དགེ་སློང་གི་དང་པོའི་ལོ་དྲི་བ།
རྒྱ་གར་སྐད་དུ། བྷི་ཀྵུ་བཪྵཱ་གྲཾ་པྲྀཙྪ། བོད་སྐད་དུ། དགེ་སློང་གི་དང་པོའི་ལོ་དྲི་བ། ཐམས་ཅད་མཁྱེན་པ་ལ་ཕྱག་འཚལ་ལོ། །མཁན་པོ་དགོངས་སུ་གསོལ། ཕྱག་འཚལ་ལོ། །དགུང་ལ་བདེའམ་ཞེས་དྲི། ཆག་ཆག་དང་ཕྱག་དར་དང༌། མཎྜལ་བགྱིད། ཀློག་པ་དང༌། ཁ་ཏོན་དང༌། དགེ་བའི་ཕྱོགས་ཀྱི་ཀུན་དུ་སྤྱད་པ་ལ་ཆོས་དང་མཐུན་པར་བགྱིད། གཎྜཱིའི་དུས་སུ་བརྗོད་པར་བྱ་བ་ནི། མཁན་པོ་དགོངས་སུ་གསོལ། ཕྱག་འཚལ་ལོ། །བདེ་བར་གསོལ་ལམ་ཞེས་དྲི། ཀློག་པ་དང༌། ཁ་ཏོན་བགྱིད། ཅུང་ཞིག་ངལ་བསོ་ཞེས་ཞུ། མཁན་པོ་དགོངས་སུ་གསོལ། ཕྱག་འཚལ་ལོ། །གདུགས་ལ་འདེའམ་ཞེས་དྲི། རྐང་པ་དག་བཀྲུ། མཆིས་མལ་འཆའ། སྲོད་དང་ཐོ་རངས་ལ་མི་ཉལ་བར་སྦྱོར་བ་བགྱིད། ཅུང་ཞིག་ངལ་བསོ་ཞེས་ཞུ། སློབ་དཔོན་དགོངས་སུ་གསོལ། ཕྱག་འཚལ་ལོ། །དགུང་ལ་བདེའམ་ཞེས་དྲི། ཆག་ཆག་དང༌། ཕྱག་དར་དང༌། མཎྜལ་ལ་སོགས་པ་བགྱིད། ཀློག་པ་དང་ཁ་ཏོན་བགྱིད། བསམ་གཏན་བགྱིད་ཅེས་ཞུ། གཎྜཱིའི་དུས་སུ་ནི། ཟས་ལ་ཀུན་དུ་སྤྱད་པར་བགྱིད། ཞབས་ལ་སྐུ་མཉེ་ལ་སོགས་པ་བགྱིད། མཉན་པ་དང་བསམ་པ་ལ་སོགས་པ་བགྱིད་ཅེས་ཞུ། དེ་ནི་ཁྱོད་ཀྱི་རྗེས་སུ་གནང་བས་སོ། །གློ་བུར་དུ་འོངས་པ་ལ་དྲི་ཞིང་ལན་གདབ་པ། ལོ་དུ་ལོན་ཞེ་ན། ལོ་ལོན་པའམ་མ་ལོན་པ་ཞེས་བྱ་བ་ལ་སོགས་པ་བརྗོད། དུས་གང་ཞེ་ན། སོས་ཀའི་དུས་ལ་སོགས་པའོ། །ཅི་ཙམ་ཐོབ་ཅེ་ན། ཟླ་བ་གཅིག་གམ། ཟླ་བ་ཕྱེད་དམ། ཞག་བཅུ་པ་ལ་སོགས་པའོ། །ཟས་ཀྱི་སྔ་རོལ་ལམ་ཟས་ཀྱི་འོག་རོལ་ཞེ་ན། དེ་བཞིན་དུ་ཟས་ཀྱི་སྔ་རོལ་ལམ་ཟས་ཀྱི་འོག་རོལ་ཞེས་ལན་གདབ་བོ། །སྐྱེས་བུ་དུ་དང་རྩ་བ་དུ་ཞེ་ན། སྐྱེས་བུ་གཅིག་དང་རྩ་བ་གཉིས་ཞེས་བྱ་བ་ལ་སོགས་པ་བརྗོད་དོ། །མཁན་པོ་གང་ཡིན་ཞེ་ན། དོན་གྱི་སླད་དུ་མཚན་ནས་སྨོས་ཏེ། བླ་མ་མཁན་པོ་ཆེ་གེ་མོ་ཞེས་བྱའོ། །ལས་བྱེད་པའི་སློབ་
དཔོན་གང་ཞེ་ན། སློབ་དཔོན་ཆེ་གེ་མོ་ཞེས་སོ། །གསང་སྟེ་བ་སྟོན་པའི་སློབ་དཔོན་གང་ཞེ་ན། སློབ་དཔོན་ཆེ་གེ་མོ་ཞེས་སོ། །དུས་སུ་ཡོད་ཅེ་ན་ལྔའོ། །ལྔ་པོ་དག་གང་ཞེ་ན། དགུན་དང༌། སོས་ཀ་དང༌། དབྱར་དང༌། དབྱར་ཐུང་དུ་དང༌། དབྱར་རིང་པོ་ཞེས་བྱ་བའོ། །དེ་ལ་དགུན་གྱི་ཚད་ཇི་ཙམ་ཞེ་ན། ཟླ་བ་བཞིའོ། །བཞི་པོ་དག་གང་ཞེ་ན། དགུན་ཟླ་ར་བ་དང༌། དགུན་ཟླ་འབྲིང་པོ་དང༌། དགུན་ཟླ་ཐ་ཆུངས་དང༌། དཔྱིད་ཟླ་ར་བ་ཞེས་སོ། །སོས་ཀའི་དུས་ཚོད་ཇི་ཙམ་ཞེ་ན། ཟླ་བ་བཞིའོ། །དཔྱིད་ཟླ་འབྲིང་པོ་དང༌། དཔྱིད་ཟླ་ཐ་ཆུངས་དང༌། དབྱར་ཟླ་ར་བ་དང༌། དབྱར་ཟླ་འབྲིང་པོ་དག་གོ །དབྱར་གྱི་དུས་ཇི་ཙམ་ཞེ་ན། ཟླ་བ་གཅིག་སྟེ། དབྱར་ཟླ་ཐ་ཆུངས་སོ། །དབྱར་ཐུང་དུའི་དུས་ཇི་ཙམ་ཞེ་ན། ཉིན་ཞག་གཅིག་སྟེ། ཉིན་ཞག་གཅིག་པོ་གང་ཡིན་ཞེ་ན། སྟོན་ཟླར་བ་ཚེས་གཅིག་གི་ཉིན་ཞག་གོ །དབྱར་རིང་པོའི་ཚད་ཇི་ཙམ་ཞེ་ན། ཉིན་ཞག་དེ་ཉིད་མ་ཚང་བའི་ཟླ་བ་གསུམ་མོ། །ཟླ་བ་གསུམ་པོ་དག་གང་ཡིན་ཞེ་ན། སྟོན་ཟླ་ར་བ་དང༌། སྟོན་ཟླ་འབྲིང་པོ་དང༌། སྟོན་ཟླ་ཐ་ཆུངས་སོ། །ཡང་སྨྲས་པ། ཞག་གཅིག་མ་ཚང་ཟླ་གསུམ་དང༌། །བཞི་དང་དེ་བཞིན་བཞི་པ་དང༌། །ཟླ་བ་གཅིག་ཡིན་ཞག་གཅིག་ཡིན། །ཞེས་བྱ་དུས་ནི་ལྔ་པོར་བརྗོད། །སྡེ་པ་གང་ཞེ་ན། འཕགས་པ་ཐམས་ཅད་ཡོད་པར་སྨྲ་བ་ཞེས་བྱ་བ་ལ་སོགས་པའོ།། །།དེའི་དབྱེ་བ་གང་ཞེ་ན། འཕགས་པ་གཞི་ཐམས་ཅད་ཡོད་པར་སྨྲ་བ་ཞེས་བྱ་བ་ལ་སོགས་པའོ། །ཡང་སྡེ་པ་དུ་ཞེ་ན། འཕགས་པ་ཐམས་ཅད་ཡོད་པར་སྨྲ་བ་དང༌། འཕགས་པ་དགེ་འདུན་ཕལ་ཆེན་པ་དང༌། འཕགས་པ་མང་པོས་བཀུར་བ་དང༌། འཕགས་པ་གནས་བརྟན་པའོ། །དེ་དག་ལ་དབྱེ་བ་དུ་ཡོད་ཅེ་ན། བཅོ་བརྒྱད་དོ། །བཅོ་བརྒྱད་པོ་གང་དག །ཇི་ལྟར་ན་བཅོ་བརྒྱད་དུ་འགྱུར་ཞེ་ན། འཕགས་པ་ཐམས་ཅད་ཡོད་པར་སྨྲ་བའི་དབྱེ་བ་བཞིའོ། །དེ་བསྟན་པར་བྱ་སྟེ། འོད་སྲུངས་ཞེས་བྱས་སྲུང་དང༌། །ཆོས་སྲུང་བ་ཞེས་བྱ་བ་དང༌། །གཞི་ཀུན་ཡོད་པར་སྨྲ་བ་སྟེ། །ལྟ་བའི་བྱེ་བྲག་འབའ་ཞིག་གི །རྒྱུ་ཡིས་འདི་དག་ཐ་དད་བྱས། །སྟོན་པ་ཐ་དད་ཡོད་མ་ཡིན། །དགེ་འདུན་ཕལ་ཆེན་དབྱེ་བ་ནི། །དྲུག་སྟེ་ཤར་གྱི་རི་བོ་དང༌། །དེ་བཞིན་ནུབ་རི་ཞེས་བྱ་དང༌། །གང་གནས་ཞེས་བྱ་དེ་ལས་གཞན།།
རྣམ་པར་ཕྱེ་སྟེ་སྨྲ་བ་དང༌། །གཞན་ནི་དེ་བཞིན་བཏགས་པར་སྨྲ། །འཇིག་རྟེན་འདས་སྨྲ་ཞེས་བྱ་བ། །དེ་དག་ཏུ་ནི་ཡང་དག་སྨྲས། །མང་པོས་བཀུར་བའི་བྱེ་བྲག་ནི། །རྣམ་པ་ལྔར་ནི་མཁས་པས་བསྒྲགས། །གོས་དམར་བ་དང་སྲུང་བ་པ། །ཀུ་རུ་ཀུལླེ་དེ་ལས་གཞན། །མང་དུ་ཐོས་པ་ཞེས་བྱ་དང༌། །གནས་མ་བུ་ཞེས་བྱ་བའོ། །རྒྱལ་བྱེད་ཚལ་ན་གནས་པ་དང༌། །འཇིགས་མེད་རི་ལ་གནས་པ་དང༌། །གཙུག་ལག་ཁང་ཆེན་ལ་གནས་དང༌། །གནས་བརྟན་དབྱེ་བ་གསུམ་དུ་འདོད། །དེ་ལྟར་བྱེ་བྲག་བཅོ་བརྒྱད་དུ། །ཤཱཀྱ་སེང་གེའི་བསྟན་པ་ནི། །གྱུར་ཏེ་འགྲོ་བའི་བླ་མ་དེའི། །སྔོན་གྱི་ཕྲིན་ལས་ངེས་པ་ཡིན། །རྟེན་དུ་ཞེ་ན། བཞི་སྟེ། བཞི་པོ་གང་དག་ཅེ་ན། གོས་ཕྱག་དར་ཁྲོད་ལ་བརྟེན་པ་དང༌། ཟས་བསོད་སྙོམས་ལ་བརྟེན་པ་དང༌། གནས་མལ་ཤིང་