྱིར་འདོད་པ་ལ་འདུན་པ་དང་འདོད་ཆགས་པ་ནི་སྲེད་པའི་བྱེ་བྲག་ཡིན་པའི་ཕྱིར་རོ་ཞེས་སྨྲས་ཏེ། འདོད་པ་དང༌། ལྟ་བ་དང༌། ཚུལ་ཁྲིམས་དང་བརྟུལ་ཞུགས་དང༌། བདག་ཏུ་སྨྲ་བ་ལ་འདུན་པ་དང༌། འདོད་ཆགས་པ་ནི་སྲིད་པའི་རབ་ཏུ་དབྱེ་བ་ཡིན་པའི་ཕྱིར་རོ། །ཚོར་བ་དང་སྲེད་པ་ནི་སྲེད་པའི་སྒྲས་བསྟན་ཏོ། །འདོད་པ་དང༌། ལྟ་བ་དང༌། ཚུལ་ཁྲིམས་དང་བརྟུལ་ཞུགས་དང༌། བདག་ཏུ་སྨྲ་བ་སྲེད་པ་ལས་ཕྱེ་བ་རྣམས་ནི་ལེན་པའི་སྒྲས་བསྟན་ཏོ། །སྲེད་བའི་གནས་སྐབས་ཀྱི་ལས་ནི་ལས་ཡིན་པར་སྲེད་པའི་རྒྱུ་ཅན་ནི་ལས་སོ་ཞེས་གསུངས་ཀྱི་རང་གི་ངོ་བོའི་གནས་སྐབས་ནི་མ་ཡིན་ནོ། །སྐྱེ་མཆེད་དྲུག་གི་གནས་སྐབས་ཀྱི་རྐྱེན་ནི་སྐྱེ་མཆེད་དྲུག་ཡིན་པར་ལས་ཀྱི་རྒྱུན་མི་གནས་ཡིད་ཀྱི་བར་དུ་ཡིན་ནོ་ཞེས་གསུངས་པ་འདི་ལ་འགལ་བ་ཅི་ཡོད། དེ་ལྟ་ན་མངོན་པར་འགྲུབ་པའི་རྟེན་ཅིང་འབྲེལ་པར་འབྱུང་བའི་མདོ་སྡེ་ལས་དགོངས་ནས་དེ་སྐད་གསུངས་ཀྱི་འཕེན་པར་བྱེད་པ་ལ་ནི་མ་ཡིན་ནོ་ཞེས་བྱ་བ་ནི་རྟེན་ཅིང་འབྲེལ་པར་འབྱུང་བ་ནི་རྣམ་པ་གཉིས་ཏེ། འཕེན་པར་བྱེད་པ་དང༌། མངོན་པར་འགྲུབ་པར་བྱེད་པའོ་
དེ་ལ་མངོན་པར་འགྲུབ་བའི་རིམ་པ་ནི། དེ་ཉིད་ཡིན་ཏེ། ཇི་ལྟ་ཞེ་ན། རྟེན་ཅིང་འབྲེལ་པར་འབྱུང་བའི་མདོ་སྡེ་འདི་ལས་ཚོར་བའི་རྐྱེན་གྱིས་སྲེད་པ་གང་ཡིན་པ་དེའི་སྤྱིའི་རྐྱེན་ནིམ་རིག་པ་ཡིན་ཏེ། རྨོངས་ན་དེ་འབྱུང་བའི་ཕྱིར་རོ། །ལེན་པ་སྲིད་པའི་རྐྱེན་གྱིས་ནི་ལས་ཀྱི་སྲེད་པ་ཡིན་ནོ། །ལས་ཀྱི་སྲིད་པའི་རྐྱེན་གྱིས་ནི་སྐྱེ་མཆེད་དྲུག་གི་གནས་ཀྱི་སྐྱེ་བ་ཡིན་ཏེ། སྐྱེ་བ་ནི་ཡོངས་སུ་རྫོགས་པའི་ཚེས་བསྡུས་པ་ཡིན་གྱི། ཉིང་མཚམས་སྦྱོར་བའི་མཚན་ཉིད་ཁོ་ན་ནི་མ་ཡིན་ནོ། །མ་རིག་པའི་རྐྱེན་གྱིས་སྲེད་པ་ཞེས་བྱ་བ་ནི་སྲེད་པ་ཐམས་ཅད་ཀྱི་སྤྱིའི་རྐྱེན་ཉིད་ལ་དགོངས་ཏེ། ཆོས་ཀྱི་རྣམ་གྲངས་དེ་ལས་གསུངས་སོ། །འདིར་ནི་བྱེ་བྲག་གི་རྐྱེན་བརྗོད་པར་བཞེད་དོ། །དེ་བས་ན་ཚོར་བའི་བྱེ་བྲག་གིས་སྲེད་པའི་བྱེ་བྲག་བསྟེན་པའི་ཕྱིར་ཚོར་བའི་རྐྱེན་གྱིས་སྲེད་པ་ཞེས་གསུངས་སོ། །དེར་ཡང་མ་རིག་པའི་རྗེས་སུ་འཇུག་པའི་ཚུལ་བཞིན་མ་ཡིན་པ་ཡིད་ལ་བྱེད་པ་རྐྱེན་ཡིན་པར་གསུངས་ཀྱི་རབ་ཏུ་འཇུག་པའི་ཚུལ་གྱིས་ནི་མ་ཡིན་ནོ། །ཇི་ལྟ་ཞེ་ན། དེའི་ཕྱིར་དེ་མ་རིག་པས་བསྐྱེད་པའི་ཕྱིར་རོ་ཞེས་སྨྲས་ཏེ། དེ་ཞེས་བྱ་བ་ནི་ཚུལ་བཞིན་མ་ཡིན་པ་ཡིད་ལ་བྱེད་པ་ཞེས་བྱ་བའི་དོན་ཏོ། །རྨོངས་པ་ཡོད་ན་ཚུལ་བཞིན་མ་ཡིན་པ་ཡིད་ལ་བྱེད་བ་ཡིན་གྱི། མ་རྨོངས་པར་ནི་མ་ཡིན་ནོ། །དེ་སྐད་དུ་དེ་ཉིད་ལས་གསུངས་སོ། །ཅི་གསུངས་ཤེ་ན། རྨོངས་ན་དེ་འབྱུང་ངོ་ཞེས་བྱ་བ་ཡིན་ནོ། །ཚོར་བའི་ཡན་ལག་ནི་རྗེས་སུ་འཇུག་པ་རྐྱེན་དུ་བརྗོད་པར་བཞེད་པ་མ་ཡིན་གྱི། འོ་ན་ཅི་ཞེ་ན། དང་པོ་འབྱུང་བ་རྐྱེན་ཡིན་ནོ། །དེ་ཉིད་ཀྱི་ཕྱིར་ཡན་ལག་བཅུ་གཉིས་ལས་ནི་རབ་ཏུ་འཇུག་པ་རྐྱེན་དུ་བརྟེན་ཏོ་ཞེས་རྒྱས་པར་སྨྲས་སོ། །ཐམས་ཅད་དུ་རྟེན་ཅིང་འབྲེལ་པར་འབྱུང་བ་སོ་སོ་ཐ་དད་པར་བསྟན་པ་རྣམས་སངས་རྒྱས་བཅོམ་ལྡན་འདས་གྱི་དགོངས་པ་རྣམས་ཤེས་པར་མི་ནུས་སོ་ཞེས་བསྟན་པའི་ཕྱིར། གདུལ་བྱའི་སྐྱེ་བོའི་བྱེ་བྲག་ལ་ལྟོས་ནས་སངས་རྒྱས་བཅོམ་ལྡན་འདས་ཀྱིས་ལུགས་དང་མཐུན་པ་དང༌། ལུགས་དང་མི་མཐུན་པ་དང༌། ནག་པོ་དང་དཀར་པོའི་ཕྱོགས་དང༌། ཡན་ལག་ཚང་བ་དང༌། མ་ཚང་བ་ལ་སོགས་པར་འཆད་པ་ཐ་དད་པ་རྟེན་ཅིང་འབྲེལ་བར་འབྱུང་
བ་སྟོན་པའི་མདོ་སྡེ་གཞན་རྣམས་མང་པོ་ལ་ཞེས་བྱ་བ་དེ་ལ་ལུགས་དང་མཐུན་པའི་དབྱེ་བ་ནི་མ་རིག་པའི་རྐྱེན་གྱིས་འདུ་བྱེད་ནས་སྐྱེ་བའི་རྐྱེན་གྱིས་རྒ་ཤིའི་བར་ཡིན་ནོ། །ལུགས་དང་མི་མཐུན་པའི་དབྱེ་བ་ནི་གང་མེད་ན་རྒ་ཤི་མེད་པ་ཡིན་ཞེ་ན། སྐྱེ་བ་མེད་ན་རྒ་ཤི་མེད་པར་འགྱུར་རོ་ཞེས་བྱ་བ་ལ་སོགས་པ་གསུངས་པའོ། །ནག་པོའི་ཕྱོགས་དང་དཀར་པོའི་དབྱེ་བ་ནི་མི་དགེ་བ་དང་ཉོན་མོངས་པ་མ་ཡིན་པའི་ཆོས་ཀྱི་རྐྱེན་གྱིས་སྟོན་པའི་དབྱེ་བའོ། །ཡན་ལག་ཚང་བ་དང༌། མ་ཚང་བར་སྟོན་པའི་དབྱེ་བ་ནི་ཁ་ཅིག་ཏུ་རྟེན་ཅིང་འབྲེལ་པར་འབྱུང་བའི་ཡན་ལག་ཚང་བར་བསྟན་པ་ནི་བཅུ་གཉིས་སོ། །ཁ་ཅིག་ཏུ་ཡན་ལག་མ་ཚང་བ་ནི་ཡན་ལག་གཉིས་དང༌། ཡན་ལག་གསུམ་པ་དང༌། ཡན་ལག་བཞི་དང༌། ཡན་ལག་ལྔའམ་དྲུག་སྟེ་མ་རྫོགས་པ་ཡིན་ནོ། །རྟེན་ཅིང་འབྲེལ་པར་འབྱུང་བ་དེའི་བྱེ་བྲག་མ་ལུས་པར་མཁྱེན་པ་ཞེས་བྱ་བ་ལ་རྟེན་ཅིང་འབྲེལ་པར་འབྱུང་བའི་བྱེ་བྲག་ནི་རྟེན་ཅིང་འབྲེལ་པར་འབྱུང་བའི་བྱེ་བྲག་གོ །འདི་ལ་ལུས་པ་ཡོད་པ་མ་ཡིན་པས་མ་ལུས་པའོ། །ཤེས་པས་ན་མཁྱེན་པའོ། །རྟེན་ཅིང་འབྲེལ་པར་འབྱུང་བ་དེའི་བྱེ་བྲག་མ་ལུས་པར་མཁྱེན་པ་ནི་རྟེན་ཅིང་འབྲེལ་པར་འབྱུང་བ་མ་ལུས་པར་མཁྱེན་ཏོ། །ཆོས་དང༌། དོན་དང༌། ངེས་པའི་ཚིག་དང༌། སྤོབས་པ་མཁྱེན་པ་མཐར་ཕྱིན་པའོ་ཞེས་བྱ་བ་དེ་ལ་ཆོས་མཁྱེན་པ་ནི་འདིར་ཆོས་སོ་སོ་ཡང་དག་པར་རིག་པ་ཡིན་པར་དགོངས་པའོ། །དོན་མཁྱེན་པ་ནི་དོན་སོ་སོ་ཡང་དག་པར་རིག་པའོ། །ངེས་པའི་ཚིག་མཁྱེན་པ་ནི་ངེས་པའི་ཚིག་སོ་སོ་ཡང་དག་པར་རིག་པའོ། །སྤོབས་པ་མཁྱེན་པ་ནི་སྤོབས་པ་སོ་སོ་ཡང་དག་པར་རིག་པའོ། །ཆོས་མཁྱེན་པ་དང༌། དོན་མཁྱེན་པ་དང༌། ངེས་པའི་ཚིག་མཁྱེན་པ་དང༌། སྤོབས་པ་མཁྱེན་པ་ནི་ཆོས་དང༌། དོན་དང༌། ངེས་པའི་ཚིག་དང༌། སྤོབས་པ་མཁྱེན་པའོ།། ཆོས་དང༌། དོན་དང༌། ངེས་པའི་ཚིག་དང༌། སྤོབས་པ་མཁྱེན་པ་རྣམས་མཐར་ཕྱིན་པ་ནི། ཆོས་དང༌། དོན་དང༌། ངེས་པའི་ཚིག་དང༌། སྤོབས་བ་མཁྱེན་པ་མཐར་ཕྱིན་པའོ། །མཐར་ཕྱིན་པ་ནི་མཆོག་ཏུ་གྱུར་པའོ། །ཡན་ལག་རེ་རེ་ལ་ཡང་རྣམ་པར་ངེས་པ་ཐ་དད་པ་ཞེས་བྱ་བ་ནི་
