གཞོན་ནུ་མ་བདུན་གྱི་རྟོགས་པ་བརྗོད་པ།
གསང་བས་བྱིན།
རྒྱ་གར་སྐད་དུ། སཔྟ་ཀུ་མཱ་རཱི་ཀ་ཨ་བ་དཱ་ནཾ། བོད་སྐད་དུ། གཞོན་ནུ་མ་བདུན་གྱི་རྟོགས་པ་བརྗོད་པ། དཀོན་མཆོག་གསུམ་ལ་ཕྱག་འཚལ་ལོ། །ཆགས་བྲལ་ལྡན་དང་ལེགས་པར་བཤད་པ་དང༌། །ངོ་མཚར་དང་ནི་དེ་ཉིད་དོན་ངེས་དང༌། །དམ་པ་རྣམས་ཀྱི་གཅིག་ཏུ་མཉན་བྱ་ཡི། །རྟོགས་པ་བརྗོད་པ་བདག་གིས་བཤད་ཀྱིས་ཉོན། །འདི་ལྟར་དགེ་བའི་རྩ་བ་ཡོངས་སུ་སྨིན་པ་རྣམས་ལ་ནི། །ལོངས་སྤྱོད་ཆེན་པོའམ། ལང་ཚོས་བར་དུ་གཅོད་པར་མི་འགྱུར་བས་མཛེས་པར་གྱུར་པ་ཡིན་ནོ། །དེ་ཡང་འདི་ལྟར་རྗེས་སུ་ཐོས་ཏེ། རྒྱལ་པོ་ཀྲི་ཀཱི་ཞེས་བྱ་བ་ཚུལ་དང་དུ་ལ་བ་ལ་སོགས་པ་ཡོན་ཏན་གྱི་དཔལ་ཕུན་སུམ་ཚོགས་བ་དང་ལྡན་པ། བཅོམ་ལྡན་འདས་ཡང་དག་བར་རྫོགས་པའི་སངས་རྒྱས་འོད་སྲུངས་ལ་དད་པ་ཡང་དག་པར་ཐོབ་པ་ཞིག་བྱུང་བར་གྱུར་པ་དེ། དེའི་བུ་མོ་བདུན་སྔོན་དུ་བྱུང་པའི་སངས་རྒྱས་རྣམས་ལ་དགེ་བའི་རྩ་བ་རྒྱ་ཆེར་བསྐྲུན་པའི་སྟོབས་དང་ལྡན་པ་དེ་དག་འཁོར་བས་ཤིན་ཏུ་ཡིད་བྱུང་བར་གྱུར་ནས། དེ་རྣམས་ཀྱིས་དུལ་བ་དང་ཞེ་སར་བཅས་པས་ཕ་ལ་ཕྱག་བྱས་ཏེ་སྙན་པའི་ཚིག་གིས་སྨྲས་པ། འཇིག་རྟེན་གནས་པ་ཆུ་ནང་སོང་བའི་ཟླ་བའི་གཟུགས་བཞིན་གཡོ་བར་མཐོང༌། །འདོད་པ་ཁྲོས་པའི་སྤྲུལ་གྱིས་ལུས་སྐྱིལ་གདེངས་ཀའི་གྲིབ་མ་ལྟ་བུར་མཐོང༌། །འགྲོ་བ་འདི་དག་སྡུག་བསྔལ་མེ་ཡིས་ཀུན་དུ་འབར་བ་མཐོང་བས་ན། །རྒྱལ་པོ་བདག་ཅག་ངེས་པར་འབྱུང་ལ་མངོན་དགའ་དུར་ཁྲོད་དག་ཏུ་མཆི། །རྒྱལ་པོས་སྨྲས་པ། ཁྱེད་ནི་བྱིས་པ་བདེ་ལ་བརྟེན་འོས་ཤིང༌། །ཡིད་ལ་བསམས་པའི་དོན་ཡང་མ་བྱས་ན། །དཀའ་ཐུབ་གནས་སུ་ཁྱེད་རྣམས་སོང་ཤིག་ཅེས། །ཇི་ལྟ་བུར་ནང་ཡིས་སྨྲ་བར་ནུས། །བུ་མོས་སྨྲས་པ། ས་བདག་ཁྱེད་ཀྱི་མཛད་སྤྱོད་བདག་ཅག་རྣམས་ཀྱིས་འཚལ་ལགས་ཏེ། །འགྲོ་ལ་ཐུགས་རྗེས་བརླན་ཞིང་དེས་པའི་ངང་ཚུལ་ལྡན་བས་ན། །དགོས་པ་མེད་ལའང་བྱམས་པར་མཛད་ན་ཉིད་ཀྱི་ཕང་པར་ནི། །རྣམ་བསྐྱེད་སྡིག་མེད་ཉེར་སོན་བདག་
ཅག་རྣམས་ལྟ་སྨོས་ཅི་འཚལ། །ཁྱེད་དང་ལྷན་ཅིག་གནས་ཀྱང་དབང་མེད་བྲལ་བ་མངོན་ཕྱོགས་པའི། །ཕོངས་པ་འདི་ཡིས་ཕྱིར་ཞིང་ཉེ་བར་གདུང་བར་མ་གྱུར་ཅེས། །རྒྱལ་པོ་ཤིན་ཏུ་དགའ་བའི་གནས་སུ་གྱུར་པ་གང་དག་ཡིན་པ་ཡི། །ཞི་བའི་གོ་འཕང་ཐོབ་པར་འཚལ་བའི་ཡིད་ནི་སྐྱེས་པར་གྱུར། །དེ་ནས་རྒྱལ་པོ་དེ་སྙིང་བརྩེ་བའི་དབང་གིས་ཡིད་རྣམ་པར་ཉམས་ཤིང༌། མིག་གཉིས་ཟངས་ལྟར་དམར་ལ་མི་འགྱུར་བས་ཡང་དང་ཡང་དུ་བལྟས་ནས་སྨྲས་པ། ཅི་ཕྱིར་ཁང་བཟངས་རང་དགར་གྱུར་དང་འཇམ་ཡངས་པའི། །སྣ་ཚོགས་སྟན་བཟངས་རྒྱ་ཆེན་རྣམ་པར་སྤངས་ནས་ནི། །དུར་ཁྲོད་མི་བཟད་སྐྱེ་བོ་ངན་པའི་ཡིད་འདྲ་ཞིང༌། །ས་གཞི་རུས་པ་དཀར་པོའི་ཚལ་པས་བཀྲམ་པས་སྟན། །གདུང་བའི་གདོང་ཅན་ཕ་དང་ཡུལ་རྨུགས་ལྟ་བུར་ནི། །མཆི་མའི་གདོང་ཅན་མ་ཡང་ཅིག་ཅར་ཇི་ལྟར་འདོར། །གཡོ་མེད་སེམས་ཀྱི་རྒྱུན་དུ་ཡིད་ནི་བརྩེ་བ་ཡི། །མཛའ་བཤེས་སྤངས་ནས་ཅི་ཕྱིར་དཀའ་ཐུབ་བསྟན་པར་དགའ། །དེ་ནས་བུ་མོ་དེ་རྣམས་ཀྱིས་ཤིན་ཏུ་བརྟན་པའི་ཡིད་ཀྱིས་བསྙེམས་པར་བྱས་ནས། སྨྲས་པ། ཕ་དང་མ་དང་མཛའ་བཤེས་གཅེས་པ་ཐ་སྙད་ཙམ། །འདི་དག་སྲིད་པར་ཕྱིར་ཡང་ལྷུང་དང་གནོད་པའི་གཞི། །འབྱུང་བའི་དོན་མཐོང་ལྐོག་ཏུ་གྱུར་པའི་དྲི་མ་ཡིས། །མི་ཡི་བདག་པོ་འཇིག་རྟེན་འཇིག་པས་ཡོངས་སུ་སྐྱོ། །མཛའ་བཤེས་རང་མི་གཉེན་གྱི་ངོ་བོ་སྣ་ཚོགས་པ། །གཡོན་ཅན་ཕུང་ཁྲོལ་ལྡན་པ་འདི་ལ་སུ་ཞིག་ཆགས། །འཚོ་བའི་འཇིག་རྟེན་མི་ལམ་མིག་འཕྲུལ་དང་འདྲ་ལ། །འདི་ན་སུ་ཞིག་གང་གིས་རང་མིའམ་སྐྱེ་བོར་བརྟག །མི་ཡི་དབང་པོ་འཇིག་རྟེན་དམ་ཆོས་གསུང་གི་འོད་ཟེར་སྣང་བཅས་ཤིང༌། །ཇི་སྲིད་སངས་རྒྱས་ཉི་མའི་ཡིད་འོང་གྲགས་པའི་འོད་ཟེར་ཕྲེང་ཡོད་པ། །དེ་སྲིད་ཕོངས་པའི་མུན་ནག་ཚོགས་ཀྱིས་ཤིན་ཏུ་གཡོགས་གྱུར་པའི། །སྲིད་པའི་མུན་པ་མི་ཟད་མུན་རུམ་ནས་ནི་འབྱུང་བར་བྱ་བའི་རིགས། །ཇི་ལྟར་རླུང་གིས་བརྡབས་པས་བསྐྱོད་པའི་མེ་ལྕེ་འབར་བའི་ཁྱིམ་ལས་ནི། །འབྱུང་བར་བྱེད་པའི་སྐྱེས་བུ་དེ་ལ་ཕན་པར་འདོད་རྣམས་ཟློག་མི་བྱེད། །དེ་བཞིན་སྡུག་བསྔལ་མེ་ཆེན་རྩེར་གནས་སྲིད་པ་མ་ལུས་གནོད་པ་ཡི། །དྲ་བ་ལས་ནི་ངེས་པར་འབྱུང་ལ་ཕན་ཕྱིར་
དམ་པས་བཟློག་མི་བྱ། །དེ་ནས་རྒྱལ་པོ་དེས་བུ་མོ་དེ་རྣམས་མཛའ་བཤེས་དང་རང་མི་དང་རྩ་ལག་རྣམས་ལ་ལྟོས་པ་མེད་པའི་ཚིག་རྩུབ་པོ་དང༌། རང་གི་ལུས་དང་སྲོག་ལ་ཡང་ཤིན་ཏུ་མ་ཆགས་པའི་ཚིག་གིས་ལྷག་པར་ཡང་མྱ་ངན་གྱིས་གདུངས་པར་གྱུར་བའི་ཡིད་ཀྱིས་དེ་རྣམས་ལ་ཡང་སྨྲས་པ། དུས་མིན་དཀའ་ཐུབ་མངོན་པར་འདོད་པ་ནི། །ཡིད་དང་རྗེས་མཐུན་དོན་དུ་མི་འགྱུར་ཏེ། །བུ་མོ་དུས་མིན་མངལ་དང་ལྡན་པ་ལ། །ཡན་ལག་ཆ་ཤས་མཛེས་པ་མི་སྐྱེ་བཞིན། །དུས་ལ་བབ་པར་དཀའ་ཐུབ་ལ་སྦྱོར་བ། །ཟླ་བ་སྐྱོན་དང་བྲལ་བ་ལྟ་བུར་མཛེས། །དེ་བས་གཞོན་ནུས་ཕན་མེད་བློ་འགྱུར་འདིའི། །ལོག་པའི་ལམ་དུ་འཇུག་ལས་བཟློག་པར་གྱིས། །བདེ་ལ་བརྟེན་ཞིང་སྡུག་བསྔལ་མ་མཐོང་བས། །ལུས་ཀྱིས་སྡུག་བསྔལ་བཟོད་པར་མི་འགྱུར་ཏེ། །ཨ་མྲའི་ཤིང་ནི་རྩ་བ་མ་ཟུག་ལ། །གླང་ཆེན་མཆོག་གི་མཆེ་བ་བསྣུན་དང་མཚུངས། །ཁོང་ནས་མེ་འབར་ལྟས་ངན་སྒྲ་འབྱིན་པའི། །ཅེ་སྤྱང་འཇིགས་པའི་སྒྲ་སྒྲོགས་ཚང་ཚིང་གང༌། །འཇིགས་པ་རྣམས་ཀྱང་འཇིགས་པར་བྱེད་པ་ཡི། །མི་བཟད་དུར་ཁྲོད་དག་ནི་འཇིགས་པར་བཅས། །ཁྱེད་ལུས་པདྨའི་རྩ་ལྟར་འཇམ་པ་ལ། །སེམས་གང་སོག་ལེས་ལྟ་བུར་བརྩེ་མེད་འདིས། །གཞན་གྱི་ངོར་བྱེད་པ་ནི་སྤངས་གྱུར་པ། །ཨེ་མ་ཧོ་གནམ་བསྐོས་བདག་ལ་བརྩེ་མེད་སྡང༌། །བཻ་ཌཱུཪྻ་ལྟར་སྔོ་ལྗང་ངུར་པའི་གོས་གྱོན་ཅིང༌། །མེ་ཏོག་རྣམ་པ་དུ་མའི་ཚོགས་ནི་བཀྲམ་གྱུར་དང༌། །བུང་བ་མྱོས་པའི་ཚོགས་ཀྱིས་ཁྱབ་པའི་རྩེད་མོའི་ཚལ། །འདིར་ནི་བུ་མོ་ཁྱེད་རྣམས་མངོན་པར་དགའ་བར་གྱིས། །སྐྱེད་མོས་ཚལ་ན་རྫིང་ཁང་ངོགས་ན་མེ་ཏོག་ཤིང་འཕྱང་ཞིང༌། །རླུང་གིས་སྐྱོད་པའི་ཆུ་རླབས་མཛེས་པའི་ཕྲེང་པ་སྐ་རགས་བཅིངས། པདྨ་དག་དང་ཨུཏྤ་ལ་རྒྱས་གསེབ་དང་པ་སྒྲ་སྒྲོགས་པ། །བརྒྱ་བྱིན་གྱིས་ཀྱང་རྙེད་དཀའ་བུ་མོ་དགའ་བས་གནས་པར་གྱིས། །མེ་ཏོག་ན་པ་མ་ལི་ཀ་ཡི་དྲིས་བསྒོས་གྱུར་པ་ཡི། །ཆུ་རླབས་མཛེས་པར་གྱུར་པའི་ཉེ་བར་གཡོ་བ་ཡི། །རླུང་དང་བཅས་པའི་ཁྱིམ་འདི་དང་ནི་ནགས་ཚལ་ནི། །ཁུ་བྱུག་སྒྲ་འབྱིན་པ་ཡི་བུ་མོ་དགའ་བར་གྱིས། །སྐར་ཁུང་དྲ་བ་ཅན་ནང་བྱ་རྣམས་སྐད་འབྱིན་མེ་ཏོག་དྲིས་
བསྒོས་དང༌། །སྒེག་པས་ཁྲུས་བྱས་དྲི་ཞིམ་བསྒོས་པའི་ནགས་དང་འདྲ་བའི་རླུང་དག་ནི། །ཁང་བཟངས་མདའ་ཡབ་ཅན་དང་བྱ་གག་བདེ་བར་ཉལ་བ་གང་ཡིན་འདིར། །བུད་མེད་འདུས་པའི་གླུ་དབྱངས་རོལ་མོ་ལྡན་པར་ཁྱེད་རྣམས་དགའ་བར་གྱིས། །དེ་ནས་གཞོན་ནུ་མ་རྣམས་ཕའི་ཚིག་དེས་ཡི་མ་རངས་པར་གྱུར་ནས་སྨྲས་པ། །མི་ཡི་བདག་པོ་ལྷ་ཡུལ་ས་སྟེང་ན། །བརྒྱ་ཕྲག་སྟོང་དུ་སྤྱད་པ་མ་བྱས་པའི། །བདེ་བ་གཞན་དག་ཅི་ཡང་ཡོད་མིན་ཏེ། །བདག་ཅག་རྣམས་ནི་དོན་མེད་མཁས་པ་ཡིན། །ཡུལ་ལ་ལྷག་པར་སྲེད་ཅིང་གོམས་པས་ན། །དབང་པོ་རྣམས་ནི་ཡུལ་གྱིས་ངོམས་པ་མེད། །སྲིད་པས་འཇིགས་པའི་རྟོག་པའི་བློ་ཅན་དག །སྲིད་པའི་ལོངས་སྤྱད་ཟད་པར་བྱ་ཕྱིར་འཇུག །ངོ་བོ་ཉིད་ཀྱིས་འགྱུར་ཞིང་མི་བརྟན་ལ། །རླུང་གིས་བསྐྱོད་པའི་ཆུ་རླབས་ལྟར་འཇིགས་པས། །སྡོམ་ཅན་དབང་པོ་དྲུག་ལས་རྣམ་རྒྱལ་རྣམས། །ཕྱིར་ཞིང་སྲིད་པར་འཇུག་ལས་ལྡོག་པར་བྱེད། །བྱིས་པ་སྲིད་པའི་བཙོན་རར་ཕག་ལྟ་བུར། །སེམས་ཀྱི་སྤགས་པའི་སྤྱོད་པས་བསླུས་གྱུར་ཏེ། །བདེ་བར་མངོན་པར་རློམ་ཞིང་བརྐམ་པ་དག །ཕོངས་ཤིང་འཇིགས་པའི་གཡང་ས་མཐའ་མེད་ལྷུང༌། །བདག་ཏུ་རྟོག་པས་སེམས་གཡེངས་སྐྱེས་གྱུར་པ། །དེ་ནི་རབ་འབར་མཚོན་ཆའི་འཁྲུལ་འཁོར་འདྲ། །ཡུལ་ལ་རྗེས་སུ་བརྟེན་པས་སེམས་བཅོམ་པ། །ཡོངས་སུ་སྨིན་ན་སྡུག་བསྔལ་མི་བཟང་རྒྱུ། །འགྲོ་བ་འདི་དག་མི་བརྟན་དབང་མེད་ཅིང༌། །སྦྲུལ་གདུག་མཚོན་གྱིས་ཟིན་འདྲའི་ཡུལ་རྣམས་དག །རྟོགས་ཀྱང་གང་ཞིག་སྲིད་ལ་ཆགས་གྱུར་པ། །དེ་ནི་མི་ཡི་གཟུགས་ལྡན་ཕྱུགས་ཉིད་ཡིན། །རྔ་རྩེད་ཤིང་ལ་ཐོགས་པའི་གཡག་བཞིན་དུ། །བློ་ཡི་ལམ་ནི་རྙོག་པས་ཉེར་འགགས་ཤིང༌། །ལོག་པར་ཆགས་པའི་ཡལ་གས་སེམས་ཐོགས་པའི། །སྐྱེས་བུ་ངན་པའི་ཁྱིམ་རྟེན་ཕུང་བར་འགྱུར། །དགའ་བའི་རྒྱུ་ཙམ་འཚོ་བའི་འཇིག་རྟེན་ལ། །ཕོངས་པ་རྒྱུན་མི་འཆད་པར་འབྱུང་འགྱུར་ན། །ཡབ་ཅིག་སྲིད་པའི་དགའ་བ་མང་པོ་ལས། །སླུ་བར་མི་འགྱུར་གང་ཞིག་མཆིས་པར་གསུངས། །མི་དབང་སྲིད་ན་སྐལ་བ་མཉམ་