དྲུང་ལ་བརྟེན་པ་དང༌། །སྨན་བཀུས་ཏེ་བོར་བ་ལ་བརྟེན་པའོ། །ལྟུང་བར་གྱུར་པའི་ཆོས་དུ་ཞེ་ན། བཞི་སྟེ། བཞི་པོ་གང་དག་ཅེ་ན། མི་ཚངས་པར་སྤྱོད་པ་དང༌། གཞན་གྱི་ནོར་འཕྲོག་པ་དང༌། མིའི་སྲོག་གཅོད་པ་དང༌། མིའི་ཆོས་བླ་མ་སྨྲ་བའོ། །དགེ་སྦྱོང་དུ་བྱེད་པའི་ཆོས་དུ་ཞེ་ན། བཞི་སྟེ། བཞི་པོ་གང་དག་ཡིན་ཞེ་ན། གཤེ་བ་ལ་ཡང་སླར་མི་གཤེ་བ་དང༌། ཁྲོས་ཀྱང་སླར་མི་ཁྲོ་བ་དང༌། བརྡེགས་ཀྱང་སླར་མི་རྡེག་པ་དང༌། མཚང་བྲུས་ཀྱང་སླར་མི་བྲུ་བའོ། །ལྟུང་བ་རིས་དུ་ཡོད་ཅེ་ན། ལྔ་སྟེ། ལྔ་པོ་གང་དག་ཅེ་ན། ཕས་ཕམ་པར་འགྱུར་བའི་རིས་དང༌། དགེ་འདུན་ལྷག་མའི་རིས་དང༌། ལྟུང་བྱེད་ཀྱི་རིས་དང༌། སོ་སོར་བཤགས་པའི་རིས་དང༌། བསླབ་པའི་རིས་ཞེས་བྱ་བའོ། །དེ་ལ་ཕས་ཕམ་པར་འགྱུར་བ་དུ་ཡོད་ཅེ་ན། བཞི་སྟེ། བཞི་པོ་གང་དག་ཡིན་ཞེ་ན། མི་ཚངས་པར་སྤྱོད་པ་དང༌། མ་བྱིན་པར་ལེན་པ་དང༌། མི་གསོད་པ་དང༌། མིའི་ཆོས་བླ་མ་སྨྲ་བའོ། །དགེ་འདུན་ལྷག་མའི་ཆོས་དུ་ཡོད་ཅེ་ན། བཅུ་གསུམ་མོ། །བཅུ་གསུམ་པོ་གང་དག་ཡིན་ཞེ་ན། འབྱིན་པ་དང། ལུས་ཀྱིས་རེག་པ་དང༌། འཁྲིག་ཚིག་སྨྲ་བ་དང༌། བསྙེན་བཀུར་བསྔགས་པ་དང༌། སྨྱན་བྱེད་པ་དང༌། ཁང་པ་རྩིག་པ་དང༌། གཙུག་ལག་ཁང་རྩིག་པ་དང༌། གཞི་མེད་པའི་ཆོས་ཀྱིས་སྨྲ་བ་དང༌། གཞན་གྱི་ཆ་དང་མཐུན་པས་རྗེས་སུ་སྨྲ་བ་དང༌། དགེ་འདུན་གྱི་དབྱེན་བྱེད་པ་དང་དེའི་
རྗེས་སུ་ཕྱོགས་པ་དང༌། ཁྱིམ་སུན་འབྱིན་པ་དང༌། བཀའ་བློ་མི་བདེ་བར་བྱེད་པའོ། །ལྟུང་བྱེད་ཀྱི་ཆོས་དུ་ཡོད་ཅེ་ན། བརྒྱ་ཕྲག་གཅིག་དང་ཉི་ཤུ་ལྷག་པའོ། །སྤང་བའི་ལྟུང་བྱེད་ཀྱི་ཆོས་སུམ་ཅུ་པོ་གང་དག་ཡིན། ལྟུང་བ་འབའ་ཞིག་དགུ་བཅུ་ནེ་གང་དག་ཡིན། སྤང་བའི་ལྟུང་བྱེད་ཀྱི་ཆོས་སུམ་ཅུ་པོ་ནི་གོས་འཆང་བ་དང༌། འབྲལ་བ་དང༌། ཟླ་བ་གཅིག་ལས་ལྷག་པ་དང༌། འཁྲུར་འཇུག་པ་དང༌། ལེན་པ་དང༌། སློང་བ་དང༌། སྟོད་གཡོགས་སྨད་གཡོགས་མཐར་ཐུག་པ་ལས་ལྷག་པ་དང༌། མ་བསྟབས་པའི་གོས་ཀྱི་རིན་དང༌། སོ་སོ་བ་དང༌། གོས་ཀྱི་རིན་བསྐུར་བ་ཞེས་བྱ་བའོ། །སྲིན་བལ་དང༌། ནག་པོ་འབའ་ཞིག་དང༌། ཆ་གཉིས་དང༌། ལོ་དྲུག་དང༌། གདིང་བ་མཐོ་གང་མ་གླན་པ་དང༌། བལ་ཁུར་བ་དང༌། བལ་གྱི་ལས་དང༌། གསེར་དངུལ་ལེན་པ་དང༌། མངོན་མཚན་ཅན་དང༌། ཉོ་ཚོང་ངོ༌། །ལྷུང་བཟེད་ལྷག་པ་འཆང་བ་དང༌། ལྷུང་བཟེད་གཞན་ཚོལ་བ་དང༌། འཐག་པ་དང༌། འཐག་པ་བསྐྱེད་པ་དང༌། བྱིན་འཕྲོག་དང༌། བརྟད་པ་ལས་བྱུང་བ་དང༌། ཞག་དྲུག་ལས་ལྷག་པར་འབྲལ་བ་དང༌། དབྱར་གྱི་གོས་རས་ཆན་གྱི་དང༌། བསྔོས་པ་གཞན་དུ་བསྐྱུར་བ་དང༌། ཞག་བདུན་བ་ཞེས་བྱ་བ་དག་གོ །ལྟུང་བ་འབའ་ཞིག་དགུ་བཅུ་གང་དག་ཡིན་ཞེ་ན། བརྫུན་དུ་སྨྲ་བ་དང༌། དགེ་སློང་གི་སྐྱོན་སྨྲ་བ་དང༌། དགེ་སློང་གི་དབྱེན་དང༌། ལས་དཀྲུགས་པ་དང༌། སྟོན་པ་དང༌། འདོན་པ་དང༌། གནས་ངན་ལེན་བརྗོད་པ་དང༌། མི་ཆོས་བླ་མ་སྒྲོགས་པ་དང༌། སྐུར་པ་འདེབས་པ་དང༌། བསླབ་པ་ལ་ཁྱད་དུ་གསོད་པའོ། །ས་བོན་འཇོམས་པ་དང༌། འཕྱ་བ་དང༌། བསྒོ་བ་དང༌། མལ་ཁྲི་དང༌། གདིང་བ་དང༌། གཙུག་ལག་ཁང་ནས་སྐྲོད་པ་དང༌། ཕྱིས་གནོན་བྱེད་པ་དང༌། རྐང་པ་དབྱུང་བའི་ཁྲི་ལ་འདུག་པ་དང༌། སྲོག་ཆགས་དང་བཅས་པའི་ཆུ་ལ་སྤྱོད་པ་དང༌། གཙུག་ལག་ཁང་ཞེས་བྱ་བའོ། །མ་བསྐོས་པར་སྟོན་པ་དང༌། ཉི་མ་ནུབ་ཀྱི་བར་དུ་སྟོན་པ་དང༌། ཟས་ཅུང་ཟད་ཙམ་གྱི་ཕྱིར་སྟོན་པ་དང༌། གོས་སྦྱིན་པ་དང༌། གོས་བྱེད་པ་དང༌། དགེ་སློང་མ་དང་བཅས་པའི་ལམ་དང༌། དགེ་སློང་མ་དང་བཅས་པའི་ཆུ་ལ་འགྲོ་བ་དང༌། བུད་མེད་དང་སྟན་གཅིག་པ་དང༌། དགེ་སློང་མ་དང་གནས་གཅིག་པ་དང༌། དགེ་
སློང་མས་ཉེ་བར་སྦྱོར་དུ་བཅུག་པའི་ཟས་སོ། །ཟས་ཡང་ཡང་ཟ་བ་དང༌། འདུག་གནས་གཅིག་ཏུ་ལྷག་པར་ཟ་བ་དང༌། ལྟུང་བཟེད་དོ་གསུམ་ལས་ལྷག་པར་ལེན་པ་དང༌། སྟན་གཅིག་པའི་ཟས་དང༌། སྤངས་པ་ལ་སྟོབས་པ་དང༌། འདུས་ཤིང་ཟ་བ་དང༌། དུས་མ་ཡིན་པར་ཟ་བ་དང༌། སོགས་འཇོག་ཟ་བ་དང༌། བྱིན་ལེན་མ་བྱས་པར་ཟ་བ་དང༌། བསོད་པ་བླངས་ནས་ཟ་བའོ། །ཡང་སྲོག་ཆགས་ཡོད་པའི་ཆུ་ལ་སྤྱོད་པ་དང༌། ཉལ་པོ་བྱེད་པར་འདུག་པ་དང༌། དེར་འགྲེང་བ་དང༌། གཅེར་བུ་པ་ལ་སྦྱིན་པ་དང༌། དམག་ལ་ལྟ་བ་དང༌། དེར་ཞག་གཉིས་ལས་ལྷག་པར་གནས་པ་དང༌། དེར་ཡང་བཤམས་པ་དཀྲུགས་པ་དང༌། རྡེག་པ་དང༌། གཟས་པ་དང༌། དགེ་སློང་གི་ལྟུང་བ་འཆབ་པའོ། །ཟས་གཅོད་པ་དང༌། མེ་ལ་རེག་པ་དང༌། འདུན་པ་ཕྱིར་ལེན་པ་དང༌། བསྙེན་པར་མ་རྫོགས་པ་དང༌། ནུབ་གཉིས་ལས་ལྷག་པར་ཉལ་བ་དང། བར་ཆད་ཀྱི་ཆོས་བར་དུ་མི་གཅོད་ཟེར་བ་དང༌། དེ་དང་གནས་གཅིག་ཏུ་ཉལ་བ་དང༌། དགེ་ཚུལ་བསྙིལ་བསྡུད་པ་དང༌། ཁ་དོག་མ་བསྒྱུར་བ་དང༌། གཞན་གྱི་རིན་པོ་ཆེ་ལ་རེག་པ་དང༌། ཁྲུས་ཡང་ཡང་བྱེད་པའོ། །དུད་འགྲོ་གསོད་པ་དང༌། འགྱོད་པ་བསྐྱེད་པ་དང༌། གཡའ་དགག་པ་དང༌། ཆུ་ལ་རྩེ་བ་དང༌། བུད་མེད་དང་ལྷན་ཅིག་ཉལ་བ་དང༌། སྡངས་པར་བྱེད་པ་དང༌། སྦེད་པ་དང༌། གདེང་མེད་པར་སྤྱོད་པ་དང༌། གཞི་མེད་པར་སྐུར་བ་དང༌། བུད་མེད་དང་འགྲོན་ལམ་དུ་འགྲོགས་