ཅི་ཞེ་ན། མཐའ་ཡས་པ་མངོན་སུམ་དུ་མཛད་པའོ། །ཅིའི་ཕྱིར་འདི་བཤད་ཅེ་ན་ཞེས་བྱ་བ་ནི་སྔར་དགོས་པ་དྲི་བ་བྱས་པའོ། །དེ་རིགས་པའི་ངོ་བོ་ཡིན་པར་སྟོན་པ་ནི། མདོ་སྡེ་མང་པོ་བཤད་པའི་དགོས་པ་ནི་ཡང་དག་པར་བསྟན་པ་དང༌། གདམས་པ་དང༌། གཟེངས་བསྟོད་པ་དང༌། ཡང་དག་པར་དགའ་བར་བྱ་བ་སྟེ། གདུལ་བྱ་ཀུན་དུ་རྨོངས་པ་དང༌། བག་མེད་པ་དང༌། ཀུན་དུ་ཞུམ་པ་དང༌། ཡང་དག་པར་ཞུགས་པ་རྣམས་ལས་གཉིས་སམ། གསུམ་མམ། བཞིའི་བྱེ་བྲག་ཐ་དད་པའི་ཕྱིར་རོ་ཞེས་བྱ་བ་ལ་གདུལ་བྱ་ཀུན་དུ་རྨོངས་པའི་བྱེ་བྲག་གི་ཕྱིར་མདོ་སྡེ་འཆད་པའི་དགོས་པ་ནི་ཡང་དག་པར་བསྟན་པ་ཡིན་ནོ། །གདུལ་བྱ་བག་མེད་པར་གྱུར་པའི་བྱེ་བྲག་གི་ཕྱིར་གདམས་པ་ནི་མདོ་སྡེ་འཆད་པའི་དགོས་པ་ཡིན་ནོ། །ཀུན་དུ་ཞུམ་པའི་བྱེ་བྲག་གི་ཕྱིར་གཟེངས་བསྟོད་པ་ནི་མདོ་སྡེ་འཆད་པའི་དགོས་པ་ཡིན་ནོ། །གདུལ་བྱ་ཡང་དག་པར་ཞུགས་པའི་བྱེ་བྲག་གི་ཕྱིར་ཡང་དག་པར་དགའ་བར་བྱ་བ་ནི་མདོ་སྡེ་འཆད་པའི་དགོས་པའོ། །གཉིས་སམ། གསུམ་མམ། བཞིའི་བྱེ་བྲག་ཐ་དད་པའི་ཕྱིར་ཞེས་གང་སྨྲས་པ་དེ་སྟོན་པ་ནི་གཅིག་པུ་ཡང་དོན་ཅིག་ལ་ཀུན་དུ་རྨོངས་པ་ནས་ཁ་ཅིག་ལ་ཡང་དག་པར་ཞུགས་པའི་བར་དུ་འགྱུར་རོ་ཞེས་བྱ་བ་ཡིན་ནོ། །དེ་ལ་དགོས་པའི་དགོས་པ་ཡང་མང་སྟེ་ཞེས་བྱ་བ་ནི་མདོ་སྡེ་འཆད་པའི་དགོས་པའི་དགོས་པ་ཞེས་བྱ་བའི་དོན་ཏོ། །ཡིད་བྱུང་བར་བྱ་བའམ། རབ་ཏུ་དང་བར་བྱ་བའམ། སེར་སྣ་ལ་སོགས་པའི་ཉེས་པ་བཟློག་པའམ། དེའི་གཉེན་པོ་ཡོན་ཏན་གྱི་ཁྱད་པར་བསྒྲུབ་པའམ། དེའི་རྗེས་སུ་འཇུག་པ་སྟེ། དེ་ལ་སོགས་པའོ་ཞེས་བྱ་བ་ལ་བསྟན་པའི་དགོས་པ་ནི་ཡིད་བྱུང་བར་བྱ་བ་ཡིན་ཏེ། སངས་རྒྱས་ནི་འཁོར་བས་ཡིད་བྱུང་བ་ཡིན་གྱི་རྨོངས་པ་ནི་མ་ཡིན་ནོ། །རབ་ཏུ་དང་བ་ཡང་བསྟན་པའི་དགོས་པ་ཡིན་ཏེ། མངོན་པར་རྫོགས་པར་སངས་རྒྱས་པ་ལ་སོགས་པ་ལ་རྟོགས་ནས་རབ་ཏུ་དང་བ་ཡིན་གྱི། མ་རྟོགས་པར་ནི་མ་ཡིན་ནོ། །སེར་སྣ་ལ་སོགས་པའི་ཉེས་པ་བཟློག་པ་ནི་གདམས་པའི་དགོས་པ་ཡིན་ཏེ། འགའ་ཞིག་ལ་གདམས་པ་བྱས་ན་སྦྱིན་པ་ལ་སོགས་པ་ལ་འཇུག་པར་འགྱུར་གྱི། མ་གདམས་པར་ནི་མ་ཡིན་པ་ཡོད་དེ། སེར་སྣ་ལ་སོགས་པ་ཡང་
སྦྱིན་པ་ལ་སོགས་པ་དང་མི་མཐུན་པ་ཡིན་ནོ། །དེའི་གཉེན་པོ་ཡོན་ཏན་གྱི་ཁྱད་པར་བསྒྲུབ་པ་ནི་གཟེངས་བསྟོད་པའི་དགོས་པ་ཡིན་ཏེ། འགའ་ཞིག་ལ་གཟེངས་བསྟོད་ཅིང་སྤོ་བར་བྱས་ན་སེར་སྣ་ལ་སོགས་པའི་ཉེས་པའི་གཉེན་པོར་གྱུར་པ་ཡོན་ཏན་གྱི་བྱེ་བྲག་ལ་འཇུག་པ་ཡོད་དོ། །བྱང་ཆུབ་ཀྱི་ཕྱོགས་ཀྱི་ཆོས་ཀྱིས་བསྡུས་པ་དག་གི་རྗེས་སུ་འཇུག་པ་ནི་ཡང་དག་པར་དགའ་བར་བྱས་པའི་དགོས་པ་ཡིན་ཏེ། ཁ་ཅིག་ཡང་དག་པར་དགའ་བར་བྱས་ན་རང་གི་ཡོན་ཏན་གྱི་ཁྱད་པར་ལ་རྟག་ཏུ་འཇུག་པ་ཡོད་དོ། །འདི་ནི་རྣམ་གྲངས་གཞན་ཡིན་ཏེ། སྦྱིན་པའི་འབྲས་བུ་ལོངས་སྤྱོད་ཆེན་པོ་ཡིན་པ་ལ། ཁ་ཅིག་ཀུན་དུ་རྨོངས་པ་དག་བསྟན་པ་ནི་མདོ་བཤད་པའི་དགོས་པ་ཡིན་ནོ། །ཇི་ལྟར་ལོངས་སྤྱོད་པ་དེ་ནི་སངས་རྒྱས་པ་ཡིན་པས་སྦྱིན་པ་བྱོས་ཤིག་ཅེས་འདོམས་པར་བྱེད་དོ། །དེ་དག་ཉིད་ལ་ཞུམ་ན་གཟེངས་སྟོད་པར་བྱེད་དོ། །བསྟན་པ་བྱས། གདམས་པ་བྱས། གཟེངས་བསྟོད་པ་བྱས་པ་ནི་ཡང་དག་པར་ཉེས་པའི་བྱ་བ་དང་མི་ལྡན་ཞིང་ཡང་དག་པར་དགའ་བར་འགྱུར་རོ། །དེ་བཞིན་དུ་ཚུལ་ཁྲིམས་ལ་སོགས་པ་ལ་ཡང་རིག་པར་བྱའོ། །བྱེད་པ་པོ་མཐུན་པ་ཅན་གྱི་བྱ་བ་བྱེད་པ་གཉིས་ལས་ཞེས་རྒྱས་པར་འབྱུང་བ་ལ་འདི་གཉིས་ལ་བྱེད་པ་པོ་མཐུན་པ་ཡོད་པས་འདི་གཉིས་བྱེད་པ་པོ་མཐུན་པ་ཅན་ནོ། །མཐུན་པ་ནི་ཐ་དད་པ་མེད་པ་དང་གཅིག་པུ་ཞེས་བྱ་བའི་དོན་ཏོ། །བྱེད་པ་པོ་མཐུན་པ་ཅན་གྱི་བྱ་བ་བྱེད་པ་དེ་གཉིས་ལས་བྱ་བ་བྱེད་པ་སྔ་མ་ལས་ཏེ་ཞེས་བྱ་བ་ཡོད་པ་མཐོང་སྟེ། དཔེར་ན་ལངས་ཏེ་འགྲོ་བ་དང་འདུག་སྟེ་ཟ་བ་ལྟ་བུའོ་ཞེས་བྱ་བ་ནི་ལྡང་བ་དང་འགྲོ་བའི་བྱ་བ་གཉིས་ལ་གལ་ཏེ་འདིར་བྱེད་པ་པོ་ཐ་མི་དད་པ་ཡོད་ན་ནི་དེས་ན་དུས་སྔ་མ་ལྡང་བའི་བྱ་བ་ལ་སྟེ་ཞེས་བྱ་བ་འདི་ཡོད་པ་ཡིན་ནོ། །འདུག་པ་དང་ཟ་བའི་བྱ་བ་གཉིས་ལ་ཡང་གལ་ཏེ་བྱེད་པ་པོ་ཐ་མི་དད་པ་ཡོད་པ་ཡིན་ན་དེས་དུས་སྔ་མ་འདུག་པའི་བྱ་བ་ལ་སྟེ་ཞེས་བྱ་བ་འདི་ཡོད་པ་བཞིན་དུ་འདི་ལ་ཡང་བྱ་བ་བྱེད་པ་གཉིས་ཡོད་དེ། བརྟེན་པའི་བྱ་བ་བྱེད་པ་དང་སྐྱེ་བའི་བྱ་བ་བྱེད་པའོ། །འདི་གཉིས་ལ་ནི་བྱེད་པ་པོ་མཐུན་པ་ཡང་ཡོད་པ་མ་ཡིན་ནོ། །ཇི་ལྟ་ཞེ་ན། དེའི་ཕྱིར། གང་སྔར་བརྟེན་ཏེ།