པ་ཡིས། །ཉེ་བར་བསྒྲུབས་ཤིང་བསགས་པར་གྱུར་ཀྱང་ནི། །བཅོམ་ཞིང་སེམས་ནི་དམན་པ་དམན་པ་ཡིས། །སྲིད་པའི་དགོན་པ་གཞན་དུ་འགྲོ་བར་འགྱུར། །རྒྱལ་པོ་རྒྱར་ཆུད་གྱུར་པའི་ཉ་བཞིན་དུ། །སྐྱེས་བུ་ལེགས་པར་བརྟགས་ཤིང་བྱེད་པ་དང༌། །ཐ་སྙད་ཀུན་ལ་ངང་གིས་མཁས་པ་ཡང༌། །ཁྱིམ་གྱི་བཙོན་རར་གནས་ན་འཇིག་པར་འགྱུར། །ས་ཡི་བདག་པོ་འབད་པ་མང་པོ་ཡིས། །ཁྱིམ་དུ་རྫས་རྣམས་བསགས་པ་བྱས་བ་དག །མི་ཡིས་སྐད་ཅིག་གིས་ནི་འདོར་འགྱུར་ཏེ། །ལེགས་བཤད་གཅིག་པུ་འདི་ཉིད་ལམ་དུ་བསྟན། །དེ་བས་འཇིག་རྟེན་མགོན་པོས་འཚོ་བ་ཡི། །འཇིག་རྟེན་མི་རྣམས་ལས་བདག་བྱར་གསུངས་ཏེ། །འཆི་བ་མངོན་ཕྱོགས་མི་ལ་རང་གི་ལས། །བ་ལ་བེའུ་བཞིན་དུ་རྗེས་སུ་འབྲངས། །ཡོངས་སུ་གྱུར་ན་མི་བཟད་གཉེན་སྡུག་དང༌། །སྡུག་དང་འདྲེ་བར་མངོན་པས་འདོད་དེས་ཆོག །སྡུག་དང་ཕྲད་པས་དགའ་བར་སེམས་བདག །ངེས་པར་སྡུག་དང་བྲལ་བའི་སྡུག་བསྔལ་འཐོབ། །མི་དབང་གཞན་ཡང་ངང་གིས་མཐར་འཇིག་པའི། །འཚོ་བའི་འཇིག་རྟེན་དག་ན་སྡུག་པ་སུ། །དམ་པའི་དོན་ལ་རྣམ་དཔྱོད་མཁས་པ་ཡང༌། །སྡུག་ཅེས་བྱ་བ་འདིས་བློ་རྣམ་པར་གཡེངས། །ས་བདག་ཁྱེད་ནི་གལ་ཏེ་བདག་ཅག་ལ། །སྡུག་པ་འགའ་ཞིག་མཆིས་ན་བདག་ཅག་རྣམས། །མ་སྨད་འཕགས་པས་བསྟེན་ཞིང་མི་ཕྲོགས་པའི། །བདེ་བ་ཡིད་ལ་འདོད་པ་སྒྲུབ་ཏུ་གསོལ། །དེ་ནས་རྒྱལ་པོ་དེ་བརྩེ་བའི་ཡི་མ་རངས་ཕར་གྱུར་ཀྱང༌། བདེ་བར་གཤེགས་པའི་བསྟན་པ་ལ་མངོན་པར་དད་པས་ཆོས་ལ་བར་ཆད་བྱེད་པའི་འཇིགས་པ་སྐྱེས་པ་དང༌། །རང་གི་བུ་མོ་རྣམས་ཀྱིས་སྔོན་གྱི་སྐྱེ་བ་རྗེས་སུ་དྲན་ཏེ་འགྲོ་བར་འདོད་པས་ན་སྐྱེ་བ་དྲན་པས་ཉེས་སོ་སྙམ་དུ་བསམས་ཏེ་ཤིན་ཏུ་ཡུན་རིང་པོར་ཅང་མི་སྨྲ་བར་གྱུར་ཏོ། །མི་ཡི་སྐྱེས་བུ་དེ་ཡིས་ནི། །འཆི་བ་མེད་པར་ཤེས་པས་ན། །སོང་བས་ཡོངས་སུ་མ་སྤངས་པར། །ཅི་ཞིག་ལྟར་ནི་རྗེས་སྣང་སྨྲས། དེ་ནས་བུ་མོ་དེ་རྣམས་ཀྱིས་མེ་ཏོག་ཕྲེང་བ་དང་བྱུག་པ་དང་རྒྱན་རྣམས་སྤངས་ནས། དུལ་བ་དང་ལྡན་པར་ཞུགས་པའི་ལུས་ལ་གོས་དཀར་
པོ་ཕྲ་ཞིང་རབ་ཏུ་འཕྱང་བ་གྱོན་བས་ཆུ་བོ་རླུང་གི་ཤུགས་གྱིས་བསྐྱོད་པའི་དབུ་བའི་ཕྲེང་བ་ལྟ་བུའམ། །སྟོན་ཀའི་མཚན་མོ་ཟླ་བའི་འོད་ཀྱིས་གོས་ཀྱིས་བཀབ་པ་ལྟ་བུའམ། དྲང་སྲོང་སྨེ་བདུན་གྱི་སྐར་མ་རང་གི་འོད་ཟེར་གྱི་དྲ་བས་གཡོགས་པ་ལྟ་བུ་དང༌། རིམ་གྱིས་རོ་བསྲེག་པའི་གནས་མེའི་དབུས་སུ་རོ་བཞག་པ་ཅིལ་ཅིལ་ཟེར་བ་རྣམ་པར་བཀྲམ་པ་དང༌། རོ་རྣམ་པར་མནམ་པ་དྲི་མི་ཞིམ་ཅིང་འཇིགས་སུ་རུང་བ་དང༌། མིའི་ཐོད་པ་བྱ་རྒོད་ཀྱིས་མཆུའི་རྩེ་མོ་རྣོན་པོས་བརྡོལ་བའི་བུ་ག་ནས་གླད་པ་དང་ཆུ་སེར་རྣམ་པར་འཇིགས་པས་མི་རོའི་གདོང་ལ་སྤགས་པས་མཐའ་མ་ཁྱབ་ཅིང་འཇིགས་པ་དང༌། རྙིངས་ཤིང་དེངས་ལ་མདོག་རྣམ་པར་འགྱུར་བའི་རུས་པ་དུམ་བུའི་ཚོགས་ཀྱིས་ནོན་ཅིང་རྩུབ་པས་སའི་ཕྱོགས་རྣམས་བགྲོད་པར་དཀའ་བ་དང༌། ལུས་ཅན་དག་ཡོངས་སུ་ཡིད་འབྱུང་བར་བྱེད་པ་གཤིན་རྗེའི་གནས་བཞིན་མྱ་ངན་དང་ཡིད་མི་བདེ་བ་དང༌། སྡུག་བསྔལ་བའི་གནས་སུ་གྱུར་པའི་དུར་ཁྲོད་དུ་ཕྱིན་པར་གྱུར་ཏོ། །དེ་ལ་འདི་སྐད་ཅེས་བྱ་སྟེ། མི་ཡི་ཁྲག་དང་ཞག་གིས་དྲི་མི་ཞིམ་པས་མྱོས་བར་གྱུར་པའི་བྱ་རྒོད་དང༌། རྒྱུ་ལྟོ་ནར་བས་ཁྱབ་ཅིང་མི་སྡུག་འཇིགས་པའི་ངོ་ཡི་ཡན་ལག་རྣམས་ཀྱིས་ཁེབས། །ཀུན་ད་འདྲ་བར་དཀར་ཞིང་རྟག་ཏུ་དགོད་པ་འདྲ་བར་མཐའ་གས་ཐོད་པ་དང༌། །ནྱ་གྲོ་དྷ་སྙིང་སུལ་ནས་འུག་པ་སྣ་ཚོགས་ཧཱུཾ་སྒྲོགས་འཇིགས་པའི་དུར་ཁྲོད་ཕྱིན། །ཅེ་སྦྱང་ཁ་ནི་མེར་བཅས་བརླང་བའི་སྒྲ་དག་སྒྲོགས་པས་འཇིགས་པ་དང༌། །ལ་ལར་ཐོད་པ་དཀར་པོའི་དྲ་བས་ཁྱབ་ཅིང་བགྲོད་དཀའ་དང༌། །སྲིན་བུ་རིགས་ཀྱི་ཚིགས་ཀྱིས་གཟེངས་ཤིང་རྣ་ཁུང་བསྐྱོད་པ་དང༌། །བུང་བ་སྦྲང་བུ་བརྒྱ་ཕྲག་མང་པོ་རོལ་འཕུངས་ཤིང་འདུ། །རུས་པ་དཀར་དང་དམར་རློན་རླུང་གིས་བསྐྱོད་པར་གྱུར་བ་དང༌། །རོ་བསྲེགས་མེ་གསལ་འཕྲོ་དང་ཤིང་སྐམ་རྩ་ན་སྤྲུལ་ཉལ་དང༌། །ལ་ལར་མི་ཡི་ལུས་ནི་མདུང་རྣོས་ཕུག་ནས་བསྐྱོན་པ་དག །གཤིན་རྗེ་རྟག་ཏུ་དགའ་སྟོན་བྱེད་ལ་འཇུག་པའི་ཚང་བང་འདྲ། །ལ་ལར་མི་མགོའི་ཐོད་པའི་གསེབ་ནས་ཁྲག་དང་ཆུ་སེར་འཛགས་པ་ཡི། །ཁུ་བ་མི་སྡུག་དག་ལ་སྲེད་པའི་ཤ་ཟའི་ཚོགས་ཀྱིས་ཁྱབ། །ལ་ལར་ཅིལ་ཅིལ་ཟེར་བའི་རོ་
བསྲེག་མེ་ཡིས་བསྐོར་བ་དང༌། །མི་རོའི་ཁོང་ནས་རྒྱུ་ལོང་ཕྱུང་བ་གཏོར་བས་ཁྱབ་པར་གྱུར། །སྐྱོ་བས་བརླན་པའི་སེམས་ཀྱིས་ནི། །དེར་ནི་བུད་མེད་དེར་བརྟགས་ནས། །འཚོ་བའི་འཇིག་རྟེན་རྒྱུ་མི་རྒྱུའི། །ངོ་བོ་ཉིད་ནི་སེམས་པར་གྱུར། །སྐྲ་ཡི་སྙིང་ནི་རྡུལ་གྱིས་རྩུབ་ཅིང་དམར། །མིག་སྦུབས་བྱ་ཡི་མཆུ་དང་སྡེར་མོས་བྲུས། །གསང་གནས་འགྱུར་ཞིང་མི་སྡུག་རྣག་བཅས་པར། །བོར་བའི་བུད་མེད་ལུས་དེར་རབ་ཏུ་བལྟས། །དམ་པའི་སྤྱོད་པ་ཐང་ཅིག་གཉེར་གཡོས་ཤིང༌། །ཨུཏྤལ་འདབ་ལྟར་དཀྱུས་རིང་མིག་གིས་ནི། །རོ་ཡི་གཟེབ་དེ་མངོན་པར་བལྟས་ནས་ཀྱང༌། །ཚིག་མང་རྣམ་པ་དུ་མ་སྨྲས་པར་གྱུར། །འདི་ཉིད་རྡོ་ཐལ་བྱུགས་པས་དགའ་བའི་གནས་ཁང་ནི། །ཟླ་ཟེར་གསལ་བས་སྤྲས་པར་བྱས་པ་རུ། །སྡུག་པའི་ཕོང་བར་བརྟེན་ཞིང་གནས་པ་ལས། །དེ་ནི་ས་ཡི་དཀྱིལ་འཁོར་གཞི་ལ་ཉལ། །སྡུག་པའི་ལག་པའི་གཟེབ་ཏུ་ཉལ་བ་ན། །འབྲུག་སྒྲ་སྒྲོགས་པ་ཡིས་ནི་ཁྱོད་སྐྲག་ན། །མེར་བཅས་ལྟས་ངན་ཅེ་སྦྱང་སྒྲ་ཡིས་ནི། །དཀའ་ཐུབ་མ་ཁྱོད་ཅི་ཕྱིར་འདིར་མི་འཇིགས། །འདི་ཉིད་རང་གི་ཁྱིམ་འཁོར་ཟླ་ཟེར་དེ། །རོ་སྨད་ལྕི་བའི་ཁུར་གྱིས་དལ་འགྲོ་ལ། །རོལ་ཅིང་དགོད་ལ་སྒེག་པར་རྣམ་ལྟ་བ། །བརྩེ་མེད་བྱ་རྣམས་ད་ལྟར་ཟ་བར་བྱེད། །འགྲོ་བ་འདི་དག་ངན་ཅིང་མི་བརྟན་ཏེ། །སྙིང་རྗེ་མེད་པའི་སྡུག་དེས་ཅི་ཡི་ཕྱིར། །མི་རོ་བརྒྱ་ཡིས་ཁྱབ་པར་གྱུར་པ་ཡི། །དུར་ཁྲོད་འདི་རུ་ཁྱོད་ནི་བོར་བར་འགྱུར། །རང་མི་རྩ་ལག་མཛའ་བཤེས་སྡུག་པ་དང༌། །པདྨར་བུང་བ་བཞིན་དུ་གནས་པ་ལས། །ཅི་ཕྱིར་མཚན་མོས་རྒྱུ་བས་འཇིགས་ཀྱང་ནི། །ཉོན་མོངས་དེང་འདིར་དུར་ཁྲོད་དག་ཏུ་དགའ། །སྔོན་ནི་མཛེས་ཤིང་སྣུམ་ལ་དཀྱུས་རིང་འཇམ་པའི་མིག་གིས་ལྟ་བ་ན། །ཆགས་ཅན་རྣམས་ཀྱིས་མིག་འབྲས་མཐའ་དམར་འགྱུར་ཞིང་མི་རྣམས་ཉམས་བྱེད་པ། །འདོད་ལྷའི་རི་དགས་རྒྱར་གྱུར་བུད་མེད་དེ་ཉིད་དེང་ནི་བྱ་རྣམས་ཀྱིས། །མིག་ཕྱུང་སྡུག་བསྔལ་བྱས་པས་ཆགས་དང་བཅས་རྣམས་ཤིན་ཏུ་འཇིགས་པར་བྱེད། །མི་གཙང་སྣ་ཚོགས་ཁོང་ན་མི་མངོན་སྲོག་ཤིང་གི །ལུས་ལ་བདག་གིར་ཆགས་པས་ལོར་བའི་མིག་བསླུས་ཞེས། །བུད་མེད་
མཆོག་འདི་འདོད་ཆགས་ལྡན་པ་རྣམས་ལ་ནི། །བརྐམ་པའི་བྱ་ཡིས་མཆུས་བཏོག་གདོང་གིས་ཉེ་བར་དགོད། །པི་ཝང་གླིང་བུའི་སྒྲ་སྙན་རྣམས་དང་སྙན་པའི་གླུ་གར་དང་བཅས་པས། །མཆོག་ཏུ་སྡུག་པའི་པང་ན་བག་ཕབ་བདེ་བར་གཉིད་ལོག་པའི། །བུད་མེད་དེ་ནི་ཅེ་སྤྱང་སྐད་འབྱིན་མུ་ཅོར་སྒྲ་བཅས་ཤིང༌། །ས་རྡུལ་གྱིས་ཁྱབ་རྩུབ་པའི་དུར་ཁྲོད་འདིར་དེང་ཉལ་བར་གྱུར། །གང་དུ་རྣམ་པར་བརྟགས་ཀྱང་སྒྲ་ཡི་རྩེ་མོ་ཙམ་གྱིས་ནི། །བཙང་བ་མི་གཙང་ཚོགས་ཀྱིས་ཚང་ཚིར་འདིར་མི་སྣད། །ཕུང་ཁྲོལ་ཆེས་ཅན་ནད་མང་འདོད་པ་ཐང་ཆད་ལ། །རང་བཞིན་ངན་རྣམས་ཅི་ཕྱིར་དེ་ནི་ཆགས་པར་གྱུར། །བུ་མོ་འགྲོ་བ་ཀུན་གྱི་ཚུལ་ཡང་འདི་འདྲ་བས། །རྨི་ལམ་མིག་འཕྲུལ་ཆུ་ཟླ་ལྟ་བུར་རང་བཞིན་གྱིས། །གཡོ་བ་རྟོགས་པ་ཇི་སྲིད་སྲོག་ནི་ལྷག་མ་དང༌། །བཅས་ཤིང་ལུས་གཞོན་གྱུར་ཚེ་ཆགས་དང་ཉེར་བྲལ་བྱོས། །གཤིན་རྗེའི་ཆུ་སྲིན་དགའ་བའི་ཁར་ནི་ཆུད་གྱུར་ཅིང༌། །སྐྲ་དཀར་ཚོགས་ཀྱིས་སྤྱི་ནས་བཟུང་ནས་ནི། །སྲོག་མཐར་གྱུར་པའི་གནོད་པའི་ཚེར་མའི་གནད་ཕུག་ལ། །མཆི་མས་མིག་ཁེབས་གྱུར་ཚེ་དགེ་བ་ཇི་ལྟར་བྱ། །འཇིག་རྟེན་ཕ་རོལ་མི་བཟད་མུན་ནག་གཡང་ཆེན་དུ། །ལྟུང་ཞིང་ལུས་བྱེར་གྱུར་ཚེ་དགེ་བ་འདོད་གྱུར་པ། །དུག་ཅན་སྦྲུལ་ཁ་དོག་པའི་ནང་དུ་ཆུད་གྱུར་པའི། །སྦལ་པ་ང་རོ་འདོན་དང་མཚུངས་ཞེས་མཁས་རྣམས་སྨྲ། །ཅི་ཕྱིར་ཚིག་རྩུབ་ཕྲ་མ་མ་འབྲེལ་སྤྱི་རྟོལ་སྨྲ་བ་དང༌། །སྙན་ཚིག་བཅོས་མས་འཇིག་རྟེན་བསླུས་པར་གྱུར་ནས་དི་རིང་ནི། །མི་སྨྲ་གནས་ཞེས་སྤྱོད་པ་ལྟ་བུས་མདུན་སོའི་ཕྲག་ནས་ནི། །བྱ་རྣམས་ཚམ་ཚོམ་མེད་པར་མཆུ་ཡི་སྐམ་པས་ལྕེ་ཡང་འབྱིན་པར་གྱུར། །ཆགས་པས་མདོངས་ཤིང་ལོག་པའི་ཡུལ་གོམས་ཡོན་པའི་བསམ་པ་ཅན། །བྱིས་པ་གང་གིས་མིག་གི་ཡུལ་མཐོང་བསྟན་པ་རྣམ་འཇིག་པའི། །མཛེས་པའི་རོ་སྨད་དེ་ནི་དེ་རིང་འཇིགས་དང་བྲལ་བ་ཡི། །མི་བཟད་བྱ་རྒོད་མཆུ་དང་སྡེར་མོར་འཇོག་ཅིང་ཚུལ་དུ་འདྲི། །གང་དག་རང་གི་ཁང་བས་གཞི་མེ་ཏོག་སེལ་མས་གཏོར་བ་ཡི། །རྩིག་པའི་རི་མོ་ཡོངས་འགྱུར་བཞིན་དང་ཟུར་གྱིས་ལྟ་བྱེད་ཅིང༌། །སྡུག་པའི་ལག་པའི་པདྨར་བརྟེན་ཞིང་དལ་གྱིས་འགྲོ་བ་ཡི། །བུད་མེད་དེ་ཡི་རྐང་པ་དེ་ནི་ཝ་དག་ཟ་བར་འགྱུར། །