པའོ། །རྐུན་མ་དང་འགྲོགས་པ་དང༌། ལོ་མ་ཚང་བར་བསྙེན་པར་རྫོགས་པ་དང༌། ས་རྐོ་བ་དང༌། ལྷག་པར་བདག་གིར་བྱེད་པ་དང༌། བསླབ་པ་སྟོན་པ་ལས་ཕྱིར་ཟློག་པ་དང༌། ཉན་རྣས་འདུག་པ་དང༌། མི་སྨྲ་བར་འགྲོ་བ་དང༌། མ་གུས་པ་དང་ཆང་འཐུང་བ་དང༌། དུས་མ་ཡིན་པར་སྤྱོད་པ་ཞེས་བྱ་བའོ། །གྲོང་དུ་རྒྱུ་བ་དང༌། རྒྱལ་པོའི་ཁྱིམ་དུ་ནུབ་མོ་འགྲོ་བ་དང༌། བསླབ་པའི་གཞི་འདོན་པ་ན་རྒོད་པས་གནས་པ་དང༌། ཁབ་རལ་སྒྲུབ་པ་དང༌། ཁྲི་རྐང་མཐོན་པོ་བྱེད་པ་དང༌། ཤིང་བལ་བཏིང་བ་དང༌། གདིང་བ་དང་གཡན་པ་དག་དགབ་པ་དང༌། དབྱར་གྱི་གོས་རས་ཆེན་གྱི་དང༌། བདེ་བར་གཤེགས་པའི་ཆོས་གོས་ཀྱི་དག་གོ །སོ་སོར་བཤགས་པའི་ཆོས་དུ་ཡོད་ཅེ་ན། བཞི་
སྟེ་དགེ་སློང་མ་ལ་བསོད་སྙོམས་ལེན་པ་དང༌། དེ་ཞལ་ཏ་བྱེད་པ་ལ་མ་བསྒོ་བར་ཟ་བ་དང༌། ཁྱིམ་སྡོམ་པས་བསྡམས་པ་འདྲལ་བ་དང༌། དགོན་པ་འཇིགས་པ་དང་བཅས་པའི་ཞེས་བྱའོ། །བསླབ་པའི་ཆོས་དུ་ཞེ་ན། བརྒྱ་རྩ་བཅུ་གཉིས་ཏེ། གང་དག་ཅེ་ན། ཤམ་ཐབས་ལ་ཡང་རྣམ་བདུན་ཏེ། ཀུན་ནས་ཟླུམ་པོར་བགོ་བ་དང༌། ཧ་ཅང་རྩེངས་པ་མ་ཡིན་པ་དང༌། ཧ་ཅང་འཇོལ་བ་དང༌། གླང་པོ་ཆེའི་སྣ་ལྟ་བུ་དང༌། རྟ་ཡའི་ལོ་མ་ལྟ་བུ་དང༌། འབྲུའི་ཕུར་མ་ལྟ་བུ་དང༌། སྦྲུལ་མགོའི་གདེངས་ཀ་ལྟ་བུར་མ་ཡིན་པར་ཅིག་ཅར་བསླབ་པར་བྱའོ། །དེ་ལ་ཆོས་གོས་ལ་ཡང་རྣམ་པ་གསུམ་སྟེ། ཆོས་གོས་ཟླུམ་པོར་བགོ་བ་དང༌། ཧ་ཅང་རྩེངས་པ་དང༌། འཇོལ་བ་མ་ཡིན་པར་བགོ་བའོ། །ཤིན་ཏུ་བསྡམས་པ་ལ་སོགས་པ་ནི་ལྔ་སྟེ། ཁྱིམ་དུ་འགྲོ་བའི་བསླབ་པའོ། །ཤིན་ཏུ་བསྡམས་པ་དང༌། ལེགས་པར་བགོས་པ་དང༌། སྒྲ་བསྐྱུང་བ་དང༌། མིག་མི་གཡེངས་པ་དང༌། གཉའ་ཤིང་གང་ཙམ་དུ་བལྟ་ཞིང་འགྲོ་བའོ། །མགོ་གཡོགས་པ་ལ་སོགས་པ་ནི་ལྔ་སྟེ། ཁྱིམ་དུ་འགྲོ་བའི་བསླབ་པའོ། །མགོ་མི་གཡོགས་པ་དང༌། མི་བརྫེ་བ་དང༌། མི་གཟར་བ་དང༌། གཉའ་གོང་དུ་མི་བསྣོལ་བ་དང༌། ལྷག་པར་མི་བསྣོལ་བའོ། །མི་མཆོད་བ་ལ་སོགས་པ་ལྔ་ཡང༌། ཁྱིམ་དུ་འགྲོ་བའི་བསླབ་པ་སྟེ། མི་མཆོང་བ་དང༌། མི་བརྐྱང་བ་དང༌། ཙོག་པུས་མ་ཡིན་པ་དང༌། བྲང་བས་མ་ཡིན་པ་དང༌། དཀུར་མི་བརྟེན་པའོ། །ལུས་ལ་སོགས་པ་ལྔ་ཡང༌། ཁྱིམ་དུ་འགྲོ་བའི་བསླབ་པ་སྟེ། ལུས་མི་བསྒྱུར་བ་དང༌། ལག་པ་མི་ཀྱོག་པ་དང༌། མགོ་མི་བསྒྱུར་བ་དང། ཕྲག་པ་མི་སྤྲད་པ་དང༌། ལག་པ་མི་སྦྲེལ་བའོ། །འདུག་པར་བྱ་བ་སྟན་ནི་དགུ་སྟེ། ཁྱིམ་དུ་འདུག་པའི་བསླབ་པའོ། །སྟན་ལམ་བསྐོ་བ་དང༌། མ་བརྟགས་པ་དང༌། ལྗིད་ཀྱིས་མི་དབབ་