ཕྱིས་སྐྱེ་བར་འགྱུར་བ་སྐྱེ་བའི་སྔ་རོལ་ན་དེ་ཡོད་པ་མ་ཡིན་ནོ་ཞེས་སྨྲས་ཏེ། འདི་ལྟར་འབྲས་བུ་མེད་པར་སྨྲ་བ་རྣམས་སྐྱེས་པ་ཁོ་ན་ཡོད་པ་ཡིན་གྱི། མ་སྐྱེས་པ་ནི་མ་ཡིན་ནོ་ཞེའོ། །དེ་ལ་གཞན་དག་ལན་འདེབས་པ་ཞེས་བྱ་བ་ནི་བཙུན་པ་དཔལ་ལེན་ཡིན་ཏེ། འདི་ལ་སྟེ་ཞེས་བྱ་བ་ཡོད་པ་མ་ཡིན་པར་རིག་པར་བྱ་སྟེ་ཞེས་རྒྱས་པར་འབྱུང་བ་ཡིན་ནོ། །དེ་ནི་དེ་དག་ལན་དུ་རུང་ན་རྟེན་ཅིང་འབྲེལ་པར་འབྱུང་བའི་མདོ་སྡེ་དེའི་ལན་དུ་གང་སྨྲས་པ། འདི་ལ་ཕྲ་ཞེས་བྱ་བ་ནི་མང་བའི་དོན་ཏོ། །ཨི་ཏྱ་ཞེས་བྱ་བ་ནི་གང་འཇིག་པ་ཞིག་པར་འགྱུར་བ་སྐྱེས་པ་མི་གནས་པ་རྣམ་པར་འཇིག་པ་ཞེས་བྱ་བའི་དོན་ཏོ། །སམ་ཞེས་བྱ་བ་ནི་འདུ་བའི་དོན་ཏོ་ཞེས་བྱ་བ་དེ་དག་ནི་རུང་ན། མིག་དང་གཟུགས་ལ་བརྟེན་ཏེ། མིག་གི་རྣམ་པར་ཤེས་པ་སྐྱེའོ་ཞེས་བྱ་བ་ལ་སོགས་པ་འདིར་ནི་མི་རུང་ངོ་ཞེས་བྱ་བ་ནི་འདིར་ནི་མིག་དང་གཟུགས་ལ་བརྟེན་ཏེ་ཞེས་བྱ་བ་ཡོད་དོ། །དེ་དག་གི་ནི་མིག་དང་གཟུགས་ལ་བརྟེན་ཏེ་མིག་གི་རྣམ་པར་ཤེས་པ་སྐྱེ་བ་ཞེས་བྱ་བ་འདི་ཡང་ཕ་རོལ་དང་ཆུ་རོལ་སྦྱོར་བ་ཙམ་ཡིན་པར་མངོན་གྱི་རྒྱུ་དང་འབྲས་བུའི་དངོས་པོ་ནི་མ་ཡིན་ནོ་ཞེས་བྱ་བ་ལ་དེ་དག་གི་ནི་ཞེས་བྱ་བ་ནི་གང་དག་རྟེན་ཏེ་འབྲེལ་པར་འབྱུང་བ་ཞེས་བྱ་བ་ནི་ཕ་རོལ་དང་ཚུ་རོལ་སྦྱོར་བ་ལ་སྟེ་ཞེས་བྱ་བ་ཡོད་པར་འདོད་པ་དེ་དག་གོ །དཔེར་ན་ཆུ་རྒལ་ཏེ་རི་ཡོད་པ་དང་ཞེས་བྱ་བ་ནི་ཕ་རོལ་དང་ཚུ་རོལ་སྦྱོར་བ་ཙམ་ཡིན་པར་མངོན་གྱི་རྒྱུ་དང་འབྲས་བུའི་ནི་མ་ཡིན་ནོ། །དབྱར་འདས་ཏེ་སྟོན་བྱུང་བ་ལྟ་བུ་ཡིན་པས་ཞེས་བྱ་བ་ཡང་དེ་བཞིན་ནོ་ཞེས་ཟེར་ན། མིག་གི་རྣམ་པར་ཤེས་པའི་རྟེན་དང་དམིགས་པ་འདས་པ་ཡིན་པར་ཐལ་བར་འགྱུར་རོ་ཞེས་བྱ་བ་ནི་མིག་དང་གཟུགས་དང་མིག་གི་རྣམ་པར་ཤེས་པ་རྣམས་ཕ་རོལ་དང་ཚུ་རོལ་སྦྱོར་བ་ཙམ་ཡིན་ན་ཞེས་བྱ་བའོ། །དེ་ལ་ཡང་འདུས་པ་བསྟན་པ་ལས་སྐྱོན་བསྟན་ཟིན་ཏོ་ཞེས་བྱ་བ་ནི་དེར་ཇི་ལྟར་བསྟན་ཞེ་ན། སྔར་ནི་དབང་པོ་དང་དོན་ཏོ། །ཕྱིས་ནི་རྣམ་པར་ཤེས་པའོ། །དེའི་འོག་ཏུ་རེག་པའོ་ཞེས་རིམ་གྱིས་སྟོན་ན་རྣམ་པར་ཤེས་པ་ཁོ་ན་རེག་པའི་རྒྱུའི་དངོས་པོ་ཡིན་པར་ནི་རུང་གི་དབང་པོ་དང་དོན་གཉིས་ནི་མི་རུང་སྟེ། རྣམ་པར་ཤེས་པའི་ཚེ་དེ་གཉིས་མེད་པའི་ཕྱིར་
རོ། །རྣམ་པར་ཤེས་པ་དང་རེག་པ་གཉིས་ལྷན་ཅིག་སྐྱེས་པ་ནི་རེག་པའི་རྒྱུ་རྣམ་པར་ཤེས་པ་ཡིན་པར་རུང་གི་རེག་པ་སྐྱེས་ཟིན་ན་ནི་ནུས་པ་མེད་པའི་ཕྱིར་དང༌། མ་སྐྱེས་ན་ཡང་མེད་པའི་ཕྱིར་རོ། །གང་དག་ཡང་གསུམ་འདུས་པ་ཙམ་ཁོ་ན་རེག་པ་ཡིན་ཏེ། ལྷན་ཅིག་སྐྱེས་པ་རྒྱུར་མི་འདོད་པ་དེ་དག་གི་ཡང་དབང་པོ་དང་དོན་གཉིས་རྣམ་པར་ཤེས་པའི་ཚེ་འགག་པའི་ཕྱིར་ཚོར་བ་སྐྱེ་བའི་རྒྱུའི་དངོས་པོར་རུང་བ་མ་ཡིན་ནོ་ཞེས་བྱ་བ་ཡིན་ནོ། །རྟེན་ཅིང་འབྲེལ་པར་འབྱུང་བ་ཞེས་བྱ་བ་བྱེ་བྲག་མེད་པར་བསྟན་པ་ལ། ཕ་རོལ་ཉིད་གང་ལས་རྟེན་ཅིང་འབྲེལ་པར་འབྱུང་བ་བཅོམ་ལྡན་འདས་ཀྱིས་བསྟན་ཞེས་བྱ་བ་ནི་རྟེན་ཅིང་འབྲེལ་པར་འབྱུང་བ་བྱེ་བྲག་མེད་པར་བཅོམ་ལྡན་འདས་ཀྱིས་བསྟན་གྱི། དེ་ལ་རྟེན་ཏེ་ཞེས་བྱེ་བྲག་ནི་མ་བསྟན་ཏོ། །དེ་བས་ན་ཕ་རོལ་ཉིད་གང་ལས་འབྲེལ་པར་འབྱུང་བ་བཅོམ་ལྡན་འདས་ཀྱིས་བསྟན་པར་བརྗོད་པར་བྱ་དགོས་ན། གང་གི་ཕྱིར་རྟེན་ཅིང་འབྲེལ་པར་འབྱུང་བ་ཞེས་བྱ་བ་ནི་ཕ་རོལ་དང་ཚུ་རོལ་སྦྱོར་བ་ལ་སྟེ་ཞེས་བྱ་བ་ཡོད་པར་རྟོག་པར་བྱེད། དེ་བས་ན་འདི་ཡང་ལན་དུ་མི་རུང་ངོ་ཞེས་བྱ་བ་ནི་རྟེན་ཏེ་འབྲེལ་པར་འབྱུང་བ་ཞེས་བྱ་བ་ལ་སྟེ་ཞེས་བྱ་བ་ཡོད་པ་འདི་ནི་ཕ་རོལ་དང་ཚུ་རོལ་སྦྱོར་བ་ཡིན་པར་རིག་པར་བྱ་སྟེ་ཞེས་བྱ་བ་སྨྲས་མ་ཐག་པ་གང་ཡིན་པ་འདིའོ། །ཏེ་ཞེས་བྱ་བ་ཡོད་པ་ནི་རྒྱུའི་དོན་ལ་ཡང་མཐོང་ངོ་ཞེས་སྔར་བསྟན་ཟིན་ཏོ་ཞེས་བྱ་བ་ན་བརྟེན་ཏེ་ཞེས་བྱ་བ་ནི་རྐྱེན་དེས་དང་རྒྱུ་དེས་དང་བྱེད་རྒྱུ་དེ་དག་གིས་ཞེས་བྱ་བར་མངོན་པ་ཡིན་ནོ། །དཔེར་ན་ཤིང་ལ་བརྟེན་ནས་མེ་འབྱུང་ངོ་ཞེས་བྱས་ན་རྒྱུ་དེ་དག་གིས་ཞེས་བྱ་བར་མངོན་པ་དང་སྤྲིན་ལ་བརྟེན་ནས་ཆར་འབབ་པོ་ཞེས་བྱས་ནས་སྤྲིན་འདུས་ན་ཞེས་བྱ་བར་མངོན་པ་ཡིན་ནོ། །གངས་རི་ལ་བརྟེན་ནས་སྨན་རྣམས་སྐྱེའོ་ཞེས་བྱ་བ་ཡང་དེ་བཞིན་ནོ། །བྱེད་པ་པོ་མི་མཐུན་པ་ལ་ཡང་མཐོང་སྟེ། འཇིག་རྟེན་ན་མར་འཐུངས་ཏེ་སྟོབས་ཡོད་དོ་ཞེས་བྱ་བ་དང་ཞེས་བྱ་བ་ནི་སྔར་མར་འཐུངས་ནས་ཕྱིས་ཡོད་པ་དེ་དག་ཀུན་ན་སྟོབས་ཡོད་པ་མ་ཡིན་གྱི། འོ་ན་ཅི་ཞེ་ན། ལྷ་སྦྱིན་གྱིས་སྔར་མར་འཐུངས་ནས་ཕྱིས་སྟོབས་ཡོད་པ་ཡིན་ནོ། །དེ་བཞིན་དུ་འདིར་ཡང་སྔར་རྒྱུ་རྣམས་རྐྱེན་བྱེད་ཅིང་ཕྱིས་འབྲས་བུ་འབྱུང་བ་ཡིན་པས་བྱེད་པ་པོ་མི་མཐུན་པ་