འདི་ལྟར་ལྟན་ཅིག་སྐྱེས་པའི་མི་སྡུག་མི་གཙང་འདམ་རྫབ་དང༌། །དྲེགས་པས་མྱོས་ཤིང་སེམས་ལྷུང་གྱུར་པས་སྡུག་བསྔལ་ཉོན་མོངས་པའི། །ལུས་ལ་ཁྱེད་ཀྱིས་འདི་ནི་རང་བཞིན་མ་ཞིར་བལྟས་ནས་ནི། །འཚོ་བའི་འཇིག་རྟེན་གློག་ལྟར་རབ་ཏུ་འཇིག་ལའང་ཡིད་བྱུང་གིས། །ཡང་དག་ཇི་བཞིན་ཐུགས་ཆུད་ཆོས་ཀྱི་རྒྱལ་པོས་སེམས་ཅན་རྣམས། །ཉོན་མོངས་རྨ་ནང་རྒྱུན་མི་འཆད་པར་འཛག་པས་གདུང་བ་ལ། །རང་བཞིན་བསིལ་བའི་ཆོས་གསུང་ཆུ་ཡི་བུམ་པས་ཚིམ་མཛད་པ། །སྨན་པའི་མཆོག་གྱུར་སྟོན་པ་དེ་ལ་རྟག་ཏུ་ཕྱག་འཚལ་ལོ། །ཤེས་པར་དཀའ་ཞིང་གཡོན་ཅན་མ་ཞི་ལས་དང་ཉོན་མོངས་ལྡན། །རྣམ་པར་འགྱུར་ལ་མ་ཞི་སྐྱེ་བར་བཤད་པ་གང་ཡིན་པས། །རྨོངས་པ་ཤིང་རྟའི་འཕང་ལོ་བཞིན་དུ་དབང་མེད་འཁོར། །འཇིག་རྟེན་མི་བཟད་ཕོངས་པའི་རྡོ་རྗེས་ལུས་ནི་ངེས་འཇོམས་འགྱུར། །གཞོན་ནུའི་ཚེ་ནམ་ཡིས་ལན་བུར་ལྡན་བའི་སྐྲ་བྱས་ཤིང༌། །གང་ལ་ལང་ཚོ་མཛེས་པའི་ནོར་བུའི་ཕྲེང་བ་མཆོག་བཅིངས་དང༌། །བྲམ་ཟེས་མེ་ཏོག་བཅས་པའི་ཞི་བའི་ཆུ་ཐིགས་ཀྱིས་གཏོར་བའི། །བུད་མེད་མགོ་ལ་མི་བཟད་ཁྭ་རྣམས་ཐོགས་པས་ཉོན་མོངས་སོ། །གང་ཞིག་བག་མའི་དུས་སུ་མེ་ཏོག་བཟང་བསྒོས་ཤིང༌། །མ་ཡི་ལག་པས་དགེ་མཚན་བཀྲ་ཤིས་བྱས་གྱུར་པའི། །སྐྲ་དེ་དི་རིང་རབ་དྲག་རླུང་གིས་བསྐྱོད་ནས་ནི། །དུར་ཁྲོད་དག་གི་ཤིང་ལ་རྔ་ཡབ་ཉིད་དུ་གྱུར། །རང་བཞིན་སྒྲིན་བར་ལྟ་དང་ཟུར་གྱིས་ལྟ་གང་སོང༌། །སྒེག་པའི་གོམས་སྟབས་དང་ནི་དྲེགས་མྱོས་གང་དུ་སོང༌། །དགའ་བས་སྟེག་ཅིང་གླུ་དང་དགོད་པ་གང་དུ་སོང༌། །ཨེ་མ་སྒྱུ་མའི་གསང་བའི་རབ་བཀོད་ངོ་མཚར་ཆེ། །དགོད་ཅིང་དལ་གྱིས་རྣམ་གཡོའི་རྣ་རྒྱན་འོད་ཀྱིས་མཁུར་བ་དམར་པོ་དང༌། །གང་དུ་སྲོག་དང་མཉམ་པའི་མཛེས་པའི་རི་མོ་འབད་དེ་བྲིས་པ་དང༌། །པདྨ་གཞོན་ནུའི་སྙིང་པོ་ལྟ་བུ་འཇམ་པའི་མཁུར་ཚོས་གང་ཡིན་དེར། །བྱ་རྣམས་དཔྲལ་བར་གནས་ཤིང་ཁྲག་གིས་སྤགས་པའི་མཆུ་ཡིས་འཚོག་པར་བྱེད། །འོད་ཅན་མུ་ཏིག་ཕྲེང་བའི་ལྦུ་བ་དཀར་ཞིང་བ་སྤུའི་ཆུ་བལ་ཅན། །ནུ་མ་རྒྱས་པའི་ངུར་པ་ཟུང་ལྡན་བྲང་གི་རྫིང་མཆོག་ཡངས་པ་དག །གཡོ་བའི་
གོས་ལྷུང་བྱས་པས་ཕོངས་པའི་མིག་ནི་གང་དུ་ཆགས་གྱུར་པ། །དེར་ནི་རྣམ་པར་རངས་པས་སྦྲང་བུའི་ཚོགས་རྣམས་འཕུངས་པར་གྱུར། །སྔོན་ནི་ཙན་དན་ཆུ་ཐིགས་ཕྲེང་གཏོང་ཏ་ལའི་ལོ་མ་རླུང་ཡབ་དང༌། །མངག་གཞུག་རྣམས་དང་བཟང་མོའི་གདུ་བུའི་སྒྲར་ལྡན་པ་དག་གཡོག་བྱེད་ཅིང༌། །ཁང་བཟངས་ཟླ་ཟེར་གྱིས་སྤྲས་དཀར་བས་མཛེས་པའི་སྔས་ནི་རྟེན་གྱུར་པ། །དེ་ནི་དེང་འདིར་ཁྭ་ཡི་སྒྲོ་གཤོག་རྩུབ་བས་བསྐྱོད་པའི་རླུང་གིས་གཡོ་བ་པར་གྱུར། །གང་གིས་སྔོན་ནི་འདི་བསྐྱོད་ཅིང༌། །གསེབ་ནང་དག་ཏུ་གནས་བཅས་ནས། །ལུས་ཀྱི་ཤིང་ནི་སྤངས་ནས་ནི། །སེམས་ཀྱི་སྤྲེའུ་དེ་གང་དུ་སོང༌། །གང་གིས་བྱེད་པ་མེད་འདི་ཡང༌། །བྱེད་པ་ལྟ་བུར་སྟོན་བྱེད་པ། །བདག་མེད་རོ་འདི་སྤངས་ནས་སུ། །སེམས་ཀྱི་བཞད་གད་མཁན་གང་སོང༌། །གང་ཞིག་རྨོངས་ལས་བློ་མདོངས་པས། །ནང་ན་བདག་ཏུ་འདོགས་གྱུར་ཅིང༌། །མུ་སྟེགས་ཅན་རྣམས་རྨོངས་བྱེད་པའི། །རྣམ་ཤེས་སྲིན་པོ་དེ་གང་སོང༌། །གང་གིས་ཡུན་རིང་རྣམ་རྨོངས་ཀྱང༌། །ཡང་དག་པར་ནི་མི་གནས་པས། །སྣ་ཚོགས་སེམས་ཀྱི་སྒྱུ་མ་མཁན། །འགྲོ་བ་འདི་ལས་གང་དུ་སོང༌། །བདག་གི་འགྲོ་བ་སེར་སྐྱ་སོགས། །དཀའ་ཐུབ་པས་ཀྱང་མི་ཤེས་པས། །ནམ་མཁའི་ཡུལ་གྱི་སྤྱོད་ཡུལ་ཅན། །སེམས་ཀྱི་རིག་འཛིན་དེ་གང་སོང༌། །གཡོ་དང་མི་གཡོའི་སྒོ་དགུ་པོ། །མི་གཙང་འདི་ནི་སྤྱོད་སྤྱོད་པ། །དེ་ནས་ལུས་ཀྱི་གཟེབ་འདི་ལས། །སེམས་ཀྱི་བྱ་དེ་གང་དུ་སོང༌། །མི་བཟད་སུལ་ལས་སྡུག་བསྔལ་འབབ་པའི་ལན་ཚྭ་ཆེན་པོས་རབ་ཏུ་ཁེངས་གྱུར་པའི། །སྲིད་པའི་རྒྱ་མཚོ་ཉོན་མོངས་སྦྲུལ་དང་ཉར་འགྲེ་གང་ཡིན་དེར་ཆུད་ཅིང༌། །མི་ཤེས་ཆུ་སྲིན་འཁྲུགས་པའི་ཆུ་རླབས་གཡོ་བའི་ཆུ་བོར་ནུབ་གྱུར་པ། །སེམས་ཀྱི་མཚན་མོ་སྤྱོད་པ་ལུས་འདི་སྤངས་ནས་དི་རིང་གང་དུ་སོང༌། །ཉེས་བྲལ་བཅོམ་ལྡན་དེ་ནི་གདུལ་པའི་ཐབས་རྣམས་གང་དག་ཡིན་མཁྱེན་གྱི། །མ་དུལ་གང་གིས་མཐར་ནི་དམྱལ་བར་མེ་འབར་འཕྲོ་བར་གྱུར་པ་ཡི། །གསེར་ལྟར་སེར་བའི་གསེབ་ཏུ་དབང་མེད་པར་ནི་འདོར་བྱེད་པ། །རང་བཞིན་གཡོ་བར་བྱེད་པའི་སེམས་ཀྱི་རྟ་དེ་དི་རིང་གང་དུ་སོང༌། །དེ་ནས་རྡོ་རྗེའི་འོད་ཀྱིས་
འཁྲིག་མ་རྒྱས་ལྗང་བ། །བརྒྱ་བྱིན་དགའ་བས་མིག་གདངས་དུལ་བཅས་ཉེར་སོང་སྟེ། །བུ་མོ་རྣམས་ལ་རང་བཞིན་སྐལ་བཟང་ཚིག་གིས་ནི། །རྗེས་སུ་མཐུན་ཞིང་དགེ་བས་ལེགས་སོ་ལེགས་ཞེས་སྨྲས། །སྲིང་མོ་ན་ཚོད་གཞོན་ཞིང་འདོད་ལྷའི་གནས་གྱུར་དང༌། །རྒྱལ་རིགས་འབྱོར་པའི་དཔལ་གྱི་བདེ་བ་སྤངས་ནས་ནི། །སྔོན་གྱི་དྲང་སྲོང་རྣམས་ཀྱི་བཀའ་ལ་ཞུགས་གྱུར་པ། །དཀའ་ཐུབ་འདིས་བདག་ཡོངས་དགའ་ཁྱེད་རྣམས་ཅི་འདོད་སྨྲོས། །འདོད་པའི་དབང་ཕྱུག་ལག་མཐིལ་གནས་བཞིན་ཤེས་པར་གྱིས། །སུམ་ཅུ་རྩ་གསུམ་བདག་པོའི་བདེ་བའང་དེས་རྟོགས་ལ། །ལྷ་རྒྱལ་བརྒྱ་བྱིན་བདག་ཡིན་ཁྱེད་ཉིད་གང་འདོད་དང༌། །སྲིང་མོ་བདག་གིས་ངེས་པར་གང་བྱ་མྱུར་དུ་སྨྲོས། །དེ་ནས་གཞོན་ནུ་དེ་རྣམས་ཡུལ་གྱི་བདེ་ལ་འདོད་མེད་ཅིང༌། །རང་བཞིན་གཡོ་མེད་སེམས་ཀྱིས་བརྒྱ་བྱིན་ཟུར་མིག་གིས་བལྟས་ནས། །རང་གི་དགེ་བ་ཡོངས་སྨིན་བརྟན་པའི་རང་བཞིན་གྱིས། །ཁ་ན་མ་ཐོ་མེད་གསལ་སྣ་ཚོགས་དོན་ལྡན་ཚིག་འདི་སྨྲས། །བརྒྱ་བྱིན་བདག་ཅག་སྐྱེ་བའི་སྡུག་བསྔལ་གྱིས་ནི་གདུངས་གྱུར་པའི། །སྲིད་པའི་བདེ་བའི་ཟིལ་པའི་ཁ་ཆུ་འཛག་པའི་རྒྱུ་འདྲའི་ཕྱིར། །བཞིན་རས་མཛེས་པ་མྱ་ངན་མཆི་མས་བྲིས་ཤིང་རྙོགས་པ་ཡི། །གཉེན་རྣམས་སྤངས་ནས་དཀའ་ཐུབ་འདི་ལ་རྗེས་སུ་ཞུགས་པ་མིན། །གཞན་ཡང་འགྲོ་བ་མ་ལུས་ཚུལ་ངན་གྱིས་བཅིངས་མི་བཟད་པ། །ཕོངས་པ་བརྒྱ་ཕྲག་སྟོང་གིས་བཅོམ་པས་ངེས་པར་སྐྱོ་གྱུར་ཅིང༌། །བཀྲེན་པས་ཉམ་ཐག་མཐོང་བས་ཉེས་ཟད་རྣམས་ཀྱིས་རྗེས་འབྲངས་ཏེ། །རྒ་མེད་མྱ་ངན་མེད་པའི་གོ་འཕང་ཐོབ་ཕྱིར་བརྩོན་པ་ཡིན། །གལ་ཏེ་འགྲོ་ལ་རྗེས་བརྩེ་ལྷག་བསམ་ངང་ཚུལ་ལྡན་གྱུར་ཅིང༌། །ཅི་སྟེ་བརྒྱ་བྱིན་ཁྱོད་ཀྱིས་མཆོག་ནི་ཡང་དག་སྟེར་ནུས་ན། །འཆི་མེད་མི་ཕྲོགས་ཚངས་བཞི་ཚངས་པའི་གོ་འཕང་རྣམ་གྲོལ་ཏེ། །སྲིད་པའི་འཇིགས་པས་ཡོངས་གདུངས་བདག་ཅག་རྣམས་ཀྱིས་ཐོབ་པར་མཛོད། །ལུས་ལས་བྱུང་ཞིང་འཛག་པའི་དྲི་མ་སྐྱོན་གྱིས་བསྒོས་པར་གནས་པ་དང༌། །མ་ཡིན་མངལ་དུ་མི་གཙང་འདམ་གྱི་ཚོགས་ན་ཡང་མ་སྤངས་སྤྱོད། །བྱུང་ན་རུས་པའི་འཁྲུལ་འཁོར་གྱིས་ནི་མ་གོ་བཙིར་བརྒྱལ་
ཞིང་ཉམ་ཐག་པས། །ཉོན་མོངས་སྡུག་བསྔལ་གཅིག་ནས་གཅིག་ཏུ་བརྒྱུད་པའི་སྐྱེ་བ་གཅད་པར་མཛོད། །རྒ་བའི་སྲིན་མོས་སྐྲ་དཀར་མཆེ་བ་དཀར་པོ་མྱུ་གུ་ལྡན་པ་ཡི། །ཁ་གདངས་ནས་ནི་འགྲོ་ལ་གཞུང་ལུགས་མེད་པར་སྤྱི་ནས་འཛིན་བྱེད་ཅིང༌། །གང་འདི་མི་ཡི་བརྩོན་དྲན་བློ་གྲོས་དགའ་བའི་དཔལ་ནི་རབ་འཇོམས་པ། ལྷ་ཡི་དབང་པོ་ཁྱོད་ཀྱིས་གལ་ཏེ་ནུས་ན་དེ་ལས་བསྐྱབ་པར་མཛོད། །དབུགས་རྒོད་གཡོ་ཞིང་ལྟོ་བ་སྲ་ལ་པགས་པ་སྐྱ་ཞིང་རྩུབ་པ་དང༌། །ལོངས་སྤྱོད་འབར་བ་སྣ་ཚོགས་ཐོབ་ཀྱང་སྤྱོད་པར་མི་ནུས་སྟོབས་མེད་པ། །གང་གིས་ལུས་ཟིན་འཆི་བདག་ཕོ་ཉའི་སྐྱེས་བུ་ནད་ཚོགས་རབ་འཇིགས་པ། །ལྷ་དབང་ཁྱོད་ནི་ཅི་སྟེ་མཆོག་སྦྱིན་འདོད་ན་དེ་ལས་བདག་ཅག་སྐྱོབས། །མིག་ནི་ཕྱིར་ཕྱོགས་གྱུར་ཅིང་མི་གཡོ་གནད་རྣམས་གཅོད་པས་སྡུག་བསྔལ་བ། །ཉོན་མོངས་འཁྲུགས་པས་རབ་ཏུ་ལུས་བཅོམ་འཇིགས་པས་ཕུང་པོ་འགྱེལ་བ་དང༌། །གཉེན་རྣམས་མཐོང་བས་མཆི་མས་མཁུར་བ་དག་དང་མཆུ་ནི་བཀྲུས་གྱུར་པ། །གང་གིས་ཟིན་ན་རབ་ཏུ་འཇིགས་འགྱུར་འཆི་བ་དེ་ལས་བདག་ཅག་སྲུངས། །གང་གིས་ཡིད་ཁྱབ་གྱུར་ན་ཕྱུགས་བཞིན་འགྱུར་ཞིང་མྱ་ངན་གྱིས་ཟིན་ལ། །བྱ་དང་མི་བྱའི་རྣམ་པ་བློ་ལ་མི་སེམས་སྨད་པའི་གནས་བསྐྱེད་པ། །ཐ་མལ་བསིལ་བའི་འཐོར་བའི་རླུང་གིས་གཡབ་ཀྱང་ལུས་ཚིམ་མི་འགྱུར་བའི། །འདོད་ཆགས་མེ་ཆེན་དེ་ནི་མཆོག་སྦྱིན་ཁྱོད་ཀྱིས་ངེས་པར་ཞི་བར་མཛོད། །གང་གི་ཤུགས་ཀྱིས་མིག་འགྱུར་གཡོ་ཞིང་སོ་ཡིས་སྒྲོས་གནོན་ལ། །སྐད་ཅིག་གིས་ཀྱང་མི་བཟད་དམྱལ་བའི་འབྲས་བུ་སྟེར་བྱེད་སྡིག་ཅན་ནི། །དེངས་པའི་ལོ་མ་དང་ནི་ཆུ་དག་ཟ་བའི་ཐུབ་རྣམས་ཀྱིས་ཀྱང་མ་བཏོན་པའི། །ཡིད་ཀྱི་སུལ་གནས་ཁྲོ་བའི་སྦྲུལ་དེ་བརྒྱ་བྱིན་ཁྱོད་ཀྱིས་བསལ་བར་མཛོད། །གང་གིས་མིག་ཁེབས་གྱུར་ན་བློ་གྲོས་ངན་རྣམས་ཞི་བའི་ལམ་སྤོང་ཞིང༌། །ལོག་ལྟའི་དུག་གིས་ཉེ་བར་སྤགས་པའི་ཡིད་ཀྱིས་ལམ་གཞན་དག་ལ་བསྟེན། །གང་ཞིག་རབ་རིབ་བསལ་བས་ཟག་པ་ཀུན་གྱི་རྒྱུར་ནི་རབ་གསུངས་པ། །ལོག་ཡིད་ཁྱིམ་ན་སྤྱོད་པ་རྨོངས་པའི་མུན་ནག་བརྒྱ་བྱིན་ཁྱོད་ཀྱིས་སོལ། །བརྒྱ་བྱིན་མཆོག་ནི་དེ་དག་རྣམས། །
ཁྱོད་ལ་བདག་ཅག་རྣམས་སློང་གིས། །དམ་བཅས་དོན་ལས་འགལ་བ་ནི། །མཁས་པས་འདོད་པར་མི་བྱེད་དོ། །དེ་ནས་བརྒྱ་བྱིན་གྱིས་དེ་རྣམས་འདོད་པའི་ཡུལ་དག་སློང་བར་མི་བྱེད་ཅིང་ལྟོས་པ་མེད་ལ་གསལ་ཞིང་མཛེས་པའི་ཚིག་གིས་རྣམ་པར་འཁྲུལ་པས་ངོ་མཚར་དུ་གྱུར་ཅིང་ཡང་དག་པར་དད་པས་ལུས་ཀྱི་སྤུ་ཟིང་ཞེས་བྱེད་དེ། སྨྲས་པ། མི་འབྱོར་དངོས་པོ་སློང་བར་གྱུར་པ་ནི། །འཇིག་རྟེན་དག་ན་བྲ་ཞིང་ཞུམ་གྱུར་པས། །གང་འདི་བདག་གིས་སྦྱིན་བར་ནུས་པ་ཡི། །མཆོག་རྣམས་སྦྱིན་གྱི་བུ་མོ་ཁྱེད་ཀྱིས་སྨྲོས། །དེ་ནས་བུ་མོ་དེ་རྣམས་ཀྱིས་དེའི་ནང་ན་མི་མངོན་བའི་རྒྱུས་རྣམ་པར་སྨྲས་པའི་ཚིག་དེས་ཡང་དག་པར་སྐྱོ་བས་ཉེ་བར་བསྐྱེད་པའི་ཁྲོ་བས་བརྒྱ་བྱིན་ལ་སྨྲས་པ། ཅི་ཕྱིར་ཉེ་བར་འདྲིད་པའི་ཐབས་དང་ནི། །བརྒྱ་བྱིན་མཛེས་མེད་དེ་དག་གང་དུ་ལྷགས། །བདེ་བ་ཙམ་དང་མི་མཁས་བློ་ཅན་ནམ། །མི་བསྲུན་པ་ཡི་བགྲོད་བྱ་བདག་ཅག་མིན། །འདིར་ནི་ཕྱོགས་རྣམས་རྒྱ་ཆེར་གྲགས་པའི་ཚོགས་ལྡན་པའི། །རྒྱལ་པོའི་རིགས་སུ་གྱུར་པར་ཁྱོད་ཀྱིས་མི་ཤེས་སམ། །གང་གིས་ནོར་གྱི་སྙིང་པོ་ངེས་པར་བལྟས་ནས་ནི། །ནོར་བདག་མིང་ཡང་ཇི་བཞིན་དོན་དང་ལྡན་པ་ཡི། །རྒ་བས་གཟིར་ཞིང་འཆི་བའི་སྡུག་བསྔལ་གྱིས། །དུབ་ཅིང་ཡིད་འབྱུང་ཞུམ་པའི་འཇིགས་སྤང་ཕྱིར། །ལྷ་ཡི་མགོན་པོ་གནས་སྐབས་འདིར་ཞུགས་ཀྱི། །དྲེགས་པས་མ་ཡིན་བྱིས་མིན་མི་བརྟན་མིན། །བསོད་ནམས་བྱེད་པ་རྣམས་ལ་འཚེ་བའི་ཕྱིར། །གང་ཕྱིར་ཁྱེད་ཀོ་བདག་ཅག་སྡུག་བསྔལ་བྱེད། །གཉེན་དང་མཛའ་བཤེས་འཁོར་གྱི་སྦྱོར་བ་ཡི། །དགའ་བས་བརྒྱ་བྱིན་ཡུན་རིང་འཚོ་བར་གྱིས། །རང་བྱས་མགོ་སྐལ་ལྡན་པའི་འབར་བ་ཡི། །གང་ཕྱིར་ལྷ་ཡི་བདག་པོར་ཁྱོད་གྱུར་དེས། །གཞན་གཙེས་རྒྱུ་ཡིས་ལྷ་ཡི་རྒྱལ་པོ་ཡི། །དམ་པའི་ཕུན་སུམ་ཚོགས་ཐོབ་མི་འགྱུར་རོ། །དེ་ནས་དབང་པོ་ཆེན་པོ་དེས་དེའི་ཚིག་གསལ་ཞིང་ཚིག་གི་དོན་སྣ་ཚོགས་སྟོན་པའི་ཚིག་རྣམས་ཀྱིས་ལུས་ཚིམ་ཞིང༌། མཆོག་ཏུ་ངོ་མཚར་དུ་གྱུར་ལ་དད་པས་བཞིན་རབ་ཏུ་དང་ཞིང་མཛེས་པ་དང༌། གཞན་ཡང་དེ་རྣམས་ཀྱིས་བསམ་པ་
སད་པའི་ཕྱིར་ཤིན་ཏུ་བསྟི་སྟང་དང་བཅས་པའི་ཚིག་གིས་སྨྲས་པ། ཀྱེ་མ་མ་དང་འདྲ་བའི་སྲིང་མོ་དག །འཇིག་རྟེན་དཀའ་ཐུབ་ཅན་དག་ཀྱང༌། །མགོན་དུ་བདག་ནི་ལྟ་འདོད་ན། །ཅི་ཕྱིར་འདི་ལྟར་མཆོག་སྟེར་བ། །ང་ལ་ཁྱེད་རྣམས་བརྩེ་མེད་འགྱུར། །དེ་ནས་བུ་མོ་དེ་རྣམས་ལྷག་པར་ཡང་འཁྲུགས་ཤིང་ཁྲོ་བ་དང་བཅས་པས་བརྒྱ་བྱིན་ལ་སྨྲས་པ། བདེ་སོགས་ཀྱིས་ནི་བཞིན་རས་ལ། །ཆགས་ཤིང་འཛུམ་དང་ཟུར་མིག་གིས། །རྣམ་ལྟའི་གནས་ནི་གཞན་ཡིན་ཞིང༌། །སྦྱིན་བྱའི་མཆོག་ཀྱང་གཞན་ཡིན་ནོ། །གལ་ཏེ་བརྒྱ་བྱིན་ཁྱོད་ཀྱིས་ནི། །མཆོག་རབ་སྟེར་བར་ནུས་ན་ནི། །ཡུལ་རྣམས་ཀྱི་ནི་ཤ་ཟ་ནི། །མི་སྲུན་དེ་ལས་རྒྱལ་བར་གྱིས། །ཡང་ན་འདོད་པ་སྤང་དཀའ་ཞིང༌། །ལོག་པའི་རྟོག་པས་ཆགས་གྱུར་ན། །རྒྱུན་དེ་ཉིད་ལ་རྟག་ཏུ་གནོས། །གལ་ཏེ་ནུས་ཡོད་འདི་འདྲར་གྱིས། །མིག་སྟོང་ལྡན་ཁྱོད་མི་བརྟན་པའི། །འདོད་ལ་ཡིད་ནི་ཆགས་གྱུར་པ། །ཁྱོད་ནི་སྦྱིན་བྱ་ཐ་དད་ན། །མཆོག་ཅེས་པ་ནི་ཇི་ལྟར་སྨྲ། །ཇི་ལྟར་ཆུ་བོ་འཇིགས་པ་ཡི། །ཤུགས་ཀྱིས་བདས་པར་གྱུར་པའི་མི། །གཞན་དག་བསྒྲལ་བར་བྱའོ་ཞེས། །ཡོངས་རྟོགས་བྱེད་པའི་རྨོངས་པའི་གནས། །སྐྲ་རྣམས་བྲེགས་པར་གྱུར་ནས་ནི། །ཕྱག་དར་ཁྲོད་ཀྱི་གོས་འཆང་ཞིང༌། །དགོན་པ་ཡུལ་དུ་འདོད་པར་ནི། །ནམ་ཞིག་དེ་ལྟར་འགྱུར་ཞིག་གུ། །གཉའ་ཤིང་གང་ཙམ་རྣམ་ལྟ་ཞིང༌། །ས་ཡི་ལྷུང་བཟེད་ལག་ཐོགས་ནས། །དཔྱས་མེད་ཁྱིམ་ནས་ཁྱིམ་དུ་ནི། །ནམ་ཞིག་སློང་མོ་སྤྱོད་པར་འགྱུར། །རྙེད་དང་བཀུར་སྟི་ཆགས་མེད་ཅིང༌། །ཉོན་མོངས་ཚེར་མའི་འདམ་རྫབ་དག །སྦྱོར་བ་བྱེད་ཅིང་གྲོང་ཁྱེར་གྱི། །སྦྱིན་པའི་གནས་སུ་ནམ་ཞིག་འགྱུར། །རྩྭ་ཡི་ཚོགས་ལས་ལངས་ནས་ནི། །བ་མོས་ལྕི་བའི་གོས་དག་དང༌། །ཟས་སྐོམ་ངན་ངོན་ཙམ་གང་གིས། །ནམ་ཞིག་ལུས་ལ་ཆགས་མེད་འགྱུར། །ཤིང་དྲུང་ནེ་ཙོ་ལྟར་ལྗང་བའི། །ངུར་པ་འཇམ་པོའི་གོས་ཅན་དུ། །མཐོང་ཆོས་བདེ་བའི་དགའ་སྟོན་དང༌། །ནམ་ཞིག་
བདག་ནི་ཉལ་བར་འགྱུར། །འདོར་བར་འགྱུར་བའི་ལུས་སྲོག་ལ། །ཆུ་དང་རྩྭ་ཡི་ཟིལ་པ་ལྟར། །ལྟོས་མེད་ཡུན་རིང་གོམས་པ་ཡི། །བདེ་བ་ཆེན་པོ་ནམ་ཞིག་འཐོབ། །ནམ་ཞིག་ཆུ་ངོགས་སྨན་ལྗོངས་སུ། །གནས་ནས་ཆུ་ངོགས་འབྱུང་འཇིག་དང༌། །འཚོ་བའི་འཇིག་རྟེན་གནས་འདྲ་བར། །ཡང་དང་ཡང་དུ་ལྟ་བར་འགྱུར། །ལྟ་བ་ཀུན་གྱི་མར་གྱུར་པའི། །འཇིག་ཚོགས་ལྟ་བ་འབྱིན་པ་དང༌། །སྲིད་པའི་ལོངས་སྤྱོད་མི་འདོད་པར། །བདག་ནི་ནམ་ཞིག་འགྱུར་ཞིག་གུ། །རྨི་ལམ་སྨིག་རྒྱུ་སྒྱུ་མ་སྤྲིན། །དྲི་ཟའི་གྲོང་ཁྱེར་མཚུངས་པར་ནི། །རྒྱུ་དང་མི་རྒྱུའི་འཇིག་རྟེན་དག །ནམ་ཞིག་རྟོགས་པར་བྱེད་པར་འགྱུར། །མིང་པོ་འདི་ལྟར་དགའ་བ་ཡི། །རེ་བའི་ཡིད་ཀྱིས་རྣམ་རོལ་པས། །ཟང་ཟིང་བཅས་ཤིང་གཡོ་བ་ཡི། །མཆོག་དེ་རྣམས་ཀྱིས་ཅི་ཞིག་བགྱི། །ཀྱེ་མ་མཆོག་རབ་སྦྱིན་པར་སེམས་གཞན་ཡང༌། །ལོག་པར་རྟོག་པ་སྐད་ཅིག་ཙམ་འགའ་ཞིག །ལྷ་མགོན་འདོད་པ་ངོ་བོ་ཉིད་ཀྱིས་གཡོ། །གཡང་ས་ཆེན་པོ་མུན་ནག་བཅས་འདྲ་བས། །སེམས་རྒྱ་ཆེ་བའི་དམ་པས་རྣམ་པར་སྤངས། །མི་རིགས་འཚེ་བ་ཀུན་གྱི་རྒྱུར་གྱུར་ཅིང༌། །འདོད་པས་མི་རྣམས་འཁྲུལ་པར་བྱེད་པས་ན། །འདི་ནི་སྨད་བྱ་འཇིགས་པ་ཆེན་པོ་སྟེ། །མི་གཙང་བསྒོས་པའི་སྦྲུལ་ནག་དག་དང་མཚུངས། །གང་འདི་ཐོག་མཐའ་མེད་ནས་འགྲོ་བ་དང༌། །འགྲོ་བར་འགྱུར་དང་གནས་པའི་སེམས་ཅན་ལུས། །དེ་ནི་གསོད་འཇོམས་བསྟན་དང་མཚུངས་པས་ན། །སྡིག་པའི་གཞིར་གྱུར་འདོད་པས་ཅི་ཞིག་བྱ། །ལྷ་དབང་བརྒྱ་བྱིན་འདོད་པའི་ཡུལ་འདི་ནི། །ཕྱག་དར་ཁྲོད་འདྲར་བྱེད་འདྲའི་ངོ་བོ་བས། །བརྫུན་པར་རྟོག་ཅིང་རྣམ་སྨིན་མི་བཟད་པའི། །འདོད་པ་ཡིད་ཀྱིས་ཀྱང་ནི་སུ་ཞིག་བསྟན། །བཻ་ཌཱུཪྻ་སྔོ་ལྗང་སྐྱེས་པ་ཡི་རྩྭ་དང་ནི། །མེ་ཏོག་རྒྱས་པར་གྱུར་པའི་ཤིང་གི་ནགས་སྤངས་ནས། །ལྕགས་ཀྱུ་རྣོན་པོས་སྤྱི་བོར་འཚོག་ཅིང་འདྲི་བ་དང༌། །གླང་ཆེན་དབང་པོས་ཁུར་སྐྱེད་ཡུལ་གྱིས་བསླུས་པ་ཡིན། །མདུང་རྩེ་ལུས་བསྐྱོན་གྲོང་གི་ཁ་ཡི་ཚོགས་རྣམས་ཀྱི། །གཤོག་པའི་
རླུང་གིས་རབ་ཏུ་གཡོབ་པར་བྱེད་འགྱུར་ལ། །མཛའ་བོ་རྣམས་ཀྱང་གཡོ་བྱས་མིག་གིས་ལྟ་བྱེད་པར། །སྐྱེས་བུ་འཇིགས་པར་འགྱུར་བའང་ཡུལ་གྱིས་བརླག་པ་ཡིན། །བྱིས་པ་ལོག་རྟོག་རླུང་གིས་རབ་འབར་འདོད་པ་ཡིས། །རང་ཉིད་ཁང་པ་བདག་ཉིད་ཀྱིས་ནི་སྲེག་བྱེད་ན། །སྨྱིག་མ་ལོ་བརྒྱ་ལོན་པ་ཕན་ཚུན་འདར་བ་ཡིས། །རང་ཉིད་ཀྱིས་ནི་སྲེག་པར་བྱེད་པ་ཇི་བཞིན་ནོ། །བརྒྱ་བྱིན་གཞན་ཡང་རྣམ་རྒྱལ་ཁང་པར་གནས་ནས་ནི། །འོད་འཕྲོ་ནོར་བུའི་དཔལ་གྱིས་དགའ་བ་འདི་ལས་ནི། །མེ་ཆེན་རང་འབར་འཇིགས་པའི་མནར་མེད་སར་ཕྱིན་པས། །གང་འདི་དུག་ཅན་ཡུལ་གྱི་བདེ་བ་དེ་ནི་བདེ་ལེགས་མིན། །མཐོ་རིས་གནས་ནས་འགྲོ་བ་ངན་པའི་གནས་འཇུག་ཅིང༌། །སྐད་ཅིག་གིས་ལྷུང་འཕོ་བའི་སྡུག་བསྔལ་གྱིས་གཟིར་བ། །གང་དག་མྱོང་འགྱུར་ལྷ་ཡི་འཇིག་རྟེན་མངོན་དགའ་བ། །སྔར་མྱོང་གྱུར་པ་དེ་ནི་བདེ་བ་མྱོང་མ་ཡིན། །གསེར་གྱི་པདྨ་ཁ་ཁྱེར་ངང་པ་ཉལ་བ་དང༌། །གང་འདིར་ལྷ་ཡི་ཁང་པ་རྫིང་བུར་གྲུལ་རྒལ་བ་དག །འདོད་པའི་ལས་ཀྱིས་སླར་ཡང་མི་རོ་རུལ་པ་ཡིས། །གཟིངས་པའི་ཆུ་བོ་རབ་མེད་ནང་དུ་ལྟུང་བར་འགྱུར། །ཡོངས་སུ་གྱུར་ན་དགའ་བྲལ་རྨི་ལམ་ལྟ་བུ་ཡི། །ལྷ་རྣམས་བདེ་ལ་དེ་ནི་བརྒྱ་བྱིན་སུ་ཞིག་འདོད། །འཚོ་བའི་འཇིག་རྟེན་ཁྲོས་པའི་སྦྲུལ་གྱིས་མེ་ལྟར་གཡོ་བར་ནི། །ཐམས་ཅད་རྟོག་པས་བདག་ཅག་ཐར་ལ་གཞོལ་བ་གནས། །སྲིད་འགྲོ་ཚང་ཚིང་ནང་ན་གནས་པའི་བྱིས་པ་རྣམས། །འདི་བདེ་ཡིན་ཞེས་པ་དེ་ལོག་པར་བརྟགས་ཙམ་སྟེ། །གང་འདི་སྲིད་པ་མ་ལུས་སྡུག་བསྔལ་ཀུན་བསྐྱེད་ཅེས། །ཡང་དག་གསུངས་པའི་སངས་རྒྱས་རྣམས་ཀྱིས་གསུངས། །འཚོ་བའི་འཇིག་རྟེན་རང་བཞིན་སྡུག་བསྔལ་མང་པོས་གཡེངས་འགྱུར་ཏེ། །གང་ཚེ་འདི་ན་བདེ་བ་མྱོང་བའང་བྱ་རོག་ཏ་ལར་མཚུངས། །དེ་ཡང་ཕྲད་གྱུར་སྡུག་བསྔལ་དུ་མས་ཟིལ་གྱིས་གནོན་འགྱུར་ཏེ། །ཆུ་བོའི་ཆུ་ནི་རྒྱ་མཚོར་
ཕྱིན་པ་དག་དང་མཚུངས། །གང་ཕྱིར་བུད་མེད་ལག་པ་གེ་སར་བཅས་པའི་པདྨའི་འདབ་འདྲ་དང༌། །གདུ་བུ་ཅུང་ཟད་ཁྲོལ་བ་ཙན་དན་བསིལ་བས་བསྒོས་པར་གྱུར་པ་ཡིས། །རེག་ཅིང་ཟངས་ལྟར་དམར་བཅས་སོར་མོ་ཟླུམ་པས་བརྩེ་པས་འཁྱུད་པར་བྱས་པ་དང༌། །བསིལ་ཡབ་རླུང་གི་རྒྱན་ཕྲེང་གཏོར་བས་ཁྱབ་པར་གཉིད་ལོག་གྱུར་པ་དག །འཇག་མའི་རྩེ་མོར་བཅེར་པའི་ལམ་དུ་ཐལ་བ་དང་འདྲེས་རླུང་དམར་ནི། །དྲག་པོས་གཡོབ་ཅིང་དུབ་ལ་ལྕི་བའི་ལུས་ཀྱི་སླར་ཡང་ཉལ་འགྱུར་ཏེ། དེ་བས་འཚོ་བའི་འཇིག་རྟེན་སྐད་ཅིག་ཐང་ཅིག་གཡོ་བར་ཤེས་གྱིས་ལ། །ཕོངས་པའི་འབྲས་འབྱིན་འདོད་པ་སྤོངས་ལ་ཚམས་པའི་ཞི་ལ་བརྟེན་པར་གྱིས། །དེ་ནས་བུ་མོ་རྣམས་ལ་མིག་སྟོང་ལྡན། །དགའ་བས་ལུས་ཀྱི་བ་སྤུ་ལྡང་འགྱུར་ཞིང༌། །བརྩོན་ལ་མངོན་དགའི་སེམས་དང་ལྷན་ཅིག་གིས། །སུམ་ཅུ་རྩ་གསུམ་མངོན་ཕྱོགས་སོང་བར་གྱུར། །དེ་ནས་བུ་མོ་དེ་རྣམས་རབ་བྱུང་ཉེར་སོན་ཅིང༌། །དེ་ཉིད་དོན་ལ་རྣམ་བརྟག་བློ་མིག་དགང་གྱུར་པས། །དྲེགས་པའི་ཆུ་རླབས་གཡོ་ཞིང་འཇིགས་པར་བྱེད་པ་ཡི། །སྡུག་བསྔལ་མཚོ་ཆེན་མཐའ་མེད་འཁོར་བ་བརྒལ་བར་གྱུར། །འགྲོ་བ་མ་རིག་མདོངས་པ་ཀུན་གྱི་མིག་གཅིག་པ། །རང་བཞིན་འགྲོ་དོན་རྣམ་བྱེད་ངེས་པའི་བདག་ཉིད་ཀྱི། །ཐུབ་པས་སེམས་ཅན་རྣམས་ལ་ཚུལ་འདི་གསུངས་པས་ན། །སེམས་ཅན་རྣམས་ཀྱི་སྲིད་པའི་ཚེར་མ་ཟད་པར་ཤོག །གཞོན་ནུ་མ་བདུན་གྱི་རྟོགས་པ་བརྗོད་པ། སློབ་དཔོན་གསང་བ་བྱིན་གྱིས་མཛད་པ་རྫོགས་སོ།། །།