པ་དང༌། རྐང་པ་མི་བསྣོལ་བ་དང༌། བརླ་མི་བསྣོལ་བ་དང༌། ལོང་དུ་མི་བརྩེགས་པ་དང༌། རྐང་པ་མི་དགུག་པ་དང༌། རྐང་པ་མི་གདངས་པ་དང༌། མདོམས་མི་བསྟན་པའོ། །བྱིན་ལེན་བྱ་བ་ནི་བརྒྱད་དེ། ཟས་བླང་བའི་དུས་ཀྱི་བསླབ་པའོ། །ལེགས་པར་ཟས་བླང་བ་དང༌། མུ་དང་མཉམ་པར་མ་ཡིན་པ་དང༌། ཚོད་མ་དང་མཉམ་པར་མ་ཡིན་བ་དང༌། མཐར་ཚིགས་དང༌། ལྷུང་
བཟེད་ལ་བལྟ་བ་དང༌། མ་འོངས་པར་ལྷུང་བཟེད་མི་བཟེད་པ་དང༌། འདོད་པའི་ཕྱིར་ཕན་ཚུན་མི་དགབ་པ་དང༌། བཟའ་བ་དང་བཅའ་བའི་སྟེང་དུ་ལྷུང་བཟེད་མི་གཟུང་བར་རོ། །ཟས་ལ་ལེགས་པར་བྱ་བ་དྲུག་ནི། ཟས་ཟ་བའི་དུས་ཀྱི་བསླབ་པ་སྟེ། ལེགས་པར་ཟས་བཟའ་བ་དང༌། ཁམ་ཧ་ཅང་མི་ཆེ་བ་དང༌། ཆུང་བ་མ་ཡིན་པ་དང༌། རན་པ་དང༌། མ་གཟས་པར་ཁ་མི་གདངས་པ་དང༌། ཁ་ཁམ་གྱིས་བཀང་སྟེ་མི་སྨྲ་བའོ། །ཙུག་ཙུག་ལ་སོགས་པ་ལྔ་ཡང༌། ཟས་ཟ་བའི་དུས་ཀྱི་བསླབ་པ་སྟེ། ཙུག་ཙུག་དང༌། ལྕག་ལྕག་དང༌། ཧུ་ཧུ་དང༌། ཕུ་ཕུ་མི་བྱ་བ་དང༌། ལྕེ་ཕྱུང་སྟེ་ཟས་མི་ཟ་བའོ། །འབྲུ་ནས་ཐ་དད་བྱེད་པ་ལྔ་ཡང༌། ཟས་ཟ་བའི་དུས་ཀྱི་བསླབ་པ་སྟེ། འབྲུ་ནས་ཐ་དད་དུ་མ་ཡིན་པ་དང༌། འཕྱས་མི་གདགས་པ་དང༌། མཁུར་བ་མི་སྤོ་བ་དང༌། རྐན་མི་གཏོགས་པ་དང༌། ཁམ་འཕྲོར་མི་གཅད་པར་ཟས་བཟའ་བའོ། །ལག་པ་ལྡག་པ་ལ་སོགས་པ་ལྔ་ཡང༌། ཟས་ཟ་བའི་དུས་ཀྱི་བསླབ་པ་སྟེ་ལག་པ་མི་སྤྲུགས་པ་དང༌། ལྷུང་བཟེད་མི་བྱོག་པ་དང༌། ལག་པ་མི་ལྡག་པ་དང༌། ལྷུང་བཟེད་མི་བསྐྱམ་པ་དང༌། མཆོད་རྟེན་འདྲ་བ་བཅོམ་སྟེ་མི་བཟའ་བའོ། །འཕྱས་ལ་སོགས་པ་རྣམ་པ་བཞི་ནི། གཞན་གྱི་སེམས་བསྲུང་བ་ལ་སོགས་པའི་བསླབ་པ་སྟེ། འཕྱས་ཀྱི་བསམ་པས་མི་བལྟ་བ་དང༌། ལག་པ་ཟས་དང་འབགས་པས་ཆུ་སྣོད་ལ་མི་གཟུང་བ་དང༌། ཟས་དང་འབགས་པས་དྲུང་ན་མོ་ལ་མི་གཏོར་བ་དང༌། མ་དྲིས་པར་ཆུ་ཟས་དང་འབགས་པ་ཁྱིམ་གཞན་དུ་མི་དབོ་བར་བསླབ་པར་བྱའོ། །ལྷུང་བཟེད་ལ་ཡང་རྣམ་པ་བཅུ་སྟེ། ལྷུང་བཟེད་ཀྱི་བསླབ་པ་སྟེ་ཟས་ཀྱི་ལྷག་མ་ལྷུང་བཟེད་ཀྱིས་མི་དོར་བ་དང༌། གཞི་མེད་པར་ལྷུང་བཟེད་མི་གཞག་པ་དང༌། གད་ཁར་མ་ཡིན་པ་དང༌། གཡང་སར་མ་ཡིན་པ་དང༌། དཀན་གཟར་པོར་ལྷུང་བཟེད་མི་གཞག་པ་དང༌། འགྲེང་སྟེ་མི་བཀྲུ་བ་དང། གད་ཁ་དང༌། གཡང་ས་དང༌། དཀན་གཟར་བོ་མ་ཡིན་པར་ལྷུང་བཟེད་གཞག་པར་བྱ། རྒྱུན་ལས་བཟློག་སྟེ་མི་བཅུ་བར་བསླབ་པར་བྱའོ། །འགྲེང་བར་བྱེད་པ་ལ་སོགས་པ་ལྔ་ནི། ཆོས་བཤད་པའི་དུས་ཀྱི་བསླབ་པ་སྟེ། མི་ན་བར་འདུག་པ་དང༌། ཉལ་བ་དང༌། སྟན་