ལ་ཡང་སྟེ་ཞེས་བྱ་བ་འདི་ཡོད་པར་འགྱུར་བ་ཡིན་ནོ། །སེང་གེ་མཐོང་སྟེ་འཇིགས་སོ་ཞེས་བྱ་བ་ནི་སེང་གེ་མཐོང་སྟེ་ཕྱིས་འཇིགས་པ་དེ་དག་ཀུན་འཇིགས་པ་ཡོད་པ་མ་ཡིན་གྱི། འོ་ན་ཅི་ཞེ་ན། ལྷ་སྦྱིན་གྱིས་སྔར་སེང་གེ་མཐོང་བས་ཕྱིས་འཇིགས་པ་འབྱུང་བ་ཡིན་ནོ། །དེ་ལྟར་ན་རེ་ཞིག་འཇིག་རྟེན་ན་མི་མཐུན་པ་ལ་ཡང་མཐོང་བ་ཡིན་ནོ། །བྷ་ར་ཏ་ལས་ཀྱང་འདྲོ་ཎའི་བུ་ངོ་མཚར་ཆེར་གྱུར་པའི་བྲོས་པ་མཐོང་སྟེ་ཞེས་བྱ་བ་རྒྱས་པར་འབྱུང་བ་ནི་སྔར་འདྲོ་ཎའི་བུ་བྲོས་པ་མཐོང་སྟེ། ཕྱིས་དེ་དག་འཇིགས་པ་བྱུང་བ་མཐོང་བ་དེ་དག་ཀུན་ན་དེ་འཇིགས་པ་མ་ཡིན་གྱི་འོ་ན་ཅི་ཞེ་ན། འདྲོ་ཎའི་བུ་དེ། བྲོས་པ་མཐོང་ནས་དེ་འཇིགས་པར་གྱུར་པའི་ཕྱིར་རོ། །སྒྲ་ལ་འཆེལ་བ་ཁ་ཅིག་དག་ན་རེ་བྱེད་པ་པོ་མི་མཐུན་པ་ལ་དེའི་དོན་ཡོད་པ་ནི་རྒྱུའི་དོན་ཡིན་པར་སྔོན་གྱི་སློབ་དཔོན་དག་སྨྲ་བ་ཞེས་རྒྱས་པར་འབྱུང་བ་དེ་བས་ན་འདིར་ཡང་བྱེད་པ་པོ་གཅིག་པ་མེད་པར་རྒྱུ་ལ་དེ་ཡོད་པ་ཡིན་ནོ། །དུས་མཐུན་པར་བྱ་བ་བྱེད་པ་ལ་མཐོང་སྟེ། དུས་སྔ་མའི་ཚེ་འབའ་ཞིག་མ་ཡིན་ནོ། །ཁ་གདངས་ཏེ་ཉལ་བ་དང་མིག་བཟློག་སྟེ་ཉལ་བ་ལྟ་བུའོ་ཞེས་བྱ་བ་ནི་གཉིད་མ་ལོག་པའི་ཚེ་མ་ཡིན་ཏེ། དུས་གཞན་ཡིན་པའི་ཕྱིར་རོ། །འདི་ཅི་ཞེ་ན། ཁ་གདངས་ཏེའམ། མིག་བཟློག་སྟེ་དུས་ཕྱིས་ཉལ་བ་མ་ཡིན་ནོ། །དེ་བས་ན་དུས་སྔ་མ་ལ་ཡང་སྟེ་ཞེས་བྱ་བ་འདི་ཡོད་པ་ཡིན་ནོ། །དུས་མི་མཐུན་པ་སྔར་ཁ་གདངས་སམ་མིག་བཟློག་སྟེ། ཕྱིས་ཉལ་བ་དེ་ལྟར་ནི་འདིར་དོན་འདི་རྟོགས་པར་བྱ་བ་མ་ཡིན་གྱི། འོན་ཀྱང་གཉིད་ལོག་པ་ཉིད་ན་ཁ་གདངས་པ་དང་མིག་བཟློག་པ་ཡིན་པར་རྟོགས་པར་བྱའོ་ཞེས་བྱ་བ་འདིར་འཇིག་རྟེན་ན་ཡོད་པ་ཚད་མ་ཡིན་ནོ། །དེ་ལྟར་མ་ཡིན་ན་གང་ཡང་སྔར་ཁ་གདངས་ལ་ཕྱིས་མིག་བཙུམས་ཏེ་ཉལ་ན་དེ་ལ་ནི་ཁ་གདངས་ནས་གཟོད་ཉལ་ལོ་ཞེས་བྱ་བར་ཐལ་བར་འགྱུར་རོ། །དུས་ཕྱིས་བྱ་བ་བྱེད་པ་ལ་ཡང་མཐོང་སྟེ། དྲིའི་བྱེད་པ་ལ་བརྟེན་ཏེ་དབྱུག་གུ་བརྡེག་པ་ལྟ་བུ་སྟེ། རྔ་འདི་སྔར་བྱེད་ལ་ཕྱིས་དབྱུག་གུ་བརྡེག་པ་ནི་མ་ཡིན་ནོ། །དུས་མཉམ་པ་ཡང་མ་ཡིན་ཏེ། ཅིའི་ཕྱིར་ཞེ་ན། དེའི་ཕྱིར་སྒྲ་ནི་བརྡེག་པའི་རྒྱུ་ལས་བྱུང་བའི་ཕྱིར་རོ་ཞེས་སྨྲས་ཏེ། བརྡེག་པའི་རྒྱུ་ལས་བྱུང་བ་ནི་སྒྲ་ཡིན་ལ། བརྡེགས་པས་ནི་བརྡེགས་
པ་ཡིན་ལ། མི་བརྡེགས་པས་ནི་མ་ཡིན་ནོ། །དེ་བཞིན་དུ་འདིར་ཡང་བྱ་བ་བྱེད་པ་དུས་མཐུན་པ་ལ་ཡང་སྟེ་ཞེས་བྱ་བ་ཡོད་པ་ཡིན་ཏེ། གང་སྐྱེ་བདེ་ཉིད་ན་བརྟེན་པའོ། །དུས་འཕྱི་ལ་ཡང་ཡོད་དེ། སྔར་འབྱུང་ལ་ཕྱིས་བརྟེན་པ་ནི་འབྲས་བུ་འབྱུང་བར་བྱ་བའི་ཕྱིར་རྒྱུའི་དངོས་པོ་ལ་ཡིན་ནོ། །དེ་ལྟར་ནི་ཕ་རོལ་དང༌། ཚུ་རོལ་སྦྱོར་ཞེས་ཟེར་བ་དང་པ་ཎི་ནི་པ་དག་ཀྱང་འདོད་པ་མ་ཡིན་ནོ། །ཀྱང་ཞེས་བྱ་བ་ཅིའི་ཕྱིར་སྨོས་ཤེ་ན་ཞེས་བྱ་བ་ལ། དེ་ལྟར་ཞེས་བྱ་བ་ནི་ཇི་སྐད་དུ་རྒྱུ་ལ་ཡང་མཐོང༌། བྱེད་པ་པོ་མི་མཐུན་པ་ལ་ཡང་མཐོང༌། དུས་མཐུན་པ་ལ་ཡང་མཐོང་དུས་ཕྱི་མ་ལ་ཡང་མཐོང་ཞེས་སྨྲས་པ་རྣམས་སོ། །ཀྱང་ཞེས་བྱ་བ་ཅིའི་ཕྱིར་སྨོས་ཤེ་ན། འཇིག་རྟེན་དང༌། བྷ་ར་ཏ་དང༌། སྒྲ་ལ་འཆེལ་བ་བྱ་ཌི་སོ་ནུ་ཀ་ལ་སོགས་པས་བསྟན་བཅོས་འདིའི་རྗེས་སུ་འཇུག་པ་མ་ཡིན་པའི་ཕྱིར་རོ་ཞེས་བྱ་བ་ནི་དེ་ལྟར་མི་འདོད་པ་པ་ཎི་ནི་དག་ཅེས་བྱ་བ་སྐབས་དང་སྦྱར་རོ། །དེ་བས་ན་དེ་དག་གིས་ཀྱང་ངེས་པ་ཁོ་ནར་འདི་འདོད་པར་བྱ་དགོས་སོ་ཞེས་བྱ་བ་ནི་པ་ཎི་ནི་པ་དེ་དག་གིས་ཀྱང་ཇི་སྐད་དུ་སྨོས་པའི་སྐྱོན་དུ་མི་འགྱུར་བར་བྱ་བའི་ཕྱིར་རོ། །གལ་ཏེ་བདག་ཉིད་ཐོབ་པ་ཡིན་ན་ཞེས་བྱ་བ་ཅི་ཞེ་ན། སྐྱེ་བའོ། །དེ་སྐྱེ་བ་ཁོ་ན་ཡིན་པའི་ཕྱིར་དེ་ལྟ་ཡིན་ན་ཅི་ཞིག་བྱ་བ་བྱེད་ན་སྐྱེ་བ་ཡིན་ནོ་ཞེས་བརྗོད་དེ། སྐྱེས་པ་ནི་ཡང་སྐྱེ་བའི་བྱ་བ་བྱེད་པ་ཡོད་པ་མ་ཡིན་པ་དང༌། ཐུག་པ་མེད་པར་ཡང་འགྱུར་རོ། །འོན་ཏེ་བདག་ཉིད་མ་ཐོབ་པ་ཡིན་ན་ནི་སྐྱེ་བའོ། །དེ་ནི་དེའི་ཚེ་ཡོད་པ་མ་ཡིན་པས་སྐྱེ་བ་མེད་པ་ཡིན་ན་ཇི་ལྟར་བྱེད་པ་པོ་ཉིད་ཡིན་བར་འགྲུབ། །འོན་ཏེ་མེད་པ་ཡང་བྱེད་པ་པོ་ཉིད་ཡིན་པར་འདོད་པས་བརྟག་པར་བྱ་ན་སྔར་རྟེན་ནས་ཕྱིས་སྐྱེའོ་ཞེས་བྱ་བ་སྐྱེ་བའི་སྔ་རོལ་ན་དེ་ཡོད་པ་མ་ཡིན་ནོ་ཞེ་ན། ཇི་ལྟར་རྩོད་པ་འདི་བྱེད་ཇི་ལྟར་དེར་མེད་པ་ལ་བྱེད་པ་པོ་ཉིད་དུ་བརྟག་པ་ལྟར་འདིར་ཡང་དེ་བཞིན་ནོ། །སྐྱེ་བ་གང་ཡིན་པ་དེ་ཅི་ཞིག་བྱེད་ན་འདི་ལྟར་བྱེད་པ་པོ་ཞེས་བརྗོད་ཅེས་བྱ་བ་ནི། སྐྱེ་བ་གང་ཡིན་པ་དེ་ནི་བྱ་བ་བྱེད་པ་ཡིན་ན་དེ་བྱ་བ་བྱེད་པ་ན་གཞན་ཅི་ཞིག་ལ་བྱེད་ན་འདི་ལྟར་བྱེད་པ་པོ་ཡིན་ཞེས་བརྗོད། སྨྲས་པ། སྐྱེ་བ་ལ་སྐྱེ་བར་བྱེད་དོ་ཞེ་ན། སྐྱེ་ཞེས་བྱ་བ་འདི་ཡང་ཅི་ཡིན། གང་ལ་བྱ་བ་བྱེད་ཅིང་མངོན་པར་འགྲུབ་པ་ལ་
སྐྱེ་བ་ཞེས་བྱ། གལ་ཏེ་སྐྱེ་ཞེས་བྱ་བ་སྐྱེ་བཞིན་པའི་བདག་ཉིད་དུ་གྱུར་བ་ཡིན་ན་ནི་ཇི་ལྟར་བདག་ཉིད་ལ་ཕྱེད་པར་རུང་སྟེ། སྐྱེད་པར་བྱེད་པ་དང༌། བསྐྱེད་པར་བྱ་བ་ཐ་དད་པ་ཡིན་པའི་ཕྱིར་རོ། །འོན་ཏེ་བདག་ཉིད་དུ་གྱུར་པ་མ་ཡིན་ན་ནི་དེ་ལས་གཞན་དུ་མི་དམིགས་པ་ཡིན་ན་གང་སྐྱེ་བ་དེ་སྐྱེ་བ་ལ་བྱེད་དོ་ཞེས་ཇི་ལྟར་འདི་གཏན་ལ་དབབ་པར་བྱ། དེ་བས་ན་སྐྱེ་བ་བྱེད་པ་པོ་བྱེད་དོ་ཞེས་བྱ་བའི་དོན་བརྗོད་པར་བྱ་དགོས་ཏེ། གང་གི་ཕྱིར་དེ་ལྟར་འཇིག་རྟེན་ན་བྱེད་པའི་དོན་མང་དུ་མཐོང་བ་དེ་ལས་ན་བརྗོད་པར་བྱ་དགོས་པ་གང་ཞེ་ན། སྐྱེ་བ་ལ་བྱེད་པ་པོ་ཡིན་ནོ་ཞེས་བྱ་བ་སྟེ། གང་གི་ཕྱིར་སྐྱེ་བར་བྱེད་དོ་ཞེས་བརྗོད་པའོ། །གལ་ཏེ་སྐྱེ་བར་བྱེད་པ་ཡིན་ནོ་ཞེ་ན་ནི་དེའི་དོན་ཀྱང་སྐྱེ་བ་ཡང་སྐྱེ་བར་འགྱུར་རོ་ཞེས་བྱ་བ་ཡིན་པར་འགྱུར་ཏེ། གལ་ཏེ་སྐྱེ་བ་བྱེད་པ་པོ་དེ་སྐྱེ་བ་སྐྱེ་བར་བྱེད་པ་ཡིན་ན་ནི་སྐྱེ་བ་སྐྱེ་བར་འགྲུབ་པར་འགྱུར་ཏེ། འདི་ལྟར་སྔར་འབྱུང་ཞེས་བྱ་བའི་དོན་གང་ཡིན་སྐྱེ་ཞེས་བྱ་བའི་དོན་ཡིན་ནོ་ཞེས་སྨྲས་པ་ཡིན་ནོ། །དེ་ལས་ཀྱང་གཞན་སྐྱེ་བར་ཐལ་བར་འགྱུར་བས་ཐུག་པ་མེད་པར་ཐལ་བར་འགྱུར་ཏེ། སྐྱེ་བ་དེ་ཡང་དེ་ལྟ་བུ་ཡིན་ན་ནི་སྐྱེ་བ་གཞན་ཡང་ཡོད་པར་ཐལ་བར་འགྱུར་བས་ཐུག་པ་མེད་པར་འགྲུབ་པར་འགྱུར་རོ། །དེ་བས་ན་བྱ་བ་བྱེད་པ་མེད་པར་ཡང་བདག་ཐོབ་པ་ཙམ་ལ་བྱེད་པ་པོ་གཞན་དུ་སྐྱེ་བར་བྱེད་དོ་ཞེས་སྟོན་ཏེ། གང་གི་ཕྱིར་དེ་ལྟར་སྐྱེ་བའི་བདག་ཉིད་དུ་གྱུར་པ་ནི་སྐྱེ་བར་མི་སྲིད། དོན་ཐ་དད་པར་གྱུར་པ་ཡང་མ་ཡིན། སྐྱེ་བ་ཡང་གཞན་ཡང་སྐྱེ་བར་ཐལ་བར་འགྱུར། ཐུག་པ་མེད་པའི་སྐྱོན་དུ་ཡང་འགྱུར་བ་དེ་བས་ན་བྱ་བ་བྱེད་པ་མེད་པར་ཡང་བདག་ཐོབ་པ་ཙམ་ལ་བྱེད་པ་པོ་གཞན་དུ་སྐྱེ་བར་བྱེད་དོ་ཞེས་སྟོན་པ་ཡིན་ནོ། །རྐྱེན་ཡོད་པ་ཙམ་ལ་ཡང་བརྟེན་ཏེ་ཞེས་བྱ་བ་ཅི་ཞེ་ན། བྱེད་པ་པོ་བཞིན་དུ་ཉེ་བར་བཏགས་པ་ཡིན་པར་སྟོན་ཏོ། །འདི་ལ་བྱ་བ་བྱེད་པ་ནི་གང་ཡང་མེད་ཅེས་བྱ་བ་ནི་སྐྱེ་བ་བྱ་བ་བྱེད་པའམ། བརྟེན་པ་བྱ་བ་བྱེད་པ་ནི་འདི་ལྟར་ཉེ་བར་བཏགས་པ་ཡིན་པའི་ཕྱིར་རོ། །བྱེད་པ་པོ་ཡང་མེད་པ་ཡིན་ན་ཞེས་བྱ་བ་ནི་སྐྱེ་བ་བྱ་བ་བྱེད་པའི་བྱེད་པ་པོའམ། བརྟེན་པ་བྱ་བ་བྱེད་པའི་བྱེད་པ་པོ་སྟེ། འདི་ལྟར་སྐྱེ་བཞིན་པ་ནི་བདག་ཉིད་མ་ཐོབ་པ་ཡིན་པའི་ཕྱིར་དང༌། སྐྱེས་པ་ལས་ནི་སྔར་མ་ཡིན་པའི་ཕྱིར་རོ། །འདི་གཉིས་བྱེད་པ་པོ་དང་ལྷན་ཅིག་པ་ལྟ་ག་ལ་
ཡོད་ཅེས་བྱ་བ་ནི་སྐྱེ་བ་དང་བརྟེན་པའི་བྱ་བ་བྱེད་པ་དེ་གཉིས་ཀྱང་ཡོད་པ་ཡིན་ལ། བྱེད་པ་པོ་ཡང་ཡོད་པ་ཡིན་ན་ནི་བྱེད་པ་པོ་དང་ལྷན་ཅིག་པའམ། བྱེད་པ་པོ་དང་ལྷན་ཅིག་པ་མ་ཡིན་ཞེས་བྱ་བ་འཐད་པར་འགྱུར་རོ། །དེ་བས་ན་བརྟེན་ཏེ་འབྱུང་ཞེས་བྱ་བའི་སྦྱོར་བ་འདི་ནི་རིགས་པ་ཡིན་ནོ་ཞེས་བྱ་བ་ནི་ཉེ་བར་བཏགས་པ་ཡིན་པའི་ཕྱིར་རོ་ཞེས་བྱ་བའི་ཐ་ཚིག་གོ །འདི་ལྟར་ཡན་ལག་སྔ་མ་ལ་ཕྱི་མའི་རྟེན་ཅིང་འབྲེལ་པར་འབྱུང་ཞེས་བྱ་བའི་བཤད་པ་བྱེད་པ་ནི། འབྲེལ་པར་འབྱུང་ཞེས་བྱ་བ་ནི་བར་མེད་ཅིང་མཆོད་པ་ཞེས་བྱ་བ་ཡིན་ཏེ། རྒྱུ་འཇིག་པ་ལས་མ་ཆོད་པ་ཁོ་ནར་ཞེས་བྱ་བའི་ཐ་ཚིག་གོ །དེ་ལྟ་ཡིན་དང་འདས་པ་དག་ལས་གང་ཡང་སྐྱེ་བ་མེད་པར་བསྟན་པ་ཡིན་ནོ་ཞེས་བྱ་བ་ནི་རྒྱུ་འཇིག་པ་དང་འབྲས་བུ་འབྱུང་བ་གཉིས་དུས་ཐ་དད་པ་མེད་པའི་ཕྱིར་རོ། །ཆོས་ཉིད་ཅེས་བྱ་བ་གང་ཞེ་ན་ཞེས་བྱ་བ་ནི་གང་གི་དབང་དུ་མཛད་དེ། མདོ་སྡེ་གཞན་ལས་གསུངས་པ། གང་འདིར་ཆོས་ཉིད་དང་ཞེས་བྱ་བ་ནི། གང་ཆོས་རྣམས་བདག་ཉིད་ཁོ་ན་ཡིན་ཏེ། ངོ་བོ་ཉིད་དེ་ལྟ་བུ་ནི། འདི་ཡོད་ན་འདི་འབྱུང་གི་མེད་ན་མ་ཡིན་པའོ། །འདི་སྐྱེས་པས་འདི་སྐྱེ་བ་ཡིན་གྱི་མ་སྐྱེས་ན་མ་ཡིན་པའོ། །སྐྱེ་བ་ཞེས་བྱ་བ་ནི་ཆོས་རྣམས་ཀྱི་བདག་ཉིད་ཐོབ་པའོ་ཞེས་བྱ་བ་ནི་མ་བྱུང་བ་ལས་བྱུང་བའི་མཚན་ཉིད་ཡིན་ནོ། །ཆོས་ཉིད་ཇི་ལྟར་སྐྱེ་བ་ཡིན་ཞེ་ན། འདི་ལྟར་འདི་ཡོད་ན་འདི་འབྱུང་འདི་སྐྱེས་པས་འདི་སྐྱེ་བ་ཞེས་བྱ་བ་འདི་ཡང་ཆོས་ཉིད་ཡིན་པར་བརྗོད་དོ་ཞེས་བསྟན་པ་ནི་ཆོས་གཞན་ལ་བརྟེན་ནས་བདག་ཉིད་ཐོབ་པའོ་ཞེས་བྱ་བ་ཡིན་ཏེ། ཆོས་ཉིད་འདི་རང་བཞིན་འདི་ལྟ་བུ་རང་གི་ངོ་བོ་ཉིད་འདི་ལྟ་བུ་སྟེ། གང་ཆོས་གཞན་ལ་བརྟེན་ནས་ཆོས་ཀྱི་བདག་ཉིད་ཐོབ་པ་ཡིན་ནོ། །དེ་བས་ན་ཆོས་ཉིད་དེ་སྐྱེ་བ་ཡིན་ནོ་ཞེས་བསྟན་ཏོ། །ད་ལྟར་བྱུང་བའི་དུས་ཀྱི་རྟེན་ཅིང་འབྲེལ་བར་འབྱུང་བ་བསྟན་པས་ཞེས་བྱ་བ་འདི་ཡོད་ན་འདི་འབྱུང༌། འདི་སྐྱེས་པས་འདི་སྐྱེ་བ་ཞེས་བྱ་བས་སོ། །དུས་གསུམ་པའི་ཤེས་པར་བྱ་བའི་ཕྱིར་ཆོས་ཉིད་བསྟན་ཏོ་ཞེས་བྱ་བ་ནི་འདས་པའི་དུས་ཉིད་ནི་ཡང་དེར་བྱུང་བས་དེ་བྱུང་བ་ཡིན་ནོ། །དེ་སྐྱེས་པས་འདི་སྐྱེས་པ་ཡིན་ནོ། །མ་འོངས་པ་ན་ཡང་དེ་འབྱུང་བར་འགྱུར་
བས་འདི་འབྱུང་བར་འགྱུར། དེ་སྐྱེ་བས་འདི་སྐྱེ་བར་འགྱུར་བ་ཡིན་ཞེས་བྱ་བ་ཡིན་ནོ། །ཆོས་གནས་པ་ཉིད་གང་ཞེ་ན། ཆོས་ཉིད་དེ་ཉིད་ལ་བྱའོ་ཞེས་བྱ་བ་ནི་ཆོས་རྣམས་དེའི་བདག་ཉིད་ཁོ་ན་ཡིན་ནོ་ཞེས་བསྟན་པའོ། །ཅིའི་ཕྱིར་ཆོས་ཉིད་དེ་ཆོས་གནས་པ་ཉིད་ཅེས་བརྗོད་ཅེ་ན། བཅོས་མ་མ་ཡིན་པའི་དོན་གྱིས་ཏེ་ཞེས་བྱ་བ་ནི་ཆོས་རྣམས་གང་དག་གི་བདག་ཉིད་ཁོ་ན་ནི་གང་གིས་ཀྱང་མ་བྱས་པ་ཡིན་ནོ། །གནས་པའི་ཚིག་གིས་མི་རྟག་པ་ཉིད་ཡིན་པར་བསྟན་ཏོ། །བྱེ་བྲག་གང་གིས་གཞན་གྱི་རྒྱུར་འགྱུར་བ་ཡིན་ནོ་ཞེས་བྱ་བ་ནི་ཆོས་གནས་པ་དེ་ནི་རྒྱུ་དང༌། དབྱིངས་དང༌། རིགས་དང༌། ས་བོན་དང༌། ནུས་པ་ཞེས་བྱ་བ་དོན་ཐ་དད་པ་མ་ཡིན་ནོ། །འདིས་རྒྱུ་ཉིད་འཛིན་པས་ན་ཞེས་བྱ་བ་ནི་ངེས་པའི་ཚིག་གི་ཚུལ་གྱིས་ཏེ། ཡི་གེ་ལྷག་མ་མི་མངོན་པར་བྱས་པས་སོ། །ཆོས་ངེས་པ་ཉིད་གང་ཞེ་ན། ཆོས་ཉིད་གང་ཡིན་པ་དེ་ཉིད་འཁྲུལ་པ་མེད་པ་གང་ཡིན་པའོ་ཞེས་བྱ་བ་ནི་གཅིག་ཁོ་ནར་ངེས་པ་ཉིད་ཡིན་ནོ། །དེ་ལྟར་ན་ཆོས་ཉིད་ཀྱི་ཚིག་གཉིས་ཀྱི་གཏན་དུ་བ་ཉིད་གང་ཡིན་པ་དང༌། གཅིག་ཁོ་ནར་ངེས་པ་ཉིད་གང་ཡིན་པ་བསྟན་ཏོ་ཞེས་བྱ་བ་ལ་ཆོས་གནས་པ་ཉིད་ཅེས་བྱ་བ་འདིས་ནི་གཏན་དུ་བ་ཉིད་བསྟན་ཏོ། །ཆོས་ངེས་པ་ཉིད་ཅེས་བྱ་བ་ནི་གཅིག་ཁོ་ནར་ངེས་པ་ཉིད་བསྟན་ཏོ། །དེ་ལས་གཞན་པའི་ཚིག་རྣམས་ནི་རྗེས་སུ་འབྲེལ་པར་འཆད་པར་རིག་པར་བྱའོ་ཞེས་བྱ་བ་ནི་ཕྱི་མ་ཕྱི་མས་སྔ་མ་སྔ་མ་འཆད་པ་ཡིན་ནོ། །ཡང་ན་དུམ་བུ་གསུམ་པའོ་ཞེས་བྱ་བ་བཤད་པའི་རྗེས་སུ་འབྲེལ་པ་ཡིན་པར་རིག་པར་བྱའོ། །དེ་ཅི་གཅིག་པུ་ཁོ་ན་ཤེས་པ་དེ་དག་ཐམས་ཅད་ཀྱི་མི་མཐུན་པའི་ཕྱོགས་ཡིན་ནམ་ཞེས་བྱ་བ་ནི་ཅི་ཉོན་མོངས་པ་ཅན་མ་ཡིན་པའི་མི་ཤེས་པ་གཅིག་པུ་ཐ་དད་པ་མེད་པ་ཁོ་ན་ཞིག་ཡི་གེ་འདྲི་བ་དང༌། བསྟན་བཅོས་དང༌། བཟོ་དང༌། ནད་དང་ནད་གཞི་དང༌། སྨན་ལ་སོགས་པ་དང༌། སངས་རྒྱས་རྣམས་ཀྱི་ཡུལ་ཤེས་པའི་མི་མཐུན་པའི་ཕྱོགས་ཡིན་ནམ། འོན་ཏེ་ཤེས་པ་སོ་སོའི་གཞན་ཡིན་ཏེ། ཡི་གེ་འདྲི་བ་ཤེས་པ་མི་མཐུན་པའི་ཕྱོགས་ཀྱང་གཞན། བསྟན་བཅོས་ཤེས་པའི་མི་མཐུན་པའི་ཕྱོགས་ཀྱང་གཞན། ནད་ཤེས་པའི་མི་མཐུན་པའི་ཕྱོགས་ཀྱང་གཞན། ནད་
གཞིའི་མི་མཐུན་པའི་ཕྱོགས་ཀྱང་གཞན། སྨན་ཤེས་པའི་མི་མཐུན་པའི་ཕྱོགས་ཀྱང་གཞན། སངས་རྒྱས་ཀྱི་ཡུལ་ཤེས་པའི་མི་མཐུན་པའི་ཕྱོགས་ཀྱང་གཞན་ཡིན་ནམ། གལ་ཏེ་ཉོན་མོངས་པ་ཅན་མ་ཡིན་པའི་མི་ཤེས་པ་ཡི་གེ་འདྲི་བ་དང༌། བསྟན་བཅོས་དང༌། བཟོ་ལ་སོགས་པ་ཤེས་པའི་མི་མཐུན་པའི་ཕྱོགས་གཅིག་ཁོ་ན་ཡིན་ན་ནི་གཅིག་ལ་ཤེས་པ་སྐྱེས་པས་ན་ཐམས་ཅད་ལ་མི་ཤེས་པ་ཅིའི་ཕྱིར་ལྡོག་པར་མི་འགྱུར་ཞེས་བྱ་བ་ནི་ཡི་གེ་འདྲི་བ་ཤེས་པ་སྐྱེས་ན་ཡང་དེའི་མི་མཐུན་པའི་ཕྱོགས་སུ་གྱུར་པའི་མི་ཤེས་པ་རྣམ་པར་ལྡོག་པ་ཡིན་དང༌། གཅིག་པུ་དེ་ཉིད་ཐམས་ཅད་ལ་མི་ཤེས་པ་ཡིན་པས་ཐམས་ཅད་ལ་མི་ཤེས་པ་ཡང་རྣམ་པར་ལོག་པ་ཡིན་པར་ཐལ་བར་འགྱུར་རོ། །འོན་ཏེ་ཤེས་པ་སོ་སོའི་གཞན་ཡིན་ན་ནི་ཅི་ཞེ་ན། ཉོན་མོངས་པ་ཅན་མ་ཡིན་པའི་མི་ཤེས་པས་ཅི་ཡང་རུང་མི་མཐུན་པའི་ཕྱོགས་སོ། །དེས་ན་སེམས་གཅིག་ལ་མི་ཤེས་པ་མཐའ་མེད་པ་དང་མཚུངས་པར་འགྱུར་རོ། །འདི་ལྟར་ཡི་གེ་འདྲི་བ་དང༌། བསྟན་བཅོས་དང༌། བཟོ་ལ་སོགས་པའི་ཤེས་པ་མི་མཐུན་པའི་ཕྱོགས་མི་ཤེས་པ་དང་མཚུངས་པར་ལྡན་པ་ཡིན་པའི་ཕྱིར་ཏེ། གང་གི་ཚེ་ཡི་གེ་འདྲི་བ་འདི་མི་ཤེས་པ་དེའི་ཚེ་ན་བསྟན་བཅོས་དང༌། བཟོ་ལ་སོགས་པ་ཡང་མི་ཤེས་པ་ཡིན་ནོ། །ལྷན་ཅིག་ཏུ་མ་རིག་པ་དུ་མའི་རྫས་ཡོད་པར་ཡང་རུང་བ་མ་ཡིན་ཏེ་ཞེས་བྱ་བ་ནི། རྫས་མཉམ་པ་ཉིད་ངེས་པའི་ཕྱིར་རོ། །དཔེར་ན་ཚོར་བ་ལ་སོགས་པའི་རྫས་བཞིན་ནོ་ཞེས་བྱ་བ་ནི་ལྷན་ཅིག་ཏུ་དུ་མ་མི་འདུག་པ་བཞིན་ནོ། །རྫས་མཐའ་ཡས་པ་མཐའ་དག་སེམས་ཅན་གྱི་རྒྱུད་ཀྱི་སྐད་ཅིག་མ་གཅིག་ཡིན་པར་ཡང་རིགས་པ་མ་ཡིན་ནོ་ཞེས་བྱ་བ་ནི་ཤེས་བྱ་མཐའ་མེད་པ་དག་འདིས་མི་ཤེས་པ་ཡིན་ནོ། །གལ་ཏེ་ཤེས་པ་སོ་སོའི་དེའི་མི་མཐུན་པའི་ཕྱོགས་སུ་གྱུར་པ་མི་ཤེས་པ་ཡོད་ན་ནི་རྫས་མཐའ་ཡས་པ་དག་སེམས་ཅན་གྱི་རྒྱུད་ཀྱི་སྐད་ཅིག་མ་གཅིག་ཡིན་པར་འགྱུར་རོ། །མི་ཤེས་པ་ཐམས་ཅད་ཀྱང་དེ་བཞིན་དུ་ཅིའི་ཕྱིར་མི་འདོད་ཅེས་བྱ་བ་ནི་ཇི་ལྟར་ཉོན་མོངས་པ་ཅན་མ་ཡིན་པའི་མི་ཤེས་པ་དག་ཤེས་པ་མེད་པ་ཙམ་ཡིན་པ་དེ་བཞིན་དུ་ཉོན་མོངས་པ་ཅན་
གང་ཡིན་པའི་མི་ཤེས་པ་ཐམས་ཅད་ཀྱང་ཤེས་པ་མེད་པ་ཙམ་ཡིན་པར་ཅིའི་ཕྱིར་མི་འདོད། ཉོན་མོངས་པ་ཅན་མ་ཡིན་པའི་མི་ཤེས་པ་དེ་ཡང་བདག་གིས་མ་ཤེས་ཏེ། དེ་ལྟར་བྱས་སོ་ཞེས་ཡང་པ་མ་སྤངས་པ་ལ་སོགས་པའི་རྒྱུ་ཉིད་ཡིན་པར་ཉེ་བར་བཏགས་པ་ཡིན་ནོ་ཞེས་བྱ་བ་ནི་དེ་ལྟར་འདུ་བྱེད་ལ་སོགས་པ་རྐྱེན་ཉིད་དུ་བསྟན་པའི་ཕྱིར་ཉོན་མོངས་པ་ཅན་མ་ཡིན་པའི་མི་ཤེས་པ་ནི་རྫས་སུ་གྲུབ་པ་ཡིན་ནོ་ཞེས་བསྟན་པ་ཡིན་ནོ། །ཉོན་མོངས་པ་ཅན་མ་ཡིན་པའི་མི་ཤེས་པ་གལ་ཏེ་ཡི་གེ་འདྲི་བ་ལ་སོགས་པ་ཤེས་པའི་མི་མཐུན་པའི་ཕྱོགས་ཡིན་ན། ཇི་ལྟར་འདོད་པ་དེ་བཞིན་དུ་ཞོག །འོན་ཏེ་ཡི་གེ་འདྲི་བ་ལ་སོགས་པ་ཤེས་པ་མེད་པ་ཙམ་ལ་རྣམ་པ་ཐམས་ཅད་དུ་སྐྱོན་མེད་དོ། །དེ་ཉོན་མོངས་པ་དང་ལས་དང་ཚེ་རྣམས་ཀྱི་རྐྱེན་ཉིད་ཡིན་པར་བསྟན་དུ་མེད་པར་འགྱུར་རོ་ཞེ་ན། གལ་ཏེ་ཡི་གེ་འདྲི་བ་ལ་སོགས་པའི་ཤེས་པ་རྣམས་མེད་པ་ཙམ་ཉོན་མོངས་པ་ཅན་མ་ཡིན་པའི་མི་ཤེས་པ་ཡིན་ན་དེ་དག་སྐྱེ་བ་ལ་གགས་བྱེད་པ་ཡང་གང་ཞིག་ཡིན། རྒྱུ་མ་ཚང་ན་དེ་མི་སྐྱེ་བར་འགྱུར་གྱི་རྒྱུ་མ་ཚང་ན་ཡང་ཡི་གེ་འདྲི་བ་ལ་སོགས་ཤེས་པ་སྐྱེ་བར་ཡང་འགྱུར་རོ། །རྒྱུ་ཚང་ན་ཡང་མི་སྐྱེ་བར་འགྱུར་རོ། །ཉོན་མོངས་པ་ཅན་གྱི་མ་རིག་པ་ནི་རིག་པའི་དངོས་པོ་མེད་པ་ཙམ་མ་རིག་པར་དེ་ལྟར་སྔར་ཤེས་པར་བྱས་ཟིན་ཏོ་ཞེས་བྱ་བ་ནི་མ་རིག་པ་རྣམ་པར་འབྱེད་པ་ལས་རྒྱས་པར་རོ། །གང་དག་ཡང་མི་ཤེས་པ་ཐམས་ཅད་ནི་ཤེས་པའི་མི་མཐུན་པའི་ཕྱོགས་ཆོས་གཞན་ཡིན་པར་སྨྲ་ཞེས་བྱ་བ་ནི་ཉོན་མོངས་པ་ཅན་དང༌། ཉོན་མོངས་པ་ཅན་མ་ཡིན་པའོ། །དེ་ལ་དང་ཕོ་ནི་ཤེས་པ་གཅིག་ཁོ་ན་ཡིན་ཏེ། ཤེས་བྱ་ཐམས་ཅད་ལ་ཤེས་པའི་མི་མཐུན་པའི་ཕྱོགས་སྐད་ཅིག་རེ་རེ་ལ་འབྱུང་བ་ན་རྒྱུན་དུ་ཡིན་པར་འཇོག་གོ་ཞེས་བྱ་བ་ནི་དང་པོ་གང་ཞེ་ན། རྒྱུན་དུ་ཀུན་དུ་འབྱུང་བར་སྨྲ་བའོ། །གལ་ཏེ་གཅིག་ཁོ་ན་ཡིན་ན་གཅིག་ལ་ཤེས་པ་སྐྱེས་པ་ན་ཐམས་ཅད་ལ་མི་ཤེས་པ་ཅིའི་ཕྱིར་ལྡོག་པར་མི་འགྱུར་ཞེས་བྱ་བའི་ལན་དུ། རྐྱེན་གྱི་བྱེ་བྲག་ཉེ་བར་གྱུར་པའི་ཕྱིར་ཡུལ་གང་ལ་ཤེས་པ་སྐྱེས་པ་ན་ཇི་ཙམ་དུ་ཤེས་པ་དེ་མེད་པར་མ་གྱུར་གྱི་བར་དུ་དེ་ལས་གཞན་པའི་དངོས་པོ་ལ་ཁྱབ་པར་བྱེད་པའི་མི་ཤེས་པ་གཅིག་གི་འབྱུང་བར་འགྱུར་ཏེ་ཞེས་བྱ་བ་ལ།