མཐོན་པོ་ལ་འདུག་པ་དང༌། མདུན་དུ་འགྲོ་བ་དང༌། ལམ་ནས་འགྲོ་བ་ལ་འགྲེང་བ་དང༌། འདུག་པ་དང༌། དམའ་བ་ལ་འདུག་པ་དང༌། ཕྱི་ནས་འགྲོ་བ་དང༌། འགྲམ་ནས་འགྲོ་བ་ལ་ཆོས་མི་བཤད་པའོ། །མགོ་གཡོགས་པ་རྣམ་པ་ལྔ་ཡང༌། ཆོས་བཤད་པའི་དུས་ཀྱི་བསླབ་པ་སྟེ། མི་ན་བར་མགོ་གཡོགས་པ་དང༌། བརྫེས་པ་དང༌། གཟར་བ་དང༌། གཉར་བསྣོལ་བ་དང༌། ལྟག་པར་བསྣོལ་བ་ལ་ཆོས་མི་བཤད་དོ། །དོ་ཀེར་ཅན་ལ་སོགས་པ་ལྔ་ཡང༌། དུས་དེའི་བསླབ་པ་སྟེ། མི་ན་བར་སྐྲ་དོ་ཀེ་ར་ཅན་དང༌། ཞྭ་གྱོན་པ་དང༌། མགོ་ཅོད་པན་ཅན་དང༌། ཕྲེང་བ་ཅན་དང། དཀྲིས་པ་ལ་ཆོས་མི་བཤད་དོ། །གླང་ཆེན་ལ་སོགས་པ་བཞོན་བ་ལྔ་ཡང༌། དུས་དེའི་བསླབ་པ་སྟེ། གླང་པོ་ཆེ་དང༌། རྟ་དང༌། ཁྱོགས་དང་བཞོན་པའི་སྟེང་ན་འདུག་པ་དང༌། མཆིལ་ལྷམ་གྱོན་པ་རྣམས་ལ་ཆོས་མི་བཤད་དོ། །ལག་ན་འཁར་བ་ལ་སོགས་དྲུག་འདི་ཡང་དེའི་དུས་ཀྱི་བསླབ་པ་སྟེ། མི་ན་བར་ལག་ན་འཁར་བ་དང༌། གདུགས་དང༌། མཚོན་ཆ་དང༌། རལ་གྲི་དང༌། དགྲ་ཆ་ཐོགས་པ་དང༌། གོ་ཆ་གྱོན་པ་ལ་ཆོས་མི་བཤད་དོ། །ན་བ་རྣམ་པ་བཞི་རྣམས་ཏེ། མི་ན་བའི་དུས་ཀྱི་བསླབ་པར་བྱའོ། །མི་ན་བར་འགྲེང་བས་དུས་ཀྱིས་བཤང་གཅི་མི་བྱ། ཆུའི་ནང་དུ་བཤང་གཅི་དང༌། མཆིལ་མ་དང༌། སྣབས་དང༌། སྐྱུགས་པ་དང༌། རླུགས་པ་མི་དོར་རོ། །རྩྭ་སྔོན་པོ་ལ་དེ་དག་མི་དོར་རོ། །གནོད་པ་མ་བྱུང་བར་ཤིང་ལ་མི་གང་ལས་འཐོར་མི་འཛེག་པར་བསླབ་པར་བྱའོ། །དེ་ལྟ་བུའི་བསླབ་པའི་གནས་ཉིས་བརྒྱ་ལྔ་བཅུ་རྩ་གསུམ་ལྷག་པ་འདི་དག་བསྲུངས་ཤིང་མ་འདས་ན་དེའི་འབྲས་བུ་ནི་གང༌། ཕན་ཡོན་ནི་ཅི་ཡོད། གང་གིས་མ་བསྲུངས་ཤིང་འདས་པ་དེ་དག་གི་རྣམ་པར་སྨིན་པ་ནི་གང་ཡིན་ཉེས་དམིགས་ནི་ཅི་ཡོད་ཅེ་ན། དེ་ལ་གང་བསྲུངས་པ་དེ་ནི་ཚངས་པ་མཚུངས་པར་སྤྱོད་པ་མཁས་པ་རྣམས་ཀྱིས་རབ་ཏུ་བསྔགས་པར་འགྱུར། འཆི་བའི་དུས་བྱེད་པའི་ཚེ་འགྱོད་པ་མེད་པར་འགྱུར་རོ། །དེ་ལ་ཕས་ཕམ་པར་འགྱུར་བ་བསྲུངས་ན། ལུས་ཞིག་པའི་འོག་ཏུ་གཞན་འཕྲུལ་དབང་བྱེད་ཀྱི་ལྷ་རྣམས་དང་སྐལ་བ་མཉམ་པར་སྐྱེ་བར་འགྱུར་རོ། །དགེ་འདུན་ལྷག་མ་བསྲུངས་ན་ལུས་
ཞིག་པའི་འོག་ཏུ་འཕྲུལ་དགའི་ལྷ་རྣམས་དང་སྐལ་བ་མཉམ་པར་སྐྱེ་བར་འགྱུར་རོ། །དེ་ལ་ལྟུང་བ་སྦོམ་པོ་བསྲུངས་ན་ལུས་ཞིག་པའི་འོག་ཏུ་དགའ་ལྡན་གྱི་ལྷ་རྣམས་དང་སྐལ་བ་མཉམ་པར་སྐྱེ་བར་འགྱུར་རོ། །ལྟུང་བྱེད་བསྲུངས་ན་འཐབ་བྲལ་དུ་སྐྱེའོ། །སོ་སོར་བཤགས་པ་བསྲུངས་པས་ནི་སུམ་ཅུ་རྩ་གསུམ་པའོ། །བསླབ་པའི་ཆོས་བསྲུངས་པས་ནི་རྒྱལ་ཆེན་བཞིའི་རིགས་ཀྱི་ལྷར་སྐྱེའོ། །གལ་ཏེ་ཡང་དག་པར་བསྟེན་ན་ནི་མྱ་ངན་ལས་འདས་སོ། །དེ་ལ་དེ་དག་མ་བསྲུངས་པས་ནི། ཚངས་པ་མཚུངས་པར་སྤྱོད་པ་རྣམས་ཀྱིས་སྨད་པར་འགྱུར། འགྱོད་པ་དང་བཅས་པས་འཆི་བའི་དུས་བྱེད་པར་འགྱུར་རོ། །ཕས་ཕམ་པར་འགྱུར་བ་ལས་འདས་པས་ནི། ཚ་བའི་དམྱལ་བ་ཆེན་པོར་སྐྱེ་བར་འགྱུར་རོ། །ལྷག་མའི་ཆོས་ལ་ས་འདས་པས་ནི་ངུ་འབོད་ཆེན་པོར་རོ། །ལྟུང་བ་སྦོམ་པོ་ལས་འདས་པས་ནི་ངུ་འབོད་དུའོ། །ལྟུང་བྱེད་ལས་འདས་པས་ནི་བསྡུས་འཇོམས་སུའོ། །སོ་སོར་བཤགས་པ་ལས་འདས་པས་ནི་ཐིག་ནག་ཏུའོ། །བསླབ་པའི་ཆོས་ལས་འདས་པས་ནི་ཡང་སོས་སུ་སྐྱེའོ། །མ་ངེས་པ་ནི་གཉིས་ཏེ། དབེན་པ་སྐྱབས་ཡོད་འདུག་པའོ། །རྩོད་པ་ཞི་བར་བྱེད་པའི་ཆོས་དུ་ཡོད་ཅེ་ན། རྩོང་བ་ཞི་བར་བྱེད་པའི་ཆོས་ནི་བདུན་ཏེ། མངོན་སུམ་དྲན་པ་མ་མྱོས་དང༌། །དེ་བཞིན་གང་མང་ངོ་བོ་ཉིད། །རྩྭ་རྣམས་བཀྲམ་པ་ལྟ་བུ་དང༌། །ཁས་བླང་བར་ཡང་བྱ་བའོ། །ཡིད་བརྟན་པར་བྱ་བ་དུ་ཡོད་ཅེ་ན། ལྔ་སྟེ། ལྔ་གང་དག་ཅེ་ན། ཆུ་ཚགས་ཡིད་བརྟན་པ་དང༌། བཀོད་མ་ཡིད་བརྟན་པ་དང༌། ཡིད་ཆེས་པས་ཡིད་བརྟན་པ་དང༌། དགེ་སློང་ཡིད་བརྟན་པ་དང༌། དགེ་འདུན་ཡིད་བརྟན་པའོ། །ཡོངས་སུ་ལོངས་སྤྱོད་པ་དུ་ཡོད་ཅེ་ན། བཞི་སྟེ། བཞི་པོ་གང་དག་ཅེ་ན། བདག་པོ་ཡོངས་སུ་ལོངས་སྤྱོད་པ་དང༌། བྱིན་པ་ལེན་པ་ཡོངས་སུ་ལོངས་སྐྱེད་པ་དང༌། རྗེས་སུ་གནང་བ་ཡོངས་སུ་ལོངས་སྤྱོད་པ་དང༌། སྦྱིན་པོ་ཡོངས་སུ་ལོངས་སྤྱོད་པ་དང༌། མི་སྤྱོད་པའི་ཡོངས་སུ་ལོངས་སྤྱོད་པའི་ལྔ་པའོ། །ཡང་སྨྲས་པ། མི་སློབ་པ་ནི་བདག་པོར་བཤད། །སློབ་པ་ལེན་པ་སྤྱོད་པ་ཡིན། །བསམ་གཏན་ཀློག་དང་ལྡན་པ་ནི། །གཟི་བརྗིད་ལྡན་པས་རྗེས་གནང་
བརྗོད། །སྐྱོན་པོ་སྤྱོད་པ་ལྷག་མ་སྟེ། །ལེ་ལོས་ཉམས་པའི་བདག་ཉིད་ཡིན། །གཙུག་ལག་ཁང་སོགས་ལོངས་སྤྱོད་ལ། །ཚུལ་འཆལ་རྣམས་ཀྱིས་སྤྱོད་པ་བཀག །གསོ་སྦྱོང་དུ་ཡོད། ཉི་ཤུ་རྩ་བཞི་སྟེ། དགུན་ཟླ་འབྲིང་བོ་དང༌། དཔྱིད་ཟླ་ར་བ་དང༌། ཐ་ཆུངས་དང༌། དབྱར་ཟླ་འབྲིང་པོ་དང༌། སྟོན་ཟླ་ར་བ་དང༌། ཐ་ཆུངས་རྣམས་ཀྱི་མར་ངོའི་གསོ་སྦྱོང་ནི་བཅུ་བཞི་པའོ། །ལྷག་མ་རྣམས་ནི་བཅོ་ལྔ་པའོ། །དགེ་སློང་དང་པོའི་ལོ་དྲི་བ་རྫོགས་སོ།། །།དཔལ་ར་སའི་གཙུག་ལག་ཁང་གི་འོད་མཆོག་དངོས་གྲུབ་གཙུག་ལག་ཁང་དུ། རྒྱ་གར་གྱི་མཁན་པོ་དཱི་པཾ་ཀ་ར་ཤྲཱི་ཛྙཱ་ན་དང༌། ལོ་ཙཱ་བ་དགེ་སློང་ཚུལ་ཁྲིམས་རྒྱལ་བས་བསྒྱུར་ཅིང་ཞུས་ཏེ་གཏན་ལ་ཕབ་པ། །།