ཡུལ་གང་ལ་ཤེས་པ་སྐྱེས་པ་ན་ཞེས་བྱ་བ་ནི་ཡི་གེ་འདྲི་བ་དང༌། བསྟན་བཅོས་དང༌། བཟོ་ལ་སོགས་པ་ལའོ། །རྐྱེན་གྱི་བྱེ་བྲག་ཉེ་བར་གྱུར་པའི་ཕྱིར་ཞེས་བྱ་བ་ནི་ཤེས་པ་དེ་དག་སྐྱེ་བའི་རྒྱུའི་བྱེ་བྲག་ཚོགས་པའི་ཕྱིར་རོ། །དེ་ལས་གཞན་པའི་དངོས་པོ་ལ་ཁྱབ་པར་བྱེད་པ་ཞེས་བྱ་བ་ནི་ཡི་གེ་འདྲི་བ་ལ་སོགས་པའི་དངོས་པོ་དེ་ལས་བྱེ་བྲག་ཏུ་གྱུར་པའི་དངོས་པོ་ཁྱབ་པར་བྱེད་པའོ། །མི་ཤེས་པ་གཞན་གཅིག་འབྱུང་བར་འགྱུར་རོ། །མི་ཤེས་པ་སྔ་མ་ནི་སྐད་ཅིག་མ་འཇིག་པ་ཡིན་པའི་ཕྱིར་རང་གི་ངང་གིས་མེད་པར་གྱུར་ཏོ། །ཇི་ཙམ་དུ་ཤེས་པ་དེ་མེད་པར་མ་གྱུར་གྱི་བར་དུ་ཞེས་བྱ་བ་ནི་ཡི་གེ་འདྲི་བ་ཤེས་པ་ལ་སོགས་པ་དེ་ལས་སོ། །དེ་ཇི་ལྟར་མེད་པར་མ་གྱུར་ཅེ་ན། དེའི་བག་ཆགས་རྟས་པ་ཡོད་པའི་ཕྱིར་ཏེ། ཡི་གེ་འདྲི་བ་ལ་སོགས་པ་ཤེས་པའི་བག་ཆགས་རྟས་པ་མ་སྤྱད་པ་ཡིན་པའི་ཕྱིར་རོ་ཞེས་བྱ་བའི་ཐ་ཚིག་གོ །དེ་སྲིད་དུ་དེ་ལས་གཞན་པའི་དངོས་པོ་ལ་ཁྱད་པར་བྱེད་པའི་མི་ཤེས་པ་གཞན་གཅིག་འབྱུང་བར་འགྱུར་རོ། །ཤེས་པ་དེ་མེད་པར་གྱུར་པ་ཡང་སྔོན་གྱི་ཇི་ལྟ་བ་དེ་བཞིན་དུ་ཡང་འབྱུང་བར་འགྱུར་རོ་ཞེས་བྱ་བ་ནི་ཡི་གེ་འདྲི་བ་ལ་སོགས་པའི་ཤེས་པ་དེ་ལས་ཉམས་ན་ཡང་ཡི་གེ་འདྲི་བ་ལ་སོགས་པའི་ཡུལ་དེ་ལ་ཡང་མི་ཤེས་པ་དེ་སྔོན་བཞིན་དུ་འབྱུང་བར་འགྱུར་རོ། །དེ་བཞིན་དུ་ནད་དང༌། ནད་གཞི་དང༌། སྨན་ལ་སོགས་པ་ཡུལ་གང་དང་གང་ལ་རྐྱེན་གྱི་བྱེ་བྲག་ཉེ་བར་གྱུར་པའི་ཕྱིར་ཞེས་སྐབས་དང་སྦྱར་ཏེ། ཤེས་པ་སྐྱེས་པ་ན་དེ་དང་དེ་ལས་གཞན་པའི་ཤེས་བྱ་ལ་ཤེས་པའི་མི་མཐུན་པའི་ཕྱོགས་མི་ཤེས་པ་གཅིག་འབྱུང་བར་འགྱུར་རོ། །ཡོད་པར་འགྱུར་རོ། །དེ་བས་ན་ནད་དང་ནད་གཞི་དང༌། སྨན་ལ་སོགས་པ་ལས་གཞན་དུ་ཤེས་བྱའི་བྱེ་བྲག་ལ་ཤེས་པའི་མི་མཐུན་པའི་ཕྱོགས་སུ་གྱུར་པའི་མི་ཤེས་པ་གཅིག་འབྱུང་བར་འགྱུར་རོ། །སྔོན་ཆད་ཡོད་པ་ནི་རང་ཉིད་སྐད་ཅིག་མ་འཇིག་པ་ཡིན་པའི་ཕྱིར་རོ། །ཇི་སྲིད་ཐམས་ཅད་མཁྱེན་པ་ཉིད་མ་ཐོབ་ཀྱི་བར་དུ་ཞེས་བྱ་བ་ནི་སངས་རྒྱས་ཉིད་ལ་ཐུག་གི་བར་དུ་
སྐྱོན་གྱི་རྣམ་པ་ཡོད་པར་རིག་པར་བྱའོ། །དཔེས་དོན་བརྗོད་པ་ནི་དཔེར་ན་ཁང་མིག་གཅིག་ན་ཞེས་རྒྱས་པར་འབྱུང་བ་ཡིན་ནོ། །ཡུལ་དེ་ཐམས་ཅད་ཀྱི་མུན་པ་ནི་རང་གི་ངང་གིས་འགག་སྟེ་ཞེས་བྱ་བ་ནི་མུན་རུམ་ན་ཡོད་པའི་གཟུགས་ཀྱི་ཡུལ་ན་མུན་པ་ཡོད་པ་ནི་ངོ་བོ་ཉིད་ཀྱིས་འགག་པ་ཡིན་ནོ། །འདུ་བྱེད་ཐམས་ཅད་སྐད་ཅིག་མ་ནི་འཇིག་པ་ཡིན་པའི་ཕྱིར་རོ་ཞེས་བྱ་བ་ནི་འདུ་བྱེད་ཐམས་ཅད་སྐད་ཅིག་མ་འཇིག་པ་ཡིན་ནོ། །དེ་བས་ན་དེ་དག་རང་གི་ངང་གིས་འགག་པར་འགྱུར་ཏེ། འཇིག་པ་ལ་རྐྱེན་མེད་པའི་ཕྱིར་རོ། །གཟུགས་དེའི་ངོས་གང་དུ་རྩིག་པའི་འོག་གི་བུ་ག་ནས་སྣང་བ་བྱུང་བ་ན་ཞེས་བྱ་བ་ནི་མུན་རུམ་ན་འདུག་པའི་གཟུགས་དེའི་ངོས་ལའོ། །དེ་བས་གཞན་པའི་ཡུལ་ལྷག་མ་དེ་དག་ཉིད་དུ་མུན་པ་འབྱུང་བར་འགྱུར་རོ་ཞེས་བྱ་བ་ནི། གཟུགས་སྔ་མ་དེ་ལས་གཞན་དང་གཞན་ན་མུན་པ་ལྷག་མ་དང་བཅས་པ་མུན་རུམ་དུ་འདུག་པའི་གཟུགས་ཀྱི་ཡུལ་དུ་མུན་པ་འབྱུང་བར་འགྱུར་རོ། །ཇི་སྲིད་དུ་སྣང་བ་མེད་པར་མ་གྱུར་གྱི་བར་དུ་ཞེས་བྱ་བ་ནི་གཟུགས་ཀྱི་ངོས་གང་དུ་སྣང་བ་དེ་བྱུང་བ་དེ་སྲིད་དུ་དེ་ལས་གཞན་དང་གཞན་ཡུལ་ལྷག་མར་མུན་པ་འབྱུང་བར་འགྱུར་རོ། །སྣང་བ་ནུབ་ན་ཡང་དུས་མཉམ་དུ་སྔོན་ཇི་ལྟ་བ་དེ་བཞིན་དུ་ཡང་མུན་པ་འབྱུང་བར་འགྱུར་རོ་ཞེས་བྱ་བ་ནི། ཇི་ལྟར་སྔོན་གྱི་མུན་པ་བཞིན་དུ་སྣང་བ་དང་མུན་རུམ་ཡོད་པའི་གཟུགས་ཀྱི་ཡུལ་དུའོ། །འོ་ན་ད་ནི་མི་ཤེས་པའི་རྫས་གཅིག་པུ་འདི་ཇི་ལྟར་ན་ཉོན་མོངས་པ་ཡང་ཡིན་ལ། ཉོན་མོངས་པ་མ་ཡིན་པ་ཡང་ཡིན་ཞེས་བྱ་བ་ནི་ཉོན་མོངས་པ་ཅན་ཡིན་པའི་ཕྱིར་ཉོན་མོངས་པ་སྟེ། ཉོན་མོངས་པ་དང༌། ལས་དང༌། ཚེའི་རྒྱུར་གྱུར་པའོ། །ཉོན་མོངས་པ་ཅན་མ་ཡིན་པའི་ཕྱིར་ཉོན་མོངས་པ་ཡང་མ་ཡིན་ཏེ། ཡི་གེ་འདྲི་བ་དང༌། བསྟན་བཅོས་དང༌། བཟོ་ལ་སོགས་པ་ཤེས་པའི་མི་མཐུན་པའི་ཕྱོགས་སུ་གྱུར་པའོ། །ཉོན་མོངས་པ་དང་མཚུངས་པར་ལྡན་པ་ཡང་ཡིན་ལ། མཚུངས་པར་མི་ལྡན་པ་ཡང་ཡིན་ཞེས་བྱ་བ་ནི། འདི་ལྟར་མ་རིག་པ་དེ་ནི་ཉོན་མོངས་པ་གཞན་དང་མཚུངས་པར་ལྡན་པ་ཡང་རྣམ་
པར་གཞག་པ་དང་འདྲེས་པ་ཡིན་ནོ། །ཡང་ན་འདོད་ཆགས་ལ་སོགས་པས་ཉོན་མོངས་པ་ཅན་ཡིན་པས་རབ་ཏུ་སྦྱོར་བ་ཡིན་ནོ། །ཉོན་མོངས་པ་ཅན་མ་ཡིན་པ་ནི་རབ་ཏུ་སྦྱོར་བ་མ་ཡིན་པའི་ཕྱིར་རོ། །མི་དགེ་བ་ཡང་ཡིན་ལ། མི་དགེ་བ་མ་ཡིན་ཞེས་བྱ་བ་ནི་ལོག་པར་ལྟ་བ་ལ་སོགས་པ་དང་མཚུངས་པར་ལྡན་པའི་ཕྱིར་མི་དགེ་བ་ཡིན་ནོ། །ཉོན་མོངས་པ་ཅན་མ་ཡིན་པའི་ཕྱིར་དགེ་བ་ཡང་ཡིན་ནོ། །འཇིག་ཚོགས་ལ་ལྟ་བ་ལ་སོགས་པ་དང་མཚུངས་པར་ལྡན་པའི་ཕྱིར་ཡང་མཐོང་བས་སྤང་བར་བྱ་བ་ཡིན་ལ། དེས་སྤང་བར་བྱ་བ་མ་ཡིན་པ་ཡང་ཡིན་ཏེ། ཉོན་མོངས་པ་ཅན་མ་ཡིན་པའི་ཕྱིར་རོ། །ཉོན་མོངས་ཅན་མིན་མཐོང་སྤང་མིན། །ཞེས་བརྗོད་པའི་ཕྱིར་རོ། །སེམས་ཉོན་མོངས་པར་བྱེད་པའི་ཕྱིར་རོ་ཞེས་བྱ་བ་ནི་དེ་ལས་བྱུང་བའི་ཉོན་མོངས་པ་ནི་སེམས་ཉོན་མོངས་པ་ཡིན་ནོ། །དེ་བས་ན་མི་ཤེས་པ་དེ་ཉོན་མོངས་པའི་མཚན་ཉིད་མ་ཡིན་ཡང་སེམས་ཉོན་མོངས་པར་བྱེད་པའི་ཕྱིར་ཉོན་མོངས་པ་ཡིན་པར་རྣམ་པར་གཞག་གོ །ཇི་ལྟར་དེ་ལས་གཞན་པའི་ཤེས་པའི་མི་མཐུན་པའི་ཕྱོགས་སུ་འདུག་པ་ན་ཉོན་མོངས་པ་རྣམས་ཀྱི་རྐྱེན་དུ་མི་འགྱུར་བ་དེ་ལྟར་ཉོན་མོངས་པ་ཡིན་པར་རྣམ་པར་མི་གཞག་གོ་ཞེས་བྱ་བ་ནི་ཡི་གེ་འདྲི་བ་དང༌། བསྟན་བཅོས་དང༌། བཟོ་ལ་སོགས་པ་ཤེས་པའི་མི་མཐུན་པའི་ཕྱོགས་སུ་འདུག་པ་ན། ཉོན་མོངས་པ་རྣམས་ཀྱི་རྐྱེན་མ་ཡིན་ཏེ། ཅིའི་ཕྱིར་ཞེ་ན། སེམས་ཉོན་མོངས་པར་མི་བྱེད་པའི་ཕྱིར་རོ། །ཉོན་མོངས་པ་མ་ཡིན་པར་ཡང་རྣམ་པར་མི་གཞག་སྟེ། ཉོན་མོངས་པ་དང་ཡུལ་མཚུངས་པ་ཡིན་པའི་ཕྱིར་ཉོན་མོངས་པ་དང་མཚུངས་པར་ལྡན་པ་ཡིན་པར་རྣམ་པར་གཞག་གི་ཞེས་བྱ་བ་ནི་གཟུགས་ཅན་མ་ཡིན་པ་རྣམས་ལ་འདུ་བའི་མཚན་ཉིད་ཀྱི་བར་དུ་སྦྱོར་བ་ནི་ཡོད་པ་མ་ཡིན་པའི་ཕྱིར་རོ། །ཡུལ་དེ་ལས་གཞན་ལ་ཤེས་པའི་སྒྲིབ་པའི་དངོས་པོར་འཇུག་པ་ནི་དམིགས་པ་གང་ལ་ཉོན་མོངས་པ་སྐྱེ་བ་དེ་ལས་གཞན་པའི་དམིགས་པ་ལ་
ཤེས་པའི་སྒྲིབ་པའི་དངོས་པོར་འདུག་པ་ནི་ཉོན་མོངས་པ་དང་མཚུངས་པ་མ་ཡིན་པའི་ཕྱིར། ཉོན་མོངས་པ་དང་མཚུངས་པར་ལྡན་པ་མ་ཡིན་པར་རྣམ་པར་གཞག་སྟེ། དམིགས་པ་ལ་འདྲེ་བ་མེད་པའི་ཕྱིར་རོ། །དགེ་བ་ཤེས་པའི་མི་མཐུན་པའི་ཕྱོགས་ཡིན་པའི་ཕྱིར་མི་དགེ་བ་ཡིན་པར་རྣམ་པར་གཞག་སྟེ། དེའི་གཉེན་པོ་ཤེས་པ་ཐོབ་པར་བྱ་བ་ལ་གུས་པ་བསྐྱེད་པའི་ཕྱིར་རོ་ཞེས་བྱ་བ་ནི་མི་ཤེས་པ་དེ་གཉེན་པོ་ཤེས་པ་ཐོབ་པར་བྱ་བ་ལ་གུས་པ་བསྐྱེད་པའི་ཕྱིར་རོ་ཞེས་བྱ་བའི་ཐ་ཚིག་གོ །དེ་ལས་གཞན་པ་ལས་ཤེས་པའི་མི་མཐུན་པའི་ཕྱོགས་ཡིན་པའི་ཕྱིར། མི་དགེ་བ་ཡིན་པར་རྣམ་པར་མི་གཞག་གོ་ཞེས་བྱ་བ་ནི་དགེ་བ་ཤེས་པ་དེ་ལས་གཞན་པའི་ཤེས་པའི་མི་མཐུན་པའི་ཕྱོགས་ཡིན་པའི་ཕྱིར་ལུང་དུ་མ་བསྟན་པའི་ཤེས་པའི་མི་མཐུན་པའི་ཕྱོགས་ཡིན་པའི་ཕྱིར་རོ་ཞེས་བྱ་བའི་ཐ་ཚིག་གོ །མཐོང་བའི་ལམ་གྱི་མི་མཐུན་པའི་ཕྱོགས་ཡིན་པའི་ཕྱིར་མཐོང་བས་སྤང་བར་བྱ་བ་ཡིན་ནོ། །བསྒོམ་པའི་ལམ་གྱི་མི་མཐུན་པའི་ཕྱོགས་ཡིན་པའི་ཕྱིར་བསྒོམ་པས་སྤང་བར་བྱ་བ་ཡིན་ནོ། །དཔེར་ན་ལུས་དང་ངག་གཡོ་བ་དང་ཐ་སྙད་གཉིས་བསམ་པའི་དབང་གིས་ཞེས་བྱ་བ་ནི་ལུས་གཡོ་བ་དང༌། ངག་གི་ཐ་སྙད་དོ། །སྒོ་དེ་ནས་ཞེས་བྱ་བ་ནི་ལུས་དང་ངག་གཡོ་བ་དང༌། ཐ་སྙད་ཀྱི་སྒོ་ནས་སོ། །དེ་ཀུན་ནས་སློང་བར་བྱེད་པའི་སེམས་པ་འཇུག་པ་དང༌། ལྡོག་པར་ཀུན་དུ་སྦྱོར་བའི་ཕྱིར་དང་ཞེས་བྱ་བ་ནི་ལུས་དང་ངག་གཡོ་བ་དང༌། ཐ་སྙད་ཀུན་ནས་སློང་བར་བྱེད་པའི་དགེ་བ་དང༌། མི་དགེ་བའི་སེམས་པ་འཇུག་པ་དང༌། ལྡོག་པའི་རྟེན་ཡིན་པའི་ཕྱིར་གོ་རིམས་བཞིན་ནོ། །མ་རིག་པ་གཉིས་པ་སྨྲ་བ་ཡང་ཞེས་བྱ་བ་ནི་ཡིད་ལ་བྱེད་པ་ཀུན་དུ་འབྱུང་བར་སྨྲ་བའོ། །ཤེས་བྱ་གང་ཡིད་ལ་བྱེད་པ་ན་ཤེས་པ་མི་སྐྱེ་བ་དེར་ནི་དེའི་མི་མཐུན་པའི་ཕྱོགས་མི་ཤེས་པ་ཀུན་དུ་འབྱུང་བ་ཡིན་པར་རྣམ་པར་གཞག་སྟེ། རང་གི་ཕྲ་རྒྱས་འཇུག་པ་ཐོབ་པའི་
ཕྱིར་རོ་ཞེས་བྱ་བ་ནི་དེ་ལྟར་ན་ཤེས་པ་སོ་སོའི་མི་མཐུན་པའི་ཕྱོགས་སུ་གྱུར་པ་ཤིན་ཏུ་མི་ཤེས་པ་ཡིན་ནོ། །སེམས་གཅིག་ལ་མི་ཤེས་པ་མཐའ་མེད་པ་དང་མཚུངས་པར་ལྡན་པར་ཐལ་བར་འགྱུར་བ་ཡང་མ་ཡིན་ཏེ། དེ་ལྟར་གང་ཡིད་ལ་བྱེད་པ་ན་ཤེས་པ་མི་སྐྱེ་བ་དེར་ནི་དེའི་མི་མཐུན་པའི་ཕྱོགས་མི་ཤེས་པ་མངོན་དུ་གྱུར་པ་ཡིན་གྱི། ཤེས་བྱ་ཐམས་ཅད་ལ་ནི་མ་ཡིན་ནོ། །ཕྲ་རྒྱས་ནི་བག་ཆགས་སོ། །འཇུག་པ་ཐོབ་པའི་ཕྱིར་ཞེས་བྱ་བ་ནི་ཡོངས་སུ་གྱུར་པའི་བྱེ་བྲག་གོ ། ཡོངས་སུ་གྱུར་པའི་བྱེ་བྲག་ཡོད་པ་དེ་ནི་བག་ཆགས་རང་གི་འབྲས་བུ་མངོན་པར་འགྲུབ་པར་འགྱུར་རོ། །དུས་ཀུན་དུ་ཡང་མ་ཡིན། ཡུལ་ཐམས་ཅད་དུ་ཡང་མ་ཡིན་ཞེས་བྱ་བ་ནི་ཐམས་ཅད་དུ་ཡང་མ་ཡིན། ཤེས་བྱ་ཐམས་ཅད་ལ་ཀུན་དུ་འབྱུང་བར་རྣམ་པར་གཞག་པ་ཡང་མ་ཡིན་པ་དེ་ལྟ་ཡིན་པའི་ཕྱིར་སེམས་གཅིག་ལ་མི་ཤེས་པ་མཐའ་མེད་པ་དང་མཚུངས་པར་ལྡན་པ་ཡིན་པར་འགྱུར་བ་མེད་དོ། །ཉོན་མོངས་པ་གང་དང་མཚུངས་པར་ལྡན་པ་དེ་ཉིད་དང་ལྷན་ཅིག་སྐྱེ་ཞིང་ཞེས་བྱ་བ་ནི་ཉོན་མོངས་པ་གང་དང་མཚུངས་པར་ལྡན་པའི་མི་ཤེས་པ་དེ་ནི་ཉོན་མོངས་པ་དེ་དག་ཉིད་དང་ལྷན་ཅིག་སྐྱེ་ཞིང་འགག་གོ །དེ་ལྟར་ནི་ཉེས་མེད་པ་ཡིན་ནོ་ཞེས་བྱ་བ་ནི་ཇི་ལྟར་ཡིད་ལ་བྱེད་པ་ཀུན་དུ་འབྱུང་བར་སྨྲ་བ་དག་བརྗོད་པ་ལྟར་ཡིན་ནོ་ཞེས་སློབ་དཔོན་གསུང་ངོ༌། །གང་གི་ཕྱིར་འདི་ལྟར་རྣམ་པར་གཞག་པ་ནི་ཐམས་ཅད་དུ་སྐྱོན་མེད་པ་ཡིན་ནོ། །དེ་བས་ན་མ་རིག་པ་ནི་རིག་པའི་མི་མཐུན་པའི་ཕྱོགས་ཆོས་གཞན་ཞིག་ཡིན་པར་གྲུབ་པ་འདི་ཡིན་ནོ། །རྟེན་ཅིང་འབྲེལ་བར་འབྱུང་བ་ཐོག་མ་དང་རྣམ་པར་འབྱེད་པའི་མདོ་སྡེའི་འགྲེལ་བ་རྒྱ་ཆེར་བཤད་པ་རྫོགས་སོ།། །།འདི་མཛད་པའི་སློབ་དཔོན་ནི་ཡོན་ཏན་བློ་གྲོས་ཡིན་ཏེ། ཐེག་པ་ཆེན་པོ་པ་བྱང་ཆུབ་སེམས་དཔའ་སེམས་དཔའ་ཆེན་པོ་ཡིན་ནོ། །ལིའི་མཁན་པོ་སུ་རེནྡྲ་ཀ་ར་པྲ་བྷཱ་དང༌། ལོ་ཙཱ་བ་ནམ་མཁས་བསྒྱུར་ཅིང་ཞུས་ཏེ་གཏན་ལ་བབ་པའོ།། །།